ཕྱག་ཆེན་ཞལ་གདམས།
ན་མོ་གུ་རུ་པདྨ་སིདྡྷི་ཧཱུྃ། སངས་རྒྱས་ཀུན་གྱི་ངོ་བོ་པདྨ་འབྱུང་། །བླ་མ་རང་སེམས་དབྱེར་མེད་ཆོས་སྐུ་ལ། །གསོལ་བ་འདེབས་སོ་སྙིང་རྗེའི་དོན་རྟོགས་སྩོལ། །རང་སེམས་ངོ་བོ་རྫོགས་པ་ཆོས་ཀྱི་སྐུ། །སེམས་ཀྱི་རང་བཞིན་རང་གསལ་ལོངས་སྤྱོད་རྫོགས། །སེམས་ཀྱི་རྣམ་པ་འགགས་མེད་སྤྲུལ་པའི་སྐུ། །བླ་མ་སྐུ་གསུམ་རང་གི་སེམས་ལ་རྫོགས། །གང་ཤར་མ་བཅོས་ལྷོད་པར་ཀློད་ལ་ཞོག །མ་ཡེངས་དྲན་རྫི་ཙམ་ཞིག་སྐྱོང་བ་ལས། །བསྒོམ་རྒྱུ་ཅི་ཡོང་མེད་ན་བསྒོམ་པའི་མཆོག །དུས་གསུམ་བསགས་པའི་དགེ་བ་ཅི་ཡོད་མཐུས། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ཕྱི་མ་བདེ་ཆེན་ཞིང་དུ་བརྫུས་སྐྱེས་ནས། །ཆོས་སྐུ་འོད་དཔག་མེད་དང་མི་འབྲལ་ཤོག ༈ །ལྟ་ལུགས་དེ་གཉིས་ལ་དང་པོ་འདི་ལྟར་ཡིན་ཏེ། ད་ནི་དེ་འདྲ་མ་བྱེད། སེམས་གང་ཤར་ལ་བལྟས་པས་སྟོང་པ་ཡལ་ནས་ཡུད་ཙམ་སྟོང་སེང་ངེ་བ་དེ་བསྒོམ་ཡིན་བསམ། ཡང་ཅིག་ཤར་ཙ་ན་དེའི་ངོ་བོ་ལ་བལྟ་དེ་ལྟར་བྱེད་པ་དེ་སེམས་ལ་སེམས་མཐུད་པ་ཞེས་བྱ་སྟེ། བསྒོམ་གྱི་གོ་མི་ཆོད། སེམས་ལ་བལྟ་དགོས་བསམ་ཧྲིག་གེ་བྱེད་མི་རུང་།
སེམས་ཁོ་རང་གནས་ན་ཡང་རུང་། འགྱུ་ན་ཡང་རུང་། གསལ་ན་ཡང་རུང་། མི་གསལ་ན་ཡང་རུང་། མ་ཡེངས་དྲན་རྫི་སྐྱོང་ཙམ་གྱིས་ཆོག །དེ་ལ་ཡག་འདོད་ཉེས་དོགས་ཅི་ཡང་མི་བྱེད། དེ་སེམས་མ་བཅོས་པ་ཡིན། ཕྱག་རྒྱ་ཆེན་པོ་ཡིན། དེ་ཡིན་དོན་ནི་སེམས་ཁོ་རང་ཡེ་ནས་ཡེ་ཤེས་ཡིན་པར་འདུག །དེ་ངོ་མ་ཤེས་ན་མ་རིག་པ་རེད། ངོ་ཤེས་ན་ཡེ་ཤེས་རེད། འགྱུ་བ་ངོ་མ་ཤེས་ན་རྣམ་རྟོག་རེད། ངོ་ཤེས་ན་ཆོས་སྐུ་རེད། དེ་ངོ་ཤེས་པས་ཆོག །རང་ཞི་རང་གྲོལ་མི་དགོས། དྲན་རྗེ་དང་བྲལ་བ་དང་མ་བྲལ་བ་ཙམ་མ་གཏོགས་ཁྱད་ཆེར་མི་གདའ། དེ་ལ་ཡེ་ཤེས་སྐྱེས་ན་དེས་ཆོག །དྲན་རྫི་མ་བྲལ་ཙམ་གྱི་ངང་ནས་ལྷ་བསྒོམ་པ་དང་འདོན་པ་བྱེད་པ་སོགས་ཅི་བྱས་ཀྱང་བསྒོམ་རེད། དྲན་རྫི་ཡང་མི་དགོས་པ་ནི་བསྒོམ་མེད་པ་འོང་རྒྱུ་མ་རེད། དྲན་རྫི་ཙམ་མ་གཏོགས་ལུས་ངག་ཡིད་གསུམ་ལྷོད་ཅི་ཐུབ་གྱིས། ལྷོད་རབ་ལ་བསྒོམ་རབ་ཟེར་བ་ཡིན། འགྱུ་བ་མང་ན་ཡེ་ཤེས་མང་བ་ཡིན་པས་མི་དགའ་བ་མ་བྱེད་དགའ་བ་བསྒོམ། ཅི་འཕྲོ་འཕྲོ་ཆུག་ལ་ངོས་བཟུང་མི་དགོས་རང་བབས་ཞོག །བར་སྐབས་བརྗེད་པ་འོང་དེ་ལ་འགྱོད་པ་མི་རུང་། །
དེའི་མཚམས་ནས་བཟུང་སྟེ་དྲན་པའི་རྩི་ཡིས་གཟུང་། བསྒོམ་རྒྱུ་ནི་ཅི་ཡང་མེད་དེ། རྒྱལ་བ་བྱམས་པས།། འདི་ཡི་དམིགས་པ་དངོས་མེད་དེ། །བདག་པོ་དྲན་པ་ཡིན་པར་བཞེད། །ཅེས་གསུངས་སོ། །ཀྱི་ལེ་གནས་དུས་ཞི་གནས་དེའི་ངོ་བོ་ལ་བལྟས་པས་སྟོང་པར་མཐོང་བ་ལྷག་མཐོང་། འགྱུ་བ་གང་ཤར་ངོས་བཟུང་ནས་དེའི་ངོ་བོ་ལ་བལྟས་པས་སྟོང་པ་ཡ་ལེ་དེ་འགྱུ་བའི་སྟེང་ནས་ལྷག་མཐོང་ཤར་བ་དེ་རྣམས་དང་པོ་ངོ་སྤྱད་དུས་དེ་ལྟར་རེད་དེ་ད་དེ་མི་དགོས་གནས་དང་འགྱུ་བ་ངོས་བཟུང་མི་དགོས། འགྱུ་བ་ཕྲ་ཞིབ་དེ་ཚོའང་ངོས་བཟུང་མི་དགོས། སེམས་ཀྱི་ངོ་བོ་ལ་ཧྲིག་གེར་བྱེད་ནས་བལྟ་ཡང་མི་དགོས། སེམས་མ་བཅོས་པར་ཞོག་ཟེར་བའི་ཚིག་གཅིག་པོ་དེ་གོ་བའི་སྐྱོན་ཡིན། མ་བཅོས་པ་དེ་གང་ཡིན་ན་ཐ་མལ་གྱི་ཤེས་པ་དེ་ཡིན། ཐ་མལ་གྱི་ཤེས་པ་དེ་གང་ཡིན་ན། ནམ་དྲན་དུས་སུ་སེམས་ལ་བལྟ་སྙམ་པའི་དྲན་རྫི་མ་བརྗེད་ཙམ་དེ་བས་བསྒོམ་རྒྱུ་ཅི་ཡང་མེད། རང་གར་ཁ་རོག་ཡེངས་ནས་འདུག་པ་འདྲ་བ། ཡེངས་པ་རང་ནི་མིན་ཏེ་སེམས་བསྲུང་བའི་དྲན་རྫི་མ་བརྗེད་ཙམ་ཞིག་ཡོད་པ་དེ་ཕྱག་རྒྱ་ཆེན་པོ་ཡིན། དེ་མ་བཅོས་པ་
ཡིན། ཐ་མལ་གྱི་ཤེས་པ་ཡིན། སེམས་ཁོ་རང་ཡེ་ནས་ཆོས་སྐུ་རེད་པས་དེ་མ་བརྗེད་ཙམ་དུ་བསྲུང་བ་དེས་ཆོག །ཡག་འདོད་པ་དང་ཉེས་དོགས་པ་ཅི་ཡང་མི་བྱེད་པར་བློས་བཏང་ལ་མ་ཡེངས་པའི་དྲན་ཙམ་མ་གཏོགས་ཅི་ཡང་གཏད་སོ་མེད་པར་ལྷོད་ཅི་ཐུབ་གྱིས་དང་སྐྱེད་ཆེ་བ་ཡིན། བདེ་ཉམས་གསལ་ཉམས་ཅི་ཤར་ཡང་དེ་བློ་གཏད་མེད། མགོ་གཡོགས་བྱེད་མི་འདྲ། དེ་བས་ཐ་མལ་ཤེས་པ་དང་རང་ཚོ་མ་ཡེངས་ཙམ་འདི་བསྒོམ་ཡིན་པས་ལྷག །བར་སྐབས་ཅུང་ཟད་ཡེངས་ཀྱང་སྐྱོན་མེད། སེམས་ལ་བསྒོམ་རྒྱུ་ཅི་ཡང་མེད། གཏད་སོ་ཅི་ཡང་མེད་པའི་ངང་ནས་ལྷོད་ཅི་ཐུབ་བྱ། སྐབས་སྐབས་སུ་དྲན་རྫི་ཡང་ཡང་གསལ་འདེབས། དེ་མ་འགྱོགས་དུས་དམིགས་པ་ཕུར་ཚུགས་སུ་བསྒོམ། ། ཡེངས་སྐབས་སུ་དྲན་རྫི་མ་ཡེངས་པའི་ངང་ནས་དམིགས་པ་བསྒོམ་ཨེ་ཐུབ་ཚད། དེའི་གནད་ནི་དམིགས་པ་བསྒོམ་པ་དེ་འགྱུ་བ་ཡིན། འགྱུ་བ་དེ་རྣམ་རྟོག་ཡིན། རྣམ་རྟོག་ཡེ་ནས་ཆོས་སྐུ་ཡིན་རྣམ་རྟོག་འཕྲོ་འཕྲོའི་ངང་ནས་ངོ་བོ་སྟོང་པ་ཉིད་ཡིན། དེ་ངོ་ཤེས་པས་ཆོག །བླ་མའི་རྣལ་འབྱོར་ནམ་རེད་བསྒོམ་ཆོག་ཐུན་མཚམས་མི་དགོས། ཁྱེད་རང་གི་ད་
ནས་བཟུང་སྟེ། སེམས་ནི་ཆོས་སྐུ་ཕྱག་རྒྱ་ཆེན་པོ་ཡིན་པས་བློ་ཐག་རྦད་ཀྱིས་ཆོད། དེ་ངོ་ཤེས་པས་ཆོག་པར་ཐག་ཆོད། བསྒོམ་རྒྱུ་ཅི་ཡང་མེད་པ་ལ་མ་ཡེངས་པའི་དྲན་རྫི་བརྟེན་ཙམ་དེ་ཕྱག་རྒྱ་ཆེན་པོ་ཡིན་པ་ཐག་ཆད་ཀྱིས་ཆོད། སེམས་ལ་བཟང་ངན་ཅི་ཤར་ཡང་ཁྱད་མེད་པར་ཐག་རྦད་ཀྱིས་ཆོད། ལུས་སེམས་ལྷོད་ལ་དྲན་རྫི་ཡང་ཡང་གསལ་འདེབས་པ་གལ་ཆེ། དྲན་རྫི་དང་མ་བྲལ་བའི་ངང་ནས་བསྐྱེད་རིམ་སྒོམ་ཨེ་ཐུབ་ལྟོས་དེ་མ་ཐུབ་ན་རེས་མོས་ཀྱིས་ནད་གདོན་སེལ་བ་ལ་དམིགས་པ་གལ་ཆེ། ཉམས་རྟོགས་བཟང་པོ་སྐྱེ་འདོད་པའི་རེ་བ་དང་། གེགས་གོལ་སར་འགྲོ་བའི་དོགས་པ་གཏན་ནས་མ་བྱེད་པ་བློས་ཐོངས། མི་དྲན་དགུ་དྲན་གྱི་འགྱུ་བ་དེ་མེད་ནི་འགྲོ་མི་སྲིད། ཆུ་རླབས་ལྟ་བུའོ། །དྭགས་པོས། རང་ལས་སྐྱེས་པའི་རྣམ་རྟོག་འདི། །ཆོས་སྐུ་ཡིན་པ་ཙིར་གྱིས་ཟུངས། །ཉམས་སུ་མྱོང་ན་སྙིང་པོ་མཐོང་། །གསུངས་སོ། །སྙིང་པོ་ནི་འགྱུ་བ་ཁོ་རང་འགྱུ་དུས་ནས་ངོ་བོ་སྟོང་པ་ཡིན། སྟོང་པ་དེ་ཆོས་སྐུ་ཡིན་དེ་ཤེས་པར་གྱིས་ལ་མི་དྲན་དགུ་དྲན་གྱི་རྣམ་རྟོག་ཅི་བྱུང་དེ་སྐྱོན་དུ་མ་བལྟ། བལྟ་མི་འདོད་ན་སེམས་ལ་མ་ལྟ་མ་སྒོམ་
ཐ་མལ་དུ་ཞོག་གསུངས་པས། སེམས་ཁོ་རང་རང་སར་བཞག་པ་མ་གཏོགས་ཧྲིག་གེར་བལྟས་ནས་ངོས་བཟུང་མི་དགོས་ལྷོད་ལ་ཞོག །བར་སྐབས་སུ་ཡེངས་བ་དེས་མི་སྒྲིབ་གསུངས་པས། ཡེངས་བ་ལ་འགྱོད་པ་མ་བྱེད། ཡེངས་ཤོར་བའི་སེམས་ལ་ཅི་འདྲ་ཞིག་ཡོད་ལྟོས། མ་ཡེངས་པའི་སེམས་ཀྱི་ངོ་བོ་ཅི་འདྲ་ཞིག་གདའ་ལྟོས་དང་། །ཁྱད་མེད་པ་ངོ་བོ་སྟོང་པ་ཉིད། དེ་ལ་གོམས་ནས་དོན་ལ་ཡེངས་མ་ཡེངས་ཁྱད་མེད་པའི་ངེས་ཤེས་ཤིག་སྐྱེས། དེ་ལ་རང་བཞིན་ཡོངས་ཤེས་བྱ་བ་ཡིན། དེ་རྟོགས་ན་འབྲུག་པ་རྣམས་ཀྱིས་དེ་ལ་ཡེངས་སྐབས་མེད་པ་བརྩིའོ། །དྭགས་པོས། ཡེངས་བྱ་བ་མེད་པ་ཡིན་གསུངས་པ་དེ་ལ་དགོངས་པ་རེད། ཁར་ཉིན་ཚིག་གཅིག་པོ་དེས་ཕྱག་རྒྱ་ཆེན་པོ་དེ་ངོ་འཕྲོད་པ་རེད་པས་བོགས་ཆེན་པོ་བྱུང་ཟིན་ད་རུང་ཡང་སྐྱོང་ལུགས་སྔ་མ་ལྟར་གྱིས་ངོ་འཕྲོད། དེས་ཀྱང་གསལ་འགྲིབ་ནི་མང་པོ་འོང་བ་ཡིན། ཞེས་དབོན་པོའི་ཞུས་པའི་ལན་དུ་རྭ་ག་ཨ་སྱས་སོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ད་ནི་ཉམས་ལེན་འདོད་ཟེར་བའི་སོགས་ཉམས་ཀྱི་འཆར་ལུགས་དང་ཞི་ལྷག་ཁྲིད་བཅས།
ད་ནི་ཉམས་ལེན་འདོད་ཟེར་བའི། །ལེན་པ་གདམས་པ་ཚིག་གསུམ་བཤད། །སེམས་ལ་རྟོགས་པ་འཆར་བའི་ཐབས། །བླ་མ་སྒྲུབ་ལས་ཟབ་པ་མེད། །བླ་སྒྲུབ་ཀུན་གྱི་མཆོག་གྱུར་པ། །པདྨ་འོད་འབར་ངོ་མཚར་ཆེ། །མི་ཁྱིམ་རང་ཁྱིམ་གང་དུ་ཡང་། །དེ་ཉིད་ཉིན་རེ་ཚར་གསུམ་ཐོན། །ཁྱེད་རང་ཆོས་སྒོར་འཛུད་མཛད་པའི། །བླ་མ་ཀརྨ་དགེ་ལེགས་དང་། །ཆོས་འབྲེལ་ཐོབ་ཚད་བླ་མ་དང་། །དད་པ་གང་ཡོད་བླ་མ་དང་། །ཐམས་ཅད་གཅིག་བསྡུས་ཨོ་རྒྱན་དང་། །དབྱེར་མེད་པདྨ་འོད་བར་དེ། ། རང་དང་དབྱེར་མེད་གཅིག་ཏུ་བསྒོམ། །བླ་མ་རང་སེམས་གཅིག་ཏུ་བསྲེས། །རེས་འགའ་སྤྱི་བོའི་གཙུག་ཏུ་བསྒོམ། །ལེའུ་བདུན་ལེའུ་དང་པོ་ཐོན། །ཨོ་རྒྱན་འོད་ཞུ་རང་ལ་བསྟིམ། །རེས་འགའ་འོད་འབར་མདུན་བསྐྱེད་བྱ། །ཚོགས་དང་མཆོད་གཏོར་ཐམས་ཅད་ཕུལ། །ཉམས་རྟོགས་སྐྱེ་བར་གསོལ་བ་འདེབས། །རྒྱུན་དུ་སེམས་ཀྱིས་ལ་སེམས་ལ་ལྟོས། །བལྟས་པས་མི་མཐོང་དངོས་པོ་མེད། །མེད་པ་མ་ཡིན་གང་ཡང་འཕྲོ། །འཕྲོ་ན་འཕྲོད་མཁན་སེམས་དེ་ལ། །ཧྲིག་གེ་བལྟས་པས་སྟོང་པར་ཡལ། །ཅི་ཡང་མི་
དྲན་ཡུད་ཙམ་གནས། །དེ་ཡི་མིང་ལ་གནས་པ་ཟེར། །རི་བྲག་ཆུ་ཡིས་མི་གནོད་པར། །ཐལ་ཐལ་འགྲོ་བ་འགྱུ་བ་ཡིན། །གནས་སམ་འགྱུ་བ་ཅི་བྱེད་དེ། །སེམས་ཀྱིས་རིག་པས་རིག་པ་ཟེར། །གནས་སམ་འགྱུ་བ་རིག་པ་གསུམ། །ཕྱག་ཆེན་བསྒོམ་པའི་ལམ་སྣེ་ཡིན། །ལམ་སྣེ་འདི་ཉིད་མ་སྐྱུར་ན། །ཕྱག་རྒྱ་ཆེན་པོའི་གྲོང་དུ་ཕྱིན། །སེམས་ཀྱིས་སེམས་ལ་ལྟ་བ་དེ། །ལྟ་བ་ཡིན་པར་བློ་ཐག་ཆོད། །དེ་ལ་རྒྱུན་དུ་བསྒོམ་འཇུག་ན། །བསྒོམ་པ་ཡིན་ནོ་རིགས་ཀྱི་བུ། །དེ་ཡི་ངང་ལ་སྡིག་ལ་འཛེམ། །དགེ་བ་སྒྲུབ་པ་སྤྱོད་པའི་མཆོག །རང་སེམས་ཆོས་སྐུར་རྟོགས་པ་ན། །འབྲས་བུ་སངས་རྒྱས་དེ་ལ་མཛོད། ༈ །ཉམས་དང་པོ་རི་གཟར་ཆུ་འབབ་འདྲ། །སེམས་མི་དྲན་དགུ་དྲན་རླུང་ལྟར་འཚུབ། །འཚུབ་པས་སྐྱོན་མེད་སློད་ལ་ཐོངས། །གར་འགྲོ་ཐོངས་ལ་རྒྱངས་སྲུང་གྱིས། །བཏང་བས་མི་འགྲོ་ཚུར་ལ་འཁོར། ༈ །ཉམས་གཉིས་པ་ལུང་རོང་ཆུ་དང་འདྲ། །སེམས་རེས་གནས་དེ་རེས་འགའ་འགྲོ། །གནས་ན་གནས་པའི་ངོ་བོར་ལྟོས། །འགྱུ་བ་འགྱུ་བའི་ངོ་བོར་ལྟོས། །བལྟ་ཡུན་ཐུང་ལ་གྲངས་མར་ལྟོས། །
ཉམས་གསུམ་པ་ཆུ་བོ་གང་གཱ་འདྲ། །སེམས་མེར་རེ་འཁྱིལ་ལེ་གནས་ནས་འོང་། །བདེ་ཉམས་ལུས་སེམས་ཞུ་ལ་ཁད། །གསལ་ཉམས་གསལ་དང་ལྷན་ནེ་བ། །སྟོང་ཉམས་ཐམས་ཅད་སྟོང་པར་འཆར། །ལེགས་ལེགས་འདྲ་བའི་ཉམས་སྣང་ལ། །ཆགས་ཞེན་མ་བྱེད་རིགས་ཀྱི་བུ། །སྤྲིན་དང་ཆར་པ་འཇའ་སྤྲིན་གསུམ། །ནམ་མཁའ་ཁོ་ནའི་ཆོ་འཕྲུལ་ཡིན། །བདེ་དང་གསལ་དང་མི་རྟོག་གསུམ། །སེམས་ཉིད་ཁོ་ནའི་ཆོ་འཕྲུལ་ཡིན། །མ་བཅོས་རང་ངོ་གང་ཤར་ལྟོས། །རེས་འགའ་མི་གསལ་ཟིང་ཞིང་འཐིབས། །བལྟས་ཀྱང་ལྟ་རྒྱུ་མི་རྙེད་ལ། །བདག་ལ་བསྒོམ་ནི་མི་གདའ་སྙམ། །དེ་འདྲ་བྱུང་ཡང་སྐྱོན་མེད་དེ། །ལུས་སེམས་བསྒྲིམས་ལ་ཧྲིག་གེ་ལྟོས། །མིག་རྒྱང་རི་རྩེ་མཐོན་པོར་ལྟོས། །རེས་འགའ་སེམས་འཚུབ་ཅི་ཡང་དྲན། །སྙིང་ཡང་མི་བདེ་སྡོད་མི་ཚུགས། །དེ་ཡང་ཉམས་ཀྱི་བྱེ་བྲག་ཡིན། །དེ་དུས་ལུས་སེམས་བག་ཞི་ལྷོད་། །སེམས་ཀྱང་ལྷོད་ལ་གར་འགྲོ་ཐོངས། །རྒྱངས་སོ་ཚུགས་དང་རང་ལ་འཁོར། ༈ །ཉམས་བཞི་པ་རྒྱ་མཚོ་ཆེན་པོ་འདྲ། །མེར་རེ་འཁྱིལ་ལེ་གནས་པ་ལ། །
རྣམ་རྟོག་བསྒོམ་ལ་མི་གནོད་པར། །དྲན་ཚད་ཐམས་ཅད་བསྒོམ་དུ་འཆར། །མཚོ་ལ་ཁ་བ་འབབ་པའམ། །ཆུ་རླབས་ཆུ་ལ་ཐིམ་པ་འདྲ། །དེ་དུས་སྤྱོད་ལམ་ཀུན་ལ་བསྲེས། །ཟ་ཞིང་འགྲོ་ཞིང་གཏམ་ཞིང་བསྒོམ། །ཉལ་ཞིང་ལང་ཞིང་ལས་ཤིང་བསྒོམ། །གང་ཤར་བསྒོམ་གྱི་འཁོར་ལོ་ཡིན། །དེ་འདྲའི་སྐབས་མཚམས་ཐམས་ཅད་དུ། །རང་ཉིད་པདྨ་འོད་འབར་བསྒོམ། །རྔ་ཡབ་གླིང་ནས་ཨོ་རྒྱན་དང་། །དད་པ་གར་ཡོད་བླ་མ་རྣམས། །ཁ་བ་བུ་ཡུག་འཚུབ་བཞིན་བྱོན། །རང་གི་སྙིང་ཁར་ཐིམ་པར་བསྒོམ། །བྱིན་རླབས་འཇུག་པའི་གདམས་ངག་ཟབ། །བྱིན་རླབས་ཞུགས་ན་ཉམས་རྟོགས་ནི། །མི་འདོད་ན་ཡང་དབང་མེད་འཆར། །གལ་ཏེ་བྱིན་རླབས་མ་ཞུགས་ན། །ལོ་བརྒྱར་མཚམས་བཅད་བསྒོམས་བྱས་ཀྱང་། །ཕྱག་རྒྱ་ཆེན་པོ་སྐྱེ་མི་སྲིད། །བྱིན་རླབས་འཇུག་གམ་མི་འཇུག་ནི། །མོས་གུས་ཆེ་ཆུང་དེ་ལ་རག །མོས་གུས་དད་པ་མེད་པ་ལ། །བྱིན་རླབས་ཞུགས་པར་མི་སྲིད་དོ། །མོས་གུས་དྲག་པོས་གསོལ་བཏབ་ན། །བྱིན་རླབས་མི་ཞུགས་རང་དབང་མེད། །དེ་ཕྱིར་ཨོ་རྒྱན་ཆེན་པོ་དང་། །འབྲེལ་ཐོགས་
བླ་མ་ཐམས་ཅད་ལ། །དད་གུས་བསྐྱེད་ཅིག་རིགས་ཀྱི་བུ། །རྩེ་གཅིག་སྒྲུབ་པ་བྱེད་པ་དང་། །བླ་མའི་ཆགས་ཕྱི་བྱེད་པ་གཉིས། །འདྲ་འདྲ་འདྲ་ལ་ཆགས་ཕྱི་ལྷག །ཉམས་རྟོགས་སྐྱེ་ལ་ཆགས་ཕྱི་ལྷག །སྡིག་སྒྲིབ་དག་ལ་ཆགས་ཕྱི་ལྷག །བྱིན་རླབས་འཇུག་ལ་ཆགས་ཕྱི་ལྷག །དེ་ཚོ་ང་ཡི་འདོད་གཏམ་མིན། །མདོ་རྒྱུད་གྲུབ་གསུང་རྣམས་མཐུན། །དེ་ཕྱིར་བླ་མའི་ཆགས་ཕྱི་དང་། །མི་ཁོམ་མི་ལྕོགས་མང་པོས་གཡེང་། །ཉམས་ལེན་མི་ཡོང་མ་བསམ་ལ། །རྒྱུན་དུ་སེམས་ངོ་མ་སྐྱུར་བསྲུང་། །རི་ཁྲོད་འདུག་དུས་ནངས་སྔ་དང་། །ནུབ་ཕྱི་ལུས་གནད་བསྲང་ལ་བསྲུང་། །རི་ཁྲོད་སྔགས་གདོན་གཏོར་བཅའ་དང་། །འགྲོ་འདུག་ཟ་འཐུང་མེ་བཞོག་དུས། །དལ་བུས་ལས་ཤིང་སེམས་ངོ་བསྲུང་། །དུས་དང་རྣམ་པ་ཐམས་ཅད་དུ། །མར་ཁུའི་ཕོར་ཁ་འཚོ་བ་བཞིན། །རང་སེམས་ཡེངས་དོགས་འཚོ་ཤེས་མཛོད། །བདག་གིས་བྲིས་པའི་དཔེ་ཆ་འདི། །དཔེ་རུལ་གསེབ་ཏུ་མ་བཅུག་ལ། །རྒྱུན་དུ་ལྟོས་ཤིང་སེམས་ལ་སྦྱོར། །ཉམས་རྟོགས་སྐྱེ་བར་ཐེ་ཚོམ་མེད། །ཟླ་ཁྲིད་མང་པོའི་བཤད་ཆོས་ལ། །འདི་འདྲའི་དམར་
འདོན་འོང་བར་དཀའ། །ལན་གཅིག་གསུངས་ཀྱང་བརྗེད་ནས་འགྲོ། །དཔེ་འདི་སློབ་དཔོན་ཁྲོད་མེད་ཡིན། །དེ་སྐད་༧ རཱ་གའི་མིང་ཅན་གྱི། །ཕན་སེམས་བཟང་པོའི་བྲིས་པ་འདི། །བུ་ཡི་སེམས་ལ་ཐིམ་པར་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མངྒ་ལཾ།། །། ༈ ཞི་གནས་ལྷག་མཐོང་གི་ངོ་སྤྲོད་ཞལ་གདམས་ཟབ་མོ་བཞུགས་སོ། །ན་མོ་རཏྣ་ཏྲ་ཡཱ་ཡ། བསྒོམ་གྱི་རྩ་བ་ཞི་ལྷག་གཉིས། །ཡིན་པར་སྔར་ནས་ཤེས་མོད་ཀྱང་། །བོགས་སྐྱེད་ཆེན་པོ་མི་འབྱུང་བས། །ཆོས་དང་འཇིག་རྟེན་བྱ་བ་རྣམས། །གལ་པོ་ཆེ་རྣམས་གཙོ་བོར་བྱས། །བསྒོམ་ལོ་ཞོར་ལ་བྱས་པས་ལན། །ད་རེས་མཚམས་འདི་བྱེད་ཚེ་ལ། །བྱ་བ་གཞན་རྣམས་བློ་ཡིས་ཐོངས། །རིག་པ་རྩེ་གཅིག་བསྒོམ་ལ་གཏོད། །རང་ཉིད་ཚེ་དཔག་དམར་སེར་སྐུ། །ནམ་མཁའི་འཇའ་ལྟར་ལམ་ཙམ་བསྒོམ། །སྙིང་དབུས་ཚེ་དཔག་ཡབ་ཡུམ་དཀར། །སྐུ་ཆུང་བཀྲག་མདངས་ལྡན་པ་ལ། །སྐད་ཅིག་རིག་པ་གཏད་པ་ཡིས། །ཡུན་རིང་མི་འཕྲོ་གནས་པ་ན། །མཚན་བཅས་ཞི་གནས་ཆགས་པ་ཡིན། །རང་ལུས་ཚེ་དཔག་ཡིན་སྙམ་པའི། །མོས་པ་རྩེ་
གཅིག་དང་པོ་བྱ། །དེ་ནས་དམིགས་པ་མི་སྒོམ་པར། །སེམས་ཀྱིས་སེམས་ལ་བལྟས་བསྡད་པས། །མི་འཕྲོ་མེ་རེ་འཁྱིལ་ལེ་གནས། །མཚན་མེད་ཞི་གནས་ཆགས་པ་ཡིན། །གནས་པའི་ངོ་བོ་བལྟས་པའི་ཚེ། །སྟོང་པ་ཉིད་དུ་ལྷག་གིས་མཐོང་། །དེ་ལ་ལྷག་མཐོང་ཤར་བ་ཟེར། །གནས་པ་དེ་དང་སྟོང་པ་གཉིས། །གནས་ཤིང་སྟོང་ལ་སྟོང་ཤིང་གནས། །དེ་ལ་ཞི་ལྷག་ཟུང་འཇུག་ཟེར། །ཉམས་ལེན་གཙོ་བོ་དེ་ལ་བྱ། །མི་གནས་འགྱུ་བ་མང་ན་ཡང་། །འགྱུ་བ་མི་དགག་ལྷོད་ལ་བལྟ། །ཆུ་རླབས་ཆུ་རུ་ཐིམ་པ་ལྟར། །འགྱུ་བ་ཉིད་ཀྱང་སྟོང་པར་མཐོང་། །འགྱུ་བའི་སྟེང་ན་ལྷག་མཐོང་ཤར། །གནས་འགྱུ་གདམས་ག་མི་བྱེད་པར། །ལྷོད་དེ་ལྷོད་ལ་གང་ཤར་བལྟ། ། གནས་པ་དེ་ལ་མི་གནོད་པར། །འགྱུ་བ་ཅུང་ཟད་བྱུང་ན་ཡང་། །དེ་ཉིད་དོགས་ཟོན་མི་གནོད་པར། །ཞི་གནས་མཚོ་ཆུང་འཁྱིལ་འདྲ་ལ། །ལྷག་མཐོང་ཉ་མོ་འཁྱུག་འདྲ་ལ། །དེ་ལས་རབ་ཅིག་བསྒོམ་པ་དང་། །འགྱུ་བ་ཇི་ལྟར་མང་ན་ཡང་། །གནས་པས་ཉམས་ལ་མི་གནོད་པར། །མཚོ་ལ་ཆར་པ་འབེབས་པ་ལྟར། །སྔར་དང་མི་འདྲ་སྐྱོང་
བདེ་བ། །གནས་འགྱུ་གཅིག་ཏུ་འདྲེས་པ་ཟེར། །དེང་ཕན་གནས་ན་དགའ་སྣང་ཆེ།