གཅོད་ཀྱི་བསྟབ་པ་ཆ་དྲུག་འདོན་འགྲིགས་ཕྱག་ལེན་དང་བཅས་པ།
༼པ༽ གཅོད་ཀྱི་བསྟབ་པ་ཆ་དྲུག་འདོན་འགྲིགས་ཕྱག་ལེན་དང་བཅས་པ་བཞུགས་སོ། །
ན་མོ་པྲཛྙཱ་པཱ་ར་མི་ཏ་ཡེ། ཡུམ་ཆེན་ཌཱཀྐིའི་ཚོགས་ལ་ཕྱག་འཚལ་ནས། །གཅོད་ཀྱི་ཆ་དྲུག་ཕྱག་ལེན་གསལ་བཀོད་བྱ། །ཆོས་བདག་སྲུང་མས་བཀའ་ཡི་གནང་བ་སྩོལ། །ནད་པ་ཁག་ཆེ་ལ་གཅོད་ཚོགས་དང་ལུས་སྦྱིན་ཞག་འགའ་བྱས་ནས་གཏོར་འབུལ་བསྟབ་པ་ཆ་དྲུག་བྱ་བ་ནི། དམར་གཏོར་མཐོ་གང་ངམ་སོར་བཞི་ཙམ་པ་དྲུག་བྱ། ནད་པའི་ལུས་ལ་དྲུད་པའི་ཆངས་བུ་དྲུག་བྱ། ལིངྒ་ཆེ་བ་གཅིག་གཙང་མ་བྱས། ནད་པའི་ལུས་བཀྲུས་པའི་ཁྲུས་ཆུ་གཅིག་སྣོད་དུ་བཞག །དེ་ནས་ནམ་སྲོད་དུ་སླེབས་པ་དང་གཅོད་ཚོགས་ཀྱི་ཚོགས་ཕུད་མ་ཕུལ་གོང་དུའམ་ལུས་སྦྱིན་ལ་བཏགས་ནའང་རུང་སྟེ། ཕཊ། སྐད་ཅིག་གིས་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུའི་ངང་ལས་ཆོས་དབྱིངས་ནམ་མཁས་
ཁྱབ་པའི་ཞིང་ཁམས་འདི་ཐམས་ཅད་ཨོ་རྒྱན་རང་བྱུང་གི་དུར་ཁྲོད་ཆེན་པོ་འཇིགས་སུ་རུང་བ་ས་གཞི་འདི་མི་རོ་སྐམ་རློན་གྱིས་གང་བར་བྱ་གཅན་སྣ་ཚོགས་ལང་ལོང་དུ་རྒྱུ་བ། རི་བོ་ཐམས་ཅད་ཀེང་རུས་ཀྱི་རི་བོ། ཆུ་ཀླུང་ཐམས་ཅད་རྣག་ཁྲག་ཏུ་འབབ་པ། རྩི་ཤིང་ཐམས་ཅད་མཚོན་ཆའི་རང་བཞིན་དུ་གཟིང་བ། སྒྲ་སྐད་ཐམས་ཅད་ཧཱུྃ་ཧཱུྃ་དང་ཕཊ་ཕཊ་ཏུ་སྒྲོག་པ། དུས་གསུམ་གྱི་སངས་རྒྱས་རྣམས་ཀྱང་སྐྱི་གཡའ་ཞིང་། དཔལ་ཕྱག་ན་རྡོ་རྗེ་ཡང་འཇིགས་ཤིང་སྐྲག་པའི་གནས། ཡེ་ཤེས་ཀྱི་ཁྲོ་བོ་རྣམས་ཀྱང་རྒྱུ་བར་མི་ནུས་པའི་གནས་ཤིན་ཏུ་འཇིགས་པའི་
དབུས་སུ་རང་བྱུང་ཐོད་པའི་གཞལ་ཡས་ཁང་ཆེན་པོའི་ཐོད་པ་སྐམ་རློན་རྙིང་གསུམ་བརྩེགས་ཤིང་གནམ་ལྕགས་ཀྱི་གཟེར་གྱིས་བསྡམས་པ། མི་ཁྲག་དང་རྟ་ཁྲག་གིས་བྱུགས་ཤིང་ཞིང་ལྤགས་ཀྱིས་ཐོགས་ཕུབ་ཅིང་རུ་ཏྲའི་མགོ་བོའི་ཏོག་དང་ཙིཏྟའི་ཕོ་ལོང་རྒྱུ་རློན་གྱི་དྲྭ་ཕྱེད་འཕྱང་བ། དེ་ཡི་དབུས་སུ་སྐད་ཅིག་ལ་རང་གི་རིག་པའི་ངོ་བོ་མ་གཅིག་ཁྲོས་མ་ནག་མོ་ཕྱག་གཡས་མི་ལྤགས་ཀྱི་གཡང་གཞི་བརྡབས་པས་སྣང་སྲིད་དབང་དུ་སྡུད་པ། གཡོན་མི་རྐང་གི་གླིང་བུ་འབུད་པས་སྣང་སྲིད་ཟིལ་གྱིས་གནོན་པ་ཁམས་གསུམ་ལས་རྣམ་པར་རྒྱལ་བའི་སྐུ་གྱུར་པའི་མདུན་གྱི་ནམ་མཁར་གཞལ་ཡས་ཁང་གི་དབུས་ཀྱི་ཐད་དུ། མ་གཅིག་ལབ་ཀྱི་སྒྲོལ་མ་སྐུ་མདོག་མཐིང་ནག་ཞལ་གཅིག་ཕྱག་བཞི་མ། ཕྱག་གཡས་ཌཱ་མ་རུ་དང་གཡང་གཞི། གཡོན་རྐང་གླིང་དང་ཐོད་ཁྲག་འཛིན་པ་ལ། སངས་རྒྱས་རིགས་ཀྱི་མཁའ་འགྲོ་བྱེ་བ་འབུམ་སྡེ་དང་བཅས་པ་སྟེང་གདོན་གཟའ་དང་རྒྱུ་སྐར་གྱིས་བསྐོར་བ། རང་གི་མདུན་ངོས་དཀྱིལ་འཁོར་གྱི་ཤར་དུ་མ་གཅིག་ལབ་སྒྲོན་སྔོན་མོ་ཞལ་གཅིག་ཕྱག་གཉིས་ཌཱ་རུ་དང་ཞགས་པ་འཛིན་པ་ལ། རྡོ་རྗེ་རིགས་ཀྱི་མཁའ་འགྲོ་བྱེ་བ་འབུམ་སྡེ་དང་དྲི་ཟ་ལ་
སོགས་ཤར་ཕྱོགས་ཀྱི་ལྷ་འདྲེས་བསྐོར་བ། ལྷོར་མ་གཅིག་ལབ་སྒྲོན་སྐུ་མདོག་སེར་མོ་གཡས་ཆུ་སྲིན་གྱི་ཞགས་པ་དང་གཡོན་གྲི་གུག་འཛིན་པ་ལ། རིན་ཆེན་རིགས་ཀྱི་མཁའ་འགྲོ་བྱེ་བ་འབུམ་སྡེ་གཤིན་རྗེ་ལ་སོགས་ལྷོ་ཕྱོགས་ཀྱི་ལྷ་འདྲེས་བསྐོར་བ། ནུབ་ཏུ་མ་གཅིག་ལབ་སྒྲོན་སྐུ་མདོག་དམར་མོ་གཡས་སྦྲུལ་ཞགས་དང་གཡོན་ཐོད་ཁྲག་བསྣམས་པ་ལ། པདྨ་རིགས་ཀྱི་མཁའ་འགྲོ་བྱེ་བ་འབུམ་སྡེ་དང་ཀླུ་དབང་ལ་སོགས་ནུབ་ཕྱོགས་ཀྱི་ལྷ་འདྲེས་བསྐོར་བ། བྱང་དུ་མ་གཅིག་ལབ་སྒྲོན་སྐུ་མདོག་ལྗང་མོ་གྲི་གུག་ཐོད་ཁྲག་ཅན་ལ། ལས་ཀྱི་མཁའ་འགྲོ་བྱེ་བ་འབུམ་སྡེ་དང་གནོད་སྦྱིན་ལ་སོགས་བྱང་ཕྱོགས་ཀྱི་ལྷ་འདྲེས་བསྐོར་བ། རང་གི་མདུན་འོག་ཕྱོགས་སུ་མ་གཅིག་ལབ་སྒྲོན་སྐུ་མདོག་སྔོན་མོ་གཡས་རྒྱུ་ཞགས་དང་གཡོན་ཁ་འཛིན་པ་ལ། སྣ་ཚོགས་ཀྱི་མཁའ་འགྲོ་བྱེ་བ་འབུམ་སྡེ་དང་ས་བདག་ལ་སོགས་འོག་ཕྱོགས་ཀྱི་ལྷ་འདྲེས་བསྐོར་བ། གཙོ་མོ་དྲུག་པོ་ཞལ་གདངས་ཤིང་མཆེ་བ་བཞི་བཞི་གཙིགས་པ། དབུ་སྐྲ་སིལ་མས་སྐུ་རྒྱབ་ཁེབ་ཅིང་སྤྱི་བོ་ན་ཕག་ཞལ་ངུར་བ། ཐོད་པ་སྐམ་རློན་དང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་། ཡེ་ཤེས་ཀྱི་
མེ་དཔུང་རབ་ཏུ་འབར་བ། ཁཊྭཱ་ག་མཆན་ཁུང་དུ་བཅུག་ནས་པད་ཉི་རོའི་གདན་ལ་གར་ཐབས་སུ་འགྱིང་བ། ཁྱད་པར་དུ་མ་གཅིག་རིགས་ལྔ་ནི་རང་རང་གི་སྐུ་མདོག་དང་མཚུངས་པའི་དར་གྱི་རལ་ག་གསོལ་བ། ཁྲོས་མའི་ཐུགས་ཀར་ཨ་མཐིང་ནག །མ་གཅིག་རིགས་ལྔའི་ཐུགས་ཀར་ཧྲཱིཿདང་ཧ་རི་ནི་ས་དེ་རྣམས་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས། བཛྲ་ས་མ་ཡ་ཛཿ ཨ། འོག་མིན་ཆོས་དབྱིངས་དག་པའི་ཞིང་ཁམས་ནས། །ཆོས་སྐུ་ཡུམ་ཆེན་ལོངས་སྐུ་ཁྲོས་མ་ནག །སྤྲུལ་སྐུ་མ་གཅིག་ལབ་སྒྲོན་རིགས་ལྔའི་ཚོགས། །ཐུགས་རྗེས་འགྲོ་བའི་དོན་ལ་གཤེགས་སུ་གསོལ། །ཨོ་རྒྱན་ཡུལ་གྱི་ཕྱོགས་བཞི་དབུས་ལྔ་ནས། །སངས་རྒྱས་རྡོ་རྗེ་རིན་ཆེན་པདྨ་ལས། །སྣ་ཚོགས་མཁའ་འགྲོ་བྱེ་བ་འབུམ་སྡེའི་ཚོགས། །རྐྱེན་ངན་བར་ཆད་བཟློག་ཕྱིར་གཤེགས་སུ་གསོལ། །སྟོང་གསུམ་མི་མཇེད་དག་པའི་ཞིང་ཁམས་ཀྱི། །སྟེང་དང་འོག་དང་ཤར་ལྷོ་ནུབ་བྱང་ནས། །སྣང་ཞིང་སྲིད་པའི་ལྷ་འདྲེ་མ་ལུས་ཀུན། །ལན་ཆགས་བུ་ལོན་སྦྱང་ཕྱིར་འདིར་འདུས་ཤིག །ཨཱ་ཧྲཱིཿཧ་རི་ནི་ས་སརྦ་ལོ་ཀཱ་པཱ་ལ་ཛཿཧཱུྃ་བྃ་ཧོཿ་
ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཨརྒྷཾ། པཱདྱཾ། པུཥྤེ། དྷུ་པྤེ། ཨཱ་ལོ་ཀེ། གནྡྷེ། ནཻ་ཝིདྱ། ཤབྡ་པྲ་ཏཱིཙྪ་སྭཱ་ཧཱ། དེ་ནས་ནད་པ་མདུན་དུ་བསྙལ། རང་གི་མདུན་དུ་ལིངྒ་ཆེ་བ་དེ་བཞག །ནད་པ་ལིངྒ་གཏོར་མ་ཆངས་བུ་རྣམས་སྣོད་སོ་སོར་བཞག་ལ་བྲན་ནས། ཕཊཿ ནད་པའི་སྙིང་གར་རྣམ་པར་ཤེས་པའི་ངོ་བོ་ཨ་མཐིང་ནག་བཀྲག་མདངས་དང་ལྡན་པ་དེ་དབུ་མའི་ལམ་ནས་མདའ་འཕང་བ་ལྟར་རྒྱངས་སེ་ཐོན་རང་ཉིད་ཁྲོས་མའི་ཐུགས་ཀར་ཐིམ། ཕཊ་ཕཊ་ཕཊ། ན་མོ། གྲུབ་ཐོབ་གཅོད་ཡུལ་བརྒྱུད་པའི་བླ་མ་རྣམས་ཀྱི་བདེན་པ་དང་། དཀོན་མཆོག་གསུམ་གྱི་བདེན་པ་དང་། ཡི་དམ་ཁྲོས་མ་ནག་མོའི་བདེན་པ་དང་། མ་གཅིག་ལབ་ཀྱི་སྒྲོན་མ་རིགས་ལྔ་རིགས་ཀྱི་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པའི་བདེན་པ་དང་། བདེན་པ་ཆེན་པོའི་མཐུས་ནད་པ་འདི་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པའི་ལུས་གདོན་རྒྱབ་རྟེན་དང་བཅས་པ། ནད་ནད་བདག་དང་བཅས་པ། གདོན་སྣ་འདྲེན་དང་བཅས་པ། བཀའ་དང་དམ་ལ་མི་གནས་པ་འགྱུ་ལོག་འཕར་ལྡིང་མགོ་གཡོགས་མགོ་
བསྐོར་བྱེད་པ་ཐམས་ཅད་དྲག་པོ་དམར་གྱི་གཏོར་མ་གཟུགས་ལིངྒ་དང་བེམ་པོ། གྲི་གླུད་དང་ཁྲུས་ཆུ་འདི་ལ་ཁུག་ཅིག །ཧཱུྃ་ཧཱུྃ་ཧཱུྃ། ཛཿཧཱུྃ་བྃ་ཧོ༔ ཕཊ་ཕཊ་ཕཊ། ཅེས་རྐང་དུང་ཌཱ་དྲིལ་དྲག་ཏུ་བྱ། འགུགས་གཞུག་ལན་གསུམ་བྱའོ། །ཀྱི། མ་མི་མིན་ཡེ་ཤེས་ཀྱི་མཁའ་འགྲོ་མ། །སྐུ་ཡི་མ་གཅིག་སྐུ་མདོག་མཐིང་། །ཞལ་གཅིག་ཕྱག་བཞི་འཇིགས་པའི་གཟུགས། །ཕྱག་གཡས་དང་པོས་གཡང་གཞི་བརྡེབས། །གནོད་བྱེད་ལུས་གདོན་དབང་དུ་སྡུད། །ཕྱག་གཡོན་དང་པོས་རྐང་གླིང་འབུད། །མཁའ་འགྲོ་ལྷ་སྲིན་དབང་དུ་སྡུད། །གཡས་འོག་གསེར་གྱི་ཌཱ་རུ་འཁྲོལ། །གནོད་བྱེད་ལུས་གདོན་མྱོས་སུ་ཆུག །ཕྱག་གཡོན་འོག་མས་ཐོད་ཁྲག་བསྣམས། །བེམ་པོ་ལུས་གདོན་ཚོགས་ལ་རོལ། །སངས་རྒྱས་མཁའ་འགྲོ་འབུམ་གྱིས་བསྐོར། །ཕྱག་མཚན་འཁོར་ལོ་གྲི་ཐོད་འཛིན། །བེམ་པོ་ལུས་གདོན་འདི་ལ་ད་རོལ་ཅིག །ནད་འདྲེ་གཅོང་སྲི་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཁྲོལ་ཅིག །ནད་གདོན་སྡུག་བསྔལ་འདི་དང་ད་ཁྲོལ་ཅིག །ནད་བདག་གནོད་བྱེད་འདི་དང་ད་ཁྲོལ་ཅིག །བེམ་པོ་ལུས་གདོན་ཚོགས་ཀྱི་མཆོད་པ་
བཞེས། །ལུས་གདོན་རིག་པ་སྐྱེ་མེད་དབྱིངས་སུ་སྤོར། །འཆུག་མེད་མངོན་སངས་རྒྱས་པའི་ཕྲིན་ལས་མཛོད། །ཕཊ་ཕཊ་ཕཊ། ཧཱུྃ། ཤར་ལྷོ་ནུབ་བྱང་འོག་དང་ལྔ་པོ་ནས། །མ་གཅིག་དཀར་སེར་དམར་ལྗང་སྔོན་མོ་ལྔ། །རིགས་ཀྱི་མཁའ་འགྲོ་འབུམ་ཕྲག་ལྔ་དང་བཅས། །ཕྱག་མཚན་རང་རྟགས་གྲི་ཐོད་ཁཊྭཱཾ་བསྣམས། །བེམ་པོ་ལུས་གདོན་འདི་ལ་ད་རོལ་ཅིག །ནད་འདྲེ་གཅོང་སྲི་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཁྲོལ་ཅིག །ནད་གདོན་སྡུག་བསྔལ་འདི་དང་ད་ཁྲོལ་ཅིག ། ནད་བདག་གནོད་བྱེད་འདི་དང་ད་ཁྲོལ་ཅིག །བེམ་པོ་ལུས་གདོན་ཚོགས་ཀྱི་མཆོད་པ་བཞེས། །ལུས་གདོན་རིག་པ་སྐྱེ་མེད་དབྱིངས་སུ་སྤྱོར། །འཆུག་མེད་མངོན་སངས་རྒྱས་པའི་ཕྲིན་ལས་མཛོད། །ཕཊ་ཕཊ་ཕཊ། དེ་ནས་བེམ་པོ་དང་ལིངྒ་དབྱེར་མེད་དུ་བཤས་པར་བསྒོམ་ལ། གྲི་གུག་གམ་མེད་ན་གྲིས་གཏུབ་ལ། རྐང་ལག་སྡེབ་བཞི་མགོ་ལ་བྲང་སྦྱར་བ་ཁོག་སྨད་དང་དྲུག་བྱས་ལ། ཏིང་ཐེབ་དྲུག་ཏུ་བཤམས་ཤ་དུམ་སྦྱར་ཁྲག་ཐིགས་བླུགས། ཏིང་བུ་དྲུག་ཏུ་དམར་གཏོར་དྲུག་ཤ་ཁྲག་གིས་བརྒྱན་པ་བྲན། སྣོད་སྡེར་མ་དྲུག་ཏུ་ཆངས་བུ་རེ་རེ་བྲན། ཁྲུས་ཆུ་འདེབས་པའི་གཟར་བུ་དང་ཁྲུས་ཆུ་བཞག །ཏིང་བུ་དང་སྣོད་མང་པོ་
མེད་ན་རེ་རེ་བཤམས་ཆོག །ཆངས་བུ་དང་ཁྲུས་ཆུ་མི་གཙང་བ་དང་གཏོར་མ་ལིངྒ་ཤ་དུམ་གཙང་དགོས་པས་དེ་ཚོ་མི་བསྲེ། མཆོད་གཡོག་པ་གསུམ་ལངས་ལ་གཅིག་གིས་གཏོར་མ་གཅིག་གིས་ལིངྒའི་མགོ་ངོས་དེར། གཅིག་གིས་ཆངས་བུ་དང་ཁྲུས་ཆུ་གཟར་བུ་ནང་དུ་བཟུང་བཅུག །བདུད་རྩིས་བྲན་ལ། ཧཱུྃ། གདོད་ནས་རྣམ་དག་ཆོས་དབྱིངས་དག་པའི་ཞིང་། །ཨོ་རྒྱན་རང་བྱུང་དུར་ཁྲོད་ཆེན་པོའི་དབུས། །ཐོད་པ་སྐམ་རློན་བརྩེགས་པའི་གཞལ་ཡས་ནས། །མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་བདུད་འདུལ་དབང་ཕྱུག་མ། །སྐུ་མདོག་མཐིང་ནག་ཁྲོ་མོའི་ཆ་ལུགས་ཅན། །ཞལ་གཅིག་ཕྱག་བཞི་རྔམ་ཞིང་བརྗིད་པའི་སྐུ། །གསེར་གྱི་ཌཱ་རུ་ཕར་ཕྱིན་ཆོས་སྒྲ་སྒྲོག །མི་ལྤགས་གཡང་གཞིས་ལྷ་སྲིན་དབང་དུ་སྡུད། །མི་རྐང་གླིང་བུས་ལྷ་འདྲེ་ཟིལ་གྱིས་གནོན། །ཐོད་ཁྲག་བསྣམས་པས་ལུས་གདོན་ཞལ་དུ་གསོལ། །ཁཊྭཱཾ་རྩེ་གསུམ་དུག་གསུམ་རྩད་ནས་གཅོད། །ཞབས་གཉིས་གར་སྟབས་ནམ་མཁའི་དབྱིངས་སུ་བསྒྱུར། །སངས་རྒྱས་མཁའ་འགྲོ་བྱེ་བ་འབུམ་གྱིས་བསྐོར། །སྟེང་གདོན་ལྷ་སྲིན་ཐམས་ཅད་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །བེམ་པོ་ལུས་གདོན་མགོ་བོ་
དོན་སྙིང་འདི། །མེ་གཅིག་བདུད་འདུལ་མཁའ་འགྲོའི་ཞལ་དུ་བསྟབ། །སངས་རྒྱས་མཁའ་འགྲོ་འབུམ་གྱིས་དགྱེས་པར་རོལ། །སྟེང་གདོན་གཟའ་སྐར་ཚོགས་རྣམས་ཚིམ་གྱུར་ཅིག །ཕཊ་ཕཊ་ཕཊ། དམ་རྫ་ས་དམར་གྱི་གཏོར་མ་རྒྱ་ཆེན་པོ་འདི་མ་གཅིག་བདུད་འདུལ་ཁྲོས་མ་ཆེན་མོའི་ཞལ་དུ་བསྟབ་བོ་བཞེས་ཤིག །ཕཊ། ཅེས་དམར་གཏོར་ནམ་མཁར་འཕང་ངོ་། བེམ་པོ་ལུས་གདོན་དབྱེར་མེད་པའི་མགོ་བོ་དོན་སྙིང་དང་བཅས་པ་འདི་དབུས་ཕྱོགས་སངས་རྒྱས་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ་བཞེས་ཤིག །ཁྱེར་ཅིག ཕཊ། ལིངྒའི་མགོ་བོ་ནམ་མཁར་འཕངས། བེམ་པོ་ལུས་གདོན་དབྱེར་མེད་པའི་ཤ་ཁྲག་གི་ངོ་བོ་གླད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི་སྟེང་ཕྱོགས་གནོད་བྱེད་ལྷ་འདྲེ་ཐམས་ཅད་ཀྱིས་ཁྱེར་ཅིག །ཟོ་ཞིག །འཐུངས་ཤིག །ཕཊ། ཅེས་རྐང་གླིང་དང་། ཌཱ་དྲིལ་དྲག་ཏུ་བྱའོ། །ཞལ་དུ་བསྟབས་རིམ་སོང་ནས་ཚིམ་པར་བསམ་ཞིང་། ཆངས་བུ་དང་དྲི་ཆུ་ནམ་མཁར་གཏོར། དེ་ནས་གཞན་ཐམས་ཅད་རིགས་འགྲེས་སོ། །ཧཱུྃ། ཨོ་རྒྱན་རང་བྱུང་དུར་ཁྲོད་ཆེན་པོའི་དབུས། །རིན་ཆེན་ཐོད་པ་བརྩེགས་པའི་གཞལ་ཡས་ཀྱི། །ཤར་ཕྱོགས་ཀེང་རུས་
བམ་ཆེན་བསྣོལ་བའི་སྟེང་། །མ་གཅིག་ལབ་སྒྲོན་མཐིང་གསལ་ནམ་མཁའི་མདོག །ཁྲོ་མོའི་ཆ་ལུགས་དར་མཐིང་རལ་ག་གསོལ། །དབུ་སྐྲ་སིལ་མས་སྐུ་རྒྱབ་ཁེབས་པར་གཏིབས། །གཡས་པས་རྒྱུ་ཞགས་འདོམ་དགུས་གནོད་བྱེད་བཅིངས། །གཡོན་པས་ཁཊྭཱཾ་རྩེ་གསུམ་ཁམས་གསུམ་སྒྲོལ། །དུར་ཁྲོད་ཆས་རྫོགས་ཞབས་གཉིས་གར་སྟབས་འགྱིང་། །རྡོ་རྗེ་མཁའ་འགྲོ་བྱེ་བ་འབུམ་གྱིས་བསྐོར། །ཤར་ཕྱོགས་ལྷ་འདྲེའི་དམག་ཚོགས་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །བེམ་པོ་ལུས་གདོན་ལག་བརྡེབ་གཡས་པ་འདི། །མ་གཅིག་ཐུགས་ཀྱི་ལབ་སྒྲོན་ཞལ་དུ་བསྟབ། །རྡོ་རྗེ་མཁའ་འགྲོ་འབུམ་གྱིས་དགྱེས་པར་རོལ། །ཤར་ཕྱོགས་ལྷ་འདྲེ་དྲི་ཟ་ཚིམ་གྱུར་ཅིག །ཕཊ་ཕཊ་ཕཊ། དམ་རྫ་ས་དམར་གྱི་གཏོར་མ་རྒྱ་ཆེན་པོ་འདི་མ་གཅིག་ཡེ་ཤེས་ཀྱི་མཁའ་འགྲོ་ཐུགས་ཀྱི་ལབ་སྒྲོན་མའི་ཞལ་དུ་བསྟབ་བོ་བཞེས་ཤིག །ཕཊ། ཅེས་གཏོར་མ་ཤར་དུ་འཕང་། བེམ་པོ་ལུས་གདོན་དབྱེར་མེད་པའི་ལག་བརྡེབ་གཡས་པ་འདི། ཤར་ཕྱོགས་རྡོ་རྗེ་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ་བཞེས་ཤིག །ཁྱེར་ཅིག
ཕཊ། ཅེས་ལག་པ་ཤར་དུ་འཕང་། བེམ་པོ་ལུས་གདོན་དབྱེར་མེད་པའི་ཤ་ཁྲག་གི་ངོ་བོ་གླུད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི། ཤར་ཕྱོགས་ཀྱི་གནོད་བྱེད་ལྷ་འདྲེ་ཐམས་ཅད་ཀྱིས་ཟོ་ཞིག །འཐུང་ཞིག །ཕཊ། ཆངས་བུ་དྲི་ཁུ་ཤར་དུ་གཏོར། ཧཱུྃ། ཨུ་རྒྱན་རང་བྱུང་དུར་ཁྲོད་ཆེན་པོའི་དབུས། །རིན་ཆེན་ཐོད་པ་བརྩེགས་པའི་གཞལ་ཡས་ནས། །ལྷོ་ཕྱོགས་ཀེང་རུས་བམ་ཆེན་བསྣོལ་བའི་སྟེང་། །མ་གཅིག་ལབ་སྒྲོན་སྐུ་མདོག་གསེར་གྱི་མདོག །ཁྲོ་མོའི་ཆ་ལུགས་དར་སེར་རལ་ག་གསོལ། །དབུ་སྐྲ་སིལ་མས་སྐུ་རྒྱབ་ཁེབས་པར་གཏིབས། །ཕྱག་གཡས་ཆུ་སྲིན་ཞགས་པས་བདུད་རིགས་བཅིངས། །གཡོན་པས་གྲི་གུག་ལུས་གདོན་རྩད་ནས་གཅོད། །དུར་ཁྲོད་ཆས་རྫོགས་ཞབས་གཉིས་གར་སྟབས་འགྱིང་། །རིན་ཆེན་མཁའ་འགྲོ་བྱེ་བ་འབུམ་གྱིས་བསྐོར། །ལྷོ་ཕྱོགས་ལྷ་སྲིན་དམག་ཚོགས་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །བེམ་པོ་ལུས་གདོན་ལག་བརྡེབ་གཡོན་པ་འདི། །མ་གཅིག་ཡོན་ཏན་ལབ་སྒྲོན་ཞལ་དུ་བསྟབ། །རིན་ཆེན་མཁའ་འགྲོ་འབུམ་སྡེས་དགྱེས་པར་རོལ། །ལྷོ་ཕྱོགས་ལྷ་
འདྲེ་གཤིན་རྗེ་ཚིམ་གྱུར་ཅིག །ཕཊ་ཕཊ་ཕཊ། དམ་རྫས་དམར་གྱི་གཏོར་མ་རྒྱ་ཆེན་པོ་འདི། མ་ཡེ་ཤེས་ཀྱི་མཁའ་འགྲོ་ཡོན་ཏན་ལབ་ཀྱི་སྒྲོན་མའི་ཞལ་དུ་བསྟབ་བོ་བཞེས་ཤིག །ཕཊ། བེམ་པོ་ལུས་གདོན་དབྱེར་མེད་པ་ལག་བརྡེབ་གཡོན་པ་འདི། ལྷོ་ཕྱོགས་རིན་ཆེན་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ་བཞེས་ཤིག་ཁྱེར་ཅིག །ཕཊ། བེམ་པོ་ལུས་གདོན་དབྱེར་མེད་པའི་ཤ་ཁྲག་གི་ངོ་བོ་གླུད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི། ལྷོ་ཕྱོགས་ཀྱི་གནོད་བྱེད་ཐམས་ཅད་ཀྱིས་ཟོ་ཞིག་འཐུང་ཞིག ། ཕཊ། ཧཱུྃ། ཨུ་རྒྱན་རང་བྱུང་དུར་ཁྲོད་ཆེན་པོའི་དབུས། །རིན་ཆེན་ཐོད་པ་བརྩེགས་པའི་གཞལ་ཡས་ཀྱི། །ནུབ་ཕྱོགས་ཞིང་ཆེན་བསྣོལ་བའི་ཁྲི་སྟེང་ནས། །མ་གཅིག་ལབ་སྒྲོན་པདྨ་རཱ་གའི་མདོག །ཁྲོ་མོའི་ཆ་ལུགས་དར་དམར་རལ་ག་གསོལ། །དབུ་སྐྲ་སིལ་མས་སྐུ་རྒྱབ་ཁེབ་པར་གཏིབས། །ཕྱག་གཡས་སྦྲུལ་ནག་ཞགས་པས་གནོད་བྱེད་བཅིངས། །གཡོན་པས་ཐོད་ཁྲག་ལུས་གདོན་ཞལ་དུ་གསོལ། །དུར་ཁྲོད་ཆས་རྫོགས་ཞབས་གཉིས་གར་སྟབས་འགྱིངས། །པདྨ་མཁའ་འགྲོ་བྱེ་བ་འབུམ་གྱིས་བསྐོར། །ནུབ་
ཕྱོགས་ལྷ་སྲིན་དམག་ཚོགས་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །བེམ་པོ་ལུས་གདོན་རྐང་བརྡེབ་གཡོན་པ་འདི། །མ་གཅིག་གསུང་གི་ལབ་སྒྲོན་ཞལ་དུ་བསྟབ། །པདྨ་མཁའ་འགྲོ་འབུམ་སྡེས་དགྱེས་པར་རོལ། །ནུབ་ཕྱོགས་ལྷ་འདྲེ་ཀླུ་གདོན་ཚིམ་གྱུར་ཅིག །ཕཊ་ཕཊ་ཕཊ། དམ་རྫས་དམར་གྱི་གཏོར་མ་རྒྱ་ཆེན་པོ་འདི་མ་ཡེ་ཤེས་ཀྱི་མཁའ་འགྲོ་གསུང་གི་ལབ་ཀྱི་སྒྲོན་མའི་ཞལ་དུ་བསྟབ་བོ་བཞེས་ཤིག་ཁྱེར་ཅིག །ཕཊ། བེམ་པོ་ལུས་གདོན་དབྱེར་མེད་པའི་རྐང་བརྡེབ་གཡོན་པ་འདི། ནུབ་ཕྱོགས་པདྨ་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ་བཞེས་ཤིག །ཁྱེར་ཅིག །ཕཊ། བེམ་པོ་ལུས་གདོན་དབྱེར་མེད་པའི་ཤ་ཁྲག་གི་ངོ་བོ་བླུད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི། ནུབ་ཕྱོགས་ཀྱི་གནོད་བྱེད་ལྷ་འདྲེ་ཐམས་ཅད་ཀྱིས་ཟོ་ཞིག་འཐུང་ཞིག །ཕཊ། ཧཱུྃ། ཨོ་རྒྱན་རང་བྱུང་དུར་ཁྲོད་ཆེན་པོའི་དབུས། །རིན་ཆེན་ཐོད་པ་བརྩེགས་པའི་གཞལ་ཡས་ཀྱི། །བྱང་ཕྱོགས་ཀེང་རུས་ཐོད་པའི་ཁྲི་སྟེང་ནས། །མ་གཅིག་ལབ་སྒྲོན་ཨིནྡྲ་ནི་ལའི་མདོག །ཁྲོ་མོའི་ཆ་ལུགས་དར་
ལྗང་ན་བཟའ་གསོལ། །དབུ་སྐྲ་གྲོལ་ཞིང་ཞལ་ནས་བཤུག་གླུ་ལེན། །ཕྱག་གཡས་གྲི་གུག་བདུད་བཞི་རྩད་ནས་གཅོད། །གཡོན་པས་ཐོད་ཁྲག་ལུས་གདོན་ཚོགས་སུ་རོལ། །དུར་ཁྲོད་ཆས་རྫོགས་ཞབས་གཉིས་གོར་ཐབས་འགྱིང་། །ལས་ཀྱི་མཁའ་འགྲོ་བྱེ་བ་འབུམ་གྱིས་བསྐོར། །བྱང་ཕྱོགས་ལྷ་སྲིན་དམག་ཚོགས་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །བེམ་པོ་ལུས་གདོན་རྐང་བརྡེབ་གཡས་པ་འདི། །མ་གཅིག་ཕྲིན་ལས་ལབ་སྒྲོན་ཞལ་དུ་བསྟབ། །ལས་ཀྱི་མཁའ་འགྲོ་འབུམ་སྡེས་དགྱེས་པར་རོལ། །བྱང་ཕྱོགས་ལྷ་འདྲེ་གནོད་བྱེད་ཚིམ་གྱུར་ཅིག །ཕཊ་ཕཊ་ཕཊ། དམ་རྫ་ས་དམར་གྱི་གཏོར་མ་རྒྱ་ཆེན་པོ་འདི། མ་ཡེ་ཤེས་ཀྱི་མཁའ་འགྲོ་ཕྲིན་ལས་ལབ་ཀྱི་སྒྲོན་མའི་ཞལ་དུ་བསྟབ་བོ། །བཞེས་ཤིག་ཁྱེར་ཅིག །ཕཊ། བེམ་པོ་ལུས་གདོན་དབྱེར་མེད་པའི་རྐང་བརྡེབ་གཡས་པ་འདི། བྱང་ཕྱོགས་ལས་ཀྱི་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ། །བཞེས་ཤིག་ཁྱེར་ཅིག །ཕཊ། བེམ་པོ་ལུས་གདོན་དབྱེར་མེད་པའི་ཤ་ཁྲག་གི་ངོ་བོ་གླུད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི། བྱང་ཕྱོགས་ཀྱི་གནོད་བྱེད་ལྷ་
འདྲེ་ཐམས་ཅད་ཀྱིས་ཟོ་ཞིག །འཐུང་ཞིག །ཕཊ། ཧཱུྃ། ཨོ་རྒྱན་རང་བྱུང་དུར་ཁྲོད་ཆེན་པོའི་དབུས། །རིན་ཆེན་ཐོད་པ་བརྩེགས་པའི་གཞལ་ཡས་ཀྱི། འོག་ཕྱོགས་ཞིང་ཆེན་ཀེང་རུས་བཀྲམ་པའི་སྟེང་། །མ་གཅིག་ལབ་སྒྲོན་སྔོ་སྐྱ་མཐིང་ཤུན་མདོག །ཁྲོ་མོའི་ཆ་ལུགས་དར་སྔོན་རལ་ག་གསོལ། །དབུ་སྐྲ་སིལ་མས་སྐུ་རྒྱབ་ཁེབས་པར་གཏིབས། །ཕྱག་གཡས་རྒྱུ་ཞོགས་འདོམ་དགུས་དམ་སྲི་བཅིངས། །གཡོན་པས་ཁཊྭཱཾ་རྩེ་གསུམ་གདོན་གསུམ་འདུལ། །དུར་ཁྲོད་ཆས་རྫོགས་ཞབས་གཉིས་གར་སྟབས་འགྱིང་། །སྣ་ཚོགས་མཁའ་འགྲོ་བྱེ་བ་འབུམ་གྱིས་བསྐོར། །འོག་ཕྱོགས་ལྷ་སྲིན་དམག་ཚོགས་རོལ་དུ་ཁྲིད། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །ཚེ་བེམ་པོ་ལུས་གདོན་རྩིབ་ཁོག་ནང་ཆར་བཅས། །མ་གཅིག་སྐུ་ཡི་ལབ་སྒྲོན་ཞོལ་དུ་བསྟབ། །སྣ་ཚོགས་མཁའ་འགྲོ་འབུམ་སྡེས་དགྱེས་པར་རོལ། །འོག་ཕྱོགས་ལྷ་འདྲེ་ས་བདག་ཚིམ་གྱུར་ཅིག །ཕཊ་ཕཊ་ཕཊ། དམ་རྫ་ས་དམར་གྱི་གཏོར་མ་རྒྱ་ཆེན་པོ་འདི། མ་ཡེ་ཤེས་ཀྱི་མཁའ་འགྲོ་སྐུ་ཡི་ལབ་ཀྱི་སྒྲོན་མའི་ཞལ་དུ་བསྟབ་བོ། །བཞེས་ཤིག །
ཕཊ། བེམ་པོ་ལུས་གདོན་དབྱེར་མེད་པའི་རྩིབ་ཁོག་ནང་ཆ་དང་བཅས་པ་འདི། འོག་ཕྱོགས་ས་གཞི་སྣ་ཚོགས་མཁའ་འགྲོ་བྱེ་བ་འབུམ་སྡེའི་ཞལ་དུ་བསྟབ་བོ་བཞེས་ཤིག་ཁྱེར་ཅིག །ཕཊ། བེམ་པོ་ལུས་གདོན་ཤ་ཁྲག་གི་ངོ་བོ་གླུད་ཟན་དྲི་ཁུ་བདུད་རྩིའི་རྒྱ་མཚོ་ཆེན་པོ་འདི། འོག་གི་ལྷ་འདྲེ་གནོད་བྱེད་ཐམས་ཅད་ཀྱིས་ཟོ་ཞིག །འཐུང་ཞིག །ཕཊ། དེ་ནས་བདུད་རྩིའི་དམིགས་པ་དེ་དག་གསལ་གདབ་ལ། ཕཊ། བསྒྲགས་ནས་ཌཱ་དྲིལ་འཁྲོལ། དེ་ནས། ཧཱུྃ། དབྱིངས་ཕྱུག་མཁའ་འགྲོ་མ་གཅིག་རིགས་ལྔར་བཅས། །དོམ་རྗེས་བརྒྱན་པའི་གཏོར་མས་མཉེས་གྱུར་ནས། །བདག་ཅག་དཔོན་སློབ་ཡོན་མཆོད་འཁོར་བཅས་རྣམས། །བདུད་བཞི་རང་སར་ཞི་བའི་ཕྲིན་ལས་མཛོད། །རིགས་ཀྱི་མཁའ་འགྲོ་བྱེ་བ་འབུམ་ཕྲག་དྲུག །ལུས་གདོན་ཤ་ཁྲག་མཆོད་པ་ཚོགས་སུ་རོལ། །བདག་ཅག་དཔོན་སློབ་ཡོན་མཆོད་འཁོར་བཅས་རྣམས། །ནད་གདོན་རང་སར་ཞི་བའི་ཕྲིན་ལས་མཛོད། །ཕྱོགས་བཞི་སྟེང་འོག་ལྷ་སྲིན་སྡེ་བརྒྱད་རྣམས། །ཤ་ཁྲག་ལན་ཆགས་གླུད་ཀྱིས་ཚིམ་གྱིས་ལ། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །ལན་ཆགས་བུ་ལོན་ཤ་
འཁོན་བྱང་མཛོད་ཅིག །ཕཊ་ཕཊ་ཕཊ། དེ་ནས་གཅོད་ཚོགས་ལ་སྦྱར་བ་ཡིན་ན་གཤེགས་གསོལ་འདི་མི་དགོས་ལུས་སྦྱིན་རྐྱང་པ་ལ་སྦྱར་ན་འདི་བརྗོད་དོ། །སྟེང་འོག་ཕྱོགས་བཞིའི་ལྷ་སྲིན་དམག་ཚོགས་རྣམས། །དགའ་མགུ་ཚིམ་པར་གྱིས་ལ་རང་གནས་སོང་། །རིགས་ཀྱི་མཁའ་འགྲོ་བྱེ་བ་འབུམ་སྡེ་དྲུག །ཨོ་རྒྱན་ཡུལ་སོགས་རང་རང་གནས་སུ་གཤེགས། །མ་གཅིག་རིགས་ལྔ་དབྱིངས་ཕྱུག་ལྷ་མོར་ཐིམ། །དེ་ཉིད་འོད་དུ་ཞུ་ནས་བདག་ལ་ཐིམ། །དབང་དང་བྱིན་རླབས་ཐམས་ཅད་དུས་གཅིག་ཐོབ། །དུར་ཁྲོད་གཞལ་ཡས་ཁང་སོགས་བདག་ལ་ཐིམ། །བདག་གི་ཐུགས་ཀའི་ནད་པའི་རྣམ་ཤེས་དེ། །ཨ་ཡིག་མཐིང་ག་བཀྲག་མདངས་ལྡན་པར་འཕྲོས། །ནད་པའི་ཚངས་བུག་ནས་ཞུགས་སྙིང་དབུས་ཐིམ། །ཕཊ་ཕཊ་ཕཊ། ཅེས་བརྗོད་ལ་སྟོང་ཉིད་ངང་ལ་ཡུན་རིང་བཞག་གོ །ཨེ་མ་གཅོད་ཀྱི་བསྟབ་པ་ཆ་དྲུག་དམིགས་རིམ་ནི། །མ་གཅིག་ཉིད་ཀྱི་གསུང་རྒྱུན་སྙན་དུ་བརྒྱུད། །འདོན་ཆ་རྒྱ་སྟོན་བླ་མ་ཞིག་གིས་མཛད། །འོན་ཀྱང་དེ་ཉིད་མི་གསལ་ཉོབ་ཆེ་ཞིང་། །ཕྱག་ལེན་དཔེ་ལ་མི་གསལ་སྙན་དུ་བརྒྱུད། །བདག་གིས་ཕྱག་ལེན་མཐོང་བ་བརྒྱུད་པ་མཐོང་། །དོན་རྩ་དམིགས་རིམ་སྔར་གྱི་འཆུག་མེད་ལ། །འདོན་ཆ་ཚང་མ་བདག་གིས་གསར་དུ་
བརྩམ། །བལྟས་ཆོག་ཤིན་ཏུ་གསལ་བར་བཀོད་པ་ལ། །ཉེས་པ་མཆིས་ན་ཊྛཀིའི་ཚོགས་ལ་བཤགས། །དགེ་བས་འདི་ལ་འབྲེལ་ཐོགས་འགྲོ་བ་ཀུན། །ཕུང་པོའི་བདུད་བཅོམ་རྡོ་རྗེའི་སྐུ་ཐོབ་ཤོག །ཅེས་རི་ཁྲོད་པ་དགེ་སློང་རཱ་ག་ཨ་སྱས་སྦྱར་བ་མངྒ་ལཾ། །བྷ་ཝནྟུ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།