གསུང་མགུར་ལོ་རྒྱུས་འདྲ།
གསུང་མགུར་ལོ་རྒྱུས་འདྲ་བཞུགས་སོ། །ན་མོ་ལོ་ཀེ་ཤྭ་ར་ཡེ། རང་ལོ་ལྔ་བཅུ་ཐམ་པ་ལ། །གདུལ་བྱ་འུར་བས་ཟས་ནོར་རྣམས། །སྒོམ་སྡེ་གསར་རྙིང་མན་ཆད་ནས། །རེ་ཆམ་ཡན་གྱི་དགོན་སྡེ་ནི། །ཆེ་ཕྲ་ཀུན་ལ་རི་བཤུ་བྱས། །ཁྱད་པར་ཞལ་སྔ་ཡབ་སྲས་ལ། །བརྒྱ་འབུལ་བྱས་ཤིང་ཆབ་མདོ་མཇལ། །དཔོན་རིགས་གནས་པོ་ཆེ་དགུ་ཡི། །གུས་འདུད་བཀུར་སྟི་ཆེ་བར་མཛད། །བྱང་སེམས་ས་ཡི་འདྲ་སྐུ་དེ། །བཀྲག་རྩི་གསར་དུ་བཏང་བ་ལྟར། །སྣུམ་ནི་འཐིག་ལ་ཁད་དུ་མཐོང་། །གཞན་གྱིས་དེ་ལྟར་མ་མཐོང་འདུག །དཔོན་རིགས་གཅིག་གིས་བརྟག་པ་ཞུས། །རྨི་ལམ་ལུང་བསྟན་གསལ་པོ་དག །བྱུང་བ་སྨྲས་པས་མགུ་བར་གྱུར། །ཉམས་དང་རྨི་ལམ་མཚམས་ཤེད་ན། །མགོན་ཁང་ཟུར་དེར་མགོན་ཁང་ལས། །ཆེ་ཞིང་རིང་བའི་བུད་མེད་ནི། །མཛེས་སྡུག་སྤོས་ཤེལ་ཁོ་ན་ཡི། །བརྒྱན་པ་གཅིག་གིས་བདག་ཉིད་ལ། །དགའ་བའི་རྣམ་པས་ལྟ་བ་མཐོང་། །ཕྱིར་ནངས་ཆོས་རྗེས་གནང་སྦྱིན་བྱུང་། །དེ་ནས་སྐུ་སྐྱེ་ཆེ་ཚང་བས། །ཟུར་མང་ཕྱོགས་སུ་ཤོག་གསུངས་པས། །བཀའ་ལྟར་དེ་ངོས་འགྲོ་སྙམ་ཚེ། །
གནས་མདོ་བླ་མ་ཤི་བའི་སར། །འགྲོ་རྒྱུ་ཡིན་ནམ་ཟེར་བ་ཡི། །སྒྲ་ཞིག་ཉམས་རྨིས་མཚམས་སུ་ཐོས། །རང་ལ་རྐྱེན་ཆགས་ཡོད་མེད་བརྟགས། །དཔོན་རིགས་གཅིག་གིས་འདི་སྐད་ཟེར། །ས་སྟེང་ཆོས་རྗེ་རེད་ཐལ་བ། །ཕོད་མེད་ཟེར་བའི་ཚིག་སྒྲ་དང་། །མཚོན་སྣ་དྲུག་གི་ཚེ་དུས་བྱེད། །ཟེར་བ་ལ་སོགས་རྨིས་ལྟས་ངན། །འོན་ཀྱང་སྐུ་སྐྱེ་མི་དགྱེས་དོགས། །འགྲོ་སྙམ་སྒར་པ་བཏེག་སྟེ་སོང་། །འདྲབ་མདོར་ཞག་ནུབ་རྨི་ལམ་ན། །ཞི་ཁྲོའི་ཕོ་བྲང་དཀྱིལ་འཁོར་གྱི། །དབུས་སུ་སྤྲུལ་སྐུ་བཞུགས་ནས་ཀྱང་། །ལྷ་ངོ་སྟོན་ཚུལ་བྱེད་པ་རྨིས། །སྤོམ་ནེ་བྲག་དེའི་གནས་མཆོག་ནི། །ལེགས་པར་ཕྱེ་བའི་རྟགས་སུ་གོ །ཟུར་ཙམ་སོ་ཐོག་ཨ་ནུར་སྨྲས། །དེ་ནས་འདྲབ་རྒྱལ་གནས་མཇལ་བྱས། །སྤྲུལ་སྐུས་སྔོན་དུ་མ་གསུངས་པའི། །རང་བྱོན་གསལ་པོ་འགའ་མཐོང་ཡང་། །བབ་འཐོབ་མེད་ཕྱིར་མ་སྨྲས་སོ། །དེ་ནས་ཉམས་དང་རྨི་ལམ་མཚམས། །གནས་དེའི་རྟགས་མཚན་ཡིན་སྙམ་པའི། །འཇའ་དང་འོད་ཟེར་བན་བུན་ལྟར། །ས་ནས་བསང་དུད་ལྟ་བུར་འཐུལ། །ཁ་དོག་ལྔ་དང་ལྡན་པ་དག །སྐྱེ་བ་མཐོང་ཕྱིར་གནས་དེ་ནི། །གནས་
བཟང་ཡིན་པའི་ངེས་ཤེས་སྐྱེས། །སྐྱོ་སྟོད་ཞི་ཁྲོའི་དབང་ཁྲིད་དང་། །ཁྲིད་ཆུང་བཙུགས་པས་སྡིག་ཅན་འགའ། །ཉམས་སྐྱེས་སེམས་ངོ་འཕྲོད་པ་དང་། །རང་མདུན་མ་མེ་འཛིན་པ་བྱུང་། །གོ་བོ་ཕུག་གི་རྩེ་དེ་ན། །ཉ་རྒྱས་ཟླ་བའི་དཀྱིལ་འཁོར་ནི། །འོད་ཟེར་སེར་པོ་འཕྲོ་བ་ཞིག །ཉམས་དང་རྨི་ལམ་མཚམས་སུ་མཐོང་། །ཁྲོམ་མཇལ་ཆམ་པའམ་མ་བྱུང་ཞིང་། །ཤི་ལ་ཁད་ཀྱི་ནད་པ་གཅིག །བཀལ་ནི་བྱུང་བའང་སོས་པར་གྱུར། །དེ་ནས་ཟུར་མང་འགྲོ་བ་བཤོལ། །དེ་རུ་འགྲོ་ས་མེད་པར་ཐོས། །ཚ་འོང་གུག་ཤིས་ཞག་པའི་ནུབ། །དཔོན་རིགས་ཕྲུག་སྔོན་གྱོན་པ་ཅིག །གུས་འདུད་ཇ་ཞུས་ཞིམ་པོ་ཞིག །དྲང་བྱུང་གཏམ་རྒྱལ་ཡིན་པར་གོ །རེ་ཞིག་འདུག་པའི་རྟེན་འབྲེལ་གོ །དེ་ནས་སྔོན་གྱི་རྨིས་ལྟས་དག །ངན་ཕྱིར་རང་དང་སྤྲུལ་སྐུ་སོགས། །གཙོ་ཆེར་སྐུ་རིམ་ལ་དམིགས་ནས། །དཔོན་སློབ་བརྒྱད་རེས་སྒྲུབ་ཆེན་ཚུལ། །བསྒྲུབ་པ་རིམ་བཞིན་བདུན་ཕྲག་རེ། །བྱས་ཚེ་རང་ཡང་ལུས་མ་བདེ། །སྔོན་གྱི་རྨིས་ལྟས་གསལ་བར་འགྱུར། །འོད་ཟེར་ཅན་མ་ཞག་བདུན་ཚེ། །རང་མདུན་བུད་མེད་དཀར་
མོ་ནི། །མཛེས་སྡུག་རྒྱན་ཆས་ཕྱུག་པ་གཅིག །བཞེངས་ནས་འདུག་ཀྱང་ཞལ་ངོ་ནི། །ཧ་ཅང་དགའ་ཚུལ་མི་སྟོན་པ། །ད་རུང་རྐྱེན་ཆག་མ་འགྱུར་རྟགས། །ཉི་མའི་དཀྱིལ་འཁོར་ཆུང་ངུ་ནི། །འོད་ཟེར་འཕྲོ་བ་ཤར་བྱུང་རྨིས། །ཐུན་པ་གཅིག་གི་མར་མེ་ཡི། །རྩེ་མོ་འཕེལ་བ་མཐོང་བ་དང་། །ཐུན་པ་གཅིག་གི་རྨི་ལམ་དུ། །བུད་མེད་ཁོ་ན་རྨིས་ཞེས་ཟེར། །དེ་ནས་སྒྲོལ་དཀར་ཞག་བདུན་བསྒྲུབ། །དགོན་པ་ཆེན་པོའི་གླིང་ཁྲོད་དུ། །རང་ཉིད་ལམ་སྟོན་ཕྱིར་ཐོན་ནས། །དགོན་འོག་སོང་བས་ལམ་ངན་ནི། །འཇིགས་སུ་རུང་བ་ཐར་དཀའ་བ། །སྤྲུལ་སྐུ་ཡིན་སྙམ་བྱིས་པ་པང་། །ངེད་གཉིས་བྲུལ་ལ་ཁད་པ་དང་། །ཁ་ཞེ་མེད་པར་ཨུ་རྒྱན་ལ། །གསོལ་བ་བཏབ་པས་ལམ་ངན་དེ། །བདེ་མོར་གྱུར་ནས་ཐར་པ་རྨིས། །འོན་ཀྱང་སྡེ་དཔོན་གུ་རུ་ཅིག །རང་གི་སྲས་སུ་འདུག་མཐོང་ནས། །རྒྱལ་འགོང་གདོན་པ་ཡོད་པར་གོ །དེ་ལྟར་ནད་རིགས་མང་དུ་ན། །དེ་ནས་གནམ་ལྕགས་ཞུན་མ་བསྒྲུབ། །དེ་ཚེ་ཆོས་དབང་ཀུན་བཟང་གིས། །དམག་ཚོགས་བྱུང་བས་མཁར་གྱི་སྒོ། །དམ་དུ་བཅད་པ་རྨིས་པའི་ཕྱིར། །གཏེར་སར་ནུས་པ་འདུག་
གོ་ཟེར། །རང་གི་རྨི་ལམ་རང་མདུན་དུ། །སྡེ་དཔོན་རབ་ཏུ་འཇིགས་པ་གཅིག །གུས་པས་རང་གི་མདུན་དུ་འདུག །བདག་གི་ཁྱེད་ལ་གང་ཕན་གྱིས། །བསམ་པ་མ་གཏོགས་མེད་རབས་ཟེར། །ཁྱི་དཀར་གཅིག་ཀྱང་བསད་པ་རྨིས། །དེ་ནས་འཇམ་དཔལ་ཀིང་ཀང་བསྙེན། །ཞག་པོ་ལྔ་སོང་རླུང་གི་སྒྲ། །འུར་སྒྲ་ཆེན་པོ་འབྲུག་སྒྲ་འདྲ། །ཁ་བ་བབ་སོགས་གཞུང་ལྟར་བྱུང་། །རྨི་ལམ་རང་ཉིད་རྟ་དཀར་ཞོན། །ཡར་ལ་བྱང་གི་ཕྱོགས་འོང་བས། །སད་ན་ལེགས་ཀྱི་སྐྱེ་བ་ནི། །རང་ཉིད་ཡིན་པར་ཐག་ཆོད་ཅིང་། །སད་ན་ལེགས་ནི་ཁྲི་སྲོང་གི །སྤྲུལ་པ་ཡིན་པར་གསུངས་པ་དང་། །ཁྲི་སྲོང་ལྡེའུ་བཙན་འཇམ་དབྱངས་ཀྱི། །སྤྲུལ་པ་ཡིན་པར་བཤད་པའི་ཚེ། །རང་ཡང་འཇམ་དབྱངས་ཡང་སྤྲུལ་ཙམ། །ཡིན་པར་འདུག་གོ་སྙམ་པ་དེ། །རྨི་ལམ་ཡུལ་དུ་གསལ་པོར་དྲན། །དེ་ནས་འོད་འབར་ཞག་བདུན་བསྒྲུབ། །སྤྲུལ་སྐུ་རང་དྲུང་མཉམ་དུ་བཞུགས། །ལྷོ་བ་སྤྲུལ་སྐུའི་བྱིན་རླབས་རྟེན། །བདག་ཅག་དཔོན་སློབ་ཐམས་ཅད་ལ། །ཤིན་ཏུ་མང་བ་གནང་བ་རྨིས། །ཉམས་དང་རྨི་ལམ་མཚམས་ཤིག་ཏུ། །བོད་དང་
སོག་པོ་ཐམས་ཅད་ཀྱིས། །མི་ཁ་ཆོད་པར་འོང་ངོ་ཞེས། །དེ་ནས་རྒྱལ་བ་རྒྱ་མཚོ་ཡི། །སྒྲུབ་པ་ཞག་བདུན་བར་དུ་བྱས། །རང་གི་རྣ་བ་གཡས་པ་ནས། །སྲིན་བུ་གཉིས་ནི་ཐོན་པ་རྨིས། །སོག་པོའི་རྒྱལ་པོ་དཔོན་གཡོག་འགས། །གུས་འདུད་དམར་གསུམ་ཕུལ་བ་རྨིས། །གྲྭ་སློབ་རིམས་ནད་བྱུང་བའི་ཚེ། །ལོ་མ་གྱོན་མ་ཞག་བདུན་བསྒྲུབ། །ཞོར་ལ་ལྷ་མོའི་མདོས་ཀྱང་བཅས། །རྨི་ལམ་བུད་མེད་རྒྱན་ལྡན་གཅིག །དགའ་ཞིང་དྲུང་དུ་བྱུང་བ་དང་། །ཆོས་ཀྱི་དབང་ཕྱུག་ཕྱག་ཕྲེང་ལ། །བརྒྱབ་པའི་བྱིན་རླབས་རྟེན་ཡིན་སྙམ། །ཆུ་ཤེལ་རྟོག་པོ་མེད་པ་རྨིས། །དེ་ནས་ཞག་དགུ་ཉི་མ་བཅུར། །ཁྲོ་ཆུའི་སྒྲུབ་ཆེན་རྒྱས་པར་བྱས། །དངོས་སུ་བག་དྲོ་བྱིན་འཐིབས་ཤིང་། །མཚན་ཐུན་གཅིག་གི་ཉིན་མཚན་གཉིས། །བལྟམས་པའི་ཆོད་པར་འཛིན་པ་དང་། །ཐུན་པ་འགའ་ཡི་རྨི་ལམ་དུ། །གཞུང་ནས་བཤད་ལྟར་རྟགས་ཐོན་ཅིང་། །ཁྲོ་ཆུ་ལྷ་མང་བསྐུལ་རིང་བརྩམས་། །རྨི་ལམ་ཨུ་རྒྱན་རིན་པོ་ཆེ། །སྟོད་འགག་སྔོན་པོ་པད་ཞྭ་དམར། །ཇོ་བོ་རྗེ་ཡི་ཆ་ལུགས་མཇལ། །བྲག་ཕུག་ཐེའུ་རང་དོད་པ། །ཀུན་ལ་གནོད་པ་ཡིན་ཟེར་
བ། །སྦྲུལ་གཉིས་ང་ལ་འཕང་བྱུང་བ། །དེ་གཉིས་རྒྱང་རིང་དོར་བྱས་ནས། །བྲག་འབུར་སྟེང་དུ་རྐང་པ་བཞག །གཟིར་བའི་དམིགས་པ་བྱས་པ་ཡིས། །བཙུན་པ་གཅིག་གིས་བདག་ཉིད་ལ། །རབ་ཏུ་སྐྲག་ཅིང་ངོ་ཕབ་ནས། །འདུག་མི་བཅུག་ན་འགྲོ་ཟེར་དང་། །བཙུན་པ་གཅིག་གིས་འདི་སྐད་དུ། །ཁྱོད་རང་ཚང་ན་ལེགས་འདུག་ཅེས། །ཀུན་གྱིས་ཟེར་ཞིང་འདུག་པའི་ཕྱིར། །ང་ནི་ཅི་གྱུར་ཡིན་ཅེས་ཟེར། །ཡང་ནི་བཙུན་པ་གཅིག་གིས་ནི། །ཨུ་རྒྱན་ལུང་བསྟན་མཐོང་སྐད་ཀྱིས། །ལོ་གཉིས་ནས་ནི་སྤྲུལ་སྐུ་དང་། །བདག་ལ་བར་ཆད་མེད་པ་ཡི། །ལོ་རྒྱུས་ཟུར་ཙམ་སྨྲ་བ་རྨིས། །དགུ་གཏོར་ནུབ་པར་ཚོགས་ཡིན་ཟེར། །ཤ་ཚོ་ཞིམ་པོ་དྲངས་བྱུང་ཟེར། །བསྒྲུབ་པའི་ཁང་ནས་གསར་པ་ཡི། །ཐུན་གཅིག་འགའ་ལ་སེམས་ངོ་འཕྲོད། །ཁྱད་པར་སྒྲོལ་དཀར་བསྙེན་པའི་དུས། །རང་གི་དྲུང་དུ་འོད་ཟེར་བསྙལ། །དེ་ཚེ་ཉམས་དང་རྨི་ལམ་མཚམས། །བྱིས་པ་འདི་ལ་ད་རེས་ཀྱིས། །བསྒྲུབ་པ་འདི་ལས་དགོས་ལེ་མེད། །ཟེར་བས་བག་ཆགས་སད་པར་གོ །ཕྱི་དེ་ཉིད་ནས་སེམས་ངོ་འཕྲོད། །བྱིས་པས་ནམ་
མཁའི་མཐོངས་ནས་ནི། །སྒྲོལ་མའི་སྔགས་སྒྲ་སྒྲོག་པ་ནི། །ཉི་མ་གཉིས་བར་དངོས་སུ་ཐོས། །དེ་ནས་ཐོས་པར་མ་གྱུར་ཏོ། །དེ་ཕྱིར་ཡི་གེ་འདོན་འདོད་སོགས། །བག་ཆགས་སད་པའི་དངོས་རྟགས་བྱུང་། །རྒྱལ་བ་རྒྱ་མཚོ་སྒྲུབ་པའི་ཚེ། །དགུན་ཉི་ལྡོག་དགོང་ཡིན་ན་ཡང་། །བྱིས་པའི་མདུན་དུ་ལྗང་བུ་སྐྱེས། །བྱིས་པ་འོད་ཟེར་འདི་ཉིད་ནི། །མི་ཏྲ་ཁྲིད་དྲུག་ལ་སོགས་པའི། །བདག་གིས་དམ་ལས་འགའ་ཞིག་ནི། །བདག་པོ་ཡིན་ཅེས་ཟེར་བ་ཅིག །བདག་གི་རྨི་ལམ་སྐབས་སུ་ཐོས། །གཞན་ཡང་བྱིས་པ་ནམ་མཁའ་ལའང་། །སེམས་ངོ་འཕྲོད་ཅིང་གནས་འགྱུ་ཤེས། །ལུས་གནད་སྒོམ་སྒྲུབ་བྱེད་ཚུལ་སྟོན། །བྱིན་རླབས་ཞུགས་པ་འདྲ་བ་བྱུང་། །དེ་ལྟར་ཟླ་བ་ཧྲིལ་གཉིས་ལ། །སྒྲུབ་ཆེན་བློ་ཁ་ཚིམ་པར་འགྲུབ། །དགེ་བས་སྤྲུལ་སྐུའི་གཙོར་བྱས་པའི། །བདག་ཅག་འཁོར་དང་བཅས་པ་ཡི། །བར་ཆད་རྐྱེན་ངན་ཀུན་ཞི་ནས། །རང་གཞན་དོན་གཉིས་མཐར་ཕྱིན་ཤོག །ཨ་རཱ་གས་སོ།། ༈ །།རྨི་ལམ་གྱི་སྐོར་ཚན་བཞི་ལྔ་ཙམ་བཞུགས་སོ། །ན་མོ་ལོ་ཀི་ཤྭ་ར་ཡེ། ཐུགས་རྗེ་ཆེན་པོའི་རྡོ་སྐུ་རང་བྱོན་ཅིག །
སྙེམ་མེད་གཅིག་ནི་ལག་ཏུ་བྱུང་བ་ལ། །རང་བྱོན་ཡིན་མིན་བརྟག་ཚེ་རྨི་ལམ་ན། །གསེར་གྱི་གླིང་བུ་གསུམ་བཞི་གཅིག་གི་ནང་། །རྡོ་ཡི་སཱཙྪ་རང་བྱོན་མཐེ་བོང་ཙམ། །རྩེ་ལ་ཤེལ་གྱི་རིང་བསྲེལ་གཉིས་ཡོད་པ། །དེ་འདྲ་གཅིག་ནི་རྙེད་ཚེ་རང་བཞིན་གྱིས། །སྒྲ་སྐད་སྙན་གསལ་བཞིན་དུ་འདི་སྐད་ཐོས། །དུས་གསུམ་མཁྱེན་པའི་ཐུགས་རྗེ་ཡི། །རྣམ་འཕྲུལ་མཛད་པ་བསམ་མི་ཁྱབ། །འགྲོ་དོན་བསམ་གྱིས་མི་ཁྱབ་འབྱུང་། །རང་བྱུང་རྡོ་ཡི་མཆོད་རྟེན་རྙེད། །དེ་སྐད་ཟེར་བའི་སྣང་བ་བྱུང་། །དེ་མ་ཐག་ཏུ་གཉིད་སད་པས། །ནམ་མཁའ་གསལ་གྱིས་ལངས་ནས་འདུག །ལུས་ནི་སེང་གེ་ཉལ་སྟབས་ལ། །དུས་ནི་ཐོ་རངས་ཁ་ཡིན་ལ། །དེ་ནུབ་དགུ་གཏོར་མཆོད་གཏོར་གཟབ། །མི་ཏྲ་ཛོ་ཀིའི་གདམས་ངག་ལྟར། །གཙང་སྦྲ་བཅས་པས་ལེགས་པར་བཏགས། །དེ་ཕྱིར་འཁྲུལ་པ་མེད་དམ་སྙམ། །དེ་སྐད་མཚམས་ཀྱི་ཁུང་ནས་སྨྲས། །རྟེན་གྱི་གང་ཟག་བཙལ་བ་འདི། །འཕགས་པའི་ཐུགས་རྗེ་མ་ལགས་སམ། །ཨེ་མ་ངོ་མཚར་མི་ཆེའམ། །།ཞེས་ཨ་རཱ་གས་སོ།། །།རྨི་ལམ་དུ་ལུང་པ་འོད་གསལ་གྱི་
རིམ་པ་ཅུང་ཟད་ཉམས་སུ་བླངས་པའི་ཉམས་ཡིག་ཉུང་ངུ་གཅིག་བཞུགས་སོ། །ན་མོ་མ་ཧཱ་མུ་ཏྲ་ཡེ། མཚུངས་མེད་བླ་མའི་ཞབས་ལ་འདུད། །ནུབ་གཅིག་ཉལ་བའི་རྨི་ལམ་ལ། །ཁང་པ་འདྲ་བ་གཅིག་གི་ནང་། །སྐྱེས་མཆོག་མར་པ་ལོ་ཙཱ་དེ། །མཁའ་སྤྱོད་གནས་སུ་བྱོན་གྲོགས་རེད། །བྷན་གཅིག་གི་ནང་དུ་ནི། །ནས་གསར་ཐུལ་ཧྲུལ་བཀང་བྱས་ནས། །དེ་ལ་བདུད་རྩི་རིལ་བུ་ཡི། །ཕབས་ཅིག་བཏབ་ནས་བཞག་འདུག་པའི། །བསྣམ་ཡང་ཆང་དྲི་ཆེར་མི་གདའ། །དེ་ནས་ལེགས་པར་བལྟས་ཙ་ན། །བྷནྡྲ་ནང་གི་༼གཤོང་རྣམས་སུ། །བདུད་རྩི་སླད་མེད་ཅུང་ཟད་གདའ། །རང་གི་ལྕེ་ལ་བཞག་པ་རྨིས། །དེ་ཕྱིན་དྭགས་པོའི་བཀའ་འབུམ་ནས། །ལྟ་བའི་བོགས་ཀྱང་བྱུང་བ་དང་། །ཆོས་ཀྱི་གནད་གསང་མང་དུ་གོ །དེ་ཡང་བརྡ་ཆོས་མཚན་རབ་གདའ། །གུ་རྒྱ་བརྡ་ཐིམ། ཡང་ནུབ་གཅིག་གཉིད་པའི་རྨི་ལམ་ན། །གསང་བ་འདུས་པ་མི་བསྐྱོད་པའི། །བྲིས་སྐུ་ཆེ་ཞིང་ལེགས་པ་གཅིག །མཐོང་ནས་རྐྱེན་བྱས་རང་ཉིད་ཀྱང་། །གསང་འདུས་མི་བསྐྱོད་རྡོ་རྗེ་བསྒོམ། །དེ་ནས་དབུ་ཞབས་ནས་འདུས་ནས། །ཧཱུྃ་དང་ཐིག་ལེ་ནཱ་ད་དང་། །
རྟོགས་པ་འོད་གསལ་ཆེན་པོའི་བར། །ཤིན་ཏུ་གསལ་བར་བསྒོམ་པ་རྨིས། །ཕྱིར་ནངས་འདི་དང་བར་དོ་རུ། །འོད་གསལ་བསྒོམ་པའི་མན་ངག་གིས། །གོ་བ་བླ་ན་མེད་པ་རྙེད། །རྒྱལ་པོ་ཨིནྡྲ་བོ་དྷི་དང་། །དབྱེར་མེད་བླ་མ་ཀརྨ་པ། །གསོལ་བ་བཏབ་པའི་ཐུགས་རྗེར་གོ །དེ་སྔོན་གསང་འདུས་མི་བསྐྱོད་པའི། །བསྐྱེད་རྫོགས་བསྒོམས་པར་མ་བྱས་ཀྱང་། །རྒྱལ་བ་གཅིག་སྒྲུབ་ཀུན་གྱི་ངང་། །གསུངས་པའི་དོན་དང་མཐུན་ནས་སྙམ། །གུ་ཧྱ། ཡང་རང་ལོ་སོ་ལྔ་མགོ་ཟླ་ལ། །ནུབ་གཅིག་ཉལ་བའི་གཉིད་ཁུང་ནས། །མིག་གི་ཐད་ཀ་འདི་ཉིད་དུ། །བྲག་སྐྱིབ་བྱ་མལ་ཙམ་པ་ཅིག །གསལ་བར་མངོན་སུམ་ལྟ་བུར་གསལ། །དེ་ཡིས་རྐྱེན་བྱས་འོད་གསལ་ནི། །ཤིན་ཏུ་གསལ་བར་ཟིན་པར་བྱུང་། །གཞན་ཡང་མཚམས་དང་སྒྲུབ་པའི་དུས། །གཉིད་དང་རྨི་ལམ་འོད་གསལ་ནི། །ལན་གྲངས་དུ་མར་ཟིན་པར་བྱུང་། །གུ་ཧྱ།། །།ཡང་རང་ལོ་སོ་དྲུག་རྒྱལ་ཟླ་ཡི། །མར་ངོ་ནུབ་གཅིག་གཉིད་ཁུང་ན། །མིག་གི་ཐད་ཀ་དེ་ཉིད་ན། །ཁང་མལ་ཙམ་ཞིག་གསལ་བ་ཡིས། །ཉི་མ་ཤར་ལྟར་
གསལ་བར་མཐོང་། །དེ་ཡིས་རྐྱེན་བྱས་སེམས་ངོ་ལ། །ཧྲིག་གེ་ས་ལེ་གནས་པ་བྱུང་། །ཆེད་དུ་འོད་གསལ་མ་བཟུང་ཡང་། །རྗེ་བཙུན་བླ་མའི་བཀའ་དྲིན་གྱིས། །འབད་མེད་ཡང་ཡང་ཟིན་ཅིང་གདའ། །བདག་ཕོ་སྒོ་བཟང་བ་མ་ལགས་ཏེ། །བློ་གཏད་རྗེ་ལ་བྱས་པས་ཡིན། །གུ་ཧྱ། ཡང་རང་ལོ་སོ་དྲུག་ལོན་པ་ཡིས། །ནག་པ་ཟླ་བའི་ཉེར་གཅིག་ལ། །ལུས་རབ་ཏུ་དུལ་བས་རྐྱེན་བྱས་ནས། །དུས་ཉིན་མཚན་མེད་པར་ཉལ་བའི་ཚེ། །སྲོད་གཉིད་དུ་སོང་དང་མ་སོང་མཚམས། །མདུན་དུ་ནག་དང་ཡོ་རེ་བ། །ཅིག་བྱུང་སྙམ་པའི་གྲིབ་གནོན་འདྲའི། །ཤིན་ཏུ་སྐྲག་ཅིང་ལུས་པོ་འདར། །ན་བ་སིང་སྒྲ་འུར་སྒྲས་གང་། །དེ་ཚེ་བསྐྱེད་རིམ་བསྒོམ་སྙམ་ཡང་། །གསལ་བར་ཟིན་པར་དཀའ་བ་བྱུང་། །སྐག་མཁན་སེམས་ཀྱི་ངོ་བོ་ལ། །གཅེར་རེ་བལྟས་ནས་ལྕམ་མེར་བཞག །འཇིགས་སྐྲག་ཞི་ནས་བདེ་བར་གནས། །ང་ཡང་ཤི་བ་ཡིན་ནམ་སྙམ། །དེ་མ་ཐག་ཏུ་སྐར་ཁུང་ནས། །ཟླ་ཐིག་ཤར་བྱུང་སྙམ་པ་ཡི། །དཀར་དྭངས་ཏ་ལེ་བྱུང་བའི་མོད། །འཇིགས་སྐྲག་སྔར་ལྟར་བྱུང་བ་ལ། །འདི་ཉིད་དཀར་ལམ་ཡིན་འདུག་སྙམ། །
འཇིགས་མཁན་སྟེང་དུ་ཧྲིག་གེར་བཞག །དེ་མ་ཐག་ཏུ་འཇིག་སྐྲག་ཞི། །བདེ་བའི་ངང་ལ་ལྷན་ནེ་གནས། །དེ་ནས་རང་མདུན་ཕ་ཀི་ན། །མེ་སྟག་འཚུབ་མ་ལྟ་བུ་ཡིས། །དམར་དང་ཚུབས་ཚུབས་བྱུང་བའི་མོད། སྔར་ལྟར་འཇིགས་སྐྲག་ཆེ་བར་བྱུང་། །འདི་ཉིད་དམར་ལམ་ཡིན་འདུག་སྙམ། །འཇིགས་མཁན་སྟེང་དུ་ཧྲིག་གེར་བཞག །དེ་ནས་བདེ་བའི་ངང་དུ་ཞི། །ལུས་པོ་འགུལ་སྐྱོད་བྱ་སྙམ་དུ། །ཤིན་ཏུ་བརྗིད་ཅིང་འགུལ་མ་ཐུབ། །འདི་ཉིད་ནག་ལམ་ཡིན་འདུག་ཀྱང་། །འཆི་དུས་ཀྱི་སྣང་མཆེད་མིན་པ་འདྲ། །གཉིད་ཀྱི་སྣང་མཆེད་ཡིན་པ་འདྲ། །གཉིད་ལས་སད་པ་འདྲ་དགོས་སྙམ། །ཤིན་ཏུ་ལུས་ནི་འགུལ་བ་ཡིས། །དེ་ནས་གཉིད་ལས་སད་པ་ན། །ལུས་པོ་ཙོག་པོར་མེ་ཐབ་ཚུལ། །ཅུང་ཟད་རྒྱབ་སྔས་བརྟེན་ནས་སྣང་། །བཤད་པ་རྣམས་དང་ཕྱོགས་མཐུན་ཕྱིར། །ཉམས་མཚར་ཡི་གེ་བྲིས་པའོ། །རྒྱུད་དང་འགྲེལ་པ་མང་པོ་ནས། །གཉིད་དང་མ་གཉིད་སོ་མཚམས་ན། །སྣང་མཆེད་ཐོབ་གསུམ་ཐིམ་པ་རྣམས། །ཅུང་ཟད་མི་གསལ་ཚུལ་དུ་འབྱུང་། །གསུངས་པའི་དོན་ཡང་ཡིད་ལ་ཤར། །དོན་
མེད་རློམ་སེམས་བྱ་དོགས་མེད། །ས་མཱ་ཡ་གྱ་ཧྱ། ༈ ཡང་ཤིང་སྤྲེལ་རང་ལོ་སོ་དྲུག་སར། །མཚམས་དམ་པོ་འདག་སྦྱར་བྱས་པའི་དུས། །ནུབ་གཅིག་གཉིད་མ་ཐག་ཏུ་ནི། །མིག་གི་ཐད་ཀ་དེ་ཉིད་དུ། །འོད་ཀྱིས་རྣམ་པ་འདྲ་བ་ཡིས། །ཉིན་མོ་བལྟས་ལྟར་གསལ་བར་སྣང་། །དེ་ནས་དེ་ཡི་ངང་ཉིད་ལ། །གསལ་མཁན་དེ་ཡི་ངོ་བོ་ལ། །ཧྲིག་གེ་རྗེན་ནེ་བཞག་པ་ཡིས། །གསལ་སྟོང་འདྲེས་པའི་ངང་དེ་ལ། །ཡུན་རིང་བར་དུ་གནས་པར་བྱུང་། །དེ་ནས་ཁྲུམས་སྟོད་ཚེས་གསུམ་ནུབ། །ཡིན་ཅིང་ཚེས་བཞིའི་ནུབ་པར་ལའང་། །སྔར་བྱུང་འདྲ་བ་ཡུན་རིང་དུ། །གསལ་ཉམས་ཤར་ཅིང་འོད་གསལ་ཟིན། །མཚམས་ཀྱི་བཅད་རྒྱ་དམ་པ་དང་། །ཨོ་རྒྱན་རྗེ་ཡི་ཟབ་ཆོས་ལ། །རྩེ་གཅིག་བསྒྲུབ་པའི་བྱིན་རླབས་ཡིན། །ཆེད་དུ་འོད་གསལ་མ་བཟུང་ཡང་། །འབད་མེད་ཟིན་པར་མི་མཚར་རམ། །ས་མ་ཡ་གུ་བྱ།། མོ་མནྡྷ་གུ་ཧྱ་ཡེ། དཔལ་རྡོ་རྗེ་འཆང་ལ་ཕྱག་འཚལ་ལོ། །སྤྲང་གསང་སྔགས་རྒྱུད་སྡེ་མང་པོ་ལ། །སྔར་ཡང་ཡང་ལན་འགའ་མཇལ་མོད་ཀྱང་། །རྒྱུད་ཆ་ཚང་ཞིག་ད་རུང་ལྟ་
འདོད་པས། །སེམས་འགྱུ་བ་ལན་གྲངས་དུ་མ་འཕྲེང་། །རྒྱུད་སྡེ་ཕས་ཨི་གཡར་ཐེ་ཚོམ་ཆེ། །གསེར་དངུལ་བཀྲ་མའི་གླེགས་བམ་ཆུང་ངུ་ཞིག །ང་ཡི་ལག་ཏུ་འདུག་པའི་ཉམས་སྣང་བྱུང་། །གླེགས་བམ་ལེགས་པར་གཡར་བར་འདུག་གི་སྙམ། །ཕྱི་ཉིན་གླེགས་བམ་གདན་འདྲེན་སྔ་མོར་སོང་། །ད་ལྟ་གདན་འདྲེན་ཕྱིན་ཡོད་སྙམ་ཙམ་ན། །ཉམས་ཀྱི་སྐབས་ལ་གར་གདའ་མཐོང་སྣང་བྱུང་། །དེ་ནས་གླེགས་བམ་རྣམས་ལ་སྤྲོས་རུམ་དང་། །བརྒྱ་ཕྱག་འགའ་དང་མཎྜལ་བརྒྱ་རྩ་ཕུལ། །དེ་ནས་རྒྱུད་སྡེ་རྣམས་ལ་མཇལ་བ་ལས། །འབྱམས་ལྟས་གླེགས་བམ་གླེགས་ཤིང་བལྟས་པ་ཡིས། །ཉིན་གཅིག་གླེགས་བམ་བཅུ་གསུམ་ཁ་ཕྱེས་ནས། །ཧང་སེ་བལྟས་ནས་སླར་ཡང་གླེགས་ཐག་དཀྲིས་། །དེ་ནས་མོས་ཀྱི་ཞིབ་པར་བལྟས་པ་ལ། །ནུབ་གཅིག་རབ་རིབ་འཁྲུལ་པའི་རྨི་ལམ་ན། །སྐྱིལ་ཀྲུང་བཅས་ནས་བར་སྣང་ཁམས་སུ་འཕུར། །ཤིན་ཏུ་ཡུན་རིང་ཡུལ་ཁམས་མང་པོ་བཅད། །ས་ཆ་ཡུལ་རིས་བྲག་སོགས་དཀར་པོ་དང་། །ས་ཆ་བྲག་དང་གྲོང་ཁྱེར་ནག་པོ་སོགས། །མང་པོ་བཅད་ནས་ཨོ་རྒྱན་ཡུལ་དུ་ཕྱིན། །ཨོ་རྒྱན་གནྡྷོ་ལ་
ཡི་གཙུག་ལག་ཕྱིན། །གཙུག་ལག་ཁང་ཆེན་བསམ་གྱིས་མི་ཁྱབ་པའི། །ཕྱི་ཡི་ཁྱམས་ལ་བདག་ཉིད་ཕྱིན་ནས་བལྟས། །ཀ་བ་ཀ་ཞུ་འདོམ་པས་མི་ཁྱིག་ཙམ། །ཐམས་ཅད་རྡོ་ལས་གྲུབ་པ་འདྲ་བ་འདུག །གཙུག་ལག་འདི་ཡི་ཆེ་ཆུང་ཅི་ཡིན་སྨྲས། །དེ་ཚེ་གཅིག་གིས་བདག་ལ་འདི་སྐད་སྨྲས། །གཙུག་ལག་འདི་ལ་རྩག་གསུམ་ཡོད་པ་ཡིན། །སྟེང་ཁང་ཆུང་བ་དེ་ཡི་ཚད་དང་ནི། །རི་བོ་ཆེ་ཡི་ལྷ་ཁང་མཉམ་པ་ཡིན། །གཙུག་ལག་ཁང་ཆེན་དེ་ཡི་ནང་ན་ནི། །གསང་སྔགས་རྒྱུད་སྡེའི་གླེགས་བམ་ཁོ་ན་ཡིན། །གཙུག་ལག་རིམ་གསུམ་ཁེངས་ནས་ཡོད་དོ་སྐད། །དེ་ལ་བདག་གིས་དད་པ་ཆེར་སྐྱེས་ནས། །བསྐོར་བ་ཅིག་ནི་ཨེ་ཐུབ་སྙམ་ནས་བཏུད། །ཅི་ལྟར་བྱས་ཀྱང་བསྐོར་བ་མ་ཐུབ་རྨིས། །རྒྱུད་དོན་མཐའ་དག་མི་རྟོག་བརྡ་རུ་གོ། ༈ །།ཡང་ནི་ཁང་བཟང་མང་པོའི་ནང་དུ་ཕྱིན། །མཛོད་ནི་མང་པོ་སྒོ་ལྕགས་རྒྱབ་པ་དང་། །དེ་ཡི་ནང་དང་ཉེ་ལོགས་ཐམས་ཅད་དུ། །ཨོ་རྒྱན་གྱིས་སྦས་གཏེར་ཁ་དཔག་མེད་འདུག །འགའ་ཞིག་བདག་གིས་འདོན་གྲབ་བྱས་ཙམ་ན། །གཏེར་སྲུང་གཡག་ནག་འཇིགས་སུ་རུང་བ་འགས། །རྭ་
བཀུག་འཇིགས་ཚུལ་སྟོན་པའི་རྨི་ལམ་བྱུང་། །གསང་སྔགས་རྒྱུད་སྡེ་ཤིན་ཏུ་གཉན་པར་གོ །ཚོགས་འཁོར་ལན་འགའ་བསྐོར་ཞིང་གསོལ་བ་བཏབ། །འཇམ་པའི་དབྱངས་དང་རྡོ་རྗེ་རྣལ་འབྱོར་མ། །ནམ་མཁར་བྱོན་ནས་བྱིན་གྱིས་བརླབས་སྣང་ནི། །ཉམས་དང་རྨི་ལམ་སྐབས་སུ་གསལ་བར་བྱུང་། །མ་ནོར་གོ་བ་ཅུང་ཟད་སྐྱེས་སམ་སྙམ། །རྩེ་གཅིག་དད་པས་རྒྱུད་ལ་བལྟས་པ་ཡི། །རང་གི་རྐང་པ་གཡོན་པའི་མཐིལ་ནས་ནི། །ཁྲག་ནི་དཔག་ཏུ་མེད་པ་ཐོན་པ་དང་། །སོ་ནས་སྲིན་བུ་འགའ་རེ་བུད་པ་རྨིས་། །སྒྲིབ་པ་ཅུང་ཟད་དག་པའི་བརྡ་རུ་གོ །རྣམ་རྒྱལ་སྒང་གིས་དཀོར་བདག་དེ། །གླེགས་བམ་རྗེས་འབྲང་གནོད་པ་བྱེད་པ་ཡི། །ལྟས་བྱུང་དམིགས་པས་གཟིར་བས་ཞི་བར་གྱུར། །རྒྱུད་དོན་གོ་བ་དག་སྣང་ཆེན་པོ་དང་། །རྡོ་རྗེ་འཆང་དང་དངོས་སུ་མཇལ་འདྲ་བའི། །བློ་ཁ་རྫོགས་ཤིང་ཐེ་ཚོམ་ཆོད་པར་བྱུང་། །རྨི་ལམ་ཡུལ་དུ་ཞྭ་དམར་སྤྲུལ་པའི་སྐུ། །ཆོས་ཀྱི་དབང་ཕྱུག་མཇལ་ཞིང་གསུང་གླེང་མཛད། །ཁྱད་པར་རྒྱལ་བའི་དབང་པོ་ཀརྨ་པ། །ཆོས་གྲགས་རྒྱ་མཚོ་ཞྭ་ནག་ཆོས་གོས་ཅན། །བདག་སོགས་འགྲོ་བ་
དཔག་ཏུ་མེད་པ་ལ། །གསང་སྔགས་ཆོས་ནི་དཔག་མེད་གསུངས་པར་རྨིས། །རྒྱུད་འབུམ་བལྟས་ཚེ་འཁྲུལ་སྣང་བྱུང་ཚུལ་ཏེ། །གཞན་ལ་བཤད་ན་ཧ་ཧའི་གད་རྒྱང་འཕེལ། །འོན་ཀྱང་བདག་གིས་དད་པའི་ཤུགས་དང་ནི། །གསང་སྔགས་རྒྱུད་སྡེའི་བྱིན་རླབས་ཡིན་ནམ་སེམས། །ཉམས་མཚར་ཡི་གེའི་རིས་སུ་བྱས་པ་ཡིན། །ཞེས་པ་གནས་མདོ་ཀརྨ་ཆགས་མེད་ཀྱིས་བགྱིས་པའོ།། ༈ །།ཡང་རྨི་ལམ་ལུང་བསྟན་ལ། ན་མོ་གུ་རུ་ཀརྨ་ཀ་དྷརྨ་དྷཆུ་བཛྲ་ཡེ། བདག་རང་ལོ་ཞེ་གཉིས་པ་ས་སྟག་ལོ་འབྲུག་གི་ཟླ་བའི་ནག་པོའི་ཕྱོགས་ཀྱི་ཚེས་བཅུ་ལ་སྔ་དྲོ་དང་དགོང་མོ་ཞི་བ་དང་དྲག་པོའི་སྦྱིན་སྲེག་ཀྱང་བྱས། མཚམས་དམ་པའི་ངང་ནས་ཐུགས་རྗེ་ཆེན་པོ་ཞི་བའི་དམིགས་རིམ་བྱེད་ཅིང་རྒྱལ་བ་རྒྱ་མཚོ་ལྷ་དགུ་བསྙེན་ཅིང་མནལ་དུ་སོང་བའི་རྨི་ལམ་ན། རྗེ་ཆོས་དབྱིངས་རྡོ་རྗེ་དང་མཇལ་ཏེ། རྒྱབ་ནས་འདེད་མཁན་འགའ་ཡང་འདུག་ནས། སང་འབྱོན་ཞོར་ང་ཡི་རི་ཁྲོད་ན་ཡང་ཕེབས་དགོས་ཞུས་པས། དེ་ག་འོང་གསུངས་ནས་འདེད་མི་དང་དགུག་མི་འགའ་ཡང་གདའ་ནས་ཅི་དྲག །སྐུ་འོ་བརྒྱལ་ཞུས་ཤིང་ང་རང་ཡང་སྐྲག་ཛབ་བེ་འདུག་པ་ལ། རྒྱལ་
བའི་དབང་པོའི་ཞལ་ནས། རང་ལུས་རྡོ་རྗེ་ཕག་མོའི་ཐུགས་ཀར་བསྒོམ་ལ། སྐུའི་བ་སྤུའི་བུ་ག་ནས་མཚོན་ཆ་སྣ་ཚོགས་འཕྲོས་པས་གནོད་བྱེད་ཐམས་ཅད་ཕྱེ་མར་བརླགས་ཏེ། རི་རབ་དང་ཁྲོ་ཆུའི་ཕ་བང་མང་པོ་སྤྲོས་ནས་མནན་པར་བསྒོམ། དམིགས་པ་འདི་བསྒོམ་ལ་ཕ་རོལ་གྱི་གནོད་པ་འོང་མི་སྲིད་ཅིང་། གཤེད་མའི་ནང་དུ་སོང་ཡང་མཐོང་མི་སྲིད་པར་འདུག་གསུངས་ནས། ལྷོ་བྲག་སོག་པོས་རྐུ་མ་མཐོང་དུས་ཡང་འདིའི་ཏིང་ངེ་མཛད་པ་ཡིན་པ་འགྲུབ་གཅིག་གསུངས། དམིགས་པ་དེ་མཚན་རིང་ལ་ཉམས་སུ་ལེན་པ་གཅིག་བྱུང་བས། ཕྱིར་ནངས་ཡི་གེར་བཀོད་པའོ། །ས་མ་ཡ། ཁ་ཐཾ། སྤྱི། རྒྱ་རྒྱ་རྒྱ༔ རྒྱལ་དབང་བཅུ་པ་འཇང་ཡུལ་དུ་སོག་དམག་གིས་རྐྱེན་གྱི་མྱུར་ཕེབས་དགོས་པའི་རྨིས་ལྟས་ཨ་རཱ་གས་ཉམས་སྣང་ཡིན་པར་འདུག །བཀྲ་ཤིས་དགེའོ།། ༈ །།དགུང་ལོ་སོ་ལྔ་སྐབས་སྒྲུབ་ཁང་རྨིས་ལྟས་ནི། ན་མོ་ལོ་ཀེཌཤྭ་ར་ཡེ། ཀུན་མཁྱེན་པདྨའི་ཞབས་ལ་འདུད། །སྤྱན་དང་མངོན་ཤེས་མི་ལྡན་ཞིང་། །ལྷ་ཡི་ལུང་བསྟན་མ་མཆིས་ཀྱང་། །རྨི་ལམ་འཁྲུལ་བའི་རྫུན་སྣང་ལ། །བདེན་བདེན་འདྲ་བ་འགའ་རེ་བྱུང་། །རང་ལོ་སོ་ལྔ་
ལོན་པའི་དུས། །མཚམས་བསྡམས་བསྙེན་སྒྲུབ་བྱེད་པའི་ཚེ། །སྒྲུབ་ཁང་འདི་ཉིད་རྨིང་སྟེང་ནུབ། །རབ་རིབ་འཁྲུལ་བའི་རྨི་ལམ་ན། །མཆོད་རྟེན་འདྲ་བའི་བང་རིམ་ནི། །བཅུ་གསུམ་དཀར་གསུམ་ཟས་ཀྱིས་ཁེངས། །དེ་ལ་འཛེགས་ནས་སྟེང་དུ་ཕྱིན། །དེ་ལ་ལུང་བསྟན་ཡི་གེ་གཅིག །སྣང་བའི་ཚིག་ལ་འདི་སྐད་གདལ། །བཅུ་གསུམ་སྒྲུབ་པའི་བང་རིམ་ལ། །བྱང་ཆུབ་སྙིང་པོའི་ཕོ་བྲང་གདའ། །ཟེར་བའི་ཡི་གེ་གསལ་བར་མཐོང་། །སྒྲུབ་ཁང་འདི་ལ་བེད་ཆོད་ཅིང་། །མཚམས་སྒྲུབ་འགྲུབ་པའི་ལྟས་སུ་གོ །གནས་ཀྱི་ལུང་བསྟན་བརྡ་ཙམ་མོ།། །།མ་འོངས་གནས་འདི་བྱུང་ཚུལ་ནི། །རྒྱལ་བ་རྒྱ་མཚོའི་ནང་སྒྲུབ་ཀྱིས། །ས་གཞི་གནས་ཁང་གདན་ཁྲི་རྣམས། །བྱིན་རླབས་དམིགས་རིམ་བྱེད་པའི་ཚེ། །རྨི་ལམ་འཁྲུལ་པའི་སྣང་བ་ལ། །མ་འོངས་པ་ན་གནས་འདི་རུ། །གནས་མདོ་བླ་མའི་གདན་ས་ཡིན། །ཟེར་བ་གཅིག་ནི་ཨེ་འོང་ཙམ། །དེ་སྐད་བདག་གིས་སྨྲས་པའི་ཚེ། །རང་བཞིན་སྟོང་པའི་སྒྲ་སྒྲོག་པ། །དེ་ལྟར་འོང་ངོ་གསལ་བར་ཟེར། །བདག་གིས་གནས་ཁང་འདི་ཉིད་ལ། །གསེར་འཕྲུ་མི་
ཚད་བཙུགས་པ་རྨིས། །མ་འོངས་གནས་ཀྱི་ལུང་བསྟན་ཡིན། །དགོན་གནས་ལུང་བསྟན་བརྡའ་ཙམ་མོ།། །།ཨེ་མ་ཧོ། སྣོད་ལྡན་སློབ་མ་ལུང་བསྟན་ནི། །བླ་མ་ཐུགས་རྗེ་ཆེན་པོ་ལ། །རྩེ་གཅིག་གསོལ་བ་བཏབ་པའི་དུས། །འཁྲུལ་པའི་རྨི་ལམ་རྫུན་སྣང་ལ། །རེ་མགོ་ཁེབ་པའི་ཡིག་ཆེན་ལ། །ཡིག་འབྲུ་དབང་གི་ཁ་དོག་ཅན། །བདག་གི་སློབ་མའི་ལུང་བསྟན་མཐོང་། །ད་ལྟའི་རྩ་གྲྭ་བཞི་པོ་འདི། །མི་ཐེ་བ་ཡི་འདི་ཕྱོགས་སུ། །ཁྱོད་ལ་སློབ་མ་བླ་མ་བཅུ་གསུམ་འབྱུང་། །ཀཿཐོག་བླ་མ་དང་བཅས་པའི། །ཕྱོགས་རྣམས་ཀུན་ཏུ་ཁྱོད་སློབ་བླ་མ་ནི། །ཉེར་བདུན་ཡང་ན་བཅུ་བདུན་འབྱུང་། །དེ་སྐད་ཟེར་བའི་ཡི་གེ་ཞིག །གསལ་བར་མཐོང་བའི་སྣང་བ་བྱུང་། །སྐལ་ལྡན་སློབ་མའི་ལུང་བསྟན་ཡིན། །རྨི་ལམ་འཁྲུལ་པ་ཤིན་ཏུ་རྫུན། །འོན་ཀྱང་སྤྲོ་བ་འཕེལ་ཕྱིར་བྲིས།། ༈ །།ཨེ་མ་ཧོ། བདག་གི་ཆོས་བརྒྱུད་ལུང་བསྟན་ནི། །ཐུགས་རྗེ་ཆེན་པོ་སྒྲུབ་པའི་དུས། །རྨི་ལམ་འཁྲུལ་པའི་ཉིང་འཁྲུལ་ལ། །མཚུངས་མེད་ཨོ་རྒྱན་རིན་པོ་ཆེ། །སྐུ་ནི་མི་མངོན་ནམ་མཁའི་
ངང་། །གསུང་ནི་གསལ་དག་སྒྲ་དང་བཅས། །ནད་གདོན་བར་ཆད་མི་འབྱུང་ཞིང་། །མི་རབས་བཅོ་ལྔའི་བར་དུ་ནི། །ཕ་རྗེས་བུ་ཡིས་སླེབས་པ་འོང་། །དེ་སྐད་གསལ་བར་ཚིག་ཏུ་གསུངས། །དེ་ལ་འཁྲུལ་པ་མི་མངའ་ན། །བདག་གི་ཆོས་བརྒྱུད་འཛིན་བྱེད་ཅིང་། །སྤྲང་པོ་བདག་དང་མཉམ་པ་ཡི། །བླ་རབས་བཅོ་ལྔ་འབྱུང་ངམ་སྙམ། །ད་ལྟ་སྨྲས་ན་ཀུན་གྱིས་འཕྱ། །མ་འོངས་ང་ཡི་བརྒྱུད་འཛིན་རྣམས། །ཚིག་འདི་གཅེས་པར་འཛིན་ཡང་སྲིད། །དེ་ཕྱིར་ཡི་གེར་བྲིས་པ་ཡིན།། ༈ །།ཨེ་མ་ཧོ། ཆོས་བརྒྱུད་འཁོར་སློབ་བྱུང་ཚུལ་ནི། །གྲ་ཡི་ཚུལ་དུ་འདི་ལྟར་མཐོང་། །མགོན་པོའི་བསྙེན་པ་བྱེད་པའི་དུས། །གཏི་མུག་འཁྲུལ་པའི་རྨི་ལམ་ན། །རྡོར་དྲིལ་སུམ་བརྒྱ་ལྷག་ཙམ་ཞིག །ཐམས་ཅད་བསྒྲིགས་ནི་འདུག་པ་ལ། །གཅིག་ནི་རང་གིས་དཀྲོལ་བྱས་ཤིང་། །རྡོར་དྲིལ་དེ་ཡི་མགོ་གྲངས་ནི། །གྲྭ་པ་མང་པོ་ཡོད་སྙམ་ཞིང་། །རྡོར་དྲིལ་འདི་དག་ཐམས་ཅད་ནི། །ངེད་ཚང་དཔོན་སློབ་མགོ་གྲངས་ཡིན། །སྨྲས་ཤིང་དགའ་དགའ་བྱས་པ་རྨིས། །བདག་ལ་དེ་ལྟར་འོང་བ་དཀའ། །བླ་རབས་བཅོ་ལྔའི་བར་
དག་གི །གྲོ་བའི་གྲངས་ཁ་ཡིན་ནམ་སྙམ། །འཁྲུལ་པའི་རྨི་ལམ་བདེན་ཆ་མེད། །བདེན་ཞེན་རློམ་སེམས་མ་མཆིས་ཀྱང་། །ཉམས་མཚར་སྤྲོ་བ་སྐྱེད་ཕྱིར་བྲིས། །ཐོག་ཏུ་ཕོག་རུང་མ་ཕོག་རུང་། །རྨི་ལམ་རྨིས་རབས་ཡིན་པའི་ཕྱིར། །བདག་ལ་རྫུན་གྱི་ཉེས་པ་མེད། །ཨ་རཱ་གས་སྨྲས་དོན་ཡོད་པར་གྲུབ་པའོ། །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།