ཕྱག་རྫོགས་གདམས་པ། ལེ་ཚན་གཉིས།
ན་མོ་ལོ་ཀེ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །ཐུགས་རྗེ་ཆེན་པོ་སྤྱན་རས་གཟིགས། །གསོལ་བ་འདེབས་སོ་ཐུགས་རྗེས་ཟུངས། །བདག་དང་འབྲེལ་བའི་འགྲོ་བ་རྣམས། །འདི་ཕྱིའི་སྐྱིད་སྡུག་ཁྱེད་རང་ཤེས། །གོ་འཇོའི་ཡུལ་ནས་བྱོན་པ་ཡི། །གཅིག་ཞུས་བྱེས་མཁན་འགའ་ཞིག་དང་། །དགོན་པ་གསུམ་གྱི་བཙུན་པ་རྣམས། །བན་རྒན་བདག་ལ་ཕྲད་པ་ལ། །བསླབ་བྱ་ཁ་ད་ཚིག་གསུམ་ཞུ། །མི་ལུས་ཡང་ཡང་ཐོབ་དཀའ་བས། །ལུས་འདི་དོན་དང་ལྡན་པའི་ཕྱིར། །སྡོམ་པ་དམ་ཚིག་གཙང་མར་སྲུང། །ནམ་འཆི་ངེས་མེད་ངེས་པར་འཆི། །ཤི་ཁ་མི་འགྱོད་ཙམ་རེ་མཛོད། །ལས་འབྲས་བསླུ་མེད་རང་ལ་སྨིན། །དགེ་སྒྲུབ་སྡིག་སྤང་བརྩོན་འགྲུས་སྐྱེད། །རིགས་དྲུག་གང་དུ་སྐྱེས་ཀྱང་སྡུག །ད་རེས་ཐར་པའི་ལམ་ཡུ་ཟུངས། །འགྲོ་དྲུག་ཕ་མ་དྲིན་ཆེན་ལ། །སྙིང་རྗེ་ཕན་སེམས་རྒྱ་མ་ཆུང་། །བཤགས་ན་མི་འདག་སྡིག་ལྟུང་མེད། །སྔར་བྱས་ལས་ལ་བཤགས་པ་མཛོད། །ཚེ་རབས་གཏན་གྱི་སོ་ནམ་ཡིན། །གང་འགྲུབ་བསོད་ནམས་ཚོགས་ལ་འབད། །འབྲེལ་ཐོགས་བླ་མ་ཐམས་ཅད་དང་། །
དབྱེར་མེད་དཀོན་མཆོག་ཀུན་འདུས་པ། །ཨོ་རྒྱན་ཆེན་པོ་སྤྱི་བོར་བསྒོམ། །ཅི་མཛད་ཁྱེད་ཤེས་བློ་སྙིང་གཏོད། །གདུང་ཤུགས་དྲག་པོས་གསོལ་བ་ཐོབ། །རང་ལུས་ཐུགས་རྗེ་ཆེན་པོར་བསྒོམས། །སྙིང་པོ་ཡི་གེ་དྲུག་པ་ཐོན། །སྐབས་སུ་རང་གི་སེམས་ལ་ལྟོས། །བལྟས་པས་མི་མཐོང་དངོས་པོ་མེད། །སྟོང་པ་ཉིད་ཅེས་དེ་ལ་ཟེར། །མེད་པ་མ་ཡིན་གར་ཡང་འགྲོ། །དྲན་རྩལ་ཐོགས་མེད་དེ་ལ་ཟེར། །གཅིག་པ་མ་ཡིན་དུ་མ་འཕྲོ། །ཐ་དད་མ་ཡིན་ངོ་བོ་གཅིག །ཡོད་མིན་མེད་མིན་གཉིས་ཀ་མིན། །དབུ་མ་ཆེན་པོ་དེ་ལ་ཟེར། །དེ་ཤེས་ཤེས་བྱ་ཀུན་གྱི་རབ། །ཤེས་རབ་ཕ་རོལ་ཕྱིན་པ་ཟེར། ། །ཆོས་ཀུན་དེ་ལས་འདའ་ས་མེད། །ཕྱག་རྒྱ་ཆེན་པོ་དེ་ལ་ཟེར། །དེ་ལ་མ་རྫོགས་ཆོས་ཤིག་མེད། །རྫོགས་པ་ཆེན་པོ་དེ་ལ་ཟེར། །དེ་ལ་བཟོ་བཅོས་མི་བྱེད་པར། །གང་ཤར་ངོ་བོ་སྐྱོང་བ་ལ། །ཉམས་ལེན་སྐྱོང་བའི་མིང་དུ་བཏགས། །དང་པོ་རི་གཟར་ཆུ་དང་འདྲ། །རིག་པ་འཕྲོ་རྒོད་ཚུབ་ཚུབ་ཚུབ། །དེ་དུས་ལྷོད་ཅིང་རང་ངོ་ལྟོས། །རེས་འགའ་ལུང་རོང་ཆུ་དང་འདྲ། །རེས་འགའ་དལ་ཞིང་རེས་འགའ་བྲེལ། །དགའ་སྡུག་མ་བྱེད་
གང་ཤར་སྐྱོང་། །དེ་ནས་མེ་རེ་འཁྱིལ་ལེ་གནས། །དེ་དུས་ངོ་བོ་ཧྲིག་གེ་ལྟོས། །རེས་འགའ་ལུས་བདེ་སེམས་ཀྱང་བདེ། །བདག་གཞན་མ་བྱེད་ངོ་བོ་ལྟོས་། །རེས་འགའ་ས་ལེ་རྗེན་ནེ་བ། །ང་རྒྱལ་མ་སྐྱེ་ངང་ལ་ཞོག །རེས་འགའ་མི་གསལ་ཐིབ་བེ་བ། །ལུས་སེམས་ཀྲིམ་མེ་སྒྲིམ་ལ་ལྟོས། །རེས་འགའ་སྟོང་པ་ཧད་དེ་བ། །ཐམས་ཅད་སྟོང་པ་རེད་བསམ་པའི། །འཛིན་པ་མ་ཞུགས་རྒྱུ་འབྲས་རྩིས། །རེས་འགའ་ཐེ་ཚོམ་ཡིད་གཉིས་སྐྱེ། །སྐྱུར་ནས་མ་བཞག་རྒྱུན་དུ་སྲུངས། །རྣམ་རྟོག་ཉུང་དུ་མ་སོང་ཡང་། །ཆུ་དང་རླབས་བཞིན་རང་སར་ཞི། །དྲན་པ་ཙམ་ནས་ཐོག་ཏུ་སླེབས། །སྤྱོད་ལམ་ཕལ་གྱིས་མི་གནོད་པ། །ཉམས་ལེན་སྐྱོང་བདེ་ཙམ་ཞིག་ཡིན། །མ་སྐྱུར་རྒྱུན་དུ་སྐྱོང་ནུས་ན། །ངོ་བོ་སླདེ་ནས་རྟོགས་པར་འགྱུར། །ཉམས་ལེན་ཐུགས་དམ་གང་བྱེད་ཀྱང་། །རང་དང་འབྲེལ་ཐོགས་ཐམས་ཅད་ཀུན། །བདེ་ཆེན་ཞིང་དུ་སྨོན་ལམ་ཐོབ། །ད་ལམ་ཆོས་འབྲེལ་དེ་ཙ་མཛོད། །དེ་སྐད་རཱ་ག་ཨ་སྱ་ཡིས། །འབྱོན་ཁར་མར་མེའི་ངོགས་ནས་བྲིས། །མངྒ་ལཾ།། །།
ན་མོ་གུ་རུ་རཏྣ་ཡེ། བླ་མ་ནམ་མཁའ་བཀྲ་ཤིས་ཁྱེད། །བླ་མ་དམ་པའི་དབོན་ལས་འཁྲུངས། །ཨོ་རྒྱན་ཆེན་པོའི་རྗེས་ཞུགས་ནས། །ཟབ་གཏེར་བསྟན་ལ་གང་ཕན་དང་། །གདུལ་བྱ་འགྲོ་དོན་ཆེ་བ་དེ། །ཧ་ཅང་རྣམ་གཡེང་ཆེ་ན་ཡང་། །ཉམས་རྟོགས་ལེགས་པོར་འཁྲུངས་པ་དེ། །ཨོ་རྒྱན་ཐུགས་རྗེ་ངོ་མཚར་ཆེ། །ད་ཡང་ཨོ་རྒྱན་བསྟན་པ་ལ། །གང་ཕན་གྲྭ་ཚོགས་སྐྱོང་བར་མཛོད། །དེང་སང་དུས་ངན་སྙིགས་མ་ལ། །སེམས་ཅན་བཅུ་ཕྲག་རེ་ཡན་གྱི། །སྣང་བ་ཆོས་ལ་བསྒྱུར་ནུས་ན། །བྱང་ཆུབ་སེམས་དཔའ་ཡིན་པར་གསུངས། །འགྲོ་དོན་སྐྱོང་ལ་སེམས་བསྐྱེད་གཙོ། །བྱ་བ་སྤྱོད་ལམ་ཅི་བྱེད་ཀྱང་། །བསྟན་དང་འགྲོ་བའི་དོན་དུ་སེམས། །རྟོགས་པ་སྐྱེ་དང་མི་སྐྱེ་ནི། །མོས་གུས་ཆེ་ཆུང་ཁོ་ནའི་ཁྱད། །བླ་མ་ཨོ་རྒྱན་དབྱེར་མེད་ལ། །གསོལ་བ་སྙིང་གི་དཀྱིལ་ནས་ཐོབ། །ཕུང་པོ་ཁམས་དང་སྐྱེ་མཆེད་རྣམས། །གདོད་ནས་ལིང་གའི་དཀྱིལ་འཁོར་ཏེ། །ཡིན་ན་ཡིན་པར་ཤེས་པ་ཡི། །བསྐྱེད་རིམ་སྣང་སྟོང་དབྱེར་མེད་བསྒོམ། །ཉམས་ལེན་རྩི་དང་མ་བྲལ་བའི། །མཁའ་ལ་འཇའ་ཚོན་ཤར་བ་ལྟར།།
བསྐྱེད་རྫོགས་ཟུང་འཇུག་རྒྱུན་དུ་བསྒོམ། །ཁྲེགས་ཆོད་ཉམས་ལེན་དངོས་གཞི་ལ། །ཚོགས་དྲུག་སྣང་བ་སྣ་ཚོགས་འདི། །རྣམ་པ་གསལ་ཡང་ངོ་བོ་སྟོང་། །ཆུ་ནང་ཤར་བའི་ཟླ་གཟུགས་འདྲ། །དེ་འདྲ་རྟོགས་པར་མ་གྱུར་ན། །ཚོགས་དྲུག་གཟུགས་སྒྲ་དྲི་རོ་དང་། །ས་རྡོ་རི་བྲག་ཐམས་ཅད་དང་། །རང་སེམས་བསྲེས་ལ་ངོ་བོ་སྐྱོང་། །དབྱེར་མེད་འདྲེས་ནས་སྟོང་ཉིད་འཆར། །ནམ་མཁས་གར་ཁྱབ་སེམས་དང་བསྲེ། ། །ཉམས་ལེན་ངོ་བོ་སྐྱོང་བ་དང་། །སངས་རྒྱས་ཐུགས་དང་སེམས་ཅན་སེམས། །རང་སེམས་བསྲེས་ལ་ངོ་བོ་སྐྱོང་། །དབྱེར་མེད་ཆེ་ཆུང་བཟང་ངན་དེ། །ལྟ་བ་འཁོར་འདས་དབྱེར་མེད་དེ། །ལྟ་བ་གྱད་ཀྱི་ལྷ་ཞེས་བྱ། །ཉམས་ལེན་སེམས་ངོ་མ་ཡེངས་པར། །བསྔོ་བ་སྨོན་ལམ་བྱ་བ་དེ། །འཁོར་གསུམ་ཡང་དག་བསྔོ་བ་སྟེ། །བསྔོ་བ་རྣམ་པར་དག་པ་ནི། །ཉམས་ལེན་མེད་པའི་བསྔོ་བ་ནི། །བསྔོ་བ་དུག་ཅན་ཕན་ཡོན་ཆུང་། །དངོས་གྲུབ་ཡི་དམ་ལྷ་ཡིས་འབྱུང་། །ཚེས་བཅུ་ཚོགས་འཁོར་གཏོར་བསྔོས་བརྩོན། །བསམ་པ་ཆོས་སྐྱོང་སྲུང་མས་སྒྲུབས། །དགུ་གཏོར་དུས་སུ་གསོལ་མཆོད་འབད། །ནུས་པ་སྔགས་ལས་འབྱུང་
བའི་ཕྱིར། །བསྙེན་སྒྲུབ་ཆུ་བོའི་རྒྱུན་བཞིན་བཟླ། །ཨོ་རྒྱན་བསྟན་ལ་ཕན་པ་ནི། །རང་དོན་དེ་བས་ལྷག་པ་མེད། །གྲྭ་ཚོགས་སྐྱོང་ལ་བློ་སྟོབས་བསྐྱེད། །བླ་མའི་ཐུགས་ལ་དེ་ལྟར་ཞོག །དེ་སྐད་རཱ་ག་ཨ་སྱས་འཕྲལ་དུ་གང་དྲན་ཞུས་པ་ལགས།།