གཏན་ཐུབ་སྐྱབས་ལ་རེ་བ་སོམ་ཉི་དང་བྲལ་བར་ཉམས་སུ་ལོངས་ན་དོན་འགྲུབ་པའི་ཉམས་མྱོང་སྐྱིད་པ་དགུའི་མགུར།
གཏན་ཐུབ་སྐྱབས་ལ་རེ་བ་སོམ་ཉི་དང་བྲལ་བར་ཉམས་སུ་ལོངས་ན་དོན་འགྲུབ་པའི་ཉམས་མྱོང་སྐྱིད་པ་དགུའི་མགུར་ནི། ཨེ་མ་ཧོ། བློ་ཁྱེད་ཤེས་ཀྱི་ལིང་སྐྱུར་ནུས་པ་ན། །བསླུ་མེད་ཀྱི་སྐྱབས་གནས་དཀོན་མཆོག་བཞུགས། །རྒྱབ་རྟེན་འདི་བཟང་བས་ང་རེ་སྐྱིད། །སེམས་གདུང་ཤུགས་ཀྱིས་གསོལ་བ་འདེབས་ནུས་ན། །བྱིན་རླབས་ཀྱི་གཏེར་མཛོད་བླ་མ་བཞུགས། །འཇུ་ས་འདི་བཟང་བས་ང་རེ་སྐྱིད། །ཚད་མེད་ཀྱི་སྙིང་རྗེ་བསྒོམ་ནུས་ན། །ཚོགས་གཉིས་ཀྱི་གཏེར་མཛོད་སེམས་བསྐྱེད་བཞུགས། །ཅི་བྱས་ཀུན་ཆོས་ཕྱོགས་སུ་འགྲོ་བས་ང་རེ་སྐྱིད། །བསྐྱེད་རིམ་དང་བསྙེན་སྒྲུབ་འབད་ནུས་ན། །དངོས་གྲུབ་ཀྱི་གཏེར་མཛོད་ཡི་དམ་བཞུགས། །མཆོག་ཐུན་མོང་གཉིས་འགྲུབ་པས་ང་རེ་སྐྱིད། །སྣང་སྟོང་སངས་རྒྱས་སུ་བསྟེན་ནུས་ན། །དཀྱིལ་འཁོར་གྱི་གཏེར་མཛོད་ལུས་ལ་བཞུགས། །ཐིག་ཚོན་མི་དགོས་ང་རེ་སྐྱིད། །བྱིན་རླབས་ཀྱི་དམིགས་རིམ་གསལ་ནུས་ན། ། ཚོགས་འཁོར་གྱི་གཏེར་མཛོད་བཟའ་བཏུང་བཞུགས། །ཚོགས་ཞོར་ལ་རྫོགས་པ་ང་རེ་སྐྱིད། །མ་བཅོས་ཀྱི་རང་བབས་སྐྱོང་ནུས་ན། །ཆོས་སྐུའི་གཏེར་མཛོད་སེམས་ཉིད་
བཞུགས། །འབྲས་བུ་འདི་རང་ཆས་ང་རེ་སྐྱིད། །མ་ཡེངས་ཀྱི་ཏིང་འཛིན་གསལ་ནུས་ན། །ཕོ་ཉའི་གཏེར་མཛོད་དམིགས་རིམ་བཞུགས། །དངོས་རྟགས་རང་ཐོན་པས་ང་རེ་སྐྱིད། །མཆོད་བསྟོད་དང་བསྐང་གསོལ་བརྩོན་ནུས་ན། །ཕྲིན་ལས་ཀྱི་གཏེར་མཛོད་ཆོས་སྐྱོང་བཞུགས། །གང་བསམ་ཀུན་འགྲུབ་པ་ང་རེ་སྐྱིད། །ཅེས་པ་འདི་འགྲུབ་པར་དཀའ་བའི་དོན་ཅིག་གྲུབ་པས་ཡིད་དགའ་ནས་ཨ་རཱ་གས་སྦྱར་བའོ།། མངྒ་ལཾ།། ༈ །།སངས་རྒྱས་ཀུན་གྱི་རང་བཞིན་སྐུ། །རང་བྱུང་རྡོ་རྗེའི་ཞབས་ལ་འདུད། །སངས་རྒྱས་ཀུན་གྱི་རིང་བཞིན་ནི། །ཆོས་སྐུ་སྐྱེ་བ་མེད་པར་ལགས། །སེམས་ཅན་ཀུན་གྱི་རང་བཞིན་ཡང་། །དེ་ལས་གཡོ་བ་མ་མཆིས་ཀྱང་། །རང་ངོ་ཤེས་དང་མི་ཤེས་ལས། །སངས་རྒྱས་སེམས་ཅན་ཁྱད་པར་བྱུང་། །གདོད་ནས་རྣམ་དག་ཆོས་ཀྱི་དབྱིངས། །འགྱུར་མེད་ནམ་མཁའ་ལྟ་བུ་ལ། །འདུ་བྱེད་གཡོ་བའི་བདག་འཛིན་གྱིས། །རྣམ་རྟོག་སྤྲིན་ཚོགས་ལྟ་སྤྲིན་ཚོགས་ནམ་མཁའི་ཆོ་འཕྲུལ་ལགས། །ནམ་མཁའ་ལས་བྱུང་ནམ་མཁར་ཐིམ། །སྤྲིན་ཀྱང་ནམ་མཁའ་ལས་གཞན་མིན། །བདག་ཏུ་འཛིན་པའི་རྣམ་རྟོག་
འདི། །སེམས་ལས་བྱུང་ཞིང་སེམས་སུ་ཐིམ། །སེམས་ལས་རྣམ་རྟོག་གཞན་མ་ཡིན། །རྣམ་རྟོག་རང་བཞིན་ཤེས་པ་ལ། །མི་རྟོག་ཡེ་ཤེས་མཚན་དུ་གསོལ། །རྣམ་རྟོག་དགག་པས་མི་རྟོག་མིན། །ཆུ་རླབས་ཆུ་ལས་གཞན་མིན་ལྟར། །རྣམ་རྟོག་སེམས་ལས་གཞན་མིན་ཏེ། །སེམས་ཉིད་ཡེ་ནས་ཆོས་ཀྱི་སྐུ། །ཆོས་སྐུ་དེ་ལ་བཅོས་མི་དགོས། །ཡག་འདོད་བཅོས་པས་འཁྲུལ་པ་ཉིད། །ངན་དོགས་གཟབ་པས་ངན་དུ་སོང་། །བཟོ་བཅོས་མེད་པར་རང་བབས་སུ། །ཀློད་དེ་བཞག་ལ་མ་ཡེངས་ཙམ། །འདི་བསྒོམ་གཏད་སོ་མེད་པ་ལ། །འདི་ཡིན་འདི་མིན་འཛིན་པ་ཞིག །ཉམས་ལ་བཟང་ངན་བླང་དོར་མེད། །གང་ཤར་དེ་ཡི་ངང་དུ་ལྷོད། །སངས་རྒྱས་དེ་ཡིན་སེམས་ཅན་དེ། །འཁོར་བ་དེ་ཡིན་མྱང་འདས་ཏེ། །ཐམས་ཅད་དེ་ཡི་རང་བཞིན་ཉིད། །སེམས་ཉིད་དངོས་པོའི་གནས་ཚུལ་ཏེ། །ཡིན་ལ་ཡིན་བཞིན་བཞག་པ་ན། །ཕྱག་ཆེན་སྒོམ་པའི་ཉམས་ལེན་ཟེར། །དེ་ཡི་རང་བཞིན་ཤེས་པ་ལ། །རང་བཞིན་ཡོངས་ཤེས་མི་ཟེར་རམ། །དབང་པོ་རབ་ཀྱི་གང་ཟག་ལ། །དེ་དོན་གོ་རྟོགས་དུས་གཅིག་
འབྱུང་། །དབང་པོ་འབྲིང་གི་གང་ཟག་ལ། །དང་པོ་གོ་སྟེ་ཕྱིས་ནས་རྟོགས། །དབང་པོ་ཐ་མའི་གང་ཟག་ལ། །གསོལ་བ་བཏབ་ཅིང་ཉམས་བླངས་ན། །རིག་པར་ཉམས་ནི་སྣ་ཚོགས་འཆར། །ཉམས་དེ་ཡལ་ནས་དངོས་སུ་རྟོགས། །གློ་བུར་སྒྲིབ་པ་ཟེར་བ་དེ། །འཛིན་པའི་འདུ་ཤེས་ཡིན་པར་སྣང་། །གང་དང་གང་ལ་དེར་འཛིན་གྱི། །མཚན་མ་མ་ཞུགས་རང་བབས་སུ། །མ་ཡེངས་ཙམ་ལས་གཞན་མེད་པར། །བཞག་པས་ཆོག་པ་གནད་དམ་པ། །དྲན་རྫི་དགོས་དང་མ་དགོས་ནི། །སློབ་དང་མི་སློབ་ལམ་གྱིས་ཁྱད་། །བ་གླང་མདུན་གྱི་གསེར་དེ་ནི། །ངོ་མི་ཤེས་ཀྱང་གསེར་ཡིན་ལྟར། །དྲན་རྫི་ཡོད་དམ་མེད་ཀྱང་རུང་། །སེམས་ཉིད་ཆོས་སྐུ་ཡིན་ཞེས་པ། །གཞི་ཡི་ཆོས་སྐད་གོ་བ་ཙམ། །གོ་བ་ཕྱི་ཡི་ལྷན་པོ་དེ། །མངོན་སུམ་མ་རྟོགས་དགོས་པ་ཆུང་། །དེ་ཕྱིར་མ་བསྒོམས་མ་རྟོགས་བར། །དྲན་རྫི་བརྟེན་པ་གནད་དུ་ཆེ། །འདི་བསྒོམ་གཏད་སོ་མེད་པ་དེ། །སྤྲོས་དང་བྲལ་བའི་རྟོགས་པ་སྟེ། །བསྒོམ་མེད་ཡིན་པར་རློམ་པ་ན། །ཝ་ཡི་སེང་སྐད་གོལ་ས་ཆེ། །འོན་ཀྱང་ཆོས་སྐུའི་བཞུགས་ཚུལ་གྱིས། །གནད་གསང་གསང་
སྔགས་སྙིང་པོའི་དོན། །ཡེ་ཤེས་མཁའ་འགྲོའི་སྙན་བརྒྱུད་དོན། །གྲུབ་ཆེན་རྣམས་ཀྱི་ཉམས་རྟོགས་གདེང་། །མདོ་རྒྱུད་ཀུན་གྱི་བཅུད་དང་སྙིང་། །བཀའ་བརྒྱུད་བླ་མའི་བཞེད་པའི་དོན། །རང་བྱུང་རྡོ་རྗེའི་དགོངས་པའི་མཐིལ། །ནམ་ལང་གཉིད་ལས་སད་པ་བཞིན། །བླ་མའི་ཐུགས་རྗེའི་ཅུང་ཟད་ཙམ། །རྟོགས་པ་བླ་མའི་དྲིན་དུ་གོ །སངས་རྒྱས་ཀུན་འདུས་བླ་མ་རྗེ། །ད་དུང་ཐུགས་རྗེའི་སྤྱན་གྱིས་གཟིགས། །བདག་དང་སློབ་མ་བརྒྱུད་བཅས་ལ། །རྒྱུན་ཆད་མེད་པར་བྱིན་གྱིས་རློབས། །ཞེས་པ་འདི་རྗེ་རང་བྱུང་རྡོ་རྗེའི་གསུང་གཅིག་མཐོང་བ་ལ་བརྟེན་ནས། རང་གི་རྟོགས་པ་ལ་བོགས་ཆེན་པོ་ཞིག་བྱུང་བ་ལ་བརྟེན་ནས་རྭགས་སྨྲས་པ་སྟེ། ཁ་སྦད་རང་མིང་ཉམས་པ་ཡོད། །རྗེ་བཙུན་བླ་མའི་རྟོགས་པ་དེ། །བདག་གཞན་འགྲོ་ལ་སྨིན་གྱུར་ཅིག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།