རང་རིག་གཉུག་མ་ཉམས་སུ་བླངས་པས་རྣལ་འབྱོར་བཞིའི་རིམ་པ་འཆར་ཚུལ་མདོར་བསྡུས་པ་སྒོམ་ཆེན་གུ་རུ་བསྟན་འཛིན་ལ་ཞལ་གདམས་གནང་བ།
རང་རིག་གཉུག་མ་ཉམས་སུ་བླངས་པས་རྣལ་འབྱོར་བཞིའི་རིམ་པ་འཆར་ཚུལ་མདོར་བསྡུས་པ་སྒོམ་ཆེན་གུ་རུ་བསྟན་འཛིན་ལ་ཞལ་གདམས་གནང་བ་བཞུགས་སོ། །ན་མོ་མ་ཧཱ་མུ་དྲ་ཡེ། རྡོ་རྗེ་འཆང་དང་དབྱེར་མེད་པའི། །དྲིན་ཆེན་བླ་མ་རྗེ་ལ་འདུད། །སྒོམ་ཆེན་གུ་རུ་བསྟན་འཛིན་གྱིས། །རྣལ་འབྱོར་བཞི་རིམ་ས་མཚམས་རྣམས། །བདག་ལ་བྲིས་ནས་བསྐུར་ཅིག་ཟེར། །ཉམས་དང་རྟོགས་པ་མེད་པའི་ཕྱིར། །བཞི་རིམ་ས་མཚམས་ངས་མི་འབྱེད། །དེང་སང་རྣམ་གཡེང་ཆེ་དྲགས་པས། །དཔེ་ཆ་ལྟ་བའི་ལོང་མི་གདའ་། །དོན་ལ་གནས་པ་དཀའ་ན་ཡང་། །རང་གི་ཉམས་ལེན་དང་བསྟུན་ནས། །འཕྲལ་དུ་གང་དྲན་ཡི་གེར་བཀོད། །ངོ་མཐོང་འདི་ལ་གཉིས་སུ་གདའ། །གནས་འགྱུ་ངོ་འཕྲོད་ངེས་ཤེས་ཐོབ། །དེ་ཡང་ངོ་མཐོང་བཏགས་པ་ཙམ། །འདི་སྐབས་ཤོར་ས་གསུམ་ཡོད་པ། །ཚུར་ལ་རང་སེམས་ལྟ་མ་ཤེས། །སྭ་བྷ་ཝ་སོགས་སྔགས་བརྗོད་པས། །ནམ་མཁའ་ལྟ་བུའི་སྟོང་ཉིད་དུ། །བསྒོམ་པ་སྟོང་ཉིད་རྒྱས་འདེབས་ཤོར། །མདོ་རྒྱུད་དབུ་ཕར་གཞུང་ཚིག་ལ། །གོ་བ་རིགས་པས་དཔྱད་བྱས་པས། །ཆོས་ཀུན་
སྟོང་ཉིད་ནམ་མཁའ་ལྟར། །ཡོད་མེད་ལ་སོགས་མཐའ་བྲལ་བ། །ཡིན་པར་འདུག་གོ་ངེས་ཤེས་ལ། །དེ་ངང་འདུག་པ་གཤིས་ལ་ཤོར། །ཉོན་མོངས་དུག་ལྔ་འདུལ་བའི་ཕྱིར་། སྟོང་ཉིད་བསྒོམ་པ་ཡིན་བསམ་པ། །དེ་ནི་གཉེན་པོར་ཤོར་བ་ཡིན། །དེ་དག་བློས་བྱས་བཅོས་པའི་ལམ། །དེ་ལྟར་མ་ཡེངས་རང་སེམས་ལ། །རང་གིས་རང་ལ་བལྟས་པའི་ཚེ། །གཟུགས་དང་དངོས་པོ་མ་མཐོང་ཡང་། །མ་མཐོང་བ་ཡི་མཐོང་རྒྱུ་ཞིག །ས་ལེ་སིང་ངེ་ཡེ་རེ་བ། །ཡུད་ཙམ་ཀྱི་ལེ་གནས་པ་དེ། །གནས་པ་ཡིན་ཞིང་དེ་ཡང་ནི། །ཡུན་རིང་མི་གནས་ཀུན་ཏུ་རྒྱུག །དེ་ཡང་འགྱུ་མཁན་ཁོ་རང་ལ། །ཧྲིག་གེར་བལྟས་པས་རང་སར་ཞི། །ཆུ་རླབས་ཆུ་ལ་ཐིམ་པ་འདྲ། །འགྱུ་དང་གནས་པ་གང་བྱེད་པ། །རིག་ཅིང་མཐོང་བ་གནས་འགྱུ་ཤེས། །དེ་ལ་ཡུན་རིང་སྐྱོང་པའི་ཚེ། །དྲན་པ་ཙམ་ནས་ཐོག་ཏུ་སླེབ། །མ་དྲན་ན་ནི་འཁྲུལ་བ་སྟེ། །དྲན་ན་ཉམས་ལེན་སྟེང་དུ་ཕྱིན། །གནས་འགྱུ་སྐྱོང་བདེ་ཟེར་བའོ། །དེ་ལ་ཡུན་རིང་བསྐྱངས་བྱས་པས། །རླུང་མེད་མར་མེ་ཇི་བཞིན་དུ། །སྟོང་གསལ་བདེ་བའི་ཉམས་དང་ལྡན། །དེ་ལ་བསྒོམ་དུས་
རྩེ་གཅིག་གནས། །ཡེངས་ན་ཐ་མལ་འཁྲུལ་པར་འབྱམས། །རེས་འགའ་ཉམས་ལེན་རེས་འགའ་འཁྲུལ། །ཉིན་རེ་ལ་ཡང་རེས་འཇོག་མང་། །རྩེ་གཅིག་ཆུང་ངུའི་རྣལ་འབྱོར་རོ། །དེ་ལ་བརྩོན་འགྲུས་ཆེར་བྱས་པས། །རེས་འགའ་བདེ་ལ་རེས་འགའ་གསལ། །རེས་འགའ་མི་རྟོག་ཉམས་འཆར་ཏེ། །གོལ་ས་གསུམ་ནི་འདི་སྐབས་འབྱུང་། །ལུས་བདེ་སེམས་བདེ་འགྱུ་བ་ཉུང་། །ཉིན་མོ་ཕལ་ཆེར་འབྲལ་བ་མེད། །སྤྱོད་ལམ་རྣམ་བཞིར་འབྲལ་མེད་འབྱུང་། །དེ་ལ་ཆགས་ཞེན་སྐྱེས་ན་ནི། །དེ་ཡན་ཉམས་རྟོགས་འཕར་མི་ནུས། །ཕྱི་མ་འདོད་ཁམས་ལྷ་རུ་སྐྱེ། །རེས་འགའ་གསལ་སྟོང་རྗེན་པར་བུད། །སྤྲིན་ཐག་ཆད་པའི་ནམ་མཁའ་བཞིན། །སྟོང་ཉིད་ཉམས་ལེན་མཐོ་སྙམ་པའི། །ངེས་ཤེས་འཛིན་པ་ཆེན་པོ་ཡོད། །ལྷང་ངེ་ས་ལེ་ཧྲིག་གེ་བ། །ལྟ་མི་ལྟ་རྒྱུ་ཡོད་ཡོད་འདྲ། །དེ་ལ་ཆགས་ཞེན་ཆེ་ན་ནི། །ཉམས་རྟོགས་དེ་ལས་མི་འཕར་ཞིང་། །ཕྱི་མ་གཟུགས་ཁམས་ལྷ་རུ་སྐྱེ། །དེ་ནས་དེ་དག་ཉམས་རྣམས་ལ། །ཆགས་ཞེན་འཛིན་པ་མ་སྐྱེས་ན། །ནམ་ཞིག་རྩུབ་ཉམས་ངེས་པར་སྐྱེས། །རྣམ་རྟོག་རླུང་
འཚུབ་བཞིན་དུ་ལྡང་། །སེམས་རྒྱུད་མི་བདེ་བློ་མི་བདེ། །སེམས་ལ་བལྟས་ཀྱང་ལྟ་རྒྱུ་མེད། །སྲོག་རླུང་ལྡང་བ་འདྲ་ཞིག་འབྱུང་། །ཞེ་སྡང་ཉོན་མོངས་སྔར་ལས་ཆེ། །དེ་ནི་ལས་སློང་རྩུབ་ཉམས་ཏེ། །དེ་དུས་དེ་ཡི་དབང་བཏང་ན། །སྒོམ་འཁྲེབ་སོང་ཞིང་ཀུན་གྱིས་འཕྱ། ། །དེ་དུས་གསོལ་འདེབས་རྒྱང་འབོད་བྱ། །རང་སེམས་ཀློད་ལ་འབོལ་ལེ་བཞག །དེ་ཡིས་བོགས་ནི་ཆེན་པོ་འབྱུང་། །རེས་འགའ་ཕར་ལ་མ་བལྟས་ཀྱང་། །ཚུར་ལ་རྗེན་ནེ་ས་ལེ་འཆར། །བདེ་ཉམས་གསལ་ཉམས་མི་རྟོག་ཉམས། །མ་ངེས་ཅི་ཡང་འཆར་བ་སྟེ། །འདུག་ས་ནོན་ལ་བྱ་བ་ཐོངས། །ཉམས་ལེན་རྩེ་གཅིག་བྱེད་སྙིང་འདོད། །རྨི་ལམ་ཕལ་ཆེར་ཟིན་གྲངས་མང་། །བརྩོན་འགྲུས་ཆེ་ན་ཉིན་ཕལ་ཆེར། །ཡེངས་སྐབས་འདྲ་བ་མེད་པ་འབྱུང་། །དེ་ལ་རྩེ་གཅིག་འབྲིང་པོར་རྩི། །དེ་ནས་གསལ་ཉམས་འཆར་བ་ནི། །གཞན་སེམས་ཤེས་ལ་ཁད་པ་དང་། །གཉིད་དང་མ་གཉིད་སོ་མཚམས་ན། །མེ་རུ་བཀྱག་འདྲའི་འོད་དང་ནི། །ཟླ་ཐིག་འདྲ་བའི་འོད་འབྱུང་བས། །དེ་ཡིས་རྐྱེན་བྱས་སེམས་ངོ་ཟིན། །ཐག་རིང་མི་ཡིས་ཅི་བྱེད་མཐོང་། །ཐག་རིང་ཅི་
སྨྲས་སྐད་གོ་བ། །མངོན་ཤེས་འདྲ་བ་ལན་འགའ་འབྱུང་། །རྒྱུན་དུ་འབྱུང་བ་མ་ཡིན་ནོ། །རྨི་ལམ་རེས་ཟིན་རེས་འགའ་འཁྲུལ། །འཁྲུལ་དུས་རྨི་ལམ་གང་རྨིས་པ། །མངོན་ཤེས་ལྟ་བུར་ཐོག་ཏུ་བབ། །ཉམས་དང་རྨི་ལམ་ཡི་དམ་དང་། །ཆོས་སྐྱོང་ལྷ་འདྲེ་གཞི་བདག་མཐོང་། །དེ་དག་མངོན་ཤེས་ཡིན་སྙམ་ནས། །ང་རྒྱལ་སྐྱེས་ན་བདུད་ཀྱིས་བསླུས། །མཆོག་འཛིན་མེད་ན་ལམ་དུ་འགྲོ། །འགྱུ་བས་བསྒོམ་ལ་མི་གནོད་ཅིང་། །ཆུ་དང་རླབས་བཞིན་དབྱིངས་སུ་ཐིམ། །རྣམ་རྟོག་སྒོམ་དུ་ཤར་བ་སྟེ། །བསྐྱེད་རྫོགས་ཟུང་འཇུག་གསལ་སྟོང་འཆར། །དེ་ནས་སྟོང་ཉམས་འཆར་བ་སྟེ། །འཁོར་འདས་ཐམས་ཅད་སྟོང་པ་ཉིད། །ནམ་མཁའ་ལྟ་བུའི་ཉམས་ཤིག་འཆར། །ཐམས་ཅད་ནམ་མཁའ་འདྲ་འོ་ཞེས། །འཛིན་པས་བཅིངས་ན་གོལ་ས་འོ། །ཐམས་ཅད་རང་སེམས་ཁོ་ནར་རྟོགས། །ཐམས་ཅད་རང་སེམས་ཡིན་ནོ་ཞེས། །འཛིན་པས་བཅིངས་ན་གོལ་ས་འོ། །ཐམས་ཅད་སེམས་ཡིན་སེམས་དེ་ཡང་། །མེད་སྟོང་ཉིད་མིན་སེམས་ཡིན་པར། །སེམས་མེད་བསམ་པའི་འཛིན་པས་བཅིངས། །དེ་ཡང་གོལ་ས་ཡིན་པ་འོ། །
སེམས་ནི་ཡོད་པ་མ་ཡིན་ཞིང་། །མེད་པ་མ་ཡིན་ཅི་ཡང་འཆར། །ཡོད་མིན་མེད་མིན་ཡིན་ནོ་ཞེས། །འཛིན་པས་བཅིངས་ན་གོལ་ས་སྟེ། །གཟུགས་མེད་མུ་བཞིའི་གོལ་ས་འོ། །འདོད་ཁམས་ལྷ་ཡི་གོལ་ས་དང་། །བདེ་སྟོང་ཕྱག་ཆེན་ནོར་དོགས་གདའ། །གཟུགས་ཁམས་ལྷ་ཡི་གོལ་ས་དང་། །གསལ་སྟོང་ཕྱག་ཆེན་ནོར་དོགས་གདའ། །སྐྱེ་མཆེད་མུ་བཞིའི་གོལ་ས་དང་། །མི་རྟོག་ཕྱག་ཆེན་ནོར་དོགས་གདའ། །གང་ཤར་འཛིན་མེད་ཕྱག་ཆེན་ཡིན། །འཛིན་པས་བཅིངས་ན་གོལ་ས་ཡིན། །བདེ་གསལ་མི་རྟོག་ཏིང་འཛིན་བརྟན། །ཆོས་ཚུགས་འཛིན་ལ་རང་རྒྱུད་དུལ། །ཉམས་རྟོགས་བཟང་བའི་རློམ་པ་ཆེ། །ལྟ་རྒྱུའི་ངེས་ཤེས་ཆེན་པོ་ཡོད། །རྩེ་གཅིག་རབ་ཡིན་དེ་ཡན་ཆད། །ཉམས་ཡིན་འཕོ་འགྱུར་ཤིན་ཏུ་ཆེ། །དེ་ནས་བལྟ་མི་ལྟ་རྒྱུ་མེད། །ངེས་ཤེས་བརྟན་པོ་གར་སོང་མེད། །འདི་ཡིན་འདི་མིན་འདི་བསྒོམ་མེད། །སེམས་ངོ་མ་ཤེས་ཐ་མལ་ལུས། །དེ་དང་ཁྱད་མེད་འདྲ་བ་ལ། །ཅུང་ཙམ་མི་འདྲ་ཅི་ཡིན་སྙམ། །ཁ་རོག་བསྡད་པ་འདྲ་གཅིག་ལས། །ཅི་ཡང་བསྒོམ་རྒྱུ་མེད་པ་ཅིག །བྱུང་ན་ངོ་བོ་མཐོང་བ་སྟེ། །
ཐ་མལ་ཤེས་པ་རྗེན་པ་ཞེས། །སྤྲོས་བྲལ་ཆུང་ངུའི་རྟོགས་པ་ཡིན། །ཡེངས་སྐབས་ཐ་མལ་འཁྲུལ་པ་སྟེ། །མ་ཡེངས་འཕོ་འགྱུར་ཆེན་པོ་མེད། །ཕྱི་རོལ་གཟུགས་སྒྲ་དྲི་རོ་སོགས། །ཚོགས་བརྒྱད་སྣང་བ་ཅི་ཤར་ཡང་། །སོ་སོར་མཐོང་ཐོས་ཚོར་ན་ཡང་། །འཛིན་པ་མི་འཇུག་ཉམས་ལེན་ངང་། །གང་ཟག་བདག་མེད་ཅེས་བྱ་འོ། །ཡེངས་སྐབས་ཉོན་མོངས་རྟོག་པ་འཆར། །དྲན་པས་ཟིན་ན་རང་སར་ཞི། །ཡེངས་སྐབས་མང་ཉུང་བརྩོན་འགྲུས་ཁྱད། །ཕལ་ཆེར་བསྐྱེད་རྫོགས་ཟུང་འཇུག་གོ །དེ་ནི་སྤྲོས་བྲལ་འབྲིང་པོ་འོ། །དེ་ནས་རང་སེམས་ནམ་མཁའ་གཉིས། །དབྱེར་མེད་འདྲེས་པའི་འཛིན་པ་ཅན། །ཐམས་ཅད་སྟོང་པའི་ཉམས་ཤིག་འཆར། །སྤྲོས་པ་མེད་པའི་སྟོང་རྫིས་ཁྱེར། །ཡང་ཡང་ངོ་བོ་ལྟ་བ་དང་། །ལྟ་སྟངས་ཡང་ཡང་བྱ་བ་གཅེས། །རྒྱལ་བའི་ཐུགས་དང་རང་སེམས་དང་། །འགྲོ་བའི་སེམས་རྒྱུད་དབྱེར་མེད་པའི། །རྟོགས་པ་རེས་འཆར་རེས་མི་འཆར། །སྤྲོས་བྲལ་ཆེན་པོ་ཡིན་པའོ། །དེ་ནས་ཕྱི་ཡི་སྣང་བ་ཡི། །རི་བྲག་གྲོང་ཁྱེར་གཟུགས་སྒྲ་སོགས། །ཐམས་ཅད་རྒྱ་མཚོར་གཟའ་སྐར་ལྟར། །
རྣམ་པ་གསལ་ཡང་ངོ་བོ་སྟོང་། །ཕལ་ཆེར་རང་ཤར་ཤུགས་འབྱུང་འཆར། །ལྷ་དང་འདྲེ་དང་བཟང་དང་ངན་། །ཐམས་ཅད་སེམས་དང་དབྱེར་མེད་འདྲེས། །རོ་གཅིག་ཆུང་ངུ་ཡིན་པར་སྣང་། །ཡེངས་སྐབས་ད་རུང་འཁྲུལ་པར་འབྱམས། །དུག་ལྔ་ཁོང་ཁྲོ་སྔར་ལས་ཧྲག །རོ་གཅིག་འདྲེས་པའི་རྦ་ལ་གཡེང་། །ཡེངས་སྐབས་མང་བས་ཡིད་མི་ཚིམ། །དེ་ནས་ཡེངས་སྐབས་ཡོད་ན་ཡང་། །ཡེངས་དང་མ་ཡེངས་ཁྱད་མེད་ཅིང་། །གཉིད་དང་མ་གཉིད་ཁྱད་མེད་ལ། །འཁྲུལ་དང་མ་འཁྲུལ་ཁྱད་མེད་པའི། །གོ་བ་སྐམ་པོ་མ་ཡིན་པའི། །རྟོགས་པའི་གདེང་ཞིག་ནང་ནས་འཆར། །བླ་མ་ཡི་དམ་མཁའ་འགྲོ་ཡང་། །རང་སེམས་ཉིད་དང་དབྱེར་མེད་རྟོགས། །རྣམ་རྟོག་རང་གཟུགས་མ་གཏོགས་པའི། །འདྲེ་གཞན་མེད་པར་ཁོ་ཐག་ཆོད། །རོ་གཅིག་འབྲིང་པོ་ཡིན་ནམ་སེམས། །དེ་ཡན་ང་ལ་བཤད་རྒྱུ་མེད། །སྐྱིད་སྡུག་བདེ་དང་ནད་ཐུ་མོ། །གཤེ་དང་བསྟོད་སོགས་ཁྱད་མེད་པ། །རོ་གཅིག་ཆེན་པོ་ཡིན་སྐད་ཐོས། །དེ་ནས་དྲན་རྫི་མི་དགོས་པར། །ངོ་བོ་རྗེན་པར་གནས་པ་ནི། །བསྒོམ་མེད་ཡིན་པར་ནཱ་རོས་གསུངས། །བསྒོམ་ཡོད་
བསྒོམ་མེད་ཁྱད་པར་ནི། །དྲན་རྫི་དགོས་དང་མི་དགོས་ཀྱིས། །ཁྱད་པར་ཡིན་པར་གསུངས་གདའོ། །གང་དྲན་བྲིས་པས་མཁས་གྲུབ་རྣམས། །བཀའ་བསྐྱོན་གནང་བ་སྲིད་ན་ཡང་། །རྣལ་འབྱོར་ཉམས་ལ་ཅི་ཡང་འཆར། །འགལ་འཁྲུལ་ཐམས་ཅད་མཐོལ་ལོ་བཤགས། །དཔེ་དང་བསྟུན་ན་འགྲིགས་དཀའ་ཡང་། །གང་དྲན་ཉམས་ལ་གང་ཤར་ཡིན། །རཱ་ག་ཨ་སྱས་གདམས་པའོ།། ༈ །།རྟ་མགྲིན་མགོན་ལ་གནང་བའི་ཞལ་གདམས་བཞུགས། །ན་མོ་ལོ་ཀེ་ཤྭ་ར་ཡེ། བུ་འདྲེས་སྔའི་གྲོགས་མཆོག་རྟ་མགྲིན་མགོན། །ཡུན་རིང་པོ་ན་ནས་ཡུས་ཆེ་ཞིང་། །དུས་ད་རེས་ང་དང་མཇལ་བ་དེ། །དཔེ་ཤི་གསོན་འཕྲད་ལྟར་དགའ་བར་བྱུང་། །སྔོན་རང་གིས་བྱས་པའི་ལས་འབྲས་ལ། །དེ་བཅོས་སུ་མེད་པར་ཐུབ་པས་གསུངས། །དོན་དེ་ཕྱིར་ནད་འདིར་ཕན་དཀའ་ཡང་། །ནད་བྱང་ཆུབ་ལམ་དུ་བསྒྱུར་བའི་ཐབས། །ཚེ་འདི་ཕྱིར་ཕན་པའི་གདམས་ངག་འཆད། །དེས་ཕན་སྲིད་མ་ཕན་ཤི་ན་ཡང་། །བདག་མཚམས་ཀྱི་བཅད་རྒྱ་དམ་པ་དེས། །ཚེ་འདི་ལ་འཕྲད་པའི་སྐབས་མེད་ཀྱང་། །ནུབ་བདེ་བ་ཅན་
གྱི་ཞིང་ཁམས་སུ། །རང་གཉིས་པོ་མཇལ་བའི་སྨོན་ལམ་བྱེད། །དེ་བར་དུ་ང་དང་འཕྲད་འདོད་དུས། །དཔེ་ཡི་གེ་འདི་དོན་ལྟོས་ཤིང་བསྒོམ། །སྔོན་ཤཱཀ་ཐུབ་ལ་སོགས་སངས་རྒྱས་ཀུན། །རང་བློས་བཏང་གཞན་དོན་བྱས་པས་འཆིངས། །མ་འགྲོ་དྲུག་སེམས་ཅན་ཐམས་ཅད་ཀྱིས། །གཞན་བློས་བཏང་རང་དོན་བྱས་པས་ཕུང་། །གནད་འདི་ལ་བསམ་བློ་ཐོངས་མཛོད་ལ། །རླུང་སྣ་ནས་ཕར་ལ་འགྲོ་བའི་ཚེ། །བདག་རང་གི་བདེ་སྐྱིད་དགེ་རྩ་ཀུན། །མ་འགྲོ་དྲུག་ཀུན་ལ་སིབ་སིབ་ཐིམ། །དེ་ཐམས་ཅད་བདེ་སྐྱིད་ལྡན་པར་བསྒོམ། །དེ་བྱམས་པ་ཚད་མེད་བྱང་ཆུབ་ལམ། །རླུང་སྣ་ནས་ཚུར་ལ་རྔུབ་པའི་དུས། །མ་འགྲོ་དྲུག་སྡིག་སྒྲིབ་སྡུག་བསྔལ་ཀུན། །དེ་སིབས་སེ་བསྡུས་ནས་རང་ལ་བསྟིམ། །མ་འགྲོ་དྲུག་སྡུག་བསྔལ་བྲལ་བར་བསྒོམ། །དེ་སྙིང་རྗེ་ཚད་མེད་བྱང་ཆུབ་ལམ། །དེ་སྙིང་ནས་རྩེ་གཅིག་བསྒོམ་ནུས་ན། །ཚེ་སྔོན་གྱི་ལས་ངན་ཐམས་ཅད་གང་། །ནད་ཀུན་ཞི་གདོན་ཀུན་དམ་ལ་ཐོགས། །ཆོས་མདོ་སྡེ་རྣམས་ཀྱི་སྙིང་པོའི་བཅུད། །དཔལ་ཇོ་བོ་རྗེ་ཡི་ཟབ་ཆོས་ཏེ། །དཔལ་འབྲི་གུང་འཇིག་རྟེན་གསུམ་མགོན་
དང་། །དགེ་བཤེས་འཆད་ཁའི་མཛེ་བཅོས་ཡིན། །དེ་སྔོན་འགྲོའི་ཉམས་ལེན་མཐིལ་པོ་མཛོད། །ཡང་རང་ལ་གནོད་བྱེད་གང་ཡིན་དང་། །མ་འགྲོ་དྲུག་ཀུན་གྱི་སྡུག་བསྔལ་ཀུན། །དེ་མ་ལུས་བསྡུས་ནས་ན་སར་བསྟིམ། །དེ་རུལ་བ་ལྟར་དུ་ཁྲག་བབ་ནས། །ས་ལུང་པ་ཐམས་ཅད་གང་བ་ལ། །གདོན་ལན་ཆགས་ཀུན་གྱིས་དེ་འཐུང་བས། །ཁོ་དགའ་མགུ་ལན་ཆགས་བྱང་བར་བསྒོམ། །དེ་ཕ་གཅིག་དམ་པའི་གདམས་ངག་ཡིན། །དོན་དམིགས་པའི་ཁྲག་གཏད་ནད་ལ་ཕན། །ཡང་གཟེར་ཆེན་བསྒྱུར་ཡང་མི་ཚུགས་ན། །རང་སེམས་ཉིད་ནམ་མཁའི་དཀྱིལ་དུ་འཕོངས། །ལུས་བེམ་རིག་ཉལ་ས་དེ་ལ་བཞག །རང་ནམ་མཁའི་དབྱིངས་སུ་ཡོད་པ་དེས། །ཕྱིར་ལུས་པོ་དེ་ལ་ལྟ་བར་བསྒོམ། །དེས་གཟེར་ཆེན་ཆོག་ནས་བསྲན་ཚུགས་འོང་། །གདོན་ཆེ་ནས་ཅིས་ཀྱང་མ་ཐུབ་ན། །རང་ལྟེ་བའི་དབུས་སུ་རཾ་དམར་པོ། །རཾ་དེ་ལས་མེ་འབར་ལུས་ཀུན་དང་། །གདོན་སྡིག་སྒྲིབ་བཅས་པ་དུས་གཅིག་བསྲེགས། །ལུས་མེ་ལྕེ་ཕུང་པོ་གཅིག་ཏུ་གྱུར། །མེ་དེ་ཡི་མེ་སྒྲ་སྔགས་སྒྲར་བསྒོམ། །སྔགས་རྟ་མགྲིན་སྙིང་པོ་ཅི་ནུས་འདོན། །
དེ་པདྨ་འབྱུང་གནས་གདམས་པ་སྟེ། །གདོན་ལུས་ལ་ཞུགས་པ་དེ་ཡིས་སེལ། །ལུས་བེམ་པོ་འདི་ནི་ས་རྡོ་འདྲ། །སེམས་སྟོང་པ་དངོས་མེད་ནམ་མཁའ་འདྲ། །ནད་ཅེས་བྱ་སེམས་ཀྱི་རྣམ་རྟོག་ཙམ། །ང་ནའོ་བསམ་མཁན་སེམས་ལ་ལྟོས། །དེ་བལྟས་པས་སྟོང་གསལ་རྗེན་པར་འཆར། །གཟེར་ནམ་བྱུང་སེམས་ལ་ལྟ་ནུས་ན། །ནད་སྡུག་བསྔལ་ཕྱག་རྒྱ་ཆེན་པོར་འཆར། །དེ་ནཱ་རོ་པཎ་ཆེན་གདམས་ངག་ཡིན། །ཁྱོད་དེ་ལྟར་རྒྱུན་དུ་ཉམས་བླངས་ན། །ནད་ན་བ་སྒྲིབ་པའི་ཕྱགས་ཤིང་ཡིན། །དུས་ནམ་ཞིག་ལུས་སེམས་བྲལ་བའི་ཚེ། །རང་བར་དོ་ཡིན་པར་ངོ་ཤེས་ཚེ། །ནུབ་བདེ་བ་ཅན་གྱི་ཞིང་ཁམས་སུ། །རང་འགྲོ་བའི་འདུན་པ་རྩེ་གཅིག་མཛོད། །དེར་བསམ་མ་ཐག་ཏུ་ཕྱིན་པར་འགྱུར། །དེ་དྲན་པས་ཆོག་གོ་དཀའ་ལས་མེད། །དེ་མགྱོགས་བུལ་ད་ལྟའི་འགྱུ་བ་ལྟོས། །དེ་འོད་དཔག་མེད་པ་ཞལ་མཐོང་ནས། །ཡིད་དགའ་ནས་པདྨའི་སྦུབས་ལ་སྐྱེས། །དེ་སངས་རྒྱས་མཇལ་བའི་བྱིན་རླབས་ཡིན། །གདན་པདྨ་ངོས་བཟུང་སོགས་མི་དགོས། །དེ་མདོ་རྒྱུད་དགོངས་པ་ཡིན་པའི་ཕྱིར། །ཁྱོད་ཐེ་ཚོམ་མ་བྱེད་སྙིང་ལ་
ཆོངས། །དེ་གསང་འདུས་སྒྲུབ་ཆེན་ཆོས་ར་ན། །མཚན་མར་མེའི་ངོས་ལ་བྲིས་པ་ཡིན། །བདག་རྣལ་འབྱོར་རཱ་ག་ཨ་སྱས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།