མཐའ་གཏད་མེ་ཡི་གཟེར་བུ་ཞེས་བྱ་བ་དམིགས་པ་ཕྱག་ལེན་འདོན་ཆ་བལྟས་ཆོག་ཏུ་བཀོད་པ།
༼བ༽ མཐའ་གཏད་མེ་ཡི་གཟེར་བུ་ཞེས་བྱ་བ་དམིགས་པ་ཕྱག་ལེན་འདོན་ཆ་བལྟས་ཆོག་ཏུ་བཀོད་པ་བཞུགས་སོ།།
ན་མོ་པྲཛྙཱ་པཱ་ར་མི་ཏཱ་ཡེ། ཡུམ་ཆེན་ཌཱཀིའི་ཚོགས་ལ་ཕྱག་འཚལ་ནས། །མཐའ་གཏད་མེ་ཡི་གཟེར་བུ་བལྟས་ཆོག་བཀོད། །ཆོས་བདག་ཏྟཀིས་བཀའ་གནང་བྱིན་གྱིས་རློབས། །ནད་པའི་ལུས་བཀྲུས་པའི་ཁུ་བས་ཟན་བརྫིས་ལུས་ལ་དྲུད་ལ། ཆངས་བུ་བརྒྱ་རྩ་བརྒྱད་བྱ། རེ་རེ་ལ་ཤ་དུམ་བསླན། ནད་པའི་གཟུགས་མཛུབ་གང་ཙམ་བཅས་ལ་གོས་རྙིང་གིས་བཏུམས་སྣལ་མས་དཀྲིས་ལ་སྤུར་འདྲ་བ་གཅིག་བྱ། དེ་ལ་སྐུ་དང་སེན་མོ་དྲི་མ་རྣམས་ཀྱང་བསླན། དེ་རྣམས་སྣོད་གཅིག་ཏུ་བཞག་གོ །སྤེན་ནེའམ་སུ་རུ་སོགས་ལ་མེ་ཐོམ་དགུ་བཅིངས་ལ་བཞག །ས་སྟེགས་གཅིག་བཅག་ལ་དེར་རྡུལ་ཚོན་ནམ་སོལ་བས་གྲུ་གསུམ་དབུས་སུ་ཡི་གེ་ཧཱུྃ་གིས་མཚན་པ་གཅིག་བྲི། དེའི་སྟེང་དུ་
ཤིང་སྣ་ཚོགས་བརྩིག །གཅོད་ཚོགས་ཀྱི་སྐབས་སམ། ལུས་སྦྱིན་ཙམ་གྱིས་ཀྱང་ཆོག་སྟེ། དང་པོ་ལུས་སྦྱིན་བྱས་དེ་ནས། ཕཊ། རང་ཉིད་སྐད་ཅིག་གིས་དུར་ཁྲོད་ཀྱི་བདག་མོ་ཁྲོས་མ་ནག་མོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། སྐུ་ལ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་པད་ཉི་བོ་གྱི་གདན་ལ་གར་སྟབས་ལིང་ངེར་བཞུགས་པ། ཕྱག་གཡས་མེ་ཡི་ཧོམ་གཟར་ཕྱར་ཞིང་གཡོན་མི་རྐང་གི་གླིང་བུ་འབུད་པས་ལྷ་སྲིན་དབང་དུ་སྡུད་པ། སྐུ་ཡིས་སྲིད་པ་གསུམ་ཁྱབ་པ་ཁམས་གསུམ་དབང་དུ་སྡུད་པ་སྲིད་གསུམ་ཟིལ་གྱིས་གནོན་པའི་སྐུར་གྱུར། །
དེ་ནས་ངར་གླུད་ཆངས་བུ་ཤ་དུམ་རྣམས་བྲན་ལ་ནད་པ་མདུན་དུ་བསྙལ་ལ། ཕཊ། མདུན་གྱི་ནམ་མཁར་མ་གཅིག་ལབ་ཀྱི་སྒྲོན་མ་སྐུ་མདོག་དཀར་མོ་དར་དཀར་གྱི་རལ་ག་གསོལ་བ། དབུ་སྐྲ་སིལ་མས་སྐུ་རྒྱབ་ཁེབས་པ། ཕྱག་གཡས་ཌཱ་མ་རུ་འཁྲོལ་ཞིང་གཡོན་དྲིལ་བུ་དཀུར་བརྟེན་ནས། པདྨ་ཟླ་བའི་གདན་ལ་གར་སྟབས་ལིང་ངེ་བཞུགས་པ་མངོན་སུམ་དུ་གསལ་བར་གྱུར། ཕཊ་ཕཊ། ནད་པའི་སྙིང་གར་རྣམ་པར་ཤེས་པ་ཚེ་བསོད་ནམས་རླུང་སེམས་ཐམས་ཅད་འདུས་པའི་ངོ་བོ། འོད་ཀྱི་ཐིག་ལེ་བྱ་མ་སར་གྱི་སྒོ་ང་ཙམ་འཕར་ལ་ཁད་པ་ཡར་ལ་ཁད་པ། ཕཊ། དབུ་མའི་ལམ་ནས་རྒྱངས་སེ་ཐོན་ནས་མ་གཅིག་གི་ཐུགས་ཀར་ཐིམ་པར་གྱུར། ཕཊ་ཕཊ་ཕཊ། ན་མོ་དྲིན་ཆེན་གཅོད་ཡུལ་བརྒྱུད་པའི་བླ་མ་དམ་པ་ནི་རྣམས་ཀྱི་བདེན་པ་དང་། །དཀོན་མཆོག་གསུམ་གྱི་བདེན་པ་དང་། མ་གཅིག་ལབ་ཀྱི་སྒྲོན་མ་བདུད་འདུལ་ཁྲོས་མ་ནག་མོའི་བདེན་པ་དང་། རིགས་ལྔའི་མཁའ་འགྲོ་བྱེ་བ་འབུམ་སྡེ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུས། ནད་པ་འདིའི་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པ།
ཚེ་ལ་བརྐུ་བ། སྲོག་ལ་འཇབ་པ། ཡིད་ལ་རློམ་པ། བླ་ལ་ཁྱེར་བ་བྱེད་པའི་ལུས་གདོན་རྒྱབ་རྟེན་དང་བཅས་པ། ནད་ནད་བདག་དང་བཅས་པ། གདོན་སྣ་འདྲེན་དང་བཅས་པ། བཀའ་དང་དམ་ལ་མི་གནས་པ། འགྱུ་ལོག་འཕར་ལྡང་བྱེད་པ། མགོ་གཡོགས་མགོ་བསྐོར་བྱེད་པ་གང་ཡིན་པ་ཐམས་ཅད་སྐད་ཅིག་རང་དབང་མེད་པར་བེམ་པོ་དང་དབྱེར་མེད་པའི་ངར་མི་ཆངས་བུ་ཤ་དུམ་འདི་རྣམས་ལ་ཁུག་ཅིག །བཛྲ་ཨངྐཤ་ཛཿ བཛྲ་པཱ་ཤ་ཧཱུྃ། བཛྲ་སྥ་ཊ་པཾ། བཛྲ་གནྡྷེ་ཧོཿ ཧཱུྃ་ཧཱུྃ་ཧཱུྃ། ཕཊ་ཕཊ་ཕཊཿ ཅེས་ལན་གསུམ་བྱ། དེ་ནས་མེ་ཐབ་དེ་བྲན་ལ། ཕཊ། སྐད་ཅིག་གིས་རཾ་ལས་དྲག་པོའི་མེ་ཐབ་གྲུ་གསུམ་དམར་ནག་ཡངས་ཤིང་རྒྱ་ཆེ་བ། བསྐལ་པའི་མེ་དཔུང་རབ་ཏུ་འབར་ཞིང་འཚུབ་པའི་དབུས་སུ་ཡི་གེ་ཧཱུྃ་དམར་ནག་ཡོངས་སུ་གྱུར་པ་ལས།། ངོ་བོ་ཁྲོས་མ་ནག་མོ་ལ་རྣམ་པ་གནམ་ལྕགས་ཀྱི་སྡིག་པ་དམར་ནག་རི་རབ་ཙམ་པ། ཡ་ཁ་གནམ་ལ་བྱས་པ། མ་ཁ་ས་ལ་བྱས་པ། མཆེ་བ་གངས་རི་ལྟར་གཙིགས་པ། ཁ་ནས་བསྐལ་པའི་མེ་འབར་བ། སྣ་ནས་བསྐལ་པའི་རླུང་ནག་འཚུབ་པ། མིག་ཉི་ཟླ་ལྟར་བགྲད་པ།
ལུས་གཉེར་མས་གང་བའི་གསེབ་ནས་རྡོ་རྗེ་མེའི་ཚྭ་ཚྭ་འཕྲོ་བ། རྭ་གཡས་སྲིད་པའི་རྩེ་ནས་བསྙིལ་བ། གཡོན་པས་ས་འོག་གཏིང་ནས་གཡེངས་པ། རྐང་གཡས་ལྕགས་ཀྱུ་ལྟར་ཕྱོགས་བརྒྱད་དུ་བགྲད་པ། དྲི་མ་མི་སྡུག་པས་སྟོང་གསུམ་ཁྱབ་པ། ལུས་ལ་མཚོན་ཆའིབ་སྤུ་སྐྱེས་པ། མཐོང་བ་ཙམ་གྱིས་ལྷ་སྲིན་ཐམས་ཅད་བརྒྱལ་བར་བྱེད་པའི། སྙིང་གར་ཡི་གེ་ཧཱུྃ་དམར་ནག་ལས་མེ་འབར་བས་ཁོག་པ་མེ་ཡི་རང་བཞིན་དུ་ཡོད་པ། ཡེ་ཤེས་ཀྱི་ཁྲོ་བོ་ཁྲོ་མོ་ཐམས་ཅད་ཀྱི་མཐུ་སྟོབས་གཅིག་ཏུ་བསྡུས་པའི་ལས་ཀྱི་སྲིན་པོ་ཆེན་པོར་གྱུར། ཕཊ་ཕཊ་ཕཊ། ་དེའི་ཐུགས་ཀའི་ཧཱུྃ་ལས་འོད་ཟེར་འཕྲོས་པའི་རང་བཞིན་གྱི་གནས་ནས་ཡེ་ཤེས་ཁྲོ་བོ་ཁྲོ་མོ་ཐམས་ཅད་ཀྱི་ཐུགས་ཀ་ནས་སྤྲུལ་པའི་སྡིག་རྒོད་དེ་འདྲ་བ་དཔག་ཏུ་མེད་པ་ཆར་ལྟར་བབས་ནས་དབྱེར་མེད་དུ་ཐིམ་པར་གྱུར། བཛྲ་ས་མ་ཛཿ ཛཿཧཱུྃ་བྃ་ཧོ༔ ཕཊ་ཕཊ། ཧཱུྃ། སྐྱེ་མེད་ཆོས་སྐུ་ཡུམ་ཆེན་མཁའ་ཀློང་ན། །ཡེ་ཤེས་མེ་དཔུང་འབར་བའི་ཀློང་དཀྱིལ་ནས། །མ་གཅིག་བདུད་འདུལ་ཁྲོས་མ་ནག་མོ་ནི། །གདུག་པ་འདུལ་ཕྱིར་གནམ་ལྕགས་སྡིག་པར་སྤྲུལ། །དམར་ནག་ལུས་ནི་རི་རྒྱལ་ལྷུན་པོ་
འདྲ། །བ་སྤུ་མཚོན་ཆ་སྣ་ཚོགས་ཟིངས་སེ་ཟིང་། །རྭ་ཅོ་གཡས་པས་སྲིད་པའི་རྩེ་ནས་བསྙིལ། །རྭ་ཅོ་གཡོན་པས་ས་འོག་གཏིང་ནས་གཡེངས། །རྐང་ལག་བརྒྱད་ཀྱིས་ཕྱོགས་མཚམས་གདོན་ཚོགས་འཇོམས། །སྤྱན་མིག་བགྲད་པས་ལྷ་སྲིན་བརྒྱལ་བར་བྱེད། །གདུག་པའི་དྲི་ངན་ཐུལ་པས་གནོད་བྱེད་མྱོས། །གནམ་ས་ལྟ་བུའི་ཁ་ནས་བསྐལ་མེ་འབར། །གངས་རི་ལྟ་བུ་མཆེ་བས་ལུས་གདོན་ཟ། །ལྕེ་ནི་གློག་འཁྱུག་ང་རོ་འབྲུག་སྟོང་ལྡིར། །བསྐལ་པའི་མེ་འབར་རྡོ་རྗེའི་ཚྭ་ཚྭ་འཕྲོ། །ཡེ་ཤེས་ཁྲོ་བོ་ཁྲོ་མོའི་མཐུ་ནུས་ཀུན། །གཅིག་བསྡུས་ལས་ཀྱི་སྲིན་པོ་གདུག་པ་ཅན། །དམ་སྲི་འབྱུང་པོའི་གཤེད་མ་ཁྱོད་ལ་བསྟོད། །བཀའ་ལས་འདས་པའི་གནོད་བྱེད་བདུད་དང་བགེགས། །ཐམས་ཅད་ཐལ་བ་རྡུལ་ཕྲན་བཞིན་དུ་རློག །རྣམ་ཤེས་མི་དམིགས་ཡུམ་ཆེན་ཀློང་དུ་བསྟིམ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཕཊ་ཕཊ། ཅེས་བསྟོད་ཅིང་དམིགས་པ་ངར་བསྐྱེད་ལ། རང་ཉིད་ཁྲོས་མ་ནག་མོས་ལུས་གདོན་གནོད་བྱེད་དེ་མངོན་སུམ་སྡིག་པའི་ཁར་འཕངས་པས་ཧབ་ཧབ་ཟོས་པར་བསམས་ལ། སྤྱིར་གྱི་གཟུགས་དེ་ལག་ཏུ་ཐོགས་ལ། ནད་པ་
འདི་ལ་གཅོད་ཅིང་འཚེ་བར་བྱེད་པའི། ཕོ་གདོན་རྒྱལ་འགོང་དམ་སྲི། མོ་གདོན་འདྲེ་མོ་བསེན་མོ། ཀླུ་གདོན་ཐེའུ་རང་འབྱུང་པོ། ནད་འདྲེ་གཅོང་སྲི། ལུས་གདོན་རྒྱབ་རྟེན་དང་བཅས་པ། ནད་ནད་བདག་དང་བཅས་པ། གདོན་སྣ་འདྲེན་དང་བཅས་པ་ཐམས་ཅད། གནམ་ལྕགས་སྡིག་རྒོད་འབར་བའི་ཞལ་དུ་བསྟབ་བོ། །བཞེས་ཤིག །ཕཊ་ཕཊ་ཕཊ། ཅེས་སྤྱིར་གཟུགས་དེ་མེའི་ནང་དུ་འཕངས་ལ་ཌ་དྲིལ་རྐང་དུང་བཏང་། སླར་ཡང་ཆངས་བུ་ཤ་དུམ་རེ་རེ་ནས་འཕེན་ཅིང་། ཧཱུྃ། ལུས་གདོན་ནད་འདྲེ་གཅོང་སྲི་རྣམས། །གནམ་ལྕགས་སྡིག་པའི་ཞལ་དུ་བསྟབ། །བཞེས་ཤིག་རོལ་ཅིག་ཁ་རཾ་ཁཱ་ཧི། །རྣམ་ཤེས་ཆོས་ཀྱི་དབྱིངས་སུ་དྲོངས། །ཕཊ། ཅེས་ཆངས་བུ་ཤ་དུམ་མ་རྫོགས་བར་བརྒྱ་རྩ་བརྒྱད་བྱའོ། །དེ་ནས་ནད་པའམ་བསྲུང་བྱ་དུ་ཡོད་ཀྱི་རྣམ་ཤེས་སྤར་ཏེ། ཕཊ། ནད་པ་དང་བསྲུང་བྱ་རྣམས་ཀྱི་སྙིང་གར་རྣམ་པར་ཤེས་པ། བླ་ཚེ་བསོད་ནམས་རླུང་སེམས་ཐམས་ཅད་འདུས་པའི་ངོ་བོ། འོད་ཀྱི་ཐིག་ལེ་བྱ་མ་སར་གྱི་སྒོ་ང་ཙམ་དེ། དབུ་མའི་ལམ་ནས་རྒྱངས་སེ་ཐོན་ནས་ནམ་མཁའི་མ་གཅིག་གི་ཐུགས་ཀར་ཐིམ་པར་གྱུར། ཕཊ་ཕཊ་ཕཊ། ནད་པ་དང་བསྲུང་བྱ་རྣམས་ཀྱི་བེམ་
པོ་ལུས་གདོན་དང་བཅས་པ་གནམ་ལྕགས་སྡིག་རྒོད་འབར་བའི་ཞལ་དུ་བསྟབ་བོ། །བཞེས་ཤིག །ཁྱེར་ཅིག །ཟོ་ཞིག །འཐུངས་ཤིག །ཌཱ་དྲིལ་དང་བཅས། །ཕཊ། བརྒྱ་རྩ་བརྒྱད་བརྗོད་པའི་ཚེ། ནད་པ་དང་བསྲུང་བྱ་ཐམས་ཅད་མེ་ཡི་སྟེང་དུ་ཕར་མཆོང་ཚུར་མཆོང་བྱེད་བཅུག །ནད་པ་མཆོང་མི་ཐུབ་ན་འཕྱར་ཁྱོགས་བྱེད་ལ་མེ་ཁ་ན་གཡུག་བཅུག་གོ །དེ་ནས་ནད་པ་ལ་གོས་སྤུ་མེད་བཀོན་ལ་རང་མདུན་དུ་བསྙལ། མེ་ཐོམ་ཆེ་བ་གཅིག་དབུས་སུ་བཞག །ཆུང་བ་བརྒྱད་ཀྱིས་བསྐོར་ལ་བཞག་ནས་བྲན། ཕཊ། སྐད་ཅིག་གིས་རྃ་ལས་མེ་ཧོམ་དཀར་པོ་ཟུར་བརྒྱད་པའི་དབུས་སུ་ཨོཾ་ལས་འཁོར་ལོ་དཀར་པོ་མེ་དཔུང་དཀར་པོ་འབར་བ། ཤར་དུ་རྃ་ལས་མེ་ཧོམ་ཟླུམ་པོ་མཐིང་ཁའི་དབུས་སུ་ཧཱུ་ལས་རྡོ་རྗེ་སྔོན་པོ་མེ་དཔུང་མཐིང་ཁ་འབར་བ། ལྷོར་རྃ་ལས་མེ་ཧོམ་སེར་པོ་གྲུ་བཞི་དབུས་སུ་ཧཱུྃ་ལས་རིན་ཆེན་སེར་པོ་མེ་དཔུང་སེར་པོ་འབར་བ། ནུབ་ཏུ་རྃ་ལས་མེ་ཧོམ་ཟླ་གམ་དམར་པོའི་དབུས་སུ་ཧྲཱིཿལས་པདྨ་དམར་པོ་མེ་དཔུང་དམར་པོ་འབར་བ། བྱང་དུ་རྃ་ལས་མེ་ཧོམ་གྲུ་གསུམ་ལྗང་གུའི་དབུས་སུ་ཨཱཿལས་རྡོ་རྗེ་རྒྱ་གྲམ་མེ་དཔུང་ལྗང་གུ་འབར་བ། ཤར་ལྷོར་རྃ་ལས་མེ་ཧོམ་ཟླུམ་པོ་དཀར་པོའི་དབུས་སུ་ཛལས་ལྕགས་ཀྱུ་དམར་
པོ་མེ་དཔུང་དཀར་པོ་འབར་བ། ལྷོ་ནུབ་ཏུ་རྃ་ལས་མེ་ཧོམ་སེར་པོ་གྲུ་བཞིའི་དབུས་སུ་ཧཱུྃ་ལས་ཞགས་པ་སེར་པོ་མེ་དཔུང་སེར་པོ་འབར་བ། ནུབ་བྱང་དུ་རྃ་ལས་མེ་ཧོམ་ཟླ་གམ་དམར་པོའི་དབུས་སུ་པྃ་ལས་ལྕགས་སྒྲོག་དམར་པོ་མེ་དཔུང་དམར་པོ་འབར་བ། བྱང་ཤར་དུ་རྃ་ལས་མེ་ཧོམ་ལྗང་གུ་གྲུ་གསུམ་གྱི་དབུས་སུ་ཧོལས་དྲིལ་བུ་ལྗང་གུ་མེ་དཔུང་ལྗང་གུར་འབར་བར་གྱུར། ཕཊ་ཕཊ་ཕཊ། རང་བཞིན་གྱི་གནས་ནས་ཡུམ་ཆེན་མོའི་ཐུགས་ཡེ་ཤེས་ལྔ་དང་ཚད་མེད་པ་བཞི། མེ་དཔུང་དང་ཕྱག་མཚན་གྱི་རྣམ་པར་སྤྱན་དྲངས་གཉིས་སུ་མེད་པར་ཐིམ། ཨོཾ་ཧཱུྃ་ཏྲཱཾ་ཧྲཱིཿཨཱཿ ཛཿཧཱུྃ་བྃ་ཧོཿ ཨཱ་བེ་ཤ་ཡ་ཨཱ་ཨཱ། ཕཊ་ཕཊ་ཕཊ། དེ་ནས་མེ་ཐོམ་དེ་རྣམས་སྔོན་མེ་ཧོམ་གྱི་མེ་ལ་རེ་རེ་ཁར་སྦར་ཤོམ་བྱས། ཕྱོགས་སོ་སོར་མ་འཆུགས་པར་ཡོད་ན་མི་བརྒྱད་དགུས་སོ་སོར་སྦྱར་ཤི་ང་གཅོད་པ་ལ་གཏད་མ་རག་བྱས་ལ། ཧཱུྃ། དང་པོ་མེ་བྱུང་གང་ནས་བྱུང་། །སྔོན་ཚེ་བསྐལ་པ་དང་པོ་ལ། །ཆོས་སྐུ་ཡུམ་ཆེན་ཐུགས་ཀ་ནས། །ཡེ་ཤེས་ལྔ་ཡི་མེ་བྱུང་བས། །དུག་ལྔའི་ཕུང་པོ་གཏན་ནས་བརླག །ཡེ་ཤེས་ལྔ་རུ་ལྷུན་གྱིས་གྲུབ། །ཚད་མེད་བཞི་ཡི་མེ་བྱུང་བས། །སྐྱེ་བ་རྣམ་བཞིའི་འཁྲུལ་པ་བརླག །ཚད་
མེད་བཞི་རུ་ལྷུན་གྱིས་གྲུབ། །དོ་ནུབ་དུར་ཁྲོད་ཕོ་བྲང་འབར་བ་འདིར། །ཉོན་མོངས་དུག་ལྔའི་བུད་ཤིང་ལ། །ཡེ་ཤེས་ལྔ་ཡི་མེ་སྦར་བས། །སྐུ་ལྔ་ཡེ་ཤེས་འགྲུབ་གྱུར་ཅིག །སྐྱེ་བ་རྣམ་བཞིའི་བུད་ཤིང་ལ། །ཚད་མེད་བཞི་ཡི་མེ་སྦར་བས། །ཕྲིན་ལས་རྣམ་བཞི་འགྱུར་གྱུར་ཅིག །ཨོཾ་ཧཱུྃ་ཏྲཱཾ་ཧྲཱིཿཨཱཿ ཛཿཧཱུྃ་བྃ་ཧོཿཛྭཿལ་རྃ། དེ་ནས་རེ་རེ་ནས་སྦར་ལ་ལག་ཏུ་ཐོགས། འདི་དམག་ཐབས་ཏེ་མཇུག་ནས་ཡར་རིམ་པར་རྒྱབ་བོ། །དེ་ཡང་རང་ཁྲོས་མའི་ཕྱག་གཡས་མེ་ཡི་ཧོམ་གཟར་དེས་མེ་ཐབ་རེ་རེའི་ཁར་བླངས་ནས་བརྒྱབས་པས། བེམ་པོ་ལུས་གདོན་དང་བཅས་པ་གཞོབ་ཐུལ་ཐུལ་ཚིག་ནས་དངོས་མེད་སང་སང་དུ་སོང་བར་བསྒོམ་མོ། །ཧཱུྃ། བྱང་ཤར་དྲག་པོའི་ལས་ཀྱི་དུར་ཁྲོད་ནས། །བཏང་སྙོམས་ཚད་མེད་མེ་དཔུང་འབར་བ་འདི། །ལན་ཅིག་ལུས་གདོན་སྟེང་དུ་འཕྲོས། །མེ་ལྕེ་ལྗང་གུས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །དྲིལ་བུ་ལྗང་མོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཅེས་བརྒྱབ། །
ཧཱུྃ༔ ནུབ་བྱང་དབང་སྡུད་ལས་ཀྱི་དུར་ཁྲོད་ཆེན་པོ་ནས། །དགའ་བ་ཚད་མེད་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་དམར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །ལྕགས་སྒྲོག་དམར་མོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུཾ། ལྷོ་ནུབ་རྒྱས་པ་ལས་ཀྱི་དུར་ཁྲོད་ནས། །སྙིང་རྗེ་ཚད་མེད་མེ་དཔུང་འབར་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་སེར་པོས་སྟོང་གསུམ་གང་། ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །ཞགས་པ་སེར་མོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། ཤར་ལྷོ་ཞི་བའི་ལས་ཀྱི་དུར་ཁྲོད་ཆེན་པོ་ནས། །བྱམས་པ་ཚད་མེད་མེ་དཔུང་འབར་བ་འདི། །ལན་ཅིག་
གནོད་བྱེད་སྟེང་དུ་འཕྲོས། །མེ་ལྕེ་དཀར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །ལྕགས་ཀྱུ་དཀར་མོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། བྱང་ཕྱོགས་ལས་ཀྱི་རིགས་ཀྱི་དུར་ཁྲོད་ཆེན་པོ་ནས། །བྱ་གྲུབ་ཡེ་ཤེས་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་ལྗང་གུས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །ལས་ཀྱི་མཁའ་འགྲོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། ནུབ་ཕྱོགས་པདྨ་རིགས་ཀྱི་དུར་ཁྲོད་ཆེན་པོ་ནས། །སོར་རྟོག་ཡེ་ཤེས་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་དམར་པོས་སྟོང་གསུམ་གང་། །ཡེ་ཤེས་མེ་སྒྲ་
འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །པདྨ་མཁའ་འགྲོ་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། ལྷོ་ཕྱོགས་རིན་ཆེན་རིགས་ཀྱི་དུར་ཁྲོད་ཆེན་པོ་ནས། །མཉམ་ཉིད་ཡེ་ཤེས་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་སེར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །རིན་ཆེན་མཁའ་འགྲོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། ཤར་ཕྱོགས་རྡོ་རྗེ་རིགས་ཀྱི་དུར་ཁྲོད་ཆེན་པོ་ནས། །མེ་ལོང་ཡེ་ཤེས་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་སྔོན་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །
རྡོ་རྗེ་མཁའ་འགྲོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ། ཧཱུྃ། དབུས་ཕྱོགས་དེ་བཞིན་རིགས་ཀྱི་དུར་ཁྲོད་ཆེན་པོ་ནས། །ཆོས་དབྱིངས་ཡེ་ཤེས་མེ་དཔུང་འབར་བ་འདི། །ལན་ཅིག་གནོད་བྱེད་སྟེང་དུ་འཕྲོས། །མེ་ལྕེ་དཀར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུག །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །སངས་རྒྱས་མཁའ་འགྲོའི་ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །གནོད་བྱེད་བསྒྲལ་བའི་ཕྲིན་ལས་མཛོད། །ཕཊ་ཕཊ་ཕཊ། །ལུས་གདོན་གང་ཡིན་པ་ཚིག་ནས་ནག་ཐུལ་ཐུལ་སོང་བར་བསྒོམ། དེ་ནས་མི་མང་པོས་ནད་པའི་གཟུགས་བཞི་ལ་བཟུང་ནས་མེའི་ཁ་ལ་ཕར་གཡུག་ཚུར་གཡུག་བྱ། ནད་ཟུག་ཆེ་བས་དེ་འདྲ་མི་ཚུགས་ན་འཕྱར་ཁྱོགས་བྱས་ལ་གཡུག་བཅུག་ལ། ཕཊ་ཤར་ཌཱ་དྲིལ་དྲག་ཏུ་བྱ། དེ་ནས་ཐང་ལ་ནར་གྱིས་བཞག །མེ་ཧོམ་དབུས་ཀྱི་སྡིག་རྒོད་འོད་དུ་ཞུ། །ཧཱུྃ་དུ་གྱུར་ནས་དབྱིངས་སུ་གཤེགས་པར་གྱུར། །དེ་ནས་དེ་ནུབ་རིང་དང་ནད་པ་བསྲུང་བྱ་
སུ་ལ་ཡང་དམིགས་པ་གང་ཡང་མི་བྱེད། ཕཊ་ཀྱང་མི་བརྗོད་ལུས་གཅེས་འཛིན་ཕྲལ་ལ་ཉལ་ནས་བསྡད། དེ་ནས་ཕྱིར་ནངས། ཕཊ། རང་གི་ཐུགས་ལས་ནད་པའི་རྣམ་ཤེས་དེ། །ཐིག་ལེ་འོད་དང་བཅས་པ་ཕར་འཕྲོས་ནས། །སྤྱི་བོར་ནས་ཞུགས་སྙིང་གར་ཐིམ་པར་གྱུར། །ཅེས་བརྗོད་སྲེག་གཞིའི་ཐལ་སོལ་དང་མེ་ཐོམ་རོ་མ་རྣམས་བསྡུས་ལ་དུར་ཁྲོད་གཅིག་ཏུ་བསྐྱལ། མ་འཛོམ་ན་རི་སྣའམ་མ་ཎི་རྩར་བླུགས་བཅོལ། མེ་ཐོམ་ལ་བསྟིམས་པའི་ཡེ་ཤེས་པ་ཡང་ཡིད་ཀྱིས་དབྱིངས་སུ་གཤེགསོ་པར་བསམས་ལ། ཨོཾ་ཧཱུྃ་ཏྲཱཾ་ཧྲཱིཿཨཱཿཛཿཧཱུྃ་བྃ་ཧོཿབཛྲ་མུཿ ཞེས་བརྗོད་དོ། །འདི་ནི་གཉན་རྒོད་ཚད་པའི་ནད་ལ་མི་འགྲོས། གཞན་རླུང་ནད་གྲངས་བའི་ནད་རིགས། རྒྱལ་འགོང་དམ་སྲི་མོ་འདྲེ་སྲོག་རླུང་སྨྱོ་འབོག་སོགས་དང་། ལུས་གདོན་དང་གདོན་བྱིང་ཆེ་ཡང་ལྷོང་ཚད་དང་ཚར་ཚད་མྱུར་དུ་འབྱུང་གསུངས་སོ། །ཨེ་མ། མི་གཅིག་ཐུགས་བཅུད་གཅིག་བརྒྱུད་བཀའ་རྒྱ་མ། །མེ་ཡི་གཟེར་བུ་ཞེས་བྱའི་མཐའ་གཏད་འདི། །དཔེ་ཙམ་མཐོང་ཡང་ལག་ལེན་ཤེས་པ་དཀའ། །མིང་ཐོས་དོན་མི་ཤེས་པའི་གཅོད་པ་འགའ། །མེ་བྲབ་བྱེད་པ་ཙམ་ཞིག་མཐའ་གཏད་རྩི། །དེ་དག་རྣམས་ལ་ཕན་པའི་བསམ་པ་ཡིས། །དམིགས་པ་ཕྱག་ལེན་འདོན་ཆ་བལྟས་ཆོག་བཀོད། །སྦུ་འོས་གསལ་དང་ལྷ་འདྲེ་ཨར་གཏད་པའི། །ཉེས་པའི་ཚ་རྣམས་མཁའ་འགྲོའི་ཚོགས་ལ་བཤགས། །དགེ་བས་འགྲོ་རྣམས་བདུད་བཞིའི་དཔུང་བཅོམ་ནས། །ཆོས་སྐུ་
ཡུམ་ཆེན་གོ་འཕང་ཐོབ་ཕྱིར་བསྔོ། །དེ་སྐད་རཱ་ག་ཨ་སྱ་ཞེས་བྱས་སྦྱར། །འདི་ནི་གཅོད་ཚོགས་སྐབས་སུ་སྦྱར་ནའང་། །རྗེས་ཆོག་སོགས་ལ་ཕཊ་སྒྲ་མི་བརྗོད་ཅིང་། །ཡང་ན་གཅོད་ཚོགས་ཚར་རྗེས་བྱས་ན་ལེགས། གློ་བུར་ལུས་སྦྱིན་ཙམ་ལ་སྦྱར་ཡང་རུང་། །དེ་ཡང་ལག་ལེན་གནད་ཀྱི་ཡིག་ཆུང་སྟེ། །འདི་ཉིད་ཚར་རྗེས་དེ་ནུབ་ཕཊ་སྒྲ་དང་། །དམིགས་པ་མི་བྱེད་དམིགས་མེད་ངང་ལ་ཉལ། །མངྒ་ལཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།