ཐིམ་རིམ་འཆི་བ་ཀྲིག་གེ་མའི་ཁྲིད།
ཀརྨ་ཨ་རཱ་གས་མཛད་པའི་ཐིམ་རིམ་འཆི་བ་ཀྲིག་གེ་མའི་ཁྲིད་བཞུགས་སོ། །དགེའོ། །
སྔགས་འཆང་རཱ་ག་ཨ་སྱ་ཡིས། །ཐིམ་རིམ་ལ་སོགས་བཤད་པ་ནི། །མང་པོ་ཤེས་ཀྱང་དགོས་པ་མེད། །ལག་ཏུ་ལོན་ངེས་འདི་ལྟ་སྟེ། །རང་ཉིད་འཆི་བར་ཐག་ཆོད་དུས། །རང་ལུས་ཡི་དམ་ལྷར་གསལ་བའི། །སྤྱི་བོར་བླ་མ་འོད་དཔག་མེད། །སངས་རྒྱས་ཀུན་འདུས་སྐུ་རུ་བསྒོམ། །ལུས་དང་ལོངས་སྤྱོད་ཉེ་དུ་དང་། །ཞིང་ཁང་ནོར་རྫས་ཅི་ཡོད་ཀུན། །མཎྜལ་གཅིག་ཏུ་དམིགས་བྱས་ཏེ། །ས་གཞི་སྤོས་བྱུགས་ལན་གསུམ་འབུལ། །འབུལ་བ་ཚར་བའི་ཡོན་བདག་ལྟར། །སུས་ཁྱེར་ཁྱེར་ལ་སུས་ཟ་ཟོ། །ཆགས་ཞེན་འཁྲི་བ་རྩད་ནས་
སྤངས། །ཁོ་བོའི་ལས་དོན་སྒོམ་སྒྲུབ་དེ། །དེ་ཉིད་ད་ལྟ་དགོས་རྒྱུ་ཡིན། །བསམ་སྟེ་ཅུང་ཟད་རིག་པ་བསྒྲིམ། །རྫོགས་སངས་རྒྱས་ནས་སྲིན་བུ་ཡན། །མི་འཆི་སྡོད་ས་གཅིག་ཀྱང་མེད། །ཁོ་བོའི་མི་ཚེ་ཆོས་ལ་བསྐྱལ། །རང་ལས་སྐྱིད་པ་མེད་སྙམ་པའི། །ང་རྒྱལ་ཆེན་པོ་བསྒོམ་དགོས་སོ། །འགྲོ་བ་སེམས་ཅན་དོན་གྱི་ཕྱིར། །འཆི་བ་ཆོས་སྐུར་སངས་རྒྱས་ནས། །བར་དོ་ལོངས་སྤྱོད་རྫོགས་སྐུར་བཞེངས། །སྐྱེ་བ་སྤྲུལ་སྐུའི་འགྲོ་དོན་བྱེད། །སྙམ་པའི་སེམས་སྐྱེད་ལན་གསུམ་བྱ། །དེ་ནས་རང་ཉིད་ལྷར་གསལ་བའི། །མ་དག་སྒོ་
བརྒྱད་ཧཱུྃཡིག་བཀག །ལུས་དབུས་དབུ་མ་སྦ་ལྕག་ཙམ། །ཕྱི་དཀར་ནང་དམར་སྟོང་སང་ངེ་། །ཡར་སྣེ་ཚངས་བུག་ཧད་པོ་ལ། །མར་སྣེ་ལྟེ་འོག་སྙུག་ཚིགས་བཞིན། །ལྟེ་བར་པདྨ་འདབ་བཞིའི་སྟེང་། །སྙིང་དབུས་རང་སེམས་ཐིག་ལེ་ནི། །དཀར་པོ་སྲན་མ་རློན་པ་ཙམ། །བཀྲག་མདངས་འཕར་འདར་ལིང་ལིང་བསྒོམ། །འཕོ་བའི་དུས་ལྟར་སྤྱི་བོ་རུ། །འོད་དཔག་མེད་པའི་ཐུགས་ཀར་བསྟིམ། །དེ་འདྲ་སྤྱིར་ཝིག་ལན་གསུམ་བྱ། །དེ་ནས་ཅི་ཡང་མི་སྒོམ་པར། །ཉམས་ལེན་སེམས་ངོའི་སྟེང་དུ་བཞག །ཐིམ་རིམ་དཀར་ལམ་ནག་ལམ་སོགས། །ངོ་ཤེས་ངོས་བཟུང་བྱེད་མི་དགོས། །གང་ཤར་དེ་ཡི་ངོ་བོ་སྐྱོང་། །ཕྱི་དབུགས་ཆད་པར་གྱུར་པའི་མཚམས། །གདུང་གཡོག་པ་ཡིས་གདུང་བཅས་གཟབ། །ཐུགས་དམ་མ་ཡེངས་བརྗོད་དུ་འཇུག །དེ་ཚེ་ནམ་མཁའ་ཡལ་ནས་ཀྱང་། །གཞི་ཡི་འོད་གསལ་ཞེས་བྱ་བ། །སྤྲིན་མེད་ནམ་མཁའ་འདྲ་བ་ཟེར། །དོན་ལ་ངོ་བོ་རྗེན་པ་དེ། །ཚུར་ལ་ལྷང་ངེ་འཆར་ནས་འོང་། །དེ་དུས་དེ་ཉིད་ངོས་བཟུང་ནས། །དེ་ཡི་ངང་དུ་འདུག་པ་དེ། །ཐུགས་དམ་བཞུགས་ཞེས་མིང་དུ་བཏགས། །ཡུན་ནི་ཇི་
ཙམ་འདུག་པ་ནི། །འཆི་ཁའི་སེམས་ནི་སྟོབས་ཆེ་བས། །དམ་བཅའ་གང་བྱས་སྟེང་དུ་འགྲོ། །དེ་ཕྱིར་འདི་ཙམ་འདུག་སྙམ་པའི། །འཆི་ཁ་དམ་བཅའ་དྲག་པོ་བྱ། །དང་པོ་འཕོ་བ་བསྒོམ་པ་ནི། །གལ་ཏེ་ཐུགས་དམ་མ་ཟིན་ན། །རྐྱེན་གྱིས་ཐུགས་དམ་འདྲོགས་ནའང་། །གཞན་དུ་མི་འཕོ་སྤྱི་བོར་འཕོ། །རང་ལུས་ཡི་དམ་བསྒོམ་པ་དེ། །ཐུགས་དམ་བརྟེན་ཞིང་བར་ཆད་མེད། །དམ་བཅའ་གང་བྱས་སྟེང་དུ་འགྲོ། །རང་དང་འདྲ་བའི་མཆེད་གྲོགས་ཀྱིས། །ཐུགས་དམ་གསལ་འདེབས་བྱས་པ་ཡིས། །ཐུགས་དམ་བརྟན་པོ་ཟིན་པ་དང་། །དམ་བཅའ་ཐོག་ཏུ་འགྲོ་བར་མཐོང་། །རྟེན་འབྱོན་འདས་རྟགས་བཟང་བ་ཡིན། །ལན་གྲང་དུ་མར་མྱོང་བས་འགྲུབ། །འཕོ་བ་ཟུང་འཇུག་ཐུགས་དམ་ནི། །མཉམ་མེད་དྭགས་པོའི་གསུངས་ལས་བྱུང་། །དེ་ནས་བར་དོ་བགྲོད་ལུགས་ལའང། །མཐོ་དམན་ཉི་ཤུ་རྩ་གཅིག་འབྱུང་། །མང་དུ་བརྗོད་ནས་དབྱེ་བ་ལ། །ཀུན་ཏུ་བསྡུས་ན་དོན་ཡང་ཚང་། །ཐ་མའི་ཐ་མ་ཡང་ཐའི་ལུགས། །སུས་ཀྱང་ཉམས་སུ་ལོན་ངེས་ཡིན། །ཐུགས་དམ་ཟིན་རུང་མ་ཟིན་རུང་། །འཕོ་བ་ཐེབ་རུང་མ་
ཐེབ་རུང་། །བར་དོ་ཞི་ཁྲོའི་ལྷ་ཚོགས་རྣམས། །ངོས་ཟིན་རུང་ལ་མ་ཟིན་རུང་། །ཤི་ནས་ཉིན་བདུན་བདུན་གཉིས་དང་། །བདུན་གསུམ་ཡོལ་ལ་ཁད་ཀྱི་སྐབས། །རང་ཉིད་ཤི་བར་ཐག་ཆོད་ཡོངས། །མངོན་ཤེས་རྫུ་འཕྲུལ་ཐོགས་པ་མེད། །གར་འགྲོ་རང་དབང་ཆེ་བ་ཡོད། །ཡུལ་དང་ཉེ་དུ་མཆེད་གྲོགས་སོགས། །དེ་དག་རྣམས་ལ་སེམས་ཆགས་ནས། །ས་ཕྱོགས་འདི་རུ་མི་ལུས་ཤིག །ལེན་ནས་དམ་ཆོས་གཤའ་མ་བྱེད། །མྱུར་དུ་ལུས་ཤིག་མ་ལོན་ན། །གཤིན་རྗེའི་ཕོ་ཉ་ཡོངས་ནས་འཁྲིད། །དགེ་སྡིག་གཉིས་པོ་བགོས་བྱུང་ན། །ལེགས་པོ་མི་ཡོངས་སྙམ་ནས་སྐག །དེ་དུས་འདི་ལྟར་དྲན་པར་གྱིས། །འཁོར་བ་ཐོག་མ་མེད་པ་ནས། །འཁོར་བར་འཁྱམས་འདི་གཉུག་རེ་རིང་། །སངས་རྒྱས་དེ་སྙེད་བསྟན་པ་ལ། །བདག་ནི་མ་ལ་རེ་ནས་ངས། །ད་རུང་འཁོར་བ་མཐའ་མེད་དུ། །སྐྱེ་འཆི་གྲངས་མེད་ཡི་རེ་མུག །ད་ལྟ་དུས་ངན་སྙིགས་མའི་མཐའ། །ཚེ་ཐུང་ནད་མང་བར་ཆད་རྒོད། །མི་ལུས་བླངས་ནས་རང་སྡུག་ཉོས། །མངོན་དགའ་ལ་སོགས་དག་པའི་ཞིང་། །ས་ཐོབ་མ་གཏོགས་སྐྱེ་མི་སྲིད། །མི་རྩིབ་ས་ལ་སྙབ་ཞན་
འདྲ། །དགའ་ལྡན་ཟངས་མདོག་དཔལ་རི་སོགས། །སྐྱེས་ཀྱང་མི་ལྷུང་ངེས་པ་མེད། །པོ་ཏ་ལ་ནི་གནས་རི་ཡིན། །སོགས་ཀྱང་རང་རེ་ལས་མ་དག །སྤྱན་རས་གཟིགས་ནི་མཇལ་ཤས་ཆུང་། །འོད་དཔག་མེད་པའི་སྨོན་ལམ་མཐུས། །སྐྱེ་གསུངས་བདེ་སྐྱིད་ཡོན་ཏན་ལྡན། །སྐྱེས་ནས་ཕྱིར་མི་ལྡོག་པའི་ཞིང་། །བདེ་བ་ཅན་དུ་འགྲོ་བར་གྱིས། །བར་དོར་ཉི་ཟླ་མེད་པའི་ཕྱིར། །ནུབ་ཕྱོགས་གང་ཡིན་མ་ཤེས་ན། །འོད་དཔག་མེད་ལ་རྩེ་གཅིག་གིས། །དད་གུས་རྩེ་གཅིག་བྱེད་ཅིང་སོང་། །འཇིག་རྟེན་ཁམས་ནི་དཔག་མེད་པའི། །འདས་པའི་ཕ་རོལ་ཞིང་ཡིན་ཡང་། །འགྲོ་ལ་དཀའ་ཚེགས་ཡོད་པ་མིན། །མགྱོགས་བུལ་འགྱུ་བ་འདི་ཉིད་ཡིན། །ཐག་རིང་མི་སླེབ་བསམ་མི་དགོས། །དེ་ལ་ཐེ་ཚོམ་བྱེད་མི་རུང་། །སྐད་ཅིག་པདྨའི་སྦུབ་ལ་སྐྱེས། །སྐྱེ་བའི་སྡུག་བསྔལ་དེ་ལ་མེད། །སྐྱེའམ་མི་སྐྱེ་ཐེ་ཚོམ་ན། །ཡུན་རིང་པདྨའི་ཁ་མི་འབྱེ། །སངས་རྒྱས་ཞལ་མཇལ་ཕྱི་སྐྱོན་ཡོད། །དེ་ཕྱིར་རང་རིག་ནམ་འཆིའི་ཚེ། །དེ་རུ་འགྲོ་བའི་བློ་ཐག་ཆོད། །དེ་རུ་སྐྱེས་ནས་ཅི་དགའ་མང་། །གསེར་མདོག་མཚན་དང་དཔེ་བྱད་
ལྡན་། །མངོན་ཤེས་རྫུ་འཕྲུལ་ཐོགས་པ་མེད། །མངོན་དགའ་ལ་སོགས་ཞིང་ཁམས་ཀུན། །བགྲོད་ཅིང་ཆོས་ཞུ་དེ་ཉིད་འཁོར། །འབྲེལ་ཐོགས་ཀུན་ཀྱང་དེ་བཞིན་འདྲེན། ། བསྐལ་པ་བྱེ་བ་དུང་ཕྱུར་ལ། །ན་རྒྱུ་རྒས་རྒྱུ་འཆི་རྒྱུ་མེད། །ཟས་གོས་ལོངས་སྤྱོད་གནས་མལ་སོགས། །ཅི་འདོད་ཡིད་ལ་བསམ་པས་འགྲུབ། །ཅེས་པ་རཱ་ག་ཨ་སྱས་སྦྱར། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།