འཕགས་པ་དོན་འགྲུབ་ཞེས་བྱ་བ་ལ། རཱ་ག་ཨ་སྱས་གདམས་པ་ལེའུ་གཅིག་ཡོད།
རྒྱ་གར་སྐད་དུ་ཤྲཱི་ན་ཐ། བོད་སྐད་དུ་དཔལ་མགོན་རབ་ཏུ་བྱུང་བའི་མིང་། ཨརླ་ཨ་མོ་གྷ་སིདྡྷི། སྐད་དུ་འཕགས་པ་དོན་འགྲུབ་ཞེས་བྱ་བ་ལ། རཱ་ག་ཨ་སྱས་གདམས་པ་ལེའུ་གཅིག་ཡོད། །
ན་མོ་ཤཱཀྱ་མུ་ནེ་ཡེ། བསླུ་བ་མེད་པའི་སྐྱབས་གནས་དཀོན་མཆོག །ཤཱཀྱའི་གཙོ་ལ་ཕྱག་འཚལ་ལོ། །ནུབ་གཅིག་འཕགས་པ་དོན་འགྲུབ་ཀྱིས། །མགུར་ཞིག་བྲིས་ཟེར་ཤོག་བུ་གཏད། །རང་གི་སེམས་ལ་མི་ཕན་ཞིང་། །ཉམས་སུ་ལོན་པར་མི་འགྱུར་བའི། ། མགུར་གྱི་དགོས་པ་ཅི་ཡང་མེད། །ཁ་མཚར་སྒྲུང་མཁན་གླུ་དང་འདྲ། །དེ་ཕྱིར་ཕན་ངེས་ཉམས་ལེན་གྱི། །དམིགས་རིམ་ཉེར་མཁོ་ཟིན་སླ་བ། །འགའ་ཞིག་འདི་རུ་བྲི་བར་བྱ། །མི་ལུས་ཐོབ་ཅིང་རབ་ཏུ་བྱུང་། །ཚེ་སྔོན་བསོད་ནམས་བསགས་པ་ཡིན། །སངས་རྒྱས་བསྟན་ལ་
ཞུགས་ཕྱིན་ནས། །བསྟན་དང་མཐུན་པར་མ་བྱས་ན། །ཤེས་བཞིན་བཙན་དུག་ཟོས་དང་འདྲ། །སྡོམ་པ་གཙང་མ་སྲུང་བ་དེ། །བླ་མ་དགོན་པའི་དོན་དུ་མིན། །རང་ཉིད་འཁོར་བར་འཁྱམས་དོགས་ཡིན། །ཟིན་ཐུན་སློབ་མའི་དཀའ་ལས་དེ། །སྤྱི་པ་བླ་མའི་དོན་དུ་མིན། །རང་ཉིད་ཆོས་ལ་ཚུད་ཕྱིར་ཡིན། །རབ་བྱུང་བརྒྱ་ཕྲག་འཚོགས་པ་ན། །བྱང་ཆུབ་སེམས་དཔའི་སྤྲུལ་པ་དང་། །གནས་བརྟན་སྤྲུལ་པ་རེ་རེ་ཡོད། །སྤྲུལ་པའི་དེ་ལ་བཟང་པོ་དང་། །དད་པ་འདྲོང་བ་ཡོད་ངེས་མེད། །སུ་མིན་མི་ཤེས་སྦ་ཚུལ་བཞུགས། །དེ་ཕྱིར་བནྡེ་སུ་
ལ་ཡང་། །བརྙས་ཆོས་ཚིག་ངན་སྐུར་འདེབས་སྤང་། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །བྲིས་སྐུ་ལྡེར་སྐུ་གསར་པ་ཡང་། །བྱིན་རླབས་མེད་པར་མ་སེམས་པར། །ཕྱག་དང་སྐོར་བ་དད་གུས་བསྐྱེད། །དེ་ཡི་ཚོགས་རྫོགས་སྒྲིབ་བྱང་ངེས། །དབང་ལུང་ཁྲིད་སོགས་མ་ཐོབ་ཀྱང་། །ཆོས་རྗེ་གནས་ཀྱི་སློབ་དཔོན་ཞེས། །འདུལ་བ་ནས་བཤད་བླ་མ་ཡིན། །དེ་ལ་ཕ་ཡི་འདུ་ཤེས་ཀྱིས། །ཅི་གསུངས་བཀའ་བཞིན་བསྒྲུབས་པ་ན། །རང་ཉིད་བཙུན་པ་གྲྭ་ཐུབ་འོང་། །དཔོན་གྱི་འདུ་ཤེས་མི་བྱ་བར། །བླ་མའི་འདུ་ཤེས་དད་གུས་བསྐྱེད། །སྡོམ་པ་རྩ་བཞི་ཆང་དང་ལྔ། །ཚོགས་ཆང་མ་གཏོགས་ཆང་ཡང་སྤང་། །གཟན་གོས་ཟླུམ་ཁྱེར་བྱེད་པ་དང་། ། སེར་མོའི་གོས་དང་མི་འབྲལ་བ། །སངས་རྒྱས་བསྟན་ལ་ཕན་པ་སྟེ། །མཛེས་ཆོས་ཁོ་ནར་མ་སེམས་ལ། །བཙུན་པའི་སྤྱོད་ལམ་བག་ཡོད་མཛོད། །ཤཱཀྱ་ཐུབ་པའི་བསྟན་པ་ལ། །ཕན་ཡོན་མེད་ཅིང་དོན་མེད་པའི། །ཚིག་འབྲུ་གཅིག་ཀྱང་མེད་པའི་ཕྱིར། །ཟིན་ཐུན་གང་གསུང་ཅི་ལོན་མཛོད། །ཐུབ་པའི་བསྟན་པའི་གཞུང་ཤིང་ནི། །ཐོས་བསམ་
སྒོམ་གསུམ་ཁོ་ན་སྟེ། །ཟིན་ཐུན་སློབ་གཉེར་ཐོན་པ་ཡིན། །དེ་དོན་གོ་བ་བསམ་པ་ཡིན། །དེ་ཡི་དོན་བསྒོམ་ཉམས་ལེན་ཡིན། །ཉམས་སུ་ལོན་ན་ཆོས་སྤྱོད་ནི། །སྣ་གཅིག་གིས་ཀྱང་ཆོག་པ་ཡིན། །ཉམས་ལེན་མ་རན་མ་བསམ་དང་། །ཚེ་ལ་ངེས་པ་མེད་པ་སྟེ། །སྔོན་ལ་རྒས་གཞོན་སུ་འཆི་བ། །ཚོད་ཟིན་སུ་ལའང་ཡོད་པ་མིན། །རྒས་ནས་འཆི་བ་རེ་རེ་ཙམ། །དེ་ཕྱིར་བུ་ཁྱོད་ཤེས་པ་ཡི། །ཆོས་སྤྱོད་འདི་གསུམ་ཡི་དམ་མཛོད། །ནད་གདོན་དུས་མིན་འཆི་བ་སོགས། །འཇིགས་པ་ཐམས་ཅད་སྐྱོབ་པ་དང་། །སངས་རྒྱས་བྱེ་བ་ཕྲག་བདུན་གྱིས། །དབང་བསྐུར་བྱིན་གྱིས་བརླབས་མཛད་ནས། །བདེ་བ་ཅན་དུ་སྐྱེ་བའི་ཐབས། །འཕགས་མ་སྒྲོལ་མའི་གཟུངས་རིང་ནི། །བཅོམ་ལྡན་རྣམ་པར་སྣང་མཛད་གསུངས། །དེ་ཉིད་བོད་སྐད་དུ་བསྒྱུར་བ། །སྒྲོལ་མ་ཉེར་གཅིག་འདི་ཡིན་པས། །འདི་ཉིད་འདི་ལྟར་ཉམས་སུ་ལོངས།། ༈ མདུན་དུ་མེ་ཏོག་པདྨ་ཡི། །སྡོང་པོ་བསམ་ལས་འདས་པ་ཡི། །ལོ་མས་བར་སྣང་ཁྱབ་པ་ལ། །འབྲས་བུ་བཀྲ་ཤིས་རྟགས་བརྒྱད་དང་། །ནོར་བུ་རིན་ཆེན་དུ་མ་སྨིན། །སྡོང་པོའི་
རྩེ་ཡར་མེ་ཏོག་ནི། །འདབ་མ་ཉི་ཤུ་ཐམ་པ་ཅན། །རྒྱ་ཁྱོན་ཤིན་ཏུ་ཆེ་བ་གཅིག །ཡར་ལ་ཁ་ནི་ཟེད་པ་ཡི། །ལྟེ་བ་དང་ནི་འདབ་མ་ལ། །བཅོ་ལྔའི་ཟླ་བ་ཉ་རྒྱས་པ། །ཉེར་གཅིག་གདན་ཐབས་བཏིང་བར་བསྒོམ། །འདི་ནས་ཉི་མ་ལྷོ་ཡི་ཕྱོགས། །པོ་ཏཱ་ལ་ཡི་རི་རྩེ་ནས། །རྗེ་བཙུན་སྒྲོལ་མ་ཉེར་གཅིག་དེ། །གློག་འགྱུ་བཞིན་དུ་སྐད་ཅིག་ལ། །བྱོན་ནས་ཟླ་བ་རིན་ཆེན་སྟེང་། །བཞུགས་པའི་གཙོ་མོ་སྒྲོལ་སྔོན་ཏེ། །སེང་ལྡེང་ནགས་ཀྱི་སྒྲོལ་མ་ཞེས། །གཡུ་ཡི་མདོག་འདྲ་ཞལ་གཅིག་པ། །ཕྱག་གཉིས་གཡས་པས་མཆོད་སྦྱིན་ལ། །གཡོན་པས་ཨུཏྤལ་ཡུ་བ་འཛིན། །དར་དང་རིན་ཆེན་རྒྱན་གྱིས་སྤྲས། །དབུ་གཙུག་འོད་དཔག་མེད་པ་བཞུགས། །ཞབས་གཉིས་རོལ་པའི་སྟབས་ཀྱིས་བཞུགས་། །འཁོར་གྱི་སྒྲོལ་མ་ཉི་ཤུ་པོ། །ཞལ་ཕྱག་མང་སྟེ་ཟིན་དཀའ་བས། །ཇོ་བོ་རྗེ་ཡི་ཞལ་གཟིགས་ལུགས། །ཐམས་ཅད་ཞལ་གཅིག་ཕྱག་གཉིས་པ། །བཞུགས་ཡོད་མོས་པ་ཙམ་གྱིས་ཆོག །གཙོ་མོ་ལ་ནི་དམིགས་པ་གཏད། །རང་ལུས་བྱེ་བ་ས་ཡར་སྤྲུལ། །ཕྱག་འཚལ་མཆོད་པ་སྣ་ཚོགས་འབུལ། །དངོས་སུ་མཆོད་པ་མེད་ན་ཡང་། །
སྟོང་གསུམ་འཇིག་རྟེན་ཕྱོགས་བཅུ་ཡི། །ལྷ་མི་ཀླུ་ཡི་ལོངས་སྤྱོད་ཚོགས། །ཡིད་ཀྱིས་མཆོད་པར་དམིགས་ལ་འབུལ། །བདག་དང་སེམས་ཅན་ཐམས་ཅད་ཀྱི། །སྡིག་སྒྲིབ་སྒྲོལ་མའི་དྲུང་དུ་བཤགས། །འཕགས་པ་དང་ནི་སོ་སྐྱེ་ཡི། །དགེ་བ་ཀུན་ལ་ཡི་རང་བསྒོམ། །ཆོས་ནི་རྒྱུན་དུ་གསུངས་པ་དང་། །མྱ་ངན་མི་འདའ་བཞུགས་པར་ཞུ། །དེ་ཡི་དགེ་བས་བདག་ཉིད་ཀྱང་། །འགྲོ་བ་ཀུན་ལ་ཕན་པའི་ཕྱིར། །རྫོགས་པའི་སངས་རྒྱས་ཐོབ་ཕྱིར་བསྔོ། །དེ་ནས་ལུས་ངག་ཡིད་དང་གསུམ། །རྩེ་གཅིག་དད་པས་བསྟོད་པ་དེ། །ཉེར་གཅིག་བདུན་ནམ་གསུམ་མམ་གཅིག །འདོན་ནས་ཡིད་ལ་དྲན་བཞིན་དུ། །ལྷ་མོ་ལ་གུས་ཕན་ཡོན་བརྗོད། །དེ་ནས་འཁོར་རྣམས་གདན་དང་བཅས་། །འོད་དུ་ཞུ་ནས་གཙོ་མོར་ཐིམ། །གཙོ་མོ་འོད་ཕུང་ལྗང་གུར་གྱུར། །རང་གི་སྙིང་ཁར་ཐིམ་པར་བསྒོམ། །དེ་ནས་དེ་ལྟར་བསྒོམ་མཁན་གྱི། །སེམས་ལ་སེམས་ཀྱིས་བལྟ་ནས་འདུག །གཟུགས་དང་དངོས་པོ་ཅི་ཡང་མེད། །མེད་ངེས་མ་ཡིན་ཅིར་ཡང་འཆར། །སྨྲ་བསམ་བརྗོད་དུ་མེད་པ་ཡི། །ཡུམ་ཆེན་སྒྲོལ་མ་རང་གི་སེམས། །
རྒྱན་དུ་བསྒོམས་ན་ངེས་པར་རྟོགས།། ༈ ཤེས་རབ་སྙིང་པོའི་དོན་བསྒོམ་པའི་ཞལ་གདམས་ནི། མཆན་བུའོ།། སེང་ཁྲི་པདྨ་ཟླ་བའི་སྟེང་། ། །རང་ཉིད་བཅོམ་ལྡན་ཤཱཀྱ་ཐུབ། །ཆ་ལུགས་སྐུ་འདྲ་རྣམས་ལ་ལྟོས། །འཁོར་དུ་འཕགས་པ་སྤྱན་རས་གཟིགས། །ཤཱ་རིའི་བུ་ལ་སོགས་པ་ཡི། །དགྲ་བཅོམ་ལྔ་བརྒྱས་བསྐོར་བར་བསྒོམ། །རང་གི་སྙིང་ཁར་བློ་བའི་སྟེང་། །ཧཱུྃ་ཡིག་གསེར་མདོག་མཐའ་མ་ལ། །འདི་སྐད་བདག་ཐོས་ནས་བཟུང་སྟེ། །མངོན་པར་བསྟོད་བར་ཟབ་མདོ་ཡི། །ཚིག་རྣམས་ཡིག་འབྲུ་དཀར་པོའི་ཡི། །ཧཱུྃ་ལ་གཅུད་པའི་ཚུལ་དུ་བསྐོར། །དེ་ལས་འོད་ཟེར་གསེར་མདོག་འཕྲོས། །སངས་རྒྱས་ཞིང་ཁམས་ཐམས་ཅད་ནས། །ཐུབ་པ་འཁོར་བཅས་དཔག་མེད་བྱོན། །རང་ཉིད་འཁོར་དང་བཅས་ལ་ཐིམ། །ངག་ཏུ་ཟབ་མདོ་འདོན་བཞིན་དུ། །སྙིང་ཁའི་ཧཱུཾ་དང་ཡིག་འབྲུ་ལས། །འོད་ཟེར་ཁ་དོག་སྣ་ཚོགས་འཕྲོས། །ཕྱི་སྣོད་ས་རྡོ་རི་བྲག་དང་། །ནང་བཅུད་སེམས་ཅན་ཀུན་ལ་ཕོག །ཐམས་ཅད་ངོ་བོ་སྟོང་པ་ཉིད། །སྟོང་པའི་ངང་ལས་རྣམ་པ་གསལ། །ཆུ་ཟླ་འཇའ་ཚོན་ལྟ་བུར་གྱུར། །དེ་ལྟར་བསྒོམ་མཁན་སེམས་ལ་བལྟ། །
ཡོད་པ་མ་ཡིན་དངོས་པོ་མེད། །མེད་པ་མ་ཡིན་རང་རིག་གསལ། །རྟག་པ་མ་ཡིན་སྣ་ཚོགས་འགྱུར། །ཆད་པ་མ་ཡིན་རྒྱུན་ཆད་མེད། །མཐའ་བཞི་བྲལ་བའི་དབུ་མའི་དོན། །རང་སེམས་མ་བཅོས་ཀློད་དེ་བཞག །དོན་ཟབ་ཡིད་ལ་བསྒོམ་པ་ཡིན། །ཚིག་ཟབ་ཟབ་མདོ་ཚར་བདུན་འདོན། །གལ་ཏེ་ཚར་བདུན་མ་ཐུབ་ན། །སྔགས་དེ་ཚར་བདུན་འདོན་པར་བྱ། །བདུད་བཟློག་ཐལ་རྡེབ་བྱེད་པའི་ཚེ། ། །འཁོར་གྱི་དགྲ་བཅོམ་ལྔ་བརྒྱ་ཡི། །ཆོས་གོས་ཕྱོགས་གཅིག་བརྡབས་བྱས་པས། །བདུད་དང་བར་ཆད་བཟློག་པར་བསྒོམ། །དེ་ནས་སེམས་ལ་སེམས་ཀྱིས་བལྟ། །གཤེགས་གསོལ་བསྡུ་ཆོག་དེ་གས་མཐུས།། ༈ མཁས་པའི་གཙུག་རྒྱན་ཙོང་ཁ་པས། །མཛད་པའི་བདེ་སྨོན་འདི་ཉིད་ནི། །ཉིད་ཀྱིས་མཁའ་སྤྱོད་པ་ལ་གནང་། །མཁའ་སྤྱོད་པ་ཡིས་ནམ་བཏོན་ཚེ། །མེ་ཏོག་ཆར་པ་བབ་པ་ཡིན། །སྨོན་ལམ་མེ་ཏོག་ཆར་འབེབས་ཟེར། །མཁའ་སྤྱོད་བཀའ་འབུམ་ནང་ནའང་ཡོད། །འོད་མདོ་བདེ་ཆེན་ཞིང་བཀོད་སོགས། །མདོ་སྡེ་མང་པོའི་དོན་བསྡུས་ཡིན། །འདི་ནས་ཉི་མ་ནུབ་ཀྱི་ཕྱོགས། །ཅུང་
ཟད་སྟེང་དུ་མཐོ་བ་ན། །བདེ་བ་ཅན་གྱི་ཞིང་ཁམས་ཡོད། །བདེ་སྐྱིད་ངོ་མཚར་བརྗོད་མི་ལང་། །དེ་ན་སངས་རྒྱས་འོད་དཔག་མེད། །སྐུ་ནི་རི་རྒྱལ་ལྷུན་པོ་ཙམ། །ཚུར་ལ་ཞལ་ནི་གཟིགས་ནས་ཀྱང་། །རང་ལ་སྤྱན་གྱིས་གཟིགས་པར་བསྒོམ། །དེ་ལ་ཕྱག་འཚལ་མཆོད་པ་འབུལ། །རྩེ་གཅིག་དད་པས་འགྱུར་མེད་བློས། །རང་དང་རང་ལ་འབྲེལ་ཐོགས་རྣམས། །འདི་ནས་ཚེ་འཕོས་གྱུར་མ་ཐག །ཞིང་ཁམས་དེ་རུ་སྐྱེ་བ་ཡི། །སྨོན་ལམ་འདེབས་པའི་བསམ་པ་ཡི། །བདེ་སྨོན་ཅི་ཐོན་འདོན་བྱས་པས། །སངས་རྒྱས་དེ་ཡི་ཐུགས་ཀ་ནས། །འོད་ཟེར་ཉི་མ་ཤར་ལྟར་འཕྲོས། །རང་ལ་ཐིམ་པས་བྱིན་གྱིས་བརླབས། །ཚེ་ཡི་བར་ཆད་བསལ་བ་དང་། །ཕྱི་མ་ཞིང་དེར་སྐྱེ་བ་ཡི། །སངས་རྒྱས་ཐུགས་རྗེས་ཟིན་པར་བསྒོམ། །དེ་ནས་དེ་ལྟར་སྒོམ་མཁན་གྱི། །སེམས་ལ་སེམས་ཀྱིས་ཅེར་རེ་ལྟ། །བལྟས་པས་མཐོང་རྒྱུ་མེད་པ་དེ། །སྟོང་པ་ཉིད་ནི་མཐོང་བ་ཡིན། །མ་མཐོང་བ་དེ་མཐོང་བའི་མཆོག །དེ་ཡི་ངང་ལ་བཞག་ཙམ་ན། །ཅི་ཡང་མི་དྲན་ཁ་རོག་འདུག །དེ་ཡང་སེམས་ཀྱིས་རིག་པ་དེ། །གནས་པ་ཞེས་བྱ་མིང་དུ་བཏགས། །དེ་
ནས་མི་སྡོད་གང་ཡང་རྒྱུག །དེ་ལ་འགྱུ་བ་ཞེས་བྱའོ། །གནས་དུས་གནས་དང་འགྱུ་དུས་འགྱུ། །ཅི་བྱེད་རིག་པས་རིག་པ་ཟེར། །གནས་དང་འགྲུ་ལ་བཟང་ངན་མེད། །གང་བྱེད་རིག་ན་དེ་གས་ཆོག །གནས་འགྱུ་གདམ་ག་མི་བྱེད་པར། །གང་ཤར་ངང་ལ་རང་ངོ་ལྟ། །འདི་མཐོང་དེ་མཐོང་མེད་ན་ཡང་། །ཡིད་ལ་ངེས་ཤེས་མྱོང་བ་སྐྱེ། །དེ་ཉིད་ཁ་ནས་བརྗོད་མི་ཤེས། །ལྐུག་པས་བུ་རམ་ཟོས་པ་འདྲ། །དེ་ལ་སྨྲ་བསམ་བརྗོད་མེད་ཟེར། །དེ་ཤེས་ཤེས་བྱ་ཀུན་གྱི་རབ། །དེ་བསྒོམ་འཁོར་བའི་རྒྱ་མཚོ་ཡི། །ཕ་རོལ་ཕྱིན་ཏེ་ཐར་པ་ཐོབ། །སེམས་དེ་གང་ནས་འང་མ་སྐྱེས་ཤིང་། །མཐར་ནི་གང་དུའང་མི་འགྲོ་ལ། །ད་ལྟ་གང་དུ་མི་གནས་པ། །དཔེར་ན་ནམ་མཁའི་ངོ་བོ་འདྲ། །ནམ་མཁའ་གང་ནས་ཀྱང་མ་སྐྱེས་ཤིང་། །མཐར་ཡང་ནམ་མཁའ་གར་མི་འགྲོ། །ད་ལྟ་ནམ་མཁར་གར་མི་གནས། །དེ་ཕྱིར་སེམས་ནི་ནམ་མཁའི་དཔེ། །དེ་ཡང་དཔེ་དོན་ཕྱོགས་མཚོན་ཙམ། །དོན་ལ་ནམ་མཁའ་དང་མི་འདྲ། །ནམ་མཁའ་དྲན་མེད་བསམ་པ་མེད། །སེམས་ནི་སེམས་རིག་དྲན་པ་ཡོད། །དེ་ཕྱིར་དཔེ་ཡིས་མི་མཚོན་
ཏེ། །བརྗོད་པ་ཀུན་དང་བྲལ་བ་སྟེ། །བརྗོད་མེད་བརྗོད་པ་ཀུན་གྱི་གཞི། །རྒྱས་པར་འབུམ་མདོ་ཉེར་ལྔར་གསལ། །དེ་ནི་གཞན་དུ་བསྟན་དུ་མེད། །སོ་སོ་རང་གི་རིག་པ་ཡིས། །རང་གི་སེམས་ལ་ལྟོས་དང་རྙེད། །ཡེ་ནས་རང་རིག་ཆོས་སྐུ་སྟེ། །དེ་ཉིད་ཤེས་ཤིང་རྟོགས་པ་ལ། །ཡེ་ཤེས་མིང་དུ་བཏགས་པ་ཡིན། །འདས་དང་མ་འོངས་སངས་རྒྱས་ཀུན། །དེ་ལས་སྐྱེས་པས་རྒྱལ་བའི་ཡུམ། །ལྷར་བཅས་འཇིག་རྟེན་ཐམས་ཅད་ཀྱི། །ཕྱག་མཚན་མཆོད་པ་འབུལ་བའི་གནས། །ཡུམ་ཆེན་ཤེས་རབ་ཕར་ཕྱིན་དེ། །གཞན་དུ་མ་ཚོལ་སེམས་ལ་ལྟོས། །སེམས་ནི་རྣམ་རྟོག་འཁྲུལ་པའི་ཆ། །འོ་མའི་དཀྱིལ་ན་མར་བཞིན་དུ། །སེམས་ཉིད་ཆོས་སྐུ་འགྱུར་མེད་ཡོད། །རྒྱུན་དུ་བལྟས་ན་ནམ་ཞིག་མཐོང་། །མཐོང་བ་མེད་པའི་ཚུལ་དུ་མཐོང་། །རྟོགས་པ་མེད་པའི་ཚུལ་དུ་རྟོགས། །བཅིང་གྲོལ་མེད་པའི་ངང་ནས་གྲོལ། །དེ་སྐད་རཱ་ག་ཨ་སྱ་ཡིས། །ཤིང་སྦྲུལ་ས་གའི་བཅོ་ལྔ་ཉིན། །སྟོན་པའི་དུས་མཆོད་བྱེད་པའི་སྐབས། །ཤོག་བུ་གཏད་བྱུང་འཕྲལ་ཉིད་དུ། །ཡིད་ལ་གང་ཤར་བྲིས་པ་སྟེ། །མགུར་ལ་དགའ་ན་མགུར་ཡང་ཡིན། །ཁ་
ད་བླངས་ན་ཞལ་གདམས་ཡིན། །ཉམས་སུ་བླངས་ན་གདམས་ངག་ཡིན། །གོ་བ་ཡོད་ན་ངོ་སྤྲོད་ཡིན། །བཀྲ་ཤིས་བདེ་ལེགས་འབྱུང་གྱུར་ཅིག །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།