ན་བ་ལམ་ཁྱེར་གྱི་སྨོན་ལམ་སྨྲེ་སྔགས་གཅིག་ལབ་མ་ཞེས་བྱ་བ་ལ་སོགས་པ་སྨོན་ལམ་གྱི་སྐོར་འགའ་ཟུང་།
ན་བ་ལམ་ཁྱེར་གྱི་སྨོན་ལམ་སྨྲེ་སྔགས་གཅིག་ལབ་མ་ཞེས་བྱ་བ་ལ་སོགས་པ་སྨོན་ལམ་གྱི་སྐོར་འགའ་ཟུང་བཞུགས་པའི་དབུའོ།།
གུ་རུ་ལོ་ཀེ་ཤྭ་ར་ཡེ། འབྱུང་བཞི་འདུས་པའི་སྒྱུ་ལུས་ལ། །ནད་ངན་འབྲུམ་པས་ཁམས་མ་བདེ། །ལུས་ན་དང་ཚ་དང་འདར་དང་བསྔངས། །རྐང་སིལ་བུར་ཁོལ་ཞིང་གྲངས་ཤ་ཟ། །ཡར་ལང་ན་མགོ་བོ་འཁོར་ཤིང་འགྱེལ། །མལ་ཉལ་ན་མལ་གྱི་འོག་ནས་གཡེངས། །དུས་དེ་ཚེ་འོག་འགྱུའི་བསམ་པ་ལ། །ནད་ཟུག་གཟེར་ཆེ་ཡང་འཆི་དོགས་མེད། །གོས་དྲོ་ལ་འཇམ་པ་སྟེང་ནས་བཀབ། །གདན་འབོལ་ལ་འཐུག་པ་འོག་ན་བཏིང་། །ཟས་ཡི་གར་ཅི་འོང་ཟུར་ནས་བསྐོར། །སྨན་པ་དང་བསྲུང་བ་ཐམས་ཅད་འཛོམ། །འོན་ཀྱང་མི་བཟོད་སྡུག་བསྔལ་
ན། །སྡུག་བསྔལ་མང་པོས་གཟིར་བ་ཡི། །སེམས་ཅན་འདི་རྣམས་སྙིང་རེ་རྗེ། །མངོན་མཐོ་ཀུན་བདེ་བར་རློམ་མོད་ཀྱང་། །མི་སྐྱེ་བའི་སྡུག་བསྔལ་བསམ་ཙམ་ན། །མི་གཙང་ཁྲོན་པའི་དོང་ནང་དུ། །མི་ནད་མེད་གཅེར་བུར་བཅུག་བྱས་ནས། །ཁ་རྡོ་བས་འདན་པས་དཔེར་མི་བཟོད། །མུན་ནག་ལ་དྲི་ང་དོག་ཅིག་གཅུམ། །བུ་ག་ཚོ་མཚོན་གྱིས་ཕུག་སྙམ་བྱེད། །ལས་རླུང་གི་མགོ་བོ་ཐུར་དུ་བསྒྱུར། །ཟུར་མའི་བར་ནས་འཐེན་ལྟར་འཐེན། །སྐྱེ་བའི་འཁྲུལ་འཁོར་ཅན་ཚོ་སྙིང་རེ་རྗེ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་
བས་དེ་ཀུན་སྐྱེ་མེད་ཤོག །རྒན་པའི་སྡུག་བསྔལ་བསམ་ན་ཡི་རེ་མུག །ལུས་ཀྱི་སྟོབས་དང་ཁ་དོག་ལང་ཚོ་ཉམས། །དཔེར་ན་མེ་ཏོག་སད་ཀྱིས་ཁྱེར་བ་བཞིན། །སྨྲས་པས་མི་ཉན་བཅོས་པས་ཉན་མཁན་མེད། །དཔེར་ན་རྒྱལ་པོ་དམང་དུ་བབས་པ་འདྲ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་རྒས་མེད་ཤོག །ན་བའི་སྡུག་བསྔལ་བསམ་ན་སྐྱི་རེ་ཚ། །ངར་ངར་སྒྲ་འབྱིན་མལ་གྱི་མཐའ་མར་ཉལ། །བཅུད་ལྡན་ཟས་སྐྱུག་བཅུད་མེད་ཆུ་ལ་འབོད། །ཟད་དོགས་འཆི་དོགས་སྨན་པ་མི་དགའ་དོགས། །སྲུང་བ་ཆེས་ན་སྡུག་ཅིག་ཆུང་ནའང་སྡུག །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གི་དགེ་བས་དེ་ཀུན་ནད་མེད་ཤོག །འཆི་བའི་སྡུག་བསྔལ་བསམ་ན་ཞེ་རེ་འཇིགས། །སྨན་པས་འཆི་བའི་ལུང་སྟོན་འབྲོས་ཤིང་ཡིབ། །མོ་མས་བུ་གདོན་གཡེ་གདོན་འཆི་ལུང་སྟོན། །བསྲུང་བ་སྨན་དང་རིམ་གྲོའི་ཕྱིར་ཕྱིར་ཐུ། །འཆི་བར་ཤེས་ཀྱང་ཐབས་རྡུགས་ཁ་ཆེམ་འཇོགས། །དམ་ཆོས་དགོས་པར་ཤེས་ཀྱང་འཕྱིས་པས་ལེན། །འབྱུང་བའི་སྟོབས་ཐིམ་བར་དོའི་སྣང་བ་འཆར། །སྒྲ་འོད་ཟེར་གསུམ་
སྣང་བ་དགྲ་རུ་ལང་། །མིག་བསྒྲད་བཞིན་བསྡུས་མཆེ་བས་མ་མཆུ་མནན། །གཤིན་རྗེའི་སྐྱེས་བུས་རང་དབང་མེད་པར་ཁྲིད། །དགེ་ལ་ཆུ་བས་སྐོམ་ཡང་གསེར་བས་དཀོན། །སྡིག་ལ་ཕྱོགས་བཅུར་བྲོས་ཀྱང་གྲིབ་ལྟར་འཁོར། །ཡིན་མིན་རྫུན་དང་གཡོ་སྒྱུ་དེར་མི་ཚུད། །རྡེལ་བུ་མེ་ལོང་ཡིག་ཆུང་འཛིན་བྱེད་ཅིང་། །སྡིག་ཆེན་ཁྲིམས་ལ་གཏུགས་ཚོ་སྙིང་རེ་རྗེ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གི་དགེ་བས་དེ་དག་འཆི་མེད་ཤོག །མེད་པས་བཙལ་ཡང་མི་རྙེད་ཡི་དྭགས་བཞིན། །ཡོད་པས་འཚོ་སྐྱོང་མི་ཐུབ་སྟོན་ཤ་བཞིན། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་བདེ་གནས་ཤོག །འགའ་ཞིག་འཁོར་བས་འཇིགས་ཏེ་ལམ་བཙལ་ཡང་། །གྱེན་དུ་འཛེགས་འདོད་ཐུར་དུ་དོང་འབྲུད་ཅིང་། །དཀར་བར་འདོད་ནས་གྲགས་སྣུམ་སྐུད་པ་ལྟར། །ཕྱི་རོལ་བོན་དང་མུ་སྟེགས་ལམ་ཞུགས་པ། །ངལ་བ་དོན་མེད་ལམ་སོགས་སྙིང་རེ་རྗེ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གི་དགེ་བས་དེ་དག་སྐྱོན་མེད་ལམ། །བྱང་ཆུབ་དམ་པའི་ལམ་དེར་འཇུག་པར་ཤོག །
ཕྲག་དོག་དབང་གི་ལྷ་ལ་རྟག་སྟོང་ཞིང་། །ལོ་རེའང་དུས་གཉིས་འཁྲུག་པ་ཕུལ་བྱུང་རྩོད། །རྨས་པའི་མུན་པའི་ནང་དུ་སྒྱུར་ཞིང་དང་། །མཚོན་ཆའི་འཁོར་ལོའི་ཡན་ལག་ཉིང་ལག་གཅོད། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་བྱམས་ལྡན་ཤོག །འདོད་ལྷ་རིགས་དྲུག་གཟུགས་ཁམས་བཅུ་བདུན་རྣམས། །ཡུན་རིང་བར་དུ་བདེ་བ་སྤྱོད་གྱུར་ཅིག །དཔག་བསམ་ཤིང་ལ་མི་སྡུག་སྒྲ་ངན་གྲག །དར་ཟབ་གོས་ཧྲུལ་མེ་ཏོག་ཕྲེང་བ་རྙིང་། །མཆན་ཁུང་གཉིས་ནས་རྔུལ་འབྱུང་དྲི་མ་ང་། །ལྷ་དང་ལྷ་མོ་ཀུན་གྱིས་རིང་དུ་དོར། །མི་ལོ་དཔག་མེད་བར་དུ་སྡུག་བསྔལ་མྱོང་། །ཕྱི་མ་ངན་སོང་སྐྱེ་བ་མངོན་སུམ་མཐོང་། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་བདེར་གནས་ཤོག །སྐྱེ་མཆེད་མུ་བཞིའི་ལྷ་རྣམས་གཟུགས་མེད་ཅིང་། །བསྐལ་པ་བརྒྱར་ཡང་དམ་ཆོས་སྤྱོད་སྐལ་ཆད། །བསྐལ་མེད་ལས་ངན་དེ་དག་སྙིང་རེ་རྗེ། །དེ་ཀུན་ལས་འབྲས་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་ཆོས་སྤྱོད་ཤོག །ལག་པ་བརྐྱང་བསྐུམ་མི་མཐོང་མུན་གླིང་དུ། །མི་ཤེས་བླུན་
པས་རང་ཤ་རང་གིས་ཟ། །ཆེ་བ་རྣམས་ནི་ཆུང་བས་ཕུག་ཅིང་ཟ། །ཆུང་བ་འགའ་ཞིག་ཆེ་བས་ཁྱུར་མིད་བྱེད། །ཀླུ་རྣམས་ཕྲག་དོག་སེར་སྣས་གཞན་ལ་འཚེ། །ཁྱུང་དང་བྱེ་ཚན་ནད་ཀྱི་འཇིགས་པས་གདུང་། །འགའ་ཞིག་ཤ་ལྤགས་རྩི་ཡི་ཆད་དུ་འཆི། །འགའ་ཞིག་མི་ཐོགས་ཁལ་འགེལ་ལྕགས་ཀྱིས་བསྣུན། །ཡུན་རིང་སྤུ་དང་འོ་མས་བསྐྱངས་བྱས་ཀྱང་། །ཅུང་ཟད་རྒས་སམ་སྐམ་ན་སྲོག་དང་ཕྲལ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་བདེ་གནས་ཤོག །བལྟས་པ་ཙམ་གྱི་ཆུ་རྒྱལ་གང་གའང་སྐམ། །འགའ་ཞིག་ཟས་ལ་རྣག་ཁྲག་དུག་ཏུ་མཐོང་། །ཟས་ཀྱི་དྲི་ཚོར་དཔག་ཚད་བརྒྱར་ཡང་རྒྱུག །ཟས་མ་རྙེད་པས་ངལ་དུབ་ཆད་ཅིང་འགྱེལ། །འགའ་ཞིག་ཁབ་ཀྱི་མིག་ལྟར་ཁ་དོག་ཅིང་། །ཡུལ་གྲུ་ཙམ་གྱི་ལྟོ་བ་བཀྲེས་པས་ཉན། །ཤིན་ཏུ་ཕྲ་བའི་མགྲིན་པ་ཡན་ལག་ཅན། །འགའ་ཞིག་ཟས་སྐོམ་ཟོས་པས་གྱི་རབ་ཏུ་འབར། །ནང་ཁྲོལ་དོན་སྙིང་ཚིག་ཀྱང་འཆི་མི་ནུས། །ཟླ་བ་ཉིན་ཞག་མཉམ་པའི་ལྔ་བརྒྱ་ཡི། །སྡུག་བསྔལ་མྱོང་བ་དེ་དག་སྙིང་རེ་རྗེ། །དེ་ཀུན་སྡུག་བསྔལ་བདག་ལ་
སྨིན་གྱུར་ཅིག །བདག་གིས་དགེ་བས་དེ་དག་འབྱོར་ལྡན་ཤོག །འདི་ན་མི་གཅིག་མདུང་ཐུང་སུམ་བརྒྱ་ཡི། །རབ་བསྣུན་སྡུག་བསྔལ་དཔེར་ན་ཡང་མི་བཟོད་ཅིང་། །གཅིག་ལྷགིས་གཅིག་ལ་མཚོན་ཆ་དུ་མས་འདེབས། །འགའ་ཞིག་ལུས་ལ་ནག་པོའི་ཐིག་བཏབ་ཅིང་། །ལྕགས་སྲེག་སོག་ལེས་དུམ་བུར་ལུས་ཀུན་གྲ། །འགའ་ཞིག་ལྕགས་སྲེག་རི་བོའི་བར་དུ་བཅིར། །འགའ་ཞིག་ལྕགས་སྲེག་གསལ་ཤིང་རྩེ་གསུམ་པར། །རྐང་མཐིལ་གཉིས་དང་བཤང་བའི་ལམ་ནས་ཕུག །ཕྲག་པ་གཉིས་དང་སྤྱི་བོའི་གཙུག་ཏུ་འབིག །འགའ་ཞིག་མེ་ཡི་ར་བས་ཡོངས་སུ་བསྐོར། །ཤིན་ཏུ་མི་བཟད་སྨྲེ་སྔགས་ཆོ་ངེ་འདེབས། །འགའ་ཞིག་ཁྲོ་ཆུ་ཁོལ་མ་ཁར་བླུགས་ནས། །ནང་གྲོལ་ཀུན་ཚིག་བུ་གར་མེ་འབར་ཀྱང་། །འཆི་བར་མི་ནུས་དཔག་མེད་སྡུག་བསྔལ་མྱོང་། །འགའ་ཞིག་ལྕགས་ལས་གྲུབ་པའི་ཟངས་ཆེན་དུ། །ཚོད་མ་བཞིན་དུ་བར་སྐལ་གཅིག་ཏུ་བཙོ། །རལ་གྲིའི་ནགས་ཀྱིས་མགོ་དང་ཡན་ལག་གཅོད། །སྤུ་གྲིའི་ལམ་གྱིས་རྐང་པ་རྗེ་ངར་གཏུབ། །མེ་མ་མུར་དུ་ལུས་སྨད་བྱིངས་ཤིང་ནུབ། །ཤལ་མ་རི་ལ་འཛེག་འབབ་ལུས་ཀུན་དྲལ། །ལྕགས་
སྲེག་བྱ་ཁྱིས་ཀླད་པ་རྒྱུ་མ་འདྲེན། །འགའ་ཞིག་འཁྱགས་པའི་སྦུབས་སུ་རབ་འཁྱགས་ནས། །ལུས་ལ་ཆུ་བུར་ཁེང་དང་ཆུ་བུར་རྡོལ། །ཨ་ཤུ་ཀྱེ་ཧུད་སྒྲ་སྒྲོགས་སོ་ཡང་འཐམ། །ལུས་རྣམས་བརྒྱད་དང་བཅུ་དྲུག་གྲངས་མེད་བར། །རབ་ཏུ་གས་ཤིང་རྣག་ཁྲག་ཆུ་སེར་འཛག །གྲངས་མེད་བསྐལ་པའི་བར་དུ་སྡུག་བསྔལ་བའི། །བསམ་ཞིང་སྙིང་རྗེ་དམྱལ་བའི་སེམས་ཅན་པ། །དེ་ཀུན་སྡུག་བསྔལ་བདག་ལ་སྨིན་གྱུར་ཅིག །བདག་གིས་དགེ་བས་དེ་དག་བདེར་གནས་ཤོག །འགྲོ་བའི་སྡུག་བསྔལ་རྒྱུ་འབྲས་དཔག་མེད་པ། །གྲངས་མེད་བསྐལ་པར་བདག་གིས་མྱོང་གྱུར་ཀྱང་། །སྐྱོ་དང་འགྱོད་ལ་སྐད་ཅིག་མི་སྐྱེ་ཤིང་། །བྱང་ཆུབ་སེམས་ཀྱི་གོ་ཆ་བརྟན་པར་ཤོག །བདག་དང་འགྲོ་བའི་དུས་གསུམ་དགེ་ཚོགས་དང་། །རྒྱལ་དངརྒྱལ་སྲས་ཉན་ཐོས་རང་རྒྱལ་གྱི། །ཚོགས་གཉིས་བསགས་དང་ཐུགས་བསྐྱེད་རྣམ་དག་སོགས། །མ་ལུས་གཅིག་ཏུ་བསྡོམ་པའི་མཐུ་སྟོབས་ཀྱིས། །འགྲོ་བ་སེམས་ཅན་གཅིག་ཀྱང་མ་ལུས་པ། །སྐྱོན་རྣམས་ཀུན་ཟད་ཡོན་ཏན་ཀུན་རྫོགས་པའི། །ཡང་དག་རྫོགས་པའི་སངས་རྒྱས་ཐོབ་གྱུར་ཅིག །དེ་མ་
ཐོབ་ཀྱི་སྐྱེ་བ་ཀུན་ཏུ་ཡང་། །བདེ་བ་ཅན་དེར་རིགས་ཀྱི་བདག་པོ་ཡི། །གསུང་གི་བདུད་རྩི་ངོམས་མེད་འཐུང་གྱུར་ཅིག །བདག་ཀྱང་འདི་ནས་བླ་མེད་བྱང་ཆུབ་བར། བཀྲེས་ལ་ཟས་དང་དབུལ་ཕོངས་རྣམས་ལ་ནོར། །ནད་ལ་སྨན་དང་འཇིགས་པ་རྣམས་ཀྱི་སྐྱབས། །མདོར་ན་སྤྱན་རས་གཟིགས་དབང་བླ་མ་རྗེའི། །ཕྲིན་ལས་སྒྲུབ་པའི་གཡོག་པོར་བདག་གྱུར་ཅིག །ཅེས་པ་འདི་བདག ༧ ཨ་རཱག་ཐོར་པ་ན་བ་ཤིན་ཏུ་ཐུ་བ་བྱུང་ཞིང་ལུས་ཐམས་ཅད་ཐོར་བ་ཁེངས་པར་ཞག་གསུམ་ཙམ་ལ་ལུས་ཐམས་ཅད་མེ་འདག་གིས་བྲབ་པ་ལྟ་བུའི་ཟུག་མི་བཟོད་པར་བྱུང་དུས། དེས་ངོ་བོའི་སྟེང་དུ་བཞག་ཀྱང་དཀའ་བ་འདྲ་ཞིག་བྱུང་ནས། གཏོང་ལེན་གྱིས་དམིགས་པ་ཁོ་ན་བྱས་ཤིང་། ཕྱིས་ཅུང་ཟད་ཁམས་གསིང་དུས་ཐུབ་པའི་དུས་དམིགས་པ་བྱས་པ་རྣམས་སླར་ཚིགས་སུ་བཅད་དེ་ཡི་གེར་བྲིས་པའོ། །འདི་ལྟར་ན་བའི་།ཚེ་ཁ་ཞེ་མེད་པར་སེམས་བསྐྱེད་དང་མིགས་པ་གཏོང་ལེན་ལ་འབད་ན། ཕ་དམ་པས། ན་བ་ན་བ་མ་ཡིན་ཏེ། །རྣལ་འབྱོར་སྒྲིབ་པའི་ཕྱགས་ཤིང་ཡིན། །ཅེས་གསུངས་པ་དང་། ཇོ་བོ་གསེར་གླིང་པའི་བློ་སྦྱོང་གི་དོན་ལ་དེ་སྣང་བས་བདག་དང་སྐལ་པ་མཉམ་པའི་བློ་དམན་རྣམས་ན་བའི་དུས་སུ་སེམས་བསྐྱེད་བློ་སྦྱོང་ཚུལ་འདི་ལྟ་བུར་མཛད་པར་ཞུའོ། །འདི་བྲིས་དུས་རང་ལོ་ཉེར་དགུའམ་སུམ་ཅུ་པའི་ཚེ་ཡིན་ནོ།། ༈ །།ན་མོ་རཏྣ་ཏྲ་ཡཱ་ཡ། རྩ་
བརྒྱུད་བླ་མ་ཡི་དམ་ལྷ་ཚོགས་དང་། །དཀོན་མཆོག་གསུམ་དང་ཊཱཀྐི་ཆོས་སྐྱོང་ཚོགས། །ཆོས་ཉིད་ཆོས་ཅན་འགོག་དང་ལམ་གྱི་བདེན། །བདེན་ལྡན་ཇི་སྙེད་རྣམས་ཀྱི་བདེན་སྟོབས་དང་། །འདི་ལྟར་བགྱིས་པའི་དགེ་བས་མཚོན་བྱས་ཏེ། །བདག་གཞན་དུས་གསུམ་དགེ་བ་ཅི་བསགས་མཐུས། །བདག་དང་བདག་གི་ཕ་མ་སློབ་དཔོན་དང་། །སློབ་མ་བྲན་གཡོག་ཡོན་བདག་སྒོ་ནོར་དང་། །ཟས་ནོར་ཆོས་ཀྱི་འབྲེལ་བའི་ཚེ་འདས་སོགས། །བཟང་ངན་ལས་ཀྱིས་འབྲེལ་བའི་འགྲོ་བ་ཀུན། །མི་གཙང་ལུས་འདི་བོར་བར་གྱུར་མ་ཐག །བདེ་བ་ཅན་དུ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་ས་བཅུ་རབ་བསྒྲོད་ནས། །སྤྲུལ་པས་ཕྱོགས་བཅུར་གཞན་དོན་བྱེད་ཕྱིར་བསྔོ། །བྱེད་ཕྱིར་བསྔོ་བྱས་ན་བསྔོ་བ་འགྱུར་ཞིང་བྱེད་པར་ཤོག་བྱས་ན་སྨོན་ལམ་དུ་འགྲོ། འདི་ཚེ་འདས་རྒེ་ལ་བསྔོ་བ་མ་བརྗེད་ཟེར་བའང་མང་དུ་བྱུང་ཞིང་། རང་གཞན་འབྲེལ་ཡོད་རྣམས་ལ་བསྔོ་བ་སྨོན་ལམ་རྒྱུན་དུ་བྱ་བའི་ཆེད་དུ། རང་ལོ་སོ་བཞི་པ་ཆོ་འཕྲུལ་ཆེན་པོའི་ཚེས་བརྒྱད་ལ། ༧ དགེ་སློང་ཀརྨ་ཆགས་མེད་ཀྱིས་སྨོན་ལམ་དུ་བྲིས་པའོ། །སརྦ་མངྒ་ལཾ།། །།