གློ་བུར་འཆི་བ་ཐོག་བབ་བྱུང་ན་འདི་བྱ་འདི་བྱེད་ཀྲིག་གེ་ཡོད་པ་པདྨ་མཐར་ཕྱིན་ལ་གདམས་པ།
གློ་བུར་འཆི་བ་ཐོག་བབ་བྱུང་ན་འདི་བྱ་འདི་བྱེད་ཀྲིག་གེ་ཡོད་པ་པདྨ་མཐར་ཕྱིན་ལ་གདམས་པ་ཀུན་ལ་གལ་ཆེའོ།།
ན་མོ་ལོ་ཀེ་ཤྭ་ར་ཡེ། གསོན་དང་བདག་ལ་ལྟོས་པའི་གྲྭ་སློབ་རྣམས། །ད་རེས་དལ་འབྱོར་མི་ལུས་ལན་གཅིག་འདི། །དུས་ངན་སྙིགས་མ་ལྔ་ཡི་དུས་དང་ཐུག །ཚེ་སྟོད་ཕལ་ཆེར་ཡང་ཡེངས་ངང་ལ་ཟད། །བྱ་བ་སྒྲུབ་དགོས་ཆུ་ཡི་གཉེར་མ་འདྲ། །རྣམ་གཡེང་མང་པོས་དམ་ཆོས་སྒྲུབ་མི་ཁོམ། །མེད་པ་འཚོལ་དགོས་ཡོད་པ་འཚོ་སྐྱོང་སྡུག །མུ་གེ་དུས་འཁྲུག་ནད་ཡམས་མང་བས་སྡུག །དགྲ་ཇག་ཆོམ་རྐུན་རྒྱལ་པོའི་འཇིགས་པས་སྡུག །ནད་དང་གདོན་དང་དུས་མིན་འཆི་དོགས་སྡུག །འཆི་ཁ་གནད་གཅོད་ཟུག་གཟེར་དྲག་པོས་སྡུག །འབྱུང་བཞི་ཐིམ་
སྡུད་སྲོག་ཆད་ཚོར་བས་སྡུག །བར་དོའི་འཁྲུལ་སྣང་འཇིགས་སྐྲག་དྲག་པོས་སྡུག །སྡུག་བསྔལ་དེ་རྣམས་མི་མྱོང་ཐབས་མི་གདའ་། །འོན་ཀྱང་ཚེ་མཇུག་དགུན་གྱི་ཉི་མ་ཙམ། །འཆི་ནད་སྲོག་གཅོད་ཟླ་ཤས་ཞག་ཤས་ཙམ། །བར་དོའི་འཁྲུལ་སྣང་ཟླ་ངོ་གཅིག་གཉིས་ཙམ། །འཁོར་བ་མཐའ་མེད་གནས་སུ་མ་འཁྱམས་ན། །དེ་ཙམ་སྡུག་ཀྱང་སྡུག་ཡུན་ཐུང་བས་དྲག །སྡུག་བསྔལ་དེ་རྣམས་སྡུག་བསྔལ་རྫོགས་སོ་བྱེད། །དེ་བས་གཏན་བདེའི་གནས་སུ་འགྲོ་བའི་ཐབས། །ཆོས་སྐད་དམའ་འུ་ལག་ཏུ་ལོན་ངེས་པ། །སྙིང་གི་གཏམ་འདི་སྙིང་ལ་འཆང་
ནས་ནི། །ཕན་ངེས་སྐྱོབ་ངེས་ཡིན་ནོ་རིགས་ཀྱི་བུ། །ལོ་མང་མཐའ་འམ་ད་ལོ་སང་ཕོད་བར། །བསམ་དུ་མེད་པར་འཆི་ནད་ཕོག་བྱུང་ན། །ཅི་བྱ་བསམ་དུས་ངེས་ཀྲིག་ཡོད་པར་བྱ། །བདག་ནི་ཆོས་སྒོར་ཞུགས་པའི་ལ་དོན་དེ། །དགོས་པའི་དུས་ལ་བབ་བསམ་རིག་པ་སྒྲིམས། །ངོ་ཤི་སྙམ་དུ་ཞེ་རྩ་མ་ཁུམ་པར། །ཤཱཀ་ཐུབ་མན་ནས་འཇག་མའི་སྲིན་བུ་ཡན། །མི་འཆི་འདུག་པས་ཆོག་པ་གཅིག་ཀྱང་མེད། །ད་རེས་ཁོ་ན་ཤི་བ་མ་ཡིན་ཏེ། །ཚེ་སྔོན་བྱེ་བ་དུང་ཕྱུར་གྲངས་མེད་ཤི །ལུས་པོ་ཁང་པ་སྒྱུར་ལྟར་བྱེད་པ་ལས། །སེམས་ཉིད་སྟོང་པ་ཉིད་ལ་འཆི་རྒྱུ་མེད། །འཆི་ཁ་གནད་གཅོད་སྡུག་བསྔལ་འདི་སྡུག་ཀྱང་། །འཆི་བ་དངོས་ནི་སྐད་ཅིག་བཏང་སྙོམས་ཏེ། །བདེ་སྡུག་ཚོར་བ་ཅི་ཡང་མེད་པར་གསུངས། །ད་རེས་འཆི་བ་འདི་ལ་བརྟེན་ནས་ཀྱང་། །འགྲོ་བ་སེམས་ཅན་ཀུན་ལ་ཕན་པའི་ཕྱིར། །འཆི་བ་འོད་གསལ་ཆོས་སྐུར་ངོས་བཟུང་སྟེ། །བར་དོར་ལོངས་སྤྱོད་རྫོགས་པའི་སྐུར་བཞེངས་ནས། །སྐྱེ་བ་སྤྲུལ་སྐུ་བདེ་ཆེན་ཞིང་ཁམས་སུ། །མེ་ཏོག་པདྨའི་སྦུབས་ལ་བརྫུས་སྐྱེས་ནས། །ས་བཅུ་ཐོབ་ནས་ཕྱོགས་བཅུའི་ཞིང་ཁམས་སུ། །
སྤྲུལ་པས་འགྲོ་བ་མ་ལུས་འདྲེན་པར་བྱ། །སྙམ་དུ་སེམས་བསྐྱེད་སྙིང་ལ་ལན་འགར་བསམ། །དེ་ནས་རང་ཉིད་རྒྱལ་བ་རྒྱ་མཚོར་བསྒོམ། །སྤྱི་གཙུག་ཁྲུ་གང་ཙམ་གྱི་ནམ་མཁའ་ལ། །པདྨ་འདབ་མ་སྟོང་ལྡན་ཟླ་བའི་སྟེང་། །བླ་མ་ཡི་དམ་སངས་རྒྱས་བྱང་སེམས་ཀུན། །གཅིག་བསྡུས་ངོ་བོ་སངས་རྒྱས་འོད་དཔག་མེད། །མངོན་སུམ་ལྟ་བུར་ཤིན་ཏུ་གསལ་བར་བསྒོམ། །བདེ་བ་ཅན་ནས་ཡིད་ཀྱིས་སྤྱན་དྲངས་བསྟིམ། །ལུས་དང་ལོངས་སྤྱོད་ཉེ་དུ་རྟེན་གསུམ་སོགས། །མཎྜལ་དུ་དམིགས་མཎྜལ་ལན་གསུམ་ཕུལ། །དེ་ནས་འབུལ་བ་ཚར་བའི་ཡོན་བདག་བཞིན། །སུ་ཡིས་ཁྱེར་ན་སེར་སྣ་ཆགས་སྡང་སྤོངས། །དེ་ནས་རང་ལུས་སྟོང་པ་ཕུས་བཏབ་བཞིན། །མ་དག་སྒོ་བརྒྱད་ཧཱུྃཿཡིག་རེ་རེས་བཀག །ལུས་དབུས་དབུ་མ་ཁང་སྟོང་ཀ་བ་བཞིན། །ཕྱི་དཀར་ནང་དམར་སྟོང་པ་སང་ངེ་བ། །ཡར་སྣེ་ཚངས་བུག་གནས་སུ་ཧད་པོ་ལ། །མར་སྣེ་ལྟེ་འོག་ཕུག་རྡུགས་སྨུག་ཚིགས་བཞིན། །ལྟེ་བར་པདྨ་དམར་པོ་འདབ་བཞིའི་སྟེང་། །རང་གི་རླུང་སེམས་རྣམ་ཤེས་ངོ་བོ་ནི། །ཐིག་ལེ་དཀར་པོ་སྲན་མ་རློན་པ་ཙམ། །བཀྲག་མདངས་ལྡན་ཞིང་
འཕར་འདར་ལིང་ལིང་བསྒོམ། །ཐིག་ལེ་དེ་ཉིད་སྐར་ཁུང་མདའ་འཕང་བཞིན། །འོད་དཔག་མེད་ཀྱི་ཐུགས་ཀར་ཐིམ་པར་བསྒོམ། །སླར་ཡང་ལྟེ་བར་ཐིག་ལེ་གོང་ལྟར་བསྒོམ། །བསྒོམ་ཝིག་སྤར་ཝིག་བདུན་ནམ་ཉེར་གཅིག་བྱ། །དེ་ཡིས་གལ་ཏེ་ཐུགས་དམ་མ་ཟིན་ན། །བར་ཆད་རྐྱེན་གྱིས་ཟིན་པ་འགྲོགས་ན་ཡང་། །བུ་ག་གཞན་ནས་མི་འགྲོ་སྤྱི་བོར་འཕོ། །འཆི་ཁ་སེམས་དང་བསམ་པ་སྟོབས་ཆེ་བས། །བཟང་ངན་ཡིད་ལ་གང་བཟུང་ནུས་པ་ཆེ། །ལོ་ཏོག་སེམས་ཆགས་སད་ཀྱིས་ཁྱེར་ཟེར་དང་། །ཞེ་སྡང་སྨོན་ལམ་ངན་པས་འདྲེར་སྐྱེ་ནུས། །དེ་ཕྱིར་ཤི་ནས་ཞག་གྲངས་ལྔ་བདུན་ནམ། །ཅི་ཙམ་འདོད་པའི་བར་དུ་ཐུགས་དམ་ལ། །འདུག་ཅིང་མི་འཕོ་བསམ་པའི་དམ་བཅའ་བྱ། །ཞག་གྲངས་དུ་སོང་རང་གིས་ཤེས་དཀའ་སྟེ། །འཆི་སེམས་སྟོབས་ཀྱིས་དམ་བཅའི་སྟེང་དུ་འགྲོ། །དེ་ནས་ཐུགས་དམ་བརྟན་པར་བྱེད་པའི་ཐབས། །རང་ཉིད་རྒྱལ་བ་རྒྱ་མཚོའི་སྐུ་གཟུགས་ནི། །ཤིན་ཏུ་གསལ་བའི་བསྐྱེད་རིམ་གཟུང་བར་བྱ། །ཐུགས་ཀར་ཟླ་བའི་དཀྱིལ་འཁོར་སྟེང་དུ་ནི། །ཧྲཱིཿཡིག་དམར་པོ་སྔགས་ཀྱིས་བསྐོར་བ་དེ། །འོད་ནི་མར་མེ་བལྟམས་
པ་ལྟ་བུ་ཡིས། །ལུས་ཀྱི་ནང་ཀུན་གསལ་བར་ཐུན་གཅིག་བསྒོམ། །དེ་ནས་དམིགས་པ་ཅི་ཡང་མི་བསྒོམ་པར། །སྙིང་དཀྱིལ་ཐད་དུ་རིག་པ་ཚུར་བཀུག་ལ། །སེམས་ངོའི་སྟེང་དུ་རིག་པ་ཅི་གནས་བྱ། །འབྱུང་བཞི་ཐིམ་རིམ་དཀར་ལམ་དམར་ལམ་སོགས། །སོ་སོར་ངེས་ཤེས་ངོས་བཟུང་བྱ་མི་དགོས། །གང་ཤར་དེ་ཡི་ངོ་བོ་བལྟས་པས་ཆོག །དེ་ཡན་འཆི་ཁ་ཇི་ལྟར་བསྒོམ་པའི་ཚུལ། །རབ་འབྲིང་ཐ་མ་གསུམ་ཀ་སྒོམ་ལུགས་འདྲ། །དེ་ལྟར་སྒོམ་ལུགས་ཁྱད་པར་མེད་ན་ཡང་། །ཟིན་ལུགས་རབ་འབྲིང་ཐ་མ་ཡང་ཐ་བཞི། །རབ་ལ་རང་དབང་ཆེ་བ་འདྲ་ཞིག་བྱུང་། །ཕྱི་དབུགས་ཆད་ནས་ནག་ལམ་འཐུག་པོའི་སྐབས། །ཕྱི་ཡི་ཚོགས་བརྒྱད་འགགས་ནས་འཁོར་བ་མེད། །ཕུང་པོ་ཕན་ཚུན་ཁྱེར་རམ་གདུང་བཅས་སོགས། །ཤ་ཚ་མེད་ལྟར་བྱས་ཀྱང་ཚོར་བ་མེད། །དཔེར་ན་བུམ་པའི་ནང་གི་མར་མེ་འདྲ། །དེ་ནས་གཞི་ཡི་འོད་གསལ་ཞེས་བྱ་སྟེ། །ཕྱི་རོལ་ཅུང་གསལ་སྐྱ་རེངས་ཤར་བ་བཞིན། །ནང་དུ་སེམས་ངོ་སྟོང་གསལ་རྗེན་ལྷང་ངེར། །ཕར་ལ་ཚོལ་མི་དགོས་པར་ཚུར་ལ་འཆར། །ངོ་ཤེས་མི་དང་འཕྲད་བཞིན་ངོས་བཟུང་ནས། །
དེ་ཡི་ངང་དུ་ལྷན་ནེ་གནས་པ་ཡིན། །རྟགས་ནི་ཕུང་པོ་བཀྲག་མདངས་བཟང་བ་དང་། །མིག་ནི་ཟིམ་བུ་ཁ་ཡང་འཛུམ་འདྲ་འབྱུང་། །སེམས་ངོ་ཡོད་པ་དེ་ཡི་དྲུང་ཕྱིན་ཚེ། །སེམས་ངོ་གསལ་ཞིང་བོགས་ནི་ཐོན་འདྲ་འབྱུང་། །རྣམ་རྟོག་རིགས་པ་སྐྱེས་པར་མ་གྱུར་ན། །ནང་དུ་རྣམ་རྟོག་ཕྲའུ་འགྱུ་ན་ཡང་། །དེ་ཡིས་ཐུགས་དམ་འགྲོགས་པར་མི་འགྱུར་ཏེ། །གདུང་ལ་ཐུག་རེག་མཆོད་བཤམས་ལ་སོགས་ཀྱིས། །གྲོལ་བར་མི་འགྱུར་ནམ་འདོད་བར་དུ་གནས། །དེ་ནས་འདུག་ཆེད་དམ་བཅའི་དུས་ཚང་ནས། །གཞན་ནས་མི་འཕོ་ཚངས་པའི་བུག་ནས་འཕོ། །དེ་ནས་ལུས་སེམས་བྲལ་བར་གྱུར་མ་ཐག །ད་ལྟར་དུ་འོད་གསལ་ཚུར་ལ་འཆར། །དེ་ཉིད་ངོས་བཟུང་ཅི་འདོད་བར་དུ་གནས། །དེ་ནི་འཆི་བ་ཆོས་སྐུར་སྦྱོང་བ་ཡིན། །གསོན་དུས་རྫོགས་ཆེན་རིག་པ་ཚད་ཕེབ་དང་། །འཆི་བ་འོད་གསལ་དེ་ཉིད་ངོས་ཟིན་ན། །བར་དོར་ཞི་ཁྲོའི་ལྷ་ཚོགས་མི་འཆར་ཏེ། །འོན་ཀྱང་བར་དོར་ལོངས་སྐུར་སྦྱོང་བའི་ཕྱིར། །རྒྱལ་བ་རྒྱ་མཚོ་ལ་སོགས་ཡི་དམ་གྱི། །བསྐྱེད་རིམ་གསལ་སྟོང་འཇའ་ཚོན་ལྟ་བུར་བསྒོམ། །ཐུགས་ཀའི་སྔགས་ཕྲེང་འོད་ཟེར་སྤྲོ་བསྡུ་
ཡིས། །སངས་རྒྱས་མཆོད་དང་བྱིན་རླབས་སྡུད་པ་དང་། །སེམས་ཅན་རྣམས་ཀྱི་སྒྲིབ་སྦྱང་འདྲེན་སྟོན་སོགས། །བསྙེན་སྒྲུབ་དུས་ཀྱི་དམིགས་པ་བཞིན་དུ་བྱ། །ད་ལྟ་བསྒོམ་དང་མི་འདྲ་དེ་དུས་སུ། །བསྒོམ་པ་དེ་དག་དངོས་སུ་འགྱུར་བ་ཡིན། །དེ་ནི་བར་དོ་ལོངས་སྐུར་སྦྱོང་བའོ། །དེ་ནས་སྐྱེ་བ་སྤྲུལ་སྐུ་སྦྱོང་བ་ནི། །འཁོར་བ་རིགས་དྲུག་སྡུག་བསྔལ་རྒྱ་མཚོ་ལས། །བྲམ་ཟེའི་མདུན་དུ་བཤང་གཅི་བཞག་པ་བཞིན། །ཞེ་ཡི་གཏིང་ནས་ཞེན་པ་ལོག་པ་ཡིས། །ཡུལ་ཕྱོགས་གྲྭ་སློབ་གཉེན་འདུན་ལ་སོགས་པ། །ཐམས་ཅད་ཀུན་ལ་ཆགས་ཞེན་གཏིང་ནས་སྤོང་། །འོད་དཔག་མེད་དང་བདེ་ཆེན་ཞིང་ཁམས་ཀྱི། །ཡོན་ཏན་རྣམས་ལ་འདོད་པ་ཆེར་བསྐྱེད་དེ། །ཞིང་དེར་བདག་ཉིད་འགྲོ་བར་བྱེད་པ་ལ། །བར་ཆད་སོལ་ཅིག་ལམ་སྣ་དྲོངས་ཤིག་ཅེས། །བླ་མ་ཡི་དམ་ཆོས་སྐྱོང་རྣམས་ལ་འབོད། །དེ་ཚེ་འོད་དཔག་མེད་པའི་སྤྲུལ་པ་ཡང་། །བསུ་མའི་ཚུལ་དུ་མདུན་དུ་འབྱོན་པར་བཤད། །བསྒྲུབས་པའི་ཡི་དམ་མཁའ་འགྲོ་ཆོས་སྐྱོང་རྣམས། །མཆོད་པའི་སྤྲིན་དང་བཅས་ཏེ་སྐྱེལ་བསུ་བྱེད། །དེ་དོན་བདེ་མཆོག་རྩ་བའི་རྒྱུད་ལས་
ཀྱང་། །རྣལ་འབྱོར་པ་རྣམས་འཕོ་བའི་ཚེ། །དཔལ་ལྡན་ཁྲག་འཐུང་ལ་སོགས་པས། །མེ་ཏོག་ལ་སོགས་ལག་ན་ཐོགས། །འཆི་བ་ཞེས་བྱ་རྣམ་རྟོག་སྟེ། །མཁའ་སྤྱོད་གནས་སུ་ཁྲིད་པར་འགྱུར། །གསུངས་པ་དེ་ཡང་དེ་ལ་དགོངས་པ་ཡིན། །དེ་ནས་འབྲིང་པོ་རྣམས་ཀྱིས་ཟིན་ལུགས་ལ། །འོད་གསལ་བཟུང་ལུགས་ཟིན་ལུགས་ཁྱད་མེད་དེ།། གྲིབ་གཞི་ཕོག་དང་སྡིག་ཅན་གྲིབ་ཕོག་དང་། །བྱི་བ་སྲེ་མོང་རྨུག་དང་ཀུ་ཅོས་གྲོལ། །འདུག་པའི་དམ་བཅའ་སྟེང་དུ་མ་སོང་བར། །འོད་གསལ་གཉིས་པ་ཤར་ཡང་མ་ཟིན་ནོ། །ཟིན་ཀྱང་ཡུན་རིང་མི་གནས་འཁྲུལ་པར་འགྱུར། །དེ་ནས་ཞི་ཁྲོའི་ལྷ་ཚོགས་ཐམས་ཅད་ནི། །རིམ་བཞིན་ཐོས་གྲོལ་ནང་ནས་བཤད་ལྟར་འཆར། །ཤར་ཡང་ལོག་ནས་གྲུབ་པ་མེད་པ་ལྟར། །རང་གི་སེམས་ཀྱི་འཁྲུལ་སྣང་ཡིན་ཤེས་ནས། །སེམས་ངོའི་ངང་དུ་མཉམ་པར་བཞག་ན་ནི། །ལྷ་རྣམས་རང་ལ་ཐིམ་ནས་རང་ཉིད་ཀྱང་། །རྟོགས་པ་ལྷ་དེའི་དགོངས་པ་རྟོགས་པར་འགྱུར། །སེམས་ངོ་མ་ཤེས་ངོས་ཟིན་དད་འདུན་བྱས། །ཞིང་ཁམས་དག་པར་སྐྱེ་བའི་རྟེན་འབྲེལ་འགྲིགས། །དེ་ནས་ལྷ་སྐུའི་སྣང་བ་རྫོགས་ཚར་
ནས། །རིགས་དྲུག་འཁྲུལ་པའི་སྣང་བ་མ་ཤར་སྔོན། །བདེ་བ་ཅན་ན་འགྲོ་བའི་འདུན་པ་བྱ། །བླ་མ་ཡི་དམ་ཆོས་སྐྱོང་རྣམས་ལ་འབོད། །དེ་ནས་སངས་རྒྱས་སྤྲུལ་པ་སངས་རྒྱས་སྐུ། །མཐོང་བ་ཡིད་དགའ་སྐྱེ་བའི་རྒྱུ་བྱེད་ཅིང་། །སྨན་བླ་བཏོན་ན་བྱང་ཆུབ་སེམས་དཔའ་བརྒྱད། །ནམ་མཁར་འབྱོན་ནས་ལམ་ཡང་སྟོན་པར་གསུངས། །གསོན་པོའི་དུས་ནས་སྨོན་ལམ་བཏབ་པ་དང་། །བླ་མ་ཡི་དམ་རྣམས་ཀྱི་ཐུགས་རྗེ་ཡིས། །བདེ་བ་ཅན་དུ་ངེས་པར་སྐྱེ་བར་གསུངས། །དེ་ནི་ཟིན་ལུགས་འབྲིང་གི་དབང་ཡིན་ནོ། །ཐ་མས་འོད་གསལ་བཟུང་ལུགས་གོང་དང་འདྲ། །དང་པོ་ཟིན་ཀྱང་ཡུན་དུ་མི་གནས་ཏེ། །རེ་ཞིག་ཟིན་ཡང་མྱུར་དུ་འཁྲུལ་གྱུར་ཏེ། །ད་ལྟ་རྨི་ལམ་དང་པོ་ཟིན་ན་ཡང་། །དེ་ནས་མི་གནས་མཇུག་ན་འཁྲུལ་དང་འདྲ། །ལུས་སེམས་བྲལ་ནས་འོད་གསལ་གཉིས་པ་ཡང་། །ཡུད་ཙམ་ཟིན་ཏེ་དེ་ཡི་སྟེང་མི་གནས། །དེ་ནས་ཞི་ཁྲོའི་ལྷ་ཚོགས་རིམ་པ་བཞིན། །ཡུན་རིང་མི་འཆར་ཡུད་ཙམ་ཡུད་ཙམ་འཆར། །གཏན་གཏན་ངོས་མ་ཟིན་པས་གྲོལ་མི་ཐུབ། །ཁྲོ་བོ་ཤར་ཚེ་སྐག་སྔངས་བརྒྱལ་ནས་འགྲོ། །ཡང་
ཡང་སོང་ཞིང་ཡང་ཡང་བརྒྱལ་བར་བྱེད། །དེ་ནས་སྲིད་པ་བར་དོ་ཤར་བའི་ཚེ། །རིག་པ་གསལ་ཞིང་ཤི་བ་ཐག་ཆོད་ནས། །གར་འགྲོ་ཅི་བྱེད་བློ་སེམས་སྦྱར་ཚུབས་སེ། །དེ་དུས་ད་ལྟ་སྨོན་ལམ་བཏབ་པ་དང་། །ཚེ་དཔག་འོད་དཔག་ལ་སོགས་པདྨའི་རིགས། །བསྙེན་སྒྲུབ་བྱས་པ་དེའང་ངེས་པར་དྲན། །ཡི་དམ་མཁའ་འགྲོའི་བསུ་སྐྱེལ་མ་བྱུང་ཡང་། །འགྲོ་ཤེས་མི་ལུས་ཆགས་ཞེན་མ་སྐྱེས་ན། །དེ་མ་ཐག་ཏུ་ཞིང་དེར་ངེས་པར་ཕྱིན། །ཆགས་ཞེན་སྐྱེས་ན་ལས་ཀྱི་སྒྲིབ་པ་ཡི། །བར་ཆད་ཡིན་པར་ངོས་བཟུང་ཆགས་ཞེན་སྤོངས། །དེ་ནས་ཐ་མའི་ཡང་ཐའི་འཆར་ལུགས་ལ། །འཆི་རྐྱེན་ངན་པས་ཐུགས་དམ་བཟུང་འོས་མེད། །འཕོ་བ་མ་ཐེབ་ཞི་ཁྲོ་ངོས་མ་ཟིན། །བདུན་གཉིས་ཡོལ་ནས་སྲིད་པ་བར་དོ་ཤར། །དེ་ནས་དུད་འགྲོ་ལ་སོགས་མ་ཡིན་ཞིང་། །མཚམས་མེད་བྱས་པའི་སྡིག་ཆེན་མ་ཡིན་པ། །མི་ནི་ཤི་ཚད་ཐམས་ཅད་ཁྱད་པར་མེད། །རྫུ་འཕྲུལ་ལྡན་ཞིང་ཟག་བཅས་མངོན་ཤེས་ཡོད། །དགེ་སྡིག་གང་བྱས་ཐམས་ཅད་ཡིད་ལ་གསལ། །ཤི་བའི་སྡུག་བསྔལ་ཆེ་ཞིང་ངན་སོང་སྐྲག །གར་འགྲོ་ཅི་བྱེད་བསམ་བློ་མང་པོ་དྲན། །ས་གཅིག་
མི་ཆགས་སྟོང་གསུམ་ཀུན་ན་རྒྱུག །དེ་དུས་ད་ལྟ་བླ་མས་གསུངས་པ་ཡི། །རིགས་དྲུག་ཀུན་ཏུ་སྡུག་བསྔལ་ཆེ་ལུགས་དང་། །བདེ་ཆེན་ཞིང་གི་བདེ་སྐྱིད་ཡོན་ཏན་རྣམས། །དྲན་པར་གྱིས་ལ་མ་ཆགས་མ་ཞེན་པར། ཉེས་ཆེན་ས་བཙོན་ལྕགས་སྒྲོག་བཀྲོལ་བའམ། །བྱ་རྒྱལ་རྒོད་པོ་རྙི་ལས་ཐར་པ་བཞིན། །ཐེ་ཚོམ་མེད་པར་བདེ་བ་ཅན་དུ་སོང་། །བར་དོར་ཉི་མ་ཟླ་བ་མེད་པའི་ཕྱིར། །ནུབ་ཀྱི་ཕྱོགས་དེ་གར་ཡིན་མ་ཤེས་ན། །བདེ་བ་ཅན་དང་སངས་རྒྱས་འོད་དཔག་མེད། །ཡིད་ལ་དུང་དུང་བསྒོམ་ཞིང་འགྲོ་བར་བྱ། །འོད་དཔག་མེད་པ་བསྒོམ་པ་མ་གཏོགས་པ། །རྣམ་རྟོག་གཞན་དུ་མ་འཕྲོ་ངང་དུ་སོང་། །ང་ཡིས་བཤད་པའི་གདམས་ངག་འདི་རྣམས་ལ། །འབྲེལ་པ་བཞག་ན་ཐེ་ཚོམ་མེད་པར་ཕྱིན། །ཞིང་དེར་ཕྱིན་ནས་ཕྱིར་མི་ལྡོག་པར་གསུངས། །གལ་ཏེ་གདམས་ངག་འདི་དག་མ་བསྒོམ་ཞིང་། །ཞི་དྲག་ལ་སོགས་སྔགས་ཆོས་ཉམས་ལེན་མཁན། །བདེ་བ་ཅན་དུ་སྨོན་ལམ་མ་བཏབ་ན། །བདེ་བ་ཅན་དེ་ས་ཐག་རིང་བ་སྟེ། །འདི་ནས་ནུབ་ཀྱི་ཕྱོགས་རོལ་སྟེང་གི་ཆར། །འཇིག་རྟེན་ཁམས་ནི་གངྒཱའི་ཀླུང་གི་
ནི། །བྱེ་མ་སྙེད་ནི་འདས་པའི་ཕ་རོལ་ཡིན། །ས་ཐག་དེ་ཙམ་རིང་བས་འགྲོ་མི་འབྱོང་། །ཡི་དམ་ཆོས་སྐྱོང་བསུ་སྐྱེལ་ལམ་སྟོན་མེད། །འགྲོ་བའི་ཕྱོགས་ཀྱང་མི་ཤེས་མགོ་འཁོར་ན། །འཛམ་གླིང་འདི་ཡི་ལྷོ་ཕྱོགས་པོ་ཏ་ལར། །སྤྱན་རས་གཟིགས་དང་སྒྲོལ་མ་བཞུགས་པ་ཡིན། །འཛམ་གླིང་ནུབ་ཕྱོགས་ཨོ་རྒྱན་ཡུལ་གྱི་དབུས། །རྡོ་རྗེ་ཕག་མོ་མཁའ་འགྲོ་འབུམ་བཅས་བཞུགས། །རྒྱ་ནག་རི་བོ་རྩེ་ལྔར་འཇམ་དབྱངས་བཞུགས། །གངས་རི་ཏི་སེའི་རྩེ་མོར་བདེ་མཆོག་བཞུགས། །ཙཱ་རིའི་རྩེ་མོ་དག་པ་ཤེལ་རི་ན། །ལྷ་ཚོགས་ཉིས་སྟོང་བདུན་བརྒྱ་བཞུགས་པར་བཤད། །བསྙེན་སྒྲུབ་བྱས་ཤིང་དམ་ཚིག་གཙང་བ་ན། །དེ་དག་མཇལ་སྲིད་མཁའ་སྤྱོད་ཆུང་ངུ་ཡིན། །མཇལ་ནས་དབང་དང་གདམ་ངག་བྱིན་རླབས་ཞུས། །འོན་ཀྱང་དེ་དག་ཞིང་ཁམས་མ་ཡིན་ཞིང་། །གནས་རི་བཟང་པོ་ཡིན་ཕྱིར་དངོས་སུ་མེད། །ལས་ཅན་སྐྱེས་བུ་མིན་པས་མཇལ་ཤས་ཆུང་། །དེ་བས་ཕ་ཀི་ལྷོ་ནུབ་རྔ་ཡབ་གླིང་། །ཟངས་མདོག་དཔལ་གྱི་རི་བོའི་རྩེ་མོ་ན། །པདྨ་འོད་ཀྱི་ཕོ་བྲང་དངོས་སུ་ཡོད། །དེ་ན་ཨོ་རྒྱན་པདྨ་དངོས་སུ་བཞུགས། །སྣང་སྲིད་ས་ལེར་མཁྱེན་པ་
བྱུང་ན་གཟིགས། །དེ་ལ་དབང་དང་བྱིན་རླབས་གདམས་ངག་ཞུས། །ལས་འཕྲོ་རབ་ལ་འཇའ་ལུས་རིག་འཛིན་འགྱུར། །ཨོ་རྒྱན་ཉིད་ཀྱི་འཁོར་དུ་གཏོགས་པ་ཡི། །དཔའ་བོ་མཁའ་འགྲོའི་གྲལ་དུ་ཚུད་པ་ཡིན། །འབྲིང་ནི་སྲིན་པོའི་བུ་རུ་སྐྱེས་ནས་ཀྱང་། །ཨོ་རྒྱན་ཞལ་མཐོང་ཆོས་ཐོབ་རྗེས་སུ་འཛིན། །དེ་ནི་ལུས་ངན་ཡིན་ཕྱིར་སྐྱེ་སླ་ཕྱིར། །མི་འོང་བ་ཡི་དོགས་པ་མེད་པ་ཡིན། །ཐ་མ་ཨོ་རྒྱན་ཆེན་པོའི་དབང་བསྐུར་ནས། །གསང་སྔགས་ཉམས་སུ་ལེན་པའི་མི་ལུས་སུ། །སོང་གསུངས་བཀའ་གནང་སྲིད་དེ་ཐ་མ་ཡིན། །དེ་མིན་རང་གི་དད་པ་ཆེ་བ་ཡི། །བླ་མའི་དྲུང་དུ་རེ་བཅར་སོང་ན་ཡང་། །བླ་མ་དོན་ལ་སངས་རྒྱས་ཡིན་ན་ཡང་། །སྐུ་ལུས་ཤ་ཁྲག་ལུས་དེས་སྒྲིབ་པའི་ཕྱིར། །རྒྱུན་དུ་བར་དོའི་རྣམ་ཤེས་གཟིགས་པར་དཀའ། །ཕན་པའི་དམིགས་རིམ་བསྔོ་བ་སྨོན་ལམ་ཙམ། །མ་མཛད་ལམ་སྟོན་ཚིག་གཅིག་མ་གསུངས་སམ། །རེ་མཁོན་ཞུགས་ནས་དད་པ་ལོག་ཉེན་ཡོད། །དེ་བས་ཨོ་རྒྱན་དྲུང་དུ་འགྲོ་བར་དྲག །དེ་ལྟར་འདི་རུ་བཤད་པའི་ངོ་སྤྲོད་ཀུན། །དབང་ཐོབ་ལུང་ཐོབ་ཕྱག་རྫོགས་ཧ་གོ་ཡོད། །འོན་ཀྱང་ཚུལ་བཞིན་
ཉམས་སུ་མ་ལོན་པའི། །གང་ཟག་རབ་འབྲིང་ཐ་མ་ཡང་ཐ་ཡིས། །ཚུལ་བཞིན་ཉམས་སུ་ལེན་པ་འདིར་མ་གཏོགས། །བར་དོ་དང་པོ་དང་ནི་གཉིས་པ་ལ། །ཆོས་སྐུ་དང་ནི་ལོངས་སྐུར་སངས་རྒྱས་གསུངས། །ཆོས་སྒོར་མ་ཞུགས་སྐྱེ་བོ་ཕལ་པ་དང་། །སྡིག་ཆེན་རྣམས་ནི་འདི་རུ་མ་གཏོགས་ཏེ། །ཐུགས་དམ་ངོ་མི་ཤེས་པས་བཟུང་རྒྱུ་མེད། །ཆོས་མ་བྱས་པས་ཞིང་ཁམས་གདམས་རྒྱུ་མེད། །འཁོར་བ་མཐའ་མེད་སྐྱེ་འཆིའི་འཁོར་ལོར་འཁོར། །འདི་ནི་རང་དང་རང་གི་གྲྭ་སློབ་ཚོགས། །རབ་དང་འབྲིང་དང་ཐ་མ་ཡང་ཐ་ཡིས་། །རང་རང་ཉམས་ཚོད་དཔག་ལ་ཡིད་དུ་འཆང་། །འཆི་བ་ནམ་འོང་ཆ་མེད་གལ་ཆེ་ཡོད། །འདི་ཉིད་ཡིད་ལ་འཆང་བར་བྱེད་པ་དང་། །གདམས་ངག་བསྟན་པ་དེ་ཚོ་ཉམས་བླངས་ན། །གནད་གཅོད་སྲོག་ཆད་ཚོར་བས་འཚེ་ན་ཡང་། །དེ་བས་གཏན་དུ་བདེ་བའི་གནས་ཐོབ་སྟེ། །མི་ལུས་དོན་ལྡན་བྱ་བ་ཁམ་ཆེན་འགྲུབ། །དེ་ཕྱིར་བློ་སེམས་བདེ་བའི་ཞེ་གདེང་བསྐྱེད། །གདམས་ངག་དེ་རྣམས་ཅི་ནུས་ཉམས་སུ་ལོངས། །དེ་དོན་རང་གི་སྙིང་ལ་འཆང་བ་རྣམས། །གྲྭ་སློབ་རྣམས་ལ་ཕན་པར་བྱ་བའི་ཕྱིར། །རཱ་ག་ཨ་
སྱས་ཇི་ལྟར་སྨྲས་པའི་ཚིག །བུ་ཆེན་པདྨ་མཐར་ཕྱིན་ཞེས་པས་བྲིས། །ནོངས་པ་མེད་པས་བཤགས་བྱ་ཅི་ཡང་མེད། །དགེ་བས་འགྲོ་དོན་རྒྱ་ཆེན་འབྱུང་བར་ཤོག །སརྦ་མངྒ་ལཾ། །། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།