གྲག་ལུ་ལ་གདམས་པའི་མགུར་མ།
གྲག་ལུ་ལ་གདམས་པའི་མགུར་མ་བཞུགས་སོ།
ན་མོ་ལོ་ཀེ་ཤྭ་ར་ཡེ། དཔལ་ཐུགས་རྗེ་ཆེན་པོ་སྤྱན་རས་གཟིགས། །མི་བདག་ལ་འབྲེལ་བའི་འགྲོ་བ་རྣམས། །སྐྱབས་གཞན་ན་མེད་དོ་ཐུགས་རྗེས་ཟུངས། །ཁྱོད་རིག་པ་ཅན་གྱི་གྲག་ལུ་ཡིས། །བདག་སྒྲུབ་པ་བྱེད་པའི་བྱ་བྲལ་ལ། །ཆོས་དམར་ཁྲིད་གྱི་དཔེ་ཆ་བྱིན་པ་དེ། །དེ་སྨོན་ལམ་བཟང་པོས་འབྲེལ་པ་ཡིན། །ད་བཟང་ལེན་དུ་གདམས་ངག་ཚིག་གསུམ་བཤད། །བུ་གྲག་ལུ་མ་ཡེངས་ལྷན་ནེར་ཉོན། །ལུས་དལ་འབྱོར་མི་ལུས་རིན་ཆེན་འདི། །དུས་ད་རེས་མ་གཏོགས་རྙེད་པར་དཀའ། །འདི་དོན་མེད་དུ་ཆུད་ཟོས་མ་བྱེད་ལ། །བུ་
གྲག་ལུ་ཉ་མཚམས་ལ་གདན་གཅིག་སྲུངས། །མི་རྒས་ནས་འཆི་བ་རེ་རེ་ཙམ། །རང་ན་མཉམ་མང་པོ་འཆི་ལུགས་ལྟོས། །རང་མི་འཆིའི་གདེང་ཚོད་ཅི་ཡོད་སོམས། །བུ་གྲག་ལུ་བློ་ཕུགས་ཆོས་ལ་གཏོད། །གཉེན་བཟའ་ཚོའི་དོན་དུ་སྡིག་བྱས་ཀྱང་། །སྡིག་སྤྱི་པས་མི་ཁུར་རང་ལ་སྨིན། །གཉེན་བཟའ་ཚང་ཚོང་དུས་མགྲོན་པོ་འདྲ། །བུ་གྲག་ལུ་རང་མགོ་རང་གིས་ཐོན། །དུས་ད་ལྟ་སྲོག་ཆགས་གཅིག་བསད་ན། །ལན་དགུ་བརྒྱ་གོ་དགུར་ཚུར་ལ་གསོད། །ལས་རྣམ་སྨིན་དམྱལ་བར་ལོ་སྟོང་ཚོ། །དེ་བསམ་གཞིག་ཐོངས་ལ་སྲོག་གཅོད་སྤོངས། །
བྱ་རི་དྭགས་ཆ་མ་ཆོ་དགུ་འདི། །བཙན་ཡུལ་ལྷ་རྣམས་ཀྱི་སྒོ་ནོར་ཡིན། །འདི་བསད་ན་ནམ་ཞིག་ལྷ་འདྲེས་གནོད། །དོན་དེ་ལ་སེམས་ནས་བག་ཟོན་མཛོད། །རྔོན་རི་དྭགས་མི་ཚེ་ཕུད་ན་ཡང་། །མཐར་ཇེ་ལྟོགས་ཤ་ལྤགས་འཕྲལ་ལ་ཟད། །སྡིག་རི་རབ་ཙམ་དེ་རང་ལ་ལུས། །བུ་སྤྱང་པོ་ཡིན་ན་རང་མགོ་ཐོན། །གནས་ངན་སོང་གསུམ་གྱི་སྡུག་བསྔལ་དེ། །ཚིག་རྣ་བས་ཐོས་ཀྱང་གློ་སྙིང་འདར། །དེ་རང་ཐོག་ཏུ་བྱུང་ན་ཇི་ལྟར་བྱེད། །བུ་བསམ་ཡོད་ཡིན་ན་སྡིག་ལ་འཛེམ། །དགྲ་མི་ཤ་རྟ་སྟོང་བརྒྱ་ཆགས་ཀྱང་། །ལུས་བཙོ་བསྲེགས་ཞག་པོ་གསུམ་མི་བྱེད། །སྡིག་ཆུང་ཆུང་རེས་ཀྱང་ལོ་སྟོང་ཚོ། །བུ་དོགས་ཟོན་མཛད་ན་སྡིག་ལ་འཛེམ། །བྱ་རི་དྭགས་ལ་སོགས་སྲོག་ཆགས་ཀུན། །སྔོན་སྐྱེ་བ་མང་པོའི་ཕ་མ་ཡིན། །དོན་ཕ་མ་བསད་དང་ཁྱད་པར་མེད། །བུ་ཁྲེལ་ཡོད་ཡིན་ན་རྨེ་མ་བྱེད། །ཟས་འབྲེ་ཞིང་ཞིམ་པའི་ཤ་ཁྲག་འདི། །རྒྱུ་མི་གཙང་ཁུ་ཆུ་མངལ་ཁྲག་ཡིན། །འདི་ཟོས་ན་གྲིབ་ཆེ་ལྷ་མི་མཉེས། །བུ་ངོ་ཚ་ཡོད་ན་ཤ་མ་ཟ། །དགྲ་ཇག་རྐུན་ཇི་ལྟར་མགོ་རྒོད་ཀྱང་། །ཚེ་གཞན་གྱི་ཟས་ནོར་འཕྲོག་མི་ཐུབ། །རྐུན་ལན་གཅིག་
བྱས་པས་སྐྱེ་བ་སྟོང་། །རང་དབུལ་ཕོངས་འགྱུར་བས་བསམ་བློ་ཐོངས། །རྒྱུ་ཁབ་སྐུད་ཙམ་ཞིག་བརྐུས་པས་ཀྱང་། །ལོ་ལྔ་བརྒྱར་ཡི་དྭགས་ལུས་ལེན་ཏེ། །ཆུ་ཐིགས་གཅིག་རྣ་བས་ཐོས་པ་མེད། །དེ་སོམ་ལ་སོར་བཅུ་བྲང་ལ་ཁོབ། །གནས་འཁོར་བའི་འཇིགས་པ་ཆེན་པོ་འདི། །གཞན་སུས་ཀྱང་སྐྱོབ་པར་མི་གདའ་བས། །སྐྱོབ་ངེས་པའི་དཀོན་མཆོག་གསུམ་པོ་ལ། །བུ་ནངས་ནུབ་རྒྱུན་དུ་སྐྱབས་འགྲོ་གྱིས། །མ་འགྲོ་དྲུག་ཕ་མ་དྲིན་ཆེན་ཡིན། །ཆོས་གཞན་དོན་དུ་བསྔོས་ན་འགྱུར་ཆེ་བས། །བུ་ཆོས་འདོན་དང་ཆོས་སྤྱོད་སྤྱི་བཏོན་པ། །འདི་ཐམས་ཅད་འགྲོ་བའི་དོན་དུ་བསྔོས། །ལས་དགེ་བ་ཅུང་ཟད་རེ་རེས་ཀྱང་། །ཚེ་ཕྱི་མ་བདེ་སྐྱིད་དཔག་མེད་འབྱུང་། །བུ་ཞིང་བཟང་ལ་ས་བོན་བཏབ་པ་བཞིན། །བུ་དེ་ཕྱིར་དགེ་བ་ཆུང་ཡང་བསྒྲུབ། །ལས་སྡིག་པ་ཆུང་ཆུང་རེ་རེས་ཀྱང་། །ཚེ་ཕྱི་མར་གནོད་པ་ཆེན་པོ་བྱེད། །དཔེ་བཙན་དུག་ཁོང་ལ་སོང་བ་ལྟ་འདྲ། །བུ་དེ་ཕྱིར་སྡིག་པ་ཆུང་ཡང་འཛེམ། །བུ་ཁྱེད་རང་སྤྱི་གཙུག་ནམ་མཁའ་ལ། །གདན་པདྨ་ཉི་ཟླ་སུམ་བརྩེགས་སྟེང་། །ཕ་དྲིན་ཆེན་པདྨ་འབྱུང་གནས་དེ། །སྐུ་དཀར་
དམར་མདངས་ལྡན་མཚན་དཔེའི་རྫོགས། །ཞལ་ཁྲོ་འཛུམ་སྤྱན་གཉིས་རང་ལ་གཟིགས། །དབུ་པད་ཞྭ་སྒོ་དར་མེ་ལོང་བརྒྱན། །ཕྱག་རྡོ་རྗེ་བྷནྡྲ་ཁ་ཊཾ་བསྣམས། །སྐུ་ཟབ་བེར་ཆོས་གོས་རྣམ་གསུམ་གསོལ། །ཞབས་རྡོ་རྗེའི་སྐྱིལ་ཀྲུང་ལྷམ་མེར་བཞུགས། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །དེ་ཐམས་ཅད་སྤྱན་དྲངས་གཉིས་མེད་ཐིམ། །སྙིང་རུས་པའི་གཏིང་ནས་གསོལ་བ་ཐོབ། །མཐར་འོད་དུ་ཞུ་ནས་རང་ལ་བསྟིམ། །དེ་ལན་གཅིག་མིན་པར་ཡང་ཡང་བསྒོམ། །སྐབས་སྐབས་སུ་རང་གི་སེམས་ལ་ལྟོས། །སྐབས་སྐབས་སུ་མདོ་འབུམ་གསུང་རབ་ཐོན། །སྐབས་སྐབས་སུ་ཆོས་སྤྱོད་སྨོན་ལམ་ཐོན། །སྐབས་སྐབས་སུ་བཛྲ་གུ་རུ་ཐོན། །སྐབས་སྐབས་སུ་ཨོ་རྒྱན་ལ་གསོལ་བ་ཐོབ། །སྐབས་སྐབས་སུ་རང་སེམས་གར་གདའ་ཚོལ། །སེམས་མ་རྙེད་ན་དེ་གའི་ངང་ལ་ཞོག །དཔེ་རྫི་བོས་ལུས་ཁྱུ་འཚོ་བ་ལྟར། །སེམས་གར་འགྲོ་ཅི་བྱེད་བྱ་ར་ལྟོས། །བཀའ་མདོ་འབུམ་ཉི་ཤུ་ལྔ་དུས་ནས། །ཆོས་ཤེས་རབ་ཕར་ཕྱིན་ཟེར་བ་དེ། །དོན་རང་སེམས་ཡིན་པར་བློ་ཐག་ཆོད། །སེམས་ཤེས་ན་ཤེས་བྱ་ཀུན་གྱི་མཆོག །དོན་དེ་ཕྱིར་
ཤེས་རབ་ཕར་ཕྱིན་ཟེར། །ངག་ཤེས་རབ་ཕར་ཕྱིན་འདོན་པ་དང་། །སེམས་ཤེས་རབ་ཕར་ཕྱིན་སྒོམ་པ་གཉིས། །དེ་ཟུང་དུ་འཇུག་ན་ཕན་ཡོན་ཆེ། །བཀའ་རྒྱས་འབྲིང་པུ་སྟི་བཅོ་བརྒྱད་པོ། །དོན་རང་སེམས་ཁོ་ནའི་བསྐོར་རྫོགས་ཡིན། །དེ་སྟོན་ན་ཕན་ཡོན་དཔག་མེད་ན། །དེ་བསྒོམས་ན་ཕན་ཡོན་སྨོས་ཅི་དགོས། །བུ་དེ་ཕྱིར་གསུང་རབ་འདོན་པ་དང་། །དོན་ཉམས་ལེན་གཉིས་ཀ་དོ་དམ་མཛོད། །དེ་ཡན་ཆད་ཉམས་མཚར་ཆོས་འབྲེལ་མཛོད། །བུ་གྲག་ལུས་དཔེ་ཆ་ཕུལ་བའི་དགེ །ཞིང་ཕྱོགས་བཅུའི་སངས་རྒྱས་ཀུན་ལ་འབུལ། །དེར་མཆོད་སྤྲིན་རྒྱ་མཚོ་འབྱུང་བར་ཤོག །དེ་མཆོད་པའི་དགེ་བ་འགྲོ་ལ་སྦྱིན། །མ་འགྲོ་དྲུག་ཆོས་ལ་འཁོད་པར་ཤོག །དེ་བཀོད་པའི་དགེ་བས་གྲག་ལུ་ཁྱོད། །ཚེ་བསོད་ནམས་ཟླ་བ་ཡར་ངོ་བཞིན། །དེ་རྒྱུན་ཆད་མེད་པར་འཕེལ་བར་ཤོག །རྐྱེན་ཕྱི་ནང་བར་ཆད་ཞི་བ་དང་། །མཆོག་ཐུན་མོང་དངོས་སྒྱུ་གྲུབ་ཐོབ་པར་ཤོག །དུས་ནམ་ཞིག་མི་གནས་འཕོ་བའི་ཚེ། །དཔེ་སྐྱེན་པོས་མདའ་འཕངས་ཇི་བཞིན་དུ། །ནུབ་བདེ་བ་ཅན་གྱི་ཞིང་ཁམས་དེར། །གདན་མེ་ཏོག་པདྨའི་ཟེའུ་
འབྲུ་ལ། །བུ་བརྫུས་སྐྱེས་སྐྱེ་བ་ལེན་པར་ཤོག །རྗེ་བཅོམ་ལྡན་མགོན་པོ་འོད་དཔག་མེད། །དཔལ་སེམས་དཔའ་འཇིག་རྟེན་དབང་ཕྱུག་སོགས། །ཞལ་མཐོང་ནས་དམ་ཆོས་ཐོས་པར་ཤོག །རང་ལག་པའི་མཐིལ་ནས་རྫུ་འཕྲུལ་གྱིས། །རྫས་མཆོད་སྤྲིན་དཔག་མེད་སྤྲུལ་བྱས་ནས། །རྗེ་རྒྱལ་བ་སྲས་བཅས་མཆོད་པར་ཤོག །དེ་མཆོད་པས་བྱང་ཆུབ་ལུང་བསྟན་ནས། །ས་དང་པོ་རབ་དགའ་ཐོབ་པར་ཤོག །རྗེ་སྐྱབས་གསུམ་ལྡན་པའི་བྱིན་རླབས་དང་། །དོན་ཆོས་ཉིད་རྣམ་པར་དག་པ་དང་། །འཕྲལ་རྒྱུ་འབྲས་བསླུ་མེད་རྟེན་འབྲེལ་གྱིས། །མི་བདག་གི་སྨོན་ལམ་འགྲུབ་པར་ཤོག །ཅེས་ཨ་རཱ་གས་འཕྲལ་དུ་ཁྲུམས་ཟླའི་ཉེར་དྲུག་ཉིན་སྨྲས་སོ།། ༈ །།།དཔོན་ཆུང་ཨ་ནུ་རྣམ་རྒྱལ་ལ་གནང་བའི་ཞལ་གདམས་རྒྱུ་འབྲས་ཆོས་ཐུན་བཞུགས་སོ། །ན་མོ་གུ་རུ་རཏྣ་ཡེ། ཕ་དྲིན་ཆེན་རྗེ་ལ་གསོལ་བ་འདེབས། །ཡང་འཆི་བ་དྲན་པར་བྱིན་གྱིས་རློབས། །ཁྱོད་དཔོན་ཆུང་ཨ་ནུ་རྣམ་རྒྱལ་གྱིས། །ད་ཕྱིན་ཆད་འདི་རུ་མི་འབྱོན་པས། །མཐུ་མ་བྱེད་ཟེར་བའི་གསུང་ཕྲིན་འཕྲོད། །ང་མི་རྟག་འཆི་བས་སེམས་སྐྲག་ནས། །ཚེ་འདི་ཡི་བྱ་བ་རྒྱབ་ཏུ་སྒྱུར། །
མཚམས་སྒྲུབ་པར་བརྩོན་འགྲུས་ལྕགས་ཀྱིས་བྲབ། །མཐུ་ངན་སྔགས་སྒྲུབ་པ་ངས་མི་ཁོམ། །མི་ང་ལ་དོགས་ཟོན་མི་དགོས་ཏེ། །དགྲ་འཆི་བདག་ནམ་འོང་ཆ་མེད་པས། །ཁྱེད་ངན་སོང་གསུམ་ལ་དོགས་ཟོན་མཛོད། །དུས་ཁར་ཉིན་ཉི་མའི་གུང་ཐུན་ལ། །སྔོན་ཚེ་རབས་མང་པོའི་མ་རྒན་ཞིག །མི་སྡིག་ཅན་གཤིན་རྗེས་དེད་པ་བཞིན། །ཁྱོད་རྔོན་པ་རྣམས་ཀྱིས་འདེད་པ་ཐོས། །ང་བཟོད་མེད་སྙིང་རྗེ་དྲག་པོ་སྐྱེས། །དུང་བུས་ན་ཨེ་བསྒྱུར་དུང་བུས་སྨྲས། །དུང་བུས་ཀྱང་མ་ཕན་བསད་སོང་ཟེར། །ལམ་ཟབ་མོ་འཕོ་བའི་དམིགས་པ་བསྒོམ། །གནས་དག་པའི་ཞིང་དུ་སྨོན་ལམ་བཏབ། །བུ་དཀར་ལུ་ལ་སྡིག་པ་མ་བྱེད་སྨྲས། །ད་ཕྱིན་ཆད་ང་ཡི་མདུན་རྒྱབ་འདིར། །རྔོན་བྱས་ན་གོས་ཧྲུལ་རྡེབ་ཅེས་བསྡིག །རྒྱ་ང་ལ་ཕུལ་ཞེས་ཆ་ཕྲིན་བསྐུར། །དོན་དེ་ཚོ་ཁར་ཉིན་གྱི་ལོ་རྒྱུས་ཡིན། །བུ་མ་ཡེངས་ང་ཡི་ཚིག་འདི་གསོན། །ཁྱེད་ང་དང་ཡོན་མཆོད་ལ་ཀྱི་འབྲེལ་པ་ཟབ། །ད་དེ་ཕྱིར་སྙིང་གཏམ་ཚིག་གསུམ་བཤད། །འདི་མ་བརྗེད་སྙིང་གི་དཀྱིལ་དུ་ཞོག །དོན་ཨེ་བདེན་བསམ་མནོ་ལེགས་པར་ཐོངས། །སྤྱིར་མི་ལུས་ཐོབ་པ་
ད་རེས་ཙམ། །ཚེ་མི་རྟག་ནམ་མཁའི་གློག་དང་འདྲ། །མི་རྒས་ནས་འཆི་བ་རེ་རེ་ཙམ། །རང་མི་འཆིའི་གདེང་ཚད་ཨེ་ཡོད་སོམས། །ཤ་གནའ་སོགས་རི་དྭགས་ཆེ་དགུ་འདི། །བཙན་ཡུལ་ལྷ་རྣམས་ཀྱི་སྒོ་ནོར་ཡིན། །འདི་བསད་ན་ནམ་ཞིག་གོད་ཁ་ལྡང་། །གྱོང་དེ་བས་ཆེ་ཞིག་ཨེ་ཡོད་སོམས། །ཁོང་འབྲོག་པ་ནོར་གྱིས་ཕྱུག་པ་འདི། །སྔོན་སྡིག་པ་བྱས་པས་ཕྱུག་པ་མིན། །ཚེ་སྔོན་གྱི་སྦྱིན་འབྲས་སྨིན་པ་ཡིན། །ཁྱེད་ཕྱུག་པོ་འདོད་ན་སྦྱིན་པ་ཐོངས། །སྤྱིར་རི་དྭགས་སོགས་སྐྱེ་འགྲོ་སྲོག་ཆགས་ཀུན། །ཚེ་སྔོན་གྱི་ཕ་མ་དྲིན་ཆེན་ཡིན། །མ་གསོད་ནས་ཟ་བ་ཡ་རེ་ང་། །ཁྲེལ་དེ་བས་ཆེ་ཞིག་ཨེ་ཡོད་སོམས། །ཤ་ལྤགས་པ་ཚིལ་བུ་རྐང་དང་ཁྲག །དེ་མི་གཙང་མནོལ་གྲིབ་ཀྱི་རྫས་ལས་གྲུབ། །འདི་ངོ་ཚ་མེད་པར་ཟ་བ་འདི། །སྐྱུགས་དེ་བས་ལོག་ཅན་ཨེ་ཡོད་སོམས། །རྔོན་བྱས་པའི་ཤ་དང་མི་རྩིའི་ཇ། །ཉེ་དུ་དང་ཡུལ་མི་ཀུན་གྱིས་ཟ། །ཚེ་ཕྱི་མར་སྡིག་པའི་ཁུར་རོགས་མེད། །ཁྱེད་སྤྱང་པོ་ཞིག་ཡིན་ན་རང་མགོ་ཐོན། །དུས་ད་ལྟ་སེམས་ཅན་གཅིག་བསད་ན། །ལན་དགུ་བརྒྱ་དང་གོ་དགུ་ཚུར་ལ་གསོད། །ཕམ་དེ་བས་ཁུར་ཞིག་མི་
གདའ་ན། །ཁྱེད་མཁས་པ་ཞིག་ཡིན་ན་ཕམ་ཁ་ཁུར། །ནོར་ཕར་ལ་བཙོང་ནས་ཤ་ཁྱི་ཉོ། །རྟ་མི་དང་བཅས་པའི་གྲ་ཤ་གཅོད། །ཚུར་འོང་སྒོ་དོ་ནུབ་ཤ་ལྷུ་གཅིག །ཚགས་དེ་བས་ཆེ་ཞིག་མི་གདའ་ན། །ཤ་པགས་པ་རྩི་ཇ་མུས་ཀྱིས་ཟད། །སྡིག་རི་བས་ལྗིད་དེ་ཇེ་ཆེར་སོགས། །རང་འཆི་རྒས་ལ་ཐུག་དུས་ཁུར་པོ་ཆེ། །ཕུགས་དེ་བས་ཞེན་ཞིག་མི་གདའ་ན། །རྔོན་བྱས་པས་ཞག་གཉིས་ལྟོ་བ་བརྒྱག །ཚེ་ཕྱི་མར་ལོ་གྲངས་བྱེ་བ་བརྒྱར། །ལུས་གསེ་གཏུབ་བཙོ་བསྲེགས་རྒྱུན་ཆད་མེད། །།བློ་དེ་བས་ཉེས་ཞིག་མི་གདའ་ན། །དགྲ་འཆི་བདག་གཤིན་རྗེས་ཟིན་པའི་དུས། །སྨན་རིམ་གྲོས་མི་ཕན་བརྒྱབ་པ་འདྲ། །དུས་དེ་དུས་སྡིག་ལ་འགྱོད་ཀྱང་འཕྱིས། །བུ་རྣམ་རྒྱལ་ད་ནི་སྡིག་ལ་འཛེམ། །མི་ཉེས་ཆེན་བཙོན་དུ་བཟུང་བ་བཞིན། །དགྲ་གཤིན་རྗེའི་ཕོ་ཉས་འདེད་ཅིང་ཁྲིད། །སྔངས་ཧད་དེ་ཆོས་རྒྱལ་མདུན་དུ་ཕྱིན། །སྡིག་མ་བྱས་ཟེར་ཞིང་སྐྱིད་པ་སྒྱུ་འདར། །ལས་དགེ་སྡིག་གི་འབྲས་བུའི་རྡེའུ་སྤུངས། །ཁས་བཙན་པའི་རྒྱལ་པོ་ཆོས་རྒྱལ་གྱིས། །འདི་མནར་མེད་ཀྱི་གནས་སུ་སྐྱོལ་ཅིག་གསུངས། །སྡིག་བྱས་པས་འགྱོད་དེ་
ངུ་བཞིན་འདར། །མེ་མུར་གྱི་འོབ་ལ་སྤུས་འབོག་དགོས། །ལྕགས་སྲེག་གི་ཐང་ལ་ཡོས་ལྟར་རྔོ། །ལྕགས་སྲེག་གི་རི་དྭགས་མང་པོ་ཡིས། །འཕྲ་ཁ་དང་རྡུང་རྒྱག་བརྫི་བསྣག་བྱེད། །སེང་གེ་དང་སྟག་གཟིག་ཁྱི་སྤྱང་རྣམས། །སྒྱུ་མ་དང་ནང་ཁྲོལ་འདྲེན་ཅིང་ཟ། །ལས་མཁན་རི་དྭགས་ཀྱི་མགོ་ཅན་གྱིས། །ལུས་སོག་ལེས་དྲ་ཞིང་སྣ་རེས་གསེ། །སྟེའུ་ཁས་བཞོག་ཅིང་ཐོ་བས་རྡུང་། །མེ་ནང་དུ་སྲོག་ཅིང་ཆུ་ནང་དུ་བཙོ། །ལོ་བྱེ་བ་དུང་ཕྱུར་འབུམ་ཕྲག་བརྒྱར། །སྡུག་དེ་ལ་བར་སྐབས་ཡུད་ཙམ་མེད། །འདི་བསམ་ན་སྡིག་པ་ཇི་ལྟར་ཕོད། །ཚེ་རྨི་ལམ་ཙམ་འདི་ཅིས་ཀྱང་ཕྱིད། །ཁ་འབུ་ཁུང་ཙམ་འདི་ཅིས་ཀྱང་ཕྱིད། །བུ་རྣམ་རྒྱལ་ད་ནི་སྡིག་ལ་འཛེམ། །ཁྱེད་སྔར་བྱས་ཀྱི་སྡིག་ལ་འགྱོད་པ་གྱིས། །གསུང་ཡི་གེ་དྲུག་པ་རྒྱུན་དུ་བགྲངས། །དུས་ཉ་མཚམས་བརྒྱད་གསུམ་བསྙེན་གནས་སྲུངས། །ཁྱེད་རང་ཕུང་རང་གིས་མ་བསྒྲུབས་ལ། །ཁྱེད་རང་གིས་རང་ལ་སྙིང་རྗེ་ལྟོས། །བུ་རྣམ་རྒྱལ་རང་མགོ་རང་གིས་ཐོན། །བུ་རྣམ་རྒྱལ་རང་གིས་རང་གི་གྱིས། །སྤྲང་བསམ་པ་བཟང་པོའི་ཆ་འཕྲིན་འདི། །བུ་རྣམ་རྒྱལ་གྱིས་མ་བརྗེད་ཐུགས་ལ་ཞོག །ཅེས་དགེ་
སློང་རཱ་ག་ཨ་སྱས་བསྐུར་བའོ། མངྒ་ལཾ།། ༈ །།པད་འབྱུང་བླ་མའི་རྣལ་འབྱོར་ཉམས་ཁྲིད་ཨ་ནུ་ལྷ་སྲུང་ལ་གནང་བ་བཞུགས་སོ། །ན་མོ་གུ་རུ། མི་བདག་གི་སྤྱི་བོའི་གཙུག་རོལ་ན། །འཇའ་འོད་ཕུང་འཁྲིགས་པའི་གུར་ཁང་ནས། །གདན་པདྨ་ཉི་ཟླ་སུམ་བརྩེགས་སྟེང་། །ཕ་མཁའ་སྤྱོད་ནམ་མཁའ་རྒྱལ་མཚན་དང་། །དོན་དབྱེར་མེད་གུ་རུ་པདྨ་འབྱུང་། །སྐུ་དཀར་དམར་མདངས་ལྡན་མཚན་དཔེས་བརྒྱན། །ཞལ་ཁྲོ་འཛུམ་སྤྱན་གཉིས་ཞི་མ་ཁྲོ། །དབུ་པད་ཞྭ་རྒོད་ཀྱི་ལྡེམ་འཕྲུ་ཅན། །སྐུ་ཟ་བེར་ཆོས་གོས་རྣམ་གསུམ་གསོལ། །ཕྱག་རྡོ་རྗེ་གསོར་ཞིང་བྷན་འཛིན། །ཡུམ་ཌཱཀི་སྦས་ཚུལ་ཁཊཾ་བརྟེན། །ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས། །སྐུ་གཟི་བརྗིད་ཉི་མ་འབུམ་བཞིན་འབར། །སྐུ་གནས་གསུམ་ཡིག་འབྲུ་གསུམ་གྱིས་མཚན། །ཞིང་ཕྱོགས་བཅུའི་སངས་རྒྱས་བྱང་སེམས་ཀུན། །དཔེ་ཁ་བ་བུ་ཡུག་འཚུབ་བཞིན་བྱོན། །དེ་ཐམས་ལྟ་ཅད་པད་འབྱུང་སྐུ་ལ་ཐིམ། །རྗེ་སངས་རྒྱས་ཐམས་ཅད་འདུས་པའི་ཐུགས། །བཀའ་དམ་ཆོས་ཐམས་ཅད་འདུས་པའི་གསུང་། །ཚོགས་དགེ་འདུན་ཐམས་ཅད་འདུས་པའི་སྐུ། །
དཔལ་སྐྱབས་གསུམ་ཀུན་འདུས་པདྨ་འབྱུང་། །བདག་འགྱུར་མེད་དད་པས་གསོལ་བ་འདེབས། །ལུས་ཐོབ་དཀའི་མི་ལུས་རིན་ཆེན་འདི། །ཚེ་ཡང་ཡེང་ངང་ལ་མི་འཛད་པར། །ལུས་སྙིང་པོ་ལོན་པར་བྱིན་གྱིས་རློབས། །དགྲ་འཆི་བདག་ནམ་འོང་ཆ་མེད་ལ། །ཆོས་ད་བྱེད་ངང་ལ་མི་ལུས་པར། །བློ་ཆོས་ལ་འགྱུར་བར་བྱིན་གྱིས་རློབས། །གཉེན་ཉེ་དུ་དགྲ་བོ་གཉིས་ཀ་ཡང་། །དེ་མི་རྟག་ཚོང་དུས་མགྲོན་པོ་འདྲ། །སེམས་ཞེ་སྡང་ཞི་བར་བྱིན་གྱིས་རློབས། །ས་ཡུལ་མཁར་ནོར་རྫས་ཁྱེར་དབང་མེད། །ལས་དགེ་སྡིག་འབྲལ་མེད་གཤིན་ཡུལ་འགྲིམ། །ལས་རྒྱུ་འབྲས་གོ་བར་བྱིན་གྱིས་རློབས། །གནས་ངན་སོང་སྡུག་བསྔལ་ཐོས་ཀྱང་སྔངས། །དེ་ཐོག་ཏུ་བྱུང་ཡང་ཇི་ལྟར་བྱེད། །ལས་སྡིག་པ་ལ་འཛེམ་པར་བྱིན་གྱིས་རློབས། །།ལས་དགེ་བ་སྨན་དང་བདུད་རྩི་འདྲ། །དེ་ཆུང་ཡང་ཕན་ཐོགས་རྒྱ་ཆེན་འབྱུང་། །ལས་དགེ་བ་སྒྲུབ་པར་བྱིན་གྱིས་རློབས། །གནས་འཁོར་བའི་སྡུག་བསྔལ་ཐམས་ཅད་ལ། །སྐྱོབ་ཐུབ་ངེས་དཔོན་པོ་དཀོན་མཆོག་གསུམ། །དེ་གཅིག་བསྡུས་ཨོ་རྒྱན་རིན་པོ་ཆེ། །བདག་སྐྱབས་སུ་མཆིའོ་ཐུགས་རྗེས་ཟུངས། །མ་འགྲོ་
དྲུག་སེམས་ཅན་མ་ལུས་པ། །སྔོན་ཚེ་རབས་མང་པོའི་ཕ་མ་ཡིན། །འདི་ཐམས་ཅད་སངས་རྒྱས་ཐོབ་པའི་ཕྱིར། །མི་བདག་གིས་བྱང་ཆུབ་སེམས་བསྐྱེད་དོ། །སྔོན་ཐོག་མེད་དུས་ནས་ད་ལྟའི་བར། །ལས་མི་དགེའི་སྡིག་པ་ཅི་བསགས་ཀུན། །བདག་རབ་ཏུ་འགྱོད་པས་མཐོལ་ལོ་བཤགས། །ལུས་ལོངས་སྤྱོད་དགེ་རྩ་ཅི་ཡོད་པ། །རྗེ་པདྨ་འབྱུང་གནས་སྤྱན་རས་གཟིགས། །བདག་ཚོགས་གཉིས་རྫོགས་པར་བྱིན་གྱིས་རློབས། །བློ་ཁྱེད་ཤེས་ཀྱི་དད་པས་བྱིན་རླབས་འཇུག །སྙིང་རུས་པའི་གཏིང་ནས་གསོལ་བ་འདེབས། །མི་བདག་ལ་དབང་བསྐུར་བྱིན་གྱིས་རློབས། །རྐྱེན་བར་ཆད་ཞི་བར་བྱིན་གྱིས་རློབས། །ཚེ་བསོད་ནམས་འཕེལ་བར་བྱིན་གྱིས་རློབས། །སེམས་ཆོས་སྐུར་རྟོགས་པར་བྱིན་གྱིས་རློབས། །ཕ་ཁྱེད་ཀྱི་ཐུགས་དང་བདག་གི་སེམས། །དོན་དབྱེར་མེད་ཆུ་ལ་ཆུ་བཞག་བཞིན། །ཕ་ཁྱེད་རང་ལྟ་བུར་བྱིན་གྱིས་རློབས། །མི་བདག་གིས་གདུང་ཤུགས་གསོལ་འདེབས་དེས། །ཕ་ཨོ་རྒྱན་ཆེན་པོའི་ཐུགས་རྗེས་གཟིགས། །སྐུ་འོད་དུ་ཞུ་ནས་བདག་ལ་ཐིམ། །བཀའ་མདོ་རྒྱུད་གྲུབ་ཐོབ་མཁའ་འགྲོའི་
གསུང་། །དེ་ཐམས་ཅད་ས་ཕག་གྲོས་ལྟར་མཐུན། །ཆོས་ཐམས་ཅད་རྩ་བ་རང་སེམས་ཡིན། །སེམས་བཙལ་བས་མི་རྙེད་དངོས་པོ་མེད། །གཟུགས་ཁ་དོག་མེད་པས་མཐོང་རྒྱུ་མེད། །དོན་དེ་ལ་སྟོང་པ་ཉིད་ཅེས་ཟེར། །སེམས་མེད་པ་མ་ཡིན་ཅི་ཡང་དྲན། །སེམས་རྐང་པ་མེད་དེ་ཕྱོགས་བཅུར་རྒྱུག །ལས་དགེ་སྡིག་འཁོར་འདས་དེ་ལས་འབྱུང་། །དོན་དེ་ལ་བདེ་གཤེགས་སྙིང་པོ་ཟེར། །བསྒོམ་དེ་ལ་འདི་བསྒོམ་དེ་བསྒོམ་མེད། །སེམས་མ་ཡེངས་རང་སེམས་སྲུང་བ་ལ། །དོན་དེ་ལ་བསྒོམ་ཞེས་མིང་དུ་བཏགས། །སེམས་བཞག་ན་མི་འདུག་ཕྱོགས་བཅུར་རྒྱུག །དོན་དེ་ལ་འགྱུ་བ་མིང་དུ་བཏགས། །སེམས་གཏད་ན་མི་འགྲོ་ཀྱི་ལེར་གནས། །དོན་དེ་ལ་གནས་པ་མིང་དུ་བཏགས། །སེམས་གནས་འགྱུ་ཅི་བྱེད་སེམས་ཀྱིས་རིག །དོན་དེ་ལ་རིག་པ་མིང་དུ་བཏགས། །སེམས་མ་ཡེངས་རྒྱང་སྲུང་བྱེད་པ་ལ། །སེམས་ཉམས་ལེན་མིང་དུ་བཏགས་པ་ཡིན། །སེམས་བསྒོམ་ཡུན་ཤི་དང་མཉམ་པ་ལ། །དེ་སྒོམ་ཆེན་མིང་དུ་བཏགས་པ་ཡིན། །སེམས་བསམ་པ་བཟང་པོ་བཟུང་བ་ལ། །དེ་ཆོས་པ་མིང་དུ་བཏགས་པ་ཡིན། །སེམས་རང་སེམས་
རང་གིས་ལྟ་བ་ལ། །ཆོས་ལྟ་བ་མིང་དུ་བཏགས་པ་ཡིན། །སེམས་མ་ཡེངས་དྲན་པའི་རྒྱང་སོ་ལ། །ཆོས་སྒོམ་པ་མིང་དུ་བཏགས་པ་ཡིན། །ལས་སྡིག་སྤངས་དགེ་སྒྲུབ་བྱེད་པ་ལ། །ཆོས་སྤྱོད་པ་མིང་དུ་བཏགས་པ་ཡིན། །དོན་རང་སེམས་བརྟན་པ་ཐོབ་པ་ལ། །ཆོས་འབྲས་བུ་མིང་དུ་བཏགས་པ་ཡིན། །སེམས་ཤེས་ན་ཤེས་བྱ་ཀུན་གྱི་རབ། །ཆོས་ཤེས་རབ་ཕར་ཕྱིན་དེ་ལ་ཟེར། །ཆོས་ཐམས་ཅད་སེམས་ལས་འདས་པ་མེད། །ཆོས་ཕྱག་རྒྱ་ཆེན་པོ་དེ་ལ་ཟེར། །ཆོས་མ་འདུས་ཐམས་ཅད་སེམས་ལ་རྫོགས། །ཆོས་རྫོགས་པ་ཆེན་པོ་དེ་ལ་ཟེར། །སེམས་ཡོད་མེད་མཐའ་བཞི་ཡེ་ནས་བྲལ། །ཆོས་དབུ་མ་ཆེན་པོ་དེ་ལ་ཟེར། །ཆོས་སེམས་བསྲུང་སྡུག་བསྔལ་སྟོང་པ་ཞི། །ཆོས་སྡུག་བསྔལ་ཞི་བྱེད་དེ་ལ་ཟེར། །སེམས་རྣམ་རྟོག་ཆོད་ན་བདུད་བཞི་ཆོད། །ཆོས་གཅོད་ཡུལ་ཕྱག་རྒྱ་ཆེན་པོ་ཟེར། །ཆོས་ཐམས་ཅད་སེམས་ལ་ཚང་བ་འདི། །དཔེ་དབུལ་པོའི་ཁྱིམ་ནས་གཏེར་རྙེད་འདྲ། །དེ་སངས་རྒྱས་ཐུགས་དང་རང་གི་སེམས། །དོན་ཕྱག་རྒྱ་ཆེན་པོའི་ཡེ་ཤེས་གསུམ། །དུས་དེ་རིང་དབྱེར་མེད་གཅིག་ཏུ་གོ །ཚེ་སྔོན་གྱི་
ལས་འཕྲོ་བཟང་ནས་སྐྱིད། །མི་བདག་གིས་ཚོགས་གཉིས་ཅི་བསགས་མཐུས། །ཚེ་འདི་ལ་ཚེ་རིང་ནད་མེད་ཅིང་། །དཔལ་ལོངས་སྤྱོད་ཡར་ངོའི་ཟླ་བཞིན་འཕེལ། །དུས་ནམ་ཞིག་འདི་ནས་འཕོ་བའི་ཚེ། །ནུབ་བདེ་བ་ཅན་གྱི་ཞིང་ཁམས་སུ། །དཔེ་དཔག་ཆེན་གཞུ་ནས་མདའ་འཕང་ལྟར། །ལུས་བརྫུས་སྐྱེས་སྤྲུལ་སྐུ་ཐོབ་པར་ཤོག །རྗེ་འོད་དཔག་མེད་པའི་ཞལ་མཐོང་ནས། །བདག་བྱང་ཆུབ་མཆོག་ཏུ་ལུང་བསྟན་ཏེ། །དོན་ས་བཅུ་ལམ་ལྔ་བགྲོད་ནས་ཀྱང་། །དཔལ་རྡོ་རྗེ་འཆང་ཆེན་འགྲུབ་པར་ཤོག །ཅེས་པ་ཨ་ནུ་ལྷ་སྲུང་གིས་གསུང་གིས་བསྐུལ་ནས་ཉམས་ལེན་ཞལ་འདོན་བྱ་ཕྱིར། དགེ་སློང་རཱ་ག་ཨ་སྱས་ཆུ་སྦྲུལ་གྱི་ལོ་གྲོ་ཞུན་ཟླ་བའི་ཡར་ཚེས་བཅུའི་ཐུན་མཚམས་ཤིག་ཏུ་སྦྱར་བའོ།། ༈ །།ན་མོ་ཤཱཀྱ་མུ་ནེ་ཡེ། །ནུབ་བདེ་བ་ཅན་གྱི་ཞིང་ཁམས་ནས། །ཆོས་སྐུ་སྣང་བ་མཐའ་ཡས་ལ། །གསོལ་བ་འདེབས་སོ་ཐུགས་རྗེས་གཟིགས། །འཆི་མེད་ཚེ་ཡི་དངོས་གྲུབ་གནོང་། །ལྷོ་པོ་ཊ་ལ་ཡི་གནས་མཆོག་ནས། །ལོངས་སྐུ་ཐུགས་རྗེ་ཆེན་པོ་ལ། །གསོལ་བ་འདེབས་སོ་ལམ་སྣ་དྲོངས། །རིགས་དྲུག་སྐྱེ་སྒོ་བཅད་དུ་གསོལ། །ལྷོ་ནུབ་རྔ་ཡབ་གླིང་ཕྲན་ནས། །སྤྲུལ་
སྐུ་པདྨ་འབྱུང་གནས་ལ། །གསོལ་བ་འདེབས་སོ་བར་ཆད་སོལ། །སྣང་སྲིད་ལྷ་འདྲེའི་གནོད་པ་ཟློག །སྟེང་ཕྱོགས་དགའ་ལྡན་ལྷ་ཡུལ་ནས། །ཡང་སྤྲུལ་ཇོ་འབྲོམ་རྣམ་གཉིས་ལ། །གསོལ་བ་འདེབས་སོ་ཐུགས་རྗེས་ཟུངས། །བློ་ཆོས་སུ་འགྲོ་བར་བྱིན་གྱིས་རློབས། །སྤྱི་གཙུག་པད་ཟླའི་གདན་སྟེང་ན། །དྲིན་ཆེན་རྩ་བརྒྱུད་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །ཚེ་འདི་ཕྱི་བར་གསུམ་ཁྱེད་རང་ཤེས། །ཐོབ་དཀའ་བའི་དལ་འབྱོར་མི་ལུས་ལ། །ད་སྙིང་པོ་ལོན་པར་བྱིན་གྱིས་རློབས། །དགྲ་འཆི་བདག་ནམ་འོང་ཆ་མེད་ལ། །བློ་འགྱོད་མེད་འགྲུབ་པར་བྱིན་གྱིས་རློབས། །ཁས་བཙན་པོ་གཤིན་རྗེའི་ཁྲིམས་ར་ན། །རང་ངོ་གནོང་མེད་པར་བྱིན་གྱིས་རློབས། །མི་བརྒྱ་ཤི་སྟོང་ཤི་ཐོས་ན་ཡང་། །རང་ཤི་སྣང་མེད་པར་ཨ་ཙ་མ། །ད་མི་རྟག་དྲན་པར་བྱིན་གྱིས་རློབས། །གཉེན་ཉེ་དུ་ནོར་རྫས་ཤུལ་དུ་ལུས། །རང་གཅིག་པུར་འགྲོ་དུས་ཨ་ཙ་མ། །དུས་དེ་དུས་བླ་མས་ཐུགས་རྗེས་ཟུངས། །འགགས་དམ་པོ་བར་དོའི་འཕྲང་བརྒྱད་འགྲིམ། །འཇའ་འོད་ཟེར་ཞི་ཁྲོའི་ལྷ་ཚོགས་འཆར། །དུས་དེ་དུས་དམ་པ་
རིགས་བརྒྱ་མཁྱེན། །ལམ་དམར་ནག་དཀར་སྔོན་དུ་མ་ཤར། །དུས་དེ་དུས་ཐུབ་པ་རིགས་དྲུག་མཁྱེན། །གནས་རིགས་དྲུག་གང་དུ་སྐྱེས་ཀྱང་སྡུག །མར་འཁོར་བའི་རྒྱ་མཚོ་གཏིང་རེ་ཟབ། །སྐྱེ་རྒ་ན་འཆིའི་རྦ་རླབས་འཁྲུགས། །དེ་ཐར་དུས་མེད་པ་ཨ་ཙ་མ། །ལྷ་ཐུགས་རྗེ་ཆེན་པོའི་ལམ་སྣ་དྲོངས། །ནུབ་བདེ་བ་ཅན་དུ་སྐྱེ་བར་ཤོག །དུས་ད་ནི་བྱང་ཆུབ་མ་ཐོབ་བར། །མི་ང་རང་རང་རྒྱུད་དུལ་བར་ཤོག །བྱམས་སྙིང་རྗེ་ཕྱོགས་མེད་འབྱོངས་བར་ཤོག །སེམས་རང་ངོ་རང་གིས་ཤེས་པར་ཤོག །ལམ་ཕ་རོལ་ཕྱིན་དྲུག་སྤྱོད་པར་ཤོག །སེམས་ཆོས་སྐུ་རྗེན་པར་རྟོགས་པར་ཤོག །འཇའ་ཐིག་ལེ་ལྷ་སྐུ་མཐོང་བར་ཤོག །ཆོས་རྫོགས་ཆེན་སྣང་བཞི་མཐར་ཕྱིན་ནས། །དོན་འཇའ་ལུས་ཆོས་སྐུ་འགྲུབ་གྱུར་ཅིག །ཅེས་ནམ་ལངས་ཀྱིས་བསྐུལ་ནས་རཱ་ག་ཨ་སྱས་མར་མེའི་ངོགས་སུ་བྲིས་པའོ།། ༈ །།ན་མོ་གུ་རུ། མི་བདག་གི་སྤྱི་བོའི་གཙུག་རུམ་ན། །གདན་པདྨ་ཉི་ཟླ་སུམ་བརྩེགས་སྟེང་། །ཕ་དྲིན་ཆེན་རྩ་བའི་བླ་མ་དང་། །དོན་དབྱེར་མེད་གུ་རུ་པདྨ་འབྱུང་། །སྐུ་དཀར་དམར་མདངས་ལྡན་འཛུམ་པའི་ཞལ། །ཕྱག་རྡོ་རྗེ་བྷནྡྷ་ཁཊཱཾ་
བསྣམས། །སྐུ་ཆོས་གོས་རྣམ་གསུམ་པད་ཞྭ་གསོལ། །ཞབས་རྡོ་རྗེའི་སྐྱིལ་ཀྲུང་གཡོ་བ་མེད། །མཚན་དཔེ་བྱད་ཉི་མ་འབུམ་བཞིན་འབར། །སྐུ་དེ་ལ་འོད་ཟེར་ཕྱོགས་བཅུར་འཕྲོས། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །སྤྱན་དྲངས་ནས་གུ་རུའི་སྐུ་ལ་ཐིམ། །རྗེ་སངས་རྒྱས་ཀུན་འདུས་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ལུས་དལ་འབྱོར་མི་ལུས་རིན་ཆེན་འདི། །དུས་ད་རེས་མ་གཏོགས་ཐོབ་པར་དཀའ། །ལུས་སྙིང་པོ་ལོན་པར་བྱིན་གྱིས་རློབས། །ཚེ་མི་རྟག་རླུང་ནང་མར་མེ་འདྲ། །དུས་ནམ་འཆི་ཚོད་ཟིན་མི་གདའ་བས། །སྤྲང་འཆི་བ་དྲན་པར་བྱིན་གྱིས་རློབས། །ལས་དཀར་ནག་གྲིབ་མ་བཞིན་དུ་འགྲོགས། །རང་གར་འགྲོ་ལས་འབྲས་གཙོ་ཆེ་བས། །བདག་དམ་ཆོས་འགྲུབ་པར་བྱིན་གྱིས་རློབས། །གནས་རིགས་དྲུག་སྡུག་བསྔལ་བཙོན་ར་ན། །གཞན་སུས་ཀྱང་སྐྱོབ་པར་མི་གདའ་བས། །ཕ་ཐུགས་ལྟ་རྗེས་སྐྱོབས་ཤིག་པདྨ་འབྱུང་། །ཆོས་ཀུན་གྱི་རྩ་བ་རང་སེམས་འདི། །ཚེ་སྔར་ནས་འགྲོགས་ཀྱང་ངོ་མ་ཤེས། །བདག་རང་ངོ་ཤེས་པར་བྱིན་གྱིས་རློབས། །ལུས་ཕྱི་ནང་གར་
ཡང་མི་གདའ་སྟེ། །དེ་མེད་ཀྱང་ཕྱོགས་བཅུ་ཀུན་ཏུ་རྒྱུག །སེམས་གནས་ལུགས་རྟོགས་པར་བྱིན་གྱིས་རློབས། །སེམས་བལྟས་པས་མི་མཐོང་གཟུགས་མི་གདའ། །སེམས་བཞག་ན་མི་འདུག་རྒྱུག་མཆོང་སྐྱེན། །སེམས་ལྷོད་ནས་འཇོག་པར་བྱིན་གྱིས་རློབས། །ཆོས་ཕྱག་ཆེན་དང་རྫོགས་ཆེན་དབུ་མ་རྣམས། །དོན་རང་སེམས་མིང་གི་བཏགས་འདོགས་ལ། །བདག་ངེས་ཤེས་སྐྱེ་བར་བྱིན་གྱིས་རློབས། །སེམས་རྩེ་གཅིག་དད་པས་གསོལ་བཏབ་པས། །ཕ་པདྨ་འབྱུང་གནས་འོད་དུ་ཞུ། །མི་བདག་གི་ལུས་ངག་ཡིད་གསུམ་ལ། །དཔེ་ཆུ་ལ་ཆུ་བཞག་ལྟ་བུར་འདྲེས། །དོན་རང་སེམས་ཆོས་སྐུ་མངོན་དུ་གྱུར། །རང་སེམས་ཀྱིས་སེམས་ལ་ལྟ་བ་འདི། །ཕ་པདྨ་འབྱུང་གནས་ལྟ་བ་ཡིན། །སྤང་བདག་ཀྱང་ལྟ་བ་འདི་ལ་བལྟ། །དོན་བལྟ་བྱ་ལྟ་བྱེད་བྲལ་བར་རྟོགས། །སེམས་མ་ཡེངས་དྲན་པའི་རྒྱང་སོ་འདི། །ཕ་པདྨ་འབྱུང་གནས་སྒོམ་པ་ཡིན། །སྤྱང་བདག་ཀྱང་ཉམས་ལེན་འདི་ལ་བྱེད། །དོན་འབྲལ་མེད་ཉམས་ལེན་གོམས་པར་བྱེད། །ལས་སྡིག་སྤངས་དགེ་སྒྲུབ་བརྩོན་པ་འདི། །ཕ་པདྨ་འབྱུང་གནས་སྤྱོད་པ་ཡིན། །སྤྲང་བདག་ཀྱང་
སྤྱོད་པ་འདི་ལ་སྤྱད། །ལས་མི་དགེ་སྲོག་ལ་བབ་ཀྱང་སྤངས། །མཐའ་འབྲས་བུ་ནམ་ཞིག་འཕོ་བའི་ཚེ། །གནས་བདེ་བ་ཅན་གྱི་ཞིང་ཁམས་སུ། །སྤང་བརྫུས་སྐྱེས་སྐྱེ་བ་ལེན་པར་ཤོག །ཅེས་པ་འདི་རས་པ་ཐལ་མགོན་ཁྱེད་རྩ་བའི་བླ་མར་བཟུང་ནས་གུ་དྲག་ཐང་སྐུའི་ཟུར་དུ་སྐུ་འདྲ་བྲིས་པ་ཡིན་ཟེར་ནས། འོ་ན་ང་རྩ་བའི་བླ་མ་ཡིན་ན་གསོལ་འདེབས་དང་ཉམས་ལེན་འདི་ལྟར་གྱིས་ཞེས་འཕྲལ་དུ་ཨ་རཱ་གས་སོ།། །།བསྟན་པ་སྤྱིའི་གསོལ་འདེབས་བཟོ་བོ་བླ་མ་སྐྱབས་ལ་གནང་བ་བཞུགས་སོ། །ན་མོ་མ་ཧཱ་མུ་དྲ་ཡེ། གནས་འོག་མིན་ཆོས་དབྱིངས་བྷི་ཕོ་བྲང་ན། །དཔལ་རྡོ་རྗེ་འཆང་ལ་གསོལ་བ་འདེབས། །སྟེང་དགའ་ལྡན་ལྷ་ཡི་ཕོ་བྲང་ན། །རྗེ་བློ་གྲོས་རིན་ཆེན་ལ་གསོལ་བ་འདེབས། །གནས་ལྷོ་ཕྱོགས་དཔལ་གྱི་རི་བོ་ནས། །ས་ར་ཧ་པ་ཆེ་ཆུང་ལ་གསོལ་བ་འདེབས། །རི་མེ་ལྟར་འབར་བའི་དགོན་པ་ནས། །རྗེ་མེ་ཏྲི་ཆེན་པོ་ལ་གསོལ་བ་འདེབས། །ལྷོ་གྲོ་བོ་ལུང་གི་དགོན་པ་ན། །རྗེ་ལོ་ཙཱ་ཆེན་པོ་ལ་གསོལ་བ་འདེབས། །གནས་ཆུ་བར་སྤྲུལ་སྐུའི་ཕོ་བྲང་ན། །རྗེ་རས་པ་ཆེ་ཆུང་ལ་གསོལ་བ་འདེབས། །ཤར་དྭགས་ལྷ་དཔལ་གྱི་སྒམ་པོ་ན། །རྗེ་ལྷ་རྗེ་ཁུ་དབོན་
ལ་གསོལ་བ་འདེབས། །དཔལ་ཕག་མོ་གྲུ་ཡི་ནགས་ཁྲོད་ན། །བདེར་གཤེགས་ཁམས་པ་རྡོར་རྒྱལ་ལ་གསོལ་བ་འདེབས། །མཚུར་མདོ་བོ་ལུང་གི་དགོན་པ་ན། །གྲུབ་ཐོབ་ཁམས་པ་དབུ་སེ་ལ་གསོལ་བ་འདེབས། །གནས་སྣ་ཕུ་དཔལ་གྱི་རི་ཁྲོད་ན། །གྲུབ་ཐོབ་གླིང་རྗེ་རས་པ་ལ་གསོལ་བ་འདེབས། །མཚལ་གུང་ཐང་དཔལ་གྱི་གཙུག་ལག་ན། །རྗེ་སྐྱེ་མེད་ཞང་ལ་གསོལ་བ་འདེབས། །གནས་འབྲི་གུང་དཔལ་གྱི་ཡང་དགོན་ན། །རྗེ་རིན་ཆེན་དཔལ་ལ་གསོལ་བ་འདེབས། །གནས་སྟག་ལུང་རྡོ་རྗེའི་གདན་སྟེང་ན། །རྗེ་བཀྲ་ཤིས་དཔལ་ལ་གསོལ་བ་འདེབས། །གནས་ལ་སྟོད་རྒྱལ་གྱི་རྩིབས་རི་ནས། །རྒོད་ཚང་མགོན་པོ་རྡོ་རྗེ་ལ་གསོལ་བ་འདེབས། །གནས་གནམ་མཚོ་སྔགས་ཀྱི་སྒྲུབ་གནས་ན། །རྗེ་ལོ་རས་ཆེན་པོ་ལ་གསོལ་བ་འདེབས། །ཤར་འོད་ཟེར་དམ་པའི་ཕོ་བྲང་ནས། །རྗེ་དྷརྨེ་ཤྭ་ར་ལ་གསོལ་བ་འདེབས། །གནས་ཝེ་རེ་རྡོ་རྗེའི་བྲག་ཕུག་ན། །རྗེ་ཀུན་དགའ་རྣམ་རྒྱལ་ལ་གསོལ་བ་འདེབས། །གནས་སྤྱི་གཙུག་ཚངས་པའི་ཡུལ་ས་ན། །དྲིན་ཆེན་རྩ་བརྒྱུད་བླ་མ་ལ་གསོལ་བ་འདེབས། །ནུབ་ཨོ་རྒྱན་སྤྲུལ་པའི་ཞིང་ཁམས་ན། །
ཡི་དམ་རྡོ་རྗེ་ཕག་མོ་ལ་གསོལ་བ་འདེབས། །གནས་བསིལ་བ་ཚལ་གྱི་དུར་ཁྲོད་ན། །ཆོས་སྐྱོང་མ་མགོན་ལྕམ་དྲལ་ལ་གསོལ་བ་འདེབས། །བདག་མོས་པའི་བུ་ལ་ཐུགས་རྗེས་ཟུངས། །ལུས་སྙིང་པོ་ལོན་པར་བྱིན་གྱིས་རློབས། །སེམས་འཆི་བ་དྲན་པར་བྱིན་གྱིས་རློབས། །ལས་རྒྱུ་འབྲས་ཤེས་པར་བྱིན་གྱིས་རློབས། །བྱམས་སྙིང་རྗེ་འབྱོང་བར་བྱིན་གྱིས་རློབས། །སེམས་རང་ངོ་ཤེས་པར་བྱིན་གྱིས་རློབས། །དོན་གནས་ལུགས་རྟོགས་པར་བྱིན་གྱིས་རློབས། །ཉམས་རྟོགས་པ་སྐྱེ་བར་བྱིན་གྱིས་རློབས། །རྗེ་བཀའ་བརྒྱུད་བླ་མའི་སྐུ་གསུང་ཐུགས། །མི་བདག་གི་ལུས་ངག་ཡིད་དང་གསུམ། །དོན་དབྱེར་མེད་ཆུ་ལ་ཆུ་བཞག་བཞིན། །ཆོས་ཕྱག་ཆེན་ངང་དུ་རོ་གཅིག་ནས། །ཉམས་རྟོགས་པ་ཡར་ངོའི་ཟླ་བ་བཞིན། །མི་བདག་གི་རྒྱུད་ལ་འཕེལ་བར་ཤོག །དེ་འཕེལ་བས་ཁམས་གསུམ་སེམས་ཅན་ལ། །བྱམས་སྙིང་རྗེ་བཟོད་མེད་སྐྱེ་བར་ཤོག། ལུས་ཡི་དམ་ཐུགས་རྗེ་ཆེན་པོའི་སྐུ། །ལྷ་བསྐྱེད་རིམ་བརྟན་པ་ཐོབ་པར་ཤོག །ཉམས་རྟོགས་པའི་འབྱུང་ཁུངས་བླ་མ་ལ། །སེམས་བཅོས་མིན་མོས་གུས་སྐྱེ་བར་ཤོག །དོན་
རང་སེམས་ཕྱག་རྒྱ་ཆེན་པོ་ལ། །ཉམས་གང་ཤར་རང་ངོ་བལྟ་བར་ཤོག །དེ་འཁོར་ཡུག་བརྟན་པ་ཐོབ་ནས་ཀྱང་། །ལུས་མི་ཡི་གཟུགས་སུ་འདུག་ན་ཡང་། །སེམས་མངོན་པར་སངས་ཆུང་རྒྱ་བར་ཤོག །མི་བདག་གི་གསོལ་འདེབས་ཉམས་ལེན་འདི། །མ་འགྲོ་དྲུག་སེམས་ཅན་མ་ལུས་པ། །དུས་མྱུར་དུ་སངས་རྒྱས་ཐོབ་པར་ཤོག །ཅེས་པ་བཟོ་བོ་བླ་མ་སྐྱབས་ཀྱིས་བསྐུལ་ནས་འཕྲལ་དུ་དགེ་སློང་རཱ་ག་ཨ་སྱས་བྲིས་སོ།། །།བསྟན་པ་སྤྱིའི་གསོལ་འདེབས་བྱམས་པ་སྐྱབས་ལ་གནང་བ་བཞུགས་སོ། །ན་མོ་ཤཱཀྱ་མུ་ནེ་ཡེ། གནས་འོག་མིན་ཆོས་དབྱིངས་ཞིང་ཁམས་ནས། །དཔལ་ཀུན་བཟང་རིགས་ལྔ་རྡོ་རྗེ་འཆང་། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་མི་མཇེད་དག་པའི་ཞིང་ཁམས་ནས། །དཔལ་ཤཱཀ་ཐུབ་བསྐལ་བཟང་སངས་རྒྱས་སྟོང་། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་གླིང་དང་རི་རབ་བཅས་པ་ནས། །དཔལ་འཕགས་པ་གནས་བརྟན་བཅུ་དྲུག་ལ། །བདག་གསོལ་བ་འདེབས་སོ་ཐུགས་རྗེས་
ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་རྒྱ་གར་འཕགས་པའི་ཡུལ་མཆོག་ན། །རྗེ་གྲུབ་ཆེན་བརྒྱད་ཅུ་རྩ་བཞི་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་ལྷོ་ནུབ་སྲིན་པོའི་ཡུལ་དབུས་ན། །རྗེ་པད་འབྱུང་གུ་རུ་མཚན་བརྒྱད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་སྤུ་རྒྱལ་གངས་ཅན་བོད་ཡུལ་ནས། །རྗེ་རྗེ་འབངས་ཉེར་ལྔ་མེས་དབོན་གསུམ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །བོད་གངས་ཅན་གཏེར་གནས་སོ་སོ་ན། །རྗེ་གཏེར་སྟོན་བརྒྱ་དང་རྩ་བརྒྱད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་ལ་སྟོད་གྲམ་པ་ས་སྐྱ་ན། །རྗེ་ས་སྐྱ་འཇམ་དབྱངས་བདུན་བརྒྱུད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་ར་སྒྲེང་དཔལ་གྱི་ནགས་ཚལ་ན། །རྗེ་
ཇོ་འབྲོམ་ཁུ་རྔོག་རྒྱལ་སྲས་གསུམ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་ཟངས་རི་མཁར་དམར་དགོན་པ་ན། །མ་ལབ་སྒྲོན་བརྒྱུད་འཛིན་བརྒྱ་རྩ་བརྒྱད། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །ཤར་དྭགས་ལྷ་དཔལ་གྱི་སྒམ་པོ་ན། །རྗེ་དྭགས་པོ་བཀའ་བརྒྱུད་ཡ་བཞི་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །མཚུར་མདོ་བོ་ལུང་གི་དགོན་པ་ན། །རྗེ་ཞྭ་ནག་འཛིན་པ་བཅུ་གསུམ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་སྒར་ཆེན་ཆོས་ཀྱི་ཕོ་བྲང་ན། །རྗེ་ཞྭ་དམར་འཛིན་པ་ཉེར་གཅིག་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །འབྲུག་ར་ལུང་གཉིས་ཀྱི་དགོན་པ་ན། །རྗེ་རྒྱ་རས་སེང་གེ་དགུ་ཚར་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་འབྲི་གུང་དཔལ་
གྱི་ནགས་འདབས་ན། །རྗེ་སྐྱོབ་པ་སེང་ཆེན་བཅུ་གསུམ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས་། །གནས་སྟག་ལུང་རྡོ་རྗེའི་གདན་སྟེང་ན། །རྗེ་ཐང་པ་སེང་ཆེན་བཅུ་གསུམ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་ཆོས་ཕུ་ཆོས་ཁྲི་སེར་མོ་ན། །རྗེ་ལོ་ཆེན་སེང་ཆེན་བརྒྱད་པོ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་གར་བཞུགས་ཆོས་ཀྱི་ཕོ་བྲང་ན། །རྗེ་མཚན་ལྡན་བླ་མ་ཐམས་ཅད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །གནས་སྤྱི་གཙུག་པད་ཟླའི་གདན་སྟེང་ནས། །ཆོས་དྲིན་ཐོབ་རྩ་བའི་བླ་མ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་ལ་པར་བྱིན་གྱིས་རློབས། །ལུས་ཐོབ་དཀའི་དལ་འབྱོར་མི་ལུས་འདི། །ཚེ་སུམ་གཉིས་ཡང་ཡེང་ངང་ལ་ཟད། །སྔར་གང་བྱས་ཟས་གོས་ཚེ་འདིའི་དོན། །ད་ཕྱི་མའི་བརྒྱགས་ཕྱེ་
གྲབས་རན་ཟིན། །ལུས་སྙིང་པོ་ལོན་པ་ཞིག་བླ་མ་མཁྱེན། །མི་ལུས་སྟོང་ལོག་མཁན་ཚོ་ཐུགས་རྗེས་གཟིགས། །ཕྱི་འཇིག་རྟེན་མི་རྟག་མེ་ཆུས་འཇིག །ནང་སེམས་ཅན་མི་རྟག་ལུས་སེམས་བྲལ། །དུས་དབྱར་རྒུན་མི་རྟག་འགྱུར་ཞིང་འགྲོ། །དུས་ཉིན་མཚན་གཉིས་པོ་ཚེ་ལ་བརྐུ། །སེམས་སྐྱོ་ཤས་སྐྱེ་བ་ཞིག་བླ་མ་མཁྱེན། །རྟག་འཛིན་ཕྱི་ཚིས་མཁན་ཚོ་ལ་ཐུགས་རྗེས་གཟིགས། །སྔར་སྐྱེས་ནས་མ་ཤི་གཅིག་ཀྱང་མེད། །མི་རྒས་ནས་འཆི་བ་རེ་རེ་ཙམ། །སང་ཕྱི་མ་ནམ་སྔ་ཆ་མེད་ཀྱང་། །རང་འཆི་གྲབ་ཀྱིས་དམ་ཆོས་མི་སྒྲུབ་པར། །ཕོ་རང་གིས་རང་ལ་མགོ་གཡོག་ཆེ། །ལས་རྒྱུ་འབྲས་མེ་ལོང་གཟུགས་བརྙན་བཞིན། །དེ་བསླུ་མེད་རང་ལ་སྨིན་ངེས་ཀྱང་། །དེ་མི་ཤེས་ཤེས་ཀྱང་འཆོལ་བར་སྤྱོད། །དཔེ་ཤེས་བཞིན་བཙན་དུག་ཟ་བ་འདྲ། །བདག་སྡིག་ལྟུང་མེད་པ་ཞིག་བླ་མ་མཁྱེན། །སྡིག་ཆོག་ཤེས་མེད་ཚོ་ཐུགས་རྗེས་གཟིགས། །ལས་དགེ་བ་མཁོ་སྟེ་བྱེད་མཁན་མེད། །དུས་སྙིགས་མའི་དགེ་བ་སྡིག་དང་འདྲེས། །སྡིག་མེད་པའི་ལུས་ངག་དགེ་སྦྱོར་ལ། །བདག་བརྩོན་འགྲུས་ནུས་པ་ཞིག་བླ་མ་མཁྱེན། །ཁ་སྤྱིན་གྱིས་སྦྱར་འདྲ་
ཚོར་ཐུགས་རྗེས་གཟིགས། །མར་ངན་སོང་གསུམ་གྱི་སྡུག་བསྔལ་འདི། །གཏམ་རྣ་བར་ཐོས་ཀྱང་འཇིགས་སྐྲག་ན། །དེ་མཐོང་ན་སྙིང་ཕྲིག་ཨེ་མི་དགའ། །དུས་ད་ལྟ་མེ་རྟག་ཕོག་ཀྱང་ཚ། །དུས་རྒྱུན་དུ་ལྕགས་སྲེག་ས་གཞི་ལ། །མེ་ཆེན་པོས་བསྲེགས་ན་ཅི་འདྲའོ། །བདག་རྒྱུ་འབྲས་ཞིབ་པ་ཞིག་བླ་མ་མཁྱེན། །མི་སྡིག་རྔམ་ཅན་ཚོར་ཐུགས་རྗེས་གཟིགས། །དུས་ད་ལྟ་ཞག་གཅིག་འཁྱགས་མི་ཁྱགས། །ལོ་དུང་ཕྱུར་ལ་ཆབ་རོམ་ནང་དུ་འཁེང་། །ལུས་བརྒྱ་སྟོང་དུ་གས་དུས་ཅི་འདྲ་འོང་། །བདག་ཆོས་མགོ་ཐོན་པ་ཞིག་བླ་མ་མཁྱེན། །ཕོ་རྒོད་མདའ་སྐྱེན་ཚོ་ལ་ཐུགས་རྗེས་གཟིགས། །དུས་ད་ལྟ་ཞག་གཅིག་ལྟོགས་མི་ཁྱག །ལོ་སྟོང་ཕྲག་མང་པོར་ཟས་དང་སྐོམ། །ཆུ་ཐིགས་གཅིག་འཐུང་དབང་མེད་པའི་དུས། །ཟས་ཞིམ་པོ་འདོད་པ་ཚོས་ཅི་བྱེད་ཨང་། །བདག་ཚོགས་བསགས་ནུས་པ་ཞིག་བླ་མ་མཁྱེན། །རྐུ་ཇག་འཕྲོག་བཅོམ་མཁན་ཚོར་ཐུགས་ལྟ་རྗེས་གཟིགས། །མར་མཐོ་རིས་ལྷ་མིའི་བདེ་སྐྱིད་ཀྱང་། །ཟས་ཞིམ་པོ་དུག་དང་འདྲེས་པ་བཞིན། །འཕྲལ་སྐྱིད་ཀྱང་ཕུགས་སུ་གནོད་པ་ཆེ། །ཚེ་འདི་ཡི་ཟས་ནོར་སྙན་གྲགས་
ལ། །བདག་ཞེན་པ་ལོག་པ་ཞིག་བླ་མ་མཁྱེན། །ཆོས་བརྒྱད་ཁེ་གྲགས་མཁན་ཚོར་ཐུགས་རྗེས་གཟིགས། །མི་བདག་དང་བདག་ལ་འབྲེལ་ཐོགས་རྣམས། །ནུབ་བདེ་ཆེན་ཞིང་དུ་ལམ་སྣ་དྲོངས། །ལུས་བརྫུས་སྐྱེས་ཐོབ་པ་ཞིག་བླ་མ་མཁྱེན། །མཐའ་མེད་འཁོར་བར་འཁྱམས་ཚོར་ཐུགས་རྗེས་གཟིགས། །འགྲོ་ཀུན་བྱང་ཆུབ་ཐོབ་པར་བྱིན་གྱིས་རློབས། །མཆོག་ཐུན་མོང་དངོས་གྲུབ་བསྩལ་དུ་གསོལ། །ཅེས་བྱམས་པ་སྐྱབས་ཀྱིས་བསྐུལ་ནས་ཨ་རཱ་གས་བྲིས་སོ།། ༈ །།ཨོ་རྒྱན་རིན་པོ་ཆེའི་གསོལ་འདེབས་བར་ཆད་རྐྱེན་སེལ་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་ཌཱཀྐི་ནཱི། གནས་སྤྱི་བོའི་གཙུག་རོལ་སྟེང་གི་ཆར། །འཇའ་འོད་ཕུང་འཁྲིགས་པའི་གུར་ཁང་ན། །རྗེ་རྫོགས་པའི་སངས་རྒྱས་པདྨ་འབྱུང་། །སྐུ་དཀར་དམར་སྟོན་ཀའི་ཟླ་རྒྱས་བཞིན། །ཞལ་འཛུམ་མཛེས་སྤྱན་གཉིས་ཞི་མ་ཁྲོ། །དབུ་པད་ཞྭ་རྒོད་ཀྱི་ལྡེམ་འཕྲུ་ཅན། །སྐུ་ཟ་བེར་ཆོས་གོས་རྣམ་གསུམ་གསོལ། །ཕྱག་རྡོ་རྗེ་བྷནྡྷ་ཚེ་བུམ་བསྣམས། །ཡུམ་སྦས་ཚུལ་ཁཊཾ་མཆན་ཁུང་བཏོན། །ཞབས་རྡོ་རྗེའི་སྐྱིལ་ཀྲུང་པད་ཟླའི་གདན། །ཡེ་གདོད་ནས་དམ་ཡེ་དབྱེར་མེད་
ངང་། །ཕྱི་ནམ་མཁས་གར་ཁྱབ་འཁོར་འདས་ཀུན། །རྗེ་པད་འབྱུང་སྐུ་གསུང་ཐུགས་ཀྱིས་ཁྱབ། །གནས་ཞིང་ཁམས་རྒྱ་མཚོ་མ་ལུས་པ། །རྗེ་པད་འབྱུང་སྐུ་ལ་ཐམས་ཅད་རྫོགས། །རྗེ་སངས་རྒྱས་ཐམས་ཅད་འདུས་པའི་ཐུགས། །ཐུགས་ཆོས་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ཆོས་སྐུ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དམ་ཆོས་ཐམས་ཅད་འདུས་པའི་གསུང་། །གསུང་ལོངས་སྐུའི་གཙོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ལོངས་སྐུ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགེ་འདུན་ཐམས་ཅད་འདུས་པའི་སྐུ། །སྐུ་སྤྲུལ་སྐུའི་རྒྱལ་པོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ལ་སྤྲུལ་སྐུ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་གནས་ལྔ་ནས། །དཔལ་རིགས་
ལྔའི་དཔའ་བོ་ཌཱཀྐིའི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ཡེ་ཤེས་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་རྩ་གནས་ནས། །ཡུལ་ཉེར་བཞིའི་དཔའ་བོ་ཌཱཀི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །མ་གནས་སྐྱེས་ཞིང་སྐྱེས་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་ཆ་ལུགས་ལ། །མ་ཌཱཀི་འབུམ་ཚོ་ཉི་ཤུ་རྫོགས། །བདག་གསོལ་བ་འདེབས་སོ་ཐུགས་རྗེས་ཟུངས། །མ་འབུམ་ཕྲག་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ཤར་དུ་བསྐྱོད་ཙ་ན། །ཤར་ཞི་མཛད་རྡོ་རྗེ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །ཤར་རྡོ་རྗེ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ལྷོ་རུ་བསྐྱོད་ཙ་ན། །ལྷོ་རྒྱས་མཛད་རཏྣ་ཐོད་ཕྲེང་རྩལ། །
བདག་གསོལ་བ་འདེབས་སོ་ཐུགས་རྗེས་ཟུངས། །ལྷོ་རིན་ཆེན་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ནུབ་ཏུ་བསྐྱོད་ཙ་ན། །ནུབ་དབང་མཛད་པདྨ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །ནུབ་པདྨ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་བྱང་དུ་བསྐྱོད་ཙ་ན། །བྱང་དྲག་མཛད་ཀརྨ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །བྱང་ལས་ཀྱི་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་དབུས་སུ་བསྐྱོད་ཙ་ན། །དབུས་ལྷུན་གྲུབ་བྷུདྨ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །དབུས་སངས་རྒྱས་མཁའ་སྒྱུ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ཕྱོགས་མཚམས་བསྐྱོད་ཙ་ན། །སྐུ་གང་འདུལ་གུ་རུ་
མཚན་མཆོག་བརྒྱད། །བདག་གསོལ་བ་འདེབས་སོ་ཐུགས་རྗེས་ཟུངས། །མ་དུར་ཁྲོད་མཁའ་འགྲོའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་བོད་ཡུལ་བསྐྱོད་ཙ་ན། །དཔལ་རྡོ་རྗེ་གྲོ་ལོད་ཞི་མ་ཁྲོ། །བདག་གསོལ་བ་འདེབས་སོ་ཐུགས་རྗེས་ཟུངས། །སྟེང་བརྟན་མ་བཅུ་གཉིས་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་དྲག་ཏུ་ཁྲོས་ཙ་ན། །དཔལ་གུ་རུ་དྲག་པོ་ཁྲོ་བོའི་རྒྱལ། །བདག་གསོལ་བ་འདེབས་སོ་ཐུགས་རྗེས་ཟུངས། །བཀའ་སྣང་སྲིད་ལྷ་འདྲེའི་སུན་མ་ཟློག །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྐྱེན་དུས་མིན་འཆི་དང་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །མི་བདག་གི་ལུས་དང་ལོངས་སྤྱོད་རྣམས། །དཔེ་ཀུན་བཟང་མཆོད་སྤྲིན་ལྟ་བུར་སྤྲུལ། །རྗེ་པད་འབྱུང་མཁའ་འགྲོའི་ཚོགས་ལ་འབུལ། །བདག་དེ་ལྟར་མཆོད་ཅིང་གསོལ་བཏབ་པས། །ཕྱག་ཚེ་བུམ་ནང་ནས་བདུད་རྩི་བབ། །རྐྱེན་ནད་གདོན་བར་
ཆད་སྡིག་སྒྲིབ་དག །ལུས་དྲི་མེད་ཤེལ་གོང་ལྟ་བུར་གྱུར། །རྗེ་པད་འབྱུང་འོད་ཞུ་བདག་ལ་ཐིམ། །མི་བདག་དང་དབྱེར་མེད་གཅིག་ཏུ་འདྲེས། །རྗེ་གུ་རུ་ཨོ་རྒྱན་ཚེ་དཔག་མེད། །དུས་སྟན་ཐོག་འདི་ནས་འགྲུབ་གྱུར་ཅིག །བདག་འཆི་མེད་རྡོ་རྗེའི་སྐུ་ཐོབ་ཤོག །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨ་ཡུསིདྡྷི་ཧཱུྃ་ཧཱུྃ༔ གུ་རུའི་ཚེ་སྒྲུབ་ཀྱི་སྔགས་འདི་ཅི་ནུས་བཟླའོ། ཨོཾ་དྷ་ཀ་ནི་ས་ར་ན་ན་མུ་ཁུ་ས་དུ་ན་ཟློག །སུན་མ་ཟློག་པའི་སྔགས་འདི་དུས་བཟང་དུས་བརྒྱའམ་ཉེར་གཅིག་གམ་ཡུན་ཙམ་བཟླའོ། །ཨོཾ་ཧ་ར་ཧཱུྃ་ཧ། མཁའ་འགྲོ་མ་རྣམས་འབྲོས་པའི་སྔགས་འདི་གལ་ཆེ་ན་ཅུང་ཟད་བཟླའོ། །མང་བར་མི་བྱ། ཞེས་པ་འདི་ནི་བདག་ཨ་རཱ་ག་གློ་བུར་དུ་ནད་དྲག་པོས་བཏབ་ནས་འཆི་བའི་རྟགས་ཀྱང་མང་དུ་ཚང་ནས་བྱུང་དུས་འདི་ལྟར་ཡིད་ཀྱིས་གསོལ་བ་བཏབ་པས། ཕྱིས་ནད་ལས་གྲོལ་དུས་གཞན་ལའང་ཕན་སྲིད་སྙམ་ནས་ཡི་གེར་བཀོད་པའོ།། ༈ །།འོད་དཔག་མེད་ཀྱི་བླ་མའི་རྣལ་འབྱོར་ཀརྨ་ཚེ་བརྟན་ལ་གདམས་པ་བཞུགས་སོ། །ན་མོ་གུ་རུ་དེ་ཝ་ཌཱཀྐི་ནཱི་ཧཱུཾ། མི་སྒྱུ་བདག་གི་སྤྱི་བོའི་གཙུག་རོལ་ན། །གདན་པདྨ་ཉི་ཟླ་བརྩེགས་པའི་སྟེང་། །སྐྱབས་ཀུན་འདུས་སངས་རྒྱས་འོད་དཔག་མེད། །སྐུ་དམར་གསལ་ཆོས་གོས་རྣམ་གསུམ་གསོལ།
ཕྱག་མཉམ་བཞག་བདུད་རྩིའི་ལྷུང་བཟེད་བསྣམས། །སྐུ་མཚན་དཔེས་རབ་བརྒྱན་སྐྱིལ་ཀྲུང་བཞུགས། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །དཔེ་ཁ་བ་བུ་ཡུག་འཚུབ་བཞིན་བྱོན། །དེ་ཐམས་ཅད་སྣང་མཐའི་སྐུ་ལ་ཐིམ། །རྗེ་དཀོན་མཆོག་ཀུན་འདུས་རྫོགས་སངས་རྒྱས། །བདག་གསོལ་བ་འདེབས་སོ་ཐུགས་རྗེས་ཟུངས། །དཔེ་བཤའ་ལུག་མགོ་འཁོར་ཇི་བཞིན་དུ། །ད་ནམ་འཆི་ཆ་མེད་ཨ་ཙ་མ། །དཔེ་ནུབ་རིའི་རྩེ་ཡི་ཉི་མ་བཞིན། །དེ་བཤོལ་ཐབས་མེད་པས་ཨ་ཙ་མ། །གཉེན་ཉེ་དུ་ཟས་ནོར་ཤུལ་དུ་ལུས། །རང་གཅིག་པུར་འགྲོ་དུས་ཨ་ཙ་མ། །ས་ཆ་མེད་ཡུལ་དུ་རྒྱུས་མེད་འཁྱམས། །ས་གར་འགྲོ་ཆ་མེད་ཨ་ཙ་མ། །ལུས་འབྱུང་བཞིའི་ཐེམ་སྡུག་ཟུག་ཟེར་ཆེ། །སེམས་འཁྲུལ་སྣང་འཇིགས་སྐྲག་ཨ་ཙ་མ། །ལས་དགེ་སྡིག་ལུས་དང་གྲིབ་བཞིན་འགྲོགས། །དཔོན་གཤིན་རྗེའི་ཁྲིམས་ར་ཨ་ཙ་མ། །དུས་དེ་དུས་བདག་ལ་སྐྱབས་གཞན་མེད། །ཕ་ཐུགས་རྗེས་ཟུངས་ཤིག་འོད་དཔག་མེད། །དུས་དེང་སང་སྙིགས་དུས་བར་ཆད་མང་། །ཚེ་མཐའ་རུ་ཕྱིན་པར་བྱིན་གྱིས་རློབས། །ཡེ་གདོད་ནས་རང་སེམས་ཆོས་
ཀྱི་སྐུ། །དེ་རང་ངོ་འཕྲོད་པར་བྱིན་གྱིས་རློབས། །དུས་ནམ་ཞིག་འདི་ནས་ཚེ་འཕོས་ཚེ། །ནུབ་བདེ་བ་ཅན་དུ་སྐྱེ་བར་ཤོག །རྗེ་འོད་དཔག་མེད་པ་འོད་དུ་ཞུ། །མི་བདག་དང་དབྱེར་མེད་གཅིག་ཏུ་འདྲེས། །ད་ཚུར་ལྟོས་རང་གི་སེམས་ལ་ལྟོས། །དེ་བལྟས་པས་མ་མཐོང་ངང་ལ་ཞོག །སེམས་བཟོ་བཅོས་མེད་པར་ལྷུག་པར་ཞོག །དབྱིངས་ནམ་མཁའི་མཐོངས་སུ་ཡར་ལྟོས་དང་། །དོན་ཡེ་ཤེས་ལྔ་ཡི་འོད་ཟེར་ལྔ། །འཇའ་ཐིག་ལེ་ཐིག་ཕྲན་ལུ་གུ་རྒྱུད། །ལྷ་དམ་པ་རིགས་བརྒྱ་དངོས་སུ་མཇལ། །དེ་ལྟོས་ལ་རང་སེམས་དབྱེར་མེད་སྲེས། །སྒོམ་གསལ་སྟོང་དབྱེར་མེད་ངོ་མཚར་ཆེ། །དེ་གོམས་ན་བར་དོར་མངོན་འཚང་རྒྱ། །ཆོས་ཐེག་པ་དགུ་ཡི་ཡང་རྩེ་ཡིན། །ཆོས་འདི་ལས་ཟབ་པ་གཅིག་ཀྱང་མེད། །ལམ་དེ་ལས་མྱུར་བར་གསུངས་པ་མེད། །ཁྱེད་ཀརྨ་ཚེ་བརྟན་ཉམས་ལེན་མཛོད། །ཚིག་དེ་སྐད་རཱ་ག་ཨ་སྱས་ཡིས། །ས་ཀེ་སྟོད་ཆུ་ཆེན་སྒྱུ་ཐོག་ཏུ་སྨྲས།། ༈ །།ཀརྨ་དོན་གྲུབ་ལ་གདམས་པ་བཞུགས། ན་མོ་གུ་རུ་ག་ག་ན་དྷ་ཛ་ཡེ། འཇམ་དབྱངས་བླ་མ་ཆོས་ཀྱི་དབང་ཕྱུག་ལ། །རྩེ་གཅིག་གུས་པའི་ཡིད་
ཀྱིས་གསོལ་བ་འདེབས། །རྗེས་འཇུག་བུ་ལ་ཐུགས་རྗེས་སྤྱན་གྱིས་གཟིགས། །མི་ཤེས་རྨོངས་པའི་དྲི་མ་བསལ་དུ་གསོལ། །བུ་ཆུང་ནས་སྐྱོང་བའི་ཀརྨ་དོན་འགྲུབ་ཉོན། །སྐྱེ་བར་དཀའ་བའི་འཛམ་བུ་གླིང་དུ་སྐྱེས། །ཐོབ་པར་དཀའ་བའི་མི་ལུས་རིན་ཆེན་ཐོབ། །རིགས་བཟང་ཁུངས་བཙུན་སྨུག་པོ་གདོང་གི་རིགས། །གྲུབ་ཆེན་མཁའ་ལ་སྤྱོད་པའི་རིགས་སུ་སྐྱེས། །ཆུང་ནས་རབ་བྱུང་ཆེ་ནས་ཚུལ་ཁྲིམས་བསྲུང་། །བླ་མ་བསྟེན་ཅིང་དབང་ལུང་ཟབ་དགུ་ཐོབ། །ཇོ་ཤཱཀ་གཉིས་སོགས་དབུས་གཙང་གནས་རི་འཁོར། །དེང་སང་མཚམས་དང་སྒྲུབ་པ་བྱེད་པ་འདི། །ཚེ་སྔོན་བསོད་ནམས་བསགས་པའི་འབྲས་བུ་དང་། །སྨོན་ལམ་བཟང་པོ་བཏབ་པའི་འབྲས་བུ་ཡིན། །མཚམས་ལ་འདུག་ཕྱིར་རི་ཁྲོད་ཕྱོགས་སུ་ནི། །གོམ་པ་བདུན་ཙམ་སྤོ་བར་བྱས་ན་ཡང་། །བསྐལ་པ་སྟོང་གི་སྡིག་པ་དག་པར་གསུངས། །འཇམ་དབྱངས་དཀར་པོ་རྒྱུན་དུ་བསྙེན་པ་ནི། །ཚེ་གཅིག་ལུས་གཅིག་སངས་རྒྱས་ཐོབ་པར་གསུངས། །བཅོམ་ལྡན་ཀུན་རིག་འདི་ཉིད་ཉམས་སུ་བླངས། །མཚམས་མེད་ལྔ་ཡི་སྡིག་སྒྲིབ་དག་པ་དང་། །འཁོར་བ་ངན་སོང་སྐྱེ་སྒོ་ཆོད་པར་
གསུངས། །ཀུན་རིག་སྒོ་ནས་ཚེ་འདས་དོན་བྱེད་པའི། །མི་དེ་སངས་རྒྱས་སྤྲུལ་པ་ཡིན་པར་གསུངས། །སྙིགས་མའི་དུས་འདིར་རིན་ཆེན་སྣ་བདུན་གྱིས། །འཇིག་རྟེན་བཀང་ནས་སྦྱིན་པ་བཏང་བ་བས། །དམ་ཆོས་ཚིག་བཞི་བློ་ལ་བཟུང་བ་ན། །བསོད་ནམས་བརྒྱ་སྟོང་འགྱུར་གྱིས་ཆེ་བར་འགྱུར། །ངན་སོང་སྦྱོང་བ་ཀུན་རིག་དཀྱིལ་འཁོར་འདི། །ཕྱི་མའི་ལམ་སྣ་འདྲེན་པའི་བླ་མ་ཡིན། །མཆོག་གི་དངོས་གྲུབ་སྩོལ་བའི་ཡི་དམ་ཡིན། །བདེ་སྐྱིད་ཕུན་ཚོགས་སྒྲུབ་པའི་མཁའ་འགྲོ་ཡིན། །རྐྱེན་ངན་བར་ཆད་སེལ་བའི་ཆོས་སྐྱོང་ཡིན། །ལོངས་སྤྱོད་འཛད་མེད་འབྱུང་བའི་ནོར་ལྷ་ཡིན། །འདི་ཕྱི་གཉིས་ཀའི་དོན་འབྱུང་ནོར་བུ་ཡིན། །དེ་ཕྱིར་དད་གུས་སྤྲོ་བ་སྐྱེད་མཛོད་ལ། །ཀུན་རིག་དཀྱིལ་འཁོར་བློ་ལ་འཛིན་པ་དང་། །ནངས་ནུབ་འཇམ་དབྱངས་དཀར་པོའི་བསྙེན་པ་དང་། །སྐབས་སུ་རང་སེམས་ངོ་བོ་སྐྱོང་བར་མཛོད། །ཅེས་དོན་འགྲུབ་མཚམས་ལ་འདུག་དུས་སྤྲོ་བ་ལྟའཕེལ་ཕྱིར་ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།