དགེ་སློང་ཀརྨ་རིན་ཆེན་ལ་གདམས་པའི་ཕྱག་རྫོགས་ཟུང་འཇུག་གི་ཁྲིད་ཡིག
མཁས་གྲུབ་ཨ་རཱ་གས་དགེ་སློང་ཀརྨ་རིན་ཆེན་ལ་གདམས་པའི་ཕྱག་རྫོགས་ཟུང་འཇུག་གི་ཁྲིད་ཡིག་བཞུགས་པའི་དབུ་ཕྱོགས་དགེ་ལེགས་འཕེལ། །
ན་མོ་མ་ཧཱ་མུ་དྲ་ཡེ། དགེ་སློང་ཀརྨ་རིན་ཆེན་གྱིས། །རྟོགས་འབུལ་བྱས་པའི་ཚིག་ལན་ཞུ། །བན་རྒན་རཱ་ག་ཨ་སྱ་བདག །དབང་པོ་རབ་ཏུ་མ་གྱུར་པས། །ཉམས་རྟོགས་མཐོན་པོ་མ་མཆིས་ཀྱང་། །ཡུན་རིང་བསྒོམས་པའི་མྱོང་བ་ཡོད། །རྩེ་གཅིག་རིབ་ཀྱི་བདེ་ཉམས་སྐབས། །ཡེངས་མེད་འཁོར་ཡུག་འབྱུང་མོད་ཀྱང་། །རྟག་མི་ཐུབ་སྟེ་ཉམས་ཀྱིས་གཡོས། །སྤྲོས་བྲལ་རྟོགས་ནས་བརྗེད་སྐབས་མང་། །ནམ་དྲན་ཉམས་ལེན་དེ་ཡི་ངང་། །བརྗོད་ཚེ་ཐ་མལ་འཁྲུལ་པར་འཆོར། །དེ་ཡང་མཉམ་རྗེས་མ་འདྲེས་ཟེར། །མཉམ་པར་
བཞག་པའི་སྐབས་སུ་ནི། །བྱིས་པས་ལྷ་ཁང་མཐོང་བ་བཞིན། །གཟུགས་ཀྱི་ལེགས་ཉེས་འཛིན་པ་མེད། །དེ་བཞིན་རྣ་བའི་ཡུལ་གྱི་སྒྲ། །སྙན་དང་མི་སྙན་འཛིན་པ་མེད། །རང་སེམས་ཉམས་ལེན་ངང་ན་གནས། །ཉམས་ལེན་ངང་ལ་གནས་པའི་ཚེ། །འདི་བསྒོམ་གཏད་སོ་སྤུ་ཙམ་མེད། །བལྟ་རྒྱུ་ལྟ་མི་གཅིག་ཏུ་འདྲེས། །ས་ལེ་སིང་ངེ་ཡེ་རེ་བ། །ཁ་རོག་རང་གར་འདུག་པ་འདྲ། །བསྒོམ་ཡིན་སྙམ་པའི་ངེས་པ་མེད། །དེ་ནི་སྤྲོས་བྲལ་ངོ་མཐོང་ཡིན། །གསུང་རབ་རྣམས་ལས་བྱུང་བ་ཡིན། །གང་ཟག་བདག་མེད་རྟོགས་ཞེས་བྱ། །ང་དང་
བདག་དང་སེམས་ཉིད་སོགས། །གཅིག་ཀྱང་མེད་པར་མཐོང་ཕྱིར་རོ། །འདི་ཉིད་སྟོང་ཉིད་ཕྱེད་པོ་སྟེ། །ནང་གི་སེམས་ཉིད་དོན་རྟོགས་ཀྱང་། །ཕྱི་ཡི་སྣང་བའི་དོན་མ་རྟོགས་། །དེ་ལ་བོགས་ཤིག་འདོན་དགོས་ན། །ཕྱི་ཡི་ས་རྡོ་རི་བྲག་དང་། །སེམས་ཉིད་བསྲེས་ལ་ངོ་བོ་ལྟ། །འདི་ཕན་ས་རྡོ་འདི་ཚུན་ནི། །རང་སེམས་ཡིན་ཞེས་ཕྱེ་རྒྱུ་མེད། །དབྱེར་མེད་འདྲེས་ཏེ་ཉམས་ལེན་ངང་། །དཔེར་ན་མཚོ་ནང་གཟའ་སྐར་བཞིན། །རྣམ་པ་སོ་སོར་གསལ་ན་ཡང་། །ངོ་བོ་སྟོང་པ་ཉིད་དུ་རྟོགས། །དེ་ནས་བསྲེ་ཡང་མི་དགོས་པར། །རང་བཞིན་ཤུགས་ཀྱིས་དེ་ལྟར་འཆར། །དེ་བཞིན་ཉམས་ལེན་ངང་བསྲེས་པས། །ནམ་མཁས་གར་ཁྱས་སེམས་ཀྱིས་ཁྱབ། །སེམས་ཀྱིས་གར་ཁྱབ་ཆོས་ཀྱི་སྐུ། །ཉམས་ལེན་རྗེན་པ་དེ་ཡིས་ཁྱབ། །རང་བཞིན་ཤུགས་ཀྱིས་དེ་ཤར་ནས། །ཉམས་ཀྱི་རོ་གཅིག་མིང་དུ་བཏགས། །རྟོགས་པའི་རོ་གཅིག་ཧ་ཐག་རིང་། །དེ་བཞིན་རང་གི་སེམས་ཉིད་དང་། །བླ་མའི་ཐུགས་རྒྱུད་གཅིག་ཏུ་བསྲེས། །ངོ་བོ་སྐྱོང་བས་དབྱེར་མེད་འདྲེས། །རྒྱ་གར་ཆུ་དང་བོད་ཀྱི་ཆུ། །ལུང་པའི་དབང་གིས་ཐ་དད་ཀྱང་། །ཆུ་
ཡིན་པ་ལ་ཁྱད་པར་མེད། །དེ་བཞིན་བླ་མའི་ཐུགས་རྒྱུད་དང་། །རང་གི་སེམས་ཉིད་ཁྱད་མེད་དེ། །ངོ་བོ་སྟོང་པ་ཡིན་པར་གཅིག །རང་བཞིན་གསལ་བ་ཡིན་པར་གཅིག །ཐུགས་རྗེ་འགགས་མེད་ཡིན་པར་གཅིག །དེ་ལ་ཐུགས་ཡིད་གཅིག་འདྲེས་པ། །བླ་མ་ཆོས་སྐུའི་རྣལ་འབྱོར་ཟེར། །དེ་བཞིན་དམྱལ་བ་ཡི་དྭགས་སོགས། །སེམས་ཅན་ཀུན་དང་སེམས་ཉིད་བསྲེས། །དབྱེར་མེད་གཅིག་ཏུ་རྟོགས་གྱུར་ན། །ལྟ་བ་འཁོར་འདས་དབྱེར་མེད་ཡིན། །ད་རུང་བརྗེད་སྐབས་མང་བ་དང་། །དེ་ཚེ་བརྗེད་སྙམ་འགྱོད་པ་སྐྱེས། །མཉམ་རྗེས་མ་འདྲེས་པ་ཡི་སྐྱོན། །ཡང་ཡང་དྲན་པ་གསལ་འདེབས་བྱ། །ཡེངས་བ་དེ་ལ་ཕྱི་ལྟས་བྱ། །ཡེངས་བའི་ངོ་བོ་དེ་ལ་བལྟ། །དེ་ཡང་སྟོང་པ་སིང་ངེ་འགྲོ། །དེ་ཡི་ཅུང་ཞིག་ཕན་པར་འབྱུང་། །ཡེངས་བའི་ངོ་བོ་ཡིད་ལ་བཀོད། །དེ་ཡི་ངོ་བོར་ཧྲིག་གེར་ལྟ། །དེ་ལ་ཁྱད་པར་ཅི་འདུག་བརྟག །མི་རྒན་མདུན་གྱི་གསེར་དང་ནི། །བསམ་མེད་བྱིས་པའི་མདུན་གྱི་གསེར། །རྒྱུ་ངོ་ཤེས་དང་མི་ཤེས་ཁྱད། །གསེར་ཡིན་པ་ལ་ཁྱད་པར་མེད། །དེ་བཞིན་ཡེངས་དང་མ་ཡེངས་སེམས། །ཁྱད་
མེད་ངོ་བོ་ཆོས་སྐུ་རང་། །གོ་བ་ཙམ་ཞིག་མ་ཡིན་པར། །སྙིང་ནས་དེ་དོན་རྟོགས་གྱུར་ན། །དེ་བཞིན་ཡོངས་སུ་ཤེས་པ་ཟེར། །མཉམ་རྗེས་འདྲེས་པའི་གྲལ་དུ་བརྩི། །དེ་དོན་དྭགས་པོ་ལྷ་རྗེ་ཡིས། །རྒྱུན་དུ་མ་ཡེངས་ཏུ་རེ་བ། །དྲན་པ་བརྟེན་ཡང་མི་དགོས་ཏེ། །ཡེངས་དང་མ་ཡེངས་ཁྱད་པར་མེད། །ཅུང་ཟད་ཡེངས་ཀྱང་མི་ཏོ་གསུངས། །འོན་ཀྱང་ཡང་ཡང་དྲན་པ་ཡིས། །གསལ་འདེབས་བྱ་བ་ཟབ་བོ་གསུངས། །དྲན་རྫི་བརྟེན་ནི་མི་དགོས་པར། །རྒྱུན་དུ་ངོ་བོ་འགྱུར་མེད་པ། །ཉམས་ལེན་ངང་དུ་འགྲོ་བ་དེ་། །བསྒོམ་མེད་ཨམ་དེ་ཡིན་ཚོད་རེད། །དེ་ཡི་ཉམས་མྱོང་ང་ལ་མེད། །བསྒོམ་ཡོད་བསྒོམ་མེད་གཉིས་ཀྱི་ཁྱད། །དྲན་རྫི་དགོས་དང་མི་དགོས་ཡིན། །བསྒོམ་བྱ་སྒོམ་བྱེད་མེད་པ་དང་། ཉིན་མཚན་ཁོར་ཡུག་སོང་བ་ན། །དྲན་རྫི་དགོས་ན་བསྒོམ་ཡོད་ཡིན། །དྲན་རྫི་ཅི་ཡང་མི་དགོས་པར། །རྒྱུན་དུ་ཉམས་ལེན་ངང་ལ་གནས། །བསྒོམ་མེད་མིང་དུ་བཏགས་ཚོད་རེད། །གསུང་རབ་རྣམས་དང་སངས་རྒྱས་ཆོས། །མ་འདྲེས་བཅོ་བརྒྱད་གསུང་པའི་སྒྲ། །ཐུགས་ནི་མཉམ་པར་མ་བཞག་པར། །མི་མངའ་གསུངས་
པ་དེ་སྐད་ལགས། །དེ་འདྲ་འདོད་པ་ཧཾ་པ་ཆེ། །ཉམས་ལེན་བཟང་པོ་ཡོད་ན་ཡང་། །སེམས་བསྐྱེད་སྙིང་རྗེ་མེད་པ་ན། །ཐེག་དམན་ཉན་ཐོས་ལམ་དུ་གོལ། །མི་རྟོག་འགྲོ་ལ་སྙིང་རྗེ་བསྐྱེད། །སེམས་ཅན་ཐམས་ཅད་རང་གི་སེམས། །སེམས་ཉིད་ཡེ་ནས་སྟོང་པ་ཉིད། །དངོས་པོར་གྲུབ་པའི་སེམས་ཅན་རྣམས། །འགྲོ་དྲུག་གཅིག་ཀྱང་མེད་པར་མཐོང་། །དེ་ལ་འཁོར་བ་དོང་སྤྲུགས་ཟེར། །སྙིང་རྗེ་བསྒོམ་ཡུལ་མ་མཆིས་ཀྱང་། །དེ་ལྟར་མ་རྟོག་སེམས་ཅན་ལ། །ཤུགས་འབྱུང་སྙིང་རྗེ་དྲག་པོ་སྐྱེ། །དམིགས་པ་མེད་པའི་སྙིང་རྗེ་ཟེར། །དེ་ལ་ངེས་ཤེས་ཐོབ་པ་ན། །འགྲོ་དོན་ཤུགས་ལ་འབྱུང་བ་ཡིན། །མདོ་ལུགས་ཆོས་ཀྱི་སྙིང་པོ་ཡིན། །རང་ལུས་གདོད་ནས་ཡི་དམ་ལྷ། །དམ་ཚིག་སེམས་དཔའི་ངོ་བོ་ཡིན། །སེམས་ཉིད་གདོད་ནས་ཡི་དམ་ལྷ། །ཡེ་ཤེས་སེམས་དཔའི་ངོ་བོ་ཡིན། །སྤྱན་འདྲེན་ལ་སོགས་མི་དགོས་པར། །རང་སེམས་ལྷ་རུ་ཤེས་པ་དེ། །གསང་སྔགས་ནང་གི་རྒྱུད་ཅེས་བྱ། །རླུང་ནི་ནང་དུ་རྒྱུ་བ་ཨོ། །ཁོང་དུ་གནས་པ་ཡི་གེ་ཨཱ། །ཕྱི་རུ་རྒྱུ་བ་ཡི་གེ་ཧཱུྃ། །དེ་ཉིད་ཡིན་ལ་ཤེས་པར་
བྱ། །ཞག་གཅིག་ཉི་ཁྲི་ཆིག་སྟོང་དང་། །དྲུག་བརྒྱའི་བསྙེན་པ་བྱས་པར་འགྲོ། །ཕྲེང་བ་བྲལ་བའི་བཟླས་པ་ཟེར། །གསར་རྙིང་རྒྱུད་སྡེ་ཀུན་ནས་གསུངས། །ཡི་དམ་ལྷ་རུ་མ་བསྒོམས་ན། །སྟོང་ཉིད་ཉམས་ལེན་བཟང་ན་ཡང་། །གྲངས་མེད་གསུམ་དུ་འཚང་མི་རྒྱུ། །དང་པོ་མཁའ་ལ་འཇའ་ཤར་ལྟར། །ཉམས་ལེན་རྩི་དང་མ་བྲལ་བར། །ཡི་དམ་ལྷ་རུ་གསལ་བར་བསྒོམ། །མེ་ལོང་ནང་གི་གཟུགས་བརྙན་ལྟར། །རྒྱན་དང་ཆ་ལུགས་གསལ་བར་བསྒོམ། །ཆུ་ནང་ཤར་བའི་ཟླ་བ་བཞིན། །སྣང་ལ་རང་བཞིན་མེད་པར་བསྒོམ། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པ་གཉིས། །རིམ་གཉིས་མཉམ་པར་གང་གནས་པ། །འདི་ནི་སངས་རྒྱས་བསྟན་པ་ཡིན། །དེ་སྐད་རྡོ་རྗེ་འཆང་གིས་གསུངས། །བསྐྱེད་རྫོགས་ཟུང་དུ་འཇུག་པ་དེ། །གསང་སྔགས་ཉམས་ལེན་རྩ་བ་ཡིན། །ནངས་ནུབ་ཉི་མའི་ཟེར་གཉིས་ལ། །འཇའ་འོད་ཐིག་ལེ་ཐིག་ཕྲན་ལྟོ། །མིག་གིས་འཇའ་འོད་མཐོང་བ་དང་། །ཉམས་ལེན་སེམས་ཉིད་ངོ་བོ་བསྲེ། །ཀུན་ཏུ་བཟང་པོས་གསུངས་པ་ཡི། །འབུམ་ཕྲག་དྲུག་ཅུ་རྩ་བཞིའི་རྒྱུད། །ཀུན་གྱི་
ཉམས་ལེན་དེ་ལ་འདུས། །ཀརྨ་པཀྵིའི་ཞལ་ནས་ཀྱང་། །ཕྱག་ཆེན་དང་ནི་རྫོགས་ཆེན་གཉིས། །ཚིག་ལ་ཁྱད་པར་ཡོད་ན་ཡང་། །དོན་ལ་ཁྱད་པར་མེད་ཅེས་གསུངས། །ཀརྨ་པཀྴི་རང་བྱུང་བ། །གཡུང་སྟོན་རོལ་པའི་རྡོ་རྗེ་རྣམས། །ཕྱག་རྫོགས་ཟུང་འཇུག་དགོངས་པ་གཏད། །དེ་ཕྱིར་ཀརྨ་རིན་ཆེན་ཁྱོད། །ཕྱག་རྫོགས་ཟུང་འཇུག་ཉམས་ལེན་མཛོད། །གསར་མའི་བླ་མ་ཕལ་ཆེར་གྱིས། །རྫོགས་ཆེན་ཐེ་ཚོམ་ཡིན་གསུངས་ཀྱང་། །ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ་། །འོད་ཆེན་རྣམ་པ་སྣང་བར་བྱེད། །གསུངས་པའི་དོན་དེ་ཡིན་ཞེས་བྱ། །གེགས་སེལ་ཀུན་གྱི་གཙོ་བོ་ཡིན། །ནམ་འཆི་ཆ་མེད་ཡང་ཡང་བསམ། །བོགས་འདོན་ཀུན་གྱིརྩ་བ་ཡིན། །གདུང་ཤུགས་དྲག་པོས་གསོལ་བ་གདབ། །འབྲེལ་ཐོགས་བླ་མ་མང་ན་ཡང་། །ཡབ་སྲས་རྩ་བའི་བླ་མར་བཟུང་། །དེ་ནས་པཀྴི་དུས་མཁྱེན་དང་། །དྭགས་པོ་ལ་སོགས་ཞལ་ཆེམས་མཇལ། །ཁྲིད་ཀྱི་རྒྱུན་ལུང་ཐོབ་ཕྱིན་ནས། །གང་ལ་དད་པའི་བཀའ་བརྒྱུད་ཀྱི། །བླ་མ་སྤྱི་བོར་བསྒོམས་ནས་ཀྱང་། །གསོལ་བ་ཐོབ་དང་ཕྱག་ཆེན་
གྱི། །རྟོགས་པ་སྐྱེ་བར་འགྱུར་རོ་གསུངས། །མི་བསྐྱོད་རྡོ་རྗེའི་ཞལ་ནས་ཀྱང་། །གསོལ་བ་ཁྱི་བཏབ་ཕག་བཏབ་ཀྱང་། །སངས་རྒྱས་ཐོབ་པར་མི་འགྱུར་བས། །བླ་མ་མིན་པར་བླ་མ་རུ། །བཅོས་མིན་བླ་མ་མ་ཡིན་པར། །བླ་མ་ཡིན་པ་བླ་མ་རུ། །བྱོན་པ་སངས་རྒྱས་མཉན་པ་འདྲ་ཞིག་དགོས། །གསུངས་ཕྱིར་ང་འདྲའི་བླ་མ་ལ། །དབང་ལུང་ཁྲིད་སོགས་འབྲེལ་ཆེ་བའི། །རྨོངས་ཞེན་བྱས་ནས་གསོལ་བཏབ་ཀྱང་། །བརྐོས་ཕོར་རི་མོ་མེད་པ་ལ། །འབི་འབི་སཱཙྪ་མི་དོད་ལྟར། །ཕྱག་ཆེན་དངོས་ནི་མི་རྟོགས་ཞེས་། །མཉམ་མེད་དྭགས་པོ་ལྷ་རྗེས་གསུངས། །རྩེ་གཅིག་རབ་འབྲིང་ཐ་མ་དང་། །ཉམས་ལེན་སྐྱོང་བདེ་ཡོད་སོང་ངེ་། །སྐྱེ་སྟེ་དེ་ནི་ཕྱག་ཆེན་མིན། །དེ་ཕྱིར་ཡབ་སྲས་ལྟ་བུ་ཞིག །རྫོགས་པའི་སངས་རྒྱས་ཡིན་པ་ལ། །ཡིན་པར་ཡིན་ཤེས་གསོལ་བཏབ་ན། །ཕྱག་རྒྱ་ཆེན་པོའི་རྟོགས་པ་འཆར། །དེ་ལ་གེགས་དང་གོལ་ས་མེད། །ཆོས་ཀྱི་དབང་ཕྱུག་གསུང་ལས་ཀྱང་། །རྒྱ་གར་ལུགས་དང་རྒྱ་ནག་ལུགས། །ཆོས་ལུགས་མང་པོ་ཤེས་དགོས་ན། །ཉམས་སུ་ལེན་བྱ་རང་ལུགས་ལས། །གཞན་ལུགས་བསྲེས་པ་
མང་བྱེད་ན། །བླ་མ་བརྒྱུད་པ་གཞན་གྱིས་རུལ། །རླུང་འཚུབ་མང་པོའི་དཔལ་འབྱོར་ཅན། །འབྱུང་བར་དོགས་པ་ཁོ་བོས་སེམས། །གསུང་པ་འདི་ལ་གནད་འགགས་མང་། །དེ་དོན་ཞིབ་པར་བརྗོད་མི་རུང་། །དོན་ལ་ཆོས་འབྲེལ་ལ་སོགས་པ། །མཐོ་དམའ་ཕྱོགས་རིས་མེད་པར་ཞུ། །བུང་བ་ལྟ་བུའི་སྤྱོད་པ་ཡིན། །རང་ཉིད་དབང་ལུང་ཆོས་ཀྱིས་ཕྱུག །དེ་དོན་ཇོ་བོ་ཨ་ཏི་ཤ །ཐང་སྟོང་རྒྱལ་པོའི་རྣམ་ཐར་ལྟོས། །གསོལ་བ་འདེབས་ཡུལ་མ་ནོར་དགོས། །ནོར་ན་ལོག་པའི་ལམ་དུ་འགྲོ། ། ཉམས་རྟོགས་ལེགས་པོ་སྐྱེས་ན་ཡང་། །ཕྱག་ཆེན་དངོས་ནི་རྟོགས་མི་སྲིད། །སྙིང་གཏམ་ཡིན་ནོ་ཡིད་ལ་འཆོངས། །བཀའ་མ་གཏེར་མ་ཐམས་ཅད་ལ། །གཟིགས་རྒྱ་ཆེ་ན་དེ་དོན་གོ །དེ་མིན་སྨྲས་ན་ཟུར་ཟར་གོ །ཟུར་ཟ་མ་ཡིན་དོན་གཏམ་ཡིན། །ཨོ་རྒྱན་གསུང་ལ་དཔང་པོ་ཡིན། །ཆོས་སྒོར་ཞུགས་པའི་དོན་གོ་ཡིན། །འཆི་བ་གློ་བུར་བྱུང་ཙ་ན། །འདི་བྱ་འདི་བྱེད་ཀྲིག་གེ་བ། །ད་ལྟའི་དུས་ནས་ཡིད་ལ་ཞོག །སྐམ་པོའི་ལག་སྟབས་ཆུ་ནང་དཔེ། །ཐིམ་རིམ་ལ་སོགས་བཤད་པ་ན། །མང་པོ་ཤེས་ཀྱང་དགོས་པ་
མེད། །ལག་ཏུ་ལོན་ངེས་འདི་ལྟ་སྟེ། །རང་ཉིད་ཡི་དམ་གསལ་བ་ཡི། །སྤྱི་བོར་བླ་མ་འོད་དཔག་མེད། །སངས་རྒྱས་ཀུན་འདུས་སྐུ་རུ་བསྒོམ། །ལུས་དང་ལོངས་སྤྱོད་ཉེ་དུ་དང་། །ཞིང་ཁང་ནོར་རྫ་ས་ཅི་ཡོད་ཀུན། །མཎྜལ་གཅིག་ཏུ་དམིགས་པ་བྱ། །ས་གཞི་སྤོས་ཆུས་ལན་གསུམ་འབུལ། །འབུལ་བ་ཚར་བའི་ཡོན་བདག་ལྟར། །སུས་ཁྱེར་ཁྱེར་ལ་སུ་ཟ་ཟོ། །ཆགས་ཞེན་འཁྲི་བ་རྩད་ནས་སྤངས། །ཁོ་བོ་མི་ཚེར་ཆོས་བྱས་པའི། །ལ་དོན་ད་ལྟ་དགོས་རྒྱུ་ཡིན། །བསམ་སྟེ་ཅུང་ཟད་རིག་པ་བསྒྲིམ། །རྫོགས་སངས་རྒྱས་དང་སྲིན་བུ་ཡན། །མི་འཆི་སྡོད་ས་གཅིག་ཀྱང་མེད། །ཁོ་བོས་མི་ཚེར་ཆོས་ལ་བསྐྱལ། །ང་བས་སྐྱིད་པ་མེད་པ་ཡི། །ང་རྒྱལ་ཆེན་པོ་བསྒོམ་དགོས་གསུངས། །འགྲོ་བ་སེམས་ཅན་དོན་གྱི་ཕྱིར། །འཆི་བ་ཆོས་སྐུར་སངས་རྒྱས་ནས། །བར་དོར་ལོངས་སྤྱོད་རྫོགས་སྐུར་བཞེངས། །སྐྱེ་བ་སྤྲུལ་སྐུས་འགྲོ་དོན་བྱེད། །སྙམ་པའི་སེམས་བསྐྱེད་ལན་གསུམ་བྱ། །དེ་ནས་རང་ཉིད་ལྷར་གསལ་བའི། །མ་དག་སྒོ་བརྒྱད་ཧྲི་ཡིག་བཀག །ལུས་དབུས་དབུ་མ་སྦ་ལྕག་ཙམ། །སྙིང་དབུས་རང་སེམས་ཐིག་ལེ་ནི།
འཕོ་བའི་དུས་སུ་སྤྱི་བོར་འཕོ། །འོད་དཔག་མེད་ཀྱི་ཐུགས་ཀར་བསྟིམ། །དེ་འདྲ་སྤར་ཝིག་ལན་མང་བྱ། །དེ་ནས་ཅི་ཡང་མི་བསྒོམ་པར། །ཉམས་ལེན་ངོ་བོའི་སྟེང་དུ་བཞག །ཐིམ་རིམ་དཀར་ལམ་ནག་ལམ་སོགས། །ངོ་ཤེས་ངོས་བཟུང་བྱེད་མི་དགོས། །གང་ཤར་དེ་ཡི་ངོ་བོ་སྐྱོངས། །ཕྱི་དབུག་ཆད་པར་གྱུར་པའི་ཚེ། །གདུང་གཡོག་པ་ཡི་གདུང་ཆེས་གཟབ། །ཐུགས་དམ་མ་ཡེངས་བརྗོད་དུ་འཇུག །དེ་ཚེ་ནག་ལམ་ཡལ་ནས་ཀྱང་། །གཞི་ཡི་འོད་གསལ་ཞེས་བྱ་བ། །སྤྲིན་མེད་ནམ་མཁའ་འདྲ་བར་ཟེར། །དེ་ལ་ངོ་བོ་རྗེན་པ་དེ། །ཚུར་ལ་ལྷང་ངེར་འཆར་ནས་འོང་། །དེ་དུས་དེ་ཉིད་ངོས་བཟུང་ལ། །དེ་ཡི་ངང་དུ་འཇུག་པ་དེ། །ཐུགས་དམ་བཞུགས་ཞེས་མིང་དུ་བཏགས། །ཡུན་ནི་ཇི་ཙམ་འདུག་པ་ནི། །འཆི་ཁའི་སེམས་ནི་སྟོབས་ཆེ་བས། །དམ་བཅའ་གང་བྱས་སྟེང་དུ་འགྲོ། །དེ་ཕྱིར་འདི་ཙམ་འདུག་སྙམ་པའི། །འཆི་ཁ་དམ་བཅའ་དྲག་པོ་བྱ། །དང་པོ་འཕོ་བ་བསྒོམས་པ་དེས། །གལ་ཏེ་ཐུགས་དམ་མ་ཟིན་ན། རྐྱེན་གྱིས་ཐུགས་དམ་འདྲོགས་གྱུར་ན། །གཞན་དུ་མི་འཕོ་སྤྱི་བོར་འཕོ། །རང་ལུས་
ཡི་དམ་བསྒོམས་པ་དེས། །ཐུགས་དམ་བརྟན་ཞིང་བར་ཆད་མེད། །དམ་བཅའ་གང་བྱས་སྟེང་དུ་འགྲོ། །ང་ནི་ཚེ་འདིར་ཤི་མ་མྱོང་། །རང་དང་འདྲ་བའི་མཆེད་གྲོགས་ལ། །གསལ་འདེབས་འདི་ལྟར་བྱས་པ་ཡིས། །ཐུགས་དམ་བརྟན་པོ་ཟིན་པ་དང་། །དམ་བཅའི་ཐོག་ཏུ་འགྲོ་བ་མཐོང་། །རྟེན་བྱོན་འདས་རྟགས་བཟང་བ་ནི། །ལན་གྲངས་མང་དུ་མྱོང་བས་གྲུབ། །འཕོ་བ་ཟུང་འཇུག་ཐུགས་དམ་འདི། །མཉམ་མེད་དྭགས་པོའི་གསུང་ལས་བྱུང་། །དེ་ནས་བར་དོ་བགྲོད་ལུགས་ལ། །མཐོ་དམན་ཉི་ཤུ་རྩ་གཅིག་གསུངས། ། ཐ་མའི་ཐ་མ་ཡང་ཐའི་ལུགས། །སུས་ཀྱང་ཉམས་སུ་ལོན་ངེས་ནི། །ཐུགས་དམ་ཟིན་རུང་མ་ཟིན་རུང་། །འཕོ་བ་ཐེབ་རུང་མ་ཐེབ་རུང་། །བར་དོར་ཞི་ཁྲོའི་ལྷ་ཚོགས་རྣམས་། །ངོས་ཟིན་རུང་ལ་མ་ཟིན་རུང་། །ཤི་ནས་ཉིན་བདུན་གཉིས་ཡོལ་ནས། །བདུན་གསུམ་གྲོས་ལ་ཁད་ཀྱི་སྐབས། །རང་ཉིད་ཤི་བ་ཐག་ཆོད་ནས། །མངོན་ཤེས་རྫུ་འཕྲུལ་ཐོགས་པ་མེད། །གར་འགྲོ་རང་དབང་ཆེ་ན་ཡང་། །ཡུལ་དང་ཉེ་དུ་མཆེད་གྲོགས་སོགས། །དེ་དག་རྣམས་ལ་སེམས་ཆགས་ནས། །ས་ཕྱོགས་འདི་རུ་མི་ལུས་ཤིག །
ལེན་ནས་དམ་ཆོས་བཤའ་མ་བྱེད། །མྱུར་དུ་ལུས་ཤིག་མ་ལོན་ན། །གཤིན་རྗེའི་ཕོ་ཉ་འོང་ནས་ཁྲིད། །དགེ་སྡིག་གཤག་རལ་དགོས་བྱུང་ན། །ལེགས་པོ་མི་འོང་སྙམ་ནས་སྡུག །དེ་དུས་འདི་ལྟར་དྲན་པར་གྱིས། །འཁོར་བ་ཐོག་མ་མེད་པ་ནས། །འཁོར་བར་འཁྱམས་པས་གཉུག་རེ་བུད། །སངས་རྒྱས་དེ་སྙེད་བསྟན་པ་ལ། །བདག་ནི་མ་གྲོལ་ལས་རེ་ངན། །ད་རུང་འཁོར་བ་མཐའ་མེད་དུ། །སྐྱེ་འཆི་གྲངས་མེད་ཡི་རེ་མུག །ད་ནི་དུས་ངན་སྙིགས་མའི་མཐའ། །ཚེ་ཐུང་ནད་མང་བར་ཆད་རྒོད། །མི་ལུས་བླངས་ན་རང་སྡུག་ཉོས། །མངོན་དགའ་ལ་སོགས་དག་པའི་ཞིང་། །ས་ཐོབ་མ་གཏོགས་སྐྱེ་མི་སྲིད། །མི་རྩིབ་ས་ལ་བསྙབ་པ་འདྲ། །དགའ་ལྡན་ཟངས་མདོག་དཔལ་རི་སོགས། །སྐྱེས་ཀྱང་མི་ལྟུང་ངེས་པ་མེད། །པོ་ཏ་ལ་ནི་གནས་རི་ཡིན། །སོང་ཡང་རང་རེ་ལས་མ་དག །སྤྱན་རས་གཟིགས་དང་མཇལ་ཤས་ཆུང་། །འོད་དཔག་མེད་པའི་སྨོན་ལམ་མཐུས། །སྐྱེ་སླ་བདེ་སྐྱིད་ཡོན་ཏན་ལྡན། །སྐྱེ་ནས་ཕྱིར་མི་ལྡོག་པའི་ཞིང་། །བདེ་བ་ཅན་དུ་འགྲོ་བར་གྱིས། །བར་དོར་ཉི་ཟླ་མེད་པའི་ཕྱིར། །ནུབ་ཕྱོགས་
གང་ཡིན་མ་ཤེས་ན། །འོད་དཔག་མེད་ལ་རྩེ་གཅིག་གིས། །དད་གུས་རྩེ་གཅིག་བྱེད་ཅིང་སོང་། །འཇིག་རྟེན་ཁམས་ནི་དཔག་མེད་པའི། །འདས་པའི་ཕ་རོལ་ཡིན་ནའང་། །འགྲོ་ལ་དཀའ་ཚེགས་ཡོད་མ་ཡིན། །མགྱོགས་བུལ་འགྱུ་བ་འདི་ཉིད་ཡིན། །ཐག་རིང་མི་སླེབ་བསམ་མི་དགོས། །སྐད་ཅིག་པདྨའི་སྦུབས་ནས་སྐྱེ། །སྐྱེ་བའི་སྡུག་བསྔལ་དེ་ལ་མེད། །སྐྱེའམ་མི་སྐྱེ་ཐེ་ཚོམ་ན། །ཡུན་རིང་པདྨ་ཁ་མི་བྱེ། །སངས་རྒྱས་ཞལ་མཐོང་ཕྱི་སྐྱོན་ཡོད། །དེ་ཕྱིར་རང་ཉིད་ནམ་འཆི་ཚེ། །དེ་རུ་འགྲོ་བར་བློ་ཐག་ཆོད། །ཨོ་རྒྱན་བྱེ་བ་ཕྲག་བརྒྱ་དང་། །མཆོག་གི་སྤྲུལ་སྐུ་ན་རིམ་ཀུན། །འོད་དཔག་མེད་པའི་སྤྲུལ་པ་ཡིན། །འཛམ་གླིང་བྱེ་བ་ཕྲག་བརྒྱ་ན། །སྤྱན་རས་གཟིགས་དབང་ཀརྨ་པ། །བསྐལ་བཟང་སངས་རྒྱས་སྟོང་ལ་སོགས། །སྤྱན་རས་གཟིགས་ཀྱི་སྤྲུལ་པ་ཡིན། །དངོས་དེ་བདེ་བ་ཅན་ན་བཞུགས། །རི་རབ་བྱེ་བ་ཕྲག་བརྒྱའི་གྲངས། ། ཕྱག་ན་རྡོ་རྗེ་དེ་སྙེད་གྲངས། །རྒྱལ་ཚབ་ན་རིམ་ལ་སོགས་པ། །མཐུ་ཆེན་ཐོབ་དེའི་སྤྲུལ་པ་ཡིན། །གཞན་ཡང་དྭགས་པོ་དུས་གསུམ་མཁྱེན། །མཐོང་བ་དོན་ལྡན་ལ་སོགས་
པ། །སྐུ་ཡི་བཀོད་པ་རེ་རེ་བཞུགས། །བེན་རྩ་དགོས་ན་དེ་ན་ཡོད། །ཀརྨ་རིན་ཆེན་དེ་རུ་བྱོན། །དེ་རུ་སྐྱེས་ན་ཅི་དགའ་ན། །གསེར་མདོག་མཚན་དང་དཔེ་བྱད་ལྡན། །མངོན་ཤེས་རྫུ་འཕྲུལ་ཐོགས་པ་མེད། །མངོན་དགའ་ལ་སོགས་ཞིང་ཁམས་ཀུན། །བགྲོད་ཅིང་ཆོས་ཞུ་དེ་དགོང་འཁོར། །འབྲེལ་ཐོགས་ཀུན་ཀྱང་དེར་ཞིང་འདྲེན་། །བསྐལ་པ་བྱེ་བ་དུང་ཕྱུར་ལ། །ན་རྒྱུ་འཆི་རྒྱུ་རྒས་རྒྱུ་མེད། །ཟས་གོས་ལོངས་སྤྱོད་གནས་མལ་སོགས། །ཅི་འདོད་ཡིད་ལ་བསམ་པ་འགྲུབ། །རྩོལ་སྒྲུབ་འཚོ་སྐྱོང་བྱ་མི་དགོས། །ཚེ་སྔོན་སྡིག་པ་གང་ཡོད་པ། །འོད་དཔག་མེད་པའི་ཞལ་མཐོང་ཞིང་། །ཆོས་ཉན་ཕྱག་བསྐོར་བྱས་པས་དག །རྣམ་སྨིན་སྡུག་བསྔལ་མྱོང་མི་དགོས། །དེ་ལྟར་དམ་ཆོས་ཏིང་འཛིན་བསྒོམ། །ལུས་དེ་ས་བཅུ་ལམ་ལྔ་བགྲོད། །ནམ་ཞིག་དེ་ནས་ཚེ་འཕོས་ནས། །རྫོགས་སངས་མི་རྒྱ་མི་སྲིད་གསུངས། །དེ་ཕྱིར་འོད་བཀོད་ཞིང་མདོ་དང་། །པད་དཀར་མདོ་དང་རྔ་སྒྲའི་གཟུངས། །ད་ལྟའི་སངས་རྒྱས་བཞུགས་མདོ་རྣམས། །ཨོ་རྒྱན་གསུང་དང་ལབ་སྒྲོན་གསུང་། །ཐམས་ཅད་ས་ཕག་གྲོས་བྱས་འདྲ། །
དེ་ཕྱིར་དེ་རུ་སྐྱེ་བའི་ཕྱིར། །དགེ་བ་ཐམས་ཅད་དེ་རུ་བསྔོ། །བཟང་སྤྱོད་བདེ་སྨོན་ཆག་མེད་ཐོན། །དེ་ལྟར་བྱས་ན་མཚམས་མེད་ལྔ། །དམ་ཆོས་སྤངས་བ་མ་གཏོགས་སྐྱེ། །འོད་དཔག་མེད་ཀྱི་སྨོན་ལམ་ཡིན། །ཁ་ཞེ་མེད་པར་ལན་བཅུ་རུ། །སྨོན་ལམ་བཏབ་ན་སྐྱེ་བར་གསུངས། །ཆགས་ཞེན་མེད་པ་གནད་དུ་ཆེ། །བན་རྒན་རཱ་ག་ཨ་སྱས་བདག་གསར་རྙིང་མདོ་རྒྱུད་རྒྱ་མཚོ་ལ། །བལྟས་པས་སྙིང་པོ་ཆོས་འདི་རྙེད། །གང་ཟག་མཐོན་པོ་མ་ཡིན་པའི། །ཆོས་སྒོར་ཞུགས་པ་མང་པོ་ལ། །འཆི་ཡང་ཧ་ཀྱང་མི་སྐག་པ། །བློ་བདེའི་གདེང་འདི་བདག་གིས་བྱིན། །ཡིད་བཞིན་ནོར་བུ་བས་ཀྱང་ལྷག །ས་ཐོབ་སེམས་དཔའ་ཆེན་པོ་རྣམས། །འཁོར་བའི་སྡུག་བསྔལ་མཐོང་མཛད་ནས། །བསམ་བཞིན་སེམས་ཅན་དོན་ལ་བྱོན། །ཁྱེད་ཀྱང་དེ་ལ་མི་འགྲན་བསམ། །གལ་ཏེ་སྐུ་སྐྱེ་འབྱོན་དགོངས་ན། །ངས་ནི་འགྲོ་དོན་བཀག་དོན་མེད། །དཔའ་སྡར་འཁྲུག་པའི་ཉམས་དང་བསྟུན། །ང་ནི་སྡར་མ་འབྲོས་རྩིས་ཡིན། །དེ་སྐད་རཱ་ག་ཨ་སྱ་ངས། །ལྕགས་ཕག་ནག་ཟླའི་བཅུ་གཉིས་ཉིན། །ཉམས་ལ་ཤར་ནས་སྨྲས་པ་ལ། །ཁྲོ་བོ་དགེ་
སློང་སྦྱིན་པ་ཡི། །ཨ་དགེ་སྙོལ་བོ་ཟེར་གྱིས་བྲིས། །སརྦ་མངྒ་ལཾ། དགེའོ།། །། ༄༅། །ན་མོ་བཛྲ་པཱ་ཎི་ཡེ། བསླུ་མེད་སྐྱབས་གནས་དཀོན་མཆོག་གསུམ། །གསོལ་བ་འདེབས་སོ་བྱིན་གྱིས་རློབས། །པད་འབྱུང་རྩ་བ་གསུམ་གྱི་ཚོགས། །གསོལ་བ་འདེབས་སོ་བྱིན་གྱིས་རློབས། །བདག་གི་བྱང་ཆུབ་སེམས་བསྐྱེད་ནས། །དེང་ནས་ཚེ་མཇུག་ཅི་ཡོད་ཚེ། །འགྲོ་དོན་དཔག་མེད་འགྲུབ་པ་རུ། །བྱིན་གྱིས་རློབས་ཤིག་དཀོན་མཆོག་གསུམ། །དེ་ལ་བར་ཆད་མེད་པ་རུ། །བྱིན་གྱིས་རློབས་ཤིག་རེ་མ་ཏི། །བསམ་པ་ལྷུན་གྱིས་འགྲུབ་པ་རུ། །བྱིན་གྱིས་རློབས་ཤིག་པདྨ་འབྱུང་། །ཆོས་ར་འདི་རུ་འོང་ཚད་ལ། །ཡམས་ནད་ཆུ་ནད་གདོན་སོགས་ཀྱི། །བར་ཆད་སྲུངས་ཤིག་ཆོས་སྐྱོང་ཚོགས། །མཐོང་གྲོལ་དྲན་གྲོལ་རེག་གྲོལ་དང་། །ཐོས་པ་ཙམ་གྱིས་རྒྱུད་གྲོལ་སོགས། །བྱིན་གྱིས་རློབས་ཤིག་སྤྱན་རས་གཟིགས། །བར་ཆད་སོལ་ཅིག་གསང་བ་ཡུམ། །དངོས་གྲུབ་སྩོལ་ཅིག་
གཤིན་རྗེའི་གཤེད། །ཆོམ་རྐུན་ཆིངས་ཤིག་འོད་ཟེར་ཅན། །རྟོག་པ་བསྐྱེད་ཅིག་གྲུབ་ཐོབ་རྣམས། །རྣམ་གཡེང་བར་ཆད་མི་གཏོང་བར། །སྒྲུབ་པའི་རྒྱལ་མཚན་ཚུགས་པ་ཞིག །བདེན་ལྡན་ཀུན་གྱི་བདེན་སྟོབས་དང་། །ཆོས་སྐྱོང་སྲུང་མའི་སྟོབས་ཀྱིས་ཤོག །ཅེས་གནས་མདོ་ནང་དུ་ཆོས་ར་བཙུགས་དུས་ཨ་རཱ་གས་སོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།