དམ་ཆོས་བདུད་ཀྱི་གཅོད་ཡུལ་ལས་ལྷ་འདྲེ་ར་མདར་སྦྲན་པའི་མན་ངག
༼ཤ༽ དམ་ཆོས་བདུད་ཀྱི་གཅོད་ཡུལ་ལས་ལྷ་འདྲེ་ར་མདར་སྦྲན་པའི་མན་ངག་བཞུགས་སོ།། ཕཊཿ ཅེས་བེམ་རིག་ཕྲལ་བེམ་པོ་ཤ་རི་ཁྲག་མཚོར་བསྐྱེད། རང་གི་རིག་པ་ཁྲོས་མ་ནག་མོར་གྱུར་པས་ཕཊ་ཅེས་གཞི་བདག་རྣམས་ར་མདའ་ལ་རྦད་པའི་དོན་དུ་བཀུག་པས། གཞི་བདག་ཐམས་ཅད་སྐྱ་མི་དཀར་སེར་དམར་ལྗང་ཐམས་ཅད་ཀྱང་གསེར་དངུལ་ཟངས་ལྕགས་ཀྱི་ཁྲབ་རྨོག་ཅན་མདའ་གཞུ་དང་མཚོན་ཆ་སྣ་ཚོགས་ཐོགས་པ། གཞན་ཡང་དུད་འགྲོ་དང་གཅན་གཟན་རི་དྭགས་སྣ་ཚོགས་ལ་ཞོན་པ། ཐམས་ཅད་ཀྱང་འགྲོ་བའི་ཚུལ་དུ་མིའི་དམག་ལྟར་སྐད་ཅིག་ལ་འདུས་པར་གྱུར་ཕཊཿ དེ་ལ་ཤ་ཁྲག་རྣམས་དམག་ལྟོའི་ཚུལ་དུ་གཟན་པས་ཞེ་སྡང་དང་ཁྲོ་གཏུམ་ཆེར་སོང་ནས་རྩུབ་ཧྲག་གེ་ཡོད་པ་ལ། ཕཊཿཅེས་དགྲ་ལ་རྦད་པས་དེ་ཐམས་ཅད་སེར་རྒོད་བབ་པ་ལྟར་དགྲའི་སྟེང་དུ་སོང་ནས། མཚོན་ཆའི་ཆར་དང་ལྟས་ངན་སྣ་ཚོགས་དང་ནད་ཀྱི་ཆར་ཕབ་ནས་རྡུལ་དུ་བརླགས་ཏེ་བསྒྲལ་ནས་རྣམ་ཤེས་མཁའ་སྤྱོད་དབྱིངས་སུ་འཕང་ངོ་། །ཨྠྀི། ཕཊ་ཀྱིས་བེམ་རིག་ཕྲལ་ལ་ཤ་ཁྲག་རྒྱ་མཚོར་བསྐྱེད། རང་ཉིད་ཐོག་བདག་ཁྲོས་མ་ནག་མོ་སྐུ་ཆེ་ཞིང་འཇིགས་པ། ཀླུ་རྣམས་ར་མདའི་
དོན་དུ་བཀུག །ཀླུ་ཐམས་ཅད་སྦྲུལ་མགོའི་གདེངས་ཀ་དང་སྦྲུལ་མཇུག་ལ་ན་བུན་ཁོལ་བ། མིག་ནས་ཁྲག་གི་ཆར་པ་འབེབས་ཤིང་ཁ་ནས་ཀླུ་ནད་སྣ་ཚོགས་ཀྱིས་རླངས་པ་སྔོ་དམར་འཕྱུར་བས་དགྲ་ཡུལ་ཁྱབ་པ། འོག་སྒོ་ནས་སྦལ་སྦྲུལ་སྡིག་པའི་ན་བུན་ཕོ་ཉ་འཕྲོས་པ། རྐང་ཞབས་ནས་ནད་ཀྱི་རླངས་དམར་ལྡང་བ། སྙིང་ནས་གདུག་པའི་མུན་ནག་འཐིབས་པ། ལག་ན་གློག་ཞགས་དང་ནད་ཀྱི་གཡབ་མོ་རྡེབ་པ། སྣ་ནས་སེར་སྤྲིན་འཕྱུར་བ། རྣ་བ་ནས་ཐོག་རྒོད་དང་བ་སྤུ་ནས་ཐོག་སེར་ཚྭ་ཚྭ་འཕྲོ་བ། སྨིན་ཕྲག་ནས་སེར་ཆེན་འབེབས་པ་བུ་ག་ཐམས་ཅད་ནས་འུར་སྒྲ་ཐུམ་ཆོམ་འབྲུག་སྒྲ་རི་སྙིལ་བ་ཙམ་སྒྲོག་པ། ཐམས་ཅད་ཀྱང་མདོག་ནག་ཅིང་སྤྱི་གཙུག་ནས་སྦྲུལ་མགོ་གདེངས་བ། དེ་རྣམས་དང་ལྷ་སྲིན་སྡེ་བརྒྱད་ལ་ཤ་ཁྲག་གཟན་ནས་། ཕ྄ཊ་ཅེས་དགྲ་ལ་རྦད་པས། དེ་རྣམས་དང་མཉམ་དུ་མ་མོ་དྲེལ་ནག་ཞོན་པ་མང་པོ་དང་འགྲོགས་ནས་དགྲ་བོ་ལ་ནད་ཡམས་སྣ་ཚོགས་བཏང་བ་དང་། རྒྱལ་པོ་བཙུན་གཟུགས་ཞྭ་ཐེབ་ཅན་སེང་གེ་དང་རྟ་དཀར་པོ་ཞོན་པ་དང་མཉམ་དུ་སོང་ནས། ནོར་ལ་གོད་ཁ་སྣ་ཚོགས་བཏང་ཞིང་ནོར་གྱི་ཤ་ཁྲག་ཟ་བ་དང་། བཙན་མི་དམར་རྟ་དམར་ཅན་དང་ཤ་
ཞོན་མང་པོ་མཉམ་དུ་སོང་ནས། ལོ་ཐོག་ལ་བཙའ་དང་སེར་བ་རྒྱབ་པ་དང་། གཞན་ཡང་གཞི་བདག་དང་ཡུལ་འདྲེ་ཐམས་ཅད་མཉམ་དུ་སོང་ནས། མི་རུང་སྣ་དགུས་དགྲ་བོ་དེ་བསྒྲལ་བར་དམིགས་ལ་རྣམ་ཤེས་མཁའ་སྤྱོད་དུ་སྤར་རོ། །འདི་ལ་ཞལ་ཤེས་མང་དུ་ཡོད་པས་ཡི་གེ་མཐོང་ཆོག་གི་དམིགས་ངན་བྱས་ན་རང་ལ་ལྡོག་པས་ཞལ་ཤེས་གལ་ཆེའོ། །འདི་བྲིས་ཉེས་པ་མ་གཅིག་ཉིད་ལ་བཤགས། དགེ་བས་བསྟན་དགྲ་མ་ལུས་རྩད་ནས་གཅོད། །མ་གཅིག་བསྟན་པ་ཕྱོགས་བཅུར་རྒྱས་ཕྱིར་བསྔོ། །ཞེས་རཱ་ག་ཨ་སྱས་སོ། །གདོལ་པ་དཀར་འགྱེད་གཞན་ཚོ་ལ་དམར་འགྱེད་མི་རུང་བ་སོགས་ཞལ་ཤེས་མང་ངོ་།། །།