རྗེ་དཀོན་མཆོག་འབངས་ཀྱིས་མཛད་པའི་གཅོད་ཁྲིད་ལ་ཉེ་བར་མཁོ་བའི་ཐོག་དམིགས་ཟབ་མོ།
༼ཟ༽ རྗེ་དཀོན་མཆོག་འབངས་ཀྱིས་མཛད་པའི་གཅོད་ཁྲིད་ལ་ཉེ་བར་མཁོ་བའི་ཐོག་དམིགས་ཟབ་མོ་བཞུགས་པའི་དབུ་ལགས་སོ།།
ན་མོ་བཛྲ་ཌཱ་ཀི་ཡེ། མ་གཅིག་སྤྲུལ་པའི་སྐུ་ལ་ཕྱག་འཚལ་ནས། །གཅོད་ཁྲིད་ལྷན་ཐབས་ཐོག་དམིགས་སྐོར་རྣམས་བྲི། །ཡེ་ཤེས་མཁའ་འགྲོས་བཀའ་གནང་བྱིན་གྱིས་རློབས། །དེ་ཡང་གར་དབང་དཀོན་མཆོག་འབངས་ཀྱིས་བསྩལ་བའི་གཅོད་ཁྲིད་ལས། ལྷོ་ཕྱོགས་སུ་སྤྲིན་ནག་པོ་ཞེས་སོགས་མདོར་བསྡུས་གསུངས་པའི་དོན་རྒྱས་པར་སྤྲོ་ན། མགར་ཚང་བཅའ་བ་དང་། མགར་བྱེད་པ་རྨིས་ན་ཕྱི་དྲོ་ཐོག་འོང་། མགར་ཐོན་པ་རྨིས་ན་སྔ་དྲོ་ཐོག་འོང་་། མགར་ཚང་དང་སོལ་ཁང་མཐོང་བ་དང་ལྕགས་བཟོ་བ་དང་མཚོན་ཆ་བརྡུང་ན་ཐོག་ཡོད་རྟགས་སོ། །དེ་རྨི་ལམ་
བརྟག་པ་ཡིན་ནོ། །ཉམས་སྣང་ལ་ལྕགས་རྡུང་བའི་སྒྲ་ཐོས་སྙམ་བྱེད་པ་དང་། ཚྭ་ཚྭ་འཐུལ་བ་དང་། མགར་བ་མགར་ཚང་མཐོང་བ་ཡང་ཐོག་འོང་རྟགས་ཡིན་ནོ། །དངོས་སུ་ཐོག་སྒྲ་བརྟག་པ་ནི། ནངས་སྔ་ཟ་རི་ཟི་རེ་མི་བདེ་ཙམ་གྲག་པ་འདྲ་ན་དངོས་སུ་རིག་མི་རིག་ཨེ་ཡིན་མི་ཡིན་བསམ་པ་དེ་འདྲ་ནམ་ལངས་བྱུང་ན་སྔ་དྲོ་འོང་། སྔ་དྲོ་བྱུང་ན་ཉིན་ཕྱེད་དམ། དགོང་ཁ་འོང་། ཉིན་ཕྱེད་དང་དགོང་ཁ་རྟགས་དེ་འདྲ་བྱུང་ན། ནམ་ཕྱེད་དམ་ཐོ་རངས་འོང་། ཡང་འབྲུག་སྐད་སྙིང་གཟེར་བའི་ཚ་སྒྲ་ཅན་དང་། ལྕགས་སྲེག་གི་ཚྭ་ཚྭ་འདྲ་བ་དམར་ཤལ་ཤལ་ཚུབ་ཚུབ་
བྱེད་པ་དང་། སྦྲང་བུའི་སྐད་འདྲ་གཟིར་སྒྲ་དང་། ཅིར་སྒྲ་རྣ་ལམ་དུ་གྲག་ན་ད་ལྟ་ཉིད་དུ་འོང་ངོ་། ༧ །ཡང་ནམ་མཁའ་ལ་སྤྲིན་དང་འབྲུག་མེད་ཅིང་ཉི་མ་དྲོ་བ་ལ། ས་འོག་ནས་སྒྲ་སྐད་མི་སྡུག་པ་དང་། དུད་པ་འཐུལ་བ་དང་ས་འགུལ་བ་དང་། རྐང་མཐིལ་ལྗིད་ཆིལ་ཆིལ་བྱེད་ན། འོག་འཁྱུག་འོང་རྟགས་སོ། །དེ་ལྟར་ཐོག་རྟགས་བྱུང་ན་ཐོག་ཚང་གཏོར་བ་ནི། རང་ཉིད་ཤཱཀྱ་ཐུབ་པར་གསལ་བའི་ཐུགས་ཀ་ནས་གསེར་གྱི་རྡོ་རྗེ་ཞིག་འཕྲོས་ནས་ནམ་མཁའ་ལ་ཤར་གྱིས་སོང་། ཐོག་ཐོག་བདག་མགར་བ་མགར་ཚང་དང་བཅས་པ་ལ་ཕོག །དེ་ཐམས་ཅད་མཐའི་རྒྱ་མཚོའི་ཕ་རིར་འཕང་བར་བསྒོམ་ལ་ཕཊཤར་བྱ། ནམ་མཁའ་ལ་ཕུ་དང་སྡིགས་མཛུབ་བྱའོ། །འདི་ལྟར་བྱས་པས་དྲག་ལས་དུས་ཐོག་བྱུངཡང་། ཉེ་སྐོར་དུ་རྒྱབ་མི་ནུས་པར་ཐག་རིང་དུ་རྒྱོབ་པ་མྱོང་བས་འགྲུབ་བོ། ༧ །ཡང་རང་ཉིད་ཀྱི་སྤྱི་བོར་ཟངས་ཀྱི་འཁོར་ལོ་རྩིབས་སྟོང་རྩིབས་རེ་རེ་ལ་ཁྲོས་མ་རེ་རེ་ཡོད་པ་དེ་ནམ་མཁའ་ལ་འཁོར་ནས། དེ་ཇེ་ཆེ་ཇེ་ཆེར་སོང་ནས་འཁོར་བའི་རྩིབས་དེས་ཐོག་ཐོག་བདག་མགར་བ་མགར་ཚང་དང་བཅས་པ་ལ་བརྒྱབ་ཅིང་དེད་ནས། མཐའི་རྒྱ་མཚོ་ཕར་རི་ལ་བརྡས་
པར་བསྒོམ་ལ། ཕཊཤར་དྲག་ཏུ་བྱའོ། ༧ །ཡང་རང་ཉིད་རྗེ་བཙུན་མར་བསྐྱེད་ལ། རང་ལུས་ཤ་ཁྲག་རུས་གསུམ་སྲིད་པའི་རྩེ་མོའི་བར་དུ་གང་བ་དེ། རི་བོ་འགྱེལ་བ་བཞིན་དུ་བྱུང་ནས་ཐོག་ཐོག་བདག་སེར་བ་སེར་བྱེད་ཐམས་ཅད་ཤ་ཁྲག་གིས་གཡོག་ཅིང་དེད་ནས། མཐའི་ལྕགས་རི་ལ་གླན་པར་བསམས་ལ། ཕཊཤར་བྱའོ། །དེ་རྣམས་ནི་ཐོག་ཚང་གཏོར་བའོ། །དེ་ཡང་གནམ་ཐེལ་བར་ཐེལ་ས་ཐེལ་གསུམ་བསྡོངས་ནས་སྟེང་ཐོག་འོག་ཐོག་བར་ཐོག་གསུམ་འབྱུང་བ་ཡིན་པས། ཐེའུ་རང་ཁ་བྲལ་བ་ནི། རང་ཉིད་ཁྲོས་མར་གསལ་བའི་སྟེང་གི་ནམ་མཁར་གནམ་ལྕགས་ཀྱི་རལ་གྲི་བསམ་གཅོད་འབར་བའི་འཁོར་ལོ་རྩིབས་བྱེ་བ་འབུམ་དང་ལྡན་པ་ཞིག་གཡས་སུ་དྲག་ཏུ་འཁོར་བས། སྟེང་ཐོག་གི་བདག་པོ་ཐོག་ཐོག་བདག་མགར་བ་མགར་ཚང་དང་བཅས་པ་སིལ་བུར་གཏུབས་ནས་རྡུལ་ཕྲན་བཞིན་དུ་བརླགས་པར་བསྒོམ། ༧ རང་ཉིད་ཁྲོས་མའི་འོག་གི་ས་གཞི་ལ་ལྕགས་སྲེག་གི་རལ་གྲི་བསམ་གཅོད་འབར་བའི་འཁོར་ལོ་རྩིབས་བྱེ་བ་འབུམ་དང་ལྡན་པ་གཅིག་གཡོན་དུ་དྲག་ཏུ་འཁོར་བས། འོག་ཐོག་གི་བདག་པོ་ཐོག་ཐོག་བདག་མགར་བ་མགར་ཚང་དང་བཅས་པ་
སིལ་བུར་གཏུབས་ནས་རྡུལ་དུ་བརླགས་པར་བསྒོམ། ༧ རང་ཉིད་ཁྲོས་མའི་ཐུགས་ཀ་ནས་རལ་གྲི་བསམ་གཅོད་འབར་བའི་འཁོར་ལོ་ཆེ་ཆུང་སྣ་ཚོགས་གྲངས་མེད་པ་ཕྱོགས་བཞི་མཚམས་བརྒྱད་ཀུན་ཏུ་འཕྲོས་པས། བར་ཐོག་གི་ཐོག་ཐོག་བདག་མགར་བ་མགར་ཚང་དང་བཅས་པ་ཐམས་ཅད་སིལ་བུར་གཏུབས་ནས་རྡུལ་དུ་བརླགས་པར་བསམས་ལ་ཕཊཿཤར་བྱའོ། །དེ་ནི་ཐེའུ་རང་གསུམ་གྱི་ཁ་ཕྲལ་བའོ། ༧ །ཡང་རང་གི་སྟེང་གི་ནམ་མཁར་བྱ་ཁྱུང་གཤོག་རྡང་འཁྲིགས་པའི་གུར་བསྒོམ་པའམ་དབུ་གཙུག་ཏུ་བྱ་ཁྱུང་ཅིག་བསྒོམ་པའི་རྭ་ཅོ་དང་ནོར་བུ་ལས་མེའི་ཞགས་པ་འཕྲོས་ནས་ཐོག་ཐོག་བདག་མགར་བ་མགར་ཚང་དང་བཅས་པ་བྱ་སྒྲོ་མེ་ལ་བསྲེགས་པ་ལྟར་གཞོབ་ཐུལ་གྱིས་སོང་བར་བསྒོམས་ལ་ཕཊབརྗོད་པ་དེ་ནི་ཐོག་ཞུད་ཕྱུང་བའོ། ༧ །ཡང་རང་གི་ཐུགས་ཀ་ནས་གསེར་གྱི་རྡོ་རྗེ་རྩེ་དགུ་པ་མེ་འབར་བ་གཅིག་འཕྲོས་ཏེ་ཐོག་ཐོག་བདག་ཐམས་ཅད་གཞོབ་བུན་གྱིས་བསྲེགས་པར་བསྒོམ་མོ། ༧ ཡང་རང་གི་སྟེང་གི་ནམ་མཁར་བྱ་ཁྱུང་ཆེན་པོ་བསྐྱེད་ལ། ཁྱུང་དེས་ཤར་དུ་ཁ་རྒྱུ་ནས། ཤར་ཕྱོགས་དྲི་ཟའི་གདོན་གྱིས་གཙོར་བྱས་གནོད་བྱེད་དང་། ཐོག་སེར་བཏང་མི་ཐམས་ཅད་
ཞལ་གྱི་ཐད་དུ་སྦལ་སྤྲུལ་གྱི་གཟུགས་སུ་གནས་པ་ཐམས་ཅད་ཟོས་ནས། བྱ་ཐལ་དེ་ནུབ་ཕྱོགས་ལྕགས་རི་ནག་པོའི་རྒྱབ་ཏུ་སོང་བར་བསྒོམ། དེ་བཞིན་དུ་ལྷོ་གཤིན་རྗེ། ནུབ་ཀླུ། བྱང་གནོད་སྦྱིན། ཤར་ལྷོ་མེ་ལྷ་དྲང་སྲོང་། ལྷོ་ནུབ་སྲིན་པོ། ནུབ་བྱང་རླུང་ལྷ། བྱང་ཤར་བགེགས། སྟེང་གཟའ་སྐར། འོག་ས་བདག་གི་གཙོར་བྱས་བ། པའི་གནོད་བྱེད་ཐམས་ཅད་ཁྱུང་གིས་རིམ་པར་ཟོས་ནས། བྱ་སྐྱག་མཐའི་རྒྱ་མཚོའི་ལྕགས་རིའི་རྒྱབ་ཏུ་དོར་བར་བསྒོམ། ༧ ཡང་དམིགས་པ་དེ་རྣམས་བསྡུས་པ་བྱེད་ན། རང་ཉིད་ཀྱི་ཐུགས་ཀ་ནས་རིག་པའི་ངོ་བོ་དེ་ཟངས་ཀྱི་བྱ་ཁྱུང་གསེར་གྱི་གཤོག་པ་ཅན། རྭ་རྩེ་ལ་མེ་འབར་ཞིང་རྭ་བར་ནོར་བུ་འབར་བ་ཅན། རི་རབ་ལས་ཆེ་བ་ཅིག་འཕྲོས། སྟེང་འོག་གི་གདོན་གཉན་ས་རི་བྲག་ཐོག་ཐོག་བདག་ཐམས་ཅད་ཧབ་སྒྲ་དང་བཅས་པས་འབྱངས་ནས་བྱ་ཐལ་བུན་ནེ་བཏང་བར་བསྒོམ། དེ་ནི་ཁྱུང་གི་ཇུར་འབྱུང་ཞེས་ཀྱང་བྱ། བྱ་ཁྱུང་འབྲུག་དང་འབྲུག་མགོར་སྦྱར་བ་ཡང་ཟེར། ཁྱུང་གི་གནད་འདྲེན་ཡིན་པས། འདི་ཐོག་སེར་གྱི་དམིགས་པ་ཡིན་ན་ཡང་། གཉན་ས་དང་གདོན་མ་ཆུན་ན་ཡང་བྱེད་པ་ཡིན་ནོ། ༧ །ཡང་
རང་ཉིད་ཁྲོས་མའི་ཐུགས་ཀ་ནས་འོད་ཟེར་དམར་པོའམ་ཡི་གེ་ཛཡིག་གི་རྣམ་པ་དཔག་ཏུ་མེད་པ་འཕྲོས་ལྷ་འདྲེ་གནོད་བྱེད་ཐོག་ཐོག་བདག་ཐམས་ཅད་རྡོ་ཁབ་ལེན་གྱིས་ལྕགས་བསྡུས་པ་ལྟར་རང་གི་སྙིང་ནང་དུ་བསྡུས་ལ་དབྱེར་མེད་དུ་བསྲེས་ཏེ། ཕྱག་རྒྱ་ཆེན་པོའི་ངང་ལ་བཞག་གོ །དེ་ནི་སྟེང་ཐོག་འོག་ཏུ་བསྲེ་བ་ཞེས་བྱ་སྟེ་རང་གི་རང་ལ་ཐོག་མི་རྙེབ་བོ། ༧ །ཡང་ན་རང་གི་འོད་ཟེར་གྱིས་ཐོག་བདག་ལྷ་འདྲེ་ཐམས་ཅད་མར་བཀུག་ནས་རང་གི་མལ་ས་ཡི་འོག་ཏུ་ཧྲུག་གེ་བླུགས་ལ་རང་གི་གཟི་བརྗིད་ཀྱིས་ཟིལ་གྱིས་མནན་ནོ། ༧ །ཡང་ན་རང་གི་འོད་ཟེར་གྱིས་ཐོག་ཐོག་བདག་དང་ལྷ་འདྲེ་ཐམས་ཅད་བསྡུས་ནས་རང་ལ་བསྟིམས་པས་སྟོང་པ་ཉིད་དུ་གྱུར། དེའི་ངང་ལས་རང་ཉིད་གནམ་ལྕགས་ཀྱི་རྡོ་རྗེ་ཡར་གྱི་རྭ་ལྔ་ལ་རྒྱལ་བ་རིགས་ལྔ། མར་སྣེ་དྲིལ་བུ་ལྟ་བུ་མཐའི་རྒྱ་མཚོ་ལ་ཟུག་པའི་ནང་དུ། ལྷ་འདྲེ་ཐོག་ཐོག་བདག་ཐམས་ཅད་ཚུད་ནས་འབྲོས་ས་མེད་ཅིང་། དེའི་ནང་དུ་ཤ་ཁྲག་གི་རྒྱ་མཚོས་བཀང་ནས་མགུལ་དབང་མེད་པར་བསྒོམས་ལ་ཕཊཿབརྗོད། དེ་རྣམས་སྟེང་ཐོག་འོག་ཏུ་བསྲེ་བའི་དམིགས་པའི་སྐོར་ཡིན་ནོ། ༧ །ཡང་རང་ཉིད་ཁྲོས་མ་འཁོར་མཁའ་འགྲོ་འབུམ་དང་བཅས་པའི་སྐུ་
སྨད་ཕུར་བུ་རྣོ་ངར་དང་ལྡན་པས་བྲོ་འཁྲབས་པས། འོག་ཐོག་གི་བདག་པོ་དང་འོག་གི་གནོད་བྱེད་ཐམས་ཅད་རབ་ཏུ་གཙག་ཅིང་ཕུག་སྨྲས་ནས་ཐམས་ཅད་ནུས་པ་མེད་པར་སྙི་ཉོལ་གྱིས་སོང་བར་བསྒོམ་པ་ནི་གནད་ལ་ཕབ་པ་དང་། རང་ཉིད་ཁྲོས་མའི་སྐུ་སྨད་ཕུར་པའི་ཁོང་སེང་ནས། གནོད་བྱེད་དང་འོག་ཐོག་ཐོག་བདག་དང་བཅས་པའི་སྲོག་ཡིག་བཀྲག་གཟི་མདངས་མཐུ་ནུས་པ་ཐམས་ཅད་སྦུ་གུས་ཆང་འཇིབས་པ་ལྟར་སིབ་ཀྱིས་ཡར་འཇིབས་ནས་རང་གི་ཐུགས་ཀར་ཐིམ་པས་བཀྲག་མདངས་དང་གཟི་བརྗིད་རྒྱས། ཁོང་རྣམས་མཐུ་སྟོབས་དང་བཀྲག་མདངས་ཉམས་ནས་ནག་ཧམ་མེ་སོང་བར་བསྒོམ། དམིགས་པ་འདི་གཉིས་ནི་འོག་ཐོག་སྟེང་དུ་བསྲེ་བ་ཞེས་བྱ་བ་ཐོག་དམིགས་ཁྱད་པར་འོག་ཐོག་གི་དམིགས་པ་ཡིན་ན་ཡང་། གཉན་ས་དང་ལྷ་འདྲེ་མ་ཆུན་ན་བྱའོ། །དེ་ཡང་ཐོག་སེར་འབྲུག་གློག་དང་ལྷ་འདྲེ་གཞི་བདག་གཟའི་དང་ཐེའུ་རང་ཟེར་བ་འདི་ཐམས་ཅད་རང་གི་སེམས་ཀྱི་ཆོ་འཕྲུལ་ཡིན། །རང་སེམས་ལས་གཞན་དུ་གྲུབ་པའི་དངོས་པོ་བདེན་གྲུབ་རྡུལ་ཙམ་ཡང་མེད་ལ། རང་གི་སེམས་ཡང་གདོད་མ་ནས་སྐྱེ་འགག་ཐམས་ཅད་དང་བྲལ་བ་ཆོས་ཀྱི་སྐུར་ཤེས་པར་བྱས་ལ།
རབ་དུས་ཐམས་ཅད་དུ་སྟོང་ཉིད་ཀྱི་གདེང་དང་མ་བྲལ་བའི་ངང་ནས་དམིགས་རིམ་རྣམས་ཀྱང་བྱེད། དེ་ཙམ་མི་ཐུབ་ན་ཐུན་གྱི་བར་བར་ཐམས་ཅད་དུ་སྟོང་ཉིད་ཀྱི་ངང་ལ་བཞག །བར་དུ་མཉམ་པར་བཞག་པ་ཞེས་བྱ་སྟེ་གལ་ཆེའོ། ༧ །ཡང་བེམ་རིག་ཕྲལ་ལུས་ལ་གཅེས་འཛིན་སྤངས་ལ། རང་གི་རིག་པ་གསེར་གྱི་རྡོ་རྗེ་རྩེ་དགུ་པ་ཞིག་ཏུ་གྱུར། ནམ་མཁའ་ལ་ཤད་ཀྱིས་སོང་སེར་བ་སེར་བྱེད་ཐོག་ཐོག་བདག་མགར་བ་མགར་ཚང་དང་བཅས་པའི་སྟེང་དུ་བརྒྱབས་པས། བྱ་སྤུ་རླུང་གིས་གཏོར་བ་བཞིན་དུ་མཐའི་ལྕགས་རི་ཡི་རྒྱབ་ཟངས་རི་ལ་གླན། རང་གི་བེམ་པོ་ཆུའི་ལྦུ་བའི་ཕུང་པོ་གཅིག་ཏུ་གྱུར་པ་ལས་རྡོ་རྗེ་མར་བྲུལ་རང་ལུས་གཉན་ས་དང་བཅས་པ་ལ་ཕོག །རྡུལ་ཕྲན་བཞིན་དུ་གཏོར་ནས་མལ་ཡང་མེད་པར་བསྒོམ། ། ༈ ཡང་རང་ཉིད་ཕག་མོའི་ཐུགས་ཀ་ནས་གནམ་ལྕགས་ཀྱི་རྡོ་རྗེ་རྩེ་དགུ་པ་གཅིག་ནམ་མཁའ་ལ་ཤད་ཀྱིས་སོང་། ཐོག་ཐོག་བདག་མགར་བ་མགར་ཚང་དང་བཅས་པ་ཐམས་ཅད་རྡོ་རྗེའི་འོད་ཟེར་ལ་ཐིམ། རྡོ་རྗེ་མར་བྲུལ་ནས་རང་འདུག་ས་དང་གཉན་ས་ཐམས་ཅད་རིལ་ཕུང་ལ་སྤྱོད་བརྒྱབ་པ་ལྟར་ཉིལ་གྱིས་ཞིག་པར་བསྒོམ། ༧ ཡང་གསེར་གྱི་རྡོ་རྗེ་འཕྲོས་ནས་དེ་
ལྟར་བསྒོམ། ཡང་རིག་པ་ལྕགས་སྲེག་གི་ཐོ་ལུམ་འབར་བ་འཕྲོས། ཐོག་ཐོག་བདག་དང་བཅས་པ་མཉམ་དུ་བཀུག་ནས། མར་བྲུལ་རང་ལུས་ས་ཆ་དང་བཅས་པ་ལ་ཕོག་རྡུལ་དུ་བརླགས་ནས་རྗེས་མེད་པར་བསམ། ༧ ཡང་རང་ཉིད་རྗེ་བཙུན་མ་སྐུ་མདོག་དམར་མོའི་སྐུ་ལས་གནམ་ལྕགས་ཀྱི་ཚྭ་ཚྭ་ཐོག་ལྟ་བུ་འཕྲོས། ཐོག་ཐོག་བདག་དང་བཅས་པ་བཀུག་ནས་མཉམ་དུ་མར་བྲུལ། རང་གི་བེམ་པོ་གནས་དང་བཅས་པ་ལ་ཕོག་རྡུལ་དུ་བརླགས་ནས་མེད་པར་བསྒོམ། དེ་རྣམས་ནི་ཐོག་འབོམ་བསལ་བའི་དམིགས་པ་མི་གཅིག་པ་རྣམས་ཡིན་ཏེ། རང་གི་དམིགས་པ་གང་བྱས་པ་དེ་ལྷ་འདྲེ་དེ་དངོས་སུ་གྱུར་སོང་བར་མཐོང་ནས། ཐབ་བས་གཞོབ་སྔ་བའི་དཔེ་རང་ལུས་རང་གི་རིག་པས་ཐོག་བརྒྱབས་ནས་མེད་པར་བྱས་པས་ལྷ་འདྲེ་སྐྱིང་ནས་བྱེད་རྒྱུ་མི་རྙེད་པར་འགྱུར་བའི་གནད་ཡིན་ནོ། ༧ །ཡང་བེམ་རིག་ཕྲལ་ནས་དབྱིངས་རིག་བསྲེས་ཏེ་གཉན་ས་ཡུལ་ཕྱོགས་དེ་ཐམས་ཅད་ཤ་ཁྲག་གི་སྒྲོ་རྒྱ་མཚོ་རྦ་རླབས་རབ་ཏུ་འཁྲུག་པ་གཅིག་བསྒོམ། དེའི་ནང་དུ་གནོད་བྱེད་ཐོག་ཐོག་བདག་དང་བཅས་པ་བཀུག་བསྟིམ་དྲག་ཏུ་བྱས་ཏེ། ཤ་ཁྲག་གི་ནང་དུ་བྱིངས་ནས་མི་ཐར་བར་
དམིགས་པ་ནི་མནོལ་ཕབ་པ་ཡིན་ནོ། ༧ །ཡང་རང་གི་སྤྱི་བོར་གསེར་གྱི་འཁོར་ལོའི་རྩིབས་སྟོང་ལ་ཐུབ་པ་སྟོང་བསྒོམ། དེ་ཐམས་ཅད་ཕྱག་གཡོན་མི་རྐང་གི་གླིང་བུ་ཚག་ཏིར་ཏིར་འབུད་ཅིང་གཡས་མི་ལྤགས་ཀྱི་གཡང་གཞི་དམར་ཙ་རེ་བ་བརྡབས་པས། གནོད་བྱེད་ཐོག་བདག་ཐམས་ཅད་དཔག་ཚད་རྒྱང་གྲགས་སུ་ཡང་མི་ཆགས་པར་ཕྱིའི་ལྕགས་རིའི་ཕར་རྒྱབ་ཏུ་བདས་པར་དམིགས་པ་ནི། ཕྱག་མཚན་གྱིས་བསྒྱུར་པས་བསྐྲད་ཆོག་བྱེར་གཏོར་གྱི་དམིགས་པའོ། ༧ །ཡང་ནད་པའམ་བསྲུང་བྱ་ལ་སྙེམས་མེད་དམ་ཐོག་དམིགས་ལུང་མེད་པར་ཐོག་ཕོག་ན། རང་གི་སྐྲ་དང་སེན་མོ་བསྲེགས་ནས་བདུག་པས་མནོལ་ཕབ་པས། རང་ཉིད་རྗེ་བཙུན་མ་ནག་མོ་དུར་ཁྲོད་ཀྱི་ཆས་བརྒྱད་གསོལ་བ། གྲི་གུག་ཐོད་ཁྲག་བསྣམས་པ་ཆེ་ལ་འཇིགས་པར་བསྐྱེད་ལ་ལུས་ལ་མ་ཐུག་པར་སྟེང་དུ་ཕར་མཆོངས་ཚུར་མཆོངས་བྱ་ཞིང་། ཕཊཿསྒྲ་དང་རོལ་མོའི་སྒྲ་ཆེ་བར་བྱ། རཱ་ཧུ་ལ་ཐོག་ཐོག་བདག་བཀུག་ལ་བསྟིམས། དེ་ནས་ནད་པའི་ལུས་ལ་ཚོགས་འཁོར་ཡར་མཆོད་མར་སྦྱིན་བྱ། ནད་པ་ལ་རྨ་བྱུང་ནི་གདའ་ན་དྲི་ཆུ་བཏབ་ལ་རྨ་མེད་པར་བསྒོམ། ཡང་ཐོག་ཟེར་ལྟ་བུའམ་གཡས་གཡོན་དུ་ཐོག་བརྒྱབས་
པས་ནད་པའམ་བསྲུང་བྱ་བརྒྱལ་ནས་དབུགས་མེད་པ་དྲོད་མ་ཡལ་ན། རང་ཉིད་མ་གཅིག་གམ་རྗེ་བཙུན་མར་གསལ་བ་ལས་འོད་ཟེར་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས་ནད་པའི་རྣམ་པར་ཤེས་པ་དེ་བཀུག་ལ་ཡང་ཡང་བསྟིམ། རོལ་མོ་དཀྲོལ་ཅིང་ཕཊསྒྲ་བཏབ་གསོལ་འདེབས་དྲག་པོ་བྱའོ། །དེ་ནས་ཐོག་བསྲུང་དམིགས་པ་རྒྱས་པ་ནི། དང་པོ་ལུས་ལ་ཆགས་ཞེན་མེད་པར་སེམས་ཅན་ཐམས་ཅད་ཀྱི་དོན་དུ་ལུས་བློས་ཐེང་བར་སྦྱིན་པར་བཏང་སྙམ་དུ་སེམས་བསྐྱེད། དེ་ནས་རང་འདུག་ས་དེ་གསེར་གྱི་ས་གཞི་ཆགས་འཇིག་དང་བྲལ་བ་ཆོས་ཀྱི་སྐུའི་རང་བཞིན། དེའི་དབུས་སུ་རང་དང་བསྲུང་བྱ་ཐམས་ཅད་ཀྱི་ཕུང་པོ་ཁམས་དང་སྐྱེ་མཆེད་འོད་དུ་ཞུ་ནས་གསེར་གྱི་རྡོ་རྗེ་རྩེ་ལྔ་པ་ཡོར་གྱི་རྭ་དབུས་མ་དེ་སྲིད་པའི་རྩེ་ལ་བུད་པ། རྭ་ལྔའི་ནང་དུ་ཡུམ་ཆེན་མོ་རྒྱལ་བ་རིགས་ལྔ་སངས་རྒྱས་བྱང་སེམས་ཀྱིས་བསྐོར་བ། འོག་གི་རྭ་དབུས་མ་དེ་མར་གསེར་གྱི་ས་གཞི་ལ་ཐེལ་ཟུག་པའི་རྭའི་ནང་དུ། ཁྲོས་མ་དང་མཁའ་འགྲོ་སྡེ་བཞི་འཁོར་དང་བཅས་པས་གནོད་བྱེད་དམ་ལ་འདོགས་པར་བསྒོམ། རྡོ་རྗེའི་ལྟེ་བ་གསེར་གྱི་གུར་ཁང་ཡངས་ཤིང་རྒྱ་ཆེ་བའི་ནང་དུ་རང་གི་ཡི་དམ་ལྷའི་གཞལ་ཡས་
ཁང་གི་དབུས་སམ། ཡི་དམ་གྱི་སྤྱི་བོར་སྒོམ་ཡང་རུང་སྟེ་རང་གི་རིག་པ་གསེར་གྱི་བྱ་ཁྱུང་སེར་པོ་སྤྱན་གསུམ་པ་ཀླུ་དང་ས་བདག་ཟས་སུ་ཟ་བ། རང་གི་བུ་སློབ་བསྲུང་བྱ་ཐམས་ཅད་ཀྱང་བྱ་ཁྱུང་རང་དང་འདྲ་བར་གྱུར་ནས། རང་ལ་བསྐོར་ནས་ཡོད་པར་བསྒོམ། དེ་ནི་སྲུང་འཁོར་ཡིན་ལ། དེ་ནས་ཐོག་བཟློག་པའི་དྲག་ལས་དམིགས་པ་ནི། རང་ཉིད་བྱ་ཁྱུང་གི་ཐུགས་ཀར་ཡུམ་ཆེན་མོའི་ས་བོན་ཨ་སེར་པོ། དེ་ལས་འོད་ཟེར་འཕྲོས་པས་གསེར་གྱི་རྡོ་རྗེ་སེར་པོ་རྣོ་ངར་དང་ལྡན་པ་གྲངས་མེད་པ་ནམ་མཁའ་གང་བར་སྤྲོས་ཏེ། གནོད་བྱེད་ཐོག་ཐོག་བདག་མགར་བ་མགར་ཚང་བྲན་གཡོག་འབྲུག་འབྲུག་ཞོན་གཟའ་དང་བཅས་པ་ལ་བརྒྱབ་ཅིང་དེད། མར་གསེར་གྱི་ས་གཞི་ལ་བཅར་ནས་ལུས་གཏོར། རྣམ་ཤེས་རང་གི་ཐུགས་ཀའི་ཡུམ་ཆེན་མོའི་ས་བོན་ལ་བསྲེས་ཏེ། དམིགས་མེད་དུ་བཞག་ལ་དབྱིངས་རིག་བསྲེ། མཐར་བསྔོ་བ་སྨོན་ལམ་རྣམ་པར་དག་པས་རྒྱས་བཏབ་བོ། ༧ །ཡང་ན་ནམ་མཁར་གསེར་གྱི་གདུགས་ཆེན་པོ་ཡུལ་རིས་བསྲུང་བྱ་ཐམས་ཅད་ཁེབས་པ། ཡེ་ཤེས་ཀྱི་མེ་ཆེན་འབར་བས་ཐོག་ཐོག་བདག་སྡེ་བརྒྱད་བསྲེགས་པ་དེའི་འོག་ཏུ་གསེར་གྱི་འཁོར་ལོ་རྩིབས་སྟོང་ཁ་སྦྱོར་
བའི་ནང་དུ་རང་དང་བསྲུང་བྱ་ཐམས་ཅད་ཚུད་ཅིང་རྩིབས་ལ་མེ་འབར་བས་གནོད་བྱེད་ཐོག་ཐོག་བདག་བསྲེགས་པས། དེའི་དབུས་སུ་རང་ཉིད་མཁའ་འགྲོ་མ་དམར་མོ་བསྒོམས་པའི་ཞབས་འོག་ཏུ་ཐོག་བདག་བཀུག་ལ་འགུལ་དབང་མེད་པར་ཟིལ་ཆེན་པོས་མནན་ནོ། །དེ་ནི་སྟེང་འོག་བར་གསུམ་གྱི་ཐོག་བསྲུང་ངོ་། ༧ །ཡང་ཁྲོས་མའམ་ཡི་དམ་གང་རུང་བསྒོམ་པའི་སྤྱི་བོར་གསེར་གྱི་འཁོར་ལོའི་ལྟེ་བར་ཤཱཀྱ་ཐུབ་པ་སྐུ་ཤིན་ཏུ་ཆེ་བ། མཚན་དང་དཔེ་བྱད་གཟི་བརྗིད་འབར་བ། རྩིབས་སྟོང་ལ་བསྐལ་བཟང་གི་སངས་རྒྱས་སྟོང་ངམ་ཐུབ་པ་སྟོང་བསྒོམ། རང་དང་བསྲུང་བྱ་ཐམས་ཅད་ཀྱི་འོག་ཏུ་རྡོ་རྗེའི་ས་གཞི་གཞོམ་གཞིག་དང་བྲལ་བའི་སྟེང་དུ། གཡུའི་གྲོད་པ་ཆེན་པོ་རང་དང་བསྲུང་བྱའི་འོག་གཞི་ཁྱབ་པ་གཅིག་རྐང་པས་མནན་ཞིང་ཡོད་པ། ཕྱོགས་བཞི་མཚམས་བརྒྱད་ཐམས་ཅད་མཁའ་འགྲོ་མའི་རྭ་གུར་ཏེ། ཤར་དང་ཤར་ལྷོ་ཐམས་ཅད་རྡོ་རྗེ་མཁའ་འགྲོ་མ་དཀར་མོ། ལྷོ་དང་ལྷོ་ནུབ་ཐམས་ཅད་རིན་ཆེན་མཁའ་འགྲོ་མ་སེར་མོ། ནུབ་དང་ནུབ་བྱང་ཐམས་ཅད་པདྨ་མཁའ་འགྲོ་མ་དམར་མོ། བྱང་དང་བྱང་ཤར་ཐམས་ཅད་ལས་ཀྱི་མཁའ་་འགྲོ་མལྗང་མོ་ཐམས་ཅད་ཞལ་
ཕྱིར་གཟིགས་ནས་གཡང་གཞི་རྡེབ་ཅིང་། རྐང་གླིང་འབུད་པས་ཐོག་སེར་ཟློག་པར་བསྒོམ་སྟེ། འདི་ནི་སྟེང་འོག་བར་གསུམ་གྱི་ཐོག་བསྲུང་ཟབ་མོའོ། །འདི་ནི་སྔོན་ཆད་ཚང་མ་ཡི་གེར་བཀོད་པ་མེད་མོད་ཀྱང་། དེང་འདིར་ཕན་སེམས་ཀྱིས་སྙན་བརྒྱུད་ཡི་གེར་བཀོད་པའོ། ༧ །ཡང་དམིགས་པ་རྒྱ་ཆེན་པོ་མ་ཟིན་པའམ་རང་ཁོ་ནའི་ཐོག་བསྲུང་ལ། རང་ཉིད་ཡི་དམ་དམ་ཁྲོས་མའི་དབུ་ཐོག་ཏུ་གསེར་གྱི་འཁོར་ལོ་རྩིབས་བརྒྱད་པའི་སྟེང་དུ་ཐུབ་པ་སྐུ་ཤིན་ཏུ་ཆེ་བ། རང་དང་གནས་ཁང་ཁེབས་པ། ཕྱོགས་བཞི་མཚམས་བརྒྱད་དུ་མཁའ་འགྲོ་ཤུགས་འགྲོ་བརྒྱད་ཞལ་ཕྱིར་གཟིགས་པ་རང་གི་རྐང་ཞབས་སུ་གཡུའི་གྲོད་པ་གཅིག་མནན་ནས་ཡོད་པར་བསྒོམས་པས་ཆོག །ཡང་ཤིན་ཏུ་དྲག་དམིགས་གནམ་ས་གོ་ལྡོག་གི་སྒོ་ནས། །སྟེང་ཐོག་འོག་ཐོག་བསྲུང་བ་ནི། ཧ་ཅང་ཉེས་པ་ཆེ་བས་འདིར་མ་བཀོད། ཞལ་དུ་གབ་བོ། ༧ །སྒྲ་གྲག་ཅན་སྤྱི་བོར་གྲག་ཙམ་ན། རང་རྩལ་སེང་གེ་དཀར་མོའི་དཔའ་རྩལ་མ་ཤེས་ན་དེ་ཡང་རི་འགྲིམ་ཅུང་ཞིག་དཀའ། ཞེས་པའི་དོན་འབྲུག་སྐད་བཅག་པ་ནི། རང་གི་རིག་པའི་ངོ་བོ་དེ་སེང་གེ་རྔམ་ཞིང་བརྗིད་པ། སྤྱན་མིག་ཉི་མ་དང་ཟླ་བ། སོ་དང་སེན་
མོ་གནམ་ལྕགས་འབར་བ་ལས་གྲུབ་པ་དེ། འབྲུག་གྲག་མ་ཐག་ཏུ་ནམ་མཁའ་ལ་མཆོངས་ནས་འབྲུག་ས་ལ་ཕབ། འབྲུག་སྐེ་རྦད་ཀྱིས་བཅད་ཨོལ་ཁྲོང་ཙར་གྱིས་བཏོན་ནས་ཟོས། རི་བྲག་དང་ལྷ་འདྲེ་ཐམས་ཅད་ཀྱང་རྗེས་མེད་དུ་བཏང་བར་བསྒོམ། ༧ ཡང་རང་ཉིད་རྗེ་བཙུན་མའི་ཐུགས་ཀ་ནས་འོད་ཟེར་གྱི་ཞགས་པ་མདའ་འཕང་བ་ལྟར་སོང་། འབྲུག་དེ་བཀུག་ཅིང་བཀུག་ནས་རང་གི་ཞབས་སུ་ཚུད། དེ་མ་ཐག་ཏུ་རང་ཉིད་སེང་གེ་ཆེན་པོ་རི་རབ་ཙམ་ས་གཞི་བར་སྣང་གང་བས་གཟི་བརྗིད་ཆེན་པོས་འབྲུག་མནན་ཅིང་སེང་གེའི་ངར་སྐད་བསྒྲགས་པར་བསྒོམ། དམིགས་པ་དེ་གཉིས་ནི་འབྲུག་སྒྲ་ཆེ་ནས་མ་བཟོད་ན་བྱའི་གཞན་ལ་མི་དགོས་སོ། ༧ །ཡང་རང་ཉིད་རྗེ་བཙུན་མ་སྐུ་མདོག་དམར་འོད་ལྡེམས་སེ་བའི་ཐུགས་ཀ་ནས། རྡོ་རྗེའི་ཞགས་པའམ་འོད་ཟེར་ཞགས་པ་ལྟ་བུ་དཔག་ཏུ་མེད་པ་ན་ར་ར་འཕྲོས་ནས། འབྲུག་གི་མཚུལ་པ་གློག་དང་བཅས་པ་བཅིངས། སྐེ་ཡན་ཆད་སྣལ་མས་འཕང་དཀྲིས་པ་ལྟར་དྲིལ་ནས། མར་བཀུག་ནས་འབྲུག་གི་མཚུལ་པ་གློག་དང་བཅས་པ་རང་གི་གདན་འོག་ཏུ་ཚུད་པར་བསྒོམ། དེ་ནི་གློག་ལྕེ་བཅིངས་བ་སྟེ་གློག་དམར་མི་
བཟོད་པ་དང་། རི་མཐོན་པོའི་རྩེ་ལྟ་བུ་ན་གློག་ཞགས་ཀྱི་མི་རྦབ་ལ་འཕེན་པ་འོང་བས་དེ་འདྲ་ལ་བྱའི་གཞན་ལ་མི་དགོས་སོ། ༧ །ཡང་ཐོག་འབྲུག་གློག་གསུམ་ལ་དམིགས་པ་གཅིག་ཆོག་མ་ནི། རང་ཉིད་རྗེ་བཙུན་མ་དམར་མོའི་ཐུགས་ཀ་ནས་གནམ་ལྕགས་ཀྱི་རྡོ་རྗེ་གཅིག་འཕྲོས། ཐོག་འབྲུག་གི་ལྕེ་དང་མཚུལ་པ་རྣམས་བསྒྱུར་ནས་ནམ་མཁར་སོང་། ཡང་མར་བྱུང་འབྲུག་གི་མཚུལ་པ་བསྒྱུར། ཐོག་འབྲུག་གློག་གསུམ་རྡོ་རྗེའི་འོད་ལ་ཐིམ། རྡོ་རྗེ་མར་བྲུལ་གཉན་སའི་རི་བྲག་ལ་བརྒྱབས་པས་ཕྱོགས་བཅུར་ཐར་རེ་གཏོར་བའམ། མར་བབ་རང་ལ་ཐིམ་པས་སྟོང་པ་ཉིད་དུ་གྱུར་པར་བསྒོམ། ༧ ཡང་གཉན་སའི་ཐོག་སེར་འོང་ཁར་གདོན་ཆེན་པོའི་གཟི་བྱིན་གྱི་ཆོ་འཕྲུལ་གྱི་ཟིལ་གྱིས་གནོན་ནས། ཚ་ངབ་ངབ་འཇིགས་འབ་འུབ་སྐྲག་ཛབ་ཛབ་པ་བ་སྤུ་ལང་བ་གློ་སྙིང་འདར་བ་སྟག་ཁུང་ཚ་འུར་འུར་བྱེད་པ་སོགས་བྱུང་ན་གཟི་བརྗིད་ཕྲལ་བ་ནི། རང་གི་ཐུགས་ཀ་ནས་འོད་ཀྱི་འཁོར་ལོ་སྦྲ་ཙམ་མམ་ཕུབ་ཙམ་པ་ཞིག་འཕྲོས་པས། ལྷ་འདྲེ་སྡེ་བརྒྱད་ཐམས་ཅད་ཀྱི་སྲོག་ཡིག་ཞྭ་དམར་ནག་གི་གཟུགས་སུ་ཡོད་པ་ཐམས་ཅད་རྡོ་ཁབ་ལེན་གྱིས་ལྕགས་བླང་པ་ལྟར་འོད་འཁོར་དེ་ལ་སིབ་ཀྱིས་ཐིམ་པས་
ཁོང་རྣམས་བཀྲག་མདངས་ཉམས་ནས་ནག་ཧམ་གྱིས་སོང་། འོད་ཀྱི་འཁོར་ལོ་རང་ལ་ཐིམ་པས་རང་ཉིད་མཐུ་སྟོབས་དང་གཟི་བརྗིད་རབ་ཏུ་རྒྱས་པར་བསྒོམ་མོ། ༧ །དེ་ཡང་རྔ་རྐང་དུང་ངམ་དྲིལ་བུའམ་དུང་དཀར་ལ་སོགས་ལ་ཐོག་སྔགས་འདི་བྲིས་པའམ་གྲོ་ཤོག་ལ་བྲིས་ཏེ་རང་སྔགས་བརྒྱ་རྩ་བརྒྱད་སོགས་ཀྱིས་རབ་གནས་བྱས་ཏེ་རོལ་མོ་ལ་བཏགས་ནས་འབུད་བཀྲོལ་བྱས་པས་ཐོག་མི་འོང་བའི་གདམས་ངག་མ་གཅིག་གི་གཅོད་ལུགས་ལས་བྱུང་བའོ། །ཨོཾ་གྷ་ཧུ་ར་ཧུ་པ་ཧེ་ཛ་ལ་དྷ་ཐཱཿ དེ་དག་ནི་གཅོད་ལུགས་ཁོ་ན་ཡིན་ལ། ། གཅོད་ལུགས་མ་ཡིན་པའི་མདོ་ལུགས་གསེར་འོད་དམ་པ་ནས་གསུངས་པ་དང་། སྔགས་གསར་རྙིང་དུ་མ་ནས་ཐོག་སྔགས་དང་། ཐོག་དམིགས་དང་ཐོག་བསྲུང་གི་རྫས་དང་ཙཀྲ་སོགས་འབྱུང་བ་ནི་འདིར་སྐབས་དོན་མིན་པས་མ་བྲིས་སོ་སོའི་སྐབས་སུ་ཤེས་སོ། ༧ །དེ་ཡང་ཨུ་རྒྱན་རིན་པོ་ཆེའི་ལུང་བསྟན་ལས། དེང་སང་བཞི་བཅུ་ཁ་རལ་ཕྱིན་དུས་འདིར། །ཐོག་དང་ས་གཡོས་དམག་དང་མུ་གེ་འབྱུང་། །ཞེས་དང་། འཁྱུག་དང་གནམ་རྡོ་མང་དུ་སློང་། །ཞེས་གསུངས་པས། གཉན་ཐོག་མི་གཅོད་ན་ཡང་། ཐོག་དམིགས་རྣམས་ཤེས་དགོས་
སོ། །དེ་ཡང་སྟེང་ཐོག་ནི་སྤྲིན་ནག་འབྲུག་སྒྲ་དང་བཅས་པའི་ནང་ནས་འབྱུང་སྟེ། སྡེ་བརྒྱད་གང་རུང་གིས་བསྐུལ་ནས་དམ་ཅན་གྱིས་ཐོག་བརྡུང་སྟེ། གཟའ་བདུད་ལ་གཏད་པས་རྭ་ཝཱཧུ་ལ་འབྲུག་ལ་ཞོན་ནས་འཕེན་པ་སྟེ། ཕུར་སོ་མ་ཞེས་གར་བརྒྱབ་དེ་གཅིག་པུ་ལ་ཕོག་པ་ཞིག་ཡོད་དེ། འདི་ནི་ཕལ་ཆེར་ཤིང་སོགས་བཅག་ནས་འགྲོ་སྟེ། ཚ་རེག་ཆུང་ལ་ཤེད་དྲག་པོ་ཅན་ནོ། །སྦྱང་ཐལ་མ་ནི་མེའི་རང་བཞིན་འཐོར་ཞིང་འཐོར་ཞིང་འོང་བས་ཟེར་མ་མང་སྟེ་ཟེར་མ་སྐྱ་རྩེ་བརྒྱར་གཤག་ཙམ་ཕོག་ཀྱང་ལུས་ཐམས་ཅད་རྫུར་ནས་འགྲོ་སྟེ་འཆི་བར་བྱེད་དོ། །ཐོག་དངོས་ཕོག་ན་ཤིང་ལ་སོགས་པ་བསྲེགས་ནས་འགྲོ་བ་ཡིན་ནོ། །དེ་གཉིས་ཀ་ཡང་འཇིག་རྟེན་པའི་ཁ་ངག་ལས་མཐུ་ཐོག་གཉིས་པོ་ཟུར་ལ་འགྲོ་ཞེས་པས། རི་དང་བྲག་དང་ཐང་དང་ཁང་པ་དང་ཐ་ན་དར་ཁ་གང་བཞག་ཀྱང་དེའི་ཟུར་ལ་རྒྱབ་ཀྱི་དཀྱིལ་དུ་ཕོག་པ་ཉུང་བའི་ཕྱིར་ཐོག་འོང་གྲབས་བྱུང་ན་ཁང་བའི་གཞིས་འོག་དང་། ཐང་གི་ཟུར་རྣམས་སུ་མི་འདུག །དམིགས་པ་བཟུང་ཞིང་ཐོག་སྔགས་ལ་ཕཊསྒྲ་བཏབ་ཅིང་ཕར་རྒྱུག་ཚུར་བརྒྱུགས་བྱས་པས། འབེན་རྒྱུགས་ན་མདའ་གཏད་མི་བདེ་བ་ལྟར་མི་ཕོག་པའི་གནད་ཡོད་ཅེས་སློབ་
དཔོན་གྱི་ཞལ་ཤེས་སྙན་བརྒྱུད་ལ་ཡོད་དོ། ༧ །དེ་ཡང་སྟོང་པ་ཉིད་ཀྱི་ལྟ་བ་དང་མ་བྲལ་བ་དང་། ཡི་དམ་གྱི་བསྐྱེད་རིམ་གསལ་བ་དང་ཐོག་དམིགས་ཟིན་ན་མི་རྒྱབ། གལ་ཏེ་ཕོག་ཀྱང་སྐྱོན་ཆེར་མི་འབྱུང་ངོ་། །སྟོན་པའི་སྐུ་ཆགས་ཚད་ལྡན་ཞིང་རབ་གནས་ཅན་ལ་མི་རྒྱག་བརྒྱབ་ཀྱང་རྟེན་ནོ། །རྒེ་བེའམ་བལ་ཕྱིང་ཆུས་བང་བས་ཅུང་ཟད་རྟེན་ནོ། །ནས་ཀྱི་ཕུབ་རྒོད་དྲ་མ་ཁོ་ན་མང་བ་དེས་ཡུད་ཙམ་རྟེན་ནོ། །བྱིན་རླབས་རྟེན་དང་སྲུང་འཁོར་ཟབ་མོའི་ཅུང་ཟད་ཕན་ནོ། །འོག་ཐོག་ནི་འོག་འཁྱུག་སྟེ་ས་འོག་ནས་འོང་སྟེ་སྟེང་ཐོག་བས་ཅུང་ཟད་ནུས་པ་ཆུང་ཟེར་རོ། །བར་ཐོག་ནི་རི་མགོ་ལྟ་བུ་ནས་འཕྲད་དུ་མདའ་ལྟར་འོང་བ་དང་། རླུང་ཐོག་ཆེན་པོས་ཁང་པ་དང་སྦྲ་གུར་ཁྱེར་བ་དང་། མི་གཡང་ལ་འཕེན་།པ་དང་། རླུང་འཚུབ་དྲག་པོས་ཕ་བོང་དང་རྡོ་ཆེན་པོ་ནམ་མཁར་ཁྱེར་ནས་བརྡེག་པ་རྣམས་ཀྱང་བར་ཐོག་གི་བྱེ་བྲག་ཡིན་ནོ། །དེ་ལྟར་སྟེང་འོག་བར་གསུམ་གྱི་ཐོག་ལྟས་ཉམས་རྨི་ལམ་དུ་བྱུང་ན་དམིགས་པས་གཅུན་པ་དང་། དུས་མིན་དུ་འབྲུག་སྒྲ་དྲག་པོ་དང་། ཚྭ་ཚྭ་གློག་ཞགས་སོགས་བྱུང་ན་ཡང་ཐོག་དམིགས་བཟུང་དགོས་ཏེ། དུས་ངན་པའི་རྟགས་སུ་དུས་མིན་
འབྱུང་སྲིད་པའི་ཕྱིར་རོ། ༧ །དེ་ལྟར་རི་འགྲིམ་ཆར་འབོད་སེར་སྲུང་སོགས་གང་ལ་ཡང་ཉེ་བར་མཁོ་བའི་ཐོག་དམིགས་ཀྱི་རིམ་པ། ༧ རྗེ་བཙུན་དྲུང་པ་ཀུན་དགའ་རྣམ་རྒྱལ་གྱི་གསུང་རྒྱུན་ཟིན་བྲིས་ལ་གཞིར་བྱས་ཤིང་། གཞན་ཡང་མ་གཅིག་གི་དམིགས་འབུམ་རྣམས་དང་སློབ་དཔོན་གྱི་གསུང་རྒྱུན་སྙན་དུ་བརྒྱུད་པ་འགའ་ཟུང་ཡོད་པ་རྣམས། ཕྱོགས་གཅིག་ཏུ་བསྡེབས་ཏེ་རཱ་ག་ཨ་སྱས་གབ་སྦས་མེད་པར་བཀོད་པའོ། །འདི་བྲིས་འགལ་འཁྲུལ་ཉེས་པའི་ཚོགས་ཐམས་ཅད། །རྒྱལ་བ་སྲས་དང་བཅས་པ་ལ་བཤགས་ཤིང་། །དགེ་བ་མཆིས་ན་མ་རྒན་སེམས་ཅན་རྣམས། །བླ་མེད་བྱང་ཆུབ་དམ་པ་ཐོབ་ཕྱིར་བསྔོ། །དམིགས་རིམ་འདི་རྣམས་ཉམས་སུ་སུས་བླངས་བསྲུང་བྱ་དང་བཅས་པ་ཐམས་ཅད་འཆི་མེད་རྡོ་རྗེའི་སྐུ་ཐོབ་ནས། བཀྲ་ཤིས་དགེ་མཚན་དུ་འབྱུང་བར་ཤོག །མངྒ་ལཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།