རྗེ་བཙུན་བླ་མ་ཀརྨ་རཱ་ག་ཨ་སྱས་དགུང་ལོ་ཉེར་བཞི་ནས་བཟུང་སྟེ་ཉམས་ཀྱི་མགུར་ངག་ཏུ་སྨྲས་ཞིང་ཚིགས་སུ་བཅད་པ་གླུར་བླངས་བའི་སྐོར་འགའ་ཞིག
རྗེ་བཙུན་བླ་མ་ཀརྨ་རཱ་ག་ཨ་སྱས་དགུང་ལོ་ཉེར་བཞི་ནས་བཟུང་སྟེ་ཉམས་ཀྱི་མགུར་ངག་ཏུ་སྨྲས་ཞིང་ཚིགས་སུ་བཅད་པ་གླུར་བླངས་བའི་སྐོར་འགའ་ཞིག་བཞུགས་པའི་དབུ་ཕྱོགས་ལགས་སོ། །
ན་མོ་མ་ཧཱ་མུ་དྲ་ཡེ། སེམས་ཉིད་འདི་བླ་མ་རྡོ་རྗེ་འཆང་། །གསོལ་བ་ནི་སྙིང་གི་དཀྱིལ་ནས་འདེབས། །བྱིན་རླབས་ནི་རྒྱུན་ཆད་མེད་པར་སྩོལ། །སེམས་ཀྱིས་སེམས་ལ་བལྟས་ཙ་ན། །བལྟ་བྱ་ལྟ་བྱེད་བྲལ་བ་ཞིག །ལྟ་འདོད་ཀྱི་མཚན་མ་ཞིག་པ་ཅིག །སྨྲ་བརྗོད་ཀྱི་ཡུལ་ལས་འདས་པ་ཅིག །ཡིད་ཡུལ་དུ་མྱོང་རྒྱུ་ཡོད་པ་ཅིག །དེ་ཡིད་ལ་འདི་བྱ་མེད་པ་ཅིག །འཁོར་འདས་ཀུན་ཁོ་ཡི་ཡོ་ལང་ལ། །ཁ་དོག་དང་དབྱིབས་ལས་འདས་པ་ཅིག །ཅེས་རང་ལོ་ཉེར་བཞི་པར་དུས་རེ་ཞིག་བྱུང་རྒྱལ་དུ་སྨྲས་སོ།། ༈ །།ཕ་འཇམ་དབྱངས་བླ་མས་བདག་
སྐྱོངས་ཤིག །སྤྲང་སྔོན་ཚེ་བསོད་ནམས་མ་བསགས་པས། །དུས་ངན་སྙིགས་མ་འདི་རུ་སྐྱེས། །ཡུལ་ངན་གྱི་མཐའ་འཁོབ་འདི་རུ་སྐྱེས། །ནོར་མེད་ཀྱི་སྤྲང་ཕྲུག་འདི་རུ་སྐྱེས། །ད་སྐྱེས་པས་འགྱོད་ཀྱང་བྱ་ཐབས་མེད། །ད་འདི་འདྲ་ཞིག་ཏུ་སྐྱེས་ན་ཡང་། །ཕ་ཁྱེད་ཀྱི་ཐུགས་རྗེའི་འོད་ཟེར་གྱིས། །བསྟན་པའི་རྩ་བ་འདུལ་བ་ལ། །བསྙེན་རྫོགས་ཀྱི་དངོས་པོ་འགྲུབ་གྱུར་ཀྱང་། །ཉེས་བྱས་དང་ལྟུང་བའི་ཁ་བ་ནི། །གྱང་རིམ་དགུ་ཙམ་གྱི་འོག་ཏུ་ཚུད། །ཕ་ཐུགས་རྗེས་གཟིགས་ཤིག་བླ་མ་རྗེ། །རྒྱལ་བའི་སྐུ་ཚབ་ཡོངས་གྲགས་པས། །མཚན་བརྗོད་
དཀའ་ཤཱཀྱ་མུ་ནེའི་དྲུང་། །བྱང་སེམས་ཀྱི་བསླབ་པ་ལེགས་མནོས་ཀྱང་། །ད་ནག་པོའི་ཆོས་བཞི་ཆར་དྲག་བབས། །ཕ་ཐུགས་རྗེས་གཟིགས་ཤིག་བླ་མ་རྗེ། །རྡོ་རྗེ་འཆང་དངོས་བླ་མ་རྗེའི། །དབང་བཞིའི་ཆུ་རྒྱུན་བྱིན་ན་ཡང་། །རྩ་བ་དང་ཡན་ལག་གི་དམ་ཚིག་ཀུན། །གོ་བའི་སྐྱ་རིས་འང་མི་འདུག་ན། །ཕ་ཐུགས་རྗེས་གཟིགས་ཤིག་བླ་མ་རྗེ། །རྒྱུ་དང་འབྲས་བུ་ཆོས་ཚུལ་ཀུན། །ཚིག་དོན་སྤྱི་དང་མི་གོ་ན། །དོན་ཉམས་སུ་ལེན་པ་ག་ལ་ཞིག །ད་སྤུ་མེད་ཀྱི་ཕག་པ་བདག་ལྟ་བུ། །ཕ་ཐུགས་རྗེས་གཟིགས་ཤིག་བླ་མ་རྗེ། །རྗེ་གྲུབ་ཐོབ་ཀུན་གཤེགས་པའི་ལམ་པོ་ཆེ། །བཀའ་ཕྱག་རྒྱ་ཆེན་པོ་ཐོབ་ན་ཡང་། །ཞི་གནས་ཀྱི་སྤྲིན་ཚོགས་མི་འདུ་ན། །ལྷག་མཐོང་གི་ཆར་རྒྱུན་ག་ལ་ཞིག །ཁ་སྒྲུབ་ཀྱི་གང་ཟག་བདག་ལྟ་བུ། །ཕ་ཐུགས་རྗེས་གཟིགས་ཤིག་བླ་མ་རྗེ། །ད་ཟབ་དང་རྒྱ་ཆེའི་ཆོས་ཚུལ་ཀུན། །མྱུར་བ་ཉིད་དུ་རྟོགས་པ་རུ། །རྗེ་བླ་མ་ཁྱེད་ཀྱིས་བྱིན་གྱིས་རློབས། །ཞེས་རང་ལོ་ཉེར་བཞི་པ་ལ་རང་ལ་རང་ཡི་མུག་ནས་སྨྲས་པའོ།། ༈ །།རྗེ་བླ་མ་རྣམས་ལ་ཕྱག་འཚལ་ལོ། །བཀའ་གོང་མ་རྣམས་ཀྱི་ཐུགས་རྗེས་ཟུངས། །
ལར་མི་རྟག་འཆི་བའི་ཆོས་ཅན་ལ། །ཆོས་ཕྱི་དལ་དུ་བཞག་པའི་སྙིང་ཕོད་ཅན། །མི་བདག་ལ་བླ་མས་ཐུགས་རྗེས་ཟུངས། །རྗེ་རྒྱལ་ནས་འཇག་མའི་སྲིན་བུའི་བར། །སྔར་མ་ཤི་བ་ཐོས་སམ་ཐེ་ཚོམ་ཟ། །ད་མི་འཆི་མཁན་མི་འབྱུང་ཐག་གིས་ཆོད། །དེ་ཤེས་བཞིན་དུ་ད་རུང་སྡོད་ཆས་མཁན། །མི་བསམ་བརླགས་བདག་ལ་ཐུགས་རྗེའི་ཟུངས། །རྗེ་སངས་རྒྱས་ཀུན་དངོས་ཀྱི་བླ་མ་རྗེ། །དེ་མངོན་སུམ་དུ་ཞལ་མཐོང་གསུང་ཐོས་དང་། །སྣོད་ཁ་སྦུབ་སྟེང་དུ་ཆུ་བླུགས་ལྟར། །མི་དྲེད་པོ་བདག་ལ་ཐུགས་རྗེས་ཟུངས། །སེམས་མཐའ་བྲལ་གཉུག་མ་ཆོས་ཀྱི་སྐུ། །མངོན་སུམ་དུ་བླ་མས་ངོ་སྤྲད་ཀྱང་། །དེ་གཡེང་བའི་དབང་གིས་ཐ་མལ་དུ་ལུས། །མི་ལས་ངན་བདག་ལ་ཐུགས་རྗེའི་ཟུངས། །ནང་དུག་ལྔ་ཉོན་མོངས་ཀྱི་རྐྱལ་པ་བདག །ཕྱི་ཆོས་གོས་ཀྱིས་གཏུམ་ཚེ་ཕོ་ཚུགས་བཟང་། །མིས་གུས་ཚུལ་བསྟན་དུས་ལྟ་བ་མཐོ། །རྐྱེན་ཐོག་བབ་ཏུ་བྱུང་ན་ཐ་མལ་པ། །མི་ཟོབ་པོ་བདག་ལ་ཐུགས་རྗེས་ཟུངས། །ཞེས་རང་ལོ་ཉེར་བཞི་པར་སྦྱིན་བདག་གཅིག་གི་སར་མགོན་པོ་ཕྱག་བཞི་པའི་བསྐང་མདོས་ཉི་ཤུ་སོགས་གཅིག་བྱས་པས། དེར་བསྔོས་ནས་མཛོ་རྒན་
འདི་བཤས་ནས་དེའི་ཤ་ལོངས་སྤྱོད་དགོས་བྱུང་བའི་ཚེ་ལང་དཀར་གཤེགས་པ་སོགས་ནས་གསུངས་པའི་ཉེས་པ་དྲན་ནས་ཡི་མུག་སྟེ་སྨྲས་ཤིང་། དེ་ཕྱིན་ཆད་ཤ་མི་ཟ་བའི་དམ་བཅའ་དྲག་པོ་བྱས་སོ།། ༈ སྐྱབས་ཟླ་བྲལ་གྱི་རྒྱལ་བ་ཡབ་སྲས་མཁྱེན། །ཆོས་ཕྱག་ཆེན་ཟེར་བའི་གཡེར་པོ་ཆེ། །ནམ་མཁའ་ལྟ་བུར་ཀུན་ལ་ཁྱབ། །ཉི་ཟླ་ལྟ་བུར་ཡོངས་ལ་གྲགས། །ཁོང་སྙན་བརྒྱུད་པ་ཀུན་ལྐོག་ལབ་བྱེད། །ཁོང་རྙིང་མ་བ་ཀུན་དབྱངས་སུ་གྱེར། །ཁོང་མཚན་ཉིད་པ་ཀུན་ཚིག་ཟུར་རྩོད། །ཁོང་སྒོམ་ཆེན་པ་ཀུན་གཅིག་ལབ་བྱེད། །ཁོང་བན་དེ་རྣམས་ཀྱིས་ཇ་དཔག་བྱེད། །ཁོང་སྐྱེ་བོ་རྣམས་ཀྱིས་ཆང་དཔག་བྱེད། །ཁོང་རས་པ་རྣམས་ཀྱིས་གླུ་རུ་ལེན། །ཁོང་མཆོད་གནས་རྣམས་ཀྱིས་འབོད་ནས་ཀློག །གསུང་དེ་ཀུན་མཛུབ་རྩེའི་བརྡའ་སྟོན་འདྲ། །ཁོ་རྟོགས་ལྡན་ཕལ་ཆེར་སྒོམ་མེད་རྟོགས། །མི་ཤི་ཚད་ཕལ་ཆེར་འོད་གསལ་ཟིན། །ཁོང་ཀུན་གྱིས་ཆོས་སྐད་འདོན་པ་དེ། །སྤྲང་རྒན་བདག་གིས་ཉན་ཙམ་ན། །རྣམ་རྟོག་འདི་ཆོས་སྐུ་ཡིན་ནོ་གསུངས། །ཁ་ཅིག་སེམས་ཉིད་ཧྲིག་ཧྲིག་པོ། །འདི་གཅིག་པུ་བསྐྱངས་བས་ཆོག་གོ་གསུངས། །ཁ་ཅིག་ས་ལེ་ཧྲིག་གེ་བ། །ཡེ་རེ་བ་
གཅིག་ཡོད་དོ་གསུངས། །ཁ་ཅིག་འགྱུ་བ་ཤར་བ་ན། །ངོས་ཟིན་པ་ཅིག་པུས་ཆོག་གོ་གསུངས། །ཁ་ཅིག་དགེ་དང་མི་དགེ་བའི། །རྟོག་པས་མཐོ་རིས་ངན་སོང་སྟེ། །རང་ངོར་བལྟ་བ་གཅིག་པུ་ཡིས། །སངས་རྒྱས་ཐོབ་པ་ཡིན་ནོ་གསུངས། །ཁ་ཅིག་སེམས་ངོ་ལྟ་བ་ལས། །ལུས་ངག་གི་དགེ་སྦྱོར་མི་དགོས་གསུངས། །ཁ་ཅིག་ལུས་ངག་གི་དགེ་སྦྱོར་འདི། །ཐེག་དམན་པ་ཡི་ལུགས་ཡིན་པས། །ཐེག་ཆེན་ལ་ཉལ་བས་ཆོག་གོ་གསུངས། །ཁ་ཅིག་འདུལ་བའི་བསླབ་བྱ་སོགས། །བྱིས་པ་འབྲིད་པའི་ཆོས་ཡིན་པས། །སྒོམ་ཆེན་ལ་དེ་རྣམས་མི་དགོས་གསུངས། །བདག་དམ་ཆོས་ཀྱི་བསྐལ་པ་ཆོས་མིན་པས། །གསུང་དེ་ཚོ་ལ་དད་འདུན་སྐྱེ་མ་ཐུབ། །རྣམ་རྟོག་འདི་ཆོས་སྐུ་ཡིན་ན་ནི། །ཆོས་སྐུའི་འཁོར་བར་འཕེན་ནམ་ཅི། །སེམས་ཉིད་ལ་ཧྲིག་ཧྲིག་ཅིག་ཡོད་ན་ནི། །རྫོགས་སངས་རྒྱས་ཀྱིས་ཅིས་མ་གཟིགས། །ས་ལེ་ཧྲིག་གེ་ཡེ་རེ་བ། །ཡོད་ཊྛ་ན་དབྱིབས་དང་ཁ་དོག་ཡིན། །རྣམ་རྟོག་ངོས་བཟུང་ཟེར་བ་ཡང་། །ངེས་བཟུང་བཟུང་ལུགས་མ་ཤེས་ན། །རྣམ་རྟོག་འཁོར་ལོ་འཁོར་དོགས་ཡོད། །རང་ངོ་ལྟ་བ་གཅིག་པུ་
ཡི། །སངས་རྒྱས་ཐོབ་པ་ཡིན་ན་ནི། །བསོད་ནམས་ཚོགས་ཀྱིས་ཅི་ཞིག་བྱ། །ལུས་ངག་དགེ་སྦྱོར་མ་བྱས་པའི། །ལུས་ངག་སྒྲིབ་པ་ཅི་ལྟར་བྱང་། །ཐེག་ཆེན་ལ་ཉལ་བས་ཆོག་ཟེར་བ། །ཐེག་ཆེན་ལ་ཚོགས་གཉིས་མི་དགོས་ཤིང་། །སྐུ་གཉིས་ཀྱི་འབྲས་བུ་མི་འབྱུང་ཞེས། །སྐུར་པ་འདེབས་པ་ཁོ་ནར་ཟད། །འདུལ་བ་བྱིས་པའི་ཆོས་ཡིན་ན། །སངས་རྒྱས་རང་སངས་རྒྱས་པ་དང་། །ཉན་ཐོས་བཅས་པ་བྱིས་པར་འགྱུར། །ཨ་མཚར་པོ་སྡོང་དུམ་འདྲ་བའི་ཚིག །ད་འོད་གསལ་ཕྱག་རྒྱ་ཆེན་པོ་དེ། །བླ་མའི་དྲིན་གྱིས་རྟོགས་རྟོགས་འདྲ། །བསྒོམ་སྲན་ཅན་ལ་ཡོད་ཡོད་འདྲ། །དད་པ་ཅན་ལ་སྐྱེ་སྐྱེ་འདྲ། །ཡོད་མེད་སྤྱོད་པས་སྟོན་སྟོན་འདྲ། །བྱ་བ་བཏང་ན་འཕེལ་འཕེལ་འདྲ། །ཞེས་པ་འདི་རང་ལོ་ཉེ་ལྔ་དུས་བཙུན་པ་དང་སྒོམ་ཆེན་དང་མཆོད་གནས་སོགས་མང་པོའི་ཆོས་གཏམ་མཐོ་དམན་སྣ་ཚོགས་བྱེད་པ་མཐོང་ནས་བྲིས་པའོ།། ༈ །།རྗེ་འཇམ་དབྱངས་བླ་མས་བདག་སྐྱོངས་ཤིག །བདག་ཆོས་མེད་ཀྱི་སེར་གཟུགས་ཐུགས་རྗེས་ཟུངས། །བདག་བསམ་ལུས་འཕྲོད་ནས་ཆོས་གཅིག་བསམ། །དེ་བསམ་ཡང་འཁྲུལ་པའི་དབང་དུ་ཤོར། །ད་དམ་ཆོས་ཚུལ་
བཞིན་མ་བྱུང་ཀུན། །སྡིག་ཏོའི་བྱ་བ་བྱེད་རེ་ཤི །བྱང་སེམས་འདི་ཚུལ་བཞིན་མ་འབྱོང་ཡང་། །གཞན་ཡིད་འདི་ནམ་ཡང་དཀྲུག་རེ་ཤི །སོ་ཐར་གྱི་སྡོམ་པ་བསྲུང་དཀའ་ཡང་། །སྤྱོད་པ་ལ་འབྱོལ་ཉོག་སྤྱོད་རེ་ཤི །ལྟ་བ་འདི་ཤིན་ཏུ་རྟོགས་དཀའ་ཡང་། །དངོས་པོས་མཚན་མར་ལྟ་རེ་ཤི །སྟོང་ལྟ་ལ་ངེས་པ་བཅས་བཅས་ནས། །རྒྱུ་འབྲས་ལ་ཁྱད་གསོད་བྱེད་རེ་ཤི །དངོས་པོའི་མཚན་མས་བཅིངས་བཅིངས་ནས། །སྡུག་བཙིར་གྱི་ཨ་འཐས་བྱེད་རེ་ཤི །གཞན་ཕན་ཀྱི་ནུས་པ་མི་ལྡན་ཡང་། །མགོ་བསྐོར་གྱི་བསླུ་ཆོས་བྱེད་རེ་ཤི །རང་རྒྱུད་འདི་ཤིན་ཏུ་འདུལ་དཀའ་ཡང་། །ང་རྒྱལ་གྱི་རྭ་རྣོན་ཕྱར་རེ་ཤི །མདོ་རྒྱུད་ཀྱི་དགོངས་དོན་རྟོགས་དཀའ་ཡང་། །བླུན་བསྒོམ་གྱི་ཨ་འཐས་བྱེད་རེ་ཤི །ངེས་དོན་གྱི་དགོངས་པ་རྟོགས་དཀའ་ཡང་། །ནེ་ཚོའི་བཟླས་བརྗོད་བྱེད་རེ་ཤི །བཟང་འདོད་ཀྱི་ཆོས་བརྒྱད་མ་བྲལ་ཡང་། །བཟང་བརྫུའི་ཟོམ་ཟོམ་བྱེད་རེ་ཤི །མཁས་འདོད་ཀྱི་སྲེད་པ་མ་བྲལ་ཡང་། །མཁས་བརྫུའི་ཡབ་ཡོབ་ལབ་རེ་ཤི །བཙུན་འདོད་ཀྱི་ཚུལ་འཆོས་མ་བྲལ་ཡང་། །བཙུན་བརྫུའི་ངོས་ལྐོག་བྱེད་རེ་ཤི །དད་
གུས་ལ་འདེམས་ཀྱང་བྱུང་གྱུར་ཀྱང་། །བླ་མ་འདི་ཐ་མལ་དུ་ལྟ་རེ་ཤི །དམ་ཆོས་ལ་ངེས་ཤེས་མ་རྙེད་ཀྱང་། །གདམས་ངག་ལ་ཐེ་ཚོམ་ཟ་རེ་ཤི །སེམས་ཅན་ལ་ཉེ་རིང་ཤོར་ན་ཡང་། །བློས་བཏང་གིས་བསམ་པ་བྱ་རེ་ཤི །མཆེད་གྲོགས་ལ་དག་སྣང་མ་འབྱོང་ཡང་། །འགྲན་སེམས་ཀྱི་ཕྲག་དོག་བྱེད་རེ་ཤི །བྱང་ཆུབ་འདི་བསྒྲུབ་པར་དཀའ་ན་ཡང་། །ཐེག་དམན་གྱི་ལམ་དུ་འཇུག་རེ་ཤི །འདག་ཆར་དང་རྡེལ་འཆའ་མ་བྱུང་ཡང་། །ཆོས་མིན་ལ་བློ་རྩེ་གཏད་རེ་ཤི །འཁོར་བ་འདི་ཤིན་ཏུ་སྡུག་བསྔལ་ཡང་། །བྱང་སྡོམ་ལ་མོས་པ་འདོར་རེ་ཤི། །དྭགས་བརྒྱུད་ཀྱི་ཆོས་སྒོར་ཞུགས་ལགས་པས། །འབྲས་བུ་ལ་རེ་དོགས་བྱེད་རེ་ཤི །ཞེས་པ་འདི་སྤྲང་པོ་སྙོམ་ལས་པ་ཨ་རཱ་གས་བྱས་སོ། །འདི་རང་ལོ་ཉེར་ལྔ་ཙམ་དུས་སྨྲས་པར་སྣང་ངོ་། །ཉམས་བཟང་དུས་གཅིག་ཡིན་པ་འདྲ།། །།ན་མོ་གུ་རུ། འཁོར་བའི་འཇིགས་པ་སྐྱོབ་མཛད་པ། །ཆོས་ཀྱི་དབང་ཕྱུག་ཞབས་ལ་འདུད། །འཁོར་བའི་ཆོས་ལ་སྙིང་པོ་མེད། །འདུས་བྱས་རྣམས་ལ་རྟག་པ་མེད། །དེ་མངོན་སུམ་མཐོང་བ་གོ་ལགས་སམ། །ཚེ་འདི་ཡི་བདེ་སྐྱིད་བསམ་བསམ་ནས། །བླ་
མ་དང་མཁན་པོ་སློབ་དཔོན་བཀུམ། །གཙུག་ལག་དང་ཆོས་འཁོར་དབེན་གནས་བཤིགས། །ཉེས་མེད་ཀྱི་གྲོང་དང་གྲོང་བརྡལ་སྲེགས། །གྲངས་བསྒྲང་བར་དཀའ་བའི་སྲོག་ཆགས་བསད། །ལས་དེས་ཀྱང་ཚེ་འདི་མ་འདུན་ནས། །བན་དམན་པ་རྣམས་ཀྱིས་ཐལ་བ་གཏོར། །མི་བསམ་ཡོད་ཀུན་གྱིས་སྙིང་རྗེ་ལྟ། །ལུས་ལྕགས་སུ་བཅུག་ན་ཁྱི་ལྟར་སྐོར། །ཚེ་འདི་ཡི་དོན་དུ་སྡིག་པ་བསྒྲུབས་པ་ཀུན། །ད་སྙིང་པོ་འདུག་གམ་འདི་ལ་ལྟོས། །ཚེ་འདི་ཡི་ལོངས་སྤྱོད་བསམ་བསམ་ནས། །མི་དབུལ་པོ་ཀུན་ལ་ཁྲལ་དུ་བསྡུས། །ཕྱུག་པོ་ཀུན་གྱི་ནོར་ལ་ཕྲོགས། །མིས་ཚོགས་གསོག་བྱེད་པའི་འདུ་སྒོ་བཀག །བླ་མ་དང་དགེ་འདུན་དཀོར་ལ་བཅོམ། །ཐག་རིང་གི་མགྲོན་པོའི་ཚོང་སྐྱེད་བཅག །ད་དེས་ཀྱང་ལོངས་སྤྱོད་མ་འགྲུབ་པར། །མིས་ལག་སྦྱིན་བསྒུགས་པ་མཐོང་ཙམ་ན། །ཚེ་འདི་དོན་དུ་རྐུ་འཕྲོག་བྱེད་པ་ཀུན། །ད་སྙིང་པོ་འདུག་གམ་འདི་ལ་ལྟོས། །ལོངས་སྤྱོད་རྣམ་ཐོས་ཀྱི་བུ་དང་འདྲ། །སྟོབས་མངའ་ཐང་ལྷ་དབང་བརྒྱ་བྱིན་འདྲ། །དབང་བཙན་ཕྱུག་དབང་ཕྱུག་ཆེན་པོ་འདྲ། །མཐའ་རྒྱལ་ཕྲན་ཀུན་གྱིས་ཕྱག་
གདངས་བསྒྲིགས། །འཛམ་གླིང་གི་ནོར་ཕུད་མདུན་དུ་སྤུངས། །ཚིག་སྙན་སྙན་མང་པོས་ཞུ་སྣ་འདྲེན། །ལུས་གཞན་དུ་མ་བསྒྱུར་དེ་ཉིད་ལ། །སྟོབས་གཟི་བརྗིད་ཅན་གྱི་ཟིལ་གྱིས་མནན། །གྱད་དཔལ་རྩལ་ཅན་གྱི་མཚོན་ཆས་སྡིག །བཙོན་ཐར་དུ་མེད་པ་མཐོང་ཙམ་ན། །ཚེ་འདི་ཡི་མངའ་ཐང་བསྒྲུབ་པ་ཀུན། །ད་སྙིང་པོ་འདུག་གམ་འདི་ལ་ལྟོས། །ད་འཁོར་བ་ལ་སྙིང་པོ་མེད་པ་འདི། །ཆོས་བཤད་པ་ལ་ཡིད་ཆེས་མ་སྐྱེས་ཀྱང་། །ད་དངོས་སུ་བསྟན་པ་གོ་ལགས་སམ། །དེ་གོ་ན་སྐྱོ་བ་མི་སྐྱེའམ། །དེ་སྐྱེས་ན་དམ་ཆོས་མི་མཛད་དམ། །འཁོར་བའི་གནས་དང་ནད་པའི་མལ། །ཅི་ལྟར་བཅོས་ཀྱང་བདེ་བ་མེད། །གསུངས་པའི་དཔེ་དོན་གོ་ལགས་སམ། །གོ་ན་ཚེ་འདིའི་འདུན་མ་སྐྱུངས། །མི་རྟག་འཆི་བ་ཡང་ཡང་སོམས། །སྡོམ་པ་དམ་ཚིག་གཙང་མར་བསྲུང་། །སྙིང་རྗེ་ཕན་སེམས་རྒྱུན་དུ་སྦྱོངས། །བསྐྱེད་རིམ་བཟླས་པ་ཐུན་དུ་ཆོད། །རྒྱུན་དུ་ཡེངས་མེད་དྲན་པ་བརྟེན། །འཚུབ་ན་ཅུང་ཟད་ཀློད་ལ་ཞོག །འོན་ཀྱང་དྲན་པའི་རྒྱང་སོ་ཚུགས། །བྱིང་ནས་རིག་པའི་རང་བྱུང་ལ། །ཕྱལ་ལེ་སེང་ངེ་ཡེ་རེ་ཞོག །བཤང་ལྕི་
གཏོར་མ་ཆུ་སྦྱིན་ལ། །བཟའ་བཏུང་ཚོགས་དང་སྦྱིན་སྲེག་དང་། །འགྲོ་འདུག་ཕྱག་དང་བསྐོར་བར་བསྒོམ། །གཉིད་ཚེ་འོད་གསལ་རྨི་ལམ་གཉིས། །ཉམས་སུ་གང་ལོན་ཉམས་དང་སྦྱོར། །དོན་དེ་དང་ལྡན་ན་སྙིང་པོ་ཡོད། །སྤྲང་སྙིང་པོའི་ཆོས་ཞིག་བྱེད་ན་བསམ། །ཞེས་པ་འདི་སྟོབས་ཀྱི་འཁོར་ལོས་སྒྱུར་བ་ལྟ་བུའི་ས་སྐྱོང་བ་ཆེན་པོ། གཅིག་ལ་ཁེང་ལོགས་བྱུང་ནས་བཙོན་དུ་བཅུག་པ་ངེས་པར་འཁོར་བའི་ཆོས་འདི་ལ་སྙིང་པོ་མེད་ངེས་པར་སྣང་བསམ་པ་ཡང་ཡང་དུ་ཡིད་ལ་འཕྲེང་ནས་བྲིས་པའོ།། ༈ །།རྗེ་ཆོས་ཀྱི་དབང་ཕྱུག་རིན་པོ་ཆེ། །སྤྲང་འཆི་བ་དྲན་པར་བྱིན་གྱིས་རློབས། །སྤྱིར་སྐྱེ་རྒ་ན་འཆི་ཆུ་བོ་བཞི། །འདི་སུས་ཀྱང་བཟློག་ཏུ་མི་གདའ་ན། །དགོས་འཆི་བདག་གཤིན་རྗེ་ཁས་བཙན་པོ། །ཚིག་གསུམ་གྱི་ཞུ་ས་མི་གདའ་ན། །གོམ་གསུམ་གྱི་འབྲོས་ས་མི་གདའ་ན། །དབྱིག་དར་ཟབ་ཀྱི་བསླུ་ས་མི་གདའ་ན། །དུས་ནམ་འོང་གི་ཚེས་གྲངས་མི་གདའ་ན། །མི་ཆེ་ཆུང་དང་རྒན་ཝཱ་གཞོན་མི་གདའ་ན། །མཐོ་དམན་དང་གྲགས་ཞན་མི་གདའ་ན། །དཔའ་སྡར་དང་ཕྱུག་དབུལ་མི་གདའ་ན། །སྨན་གསོ་དཔྱད་ཀྱི་ཕན་པ་མི་གདའ་ན། །སྲུང་རིམ་གྲོའི་ངོ་སོ་
མི་གདའ་ན། །དགྲ་འཆི་བདག་གི་གཤིན་རྗེ་དབང་ཆེན་པོ། །ཁོང་ནམ་འོང་ལ་ཚོད་བཟུང་མི་གདའ་ན། །རང་འཆི་གྲབ་ཀྱི་འདུན་མ་ཚོར་ལགས་སམ། །མི་བཙན་པོ་ཀུན་འཆི་བ་མཐོང་ཙམ་ན། །སྟོབས་མངའ་ཐང་གིས་ཕན་པ་མི་གདའ་ན། །མི་ཕྱུག་པོ་ཀུན་འཆི་བ་མཐོང་ཙམ་ན། །ནོར་ལོངས་སྤྱོད་ཀྱི་ཕན་པ་མི་གདའ་ན། །མི་དཔའ་བོ་ཀུན་འཆི་བ་མཐོང་ཙམ་ན། །ལུས་དཔལ་རྩལ་གྱི་ཕན་པ་མི་གདའ་ན། །ད་བསམས་ཤིང་དམ་ཆོས་མ་གཏོགས་པ། །ཐབས་གང་གིས་འང་འཕན་པ་མི་གདའ་ན། །ད་བཙུན་པའི་གཟུགས་བརྙན་ལེ་ལོ་མཁན། །དོན་འདི་ལ་སོམས་ཤིང་བརྩོན་འགྲུས་མཛོད། །ཅེས་དཔལ་རྩལ་སྟོབས་མངའ་ཐང་ཕུན་སུམ་ཚོགས་པའི་ས་སྐྱོང་བ་ཆེན་པོ་ཞིག་གློ་བུར་དུ་བསྙུངས་ནས་ཞབས་ལ་ཟུགས་ཆེན་པོ་བྱུང་དུས་སུ་སུས་ཀྱང་མ་ཐུབ་པའི་དགྲ་སྡེ་རྣམས་ཀྱང་ཕམ་པ་བྱས་པ་ཡིན་ཏེ་ང་ལས་སྟོབས་ཆེ་བ་གཅིག་འདི་ན་སླེབས་བྱུང་གསུངས་ནས་རྐང་པའི་གཟེར་སར་རེག་པ་དང་། ངས་འདི་ལྟར་ལ་མ་བསམ་སྟེ་རང་ཅག་ལ་ཆོས་ཀྱི་སྐལ་པ་མི་འདུག་ཨང་། ཞེས་པ་སོགས་རྟག་འཛིན་ལ་སྐྱོ་བའི་ཚིག་འགའ་རེ་གསུངས་ནས་འདས་པ་ཐོས་ནས་འཆི་བ་དྲན་པའི་ངེས་འབྱུང་དྲག་པོ་ཡང་ཡང་བྱུང་ནས་སྨྲས་པ་སྟེ། རཱ་ག་ཨ་སྱས་དཔལ་རི་རྩེར་བྲིས་པའོ།།
ན་མོ་གུ་རུ་བཛྲ་སཏཱ་ཡ། །མཚུངས་མེད་རྒྱལ་བ་ཀུན་གྱི་དངོས། །དུས་གསུམ་མཁྱེན་པ་ཀརྨ་པ། །རོལ་པའི་རྡོ་རྗེ་དེ་བཞིན་གཤེགས། །མི་བསྐྱོད་རྒྱལ་བ་དབང་ཕྱུག་མཚན། །ཐུབ་ཆེན་རྒྱལ་བ་རིགས་མཆོག་ལྔ། །ཕུང་པོ་གསུམ་པའི་མདོ་ལས་ནི། །ཇི་སྐད་གསུངས་པའི་སངས་རྒྱས་དང་། །རྡོ་རྗེ་སེམས་དཔའ་ལ་སོགས་པའི། །བཟླསྒྱུ་འཕྲུལ་ཞི་ཁྲོའི་ལྷ་ཚོགས་རྣམས། །ཐམས་ཅད་བདག་ལ་བརྩེ་བས་དགོངས། །ཞིང་རྡུལ་ལུས་ཀྱིས་གུས་ཕྱག་འཚལ། །བདག་གི་ལུས་དང་ལོངས་སྤྱོད་ཀུན། །རབ་འབྱམས་མཆོད་པར་དམིགས་ཏེ་འབུལ། །བདག་གིས་ཁས་བླངས་དམ་བཅས་པའི། །རྩ་བ་ཡན་ལག་དམ་ཚིག་ཀུན། །ཉམས་ཆག་འགལ་འཁྲུལ་མཐོལ་ཞིང་བཤགས། །ཕྱིན་ཆད་སྡོམ་པར་དམ་བཅའོ། །རྒྱལ་དང་རྒྱལ་བའི་སྲས་རྣམས་ཀྱིས། །ཅི་བསགས་དགེ་ལ་ཡི་རང་ངོ་། །འཇིག་རྟེན་ཀུན་ལ་སྨན་སླད་དུ། །ཟབ་རྒྱས་འཁོར་ལོ་བསྐོར་བར་ལ་བསྐུལ། །འཁོར་བའི་སེམས་ཅན་མ་རྫོགས་པར། །མྱ་ངན་མི་འདའ་བཞུགས་སུ་གསོལ། །དགེ་བ་འདི་ཡིས་བདག་གཞན་ཀུན། །འོད་དཔག་མེད་མགོན་མཉེས་བྱེད་
ཤོག །ཅེས་པ་འདི་སྔ་སོར་རང་ལོ་ཉེར་གཉིས་པ་ལ་མཚུར་ཕུར་ལྷ་ཆེན་འཛམ་གླིང་རྒྱན་གྱི་ལོ་རྒྱུས་སྐུ་རྒྱུའི་ཟངས། །པཀྴི་ལ་རྒྱ་ནག་རྒྱལ་པོའི་ཕུལ་བ་སོགས་ས་འོག་ནས་ཀླུ་ལ་བསྐུར་བ་རག་མ་ནས་བུད་པ། སྐུ་ཚད་ཕོ་འདོམ་བརྒྱད་ཅུ་བ་དེ་སྤྲུལ་པའི་བཟོ་བོས་བླུག་པས་སྐུ་སྒུར་པོ་གཅིག་བྱུང་བས། རྗེ་པཀིའི་རླུང་བཟུང་སྟེ་ཡེ་རེ་རེ་བསྲང་བ་དང་། རབ་གནས་དུས་སུ་བྱམས་པ་དངོས་སུ་བྱོན་ནས་མེ་ཏོག་གཏོར་བས་བྱམས་པའི་དབུའི་གཙུག་ཏོར་དང་། ཡ་ཀིའི་རི་དེའི་རྩེ་མཉམ་པར་སྣང་བས་དབུ་རིའམ་གཙུག་ཏོར་རིར་གྲགས་པ་སོགས་ལོ་རྒྱུས་དེ་དག་གིས་དད་པ་དྲག་པོ་ཞིག་སྐྱེས་ནས། ལྷ་ཆེན་དྲུང་དུ་ལུས་ཀྱི་ཤིག་མི་གསོད་པ་དང་གོས་ནང་ནས་ཕྱི་མར་བཞག་པ་ཙམ་ལས་འཆི་བའི་སར་མི་དོར་བ་དང་། མི་བསྐྱོད་ཞབས་ཀྱི་རོལ་པའི་རྡོ་རྗེ་དེ་བཞིན་གཤེགས་པ་སོགས་ཀྱིས་དངུལ་གདུང་རྙིང་མའི་དྲུང་དུ། ངག་གིས་ཕ་རོལ་དེ་ལ་ཕན་པར་འདུག་པའམ་བསྟན་པ་ལ་ཕན་པ་མ་གཏོགས་ཆོས་པ་གཞན་གྱི་སྐྱོན་མི་བརྗོད་པ་དང་། རྗེ་དབང་ཕྱུག་རྡོ་རྗེའི་གསེར་གདུང་དང་། དུས་མཁྱེན་གྱི་སྐུ་ཆོས་དྲུག་ལོ་གསུམ་གསུངས་པས་ཆོས་དྲུག་མར་གྲགས་པ་དང་སྐུ་གདུང་པཀཱིའི་སྐུ་གདུང་སོགས་ཀྱི་དྲུང་དུ་ཇི་ལྟར་གཡེང་བ་ཆེ་ཡང་ཡིད་ཀྱི་སྒོ་ནས་ཞག་རེ་ལ་བླ་མ་སྤྱི་བོར་བསྒོམ་པ་རེ་དང་ཕྱག་ཆེན་ཐུན་རེ་མི་ཆག་པ་སྟེ་དམ་བཅའ་དེ་བཞིན་བྱས་ནས་གལ་ཏེ་ཉམས་ན་ཚེ་འདིར་ནད་སྡུག་བསྔལ་ཐོངས་ཤིག །མ་ཉམས་ནའམ་ཉམས་ཀྱང་རུང་སྟེ་བྱང་ཆུབ་ཐོབ་པའི་རྒྱུར་གྱུར་ཅིག །ཅེས་དམ་བཅའ་དྲག་པོ་བྱས་པ་ལས་མ་བརྗེད་པར་ཡོད་ཀྱང་བར་
སྐབས་འགའ་རེར་ཉམས་པ་འགའ་རེ་བྱུང་ཡོད་པར་སྣང་བས་འགྱོད་ནས་སྔར་གྱིས་དེ་བཤགས་ཤིང་ཕྱིན་ཆད་སྡོམ་པར་བྱས་ནས་བྲིས་པ་ནི་རང་ལོ་སོ་བཞི་པར་དཔལ་རི་ཁྲོད་དུའོ།། མོ་གུ་རུ་བྷེ། བློ་ལིང་སྐྱུར་གྱིས་གསོལ་བ་འདེབས་ནུས་ན། །རྐྱེན་བར་ཆད་དངོས་སུ་སེལ་བ་དེ། །རྗེ་ཆོས་ཀྱི་དབང་ཕྱུག་མ་ལགས་སམ། །ད་གསོལ་བ་གཅིག་འདེབས་ན་དང་རེ་སྤྲོ། །རང་ཤེས་རབ་དང་བརྩོན་འགྲུས་འཛོམ་པ་ན། །མཁས་གྲུབ་ཀྱི་སྐུ་པར་ཡོད་པ་དེ། །དཔལ་ཉིན་གླིང་གི་འདུས་སྡེ་མ་ལགས་སམ། །བུ་བློ་གསལ་འདྲ་ཡོད་ན་དང་རེ་སྤྲོ། །རང་མཆོད་རྫས་ཀྱི་དངོས་པོ་མི་དམན་ན། །ལྷར་བཅས་ཀྱི་འགྲོ་བའི་མཆོད་པའི་རྟེན། །དཔལ་ཤཱཀྱ་མུ་ནེ་མ་ལགས་སམ། །བུ་དད་པ་ཅན་ཡོད་ན་དང་རེ་སྤྲོ། །རང་གསོལ་འདེབས་ཀྱི་འབྲུག་སྒྲ་མ་ཞན་ན། །བྱིན་རླབས་ཀྱི་ཆར་རྒྱུན་འབྱུང་བ་དེ། །དཔལ་ནཱ་རོའི་དོན་བརྒྱུད་མ་ལགས་སམ། །བུ་མོས་གུས་ཅན་ཡོད་ན་དང་རེ་སྤྲོ། །ལར་ངོ་མཚར་གྱི་བརྒྱུད་པ་གྲངས་མང་ཡང་། །གྲུབ་ཐོབ་ཀྱི་སྐར་ཚོགས་རྒྱས་པ་དེ། །དཔལ་དྭགས་པོའི་བཀའ་བརྒྱུད་མ་ལགས་སམ། །བུ་བརྩོན་འགྲུས་ཅན་ཡོད་ན་དང་རེ་སྤྲོ། །
སྤྱིར་ཟབ་པའི་གདམས་ངག་མཐའ་ཡས་ཀྱང་། །དོན་གཅིག་ཤེས་ཀུན་ལ་མཁས་པ་དེ། །བཀའ་ཕྱག་རྒྱ་ཆེན་པོ་མ་ལགས་སམ། །བུ་བསྒོམ་སྲན་ཅན་ཡོད་ན་དང་རེ་སྤྲོ། །ཡོད་དང་སྒོ་དྲུག་གི་དབྱངས་ཆུང་འདི། །གནས་མཆོག་དཔལ་གྱི་རི་རྩེ་ན། །མཚམས་དམ་པོ་འདག་ཆལ་བྱེད་པའི་དུས། །ཉམས་ལ་ཤར་ནས་བླངས་པ་ཡིན། །ཞེས་པ་འདི་རང་ལོ་བཅུ་དགུ་པ་ལ་དབུས་སུ་སོང་དུས་ལྕགས་ལ་ཨ་རྒན་དེ་རྒྱབ་ཁ་ནས་ཚ་བ་འདྲ་བའི་རིམས་ཐུ་མོ་གཅིག་ན་ནས་མགོ་དང་ཚིགས་བཞི་ན་བ་དང་ཁོལ་བ་དང་སྦྲིད་པ་བྱུང་ཡང་ན་བ་གསང་ནས་སོང་ཙ། ལ་རྒྱབ་ནས་དེ་ཉིན་ར་ཤ་རུལ་བ་གཅིག་བྱིན་བྱུང་བ་ཡང་ཟོས་པས་ཤིན་ཏུ་ཐུ་ནས་ལུས་པོ་འཁོར་ཞིང་འགྲོ་བ་ཆང་གི་བཟི་བ་ཙམ་བྱུང་ཡང་། རྟ་དྲེལ་འདི་རྣམས་ཡབ་སྲས་ལ་འབུལ་རྒྱུ་ཡིན་པས་འདི་འཚོ་བའི་ཕྱིར་དུ་ཤི་བ་ལེགས། ཁ་ཞེ་མེད་པར་བསམས་ནས་ན་བ་གསང་ནས་རྟ་དྲེལ་འཚོར་སོང་ནས་ཀྱང་དེ་ནུབ་རབ་ཏུ་ཐུ་ནས་བྱུང་སྟེ་དེ་ནུབ་འཆི་བ་འདྲ་བསམ་སྟེ་ཡབ་སྲས་དང་ཇོ་བོའི་ཕྱོགས་སུ་མགོ་བསྟན་ཏེ། འཆི་བ་གཅིག་བྱེད་ད་རེས་ཤི་བས་ཆོས་ཕྱིར་ཤི་བས་ལེགས་བསམ་པ་སྙིང་ནས་བསམ་སྟེ། མགོ་ནུབ་ཏུ་བསྟན་ཏེ་ཉལ་བས་སྒར་པའི་སྟབས་ཀྱིས་མགོ་ཐུར་དུ་དོང་དོ་བས། འབུལ་དཔོན་གྱི་མགོ་མཐོ་སར་བཏོན་ནས་ཉལ་མི་ཤེས་པ་འདི་འདྲ་བ་ཟེར་ནས་བརྩོན་ཀྱང་མགོ་བ་ལྟར་བྱས་པས། ཕྱིར་ནངས་ཕལ་ཆེར་བདེ་ནས་སྣང་ཞིང་མྱུར་དུ་ཕན་
ནོ། །ད་ལོ་རང་གི་གྲྭ་འཁོར་རྣམས་ཚད་རིམས་ན་བས་རང་གི་བསྲུང་བ་སྣ་ཚོགས་དང་སྨན་པས་སྨན་སྡུད་ཁ་སྣ་ཚོགས་དང་གཉིད་བསྲུང་བ་དང་། ཟས་སྤྱོད་གཟབ་པ་ཅི་བྱས་ཀྱང་སྲོག་འདོར་ལ་ཁད་འོང་དོ་བས། དེ་དུས་ང་ལ་སྨན་ཐུམ་གཅིག་ནི་མེད་ཡུད་ཙམ་ངལ་བསོ་བ་ནི་མེད། ནད་ལ་འབྱོར་བའི་ཐུག་པ་ཕོར་གང་ནི་མེད། ཟས་ལྷད་ནི་ཟོས་ཀྱང་ཉེས་མེད་དུ་བདེ་བ་དེ་བླ་མ་དཀོན་མཆོག་ལ་བློ་ལིང་སྐྱུར་བྱས་པའི་དོན་ཡིན་པར་སྣང་བློ་ལིང་སྐྱུར་དེ་ལྟ་བུའི་ངང་ནས་གསོལ་བ་བཏབ་ན་བར་ཆད་སེལ་བ་དང་། དངོས་གྲུབ་སྩོལ་བ་ལ་ཐེ་ཚོམ་མེད་པར་སྣང་སྙམ་ནས། སྤྲོ་ཁ་ཅུང་ཟད་སྐྱེས་ནས་རང་ལོ་སོ་བཞི་པར། ༧ ཀརྨ་ཨ་རཱ་གས་སོ།། ༈ །།རྗེ་ཆོས་ཀྱི་དབང་ཕྱུག་ཞབས་ལ་འདུད། །སྤྲང་དག་སྣང་འབྱོངས་བར་བྱིན་གྱིས་རློབས། །རྗེ་རྫོགས་པའི་སངས་རྒྱས་རྡོ་རྗེ་འཆང་། །མཚན་དཔེ་བྱད་ལྡན་པར་བཞུགས་ལགས་ཀྱང་། །ས་བཅུའི་བྱང་སེམས་མ་ལགས་པ། །མི་གཞན་གྱི་མཐོང་དུ་མི་གདའ་ན། །སྟེང་དགའ་ལྡན་ཆོས་ཀྱི་ཕོ་བྲང་ན། །དཔལ་མི་ཕམ་སྲས་བཅས་བཞུགས་ལགས་ཀྱང་། །སློབ་དཔོན་ཐོགས་མེད་མ་ལགས་པ། །མི་གཞན་གྱི་མཐོང་དུ་མི་གདའ་ན། །དཔལ་སློབ་དཔོན་པདྨ་འབྱུང་གནས་དེ། །སྤྲེལ་ཟླའི་ཚེས་བཅུར་བྱོན་ལགས་ཀྱང་། །ལས་ཅན་གྱི་
སྐྱེས་བུ་མ་ལགས་པ། །མི་གཞན་གྱི་མཐོང་དུ་མི་གདའ་ན། །གྲུབ་ཆེན་མི་ཏྲ་ཛཱ་ཀི་དེ། །ལོ་རེ་ལེན་རེ་འབྱོན་ལགས་ཀྱང་། །རྗེ་ཞྭ་དམར་ན་རིམ་མ་ལགས་པ། །མི་གཞན་གྱི་མཐོང་དུ་མི་གདའ་ན། །སེམས་ལྷན་ཅིག་སྐྱེས་པ་ཆོས་ཀྱི་སྐུ། །དེ་ཡེ་ནས་རང་ལ་བཞུགས་ཡོད་ཀྱང་། །དོན་གདམས་ངག་ཐེབ་པ་མ་གཏོགས་པ། །མི་གཞན་གྱིས་མཐོང་དུ་མི་གདའ་ན། །འགྲོ་དྲུག་གི་སེམས་ཅན་མ་ལུས་པ། །དྲིན་ཆེན་གྱི་ཕ་མ་ཡིན་ལགས་ཀྱང་། །དེ་བྱང་སེམས་འབྱོངས་བ་མ་ལགས་པ། །མི་གཞན་གྱིས་མཐོང་དུ་མི་གདའ་ན། །ཕྱི་སྣོད་འདི་ཡེ་ནས་གཞལ་ཡས་ཁང་། །ནང་བཅུད་ཀུན་ཡི་དམ་ཡིན་ལགས་ཀྱང་། །དེ་རྣལ་འབྱོར་དབང་ཕྱུག་མ་ལགས་པ། །མི་གཞན་གྱིས་མཐོང་དུ་མི་གདའ་ན། །རྗེ་ཆོས་ཀྱི་དབང་ཕྱུག་གཤེགས་པའི་ཚེ། །ལྟས་ངོ་མཚར་བསམ་གྱིས་མི་ཁྱབ་ཀྱང་། །བུ་དད་ལྡན་སྤྱོད་ལྡན་མ་ལགས་པ། །མི་གཞན་གྱིས་མཐོང་དུ་མི་གདའ་ན། །མི་གདའ་བརྒྱད་ཀྱི་དབྱངས་ཆུང་འདི། །ད་ཉམས་ལ་ཤར་ནས་བླངས་པ་ཡིན། །ཞེས་པ་འདི་རང་ལོ་ཉེར་བཞི་པར་ཁམས་སུ་སླེབས་འགྲོགས་ཤིང་བུ་དཔོན་ཆེན་གོ་བ་འཛིན་པ་གཅིག་དང་མཇལ་ནས། སློབ་
དཔོན་རིན་པོ་ཆེ་ཞིང་བརྗེས་ཚུལ་ཤོད་གསུངས་པས། ལོ་རྒྱུས་རྒྱས་པར་ཞུས་ཤིང་ལྷག་པར་གདུང་མཆོད་ཟླ་བ་བཅུ་གཉིས་པའི་ནང་དུ་ཡིན་པས་ཉི་མའི་མཐོང་ཐིག་ཡིན་ཀྱང་། འཚོགས་པ་ཁྲི་ཚོ་བདུན་ལ་ཉིན་རེ་ལའང་མང་ཇ་བདུན་འབྲས་ཐུག་སོགས་ཐུག་པ་དང་རྩམ་པ་ཟས་སྣ་མང་པོ་མང་འགྱེད་སོགས་འབྱེད་ཅིང་། འཚོགས་སར་བསྐོར་བ་གསུམ་རེ་དང་འཚོགས་ཆེན་གྲོལ་ནས་གྲྭ་ཚང་རང་རེའི་མང་ཇ་རེ་གཏོང་ལོང་ཡོད་པར་བྱུང་ནས་ཉི་མ་གསུམ་འགྱུར་གཉིས་འགྱུར་དུ་རིང་བ་དང་། དུས་ཚོད་དབུ་འདྲིལ་སྒང་ཡིན་ཅིང་མཚུར་ཕུ་བས་ལྷགས་པ་ཆེ་མེད་ཀྱང་། བདག་ལྟ་བུའི་གཟན་རྐྱང་ངམགཟན་སྤུ་ཆད་རེ་ཟུང་ལས་མེད་པ་རྣམས་ལའང་འཁྱགས་པའི་སྣང་བ་མེད་པ་དང་། རྒྱལ་བའི་དབང་པོའི་དགོངས་རྫོགས་འབུལ་བ་རྣམས་ཕྱག་གིས་གནང་བ་དང་། ན་བཟའ་དུམ་བུ་དགེ་འདུན་པ་རྣམས་ལ་ཕྱག་གིས་གནང་བ་དང་། སྤོས་ཀོར་ལན་མང་དུ་མཛད་པ་དང་། བཀའ་ཆོས་གནང་བ་དང་། སྐུ་རྒྱབ་ཏུ་ཚོགས་ཆུ་དངུལ་བེམ་ཤིན་ཏུ་བརྗིད་པ་རེ་བསྣམས་ནས་འཚོགས་ཆུ་ཉིན་རེ་ལའང་ལན་བཅུ་གཉིས་རེ་ཙམ་ལེན་པ་མཛད། དེ་དུས་ཉིན་ཐམས་ཅད་ནམ་མཁའ་འཇའ་སྤྲིན་དཀར་པོའི་ཤས་ཆེ་བ་ལ་མཐའ་མར་ཁ་དོག་སྣ་ལྔའི་རི་མོ་ཅན་ལ། དཔག་བསམ་གྱི་ཤིང་ལོ་དང་བྱ་ཚེ་རིང་། འབྲུག་རྒྱུག་ཀོར་གྱི་གཟུགས་འདྲ་བ་མང་པོ་ནུབ་ཕྱོགས་ནས་འབྱུང་ཞིང་མགྱོགས་པར་ཤར་ཕྱོགས་སུ་འགྲོ་བ་བྱུང་ཞིང་། དེའི་གསེབ་ནས་ལན་གཉིས་ཀྱི་བར་དུ་མེ་ཏོག་གི་གཟུགས་ཤིན་ཏུ་མཛེས་པ་འདབ་མ་བཅུ་དྲུག་ཙམ་པ་
བཟོས་ཀྱང་མི་ཐོན་པ། རྒྱུ་དཀར་པོ་ལ་ལེགས་པར་བལྟས་ན་མཐའ་མ་སྔོན་དམར་དུ་ཡོད་པ་སྐྱ་ཡམ་པ། ཞུ་ན་ནི་ཁ་བ་དང་འདྲ་བ་ཆུར་འགྱུར་བ་སྐུ་རུ་ཡོད་པ་ཙམ་བྱུང་། དེ་དུས་རྒྱལ་བའི་དབང་པོའི་ནམ་མཁའ་རང་ལ་གཟིགས་ཤིང་། ཕྱིས་ནམ་མཁའ་ལ་སློབ་དཔོན་རིན་པོ་ཆེས་ཞལ་གཟིགས་པའི་བཀོད་པ་ཕྱག་བྲིས་མཛད་འདུག་སྐད། དེ་སོགས་ལོ་རྒྱུས་ཞུས་པ་ལ། ཕྱིས་སྒར་ནས་གྲྭ་པ་འགའ་བྱུང་བ་ལ་དེ་རྣམས་བཤད་རྒྱུ་མི་འདུག་གསུངས་ནས། བདག་གིས་བཤད་པ་དེ་ཀུན་རྫུན་དུ་རེད་འདུག་ཟེར་བ་ཐོས་ནས། ཀྱེ་མ་དེ་ལྟར་སེམས་ཅན་གྱི་མངོན་སུམ་དུ་མཐོང་བ་དེ་བཤད་རྒྱུ་མེད་པ་དད་པ་ཆུང་བ་ཡན་ལྟར་མི་བཤད་པའམ། དག་སྣང་ཆུང་བས་མ་མཐོང་བའམ། རྟོག་དཔྱོད་ཆུང་བས་མ་ཤེས་སམ། ཅི་ཡིན་ན་ཡང་ཡང་སེམས་ནས་རང་ལོ་སོ་བཞི་པར་ཚིགས་བཅད་འདི་སྨྲས་པའོ།། །།ན་མོ་མ་ཧཱ་མུ་དྲ་ཡེ། མི་ལ་ལས་ལྟ་བ་ལྟ་བ་ཟེར། །ད་བལྟས་པས་མཐོང་བ་ངས་མ་རྟོགས། །ཁྱེད་ལྟ་བ་ཟེར་བ་གང་ལ་ཟེར། །མི་ལ་ལས་བསྒོམ་པ་བསྒོམ་པ་ཟེར། །ད་འདི་བསྒོམ་གྱི་མཚན་མ་མ་རྙེད་པས། །ཁྱེད་བསྒོམ་པ་ཟེར་བ་གང་ལ་ཟེར། །མི་ལ་ལས་སྤྱོད་པ་སྤྱོད་པ་ཟེར། །སྤང་བླང་གི་འཛིན་པ་མ་མཐོང་བས། །ཁྱེད་སྤྱོད་པ་བྱ་བ་གང་ལ་ཟེར། །མི་ལ་ལས་འབྲས་བུ་འབྲས་བུ་ཟེར། །ད་ཐོབ་བྱ་ཐོབ་བྱེད་མེད་
ལགས་པས། །ཁྱེད་འབྲས་བུ་བྱ་བ་གང་ལ་ཟེར། །ད་ལྟ་བ་དང་བསྒོམ་སྤྱོད་འབྲས་བུའི་གླུ། །མཚམས་དམ་པོ་འདག་ཆལ་བྱེད་པའི་དུས། །ཉམས་ལ་ཤར་ནས་བླངས་བ་ཡིན། །ཅེས་བྱུང་རྒྱལ་དུ་སྨྲས་པའོ།། ༈ །།ན་མོ་ཨི་ཤྭ་ར་དྷརྨ་ཡ། ཕ་ཆོས་ཀྱི་དབང་ཕྱུག་ཞབས་ལ་འདུད། །སྤྲང་འཆི་བ་དྲན་པར་བྱིན་གྱིས་རློབས། །སྤྱིར་མི་རྟག་གི་སློབ་དཔོན་བསམ་ཡས་ཀྱང་། །དགོས་ད་ལོ་དངོས་སུ་སྟོན་མཁན་མང་། །བན་ཆགས་མེད་ཀྱི་མིང་ཅན་ཆགས་སྲེད་ཅན། །ཁྱོད་སྙིང་རྗེ་རང་གིས་རང་ལ་ལྟོས། །ཕུ་ཤི་མདའ་ཤི་ཟེར་ཙམ་ན། །མི་ཁྱོད་ལ་མི་འཆིའི་གདེང་ཡོད་དམ། །གྲྭ་རྒྱ་དང་ལྡོམ་རྒྱ་གྲོང་ཆོག་རྒྱ། །རྒྱ་མང་པོའི་ས་རྒྱ་བྲིས་ལགས་ཀྱང་། །དགྲ་འཆི་བདག་གི་ཐོག་བརྫིས་འདི་ལ་ལྟོས། །རང་སྤྲོས་པ་བསྐྱངས་ན་མི་ལེགས་སམ། །ལྷ་འབྲི་དང་རྟེན་བཞེངས་སྒོམ་སྒྲུབ་སོགས། །ཆོས་བྱེད་བསམ་གྱི་འདུན་མ་མི་ཆུང་ཡང་། །སྒྱུ་བདུད་གཤིན་རྗེའི་བར་ཆད་བརྩམས་ལ་ལྟོས། །ཆོས་འཕྲལ་འཕྲལ་དུ་བསྒྲུབས་ན་མི་ལེགས་སམ། །སྡུག་སེར་སྣས་དཀོར་རྫ་ས་བསོགས་བསོགས་ནས། །འགྱེད་མང་ཇ་དང་
བརྒྱ་འབུལ་བསམ་ལགས་ཀྱང་། །རྐྱེན་དགྲ་འདྲེའི་གློ་རྒྱག་བྱེད་ལ་ལྟོས། །སེམས་འཛིན་པ་བཏང་ན་མི་ལེགས་སམ། །འདུས་བྱས་ཀྱི་དགེ་བ་རླབས་པོ་ཆེ། །རྣར་སྙན་གྱི་གྲགས་པ་ཆེ་ལགས་ཀྱང་། །དེ་བསྒྲུབ་པར་དཀའ་ལ་བར་ཆད་མང་། །རང་དགེ་སྦྱོར་བྱས་ན་མི་ལེགས་སམ། །ཞེས་བླ་མ་ཆེན་པོ་མཁས་བཙུན་བཟང་གསུམ་འཛོམ་ཞིང་གྲུབ་པ་ཐོབ་པ་ཞིག་ལ་བདག་གིས་ཆོས་འབྲེལ་འདོད་ཆོས་ཤིག་ཞུ་འདོད་ཞུས་པས། ཁྱོད་ལ་རྟ་བཟང་པོ་ཅི་འདྲ་ཡོད་གསུངས་མེད་རབ་ཞུས། རྟེན་ལི་མ་འདྲ་ཨི་ཡོད་གསུངས་ནས་ཕྱག་རྟེན་ལ་རེ་བ་ཆེན་པོ་མཛད་པར་སྣང་། ཁོང་ལ་སྲེད་ཞེན་གར་མངའ་ཡབ་སྲས་ལ་བརྒྱ་འབུལ་དགོངས་ཤིང་། ཕྱིས་གཙུག་ལག་ཁང་ཞིག་གསོ་དང་སྒྲུབ་པ་མཛད་པའི་བསམ་གཏན་ཁོ་པ་སོགས་བཞེངས་པར་བྱོན་པ་གློ་བུར་དུ་ལམ་ཁར་འདས། གཞན་རི་ཁྲོད་པ་སྒྲུབ་ཚུགས་ལྡན་པ་ཞིག་བརྒྱ་འབུལ་ལ་དམིགས་ནས་རང་གི་གསོལ་བ་སྲབ། ཆས་ཀ་ཟད་དོགས་ནས་ཆུ་ཤིང་ཡང་རང་གི་བསྒྲུབ་པ་སོགས་དཀའ་ལས་ཆེན་པོ་ཚེ་གང་ལ་ཟས་ནོར་རླབས་ཆེན་བསགས་ཀྱང་ཐོག་ཏུ་ལ་ལ་སོང་བས་གློ་བུར་དུ་འདས་ཆས་ཀ་རྣམས་ཀྱང་ཅི་འགྱུར་ཆ་མེད་པ་ཞིག་བྱུང་སོང་བས་སྐྱོ་བ་སྐྱེས་ནས་རང་གི་རང་ལ་གྲོས་འདེབས་སུ་སྨྲས་པའོ།། ༈ །།ན་མོ་རཏྣ་གུ་རུ་ཡེ། མོས་གུས་མོས་གུས་ཟེར་བ་དེ། །རྗེ་སངས་རྒྱས་སུ་མཐོང་བ་ཡིན་པར་སྣང་། །
ཚིག་དཀའ་བཀྱོན་ཟུར་ཙམ་མི་ཁྱག་པའི། །འཕྲལ་ལྟོ་ཟན་མང་པོ་ཅི་དགྱེས་མཛོད། །དད་པ་དད་པ་ཟེར་བ་དེ། །རྗེ་ཡོན་ཏན་གྱི་གཏེར་དུ་མཐོང་ན་ཡིན། །འཕྲལ་སྐུ་སྤྱོད་ཅུང་རེས་མི་ནུས་པའི། །འཕྲལ་དཔོན་ཕྱག་དང་ཞུང་ཞུང་ཅི་དགྱེས་མཛོད། །དག་སྣང་དག་སྣང་ཟེར་བ་དེ། །རྒྱལ་བསྟན་འདི་རེག་འཚིངས་སུ་མཐོང་ན་ཡིན། །ཆོས་སུ་བྱེད་མི་ལ་སྐྱོན་རེ་ཚོལ། །འཕྲལ་ཁ་དད་ཀྱི་མཛེས་མཛེས་ཅི་དགྱེས་མཛོད། །ཆོས་འདུལ་བ་འདུལ་བ་ཟེར་བ་དེ། །མི་གཞན་ལ་གནོད་པ་སྤངས་ནས་ཡིན། །དགྲ་ཇག་རྐུན་ཐོས་ན་གློ་གྲིབ་བདར། །འཕྲལ་ཆབ་ལེན་དང་ལྷམ་ཕུད་ཅི་དགྱེས་མཛོད། །བྱང་སེམས་བྱང་སེམས་ཟེར་བདི། །ཅི་བྱེད་གཞན་དོན་དུ་བསྔོས་ན་ཡིན། །ཚོང་བྲེ་ཁ་དམའ་ན་བྲང་ལག་འཐབ། །རྙེད་ཚོལ་གྱི་འགྲོ་དོན་ཅི་དགྱེས་མཛོད། །གསང་སྔགས་གསང་སྔགས་ཟེར་བ་དེ། །བསྐྱེད་རྫོགས་ལ་ནན་ཏན་བྱེད་ན་ཡིན། །འཕྲལ་བསྙེན་སྒྲུབ་ཀྱི་རྟགས་ཙམ་མི་ཐོན་པའི། །ཟ་འདོད་ཀྱི་ཚོགས་འཁོར་ཅི་དགྱེས་མཛོད། །ལྟ་བ་ལྟ་བ་ཟེར་བ་དེ། །བལྟ་བྱ་དང་ལྟ་བྱེད་བྲལ་ན་ཡིན། །རང་སེམས་ཀྱི་གནས་ཚུལ་མ་
གཏོགས་པའི། །ཁ་ལྟའི་སྟོང་སྐད་ཅི་དགྱེས་མཛོད། །བསྒོམ་པ་བསྒོམ་པ་ཟེར་བ་དེ། །བྱིང་རྒོད་ཀྱི་སྐྱོན་དང་བྲལ་ན་ཡིན། །སྟན་ཉལ་མལ་ཟླ་གཅིག་མི་ནོན་པའི། །མིག་ཟིམ་ཟིམ་ཀུན་ཐུགས་ལ་ཅི་དགྱེས་མཛོད། །སྤྱོད་པ་སྤྱོད་པ་ཟེར་བ་དེ། །གནང་བཀག་གི་སོ་མཚམས་ཤེས་ན་ནི། །རྩ་བཞི་སྐྱོན་མེད་མི་བསྲུང་བའི། །གོས་ཟླུམ་ཁྱེར་གྱི་འཇོལ་འཇོལ་ཅི་དགྱེས་མཛོད། །གཅོད་ཡུལ་གཅོད་ཡུལ་ཟེར་བ་དེ། །རྣམ་རྟོག་གི་འཛིན་པ་ཆོད་ན་ཡིན། །འཕྲལ་གཉན་ས་རུ་ཞག་གསུམ་མི་ཁྱག་པའི། །ཟོ་ཁྱེར་གྱིས་ཕཊསྒྲ་ཅི་དགྱེས་མཛོད། །ཅི་དགྱེས་བཅུ་ཡི་དབྱངས་ཆུང་འདི། །མི་གཞན་ལ་སྨྲས་པ་མ་ལགས་ཏེ། །རང་ཉམས་ལ་ཤར་ནས་རང་ལ་སྨྲས། །སྐྱོན་ངོས་ལེན་མཁན་ཀུན་ཅི་དགྱེས་མཛོད། །ཅེས་བྱུང་རྒྱལ་ཉམས་ལ་ཤར་ནས་རི་ཁྲོད་དུ་སྨྲས་པ་ལགས་སོ།། །།ན་མོ་གུ་རུ་དྷརྨེ་ཤྭ་ར་ཡེ། ཕ་ཀུན་མཁྱེན་རྒྱལ་བ་ཆོས་ཀྱི་དབང་། །ཕ་ཁྱེད་ཀྱིས་ཐུགས་རྗེའི་བྱིན་རླབས་ཀྱིས། །སྤྲང་གཟུགས་བརྙན་གྱི་ཆོས་ཀྱིས་མི་བསླུ་བར། །ཆོས་ལམ་དུ་འགྲོ་བར་བྱིན་གྱིས་རློབས། །དབང་མ་ཐོབ་པར་རྫུན་དབང་བསྐུར་དང་
གཅིག །དབང་མ་བསྒྲུབ་པར་མགྱོགས་དབང་བསྐུར་དང་གཉིས། །ལུང་མ་ཐོབ་པར་རྫུན་ལུང་བྱེད་དང་གསུམ། །འདི་གསུམ་ཡང་བྲིས་པའི་ཆུ་དང་འདྲ། །བུ་ཆོས་འདོད་ཀྱི་སྐོམ་པ་མི་སེལ་དོ། །ཞལ་ཐོན་ཉི་ཆོད་ཀྱི་ཁྲིད་དང་གཅིག །གཟའ་འཐབ་རྣ་གཡོལ་གྱིས་ཆོས་ཞུ་གཉིས། །མ་གོ་དང་གོ་བརྫུའི་ཟིམ་ཟིམ་གསུམ། །འདི་གསུམ་ཡང་བྲིས་པའི་མར་མེ་འདྲ། །སེམས་མ་རིག་གི་མུན་པ་མི་སེལ་དོ། །གསུང་ཡི་གེ་མི་ཤེས་ཀྱིས་མདོས་ཟློག་གཅིག །ཀློག་མགྱོགས་ཐལ་གྱི་པོད་ཚད་མཉམ་དང་གཉིས་། །སྒྱུ་མ་ཤོར་རྣམ་གསུམ་གྱི་རིམ་གྲོ་གསུམ། །འདི་གསུམ་ཡང་བྲིས་པའི་དམག་དཔོན་འདྲ། །རྐྱེན་བར་ཆད་ཀྱི་གཡུལ་ངོ་མི་བཟློག་གོ །མཚན་ཉིད་མི་ལྡན་བླ་མ་གཅིག །དད་པ་མེད་པའི་སློབ་མ་གཉིས། །བརྒྱུད་རིམ་མེད་པའི་ཆོས་དང་གསུམ། །འདི་གསུམ་ཡང་བྱིས་པའི་ནོར་བུ་འདྲ། །དོན་དགོས་འདོད་འབྲས་བུ་མི་འབྱུང་ངོ་། །རྒྱུད་ངེས་འབྱུང་མ་སྐྱེས་ཀྱི་སྡོམ་པ་གཅིག །གཞུང་མདོ་རྒྱུད་མ་མཐོང་གི་བྱང་སེམས་གཉིས། །དོན་གནས་གསང་མ་གོའི་དམ་ཚིག་གསུམ། །འདི་གསུམ་ཡང་བྲིས་པའི་སྤོས་
དང་འདྲ། །དོན་ཚུལ་ཁྲིམས་ཀྱི་དྲི་ངད་མི་འབྱུང་ངོ་། །ནོར་འདོད་ཆོས་བཙོང་གི་འགྲོ་དོན་གཅིག །ནོར་ཅི་འབུལ་བསྒོམ་པའི་འཕོ་འདེབས་གཉིས། །གསོན་མི་ཁ་ཆོད་ཀྱི་འབུལ་ནོར་གསུམ། །འདི་གསུམ་ཡང་བྲིས་པའི་སྐྱེལ་མ་འདྲ། །གཤིན་བར་དོའི་འཇིགས་སྐྲག་མི་སྐྱོབ་བོ། །ཆོས་ཁ་བཤད་ལ་མི་ཚེ་བསྐྱལ་དང་གཅིག །ཆོས་མི་ཤེས་ཀྱང་བླུན་བསྒོམ་གྱི་ཨུ་ཚུགས་གཉིས། །ནོར་བསོགས་ནས་དཀའ་ཐུབ་བྱེད་དང་གསུམ། །འདི་གསུམ་ཡང་བྲིས་པའི་སྨྱུ་གུ་འདྲ། །དོན་སྐུ་གསུམ་གྱི་འབྲས་བུ་མི་སྨིན་དོ། །ཚིགས་ལྔ་ཚན་བསྒྲིགས་པའི་དབྱངས་ཆུང་འདི། །མི་གཞན་ལ་ཟུར་ཟ་བྱས་པ་མིན། །རང་ཉམས་ལ་ཤར་ནས་རང་ལ་སྨྲས། །གནས་ཆུ་ཤིང་འཛོམ་པའི་རི་ཁྲོད་ན། །མཚམས་སྒོ་བཅད་བྱེད་པའི་ཁོང་དུ་བྲིས། །ཞེས་བྷུ་སུ་ཀུ་པ་༧ ཀརྨ་ཨ་རཱ་གས་ཐུན་མཚམས་གཅིག་ལ་ཉམས་ལ་ཤར་ནས་སུག་ལས་སུ་བྲིས་པའོ། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།