ཕྱག་རྒྱ་ཆེན་པོ་མཐོང་བ་ཞལ་གདམས་གནད་འགག
ཕྱག་རྒྱ་ཆེན་པོ་མཐོང་བ་ཞལ་གདམས་གནད་འགག་བཞུགས་སོ། །ན་མོ་ལོ་ཀེ་ཤྭ་ར་ཡེ། ད་ནི་ངོ་བོ་རྗེན་པར་མཐོང་། །ཚེས་གསུམ་ཟླ་བ་མཐོང་དང་འདྲ། །རྟོགས་པ་གོང་དུ་འཕེལ་བ་དང་། །ངོ་བོ་འགྱུར་བ་མེད་པ་ཡིན། །རྣལ་འབྱོར་བཞི་རིམ་དང་བསྟུན་ན། །སྤྲོས་བྲལ་ཆུང་ངུའི་རྣལ་འབྱོར་དང་། །འདི་བསྒོམ་གཏད་སོ་སྤུ་ཙམ་མེད། །བལྟ་བྱ་ལྟ་བྱེད་གཅིག་ཏུ་དྲིལ། །རྣམ་རྟོག་ཉུང་དུ་མ་སོང་ཡང་། །མཚོ་ལ་ཁ་བ་བབ་པ་ལྟར། །རྣམ་རྟོག་བསྒོམ་གྱི་ངོ་བོར་འཆར། །མ་དྲན་ན་ནི་འཁྲུལ་པ་སྟེ། །ནམ་དྲན་བསྒོམ་གྱི་ངོ་བོ་སྟེ། །དྲན་པ་ཙམ་གྱི་ཐོག་ཏུ་སླེབ། །ད་རུང་མཐོ་དམན་འགའ་རེ་འཆར། །མཐོ་དུས་སྤྱོད་ལམ་ཀུན་ཏུ་འདྲེས། །ཉིན་པར་ཕལ་ཆེར་འབྲལ་བ་མེད། །རྨི་ལམ་རེས་ཟིན་རེས་མི་ཟིན། །རེས་འགའ་དལ་དུས་ཅུང་རེ་འགྲུལ། །སྡུག་བསྔལ་ན་ཚ་འཇིགས་སྐྲག་དུས། །ལྷག་པར་གསལ་ཞིང་བརྟེན་པར་འགྱུར། །རེས་འགའ་རྨི་ལམ་འོད་གསལ་ཟིན། །ཉིན་ལས་གསལ་ཞིང་བརྟན་པར་འབྱུང་། །དེ་ཡང་དལ་དུས་ཟིན་པ་དང་། །མ་སད་བར་དུ་ཟིན་པ་སོགས། །ཡུན་ལ་ངེས་མེད་སྣ་ཚོགས་ཏེ། །ལན་
བདུན་ཟིན་ན་བར་དོ་ཆོད། །ནམ་གཉིད་ཕལ་ཆེར་ཟིན་ན་ནི། །འཆི་ཁར་འོད་གསལ་ངོས་ཟིན་པས། །བར་དོ་མེད་པར་མངོན་སངས་རྒྱས། །རྟོགས་པ་འདི་ཙམ་སྐྱེས་པ་དེ། །དང་པོའི་ས་ཐོབ་སེམས་དཔའ་དང་། །རྟོགས་པ་མཐོ་དམན་མཉམ་པར་བཤད། །རྩལ་དང་ཡོན་ཏན་མ་རྫོགས་པས། །གཞན་དོན་རྫུ་འཕྲུལ་སྟོན་མི་ནུས། །སྒོ་ངའི་ནང་གི་ཁྱུང་ཕྲུག་ལྟར། །གཤོག་དྲུག་རྒྱས་ཀྱང་འཕུར་མི་ནུས། །སྒོ་ང་ཆག་ནས་འཕུར་བ་ལྟར། །ཤ་ཁྲག་ལུས་དང་བྲལ་མ་ཐག །ཡོན་ཏན་བརྒྱ་ཕྲག་བཅུ་གཉིས་ཐོབ། ། ཐོད་པ་བོར་ཆོག་དེ་ལ་ཟེར། །རྟོགས་ལྡན་ཞེས་བྱའི་མིང་དེ་ཡང་། །འདི་ཙམ་ཞིག་ལ་བཏགས་པ་ཡིན། །ད་རུང་གེགས་སེལ་ཕྲན་བུ་དགོས། །སྤྲོས་བྲལ་མེད་པའི་སྟོང་རྫིས་ཁྱེར། །ཕྱི་ནང་སྣོད་བཅུད་འཁོར་འདས་ཀུན། །སྟོང་པ་ཡིན་པར་བློས་དཔྱད་དེ། །གོ་བ་ཙམ་ལ་གདེང་བཅས་ནས། །དགེ་སྒྲུབ་སྡིག་སྤངས་མ་བྱས་ན། །སྟོང་ལྟ་ཧད་པོར་འགྲོ་ཉན་ཡོད། །ལྟ་བ་ཇི་ཙམ་མཐོ་ན་ཡང་། །སྤྱོད་པ་ཞིབ་པ་སྙིང་གཏམ་ཡིན། །སྤྲོས་བྲལ་ངོ་བོ་མཐོང་བ་འདི། །རང་སེམས་སྟོང་ཉིད་མངོན་སུམ་རྟོགས། །སྨྲ་བསམ་
བརྗོད་མེད་དོན་གོ་བས། །གང་ཟག་བདག་མེད་རྟོགས་མོད་ཀྱང་། །ཆོས་ཀྱི་བདག་མེད་མ་རྟོགས་པས། །རང་སེམས་བསྲེ་བའི་བོགས་འདོན་དགོས། །མིག་གི་ཡུལ་དུ་གང་སྣང་བའི། །གཟུགས་དང་རང་སེམས་གཅིག་ཏུ་བསྲེ། །ཉམས་ལེན་ཐོག་ཏུ་བཞག་པ་ཡིས། །སྣང་སྟོང་ཕྱག་རྒྱ་ཆེན་པོར་འཆར། །རྣ་བའི་ཡུལ་དུ་གྲག་པའི་སྒྲ། །དེ་དང་རང་སེམས་གཅིག་ཏུ་བསྲེ། །ཉམས་ལེན་ཐོག་ཏུ་བཞག་པ་ཡིས། །སྒྲ་དང་རང་སེམས་གཅིག་ཏུ་བསྲེས། །གྲུག་སྟོང་ཕྱག་རྒྱ་ཆེན་པོར་འཆར། །ནམ་མཁའ་སེམས་ཉིད་གཅིག་ཏུ་བསྲེ། །ཉམས་ལེན་ཐོག་ཏུ་བཞག་པ་ཡིས། །ནམ་མཁས་གར་ཁྱབ་སེམས་ཀྱིས་ཁྱབ། །སེམས་ཀྱིས་གར་ཁྱབ་ཆོས་སྐུས་ཁྱབ། །དེ་ཙམ་རྟོགས་པ་སྐྱེས་ཙ་ན། །ཚེ་འདས་དང་ནི་ནད་པ་ལ། །རིག་པ་གཏད་ནས་ཉམས་ལེན་ལ། །མཉམ་པར་བཞག་པས་ཕན་ཐོགས་ཆེ། །བཀའ་བརྒྱུད་ལུགས་ཀྱི་བསྲེ་བ་ཡིན། །རྒྱལ་བ་རྣམས་ཀྱི་ཐུགས་དང་ནི། །འགྲོ་དྲུག་ཀུན་གྱི་སེམས་རྒྱུད་དང་། །རྣལ་འབྱོར་རང་གི་རིག་པ་གསུམ། །དབྱེར་མེད་བསྲེས་ནས་ངོ་བོ་སྐྱོང་། །དེ་གསུམ་དབྱེར་མེད་ངོ་བོ་
གཅིག །ངོ་བོ་སྟོང་པ་ཡིན་པར་མཉམ། །རང་བཞིན་གསལ་བ་ཡིན་པར་མཉམ། །ཐུགས་རྗེ་འགགས་མེད་འཆར་བ་མཉམ། །ལྟ་བ་འཁོར་འདས་དབྱེར་མེད་ཡིན། །འདི་ག་ཙམ་ཞིག་རྟོགས་པས་ན། །གསོན་ཤོག་བཞུ་བར་རུང་བ་ཡིན། །འོན་ཀྱང་དེ་དག་ཐམས་ཅད་ལ། །གོ་བ་དང་ནི་ཉམས་མྱོང་དང་། །རྟོགས་པ་ཤར་བ་གསུམ་རེ་ཡོད། །དེ་འདྲ་ཡིན་པར་འདུག་སྙམ་ན། །གོ་བ་ཡིན་ན་ཕན་པ་ཆུང་། །དེ་འདྲ་བཅོས་ཤིང་བསྒོམ་པའི་ཚེ། །དེ་འདྲ་ཉིད་དུ་འུར་ཆོང་ན། །ཉམས་ཡིན་དེ་འདྲ་ཕྱོགས་འགྲོ་ཙམ། །མ་བཅོས་ཤུགས་ཀྱིས་འཆར་བ་ལ། །ནམ་སྒོམ་དེ་ཡི་ངང་སོང་ན། །རྟོགས་པ་ཡིན་ཞིང་ངོ་མཚར་ཆེ། །ད་རུང་ཡངས་སྐབས་བརྗེད་སྐབས་ཡོད། །མཐོ་དམན་གསལ་འགྲིབ་འགའ་རེ་ཡོད། །མ་བརྗེད་དྲན་པའི་སོ་མ་བཞག །རེས་འགའ་འབྲལ་མེད་ཡེངས་མེད་ཀྱང་། །ཉམས་ཀྱི་གཤིས་ཡིན་རྟག་མི་ཐུབ། །གཞི་ཡི་གནས་ལུགས་གོ་བ་ཡིན། ། ཡེངས་དང་མ་ཡེངས་ཁྱད་མེད་ཅེས། །སྨྲ་ན་གོ་བ་སྐམ་པོ་ཡིན། །ཡེངས་དང་མ་ཡེངས་ཁྱད་མེད་པའི། །རྟོགས་པ་འབྲལ་བ་མེད་པ་དེ། །བསྒོམ་མེད་རྟོགས་དུས་ཡིན་སྐད་
ཐོས། །སྣང་སྟོང་ཡི་དམ་བསྐྱེད་རིམ་དང་། །ངོ་བོ་སྐྱོང་བའི་རྫོགས་རིམ་གཉིས། །ནམ་མཁའ་དང་ནི་འཇའ་ཚོན་བཞིན། །དབྱེར་མེད་གཅིག་གིས་གཅིག་མི་བཤོས། །བསྐྱེད་རྫོགས་ཟུང་འཇུག་རྣལ་འབྱོར་ཡིན། །བླ་མའི་ཐུགས་དང་རང་གི་སེམས། །དབྱེར་མེད་ངོ་བོ་གཅིག་ཏུ་རྟོགས། །མོས་གུས་ཕྱག་རྒྱ་ཆེན་པོ་ཡིན། །ཉམས་ལེན་སྟོང་ཉིད་ལྟ་བའི་ངང་། །མ་རྟོགས་འགྲོ་ལ་སྙིང་རྗེ་སྐྱེས། །སྟོང་ཉིད་སྙིང་རྗེ་ཟུང་འཇུག་ཡིན། །སྙིང་རྗེ་སྐྱེ་ཡུལ་སེམས་ཅན་ཡང་། །རང་གི་སེམས་ལས་གཞན་མ་གྲུབ། །དམིགས་པ་མེད་པའི་སྙིང་རྗེ་ཡིན། །རང་གི་མྱོང་བ་དང་བསྟུན་ནས། །རཱ་ག་ཨ་སྱས་འཕྲལ་དུ་བྲིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།