གསུང་མགུར་སྐོར། ན་མོ་གུ་ར་ཝེ། སྐྱབས་གནས་ཕྱོགས་བཅུའི་རྒྱལ་བ་སོགས།
ན་མོ་གུ་ར་ཝེ། སྐྱབས་གནས་ཕྱོགས་བཅུའི་རྒྱལ་བ་སྲས་བཅས་མང་ལགས་ཀྱང་། །རྩ་བའི་བླ་མ་དཀོན་མཆོག་ཀུན་འདུས་རང་ཡིན་པར་འདུག་གོ །དམ་ཆོས་ཕུང་པོ་བརྒྱད་ཁྲི་བཞི་སྟོང་ནི་མང་ཡང་། །དམ་ཆོས་ཀུན་འདུས་ཡི་གེ་དྲུག་པ་རང་ཡིན་པར་འདུག་གོ །ཚོགས་བསགས་སྒྲིབ་བྱང་བྱ་ཐབས་བརྒྱད་སྟོང་ཁྲི་འབུམ་ཡོད་ཀྱང་། །སྟབས་བདེ་ཕན་ཡོན་ཆེ་བ་ནི་ཕྱག་དང་བསྐོར་བ་རང་ཡིན་པར་འདུག་གོ །གདམས་ངག་ཟབ་མོ་ཁུངས་བཙུན་སྐར་ཚོགས་དང་འདྲ་ཡང་། །མོས་གུས་གསོལ་བ་འདེབས་པ་ནི་ཟབ་ཆོས་གཏིང་པོ་རུ་འདུག་གོ །ཕྱག་རྒྱ་ཆེན་པོ་ལ་བཤད་ཆོས་བརྒྱ་ཕྲག་བས་མང་བར་གདའ་སྟེ། །དོན་རྩ་རང་གི་སེམས་ཉིད་རིག་རིག་ཏུར་ཏུར་པོ་འདི་ཡིན་པར་འདུག་གོ །ཉམས་ལེན་སྐྱོང་ཚུལ་ལོ་ཡག་གི་སྙེ་མ་འདྲ་སྟེ། །མ་ཡེངས་རང་ངོ་རྒྱུན་དུ་སྐྱོངས་བ་ཉམས་ལེན་གྱི་དངོས་པོ་འདི་རང་ཡིན་པར་འདུག་གོ །གནས་པ་གནས་པ་ཟེར་ཡང་མི་དྲན་ཀྱི་ལེ་གནས་པ་འདི་ཡིན་པར་འདུག་གོ །འགྱུ་བ་འགྱུ་བ་ཟེར་ཡང་མི་དྲན་དགུ་དྲན་མི་འཕྲོ་དགུ་འཕྲོ་འདི་ཡིན་པར་འདུག་གོ །མ་རིག་མ་རིག་ཟེར་ཡང་རང་སེམས་
རང་གི་མ་རིག་པ་འདི་ཡིན་པར་འདུག་གོ །སེམས་ངོ་མ་མཐོང་མ་མཐོང་ཟེར་ཡང་སེམས་ཀྱི་ངོ་བོ་ཅིར་ཡང་མ་གྲུབ་པ་འདི་ཡིན་པར་འདུག་གོ །སྒོམ་ཆེན་སྒོམ་ཆེན་ཟེར་ཡང་འདི་སྒོམ་གྱི་དམིགས་གཏད་མེད་པ་འདི་ཡིན་པར་འདུག་གོ །ལྟ་བ་ལྟ་བ་ཟེར་ཡང་རང་སེམས་རང་གི་ལྟ་བ་འདི་ཡིན་པར་འདུག་གོ །སྤྱོད་པ་སྤྱོད་པ་ཟེར་ཡང་དགེ་སྒྲུབ་སྡིག་སྤང་བརྩོན་པ་འདི་ཡིན་པར་འདུག་གོ །འབྲས་བུ་འབྲས་བུ་ཟེར་ཡང་རང་སེམས་ལ་གཏན་པ་ཐོབ་ནས་སངས་རྒྱས་པ་འདི་ཡིན་པར་འདུག་གོ །དེ་སྐད་ཀརྨ་ཨ་རཱ་གས་སྨྲས་པ་ལྕི་རྒྱ།། ༈ །ན་མོ་གུ་རུ། དལ་འབྱོར་མི་ལུས་ཐོབ་པར། །ན་སྨོན་སྡུག་སྐད་མ་འདོན། །ནམ་འཆི་ངེས་པ་མེད་པས། །འགྱོད་མེད་དགེ་ལ་བརྩོན་ཅིག །ཕྱི་མ་མི་ལུས་ཐོབ་ཕྱིར། །ཉ་སྡོམ་བསྙེན་གནས་སྲུངས་ཤིག །བོད་ཀྱི་ལྷ་སྐལ་ཡིན་པས། །ཡིག་དྲུག་རྒྱུན་དུ་ཐོན་ཅིག །བསྒོམ་གྱི་རྩ་བ་ཡིན་པས། །སེམས་ཀྱིས་སེམས་ལ་ལྟོས་ཤིག །མཐོང་རྒྱུ་ཅི་ཡང་མེད་ན། །དེ་ཡི་ངང་ལ་ཞོག་ཅིག །མི་དྲན་དགུ་དྲན་འཚུབས་ན། །དྲན་པའི་ངོ་བོར་ལྟོས་ཤིག །བལྟས་པས་དྲན་པ་ཡལ་ན། །དེ་ཡི་ངང་
ལ་ཞོག་ཅིག །བཞག་པས་མི་འདུག་རྒྱུག་ན། །གར་འགྲོ་ལྟོས་ལ་ཐོངས་ཤིག །ནམ་ཞིག་འཆི་བའི་དུས་དེར། །ཕྱི་དབུགས་ཆད་པའི་མཚམས་ནས། །གསལ་སྟོང་ཚུར་ལ་འཆར་བ། །དེ་དུས་ངོས་བཟུང་གྱིས་ཤིག །དུས་དང་རྣམ་པ་ཀུན་ཏུ། །སྐྱེ་སླ་ཕན་ཡོན་ཆེ་བའི། །བདེ་བ་ཅན་དུ་སྐྱེ་བར། །རྒྱུན་དུ་སྨོན་ལམ་ཐོབ་ཅིག །ཅེས་དྲག་མགོན་གྱིས་བསྐུལ་ངོར། རཱ་ག་ཨ་སྱས་ཚེས་བཅུའི་སྔ་དྲོ་བྲིས་པའོ།། ༈ །།ན་མོ་པདྨ་ཀ་ར་ཡེ། ཕ་པདྨ་འབྱུང་གནས་ཞབས་ལ་འདུད། །ཕ་ཁྱེད་ཀྱི་གསུངས་ལ་བློ་གཏད་ནས། །སྤྱང་རྩེ་གཅིག་བསྒྲུབས་པ་བྱས་པ་ལ། །ད་བསམ་ཞིང་བློ་སེམས་བདེ་བར་བྱུང་། །ཡུལ་རྒྱ་ནག་ལོངས་སྤྱོད་གནས་པ་དེར། །རྗེ་རྒྱ་ནག་ཁྲིམས་ཀྱི་རྒྱལ་པོ་དེས། །ས་འཛམ་གླིང་ཕྱེད་ཀྱི་བདག་པོ་བྱས། །དུས་དེང་སང་མཐའ་མིས་ཕུད་ཅེས་ཐོས། །དེ་བསམ་ཞིང་རྣལ་འབྱོར་སྐྱོ་བ་སྐྱེས། །སྟོབས་མངའ་ཐང་ལ་སྙིང་པོ་མི་འདུག་པས། །རང་སྒྲུབ་པ་བྱས་པ་སྐྱིད་དུ་ཚོར། །བུ་སྐྱིད་དུ་ཚོར་རོ་རྟོགས་ལྡན་པ། །འཇང་ས་ཐམ་རྒྱལ་པོའི་ཕོ་བྲང་ན། །དངུལ་རིན་ཆེན་དག་ལ་བོང་བ་བདུན། །དེ་མཐའ་མི་
ཀུན་གྱི་འཕྲོག་གོ་ཞེས། །དེ་བསམ་ཞིང་སྐྱོ་བ་སྙིང་ནས་སྐྱེས། །ནོར་ལོངས་སྤྱོད་ལ་སྙིང་པོ་མི་འདུག་པས། །རང་སྒྲུབ་པ་བྱས་པ་སྐྱིད་དུ་ཚོར། །བུ་སྐྱིད་དུ་ཚོར་རོ་རྟོགས་ལྡན་པ། །རྗེ་མཁས་གྲུབ་ལུང་རིགས་ཉི་མ་དེ། །གནུབ་སངས་རྒྱས་ཡེ་ཤེས་སྤྲུལ་པར་གྲགས། །ལྷ་ཁྲོ་ཆུ་བསྒྲུབ་པའི་བརྒྱུད་པར་འཁྲུངས། །དཔལ་རྡོ་རྗེ་འཇིགས་བྱེད་སྒྲུབ་པའི་ཚེ། །སྐུ་དངོས་སུ་བསྟན་ནས་རོལ་རྩེད་མཛད། །ལྷ་འཇམ་དཔལ་དུག་གདོང་ལོ་གསུམ་སྒྲུབ། །ཡུལ་ཚ་བའི་བརྟན་མས་དམ་བཅའ་ཕུལ། །ཁོང་དེ་འདྲའི་ནུས་ལྡན་རྣལ་འབྱོར་ལ། །གཞན་ཕལ་པས་མཐུ་སྡིག་བྱས་ཞེས་ཐོས། །ད་ཞིང་ཁམས་གཤེགས་པས་བདེན་བདེན་འདྲ། །འདི་བསམ་ཞིང་སྐྱོ་བ་སྙིང་ནས་སྐྱེས། །ཚེ་མི་རྟག་འཆི་བ་མ་དྲན་ན། །ཆོས་བྱས་པས་ཚེ་ཡི་ཆེ་ཐབས་རེད། །རང་འཆི་བ་དྲན་པ་སྐྱིད་དུ་ཚོར། །བུ་སྐྱིད་དུ་ཚོར་རམ་རྟོགས་ལྡན་པ། །རྒྱུད་མན་ངག་ནང་ལ་བལྟས་ན་ཡང་། །ཆོས་ཟབ་ལམ་གཏུམ་མོའི་གདམས་ངག་དང་། །ཆོས་གྲོལ་ལམ་ཕྱག་རྒྱ་ཆེན་པོ་གཉིས། །ཆོས་འདི་ལས་ཟབ་པ་མི་འདུག་པས། །རང་ཉམས་ལེན་མ་ནོར་སྐྱིད་དུ་ཚོར། །བུ་སྐྱིད་དུ་ཚོར་རམ་
རྟོགས་ལྡན་པ། །བུ་བརྩོན་འགྲུས་བསྐྱེད་དེ་བལ་པོ་བ། །ཁ་བྱིང་བ་སེང་བླའི་དབྱངས་ཆུང་འདི། །སེམས་སྐྱོ་ཤས་སྐྱེས་ནས་བུ་ལ་སྤྲིང་། །ཞེས་རཱ་ག་ཨ་སྱས་སྨྲས་པའོ། །ན་མོ་གུ་རུ་ཤིནྟཾ་ཀྲོ་དྷ་ཡེ། དཔོན་དད་ལྡན་ཀརྨ་ཚེ་བརྟན་པས། །ཆོས་ཉིད་བར་དོ་དྲུག་གི་ངོ་སྤྲོད་ལ། །སྔོན་དེ་ལས་མང་ཙམ་དགོས་གསུངས་པས། །དུས་ད་ལྟ་ངེད་རང་ཡོན་མཆོད་རྣམས། །དུས་སྐྱེ་གནས་བར་དོའི་གནས་སྐབས་ཡིན། །ད་འདི་ལ་ངོ་སྤྲོད་ཅུང་ཙམ་ཞུ། །མ་འགྲོ་དྲུག་སེམས་ཅན་ཐམས་ཅད་ཀུན། །སྔོན་ཚེ་རབས་མང་པོའི་ཕ་མ་ཡིན། །དེ་མ་ཤེས་དགྲ་དང་སྡང་སེམས་ཚེ། །བྱ་རི་དྭགས་གཡུང་དྭགས་ཟས་ཕྱིར་གསོད། །འདི་བར་དོའི་འཁྲུལ་སྣང་ཆེ་ཤོས་ཡིན། །བྱམས་སྙིང་རྗེ་སྒོམས་ཤིག་རིགས་ཀྱི་བུ། །རང་གཅིག་པུར་འགྲོ་བ་མ་ཤེས་ནས། །གཉེན་བུ་ཚ་གྲོགས་ལ་གདུང་སེམས་ཆེ། །དེ་མི་རྟག་དབང་མེད་སོ་སོར་འགྲོ། །གྲོགས་སེམས་མཐུན་གཅིག་ཀྱང་ཁྲིད་དབང་མེད། །སེམས་སྐྱོ་བ་སྐྱེད་ཅིག་རིགས་ཀྱི་བུ། །ནོར་མི་རྟག་སྒྱུ་མར་མ་ཤེས་ན། །ནོར་ཆོག་ཤེས་མེད་པ་སེར་སྣས་བཅིངས། །མི་གཞན་གྱི་ནོར་
ལ་རྐུ་འཕྲོག་བྱེད། །རང་ཤི་ཚེ་ལག་པ་སྟོང་པར་འགྲོ། །ཁབ་སྐུད་པ་ཙམ་ཡང་འཁྱེར་དབང་མེད། །ད་དགོས་མེད་བསྒོམ་ཞིག་རིགས་ཀྱི་བུ། །ཚེ་འཁོར་བ་ཐོག་མ་མེད་པ་ནས། །གནས་ངན་སོང་བཙོན་རར་འཕེན་པའི་དགྲ། །ལས་མི་དགེ་སྡིག་ལ་མི་འཚེར་པ། །འདི་བར་དོའི་འཁྲུལ་སྣང་ཆེ་ཤོས་ཡིན། །དགྲ་ཐུབ་ཅེས་སྡིག་པའི་ལས་ཡིན་པས། །དགྲ་འདི་ལ་དགྲ་ལེན་བཤགས་སྦྱོང་མཛོད། །ཚེ་འདི་དང་ཕྱི་མ་བར་དོ་ལ། །རང་བདེ་སྐྱིད་སྦྱིན་པའི་གཉེན་བཤེས་དེ། །ལས་དགེ་བཅུ་ཁོ་ནར་ཡིན་ངེས་པས། །གཉེན་འདི་ལ་འཚོ་སྐྱོངས་གང་དྲག་མཛོད། །ལར་འཁོར་བ་མཐའ་མེད་འཁྱམས་པ་འདི། །ཕྱི་དགྲ་བགེགས་སུ་ཡང་མ་ལེན་ཏེ། །ནང་རང་སེམས་འཁྲུལ་པ་གཅིག་པུའི་ལེན། །སེམས་རྩ་བ་ཆོད་ཅིག་རིགས་ཀྱི་བུ། །དོན་རང་སེམས་རང་གིས་མ་རྟོགས་ན། །བཀའ་མདོ་རྒྱུད་ཤེས་ཀྱང་ཁ་བཤད་ཙམ། །དོན་རང་སེམས་ལྟོས་ཤིག་རིགས་ཀྱི་བུ། །སེམས་བལྟས་པས་གཟུགས་དང་ཁ་དོག་མེད། །དེ་སྟོང་ཉིད་ཡིན་ནོ་རིགས་ཀྱི་བུ། །དེ་སྟོང་ལྟ་ཧད་པོ་མ་ཡིན་ཏེ། །སེམས་རང་རིག་རང་གསལ་ས་ལེ་བ། །དེ་འོད་གསལ་
ཡིན་ནོ་རིགས་ཀྱི་བུ། །སེམས་ཡོད་མེད་གང་དུ་མ་གྲུབ་པ། །དེ་དབུ་མ་ཡིན་ནོ་རིགས་ཀྱི་བུ། །དེ་ཤེས་ན་ཤེས་བྱ་ཀུན་གྱི་རབ། །དོན་ཤེར་ཕྱིན་ཡིན་ནོ་རིགས་ཀྱི་བུ། །སེམས་བཅོས་བསླད་མེད་པར་རང་ངོ་ལྟ། །དེ་ཕྱག་ཆེན་ཡིན་ནོ་རིགས་ཀྱི་བུ། །དོན་དེ་ལ་མ་རྫོགས་གཅིག་ཀྱང་མེད། །ཆོས་རྫོགས་ཆེན་ཡིན་ནོ་རིགས་ཀྱི་བུ། །དེ་སྐྱོང་ན་འཁོར་བའི་སྡུག་བསྔལ་ཞི། །ཆོས་ཞི་བྱེད་ཡིན་ནོ་རིགས་ཀྱི་བུ། །སེམས་རྣམ་རྟོག་གང་ཤར་ཐད་ཀར་གཅོད། །ཆོས་གཅོད་ཡུལ་ཡིན་ནོ་རིགས་ཀྱི་བུ། །སེམས་དགའ་སྡུག་གང་ཤར་ངོ་བོར་ལྟ། །དེ་རོ་སྙོམས་ཡིན་ནོ་རིགས་ཀྱི་བུ། །སེམས་ཀྱི་ལེ་གནས་པ་ཞི་གནས་ཏེ། །དེ་སྟོང་པར་རྟོགས་ན་ལྷག་མཐོང་སྟེ། །དེ་ཟུང་འཇུག་ཡིན་ན་རིགས་ཀྱི་བུ། །ཕྱི་སྣང་བ་སྣ་ཚོགས་སྣོད་བཅུད་འདི། །ནང་རང་སེམས་ཀྱི་འོད་ཟེར་ཕྱི་ལ་འཆར། །དོན་རང་སེམས་ཡིན་ནོ་རིགས་ཀྱི་བུ། །ཚེ་འདི་དང་ཕྱི་མ་བར་དོ་གསུམ། །དོན་ཉམས་ལེན་ཡིན་ནོ་རིགས་ཀྱི་བུ། །དུས་ད་རེས་དབང་ཆོས་གསན་པ་སོགས། །ཁྱེད་དུས་གསུམ་དགེ་བ་ཅི་བསགས་མཐུས། །དཔོན་ཀརྨ་ཚེ་བརྟན་ཚེ་རིང་
ཞིང་། །དཔལ་འབྱོར་པ་མངའ་ཐང་འཕེལ་ཞིང་རྒྱས། །ལམ་བསྐྱེད་རྫོགས་གཉིས་ལ་བརྟན་པ་ཐོབ། །དུས་ནམ་ཞིག་མི་གནས་འཕོ་བའི་ཚེ། །ལྷ་རིག་འཛིན་གོ་འཕང་མྱུར་ཐོབ་ཤོག །ཨ་རཱ་གས་སོ།། ༈ །།ན་མོ་གུ་རུ་མཉྫའི་ཡེ། ཤེས་བྱའི་མཁའ་ལ་མཁྱེན་བརྩེའི་དཀྱིལ་འཁོར་རྒྱས། །རྒྱལ་བའི་བསྟན་པ་རབ་ཏུ་གསལ་མཛད་ཅིང་། །འགྲོ་བའི་མ་རིག་མུན་པ་སེལ་མཛད་པ། །འཇམ་དབྱངས་བླ་མ་ཆོས་ཀྱི་དབང་ཕྱུག་བདག་ལ་དགོངས། །བཙུན་པའི་གཟུགས་བརྙན་ཀརྨ་ཆགས་མེད་ངས། །འཁོར་གསུམ་དག་པའི་སྦྱིན་པ་བཏང་འདོད་ཀྱང་། །བཀྲེས་པའི་རིགས་གྱུར་སེར་སྣའི་མདུད་པས་བསྡམས། །སེར་སྣའི་མདུད་པ་གྲོལ་ཅིག་ཆོས་ཀྱི་དབང་། །བཙུན་པའི་གཟུགས་བརྙན་ཀརྨ་ཆགས་མེད་ངས། །ཉེས་ལྟུང་བྲལ་བའི་ཚུལ་ཁྲིམས་བསྲུང་འདོད་ཀྱང་། །ཉོན་མོངས་མི་ཤེས་བྱིས་པའི་དབང་དུ་སོང་། །གཉེན་པོ་མཐུ་དཔུང་བསྐྱེད་ཅིག་ཆོས་ཀྱི་དབང་། །བཙུན་པའི་གཟུགས་བརྙན་ཀརྨ་ཆགས་མེད་ངས། །ཁོང་ཁྲོ་བྲལ་བའི་བཟོད་པ་བསྒོམ་འདོད་ཀྱང་། །དུས་སྤྱོད་ངན་དང་རང་རྒྱུད་རྩུབ་པ་གདའ། །བཟོད་པའི་གོ་
ཆ་རྩོལ་ཅིག་ཆོས་ཀྱི་དབང་། །བཙུན་པའི་གཟུགས་བརྙན་ཀརྨ་ཆགས་མེད་ངས། །ལེ་ལོ་བྲལ་བའི་བརྩོན་འགྲུས་བརྩམ་འདོད་ཀྱང་། །གཉིད་དང་ལོང་གཏམ་སྙོམས་ལས་སྒྲོགས་སུ་ཚུད། །བརྩོན་འགྲུས་རྟ་མཆོག་སྩོལ་ཅིག་ཆོས་ཀྱི་དབང་། །བཙུན་པའི་གཟུགས་བརྙན་ཀརྨ་ཆགས་མེད་ངས། །ཞི་ལྷག་ཟུང་དུ་འབྲེལ་བ་སྒོམ་འདོད་ཀྱང་། །ཆོས་དང་ཆོས་མིན་བྱ་བས་རྣམ་པར་གཡེང་། །བདེ་སྟོང་ཏིང་འཛིན་སྩོལ་ཅིག་ཆོས་ཀྱི་དབང་། །བཙུན་པའི་གཟུགས་བརྙན་ཀརྨ་ཆགས་མེད་ངས། །རྒྱལ་བའི་གསུང་རབ་རྒྱ་མཚོ་སྦྱང་འདོད་ཀྱང་། །མི་ཤེས་གཏི་མུག་མུན་པའི་ནང་དུ་བྱིངས། །ཤེས་རབ་ཉི་འོད་སྩོལ་ཅིག་ཆོས་ཀྱི་དབང་། །སྐྱེས་ཆེན་ཁྱེད་ལ་གསོལ་བ་བཏབ་པའི་མཐུས། །བདག་བློའི་མི་ཤེས་གཏི་མུག་རབ་བསལ་ནས། །བཀའ་དང་བསྟན་བཅོས་ཇི་བཞིན་རྟོགས་པ་ཡི། །བློ་གྲོས་ཤེས་རབ་མྱུར་དུ་བསྩལ་དུ་གསོལ།། །།ན་མོ་གུ་རུ་སརྦ་ཡེ། རྗེ་བཀའ་དྲིན་ཅན་ལ་གསོལ་བ་འདེབས། །ཕྱི་འཇིག་རྟེན་རྒྱ་ཆེ་རྔམས་འཐུག་པ། །འདི་མི་རྟག་མེ་ཆུས་འཇིག་ཐོས་ནས། །ལུས་
འདོམ་གང་ཙམ་འདི་ག་ལ་རྟག །ནང་བཅུད་ཀྱི་སེམས་ཅན་མ་ལུས་པ། །དེ་གཅིག་ཀྱང་མི་འཆི་མི་སྲིད་ན། །བདག་གཅིག་པུ་ཅི་ལ་ཚེ་ཐར་ལུས། །སྔར་སྲིད་པ་ཆགས་ནས་ད་ལྟའི་བར། །མི་མ་ཤི་ལུས་པ་གཅིག་མི་གདའ། །རང་འཆི་བ་མ་དྲན་ཅི་ཡིན་ཨང་། །སྔོན་རྫོགས་པའི་སངས་རྒྱས་རྡོ་རྗེའི་སྐུ། །དེ་མི་རྟག་འདས་ཚུལ་བསྟན་དགོས་ན། །ལུས་མི་གཙང་རྐྱལ་པ་ག་ལ་རྟག །སྔོན་ཉན་རང་དགྲ་བཅོམ་རྫུ་འཕྲུལ་ཅན། །དེ་ཐམས་ཅད་མྱ་ངན་འདས་ཐོས་ན། །རང་འཁོར་བའི་སེམས་ཅན་སྨོས་ཅི་དགོས། །སྔོན་དྲང་སྲོང་མངོན་ཤེས་རྫུ་འཕྲུལ་ཅན། །དེ་རྣམས་ཀྱང་འབྲོས་ས་མ་རྙེད་འདས། །ད་མི་འཆི་ས་རུ་འགྲོ་ས་མེད། །དུས་ནམ་ཟླ་མི་སྡོད་འགྱུར་ཞིང་འགྲོ། །ལོ་ཟླ་བ་མི་སྡོད་ཡད་ཡུད་ཟད། །རང་འཆི་དང་ཉེ་བར་མ་ཚོར་རམ། །ཚེ་ཡད་ཡུད་ཟད་པ་མི་ཤེས་པར། །དུས་ནམ་ཟླ་སླ་ཞིང་འོང་ན་དགའ་སྙམ་བྱེད། །ཨ་བསམ་ཆུང་སྙིང་མེད་སྙིང་རེ་རྗེ། །དཔེ་བཤའ་ལུག་ཤན་པས་བཟུང་བ་བཞིན། །ཁོ་འཆི་བདག་ལས་ཀྱི་ཤན་པ་དེས། །དུས་ནམ་ཞིག་བཟུང་ངེས་ཨ་ཙ་མ། །སྨན་རིམ་གྲོ་བྱས་ཀྱང་ཕྱིར་ཕྱིར་ཐུ། །ཕན་རེ་བའི་སྨན་
པ་ཝ་བྲོས་བྱེད། །ཐབས་སྡུག་པའི་དུས་ཤིག་ནམ་འོང་ན། །ནད་འདུ་བ་རྣམ་བཞི་ཁོང་ནས་འཁྲུགས། །གདོན་དྲི་ཟ་རྣམས་ཀྱིས་འཇབ་བུ་སྟོན། །ཐབས་སྡུག་པའི་དུས་ཤིག་ནམ་འོང་ན། །ཡར་མཆོད་གནས་ལྷ་ཡི་བསྲུང་སྐྱབས་ཡལ། །མར་བཀར་བའི་འདྲེ་གདོན་ཡར་ལ་བསྡོང་། །སེམས་མྱོས་ཤིང་འཁྲུགས་པ་ཅིག་ནམ་འོང་ན། །སྡུག་སྡིག་པས་བསྒྲུབས་པའི་ཟས་དང་ནོར། །སེམས་ཆགས་ཀྱང་ཡུད་ཙམ་ཁྱེར་དབང་མེད། །རང་ལག་སྟོང་འགྲོ་དུས་ཤིག་ནམ་ཡོང་ན། །གོས་དྲོ་འཇམ་བཀོན་ཀྱང་ཨ་རི་བས་ལྗི། །ཟས་ཁ་ལ་འགྲོ་བ་ཆུ་ཐིགས་ཤིག །གཏམ་ཁ་ཆེམ་འཇོག་དུས་ཤིག་ནམ་འོང་ན། །ཕྱི་སྒྱུ་ལུས་བཟོད་མེད་ན་ཚས་མནར། །ནང་རྣམ་ཤེས་འཁྲུལ་སྣང་འཇིགས་སྐྲག་ཆེ། །གནམ་རྡིབ་པ་འདྲ་ཅིག་ནམ་འོང་ན། ལུས་གཅེས་ཤིང་འཕང་བ་ཐག་པས་སྒྲོག །གོས་དྲོ་འཇམ་བྲག་ཕུག་སྟོང་པ་དོར། །མལ་ཕྱགས་མས་ཕྱགས་དུས་ཅིག་ནམ་འོང་ན། །ལུས་མེར་སྲེག་ཐལ་བ་རླུང་གིས་ཁྱེར། །དེ་ཡང་ན་བྱ་ཁྱི་གཅན་གྱིས་ཟོས། །གཏན་ཡུལ་མེད་རེད་དུས་གཅིག་ནམ་འོང་ན། །གཉེན་བྱམས་པས་མིག་ནས་མཆི་མ་
འབྱིན། །སྡང་དགྲ་བོ་ཡི་བློ་བདེ་ཁོག་བགད་ཤོར། །མིང་ཙམ་ལས་མེད་པ་ཞིག་ནམ་འོང་ན། །ལས་དེ་འདྲ་ཞིག་ངེས་པར་འོང་རྒྱུ་རེད། །འཆི་གྲབ་ཀྱིས་ཤོག་ཅིག་མི་བྱེད་པར། །སྡོད་ཆེས་རང་བྱེད་པ་ཨ་ཙ་མ། །དེ་མི་འཆི་ཁྲིག་ཆ་མི་གདའ་བ། །གློ་བུར་དུ་ཐོག་ལྟར་བརྒྱབ་པ་ལ། །ལོང་ཡོད་རང་བསམ་ན་ཨ་ཙ་མ། །དམ་པའི་ཆོས་ཤིག་མ་གཏོགས་པ། །དེ་དུས་སུ་ཕན་པ་མི་གདའ་བས། །སྙིང་ནས་ལྷ་ཆོས་མཛོད་ཅིག་མ་རྒན་རྣམས། །སྒྱུ་ལུས་འདི་ངེས་པར་འགྱུར་དགོས་པས། །དུས་འདི་ད་རེས་སྙིང་པོ་ལོངས། །གཏན་གྱི་སོ་ནམས་ད་རེས་རེམ། །མི་རྟག་འཆི་བ་སྙིང་གཟེར་གླུ། །དགེ་སྦྱོར་ལྕགས་འདེབས་རཱ་ག་ཨ་སྱས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།