ཕྱག་རྫོགས་ཟུང་འཇུག་གི་ཉམས་ལེན་ཁྲིད་བསྡུས་པ་ཆམ་ཕུ་དབུ་མཛད་ལ་གནང་བ།
ཕྱག་རྫོགས་ཟུང་འཇུག་གི་ཉམས་ལེན་ཁྲིད་བསྡུས་པ་བཞུགས་སོ། །ཆམ་ཕུ་དབུ་མཛད་ལ་གནང་བ་བཞུགས། །
ན་མོ་མ་ཧཱ་མུ་དྲ་ཡེ། ཀུན་ཏུ་བཟང་པོ་རྡོ་རྗེ་འཆང་། །དགའ་རབ་རྡོ་རྗེ་ས་ར་ཧ། །དབྱེར་མེད་དྲིན་ཐོབ་བླ་མ་ལ། །གསོལ་བ་འདེབས་སོ་ཐུགས་རྗེས་གཟིགས། །ཉམས་རྟོགས་སྐྱེ་བར་བྱིན་གྱིས་རློབས། །ཆམ་ཕུ་དབུ་མཛད་ད་ཞག་སྐོར། །ཡི་གེ་འདི་ལ་ཐུགས་བསམ་ཐོངས། །དལ་འབྱོར་རྙེད་དཀའི་ཆོས་ཐུན་ལ། །བཤད་པ་རྒྱ་ཆེར་གྲངས་མང་ཡང་། །བཤད་པ་མི་དགོས་མིག་གིས་ལྟོས། །རྒྱལ་པོ་མངའ་ཐང་རྒྱས་པ་ཡི། །དམག་ལ་འབུམ་ཕྲག་འབྱུང་བར་དཀའ། །གྲོག་ཚང་རེར་ཡང་འབུམ་ཕྲག་ལྷག །འབུ་སྲིན་གྲངས་ཁ་འདི་ལ་
ལྟོས། །མི་ལུས་ཐོབ་པ་ཨེ་དཀའ་ལྟོས། །མི་རྟག་བསྒོམ་པའི་ཆོས་ཐུན་ལ། །བཤད་པ་མི་དགོས་རྣ་བས་ཉོན། །རྒས་གཞོན་ངེས་པ་མི་གདའ་ན། །མཐོན་པོ་དང་ནི་དམའུ་གཉིས། །ཐམས་ཅད་རིམ་གྱིས་འཆི་གྲགས་ཉོན། །རང་ལ་མི་འཆི་གདེང་ཅི་ཡོད། །ཚེ་ཚད་ངེས་པ་ཡོད་མེད་བསམ། །སྟོབས་ཆེན་དཔལ་འབྱོར་ཅན་ཚོས་ཀྱང་། །འཆི་བ་བཟློག་ཐབས་མ་རྙེད་ནས། །ཐམས་ཅད་ཤི་རབས་རྣ་བས་ཉོན། །རང་ཉིད་དེ་རིང་སོང་ཙམ་ཡང་། །མི་འཆི་ངེས་ཤེས་ཨེ་ཡོད་བསམ། །ཤི་ནས་གར་འགྲོའི་ངེས་ཏིག་དང་། །ཤི་བས་མི་
འཇིགས་གདེང་ཅི་ཡོད། །རྒྱུ་འབྲས་ཆོས་ཐུན་བསྒོམ་བྱ་ལ། །བཤད་པ་མི་དགོས་བསམ་བློ་ཐོངས། །ཕ་མ་མཉམ་པའི་བུ་ལ་ཡང་། །ཚེ་ཡི་རིང་ཐུང་སྐྱིད་སྡུག་དང་། །ཕྱུག་དབུལ་ལ་སོགས་མི་མཉམ་པ། །ལས་འབྲས་མིན་ན་ཅི་ཞིག་ཡིན། །ད་ལྟའི་སྐྱིད་སྡུག་སྔོན་གྱི་ལས། །ཕྱི་མ་གར་སྐྱེ་ད་ལྟའི་ལས། །གཏན་ནས་གནོད་ངེས་སྡིག་དང་ལྟུང་། །གཏན་དུ་ཕན་ངེས་དགེ་བའི་ཕྱོགས། །གནོད་ངེས་སྤངས་ལ་ཕན་ངེས་སྒྲུབས། །ཞག་བར་འདི་ལ་གོ་བ་ལོངས། །འཁོར་བའི་ཉེས་དམིགས་བསྒོམ་བྱ་ལ། །བཤད་པ་མི་དགོས་ལྟོས་དང་གསལ། །རིགས་དྲུག་མཆོག་གྱུར་མི་ལུས་ལ། །སྐྱེ་རྒ་ན་འཆི་ཅི་འདྲ་ན། །མཛེ་སོགས་ནད་ངན་དམྱལ་བ་འདྲ། །འཁྲུག་རྩོད་ཤི་བསད་ལྷ་མིན་འདྲ། ། མཐོན་པོ་དམའ་ལུགས་ལྷ་དང་འདྲ། །མུ་གེའི་ཤི་ཚད་ཡི་དྭགས་འདྲ། །ཁྲིམས་གཅོད་བཀྱིག་བརྡུང་དུད་འགྲོ་འདྲ། །མི་ཡི་སྡུག་བསྔལ་འདི་འདྲ་ན། །ངན་སོང་སྐྱེ་ན་སྨོས་ཅི་དགོས། །རང་ཐོག་བྱུང་ན་ཅི་འདྲ་སོམས། །དེ་ཡང་རང་བྱས་འབྲས་བུ་སྟེ། །སུ་ཡང་མ་ལེན་རང་གི་ལས། །སྡུག་བསྔལ་ནམ་ཡང་མི་འདོད་ན། །འཁོར་བའི་འདམ་ལ་མ་
ཆགས་པར། །དག་པའི་ཞིང་དུ་ཕྱིན་ཐབས་འབད། །འཁོར་བ་སྡུག་བསྔལ་འབའ་ཞིག་སྟེ། །དེ་ལས་སྐྱོབ་པ་གཞན་མ་མཆིས། །སྐྱོབ་པར་ངེས་པ་དཀོན་མཆོག་གསུམ། །གཅིག་བསྡུས་ཨོ་རྒྱན་རིན་པོ་ཆེ། །པད་ཞྭ་ཆོས་གོས་ཁ་ཊཾ་སོགས། །རྒྱན་དང་ཆ་ལུགས་ཡོངས་རྫོགས་པ། །སྤྱི་བོའི་གཙུག་ཏུ་གསལ་བར་བསྒོམ། །འདི་དང་ཕྱི་མ་བར་དོ་གསུམ། །ཅི་མཛད་ཁྱེད་ཤེས་གློ་སྙིང་གཏོད། །སྐྱབས་འགྲོ་སྤྱི་ལྟར་གང་ཤེས་བྱེད། །རིགས་དྲུག་སེམས་ཅན་ཐམས་ཅད་ཀུན། །ཚེ་རབས་དུ་མའི་ཕ་དང་མ། །རིགས་དྲུག་སྡུག་བསྔལ་སྙིང་རེ་རྗེ། །དེ་དག་ཐམས་ཅད་བདེ་བ་ལ། །རང་ཉིད་ཁོ་ནས་འགོད་སྙམ་པའི། །བློ་སྟོབས་བྱང་ཆུབ་སེམས་བསྐྱེད་དེ། །རང་གིས་དགེ་སྦྱོར་གང་བྱེད་རྣམས། །སེམས་ཅན་སྤྱི་ཡི་དོན་དུ་བསྔོས། །དེ་ནི་ཐེག་ཆེན་ལམ་གྱི་མཆོག །མཐར་ཐུག་སངས་རྒྱས་འགྲུབ་པའི་རྒྱུ། །དེ་ཡི་བསྒོམ་བྱ་འདི་ལྟ་སྟེ། །སྣ་དབུགས་རླུང་ནི་ཕར་འགྲོ་དུས། །རང་གི་དགེ་བའི་རྩི་བོ་རྣམས། །འགྲོ་དྲུག་སེམས་ཅན་ཀུན་ལ་ཐིམ། །ཐམས་ཅད་བདེ་སྐྱིད་ལྡན་པར་བསྒོམ། །རླུང་ནི་ཚུར་ལ་རྩུབ་པའི་
ཚེ་། །སེམས་ཅན་ཀུན་གྱི་སྡིག་དང་ལྟུང་། །ཐམས་ཅད་རང་ལ་སིབས་སེ་ཐིམ། །འགྲོ་ཀུན་སྡུག་བསྔལ་བྲལ་བར་བསྒོམ། །དེ་ནི་བཏང་ལེན་དམིགས་པ་ཞེས། །བཀའ་གདམས་ཆོས་ཀྱི་རྩ་བ་ཡིན། །ནད་གདོན་བར་ཆད་ཞི་བའི་ཐབས། །བྱམས་པའི་གོ་ཆ་བསྲུང་བའི་མཆོག །རྫོགས་པའི་སངས་རྒྱས་སྒྲུབ་པའི་ཐབས། །ས་བོན་ཆུ་ལུད་ལྟ་བུ་ཡིན། །དེ་ཕྱིར་ནངས་སྔ་ནུབ་ཕྱི་ལ། །དམིགས་པ་རླུང་གི་རྒྱུ་བ་དང་། །སྦྲག་པ་བརྒྱའམ་ཉེར་གཅིག་ཙམ། །ཞག་སྐོར་བསྒོམ་ལ་རྒྱུན་དུ་མཛོད། །དེ་ནས་སྡིག་སྒྲིབ་སྦྱོང་བའི་ཐབས། །སྤྱི་བོའི་པདྨ་འབྱུང་གནས་ཀྱི། །སྐུ་ལས་བདུད་རྩིའི་རྒྱུན་བབས་པས། །སྤྱི་བོ་ཚངས་པའི་བུག་ནས་ཞུགས། །ལུས་གང་སྡིག་ལྟུང་དྲི་མ་རྣམས། །དུད་ཁུ་སོལ་ཁུ་ལྟ་བུ་རུ། །རྐང་མཐིལ་བཤང་བའི་ལམ་ནས་ཐོན། །འོག་གི་ས་ལ་ཐིམ་པ་ཡིས། །རང་ལུས་ཤེལ་སྒོང་ལྟར་གྱུར་བསྒོམ། །བཛྲ་གུ་རུ་ཅི་ནུས་བཟླ། །དེ་ནས་བསོད་ནམས་ཚོགས་བསགས་ཐབས། །རང་ལུས་ལོངས་སྤྱོད་དགེ་རྩེར་བཅས། །གླིང་བཞི་རི་རབ་ཉི་ཟླ་དང་། །ལྷ་མིའི་ལོངས་སྤྱོད་ཕུན་ཚོགས་རྒྱུ། །ཨོ་རྒྱན་རྗེ་ལ་ཕུལ་དམིགས་
ཤིང་། །ས་གཞི་སྤོས་བྱུགས་མ་ལ་སོགས། །མཎྜལ་གང་ཤེས་འབུལ་བར་བྱ། །དེ་ནས་བྱིན་རླབས་འཇུག་པའི་ཐབས། །སྤྱི་བོར་བསྒོམ་པའི་ཨོ་རྒྱན་དེ། །རྩ་བརྒྱུད་བླ་མ་ཀུན་འདུས་དམིགས། །བླ་མ་སྐུ་གསུམ་གསོལ་འདེབས་སོགས། །གསོལ་འདེབས་གང་ཤེས་འདོན་པའམ། །ཡང་ན་བཛྲ་གུ་རུ་བཟླས། །དེ་ནས་དབང་བཞི་བྱིན་རླབས་ནི། །པད་འབྱུང་འོད་དུ་ལྟེམས་སེ་ཞུ། །རང་ལ་དབྱེར་མེད་ཐིམ་པར་བསྒོམས། །དེ་ཡི་སྔོན་འགྲོ་དམིགས་པའི་སྐོར། །མདོར་བསྡུས་ཚང་ཞིང་དངོས་གཞི་སེམས་ལ་ཅི་ཡང་མི་བསྒོམ་པར། །ཞི་གནས་ལྷག་མཐོང་གཉིས་ཡིན་ཏེ། །མདུན་གྱི་ནམ་མཁར་བཅོམ་ལྡན་འདས། །ཤཱཀྱའི་དབང་པོ་གསལ་བར་བསྒོམ། །དེ་ཡི་སྐུ་ལ་རྩེ་གཅིག་ཏུ། །སེམས་གཏད་སེམས་གཞན་མི་འཕྲོ་བར། །རིག་པ་ཅི་ཙམ་གནས་ཐུབ་ལྟ། །མི་གནས་འཕྲོ་ན་ཚུར་བཀུག་ལ། །སྔར་ལྟར་སེམས་དེ་སྟོན་པ་ལ། །ཅི་ཙམ་གནས་གནས་བར་དུ་བཞག །སེམས་གཞན་མི་འཕྲོ་ཐུབ་པ་ལ། །ཡུན་རིང་སེམས་ནི་གནས་པ་ལ། །ཐུན་མོང་ཞི་གནས་བྱ་བ་ཡིན། །ཐུན་མོང་མིན་པའི་ཞི་གནས་ནི། །
སེམས་ལ་ཅི་ཡང་མི་བསྒོམ་པར། །སེམས་ལ་སེམས་ཀྱིས་ལྟ་བྱས་ལ། །སེམས་དེ་གཞན་དུ་མི་འཕྲོ་བར། །ཀྱི་ལེར་གནས་པ་དེ་དག་ཏུ། །ཅི་ཙམ་གནས་གནས་བར་དུ་བཞག་རྣམ་རྟོག་ཚབ་ཚུབ་མི་འཕྲོ་བར། །སེམས་དེ་ཀྱི་ལེ་མེ་རེ་གནས། །གནས་པ་དེ་ཡང་སེམས་ཀྱིས་རིགས། །ད་ལྟ་ང་ཡི་སེམས་དེ་ནི། །ཀྱི་ལེ་གནས་ནི་ཡོད་སྙམ་པའི། །སེམས་ལ་འཛིན་པའི་ངེས་ཤེས་ཡོད། །དེ་ནི་མཚན་མེད་ཞི་གནས་ཡིན། །དེ་ལ་རེ་ཞིག་ཉམས་ལེན་ཞུ། །དེ་ནས་ལྷག་མཐོང་ལ་ཡང་གཉིས། །དང་པོ་ཐུན་མོང་ལྷག་མཐོང་གི །ཆོས་ཀུན་རྩ་བ་རང་གི་སེམས། །སེམས་ཀྱི་རྩ་བ་ཆོད་པ་ན། །ཆོས་ཀུན་རྩ་བ་ཆོད་པ་ཡིན། །དེ་ཕྱིར་རང་སེམས་ལེགས་པར་ཚོལ། །ལུས་ཀྱི་ཕྱི་ནང་བར་གསུམ་དང་། །ཕྱི་རོལ་སྟེང་འོག་ཕྱོགས་མཚམས་སུ། །རང་སེམས་གར་གདའ་ཚོལ་བར་གྱིས། །སེམས་དེའི་ཁ་དོག་ཅི་ལྟ་བུ། །སེམས་དེའི་དབྱིབས་ནི་ཇི་ལྟ་བུ། ། གཟུགས་སྒྲ་དྲི་རོ་རེག་བྱ་སོགས། །སེམས་དེའི་རྣམ་པ་ཅི་ལྟ་བུ། །གལ་ཏེ་རང་སེམས་མ་རྙེད་ན། །མ་རྙེད་བསམ་མཁན་སུ་ཞིག་ཡིན། །སེམས་དེ་ཚོལ་མཁན་སུ་ཞིག་
ཡིན། །གལ་ཏེ་སེམས་དེ་ཡོད་ན་ནི། །དངོས་པོ་གཟུགས་བརྙན་ཅི་ལྟར་སྣང་། །གལ་ཏེ་སེམས་དེ་མེད་ན་ནི། །སྐྱིད་དང་སྡུག་པ་ཅི་ལས་བྱུང་། །དུག་ལྔ་ཁོང་ཁྲོ་གང་ནས་བྱུང་། །དད་པ་དག་སྣང་གང་ལས་བྱུང་། །ཆོས་ཞུ་བསམ་མཁན་གང་ནས་བྱུང་། །དེ་འདྲ་ཡིད་ལ་ཕྲེང་བ་ཡི། །རྣམ་རྟོག་མི་དྲན་དགུ་དྲན་དེ། །དང་པོ་གང་ནས་བྱུང་བ་ཡིན། །ད་ལྟ་གང་དུ་གནས་པ་ཡིན། །ཐ་མ་གང་དུ་འགྲོ་བ་རེད། །ད་ལྟ་ལེགས་པར་ཚོལ་བར་གྱིས། །དེ་ནས་གལ་ཏེ་མ་རྙེད་ན། །མ་རྙེད་བསམ་མཁན་དེ་ཉིད་ལ། །ལྟོས་དང་སྡོད་དང་ཅི་འདྲ་འོང་། །དེ་ཚེ་ལེགས་པར་བསམ་བློ་ཐོངས། །དེ་ནས་ཁྱད་པར་ལྷག་མཐོང་ལ། །རེས་འགའ་ཅི་ཡང་མི་བསམ་པར། །སེམས་དེ་ལྷོད་དེར་ཞོག་མཛོད་ལ། །ཅི་ཡང་ཡིད་ལ་མི་དྲན་པ། །ཅི་ཙམ་འདུག་རྒྱུ་གདའ་བར་ཞོག །སེམས་དེ་གར་ཡང་མི་འགྲོ་བར། །ཅི་ཙམ་སྡོད་ཐུབ་ཚད་སྤུ་གྱིས། །རེས་འགའ་གར་འགྲོ་ཐོངས་མཛོད་ལ། །འགྲོ་ས་གར་གདའ་དེ་རུ་ཐོངས། །དེ་ལྟར་སྒྲིམ་ལྷོད་རེས་མོས་གྱིས། །ངོ་བོ་དེ་ལ་ཕྱིན་པའི་དུས། །སེམས་ཀྱི་མདོག་དབྱིབས་གནས་འདུག་དེ། །
ང་ལ་བཤད་རྒྱུ་ཡོད་པར་གྱིས། །ཁ་དལ་ལ་སོགས་མ་ཡེངས་པར། །སེམས་ལ་ཅི་གདའ་ངེས་ཤིག་ཅིག། །ང་ལ་བཤད་རྒྱུ་ཡོད་ངེས་མཛོད། །དམིགས་ཐུན་དང་པོའོ།། ༈ །།དེ་ནས་ཐུན་མོང་མ་ཡིན་པའི། །ཞི་གནས་དང་ནི་ལྷག་མཐོང་གཉིས། །སེམས་ལ་ཅི་ཡང་མི་དྲན་པར། །ཀྱི་ལེ་གནས་ཤིང་གནས་པ་དེ། །རིག་པ་དེ་ནི་ཞི་གནས་ཟེར། །དེ་ཡི་གནས་མཁན་ངོ་བོ་ལ། །བལྟས་པས་དངོས་པོ་ཅི་ཡང་མེད། །སྟོང་པར་མཐོང་བ་ལྷག་མཐོང་ཡིན། །གནས་པ་དེ་དང་སྟོང་པ་གཉིས། །དབྱེར་མེད་ངོ་བོ་གཅིག་པ་ལ། །ཞི་ལྷག་ཟུང་འཇུག་ཟེར་བ་ཡིན། །དེ་ལ་ཡུན་རིང་གནས་པ་ནི། །གནས་པ་ཆགས་ཞེན་བྱ་བ་ཡིན། །གལ་ཏེ་མི་གནས་འཕྲོ་ན་ཡང་། །མ་སྒྲིམ་ལྷོད་ལ་བབ་ཀྱི་ལྟོས། །མང་པོ་བཤད་པའི་སོ་ན་མེད། །ལུས་གནད་བསྲང་ལ་རྩེ་གཅིག་ལྟོས། །རང་སེམས་བཙལ་བས་མ་རྙེད་ན། །དེ་ལ་སྟོང་པ་ཉིད་ཅེས་བྱ། །དབྱིབས་སུ་མ་གྲུབ་ཁ་དོག་མེད། །ལུས་ཀྱི་ཕྱི་དང་ནང་ན་མེད། །ཕྱི་རོལ་ཕྱོགས་བཅུར་བཙལ་ཡང་མེད། །སེམས་དེ་མེད་པ་ཉིད་ཀྱང་མིན། །སྐྱིད་སྡུག་དུག་ལྔ་དད་གུས་སོགས། །སྣ་
ཚོགས་དྲན་ཞིང་ཅི་ཡང་འཆར། །ཡོད་མེད་གཉིས་ཀ་མ་ཡིན་པས། །སེམས་ཀྱི་གནས་ལུགས་བརྗོད་མི་ཤེས། །དེ་ཕྱིར་སྨྲ་བསམ་བརྗོད་མེད་ཡིན། །རང་སེམས་ཡེ་ནས་ཕྱག་རྒྱ་ཆེ། །རང་ངོ་ཤེས་པས་ཆོག་པ་ཡིན། །ཡག་འདོད་ཉེས་དོགས་བྱས་ན་འཆིང་། ་།རེ་དོགས་མེད་པར་གང་ཤར་བ། །བཟོ་བཅོས་མེད་པར་ལྷུག་པར་ཞོག །སེམས་ལ་སེམས་ཀྱིས་ཚུར་ལྟ་བ། དེ་ནི་བསྒོམ་ཞེས་བྱ་བ་ཡིན། །རང་སེམས་རང་གིས་ལྟ་མ་ཤེས། །བསྒོམ་ནི་མ་ཤེས་པ་ཡིན་པས། །བལྟས་པས་མཐོང་རྒྱུ་ཡོད་པ་མིན། །མཐོང་རྒྱུ་མེད་པ་མཐོང་བ་དེ། །སེམས་ངོ་ཤེས་པ་ཡིན་ལགས་སོ། །ཕྱག་རྒྱ་ཆེན་པོ་ཟེར་བ་དེ། །རང་གི་སེམས་ལ་ཟེར་བ་ཡིན། །གཞན་ན་མེད་པར་བློ་ཐག་ཆོད་། །དེ་ཉིད་ཉམས་སུ་ལེན་པའི་ཐབས། །སེམས་ལ་སེམས་ཀྱིས་ལྟ་བ་ཡིན། །བསྒོམ་རྒྱུ་མེད་པ་བློ་ཐག་ཆོད། །སེམས་དེ་བལྟས་པས་མ་མཐོང་ན། །སྟོང་ཉིད་དོན་དམ་མཐོང་བ་ཡིན། །དེ་ཉིད་བསྒོམ་དུ་བློ་ཐག་ཆོད། །གནས་ནི་དགའ་དང་འགྱུ་ན་སྡུག །དེ་འདྲ་དང་པོར་མཐོང་ན་ཡང་། །ཆུ་དང་ཆུ་རླབས་བཟང་ངན་མེད། །གནས་འགྱུ་
གདམ་ཀ་མ་བྱེད་པར། །གང་ཤར་རང་ངོ་བལྟ་བ་དེ། །ཉམས་ལེན་ཡིན་པར་བློ་ཐག་ཆོད། །རང་ངོ་རང་གིས་མ་རིག་ན། །བཟང་པོ་ངན་པ་ཅི་དྲན་ཡང་། །འཁྲུལ་བ་ཡིན་པར་བློ་ཐག་ཆོད། །དེ་ཕྱིར་མ་ཡེངས་དྲན་རྫི་ཡི། །མར་ཁུའི་ཕོར་ཁ་འཚོ་བ་ལྟར། །སྤྱོད་ལམ་ཀུན་ཏུ་རང་སེམས་སྲུངས། །དེ་ལྟར་རང་སེམས་འཚོ་ཐུབ་ན། །ཚོང་དུས་ཁ་ཡང་དབེན་པ་ཡིན། །རང་སེམས་འཚོ་ནི་མ་ཐུབ་ན། །མུན་མཚམས་བྱས་ཀྱང་ཕན་པ་མེད། །རང་སེམས་བྱ་ར་ཡང་ཡང་མཛོད། །ཉམས་དང་པོ་རི་གཟར་གྱི་ཆུ་དང་འདྲ། སེམས་སྐད་ཅིག་མི་སྡོད་ཚུབ་ཚུབ་རྒྱུག །བསྒོམ་འོང་ལེ་མི་གདའ་བསམ་པ་འབྱུང་། །བསྒོམ་འོང་རྟགས་ཡིན་ནོ་སྡུག་མི་དགོས། །ཉམས་གཉིས་པ་ས་རོང་གི་ཆུ་དང་འདྲ། སེམས་རེས་འགའ་དལ་ཏེ་རེས་འགའ་བྲེལ། །སེམས་གནས་ན་དགའ་ཞིང་འགྱུ་ན་སྡུག །གནས་འགྱུ་ལ་གདམ་ག་མ་བྱེད་དང་། །དོན་རིག་པས་ཆོག་གོ་བཟང་ངན་མེད། ཉམས་གསུམ་པ་གཙང་པོའི་ཆུ་ཆེན་འདྲ། །སེམས་མེ་རི་འཁྱིལ་ལེ་ཡུན་རིང་གནས། །སེམས་གནས་པའི་ངང་ནས་འགྱུ་བ་ཡང་། །དཔེ་ཆུ་ཆེན་ནང་གི་ཆུ་རླབས་འདྲ། །
བསྒོམ་འོང་བ་གདའ་བསམ་སྤྲོ་བ་སྐྱེ། །ཉམས་བཞི་པ་རྒྱ་མཚོ་ཆེན་པོ་འདྲ། །སེམས་མེ་རེ་འཁྱིལ་ལེ་ཡུན་རིང་གནས། །སེམས་གནས་པའི་ངང་ནས་འགྱུ་བ་ཡང་། །མཚོ་དྭངས་བའི་ནང་དུ་ཉ་རྒྱུག་འདྲ། །དེ་སྤྱོད་ལམ་ཕལ་ཆེར་འབྲལ་མེད་འདྲ། །བསྒོམ་ལེགས་པོར་སྐྱེས་ན་དགའ་བ་སྐྱེས། །ཉམས་དེ་རྣམས་ཡུན་ལ་ངེས་པ་མེད། །དུས་ཡུད་ཙམ་རེ་དང་ཉིན་ཞག་ཙམ། །དུས་ཟླ་ཆས་ལོ་ཤས་འདུག་ཀྱང་སྲིད། །དེ་མ་བསྐྱུར་རྒྱུན་དུ་སྐྱོང་བ་ན། །སེམས་བདེ་གསལ་མི་རྟོག་ཉམས་བཟང་འཆར། ། བླ་མའི་བྱིན་རླབས་མ་ཡིན་ཞིང་། །དམ་ཆོས་ཟབ་པས་མ་ཡིན་ཏེ། །བསྐལ་པ་གྲངས་མེད་སྔོན་རོལ་ནས། །སེམས་ཉིད་ཆོས་སྐུ་ཡིན་པར་འདུག །དེ་ཉིད་ཡིན་པར་མ་ཤེས་པས། །སྐྱོན་གྱིས་འཁོར་བར་འཁྱམས་པར་སྣང་། །སེམས་ཉིད་ཆོས་སྐུར་ངོ་སྤྲད་ཀྱང་། །དེ་ནི་མི་བདེན་བསམ་པ་རྣམས། །ལས་ངན་སྒྲིབ་པ་ཡིན་པར་གདའ། །ད་ནི་རང་གི་སེམས་ཉིད་ནི། །ཆོས་སྐུ་ཡིན་པར་ཐག་ཆོད་མཛོད། །སེམས་ལ་སེམས་ཀྱིས་ལྟ་བ་འདི། །ཉམས་ལེན་ཡིན་པར་ཐག་ཆོད་མཛོད། །གནས་པ་ཆོས་སྐུའི་ངོ་བོ་སྟེ། །
རིག་པ་ལོངས་སྤྱོད་རྫོགས་པའི་སྐུ། །འགྱུ་བ་སྤྲུལ་པའི་སྐུ་ཡིན་ཏེ། །དེ་གསུམ་ངོ་བོ་དབྱེར་མེད་པ། །ངོ་བོ་ཉིད་ཀྱི་སྐུ་ཞེས་བྱ། །སངས་རྒྱས་སྐུ་བཞིའི་ངོ་བོ་དེ། །ཡེ་ནས་རང་གི་སེམས་ལ་ཚང་། །དེ་ལྟར་རྟོགས་ན་བདེ་བ་ཆེ། །མ་རྟོགས་འཁོར་བའི་སྡུག་བསྔལ་མཚོ། །འཁོར་བ་དང་ནི་མྱ་ངན་འདས། །རྟོགས་དང་མ་རྟོགས་ཁྱད་པར་ཙམ། །རྣམ་རྟོག་དང་ནི་ཆོས་སྐུ་གཉིས། །རིག་དང་མ་རིག་ཁྱད་པར་ཙམ། །དེ་ཕྱིར་རང་སེམས་རང་གིས་ལྟོས། །སེམས་མ་བཅོས་རང་སར་ཞོག་ཟེར་བ། །ཚིག་བརྗོད་པར་སླ་སྟེ་ཤེས་པར་དཀའ། །སེམས་གནས་ན་དགའ་བའི་རེ་བ་ཅིག །སེམས་འཕྲོ་ན་མི་དགའི་དོགས་པ་གཉིས། །བསྒོམ་ལེགས་པོ་སྐྱེ་བའི་རེ་འདོད་གཅིག །བསྒོམ་མི་སྐྱེ་དོགས་པའི་དོགས་པ་གཉིས། །སེམས་གསལ་ན་དགའ་བའི་རེ་བ་གཅིག །སེམས་སྨུག་ན་མི་དགའི་དོགས་པ་གཉིས། །སེམས་མཐོང་དུ་རེ་བའི་རེ་བ་གཅིག །སེམས་ངོ་བོ་མ་མཐོང་དོགས་པ་གཉིས། །བསྒོམ་སྐྱོན་མེད་སྐྱེ་འདོད་རེ་བ་གཅིག །གེགས་གོལ་ས་ཤོར་དོགས་ཡི་མུག་གཉིས། །སེམས་རྣམ་རྟོག་དེ་ཚོ་ཡོད་རིགས་ལ། །སེམས་མ་བཅོས་མ་
ཡིན་བཅོས་མ་ཡིན། །ད་སེམས་ལ་སེམས་ཀྱིས་ལྟ་བ་ཡིན། །སེམས་དྲན་རྫི་མ་བརྗེད་ཙམ་དང་ཞིག །གཞན་ཡག་འདོད་ཉེས་དོགས་རྒྱབ་ཏུ་སྒྱུར། །སེམས་ཀློད་དེ་ལྷོད་ལ་རང་བབས་ཞོག །དེ་བཞག་པས་མཐོང་རྒྱུ་གཞན་མེད་པར། །དཔེ་བར་སྣང་སྟོང་པར་བལྟས་པ་བཞིན། །གཟུགས་དངོས་པོ་མེད་པར་སྟོང་པར་མཐོང་། །དེ་མཐོང་ཚུལ་ཡིད་ལ་གསལ་ན་ཡང་། །དོན་དེ་འདྲ་ངག་ནས་བརྗོད་མི་ཤེས། །དཔེ་ལྐུགས་པས་བུ་རམ་ཟོས་པ་ལྟར། །ཚིག་བརྗོད་དུ་མེད་ཀྱང་རང་ལ་གསལ། །སེམས་བདེ་ཉམས་བདེ་ལུས་བདེ་སེམས། །སེམས་འབོལ་ལེ་ཤིག་གེར་གནས་པ་བྱུང་། །སེམས་གསལ་ཉམས་སྟོང་རྗེན་ལྷང་ངེ་བ། །དཔེ་ནམ་མཁའ་དྭངས་པའི་དཀྱིལ་ལྟར་འཆར། །སེམས་སྟོང་ཉམས་ཐམས་ཅད་སྟོང་པ་ཉིད། །ལུས་འདི་ཡང་མེད་པ་འདྲ་ཞིག་འཆར། །ཉམས་བཟང་བ་ལ་མ་ཆགས་ངོ་བོ་ལྟོས། །སེམས་རྩུབ་ཉམས་རྣམ་རྟོག་འཕྲོ་རྒོད་སྐྱོན། །སེམས་ལྟ་རྒྱུ་མེད་པ་རླུང་འཚུབ་འདྲ། །སེམས་མི་བདེ་དུག་ལྔ་ཅི་ཤར་ཡང་། །དེ་སྐྱོན་དུ་མ་ལྟ་ཀློད་ལ་ལྟོས། །སེམས་བྱིངས་བ་སྨུག་འཐིབ་མོག་གེ་བ། །སེམས་
བལྟས་ཀྱང་ལྟ་རྒྱུ་མི་རྙེད་ན། །ལུས་ཀྲིམ་མེར་བསྒྲིམས་ལ་ནམ་མཁའ་དང་། །སེམས་དབྱེར་མེད་བསྲེས་ལ་ངོ་བོ་ལྟོས། །སེམས་བལྟ་རྒྱུ་ཧྲིག་གེ་རྗེན་ནེ་བ། །རང་ངེས་ཤེས་གདིང་ནས་སྐྱེས་ཙམ་ན། །སེམས་ངར་འཛིན་མ་ཆེ་རང་བབས་ལྟོས། །དུས་ནམ་ཞིག་བལྟ་རྒྱུ་ལྟ་བ་འདྲེས། །སེམས་འདི་བལྟ་འདི་བསྒོམ་མེད་པ་ཡི། །སེམས་ཐ་མལ་རང་ག་འཇོག་པ་དེ། །བསྒོམ་ཡིན་ནམ་མིན་ནམ་སྙམ་པ་བྱུང་། །དེ་བཅོས་མ་མི་དགོས་དེ་གར་སྐྱོངས། །དེས་ཕྱག་ཆེན་གྱི་ལམ་སྣེ་ཟིན་པའོ། །དེ་ལྟར་བསྒོམས་པས་སངས་རྒྱས་པ། །སྔོན་གྱི་བཀའ་བརྒྱུད་ཐམས་ཅད་ལགས། །བསྒོམས་པས་གྲོལ་བ་སྤྱི་ཡི་ལུགས། །དེ་ལ་ངོ་མཚར་ཆེ་རྒྱུ་མེད། །མ་བསྒོམས་སངས་རྒྱས་ངོ་མཚར་ཆེ། །ཨོ་རྒྱན་པདྨའི་ཟབ་ཁྱད་ལ། །མ་བསྒོམས་སངས་རྒྱས་ཐབས་བཞི་ཡོད། །དེ་ཡི་ནང་ནས་ཁྱད་པར་དུ། །ཐེག་པ་དགུ་ཡི་ཡང་རྩེའི་ཆོས། །རྫོགས་ཆེན་ཨ་ཏི་སྤྱི་ཏི་ཞེས། །ཀུན་ཏུ་བཟང་པོས་གསུངས་པའི་དོན། །བལྟས་པས་གྲོལ་བ་ཐོད་རྒལ་ཁྲིད། །ཡེ་ཤེས་ལྔ་པོ་དངོས་སུ་མཐོང་། །ཐེ་ཚོམ་ཅན་ལ་གསང་བའི་གནས། །ལོག་ལྟ་སྐྱེས་ན་མནར་མེད་ལྟུང་། །
དོན་མེད་ཕལ་ལ་འདི་བཤད་ན། །མ་གཟའ་དམ་གསུམ་བཀའ་ཆད་འབེབས། །དེ་ལྟར་ཟབ་ཅིང་གཉན་པའི་ཆོས། །སྟོན་པའི་སྔོན་འགྲོའི་དམིགས་རིམ་ནི། །རང་གི་སྤྱི་བོར་པད་ཟླའི་སྟེང་། །ཆོས་སྐུ་ཀུན་བཟང་ཡབ་ཡུམ་ལ། །རྫོགས་ཆེན་བརྒྱུད་པས་བསྐོར་བར་བསྒོམ། །གསོལ་འདེབས་གང་འོས་བྱ་བའམ། །བཛྲ་གུ་རུ་མ་ཞིག་བཟླས། །སྤྱི་བོའི་ལྷ་ཚོགས་རང་ལ་བསྟིམ། །དབང་དང་བྱིན་རླབས་ཐོབ་པར་བསྒོམ། །དེ་ནས་རང་སེམས་ངོ་བོ་སྐྱོང་། །དེ་ནི་ཁྲེགས་ཆོད་དོན་འདུས་སོ། །ལུས་ངག་ཡིད་གསུམ་འཁོར་བ་དང་། །རུ་ཤན་ཕྱེ་བའི་དོན་བསྡུས་ནི། །རང་ཉིད་དམྱལ་བར་སྐྱེས་ནས་ཀྱང་། །སྡུག་བསྔལ་དཔག་མེད་ཡོད་པར་བསྒོམ། །དེ་བཞིན་ཡི་དྭགས་དུད་འགྲོ་དང་། །ལྷ་མིན་རྣམས་སུ་སྐྱེ་བར་བསྒོམ། །དེ་དག་སྐྱེས་པའི་སྡུག་བསྔལ་དེའི། །ངོ་བོ་སེམས་ལ་སྐབས་སུ་བལྟ། །རང་ཉིད་ལྷ་ཡི་རྒྱལ་པོ་དང་། །མི་ཡི་རྒྱལ་པོ་སྐྱེས་པར་བསྒོམ། །བདེ་སྐྱིད་དཔག་མེད་ཡོད་པར་བསྒོམ། །སྐྱིད་སྙམ་སེམས་ལ་ཧྲིག་གེར་བལྟ། །ལུས་ཀྱང་སྤྱོད་ལམ་རྣམ་འགྱུར་བྱ། །རང་ལ་སེམས་ཅན་ཐམས་ཅད་
ཀྱིས། །གཤེ་སྐུར་ཚིག་ངན་བརྗོད་པར་བསྒོམ། །རང་ལ་སེམས་ཅན་ཐམས་ཅད་ཀྱིས། །བསྟོད་བཀུར་དཔག་མེད་བྱེད་པར་བསྒོམ། །དེ་གཉིས་སེམས་ཀྱི་ངོ་བོ་ལ། །བལྟས་པས་དངོས་མེད་སྟོང་པར་སྙོམས། །སེམས་ལ་རྣམ་རྟོག་མང་པོ་སྤྲོ། །ཕྱོགས་བཞི་མཚམས་བརྒྱད་ཀུན་ཏུ་བཏང་། །སེམས་ལ་ཅི་ཡང་མི་དྲན་འཇུག །འགྱུ་བ་བཀག་ལ་ངོ་བོ་བལྟ། །དེ་གཉིས་སེམས་ཀྱི་ངོ་བོ་ལ། །བཟང་ངན་ཁྱད་པར་ཅི་གདའ་བལྟ། །རིགས་དྲུག་སྐྱེ་སྒོ་ཆོད་པ་དང་། །འཁོར་འདས་རུ་ཤན་ཕྱེ་བའི་ཐབས། །ཤིན་ཏུ་བསྡུས་ཏེ་བསྟན་པའོ། །རྒྱས་པར་ཕྱེ་ན་བསམ་མི་ཁྱབ། །རང་ལུས་སྟོང་པ་སང་ངེར་བསྒོམ། །དེ་དབུས་དབུ་རྐྱང་རོ་གསུམ་རྩ། །ཁང་སྟོང་ཀ་བ་བཙུགས་འདྲ་བསྒོམ། ། གཡས་པར་ཨོཾ་དཀར་ཨཱདམར་གཡོན། །དབུ་མའི་ནང་དུ་ཧཱུྃ་མཐིང་ནི། །སྐུ་གསུམ་ཐུགས་ཀྱི་ངོ་བོ་བསྒོམ། །རྐང་མཐིལ་གཉིས་སུ་དམྱལ་བ་ཡི། །ས་བོན་དུ་ཡིག་ནག་པོ་རེ། །གསང་གནས་ཡི་དྭགས་སྲེ་དམར་པོ། །ལྟེ་བར་དུད་འགྲོར་ཏྲི་དུད་ཁ། །སྙིང་ཁར་མི་ཡི་ནི་ལྗང་གུ། །མགྲིན་པར་ལྷ་མིན་སུ་དམར་སྐྱ། །སྤྱི་བོར་ལྷ་ཡི་ཨ་དཀར་
པོ། །ཚེ་རབས་འཁོར་བ་ཐོག་མེད་ནས། །རིགས་དྲུག་སྐྱེ་བའི་སྡིག་སྒྲིབ་རྣམས། །ཡི་གེ་དེ་དག་རྣམས་ལ་ཐིམ། །སྙིང་ཁའི་ཨོཾ་ཨཱཿཧཱུྃ་གསུམ་ལས། །མེ་འབར་རིགས་དྲུག་ས་བོན་བསྲེག །དེ་ནས་རང་ལུས་ནང་ཐམས་ཅད། །ཡི་གེ་ཧཱུཾ་ཡིག་སྔོན་པོ་ཡིས། །ཐེམ་འགགས་ནེམ་འགགས་གང་བར་བསྒོམ། །དེ་ནས་དེ་རྣམས་སྒོམ་མཁན་གྱི། །སེམས་ལ་སེམས་ཀྱིས་ཧྲིག་གེར་བལྟ། །དངོས་པོ་ཁ་དོག་མ་མཐོང་བས། །སྟོང་རྗེན་ལྷང་ངེར་སྣང་བ་ནི། །རྫོགས་པ་ཆེན་པོའི་ཁྲེགས་ཆོད་ཅེས། །གནས་པ་གཞི་ཡི་སྒྲོན་མ་ཡིན། །རང་སེམས་སངས་རྒྱས་ཡིན་པ་ནི། །མདོ་སྔགས་གཉིས་ཀ་མཐུན་ན་ཡང་། །མདོ་ལུགས་ལམ་ཐག་རིང་བ་ནི། །རང་ལུས་སངས་རྒྱས་མ་རྟོགས་སྐྱོན་། །རང་ལུས་ཕུང་ཁམས་རྩ་ཐིག་རླུང་། །སངས་རྒྱས་ཡིན་ཚུལ་གསར་རྙིང་གི །རྒྱུད་སྡེ་ཀུན་ནས་གསུངས་པ་ཡིན། །ཡིན་ལ་ཡིན་བཞིན་གསལ་འདེབས་དགོས། །རང་ལུས་རྡོ་རྗེ་སེམས་དཔར་བསྒོམ། །སྙིང་དབུས་ཀུན་ཏུ་བཟང་པོ་ལ། །ཞི་བ་བཞི་བཅུ་རྩ་གཉིས་བསྐོར། །མགྲིན་པར་པདྨ་གར་དབང་ལ། །རིག་འཛིན་དཔའ་བོ་ཌཱཀྐིའི་
བསྐོར། །ཀླད་པ་དུང་ཁང་ནང་དུ་ནི། །ཆེ་མཆོག་ཁྲག་འཐུང་ལྷ་ཚོགས་བསྒོམ། །ཟས་རྣམས་ཐམས་ཅད་མཆོད་པར་དམིགས། །གོས་རྣམས་ཐམས་ཅད་འབུལ་བར་དམིགས། །གདན་ཡང་པདྨ་ཉི་ཟླའི་གདན། །རླུང་ནི་རྡུབ་པ་ཡི་གེ་ཨོཾ། །ཁོག་ཏུ་གནས་པ་ཡི་གེ་ཨཱ། །ཕྱིར་ལ་རྒྱུ་བ་ཡི་གེ་ཧཱུྃ། །དེ་ལྟར་ཤེས་ཤིང་གསལ་ཐེབས་ན། །བྱ་བ་སྤྱོད་ལམ་བྱང་ཆུབ་ལམ། །སྙིང་ག་སངས་རྒྱས་བཞི་བཅུ་གཉིས། །ཡེ་ནས་དངོས་སུ་ལུས་ལྷར་བཞུགས། །བཞུགས་རྟགས་མིག་ནི་མཛུབ་མོ་ཡིས། །མནན་པས་ཐིག་ལེ་གོར་མོ་འཆར། །ཙིཏྟ་ཤ་ཡི་སྒྲོན་མ་ཞེས། །ཞི་བ་རྡོ་རྗེ་དབྱིངས་ཀྱི་ལྷ། །རང་ལ་བཞུགས་པ་ངོ་མཚར་ཆེ། །སྙིང་དང་མིག་གཉིས་འབྲེལ་བའི་རྩ། །དར་དཀར་སྐུད་པ་འདྲ་བ་དོད། །དཀར་འཇམ་རྩ་ཡི་སྒྲོན་མ་ཡིན། །མིག་དབུས་ལུས་བཅུད་ཀུན་འདུས་པ། །གཟུགས་རྣམས་སོ་སོར་མཐོང་བྱེད་པ། །རྒྱང་ཞགས་ཆུ་ཡི་སྒྲོན་མ་ཡིན། །ཙཀྵུས་ཟིམ་བྱས་ཟེར་གཉིས་དུས། །སུརྻའི་དཀྱིལ་འཁོར་ལ་བལྟས་པས། །འཇའ་ཚོན་ཁ་དོག་སྣ་ཚོགས་འཆར། །རྣམ་དག་དབྱིངས་ཀྱི་སྒྲོན་མ་ཡིན། །དེ་དབུས་འོད་ཟེར་མུ་ཁྱུད་
ཀྱི། །ར་བ་ཟླུམ་པོར་འཆར་བ་ནི། །ཐིག་ལེ་སྟོང་པའི་སྒྲོན་མ་ཡིན། །དེ་སྟེང་རྟ་རྔའི་ཉག་མ་ཙམ། །དྲྭ་བ་དྲྭ་ཕྱེད་ལུ་གུ་རྒྱུད། །ལྕགས་ཐག་འདྲ་བ་འཆར་བ་ནི། །རིག་པ་རྡོ་རྗེ་ལུ་གུ་རྒྱུད། །ཞི་བའི་ལྷ་ཚོགས་སྙིང་དཀྱིལ་དུ། །བཞུགས་པའི་རང་འོད་ཡེ་ཤེས་ལྔ། །རྩ་ཡི་རྒྱུད་ནས་མིག་ལ་གསལ། །དངོས་སུ་ནམ་མཁའི་དབྱིངས་སུ་མཐོང་། །དེ་ལ་རྒྱུན་དུ་གོམས་བྱས་པས། །བཀྲག་མདངས་ལྟ་བར་མི་བཟོད་པའི། །ཐིག་ལེ་དཀར་སེར་དམར་དང་ལྗང་། །གཅིག་གམ་གསུམ་ཙམ་ལྔ་ཚོམ་འཆར། །ཆོས་ཉིད་མངོན་སུམ་སྣང་བ་ཡི། །ཡིད་ཡུལ་བསྒོམ་པའི་ཕྱག་ཆེན་གྱི། །རྟོགས་པ་གཞན་ལས་ཁྱད་པར་འཕགས། །ཅི་ཕྱིར་ཡེ་ཤེས་མིག་གིས་མཐོང་། །ཡིད་དཔྱོད་ལྟ་བར་རག་མ་ལུས། །དངོས་སུ་མཐོང་བར་ཐེ་ཚོམ་མེད། །དེ་ནས་དེ་ལ་གོམས་བྱས་པས། །འོད་དང་ཐིག་ལེ་ཐིག་ཕྲན་ནི། །ཇེ་ཆེ་ཆེ་ཞིང་ལུང་པ་ཁེངས། །ཐིག་ལེའི་དབུས་ན་རྡོ་རྗེ་དང་། །འཁོར་ལོ་ནོར་བུ་པདྨ་དང་། །ཕྱག་མཚན་ཡིག་འབྲུ་ལ་སོགས་འཆར། །ཉམས་ལེན་གོང་དུ་འཕེལ་བ་ཡིན། །འདི་ཙམ་མཐོང་བ་ཤི་ན་ཡང་། །
བར་དོར་རང་ངོ་འཕྲོད་དེ་གྲོལ། །དེ་ནས་གོམས་པར་བྱས་པ་ལ། །ཐིག་ལེའི་དཀྱིལ་ན་ལྷ་ཡི་སྐུ། །རེ་རེའི་གཙོ་འཁོར་སྣ་ཚོགས་པ། རིགས་ལྔ་ཞི་ཁྲོ་ཕལ་ཆེར་འཆར། ། དེ་ཡང་དང་པོ་གསལ་ཙམ་དང་། །དེ་ནས་རྒྱན་དང་ཆ་ལུགས་གསལ། །ཐམས་ཅད་གཏན་ལ་ཕབ་ན་ནི། །བར་དོ་བགྲོད་པར་མི་དགོས་ཏེ། །ཕྱི་དབུགས་ཆད་མ་ཐག་ཏུ་ནི། །རྡོ་རྗེ་སེམས་དཔའི་ཐུགས་ཀ་ནས། །འོད་ཀྱི་སྦུ་གུ་མིག་ལ་ཟུག །རིག་པ་རྡོར་སེམས་ཐུགས་ཀར་ཐིམ། ། །འདི་ལྟར་རྫོགས་ཆེན་ཐོད་རྒལ་འདི། །བསྒོམ་ཤེས་མི་དགོས་བལྟས་པས་གྲོལ། །ཟླ་དྲུག་མ་ཆག་བལྟས་ན་ནི། །རིག་པ་ཚད་ལ་ཕེབ་པ་སྟེ། །ཞི་ཁྲོའི་ལྷ་ཚོགས་དངོས་སུ་འཆར། །འདི་ལས་སླ་དང་ཟབ་པ་མེད། །གེགས་དང་གོལ་ས་ཅི་ཡང་མེད། །ཅུང་ཟད་མིག་ལ་གནོད་དོགས་ན། །དང་པོ་བལྟ་ཞིང་དེ་ནས་ནི། །གཡས་གཡོན་གང་གསལ་ཁྲིད་ལ་བལྟ། །ཟླ་བ་གཅིག་གཉིས་མ་བསྐྱུར་ན། །ནུབ་མོ་གཉིད་ཁ་ལ་སོགས་འཆར། །ཟླ་བ་མར་མེ་མེ་ལོང་དང་། །གསལ་ཁུང་ལ་ཡང་བལྟས་པས་འཆར། །ཐེག་དགུའི་ཡང་རྩེ་ཀུན་བཟང་བཀའ། །མ་བསྒོམས་སངས་རྒྱས་
ངོ་མཚར་ཆེ། །གསར་མའི་ལུགས་ལ་མེད་པའི་ཕྱིར། །ཕལ་པའི་རྣ་བར་མི་ཤོང་བས། །གཞན་ལ་གསང་བ་དམ་ཚིག་ཡིན། །མ་གསང་བཀའ་སྲུང་ཆད་པ་འོང་། །དེ་ནས་སེམས་ངོ་སྐྱོང་ཤེས་ན། །ཕྱག་རྫོགས་ཟུང་འཇུག་ཉམས་ལེན་ནི། །མིག་གིས་འཇའ་འོད་ཐིག་ལེར་བལྟ། །དེ་ཚེ་རྣམ་རྟོག་མི་འཕྲོ་བས། །འཇའ་ཚོན་རྣམས་ལ་སེམས་གནས་པ། །དེ་ཡི་ངོ་བོ་བལྟས་པ་ཡི། །གསལ་སྟོང་ཟུང་དུ་འཇུག་པ་ནི། །དངོས་སུ་འཆར་ཞིང་བོགས་ཐོན་འགྱུར། །དེ་ལྟར་ཉམས་སུ་བླང་པ་ན། །ཨོ་རྒྱན་ཆེན་པོའི་ཟབ་ཆོས་ལ། །དེ་ལས་ཐེག་པ་མཐོ་བ་མེད། །དེ་བས་ཟབ་པའི་ཆོས་མེད་དོ། །དེ་བས་སླ་བའི་ཆོས་མེད་དོ། །དེ་བས་ལམ་ཐག་ཉེ་བ་མེད། །དེ་ལྟར་ཉམས་ལེན་སྐྱེས་བུ་ལ། །འདས་དུས་འཇའ་འོད་རིང་བསྲེལ་དང་། །གདུང་ལ་ལྷ་སོགས་ངེས་པར་འབྱོན། །དེང་སང་ཚེ་ལོ་ལྔ་བཅུའི་མཐའ། །ཚེ་ལོ་བཅུ་པའི་མཐར་ཐུག་བར། ། ཀུན་བཟང་ཐུགས་ཀྱི་བསྟན་པ་སྟེ། །རྫོགས་ཆེན་རྣམས་ནི་གྲོལ་བར་སླ། །ཤཱཀ་ཐུབ་བསྟན་པ་རྟགས་ཙམ་དུས། །ཡིན་པར་གསར་མ་ཉམས་བླངས་ཀྱང་། །རྟགས་མཚན་
ཐོན་ཉུང་གྲོལ་བར་དཀའ། །དེ་ཚུལ་རྫོགས་ཆེན་རྣམས་ནས་གསུངས། །དེ་ཕྱིར་ཕྱག་རྫོགས་ཟུང་འཇུག་གི །དམིགས་ཐུན་གོ་བདེ་ཚིག་ཉུང་བ། །ལུང་འདྲེན་ལ་སོགས་མ་བྱས་པར། །འཕྲལ་དུ་ཡིད་ལ་གང་ཤར་སྨྲས། །ཆམ་ཕུ་དབུ་མཛད་ལ་ཕན་ཕྱིར། །ཁྲིད་ཀྱི་རིམ་པ་རྫོགས་པ་ཡིན། །ཨ་ནུ་ཨ་ཏིའི་ཉམས་ལེན་འདུས། །མ་ཧཱ་ཡོ་གའི་ཉམས་ལེན་ནི། །ནངས་ནུབ་ནམ་ཁོམ་ཕུར་པ་ཡི། །ལས་བྱང་ལ་སོགས་གཏོར་བསྔོས་སམ། །བསྐྱེད་རིམ་བསྙེན་པ་རྒྱུན་དུ་མཛོད། །དེ་ཙམ་ཉམས་སུ་བླངས་པ་ན། །གསང་སྔགས་རྙིང་མའི་གྲལ་དུ་གཏོགས། །ཨོ་རྒྱན་རྗེས་འཇུག་ཡིན་ཞེས་བཤད། །དེ་སྐད་རཱ་ག་ཨ་སྱ་ཡིས། །སྙིང་གཏམ་གབ་སྦས་སྤངས་པའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།