གཅོད་ཀྱི་ཚོགས་ལས་རིན་པོ་ཆེའི་ཕྲེང་བ་ལས། སྙན་བརྒྱུད་ནག་སྦྱོར་གྱི་དམིགས་པ་བཅོ་ལྔའི་མ་ཡིག་བཙན་དུག་ཧ་ལ་ནག་པོ་བཀའ་རྒྱ་ཅན།
༼ཨ༽ གཅོད་ཀྱི་ཚོགས་ལས་རིན་པོ་ཆེའི་ཕྲེང་བ་ལས། སྙན་བརྒྱུད་ནག་སྦྱོར་གྱི་དམིགས་པ་བཅོ་ལྔའི་མ་ཡིག་བཙན་དུག་ཧ་ལ་ནག་པོ་བཀའ་རྒྱ་ཅན་བཞུགས་སོ། །མ་ཡིག་གཅིག་པའོ། །
ན་མོ་གུ་རུ། བདག་འདྲ་མཁའ་འགྲོ་ལབ་སྒྲོན་གྱིས། ། །ཚེ་སྟོད་དག་ལ་སྡུག་བསྔལ་བྱས། །ཚེ་སྐད་དག་ལ་འཁོར་བ་སྤོང་། ། སྐྱོ་སྟོན་བསོད་ནམས་བླ་མ་ཡིས། །དབང་བཞི་ཡོངས་སུ་རྫོགས་པར་བསྐུར། །ཕར་ཕྱིན་ནམ་མཁའ་སྒོ་འབྱེད་གནང་། །སྡོང་པོ་གསེར་ལྟག་ལ་སོགས་པའི། །གཉན་ཁྲོད་བརྒྱ་ཡི་ལུང་བསྟན་བྱུང་། །བྱ་བ་བཏང་ནས་རི་ཁྲོད་འགྲིམ། །བརྒྱ་རྩ་ཆོད་པའི་རྟིང་པ་ལ། ། །ཟངས་རི་བྲག་དམར་སེང་གདོང་ན། །གཅིག་པུར་སྒོམས་ཤིང་ཡོད་པ་ལ། །སྲོད་ལ་རྗེ་བཙུན་སྒྲོལ་མ་ཡིས། །དཀར་སྦྱོར་མན་ངག་ལྔ་བཅུ་གནང་། །གུང་ལ་སུ་ཁ་
སིདྡྷི་ཡིས། །བགེགས་སེལ་ལྔ་བཅུ་ཐམ་པ་གནང་། །ཐོ་རངས་ཁྲོས་མ་ནག་མོ་ཡིས། །ནག་སྦྱོར་དམིགས་པ་བཅོ་ལྔ་གནང་། ། ཡི་གེ་མེད་པའི་སྐོར་རྣམས་གནང་། །མཁའ་འགྲོ་གསུམ་གྱི་ཞལ་གདམས་འདི། །སྲས་རྒྱུད་སོགས་ལ་མ་གནང་ནས། །ཟབ་ཕྱིར་གཡོག་མོ་ཁྱོད་ལ་གཏད། །མི་རབས་བདུན་ལ་སྙན་བརྒྱུད་གྱིས། །དེ་ཕྱིར་དཔེ་རུ་འདེབས་ན་ཡང་། །གཅིག་བརྒྱུད་མ་གཏོགས་བསྟན་གྱུར་ན། །སྟོང་གསུམ་མཁའ་འགྲོས་ཆད་པ་འོང་། །ཁྱད་པར་ཆོས་འདིའི་བཀའ་སྲུང་སྟེ། །སྲོག་བདག་མི་དང་ལྕེ་སྤྱང་མ། །གནས་འདིར་བཞུགས་པའི་གནས་པོ་དང་། །
ལས་མཁན་མདུང་དམར་མཆེད་བདུན་གྱིས། །མན་ངག་འདི་ཡི་བཀའ་སྲུང་གྱིས། །ཚུལ་དང་མི་མཐུན་བརླག་པར་མཛོད། །གསུངས་ནས་བཀའ་རྒྱ་ལན་གསུམ་གདབ། །མ་གཅིག་གིས་ཇོ་མོ་འབུམ་ལྕམ་མ་ལ་གནང་། དེས་གྲུབ་ཐོབ་སྙིང་པོ་ལ། དེས་འབྲི་སྒོམ་རྟོག་མེད་ལ། དེས་མདོ་སྟོན་གྲགས་པ་ལ། དེས་སྙིལ་སྒོམ་ཡོན་པོ་ལ། དེས་ཨ་གཉེན་དམ་པ་ལ། དེས་གུ་རུམ་གྱི་རི་ཁྲོད་པ་ཡི་གེར་བཏབ། དེ་དང་འདི་ཡི་བུ་ཡིག་འཁོར་ལོ་མ་ཚང་ནས། འབྲི་གུང་ཕག་མོ་གྲུབ་པས། མདོ་སྟོན་གྲགས་པ་རང་ལ་གཏུག་ནས། ཐོད་པ་བཟང་པོ་དུམ་གཅིག་དང་། གསེར་སྲང་གང་དང་། གོས་ཡུག་གཅིག་ཕུལ་ནས་ཞུས། བཀའ་རྒྱ་མཛད་ནས་གནང་བ་ལགས། དེ་ནི་ལོ་རྒྱུས་སོ། །དེ་ནས་ནག་སྦྱོར་ཧ་ལ་ནག་པོའི་མ་ཡིག་བསྟན་པ་ནི། ༈ ཨེ་མ་ཧོ། སྐྱེ་མེད་ངང་ལས་མ་གཡོས་ཀྱང་། །འགགས་མེད་ཤུགས་འབྱུང་ལྷུན་གྱིས་གྲུབ། །གཏད་མེད་སྙིགས་མའི་འགྲོ་བ་འདྲེན། ། མཐའི་བྲལ་ལབ་སྒྲོན་ཞབས་ལ་འདུད། །སྙན་བརྒྱུད་གསུམ་གྱི་ཞལ་གདམས་ནི། །ཕ་མདོ་སྟོན་ཞལ་གདམས་གསུངས་པ་བཞིན། །ཡུམ་ཆེན་ཌཱཀི་བཀའ་བརྒྱུད་རྣམས། །བདག་
ལ་བྱིན་གྱིས་བརླབ་ཏུ་གསོལ། ༼ཀ༽ །རྣལ་འབྱོར་རི་ཁྲོད་འགྲིམ་པ་ལ། །ཇག་རྐུན་ཆོམ་སོགས་ཏིང་འཛིན་འཕྲོག །བསྟན་དགྲ་སེར་མོ་ཡོངས་ལ་གནོད། ། དེ་ལ་ནག་སྦྱོར་ལྡོག་མེད་དགོས། །གློ་བུར་དགྲ་བྱུང་གཉན་སར་འགྲོ། །གོས་ཕུད་ཁྲོས་མ་ནག་མོར་བསྐྱེད། །གོས་ཀྱི་ནང་དུ་ལྷས་སྦྱིན་བསམ། །སྡེ་བརྒྱད་བཀུག་ལ་གནས་པོར་བསྟིམ། །གོས་ཀྱིས་གནས་པོའི་མགོ་ལ་བརྡེག །གོས་ནང་ལྷ་སྦྱིན་ཤ་ཁྲག་བསམ། །གནས་ལ་བརྡབས་པས་ཞེ་སྡང་འབར། །དགྲ་ལ་དམག་དྲངས་བརླག་པར་བསམ། །དེས་ནི་འཇོམ་པར་ཐེ་ཚོམ་མེད། །ཡང་ཟབ་སློབ་དཔོན་ཞལ་ལ་དྲིས། ༼ཁ༽ །གཉིས་པ་དགྲ་ཁྱིམ་ཐན་གྱིས་འགེང་འདོད་ན། །ཤོག་བུ་གྲུ་གང་གྲུ་བཞི་ལ། །དཀྱིལ་ན་དགྲ་ཡི་མིང་རུས་བྲི། །མཐའ་མར་ཐན་གཟུགས་ཤེས་ཚད་བྲི། །བསྐྱེད་བསྟིམ་མང་བྱས་དངོས་སུ་བསམ། །རང་ཉིད་ཁྲོས་མའི་འོག་ཏུ་ནི། །ཆོས་འབྱུང་བྲུས་ལ་དེ་ནང་བཞག །ཆོས་འབྱུང་དགྲ་ཡུལ་དངོས་སུ་བསྒོམ། །གཟུགས་ལྡན་གཟའ་ཀླུ་བདུད་བཙན་བཞིའི། །བླ་རྡོ་བླང་ལ་བཀུག་གཞུག་བྱ། །དྲག་གཅོད་བྱ་ཞིང་དགྲ་བོ་དང་། །ལྷ་འདྲེ་གཉིས་མེད་མནན་པོར་
བྱ། །འཁྲུལ་ནས་འཕར་འདར་བྱེད་པར་བསམ། །ཤེས་གཏད་ཕཊ་ཀྱིས་བརྟུལ་ཞུགས་བྱ། །བ་ལིང་ཉ་བོ་ཟོར་དུ་འཕོང་། །དམིགས་པ་དྲག་པོ་ཞལ་ལ་ཤེས། །ཨྠྀི། ༼ག༽། ། གསུམ་པ་དགྲ་བོ་ཀླུ་ལ་གཏད་འདོད་ན། །ལིངྒ་བྲིས་ལ་མཛེ་ཁྲག་བྱུག །གཉན་སའི་འོག་ཏུ་ཞག་གསུམ་བཏིང་། །སྡེབ་བཞི་དབང་སྡུད་ལུས་སྦྱིན་བྱ། །ཏི་པ་ཙ་མི་ཁ་སྦྱོར་བྱ། །ནུབ་ཕྱོགས་འབྱུང་པོའི་ཁ་རུ་བཅུག །དམིགས་པ་འཇུག་ལུགས་ཞལ་ལ་དྲིས། །ཨྠྀི། ༼ང༽ །བཞི་པ་དགྲ་མཁར་ཐོག་གིས་བཤིག་འདོད་ན། །རང་ཉིད་ཁྲོས་མའི་མདུན་དུ་ནི། །དགྲ་བོའི་ཁང་ཁྱིམ་རྣམ་པར་བརྩེགས། །ནང་དུ་ལིངྒ་མིང་རུས་བཞག །དངོས་སུ་བསམ་ལ་བསྐྱེད་བསྟིམ་བྱ། །སྟེང་དུ་རས་དམར་སྤུ་འབྲུ་བཙུགས། །ཇེ་ཆེར་སོང་ནས་དགུ་རུ་མཆེད། །དགྲ་བོའི་ཡུལ་བཅས་ཐལ་བར་བརླག །ཞག་གསུམ་གཉན་སར་དམིགས་པ་གཟིར། །དེ་ནས་ལིང་ག་ཕྱུང་ནས་སུ། །བྱང་ཕྱོགས་འབྱུང་པོའི་ལག་ཏུ་གཏད། ། མཐའ་གཏད་བྱ་ཞིང་འབྱུང་པོ་གཟིར། །ཐོད་ཟོར་འཕངས་ཤིང་དམོད་བཅོལ་བྱ། །སྟེང་དུ་དམིགས་པ་རྣམ་གསུམ་བྱ། ༼ཅ༽ །ལྔ་པ་དགྲ་ལ་སྨྱོ་འབོག་བཏང་འདོད་ན། །ལིང་ག་
མིང་བཅས་ཚང་བར་བྲི།་་་སྨྱོ་ཁྲག་དང་གཙོད་ཁྲག་བྱུག །བཀུག་གཞུག་བྱས་ཤིང་མལ་འོག་བཞག །སྣང་སྲིད་ལྷ་འདྲེ་མ་ལུས་རྣམས། །ཞག་བདུན་དབང་སྡུད་དྲག་ཏུ་བྱ། །དེ་ནས་ལིང་ག་བཏོན་ནས་སུ། །ཤར་ཕྱོགས་འབྱུང་པོའི་སྙིང་གར་བཅུག །གཟའ་བདུད་ཁྱབ་འཇུག་མིག་དམར་དང་། །འཇིགས་པའི་སྟག་ཞོན་སེང་ཞོན་པ། །ཡང་ཡང་བསྟིམ་ལ་དྲག་དམིགས་བྱ་་་མར་མེ་བསད། །དགྲ་བོ་སྨྱོ་བར་ཐེ་ཚོམ་མེད། །མན་ངག་སློབ་དཔོན་ཞལ་ལ་དྲིས། །སྤྱི། ༼ཆ༽ །དྲུག་པ་དགྲ་ལ་ཞ་རིང་བཏང་འདོད་ན། །ལིངྒ་མིང་བཅས་ཚང་བར་བྲི། །བིལ་རློན་ལུག་གུས་མཆིན་ཁྲག་བྱུག །ཛདམར་རམ་གྱི་དྲ་ནས་བསྐོར། །ཆུ་མིག་ལྐུག་པའི་ནང་དུ་མནན། །ཕྱོགས་བཞི་མཚམས་བརྒྱད་སྦྲུལ་ཆིང་བྱ། །སྟེང་དུ་ཀླུ་ཡི་ཕོ་བྲང་བཏབ། །ཁྱུང་དམར་མེ་གཤོག་དམིགས་པ་བྱ། །དགྲ་བོ་ཞི་བར་ཐེ་ཚོམ་མེད། །དམིགས་པ་སློབ་དཔོན་ཞལ་ལ་དྲིས། ༼ཇ༽ །བདུན་པ་དགྲ་ཞིང་སེར་བས་འཇོམ་འདོད་ན། །ཡུལ་དང་ཞིང་གི་མིང་བྲིས་ལ། །སྟེང་དུ་ཀླུ་བདུད་བཙན་གསུམ་གྱི། །བླ་རྡོ་བཞག་ལ་དངོས་སུ་བསྐྱེད། །སྣང་སྲིད་ལྷ་འདྲེ་མ་ལུས་བསྟིམ། །ཞག་
གསུམ་ལུས་སྦྱིན་དམར་འགྱེད་བྱ། །ཆུ་མིག་གཉན་པོའི་ནང་དུ་མནན། །ཚེར་མ་ཆུ་རིས་བཙུགས་པར་བཅོས། །ཁྱུང་དམར་འཇུ་འབྱང་དམིགས་པ་བྱ། །དགྲ་ཡུལ་སེར་བས་བརླགས་པར་བསམ། །དགྲ་ཡུལ་འཇོམས་པར་ཐེ་ཚོམ་མེད། །མན་ངག་གནད་ཡིག་ཞལ་ལས་ཤེས། ༼ཉི༽ །བརྒྱད་པ་དགྲ་ལ་གཟེར་རྒོད་གཏོང་འདོད་ན། །ཕུང་ཤུལ་ས་ལ་རུ་པ་བྱ། །སྙིང་གར་མིང་ཡིག་གང་ཡོད་བྲི། །གན་རྐྱལ་བཞག་ལ་བཀུག་གཞུག་བྱ། །གྲི་ཁྲག་སྐྱེར་ཆུང་རྩེ་ལ་བྱུག །སྐྱེར་ཕུར་ལིངྒ་སྙིང་འཛེར་བཏབ། །སྐྱེར་ཕུར་གཟའ་བདུད་དངོས་སུ་བསམ། །དེ་ལ་སྣང་སྲིད་ལྷ་འདྲེ་བསྟིམ། །རང་ཉིད་ཁྲོས་མས་ལྷ་འདྲེ་གཟིར། །ལྷ་འདྲེ་དགྲ་བོའི་སྙིང་གར་གཟིར། །རྡོ་གྲམ་ནང་དུ་མནན་པར་བྱ། །ལུས་སྦྱིན་བཏང་བ་ཤིན་ཏུ་གཅེས། །དགྲ་བོ་གཟིར་བར་ཐེ་ཚོམ་མེད། ༼ཏེ། །དགུ་པ་དགྲ་ལ་འོན་ལོང་ལྐུགས་འདོད་ན། །ལིངྒར་བསྐྱེད་བསྟིམ་ལྷ་དབྱེ་བྱ། །བྱ་རིགས་ཁྲག་དང་སྦལ་པའི་ཁྲག །ཕ་བོང་ར་ཁྲག་ནག་པོ་བྱུག །ལོང་བར་འདོད་ན་མིག་ལ་རཾ། །འོན་པར་འདོད་ན་རྣ་བར་བྷྱོ། །ལྐུགས་པར་འདོད་ན་ལྕེ་ལ་བྷྱོ་ནན། །གཉན་ས་གསུམ་དུ་གདན་དུ་
བཏིང་། །དེ་ནས་ལིང་ག་བྱུག་ཕྱུང་ནས། །ལྷོ་ཕྱོགས་འབྱུང་པོ་དམིགས་སུ་མནན། །རྡོ་རྗེ་ངག་མནན་དམིགས་པ་བྱ། །ལས་དེ་འགྲུབ་པར་ཐེ་ཚོམ་མེད། ༼ཐ༽ །བཅུ་པ་དགྲ་བོ་ཕ་ཚན་ཕྱེ་འདོད་ན། །ལིངྒ་བྲིས་ལ་རྒྱབ་སྤྲོད་བྱ། །འུག་པ་ཕོ་རོག་གཉིས་ཀྱི་ཁྲག །བྱུག་ནས་གཉན་སའི་འོག་ཏུ་བཏིང་། །རང་ཕྱོགས་དག་ལ་བྱ་ཁྱུང་དང་། །གཞན་ཕྱོགས་དག་ལ་སྦྲུལ་ནག་བསྙིལ། །གཞན་ཡང་ལྷ་འདྲེ་མང་པོ་བསྟིམ། །བསྐུལ་པ་གསུམ་འདམ་དམིགས་པ་བྱ། །དེ་ནི་རྒྱ་གྲམ་ལམ་དུ་མནན། །སྟེང་དུ་སྡེ་ལྔའི་སྟངས་སྟབས་བྱ། །གཅེར་བུ་ཕཊ་ཀྱིས་ས་གཞི་འདུལ། །དགྲ་བོ་ཕ་གཅིག་བུ་གཅིག་ཡིན་ཡང་འཁོན། །མན་ངག་གནད་ཡིག་ཞལ་ལ་དྲིས། ༼ད༽ །བཅུ་གཅིག་དགྲ་བོའི་རིགས་རྒྱུད་གཅོད་འདོད་ན། །མ་ནི་སྲིན་མོ་དམར་མོར་བསྐྱེད། །དར་ཁང་ནང་དུ་གཟའ་རྒོད་བསྐྱེད། །མ་ཐེམ་འོག་ཏུ་ཟླ་བས་བརྒྱན། །ཡ་ཐེམ་རྩེ་ལ་ཉི་མ་ཤར། །ཉི་ཟླའི་ཚ་ཟེར་འཕྲོས་པ་ལས། །གཟའ་རྒོད་སྤུན་བདུན་མ་རྟོགས་པ། གཞན་གྱིས་བསྒྲོད་པར་མི་ནུས་བསམ། །མིང་ཡིག་ལིང་ག་བྲིས་པ་ནི། །སྟེང་འོག་གཟའ་བདུད་མགོ་དགུར་
བསམ། །མཚན་མ་རཾ་དང་བཻ་གྱིས་བརྒྱན། །ཕ་མ་མིང་ཡིག་སྙིང་གར་བཅུག །ཕུང་བྱེད་མགོ་ལ་རྡོ་རྗེ་བསྣོལ། །དང་པོ་ཕ་ལ་བསྐྱེད་བསྟིམ་བྱ། །དེ་ནས་སྣང་སྲིད་ལྷ་འདྲེ་བསྟིམ། །གཟིར་བའི་དམིགས་པ་ཁ་ཡར་བྱ། །དེ་ནས་མཛོ་རྭའི་ནང་དུ་བཅུག །ནུབ་ཕྱོགས་འབྱུང་པོའི་ཆུ་སོར་མནན། །རྒྱ་མཚོ་སྟེང་ལྡོག་དམིགས་པ་བྱ། །མན་ངག་སློབ་དཔོན་ཞལ་ལ་ཤེས། །ཨྠྀི། ༼ན༽ །བཅུ་གཉིས་བྱད་མ་ནང་དགྲས་བྱུང་བ་ན། །གཏད་ཁྲམ་བྱས་པའི་ས་ཕྱོགས་དམིགས། །ཡང་ན་དེ་རུ་ཕྱིན་པར་བསྐྱེད། །མ་རིག་འཁྲུལ་པའི་སྔགས་མཁན་འདིས། །སྡེ་བརྒྱད་སྒྲུབ་ནས་བར་ཆད་བྱེད། །མནར་མེད་འགྲོ་བ་ཕ་མ་འདི། །ཁོ་རང་སྲུང་མ་བཅས་པ་ལ། །སྙིང་རྗེ་དྲག་པོས་ལུས་སྦྱིན་བྱ། །ཁོ་ཡི་སྲུང་མའི་སོ་སེམས་དང་ནི། །རང་སེམས་གཉིས་མེད་སྤྲོས་བྲལ་བསྒོམ། །བྱད་མའི་ཆོ་འཕྲུལ་ཅི་བྱུང་ཡང་། །སྙིང་རྗེ་ཆེན་པོའི་སྐྱེ་མེད་བསྒོམ། །གཏོར་སྟེགས་འོག་ཏུ་ཉལ་བར་བསྒོམ། །དེས་ནི་ཚུགས་པར་མི་འགྱུར་རོ། ༼པ༽ །བཅུ་གསུམ་བྱེད་གཅོད་ཐོག་ཏུ་འགེལ་བ་ནི། །རང་ཉིད་གནམ་ལྕགས་ཉིལ་ནས་ནི། །གཤིན་རྗེའི་གཟུགས་ཅན་ཆེ་བར་བསྐྱེད། །བྱུང་
སྟེང་བྱད་མའི་ཕོ་བྲང་བསྐྱེད། །ལུས་སྦྱིན་ཉི་ཤུ་རྩ་གཅིག་བྱ། །བྱད་མ་ཕོ་བྲང་བཅས་པ་རྣམས། །སུམ་ཅུ་རྩ་གསུམ་བར་ཁྱེར་ནས། །ཁ་ཞིབ་ལྡོག་ནས་ས་ལ་བརྡབ། །རྡུལ་ཕྲན་བཞིན་དུ་བརླག་པར་བསམ། །སྐྱེ་མེད་ངང་ལ་མ་བཅོས་བཞག ༼ཕ༽ །བཅུ་བཞི་རི་རབ་སྟེང་ལྡོག་ནི། །རང་ཉིད་ཁྲོས་མ་ནག་མོར་བསྒོམ། །དགྲ་བོ་ཡུལ་ཞིང་བཅས་པ་རྣམས། །ཕྱག་མཐིལ་བཞག་ནས་ནམ་མཁར་ཁྱེར། །ནམ་མཁའི་དབྱིངས་སུ་ཕྱར་བ་ཡིས། །དབང་ཆེན་གསེར་གྱི་ས་གཞིར་བརྡབ། །རྡུལ་ཕྲན་བཞིན་དུ་བརླག་པར་བསམ། །སྐྱེ་མེད་ངང་ལ་མ་བཅོས་བཞག །བྱད་མ་བཟློག་པར་ཐེ་ཚོམ་མེད། །ཨྠྀི་རྒྱ། ༼བ༽ །བཅོ་ལྔ་རྒྱ་མཚོ་ཧུབ་འདེབས་ནི། །རང་ཉིད་བྱ་ཁྱུང་ཆེན་པོར་བསྒོམ། །སྙིང་གར་ལྕགས་ཀྱི་རྡོ་རྗེ་བསྒོམ། །བྱད་མ་ཞེ་སྡང་སྦྲུལ་དུ་བསྒོམ། །བྱད་མའི་སྙིང་གར་ནི་ཅིག་བསམ། །རང་ཉིད་རི་རབ་རྩེ་མོར་བསམ། །སྦྲུལ་ནི་རྒྱ་མཚོའི་གཏིང་དུ་བསྒོམ། །རང་གི་སྙིང་གའི་རྡོ་རྗེ་དེས། །ཚ་ཟེར་རབ་ལྡན་སོང་ནས་སུ། །ཁོ་ཡི་སྙིང་གའི་རྨི་ལ་བརྒྱབ། །རྡུལ་ཕྲན་བཞིན་དུ་བརླག་པར་བསམ། །རང་ཉིད་བྱ་ཁྱུང་རྒྱལ་པོ་ཡིས། །རྒྱ་མཚོ་
ཧུབ་ཀྱིས་བཏབ་ནས་འཐུང་། །སྦྲུལ་དང་བྱད་མར་གྱུར་ཏེ་མིད། །སྙིང་རྗེ་བསྒོམ་ཞིང་སྨོན་ལམ་བཏབ། །སྐྱེ་མེད་ངང་ལས་མ་གཡོས་བཞག །ནག་སྦྱོར་འདི་དག་ཐམས་ཅད་ལ། །བསྔོ་བ་སྨོན་ལམ་རྒྱ་ཡིས་གདབ། །སྙན་བརྒྱུད་ནག་སྦྱོར་བཅོ་ལྔ་འདི། །བཙན་དུག་ཧ་ལ་ནག་པོ་ཡིན། །ཐོ་ཅོ་ཅན་གྱིས་ཐོས་མི་རུང་། །རང་དོན་མེད་ཅིང་གཞན་དོན་རྫོགས། །རི་ཁྲོད་འགྲིམས་པའི་རྣལ་འབྱོར་པ། །ཚེ་འདིར་འདུན་མར་ཞེན་པ་ལོག །ཕྱི་མ་དང་ལེན་གཉན་ཁྲོད་འགྲིམ། །བྱང་ཆུབ་སེམས་དཔའི་རིགས་ཅན་ལ། །ངན་སྔགས་འདི་དག་སྦྱིན་པར་བྱ། །གཅིག་བརྒྱུད་མིན་པར་མ་སྤེལ་ཅིག །བདག་འདྲ་ཨ་གཉན་དམ་པ་ཡིས། །གཅོད་ཀྱི་གྲུབ་མཐའ་འཛིན་པ་ཡི། །བླ་མ་བརྒྱ་དང་ལྔ་ལ་གཏུག །གཞུང་དང་མན་ངག་ཐོར་བུ་ཡི། །གདམས་པ་དཔག་མེད་ཞུས་དོན་དུ། །བསྟན་པ་སྲུང་བའི་མཚོན་ཆ་སྟེ། །མན་ངག་ནག་སྦྱོར་མ་རྙེད་ནས། །ཟིལ་བསྒོམ་ཡོན་ཏན་མགོན་པོའི་དྲུང་། །ལོ་གསུམ་འབྲེལ་བས་གནང་བ་ལགས། །དེ་ནས་ཨ་གཉན་དམ་པ་ཡིས། །གུ་རུམ་རི་ཁྲོད་དབེན་གནས་སུ། །ཡི་གེའི་རིས་སུ་བྲིས་པ་དགེ །གཞན་ལ་མ་སྤེལ་བཀའ་རྒྱ་ཡོད། །
གསེར་སྲང་བརྒྱ་དང་ཁྱད་པར་མེད། །གཅིག་བརྒྱུད་སྤེལ་ཀྱང་བཀའ་རྒྱ་ནི། །གསེར་སྲང་གང་གིས་བཀའ་རྒྱ་བཀྲོལ། །དེ་ལ་མནའ་རྒྱ་གདམས་ལ་གཏད། དཔེ་ཚང་སུམ་ཅུའི་མཚམས་ནས་སུ། །བརྒྱུད་པ་ནི། ཨ་གཉན་ནས། ཨ་ནན་ཏ་བི་ཛ། དེས་ཨ་རཱ་ག་ལ། རཱ་གས་ཅུང་ཟད་ཙམ་གསལ་བར་བཀོད་པའོ། །མནྟྲ་རྒྱ། བཀའ་གསང་རྒྱུ།། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།