མཐའ་གཏད་འབྱུང་བཞིའི་གཟེར་བུ།
༼ཙ་༽ མཐའ་གཏད་འབྱུང་བཞིའི་གཟེར་བུ་བཞུགས་སོ། །
ན་མོ་པྲཛྙཱ་པཱ་ར་མི་ཏཱ་ཡེ། ཡུམ་ཆེན་ཌཱ་ཀིའི་ཚོགས་ལ་ཕྱག་འཚལ་ནས། །མཐའ་གཏད་འབྱུང་བཞིའི་གཟེར་བུ་གསལ་བར་བཀོད། །མ་གཅིག་ལྗཀིས་བཀའ་གནང་བྱིན་གྱིས་རློབས། །བད་ཀན་སྨུག་པོ་སོགས་འདུས་པའི་ནད། གདོན་སྣ་འདུས་ལ་འདི་ཟབ་སྟེ། ངར་མི་དཀར་སེར་དམར་ལྗང་བཞི་བྱ། དམར་གཏོར་བཞི་བྱ། གཅོད་ཚོགས་སྐབས་སུ་ཡིན་ན་ལེགས། ལུས་སྦྱིན་ལ་ཡང་སྦྱར་རུང་བས། གཅོད་ཚོགས་ལ་སྦྱར་ན་ཚོགས་ཕུད་མ་ཕུལ་གོང་དུ་བྱའོ། །ལུས་སྦྱིན་ཙམ་དུ་སྦྱར་ན་དཀར་འགྱེད་དམར་འགྱེད་གདོན་ཚོགས་དགུ་མ་ཚར་བ་དང་འདི་བྱ་སྟེ། དང་པོ་གཅོད་པའི་མདུན་ཕ་གིར། ཤར་ངོས་སུ་ཐོ་ཆུང་གཅིག་བྱ། ཐོ་དེའི་སྟེང་དུ་ངར་མི་དཀར་པོ་
བཞག་སྟེ་དེ་ལ་ནད་པས་མགོ་གཏད་ནས་ཉལ་བཅུག་ལ། ཕཊ། ནད་པའི་སྙིང་གར་རྣམ་པར་ཤེས་པ་དང་། །རླུང་སེམས་འདུས་པའི་ངོ་བོ་ཐིག་ལེ་ནི། །དངུལ་ཆུའི་མདོག་ཅན་འོད་ཟེར་དཀར་མདངས་ཅན། །མ་སར་བྱ་ཡི་སྒོ་ང་ཙམ་པ་དེ། །དབུ་མའི་ལམ་ནས་རྒྱངས་སེ་སྤྱི་བོར་ཐོན། །ནམ་མཁའ་ལ་ཐིམ་སེམས་དང་ནམ་མཁའ་འདྲེས། །ཆོས་དབྱིངས་ཡུམ་ཆེན་ཐུགས་དང་དབྱེར་མེད་གྱུར། །ཕཊ། ལུས་ཀྱི་ཆུ་ཁམས་ངར་མི་དཀར་པོར་ཐིམ། །བེམ་པོ་ཤ་ཁྲག་སྟོང་གསུམ་འཇིག་རྟེན་གང་། །ལྷ་ཡི་བུ་ཡི་བདུད་ཀྱི་དམག་ཚོགས་ནི། །མི་ནི་དཀར་པོ་
མཛེས་ཤིང་ཡིད་འོང་བ། །བྱེ་བ་འབུམ་སྡེ་དཔག་ཏུ་མེད་པ་རྣམས། །བེམ་པོ་ཤ་ཁྲག་ལྷག་མ་མེད་པར་ཟོས། །ཕཊ་ཕཊ་ཕཊ། དམིགས་པ་མང་དུ་བཟུང་ནས། ཧཱུྃ། ཤར་ཕྱོགས་མངོན་པར་དགའ་བའི་ཞིང་ཁམས་ནས། །མ་གཅིག་ཡུམ་ཆེན་ལྷ་མོ་མཱ་མ་ཀཱི། །སྐུ་མདོག་དཀར་སྔོ་མཚན་དཔེའི་གཟི་བརྗིད་འབར། །ཞལ་གཅིག་ཕྱག་གཉིས་སྐྱིལ་ཀྲུང་མཉམ་གཞག་མཛད། །མཉམ་གཞག་སྟེང་ན་རྡོ་རྗེ་སྔོན་པོ་འཛིན། །སྣ་ཚོགས་པདྨ་ཟླ་བའི་གདན་ལ་བཞུགས། །ཆུ་ཁམས་རྣམ་དག་རྡོ་རྗེ་རིགས་ཀྱི་ཡུམ། །རྡོ་རྗེ་མཁའ་འགྲོ་བྱེ་བ་འབུམ་གྱིས་བསྐོར། །རིན་ཆེན་དབུ་རྒྱན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་རྒྱན་ཆ་སི་ལི་ལི། །ཐོར་ཚུགས་དར་གྱི་ཅོད་པན་པུ་རུ་རུ། །སྒྲ་སྙན་རོལ་མོ་མང་པོ་ཏི་རི་རི། །དྲི་ཞིམ་སྤོས་ཀྱི་ངད་པ་སངས་སེ་སང་། །དོ་ནུབ་མངོན་དགའི་ཞིང་ནས་འདིར་གཤེགས་ལ། །འདི་ཡི་ཁྲག་རྣམས་ཆུ་ལ་བསྟིམ་དུ་གསོལ། །རིག་པ་སྐྱེ་མེད་ཡུམ་གྱི་ཀློང་དུ་བསྟིམ། །བེམ་པོ་ཤ་ཁྲག་རུས་པའི་ཕུང་པོ་རྣམས། །ལྷ་ཡི་བུ་ཡི་བདུད་ཚོགས་ཐམས་ཅད་ལ། །སོ་སོར་ཅི་འདོད་སྦྱིན་པ་ཆེན་པོས་ཁྱེར། །གསོལ་བ་འདེབས་སོ་ཡུམ་
ཆེན་མཱ་མ་ཀཱི། །བྱིན་གྱིས་རློབས་ཤིག་མ་གཅིག་ལབ་སྒྲོན་མ། །དངོས་གྲུབ་སྩོལ་ཅིག་རྡོ་རྗེ་མཁའ་འགྲོའི་ཚོགས། །བདུད་བཞི་རང་སར་ཞི་བར་བྱིན་གྱིས་རློབས། །རྐྱེན་ངན་ལམ་དུ་སློང་བར་བྱིན་གྱིས་རློབས། །ན་ཚ་བོགས་སུ་ཐོན་པར་བྱིན་གྱིས་རློབས། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཕཊ་ཕཊ་ཕཊ། དེ་ནས་ངར་མི་ཆུ་ནང་དུ་འཕེན་རྒྱུ་བསྐུར། དེ་ནུབ་མ་ཐིངས་ན་ཕྱིར་ནངས་འཕེན་ཆོག །ཌཱ་དྲིལ་རྐང་དུང་དང་བཅས། འོ་འོ། ཡུམ་ཆེན་ཐུགས་ཀྱི་མཁའ་འགྲོ་ཆུ་ཡི་ལྷ་མོ་མཱ་མ་ཀཱི། འཁོར་རྡོ་རྗེ་མཁའ་འགྲོ་བྱེ་བ་འབུམ་དང་བཅས་པའི་ནད་པ་འདིའི་ཁྲག་རྣམས་ཆུ་ལ་སྟིམས་ཤིག །རིག་པ་སྐྱེ་མེད་ཆོས་སྐུའི་ངང་དུ་སྟིམས་ཤིག །འོ་འོ། ནད་པ་འདིའི་ལུས་ངག་ཡིད་གསུམ་ལ་གནོད་ཅིང་འཚེ་བ། བྱང་ཆུབ་ཐོབ་པ་ལ་བར་དུ་གཅོད་པའི་ལྷ་ཡི་བུ་ཡི་བདུད་དམག་བྱེ་བ་འབུམ་སྡེ་ཁྱོད་རྣམས་ལ་ལུས་ཤ་ཁྲག་གི་བེམ་པོ་འདི་སྦྱིན་པ་ཡིན་པས། ཤ་འདོད་པས་ཤ་ཁྱེར། ཁྲག་འདོད་པས་ཁྲག་ཁྱེར། རུས་པ་འདོད་པས་རུས་པ་ཁྱེར། པགས་པ་འདོད་པས་པགས་པ་ཁྱེར། ཟོ་ཞིག་ཁྱེར་ཅིག །ཕཊ་ཕཊ་ཕཊ། དེ་ནས་སྒོ་ཕྱི་ནང་མཚམས་ལ་
གཅོད་པ་ལངས་ལ། རྐང་དུང་བཏང་ཌཱ་དྲིལ་འཁྲོལ། མཆོང་འཁྲབ་བྱེད་ཅིང་། མཆོད་གཡོག་གི་ས་དམར་གཏོར་བཟུང་ལ་བྲན། འོ་འོ། ལྷ་ཡི་བུའི་བདུད་དམག་བྱེ་བ་འབུམ་སྡེ་སྣང་སྲིད་ཀྱི་ལྷ་འདྲེ་ཁྱེད་རྣམས་ལ། བེམ་རིག་གཉིས་ལ་གཅེས་འཛིན་ཡོད་དམ་མེད། ཡོད་ན་ལུས་ཤ་ཁྲག་གི་གཏོར་མ་རྒྱ་ཆེན་པོ་འདི། ཁྱེད་རྣམས་ལ་ཚོགས་སུ་འབུལ། བཞེས་ཤིག །ཁྱེར་ཅིག །ཟོ་ཞིག །འཐུངས་ཤིག །ཧ་ཕཊ། ཧ་ཕཊ། ཧ་ཕཊ། ལུས་གདོན་བེམ་པོ་ཤ་ཁྲག་དང་དབྱེར་མེད་ལྷ་ཡི་བུའི་བདུད་ཚོས་ཁྱེར་སོང་བར་བསམས་ལ། དམར་གཏོར་གཅིག་ཤར་དུ་འཕེན་བཅོལ། ནུབ་མ་བཞི་ལ་རེ་རེ་བྱེད་པ་གསུངས་ཀྱང་། ནུབ་གཅིག་ལ་རུང་བས། ལྷོ་ཕྱོགས་སུ་ཐོ་ཆུང་སྟེང་དུ་ངར་མི་སེར་པོ་བཞག །དེ་ལ་ནད་པ་མགོ་གཏད་ཉལ་ནས། ཕཊ། ནད་པའི་སྙིང་གར་རིག་པའི་ཐིག་ལེ་ནི། །དབུ་མའི་ལམ་ནས་ནམ་མཁའི་དབྱིངས་སུ་ཐིམ། །ལུས་ཀྱི་ས་ཁམས་ངར་མི་སེར་པོར་ཐིམ། །བེམ་པོ་གཏོར་མ་དབྱེར་མེད་ཤ་ཁྲག་གིས། །སྟོང་གསུམ་འཇིག་རྟེན་ལྟེམས་སེ་གང་བ་ལ། །ཕུང་པོའི་བདུད་རིགས་མི་སེར་གཟི་བརྗིད་ཅན། །བྱེ་བ་དུ་མས་ཤ་ཁྲག་ལྷག་མེད་ཟོས། །ཐམས་ཅད་དགའ་མགུ་ཡི་རང་ལྡན་པར་གྱུར། །ཕཊ།
དམིགས་པ་མང་དུ་བྱས་ལ། ཧཱུྃ། ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས། །མ་གཅིག་ཡུམ་ཆེན་ལྷ་མོ་སངས་རྒྱས་སྤྱན། །སྐུ་མདོག་སེར་མོ་མཚན་དཔེའི་གཟི་བརྗིད་འབར། །ཞལ་གཅིག་ཕྱག་གཉིས་མཉམ་གཞག་སྐྱིལ་ཀྲུང་མཛད། །མཉམ་གཞག་སྟེང་ན་གསེར་གྱི་འཁོར་ལོ་བསྣམས། །སྣ་ཚོགས་པདྨ་ཟླ་བའི་གདན་ལ་བཞུགས། །ས་ཁམས་རྣམ་དག་རིན་ཆེན་རིགས་ཀྱི་ཡུམ། །རིན་ཆེན་མཁའ་འགྲོ་བྱེ་བ་འབུམ་གྱིས་བསྐོར། །རིན་ཆེན་དབུ་རྒྱན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་རྒྱུན་ཆ་སི་ལི་ལི། །ཐོར་ཚུགས་དར་གྱི་ཅོད་པན་པུ་རུ་རུ། །སྒྲ་སྙན་རོལ་མོ་མང་པོ་དི་རི་རི། །དྲི་ཞིམ་སྤོས་ཀྱི་ངད་པ་སངས་སེ་སང་། །དོ་ནུབ་དཔལ་ལྡན་ཞིང་ནས་འདིར་གཤེགས་ལ། །འདི་ཡི་ཤ་རྣམས་ས་ལ་བསྟིམ་དུ་གསོལ། །རིག་པ་སྐྱེ་མེད་ཡུམ་གྱི་ཀློང་དུ་བསྟིམ། །བེམ་པོ་ཤ་ཁྲག་རུས་པའི་ཕུང་པོ་རྣམས། །ཕུང་པོའི་བདུད་ཚོགས་བྱེ་བ་འབུམ་སྡེ་རྣམས། །སོ་སོར་ཅི་འདོད་སྦྱིན་པ་ཆེན་པོར་ཁྱེར། །གསོལ་བ་འདེབས་སོ་ཡུམ་ཆེན་སངས་རྒྱས་སྤྱན། །བྱིན་གྱིས་རློབས་ཤིག་མ་གཅིག་ལབ་སྒྲོན་མ། །དངོས་གྲུབ་སྩོལ་ཅིག་
རིན་ཆེན་མཁའ་འགྲོའི་ཚོགས། །བདུད་བཞི་རང་སར་ཞི་བར་བྱིན་གྱིས་རློབས། །རྐྱེན་ངན་ལམ་དུ་སློང་བར་བྱིན་གྱིས་རློབས། །ན་ཚ་བོགས་སུ་ཐོན་པར་བྱིན་གྱིས་རློབས། མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཕཊ་ཕཊ་ཕཊ། དེ་ནས་ངར་མི་དོང་བྲུས་པའི་ནང་དུ་སྦ་བཅུག་ལ། ཌཱ་དྲིལ་བྱ་རྐང་དུང་བཏང་། འོ་འོ། ཡུམ་ཆེན་ཡོན་ཏན་གྱི་མཁའ་འགྲོ་ས་ཡི་ལྷ་མོ་སངས་རྒྱས་སྤྱན་མའི་འཁོར། །རིན་ཆེན་མཁའ་འགྲོ་བྱེ་བ་འབུམ་དང་བཅས་པས། ནད་པ་འདི་ཡི་ཤ་རྣམས་ས་ལ་སྟིམས་ཤིག །རིག་པ་སྐྱེ་མེད་ཆོས་སྐུའི་པས་ཤིག །འོ་འོ། ནད་པ་འདི་ཡི་ལུས་ངག་ཡིད་གསུམ་ལ་གནོད་ཅིང་འཚེ་བ། ལུས་ཕུང་པོ་ལ་ན་ཚ་ཟུག་ཟེར་གཏོང་བའི་ཕུང་པོའི་བདུད་རིགས་བྱེ་བ་འབུམ་སྡེ་ཁྱེད་རྣམས་ལ་ལུས་བེམ་པོ་ཤ་ཁྲག་འདི་སྦྱིན་པ་ཡིན་པས། ཤ་འདོད་པས་ཤ་ཁྱེར། ཁྲག་འདོད་པས་ཁྲག་ཁྱེར། རུས་པ་འདོད་པས་རུས་པ་ཁྱེར་། པགས་པ་འདོད་པས་པགས་པ་ཁྱེར། ཟོ་ཞིག །ཁྱེར་ཅིག །ཕཊ་ཕཊ་ཕཊ། དེ་ནས་མཆོད་གཡོག་པས་དམར་གཏོར་བྲན་ལ་བཟུང་བཅུག་རྐང་དུང་བཏང་ཞིང་ཌཱ་དྲིལ་དང་བཅས་སྒོ་ཕྱི་ནང་མཚམས་སུ་མཆོང་འཁྲབ་བྱེད་ཅིང་། འོ་འོ། ཕུང་
པོའི་བདུད་ཀྱི་དམག་ཚོགས་བྱེ་བ་འབུམ་སྡེ། སྣང་སྲིད་ལྷ་འདྲེ་ཁྱེད་རྣམས་ལ། བེམ་རིག་གཉིས་ལ་གཅེས་འཛིན་ཡོད་དམ་མེད། ཡོད་ན་ལུས་ཤ་ཁྲག་གི་གཏོར་མ་རྒྱ་ཆེན་པོ་འདི། ཁྱེད་རྣམས་ལ་ཚོགས་སུ་འབུལ། བཞེས་ཤིག །ཁྱེར་ཅིག །ཟོ་ཞིག །འཐུངས་ཤིག །ཧ་ཕཊ། ཧ་ཕཊ། ཧ་ཕཊ། ཅེས་གཏོར་མ་ལྷོར་འཕང་བཅུག་གམ་རང་གིས་འཕེན་ལ། ཕུང་པོ་ཤ་ཁྲག་གཏོར་མ་དབྱེར་མེད་པ་བདུད་མི་སེར་པོའི་ཚོགས་ཀྱིས་ཁྱེར་སོང་བར་བསྒོམ། དེ་ནས་ཐོ་ཆུང་དེ་ཡང་བཤིག་ལ། ནུབ་ངོས་སུ་ཐོ་ཆུང་སྟེང་དུ་ངར་མི་དམར་པོ་བཞག་ལ་ནད་པའི་མགོ་གཏད་ནས་ཉལ་བཅུག་ལ། ཕཊ། ནད་པའི་སྙིང་གར་རྣམ་ཤེས་རླུང་དང་བཅས། །འོད་ཀྱི་ཐིག་ལེ་བཀྲག་དང་ལྡན་པ་འདི། །དབུ་མའི་ལམ་ནས་རྒྱངས་སེ་ནམ་མཁར་ཐོན། །ནམ་མཁས་གར་ཁྱབ་རིག་པས་ཁྱབ་པར་གྱུར། །ཕཊ། ལུས་ཀྱི་མེ་ཁམས་ངར་མི་དམར་པོར་ཐིམ། །བེམ་པོ་ཤ་ཁྲག་སྟོང་གསུམ་འཇིག་རྟེན་གང་། །ཉོན་མོངས་བདུད་ཚོགས་བྱེ་བ་འབུམ་སྡེ་ནི། །མི་དམར་སྒེག་བཞད་ལང་ཚོ་ལྡན་པ་རྣམས། །ཕུང་པོ་ཤ་ཁྲག་ལྷག་མ་མེད་པར་ཟོ། །ཕཊ་ཕཊ་ཕཊ། ཧཱུྃ། ནུབ་ཕྱོགས་བདེ་བ་ཅན་གྱི་ཞིང་ཁམས་
ནས། །མ་གཅིག་ཡུམ་ཆེན་ལྷ་མོ་གོས་དཀར་མོ། །སྐུ་མདོག་དམར་གསལ་མཚན་དཔེའི་གཟི་བརྗིད་འབར། །ཞལ་གཅིག་ཕྱག་གཉིས་མཉམ་གཞག་སྐྱིལ་ཀྲུང་མཛད། །མཉམ་གཞག་སྟེང་ན་པདྨ་འདབ་བརྒྱད་བསྣམས། །སྣ་ཚོགས་པདྨ་ཟླ་བའི་གདན་ལ་བཞུགས། །མེ་ཁམས་རྣམ་དག་པདྨ་རིགས་ཀྱི་ཡུམ། །པདྨ་མཁའ་འགྲོ་བྱེ་བ་འབུམ་གྱིས་བསྐོར། །རིན་ཆེན་དབུ་རྒྱན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་རྒྱན་ཆ་སི་ལི་ལི། །ཐོར་ཚུགས་དར་གྱི་ཅོད་པན་པུ་རུ་རུ། །སྒྲ་སྙན་རོལ་མོ་མང་པོ་དི་རི་རི། །དྲི་ཞིམ་སྤོས་ཀྱི་ངད་པ་སངས་སེ་སང་། །དོ་ནུབ་བདེ་ཆེན་ཞིང་ནས་འདིར་གཤེགས་ལ། །འདི་ཡི་དྲོད་རྣམས་མེ་ལ་བསྟིམ་དུ་གསོལ། །རིག་པ་སྐྱེ་མེད་ཡུམ་གྱི་ཀློང་དུ་བསྟིམ། །བེམ་པོ་ཤ་ཁྲག་རུས་པའི་ཕུང་པོ་འདི། །ཉོན་མོངས་བདུད་ཚོགས་བྱེ་བ་འབུམ་སྡེ་ལ། །སོ་སོར་ཅི་འདོད་སྦྱིན་པ་ཆེན་པོ་ཁྱེར། །གསོལ་བ་འདེབས་སོ་ཡུམ་ཆེན་གོས་དཀར་མོ། །བྱིན་གྱིས་རློབས་ཤིག་མ་གཅིག་ལབ་སྒྲོན་མ། །དངོས་གྲུབ་སྩོལ་ཅིག་པདྨ་མཁའ་འགྲོའི་ཚོགས། །བདུད་བཞི་རང་སར་ཞི་བར་བྱིན་གྱིས་རློབས། །རྐྱེན་ངན་ལམ་དུ་
སློང་བར་བྱིན་གྱིས་རློབས། །ན་ཚ་བོགས་སུ་ཐོན་པར་བྱིན་གྱིས་རློབས། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ཕཊ་ཕཊ། དེ་ནས་ཤིང་སྣ་ཅུང་བརྩེགས་པ་ལ་ངར་མི་དེ་བསྲེགས་ཅིང་རོལ་མོ་དང་བཅས་པས། འོ་འོ། ཡུམ་ཆེན་གསུང་གི་མཁའ་འགྲོ་མ་མེ་ཡི་ལྷ་མོ་གོས་དཀར་མོ་འཁོར་པདྨ་མཁའ་འགྲོ་བྱེ་བ་འབུམ་དང་བཅས་པས། ནད་པ་འདི་དྲོད་རྣམས་མེ་ལ་སྟིམས་ཤིག །རིག་པ་སྐྱེ་མེད་ཆོས་སྐུའི་ངང་དུ་སྟིམས་ཤིག །འོ་འོ། ནད་པ་འདི་ཡི་ལུས་ངག་ཡིད་གསུམ་ལ་གནོད་ཅིང་འཚེ་བ། སེམས་ལ་ཉོན་མོངས་དུག་ལྔ་རྒྱས་པར་བྱེད་པའི་ཉོན་མོངས་པ་བདུད་ཀྱི་རིགས་བྱེ་བ་འབུམ་སྡེ་ཁྱེད་རྣམས་ལ་ལུས་བེམ་པོ་ཤ་ཁྲག་འདི་སྦྱིན་པ་ཡིན་པས། ཤ་འདོད་པས་ཤ་ཁྱེར། ཁྲག་འདོད་པས་ཁྲག་ཁྱེར། རུས་པ་འདོད་པས་རུས་པ་ཁྱེར། པགས་པ་འདོད་པས་པགས་པ་ཁྱེར། ཟོ་ཞིག །ཁྱེར་ཅིག །ཕཊ་ཕཊ། དེ་ནས་མཆོད་གཡོག་པས་དམར་གཏོར་བཟུང་ལ་བྲན་ཏེ་རྐང་དུང་ཌཱ་དྲིལ་དང་བཅས་ལ་སྒོ་ཕྱི་ནང་མཚམས་སུ་འཚམས་ཤིང་། འོ་འོ། ཉོན་མོངས་བདུད་དམག་བྱེ་བ་འབུམ་སྡེ་སྣང་སྲིད་ལྷ་འདྲེ་ཁྱེད་རྣམས་ལ། བེམ་རིག་གཉིས་ལ་གཅེས་འཛིན་ཡོད་དམ་
མེད། ཡོད་ན་ལུས་ཤ་ཁྲག་གི་གཏོར་མ་རྒྱ་ཆེན་པོ་འདི་ཁྱེད་རྣམས་ལ་ཚོགས་སུ་འབུལ། བཞེས་ཤིག །ཁྱེར་ཅིག །ཟོ་ཞིག །འཐུངས་ཤིག །ཧ་ཕཊ། ཧ་ཕཊ། ཧ་ཕཊ། ཅེས་གཏོར་མ་ནུབ་ཏུ་འཕེན་ནམ་འཕང་བཅུག་བེམ་པོ་ཤ་ཁྲག་གི་ངོ་བོ་གཏོར་མ་དང་དབྱེར་མེད་པ་ཉོན་མོངས་པའི་བདུད་ཚོགས་ཐམས་ཅད་ཀྱིས་ཁྱེར་སོང་བར་དམིགས་སོ། །ཐོ་ཆུང་བསྒྱེལ་ལ་བྱང་དུ་ཐོ་བྱས་པར་ངར་མི་ལྗང་ནག་བཞག་ལ་ནད་པ་མགོ་བསྟན་ནས་ཉལ་བཅུག །ཕཊ། ནད་པའི་སྙིང་གར་རྣམ་ཤེས་ཚེ་བསོད་ནམས། །རླུང་སེམས་ངོ་བོ་ཐིག་ལེ་འོད་འབར་བ། །དབུ་མའི་ལམ་ནས་རྒྱངས་སེ་སྤྱི་བོར་ཐོན། །ནམ་མཁར་ཐིམ་པའི་ཆོས་ཀྱི་དབྱིངས་དང་འདྲེས། །ཕཊ། ལུས་ཀྱི་རླུང་ཁམས་ངར་མི་ལྗང་གུར་བསྟིམ། །བེམ་པོ་ཤ་ཁྲག་སྟོང་གསུམ་འཇིག་རྟེན་གང་། །འཆི་བདག་བདུད་ཚོགས་བྱེ་བ་འབུམ་སྡེ་ནི། །མི་ནག་འཇིགས་ཤིང་གཏུམ་བག་ལྡན་པ་རྣམས། །ཕུང་པོ་ཤ་ཁྲག་ལྷག་མ་མེད་པར་ཟོ། །ཕཊ། དམིགས་པ་མང་དུ་བཟུང་ནས། ཧཱུྃ། །བྱང་ཕྱོགས་ལས་རབ་རྫོགས་པའི་ཞིང་ཁམས་ནས། །མ་གཅིག་ཡུམ་ཆེན་ལྷ་མོ་དམ་ཚིག་སྒྲོལ། །སྐུ་མདོག་ལྗང་གུ་མཚན་དཔེའི་གཟི་བརྗིད་འབར། །ཞལ་གཅིག་ཕྱག་གཉིས་
མཉམ་གཞག་སྐྱིལ་ཀྲུང་མཛད། །མཉམ་གཞག་སྟེང་ན་ཨུཏྤལ་ལྗང་གུ་བསྣམས། །སྣ་ཚོགས་པདྨ་ཟླ་བའི་གདན་ལ་བཞུགས། །རླུང་ཁམས་རྣམ་དག་ལས་ཀྱི་རིགས་ཀྱི་ཡུམ། །ལས་ཀྱི་མཁའ་འགྲོ་བྱེ་བ་འབུམ་གྱིས་བསྐོར། །རིན་ཆེན་དབུ་རྒྱན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་རྒྱན་ཆ་སི་ལི་ལི། །ཐོར་ཚུགས་དར་གྱི་ཅོད་པན་པུ་རུ་རུ། །སྒྲ་སྙན་རོལ་མོ་མང་པོ་དི་རི་རི། །དྲི་ཞིམ་སྤོས་ཀྱི་ངད་པ་སངས་སེ་སང་། །དོ་ནུབ་ལས་རབ་ཞིང་ནས་འདིར་གཤེགས་ལ། །འདི་ཡི་དབུགས་རྣམས་རླུང་ལ་བསྟིམ་དུ་གསོལ། །རིག་པ་སྐྱེ་མེད་ཡུམ་གྱི་ཀློང་དུ་བསྟིམ། །བེམ་པོ་ཤ་ཁྲག་རུས་པའི་ཕུང་པོ་རྣམས། །འཆི་བདག་བདུད་ཚོགས་བྱེ་བ་འབུམ་སྡེ་ལ། །སོ་སོར་ཅི་འདོད་སྦྱིན་པ་ཆེན་པོར་ཁྱེར། །གསོལ་བ་འདེབས་སོ་ཡུམ་ཆེན་དམ་ཚིག་སྒྲོལ། །བྱིན་གྱིས་རློབས་ཤིག་མ་གཅིག་ལབ་སྒྲོན་མ། །དངོས་གྲུབ་སྩོལ་ཅིག་ལས་ཀྱི་མཁའ་འགྲོའི་ཚོགས། །བདུད་བཞི་རང་སར་ཞི་བར་བྱིན་གྱིས་རློབས། །རྐྱེན་ངན་ལམ་དུ་སློང་བར་བྱིན་གྱིས་རློབས། །ན་ཚ་བོགས་སུ་ཐོན་པར་བྱིན་གྱིས་རློབས། །མཆོག་གི་དངོས་གྲུབ་ཐོབ་པར་བྱིན་
གྱིས་རློབས། །ཕཊ་ཕཊ། དེ་ནས་ངར་མི་བྱང་ཕྱོགས་ནམ་མཁའི་དབྱིངས་ལ་འཕེན་བཅུག་ལ། འོ་འོ། ཡུམ་ཆེན་ཕྲིན་ལས་ཀྱི་མཁའ་འགྲོ་མ་རླུང་གི་ལྷ་མོ་དམ་ཚིག་སྒྲོལ་མ། འཁོར་ལས་ཀྱི་མཁའ་འགྲོ་བྱེ་བ་འབུམ་དང་བཅས་པས་ནད་པ་འདི་ཡི་དབུགས་རྣམས་རླུང་ལ་སྟིམས་ཤིག །རིག་པ་སྐྱེ་མེད་ཆོས་སྐུའི་ངང་དུ་སྟིམས་ཤིག །འོ་འོ། ནད་པ་འདི་ཡི་ལུས་ངག་ཡིད་གསུམ་ལ་གནོད་ཅིང་འཚེ་བ། ཚེ་དང་སྲོག་ལ་བར་དུ་གཅོད་པའི་འཆི་བདག་གི་བདུད་རིགས་བྱེ་བ་འབུམ་སྡེ་ཁྱེད་རྣམས་ལ། ལུས་བེམ་པོ་ཤ་ཁྲག་འདི་སྦྱིན་པ་ཡིན་པས། །ཤ་འདོད་པས་ཤ་ཁྱེར། ཁྲག་འདོད་པས་ཁྲག་ཁྱེར། རུས་པ་འདོད་པས་རུས་པ་ཁྱེར། པགས་པ་འདོད་པས་པགས་པ་ཁྱེར། ཟོ་ཞིག །ཁྱེར་ཅིག །ཕཊ་ཕཊ། དེ་ནས་མཆོད་གཡོག་པས་དམར་གཏོར་བཟུང་ལ་བྲན་ནས། རྐང་དུང་ཌཱ་དྲིལ་དང་བཅས་པས་རང་ངམ་གཅོད་གཡོག་པས་སྒོ་ཕྱི་ནང་མཚམས་སུ་འཚམས་ཤིང་། འོ་འོ། འཆི་བདག་གི་བདུད་དམག་བྱེ་བ་འབུམ་སྡེ། སྣང་སྲིད་ཀྱི་ལྷ་འདྲེ་ཁྱེད་རྣམས་ལ། བེམ་རིག་གཉིས་ལ་གཅེས་འཛིན་ཡོད་དམ་མེད། ཡོད་ན་ལུས་ཤ་ཁྲག་གི་གཏོར་མ་རྒྱ་ཆེན་པོ་འདི་ཁྱེད་རྣམས་ལ་ཚོགས་སུ་འབུལ་ལོ། །
བཞེས་ཤིག །ཁྱེར་ཅིག །ཟོ་ཞིག །འཐུངས་ཤིག །ཧ་ཕཊ། ཧ་ཕཊ། ཧ་ཕཊ། ཅེས་གཏོར་མ་བྱང་དུ་འཕེན་བཅུག་གམ་འཕངས་ལ། བེམ་པོ་ཤ་ཁྲག་གི་ངོ་བོ་དབྱེར་མེད་པའི་གཏོར་མ་འཆི་བདག་གི་བདུད་ཐམས་ཅད་ཀྱིས་ཁྱེར་སོང་བར་བསྒོམ། དེ་ནས་དབྱིངས་རིག་བསྲེ་བ་ནི། ཕཊ། བདག་དང་བསྲུང་བྱ་ནད་པ་བཅས་པ་ཡི། །ཤ་ཁྲག་དྲོད་དབུགས་འབྱུང་བ་བཞི་ལ་ཐིམ། །སེམས་ནི་ནམ་མཁའི་མ་གཅིག་བཞི་ལ་ཐིམ། །མ་གཅིག་བཞི་པོ་དམིགས་མེད་འཇའ་ལྟར་ཡར། །རང་དང་བསྲུང་བྱའི་སེམས་དང་མ་གཅིག་ཐུགས། །དབྱེར་མེད་ཆོས་དབྱིངས་ནམ་མཁའི་ངང་དུ་ཐིམ། །སྐྱེ་མེད་ཡུམ་ཆེན་དགོངས་པ་མངོན་དུ་གྱུར། །ཕཊ་ཕཊ་ཕཊ། ཅེས་ཡུན་རིང་དུ་མཉམ་པར་བཞག །འདི་བཞིན་ནུབ་མ་བཞིའམ་གཅིག་ལ་རྫོགས་པར་བྱ། དེ་ནས་གཅོད་ཚོགས་ཡིན་ན་ཚོགས་ཕུད་ཕུལ་ལ་གཏོར་བསྔོས་གཞུང་ལྟར་བྱ། ལུས་སྦྱིན་ཡིན་ན་ཡང་ལུས་སྦྱིན་རྗེས་ཆོག་རྣམས་སྦྱར་རོ། །ཨེ་མ་ལུས་གདོན་གནད་ལ་གཏད་པའི་མན་ངག་མཆོག །གཉན་འབོད་སྤུར་བསྲེག་མཐའ་གཏད་ཆེན་པོ་དང་། །དྲི་ཆུ་བཀྲུ་བསྐྱེལ་ཆུ་ཡི་གཟེར་བུ་དང་། །མེ་ཡི་མཐའ་གཏད་མེ་ཡི་གཟེར་བུ་དང་། །འབྱུང་བཞིའི་མཐའ་གཏད་ངར་མི་སྲེག་སྦས་ཐབས། །དམིགས་རིམ་ཙམ་ཞིག་དམིགས་འབུམ་ཆེན་མོར་ཡོད། །ཕྱག་ལེན་བླ་མ་
རྣམས་ཀྱི་ཐུགས་ལ་གབ། །འདོན་བྱ་ཁ་གཏོར་གང་ཡང་འཐོར་ནས་ཡོད། །དེ་དག་རྨོངས་པ་ཕལ་གྱིས་གབ་མི་འཕྲོད། །འདོན་ཆ་དཔེ་རྙིང་ཉག་ཉོག་མང་པོ་ཞིག །མཛད་བྱང་མི་གསལ་གཅོད་ལོག་འདྲེས་ཀྱང་དོགས། །མཐའ་གཏད་གཉན་འབོད་རིགས་ནི་མང་མཆིས་ཀྱང་། །དགྲ་བོ་ལྷ་འདྲེ་ལ་གཏད་གཉན་འབོད་དང་། །གཉན་སའི་ལྷ་འདྲེ་དབང་སྡུད་གཉན་འབོད་དང་། །ནད་པའི་ལུས་གདོན་གཏད་པའི་གཉན་འབོད་གསུམ། །སོ་སོར་མ་ཕྱེས་ཕྱོགས་གཅིག་བྲིས་པ་དེ། །རྨོངས་པ་རྣམས་ཀྱིས་དབྱེ་བསལ་མི་ཤེས་པས། །ཕན་བས་གནོད་པ་ཆེ་བར་འོང་ཉན་སྣང་། །དེ་ཕྱིར་ཕན་བྱའི་མཐའ་གཏད་རྣམ་པ་བཞི། །མ་འོངས་འགྲོ་ལ་ཕན་པའི་བསམ་པ་ཡིས། །རཱ་གའི་མིང་ཅན་དགེ་སློང་དེ་ཡིས་བྲིས། །འདི་ལ་འགལ་འཁྲུལ་སྦ་འོས་གསལ་བཀོད་སོགས། །ཉེས་པ་མཆིས་ན་ཌཱ་ཀིའི་ཚོགས་ལ་བཤགས། །དགེ་བས་འགྲོ་ཀུན་བདུད་བཞིའི་དགྲ་ལས་རྒྱལ། །བཅོམ་ལྡན་ཚེ་དཔག་མེད་པར་འགྲུབ་པར་ཤོག །མེ་དང་ཆུ་ཡི་གཟེར་བུ་གཉིས་པོ་ནི། །འུ་ཐུག་མ་གཏོགས་མི་རུང་རྣམ་སྨིན་ཆེ། །གཉན་ཆེན་མཐའ་གཏད་སྤུར་གཟུགས་བསྲེགས་པ་དེ། །དེ་ལས་ཅུང་དྲག་འགའ་རེ་འགའ་རེར་བྱ། །འབྱུང་བཞིའི་གཟེར་བུ་ངར་མི་བཞི་པོ་འདི། །འཇམ་ཞིང་ཉེས་ཆུང་གང་ལ་གང་དགོས་བྱ། །ཀུན་ཀྱང་ཆོས་སྒྲུབ་རི་ཁྲོད་འགྲིམ་ངེས་པར། །རེ་རེ་གཅིག་བརྒྱུད་མཁའ་འགྲོའི་སྙིང་ཁྲག་ཡིན། །ལབ་ཀྱི་སྒྲོན་མ་མཁའ་འགྲོའི་སྙིང་ཁྲག་རྒྱ། །ཁུ་སྒོམ་ཆོས་སེང་མཁའ་འགྲོའི་གཅིག་བརྒྱུད་རྒྱ། །སྣང་
སྲིད་ལྷ་འདྲེའི་སྲོག་སྙིང་དབང་སྡུད་རྒྱ། །མ་གཅིག་ཐུགས་བཅུད་རྒྱ་གསུམ་ལྡན་པའི་ཕྱིར། །ཀུན་གྱི་ཟབ་ཆོས་གདམས་ངག་སྙིང་ལ་ཆོངས། །ཟངས་རི་དྲག་པོ་ཟླ་སྐྱོང་ཤམ་པོ་སོགས། །བཀའ་སྲུང་རྣམས་ཀྱིས་བཀའ་འདི་ཐུབ་པར་སྲུངས། །བློ་སྙིང་ངེས་པར་གཏོད་པའི་བུ་ལ་བྱིན། །དེ་ཡི་ཕྲིན་ལས་འགྲུབ་པའི་སྡོང་གྲོགས་མཛོད། །ས་མཱ་ཡ༔ དྷ་ཐིམ། མངྒ་ལཾ། །ཤུ་བྷཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།