ཁྲོས་མའི་སྒྲུབ་ཐབས་ཆོ་ག་དངོས་གྲུབ་གཏེར་མཛོད།
༼ཆ༽ ཁྲོས་མའི་སྒྲུབ་ཐབས་ཆོ་ག་དངོས་གྲུབ་གཏེར་མཛོད་ཅེས་བྱ་བ་བཞུགས་སོ། །
ན་མོ་ཝཱ་རཱ་ཧི་ཡེ། བཅོམ་ལྡན་རྡོ་རྗེ་ཕག་མོ་ལ་བཏུད་ནས། །ནག་མོ་ཐུགས་ཀྱི་སྒྲུབ་པ་གསལ་བཀོད་བྱ། །ཡར་མར་ཚེ་བཅུ་ལ་སོགས་དུས་བཟང་ལ། །རས་བྲིས་སམ་ནི་ལྷ་གྲངས་ཚོམ་བུ་བཀོད། །གཏོར་མ་མཆོད་པ་ཚོགས་རྣམས་སྤྱི་ལྟར་བཤམས། །ཌཱ་དྲིལ་ལག་མཆོད་མདུན་བཤམས་སྟན་ལ་འདུག །གྱེར་སྒོམ་སྦྲགས་ལ་རྔ་ཆེན་བརྡུང་ཡང་རུང་།། ཧཱུྃ། རང་ཉིད་སྐད་ཅིག་ཁྲོས་མའི་སྐུར་གསལ་མདུན། །ཨ་རླུང་མེ་ཐོད་སྐྱེད་སྟེང་དུ་ཀ་པཱ་ལར། །ཤ་ལྔ་བདུད་རྩི་ལྔ་དང་ཡེ་ཤེས་ལྔ། །ཞུ་ཞིང་ཡེ་ཤེས་བདུད་རྩི་སྤྱན་དྲངས་ཐིམ། །ཨོཾ་ཨཱཿཧཱུྃ། ལན་གསུམ། སྔོན་འགྲོ་གཏོར་མ་བཤམས་ལ་བྲན། ཨོཾ་ཨཱཿཧཱུྃ་ཧ་ཧོཿཧྲཱིཿ པད་སྣོད་ནང་
དུ་ལྷ་རྫས་བདུད་རྩིའི་མཚོ། །ཁ་དོག་དྲི་རོ་ནུས་པ་ཕུན་ཚོགས་འདི། །གནོད་སྦྱིན་སྲིན་པོ་འབྱུང་པོ་ཡི་དྭགས་དང་། །ཤ་ཟ་སྨྱོ་བྱེད་བརྗེད་བྱེད་མཁའ་འགྲོའི་ཚོགས། །འདིར་གནས་གཞི་བདག་གནས་བདག་རྣམས་ལ་འབུལ། །དཀར་ཕྱོགས་རྣམས་ཀྱིས་སྒྲུབ་པའི་སྡོང་གྲོགས་མཛོད། །ནག་ཕྱོགས་རྣམས་ནི་གཞན་དུ་འགྲོ་བར་གྱིས། །དཀོན་མཆོག་བདེན་པའི་བཀའ་ལ་ཁྱོད་མ་འདའ། །ཨོཾ་སརྦ་ལོ་ཀ་པཱ་ལ་བ་ལིཾ་ཏ་ཁཱ་ཧི། སརྦ་བིགྷྣན་གཙྪ། དེ་ནས་བྱིན་དབབ་པ་ནི། ཧཱུྃ། བདག་ཉིད་དག་པའི་གནས་མཆོག་ནས། །དུར་ཁྲོད་བདག་མོ་འཁོར་བཅས་
ཀྱིས། །དུར་ཁྲོད་གནས་འདིར་བྱིན་གྱིས་རློབས། །བར་དུ་གཅོད་པ་དབང་དུ་བསྡུས། །ལོག་པར་འདྲེན་པ་རྡུལ་དུ་རློགས། །ཨོཾ་གྷ་གྷ་གྷ་ཏ་ཡ་ཧཱུྃ་ཕཊ། དེ་ནས་རང་ཉིད་ལྷའི་ང་རྒྱལ་གྱིས་བཀའ་བསྒོ་མཚམས་གཅོད་ནི། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ང་ནི་ཁྲོས་མ་རིགས་ལྔའི་སྐུ། །ང་ཡི་བཀའ་ལ་མ་འདའ་བར། །འདི་རུ་མ་འདུག་གཞན་དུ་དེངས། །ཅི་ཏེ་མི་འགྲོ་འདུག་གྱུར་ན། །ཁྲོས་མ་རིགས་ལྔ་ཐུགས་ཁྲོས་ནས། །རིགས་ལྔའི་གྲི་གུག་མཚོན་ཆ་ཡིས། །ཁྱོད་ཀྱི་ལུས་ངག་ཡིད་གསུམ་རྣམས། །རྡུལ་ཕྲན་བཞིན་དུ་བརླག་པར་གྱུར། །དེ་བས་རང་རང་གནས་སུ་དེངས། །ཨ་ཧ་རི་ནི་ས་པཉྩ་ཌཱཀྐི་ནཱི་གནོད་བྱེད་ཨུ་ཙ་ཏ་ཡ་ཧཱུྃ་ཕཊ། ཅེས་བགེགས་བསྐྲད་ནས། མཆོད་པ་བྱིན་རླབས་ནི། ཨ༔ ཐོད་པའི་ནང་དུ་ཧཱུྃ་ལས་མཆོད་པའི་སྤྲིན། །རབ་འབྱམས་དཔག་ཡས་ནམ་མཁའ་ཁྱབ་པར་གྱུར། །ཨོཾ་བཛྲ་སརྦ་པཱུ་ཛ་ཨཱཿཧཱུྃ། རྩ་བརྒྱུད་བླ་མ་ཡི་དམ་ལྷ་ཡི་ཚོགས། །དཀོན་མཆོག་གསུམ་དང་ཌཱཀྐི་ཆོས་སྐྱོང་ལ། །དེང་ནས་བཟུང་སྟེ་རྟག་ཏུ་སྐྱབས་སུ་མཆི། །འགྲོ་བའི་དོན་དུ་བྱང་ཆུབ་སེམས་མཆོག་བསྐྱེད། །བདག་གི་སྤྱི་བོར་རྡོར་སེམས་ཧེ་རུ་
ཀ །དཀར་གསལ་རྡོར་དྲིལ་བསྣོལ་ནས་ཡུམ་དང་སྦྱོར། །གར་དགུའི་ཉམས་ལྡན་གཡས་བརྐྱང་སྟབས་ཀྱིས་བཞུགས། །གདོད་ནས་དམ་ཡེ་དབྱེར་མེད་ཐུགས་ཀ་རུ། །ཟླ་སྟེང་ཧཱུྃ་ལ་ཡི་གེ་བརྒྱ་པས་བསྐོར། །བདུད་རྩིའི་རྒྱུན་བབ་ཉམས་ཆག་སྡིག་སྒྲིབ་དག །ཨོཾ་ཤྲཱི་ཧེ་རུ་ཀ་བཛྲ་སཏྭ་ཧཱུཾ། རྒྱས་པར་ན་ཧེ་རུ་ཀའི་ཡིག་བརྒྱ་བཟླ། རྡོར་སེམས་ཡབ་ཡུམ་རང་ལ་ཐིམ་པའི་མཐུས། །བདག་ཉིད་ཁྲོས་མའི་སྐུར་གྱུར་ཐུགས་ཀ་རུ། །ཨ་དང་ཧ་རི་ནི་སའི་འོད་ཟེར་གྱིས། །བཀའ་བརྒྱུད་བླ་མ་ཁྲོས་མའི་ལྷ་ཚོགས་བཅས། །ཕེཾ་ཕེཾ་སྒྲ་ཡིས་ནམ་མཁར་སྤྱན་དྲངས་བཞུགས། །ལུས་ངག་ཡིད་གསུམ་གུས་པས་ཕྱག་འཚལ་ལོ། །གླིང་བཞི་རི་རབ་ཉི་ཟླས་བརྒྱན་པ་སོགས། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོས་མཆོད། །སྡིག་པའི་ལས་རྣམས་གང་བགྱིས་མཐོལ་ཞིང་བཤགས། །འཕགས་སྐྱེས་བསོད་ནམས་ཀུན་ལ་བདག་ཡི་རང་། །ཆོས་འཁོར་བསྐོར་ཞིང་རྟག་ཏུ་བཞུགས་གསོལ་འདེབས། །དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །ཡུམ་ཆེན་ཤཱཀ་ཐུབ་འཇམ་དཔལ་འཕགས་པ་ལྷ། །དམ་པ་མ་གཅིག་ཁམ་བུ་ཡ་ལེ་དང་། །
ཡེ་ཤེས་འབར་དང་རྟོགས་ལྡན་གནམ་མཚོ་བ། །རང་བྱུང་རྡོ་རྗེ་རྣམས་ལ་གསོལ་བ་འདེབས། །ཕག་མོ་པད་འབྱུང་མཚོ་རྒྱལ་མངའ་བདག་རྗེ། །ཉི་མ་འོད་ཟེར་ཉང་སྲས་མདོ་རས་སོགས། །རྩ་བརྒྱུད་བླ་མ་རྣམས་དང་ཁྲོས་མ་ཡི། །དཀྱིལ་འཁོར་ལྷ་ཚོགས་རྣམས་ལ་གསོལ་བ་འདེབས། །གསོལ་བ་བཏབ་པས་ལྷ་ཚོགས་ཐམས་ཅད་ཀུན། །འོད་ཞུ་རང་ལ་ཐིམ་པས་དབང་བཞི་ཐོབ། །འགྲོ་ཀུན་བདེ་ལྡན་སྡུག་བསྔལ་ཀུན་དང་བྲལ། །བདེ་དང་འབྲལ་མེད་བཏང་སྙོམས་ལ་གནས་ཤོག །ཅེས་པས་ཚོགས་བསགས། སྲུང་འཁོར་ལྷ་བསྐྱེད་ནི། ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷ་ཝ་ཤུདྡྷོཉཧཾ། སྟོང་ཉིད་ངོ་བོ་གསེར་གྱི་རྡོ་རྗེ་ལས། །འོད་འཕྲོས་རྡོ་རྗེའི་ར་གུར་མེ་དཔུང་འབར། །རྡོ་རྗེའི་ལྟེ་དབུས་ནམ་མཁའི་ཁྱོན་ལྟ་བུར། །ཨོ་རྒྱན་རང་བྱུང་གནས་མཆོག་ཆོས་འབྱུང་དབྱིབས། །མེ་རི་རྡོ་ར་དུར་ཁྲོད་བརྒྱད་ཀྱི་དབུས། །ཐོད་པ་སྐམ་རློན་རིན་ཆེན་བརྩེགས་པ་ཡི། །ལྷ་བརྒྱད་ཀླུ་བརྒྱད་མཆོག་ཆེན་མཆོག་ཕྲན་སོགས། །གཞལ་ཡས་གྲུ་བཞི་སྒོ་བཞི་མཚན་ཉིད་རྫོགས། །དེ་ནང་ཆོས་འབྱུང་རྩེ་ཕྲ་ཐུར་དུ་ཟུག །ཁ་གདེང་གྱེན་བསྟན་རྒྱ་ཆེ་ཡངས་པའི་དབུས། །
འདབ་བཞི་འདབ་བརྒྱད་པད་ཉི་རོ་ཡི་སྟེང་། །རང་སེམས་ཨ་ཡིག་འོད་ཀྱི་འཕྲོ་འདུ་ལས། །རང་ཉིད་བཅོམ་ལྡན་ཐུགས་རྗེ་ཁྲོས་མའི་སྐུ། །ཆོས་ཉིད་མི་འགྱུར་སྐུ་མདོག་མཐིང་ནག་འབར། །ཀུན་རྫོབ་དོན་དམ་བདེན་པའི་ཕྱག་གཉིས་ཀྱི། །གཡས་པས་རྣམ་རྟོག་རྩད་གཅོད་གྲི་གུག་ཕྱར། །གཡོན་པས་འགྲོ་ལ་རྗེས་ཆགས་ཐོད་ཁྲག་གསོལ། །སྐུ་གསུམ་ལྡན་པས་ཁྲོ་གཉེར་དཔྲལ་བར་བསྡུས། །དུས་གསུམ་གཟིགས་པའི་སྤྱན་གསུམ་དམར་ལ་འཁྲུགས། །བདུད་བཞི་གདུག་པ་ཟ་བྱེད་མཆེ་བཞི་གཙིགས། །ལྗགས་འདྲིལ་རྐན་རྡེབ་ཕོ་སྒྲས་བདུད་ཚོགས་བསྐྲད། །ཐབས་ཤེས་ཞབས་གཉིས་གཡས་བསྐུམ་བྷ་གར་གཏད། །སྲིད་པར་མི་འཁྲུལ་ཟག་མེད་བདེ་ཆེན་རྒྱས། །གཡོན་བརྐྱང་གར་གྱིས་དབུགས་བྲལ་སྙིང་གར་མནན། །ཞེ་ལ་མི་གནས་གཉིས་འཛིན་རྣམ་རྟོག་འཇོམས། །ཧེ་རུ་ཀ་དངོས་ཁ་ཊྭཱཾ་མཆན་དུ་བསྒྲེང་། །དུག་གསུམ་རྩད་གཅོད་སྐུ་གསུམ་ལྷུན་གྱིས་གྲུབ། །ཐུགས་རྗེའི་ཆར་འབེབས་དབུ་སྐུ་སྤྲིན་ལྟར་གཏིབས། །རྟོག་མེད་ཆོས་སྐུའི་ཕག་ཞལ་གྱེན་དུ་ངུར། གཟུགས་སྐུ་སྤྲུལ་ཕྱིར་ཕག་ཟེ་མེ་དཔུང་འབར། །ཡེ་ཤེས་ལྔ་
ལྡན་ཐོད་སྐམ་དབུ་ལ་བརྒྱན། །ཕ་རོལ་ཕྱིན་དྲུག་ལྡན་པའི་རུས་པའི་རྒྱན། །ཞེ་སྡང་འཇོམས་ཕྱིར་དུག་སྦྲུལ་ག་ཤལ་དང་། །འདོད་ཆགས་འཇོམས་ཕྱིར་རཀྟའི་ཐིག་ལེས་སྤྱས། །ང་རྒྱལ་འཇོམས་ཕྱིར་སྟག་ལྤགས་ཤམ་ཐབས་དང་། །གཏི་མུག་དག་ཕྱིར་གླང་ཆེན་ཀོ་རློན་གསོལ། །ཕྲག་དོག་འཇོམས་ཕྱིར་ཞིང་ཆེན་སྟོད་གཡོགས་དང་། །འབྱུང་པོ་ཚར་གཅོད་ཐོད་རློན་ཕྲེང་བས་བརྒྱན། །ཧ་ཧའི་སྒྲ་སྒྲོགས་འགྲོ་བ་དབྱིངས་སུ་འདྲེན། །བདུད་དཔུང་བསྲེག་ཕྱིར་མེ་དཔུང་ཀློང་ན་འགྱིང་། །གཙོ་མོའི་ཕྱོགས་བཞིར་ཁྲོས་མ་རིགས་བཞི་དང་། །དེ་རྒྱབ་ཕྱོགས་བཞིར་རིགས་བཞིའི་མཁའ་འགྲོ་རྣམས། །ཕྱོགས་ཀྱི་མདོག་ཅན་ཕྱི་ཡི་མཚམས་བཞི་ལ། ཤར་ལྷོ་དམ་ཚིག་ལྷོ་ནུབ་སྣ་ཚོགས་དང་། །ནུབ་བྱང་ཐམས་ཅད་བྱང་ཤར་འཇིག་རྟེན་གྱི། །མཁའ་འགྲོ་མ་བཞི་ཕྱེད་གཟུགས་འཛིན་པ་སྟེ། །ཀུན་ཀྱང་བཅུ་དྲུག་ན་ཚོད་སྒེག་ཅིང་བཞད། །གར་དགུའི་ཉམས་ལྡན་དབུ་སྐྲ་སིལ་བུར་གྲོལ། །གྲི་ཐོད་འཛིན་པའི་གར་གྱིས་ཁ་ཊྭཱཾ་འཁྱུད། །དུར་ཁྲོད་ཆས་གསོལ་པད་ཉི་རོ་སྟེང་འགྱིང་། །དེ་ནས་ལུས་དཀྱིལ་ནི། །བདག་ལུས་རང་བྱུང་གདོད་ནས་གཞལ་ཡས་
ཁང་། །སྟོང་གསལ་ཕྲུ་མ་ཕུས་བཏབ་ལྟ་བུའི་ནང། །རྩ་གསུམ་འཁོར་ལོ་ལྔ་བཅས་གསལ་བ་ཡི། །འཁོར་ལོ་ལྔ་དབུས་འདབ་བཞི་རིགས་མཐུན་མདོག །མུ་ཁྱུད་རིགས་ལྔར་ཕྱག་མཚན་གྱིས་བསྐོར་བའི། །སྤྱི་བོར་ཧ་ལས་བདེ་ཆེན་དཀར་མོ་དང་། །མགྲིན་པར་ནི་ལས་དམར་མོ་སྒྲ་སྒྲོགས་མ། །སྙིང་གར་ཨ་ལས་ཁྲོས་མ་ནག་མོ་ཉིད། །ལྟེ་བར་རི་ལས་སེར་མོ་དོན་གྲུབ་དང་། །གསང་བར་ས་ལས་སྣ་ཚོགས་མཐར་ཕྱིན་རྣམས། །རང་རང་མདོག་མཚུངས་ཀི་བཞི་རེས་བསྐོར། །སྒལ་ཚིགས་རིག་འཛིན་བརྒྱུད་པའི་བླ་མ་རྣམས། །རྩིབ་ལོགས་གཡས་པ་རྟ་མགྲིན་དཔའ་བོའི་ཚོགས། །རྩིབ་ལོགས་གཡོན་པ་གསང་ཡེ་དཔའ་མོའི་ཚོགས། །བ་སྤུའི་བུ་གར་གྲངས་མེད་ཌཱཀྐིའི་ཚོགས། །བར་མཚམས་སྐུ་གདུང་རིང་བསྲེལ་དབྱངས་གསལ་དང་། །འཇའ་འོད་ཐིག་ཕྲན་ཁྲ་དང་ཤིག་སེར་གསལ། །དེ་ནས་གོ་ཆ་རྩ་གནས་བྱིན་གྱིས་རླབས་པ་ནི། །གཙོ་འཁོར་ཀུན་གྱི་གནས་གསུམ་ཡི་གེ་གསུམ། །མགོ་བོར་ཨ་དང་ཡན་ལག་ཡི་གེ་བཞི། །སྤྱི་བོར་ཨ་སོགས་གནས་བཞིར་ཡི་གེ་བཞི། །ཁྱད་པར་འཁོར་ལོ་ལྔ་ཡི་རྩ་འདབ་ཀུན། །དབུས་
མཐིང་ལ་སོགས་ཕྱོགས་མདོག་ཨ་ཡིག་རེ། །སྙིང་དབུས་ཁྲོས་མའི་ཐུགས་ཀར་འདབ་བཞིའི་སྟེང་། །ཨ་དང་ཧ་རི་ནི་སའི་འོད་ཟེར་གྱིས། །ཨོ་རྒྱན་རང་བྱུང་དུར་ཁྲོད་ཆེན་པོ་ནས། །འཁོར་བཅས་ཕེ་ཕོ་སྒྲ་ཡིས་སྤྱན་དྲངས་ཏེ། །འདིར་ཡེ་ཤེས་འགུགས་པའི་ཕྱག་རྒྱ་བྱའོ།། ཡིད་སྤྲུལ་མཆོད་པས་མཆོད་ནས་བདག་ཉིད་ལ། །ཛཿཧཱུྃ་བྃ་ཧོཿས་གཉིས་སུ་མེད་པར་གྱུར། །སྤྱི་བོར་གུ་རུ་རྟ་མགྲིན་ཡབ་ཡུམ་གྱི། །བྱང་སེམས་རྒྱུན་གྱི་དབང་བསྐུར་བདེ་ཆེན་རྒྱས། །བདག་ཉིད་མཆོད་པས་གཙོ་བོ་ལག་མཆོད་ནི། །ལག་པ་བསང་ཞིང་ཆོས་འབྱུང་ཕྱག་རྒྱ་བྲི། །ཨ་ལས་ལག་མཐིལ་ཆོས་འབྱུང་འདབ་བཞིའི་དབུས། །ཨ་དང་ཧ་རི་ནི་སའི་ཡི་གེ་ལས། །འོད་འཕྲོས་དོན་གཉིས་བྱས་ནས་ཡོངས་སུ་གྱུར། །ཁྲོས་མ་ལྷ་ལྔ་རྒྱན་དང་ཆ་ལུགས་གསལ། །ས་བོན་འོད་ཀྱིས་ཡེ་ཤེས་སྤྱན་དྲངས་ཏེ། །ཕེཾ་ཕེཾ་ཛཿཧཱུྃ་བྃ་ཧོཿས་གཉིས་མེད་གྱུར། །ཕྱི་ནང་གསང་གསུམ་མཆོད་སྤྲིན་རྒྱ་མཚོས་མཆོད། །ཨ་དང་ཧ་རི་ནི་ས་ཨོཾཿཨཱཿཧཱུྃ། །འབྱུང་ལྔ་གནས་དག་ཡེ་ཤེས་ལྔ་ཡི་ངང་། །དུག་ལྔ་རྩད་གཅོད་ཌཱཀྐི་ལྔ་ལ་བསྟོད། །ལག་པའི་ལྷ་ཚོགས་འོད་ཞུར་བདུད་རྩི་ཐིམ། །བདུད་རྩི་ཟེག་མ་མཐེབ་སྲིན་རྩེ་
ནས་འཕྲོས། །གནས་ལ་ཕོག་པས་ཨོ་རྒྱན་རང་བྱུང་གནས། །མགྲོན་ལ་ཕོག་པས་དཔའ་བོ་ཌཱཀྐི་མ། །ཚོགས་དང་མཆོད་པ་ལ་ཕོག་བདུད་རྩིར་གྱུར། །རང་ལ་ཕོག་པས་བ་སྤུ་ཌཱཀིའི་གཏམས། །རྩ་བརྒྱུད་བླ་མ་ཡི་དམ་ཁྲོས་མའི་ཚོགས། །ཆོས་བདག་སྲུང་མའི་ཞལ་དུ་ཨོཾ་ཨཱཿཧཱུྃ། །འགྲོ་དྲུག་ཡི་དམ་ལྷ་རུ་གསལ་བ་དང་། །གནས་བདག་གཞི་བདག་ཞལ་དུ་ཨོཾ་ཨཱཿཧཱུྃ། །ཕག་ཞལ་ངུར་ཞིང་བརྟུལ་ཞུགས་བསྐྱེད། །ང་རྒྱལ་བསྐྱེད་ཅིང་བསྟོད་བསྐུལ་བྱ། །ཧཱུྃ། སྟོང་ཉིད་ཆོས་ཀྱི་དབྱིངས་ཀྱི་དཀྱིལ་འཁོར་ནས། །ཐུགས་རྗེས་སྤྲུལ་པས་བདག་གཞན་གཉིས་ཀྱི་དཔལ། །རྣམ་པར་ཐར་པ་གསུམ་གྱི་སྒོ་དབྱེ་མ། །ཤེས་རབ་ཕ་རོལ་ཕྱིན་ལ་ཕྱག་འཚལ་བསྟོད། །ཧཱུྃ། རྟོག་མེད་དགྱེས་པའི་ཚུལ་དུ་སྐུ་སྤྲུལ་མ། །ནག་མོ་ཁྲོས་མས་ལྷ་རྣམས་ཟིལ་གྱིས་གནོན། །ཆོས་ཉིད་མི་འགྱུར་སྐུ་མདོག་མཐིང་ནག་ལ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་བསྟོད། །ཧཱུྃ། གཡས་ན་གཅོད་བྱེད་གྲི་གུག་བསྣམས་པ་ནི། །བདུད་དང་མུ་སྟེགས་ཚོགས་རྣམས་སྐྲག་པར་བྱེད། །ཉོན་མོངས་རྣམ་པར་རྟོག་པ་རྩད་ནས་གཅོད། །ཕྲིན་ལས་མཐར་ཕྱིན་ཁྱེད་ལ་ཕྱག་
འཚལ་བསྟོད། །གཡོན་ན་ཐོད་པ་ཁྲག་བཀང་བསྣམས་པ་ནི། །ཐུགས་རྗེའི་ཆགས་པའི་ཚུལ་གྱིས་འགྲོ་དོན་མཛད། །སྟོང་ཉིད་སྙིང་རྗེའི་འབྲེལ་བའི་བདག་ཉིད་ཅན། །ཐུགས་རྗེས་འགྲོ་དོན་མཛད་ལ་ཕྱག་འཚལ་བསྟོད། །ཕྱག་མཚན་ཁ་ཊཾ་ག་ནི་ཐུགས་ཀར་འཛིན། །དུག་གསུམ་རྩད་གཅོད་འཁོར་བའི་གཡུལ་ངོ་སེལ། །སྐུ་གསུང་ཐུགས་དང་མཉམ་སྦྱོར་ཁྲོ་མོའི་སྐུ། །སྐུ་གསུམ་ལྷུན་གྲུབ་ཁྱེད་ལ་ཕྱག་འཚལ་བསྟོད། །སྲིད་གསུམ་རྣམ་རྟོག་ཐམས་ཅད་འཇོམས་པའི་ཕྱིར། །འཇིགས་བྱེད་ཆེན་མོ་ཕག་གི་གདོང་པ་ཅན། །ཡེ་ཤེས་ཁྲོ་ཞལ་འཇིགས་པའི་ཁྲོ་གཉེར་ཅན། །མཐུ་སྟོབས་བདག་མོ་ཁྱེད་ལ་ཕྱག་འཚལ་བསྟོད། །གདུག་པ་ཟ་བྱེད་འཇིགས་པའི་མཆེ་བ་གཙིགས། །བདུད་དང་ལོག་འདྲེན་ཐམས་ཅད་ཟིལ་གྱིས་གནོན། །ཞལ་གདངས་ལྗགས་འདྲིལ་དྲག་པོའི་རྐན་སྒྲ་རྡེབ། །སྟོང་ཉིད་སྒྲ་སྒྲོགས་མ་ལ་ཕྱག་འཚལ་བསྟོད། །དུག་གསུམ་འཐོར་བྱེད་སྤྱན་གསུམ་མེ་ལྟར་འབར། །ཡེ་ཤེས་ལྔ་ལྡན་ཐོད་པས་དབུ་ལ་བརྒྱན། །སྐུ་ལྔ་རབ་རྫོགས་ཡེ་ཤེས་མཁའ་འགྲོ་མ། །ཡོན་ཏན་མཐར་ཕྱིན་མ་ལ་ཕྱག་འཚལ་བསྟོད། །ཧཱུྃ། ངོ་
མཚར་ཆེན་མོ་དགྱེས་པའི་གད་རྒྱང་ཅན། །དུག་ལྔ་འཇོམས་ཕྱི་དུར་ཁྲོད་ཆས་ཀྱིས་བརྒྱན། །དགྱེས་པའི་གད་མོས་འཁོར་བ་སྐམ་སར་འདྲེན། །རྟགས་ཀྱི་འགྲོ་དོན་མཛད་ལ་ཕྱག་འཚལ་བསྟོད། །ཕག་སྐད་ཕྱོགས་བཅུར་ངུར་བའི་དམིགས་པ་དང་བསྟུན་ཏེ། ཧཱུྃ། ཕག་སྐད་ངུར་ངུར་སྟེང་དུ་བསྒྲོགས་པ་ཡིས། །གཟུགས་མེད་ཁམས་རྣམས་དབང་བདུན་པ་དུ་སྡུད་པར་བྱེད། །ཕག་སྐད་ངུར་ངུར་བར་དུ་བསྒྲོགས་པ་ཡིས། །གཟུགས་ཁམས་མ་ལུས་དབང་དུ་སྡུད་པར་བྱེད། །ཕག་སྐད་ངུར་ངུར་འོག་ཏུ་བསྒྲོགས་པ་ཡིས། །འདོད་ཁམས་གནས་རིགས་དབང་དུ་སྡུད་པར་བྱེད། །ཁམས་གསུམ་མ་ལུས་དབང་དུ་སྡུད་པ་ཡི། །ཕག་མོ་དབང་སྡུད་སྐུ་ལ་ཕྱག་འཚལ་བསྟོད། །ཕག་སྐད་དྲག་པོ་ཕྱོགས་བཞིར་བསྒྲོགས་པ་ཡིས། །རིགས་བཞི་མཁའ་འགྲོའི་ཚོགས་རྣམས་ཕོ་ཉར་འགྱེད། །མཁའ་འགྲོ་དབང་སྡུད་སྐུ་ལ་ཕྱག་འཚལ་བསྟོད། །རྡོ་རྗེ་ཕག་མོ་ནག་མོ་ཁྲོས་མའི་སྐུ། །མཁའ་འགྲོ་རིགས་བཞི་འཁོར་དང་བཅས་པ་ཡིས། །ཁམས་གསུམ་གདུག་པ་མ་ལུས་རྡུལ་དུ་རློགས། །དྲེགས་པ་གདུག་པ་མ་ལུས་དབང་དུ་སྡུད། །མཁའ་འགྲོ་ཕོ་མོ་ཐམས་ཅད་ལས་
ལ་འགྱེད། །བཀའ་དང་དམ་བཞིན་བཅོལ་བའི་ཕྲིན་ལས་མཛོད། །ཅེས་བསྐུལ་དགྲ་བགེགས་གང་དམིགས་བརླག་པར་འགྱུར། དེ་ནས་བསྙེན་པ་བྱ་བ་ནི། རང་གི་གནས་ལྔར་ཁྲོས་མ་རིགས་ལྔ་ཡི། །ཐུགས་ཀར་ཉི་སྟེང་རང་རང་ས་བོན་མཐར། །སྤྱི་བོར་སྐུ་སྔགས་བཛྲ་བྷ་ར་ཧི། །མགྲིན་པ་གསུང་སྔགས་ཀྲོ་ཏི་ཀཱ་ལི་དང་། །ཐུགས་ཀར་ཐུགས་སྔགས་ཧ་རི་ནི་ས་བཞི། །ལྟེ་བར་ཨཱ་ཝེ་ཤ་ཡ་ཡོན་ཏན་སྔགས། །གསང་བར་སརྦ་ཀརྨ་ཕྲིན་ལས་སྔགས། །གཡོན་དུ་འཁོར་བས་འོད་ཟེར་ཕྱོགས་བཅུར་འཕྲོས། །འཁོར་འདས་མཐུ་བྱིན་ཀུན་བསྡུས་བདག་ལ་ཐིམ། །ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་ཨཱ་ཝེ་ཤ་ཡ་སརྦ་ཀརྨ་ཧཱུྃ་ཕཊ། ཅེས་ཉང་ལུགས་ལྷ་བཅུ་གསུམ་མ་དང་། ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་བཛྲ་ཌཱཀྐི་ནི་ཨཱ་ཝེ་ཤ་ཡ་ཧཱུྃ་ཕཊ། ཅེས་ལྷ་ལྔ་ཇོ་མོ་ལུགས་གང་བྱེད་ཀྱི་སྔགས་བཟླས་ཏེ། སྔགས་བསྡུས་པ་ཨ་ཧ་རི་ནི་སའོ། །འབུམ་ཕྲག་གསུམ་མམ་དྲུག་གམ་བཅུ། །ཞག་བདུན་ཉེར་གཅིག་ཟླ་བ་དྲུག །དབང་པོ་རབ་འབྲིང་ཐ་མ་ཡི། །འགྲུབ་རྟགས་སྣ་ཚོགས་འབྱུང་བ་སྟེ། །རྒྱུན་བསྙེན་ཡི་དམ་བྱས་གྱུར་ཀྱང་། །འཆི་ཚེ་དཔའ་བོ་མཁའ་འགྲོས་བསུ། །འཇའ་འོད་སྒྲ་དང་མེ་ཏོག་ཆར། །རོལ་མོའི་སྒྲ་བཅས་མཁའ་སྤྱོད་ཁྲིད། །སྐུ་གཟུགས་ཡིག་འབྲུ་རིང་བསྲེལ་
དང་། །དག་པའི་སྣང་བ་དཔག་མེད་འབྱུང་། །སངས་རྒྱས་ས་ལ་འཕྱུགས་མེད་གསུངས། །དེ་ནས་མདུན་བསྐྱེད་སྒྲུབ་པ་ནི། །ཨ། མདུན་འདིར་ཨོ་རྒྱན་གནས་མཆོག་ཆོས་འབྱུང་དབྱིབས། །མེ་རི་རྡོ་ར་དུར་ཁྲོད་བརྒྱད་ཀྱི་དབུས། །ཐོད་པའི་གཞལ་ཡས་གྲུ་བཞི་སྒོ་བཞི་པ། །དྲག་པོའི་ཕོ་བྲང་མཚན་ཉིད་ཡོངས་སུ་རྫོགས། །དེ་དབུས་ཆོས་འབྱུང་བསྣོལ་མ་གདན་ཐབས་སྟེང་། །འདབ་བརྒྱད་འདབ་བཞི་པད་ཉི་རོ་ཡི་སྟེང་། །ཨ་ཡིག་མཐིང་ནག་འོད་ཀྱི་འཕྲོ་འདུ་ལས། །བཅོམ་ལྡན་ཐུགས་རྗེ་ཁྲོས་མ་ནག་མོ་ནི། །རབ་ཁྲོས་དབུ་སྐྲའི་གསེབ་ནས་ཕག་ཞལ་ངུར། །གར་དགུའི་ཉམས་ལྡན་མེ་དཔུང་ཀློང་ན་བཞུགས། །ཕྱོགས་བཞིའི་འདབ་བཞི་ནཱང་དང་ཕྱི་གཉིས་ན། །ཁྲོས་མ་རིགས་བཞི་མཁའ་འགྲོ་སྡེ་བཞི་རྣམས། །ཕྱོགས་ཀྱི་མདོག་ཅན་ཕྱི་ཡི་མཚམས་བཞི་ལ། །དུར་ཁྲོད་ཌཱཀྐི་བཞི་པོ་ཕྱེད་གཟུགས་འཛིན། །འཁོར་རྣམས་སྐུ་གྲོལ་སྒེག་བཞད་ལང་ཚོ་རྒྱས། །ཀུན་ཀྱང་དུར་ཁྲོད་ཆས་བརྒྱད་སྐུ་ལ་གསོལ། །གྲི་ཐོད་བསྣམས་པའི་ཚུལ་གྱིས་ཁ་ཊཾ་འཁྱུད། །ཀུན་གྱི་གནས་གསུམ་ཨོཾ་ཨཱཿཧཱུྃ་རྣམས་དང་། །ཨ་དང་ཧ་རི་ནི་སའི་འོད་ཟེར་གྱིས། །ཨོཾ་
རྒྱན་རང་བྱུང་གནས་དང་སོ་ས་གླིང་། །རང་བཞིན་གནས་ནས་འཁོར་བཅས་སྤྱན་དྲངས་གྱུར། །དེ་ནས་སྤྱན་དྲངས་པ་ནི། ཧཱུྃ། འོག་མིན་ཆོས་དབྱིངས་ཞིང་ཁམས་ནས། །གྲུབ་ཐོབ་བླ་མ་གཤེགས་སུ་གསོལ། །སྐུ་དང་ཡེ་ཤེས་ཞིང་ཁམས་ནས། །ཡི་དམ་ལྷ་ཚོགས་གཤེགས་སུ་གསོལ། །ཧཱུྃ། སྟོང་ཉིད་ཆོས་ཀྱི་དབྱིངས་ཀྱི་ཕོ་བྲང་ནས། །ཐུགས་རྗེ་ཁྲོས་མ་ནག་མོ་གཤེགས་སུ་གསོལ། །མི་འགྱུར་གནས་པའི་གཞལ་ཡས་ནས། །བདེ་ཆེན་དཀར་མོ་གཤེགས་སུ་གསོལ། །གཏེར་འབྱུང་ཡིད་བཞིན་གཞལ་ཡས་ནས། །སེར་མོ་དོན་གྲུབ་གཤེགས་སུ་གསོལ། །ཤེས་རབ་བཙུན་མོའི་བྷ་ག་ནས། །དམར་མོ་སྒྲ་སྒྲོགས་གཤེགས་སུ་གསོལ། །ཕྲིན་ལས་ཐོགས་མེད་ཕོ་བྲང་ནས། །སྣ་ཚོགས་མཐར་ཕྱིན་གཤེགས་སུ་གསོལ། །ཕྱོགས་བཞི་མཚམས་བརྒྱད་དུར་ཁྲོད་ནས། །མཁའ་འགྲོ་རྣམ་བརྒྱད་གཤེགས་སུ་གསོལ། །ཌཱཀྐིའི་ཚོགས་རྣམས་གཤེགས་ཙམ་ན། །རིན་ཆེན་རུས་རྒྱན་ཁྲ་ལ་ལ། །དབུ་རྒྱན་ཐོར་ཚུགས་ལྡེམས་སེ་ལྡེམ། །རོལ་མོ་སིལ་སྙན་སི་ལི་ལི། །གླུ་ལེན་གར་བྱེད་ཁྱུགས་སེ་ཁྱུག །ཧཱུཾ་དང་ཕཊ་སྒྲ་དི་རི་རི། །བྱིན་རླབས་དངོས་གྲུབ་
ཐིབས་སེ་ཐིབ། །བྱིན་གྱིས་བརླབ་ཕྱིར་གཤེགས་སུ་གསོལ། །ཛཿཧཱུྃ་བ་ཧོ༔ བཛྲ་ཌཱཀྐི་ནཱི་ས་མ་ཡ་ཧོ༔ ས་མ་ཡ་སྟྭཾ། དྲི་ཤྱ་ཧོ༔ ཨེ་ཨཱ་རལླི་ཧོ༔ ཕེཾ་ཕེཾ་ཕེཿ མདུན་གྱི་ནམ་མཁར་སྤྲིན་གཏིབས་པ་ལྟར་བྱོན་པར་བསམས་ལ། བཞུགས་སུ་གསོལ་བ་ནི། ཧཱུྃ། ཉོན་མོངས་ཡེ་ཤེས་གཉིས་སུ་མེད་པའི་ངང་། །སྤང་ཐོབ་བྲལ་བའི་འཁོར་འདས་མཉམ་པ་ཉིད། །དམ་ཚིག་ཡེ་ཤེས་ཆུ་ལ་ཆུ་བཞག་བཞིན། །གཉིས་མེད་ཟུང་འཇུག་བརྟན་པར་བྱ་བའི་ཕྱིར། །ཚོགས་ཁང་དུར་ཁྲོད་འབར་བའི་ཕོ་བྲང་འདིར། །སྣ་ཚོགས་པད་ཉི་རོ་ཡི་གདན་སྟེང་དུ། །ཐུགས་རྗེའི་ཁྲོས་མ་ནག་མོའི་ལྷ་ཚོགས་རྣམས། །བྱིན་རླབས་དངོས་གྲུབ་འབེབས་ཕྱིར་བཞུགས་སུ་གསོལ། །བཛྲ་ཌཱཀྐི་ནཱི་ས་མ་ཡ་ཏིཥྛ་ལྷན། ཅེས་དམ་ཚིག་པ་ལ་བསྟིམ། དབང་ལྷ་སྤྱན་དྲངས་དབང་བསྐུར་དྲི་མ་དག །ཌཱཀྐི་ལྔ་ལ་དེ་བཞིན་གཤེགས་པ་ལྔ། །ཌཱཀྐི་བརྒྱད་ལ་རང་རྟགས་དབུ་བརྒྱན་ཅིང་། །གཙོ་མོའི་དབུ་གཙུག་པད་འབྱུང་སྨུག་ནག་ནི། །རྒྱན་དྲུག་གསོལ་ཞིང་ཀླུ་རུ་རྐང་གླིང་འབུད། །ཌཱཀྐི་ཐམས་ཅད་དབང་སྡུད་ཟིལ་གནོན་གྱུར། །དེ་ནས་ཕྱག་འཚལ་བ་ནི། ཧཱུྃ། ལྷུན་གྲུབ་ཡེ་ཤེས་ཕོ་བྲང་ནས། །
དག་སྣང་བཀའ་བརྒྱུད་རིན་པོ་ཆེ། །གནས་གསུམ་མཁའ་འགྲོའི་སྤྲིན་ཚོགས་བཅས། །རྗེ་བཙུན་བླ་མ་རྣམས་ལ་ཕྱག་འཚལ་ལོ། །ཧཱུྃ། སྟོང་ཉིད་སྙིང་རྗེའི་ངང་ལས་ཐུགས་ལྟ་རྗེའི་སྐུ། །རྒྱལ་བའི་བསྐྱེད་ཡུམ་རྡོ་རྗེ་རྣལ་འབྱོར་མ། །བྱིན་རླབས་དངོས་གྲུབ་ཐམས་ཅད་འབྱུང་བའི་གནས། །ཐུགས་རྗེ་ཁྲོས་མའི་སྐུ་ལ་ཕྱག་འཚལ་ལོ། །ཧཱུྃ། བདེ་ཆེན་དཀར་མོའི་འཇིགས་པ་ཀུན་ལས་སྒྲོལ། །སེར་མོ་དོན་གྲུབ་ཚེ་དབང་རྒྱས་པར་མཛད། །དམར་མོ་སྒྲ་སྒྲོགས་ཁམས་གསུམ་དབང་དུ་སྡུད། །སྣ་ཚོགས་མཐར་ཕྱིན་མངོན་སྤྱོད་ལས་རྣམས་མཛད། །མཁའ་འགྲོ་སྡེ་བརྒྱད་ཕྲིན་ལས་སྣ་ཚོགས་སྒྲུབ། །བདེ་སྟོང་མཁའ་འགྲོའི་ཚོགས་ལ་ཕྱག་འཚལ་བསྟོད། །ཨ། ཐོད་པའི་སྣོད་དུ་ཧཱུྃ་ཡིག་ལས་བྱུང་བའི། །ཀུན་བཟང་མཆོད་སྤྲིན་ཟད་མི་ཤེས་པར་གྱུར། །ཨོཾ་བཛྲ་སརྦ་པཱུ་ཛ་ཨཱཿཧཱུྃ། དེ་ནས་མཆོད་བཞི་བསྟོད་བཞི་ནི། ཧཱུྃ། རབ་ཏུ་གཙང་ཞིང་གཙང་མར་སྦྱར་བ་ཡི། །ཡན་ལག་བརྒྱད་ལྡན་དྲི་མ་མེད་པའི་ཆབ། །ཉོན་མོངས་དྲི་མ་དག་བྱེད་ཁྲུས་ཆབ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཨོཾ་ཤྲཱི་བཛྲ་ཨརྒྷཾ་པྲ་ཏིཙྪ་ཨཱཿཧཱུྃ། ཧཱུྃ། རྒྱལ་
བའི་སྐུ་ལ་ཉོན་མོངས་མི་མངའ་ཡང་། །སེམས་ཅན་བག་ཆགས་དྲི་མ་སྦྱང་སླད་དུ། །ཁྲོས་མའི་སྐུ་ལ་ཞབས་བསིལ་འདི་གསོལ་བས། །སེམས་ཅན་ལུས་ཀྱི་དྲི་མ་དག་གྱུར་ཅིག །ཨོཾ་ཤྲཱི་བཛྲ་པཱདྱཾ་པྲ་ཏཱིཙྪ་ཨཱཿཧཱུྃ། ཧཱུྃ། ཆུ་སྐྱེས་ཐང་སྐྱེས་ཡིད་ལས་གྲུབ་པ་ཡི། །དབྱིབས་ལེགས་ཁ་དོག་ཕུན་སུམ་ཚོགས་པའི་མཆོག །བྱང་ཆུབ་ཡན་ལག་མཛེས་པའི་མེ་ཏོག་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ༀ་ཤྲཱི་བཛྲ་པུངྒེ་པྲ་ཏཱིཙྪ་ཨཱཿཧཱུྃ། ཧཱུྃ། ཙནྡན་དྲི་ཞིམ་ག་པུར་སྨན་རྣམས་དང་། །བཟང་པོ་རྣམ་གཉིས་ལ་སོགས་སྦྱར་བ་ཡི། །ཚུལ་ཁྲིམས་དྲི་ལྡན་བདུག་སྤོས་དམ་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ༀ་ཤྲཱི་བཛྲ་དྷུ་པེ་པྲ་ཏིཙྪ་ཨཱཿཧཱུྃ། ཧཱུྃ། སྤྲིན་མེད་མཁའ་ལ་ཉི་མ་ཤར་བ་ལྟར། །ཡེ་ཤེས་རབ་ཏུ་གསལ་བའི་སྒྲོན་མེ་མཆོག །མ་རིག་མུན་པ་སེལ་བའི་སྣང་གསལ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཨོཾ་ཤྲཱི་བཛྲ་ཨཱ་ལོ་ཀེ་པྲ་ཏིཙྪ་ཨཱཿཧཱུྃ། ཧཱུྃ། དྲི་ཞིམ་སྨན་དང་བདུག་སྤོས་སྣ་ཚོགས་ཀུན། །ལྷག་བསམ་རྣམ་པར་དག་པས་སྦྱར་བ་འདི། །ཐུགས་མཆོག་མཉེས་བྱེད་བྱུག་སྤོས་
དམ་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཨོཾ་ཤྲཱི་བཛྲ་གནྡྷེ་པྲ་ཏིཙྪ་ཨཱཿཧཱུྃ། ཧཱུྃ། སྣོད་བཅུད་ཀུན་དང་རོ་མཆོག་ལྡན་པ་ཡི། །ལྷ་དང་མི་ཡི་ཞལ་ཟས་ཐམས་ཅད་ཀྱིས། །ལུས་སེམས་ཚིམས་བྱེད་རོ་མཆོག་དམ་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ༀ་ཤྲཱི་བཛྲ་ནེ་ཝི་ཏྱ་པྲ་ཏིཙྪ་ཨཱཿཧཱུྃ། ཧཱུྃ། དྲིལ་ཆེན་སིལ་སྙན་རྣམ་རོལ་ཚངས་པའི་དབྱངས། །གསུང་དབྱངས་དྲུག་ཅུ་དག་དང་ལྡན་པ་ཡི། །ཡིད་འཕྲོག་གསུང་སྙན་རོལ་མོ་དམ་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཨོཾ་ཤྲཱི་བཛྲ་ཤཔྟ་པྲ་ཏཱིཙྪ་ཨཱཿཧཱུྃ། སྐུ་ཡི་བསྟོད་པ་ནི། ཧཱུྃ། མ་བཅོས་ཆོས་དབྱིངས་སྐྱེ་བ་མེད་པ་ལས། །རང་བྱུང་ལོངས་སྐུ་ཐུགས་རྗེ་ཁྲོས་མ་ནི། །སྐུ་མདོག་མཐིང་ནག་ཁྲོ་མོའི་ཆ་བྱད་ཅན། །གཅེར་བུ་རྟོག་བྲལ་དབུ་སྐྲ་ཐུར་དུ་གྲོལ། །ཁྲོ་གཉེར་སྤྱན་གསུམ་མཆེ་བ་རབ་ཏུ་གཙིགས། །སྤྱི་གཙུག་ཕག་ཞལ་སྲིད་གསུམ་རྩེ་ནས་བལྟ། །ཕག་མོའི་ངུར་སྒྲས་སྟོང་གསུམ་ཟིལ་གྱིས་གནོན། །གྲི་གུག་ཐོད་ཁྲག་གཡས་གཡོན་ཕྱག་ན་བསྣམས། །རྒྱལ་མཚན་ཁ་ཊཾ་ག་ནི་གྲུ་མོར་གཏད། །ཕྱག་རྒྱ་ལྔ་དང་དུར་ཁྲོད་ཆས་ཀྱིས་
བརྒྱན། །མེ་དཔུང་ཀློང་ན་ཞབས་གཉིས་བརྐྱང་བསྐུམ་བཞུགས། །པད་ཉིད་དུས་མཚན་རོ་ཡི་སྟེང་ནས་མནན། །བདེ་སྟོང་ཉམས་ལྡན་འབར་བའི་གར་གྱིས་བཞུགས། །ཐུགས་རྗེ་ཁྲོས་མའི་སྐུ་ལ་ཕྱག་འཚལ་བསྟོད། །གསུང་གི་བསྟོད་པ་ནི། ཧཱུྃ། ཆོས་ཉིད་རང་སྒྲ་རྣམ་པར་དག་པ་ཡི། །ཨཱ་ལི་ཀཱ་ལི་ངོ་བོར་རབ་བརྗོད་ཅིང་། །ཨཱ་ར་ལི་ཞེས་བཞད་པའི་གད་རྒྱང་སྒྲོག །ཕེ་ཕོ་སྒྲ་ཡིས་མཁའ་འགྲོ་དབང་དུ་སྡུད། །ཧཱུྃ་གིས་ང་རོས་བདུད་དཔུང་འཇོམས་པར་བྱེད། །སྟོང་ཉིད་ཆོས་སྒྲས་འགྲོ་བ་དབྱིངས་སུ་སྒྲོལ། །ཕཊ་ཀྱི་འབྲུག་སྒྲས་ལོག་ལྟ་ཚར་གཅོད་ཅིང་། །བདེ་བ་རབ་རྒྱས་ཨ་ཧཾ་སྒྲ་འབྱིན་ཅིང་། །གསུང་དབྱངས་དྲུག་ཅུས་འགྲོ་བ་ཐབས་ཀྱིས་འདུལ། །ཐུགས་རྗེ་ཁྲོས་མའི་གསུང་ལ་ཕྱག་འཚལ་བསྟོད། །ཐུགས་ཀྱི་བསྟོད་པ་ནི། ཧཱུྃ། དོན་དམ་སྟོང་ཉིད་བདེ་ཆེན་དག་པའི་ཐུགས། །ཁ་དོག་མཚན་མ་བརྗོད་པའི་ཡུལ་ལས་འདས། །ཉོན་མོངས་རྣམ་དག་ཡེ་ཤེས་ངོ་བོ་ཉིད། །གདོད་ནས་མ་སྐྱེས་སྤྲོས་བྲལ་དོན་སྟོན་མ། །འཁོར་བའི་སྐྱོན་བྲལ་ཤེས་རབ་ཕ་རོལ་ཕྱིན། །བདེ་སྟོང་གཉིས་མེད་ཟུང་འཇུག་རང་བཞིན་ཅན། །མཐོང་
ཐོས་དྲན་པས་འགྲོ་བ་ཐམས་ཅད་ལ། །འབར་བ་གསུམ་གྱིས་དངོས་གྲུབ་སྟེར་མཛད་ཅིང་། །དགའ་བདེ་གཉིས་མེད་ཡེ་ཤེས་འཆར་མཛད་མ། །ཐུགས་རྗེ་ཁྲོས་མའི་ཐུགས་ལ་ཕྱག་འཚལ་བསྟོད། །ཡོན་ཏན་ཕྲིན་ལས་བསྟོད་པ་ནི། ཧཱུྃ། དོན་དམ་ཆོས་དབྱིངས་ངང་ལས་མ་གཡོས་ཀྱང་། །སྣང་སྟོང་དབྱེར་མེད་འཇའ་ལུས་གཟུགས་སྐུའི་ཚུལ། །རྣམ་དག་སྐུ་ལ་ཡོན་ཏན་རབ་བརྒྱན་ཅིང་། །འགགས་མེད་གསུང་གིས་གདུལ་བྱ་སྨིན་གྲོལ་མཛད། །སྤྲོས་བྲལ་ཐུགས་ཀྱིས་འཁོར་བའི་རྒྱ་མཚོ་སྐེམས། །ཡོན་ཏན་ལྷུན་གྱིས་གྲུབ་པའི་དངོས་གྲུབ་སྟེར། །ཕྲིན་ལས་ཐུགས་རྗེའི་འགྲོ་བ་ཐབས་ཀྱིས་འདུལ། །ཐུགས་རྗེ་ཁྲོས་མ་བདེ་ཆེན་རྣལ་འབྱོར་མ། །འཁོར་ལོ་ལྔ་རྫོགས་ཕྲིན་ལས་ཀུན་གྱི་བདག །མཆོག་དང་ཐུན་མོང་དངོས་གྲུབ་སྟེར་མཛད་མ། །ཡེ་ཤེས་མཁའ་འགྲོ་བདེ་གཤེགས་ཀུན་གྱི་ཡུམ། །རྡོ་རྗེ་ཕག་མོའི་སྐུ་ལ་ཕྱག་འཚལ་ལོ། །དམ་རྫས་བདུད་རྩི་འབར་བ་འདི་བཞེས་ལ། །ཞི་རྒྱས་དབང་དྲག་མངོན་སྤྱོད་ལ་སོགས་པ། །བཅོལ་བའི་ཕྲིན་ལས་མ་ལུས་འགྲུབ་པར་མཛོད། །རིགས་བཞིའི་བསྟོད་པ་ནི། ཧཱུྃ། ཧ་རི་ནི་ས་ལས་བྱུང་མཁའ་འགྲོ་བཞི། །ཉོན་
མོངས་བཞི་དག་ཡེ་ཤེས་བཞི་ཡི་སྐུ། །ཕྲིན་ལས་བཞི་མཛད་རྡོ་རྗེ་རྣལ་འབྱོར་མ། །དཀར་སེར་དམར་ལྗང་རིགས་རྣམས་བཞི་ཡི་གཙོ། །རིགས་བཞིའི་རིགས་མཚོན་རང་རྟགས་དབུ་བརྒྱན་ཅན། །རང་རྟགས་གྲི་གུག་ཐོད་ཁྲག་ཕྱག་ན་བསྣམས། །དུག་རྣམས་རྩད་གཅོད་ཉོན་མོངས་ཞལ་དུ་གསོལ། །བཅུ་དྲུག་ལོ་ལོན་ཁ་ཊཾ་གྲུ་མོར་བརྟེན། །གཅེར་བུ་སྐྲ་གྲོལ་རུས་པའི་རྒྱན་གྱིས་བརྒྱན། །ཐོད་སྐམ་དབུ་རྒྱན་ཐོད་རློན་དོ་ཤལ་མཛད། །ཞབས་གཉིས་བརྐྱང་བསྐུམ་རོ་ཡི་གདན་ལ་བཞུགས། །ཀི་ཧ་རི་ནི་སའི་སྒྲ་འབྱིན་ཅིང་། །རིགས་བཞི་མཁའ་འགྲོ་འབུམ་གྱི་འཁོར་དང་བཅས། །ཁྲོས་མ་རིགས་བཞིའི་སྐུ་ལ་ཕྱག་འཚལ་བསྟོད། །དམ་རྫས་བདུད་རྩི་འབར་བ་འདི་བཞེས་ལ། །ཞི་རྒྱས་དབང་དྲག་མངོན་སྤྱོད་ལ་སོགས་པ། །བཅོལ་བའི་ཕྲིན་ལས་མ་ལུས་འགྲུབ་པར་མཛོད། །ཧཱུྃ། ཕྱོགས་བཞི་མཚམས་བརྒྱད་དུར་ཁྲོད་ནས། །དུར་ཁྲོད་གནས་པའི་མཁའ་འགྲོ་བརྒྱད། །གཅེར་བུའི་ལུས་ལ་སྐུ་གྲོལ་མ། །སྒེག་བཞད་གྲི་ཐོད་ཁ་ཊ་ཐོགས། །ཅོད་པན་རྒྱན་དྲུག་དུར་ཁྲོད་ཆས། །སྐྱིལ་ཀྲུང་ཕྱེད་པའི་གར་དང་ལྡན། །དུར་
ཁྲོད་ཌཱཀྐི་ཆེན་མོ་བརྒྱད། །ལས་རྣམས་བསྒྲུབ་ཕྱིར་གཤེགས་སུ་གསོལ། །དམ་རྫས་བདུད་རྩི་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་མཛོད། །དེ་ནས་མཐེབ་སྲིན་གཡོན་པས་བདུད་རྩི་གཏོར་ཞིང་། གུ་རུ་སརྦ་ཨོཾ་ཨཱཿཧཱུྃ། ཨ་ཧ་རི་ནི་ས་ཨོཾ་ཨཱཿཧཱུྃ། ཊཀྐི་ཨཉྫ་ཨོཾ་ཨཱཿཧཱུྃ། དེ་ནས་ནང་གི་མཆོད་པ་ནི། ཧཱུྃ། འབྲས་རྒུན་བུ་རམ་བཙོས་པའི་ཆང་། །ཤེས་རབ་མ་དཱའི་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཐིག་ལེ་རྐང་དང་ཁུ་བ་ཞག །ཚོགས་དང་ལོངས་སྤྱོད་རཀྟ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །དབང་པོ་ལྔ་ཡི་མཆོད་པ་དང་། །སྣ་ཚོགས་ཀེ་རུས་པཱུ་ཙ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཤ་ལྔ་བདུད་རྩི་ལྔ་ལ་སོགས། །མུག་ཚྭ་སའི་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །མངར་གསུམ་ལན་ཚྭའི་མཆོད་པ་དང་། །དཀར་གསུམ་ཨརྒའི་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཞོ་ཤ་ལྷ་ཡི་དམ་ཚིག་རྫས། །པཉྩ་བདུད་རྩིའི་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །རྩ་བརྒྱད་སྟོང་ལ་སྦྱར་
བའི་སྨན། །རིགས་ལྔ་ཡེ་ཤེས་བདུད་རྩི་ལྔ། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཤ་རུས་ཁྲག་དང་ཀླད་པ་དང་། །ཉོན་མོངས་དུག་ལྔའི་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ༀ་ཨཱཿཧཱུྃ༔ ནང་ལྟར་བསྟོད་པ་ནི། ཧཱུྃ། བཅོམ་ལྡན་རྡོ་རྗེ་ཕག་མོ་ནི། །སྲིད་གསུམ་རྣམ་རྟོག་འཇོམས་པའི་ཕྱིར། །འཇིགས་བྱེད་ཆེན་མོ་ཕག་གི་གདོང་པ་ཅན། །ཡེ་ཤེས་ལྔ་ཡི་ཁྲོ་གཉེར་ཅན། །མཐུ་སྟོབས་བདག་མོ་ཁྱོད་ལ་ཕྱལ་འཚལ་བསྟོད། །ཧཱུྃ༔ བཅོམ་ལྡན་རྡོ་རྗེ་ཕག་མོ་ནི། །དབུ་སྐྲ་དམར་ནག་སྤྲིན་ལྟར་གཏིབས། །བྱམས་པ་ཆེན་པོའི་ཆར་ཆེན་འབེབས། །ཉོན་མོངས་རྩད་ནས་གཅོད་པའི་རྟགས། །འཇིགས་བྱེད་ཁྲོ་མོའི་སྐུ་ལ་ཕྱག་འཚལ་བསྟོད། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །དུག་གསུམ་འཐོར་བྱེད་སྤྱན་གསུམ་མེ་ལྟར་འབར། །ཡེ་ཤེས་ལྔ་ལྡན་ཐོད་སྐམ་དབུ་ལ་བརྒྱན། །ཡོན་ཏན་མཐར་ཕྱིན་དུར་ཁྲོད་ཆས་དང་ལྡན། །སྒེག་ཆེན་དཔའ་མོའི་སྐུ་ལ་ཕྱག་འཚལ་བསྟོད། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །གདུག་པ་ཟ་བྱེད་
འཇིགས་པའི་མཆེ་བ་གཙིགས། །ལོག་འདྲེན་ཐམས་ཅད་ཟིལ་གྱིས་གནོན་པའི་རྟགས། །ཟིལ་གནོན་མཁའ་འགྲོའི་སྐུ་ལ་ཕྱག་འཚལ་བསྟོད། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །ངོ་མཚར་ཆེན་མོ་དགྱེས་པའི་གད་རྒྱང་ཅན། །དགྱེས་པའི་གད་མོས་འཁོར་བ་སྐམ་སར་འདྲེན། །ཁྲོས་པའི་གད་མོས་དགྲ་བགེགས་རླག་པར་བྱེད། །གསུང་མཆོག་ངོ་མཚར་ཅན་ལ་ཕྱག་འཚལ་བསྟོད། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། ཞལ་གདངས་ལྗགས་འདྲིལ་རབ་ཏུ་བསྐྱོད། །སྐྱེ་མེད་ཆོས་སྒྲས་སྟོང་གསུམ་འགེངས། །སྟོང་ཉིད་སྒྲ་སྒྲོགས་མ་ལ་ཕྱག་འཚལ་བསྟོད། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །གཡས་པས་གཅོད་བྱེད་གྲི་གུག་འཛིན། །མི་མཐུན་བདུད་དང་མུ་སྟེགས་ཚོགས་རྣམས་གཅོད། །ཤེས་རབ་མཐར་ཕྱིན་མ་ལ་ཕྱག་འཚལ་ལོ། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །གཡོན་པས་ཐོད་པ་ཁྲག་བཀང་བསྣམས། །ཐུགས་རྗེས་ཆགས་པའི་ཚུལ་གྱིས་འགྲོ་དོན་མཛད། །སྟོང་ཉིད་སྙིང་རྗེ་བྱང་ཆུབ་སེམས་ལྡན་པའི། །ཐུགས་རྗེས་འགྲོ་བ་སྐྱོབས་ལ་ཕྱག་འཚལ་ལོ། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །ཕྱག་མཚན་ཁ་ཊྭཱཾ་ག་ནི་
ཐུགས་ཀར་འཛིན། །དུག་གསུམ་རྩད་གཅོད་འཁོར་བའི་གཡུལ་ངོ་ཟློག །སྐུ་གསུང་ཐུགས་དང་མཉམ་སྦྱོར་ཁྲོ་མོའི་སྐུ། །འབྲས་བུ་ལྷུན་གྲུབ་མ་ལ་ཕྱག་འཚལ་ལོ། །ཧཱུྃ། བཅོམ་ལྡན་རྡོ་རྗེ་ཕག་མོ་ནི། །ཞེ་སྡང་འདུལ་མཛད་སྦྲུལ་གྱི་སེ་རལ་འཕྱང་། །ང་རྒྱལ་འཇོམས་མཛད་སྟག་གི་ཤམ་ཐབས་ཅན། །འབྱུང་པོ་ཚར་གཅོད་ཐོད་པའི་ཕྲེང་བས་བརྒྱན། །རྟགས་ཀྱི་འགྲོ་དོན་མཛད་ལ་ཕྱག་འཚལ་ལོ། །གསང་མཆོད་ནི། ཧཱུྃ། ཐབས་ཆེན་ཡབ་ཀྱི་རྡོ་རྗེ་ནི། །ཤེས་རབ་ཡུམ་གྱི་བྷ་ག་གཉིས། །བསྲུབ་དང་སྤྱོད་པའི་སྦྱོར་བ་ལས། །དགའ་བ་ཆེན་པོ་བྱང་ཆུབ་སེམས། །ཡིད་ཀྱི་ཆུ་བོ་དྲི་མ་མེད། །སངས་རྒྱས་ཀུན་དང་ལྷན་ཅིག་སྐྱེས། །ཐབས་དང་ཤེས་རབ་རང་བཞིན་གྱིས། །པདྨ་རྡོ་རྗེ་མཆོག་སྦྱོར་ཏེ། །དགྱེས་པ་ཆེན་པོ་མཆོག་རོལ་པའི། །ཀུན་རྫོབ་དོན་དམ་བྱང་སེམས་མཆོད་པ་འདི། །ཐུགས་རྗེ་ཁྲོས་མ་འཁོར་དང་བཅས་ལ་འབུལ། །ཨོཾ་གུ་ཧེ་སརྦ་པཱུ་ཙ་མེ་གྷ་ཨཱཿཧཱུྃ། གསང་བའི་བསྟོད་པ་ནི། ཧཱུྃ། བཅོམ་ལྡན་རྡོ་རྗེ་ཕག་མོ་ནི། །ཞལ་གཅིག་ཕྱག་གཉིས་སྐུ་མདོག་ནག །གྲི་གུག་གཡས་ན་ཐོད་ཁྲག་གཡོན། །
ཁ་ཊཾ་ག་ནི་ཐུགས་ཀར་གཏད། །དུར་ཁྲོད་ཆས་ཀྱིས་ལེགས་པར་བརྒྱན། །རལ་པ་དམར་ནག་སྤྲིན་ལྟར་གཏིབས། །ཐོད་སྐམ་ལྔ་ཡིས་དབུ་ལ་བརྒྱན། །སྤྱི་གཙུག་ཕག་ཞལ། ནམ་མཁའི་གནས། །རྟོག་མེད་རོ་ཡི་གདན་སྟེང་ན། །བརྐྱང་བསྐུམ་ཚུལ་གྱིས་འགྱིང་བག་ཅན། །མཁའ་འགྲོ་ཟིལ་གནོན་ཁྲོས་པའི་གཟུགས། །རྡོ་རྗེ་ཕག་མོའི་སྐུ་ལ་ཕྱག་འཚལ་བསྟོད། །དེ་ཁོ་ན་ཉིད་ཀྱི་མཆོད་པ་ནི། ཧཱུྃ། ཉོན་མོངས་རྣམ་རྟོག་ལས་བྱུང་བའི། །བདེ་སྟོང་ཡེ་ཤེས་མཆོད་པ་འདི། །གྲུབ་ཐོབ་བླ་མས་བཞེས་སུ་གསོལ། །ཉོན་མོངས་དུག་ལྔ་ལས་བྱུང་བའི། །ཡེ་ཤེས་ལྔ་ཡི་མཆོད་པ་འདི། །ཁྲོས་མ་རིགས་ལྔས་བཞེས་སུ་གསོལ། །ཉོན་མོངས་ཚོགས་བརྒྱུད་ལས་བྱུང་བའི། །གནས་བརྒྱད་ཡེ་ཤེས་མཆོད་པ་འདི། །དུར་ཁྲོད་མཁའ་འགྲོས་བཞེས་སུ་གསོལ། །དེ་ཁོ་ན་ཉིད་ཀྱི་བསྟོད་པ་ནི། ཧཱུྃ། མཚན་མོ་སྐྲ་གྲོལ་གཅེར་བུར་གནས། །གར་བྱེད་དགྱེས་པའི་གད་རྒྱང་ཅན། །བདུད་འཇོམས་དྲག་མོའི་ཆ་ལུགས་ཅན། །དབང་བསྒྱུར་ཕག་གདོང་མ་ལ་ཕྱག་འཚལ་བསྟོད། །དེ་ནས་མདུན་བསྐྱེད་བསྙེན་སྒྲུབ་ནི། མདུན་བསྐྱེད་ཁྲོས་མའི་ཐུགས་ཀར་འཁོར་ལོ་ནི། །
དམར་པོ་རྩིབས་བཞི་མུ་ཁྱུད་ལྡན་པ་ཡི། །ལྟེ་བར་ཨ་མཐིང་རྩིབས་ལ་ཡི་གེ་བཞི། །མུ་ཁྱུད་སྔགས་རིང་གཡས་སུ་བཀོད་པ་གསལ། །བདག་གི་ཐུགས་ལས་འོད་འཕྲོས་འཁོར་ལོ་དེ། །གཡོན་དུ་བསྐོར་བས་ཐུགས་རྒྱུད་དྲག་ཏུ་བསྐུལ། །གཙོ་འཁོར་ཀུན་ལས་འོད་ཟེར་ཁ་དོག་བཞི། །འཕྲོས་པས་ཕྲིན་ལས་རྣམ་བཞི་འགྲུབ་པར་གྱུར་། །ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་ཨཱ་ཝེ་ཤ་ཡ་སརྦ་ཀརྨ་ཧཱུྃ་ཕཊ། གནས་སྐབས་སུ་བརྒྱ་ཕྲག་དང་། སྒྲུབ་དུས་ཞག་བདུན་ནམ་ཉེར་གཅིག་སོགས་བཟླའོ།། ༈ དེ་ནས་ཚོགས་བདུད་རྩིས་བྲན་ལ་བསངས། སྟོང་ཉིད་དྲན་པས་སྦྱངས་ལ། ཨཱཿ རླུང་མེ་ཐོད་སྐྱེད་སྟེང་ཉིད་དུ། །རང་བྱུང་སྣོད་དུ་ཤ་ལྔ་དང་། །བདུད་རྩི་ལྔ་དང་ཡེ་ཤེས་ལྔ། །ཞུ་བའི་ཟག་མེད་བདུད་རྩི་ཡི། །འོད་ཟེར་འདོད་ཡོན་ལྷ་མོའི་ཚོགས། །དཔག་ཏུ་མེད་པས་ཚོགས་མཆོད་འབུལ། །ཨོཾ་ཨཱཿཧཱུྃ་ཧ་ཧོཿཧྲཱིཿ ཧཱུྃ། ཡུམ་ཆེན་ཁྲོས་མ་ནག་མོ་ལ། །གནས་གསུམ་མཁའ་འགྲོའི་ཚོགས་ཀྱིས་བསྐོར། །ཚོགས་ལ་སྤྱན་འདྲེན་གཤེགས་སུ་གསོལ། །བཟའ་དང་བཅའ་དང་བཏུང་བ་དང་། །བཤོས་དང་ཞལ་ཟས་སྣ་ཚོགས་པ། །ཁ་དང་མངར་དང་སྐྱུར་བ་
དང་། །ཚ་དང་རྩུབ་དང་ལན་ཚྭའི་རོ། །གཟུགས་དང་སྒྲ་དང་དྲི་དང་རོ། །རེག་བྱ་འདོད་ཡོན་ལ་སོགས་པའི། །ཞལ་ཟས་ཚོགས་ཀྱི་མཆོད་པ་འདི། །རྡོ་རྗེ་ཕག་མོའི་ཐུགས་དམ་བསྐང་། །འཁོར་གྱི་མཁའ་འགྲོས་དགྱེས་པར་རོལ། །བཞེས་ཤིག་རོལ་ཅིག་ཨ་ལ་ལ། །མཆོད་པ་དམ་པ་འདི་བཞེས་ལ། །རྣལ་འབྱོར་བདག་ལ་དངོས་གྲུབ་སྩོལ། །ཚེ་དབང་ལོངས་སྤྱོད་བསོད་ནམས་སྤེལ། །དུས་མིན་འཆི་སོགས་བར་ཆད་ཟློག །གུ་རུ་ཧ་རི་ནི་ས་གྷ་ན་ཙཀྲ་ལ་ཁཱ་ཧི། ཞེས་བཏགས་པས་འཐུས་ལ། རྒྱས་པར་ན། ཧཱུྃ། རང་བཞིན་རྣམ་དག་ལྷུན་གྲུབ་གཞལ་ཡས་ནས། །འགྲོ་བའི་དོན་དུ་ཐུགས་རྗེ་སྤྲུལ་པའི་སྐུ། །མཁའ་འགྲོའི་དབང་ཕྱུག་པདྨ་ཐོད་ཕྲེང་རྩལ། །ཕྲིན་ལས་མཚུངས་མེད་བཀའ་བརྒྱུད་པའི་རིན་པོ་ཆེ། །གནས་གསུམ་མཁའ་འགྲོའི་ཚོགས་དང་བཅས་པ་རྣམས། །རྣམ་འཕྲུལ་མཁའ་ལ་སྤྲིན་ལྟར་གཏིབས་ནས་ཀྱང་། །རིན་ཆེན་རུས་པའི་རྒྱན་ཆ་ཁྲ་ལ་ལ། །རོལ་མོ་སྒྲ་སྙན་མང་པོ་སི་ལི་ལི། །སྣ་ཚོགས་གླུ་ལེན་གར་བྱེད་ཁྱུགས་སེ་ཁྱུག །འདིར་གཤེགས་དམ་བསྐང་ཚོགས་ཀྱི་མཆོད་པ་བཞེས། །ཨ་ལ་ལ་ཏེ་དགྱེས་པར་རོལ་ནས་ཀྱང་། །
མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཧཱུྃ། སྟོང་ཉིད་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ཡུམ་མཆོག་མ། །དཔལ་ལྡན་ཐུགས་རྗེ་ཁྲོས་མ་ནག་མོ་ནི། །བདེ་སྟོང་གཉིས་མེད་འབར་བའི་གར་དགུ་ལྡན། །གནས་གསུམ་དཔའ་བོ་མཁའ་འགྲོའི་ཚོགས་དང་བཅས། །རྣམ་འཕྲུལ་མཁའ་ལ་སྤྲིན་ལྟར་གཏིབས་ནས་ཀྱང་། །རིན་ཆེན་རུས་པའི་རྒྱན་ཆ་ཁྲ་ལ་ལ། །རོལ་མོ་སྒྲ་སྙན་མང་པོ་སི་ལི་ལི། །སྣ་ཚོགས་གླུ་ལེན་གར་བྱེད་ཁྱུགས་སེ་ཁྱུག །འདིར་གཤེགས་དམ་བསྐང་ཚོགས་ཀྱི་མཆོད་པ་བཞེས། །ཨ་ལ་ལ་ཏེ་དགྱེས་པར་རོལ་ནས་ཀྱང་། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཧཱུྃ། ཨོ་རྒྱན་ཡུལ་གྱི་ཕྱོགས་བཞིའི་ཕོ་བྲང་ནས། །ཕྲིན་ལས་བཞི་མཛད་ཁྲོས་མ་རིགས་བཞི་ནི། །རིགས་བཞི་མཁའ་འགྲོ་འབུམ་གྱི་ཚོགས་དང་བཅས། །རྣམ་འཕྲུལ་མཁའ་ལ་སྤྲིན་ལྟར་གཏིབས་ནས་ཀྱང་། །རིན་ཆེན་རུས་པའི་རྒྱན་ཆ་ཁྲ་ལ་ལ། །རོལ་མོ་སྒྲ་སྙན་མང་པོ་སི་ལི་ལི། །སྣ་ཚོགས་གླུ་ལེན་གར་བྱེད་ཁྱུགས་སེ་ཁྱུག །འདིར་གཤེགས་དམ་བསྐང་ཚོགས་ཀྱི་མཆོད་པ་བཞེས། །
ཨ་ལ་ལ་ཏེ་དགྱེས་པར་རོལ་ནས་ཀྱང་། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཧཱུྃ། ཕྱོགས་མཚམས་དུར་ཁྲོད་ཆེན་པོའི་གནས་བརྒྱད་ནས། །སྣ་ཚོགས་ལས་མཛད་མཁའ་འགྲོ་མ་བརྒྱད་ནི། །སོ་སོའི་རིགས་ཀྱི་མཁའ་འགྲོ་འབུམ་དང་བཅས། །རྣམ་འཕྲུལ་མཁའ་ལ་སྤྲིན་ལྟར་གཏིབས་ནས་ཀྱང་། །རིན་ཆེན་རུས་པའི་རྒྱན་ཆ་ཁྲ་ལ་ལ། །རོལ་མོ་སྒྲ་སྙན་མང་པོ་སི་ལི་ལི། །སྣ་ཚོགས་གླུ་ལེན་གར་བྱེད་ཁྱུགས་སེ་ཁྱུག །འདིར་གཤེགས་དམ་བསྐང་ཚོགས་ཀྱི་མཆོད་པ་བཞེས། །ཨ་ལ་ལ་ཏེ་དགྱེས་པར་རོལ་ནས་ཀྱང་། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཧཱུྃ། བཀའ་དང་དམ་ཚིག་གཉན་པོའི་ཕོ་བྲང་ནས། །བསྟན་པ་སྲུང་ཞིང་བར་ཆད་སེལ་མཛད་པའི། །ཆོས་སྐྱོང་སྲུང་མ་འཁོར་དང་བཅས་པ་རྣམས། །རྣམ་འཕྲུལ་མཁའ་ལ་སྤྲིན་ལྟར་གཏིབས་ནས་ཀྱང་། །རིན་ཆེན་རུས་པའི་རྒྱན་ཆ་ཁྲ་ལ་ལ། །རོལ་མོ་སྒྲ་སྙན་མང་པོ་སི་ལི་ལི། །སྣ་ཚོགས་གླུ་ལེན་གར་བྱེད་ཁྱུགས་སེ་ཁྱུག །འདིར་གཤེགས་དམ་བསྐང་ཚོགས་ཀྱི་མཆོད་པ་བཞེས། །ཨ་ལ་ལ་ཏེ་དགྱེས་པར་རོལ་ནས་ཀྱང་། །མཆོག་དང་ཐུན་མོང་
དངོས་གྲུབ་བསྩལ་དུ་གསོལ། །ཨོཾ་ཨཱཿཧཱུྃ་གྷ་ན་ཙཀྲ་སརྦ་པཱུ་ཙ་མེ་གྷ་ཨཱཿཧཱུྃ། དེ་ནས་ཚོགས་ཕུད་གཏོར་མར་ཕུལ་ལ་བདུད་རྩིས་བྲན། ཨ། རླུང་མེད་ཐོད་སྐྱེད་སྟེང་དུ་བྷནྡའི་ནང་། །གཏོར་མ་ལྕགས་ཀྱུ་ལྔ་དང་སྒྲོལ་མ་ལྔ། །ཞུ་བ་ཡེ་ཤེས་བདུད་རྩི་རོ་གཅིག་པའི། །འོད་ཀྱིས་གཏོར་མགྲོན་སྤྱན་དྲངས་ནམ་མཁར་བཞུགས། །ཕེཾ་ཕེཾ་ཕེཾ། མ་ཧཱ་གུ་རུ་སརྦ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི། ཨོཾ་ཤྲཱི་བཛྲ་བྷ་ར་ཧི་མ་ཧཱ་ཡོ་གི་ནི་ཨི་དཾ་བྷ་ལིཾ་ཏ་ཧཱུྃ་ཧ་ན་ཧཱུཾ་ཧ་ན་པཱུ་ཙ་ཧོ༔ ཨ་ཏི་ཀྲ་མ་ཐ། ས་མ་ཡ་ཁ་ཁ་ཁཱ་ཧི་ཁཱ་ཧི། གསུམ་དང་། །བཛྲ་ཌཱཀི་ནཱི་ཕོ། རཏྣ་ཊཱཀི་ནཱི་ཡེ། པདྨ་ཊཱཀི་ནཱི་ཝེ། ཀརྨ་ཊཱཀི་ནཱི་ཡེ། ས་མ་ཡ་ཌཀི་ནཱི་ཡེ། བྷི་ཤཱ་ཀི་ནཱི་པཾ། སརྦ་ཌཱཀི་ནཱི་ཕོ། ལོ་ཀྐ་ཊཱཀི་ནཱི་ཡེ། ཨི་དཾ་བྷ་ལིཾ་ཏ་གྷྲི་ཧ་ན་གྷྲི་ཧ་ན་པཱུ་ཛ་ཧོཿ ཨ་ཏི་ཀྲ་མ་ཐཱ། ས་མ་ཡ་ཁ་རྃ་ཁ་ཁ་ཁཱ་ཧི་ཁཱ་ཧི། གསུམ་དང་། བསྟོད་ཅིང་ཕྲིན་ལས་བཅོལ་བ་ནི། ཧཱུྃ། བཅོམ་ལྡན་རྡོ་རྗེ་ཕག་མོ་ནི། །འཇིག་རྟེན་གསུམ་པོ་ཟིལ་གནོན་ཅིང་། །ལོག་པར་ལྟ་བའི་ཚོགས་རྣམས་འཇོམས། །གཏུམ་ཆེན་རྡོ་རྗེ་མཁའ་འགྲོ་མ། །མཁའ་འགྲོ་མང་པོའི་ཚོགས་དང་བཅས། །མཆོད་སྦྱིན་གཏོར་མ་འདི་
བཞེས་ལ། །ཞི་དང་རྒྱས་དང་དབང་དང་དྲག །འགུགས་དང་བསྐད་དང་གཟིར་བ་དང་། །ཕྲིན་ཐམས་ཅད་འགྲུབ་པར་མཛོད། །མཁའ་འགྲོ་མཉེས་པའི་མཆོད་པ་འདིས། །ཁྱོད་ཀྱི་ཐུགས་དམ་བསྐངས་གྱུར་ནས། །བདེ་ལེགས་ཐམས་ཅད་བདག་ལ་སྩོལ། །དེ་ནས་ཚོགས་བར་པས་བསྐང་གཏོར་གསོ། མེད་ན་ཕུགས་གཏོར་གསོ་བྲན་བྱས་ལ། བསྐང་བ་ནི། ཧཱུྃ། དག་སྣང་ཆོས་སྐུའི་གཞལ་ཡས་ནས། །རིགས་གཙོ་དཔལ་ལྡན་ཧེ་རུ་ཀ །རྩ་བར་བརྒྱུད་པའི་བླ་མ་རྣམས། །བཟོད་མེད་གདུང་ཤུགས་དྲག་པོ་ལས། །ཚོགས་དང་གཏོར་མས་ཐུགས་དམ་བསྐང་། །རང་བྱུང་ཨོ་རྒྱན་གཞལ་ཡས་ནས། །ཐུགས་རྗེ་ཁྲོས་མའི་ལྷ་ཚོགས་རྣམས། །བསྐྱེད་རྫོགས་ལྟ་སྤྱོད་ཏིང་འཛིན་དང་། །ཚོགས་དང་གཏོར་མས་ཐུགས་དམ་བསྐང་། །རྣམ་ཤེས་ཞེ་སྡང་གནས་དག་པའི། །ཁྲོས་མ་ནག་མོའི་ཐུགས་དམ་བསྐང་། །གཟུགས་ཕུང་གཏི་མུག་གནས་དག་པའི། །བདེ་ཆེན་དཀར་མོའི་ཐུགས་དམ་བསྐང་། །ཚོར་བ་ང་རྒྱལ་གནས་དག་པའི། །སེར་མོ་དོན་གྲུབ་ཐུགས་དམ་བསྐང་། །འདུ་ཤེས་འདོད་ཆགས་གནས་དག་པའི། །དམར་མོ་སྒྲ་སྒྲོགས་ཐུགས་དམ་བསྐང་། །
འདུ་བྱེད་ཕྲག་དོག་གནས་དག་པའི། །སྣ་ཚོགས་མཐར་ཕྱིན་ཐུགས་དམ་བསྐང་། །ཁྲག་དང་ཆུ་ཁམས་གནས་དག་པའི། །རྡོ་རྗེ་མཁའ་འགྲོའི་ཐུགས་དམ་ཤ་རུས་ས་ཁམས་གནས་དག་པའི། །རིན་ཆེན་མཁའ་འགྲོའི་ཐུགས་དམ་བསྐང་། །དྲོད་དང་མེ་ཁམས་གནས་དག་པའི། །པདྨ་མཁའ་འགྲོའི་ཐུགས་དམ་བསྐང་། །དབུགས་དང་རླུང་ཁམས་གནས་དག་པའི། །ལས་ཀྱི་མཁའ་འགྲོའི་ཐུགས་དམ་བསྐང་། །རྟག་པར་ལྟ་བ་གནས་དག་པའི། །དམ་ཚིག་མཁའ་འགྲོའི་ཐུགས་དམ་བསྐང་། །ཆད་པར་ལྟ་བ་གནས་དག་པའི། །སྣ་ཚོགས་མཁའ་འགྲོའི་ཐུགས་དམ་བསྐང། །མཚན་མར་ལྟ་བ་གནས་དག་པའི། །ཐམས་ཅད་མཁའ་འགྲོའི་ཐུགས་དམ་ང་། །བདག་ཏུ་ལྟ་བ་གནས་དག་པའི། །འཇིག་རྟེན་མཁའ་འགྲོའི་ཐུགས་དམ་བསྐང་། །ཚོགས་བརྒྱད་རྟོག་པ་གནས་དག་པའི། །དུར་ཁྲོད་གནས་བརྒྱད་ཐུགས་དམ་བསྐང་། །ཡུལ་བརྒྱད་རྟོག་པ་གནས་དག་པའི། །དུར་ཁྲོད་བརྒྱད་ཀྱི་མཁའ་འགྲོའི་ཐུགས་དམ་བསྐང་། །ཕུང་ཁམས་སྐྱེ་མཆེད་གནས་དག་པའི། །ཁྲོས་མའི་དཀྱིལ་འཁོར་
ལྷ་ཚོགས་རྣམས། །བསྐང་ངོ་མཆོད་དོ་ཐུགས་དམ་བསྐང་། །བདུད་རྩི་སྨན་གྱིས་ཐུགས་དམ་བསྐང་། །བྷ་ལིང་གཏོར་མས་ཐུགས་དམ་བསྐང་། །རཀྟ་དམར་གྱིས་ཐུགས་དམ་བསྐང་། །ཞལ་ཟས་ཚོགས་ཀྱིས་ཐུགས་དམ་བསྐང་། །ལྟ་བ་ཡངས་པས་ཐུགས་དམ་བསྐང་། །སྤྱོད་པ་ཞིབ་མོས་ཐུགས་དམ་བསྐང་། །ཐུགས་དམ་བསྐང་བའི་བྱིན་བརླབས་ཀྱིས་། །ཆག་ཆེན་ཉམ་ང་བཟློག་ཏུ་གསོལ། །མཆོག་དང་ཐུན་མོང་དངོས་གྲུབ་སྩོལ། །དེ་ནས་བཤགས་པ་ནི། ཧཱུྃ། གུ་རུ་ཌཱཀིའི་ཚོགས་རྣམས་བརྩེ་བས་དགོངས། །ཐོག་མེད་དུས་ནས་བདག་སོགས་འགྲོ་བ་རྣམས། །འཁྲུལ་པའི་དབང་གིས་སྒྲིབ་གཉིས་ཅི་བསགས་པ། །རབ་ཏུ་འགྱོད་པས་མཐོལ་བཤགས་བཟོད་པར་གསོལ། །ཨོཾ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། གུ་རུ་ཧ་རི་ནི་ས། ཨོཾ་གྷ་ན་ཙཀྲ་བཛྲ་ས་ཏྭ་ས་མ་ཡ་སོགས། ཡིག་བརྒྱ་བཟླའོ། །དེ་ནས་ཚོགས་དུམ་ལིངྒ་བྱས་ལ་ཁྲག་གིས་སྦག་ལ། ཧཱུྃ་བྷྱོ༔ ཁྲག་འཐུང་ཁྲོས་མའི་ཐུགས་ཀ་ནས། །ལས་ཀྱི་ཌཱཀིས་སྟོང་གསུམ་གང་། །གནོད་ཅིང་འཚེ་བའི་དགྲ་བགེགས་ཚོགས། །གང་ལ་བྱ་བ་ཁྱོད་ཀྱིས་ཤེས། །ཁུག་ཅིག་རྡོ་རྗེ་ལྕགས་ཀྱུ་མ། །ཆིངས་
ཤིག་རྡོ་རྗེ་ཞགས་པ་མ། །སྡོམས་ཤིག་རྡོ་རྗེ་ལྕགས་སྒྲོག་མ། །མྱོས་པར་གྱིས་ཤིག་དྲིལ་བུ་མ། །ལྷ་དང་ཕྲོལ་ཅིག་ཕྲ་མེན་མ། །བདུད་དང་སྤྲོད་ཅིག་ཤ་ཟན་མ། །དབུགས་དང་ཕྲོལ་ཅིག་དབུགས་ལེན་མ། །རྣམ་ཤེས་སྤྱོར་ཅིག་ཌཀི་མ། །ཤ་རུས་གཏུབས་ཤིག་ཞིང་སྐྱོང་མ། །དྲག་པོའི་ཕྲིན་ལས་མྱུར་དུ་སྒྲུབས། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་ལོ་ཀ་ཌཱཀྐི་ནཱི་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུྃ་ཕཊ། ཅེས་ཕུར་པ་བཏབ་ལ་ལིང་རོ་ཤ་དུམ་བྷནྡྷར་བཅུག་ལ་གཏོར་མར་བསྟབ་ལ། ཧཱུྃ། འཇིགས་བྱེད་ཁྲོས་མའི་ལྷ་ཚོགས་རྣམས། །གནམ་ས་ཙམ་གྱིས་ཞལ་ཕྱེས་ལ། །གངས་རི་ཙམ་གྱིས་མཆེ་བ་གཙིགས། །གློག་དམར་ཙམ་གྱིས་ལྗགས་སྐྱོངས་ལ། །བདག་ལ་སྡང་བའི་དགྲ་དང་བགེགས། །ཚོགས་སུ་རོལ་ཅིག་མཁའ་འགྲོ་མ། །བཞེས་ཤིག་རོལ་ཅིག་ཁ་རཾ་ཁཱ་ཧི། །རྣམ་ཤེས་མཁའ་སྤྱོད་གནས་སུ་དྲོངས། འཁྲུལ་མེད་མངོན་སངས་རྒྱས་པར་མཛོད། །ཨ་ཧ་རི་ནི་ས་ཌཱཀྐི་ནི་དགྲ་བགེགས་ཀྱི་ཤ་ཁྲག་ལ་ཁཱ་ཧི། ཞེས་ལིང་རོ་བཟློག་གཏོར་རམ་གཏོར་མ་གསོས་ལ་བདུད་རྩིས་བྲན། དམར་
གཏོར་བྲན་ལ་སྤྲོ་ན་འབུམ་བསྐུལ་བྱ་སྟེ། ཧཱུྃ། ཕྱོགས་ཕྱོགས་དག་ཀྱང་ཕ་ཀི་ན། །རི་བོ་ཆེན་པོའི་བྱང་ཕྱོགས་ན། །རྩུབ་གྱུར་ཚལ་གྱི་ནུབ་བྱང་ན། །རི་བོ་ཐམས་ཅད་རུས་པའི་རི། །ཆུ་རྣམས་ཐམས་ཅད་ཁྲག་དང་རྣག །རྩི་ཤིང་ཐམས་ཅད་མདའ་དང་མདུང་། །སྒྲ་སྐད་ཐམས་ཅད་སོད་དང་རྒྱོབ། །རབ་ཏུ་འཇིགས་པའི་གནས་མཆོག་དེར། །རིགས་ལྔའི་སངས་རྒྱས་བཞུགས་པའི་གནས། །ཕྱག་ན་རྡོ་རྗེ་འཇིགས་པའི་ས། །ཁྲོ་བཅུ་རྒྱུ་བར་མི་ནུས་པའི། །རབ་ཏུ་འཇིགས་པའི་གནས་མཆོག་དེར། །གཙོ་མཆོག་ཁྲོས་མ་དེ་ན་བཞུགས། །ཁྲོས་མ་རིགས་བཞི་དེ་ན་བཞུགས། །མཁའ་འགྲོ་སྡེ་བརྒྱད་དེ་ན་བཞུགས། །ཧཱུྃ། རྟོག་མེད་ཕག་མོའི་ཞལ་དུ་བྱུང་བ་ལས། །དོན་དམ་སྟོང་ཉིད་རྟོགས་པའི་མཁའ་འགྲོ་འབུམ། །དབུ་སྐྲ་དམར་ནག་སྤྲིན་ལྟར་གཏིབས་པ་ལ། །ཐུགས་རྗེ་ཆར་ལྟར་འབེབས་པའི་མཁའ་འགྲོ་འབུམ། །ཐོད་སྐམ་ལྔ་ཡིས་དབུ་ལ་བརྒྱན་པ་ལ། །རིགས་ལྔས་འགྲོ་དོན་མཛད་པའི་མཁའ་འགྲོ་འབུམ། །སྤྱན་གསུམ་སྡང་མིག་རབ་ཏུ་གཟིགས་པ་ལ། །དུག་གསུམ་རྩད་ནས་གཅོད་པའི་མཁའ་འགྲོ་འབུམ། །ཞལ་གྱི་ཁྲོ་གཉེར་ལྔ་དང་
ལྡན་པ་ལ། །དུག་ལྔ་རང་སར་གྲོལ་བའི་མཁའ་འགྲོ་འབུམ། །ཞལ་གདངས་ལྗགས་ཀྱང་རབ་ཏུ་བསྐྱོད་པ་ལ། །སྤྲུལ་པ་གློག་ལྟར་འཁྱུགས་པའི་མཁའ་འགྲོ་འབུམ། །འཇིགས་པའི་མཆེ་བ་རབ་ཏུ་གཙིགས་པ་ལ། །སྐྱེ་འཆི་རྩད་ནས་གཅོད་པའི་མཁའ་འགྲོ་འབུམ། །དགྱེས་པའི་གད་མོ་ཧི་ཧི་བཞད་པ་ལ། །འཁོར་བ་སྐམ་སར་བྱེད་པའི་མཁའ་འགྲོ་འབུམ། །ཁྲོས་པའི་གད་མོ་ཧ་ཧ་རྒོད་པ་ལ། །བདུད་སྲིན་ཐལ་བར་བརླག་པའི་མཁའ་འགྲོ་འབུམ། །གཡས་ཀྱི་གྲི་གུག་རབ་ཏུ་འབར་བ་ལ། །སྲོག་གཅོད་དབུགས་ལེན་བྱེད་པའི་མཁའ་འགྲོ་འབུམ། །གཡོན་གྱི་ཐོད་ཁྲག་དམར་པོ་གསོལ་བ་ལ། །དམ་ཉམས་སྙིང་ཁྲག་འཇིབ་པའི་མཁའ་འགྲོ་འབུམ། །ཁ་ཊཾ་ག་ནི་རྩེ་གསུམ་བསྣམས་པ་ལ། །དུག་གསུམ་རྩད་ནས་གཅོད་པའི་མཁའ་འགྲོ་འབུམ། །ཐོད་པ་སྐམ་རློན་གསུམ་གྱིས་བརྒྱན་པ་ལ། །ཁམས་གསུམདབང་དུ་སྡུད་པའི་མཁའ་འགྲོ་འབུམ། །མཐིང་ནག་དར་གྱི་ཅོད་པན་འཕུར་བ་ལ། །སྲིད་གསུམ་རྩད་ནས་གཅོད་པའི་མཁའ་འགྲོ་འབུམ། །ཌ་རུ་གསེར་གྱི་དྲིལ་ཆུང་འཁྲོལ་བ་ལ། །སྙན་བརྒྱུད་གསང་སྤྱོད་འཛིན་པའི་
མཁའ་འགྲོ་འབུམ། །དྲངས་ཤིང་ཡུ་བ་དཀར་པོ་འདྲིལ་བ་ལ། །ལྷ་མིན་གཡུལ་ངོ་ཟློག་པའི་མཁའ་འགྲོ་འབུམ། །སྙན་ཆ་མགུལ་རྒྱུན་རབ་ཏུ་མཛེས་པ་ལ། །ཡབ་ལ་བསྙེན་བཀུར་བྱེད་པའི་མཁའ་འགྲོ་འབུམ། །ཕྱག་རྒྱ་དྲུག་གིས་རབ་ཏུ་བརྒྱན་པ་ལ། །ཕ་རོལ་ཕྱིན་དྲུག་རྫོགས་པའི་མཁའ་འགྲོ་འབུམ། །གདུག་པ་སྦྲུལ་གྱིས་ག་ཤལ་མཛད་པ་ལ། །མཛེ་ནད་ཁྲག་སྐྱག་བཏང་བའི་མཁའ་འགྲོ་འབུམ། །ཐོད་རློན་ལྔ་བཅུས་དོ་ཤལ་བྱས་པ་ལ། །འདུ་བྱེད་ལྔ་བཅུ་དག་པའི་མཁའ་འགྲོ་འབུམ། །ང་རྒྱལ་སྟག་གི་ཤམ་ཐབས་བྱས་པ་ལ། །སྡིག་ཅན་ཟིལ་གྱིས་གནོན་པའི་མཁའ་འགྲོ་འབུམ། །གཅེར་བུ་སྐུ་གྲོལ་གར་ཐབས་བཞུགས་པ་ལ། །ལེགས་ཉེས་ཞལ་ལྕེ་གཅོད་པའི་མཁའ་འགྲོ་འབུམ། །གཡས་བསྐུམ་གཡོན་བརྐྱང་ཚུལ་དུ་བཞུགས་པ་ལ། །རྟོག་མེད་ཉམས་དང་ལྡན་པའི་མཁའ་འགྲོ་འབུམ། །མེ་རི་མེ་དཔུང་དབུས་ན་བཞུགས་པ་ལ། །ཐ་དད་རྟོག་པ་བསྲེགས་པའི་མཁའ་འགྲོ་འབུམ། །རྟོག་མེད་རོ་ཡི་གདན་ལ་བཞུགས་པ་ལ། །དུར་ཁྲོད་ཤ་ལ་རོལ་བའི་མཁའ་འགྲོ་འབུམ། །སྐུ་མདོག་མཐིང་ནག་རབ་ཏུ་རྔམས་པ་ལ། །གཏི་མུག་རྩད་
ནས་གཅོད་པའི་མཁའ་འགྲོ་འབུམ། །སྐུ་སྤྲུལ་མཁའ་འགྲོ་འབུམ་ཚོ་ཉི་ཤུ་དྲུག །མཁའ་འགྲོའི་བརྡ་སྐད་དི་རི་རི། །དམར་གྱི་གཏོར་མ་འདི་བཞེས་ལ། །དོ་ནུབ་སྡང་བའི་དགྲ་ལ་ཡ། །བར་ཆད་བྱེད་པའི་བགེགས་ལ་ཡ། །སྐུ་མདོག་དཀར་མོ་རབ་ཏུ་འཚེར་བ་ལས། །ཞེ་སྡང་རྩད་ནས་གཅོད་པའི་མཁའ་འགྲོ་འབུམ། །སྐུ་མདོག་སེར་མོ་རབ་ཏུ་མཛེས་པ་ལ། །ང་རྒྱལ་རྩད་ནས་གཅོད་པའི་མཁའ་འགྲོ་འབུམ། །སྐུ་མདོག་དམར་མོ་མདངས་དང་ལྡན་པ་ལ། །འདོད་ཆགས་རང་སར་གྲོལ་བའི་མོཁའ་འགྲོ་འབུམ། །སྐུ་མདོག་ལྗང་གུ་རབ་ཏུ་བརྗིད་པ་ལ། །ཕྲག་དོག་རྩད་ནས་གཅོད་པའི་མཁའ་འགྲོ་འབུམ། །ཤར་གྱི་ཕྱོགས་ཀྱི་དུར་ཁྲོད་ནས། །རྡོ་རྗེ་རིགས་ཀྱི་མཁའ་འགྲོ་འབུམ། །ལྷོ་ཡི་ཕྱོགས་ཀྱི་དུར་ཁྲོད་ནས། །རིན་ཆེན་རིགས་ཀྱི་མཁའ་འགྲོ་འབུམ། །ནུབ་ཀྱི་ཕྱོགས་ཀྱི་དུར་ཁྲོད་ནས། །པདྨ་རིགས་ཀྱི་མཁའ་འགྲོ་འབུམ། །བྱང་གི་ཕྱོགས་ཀྱི་དུར་ཁྲོད་ནས། །ལས་ཀྱི་རིགས་ཀྱི་མཁའ་འགྲོ་འབུམ། །ཤར་ལྷོའི་ཕྱོགས་ཀྱི་དུར་ཁྲོད་ནས། །དམ་ཚིག་རིགས་ཀྱི་མཁའ་འགྲོ་འབུམ། །ལྷོ་ནུབ་ཕྱོགས་ཀྱི་དུར་
ཁྲོད་ནས། །སྣ་ཚོགས་རིགས་ཀྱི་མཁའ་འགྲོ་འབུམ། །ནུབ་བྱང་ཕྱོགས་ཀྱི་དུར་ཁྲོད་ནས། །ཐམས་ཅད་རིགས་ཀྱི་མཁའ་འགྲོ་འབུམ། །བྱང་ཤར་ཕྱོགས་ཀྱི་དུར་ཁྲོད་ནས། །འཇིག་རྟེན་རིགས་ཀྱི་མཁའ་འགྲོ་འབུམ། །འཁོར་གྱི་མཁའ་འགྲོ་འབུམ་ཚོ་ལྔ་བཅུའི་ཚོགས། །མཁའ་འགྲོའི་བརྡ་སྐད་དི་རི་རི། །དམར་གྱི་གཏོར་མ་འདི་བཞེས་ལ། །དོ་ནུབ་སྡང་བའི་དགྲ་ལ་ཡ། །བར་ཆད་བྱེད་པའི་བགེགས་ལ་ཡ། །དམ་ཉམས་དགྲ་བོ་འདུལ་བའི་དུས་ལ་བབ། །བར་ཆད་བགེགས་རྣམས་ཟློག་པའི་དུས་ལ་བབ། །ཅེས་བསྐུལ་ལོ། །ཐབས་ཤེས་ཀྱི་རྫས་རྣམས་དྲངས་ཤིང་། ཀྱེ། དཔའ་བོ་ཆེན་པོ་དགོངས་སུ་གསོལ། །འདིར་ནི་ཆོས་རྣམས་བཟང་པོ་སྟེ། །འདུས་པ་རྣམས་ཀྱི་ཐེ་ཚོམ་བྲལ། །བྲམ་ཟེ་ཁྱི་དང་གདོལ་པ་ཕག །རང་བཞིན་གཅིག་ཏུ་དགོངས་ཏེ་རོལ། །པད་ཀོར་གྱིས་བླངས་ཏེ། ཨ་ཧོ་མ་ཧཱ་སུ་ཁ། ཞེས་ལོངས་སྤྱོད་ནས་ལྷག་མ་བྲན་ལ། ཨོཾ་ཨཱཿཧཱུྃ་ཧ་ཧོཿཧྲཱིཿ ལྷག་གཏོར་འདོད་ཡོན་ཟད་མི་ཤེས་པར་གྱུར། ཧཱུྃ། ཕྱི་རོལ་དུར་ཁྲོད་ཆེན་པོའི་གནས་བརྒྱད་ནས། །མཁའ་འགྲོ་ཤུགས་འགྲོ་ཞིང་སྐྱོང་ཕྲ་མེན་མ། །དབང་ཕྱུག་གིང་དང་ལངྐ་མ་མོའི་ཚོགས། །
ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་སྒྱུར་བའི་གཟུགས་ཅན་འཕྲུལ་མོ་ཆེ། །རབ་ཏུ་འཇིགས་ཤིང་རྔམ་བྱེད་སྲིན་མོའི་ཚོགས། །ཤ་ཟ་ཁྲག་འཐུང་རུས་འཆའ་ལས་བྱེད་མ། །མྱུར་མགྱོགས་རྫུ་འཕྲུལ་སྟོབས་ལྡན་དབང་མོ་ཆེ། །སྣ་ཚོགས་ལས་མཛད་སྤྲུལ་པ་འཁོར་དང་བཅས། །དཔལ་གྱི་ཕ་འབབ་ལྷག་གཏོར་འདི་བཞེས་ལ། །ཞི་རྒྱས་དབང་དང་མངོན་སྤྱོད་ལ་སོགས་པའི། །ཇི་ལྟར་ནུས་པའི་ཕྲིན་ལས་སོ་སོར་མཛོད། །ཨོཾ་ཨུཙྪི་ཊ་སརྦ་ཌཀྐི་ནཱི་པྲ་ཏི་ཛ་བྷ་ལིཾ་ཏ་ཁ་ཁ་ཁཱ་ཧི། ཞེས་ཕྱིར་དོར། ཚོགས་ལྷག་ལ་སྔགས་འདིས་ཆོག །འདིར་དཀར་གཏོར་བསྔོ། དེ་ནས་ཐུན་གཏོར་བྲན་ཏེ། དམར་གཏོར་སྔོན་མ་དེས་ཀྱང་ཆོག །ན་མོ། དཀོན་མཆོག་གསུམ་དང་རྩ་བ་གསུམ། །ཐུགས་རྗེ་ཁྲོས་མའི་ལྷ་ཚོགས་བདེན་པའི་མཐུས། །བསྟན་པའི་སྤྱི་དགྲ་རྣལ་འབྱོར་སྒོས་དགྲ་དང་། །བདག་དང་བསྲུང་བྱ་ལ་གནོད་གདོན་བགེགས་རྣམས། །གཏོར་མ་འདི་ལ་ཛཿཧཱུྃ་བྃ་ཧོཿས་ཁུག །སྙིང་དབུས་མཚོན་ཆའི་འཁོར་ལོས་དམར་ཉིལ་གཏུབ། །ཤ་ཁྲག་ཊཱཀིས་གསོལ་ལ་རྣམ་ཤེསཾ་སྤོར། །ཕྲིན་ལས་ཐོགས་མེད་འགྲུབ་པའི་ལས་མཛོད་ཅིག །ཨ་ཧ་རི་ནི་ས་
ཊཱཀྐི་ནཱི་དགྲ་བགེགས་ཀྱི་ཤ་ཁྲག་ལ་ཁ་ཁཱ་ཧི་ཁཱ་ཧི། ལས་ལ་བསྐུལ་བ་ནི། ཧཱུྃ། རང་བཞིན་གདོད་ནས་ཅི་ཡང་མ་གྲུབ་ཀྱང་། །འགག་མེད་རིག་པའི་རྩལ་ཀ་ཡི། །སྙོམས་བྱེད་སྐུ་ལ་བསྟོད་པ་ནི། །ཧཱུྃ། རང་བཞིན་མཚན་མོ་ནམ་མཁའི་དབྱིངས། །རུས་པའི་རྒྱན་དྲུག་གསོལ་བ་ནི། །རྒྱུ་སྐར་མང་པོའི་ཚོགས་ཀྱིས་སྐོར་སྙམ་བྱེད། །ཧཱུྃ། གྲི་གུག་ཕྱོགས་བཞིར་ཕྱར་བ་ལས། །ཁམས་གསུམ་ཁྲོས་མས་གང་སྙམ་བྱེད། །ཧཱུྃ། བྷནྡྷ་རཀྟས་བཀང་བ་ཡི། །རི་ལུང་ཁྲག་གིས་གང་སྙམ་བྱེད། །ཕྱག་མཚན་གྲི་གུག་ཕྱར་བ་ལས། །བར་སྣང་མཚོན་ཆས་གང་སྙམ་བྱེད། །གླང་ཆེན་ཀོ་རློན་སྤྲུགས་པ་ལས། །གནམ་ས་ལྟོ་བར་སྦྱོར་སྙམ་བྱེད། །ཧཱུྃ། ཞལ་གདངས་ཕཊ་ཀྱི་སྒྲ་སྒྲོགས་པས། །ཟགདོན་བགེགས་འབྱུང་པོ་བསྒྲལ་སྙམ་བྱེད། །ཧཱུྃ། སྤྱན་རྩ་དམར་ཞིང་འཁྲུགས་པ་ལས། །ཉི་ཟླ་ཕྱོགས་བཅུར་རྒྱུག་སྙམ་བྱེད། །ཧཱུྃ། དབུ་སྐྲ་དམར་པོ་གཅིག་ཅིང་བཀྲམ་པ་ལས། །ལྷོ་སྤྲིན་སྨུག་པོ་འཐིབ་སྙམ་བྱེད། །ཧཱུྃ། ཕག་གདོང་ནག་པོ་ངུར་བ་ལས། །བརྒྱལ་ནད་སྨྱོ་འབོག་གཏོང་སྙམ་བྱེད། །ཧཱུྃ། མི་མགོའི་ཕྲེང་བ་ཆེན་པོ་འཁྲོལ་བ་
ལས། །བྲག་རི་གནམ་ས་སྟོང་སྙམ་བྱེད། །ཧཱུྃ། གར་ཐབས་ཞབས་ནི་བརྡབ་པ་ལས། །ས་གཞི་རི་བོ་གཏིབ་སྙམ་བྱེད། །ཧཱུྃ། སྡེ་བརྒྱད་མཁའ་འགྲོས་བསྐོར་བ་ལས། །སྟོང་གསུམ་གཡོ་ཞིང་འཁྲུགས་སྙམ་བྱེད། །ཧཱུཾ། གཟི་བརྗིད་ཆེན་པོ་འོད་དུ་འབར་བ་ལས། །བསྐལ་པའི་མེ་ཆེན་འབྱུང་བར་སྐམ་སྙམ་བྱེད། །རྣལ་འབྱོར་གུས་པས་ཕྱག་འཚལ་བསྟོད། །འབུལ་ལོ་དམར་ཆེན་གཏོར་མ་འབུལ། །བསྐུལ་ལོ་ཁྲོ་གཏུམ་ནག་མོའི་ཚོགས། །བཅོལ་བའི་ཕྲིན་ལས་འགྲུབ་པར་མཛོད། །འདི་གཏོར་བསྐུལ་ཡིན་ཀྱང་ནད་པ་སོགས་བསྐུལ་འདིས་གཏོར་རྒྱག་བྱའོ། །ཆད་མདོ་བརྟན་སྐྱོང་ཡང་དེ་ཉིད་ལ་འདོན་རུང་སྟེ། བདུད་རྩིས་བྲན་ལ། ཧཱུྃ། དགུང་སྔོན་རྩེ་སྟེང་གངས་རིའི་ཡང་རྩེ་དང་། །སྤང་ལྗོངས་སྐྱེད་མོས་ཚལ་དང་ནགས་འདབ་དང་། །ཕྱོགས་མཚམས་སྟེང་འོག་དག་ན་གང་གནས་དང་། །བོད་ཁམས་སྐྱོང་བའི་བརྟན་མ་བཅུ་གཉིས་ཀྱིས། །སློབ་དཔོན་པདྨའི་སྤྱན་སྔར་ཁས་བླངས་བཞིན། །རང་རང་གནས་ནས་འདིར་བྱོན་མཆོད་གཏོར་བཞེས། །རྣལ་འབྱོར་བདག་གིས་འཁོར་སྲུང་རྐྱེན་ངན་ཟློག །བཀའ་བཞིན་ཕྲིན་ལས་གཉེན་པོ་འགྲུབ་
པར་མཛོད། །དེ་ནས་དཔལ་འབར་བཙུགས་ལ་གོམ་པ་བདུན་གྱིས་སར་བཏེག་ལ་བདུད་རྩིས་བྲན་ལ། ཧཱུྃ། སྲིན་མོ་ཟ་ལམ་བདུན་ཅུ་འདས་པའི་ཕ་རོལ་ན། །དཔག་ཚད་བརྒྱད་ཁྲི་བཞི་སྟོང་ནས། །དུར་ཁྲོད་ཆེན་པོའི་གནས་བརྒྱད་ནས། །ཁྲོ་མོའི་གཏོར་ལེན་གཤེགས་སུགསོལ། །ཧཱུྃ། སྒྲུབ་མཆོག་བདག་གིས་རྔ་ཆེན་བརྡུང་བ་ཡི། །ཐོད་པ་ལྟག་སྤྲོད་ལས་ཀྱི་ཕྱག་རྒྱ་ལས། །ཞིང་ཆེན་ཞིང་ཆུང་བསྒྲལ་བའི་ཤུན་པས་གཡོགས། །སྐྱེས་བུ་ཆེན་པོའི་ལག་པ་གཡས་པ་ཡིས། །མི་རྐང་སེར་པོའི་ཕོ་རྡོས་བསྐོར་ཞིང་བརྡུང་། །མ་མོ་མཁའ་འགྲོའི་ཚོགས་རྣམས་གཤེགས་སུ་གསོལ། །དམ་རྫས་གཏོར་མ་དམར་གྱི་ཨརྒས་བརྒྱན། །དམར་གྱིས་དྲི་ལ་སྣོམ་ཞིང་གཤེགས་སུ་གསོལ། །གསལ་བའི་སྒྲོན་མེ་ཡེ་ཤེས་སྤྱན་གྱི་ཡུལ། །མེ་ཡི་འོད་ལ་གཟིགས་ཏེ་གཤེགས་སུ་གསོལ། །དམ་རྫས་བདུད་རྩི་དམ་ཚིག་གཉན་གྱི་ཆུ། །དམ་ཚིག་གཉེན་པོ་དགོངས་ཏེ་གཤེགས་སུ་གསོལ། །ཧཱུྃ། མཁའ་འགྲོའི་གཏོར་ལེན་ཕོ་ཉའི་ཚོགས། །གཏོར་མ་ལེན་ཕྱིར་གཤེགས་སུ་གསོལ། །རིགས་བཞི་མཁའ་འགྲོའི་གཏོར་ལེན་མ། །ཕྱོགས་བཞིའི་གནས་ནས་གཤེགས་སུ་
གསོལ། །དཀར་སེར་དམར་ལྗང་གཤོག་པ་ཅན། །ལག་ན་རིན་ཆེན་གཞོང་པ་ཐོགས། །རིགས་བཞིས་འགྲོས་ཀྱིས་གཤེགས་སུ་གསོལ། །དམ་རྫས་གཏོར་མ་འདི་ལོངས་ལ། །རིགས་བཞིའི་མཁའ་འགྲོའི་སྐག་སྒྱུར་ཅིག །ཕྱོགས་བཞིའི་གདོན་ཚོགས་བཟློག་ཅིང་སྒྱུར། །རྣལ་འབྱོར་བདག་ཅག་འཁོར་བཅས་ཀྱིས། །ནད་དང་གདོན་དང་བར་ཆད་ཟློག །ཚེ་དང་དབང་ཐང་རྒྱས་པར་སྤེལ། །བཅོལ་བའི་ཕྲིན་ལས་འགྲུབ་པར་མཛོད། །རིགས་བཞིའི་གཤོག་པ་བརྡབས་པ་ཡིས། །དཔག་ཚད་བརྒྱད་ཁྲི་བཞི་སྟོང་ཡང་། །སྐད་ཅིག་ཡུད་ཀྱིས་བསྒྲོད་པར་བྱེད། །གཏོར་མ་ཁྱེར་ལ་གནས་སུ་གཤེགས། །ཞེས་ཟ་ལམ་ཟློག་སྒྱུར་བྱས་ནས། གཏོར་ལེན་རྣམས་ཀྱི་གཏོར་མའི་བཅུད་ཁྱེར་བའི་མཁའ་འགྲོའི་གནས་སུ་མཆོད་པའི་སྤྲིན་ཕུང་དུ་གྱུར་ནས། ལྷག་མ་མེ་དཔུང་དང་མཚོན་ཆའི་ཆར་དུ་གྱུར་པར་བསམས་ལ། ཧཱུྃ། དམར་གྱི་གཏོར་མ་ཆེན་པོ་འདི། །མཁའ་འགྲོ་དམ་ཅན་མཆོད་པའི་རྫས། །དགྲ་བགེགས་དམ་སྲི་བསྒྲལ་བའི་མཚོན། །ནད་དང་རིམས་ཀྱི་ན་བུན་འཐུལ། །མཚོན་དང་ཐུན་གྱི་ཆར་དུ་འབེབས། །བསྟན་པ་བཤིག་པའི་དགྲ་བགེགས་ལ། །
མཚོན་གྱི་བསྐལ་པ་དེ་ལ་ཕོབ། །ནད་དང་རིམས་ནད་དེ་ལ་ཕོབ། །ཐུན་ཁྲག་སྔགས་ཟོར་དེ་ལ་རྒྱོབ། །སྡང་བའི་དགྲ་ལ་གཏོར་ཟོར་རྒྱོབ། །གནོད་པའི་བགེགས་ལ་གཏོར་ཟོར་རྒྱབ། །བར་ཆད་བདུད་ལ་གཏོར་ཟོར་རྒྱོབ། །ཕུང་བའི་སྲི་ལ་གཏོར་ཟོར་རྒྱོབ། །ཟ་བའི་འདྲེ་ལ་གཏོར་ཟོར་རྒྱོབ། །དགྲ་བགེགས་ཐལ་བ་རྡུལ་དུ་རློགས། །རྩ་སྔགས་མཇུག་ཏུ། དགྲ་བགེགས་མཱ་ར་ཡ་ཧཱུྃ་ཕཊ། ཅེས་ཟོར་དུ་འཕང་བའམ་དམིགས་པའི་ཕྱོགས་སུ་བསྐྱལ་ལོ། །སླར་སྤྲོ་ན་གཏོར་གཞོང་ཆང་གིས་བཤལ་ལ། ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཧཱུྃ་ཧྲཱིཿཋཱ། ཞེས་བདུད་རྩིར་བྱིན་གྱིས་བརླབས་ལ་སླར་ཡང་བརྟན་མ་མཆོད་དོ། །དེ་ནས་གཏོར་གཞོང་ཁ་སྦུབ་ལ། ཧཱུྃ། ཐུགས་རྗེ་ཁྲོས་མའི་གཟི་བརྗིད་ཀྱིས། །བགེགས་དང་དམ་སྲི་བར་ཆད་རྣམས། །རི་རབ་ཆེན་པོའི་འོག་ཏུ་མནན། །ཌཀི་སྡེ་ལྔའི་བྲོ་ར་བཙུགས། །དཔའ་བོའི་བྲོ་རྡུང་ཁྲིགས་སེ་ཁྲིག །དཔའ་མོའི་གར་བྱེད་ཁྱུགས་སེ་ཁྱུག །ཡེ་ཤེས་ལྔ་ཡི་བྲོ་བརྡུང་བས། །དུག་ལྔའི་ཕུང་པོ་གཏན་ནས་བརླག །བདུད་དགྲ་ཐལ་བ་རྡུལ་དུ་རློགས། །ཨོཾ་ལཾ་ཨ་ལཾ་ཧཱུྃ་ལཾ་སྟྭཾ་བྷ་ཡ་ནན། རྗེས་ཆོག་ནི། ཧཱུྃ། ཐུགས་རྗེ་ཁྲོས་མའི་ལྷ་ཚོགས་འཁོར་བཅས་ལ། །དངོས་
འབྱོར་ཡིད་སྤྲུལ་ཕྱི་ནང་གསང་མཆོད་འབུལ། །བསྟོད་དབྱངས་ཡན་ལག་རྒྱ་མཚོས་རབ་ཏུ་བསྟོད། །ཆོ་ག་ལྷག་ཆད་འགལ་འཁྲུལ་བཟོད་པར་བཞེས། །རང་གནས་གཤེགས་སམ་རྟེན་ལ་བརྟན་པར་བཞུགས། །མདུན་བསྐྱེད་དམ་ཚིག་རང་ཐིམ་རང་ཉིད་ཀྱང་། །མཐའ་ནས་དབུས་ཡལ་མི་དམིགས་སྟོང་ཉིད་གྱུར། །དགེ་བས་མཆོག་ཐུན་དངོས་གྲུབ་མྱུར་ཐོབ་ནས། །བདེ་ལེགས་ཕུན་སུམ་ཚོགས་པའི་བཀྲ་ཤིས་ཤོག །ཉང་ལུགས་ལྷ་གྲངས་བཅུ་གསུམ་ཡིན། །སེར་མ་སྐྱུར་ན་ཇོ་མོའི་ལུགས། །དམ་པ་ཨོ་རྒྱན་བསྒྱུར་ཁ་ཡིན། །ཐམས་ཅད་འདོན་པ་རྒྱས་པ་སྟེ། །དང་པོ་མཆོད་བཞི་བྱས་ནས་ཀྱང་། །ཕྱི་མཆོད་ཁོ་ན་རྗེས་ནས་བྱ། །བསྟོད་པ་གཞན་དང་འབུམ་བསྐུལ་སྒྱུར། །དེ་ནི་འབྲིང་པོ་འདོན་ལུགས་ཡིན། །བདག་བསྐྱེད་ཁོ་ན་བསྡུས་པ་སྟེ། །དེ་ལ་ཚོགས་འཁོར་སྦྱར་ཡང་རུང་། །ཡི་དམ་གཞན་གྱི་ཁོག་ཕུབ་ན། །བདུད་རྩི་བྱིན་རླབས་སྔོན་འགྲོ་སྐྱུར། །རྒྱུན་དུ་གཏོར་འབུལ་མེད་ཀྱང་ཆོག །བསྙེན་དུས་བདག་བསྐྱེད་གཏོར་བསྔོས་སྦྱར། །སྒྲུབ་དུས་མདུན་བསྐྱེད་བསྙེན་པ་བྱ། །དུས་བཟང་མཆོད་པ་ཚོགས་ལས་བྱ། །ལས་སྦྱོར་བསྐུལ་དང་ཟོར་ལས་བྱ། །ཚིག་ཉུང་དོན་འདུས་ཁྱེར་བདེ་འདི། །གཅོད་ཡུལ་ཉམས་ལེན་སྤྲོ་རྣམས་ལ། །ཕན་པར་བསམས་ནས་འབད་པས་བྲིས། །ཉེས་འགལ་ཆོས་བདག་རྣམས་ལ་
བཤགས། །དགེ་བས་ནམ་ཞིག་ཚེ་འཕོས་ཚེ། །མཁའ་འགྲོས་བདེ་ཆེན་ཞིང་ཁྲིད་ཤོག །ཅེས་པ་འདི་ཉིད་རཱ་ག་ཨ་སྱས་བསྒྲིགས་པའོ། །ཡུམ་ཆེན་ཌཱཀྐིའི་གོ་འཕང་མྱུར་ཐོབ་ཤོག །སརྦ་མངྒ་ལཾ། དགེའོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།