བླ་མ་ཀརྨ་དགེ་ལེགས་པའི་དྲིས་ལན་མགུར་སྣ་བདུན་པ།
བླ་མ་ཀརྨ་དགེ་ལེགས་པའི་དྲིས་ལན་མགུར་སྣ་བདུན་པ་བཞུགས་སོ།།
ན་མོ་གུ་རུ་བཛྲ་དྷ་ར་ཡེ། །དཔལ་རྡོ་རྗེ་འཆང་ལ་ཕྱག་འཚལ་ལོ། །ཁྱེད་བླ་མ་ཀརྨ་དགེ་ལེགས་པས། །གནས་གོ་བོ་ཁྱུང་ཕུག་གནས་སྒོ་དེ། །མི་བདག་གིས་ཕྱེས་ན་ཨེ་འབྱེད་གསུངས། །ཕྱི་ས་རྡོའི་གནས་སྒོ་ངས་མི་འབྱེད། །དེ་འབྱེད་པའི་ལུང་བསྟན་བདག་ལ་མེད། །ས་རྐོ་རྡོ་མཆུའི་ལྷ་ཞལ་ངས་མི་མཐོང་། །དེ་མཐོང་བའི་ཁ་བྱང་བདག་ལ་མེད། །ང་ཡི་མཆེད་པོ་ཆོས་དབང་ཀུན་བཟང་གིས། །གནས་གོ་བོ་ཕུག་དེ་མཇལ་བའི་དུས། །ཨོ་རྒྱན་གྱི་ཞབས་རྗེས་གསལ་པོ་གཅིག །སྔར་མེད་པར་གསར་དུ་རྙེད་ནས་ཀྱང་། །སྣུམ་བྱུགས་ནས་
ཀུན་ལ་བསྟན་འདུག་ཀྱང་། །དེ་ངེས་ཤེས་དང་ཡིད་རང་བྱེད་མཁན་མེད། །ངས་ཕྱི་ཡི་གནས་སྒོ་མི་འབྱེད་ཀྱང་། །ནང་རྡོ་རྗེ་ལུས་ཀྱི་གནས་སྒོ་ཅིག །དེ་ཅི་འབྱེད་ལ་བརྩོན་འགྲུས་བྱེད་ན་བསམ། །དེ་ཁ་བྱང་བླ་མེད་ཀྱི་རྒྱུད་སྡེ་མཐོང་། །ཡང་བྱང་བླ་མའི་བཀའ་ལུང་ཐོབ། །གནས་བྱང་རང་སེམས་ཀྱི་ངོ་བོ་མཐོང་། །གནས་སྤྱི་བོ་བདེ་ཆེན་གྱི་འཁོར་ལོ་ན། །ལྷ་ཕ་རྒྱུད་གསང་འདུས་ཀྱི་ལྷ་ཚོགས་བཞུགས། །ཐབས་གཙོ་བོ་སྟོན་ནས་འབྱེད་ན་བསམ། །གནས་མགྲིན་པ་ལོངས་སྤྱོད་ཀྱི་འཁོར་ལོ་ན། །ལྷ་མ་རྒྱུད་མཱ་ཡཱའི་ལྷ་ཚོགས་བཞུགས། །ཤེས་རབ་
གཙོ་བོར་སྟོན་ནས་འབྱེད་ན་བསམ། །གནས་སྙིང་ག་ཆོས་ཀྱི་འཁོར་ལོ་ན། །ལྷ་དགྱེས་རྡོར་སྤྲུལ་པའི་ལྷ་དགུ་བཞུགས། །ཐབས་ལམ་གཙོ་བོར་སྟོན་ནས་ཕྱེ་ན་བསམ། །གནས་ལྟེ་བ་སྤྲུལ་པའི་འཁོར་ལོ་ན། །ལྷ་བདེ་མཆོག་དྲུག་ཅུ་རྩ་གཉིས་བཞུགས། །ཨ་ཐུང་གཙོ་བོར་སྟོན་ནས་ཕྱེ་ན་བསམ། །གནས་གསང་གནས་བདེ་སྐྱོང་གི་འཁོར་ལོ་ན། །ལྷ་དུས་འཁོར་བདུན་བརྒྱ་ཉི་ཤུ་བཞུགས། །ཟུང་འཇུག་གཙོ་བོར་སྟོན་ནས་ཕྱེ་ན་བསམ། ། །གནས་ཙིཏྟ་སྙིང་གི་ཕུག་པ་ན། །ལྷ་ཞི་བ་བཞི་བཅུ་རྩ་གཉིས་བཞུགས། །ཨ་ཏི་གཙོ་བོར་སྟོན་ནས་ཕྱེ་ན་བསམ། །གནས་མགྲིན་པ་ལོངས་སྤྱོད་ཀྱི་འཁོར་ལོ་ན། །ལྷ་དག་པ་རིག་འཛིན་གྱི་ལྷ་ཚོགས་བཞུགས། །ཨ་ནུ་གཙོ་བོར་སྟོན་ནས་ཕྱེ་ན་བསམ། །གནས་སྤྱི་བོར་ཀླད་པ་དུང་ཁང་ན། ལྷ་ཁྲག་འཐུང་དྲུག་ཅུའི་ལྷ་ཚོགས་བཞུགས། །མ་ཧཱ་གཙོ་བོར་སྟོན་ནས་ཕྱེ་ན་བསམ། །ལུས་རྩ་གནས་ཉི་ཤུ་རྩ་བཞི་ན། །ཡུལ་ཉི་ཤུ་རྩ་བཞིའི་གནས་སྒོ་ཡོད། །རླུང་འཁྲུལ་འཁོར་ལ་བརྟེན་ནས་ཕྱེ་ན་བསམ། །གནས་གསང་བའི་རྩ་མདུད་འོག་མ་ན། །ཕྲིན་ལས་གྲུབ་པའི་གནས་ཆེན་ཡོད། །ལྷ་ལས་ཀྱི་མཁའ་
འགྲོ་དངོས་སུ་བཞུགས། །ངས་དབབ་བཟློག་ལ་བརྟེན་ནས་ཕྱེ་ན་བསམ། །གསང་གནས་ཀྱི་རྩ་མདུད་བར་མ་ན། །ལྷ་དོན་ཡོད་གྲུབ་པ་དངོས་སུ་བཞུགས། །ངས་ལྷ་ཞལ་གཅིག་དེ་རུ་མཇལ་ན་བསམ། །གསང་གནས་ཀྱི་རྩ་མདུད་གོང་མ་ན། །ལྷ་རྡོ་རྗེ་གཞོན་ནུ་དངོས་སུ་བཞུགས། །ངས་ཕྲིན་ལས་ཀྱི་རྟེན་འབྲེལ་ཞིག་བསྒྲིགས་ན་བསམ། །གནས་ལྟེ་བའི་རྩ་མདུད་འོག་མ་ནི། །ལྷ་རིན་ཆེན་མཁའ་འགྲོ་དངོས་སུ་བཞུགས། །ཡོན་ཏན་རྒྱས་པའི་གནས་ཆེན་ཡིན། །ངས་ཨ་ཐུང་གི་གདམས་པས་ཕྱེ་ན་བསམ། །གནས་ལྟེ་བའི་རྩ་མདུད་བར་མ་ན། །ལྷ་རིན་ཆེན་འབྱུང་ལྡན་དངོས་སུ་བཞུགས། །ངེས་ལྷ་ཞལ་གཅིག་དེ་རུ་མཇལ་ན་བསམ། །གནས་ལྟེ་བའི་རྩ་མདུད་འོག་མ་ན། །ལྷ་ཆེ་མཆོག་ཧེ་རུ་དངོས་སུ་བཞུགས། །ངས་ཡོན་ཏན་གྱི་རྟེན་འབྲེལ་ཞིག་བསྒྲིགས་ན་བསམ། །གནས་སྙིང་གའི་རྩ་མདུད་འོག་མ་ན། །གནས་མི་འགྱུར་རྡོ་རྗེའི་གཞལ་ཡས་ཡོད། །ལྷ་རྡོ་རྗེ་མཁའ་འགྲོ་དངོས་སུ་བཞུགས། །ངས་འོད་གསལ་གྱི་གདམས་པས་ཕྱེ་ན་བསམ། །གནས་སྙིང་གའི་རྩ་མདུད་བར་མ་ན། །ལྷ་རྡོ་རྗེ་སེམས་དཔའ་དངོས་
སུ་བཞུགས། །དྭངས་མ་ལྔ་ལྡན་གྱི་བུ་ག་ན། །ལྷ་ཆོས་སྐུ་ཀུན་བཟང་ཡབ་ཡུམ་བཞུགས། །ངས་ལྷ་ཞལ་གཅིག་དེ་རུ་མཇལ་ན་བསམ། །གནས་སྙིང་གའི་རྩ་མདུད་གོང་མ་ན། །ལྷ་ཐུགས་མཆོག་བཛྲ་ཧེ་རུ་ཀ །ཉམས་རྟོགས་པའི་རྟེན་འབྲེལ་ཞིག་བསྒྲིགས་ན་བསམ། །གནས་མགྲིན་པའི་རྩ་མདུད་འོག་མ་ན། །པདྨ་གསུང་གི་གནས་ཆེན་ཡོད། །ལྷ་པདྨ་ཊཱཀི་དངོས་སུ་བཞུགས། །ངས་སྔགས་བཟླས་ལ་བརྟེན་ནས་ཕྱེ་ན་བསམ། །གནས་མགྲིན་པའི་རྩ་མདུད་བར་མ་ན། །ལྷ་སྣང་བ་མཐའ་ཡས་དངོས་སུ་བཞུགས། །ངས་ལྷ་ཞལ་ཞིག་དེ་རུ་མཇལ་ན་བསམ། །གནས་མགྲིན་པའི་རྩ་མདུད་འོག་མ་ན། །ལྷ་པདྨ་དབང་ཆེན་དངོས་སུ་བཞུགས། །ངག་ནུས་པའི་རྟེན་འབྲེལ་ཞིག་བསྒྲིགས་ན་བསམ། །གནས་སྤྱི་བོའི་རྩ་མདུད་འོག་མ་ན། །བདེ་ཆེན་དག་པའི་གནས་ཆེན་ཡོད། །ལྷ་སངས་རྒྱས་མཁའ་འགྲོ་དངོས་སུ་བཞུགས། །ངས་རྩ་ཐིག་རླུང་གི་གདམས་པས་ཕྱེ་ན་བསམ། །གནས་སྤྱི་བོའི་རྩ་མདུད་བར་མ་ན། །ལྷ་སྐུ་མཆོག་རྣམ་པར་སྣང་མཛད་བཞུགས། །ངས་ལྷ་ཞལ་ཞིག་དེ་རུ་མཇལ་ན་བསམ། །གནས་སྤྱི་བོའི་རྩ་མདུད་གོང་མ་
ན། །ལྷ་འཇམ་དཔལ་གཤིན་རྗེ་གཤེད་པོ་བཞུགས། །ལུས་སྤྲུལ་སྐུའི་རྟེན་འབྲེལ་ཞིག་བསྒྲིགས་ན་བསམ། །མིག་ཙཱ་རི་དང་ཙཱ་འདྲའི་གངས་རི་ན། །མིག་འབྲས་གཡུ་མཚོ་དང་མཐིང་མཚོ་ཡོད། །ལྷ་ས་སྙིང་ཡབ་ཡུམ་དངོས་སུ་བཞུགས། །ངས་སྣང་སྟོང་གི་མཚོ་ཞལ་ཞིག་མཇལ་ན་བསམ། །རྣ་བ་དྷེ་ཝི་ཀོ་ཊི་ན། །ལྷ་ཕྱག་རྡོར་ཡབ་ཡུམ་དངོས་སུ་བཞུགས། །ངས་གྲག་སྟོང་གི་སྒྲུབ་ཕུག་ཞིག་མཇལ་ན་བསམ། །གནས་རྡོ་རྗེ་གངས་རིའི་ཏི་སེ་ན། །ལྷ་དབང་ཕྱུག་ཆེན་པོ་དངོས་སུ་བཞུགས། །ངས་དབབ་ལྡོག་གིས་གངས་བསྐོར་ཅིག་བྱེད་ན་བསམ། །གནས་དེ་ཚོ་ངེས་པར་འབྱེད་གྱུར་ན། །ས་རྡོའི་གནས་ཀྱིས་དོ་ཟླ་མེད། །སྔར་བྱོན་གྱི་གྲུབ་ཐོབ་ཐམས་ཅད་ཀྱང་། ། གནས་དེ་ཚོ་ཕྱེས་ནས་གྲུབ་པ་ཐོབ། །གནས་དེ་ཚོ་ཕྱེས་ནས་དངོས་གྲུབ་ཐོབ། །གནས་དེ་ཚོ་ཕྱེས་ནས་རྫོགས་སངས་རྒྱས། །མི་བདག་ཀྱང་དེ་འདྲའི་གནས་སྒོ་ན། །ད་མྱུར་དུ་གེགས་མེད་ཕྱེས་པ་ཞིག །ལྷ་ཐུགས་རྗེ་ཆེན་པོ་ཁྱེད་རང་མཁྱེན། །གནས་དེ་འདྲ་འབྱེད་ལ་ཡིད་སྨོན་ཆེ། །ས་རྡོའི་གནས་སྒོ་ཡིད་སྨོན་མེད། །དེ་འཕྲལ་དུ་ཡིད་ལ་ཤར་ནས་
སྨྲས། །མངྒ་ལཾ།། ༈ །།ན་མོ་མ་ཧཱ་མུ་དྲ་ཡེ། ཡང་གསོན་དང་ཀརྨ་དགེ་ལེགས་པ། །གནས་ཚྭ་བ་རྡོ་རྗེ་དྲེལ་དཀར་ནས། །སྐྱེ་བདུན་རིལ་བུའི་གཏེར་ཁ་སོགས། །ལུང་བསྟན་དང་ཁ་བྱང་བདག་ལ་མེད། །ཕྱི་རྫ་ས་གཏེར་ཆོས་གཏེར་ངས་མི་ཐོན། །དེ་ཐོན་པའི་ལུང་བསྟན་བདག་ལ་མེད། །ནང་རིག་པ་ཆོས་སྐུའི་གཏེར་ཆེན་གཅིག །དེའི་ཁ་བྱང་མདོ་རྒྱུད་ཀུན་ནས་མཐོང་། །ཡང་བྱང་བླ་མའི་བཀའ་ལུང་ཐོབ། །གནད་བྱང་ངོ་སྤྱོད་ལ་རྡོ་རུས་གཏུག །ལུས་ཤ་ཁྲག་གདོས་བཅས་ཀྱི་རི་བོ་ལ། །སེམས་ཆོས་སྐུའི་གཏེར་ཆེན་གཅིག་འདོན་ན་བསམ། །སེམས་ཞི་གནས་ཀྱི་རྒྱ་མཚོ་མེར་བ་ན། །སེམས་ལྷག་མཐོང་གི་ཆོས་གཏེར་གཅིག་ཐོན་ན་བསམ། །སེམས་འགྱུ་བའི་ནགས་ཚལ་སྤྱན་སྤུན་ན། །སེམས་གཅེར་མཐོང་གི་ཤོག་དྲིལ་འགའ་འདོན་ན་བསམ། །སེམས་སྒོམ་འདོད་ཀྱི་བྲག་རི་གཟར་མོ་ན། །སེམས་མ་བཅོས་ཀྱི་སྐྱེ་བདུན་གཅིག་འདོན་ན་བསམ། །སེམས་ཞེ་སྡང་གི་བྲག་རི་ནག་པོ་ན། །ལྷ་རྡོ་རྗེ་སེམས་དཔའི་ཐུགས་གཏེར་ཡོད། །མེ་ལོང་ཡེ་ཤེས་ཀྱི་གཏེར་ཁ་ཞིག་འདོན་ན་བསམ། །ང་རྒྱལ་གྱི་སྤང་རི་སེར་
པོ་ན། །ལྷ་རིན་ཆེན་འབྱུང་ལྡན་ཐུགས་གཏེར་ཡོད། །མཉམ་ཉིད་ཡེ་ཤེས་ཀྱི་གཏེར་ཁ་ཞིག་འདོན་ན་བསམ། །སེམས་འདོད་ཆགས་ཀྱི་རྫ་རི་དམར་པོ་ན། །ལྷ་སྣང་བ་མཐའ་ཡས་ཀྱི་ཐུགས་གཏེར་ཡོད། །སོར་རྟོག་ཡེ་ཤེས་ཀྱི་གཏེར་ཁ་ཞིག་འདོན་ན་བསམ། །སེམས་ཕྲག་དོག་གི་གཡའ་རི་ལྗང་ཁུ་ནི། །ལྷ་དོན་ཡོད་གྲུབ་པའི་ཐུགས་གཏེར་ཡོད། །བྱ་གྲུབ་ཡེ་ཤེས་ཀྱི་གཏེར་ཁ་ཞིག་འདོན་ན་བསམ། །གཉིད་གཏི་མུག་ཀླུ་བདུད་ཀྱི་བླ་མཚོ་ན། །སེམས་འོད་གསལ་ཆོས་སྐུའི་གཏེར་ཆེན་ཡོད། །འོད་གསལ་ཆོས་སྐུའི་གཏེར་ཞིག་འདོན་ན་བསམ། །རྨི་ལམ་འཁྲུལ་པའི་ལྷ་ཁང་ན། །ལོངས་སྐུ་ཞིང་སྦྱོང་གི་གཏེར་ཆེན་ཡོད། །ལོངས་སྐུ་དག་པའི་གཏེར་ཁ་ཞིག་འདོན་ན་བསམ། །སད་པ་ཉིང་འཁྲུལ་གྱི་བྲག་ཕུག་ན། །གཏུམ་མོ་ཨ་ཐུང་གི་གཏེར་གཅིག་ཡོད། །བདེ་དྲོད་རང་འབར་གྱི་གཏེར་གཅིག་འདོན་ན་བསམ། །ཐུན་མཚམས་ཐ་མལ་གྱི་འདྲེ་གནས་ན། །སྒྱུ་ལུས་ལྷ་སྐུའི་རྫས་གཏེར་ཡོད། །འཁྲུལ་པ་རང་གྲོལ་གྱི་གཏེར་གཅིག་འདོན་ན་བསམ། །གཏེར་དེ་འདྲ་ལ་ཡིད་སྨོན་ཤིན་ཏུ་ཆེ། །ད་བརྩོན་འགྲུས་གཅིག་ཆེ་ན་ཐོན་
ཡང་སྲིད། །མཚོ་རི་བྲག་ལ་སྦས་པའི་གཏེར་ཁ་འདིར། །དེ་དུག་སྦྲུལ་མགོ་ཡི་ནོར་བུ་བཞིན། །ཁོ་ཡག་ཉེས་ཤིན་ཏུ་ཆེ་བའི་ཕྱིར། །ད་ལུང་བསྟན་བྱུང་ཡང་དགའ་བ་ཆུང་། ། སྔོན་གཏེར་སྟོན་བརྒྱ་རྩ་ལྷག་ཙམ་བྱོན། །དེ་བར་ཆད་དབང་དུ་མ་ཤོར་བར། །དོན་འགྲོ་དོན་ལུང་བཞིན་འགྲུབ་པ་ནི། །རྗེ་རཏྣ་གླིང་པ་ཙམ་ཞིག་ལགས། །གཞན་གཏེར་སྟོན་ཚད་ལྡན་ཕལ་ཆེར་ཡང་། །ལ་ལ་ནི་དུས་གནད་རྟེན་འབྲེལ་འཆུགས། །ལ་ལ་ནི་གསང་བའི་རྟེན་འབྲེལ་འཆུགས། །ལ་ལ་ནི་ཕྱག་རྒྱའི་རྟེན་འབྲེལ་འཆུགས། །ལ་ལ་ནི་ཆོས་བདག་རྟེན་འབྲེལ་འཆུགས། །ལ་ལ་ནི་སྐུ་ཚེའི་བར་ཆད་གྱུར། །ལ་ལ་ནི་ཆོས་རྒྱུད་མྱུར་དུ་ཆད། །ལ་ལ་ནི་འགྲོ་དོན་རྒྱ་སྡུག་འགྱུར། །དེ་འདྲའི་ཁེ་ཉེས་དགོས་དོན་མེད། །ཆོས་འདོད་ན་གཏེར་ཆོས་ཀྱིས་ས་གཞི་གང་། །གཏེར་ཕྲན་གཅིག་ཐོན་པས་ཅི་མི་འཚངས། །གནས་འདོད་ན་གནས་ཆེན་གྱི་འཛམ་གླིང་གང་། །གནས་ཕྲན་གཅིག་ཕྱེས་པས་ཅི་མི་འཚིངས། །སྔོན་བྱོན་གྱི་སངས་རྒྱས་བྱང་སེམས་ཀུན། །རང་སེམས་ཆོས་སྐུའི་གཏེར་ཐོན་པས། །ས་ལམ་རྣམས་རིམ་པར་བགྲོད་པ་ཡིན། །བདག་ཀྱང་དེ་འདྲ་
ལ་ཡིད་སྨོན་འཆོར། །ཁྱེད་ཀྱང་དེ་འདྲ་ལ་ཐུགས་འདུན་མཛོད། །ཅེས་པ་ཡང་འཕྲལ་དུ་སྨྲས་སོ། །མངྒ་ལཾ།། ༈ །།ན་མོ་གུ་རུ་ཡེ། ཁྱེད་བླ་མ་ཀརྨ་དགེ་ལེགས་ཀྱིས། །ཁོང་བལ་པོ་རྟོགས་ལྡན་དྲིས་པའི་ལན། །རྗེ་མཁས་པ་ནཱ་རོ་པཎ་ཆེན་དེས། །ཁོང་སྒྲ་བསྒྱུར་མར་པ་ལོ་ཙཱ་ལ། །བུ་སེང་གེ་ཁྱུང་གི་ཕྲུ་གུ་བཞིན། །སློབ་མ་བས་ཀྱང་ཡང་སློབ་བཟང་། །ཞེས་གསུངས་ལུང་བསྟན་བསྔགས་པ་མཛད། །རྗེ་རྨོག་ཅོག་རིན་ཆེན་བརྩོན་འགྲུས་པས། །ཁོང་གྲུབ་ཐོབ་སྤྱོད་པ་དགོངས་པ་ལ། །ཉམས་རྟོགས་ང་བས་ཁྱོད་རང་བཟང་། །བ་ལ་མཛོ་སྐྱེས་ཡིན་གསུངས་སོ། །དཔེ་དེ་བཞིན་བལ་པོ་རྟོགས་ལྡན་པ། །ཕ་ང་བས་ཉམས་རྟོགས་བུ་ཁྱོད་བཟང་། །ངེད་ཕ་ཡང་ཕ་གླང་བུ་མཛོ་ཡིན། །མི་ང་བས་བུ་དགའ་བལ་པོ་དེ། །སེམས་ཤེས་རབ་རིག་པའི་བློ་ཁ་བྱེ། །ལག་ཅི་བཟོས་སྤྲུལ་པའི་ལྷ་བཟོ་འདྲ། །སེམས་ངེས་འབྱུང་སྐྱོ་ཤས་རང་དབང་མེད། །ཚེ་འདི་ཡི་བྱ་བར་ཡིད་མི་འགྱུར། །ཟས་འདོད་ཡོན་ཞེན་པ་གཏིང་ནས་ལོག །ཟས་དཀའ་ཐུབ་བཅུད་ལེན་སྙིང་ལ་འཆང་། །ཚེ་འདི་ཡི་སྙན་གྲགས་འདོད་པ་མེད། །ལུས་
བཙུན་ཚུགས་མི་འཛིན་སྨྱོ་སྤྱོད་བྱེད། །ཆོས་ལུས་ངག་དགེ་སྦྱོར་ཞེ་མི་ཚིམ། །གནད་རྩ་རླུང་ཐིག་ལེ་སྙིང་ལ་འཆང་། །སྒོམ་རྩེ་གཅིག་ཙམ་གྱིས་ཞེ་མི་ཚིམ། །དོན་རོ་གཅིག་ཆེན་པོ་སྙིང་ལ་འཆང་། །ཉམས་བཟང་དུས་དཔའ་སྐད་ཞེ་མི་ཚིམ། །རྐྱེན་དྲག་པོ་བསྲེ་བ་སྙིང་ལ་འཆང་། །ཆོས་བརྩམ་ཆོས་པོད་གཞུང་ཞེ་མི་ཚིམ། །དོན་གཏེར་ཆོས་སེལ་མེད་སྙིང་ལ་འཆང་། །འཕྲལ་གྲོང་ཆོག་འགྲོ་དོན་ཞེ་མི་ཚིམ། །ཚེ་བློས་བཏང་སློབ་མ་སྙིང་ལ་འཆང་། །ལུས་སོས་དལ་ཙམ་སྒྲུབ་ཞེ་མི་ཚིམ། །དོན་བརྩོན་འགྲུས་དྲག་པོ་སྙིང་ལ་འཆང་། །རྟག་དག་སྣང་ཕྲན་བུས་ཞེ་མི་ཚིམ། །དོན་ཡི་དམ་དངོས་མཇལ་སྙིང་ལ་འཆང་། །ལུས་འདུལ་ཁྲིམས་མཛེས་ཆོས་ཞེ་མི་ཚིམ། །སྔགས་གྲུབ་ཐོབ་སྤྱོད་པ་སྙིང་ལ་འཆང་། །གནས་གྲོང་ལྟག་རི་ཁྲོད་ཞེ་མི་ཚིམ། །གནས་མི་མེད་ལུང་སྟོང་སྙིང་ལ་འཆང་། །དོན་ལྟ་བ་ནམ་མཁའ་གཡའ་དག་འདྲ། །སེམས་སྒོམ་པ་ཆུ་བོའི་གཞུང་དང་འདྲ། །ལུས་སྤྱོད་པ་ངེས་མེད་སྨོན་པ་འདྲ། །ཉམས་རྨི་ལམ་ཞལ་གཟིགས་འཇའ་ལྟར་བཀྲ། །ངག་ངོ་སྲུང་མི་ཤེས་གདོལ་ཚིག་སྨྲ། །ནོར་གསོག་འཇོག་མི་ཤེས་ཅི་དགར་
སྤྱོད། །གནས་གཅིག་ཏུ་མི་སྡོད་རླུང་ལྟར་འཕྱོ། །མི་ང་ལ་མངོན་ཤེས་མ་མཆིས་ཀྱང་། །རྟགས་དེ་ཚོ་དོན་ལ་རྗེས་དཔག་ན། །ཁོང་ལས་ཅན་སྐྱེས་བུ་གཅིག་ཡིན་ངོ་ཤེས། །ངེས་མེད་སྤྲུལ་པ་གཅིག་ཡིན་ངོ་ཤེས། །ཚེ་སྲོག་ལ་བར་ཆད་མ་བྱུང་ན། །འབྲེལ་ཚད་དོན་ལྡན་ཞིག་འོང་ངོ་ཤེས། །རྗེ་པད་འབྱུང་གི་བསྟན་ལ་ཕན་ངོ་ཤེས་། །རྒྱ་ཆེན་གྱི་འགྲོ་དོན་ཞིག་འགྲུབ་བམ་སེམས། །དོན་དེ་ཚོ་བལ་པོའི་སྤྱོད་འགྲོའི་ལགས། །ཞེས་སྨྲས་སོ། །མངྒ་ལཾ།། ༈ །།ན་མོ་གུ་རུ་པྲ་ཝ་ཀ་ར་ཡེ། པད་འབྱུང་རྗེ་ལ་གསོལ་བ་འདེབས། །དཔེ་ཆ་འགའ་རེ་འདོད་གསུངས་པས། །འདི་ལ་ཉམས་མཚར་ཚིག་འགའ་ཞུ། །བདག་ཏུ་འཛིན་པའི་རྩ་བ་འདི། །ཤེས་རབ་མཚོན་ཆས་བཅད་པ་ན། །འཁོར་བའི་འཁོར་ལོ་རྒྱུན་ཆད་ནས། །སྤང་བྱའི་སྒྲིབ་པ་མཐའ་དག་གཏོར། །འཁོར་བ་མྱང་འདས་གནས་སུ་ཟློག །མཚོན་ཆ་འཁོར་ལོའི་གཏོར་ཟློག་ཡིན། །རང་ཉིད་དྲག་པོའི་སྐུར་གསལ་བས། །ཐ་མལ་གཟུགས་ཀྱི་ཕུང་པོ་ནི། །སྣང་སྟོང་ལྷ་ཡི་སྐུ་རུ་བཟློག །གུ་རུ་དྲག་པོའི་བཟློག་པ་ཡིན། །སྣང་བ་སྐུ་ཡི་ཁྱེར་སོ་
ཡིན། །མཐོང་ཚད་ལྷ་ཡི་སྐུར་གསལ་བས། །ཐ་མལ་གཟུགས་ཀྱི་སྣང་བ་ཟློག་།འཇམ་དཔལ་སྐུ་ཡི་བཟློག་པ་ཡིན། །སྣང་བ་སྐུ་ཡི་ཁྱེར་སོ་ཡིན། །གྲག་པ་གསུང་གི་ཁྱེར་སོ་ཡིན། །སྒྲ་གྲག་སྔགས་ཀྱི་སྒྲར་གསལ་བས། །བསྟོད་སྨད་ཆགས་སྡང་འཛིན་པ་ཟློག །རྟ་མགྲིན་གསུང་གི་བཟློག་པ་ཡིན། །དྲན་རྟོག་ཐུགས་ཀྱི་ཁྱེར་སོ་ཡིས། །གང་ཤར་བཟོ་མེད་རང་ངོར་བལྟ། །དྲན་ཚད་ཕྱག་རྒྱ་ཆེན་པོར་ཟློག །ཕྱག་རྡོར་ཐུགས་ཀྱི་བཟློག་པ་ཡིན། །གཏུམ་མོའི་འབར་འཛག་བཟློག་པ་ཡིས། །ཁམས་ལྔ་ཌཱཀྐི་ལྔ་རུ་སྒྱུར། །དུག་ལྔ་ཡེ་ཤེས་ལྔ་རུ་ཟློག །ཡོན་ཏན་མཁའ་འགྲོའི་བཟློག་པ་ཡིན། །ལྷ་སྔགས་འགྲེལ་བའི་ཏིང་འཛིན་གྱིས། །ལས་ཚོགས་གང་འདོད་ཐམས་ཅད་འགྲུབ། །བདུད་དང་ལོག་འདྲེན་བར་ཆད་ཟློག །ཡཀཱ་མེ་དབལ་བཟློག་པ་ཡིན། །རང་ངོ་ཤེས་པའི་མཁའ་ལྡིང་གིས། །མ་རིག་དུག་སྦྲུལ་ཞལ་དུ་ཐོབ། །རྣམ་རྟོག་ཐམས་ཅད་ཆོས་སྐུར་ཟློག །བྱ་ཁྱུང་རྒྱལ་པོའི་བཟློག་པ་ཡིན། །འདོད་ཆགས་མ་མོ་སྲིན་མོ་ལ། །ཡེ་རིག་ཡེ་ཤེས་རིཀས་མཆོད། །འདོད་ཆགས་བདེ་སྟོང་ངང་དུ་ཟློག །སྲིན་མོ་ཟ་ལམ་བཟློག་
པ་ཡིན། །དྲག་པོའི་གཏོར་ཟློག་དེ་ལྟར་མཛོད། །འདྲེ་ངན་བརྡུངས་བའི་གཏོར་ཟློག་སྟེ། །སེམས་བསྐྱེད་སྙིང་རྗེས་མ་ཟིན་ན། །ཕ་མ་བརྡུངས་དང་ཁྱད་པར་མེད། །དེ་ཕྱིར་སྙིང་རྗེ་སེམས་བསྐྱེད་གཟོབ། །ཁྲོ་བོའི་བཞུགས་གནས་དུང་ཁང་ལ། །བྱང་ཆུབ་སེམས་ཀྱི་ཆུ་རྒྱུན་འབབ། །གནས་སྐབས་བཞི་ཡི་སྒྲིབ་པ་གཏོར། །འབྲས་བུ་སྐུ་བཞིའི་ངང་དུ་ཟློག །ཁྲོ་ཆུའི་གཏོར་ཟློག་དེ་ལ་ཟེར། །ཁྲོ་དང་འདོད་ཆགས་གཏི་མུག་གསུམ། །བྱང་ཆུབ་སེམས་ཀྱི་ཆུ་རྒྱུན་གྱིས། །དུག་ལྔ་འཁོར་བའི་སྡོང་པོ་ལྔ་། །སྐུ་ལྔ་ཡེ་ཤེས་ལྔ་རུ་ཟློག །ཁྲོ་ཆུ་དུག་སྡོང་བཟློག་པ་ཡིན། །ཚོགས་གཉིས་ཟུང་དུ་འཇུག་པ་ཡིས། །ཚེ་བསོད་འཕེལ་ཞིང་བདག་འཛིན་ཞི། །ནག་པོ་བདུད་ཀྱི་གཡུལ་ངོ་ཟློག །ཚེ་བདག་ནག་པོའི་བཟློག་པ་ཡིན། །སྐྱེ་འཆི་མེད་པའི་དོན་རྟོགས་ནས། །ཤི་ཡང་བདག་གིས་སྐྲག་པ་མེད། །ངན་སོང་ནག་པོ་ལུས་ངན་ཟློག །འཆི་བདག་ནག་པོའི་བཟློག་པ་ཡིན། །སྲོག་དང་རྩོལ་བའི་རླུང་ལ་སྦྱོང་། །རྡོར་བཟླས་དག་གིས་ངག་ནུས་འབར། །ནག་པོ་བདུད་ཀྱི་བར་ཆད་ཟློག །སྲོག་བདག་ནག་པོའི་བཟློག་པ་ཡིན། །
བྷེ་ཝ་ས་ཏ་ཡོན་ཏན་ཏེ། །མདོ་རྒྱུད་མན་ངག་གནད་ཤེས་པས། །བླུན་སྒོམ་ཨུ་ཚུགས་གོལ་ས་ཟློག །བྷེ་ཝ་ས་ཏའི་བཟློག་པ་ཡིན། །ཤུགས་འབྱུང་དཀོར་ཟས་ཅི་ཟ་བ། །རང་བྱུང་ལྗགས་དམར་མེ་ལ་བསྲེགས། །ཕུང་པོའི་ལྷ་མཆོད་དཀོར་སྒྲིབ་ཟློག །ཟ་བ་ལྗགས་དམར་བཟློག་པ་ཡིན། །བཟློག་པ་མཛད་ན་དེ་ལྟར་མཛོད། །ཡ་མཚན་ལྡན་པའི་ཞིང་ཁམས་སུ། །མ་གྱུར་འགྲོ་རྣམས་འདྲེན་པའི་ཕྱིར། །ཐབས་ཤེས་རྭ་ལྟར་འབྲལ་མེད་ཅིང་། །རྩ་དང་རླུང་བསྒོམ་འཁྲུལ་པ་ཟློག །ཡ་མ་ར་ཙའི་བཟློག་པ་ཡིན། །གྱེར་བསྒོམ་རྔ་སྒོག་ཅི་བརྡུང་ཡང་། །གོང་མའི་ཕ་རབ་མི་ཟིན་པས། །གཏོར་ཟློག་དེ་ལྟར་བྱེད་སྙིང་འདོད། །ཚེ་ལུང་ཁྲུས་ལུང་མི་ཤེས་པར། །དམིགས་ངན་བསྒོམ་ཞིང་འགུགས་གཞུག་བྱེད། །ཞེ་སྡང་སྐྱེད་ཅིང་ཕུར་པ་འདེབས། །དམིགས་ངན་དེ་འདྲས་དམྱལ་བར་སྐྱེ། །དེ་འདྲའི་ལས་འགྲིགས་དགོས་པ་མེད། །སྐུ་གསུམ་རང་ཤར་ཧོམ་ཁུང་དུ། །དུག་ལྔ་དུག་གསུམ་དགྲ་དང་བགེགས། །བདག་མེད་རྟོགས་པའི་ཕུར་པས་བསྒྲལ། ། །བསྒྲལ་ལས་དེ་འདྲ་བྱེད་སྙིང་འདོད། །རྣམ་ཤེས་ཆོས་ཉིད་བསྟིམ་མི་ཤེས། །ལིངྒ་ཤ་
དུམ་ཁྲག་ཐིགས་རྣམས། །ང་རྒྱལ་བསྐྱེད་ཅིང་བསྟབ་པ་བྱེད། །དགྲ་བགེགས་ཟོས་བསམ་གཏོར་མར་བླུག །ཕྱི་མ་རང་ཉིད་གཤིན་རྗེས་ཟ། །དེ་འདྲའི་བསྟབ་པ་ངོས་མི་འདོད། །ཆོས་ཉིད་སྐྱེ་མེད་ཞལ་ནང་དུ། །གང་སྐྱེས་རྣམ་རྟོག་རང་ཞིར་བསྟབ། །ལྷན་སྐྱེས་ཡེ་ཤེས་ལྷ་ཞལ་མཐོང་། །དེ་འདྲའི་བསྟབ་པ་བྱེད་སྙིང་འདོད། །བརྡ་དོན་རྟེན་འབྲེལ་མི་ཤེས་པའི། །དུག་ཤིང་སྐྱེར་པའི་རྩང་ཁྲོས་དེ། །བཟོ་ན་ཕྱག་ཚ་ཁུར་ན་དཀའ། །འཁོར་ལོ་བཞི་ཡི་རྩ་འདབ་རྣམས། །དྲྭ་བ་དྲྭ་ཕྱེད་འཚུབ་མ་རིས། །རང་བྱུང་རྩང་ལྷས་ངོ་མཚར་ཆེ། །སྟོང་རའི་རྩང་ར་བསྐོར་སྙིང་འདོད། །ཨ་མྱེའི་གསོལ་ལྷག་ཆང་སྐྱུར་ཏེ། །ཡོན་བདག་ནས་ལ་གཟན་པའི་རྒྱུ། །འཐུང་ན་འདུལ་བའི་ཁྲིམས་དང་འགལ། །ཆང་སྐྱུར་བདུད་རྩི་ཅི་ལ་ཕན། །སྤྱི་བོ་ཚངས་པའི་ཡུལ་ས་ན། །ཧཾ་ཡིག་ཀུནྡྷའི་བདུད་རྩི་བབས། །ཧེ་རུ་ཀ་རྣམས་དེ་ལ་དགྱེས། །དེ་འདྲའི་ཆང་བཟང་བཙག་ན་བསམ། །འཆག་ཁྲག་གཏར་བའི་སྣེ་ཁྲག་དེ། །རྣམ་སྨིན་ཆེ་བས་ལྷ་མི་དགྱེས། །ལྟེ་བ་སྤྲུལ་པའི་འཁོར་ལོ་ན། །རཀྟ་ཀུན་གྱི་དྭངས་མ་ནི། །ཨ་ཐུང་
པདྨ་རཱ་གའི་མདོག །མ་རྒྱུད་མཁའ་འགྲོ་དེ་ལ་འཁོར། །དེ་འདྲའི་རཀྟ་སྤེལ་ན་བསམ། །ཟས་སུ་ཁ་རེའི་གཏོར་གདུགས་དེ། །ཁྱེར་ན་ཡོན་བདག་སེར་སྣ་སྐྱེ། །དབུ་མ་ལུས་ཀྱི་སྲོག་ཤིང་སྟེ། །བདེ་ཆེན་འཁོར་ལོའི་རྩ་འདབ་རྣམས། །རང་བྱུང་གདུགས་ཀྱི་ཚུལ་དུ་ཡོད། །གཙུག་ཏོར་རྩ་བཞི་ཏོག་གི་ཚུལ། །དེ་འདྲའི་གཏོར་གདུགས་ཕུབ་སྙིང་འདོད་། །གཟའ་དང་དབང་ཕྱུག་མཁའ་འགྲོ་སོགས། །ཐེབ་ལྡོག་རྒྱུ་དུས་མི་ཤེས་པའི། །གཏོར་འཕེན་ཕན་བས་གནོད་པ་ཆེ། །གང་ཤར་འགྱུ་བའི་གཏོར་མ་འདི། །རང་གྲོལ་དབྱིངས་སུ་འཕེན་ཤེས་ན། །ཉོན་མོངས་བདུད་བགེགས་ཐམས་ཅད་ཐུལ། །དེ་འདྲའི་གཏོར་མ་འཕེན་སྙིང་འདོད། །ལྔ་སེར་ལྟོ་འཕྱེ་ལ་སོགས་པ། །མི་ཤེས་མེ་མཆོད་གནོད་པ་ཆེ། །ཟང་ཟིང་རྫས་རྣམས་སྣང་བ་སྤུན། །ཀུན་རྟོགས་བསྲེག་རྫས་སྣ་ཚོགས་པ། །མི་རྟོག་ངང་དུ་བསྲེག་ཤེས་ན། །ཡེ་ཤེས་མེ་ཆེན་རབ་ཏུ་འབར། །དེ་འདྲའི་མེ་མཆོད་བླུག་སྙིང་འདོད། །ཨ་ནུ་ཨ་ཏི་ཡོ་གའི་ལུགས། །གཏོར་ཟློག་སྦྱིན་སྲེག་བྱ་ཚུལ་འདི། །འཕྲལ་དུ་ཉམས་ལ་ཤར་ནས་སྨྲས། མ་གྱུར་འགྲོ་བ་ཐམས་ཅད་ཀྱི། །གཏོར་
ཟློག་དེ་འདྲ་བཅའ་བར་ཤོག །ཅེས་སྨྲས་སོ། །མངྒ་ལཾ།། ༈ །།ན་མོ་ཤཱཀྱ་མུ་ན་ཡེ། །བླ་མ་རིག་འཛིན་དགེ་ལེགས་པས། །དུས་རྟག་ཏུ་ལུང་བསྟན་དགོས་གསུངས་པ། །སྐྱེས་པའི་ཐ་མ་ངེས་པར་འཆི། །བསགས་པའི་ཐ་མ་ངེས་པར་ཟད། །འདུས་པའི་ཐ་མ་ངེས་པར་འབྲལ། །བརྩེགས་པའི་ཐ་མ་ངེས་པར་འཇིག །དར་བའི་ཐ་མ་ངེས་པར་རྒུད། །ཐམས་ཅད་མི་རྟག་སྒྱུ་མ་ཡིན། །རྟག་པར་གནས་པ་གཅིག་ཀྱང་མེད། །དེ་ནི་ལུང་བསྟན་རྩ་ཚིག་ཡིན། །ལོ་ཟླ་ཡུད་ཡུད་ཟད་པ་འདི། །ཚེ་ཡུད་ཡུད་ཟད་པའི་ལུང་བསྟན་ཡིན། །མི་ཕུ་ཤི་མདའ་ཤི་ཟེར་བ་འདི། །ད་མྱུར་དུ་འཆི་བའི་ལུང་བསྟན་ཡིན། །ནོར་བསགས་པ་དགྲ་ཡིས་ཁྱེར་ཐོས་ཚེ། །ནོར་སྙིང་པོ་མེད་པའི་ལུང་བསྟན་ཡིན། །གྲོགས་ཉེ་དུ་དམེ་ཤི་བྱས་ཐོས་ཚེ། །གྲོགས་སྙིང་པོ་མེད་པའི་ལུང་བསྟན་ཡིན། །རྗེ་རྒྱལ་པོ་མེད་པའི་སྒྲ་ཐོས་ཚེ། །གཏམ་སྙིང་པོ་མེད་པའི་ལུང་བསྟན་ཡིན་། །རྗེ་སངས་རྒྱས་ལ་སྐུར་བ་འདེབས་ཐོས་ཚེ། །གཏམ་སྙིང་པོ་མེད་པའི་ལུང་བསྟན་ཡིན། །དགོན་དགེ་འདུན་ཚོགས་ཆེན་འཐོར་ཐོས་ཚེ། །གྲྭ་སློབ་སྙིང་པོ་མེད་པའི་
ལུང་བསྟན་ཡིན། །མི་ད་ནངས་ནད་མེད་དོ་དགོང་ཤི། །ཚེ་ངེས་པ་མེད་པའི་ལུང་བསྟན་ཡིན། །གནས་གྲོག་ཚང་རེ་ན་སྟོང་ཕྲག་བརྒྱ། །དལ་འབྱོར་རྙེད་དཀའ་ལུང་བསྟན་ཡིན། །འབྲས་དྲུག་སོ་སོར་སྨིན་པ་འདི། །རྒྱུ་འབྲས་བསླུ་མེད་ཀྱི་ལུང་བསྟན་ཡིན། །སྨན་རིམ་གྲོས་མ་བསླུས་ཤི་ཐོས་ཚེ། །འཆི་བ་བཟློག་མེད་ཀྱི་ལུང་བསྟན་ཡིན། །རང་སྡུག་བསྔལ་བྱུང་དུས་ཡིད་མི་དགའ། །སྡིག་སྒྲིབ་བཤགས་པ་དགོས་པའི་ལུང་བསྟན་ཡིན། །ཚེ་བསོད་དཔལ་འབྱོར་རྒྱས་ན་དགའ་བ་སྐྱེས། །བསོད་ནམས་ཚོགས་བསགས་དགོས་པའི་ལུང་བསྟན་ཡིན། །མི་གནོད་འཚེ་མཁན་ལ་མནར་སེམས་སྐྱེ། །བྱམས་སྙིང་རྗེ་བསྒོམ་དགོས་ཀྱི་ལུང་བསྟན་ཡིན། །རང་ཁོ་ན་སྐྱིད་འདོད་ཞེ་ན་ཆང་། །ཐེག་དམན་ལམ་དུ་གོལ་བའི་ལུང་བསྟན་ཡིན། །ཞེ་སྡང་བསྐྱེད་ཅིང་ཁྲོ་སྐུ་ཨ་འཐས་བསྒོམ། །སྲིན་པོའི་ལུས་སུ་སྐྱེ་བའི་ལུང་བསྟན་ཡིན། །དམ་ཚིག་མི་སྲུང་གསང་སྔགས་སྒྲུབ་ལ་འབདེ། །རླུང་ལྷའི་འཁོར་དུ་སྐྱེ་བའི་ལུང་བསྟན་ཡིན། །བླ་མ་མི་བཀུར་སྨད་ཅིང་དཔེ་ཆོས་སྤྱོད། །དམ་སྲིའི་རིགས་སུ་སྐྱེ་བའི་ལུང་བསྟན་ཡིན། །སྤྱོད་པ་མ་དག་ལྟ་བ་རྣམ་པར་དག །
ཀླུ་ཡི་རིགས་སུ་སྐྱེ་བའི་ལུང་བསྟན་ཡིན། །ལྟ་བ་མ་རྟོགས་སྤྱོད་པར་རྣམ་པར་དག །ཐར་པ་མི་ཐོབ་འཁོར་བ་ཡུན་རིང་དུ། །ལྷ་མིའི་ལུས་བཟང་ལེན་པའི་ལུང་བསྟན་ཡིན། །བདེ་གསལ་མི་རྟོག་ཉམས་ལ་ཆགས་ཞེན་ཆེ། །ཁམས་གསུམ་གནས་སུ་གོལ་བའི་ལུང་བསྟན་ཡིན། །རྣམ་རྟོག་བཀག་ནས་མི་རྟོག་སྒོམ་པར་སེམས། །དགེ་སྡིག་གཉིས་ཀ་སྤངས་ནས་སྟོང་སྙམ་གནས། །ཧཱཤང་ལྟ་བར་གོལ་བའི་ལུང་བསྟན་ཡིན། །ལྟ་བ་མཐོ་ཡང་རྒྱུ་འབྲས་བྱོལ་ཉོག་སྤྱོད། །བདུད་ཀྱི་ལྟ་བར་གོལ་བའི་ལུང་བསྟན་ཡིན། །དགེ་བ་མི་བསྒྲུབ་སྡིག་པ་ཚབས་ཆེན་སྤྱོད། །དམྱལ་བར་གཏན་ཡུལ་བྱེད་པའི་ལུང་བསྟན་ཡིན། །དམ་པའི་ཆོས་ལ་འབྲེལ་བ་ཅུང་ཟད་མེད། །ནམ་ཡང་ཐར་དུས་མེད་པའི་ལུང་བསྟན་ཡིན། །སྡོམ་པ་དམ་ཚིག་ཞུས་ནས་མི་བསྲུངས་ན། །རེ་ཞིག་ཚབས་ཆེ་ཡུན་ཐུང་སྡུག་བསྔལ་སྤྱོད། །ནམ་ཞིག་ཐར་པ་ཐོབ་པའི་ལུང་བསྟན་ཡིན། །སྙིང་རྗེ་ཆུང་ཞིང་རང་དོན་ཆོས་ལ་འབད། །ཉན་ཐོས་དགྲ་བཅོམ་ཐོབ་པའི་ལུང་བསྟན་ཡིན། །བླ་མ་གསང་ཞིང་རང་དོན་ཆོས་ལ་འབད། །རང་རྒྱལ་དགྲ་བཅོམ་ཐོབ་པའི་ལུང་
བསྟན་ཡིན། །སྙིང་རྗེ་ཆེ་བས་དགེ་བ་འགྲོ་ལ་བསྔོ། །ནམ་ཞིག་རྫོགས་སངས་རྒྱས་པའི་ལུང་བསྟན་ཡིན། །བླ་མ་ཡི་དམ་དངོས་ལྟར་སྒྲུབ་ལ་བརྩོན། །དངོས་གྲུབ་རྣམ་གཉིས་ཐོབ་པའི་ལུང་བསྟན་ཡིན། །རྩེ་གཅིག་ཡེངས་མེད་རྩ་རླུང་འོད་གསལ་བསྒོམ། །མྱུར་དུ་སངས་རྒྱས་འགྲུབ་པའི་ལུང་བསྟན་ཡིན། །བླ་མ་སངས་རྒྱས་དངོས་ལ་གསོལ་འདེབས་རེམ། །མྱུར་དུ་ཉམས་རྟོགས་འཆར་བའི་ལུང་བསྟན་ཡིན། །དགེ་སྒྲུབ་སྡིག་སྤང་སྨོན་ལམ་རྣམ་པར་དག །དག་པའི་ཞིང་ཁམས་བགྲོད་པའི་ལུང་བསྟན་ཡིན། །ལུང་བསྟན་སོ་བཞིར་ལྡན་པའི་ལུང་བསྟན་འདི། །འཕྲལ་དུ་ཡིད་ལ་ཤར་ནས་སྨྲས་པ་ཡིན། །མངྒ་ལཾ། ༈ །།ན་མོ་ཀཱ་ལ་ཙཀྲ་མཉྫ་གྷོ་ཥ་ཡེ། དཀར་ནག་གི་རྩིས་གཞུང་རྒྱ་མཚོ་ལས། །བློ་གྲོས་ཀྱི་སྣང་བ་ཆེར་རྒྱས་པའི། །རྩིས་པའི་མཆོག་གྱུར་དགེ་ལེགས་པས། །རྒྱ་འབོར་དང་དོན་བདུན་གྱིས་རྩིས་གཞུང་ལ། །རྡེལ་བཞག་གི་ཡི་གེ་གྱིས་གསུངས་པ། །ཕྱི་ཀུན་རྫོབ་ཀྱི་རྡེའུ་དཀར་ནག་དེ། །ཐབས་མཁས་ཀྱི་དགེ་བསྐུལ་མ་ཤེས་ན། །ལྕགས་ཚེར་གྱིས་འབིགས་པའི་དམྱལ་བར་སྐྱེ། །ནང་དོན་དམ་གྱི་རྡེའུ་འདི་
ལྟར་བཀྲམ། །ལུས་སྣང་སྟོང་རྡོར་སེམས་ཀྱི་རྡེའུ་གཞི་བཏིང་། །སྙིང་ཙཏྟ་འོད་ཀྱི་རེ་མིག་ལ། །ལྷ་ཞི་བའི་རྡེའུ་དཀར་ཞེ་གཉིས་བཞག །མགོ་ཀླད་པ་དུང་ཁང་གི་རེ་མིག་ལ། །ལྷ་ཁྲག་འཐུང་གི་རྡེའུ་ནག་ང་བརྒྱད་བཞག །ངག་མགྲིན་པ་འཇའ་ཚོན་གྱི་རྡེའུ་ལམ་ལ། །ལྷ་རིག་འཛིན་གྱི་རྡེའུ་ཕྲེང་ལྔ་པོ་བཀོད། །ཡུལ་ཉི་ཤུ་རྩ་བཞིའི་རྡེའུ་ལམ་ལ། །ལྷ་དཔའ་བོ་ཌཱཀྐིས་ཁ་དམར་རྒྱབ། །ཁྱེད་རྒྱ་འབོར་ཅིག་རྒྱབ་ན་དེ་ལྟར་རྒྱོབས། །རྡེའུ་ངོ་མཚར་ཅན་བརྒྱ་དང་རྩ་དགུ་ཡིན། །ད་དཔྱད་དོན་བདུན་མ་འདི་ལྟར་སྤྱད། །ཚུལ་ཁྲིམས་ཀྱི་ས་གཞི་གཙང་མ་ལ། །དགེ་བའི་ལོ་ཏོག་ཐམས་ཅད་སྨིན། །དེ་ས་གཞི་ལྟ་བུར་དཔྱད་པ་ཡིན། །ལྷན་སྐྱེས་མ་རིག་པའི་རུས་སྦལ་ལ། །ཆོས་རྟེན་འབྲེལ་བཅུ་གཉིས་ལུགས་སུ་འབྱུང་། །དེ་འཁོར་བའི་རྒྱ་མཚོ་འཁོར་ལུགས་ཤེས། །དེ་ལུས་པོ་ཐར་པའི་ཐོབ་ལུགས་གསལ། །དེ་རུས་སྦལ་ལྟ་བུར་དཔྱད་པ་ཡིན། །ཚད་མེད་བཞི་ཡི་ཀ་བ་ལ། །འཕགས་ལམ་བརྒྱད་ཀྱི་གདུང་མ་བྲིས། །བསྡུ་དངོས་བཞི་ཡི་སྒོ་བཞི་གསལ། །ཚད་མེད་སྙིང་རྗེ་ཕུག་ན་གནས། །དེ་གཙུག་ལག་ལྟ་བུར་དཔྱད་པ་
ཡིན། །ཆོས་སྡོམ་པ་གསུམ་གྱི་བང་རིམ་སྟེང་། །བློ་བྱང་ཆུབ་སེམས་ཀྱི་བུམ་པ་བཞག །དོན་ཚད་མེད་བཞི་ཡི་བྲེ་སྟེང་དུ། །ས་བཅུ་རིམ་པའི་ཆོས་འཁོར་ལ། །མ་འགྲོ་དྲུག་སྐྱོབ་པའི་གདུགས་ཀྱི་དགབ། །འབྲས་བུ་སྐུ་གསུམ་ཉི་ཟླའི་ཏོག །དེ་མཆོད་རྟེན་ལྟ་བུར་དཔྱད་པ་ཡིན། །ཆོས་ཚད་མེད་བཞི་ཡི་རི་རབ་ལ། །དོན་འཕགས་ནོར་གསེར་རི་བདུན་གྱིས་བསྐོར། །ཐབས་ཤེས་རབ་ཉི་ཟླ་ཟུང་གིས་བརྒྱན། །དེ་རི་རབ་ལྟ་བུ་དཔྱད་པ་ཡིན། །ཆོས་སེམས་བསྐྱེད་ཟབ་མོའི་རྩ་བ་ལ། །དོན་བྱང་ཆུབ་སེམས་ཀྱི་སྡོང་པོ་རྒྱས། །བྱང་ཆོས་སོ་བདུན་གྱི་ཡལ་འདབ་ལ། །སྐུ་ལྔ་ཡེ་ཤེས་ཀྱི་མེ་ཏོག་བཀྲ། །སྐུ་གསུམ་ལྷུན་གྲུབ་ཀྱི་འབྲས་བུ་སྨིན། །དེ་ལྗོན་ཤིང་ལྟ་བུར་དཔྱད་པ་ཡིན། །དོན་མཐའ་བཞིར་མ་ལྷུང་དབུ་མའི་ལམ། །ཆོས་འོད་གསལ་ཕྱག་རྒྱ་ཆེན་པོ་དེ། །དཔེ་སྤྲིན་ཐག་ཆད་པའི་ནམ་མཁའ་བཞིན། །སྤྲིན་འཇའ་ཚོན་ཀུན་ལངས་སྣ་ཚོགས་པ། །དེ་མཁའ་ལས་བྱུང་ཞིང་མཁའ་ལ་ཐིམ། །སེམས་རྣམ་རྟོག་འགྱུ་བ་སྣ་ཚོགས་པ། །དེ་སེམས་ལས་བྱུང་ཞིང་སེམས་ལ་ཐིམ། །སྤྲིན་འཇའ་ཚོན་ཤར་ཚེ་ནམ་མཁའི་ངང་། །སེམས་འགྱུ་བ་
སེམས་ལས་གཞན་དུ་མེད། །གཞི་ཕྱག་རྒྱ་ཆེན་པོའི་དོན་རྟོགས་ནས། །ཡེ་གདོད་ནས་ཐམས་ཅད་ཆོས་སྐུར་རྟོགས། །དེ་ནམ་མཁའ་ལྟ་བུར་དཔྱད་པ་ཡིན། ། རྩིས་དཔྱད་དོན་བདུན་མ་དེ་ལ་མཛོད། །ཅེས་སྨྲས་སོ། །མངྒ་ལཾ།། ༈ །།ན་མོ་གུ་རུ་དྷེ་ཝ་ཌཱཀི་ནི། རིག་འཛིན་ཀརྨ་དགེ་ལེགས་པས། །འབྲས་མོའི་གནས་ཡིག་གསུངས་པའི་ལན། །འབྲས་མོ་ལྗོངས་སོགས་གནས་ཆེན་དུ། །འགྲོ་བའི་དུས་ཚོད་ཡིན་སྲིད་ཀྱང་། །ན་སོ་རྒས་པས་ཕྱིན་པར་དཀའ། །དེ་བས་ཐག་ཉེའི་སྦས་ལུང་དང་། ། གནས་རི་བཟང་པོ་མང་དུ་གདའ། །བྱང་ཆུབ་སེམས་བསྐྱེད་ལུང་པ་ན། །བྱང་ཆོས་སོ་བདུན་གྱི་ལོ་ཏོག་འཁྲུངས། །སྐུ་ལྔ་ཡེ་ཤེས་ཀྱི་ནོར་བུ་ལ། །བཟོད་པའི་ལམ་འགག་དམ་དྲགས་པས། །དགྲ་བོ་མཐའ་དམག་གི་འཇིགས་པ་བྲལ། །འབྲས་མོའི་སྦས་ལུང་ཞིག་དེ་ན་གདའ། །ཕྱག་རྒྱ་ཆེན་པོའི་ལུང་པ་ན། །ཉམས་རྟོགས་རང་གྲོལ་གྱི་ལོ་ཏོག་རྒྱས། །དུག་ལྔ་ཡེ་ཤེས་ཀྱི་མེ་ཏོག་རྒྱས། །རང་སེམས་སངས་རྒྱས་ཀྱི་གཏེར་ཆེན་བརྡོལ། །པདྨ་བཀོད་ཆེན་ཞིག་དེ་ན་གདའ། །ཕྱག་རྒྱ་ཆེན་པོའི་ལུང་པ་ན། །ཉམས་
རྟོགས་རང་གྲོལ་གྱི་ལོ་ཏོག་རྒྱས། །ཞི་གནས་བརྟན་པོའི་ལུང་ཕྲན་ལ། །ལྷག་མཐོང་ཉམས་རྟོགས་ཀྱི་གྲོ་མ་ཞིམ། །གྲོ་མའི་སྐུ་ལུང་ཞིག་དེ་ན་གདའ། །ཙིཏྟ་འོད་ཀྱི་ལུང་པ་ན། །ཞི་བའི་ལྷ་ཚོགས་རང་བྱོན་བཞུགས། །དྭངས་མ་ལྔ་ཡི་འཇའ་ཚོན་འཁྲིགས། །ཟམ་བུའི་གཏེར་ལུང་ཞིག་དེ་ན་གདའ། །ཀླད་པའི་དུང་མཚོ་དཀར་པོ་ན། །ཁྲག་འཐུང་ལྔ་བཅུའི་ཞལ་གཟིགས་གསལ། །ཙཱ་རི་མཚོ་དཀར་ཞིག་དེ་ན་གདའ། །ལྟོ་བ་རྒྱ་མཚོ་ཆེན་པོའི་དཀྱིལ། །སྤྲུལ་པའི་འཁོར་ལོ་པདྨའི་སྟེང་། །ཨ་ཐུང་ཕག་མོ་དངོས་སུ་བཞུགས། །མ་ཕམ་གཡུ་མཚོ་ཞིག་དེ་ན་གདའ། །དབུ་མ་བྱང་ཆུབ་ཤིང་དྲུང་ན། །སྙིང་ཁ་མི་ཤིགས་རྡོ་རྗེའི་གདན། །རང་སེམས་མ་ཧཱ་བོ་དྷི་བཞུགས། །རྡོ་རྗེ་གདན་ཞིག་དེ་ན་གདའ། །ཡན་ལག་ལྔ་ཡི་དབུས་མ་སྟེ། །དཔྲལ་བ་མི་ཤིགས་མཛོད་སྤུ་ན། །སྐུ་མཆོག་འཇམ་དཔལ་ལྷ་ཚོགས་བཞུགས། །རི་བོ་རྩེ་ལྔ་ཞིག་དེ་གདའ། །གསང་གནས་བདེ་སྐྱོང་འཁོར་ལོ་ན། །དབང་ཕྱུག་ཆེན་པོ་རང་བྱུང་ཡོད། །ཏི་སེའི་གནས་ཆེན་ཞིག་དེ་ན་གདའ། །དབུ་སྐྲ་ལྕང་ལོ་འཁྱིལ་བའི་གསེབ། །རྣ་བོ་ཕྱག་ན་རྡོ་རྗེ་བཞུགས། །
ལྕང་ལོ་ཅན་ཞིག་དེ་ན་གདའ། །ཁ་རང་བྱུང་ཡེ་ཤེས་བྲག་ཕུག་ན། །ལྕེ་རང་བྱོན་སྤྱན་རས་གཟིགས་དབང་བཞུགས། །པོ་ཊ་ལ་ཡི་གནས་ཤིག་དེ་ན་གདའ། །རྫི་མ་མུ་ལེའི་གྲམ་ཤིང་ཚོལ། །མིག་འབྲས་བྱང་སེམས་ས་སྙིང་བཞུགས། །རྒྱ་ནག་གི་མི་ཤན་ཞིག་དེ་ན་གདའ། །རང་ལུས་གླང་ཆེན་འགྱིང་རི་ལ། །རང་སེམས་ཀུན་ཏུ་བཟང་པོ་བཞུགས། །གླང་ཆེན་འགྱིང་རི་ཞིག་དེ་གདའ། །ཐག་ཉེ་བའི་སྦས་ལུང་གནས་རི་དེ། །བགྲོད་འདོད་ཀྱི་ཐུགས་མོས་ཡོད་པ་ན། །གསང་སྔགས་ཀྱི་ཉམས་ལེན་གནད་དུ་བསྣུན། །བརྩོན་འགྲུས་ལ་ཐང་ལྷོད་མེད་པར་མཛོད། །སྦས་ལུང་དེ་ཚོར་ཕྱིན་པས་འཇིགས་པ་བྲལ། །གནས་རི་དེ་ཚོ་བསྐོར་ན་སྒྲིབ་པ་དག །རང་བྱོན་དེ་ཚོ་མཇལ་ན་དངོས་གྲུབ་ཐོབ། །དེ་ཕྱིར་གནས་བསྐོར་དེ་ལྟར་མཛོད། །ཅེས་སྨྲས་སོ། །བླ་མ་ཀརྨ་དགེ་ལེགས་པའི་དྲིས་ལན་མགུར་སྣ་བདུན་པོ་འདི་ཤིང་ཕོ་རྟ་ལོའི་སྤྲུལ་གྱི་ཟླ་བའི་ནག་པོའི་ཕྱོགས་ཀྱི་ཚེས་བདུན་བརྒྱད་གཉིས་ལ། ཀརྨ་ཨ་རཱ་གས་རྫོགས་པར་བྲིས་པའོ། །མངྒ་ལཾ།། །། ༧ ནང་ཆེན་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།