ཉམས་ལེན་ཆོས་སྤྱོད་བུང་བའི་སྒྲ་སྙན་གྱི། །གཞུང་གི་ཆ་ལག་དགོས་འདོད་འབྱུང་བ་ལས། །ཕྱག་རྒྱ་ཆེན་པོའི་ཉམས་ལེན་ཆ་ལག་ཏུ། །རྒྱབ་ཆོས་ཀུན་འདུས་ཡིད་བཞིན་ནོར་བུ།
ཉམས་ལེན་ཆོས་སྤྱོད་བུང་བའི་སྒྲ་སྙན་གྱི། །གཞུང་གི་ཆ་ལག་དགོས་འདོད་འབྱུང་བ་ལས། །ཕྱག་རྒྱ་ཆེན་པོའི་ཉམས་ལེན་ཆ་ལག་ཏུ། །རྒྱབ་ཆོས་ཀུན་འདུས་ཡིད་བཞིན་ནོར་བུ་བཞུགས།།
ན་མོ་གུ་རུ་དྷེ་བ་དྷཱ་ཀི་ནཱི། སརྦ་དྷརྨཱ་པཱ་ལ་མ་ཧཱ་མུ་ཏྲ་ཡེ། བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མར་ཕྱག་འཚོལ་ནས། །ཕྱག་རྒྱ་ཆེན་པོའི་ཉམས་ལེན་ཆ་ལག་ཏུ། །རྒྱབ་ཆོས་ཀུན་འདུས་ཡིད་བཞིན་ནོར་བུ་བྲི། །རྩ་གསུམ་སྲུང་མས་བྱིན་རླབས་དངོས་གྲུབ་སྩོལ། །དེ་ཡང་མདོ་རྒྱུད་གསར་རྙིང་གཏེར་རྣམས་ཀྱི། །དོན་རྣམས་ཐམས་ཅད་ཕྱག་རྒྱ་ཆེན་པོར་འདུས། །དེ་ཉིད་དོན་རྩ་ཉམས་སུ་ལེན་པ་ལོ། །དང་པོའི་ཐོག་མར་ཐོས་པ་དགོས་པ་སྟེ། །རྗེ་བཙུན་ནཱ་རོ་པ་ཡི་ཞལ་ནས་ཀྱང་། །ཕྱི་ནང་ཆོས་ལ་ཐོས་པ་དགོས། །གོ་བས་མཐའ་
གཉིས་ཡོང་བ་ཡིན། །ཡིན་མིན་སྒྲོ་འདོགས་ཆོད་རྩ་ན། །གོལ་སས་མི་འཇིགས་གདེང་ཞིག་འཐོབ། །ཅེས་གསུངས་ཉམས་སུ་མ་བླང་མི་ཚེ་ཐོས་པ་ལ། །སྦྱངས་པས་དོན་ནི་མེད་པ་སྟེ། །གཙུག་ཏོར་ཆེན་པོའི་མདོ་ལས་ཀྱང་། །བསྐལ་པ་མང་པོར་ཐོས་པ་བསགས་པ་བས། །ཉིན་གཅིག་ཆོས་ཉིད་དོན་ལ་མཉམ་བཞག་བསོད་ནམས་ཆེ། །ཞེས་གསུངས་ཕྱག་རྒྱ་ཆེན་པོའི་ཉམས་ལེན་ལ། །ལང་གྲོའི་ཞུས་ལན་མཐོང་བ་ཡིད་འཕྲོག་ལས། །བསྒོམ་རྒྱུ་ཅི་མེད་མི་སྒོམ་སྒོམ་མེད་ཀྱི། །ངང་དུ་བསྒོམ་མེད་མཐའ་རུ་སྐྱེལ་བ་ཡིན། །དེ་ལས་གཞན་པའི་སྒོམ་
ཐབས་ནི། །སངས་རྒྱས་ལ་ཡང་མེད་དེ་མཆིས། །ཞེས་གསུངས་དེ་ལྟར་བསྒོམས་པས་སྒོམ་ཐབས་ཀུན། །མང་པོ་གསུངས་པ་ཐམས་ཅད་འདུས་པ་སྟེ། །སྟོན་པས་སྡོང་པོ་བཀོད་པའི་མདོ་ལས་ཀྱང་། །འཇིག་རྟེན་ཁམས་ནི་ཐམས་ཅད་དུ། །ངས་ནི་མདོ་སྡེ་གང་བཤད་པ། །ཚིག་འབྲུ་ཐམས་ཅད་དོན་གཅིག་ལ། །ཐམས་ཅད་བསྒོམ་པར་མི་ནུས་ཚིག་གཅིག་རྣམ་པར་བསྒོམ་པ་ཡིན། །ཞེས་གསུངས་ས་ར་ཧ་ཡི་ཞལ་ནས་ཀྱང་། །ནུབ་གཅིག་ཚེས་གཅིག་བསྒོམས་པས་གྲུབ་པ་ཐོབ། །ཅེས་གསུངས་ཕྱག་རྒྱ་ཆེན་པོ་བསྒོམས་པས་ནི། །བླ་མ་བསྒོམ་དང་མོས་གུས་ཀུན་འདུས་ཏེ། །གསང་འདུས་རྣམ་ཐར་ཞལ་ཆེམས་ལས། །བླ་མ་རང་སེམས་ཆོས་ཀྱི་སྐུ། །དབྱེར་མེད་ཡིན་པར་མ་ཤེས་ན། །ང་ཉིད་བསྡད་ཀྱང་དོན་གོ་ཆུང་། །གསོལ་བ་ཐོབ་ཅིག་རྗེ་འབངས་རྣམས། །ཞེས་གསུངས་རང་བྱུང་རྡོ་རྗེའི་ཞལ་ནས་ཀྱང་། །རང་སེམས་བླ་མར་མ་ཤེས་ན། །ཐ་སྙད་ཀྱི་བླ་མ་དགོས་པ་ཆུང་། །ཞེས་གསུངས་སངས་རྒྱས་ཡེ་ཤེས་ཀྱིས། །བླ་མ་རང་རིག་སྐྱེ་མེད་ཆོས་སྐུ་ཡིན། །བླ་མའི་སྒྲུབ་སྐོར་མེད་ཀྱང་དགོས་པ་ཆུང་། །ཞེས་གསུངས་
བླ་མའི་སྒོམ་སྒྲུབ་ཐམས་ཅད་འདུས། །དེ་ནས་ཕྱག་རྒྱ་ཆེན་པོ་ཉམས་བླངས་པས། །བླ་མ་སྐུ་གསུམ་སྒྲུབ་པའི་ཉམས་ལེན་དང་། །ཡི་དམ་ཞི་བ་ཁྲོ་བོའི་ཉམས་ལེན་ཀུན། །ཕྱག་རྒྱ་ཆེན་པོའི་ཁོངས་སུ་འདུས་པ་ཉིད། །རྫོགས་པ་ཆེན་པོ་ལས་ནི་འདི་སྐད་གསུངས། །ཆོས་ཀྱི་སྐུ་རུ་བཞུགས་ཙམ་ན། །མི་རྟོག་མཉམ་པའི་ངོ་བོར་བཞུགས་ཙམ་ན། །སྣ་ཚོགས་ཆོས་ལ་ལོངས་སྤྱོད་ཅིང་། །མ་སྤང་ཡེ་ཤེས་རྒྱན་དུ་བཞུགས། །སྤྲུལ་པའི་སྐུ་རུ་བཞུགས་ཙམ་ན། །གང་ལ་གང་འདུལ་དེར་སྤྲུལ་ནས། །དགོས་པ་ཕུན་སུམ་ཚོགས་པར་བཞུགས། །སྐུ་གསུང་ཐུགས་གསུམ་ཉམས་ལེན་ཐམས་ཅད་འདུས། །དེ་ནས་ཕྱག་རྒྱ་ཆེན་པོ་ཉམས་བླངས་པས། །ཡེ་ཤེས་ལྔ་ཡང་དེ་ཡི་ཁོངས་སུ་འདུས། །དེ་ཡང་རྫོགས་པ་ཆེན་པོ་ལ། །བྱང་ཆུབ་སེམས་ཀྱི་ཆོས་ཉིད་དེ། །མ་བཅོས་རྣལ་དུ་བཞག་པ་ནི། །དེ་ནི་ཆོས་དབྱིངས་ཡེ་ཤེས་ཡིན། །གསལ་ལ་རྟོག་པ་མེད་པ་ནི། །དེ་ནི་མེ་ལོང་ཡེ་ཤེས་ཡིན། །སེམས་ལ་དབྱེ་བ་མེད་པ་ནི། །དེ་ནི་མཉམ་ཉིད་ཡེ་ཤེས་ཡིན། །སྣང་ཚུལ་ཅིར་ཡང་སྣང་བས་ན། །དེ་ནི་སོར་རྟོག་ཡེ་ཤེས་ཡིན། །སེམས་ཀྱིས་ཀུན་
ཏུ་དབང་བསྒྱུར་བས། །དེ་ནི་བྱ་གྲུབ་ཡེ་ཤེས་ཡིན། །ཞེས་གསུངས་ཡེ་ཤེས་ལྔ་ཡང་ཕྱག་རྒྱ་ཆེན་པོར་འདུས། །དེ་ལྟར་ཕྱག་རྒྱ་ཆེན་པོ་ཉམས་བླངས་པས། །རིགས་ལྔའི་སངས་རྒྱས་དེ་ཡི་ཁོངས་སུ་འདུས། །དེ་ཡང་རྫོགས་པ་ཆེན་པོ་ལས། །སེམས་ཅིར་ཡང་སྣང་བས་རྣམ་པར་སྣང་མཛད་ཡིན། །དུས་གསུམ་འཕོ་འགྱུར་མེད་པས་རྡོ་རྗེ་སེམས་དཔའ་ཡིན། །ཆེ་བའི་ཡོན་ཏན་འབྱུང་བས་རིན་ཆེན་འབྱུང་ལྡན་ཡིན། །སེམས་ཀྱིས་ཀུན་ལ་ཁྱབ་པས་སྣང་བ་མཐའ་ཡས་ཡིན། །བྱ་རྩོལ་མེད་པར་གྲུབ་པས་དོན་ཡོད་གྲུབ་པ་ཡིན། །ཞེས་གསུངས་རིགས་ལྔའི་སངས་རྒྱས་ཕྱག་རྒྱ་ཆེན་པོར་འདུས། །དེ་ལྟར་ཕྱག་རྒྱ་ཆེན་པོ་ཉམས་བླངས་པས། ། །ཕུང་པོ་ལྔ་ཡང་དེ་ལ་འདུས་པ་སྟེ། །ཀློང་གསལ་སྙིང་ཐིག་ཉི་མའི་གསང་རྒྱུད་ལས། །རང་རིག་རིག་པའི་ཡེ་ཤེས་འདི། །ནང་ལྟར་ཕུང་པོ་ལྔ་ཡིན་ནོ། །གཟུགས་ཕུང་རྡོ་རྗེ་སེམས་དཔའ་ཡིན། །ཚོར་བའི་ཕུང་པོ་རིན་ཆེན་འབྱུང་། །འདུ་ཤེས་ཕུང་པོ་སྣང་མཐའ་ཡས། །འདུ་བྱེད་ཕུང་པོ་དོན་ཡོད་གྲུབ། །རྣམ་ཤེས་ཕུང་པོ་རྣམ་སྣང་མཛད། །ཐུབ་པ་དྲུག་ནི་རིག་རྩལ་ངང་། །ང་རྒྱལ་ལྷ་ཡི་ཐུབ་པ་ཡིན། །ཕྲག་
དོག་ལྷ་མིན་ཐུབ་པ་ཡིན། །འདོད་ཆགས་མི་ཡི་ཐུབ་པ་ཡིན། །གཏི་མུག་བྱོལ་སོང་ཐུབ་པ་ཡིན། །སེར་སྣ་ཡི་དྭགས་ཐུབ་པ་ཡིན། །ཞེས་སྡང་དམྱལ་བའི་ཐུབ་པ་ཡིན། །སྐྱེ་མཆེད་བཅུ་དྲུག་སེམས་དཔའ་སེམས་མའི་ཚོགས། །ཆུ་ཡི་སྒོ་ནི་ལྕགས་ཀྱུ་ཡབ་ཡུམ་ཡིན། །ས་ཡི་སྒོ་ནི་ཞགས་པ་ཡབ་ཡུམ་ཡིན། །མེ་ཡི་སྒོ་ནི་ལྕགས་སྒྲོག་ཡབ་ཡུམ་ཡིན། །རླུང་གི་སྒོ་ནི་དྲིལ་བུ་ཡབ་ཡུམ་ཡིན། །ཕ་ཡི་ཐིག་ལེ་ཟླ་བ་ཡིན། །མ་ཡི་ཐིག་ལེ་ཉི་མ་ཡིན། །རིག་པ་ཡེ་ཤེས་སྐུ་ལྔ་སྟེ། །རིག་པ་ཅིར་ཡང་སྣང་བས་རྣམ་པར་སྣང་མཛད་ཡིན། །རིག་པ་འགྱུར་བ་མེད་པས་མི་བསྐྱོད་པ། །རིག་པ་ཐོག་མཐའ་མེད་པས་སྣང་མཐའི་སྐུ། །རིག་པ་དགོས་འདོད་འབྱུང་བས་རིན་འབྱུང་སྐུ། །རིག་པ་ལྷུན་གྲུབ་ཡིན་པས་དོན་ཡོད་གྲུབ། །རིག་པ་རང་རིག་ཡིན་པས་དེ་བཞིན་རིགས། །རང་རིག་འགྱུར་བ་མེད་པས་རྡོ་རྗེའི་རིགས། །རིག་པར་ཡོན་ཏན་འབྱུང་བས་རིན་ཆེན་རིགས། །རིག་པ་སྐྱོན་དང་བྲལ་བས་པདྨའི་རིགས། །རིག་རྩལ་མ་འགགས་ལས་ཀྱི་རིགས། །ཞེས་གསུངས་ཡི་དམ་ཞི་བ་ཁྲོ་བོ་ལ་སོགས་པ། །རང་སེམས་ཕྱག་རྒྱ་ཆེན་པོའི་
ཁོངས་སུ་འདུས། །ཅི་ཡི་ཕྱིར་ན་རིགས་ལྔར་མ་གཏོགས་པའི། །ཡི་དམ་ལྷ་ནི་འབྱུང་བར་མི་སྲིད་དོ། །དེ་ནས་ཕྱག་རྒྱ་ཆེན་པོ་ཉམས་བླངས་པས། །མཁའ་འགྲོའི་ཉམས་ལེན་ཐམས་ཅད་འདུས་པ་སྟེ། །ཀློང་གསལ་སྙིང་ཐིག་ཉི་མའི་གསང་རྒྱུད་ལས། །རང་རིག་རིག་པའི་ཡེ་ཤེས་འདི། །བླ་མེད་ལྟར་ན་མཁའ་འགྲོ་ལྔ། །རིག་རྩལ་ཡེ་ཤེས་སེམས་ཉིད་དོ། །བརྟེན་པ་ཕྱི་ཡི་ཡུལ་ལ་བརྟེན། །ཁྲག་ནི་ཡུམ་ཆེན་མཱ་མ་ཀཱི །དྲོད་ནི་ཡུམ་ཆེན་གོས་དཀར་མོ། །ཤ་ནི་སངས་རྒྱས་སྤྱན་མ་སྟེ། །དབུགས་ནི་དམ་ཚིག་སྒྲོལ་མ་ལ། །སེམས་ནི་ནམ་མཁའི་དབྱིངས་ཕྱུག་མ། །རིག་པ་ཡེ་ཤེས་མཁའ་འགྲོ་ལྔ། །རིག་པ་མི་འགྱུར་རང་བྱུང་སྐུ། །རྡོ་རྗེ་མཁའ་འགྲོ་རིག་པ་ཉིད། །རིག་པ་ཟང་ཐལ་སྣ་ཚོགས་འཆར། །རིན་ཆེན་མཁའ་འགྲོ་རིག་པ་ཡིན། །རིག་པ་སྐྱོན་བྲལ་རིག་མདངས་ལྔ། །པདྨ་མཁའ་འགྲོ་རིག་པ་ཡིན། །རིག་པ་ཐོགས་མེད་ཀུན་ལ་ཁྱབ། །ལས་ཀྱི་མཁའ་འགྲོ་རིག་པ་ཡིན། །རིག་པ་རང་བྱུང་སྐྱེ་འགག་བྲལ། །སངས་རྒྱས་མཁའ་འགྲོ་རིག་པ་ཡིན། །བདག་མེད་ཆོས་ཀྱི་སྐུ་གསལ་སྟོང་། །རིག་པ་ཡིག་འབྲུ་རིགས་ལྔར་
གསལ། །ཕྱི་དང་ནང་དང་གསང་བའོ། །ཕྱི་ལྟར་ཨོཾ་ཧཱུྃ་ཏྲཱྃ་ཧྲཱིཿཨཱཿ །ནང་ལྟར་ཧ་རི་ནི་ས་ཧཱུྃ། །གསང་བ་ཨོཾ་དང་ཨཱཿདང་ཧཱུྃ། །རིག་པ་སྐུ་གསུམ་ཉིད་ཡིན་ནོ། །ཞེས་གསུངས་མཁའ་འགྲོའི་བསྐྱེད་རྫོགས་ཉམས་ལེན་ཀུན། །ཕྱག་རྒྱ་ཆེན་པོའི་ཉམས་ལེན་ཁོངས་སུ་འདུས། །དེ་ནས་ཕྱག་རྒྱ་ཆེན་པོ་ཉམས་བླངས་པས། །ཆོས་སྐྱོང་སྲུང་མའི་ཉམས་ལེན་འདུས་པ་སྟེ། །མགོན་པོ་སྐུ་རག་མ་ལས་འདི་སྐད་གསུངས། །ཡེ་ཤེས་མགོན་པོ་བྱ་བ་དེ། །བླ་མ་དམ་པས་ངོ་སྤྲད་ནས། །ཉམས་སུ་བླངས་ནས་མངོན་དུ་གྱུར། །ཡེ་ནས་གནས་པ་དེ་ཤེས་ཡེ་ཤེས་བྱ་བ་ཡིན། །ཞི་རྒྱས་དབང་དྲག་ལ་སོགས་པས། །མཁའ་མཉམ་སེམས་ཅན་ཐམས་ཅད་ཀུན། །འཁོར་བ་སྡུག་བསྔལ་རྒྱ་མཚོ་ལས། །སྒྲོལ་བ་བྱེད་པས་མགོན་པོའོ། །བདུད་རིགས་ཐམས་ཅད་ཕམ་མཛད་ཅིང་། །དཀར་ཕྱོགས་སྐྱོང་བས་ཆོས་སྐྱོང་ཡིན། །ཞེས་གསུངས་མ་ནིང་སྲོག་དབང་ལས། །རང་སེམས་འགགས་མེད་ཆོས་ཀྱི་སྐུ། །འཁོར་འདས་ཀུན་གྱི་རྩ་བ་སྟེ། །ཡ་ཀི་ཀུན་བཟང་ཆེ་མཆོག་ནས། །མ་ཀི་ཐེའུ་རང་ཡན་ཆོད་དུ། །ཀུན་སྲོག་སེམས་ཉིད་གཅིག་ཏུ་
འདུས། །མ་ནིང་ལ་སོགས་དྲེགས་པ་རྣམས། །དོན་ལ་རང་གི་རྟོག་ཚོགས་ཏེ། །ལྷ་སྲིན་ཀུན་གྱི་དྲྭ་བར་བྱུང་། །རྟོག་ཚོགས་སུམ་ཅུ་སྡེ་དཔོན་ཚོགས། །ཁམས་ཆེན་བཅོ་བརྒྱད་དྲེགས་བཅོ་བརྒྱད། །རྣམ་ཤེས་ཚོགས་བརྒྱད་སྡེ་བརྒྱད་དོ། །འདི་ནི་ཀུན་གྱི་མི་ཐུབ་པས། །དུག་གསུམ་ཕོ་མོ་ཀླུ་གསུམ་སྟེ། །ངར་འཛིན་ལྷན་སྐྱེས་མ་རིག་པ། འདི་ཉིད་གཅིག་པུ་མ་ནིང་སྟེ། །འདི་ནི་ཀུན་གྱི་མི་ཐུབ་པས། །གཞན་གྱིས་སྲུང་ཟློག་མི་ནུས་ཏེ། །ངར་འཛིན་རུ་ཏྲའི་རྒྱལ་པོ་ཡིན། །གཅིག་ཤུལ་དུར་ཁྲོད་བདག་པོ་སྟེ། །མ་རིག་མ་ནིང་རང་གི་ལུས། །རྟོགས་ན་ཀུན་བཟང་ཧེ་རུ་ཀ །སྟོང་སྲོག་རང་རིག་ཆོས་སྐུར་བཅད། །དེ་ཕྱིར་མ་ནིང་རང་རྒྱུད་དུ། །མི་བསྐོལ་རང་སེམས་ཆོས་སྐུ་ཡིན། །ཞེས་གསུངས་ཆོས་སྐྱོང་སྲུང་མ་ཐམས་ཅད་ཀུན། །དོན་ལ་རང་གི་རྟོག་ཚོགས་ལས། །གུད་ན་ཡོད་པར་མི་འདུག་པས། །ཕྱག་རྒྱ་ཆེན་པོའི་ཁོངས་སུ་འདུས། །སྐུ་ནི་གསང་བ་མཛོད་གཞུང་ལས། །ཕྱག་རྒྱ་ཆེན་པོ་གཞན་ལ་མི་ལྟོས་ཕྱིར། །བསྒོམ་བྱ་རང་ལ་སྒོམ་བྱེད་རང་གི་སེམས། །བློ་འདས་ཉིད་ལ་དམིགས་པ་ཉིད་དང་བྲལ། །དེ་ཉིད་འབྲས་བུ་
ཡིན་ཕྱིར་རང་ལ་རག་མ་ལུས། །ལྷ་སྒྲུབ་སྔགས་བཟླས་རང་གི་སེམས་ཡིན་ཏེ། །ཡི་དམ་ལྷ་ཡང་རང་གི་སེམས་ཡིན་པས། །དེ་ཕྱིར་མཁའ་འགྲོ་ལ་སོགས་ལུང་བསྟན་རང་གི་སེམས། །བློ་འདས་ངང་ལ་དམིགས་པ་ཉིད་དང་བྲལ། །ཞེས་གསུངས་ཡོད་མེད་སྐྱེ་འགགས་བྲལ་བའི་ངང་། །མ་ཡེངས་ཡེངས་མེད་ངང་དུ་ཉམས་སུ་བླངས། །ཕྱག་རྒྱ་ཆེན་པོའི་ཉམས་ལེན་རྒྱབ་ཆོས་སུ། །ཀུན་འདུས་ཡིད་བཞིན་ནོར་བུའི་གདམས་པ་མཆོག །བཀའ་བརྒྱུད་གོང་མའི་གསུང་སྒྲོས་གསེར་འདྲ་འདི། །གུ་རུ་རྩ་གསུམ་ལྷ་ལ་གསོལ་བཏབ་ནས། །བསམ་པ་སེམས་བསྐྱེད་བཟང་པོའི་བཀོད་གྲུབ་འདི། །སྔགས་འཆང་དེས་བྲིས་དགེ་བས་བདག་གཞན་ཀུན། །མ་བཅོས་རང་གསལ་སྙིང་པོ་དོན་རྟོགས་ནས། །སྒྲུབ་པ་ཉམས་ལེན་མཐའ་རུ་ཕྱིན་པར་ཤོག །ཕྱི་མའི་དུས་སུ་འོད་དཔག་མེད་མགོན་དང་། །དགོངས་པ་དབྱེར་མེད་མངོན་པར་སངས་རྒྱས་ནས། །གྲངས་མེད་སྤྲུལ་པས་གཞན་དོན་ལྷུན་གྲུབ་ཤོག །དཀོན་མཆོག་གསུམ་ལ་ཕྱག་འཚལ་ལོ། །ཏདྱ་ཐཱ། པཉྩ་པྲི་ཡ་ཨ་བ་བྷོ་དྷ་ན་སྭཱ་ཧཱ། ཨོཾ་ཨཱཿཧཱུྃ། ཡེ་དྷརྨཱ་ཧེ་ཏུ་པྲ་བྷ་ཝ་ཧེ་ཏུནྟེ་ཥཱན་
ཐཱ་ག་ཏོ་ཧྱ་ཝ་དཏ་ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དི་མ་ཧཱ་ཤྲ་མ་ཎཿ །སྤྱི་གཏེར་ཆོས་རྣམས་དུས་སྐབས་སོ་སོར་དར་ནས། གཏེར་ཆོས་མཁའ་འགྲོས་གདན་དྲངས་ནས། སངས་རྒྱས་བླ་མ་སོགས་སྔ་མ་རྣམས་ཀྱི་དཔེ་ཡང་མེད་པ་ཆེས་མང་བར་འདུག་ཅེས་བྱང་བདག་སོགས་གསུངས་སོ། །རཏྣ་ལུགས་དང་ཐུགས་རྗེ་ཆེན་པོ་འདི་བསྟན་པ་མཐའ་རྒྱས་སུ་འགྲོ་བར་ལུང་བསྟན་ཏེ། གསང་བ་འདུས་པའི་རྒྱུད་ལས། ཁ་བ་ཅན་གྱི་རྒྱལ་ཁམས་སུ། །འགྲོ་མགོན་ཐུགས་རྗེའི་འདུལ་ཞིང་དེར། །ཐུགས་རྗེའི་སྤྲུལ་སྲས་རྒྱུན་འཛིན་གྱིས། །ཡིག་བདུན་བསྟན་པ་འཛིན་སྐྱོང་སྲུངས། །རིམ་པ་བཞིན་དུ་དོན་གཉིས་སྤྱོད། །ཅེས་དང་། ལང་གྲོའི་ཞུས་ལེན་ལས། བུ་བས་ཡང་སློབ་རྗེས་ཀྱི་དུས་ན་མར་ལ་བསྟན་པ་མཐའ་རྒྱས་སུ་འགྲོ་བར་འགྱུར་རོ། །ཞེས་ལུང་བསྟན་ཆེན་མོ་ལས། རཏྣ་གླིང་པ་ཉིད་ལུང་བསྟན་ནས། སྐལ་ལྡན་དེ་ཡི་རྗེས་འཇུག་རྣམས། །སློབ་མ་བས་ཀྱང་ཡང་སློབ་རྗེས་སློབ་དུས། །རིམ་པ་བཞིན་དུ་བསྟན་པ་མཐའ་རྒྱས་འགྱུར། །ཕྱོགས་དང་མཐའ་དབུས་ཀུན་ཏུ་ཆོས་འདི་དར། །སྙིགས་མའི་འགྲོ་བ་ཕྱམ་གཅིག་ཐར་
ལམ་བགྲོད། །འཕྲད་ཚད་མཐོང་གྲོལ་གྱུར་ཏེ་ངོ་མཚར་ཆེ། །ཞེས་དང་། དག་སྣང་ཡིད་བཞིན་ནོར་བུའི་སྐབས་སུ། མ་གཅིག་མཚོ་རྒྱལ་གྱིས་དུང་དཀར་ཅིག་དང་། རྡོ་རྗེ་དྲིལ་བུ་ཞིག་གནང་ནས་ཨོ་རྒྱན་ལ་ཕྱག་རྟེན་ལ་ཕུལ་བས། ཨོ་རྒྱན་ཆེན་པོའི་ཞལ་ནས། ཁྱོད་ཀྱི་རྟེན་འབྲེལ་བཟང་། རྡོ་རྗེ་འདིས་ཁྱོད་ཀྱི་བུ་སློབ་ཡང་སློབ་བརྒྱུད་པ་རྣམས་མི་འགྱུར་རྡོ་རྗེ་ལྟ་བུའི་དོན་རྟོགས་པ་དང་། དུང་འདིས་ཁྱོད་ཀྱི་སྤྱོད་པའི་གཏེར་ཆོས་འདི་རྣམས་ཀྱིས་མ་ཁྱབ་པ་དང་མ་ཐོས་པ་མེད་པ་ཞིག་འོང་བ་ཡིན། དྲིལ་བུ་འདིས་ཐབས་ཤེས་དབྱེར་མེད་ཀྱི་དོན་གྱིས། ཁྱོད་འཁོར་བཅས་འདིར་མྱུར་དུ་འོང་བར་འདུག་གོ །ཞེས་སོ། །དེས་ན་ད་རུང་བྱིན་རླབས་ཀྱི་སོ་མ་ཉམས་པ་དང་། མ་འོངས་པའི་ཆོས་འདི་དར་ཞིང་ཕྱོགས་ཀུན་ཏུ་འཕེལ་བའི་རྟེན་འབྲེལ་ཡོད་པས་མཐའ་བཟང་བསྟན་པའི་བརྒྱུད་རིང་བ་དང་། འབྲེལ་ཚད་དོན་དང་ལྡན་པ་ཡིན་ནོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།