བླ་མ་དོན་གྲུབ་ཀྱི་གཏོར་བསྔོས་བྲིས་ཟེར་ནས་ཤོག་བུ་གཏད་པ་ལ་ཤོག་ལྷག་བྱུང་བས་བྲིས་པ།
བླ་མ་དོན་གྲུབ་ཀྱི་གཏོར་བསྔོས་བྲིས་ཟེར་ནས་ཤོག་བུ་གཏད་པ་ལ་ཤོག་ལྷག་བྱུང་བས་བྲིས་པའོ། ། །
ན་མོ་ལོ་ཀེ་ཤྭ་ར་ཡེ།། ཐུགས་རྗེ་ཅན་ལ་གསོལ་བ་འདེབས། །ཐུགས་རྗེ་ཆེན་པོས་བྱིན་གྱིས་རློབས། །ཐུགས་རྗེ་ཆེན་པོས་དངོས་གྲུབ་སྩོལ། །ཐུགས་རྗེ་ཆེན་པོས་ལམ་སྣ་དྲོངས། །ཐུགས་རྗེ་ཆེན་པོས་བར་ཆད་སོལ། །ཐུགས་རྗེ་ཆེན་པོ་འགྲུབ་པར་ཤོག །ཐུགས་རྗེ་ཆེན་པོ་འགྲུབ་ནས་ཀྱང་། །མཐོང་ཐོས་དྲན་རེག་འགྲོ་བ་རྣམས། །བདེ་བ་ཅན་དུ་ཁྲིད་པར་ཤོག །འཇིག་རྟེན་སྲིད་པའི་ཁ་དཔེ་ལ། །མ་རྒས་བར་དུ་མི་གོམས་ཟེར། །དེ་ལ་བདེན་པ་ཆེན་པོ་གདའ། །ད་ནི་ཁོ་བོ་རབ་ཏུ་རྒས། །བསམ་བློ་ཆེན་པོ་སྐྱེས་ནས་བྱུང་། །སྔོན་ཆད་ཧ་
རེ་ལོང་དུ་སོང་། །ད་ནི་དོན་གྱི་སྙིང་པོ་མཐོང་། །ཆུ་བུར་མིག་གིས་མ་མཐོང་ཡང་། །ཡེ་ཤེས་དག་པའི་སྤུན་ཟླར་བྱེད། །སེམས་ཉིད་སྟོང་པའི་དཀྱིལ་འཁོར་ན། །ཆོས་སྐུ་རྡོ་རྗེ་འཆང་ཆེན་དེ། །འདུ་འབྲལ་མེད་པར་བཞུགས་ནས་གདའ། །སེམས་ཉིད་གསལ་བའི་དཀྱིལ་འཁོར་ན། །ལོངས་སྐུ་ཐུགས་རྗེ་ཆེན་པོ་དེ། །གསལ་འགྲིབ་མེད་པར་བཞུགས་ནས་གདའ། །སེམས་ཉིད་འགགས་མེད་དཀྱིལ་འཁོར་ན། །སྤྲུལ་སྐུ་པདྨ་འབྱུང་གནས་དེ། །རྒྱུན་ཆད་མེད་པར་བཞུགས་ནས་གདའ། །ཕུང་པོ་ལྔ་ཡི་དཀྱིལ་འཁོར་ན། །སངས་རྒྱས་རྒྱལ་བ་
རིགས་ལྔ་དེ། །ལྷུན་གྱིས་གྲུབ་པར་བཞུགས་ནས་གདའ། །ཁམས་ལྔ་དག་པའི་དཀྱིལ་འཁོར་ན། །ཡུམ་ཆེན་ལྷ་མོ་དབྱིངས་ཕྱུག་ལྔ། །གདོད་ནས་དག་པར་བཞུགས་ནས་གདའ། །ཚོགས་བརྒྱད་དག་པའི་དཀྱིལ་འཁོར་ན། །ཉེ་བའི་སྲས་ཆེན་བརྒྱད་པོ་དེ། །སྤྲུལ་སྒྱུར་བྱེད་ཅིང་བཞུགས་ནས་གདའ། །ཚོགས་བརྒྱད་རྒྱུ་བའི་ཡུལ་བརྒྱད་ན། །སྒེག་སོགས་མཆོད་པའི་ལྷ་མོ་བརྒྱད། །རོལ་གར་འཆམ་སྟབས་ངང་ནས་གདའ། །སྣང་སྲིད་སྲིད་པའི་ཆོས་རྣམས་ཀུན། །ཐམས་ཅད་སེམས་སུ་རོ་གཅིག་ཐིམ། །ཕྱི་ནང་དབྱེར་མེད་འདྲེས་ནས་གདའ། །སྣང་བ་ཕྱི་རུ་མ་ལུས་ཤིང་། །རིག་པ་ནང་དུ་མ་ལུས་པར། །དབྱེར་མེད་ཁྱབ་གདལ་ཆེན་པོར་གདའ། །བདག་དང་གཞན་དུ་མ་གྲུབ་ཅིང་། ། ཐམས་ཅད་སེམས་ཉིད་གཅིག་ཏུ་གདའ། །སེམས་ཡང་ཡེ་ནས་ཡོད་མེད་དང་། །རྟག་ཆད་སྐྱེ་འགགས་བྲལ་བར་གདའ། །མ་བསྒོམ་པ་ཡང་འཁྲུལ་པ་སྟེ། །བསྒོམ་པ་རང་ཡང་འཁྲུལ་པ་ཉིད། །བསྒོམ་དང་མི་སྒོམ་ཁྱད་མེད་པར། །ཡེ་ནས་ཆོས་སྐུ་རྗེན་པར་གདའ། །ཡེངས་བ་ཉིད་ནི་འཁྲུལ་པ་ཉིད། །མ་ཡེངས་པ་ཡང་འཁྲུལ་པ་ཉིད། །ཡེངས་
དང་མ་ཡེངས་དབྱེར་མེད་པར། །ཡེ་ནས་སྤྲོས་བྲལ་ཆེན་པོར་གདའ། །བདག་མེད་ཕྱིར་ན་གཞན་མེད་ཕྱིར། །བདག་གཞན་གཉིས་མེད་སྟོང་པ་ཉིད། །དབྱེར་མེད་རོ་གཅིག་ཆེན་པོ་གདའ། །རང་སེམས་གདོད་ནས་ཀུན་ཏུ་བཟང་། །དང་པོའི་སངས་རྒྱས་བཅོམ་ལྡན་འདས། །རང་ལ་ཡེ་ནས་བཞུགས་པའི་ཕྱིར། །འབྲས་བུ་ཐོབ་འདོད་ངང་གིས་ཆུང་། །རིགས་དྲུག་སེམས་ཀྱི་སྣང་བ་ལས། །གཞན་དུ་གྲུབ་པ་མ་དམིགས་པས། །འཁོར་བར་འཁྱམས་དོགས་ད་ནི་ཆུང་། །སེམས་ཅན་ཡེ་ནས་མ་དམིགས་པས། །སྙིང་རྗེ་སྐྱེ་བའི་ཡུལ་མ་མཆིས། །དངོས་འཛིན་སྙིང་རྗེ་ད་ནི་ཆུང་། །རང་སེམས་རྫོགས་པའི་སངས་རྒྱས་མཐོང་། །ལྷ་ཞལ་མཐོང་འདོད་ད་ནི་ཆུང་། །མུན་པ་ལ་ནི་སྒྲོན་མེ་ལྟར། །རང་སེམས་ཆོས་སྐུར་རྟོགས་མ་ཐག །སྡིག་སྒྲིབ་མ་ལུས་ཐམས་ཅད་དག །དཀོར་སྒྲིབ་ཆེ་ཡང་ང་མི་སྐྲག །རྗེས་སུ་འཇུག་པའི་སློབ་མ་ཚོ། །ཚ་ཚ་བརྐོས་ཕོར་ཇི་བཞིན་དུ། །བོགས་སྐྱེད་འོང་ན་ད་འོང་རན། །ཚོང་པ་ཁྱིམ་དུ་བསླེབས་པ་བཞིན། །བློ་བདེའི་བསམ་དོན་ད་ནི་འགྲུབ། །གངས་དཀར་སེང་ལྕམ་དཀར་མོ་
ལ། །ཡ་ང་བག་ཚ་མི་འདུག་སྟེ། །གངས་དཀར་འགྲིམས་པ་སེང་གེའི་ལུགས། །འཁོར་བར་ལྟུང་དོགས་མི་གདའ་སྟེ། །རྒྱུ་འབྲས་འཛེམ་པ་ཆོས་པའི་ལུགས། །གཙང་ཆབ་ཉ་མོ་གསེར་མིག་དེ། །འཚུབ་ནས་འཆི་དོགས་མི་གདའ་སྟེ། །མཚོ་འཁྱིལ་བསྡོམ་པ་གསེར་ཉའི་ལུགས། །ལྟུང་བའི་དོགས་པ་མི་གདའ་སྟེ། །ཚུལ་ཁྲིམས་བསྲུང་བ་བཙུན་པའི་ལུགས། །འཕགས་པ་འཇིག་རྟེན་དབང་ཕྱུག་གི །སེམས་ཅན་དམིགས་སུ་མ་མཆིས་ཏེ། །འགྲོ་དོན་བྱེད་པ་རྒྱལ་སྲས་ལུགས། །བདག་གཞན་གཉིས་མེད་རྟོགས་ལགས་ཀྱང་། །གཞན་ཕན་བྱེད་པ་བློ་སྦྱང་ལུགས། །ཡུམ་ཆེན་འཕགས་མ་སྒྲོལ་མ་དེ། །སངས་རྒྱས་ཀུན་དང་དབྱེར་མེད་ཀྱང་། །དཀྱིལ་འཁོར་ཀུན་གྱི་མཆོད་ལྷ་མ། །རང་ལུས་རྒྱལ་བའི་དཀྱིལ་འཁོར་དུ། །ད་ནི་ངེས་ཤེས་སྐྱེ་ལགས་ཀྱང་། །མཆོད་གཏོར་མཎྜལ་མི་གཅོད་པར། །འདི་ཡང་རྟེན་འབྲེལ་དོན་རྟོགས་རྟོགས། །ཆོས་སྐྱོང་བཀའ་སྲུང་ཐམས་ཅད་ཀྱང་། །རང་རིག་རྩལ་དུ་རྟོགས་མོད་ཀྱང་། །གཏོར་བསྔོ་དུས་གཏོར་མི་གཅོག་པར། །འདི་ཡང་རྟེན་འབྲེལ་གནད་ཅིག་རྟོགས། །སྣང་སྲིད་ལྷ་འདྲེ་སྡེ་བརྒྱད་ཀུན། །
རང་སེམས་ཡིན་པར་ཐག་ཆོད་ཀྱང་། །བསང་མཆོད་དཀར་གཏོར་བསྔོ་བ་སོགས། །རྟེན་འབྲེལ་ཁྱད་དུ་མི་གསོད་པ། །འདི་ཡང་རྒྱུད་ཀྱི་དགོངས་པ་ཡིན། །ད་ལྟ་ཤི་ཡང་མི་འགྱོད་ཅིང་། །བློ་བདེ་ཁོང་དུ་ཆུད་ལགས་ཀྱང་། །སྲུང་འདོགས་ཚེ་སྒྲུབ་སྨན་བླ་སོགས། །རྟེན་འབྲེལ་ཐབས་ལ་འབུངས་བ་འདི། །ད་རུང་ལུས་འདིས་མགྲོན་པོ་ཞིག །འགྲུབ་ན་བསམ་པའི་སེམས་བསྐྱེད་ཡིན། །རྒས་པོ་བཅོས་པའི་དཔའ་གཏམ་འདི། །བུང་བུས་སེང་སྐད་ཡིན་ནམ་མིན། །ཡེ་ཤེས་སྤྱན་ལྡན་རྣམས་ཀྱིས་མཁྱེན། །ཆུང་ནས་འགྲོགས་པའི་དོན་འགྲུབ་ལ། །དེ་རིང་སྙིང་གཏམ་རྗེན་པར་ཞུ། །ཤོག་བུ་ལྷག་པས་ཉམས་མཚར་དུ། །ཁོང་ཆུང་དབེན་ཕྱིར་ཉམས་ལ་ཤར། །འཕྲལ་དུ་བྲིས་པ་མངྒ་ལཾ། །ཨ་རཱ་གས་སོ།། ༈ །།རྗེ་ཆོས་སྐུའི་རྒྱལ་པོ་སྣང་བ་མཐའ་ཡས་ལ་གསོལ་བ་འདེབས་སོ། །ལུས་འཆི་མེད་ཚེ་ཡི་རིག་འཛིན་མ་ཐོབ་པར་གྱུར་ཀྱང་། །ལྷ་མིའི་བདེ་སྐྱིད་ལ་ཆགས་ཞེན་སྤངས་ནས་བདེ་སྨོན་ལ་ཡི་དམ་བྱེད་དང་། །འདི་ནས་འཕོས་མ་ཐག་ཏུ་ཞིང་དེར་སྐྱེ་བ་ཞིག་འོད་དཔག་མེད་ཁྱེད་མཁྱེན་ནོ། །རྗེ་ལོངས་
སྐུའི་རྒྱལ་པོ་ཐུགས་རྗེ་ཆེན་པོ་ལ་གསོལ་བ་འདེབས་སོ། །ཚེ་འདིར་འགྲོ་དོན་དུས་གསུམ་སངས་རྒྱས་དང་མ་མཉམ་པར་གྱུར་ཀྱང་། །རང་དོན་ཡིད་བྱེད་སྤངས་ནས་སེམས་བསྐྱེད་དང་སྨོན་ལམ་འདི་ལ་འབད་དང་། །འབྲེལ་ཚད་དོན་དང་ལྡན་པ་ཞིག་སྤྱན་རས་གཟིགས་ཁྱེད་རང་མཁྱེན་ནོ། །རྗེ་སྤྲུལ་སྐུ་པའི་སྐུ་ཡི་རྒྱལ་པོ་པདྨ་འབྱུང་གནས་ལ་གསོལ་བ་འདེབས་སོ། །འབྱུང་བཞི་ལ་རང་དབང་བསྒྱུར་བའི་གྲུབ་རྟགས་མ་ཐོན་གྱུར་ཀྱང་། །ཐ་མལ་གྱི་སྣང་ཞེན་སྤངས་ནས་བསྐྱེད་རིམ་བསྙེན་སྒྲུབ་ཞིག་བྱེད་དང་། །ཕྲིན་ལས་རྣམ་བཞི་འགྲུབ་པ་ཞིག་པད་འབྱུང་ཁྱེད་རང་མཁྱེན་ནོ། །རྗེ་མཁའ་འགྲོའི་རྒྱལ་མོ་བྷ་ག་ལ་ཡི་ཕག་མོ་ལ་གསོལ་བ་འདེབས་སོ། །ཚེ་འདིར་འཇའ་ལུས་མཁའ་སྤྱོད་རང་མ་གྲུབ་གྱུར་ཀྱང་། །ཐེག་དམན་གྱི་བསམ་པ་སྤངས་ནས་རྩ་རླུང་ལ་ཉམས་ལེན་ཞིག་བྱེད་དང་། །རླུང་སེམས་དབུ་མར་ཚུད་པ་ཞིག་མ་གཅིག་ཁྱེད་རང་མཁྱེན་ནོ། །རྗེ་པཎ་གྲུབ་རྒྱལ་པོ་ཏེ་པུ་པ་ཆེན་པོ་ལ་གསོལ་བ་འདེབས་སོ། །རྒྱ་བོད་ཀུན་ཏུ་མཁས་གྲུབ་ཀྱི་གྲགས་པ་འཐོན་པར་མ་བྱུང་གྱུར་ཀྱང་། །རྨོངས་ཞེན་གྱི་ཨུ་ཚུག་སྤངས་ནས་མདོ་རྒྱུད་ཕྱོགས་མེད་ལ་ལྟ་
དང་། །ལམ་ལོག་ལམ་གོལ་མེད་པ་ཞིག་པཎ་གྲུབ་ཁྱེད་རང་མཁྱེན་ནོ། །རྗེ་རྟོགས་ལྡན་གྱི་རྒྱལ་པོ་རས་ཆུང་རྡོར་གྲགས་ལ་གསོལ་བ་འདེབས་སོ། །ལུས་འདིས་འཕགས་ཡུལ་སོགས་གནས་ཆེན་དུ་མ་བགྲོད་པར་མ་གྱུར་ཀྱང་། །མི་གཙང་བའི་འདུ་ཤེས་སྤངས་ནས་རྡོ་རྗེའི་ལུས་ལ་གནད་དུ་བསྣུན་དང་། །གནས་གསུམ་ཌཱཀྐིས་བྱིན་གྱིས་བརླབས་པ་ཞིག་སྐྱེས་བུ་ཁྱེད་རང་མཁྱེན་ནོ། །རྗེ་རས་པའི་རྒྱལ་པོ་ཟངས་རི་རས་པ་ལ་གསོལ་བ་འདེབས་སོ། །ལོ་སར་གངས་ཁྲོད་དུ་ཆུ་རས་ཐུབ་པ་མ་བྱུང་གྱུར་ཀྱང་། །དགུན་ཚེའི་རིང་ལ་གཏུམ་མོ་ཨ་ཐུང་གི་དམིགས་ཐུན་རེ་སྐྱོང་དང་། །བདེ་སྟོང་གི་ཡེ་ཤེས་སྐྱེ་བ་ཞིག་རས་པ་ཁྱེད་རང་མཁྱེན་ནོ། །རྗེ་འགྲོ་མགོན་རྒྱལ་པོ་རས་ཆེན་ཡབ་སྲས་ལ་གསོལ་བ་འདེབས་སོ། །ཆོས་སྐྱོང་མི་བཞིན་དུ་དངོས་སུ་འཁོར་བའི་ནུས་པ་མཐུ་སྟོབས་ཞིག་མ་བྱུང་གྱུར་ཀྱང་། །སྡིག་གྲོགས་སྤངས་ནས་ཆོས་སྐྱོང་སྲུང་མ་འདི་གྲོགས་སུ་བརྟེན་དང་། །ཆོས་དང་བསྒྲུབ་པའི་ས་ལམ་དུ་འགྲོ་བ་ཞིག་འགྲོ་མགོན་ཁྱེད་མཁྱེན་ནོ། །རྗེ་གྲུབ་ཆེན་གྱི་རྒྱལ་པོ་ཀརྨ་པཀྵི་ལ་གསོལ་བ་འདེབས་སོ། །མེ་ཆུ་དུག་མཚོན་གྱི་ནུས་པ་
བཅོམ་པར་མ་ནུས་སུ་གྱུར་ཀྱང་། །སྣང་བ་འདི་བདེན་འཛིན་སྤངས་ནས་སྒྱུ་ལུས་ཀྱི་རྣལ་འབྱོར་བསྒོམ་དང་། །དགྲ་གཉེན་གྱི་འཛིན་པ་ཞིག་པ་ཞིག་གྲུབ་ཆེན་ཁྱེད་རང་མཁྱེན་ནོ། །རྗེ་བཀའ་བརྒྱུད་གྱི་རྒྱལ་པོ་ཀཾ་ཚང་དོན་བརྒྱུད་ལ་གསོལ་བ་འདེབས་སོ། །མཐོང་གྲོལ་དྲན་གྲོལ་ཐོས་གྲོལ་ཙམ་མ་གྲུབ་གྱུར་ཀྱང་། །བླ་མའི་སྐྱོན་ཚོལ་སྤངས་ནས་སྙིང་ནས་གསོལ་བ་ཞིག་འདེབས་དང་། །ཉམས་རྟོགས་འདི་ཡར་ངོའི་ཟླ་ལྟར་འཕེལ་བ་ཞིག་བཀའ་བརྒྱུད་ཁྱེད་རང་མཁྱེན་ནོ། །རྗེ་དྲིན་ཆེན་གྱི་རྒྱལ་པོ་ཆོས་ཀྱི་དབང་ཕྱུག་ཡབ་སྲས་ལ་གསོལ་བ་འདེབས་སོ། །མཁས་བཙུན་བཟང་གསུམ་གྱི་གྲགས་པོས་འཛམ་གླིང་ཁྱབ་པར་མ་གྱུར་ཀྱང་། །སྡོམ་གསུམ་ལ་ངོས་ལྐོག་མེད་པར་བསླབ་གསུམ་ལ་ནན་ཏན་ཞིག་བྱེད་དང་། །འཁོར་བ་ལ་ཕྱི་ཕྱག་འཚལ་བ་ཞིག་རྩ་བའི་བླ་མ་ཁྱེད་རང་མཁྱེན་ནོ། །རྗེ་ཡི་དམ་གྱི་རྒྱལ་པོ་རྒྱལ་བ་རྒྱ་མཚོ་ལ་གསོལ་བ་འདེབས་སོ། །ཡི་དམ་དངོས་སུ་མཇལ་བ་རྫུ་འཕྲུལ་སྟོན་པར་མ་ཐོབ་གྱུར་ཀྱང་། །ལོ་གྲངས་བཅུ་གསུམ་གྱི་བར་དུ་གསོལ་བ་འདེབས་པ་ཞིག་བསྒྲུབ་དང་། །བདེ་ཆེན་གྱི་ཞིང་དུ་སྐྱེས་ནས་ས་བཅུ་ཐོབ་པ་ཞིག་ཡི་དམ་ཁྱེད་རང་
མཁྱེན་ནོ། །རྗེ་ཆོས་སྐྱོང་གི་རྒྱལ་པོ་མ་མགོན་ལྕམ་དྲལ་ལ་གསོལ་བ་འདེབས་སོ། །སངས་རྒྱས་བསྟན་པ་སྲུང་བའི་མཐུ་ནུས་ཞིག་མ་གྲུབ་གྱུར་ཀྱང་། །དམ་ཚིག་ཆག་ཉམས་སྤངས་ནས་གཏོར་བསྔོས་དང་དགུ་གཏོར་འདི་མ་ཆག་པར་བྱེད་ན། །བསྒྲུབ་པའི་བར་ཆད་ཞི་ཞིང་མཐུན་རྐྱེན་འབྱོར་བ་ཞིག་ཆོས་སྐྱོང་ཁྱེད་རང་མཁྱེན་ནོ། །རྗེ་བསླུ་བ་མེད་པའི་ཀུན་རྫོབ་དོན་དམ་གྱི་བདེན་པ་གཉིས་ལ་གསོལ་བ་འདེབས་སོ། །བསྔོ་བ་སྨོན་ལམ་གང་བཏབ་འཕྲལ་དུ་དངོས་སུ་མ་གྲུབ་པར་གྱུར་ཀྱང་། །བློ་ཆུང་སྤངས་ནས་དགེ་བ་ཅི་བྱེད་གཞན་དོན་དུ་བསྔོ་དང་། །མཐར་ཐུག་རྫོགས་སངས་རྒྱས་པ་ཞིག་བདེན་གཉིས་ཁྱེད་རང་མཁྱེན་ནོ།། ༈ །།དབང་ལུང་གི་ཐོབ་རྒྱ་བསྐྱེད་ན། །ས་སྟེང་གི་བླ་མ་ཀུན་བསྟེན་ཡང་དགོས་པར་འདུག་སྟེ། །རྩེ་གཅིག་གསོལ་བ་བཏབ་ན་ལྷན་སྐྱེས་ཡེ་ཤེས་ནི་རྩ་བའི་བླ་མ་གཅིག་པོས་ཀྱང་སྟེར་བར་འདུག་པས། །འབུལ་སྡུད་ཀྱི་ཚོང་ཟོག་ལ་དམིགས་ནས་ཐོབ་རྒྱ་ཡི་བླ་མ་རྩ་བ་བཞག་ལ། །མོས་གུས་གཅིག་ཆོག་གིས་གསོལ་བ་འདེབས་ཡུལ་རྒྱལ་བ་ཡབ་སྲས་བཞུགས་པ་འདི་དགའ་ཡང་དགའོ། །སྔགས་ལ་མཁས་པའི་
གྲགས་པ་བསྒྲུབས་ན་གསར་རྙིང་གི་དཀྱིལ་འཁོར་ཐམས་ཅད་ཀྱང་དགོས་པར་འདུག་སྟེ། །རྒྱུད་སྡེ་བཞི་ཡི་སྤྱི་སྒྲུབ་ནི་རྒྱལ་བ་རྒྱ་མཚོ་ལྷ་ལྔས་ཀྱང་ཐུབ་པར་འདུག་པས། །མངོན་དཀྱིལ་མང་པོའི་ཟིན་ཐུན་ལ་མི་ཚེ་བསྐྱལ་བ་དེ་བཞག་ལ། །དཀྱིལ་འཁོར་ཀུན་འདུས་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་ཉམས་སུ་ལེན་པ་འདི་དགའ་ཡང་དགའོ། །མང་པོའི་ལས་ཚོགས་དང་བརྩོན་འགྲུས་རྣམས་བསྒྲུབས་ན་ལྷ་ཚོགས་རྒྱ་མཚོ་ཐམས་ཅད་ཀྱང་དགོས་པར་འདུག་སྟེ། ། །མཆོག་ཐུན་མོང་གི་དངོས་གྲུབ་ནི་རྒྱལ་བ་རྒྱ་མཚོས་ཀྱང་སྟེར་བར་འདུག་པས། །ངག་ནུས་དང་འདྲེ་བརྡུང་ལ་དམིགས་པའི་མཚམས་སྒྲུབ་མང་པོ་བཞག་ལ། །ལུས་སེམས་འཁྲུལ་པ་སྦྱོང་ཕྱིར་ཐུགས་རྗེ་ཆེན་པོ་ཡབ་ཡུམ་བསྒོམ་པ་འདི་དགའ་ཡང་དགའོ། །མཆོད་བསྟོད་ཀྱིས་བསོད་ནམས་བསགས་ན་གསར་རྙིང་གི་ཆོ་ག་དང་མཆོད་ཕྲེང་མང་པོ་ཡང་དགོས་པར་འདུག་སྟེ། །རྩ་བ་གསུམ་དང་སངས་རྒྱས་ཀྱི་མཆོད་རྟེན་ནི་ཐུགས་རྗེའི་ཆོ་གས་ཀྱང་འཐུས་པར་འདུག་པས། །དབང་ལུང་ངེས་ཆ་མེད་ཅིང་བསྙེན་སྒྲུབ་མ་ཐེམ་པའི་ཆོ་ག་མང་པོ་བཞག་ལ། །ཐམས་ཅད་ཀུན་འདུས་ཐུགས་རྗེ་ཆེན་པོའི་མཆོད་
ཕྲེང་བཏང་བ་འདི་དགའ་ཡང་དགའོ། །བསྟན་པའི་རླབས་རྒྱ་སྐྱོང་ཞིང་བསྟན་འགྲོའི་ལམ་ངན་འདུལ་ན་ཆོས་སྐྱོང་ཐམས་ཅད་ཀྱང་དགོས་པར་འདུག་སྟེ། །བྱང་ཆུབ་སྒྲུབ་པའི་བར་ཆད་ནི་མ་མགོན་ཡབ་ཡུམ་ཁོ་ནས་ཀྱང་སེལ་བར་འདུག་པས། །གཏད་སེལ་སྲེག་གསུམ་བསྒྲུབ་པའི་ངག་བཅད་དང་མུན་མཚམས་ཀྱང་བཞག་ལ། །བརྒྱུད་པའི་བཀའ་སྲུང་ལ་གཏོར་བསྔོས་དང་དུས་གཏོར་ཙམ་བཏང་ནས་འདོད་དོན་གསོལ་བ་འདི་དགའ་ཡང་དགའོ། །མཁས་པའི་གྲལ་ལ་བསྙག་ན་བཀའ་བཅུ་དང་རབ་འབྱམས་ཀྱང་གྲྭ་སྐོར་ཡང་དགོས་པར་འདུག་སྟེ། །མདོ་རྒྱུད་ཀྱི་གོ་བ་ནི་བསྒོམས་བྱུང་གི་ཤེས་རབ་དང་དཔེ་བལྟས་གཉིས་སྦྲགས་ན་ཡང་འོང་བར་འདུག་པས། །མི་ཚེ་ཚིག་ཕྱིར་འབྲང་ནས་ཉམས་ལེན་དང་བྲལ་བ་དེ་བཞག་ལ། །གཅིག་ཤེས་ཀུན་གྲོལ་གྱི་གདམས་ངག་ཟབ་མོ་ཉམས་སུ་ལེན་པ་འདི་དགའ་ཡང་དགའོ། །བཟང་པོའི་གྲྭ་ལ་བསྐངས་ན་དཀའ་ཐུབ་དང་ཆུ་འཐུང་རྡེལ་འཆའ་ཡང་དགོས་པར་འདུག་སྟེ། །བསོད་ནམས་བསགས་པའི་ཐབས་ལ་ནང་གི་སྦྱིན་སྲེག་ཀྱང་ཟབ་པར་འདུག་པས། །ཕུང་ཁམས་ཀྱི་ལྷ་ལ་བརྙས་ཆོས་ཀྱིས་དཀའ་ཐུབ་དྲག་པོ་
ཡང་བཞག་ལ། །ཤ་ཆང་ལོག་འཚོ་སྤངས་ནས་གདན་གཅིག་བྱེད་པ་འདི་དགའ་ཡང་དགའོ། །བཙུན་པོའི་གྲལ་བསྙགས་ན་དགོན་པ་དང་གྲ་འགྲིག་བཅའ་ཁྲིམས་ཀྱང་འོང་དགོས་པར་འདུག་སྟེ། །ཚུལ་ཁྲིམས་གཙང་མ་ནི་བག་ཡོད་དྲན་ཤེས་བརྟེན་པ་ཁོ་ནས་ཀྱང་ཆོག་པར་འདུག་པས། །སྐྱབས་གནས་བླ་མ་ཚེ་འདིའི་མི་དཔོན་དུ་མཐོང་བའི་བཅའ་ཁྲིམས་ཀྱང་བཞག་ལ། །རང་གིས་ཚུལ་ཁྲིམས་བསྲུང་ཞིང་གཞན་ལ་ཚུལ་ཁྲིམས་ཀྱི་བསྔགས་པ་བརྗོད་པ་འདི་དགའ་ཡང་དགའོ། །བྱ་བཏང་གི་གྲ་ལ་བསྙག་ན་ཚོང་དང་རྐང་བཞི་སྤོང་བའང་དགོས་པར་འདུག་སྟེ། །ཏིང་འཛིན་གྱི་གཡེང་བ་སྤང་བ་ནི་དགོས་མེད་ཀྱི་དྲན་པ་བརྟེན་པས་ཀྱང་ཆོག་པར་འདུག་སྟེ། །བྱ་བ་བཏང་ནས་འབུལ་སྡུད་རྒྱལ་ཁམས་འགྲིམ་པ་དེ་བཞག་ལ། །གང་བྱུང་ལེན་ཞིང་དཀོར་ཕུད་དགེ་བ་གང་འགྲུབ་བསྒྲུབ་པ་འདི་དགའ་ཡང་དགའོ། །ནུས་པ་ཆེ་བའི་གྲ་ལ་བསྙག་ན་བཟླས་པའི་དུང་གྲངས་ཕྲེང་བ་ཁྲ་ཆོབ་སེར་སོང་དགོས་པར་འདུག་སྟེ། །བསྐྱེད་རྫོགས་འབྲེལ་པའི་བྱེ་ཆུང་བཅའ་བཅུས་ཀྱང་རྟགས་མཚན་ཅུང་ཟད་སྟོན་པར་འདུག་པས། །ལྷ་དང་བྲལ་བའི་མི་ནག་སྔགས་འདྲེན་གྱི་དུང་གྲངས་
ཀྱང་བཞག་ལ། །བསྐྱེད་རྫོགས་མཆོད་བསྟོད་རྡོ་རྗེའི་བཟླས་པ་རྣམས་དང་འབྲེལ་པ་འདི་དགའ་ཡང་དགའོ། །ཆེན་པོ་གྲྭ་ལ་བསྙག་ན་སྡེ་དང་དགོན་པ་གདན་ས་ཡང་འོང་དགོས་པར་འདུག་སྟེ། །ཅི་ཡང་མེད་ན་དཀའ་ལས་དང་སེམས་ཁུར་སྡུག་བསྔལ་ནི་ཆུང་བར་འདུག་པས། །ཆེན་པོའི་ས་ལ་ཞེ་འདོད་དང་ཡིད་སྨོན་རློམས་སེམས་ཀྱང་བཞག་ལ། །གཉོམ་ཆུང་རི་སུལ་དུ་ཉམས་ལེན་རྩེ་གཅིག་ཏུ་སྐྱོང་བ་འདི་དགའ་ཡང་དགའོ། །ཞེན་ལོག་གི་གྲྭ་ལ་བསྙག་ན་ཕ་ཡུལ་དང་གཉེན་འདུན་སྤང་བ་ཡང་དགོས་པར་འདུག་སྟེ། །དད་འདུན་དང་རྩི་འཇོག་ཆུང་བའི་རང་ཡུལ་ན་ཐུགས་དམ་འཕེལ་བར་འདུག་པས། །རང་ཡུལ་སྤངས་ནས་མི་ཡུལ་ན་དགྲ་འདུལ་གཉེན་སྐྱོང་བྱེད་པའང་བཞག་ལ། །དགྲ་གཉེན་སུ་ལའང་ཧ་ཅང་མཛའ་འཁོན་མེད་པ་འདི་དགའ་ཡང་དགའོ། །རྟོགས་ལྡན་གྱི་གྲལ་ལ་བསྙག་ན་རྒྱ་བོད་ཀྱི་གནས་རི་བསྐོར་བའང་དགོས་པར་འདུག་སྟེ། །ཉི་ཤུ་རྩ་བཞིའི་གནས་ཆེན་རྣམས་རྡོ་རྗེའི་ལུས་ལའང་ཚང་བར་འདུག་པས། །ཁ་ཕྱེད་ཀྱིས་རྒྱལ་ཁམས་བསྐོར་ཞིང་དབུས་རྐང་གི་དགེ་དགོན་འགྲིམ་པ་དེ་བཞག་ལ། །རྟེན་འབྲེལ་ལུས་ལ་
བསྒྲིགས་པས་རྟོགས་པ་སེམས་ལ་འཆར་བ་འདི་དགའ་ཡང་དགའོ། །བདེ་སྟོང་དཔེའི་ཡེ་ཤེས་བསྒྲུབས་ན་ལས་ཀྱི་ཕྱག་རྒྱ་བསྟེན་པ་ཡང་དགོས་པར་འདུག་སྟེ། །བདེ་སྟོང་ལྷན་སྐྱེས་ཀྱི་ཡེ་ཤེས་ནི་ཙཎྜ་ལི་དམ་ཚིག་གི་ཕྱག་རྒྱས་ཀྱང་སྟེར་བར་འདུག་པ། །བསྟན་པའི་ཞབས་འདྲེན་བྱིས་པ་ལྐོག་གསོད་བྱེད་པའི་ཆགས་ལམ་དེ་བཞག་ལ། །ཡིད་རིག་ཡེ་ཤེས་ཀྱི་ཕྱག་རྒྱས་གསང་སྔགས་ཀྱི་དམ་ཚིག་མི་འགལ་བ་འདི་དགའ་ཡང་དགའོ། །སྤྲོས་མེད་ཁོར་ཡུག་གིས་ཉམས་ལེན་སྐྱོང་ན་བྱ་ཆ་དང་དགེ་སྦྱོར་ཡང་སྤོང་དགོས་པར་འདུག་སྟེ། །འབྲས་བུ་སྐུ་གཉིས་ནི་ཐབས་ཤེས་ཟུང་འཇུག་གིས་ཀྱང་འགྲུབ་པར་གསུངས་པས། །སྤྲོས་མེད་དུ་རློམས་ནས་ལུས་ངག་བཏང་སྙོམས་སུ་ལུས་པ་འདི་བཞག་ནས། །གཉིད་ཚེ་མ་གཏོགས་བསྐྱེད་རྫོགས་བཟླས་བརྗོད་གང་རུང་ཞིག་དང་ནམ་ཡང་འབྲལ་མེད་འདི་དགའ་ཡང་དགའོ། །དབུ་ཕར་གྱི་བཤད་པ་བཏང་ན་རང་གཞན་གྱི་ལྟ་གྲུབ་དགག་བཞག་ཀུན་དགོས་པར་འདུག་སྟེ། །ཕྱག་རྫོགས་དབུ་གསུམ་གྱི་ཉམས་ལེན་ནི་རང་སེམས་རང་ངོ་ལྟ་བས་ཀྱང་འཐུས་པར་འདུག་པས། །ཆོས་སྤང་གི་སྒྲིབ་པ་སོགས་པའི་ལྟ་གྲུབ་ཀྱི་དགག་
བཞག་ཀུན་བཞག་ལ། །བྱིན་རླབས་སྟོབས་ལས་འཁྲུངས་པའི་ཉམས་མྱོང་སྐྱོང་བ་འདི་དགའ་ཡང་དགའོ། །མངོན་ཤེས་དང་རྫུ་འཕྲུལ་བསྒྲུབས་ན་ཞི་གནས་ཀྱི་ཏིང་འཛིན་བཟང་པོ་ཡང་དགོས་པར་འདུག་སྟེ། །འཁོར་བའི་འཁྲུལ་སྣང་རྒྱུན་ནི་ལྷག་མཐོང་གི་རྟོགས་པས་ཀྱང་སེལ་བར་འདུག་པས། །དམིགས་བཅས་ཀྱི་སེམས་འཛིན་མང་པོ་ལ་སྡུག་བཙིར་བྱེད་པ་དེ་བཞག་ལ། །གང་ཤར་དགག་སྒྲུབ་མེད་པར་ལྷུག་པར་འཇོག་པ་འདི་དགའ་ཡང་དགའོ། །བྱང་སེམས་ཀྱི་སྤྱོད་པ་སྐྱོང་ན་ཕྱོགས་མེད་འགྲོ་དོན་ཀྱང་དགོས་པར་འདུག་སྟེ། །གཞན་དོན་གཟུགས་སྐུའི་ས་བོན་ནི་སེམས་བསྐྱེད་བསྔོ་བས་ཀྱང་ཐོབ་པར་འདུག་པས། །རང་གི་འགྲོ་དོན་བཤོལ་ཞིང་གཞན་རྒྱུད་མི་གྲོལ་བའི་འགྲོ་དོན་ཡང་བཞག་ལ། །རང་རྒྱུད་ཅི་ཐུལ་བྱེད་ཅིང་གཞན་དོན་སྨོན་ལམ་འདེབས་པ་འདི་དགའ་ཡང་དགའོ། །དགེ་བཤེས་ཀྱི་གྲལ་ལ་བསྙག་ན་ས་ལམ་དང་འབྲས་བུའི་བཤད་པའང་དགོས་པར་འདུག་སྟེ། །རང་སེམས་གློ་བུར་གྱི་དྲི་མ་དེ་དག་ནི་སངས་རྒྱས་རང་ཡིན་པར་གསུངས་པས། །ས་ལམ་འབྲས་བུའི་རྩིས་བགྲང་དང་རྩོད་པ་དེ་བཞག་ལ། །རང་སེམས་
གཉུག་མའི་ངོ་བོ་སྐྱོང་བ་འདི་དགའ་ཡང་དགའོ། །ཞེས་པ་འདི་གྲོ་ཞུན་ཟླ་བའི་ཡར་ཚེས་གསུམ་གྱི་ཉིན་ཉམས་མཚར་དུ་བྱས་པའོ། །ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།