གསུང་མགུར། རང་སྤྱོད་ལ་ལེགས་པར་བརྟག་པའི་གླུ།
རང་སྤྱོད་ལ་ལེགས་པར་བརྟག་པའི་གླུའོ། །རྗེ་དེ་ཉིད་དགུང་ལོ་སོ་བཞིའི་དུས་ཙམ་ལ་བསྒྲིགས་པའི་སྐོར་ཡིན། ན་མོ་རཏྣ་ཏྲ་ཡཱ་ཡ། རྗེ་མཁྱེན་ལྡན་ཀུན་གྱི་སྤྱན་གྱིས་གཟིགས། །སྒོས་སྲུང་མ་རྣམས་ཀྱི་ཞལ་ཆེ་ཆོད། །བདག་མཆིས་པའི་བན་ཆུང་འདུག་པ་འདི། །རང་འགྱོད་མེད་ཀྱི་གདེང་ཚད་འདི་ལྟར་གདལ། །ང་དང་པོར་དལ་འབྱོར་རིན་ཆེན་ཐོབ། །དེ་རྗེས་རྒྱལ་བའི་བསྟན་ལ་ཞུགས། །བར་དུ་མཚན་ལྡན་གྱི་བླ་མ་བསྟེན། །མི་སྐལ་ཆད་ཟེར་ཡང་ང་མི་འགྱོད། །རྗེ་སྤྲུལ་པའི་སྐུ་ལ་བསྙེན་པར་རྫོགས། །རྩ་བཞི་དང་ཆང་ལྔ་སྲོག་ལྟར་བསྲུང་། །གཞན་ཉེས་པ་ཀུན་ལ་གསོ་སྦྱང་བྱས། །མི་སྡོམ་འཆལ་ཟེར་ཡང་ང་མ་འགྱོད། །ལྷ་ཇོ་བོའི་དྲུང་དུ་སེམས་བསྐྱེད་ཞུས། །ལམ་ཕ་རོལ་ཕྱིན་དྲུག་ཅི་ནུས་འབད། །ལས་ཅི་བྱེད་འགྲོ་བའི་དོན་དུ་བསྔོས། །མི་བློ་ཆུང་ཟེར་ཡང་ང་མི་འགྱོད། །རྗེ་མཚན་ལྡན་འགའ་ལ་དབང་བཞི་ཞུས། །སྐུ་གསུམ་གྱི་དམ་ཚིག་སྲོག་ལྟར་བསྲུངས། །ཡན་ལག་ཀུན་བསྐང་བཤགས་བདག་འཇུག་འབད། །མི་དམ་ཉམས་ཟེར་ཡང་ང་མི་འགྱོད། །མཁས་གྲུབ་ཀྱི་འདུན་པ་ཉིན་གླིང་དུ། །སྤྱི་དགེ་འདུན་ཀུན་ལ་དག་
སྣང་སྦྱང་། །བསྒྲིགས་མཐུན་པར་ཆོས་པ་ཀུན་ཞལ་འཆམ། །མི་མ་རབས་ཟེར་ཡང་ང་མི་འགྱོད། །ཉིན་རེ་ལ་ཁྱབ་པ་དྲུག་རེ་བསླབས། །བར་བར་དུ་ཟིན་ཐུན་དང་རིག་ལུང་སྦྱངས། །འཛིན་ཤེས་རབ་ཆེ་ཞེས་ཀུན་གྱིས་སྨོན། །མི་ཏིར་རྒན་ཟེར་ཡང་ང་མི་འགྱོད། །རྗེ་བླ་མ་ལ་བཟློག་མེད་ཀྱི་མོས་གུས་སྐྱེས། །རང་སེམས་ལ་འགྱུར་མེད་ཀྱི་ངེས་ཤེས་རྙེད། །དུས་ངེས་མེད་དུ་རང་ཞལ་ཡང་ཡང་བལྟས། །མི་ཁ་ལྟ་མཁན་ཟེར་ཡང་ང་མི་འགྱོད། །དུས་ཕལ་ཆེར་བསྐྱེད་རིམ་འདུ་འབྲལ་མེད། །བསྙེན་སྒྲུབ་དང་མཆོད་གཏོར་རྒྱུན་དུ་འབད། ། །བློ་གཏད་ས་རྩ་བ་གསུམ་ལ་བྱས། །མི་འདྲེས་ཁྱེར་ཟེར་ཡང་ང་མི་འགྱོད། །ཆོ་ག་དང་དབང་བསྐུར་མདོས་ཟློག་སོགས། །དོན་སྦྱོར་དངོས་རྗེས་གསུམ་མ་ཚང་བའི། །བསླུ་ཆོས་ཀྱི་མགོ་བསྐོར་གཏན་ནས་སྤོངས། །མི་ལོག་འཚོ་ཅན་ཟེར་ཡང་ང་མི་འགྱོད། །ཆུང་བསམ་ལུས་འཕྲོད་ནས་ཆོས་སྒོར་ཞུགས། །ཆོས་ཐོས་བསམ་བསྒོམ་ལ་མི་ཚེ་བསྐྱལ། །ལམ་བསླབ་པ་གསུམ་ལ་ཅི་ནུས་འབད། །ད་ངན་འགྲོར་ལྟུང་ཡང་ང་མི་འགྱོད། །ད་འགྱོད་མེད་བཅུ་ཡི་དབྱངས་ཆུང་འདི། །ངན་པའི་རང་
བསྟོད་མ་ལགས་ཏེ། །རང་ངེས་ཤེས་སྐྱེས་ནས་སྨྲས་པ་ཡིན། །ད་འགྱོད་མེད་ཀྱི་བན་ཆུང་བློ་རེ་བདེ།། །ཞེས་པ་འདི་སྡུག་འདྲེས་བཏབ་པ་འགའ་ལ་གླུད་གཏོར་དང་དྲག་ལས་མང་པོ་དང་། དམིགས་པ་དྲག་པོས་གཅུན་ནས་ཚེགས་མེད་དུ་བདེ་བ་མང་པོ་བྱུང་བ་ལ། གཞན་དག་ན་རེ། ཁོ་རང་གི་འདྲེ་དེ་བསྒྲུབ་པ་མིན་ཏེ་ཡིན་ན་དེ་ཙམ་ཕན་མི་ཐུབ་ཕྲག་དོག་གིས་སྨྲ་བ་བྱུང་བས། ཡོན་བདག་ཐམས་ཅད་ལ་དེ་ལྟར་སྨྱོ་བའི་འདྲེ་དེ་བདག་གིས་གཟིར་བ་དང་བསྐྱེད་པ་མ་གཏོགས། །ལྷར་འདུ་ཤེས་ནས་མཆོད་བསྒྲུབ་བྱས་རེ་ཞེས་མནའ་དཀོན་མཆོག་གསུམ་དཔང་བཙུགས་ཡང་ཡང་བྱས་ཤིང་ཡི་གེ་འབྱམས་ཡིག་བཏང་བས། ངོམ་གྱི་སྡེ་བའི་དྲུང་ནས་དེ་ལྟར་དཔྱོད་ལྡན་སུས་མི་སེམས་ཤིང་ཕྲག་དོག་གིས་སྨྲ་བ་ནི་རྒྱལ་བ་ཡབ་སྲས་ལའང་འདི་དག་གིས་ལྷག་པར་དུའང་སྨྲ་འདུག་པས་ན། གཞན་ལ་ལྟ་ཅི་སྨོས་ཞེས་བློ་གཟུར་གནས་ཀྱི་གསུང་དང་། བཀའ་ཤོག་དང་བསླབ་བྱ་དར་ཁ་བཅས་བྱུང་བས་སེམས་ངལ་སོས། ཁ་ཅིག་དག་བྱས་པ་མ་ཉན་པའི་པའི་ཆོས་གཏམ་སྨྲ་བྱུང་སྟེ། རོ་སྙོམས་མཁན་ལ་དེ་འདྲའི་ངག་མི་རུང་ཡང་བདག་རོ་སྙོམས་པ་མིན་ལ། གཞན་མི་དད་པའི་རྒྱུ་གང་ཡང་བྱང་ཆུབ་སེམས་དཔའ་གསལ་བའམ་མི་སྤངས་ན་ལྟུང་བར་བཤད་པས་གསལ། ཁ་ཅིག་གིས་མནའ་བྱས་པས་ཀྱང་དུས་ལོག་པ་དག་དཀའ་བའི་ཚུལ་ཟེར་བས། འོ་ན་རང་མ་ཁྲེལ་བ་ཆོས་པ་རབ་ཏུ་གསུངས་པས་ཡང་རང་ཁྲེལ་བའམ་འགྱོད་པ་མེད་ནས་དབྱངས་དེ་སྨྲས་སོ། །ཞེས་པའང་
ཨ་རཱ་གས་སོ།། ༈ །།ན་མོ་མ་ཧཱ་མུ་དྲ་ཡེ། སྐྱབས་ཆོས་ཀྱི་དབང་ཕྱུག་ཞབས་ལ་འདུད། །གདོན་ཕོ་གདོན་འདི་རྒྱལ་པོ་མཐུ་སྟོབས་ཅན། །བཏུལ་ན་འདི་ཡང་ཐུལ་ལགས་ཏེ། །བདུད་གཏི་མུག་འདི་ཐུལ་དུས་མི་གདའ་ན། །མོ་གདོན་གྱི་འདྲེ་མོ་ཞན་ཆགས་ཅན། །བསྐྱེད་ན་མོ་ཡང་འབྲོས་ལགས་ཏེ། །བདུད་འདོད་སྲེད་འདི་ཕུད་དུས་མི་གདའ་ན། །འོག་ཀླུ་བདུད་ནག་པོ་ཞེ་ནག་པོ། །གཟེར་ནས་འདི་ཡང་ཐུབ་ལགས་ཏེ། །བདུད་གཏི་མུག་འདི་སངས་དུས་མི་གདའ་ན། །ཤེས་དཀའ་བ་སྒྲ་དང་ཚད་མ་གཉིས། །བསླབ་ན་འདི་གཉིས་ཀྱང་ལོབ་ལགས་ཀྱང་། །སེམས་ཡེངས་མེད་འདི་ལོབ་དུས་མི་གདའ་ན། །རས་བྲིས་ཀྱི་སྐུ་དང་ཤོག་བྲིས་ཀྱི་གསུང་། །བྲིས་ན་འདི་གཉིས་ཀྱང་བཀྲ་ལགས་ཏེ། །སེམས་སྟོང་གསལ་འདི་བཀྲ་དུས་མི་གདའ་ན། །ནག་པོ་རྒྱ་དང་སོག་བྲང་དབུས། །སོང་ན་འདི་གཉིས་སུག་ཕྱིན་ལགས་ཏེ། །རང་བཙན་སར་ཕྱིན་དུས་མི་གདའ་ན། །འབྲོང་ཀོའི་གཞུང་དང་ཤ་ཀོའི་གཉའ། །མཉེས་ན་འདི་གཉིས་ཀྱང་ཉེད་ལགས་ཏེ། །རང་སེམས་རང་རྒྱུད་འདི་གཉེན་དུས་མི་གདའ་ན། །ནག་པོའི་མཛེ་
དང་སྨྱོ་འབོག་གཟའ། །གསལ་ན་འདི་ཡང་སོས་ལགས་ཏེ། །སེམས་དུག་ལྔ་འདི་སེལ་དུས་མི་གདའ་ན། །ཚིག་གསུམ་གསུམ་བསྡེབ་པའི་མི་གདའ་བརྒྱད་། །ངག་དབྱངས་སུ་སྨྲས་ཀྱང་ཚིག་ཏུ་གདའ། །དོན་ཉམས་སུ་ལོན་པ་མི་གདའ་ན། །ཞེས་པ་འདི་གདོན་དྲག་པོས་གཟིར་བའི་སྨྱོ་འབོག་ཅན་འགའ་ལ་དྲག་ལས་ཀྱི་སྦྱོར་བས་བཏུལ་ནས་བདེ་བར་བྱུང་ཡང་། །ཡོན་བདག་དེ་དག་འགའ་རེས་མི་དགའ་བའི་རྣམ་འགྱུར་སྟོན་པ་དང་། འགའ་ཞིག་གིས་ངོ་མཚར་དུ་མི་འཛིན་པར་བཙོག་ལྟ་བ་འདྲ་འགའ་རེ་བྱུང་ནས། རྗེ་གླང་རི་ཐང་པས་སྐྱོན་ཐམས་ཅད་རང་གི་ཡིན། ཡོན་ཏན་ཐམས་ཅད་ཇོ་བོ་སེམས་ཅན་གྱི་ཡིན་གསུངས་འདུག་པས་ཅི་ཡིན་བསམས་པས། ཡོན་བདག་ལ་ཕན་འདོད་ཀྱི་ཆགས་ཞེན་དང་། རང་ནུས་པ་ཅན་དུ་རློམ་པའི་ང་རྒྱལ་དང་། གདོན་དེ་ལ་ཐུབ་ཐུབ་ཀྱི་བརྙས་ཆོས་དང་། བསྐྱེད་རིམ་ངར་དབང་གི་ཞེ་སྡང་དང་། འབུལ་ནོར་ལ་རེ་བ་ཅུང་ཟད་རེ་བྱུང་གདལ། སྔགས་ཀྱི་དམ་ཚིག་ལས་མི་འཚམ་པ་ལྔའི་ནང་ནས་ཡི་དྭགས་ལ་མི་འཁུ་ཟེར་བ་དེར་སྣང་། རང་གི་ཆོས་གྲོགས་ཕན་ཚུན་ཆོས་ཀྱི་འབྲེལ་པ་ཟབ་ཅིང་ཐུགས་དམ་ཡུལ་དུ་ཕྱིན་པ་ཞིག་གིས་ཀྱང་། ། ད་ལོ་ཁོ་ན་ལ་སྨྱོན་པ་དེ་ཙམ་བཏུལ་བ་ཚེ་ལ་གནོད། དེ་ལྟ་བུའི་དྲག་ལས་ཁོ་ན་བྱེད་པ་དཔེ་གར་སྲིད། ངེད་རྣམས་ཀྱང་ཁ་ཐོན་པར་བྱུང་། ད་དེ་ཙམ་མཛད་མི་ཐོན་དང་ཁ་ཐོན་ཡོངས་གསུངས་ནས་ཐུགས་རྩར་བཅར་བའི་
གསུང་ཕྲིན་བྱུང་བས། ད་ཕྱིན་ཤུགས་འབྱུང་ལ་ཕན་ན་མ་གཏོགས་ཆེད་གཉེར་གྱིས་བརྡུང་བཏགས་དྲག་དམིགས་ཀྱིས་གཟིར་བར་མི་བྱེད་པར་དམ་བཅས་ཏེ་ཉམས་ལེན་ལ་སྐྱོ་བའི་གླུ་ཆུང་དེ་བྱས་པའོ།། །།རྗེ་བླ་མ་རྣམས་ལ་ཕྱག་འཚལ་ལོ། །མི་ལ་ལས་བླ་མ་སྐྱོན་ལྟར་གསང་། །མི་ཁོ་བོས་བླ་མ་རྒྱན་དུ་འཕྱུར། །མི་ལ་ལས་ཆོས་ཐོབ་མཚངས་སུ་སྦ། །མི་ཁོ་བོས་ཆོས་ཐོབ་རྒྱན་དུ་བཏགས། དྲིན་མཉམ་མེད་ཀྱི་རྒྱལ་བ་ཆོས་ཀྱི་དབང་། །མིང་ཡོངས་སུ་གྲགས་པའི་ཀརྨ་པ། །དེ་སྐྱབས་གནས་ཀྱི་སངས་རྒྱས་རྣམ་གཉིས་ཡིན། །དྲུང་རྒྱལ་ཚབ་དྲག་པ་མཆོག་དབྱངས་གཅིག །དཔལ་སི་ཏུ་ཆོས་ཀྱི་རྒྱལ་མཚན་གཉིས། །རྗེ་ངག་དབང་བཀྲ་ཤིས་དཔལ་གྲུབ་གསུམ། །ཆོས་འབྲེལ་ཐོགས་ཀྱི་རྒྱལ་སྲས་རྣམ་གསུམ་ཡིན། །དཔལ་འབྲུག་པ་འཇིག་རྟེན་གསུམ་གྲགས་དང་། །སྒྲུབ་བརྒྱུད་ཀྱི་བཀའ་བབས་དྲུང་ཡིག་པ། །བརྟུལ་ཞུགས་ཀྱི་བཀའ་བབས་རྒྱ་ར་བ། །དེ་ཆོས་འབྲེལ་ཐོབ་ཀྱི་གྲུབ་ཐོབ་རྣམ་གསུམ་ཡིན། །དཔལ་ཨཱརྱ་དེ་ཝཱ་ཆོས་ཀྱི་རྗེ། །དེ་མོ་སྤྲུལ་སྐུ་གོང་འོག་གཉིས། །གནས་གདན་ས་མཐིལ་གྱི་མཁན་ཆེན་བཞི། །ཆོས་འབྲེལ་ཐོབ་ཀྱི་ཆོས་རྗེ་ཆེ་བཞི་ཡིན། །རྗེ་དྲུང་པ་ཀུན་
དགའ་རྣམ་རྒྱལ་དང་། །དཔལ་ངག་དབང་འཇིགས་མེད་དྲག་པ་གཉིས། །སྔགས་འཆང་བ་ཀརྨ་དོན་ཡོད་གསུམ། །སྦས་པའི་རྣལ་འབྱོར་པར་རྣམ་རོལ་བཞི། །དྲིན་འཁོར་མེད་ཀྱི་སློབ་དཔོན་རྣམ་བཞི་ཡིན། །དཔལ་འཇམ་དབྱངས་དཀོན་མཆོག་དཔལ་འབྱོར་དང་། །སློབ་ཆུང་བ་ཀརྨ་རྒྱས་པ་གཉིས། །ལུང་རིག་པའི་དབང་ཕྱུག་རྒྱལ་རོངས་པ། །གཞུང་རབ་འབྱམས་སྨྲ་བའི་བདེ་ཆེན་བཞི། །མཚན་ཉིད་ཀྱི་དགེ་རྒན་རྣམ་བཞི་ཡིན། །རྗེ་རྟོགས་ལྡན་ཚུལ་ཁྲིམས་རིན་ཆེན་དང་། །དོན་བརྒྱུད་ལྡན་ཆོས་ལྡན་རབ་འབྱོར་གཉིས། །བསྙེན་སྒྲུབ་པ་མཐར་ཕྱིན་གུ་རུའི་མཚན། །གཞུང་བཀའ་བཅུ་སྨྲ་བའི་རྣམ་དག་པ། །གཞུང་གསོལ་རིག་མཐར་སོན་དགེ་ལེགས་དང་། །རང་མཆེད་པོ་ཆོས་དབང་ཀུན་བཟང་དྲུག །ཆོས་ཕན་ཚུན་འབྲེལ་ཡོད་ཀྱི་བླ་མ་ཡིན། །ཆོས་ཚད་མའི་དབང་ཕྱུག་འགྲོ་སྐྱོང་བ། །མཚན་རབ་འབྱམས་སུ་གྲགས་པའི་དགའ་བ་པ། །གཞུང་ཀུན་ལ་སྦྱང་པའི་ཀུན་འཕེལ་བ། །ཆོས་འབྲེལ་ཐོབ་ཀྱི་རབ་འབྱམས་རྣམ་གསུམ་ཡིན། །མཚན་ལོ་ཙཱ་རུ་འབོད་པའི་ཆོས་དྲུག་པ། །མཚན་མགོན་བླ་རུ་འབོད་པའི་བསམ་གཏན་
པ། །མཚན་རྐང་ཀྱོག་རུ་འབོད་པའི་མཆོད་གནས་པ། །མཚན་ཁྲོམ་པ་རུ་འབོད་པའི་བཀའ་བཅུ་པ། །མཚན་རིན་ཆེན་དུ་འབོད་པའི་གནས་སྒོ་བ། །ཆོས་འབྲེལ་ཡོད་ཀྱི་བླ་མ་རྣམ་ལྔ་ཡིན། །ཆོས་དྲིན་ཐོབ་ཀྱི་བླ་མ་སུམ་བཅུ་བཞི། །ད་རུང་ལོ་རོ་གཏེར་སྟོན་མི་འགྱུར་རྡོ་རྗེ། སྤུ་བོ་གཏེར་སྟོན་བདུད་འདུལ་རྡོ་རྗེ། ལྷོ་རིན་པོ་ཆེ་ཕྲིན་ལས་རྣམ་རྒྱལ། སྒར་རྗེ་བླ་མ་ཀུན་བཟང་ཤེས་རབ། །འཇའ་ཚོན་པའི་སློབ་མ་མུ་ནེའི་མཚན་ཅན། ལྷ་ས་ཀུན་མཁྱེན་ཆེན་པོ་ལུང་རིགས་ཉི་མ། རྫ་ཁོག་བླ་མ་ཀརྨ་འདུལ་བ། བལ་པོ་རྟོགས་ལྡན་པདྨ་རིག་འཛིན། རབ་འབྱམས་བཀའ་ཆེན་རྣམ་དག །དྲུང་པ་སྤྲུལ་སྐུ་སྒྲུབ་བརྒྱུད་བསྟན་པ་རྣམ་རྒྱལ་སོགས་མང་ངོ་། མཆན། མི་ངས་ནི་མི་གསང་ཐོད་དུ་བཅིང་། །ཆོས་རྒྱ་མཚོ་དང་འདྲ་སྟེ་ཟད་མི་ཤེས། །མཐའ་རྫོགས་པར་ཐོབ་དུས་མི་གདའ་སྟེ། །འདུལ་བ་དང་ཕར་ཕྱིན་མངོན་པའི་ཆོས། །ཚད་མ་དང་ལེགས་སྦྱར་བོད་ཀྱི་སྒྲ། །ཡིག་རིགས་དང་སྙན་ངག་ཚིག་གི་རྒྱུན། །གྱེར་དབྱངས་དང་རྔ་རྡུང་ཕྱག་རྒྱའི་རིགས། །བཟོ་རིག་དང་འགའ་འབྲེལ་བསྡུས་རའི་རིགས། །སྐྱེས་རབ་དང་རྣམ་ཐར་ཆོས་འབྱུང་རིགས། །ཊི་ཀ་དང་སྤྱི་དོན་བཤད་པའི་རིགས། །བསྙེན་སྒྲུབ་དང་ལས་སྦྱོར་སྒྲུབ་ཐབས་རིགས། །དབུ་ཕྱག་
ཚན་ནས་ཀློག་དྲ་འབྱོར་སྤྱི་མང་གནས་པ། །མཚན་ཟློས་ལྟ་ནའཁོད་པ་བཀའ་བཅུ་པ། གངས་ཆེན་རྒྱུ་འབོད་པའི་གནས་སྒོ་། སྒོས་འབྲེལ་ཐོག་ཕྱི་དང་རྫོགས་ཆེན་ཁྲིད་ཀྱི་རིགས། །དབང་བཞི་དང་རྗེས་གནང་བྱིན་རླབས་ཀྱི། །གསོལ་འདེབས་མགུར་འབུམ་ཉམས་དབྱངས་རིགས། །ཆོས་གང་ལའང་དག་སྣང་གི་འབྲེལ་པ་བཞག །ཚད་པོད་ཆུང་གིས་གཞལ་ན་སུམ་ཅུ་ཙམ། །མི་ངས་ནི་མི་གསང་རྒྱན་དུ་ངོམས། །མགོར་ནོར་བུའི་ཅོད་པན་ལྔ་བརྒྱ་བས། །ཕ་བླ་མས་བརྒྱན་ན་བརྗིད་དོ་སྙམ། །ལུས་ཟ་འོག་གི་ལྷབ་ལྷུབ་ལྔ་བརྒྱ་བས། །ཆོས་སྡོམ་གསུམ་གྱིས་བརྒྱན་ན་མཛེས་སོ་སྙམ། །ཞེས་པ་འདི་རང་གི་ཆོས་གྲོགས་བླ་མ་ཞིག་ལ། དབང་ལུང་ཤིན་ཏུ་མང་བ་འགའ་ཕུལ་བས། གཞན་མ་ཞུས་པའི་ཁུངས་གསང་ནས་བརྒྱུད་པ་བཟང་པོ་གཞན་དག་ནས་བྱུང་བ་སྐད་ཟེར་ནས། གཞན་ལ་ཟབ་སོར་འཆད་འདུག་ཟེར་བ་ཐོས་ནས། ཆོས་ཐོབ་པའི་བླ་མ་གསང་ན་བརྒྱུད་པ་བཟང་པོ་ནས་ཐོབ་སྐད་སྨྲ་བ་གསང་སྔགས་ནས་ལྟུང་བར་བཤད་ལ། བླ་མ་དེ་ཞན་པའི་འདུ་ཤེས་ཀྱིས་ཡིན་ན་རྩ་ལྟུང་དང་པོ་འབྱུང་། དེ་མིན་ཀྱང་རང་མཆོག་ཏུ་འདོད་ཅིང་བླ་མ་ལ་སེམས་དད་ནའང་དེ་དང་ཆ་འདྲའམ་ལྟུང་བ་སྦོམ་པོར་འགྱུར། བླ་མ་ལ་རྩེ་གཅིག་དད་ཀྱང་ཆོས་དེ་གཞན་གྱིས་ཞུ་དོགས་ན་ཉེས་བྱས་སུ་གདའ་བ་དང་། རྒྱལ་བུ་དོན་འགྲུབ་ཀྱིས་ཡི་གེ་གཞན་ནས་བསླབ་པ་དང་། མུ་སྟེགས་པ་མང་པོ་བླ་མར་བསྟེན་པ་དང་། སློབ་དཔོན་པདྨས་རྫ་མཁན་ལ་ཕྱག་འཚལ་ནས་རྫ་བཟོ་བསླབས། རྒྱ་
བོད་ཀྱི་མཁས་གྲུབ་རྣམས་ཀྱི་རྣམ་ཐར་ན་བླ་མ་མཆོག་དམན་སྣ་ཚོགས་པ་མ་གསང་བར་གདའ་སྟེ། ཁོང་རྣམས་ངན་དུ་མ་སོང་བར་འདུག་པ་ལ། ང་རང་གིས་ནི་གསང་དགོས་པ་མེད་སྙམ་ནས། བླ་མའི་རྩིས་བསྒྲང་འདི་བྱས་སོ། །ཞེས་ཀརྨ་ཨ་རཱ་གས་སོ།། །།ན་མོ་གུ་རུ་ལོ་ཀེ་ཤྭ་ར་ཡེ། འཕགས་པ་རྣམས་ལ་ང་རྒྱལ་དྲི་མ་བྲལ། །བླུན་པོས་རང་ཉིད་མཁས་བཙུན་བཟང་པོར་རློམ། །དེ་ཕྱིར་བླུན་པོ་བདག་གིས་རང་བསྟོད་ལ། །མཁས་པ་རྣམས་ཀྱིས་བཞད་གད་སྟོན་མཛོད་ཅིག །ཀུན་དང་མཐུན་ཞིང་བཀའ་བློ་བདེ་ལུགས་ཀྱིས། །འཇིག་རྟེན་མི་ཆོས་མཁན་ཞིག་འདྲ་དང་གཅིག །ལུས་ཀྱི་ཀུན་སྤྱོད་དམ་ཞིང་བཙུན་ལུགས་ཀྱིས། །སོ་ཐར་ཐེག་དམན་དགེ་སློང་འདྲ་དང་གཉིས། །སེམས་སྐྱེད་སྨོན་ལམ་སྙིང་རྗེ་ཆེ་ལུགས་ཀྱིས། །མདོ་ལུགས་སོར་བཞག་བྱང་སེམས་འདྲ་དང་གསུམ། །བསྐྱེད་རིམ་བསྙེན་སྒྲུབ་མཆོད་གཏོར་བརྩོན་ལུགས་ཀྱིས། །མ་ཧཱ་ཡོ་གའི་རྣལ་འབྱོར་འདྲ་དང་བཞི། །ཐིག་ལེ་གཅེས་སྤྲས་རྩ་རླུང་སྒོམ་ལུགས་ཀྱིས། །ཨ་ནུ་ཡོ་གའི་རྣལ་འབྱོར་འདྲ་དང་ལྔ། །འཁོར་འདས་སྣོད་བཅུད་སྟོང་པར་རྟགས་ལུས་ཀྱིས། །ཨ་ཏི་ཡོ་གའི་རྣལ་འབྱོར་འདྲ་དང་དྲུག །མོས་གུས་འགྱུར་མེད་
གདུང་ཤུགས་ཆེ་ལུགས་ཀྱིས། །པཎ་ཆེན་ནཱ་རོའི་བུ་བརྒྱུད་འདྲ་དང་བདུན། །ཐ་མལ་ཤེས་པ་གླན་སྒོམ་བྱེད་ལུགས་ཀྱིས། །མེ་ཏྲི་ཆེན་པོའི་བུ་བརྒྱུད་འདྲ་དང་བརྒྱད། །ཉམས་དང་མི་ལམ་དག་སྣང་མང་ལུགས་ཀྱིས། །འཇིག་རྟེན་སྟབས་ཁ་མཁན་ཅིག་འདྲ་དང་དགུ། །བཀའ་སྲུང་སྒྲུབ་སྐོར་རྫས་སྣ་མང་ལུགས་ཀྱིས། །ཕུང་བྱེད་ངན་སྔགས་མཁན་ཞི་འདྲ་དང་བཅུ། །བསླབ་པའི་ཡོན་ཏན་སྣ་ཁ་མང་ལུགས་ཀྱིས། །བློ་གསལ་ཤེས་རབ་ཅན་ཞིག་འདྲ་བཅུ་གཅིག །ཡི་གེ་དྲུག་པ་རྒྱུན་དུ་འདྲེན་ལུགས་ཀྱིས། ། ཏི་ཐུག་བླུན་དད་ཅན་ཞིག་འདྲ་བཅུ་གཉིས། །ཁ་ལ་མི་ཉན་གྲྭ་སློབ་ཧྲལ་ཧྲུལ་མང་། །བཟའ་ངན་དཔོན་པོ་འདྲ་དང་བཅུ་གསུམ་སྟེ། །སུ་ཤིའི་བསྔོ་ཞུས་སྣ་རེ་འོང་ལུགས་ཀྱིས། །སྡེ་དགོན་བསྐོར་བླ་འདྲ་དང་བཅུ་བཞི་པ། །དངོས་པོ་གང་བྱུང་གར་སོང་འདི་ཆ་མེད། །གྲམ་སེང་ཆུ་བླུགས་འདྲ་དང་བཅོ་ལྔའོ། །ཀུན་གྱིས་གཏད་ར་གཏུག་སྒོ་མང་ལུགས་ཀྱིས། །ས་མདོའི་གཙོ་བོ་འདྲ་དང་བཅུ་དྲུག་པ། དབང་ལུང་དཔེ་ཆ་མང་ཡང་ཆོག་ཤེས་མེད། །ལན་ཚྭའི་ཆུ་འཐུང་འདྲ་དང་བཅུ་བདུན་པ། འདི་ནས་འཕོས་ཚེ་བདེ་བ་ཅན་དུ་
འགྲོ། །བྱ་རྒོད་རྙི་ཐར་འདྲ་དང་བཅོ་བརྒྱད་པ། འདྲ་བ་བཅོ་བརྒྱད་ང་ཡི་རྣམ་ཐར་ཡིན། །འཕྲལ་དུ་ཉམས་ལ་ཤར་ནས་གླུ་རུ་བླངས། །ཁམས་ཀྱི་བྱིང་བ་བསང་ཕྱིར་རཱ་གས་སྨྲས།། ༈ །།རྗེ་ཆོས་ཀྱི་དབང་ཕྱུག་ཞབས་ལ་འདུད། །ངས་དང་པོར་གདམས་ངག་གི་ནུ་ཞོ་འཐུང་། །བར་དུ་ཐོས་བསམ་གྱི་སྣ་རྒྱག་ཕྱིར། །ད་ལྟ་སྡོམ་གསུམ་གྱི་ཐེག་པ་ཁུར། །སྤྲང་ལག་ལྡན་གྱི་ཕྲུ་གུ་མ་ལགས་སམ། །ང་དང་པོ་རྒྱལ་བསྟན་གྱི་ལྷོ་སྤྲིན་བསྙགས། །བར་དུ་མོས་གུས་ཀྱི་གློག་དམར་འཁྱུག །ད་ལྟ་གདམས་ངག་གི་འབྲུག་སྒྲ་སྒྲོག །སྤྲང་ལུས་གཉིས་ཀྱི་ཕྲུ་གུ་མ་ལགས་སམ། །ངས་དང་པོ་བཀའ་བརྒྱུད་ཀྱི་གངས་རི་བསྙགས། །བར་དུ་གདམས་ངག་གི་གཡུ་རལ་རྒྱས། །ད་ལྟ་ཉམས་ཀྱི་སྡེར་བཞི་བསྒྲད། །སྤྲང་གདོང་ལྔའི་ཕྲུ་གུ་མ་ལགས་སམ། །ངས་དང་པོ་སྒྲུབ་བརྒྱུད་ཀྱི་ནགས་ཚལ་བསྙགས། །བར་དུ་ངོ་སྤྲོད་ཀྱི་འཛུམ་དྲུག་རྒྱས། །ད་ལྟ་ཡེངས་མེད་ཀྱི་ས་མདོ་བཟུང་། །སྤང་རྒྱལ་སྟག་གི་ཕྲུ་གུ་མ་ལགས་སམ། །ངས་དང་པོ་ངེས་འབྱུང་གི་ནམ་འཕང་བསྙགས། །བར་དུ་ངུར་སྨྲིག་གི་འདབ་དྲུག་རྒྱས། །ད་ལྟ་ཚུལ་ཁྲིམས་ཀྱི་ནོར་
བུས་བརྒྱན། །སྤྲང་མཁའ་ལྡིང་གི་ཕྲུ་གུ་མ་ལགས་སམ། །ངས་དང་པོ་མཚན་ལྡན་མཁན་པོ་བསྟེན། །བར་དུ་ངེས་འབྱུང་གི་སྡོམ་པ་ཞུས། །ད་ལྟ་བསླབ་གསུམ་ལ་ནན་ཏན་བྱེད། །སྤྲང་ཤཱཀྱའི་སྲས་པོ་མ་ལགས་སམ། །ངས་དང་པོ་སྨོན་འཇུག་གིས་སེམས་བསྐྱེད་ཞུས། །བར་དུ་ཐེག་ཆེན་གྱི་གཞུང་ལུགས་སྦྱངས། །ད་ལྟར་ཕྱིན་དྲུག་ལ་ནན་ཏན་བྱེད། །སྤང་རྒྱལ་བའི་སྲས་པོ་མ་ལགས་སམ། །ངས་དང་པོར་སྨིན་བྱེད་ཀྱི་དབང་བཞི་ཞུས། །བར་དུ་རྒྱུད་གཞུང་དང་མན་ངག་སྦྱངས། །ད་ལྟ་བསྐྱེད་རྫོགས་ལ་ནན་ཏན་བྱེད། །སྤང་རིག་འཛིན་གྱི་སྲས་པོ་མ་ལགས་སམ། །དོན་ངེས་པར་མིན་ཀྱང་ཉམས་དགའ་ཙམ། །སྤྱིར་སྙན་ངག་བ་ལ་བཀག་པ་མེད། །དྲིན་ཆེན་ལ་འཛམ་བུའི་ཆུ་གསེར་མདོག །བྱི་བ་ལ་གླང་ཆེན་སྨྲ་དང་མཚུངས། །ཞེས་པ་འདི་དོན་དུ་ཅུང་ཟད་ཀྱང་གནས་པ་མི་སྲིད་ནའང་། སྙན་ངག་གིས་བསྟོད་པ་ལ་སྐྱོན་མེད་པས། སེམས་བདེ་ཉམས་ཅུང་ཟད་ཤར་དུས་ཤིག་ཉམས་དགར་སྨྲས་པར་ཟད་དོ། །ཨ་རཱ་གས་སོ།། ༈ །།རྗེ་སྤྲུལ་པའི་སྐུ་ལ་གསོལ་བ་འདེབས། །ལྟ་བ་ལ་བཤད་ལུགས་མང་ན་ཡང་། །རང་སེམས་ལ་སེམས་ཀྱིས་ལྟ་བ་
འདི། །ལྟ་བ་ཡིན་པར་བློ་ཐར་ཆོད། །ཚིག་དགའ་སྒྲུབ་མང་པོ་སྣང་བ་སྤུན། །བསྒོམ་པ་ལ་བཤད་ལུགས་མང་ན་ཡང་། །སེམས་གང་ཤར་ལ་སྤང་བླང་མེད་པ་འདི། །བསྒོམ་པ་ཡིན་པར་ཁོ་ཐག་ཆོད། །གེགས་སེལ་གྱི་བཅས་བཅོས་སྣང་བ་སྤྱན། །སྤྱོད་པ་ལ་བཤད་ལུགས་མང་ན་ཡང་། །སྡིག་སྤང་དང་དགེ་སྒྲུབ་འབད་པ་འདི། །སྤྱོད་པ་ཡིན་པར་ཁོ་ཐག་ཆོད། །གནང་བཀག་ཀྱི་ཀྱོག་བཤད་སྣང་བ་སྤུན། །འབྲས་བུ་ལ་ཐོབ་ལུགས་མང་བཤད་ཀྱང་། །ཚོགས་གཉིས་ཀྱི་བྲེ་ཁ་གང་བ་ན། །འབྲས་བུ་ཐོབ་པར་ཁོ་ཐག་ཆོད་། །རེ་དོགས་ཀྱི་གནད་གཞུང་སྣང་བ་སྤུན། །ད་ལྟ་སྒོམ་དང་སྤྱོད་པ་འབྲས་བུའི་གླུ། །ཉམས་བྱུང་རྒྱལ་དུ་ཤར་ནས་སྨྲས་པ་ཡིན། །ཞེས་པ་ཉམས་བྱུང་རྒྱལ་དུ་ཤར་ནས་སྨྲས་པ་ཡིན་པས་ཐོས་བསམ་ལ་གཤེ་བར་མི་དགོངས་འཚལ། ཨ་རཱ་གས་སོ།། ༈ །།སྐྱབས་དཀོན་མཆོག་གསུམ་ལ་ཕྱག་འཚལ་ལོ། །སྒྲོས་སྤྲུལ་པའི་སྐུ་ཡི་བྱིན་གྱིས་རློབས། །སྔོན་རྒྱལ་བས་ལུང་བསྟན་གདོང་དམར་ཡུལ། །ཁ་བ་ཅན་ལྗོངས་མདོ་སྨད་ན། །དཔལ་འཁོར་ལོ་སྡོམ་པའི་གསུང་གི་གནས། །འོག་མིན་ཀརྨའི་ལྷོ་ཕྱོགས་ན། །རྗེ་མཁའ་ལ་སྤྱོད་
པས་བྱིན་རླབས་པ། ཡུལ་ངོམ་དུ་རུང་བའི་སྟོད་ཆ་ན། །དཔལ་ཆོས་གྲགས་རྒྱ་མཚོའི་བྱིན་རླབས་པའི། །ཡུལ་གནས་སུ་གྲགས་པའི་རི་ཁྲོད་འདིར། །ས་ལུང་གསུམ་རྩ་གསུམ་འདུས་པ་འདྲ། །དེ་སྐུ་གསུམ་ལྷུན་གྱིས་གྲུབ་པའི་བརྡའ། །དགུང་ནམ་མཁའི་ཤར་ནུབ་ཕྱེས་པ་འདྲ། །དེ་ལྟ་བ་མཁའ་ལྟར་ཡངས་པའི་བརྡའ། །འོད་ཉི་ཟླ་སྒྲོན་མེ་བཀྱག་པ་འདྲ། །དེ་ཉམས་རྟོགས་གསལ་འགྲིབ་མེད་པའི་བརྡའ། །རྒྱབ་རི་རྒྱལ་པོ་གདན་བཞུགས་འདྲ། །དེ་སྐུ་བཞིའི་རྒྱལ་ས་ཟིན་པའི་བརྡའ། །ཞྭ་དཀར་འཁོར་ལོ་རིན་ཆེན་འདྲ། །དེ་ཆོས་ཀྱི་འཁོར་ལོ་བསྐོར་བའི་བརྡའ། །ཟོ་རྒྱལ་བློན་པོ་རིན་ཆེན་འདྲ། །དེ་ཐེག་པ་སྣ་ཚོགས་རྟོགས་པའི་བརྡའ། །རྟ་འདྲ་རྟ་མཆོག་རིན་ཆེན་འདྲ། །དེ་ཐར་བའི་གྲོང་དུ་ཕྱིན་པའི་བརྡའ། །རྒྱལ་མོ་བཙུན་མོ་རིན་ཆེན་འདྲ། །དེ་ཐབས་ཤེས་ཟུང་དུ་འཇུག་པའི་བརྡའ། །དཔལ་རི་གླང་པོ་རིན་ཆེན་འདྲ། །དེ་སྟོབས་བཅུ་ལྷུན་གྱིས་གྲུབ་པའི་བརྡའ། །མགར་ནག་དམག་དཔོན་རིན་ཆེན་འདྲ། །དེ་བདུད་བཞིའི་གཡུལ་ལས་རྒྱལ་བའི་བརྡའ། །མདུན་གྲུ་གསུམ་ཕག་མོའི་དཀྱིལ་འཁོར་འདྲ། །དེ་སྙན་
བརྒྱུད་གདན་ས་འཛིན་པའི་བརྡའ། །ཆུ་རྒྱུན་འབབ་ཡོན་ཆབ་བལྟམས་པ་འདྲ། །དེ་དབང་བཞིའི་ཆུ་བོ་རྒྱས་པའི་བརྡའ། །རྩྭ་ཆུ་ཤིང་འདོད་འབྱུང་གཏེར་ཀ་འདྲ། །དེ་དགོས་འདོད་ལྷུན་གྱིས་གྲུབ་པའི་བརྡའ། །ཟངས་རྡོ་ནོར་བུ་རིན་ཆེན་འདྲ། །དེ་རང་གཞན་དོན་གཉིས་འགྲུབ་པའི་བརྡའ། །བརྡའ་བཅུ་བཞི་ལྡན་པའི་རི་ཁྲོད་འདིར། །ངེད་འཁོར་བཅས་བྱང་ཆུབ་སྒྲུབ་པ་ལ། །ཁྱོད་གནས་བདག་གི་ཀོ་ལོང་མ་སྡོམ་པར། །ལས་དགེ་བ་སྒྲུབ་པའི་གྲོགས་དན་མཛོད། །ཐུགས་འགལ་བ་བྱུང་ཡང་བཟོད་པར་བཞེས། །ཆོས་བྱང་ཆུབ་ཀྱི་འབྲས་བུ་ཐུན་མོང་བྱེད། །དོན་གོ་བར་མཛོད་ཅིག་མི་མ་ཡིན། །ཐུགས་དགྱེས་པར་མཛོད་ཅིག་ཨ་ལ་ལ། །ཞེས་པ་འདི་སྔ་སོར་གྲྭ་པ་གཅིག་གིས་ཉམས་དགར་གནས་བསྟོད་ཅིག་གྱིས་ཟེར་བས་རི་ཁྲོད་བྱས་ནས་ཡུན་མི་རིང་བ་ཞིག་ལ། ཚིག་འདི་དང་འདྲ་ཙམ་ཞིག་གྲོ་ག་ལ་བྲིས་པ་ཡོད་པ་ཁོང་དགའ་རེས་མེ་སྒྲོན་དུ་སྦྱར་འདུག་པས། ཡི་གེའི་ཐད་ནས་མ་འབར་བར་སྣང་ཡང་ཕྱིས་གར་སོང་ཆ་མེད་ལ། སླད་ནས་བྲག་ཚན་ཆེན་པོ་བཤིགས་ནས་བསམ་གཏན་གྱི་ཁང་པ་བརྩེགས་པས་ཉམས་རྨི་ལམ་གྱི་འཚུབས་ཆ་ངེས་པ་ཅན། ཡང་མང་དུ་བྱུང་ཞིང་། རྟེན་འབྲེལ་གྱི་བཀྲ་བརྟག་འགའ་ལའང་གནས་བདག་མ་དགའ་བ་ན་ཚ་ཡོད་ཟེར་བ་ཡང་ཡང་བྱུང་ཞིང་། དངོས་
སུ་ན་ཚ་རྐྱེན་ངན་མང་བ་ཞིག་བྱུང་ནས། བསང་དང་གཏོར་མ་བཏང་བ་སོགས་བྱས་ཀྱང་འཚུབས་ཆའི་ལྷོང་དེ་ཚེར་མ་ཞི་བས། གནས་བསྟོད་འདི་བྲིས་ནས་ལན་འགའ་བྱས་པའོ།། ༈ །།ཕ་ཆོས་ཀྱི་དབང་ཕྱུག་རིན་པོ་ཆེ། །སྤང་ཞན་པ་ལོག་པར་བྱིན་གྱིས་རློབས། །སྤྱིར་འཁོར་བའི་ཆོས་ལ་སྙིང་པོ་མེད། །དེ་རྣ་ཐོས་ཀྱིས་མི་ཚད་དངོས་སུ་བསྟན། །ཡུལ་དབུས་གཙང་དག་པའི་ཞིང་ཁམས་ན། །ས་གཙང་སྟོད་ཀྱི་ཆོས་རྒྱལ་སྟོབས་འབྱོར་ཅན། །སྡེ་མངའ་རིས་བྱེ་བ་དུང་ཕྱུར་ཡང་། །དེ་གཅིག་པུར་འཁྱམས་པ་ཐོས་ཙ་ན། །སྡེ་མངའ་རིས་ལ་སྙིང་པོ་འདུག་གམ་ལྟོས། །སྤྲང་སྙིང་པོའི་ཆོས་ཤིག་ཅུག་བྱེད་ཨང་། །ང་སྐྱེན་དང་ང་རྒོད་ང་མཁས་ཅན། །ཟས་གོས་ཀྱིས་བུ་བཞིན་སྐྱོང་བ་ཡི། །ཐབས་གསོས་ཀྱི་གཟིམ་ཆུང་སྟོང་ཕྲག་བཅུ། །བློན་རིགས་རུས་ལྡན་པ་བསམ་ཡས་ཀྱང་། །རང་གཅིག་པུར་འཁྱམས་པ་མཐོང་ཙ་ན། །གཡོག་འཁོར་རེས་ལ་སྙིང་པོ་འདུག་གམ་ལྟོས། །གསེར་དངུལ་དང་གོས་དར་ནོར་བུའི་མཛོད། །གྲོ་ནས་དང་ཏིལ་འབྲས་འབྲུ་ཡི་མཛོད། །བུར་སྦྲང་དང་ཤ་མར་ཟས་ཀྱི་མཛོད། །གོས་སྐུ་དང་ལི་མ་རྟེན་གྱི་མཛོད། །དེ་གཞན་གྱིས་སྤྱོད་པ་
མཐོང་ཙ་ན། །ནོར་ལོངས་སྤྱོད་ལ་སྙིང་པོ་འདུག་གམ་ལྟོས། །བོད་རྩམ་ཟན་གྱི་རྒྱལ་པོ་ཡིན་ནོ་ཞེས། །ཡུལ་མངའ་རིའི་སྟོད་ནས་ལྷ་ཕྱག་འཚལ། །ཟངས་གསེར་དངུལ་དང་རིན་ཆེན་རི་ལྟར་འབུལ། །ཡུལ་བལ་པོའི་བར་དུ་བཀའ་ལུང་རྒྱུག །ད་དབང་མེད་དུ་བཅིང་བ་མཐོང་ཙ་ན། །སྙན་གྲགས་པ་ལ་སྙིང་པོ་འདུག་གམ་ལྟོས། །དེ་བསྟན་པའི་སྦྱིན་བདག་ཡིན་ནོ་ཞེས། །རྗེ་རྒྱལ་བ་རྣམས་ཀྱིས་ཤེས་བརྗོད་མཛད། །བཙུན་དགེ་བཤེས་རྣམས་ཀྱིས་ལྷ་ཕྱག་འཚལ། །ཚིག་འཁོར་གསུམ་སོང་ལ་མཆོད་བརྗོད་འབུལ། །གྲོང་འདབས་སུ་འབེབ་པ་མཐོང་ཙ་ན། །གཏམ་ངོ་བསྟོད་ལ་སྙིང་པོ་འདུག་གམ་ལྟོས། །ཡུལ་དབུས་གཙང་རུ་བཞིའི་སྟག་ཤར་ཚོས། །དཔོན་ཅིག་ཆོག་གཙང་སྟོད་ཀྱི་རྒྱལ་པོ་ཞེས། །འབེན་སོར་བཞི་ཉེ་ལ་མཆོད་བརྗོད་བྱེད། །རྒྱང་མཐོ་གང་རིང་ལ་མཆོད་བརྗོད་བྱེད། །དེ་བཙོན་དུ་བཅུག་པ་མཐོང་ཙ་ན། །གཏམ་སྙན་གྲགས་ལ་སྙིང་པོ་འདུག་གམ་ལྟོས་། །ཡུལ་སོ་སོ་ནས་མཛེས་སྡུག་གི་ཤར་མོ་ཚོས། །རྫོང་རྒྱན་ཆ་སོ་སོའི་ཡུལ་གྱི་འདོན། །བྲོ་ཁོད་ཕོག་རེ་ལ་མཆོད་བརྗོད་བྱེད། །གླུ་ལེས་ཁ་རེ་ལ་འཁྲུངས་ཞུས་བཀྱག །
ད་གྲོགས་མེད་དུ་འཁྱམས་པ་མཐོང་ཙ་ན། །གྲོང་མཛེས་སྡུག་ལ་སྙིང་པོ་འདུག་གམ་ལྟོས། །ཡུལ་གཙང་ཕྱོགས་སུ་རྩེ་ཆེན་བཅོ་བརྒྱད་དེ། །ཡུལ་སོ་སོར་སྐུ་མཁར་གྲངས་ལས་འདས། །རྫོང་ཆུ་ཕི་དང་ལྕགས་རི་འོབ་ཀྱིས་བསྐོར། །དབྱིབས་བཅའ་ཐབས་ལང་ཀ་པུ་རི་འདྲ། །ད་ཁང་ངན་ནང་དུ་འདུག་མཐོང་ན། །གཞེས་ཡུལ་མཁར་ལ་སྙིང་པོ་འདུག་གམ་ལྟོས། །དམག་ཡོངས་རྫོགས་ལ་བརྩིས་པའི་གྲངས་ཀ་མེད། །གཙང་ཁོ་ནའི་ཉེ་སྐོར་བསྡུས་པའི་ཚེ། །ཁྲབ་སྔོ་སིལ་ཁྲི་ཕྲག་བཅུ་གསུམ་ཟེར། །སྲོག་རྗེ་ལ་འབུལ་བ་ལྔ་བརྒྱ་ཙམ། །སྐྱོགས་མེ་མདའ་མཁས་ཀྱང་ཐ་མ་ཕམ། །དམག་བུ་རྟ་ལ་སྙིང་པོ་འདུག་གམ་ལྟོས། །སོག་མཁར་ཁ་དང་ཁ་ཐན་ཝ་བྲོས་བྱས། །བོད་རུ་བཞིའི་རྒྱལ་ཕྲན་ས་མཐར་ཕུད། །མོན་གི་རིའི་རྒྱལ་པོ་བཙོན་དུ་བཟུང་། །སྟོད་གུ་གེའི་རྒྱལ་པོའི་སྲོག་སྐྱབས་ཞུས། །རྐང་མཇུག་རྡུམ་ཡན་ཆད་ཞབས་སུ་བཅུག །ད་བཙོན་དུ་བཅུག་པ་མཐོང་ཙ་ན། །ཆུས་བཙན་དྲག་ལ་སྙིང་པོ་འདུག་གམ་ལྟོས། །སྤྱིར་འཁོར་བའི་ཆོས་ལ་སྙིང་པོ་མེད། །སྒོས་སྙིགས་མའི་ཚེ་ལ་ལོང་ཁམས་མེད། །ཚེ་འདི་ཡི་དཔལ་
འབྱོར་མཁོ་མཁོ་པོ། །འདི་བསྒྲུབ་པར་དཀའ་ལ་རྟག་མི་ཐུབ། །ད་སྙིང་པོ་མེད་པའི་མཚངས་རིག་ནས། །སྤྱང་སྙིང་པོའི་ཆོས་ཤིག་ཅུག་བྱེད་ཨང་། །ཞེས་པ་འདི་གཙང་པ་ཆོས་རྒྱལ་དེ་ཁེངས་ལོག་བྱུང་ནས་ནང་དུ་བཅུག་སྟེ་ལྷ་སར་ཁང་ངན་ཞིག་ན་བཞག་འདུག་ཟེར་བ་ཐོས་པས། སྤྱིར་འདུས་བྱས་ཐམས་ཅད་དང་། ཚངས་པ་དབང་པོ་འཁོར་ལོས་སྒྱུར་རྒྱལ་རྣམས་ཀྱང་མི་རྟག་པར་གསུངས་པ་ནི་རྣ་ཐོས་ཙམ་ཡིན་ལ། འདི་ནི་མི་རྟག་ཅིང་སྙིང་པོ་མེད་པའི་ངོ་སྤྲོད་ཤིན་ཏུ་མཚར་བར་བོད་ཡུལ་ཐམས་ཅད་ལ་བསྟན་པར་སྣང་བ་སམ་སྟེ་སྨྲས་སོ། །འདི་ཡི་སྟོད་ཆ་རྣམས་སྔ་སོར་ཤོག་རས་དང་ཤིང་ཤུན་འདྲ་ལ་དམ་དུམ་དུ་བྲིས་ཡོད་པ། ཕྱིས་ཕྱོགས་གཅིག་ཏུ་རང་ལོ་སོ་བཞི་པར་བསྒྲིགས་པ་སྟེ། ལྟ་འདོད་ཟེར་བ་འགའ་ཞིག་བྱུང་བ་རྐྱེན་བྱས་ཏེ་བསྒྲིགས་པའོ། །ཀརྨ་ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།