གཅོད་ལུགས་ཀྱི་སྒོ་ནས་གོད་གཅོད་བྱེད་ཐབས།
གཅོད་ལུགས་ཀྱི་སྒོ་ནས་གོད་གཅོད་བྱེད་ཐབས་བཞུགས་པའི་དབུ་ཕྱོགས་ལགས་སོ།། ༈ ན་མོ་པྲཛྙཱ་པཱ་ར་མི་ཏཱ་ཡེ། གཅོད་ལུགས་ཀྱི་གོད་གཅོད་ནི། གོད་མགོའམ་མ་རྙེད་ན་གོད་རུས་ལ་ཁྲག་གམ་སྣག་ཚ་གཙང་མས་ལིངྒ་བྲི། མི་ཤེས་ན་ཡི་གེ་ཏྲི་ཁུག་ཅིག་ཅེས་བྲིས་ལ་མདུན་དུ་བཞག །ལུས་སྦྱིན་དུས་ནོར་ཕྱུགས་ཐམས་ཅད་རང་དང་དབྱེར་མེད་དུ་བསྲེས་ལ། རྣམ་ཤེས་སྤར་ནས་བེམ་པོ་དཀར་འགྱེད་དམར་འགྱེད་མང་དུ་བྱ། ཚོགས་ཀྱི་ཞབས་སམ་རང་གི་འོག་ཏུ་གོད་ལྤགས་བཏིང་། གོད་ཤས་ཚོགས་ཤ་བྱས་ལ། ཚོགས་ལ་གོད་འདྲེ་འགུགས་གཞུག་བྱས་ལ་ཚོགས་བྱ། གོད་མགོ་ལ་གོད་འདྲེ་འགུགས། གཞུག་ལན་བརྒྱའམ་ཉེར་གཅིག་ཙམ་བྱས་ལ། དེ་ནས་ཤ་མི་འདོད་པོ་དྲུག་ཡོད་དེ། བྲག་སྤྲེའུ་དཀར་པོ་འདྲ་བ། ཁྱི་དཀར་འདྲ་བ། བྱ་དཀར་འདྲ་བ། སྦྲུལ་དཀར་འདྲ་བ། གླང་དཀར་པོ་འདྲ་བ། སྦལ་པ་དཀར་པོ་འདྲ་བའི་བྲག་གམ་ཕ་བོང་གི་འོག་ཕ་རི་ཐད་ནས་ཆུ་སྣ་ཚུར་ལ་བབས་ཤིང་ཆུ་ཤིང་ན་བ་སོགས་དཔལ་ཁ་ཡོད་པ་ལ་གཏད། ས་ཤུལ་དང་ས་བྲག་དམར་པོ་མཐོང་བའི་སར་སྦ་མི་རུང་། དོང་ཧ་ཅང་རིང་ན་རང་ལ་ལྡོག་ཅིང་། ཐུང་ན་ཕན་གནོད་མེད་པའང་བཤད་པས། གྲུ་གང་སོར་བཞིའི་མཚམས་བར་དོང་བརྐོས་ལ། དོང་ནང་ལིངྒ་གན་རྐྱལ་དུ་མགོ་ཕྱིར་བསྟན་ལ་བཞག་ནས། དེ་ནས་དབང་བསྡུད་བྱ་བ་ནི། ཕ྄ཊ། རང་ཉིད་སྐད་ཅིག་གིས་ཁྲོས་མ་ནག་མོ་
ཞལ་གཅིག་སྤྱན་གསུམ་མཆེ་བ་བཞི་གཙིགས་པ། དབུ་ནི་ལྷ་གནས་སྲིད་པའི་རྩེར་མོར་སླེབས་པ། སྐུ་སྟོད་གཟུགས་ཁམས་ལྷ་ཡི་གནས་སུ་འགྱིང་བ། སྐུ་སྨད་འདོད་ཁམས་ལྷ་གནས་དྲུག་ཏུ་འཁྱིལ་བ། ཞབས་གཉིས་དབང་ཆེན་གསེར་གྱི་ས་གཞི་ལ་བྲོ་ཁྲིག་ཁྲིག་བརྡུངས་བས་སྟོང་གསུམ་གཡོ་བ། ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ། ཁྲོ་མོའི་ཆ་ལུགས་ཐམས་ཅད་དང་ལྡན་ཞིང་དུར་ཁྲོད་ཀྱི་ཆས་བརྒྱད་གསོལ་བ། ཕྱག་གཡས་མི་ལྤགས་ཀྱི་གཡང་གཞི་ནམ་མཁར་ཕྱར་ཞིང་ས་ལ་བརྡབས་པས། སྣང་སྲིད་ཀྱི་ལྷ་འདྲེ་ཐམས་ཅད་འདར་ཞིང་བསྔངས་པ། གཡོན་མི་རྐང་གི་གླིང་བུ་ཙེར་ཙེར་འབུད་པ། སྣང་སྲིད་ཀྱི་ལྷ་འདྲེ་ཐམས་ཅད་དབང་དུ་སྡུད་ཅིང་ཟིལ་གྱིས་གནོན་པ། དེའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་དཀར་སེར་དམར་ལྗང་ཁྲོ་མོའི་ཚོགས་དཔག་ཏུ་མེད་པ་འཕྲོས་པས་རྨེ་ཚང་གི་ནོར་ལའམ་རྟ་ནོར་ར་ལུག་གང་ཡིན་པ་ལ། གནོད་ཅིང་འཚེ་བའི་གོད་འདྲེ་གོད་སྲི་གོད་བདག་དང་བཅས་པ་ཐམས་ཅད་རང་དབང་མེད་པར་མདུན་དུ་བཀུག་པར་གྱུར། ཕ྄ཊ་ཕ྄ཊ་ཕ྄ཊ། ན་མོ་སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་
བདེན་པ་དང་། དགེ་འདུན་ཀྱི་བཀའ་བདེན་པ་དང་། མ་གཅིག་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ལྷ་ཚོགས་འཁོར་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་མཐུས་གོང་ལྟར་མིང་སྤེལ་ལ་མཚིས་འདྲེ་མཚིས་སྲི་ནད་གདོན་རྒྱབ་རྟེན་བྱེད་པའི་དམ་སྲི་གང་ཡིན་ཁ་བསྒྱུར་ཆོག །གནོད་ཅིང་འཚེ་བའི་གོད་འདྲེ་གོད་སྲི་གང་ཡིན་པ་དེ་དག་ཐམས་ཅད་སྟེང་འོག་ཕྱོགས་མཚམས་གར་གནས་དམིགས་པའི་རྟེན་འདི་ལ་ཁུག་ཅིག །ཧཱུྃ་ཧཱུྃ་ཧཱུྃ། ཛཧཱུྃ་བཾ་ཧོ༔ ལན་གསུམ་མམ་བདུན་ནམ་ཉེར་གཅིག་བརྒྱ་སོགས་གལ་ཆེ་ཆུང་དང་བསྟུན། དེ་ནས་རང་ཁྲོས་མའི་ང་རྒྱལ་གྱིས། འོ་འོ། སྣང་ཞིང་སྲིད་པའི་ལྷ་འདྲེ་ཁྱད་པར་དུ་ཡུལ་ཕྱོགས་འདི་ན་གནས་པའི་གཞི་བདག་རྨེ་ས་ཆ་འདི་ལ་གནས་པ། བྲག་དང་ཕ་བོང་འདི་ལ་གནས་པའི་ལྷ་འདྲེ་མཐུ་བོ་ཆེ་ཁྱེད་རྣམས་ཉོན་ཅིག་རྒེ་ཚང་ལ་གནོད་ཅིང་འཚེ་བའི་གོད་འདྲེ་གོད་སྲི་འདི་གཏད་པ་ཡིན་པས། མ་ཤོར་ཅིག །ཟུངས་ཤིག །མ་གཏང་ཞིག །ཆིངས་ཤིག །ནོན་ཅིག །ཁྱོད་ལ་མཐུ་དང་ནུས་པ་ཅི་འདུག་བལྟའོ། །གལ་སྲིད་གོད་འདྲེ་གོད་སྲི་འདི་བཏང་བྱུང་ན། ང་ཁྲོས་མ་ནག་མོས་མཁའ་འགྲོའི་དམག་དཔུང་བསྡུ། བྱ་ཁྱུང་གིས་
ནམ་མཁའ་བཀང་། མཛེ་ཁྲག་ཆུ་ལ་བླུགས། མཛེ་ཤས་ཐང་མ་བརྡལ། དམེ་རོ་དང་མཛེ་རོ་བསྲེག །རི་ཆེན་ཚོ་རྦབ་ཏུ་བསྒྲིལ། རི་ཆུང་ཀུན་ཚོགས་པོར་འཕེན། ཁྱོད་ཀྱི་ཕོ་བྲང་གནས་མལ་འདི་རྩད་ནས་བཤིག་ནས། ཁྱོད་ལྷ་འདྲེ་ཨར་ལ་གཏད་ནས་ཡུལ་ཕུད་པ་ཡིན་པས། དེར་མ་སོང་བར་གང་ཡིན་མིང་བསྒྱུར། གོད་འདྲེ་གོད་སྲི་འདི་མ་གཏོང་ཞིག །ནོན་ཅིག །ཆིངས་ཤིག །སྡོམས་ཤིག །གོད་ཀ་འདི་མྱུར་དུ་ཆོད་ཅིག །མ་ཁྲོས་མ་ནག་མོའི་བཀའ་དང་དམ་ལ་མ་འདའ་ཞིག །ས་མ་ཡ་ན་ར་ཀན། ཞེས་ལན་གསུམ་བརྗོད། ས་ཁོད་རིམ་གཅིག་གིས་མནན་པའི་སྟེང་མེ་བླུགས་ཆུ་བླུགས་ས་ཡིས་བཀབ་རོ་སོལ་ལམ་མ་རྙེད་ན་སོལ་བས་རོ་གཡམ་གཅིག་གི་ངོས་ལ་འོག་ཏུ་རྡོ་རྗེ་རྒྱ་གྲམ་བྲི། སྟེང་དུ་རི་རབ་བང་རིམ་བྲིས་པས་མནན། ས་རྡོས་བཀབ་ལ་བཅག་བརྡུངས་བྱས་ལ་མི་མངོན་པར་བྱ། རྡོག་པས་བརྫིས་ལ་རྟ་བྲོ་ནི། ཧཱུྃ། སྟོང་གསུམ་སྟོང་གི་འཇིག་རྟེན་ན། །གནོད་བྱེད་བསྒྲལ་བའི་གདན་སྟེང་དུ། །ཁྲོས་མའི་ལྷ་ཚོགས་བྲོ་བརྡུངས་བས། །དགྲ་ནི་ཐལ་བར་བརླག་པའི་བྲོ། །བགེགས་ནི་ཕྱེ་མར་འཐག་པའི་བྲོ། །རྣལ་འབྱོར་དམ་སྲི་འདུལ་བའི་བྲོ། །བར་ཆད་མེད་པར་བརྡུངབར་བྱ། །ཨོཾ་ལཾ་ཨཱཿལཾ་ཧཱུཾ་ལཾ་
སིཾ་བྷ་ཡ་མཱ་ར་ཡ་ནན། ཞེས་བྲོ་བརྡུངས་ནས་མི་དམིགས་པར་བཞག །དེ་ནས་ཕྱི་མིག་མི་ལྟ་བར་ནང་དུ་ལོག་གོ །ཞེས་ཨ་རཱ་གས་སོ།། ༈ གལ་ཆེ་ན། །ཕ྄ཊ། རང་རིག་རང་ལུས་ནས་ཐོན་ཁྲོས་མེར་བྱུང་། །བེམ་པོའི་གཡང་གཞི་བཏིང་པས་ས་སྟེང་ཁྱབ། །བདག་ལུས་ཤ་ཁྲག་དཔག་མེད་ལོངས་སྤྱོད་རྣམས། །གོད་འདྲེ་གོད་སྲི་གནོད་བྱེད་རྣམས་ལ་སྦྱིན། །ཐམས་ཅད་ངོམ་ཞིང་ཚིམ་སྟེ་དགའ་མགུར་ལྡན། །ཕ྄ཊ། གཡང་གཞིའི་ནང་དུ་གོད་འདྲེ་གནོད་བྱེད་བཏུམས། །ཁྲོས་མས་ཀླད་ལ་གཡུག་ཅིང་ས་ལ་བརྡབས། །ཞབས་འོག་མནན་ཏེ་བྲོ་བརྡུང་འདམ་ལྟར་བརྫིས། །ཕ྄ཊ་ཕ྄ཊ། འདི་འདྲ་མ་བྱེད་གོད་ཀ་བཏང་རེ་ཞེས། །ན་རེ་ཀན་ཞེས་ཁས་བླངས་དམ་བཅས་གྱུར། ཕ྄྄ཊ་ཕ྄ཊ། དེ་ལྟ་བུའི་འདོན་བསྒོམ་དམིགས་པ་གཅོད་ཚོགས་ལུས་སྦྱིན་སྐབས་སུ་བྱའོ།། མངྒ་ལཾ། དགེའོ།། །།