རི་ཆོས་མཚམས་ཀྱི་ཞལ་གདམས་ལས། ཀུ་སཱ་ལིའི་ཚོགས་གསོག་དང་འབྲེལ་པ་ལ་བཙས་གཟའ་འབྱེད་དང་སྨྱོ་གཅོད་དམ་པའི་ལྕགས་དྲྭ།
རི་ཆོས་མཚམས་ཀྱི་ཞལ་གདམས་ལས། ཀུ་སཱ་ལིའི་ཚོགས་གསོག་དང་འབྲེལ་པ་ལ་བཙས་གཟའ་འབྱེད་དང་སྨྱོ་གཅོད་དམ་པའི་ལྕགས་དྲྭ་བཞུགས་སོ།
ན་མོ་གུ་རུ་ཀ་མ་ལ་ཤཱི་ཌཱ་ཀི་ནཱི་ཡེ། འདི་རུ་གཅོད་ཀྱི་ཟབ་གནད་དམིགས་ཕྲན་བྲི། །ཕ་གཅིག་དམ་པ་མ་གཅིག་ལབ་སྒྲོན་གྱིས། །བུ་གཅིག་བདག་དང་བརྒྱུད་འཛིན་བྱིན་གྱིས་རློབས། །དུས་ངན་སྙིགས་མར་རྒྱལ་འགོང་དམ་སྲི་དར། །མི་ཕྱེད་སྨྱོན་པར་འགྲོ་བའི་དུས་ལ་ཕྱིན། །ཕལ་ཆེར་རང་སྲོག་རང་གིས་བཅད་ནས་འཆི། །ནད་པ་གདོན་ཅན་ལུས་ངན་སྙིང་རྗེའི་གནས། །དེ་ལ་ནང་དུ་སྙིང་རྗེའི་སེམས་བསྐྱེད་ནས། །ཕྱི་རུ་དྲག་ཅིང་རྩུབ་པའི་དམིགས་པས་འདུལ། །རང་ཉིད་དྲན་རྫོགས་དམ་པ་ནག་པོའི་སྐུ། །ཨ་ཙ་ར་ཡི་གཟུགས་ཅན་འཇིགས་པར་
བསྒོམས། །སྐུ་ལས་མེ་འབར་ནད་པ་གདོན་བཅས་རྣམས། །ལན་བདུན་བར་དུ་བསྲེགས་པའི་ཐལ་བ་དེ། །རླུང་ནག་འཕྲོས་ནས་གཏོར་ཏེ་མི་དམིགས་བསམ། །དེ་རྗེས་གདོན་ལ་སྙིང་རྗེ་ཐུན་གཅིག་བསྒོམ། །དེ་ནས་ནད་པ་ལྕགས་ཀྱི་དྲྭ་བ་ནི། །སྨན་སྒོའི་དབྱིབས་ཅན་གཅིག་གི་ནང་དུ་ཚུད། །རང་གི་ཕྱག་གཡོན་དེ་ཡི་ཁ་བཟུང་བསམ། །དམིགས་པ་གསལ་ན་བྱ་བླག་མི་མང་ཞིང་། །ཆུ་དང་གཡང་ས་སོགས་ལ་མཆོང་མི་འགྱུར། །དེ་ཉིད་ཕྱག་གཡོན་ལྕགས་སྲེག་ཏི་ཚར་བཞག །ཕྱག་གཡས་ལྕགས་སྲེག་ཐོ་བ་མེ་འབར་བསམ། །ཡུངས་སད་རྡུང་ལྟར་དྲག་ཏུ་
བརྡུངས་པ་ཡིས། །གདོན་དང་ནད་པའི་ལུས་པོ་དབྱེར་མེད་པར། །ཤ་སྐྱོ་ཁྲག་སྐྱོ་རུས་ཕྱེར་གྱུར་པར་བསམ། །དེ་འདྲའི་དམིགས་པ་ཚར་གྲངས་བདུན་རེའི་མཐར། །གདོན་ལ་སྙིང་རྗེ་དྲག་པོ་ཐུན་གཅིག་བསྒོམ། །དེ་རྗེས་སྙིང་རྗེའི་ངང་ལ་ཐུན་གཅིག་བཞག །དེ་ཉིད་རྩེ་གཅིག་བར་མེད་བསྒོམས་བྱས་ནས། །རབ་ནི་ཞག་གཅིག་འབྲིང་ནི་ཞག་པོ་གཉིས། །ཐ་མ་ཞག་གསུམ་མི་འགོར་སྨྱོ་རྒོད་ཐུལ། །ནུབ་མོའི་སྲོད་ལ་ཐུན་རེ་བསྒོམས་པས་ཀྱང་། །སྲོག་རླུང་ཅན་འགར་ཕན་པ་མྱོང་བས་གྲུབ། །རང་ཉིད་གཅིག་པུར་རི་ལ་འདུག་པའི་ཚེ། །སྒོམ་ཁང་བཞག་ནས་དོན་གཉེར་འགྲོ་བའི་དུས། །རང་ཉིད་སྒོར་བུད་རྐང་དུང་ལན་གསུམ་འབུད། །རང་ཉིད་ཁྲོས་མ་ནག་མོའི་ཏིང་འཛིན་གྱིས། །ཡུལ་དེའི་ལྷ་འདྲེ་དྲག་རྩལ་གང་ཆེ་འབོད། །རང་ཉིད་དོན་གཉེར་ཚུར་ལ་མ་འཁོར་བར། །ང་ཡི་སྒོམ་ཁང་ཀ་ཆར་བཅས་པ་ལ། །མི་ངན་ཇག་རྐུན་འཚེ་བ་མ་བཏང་སྲུངས། །ང་ཡི་ཀ་ཆ་ཐམས་ཅད་ཁྱོད་ལ་བཅོལ། །གལ་ཏེ་མ་ཐུབ་ཀ་ཆ་ཁྱེར་འདུག་ན། །ལེ་ལན་ཁྱོད་དང་གནས་བདག་གཉིས་ལ་འདེད། །ང་ཉིད་ཇི་སྲིད་འཁོར་བ་མ་སྟོངས་བར། །ཁྱོད་ཉིད་གནས་པའི་ཕོ་བྲང་རྩེ་དེར་
འདུག །རི་བྲག་ཀུན་བཤིག་མཚོ་དང་ཆུ་མིག་བསྐམ། །ཤིང་གཉན་ཀུན་གཅོད་མཛེ་རོ་དམེ་རོ་བསྲེག །དཀར་ཐབ་དམར་ཐབ་སྔོ་ཐབ་དུག་ཐབ་བརྫོག །མཛེ་ཁྲག་མཚོར་བསྐྱིལ་མཛེ་ཤ་ཐང་མར་བརྡལ། །ཁྱོད་ཉིད་རྩད་ནས་བརླག་ཅིང་དྲུང་ནས་ཕྱུང་། །རྡུལ་དུ་མི་བརླག་རེ་ནི་ན་ར་ཀན། །ཁྱོད་ལ་མཐུ་རྩལ་ཅི་འདུག་ད་རེས་བལྟ། །དེ་སྐད་སྨྲས་པ་གནས་བདག་ལྷ་འདྲེ་དེས། །ཅི་བགྱིས་བཀའ་ཉན་ཁས་བླངས་དམ་བཅས་ནས། །གནས་དེ་སྲུང་ཞིང་སྦེད་དེ་སྐྱོབ་པར་བསམ། །སྒོ་རྩ་དེ་རུ་ཐལ་རྒྱ་བྲིས་ཏེ་འགྲོ། །བྱེས་སུ་འགྲོ་ཚེ་ཇག་རྐུན་བཅིང་བ་ནི། །རང་གི་ཞབས་འོག་ལྕགས་སྲེག་ཁང་སྒྲོམ་ནི། །རྒྱ་ཆེ་གཏིང་ཟབ་མུན་ནག་འཁྲིགས་པའི་ནང་། །ཇག་རྐུན་ཐམས་ཅད་དེའི་ནང་ཚུད་པ་ལ། །ཁ་ལེབ་ལྕགས་སྲེག་དྲྭ་བས་བཀབ་པ་ཡིས། །དྲ་བའི་ནང་དུ་ཁོང་རྣམས་རྐང་པ་འཐོགས། །ཐམས་ཅད་མགོ་མཐུར་བསྟན་ཏེ་མཆོང་བ་ཡི། །དེ་སྟེང་མི་ལྤགས་གཡང་གཞིས་བསྣོལ་མར་བཀབ། །དེ་སྟེང་རང་ཉིད་ཁྲོས་མའི་ཞབས་གཡོན་མནན། །དམིགས་པ་གསལ་ན་དེ་ཀས་ཆོག་པར་བཤད། །ཆོ་འཕྲུལ་འབེབས་པ་ཀ་ཆ་ཤོར་མ་ཐག །རང་ཉིད་ཕག་མོའམ་
ནི་ཁྲོས་མའི་ང་རྒྱལ་གྱིས། །ལྷ་འདྲེ་དབང་དུ་བསྡུས་ནས་དམར་འགྱེད་བྱ། །དེ་ཟོས་ཆང་སྨྱོན་ཅན་གྱིས་ཆང་འཐུང་ལྟར། །ཐམས་ཅད་ཁྲོས་འཁྲུགས་ཞེ་སྡང་མེ་ལྟར་འབར། །ཡུན་རིང་མི་འགོར་ཉེས་བྱེད་དགྲ་འདི་ལ། །ཆོ་འཕྲུལ་དྲག་པོ་མངོན་སུམ་མི་བཏང་ཞིང་། །ཀ་ཆ་འདི་དག་མྱུར་དུ་མ་ལོན་ན། །ལྷ་འདྲེ་ཁྱེད་ཉིད་རྩད་ནས་མི་སྐམ་རེ། །དེ་སྐད་མཁའ་འགྲོས་གསུངས་བསམ་འོ་དོད་བྱ། །ཤིང་གཉན་འཐེན་སྤྲུགས་ལྷ་འདྲེའི་སྐྲ་འཐེན་བསམ། །རྡོ་རྗེའི་ཐོག་ཕབ་གནས་ཁང་བཤིག་བསྒོམ་ལ། །བྲག་དང་མཚོ་གཉན་རྣམས་ལ་རྡོ་འཐག་བྱ། །ལྷ་འདྲེའི་དམག་ཚོགས་མི་ཡི་དམག་གཤར་ལྟར། །གོ་གྱོན་མཚོན་ཐོགས་རིང་ནས་རྒྱུག་པར་བསམ། །ཀི་སྒྲ་བསྲོ་སྒྲ་དར་འཕྲུ་རླུང་ལྟར་འཚུབ། །ཀླུ་བདུད་རྣམས་ནི་ཁྲོ་གཟུགས་གདེང་ཀ་ཅན། །སྤྲིན་ནག་འབྲུག་སྒྲ་ཐོག་སེར་དྲག་པོར་བཅས། །དགྲ་ཡི་ཡུལ་སོང་ཐོག་སེར་ལྟས་ངན་ཚོགས། །མི་རུང་སྣ་དགུ་ཆར་མུན་འཁྲིགས་ལྟར་བསྒོམ། །ལ་བཙས་གཉན་པོ་དགྲ་བོ་དངོས་སུ་བསྒོམ། །གཅེར་བུར་བུད་ནས་ཕཊ་སྒྲ་རྐང་དུང་འབུད། །དེ་ལ་ཁོ་ཉིད་བཀུག་གཞུག་ལན་གསུམ་བྱས། །དེ་ཉིད་ཁྲོས་མའི་གྲི་གུག་གིས་གཏུབ་
བསམ། །དགྲ་བོའི་མགོ་བཅད་འཕང་བསམ་རྩེ་ཡི་རྡོ། །དགྲ་ཕྱོགས་འཕངས་རྗེས་ལ་བཙས་ཕྱོགས་མཚམས་གཏོར། །ལ་ཁར་དགྲ་བོ་བཤས་ནས་བཞག་པ་ཟདེ། །ལྷ་འདྲེ་ཀུན་གྱིས་ཟ་སྐལ་བྱེད་པར་བསམ། །དེས་ནི་ལ་བཙས་གཟའ་འབྱེད་ཅེས་བྱ་སྟེ། །དྲིན་ཆེན་སློབ་དཔོན་གྱིས་གསུང་སྙན་བརྒྱད་ཡིན། །རྟགས་བྱུང་ནས་ནི་ལ་བཙས་སྔར་ལྟར་བརྩིག །རིན་ཆེན་སྣ་བཞི་ལས་གྲུབ་སྐུ་མཁར་ནི། །འདོད་ཡོན་རྣམ་པ་སྣ་ཚོགས་ཀྱིས་བཀང་བ།། །ལྷ་འདྲེ་ཐམས་ཅད་དགའ་ཞིང་མགུ་བར་བསམ། །ནང་དུ་འབྲུ་དང་རིན་ཆེན་ཅུང་ཟད་བླུག །བཀྲ་ཤིས་ཚིགས་བཅད་བརྗོད་ནས་བཞག་པ་ཡིན། །དམར་འགྱེད་བྱེད་སྐབས་པགས་པ་དེ་ཉིད་ནི། །ས་ཕྱོགས་གང་འདོད་ཁྱབ་པ་དེ་ཡི་སྟེང་། །ཡུལ་དེའི་སྐྱེས་པ་བུད་མེད་ཁྲོམ་ལྟར་འཚོགས། །རང་ཉིད་ཕག་མོའི་འོད་ཟེར་དམར་པོ་ཡིས། །དེ་རྣམས་བླ་ཡིད་ཚེ་སྲོག་ལོངས་སྤྱོད་ནོར། །འོད་ཟེར་རྣམ་ལྔར་བསྡུས་ཏེ་རང་ལ་བསྟིམ་། །རང་ཉིད་བཀྲག་མདངས་གཟི་བརྗིད་ཇེ་ཆེར་བསྒོམས། །ཁོང་རྣམས་དད་གུས་ཕྱག་བསྐོར་བྱེད་པར་བསམ། །རྗེས་སུ་དམིགས་མེད་ངང་ལ་བཞག་པར་བྱ། །རྒྱུན་ཁྱེར་
བསྒོམ་པའི་དང་པོ་རྨི་ལམ་དང་། །ཕྱིས་ནས་མངོན་སུམ་དབང་དུ་བསྒོམ་ལྟར་འདུ། །ཀུ་སཱ་ལི་ཡི་ཚོགས་གསོག་ལས་ཚོགས་སྐོར། གཞན་ལ་སྤེལ་ན་མི་དགེ་གནོད་སེམས་རྒྱུ། །དེ་ཕྱིར་འདི་ཡང་ཐེམ་མེད་གུད་དུ་བཀོད། །ཚར་ཚད་སློང་ཚད་འགའ་ཞིག་ཉམས་མྱོང་བའི། །གཅོད་མཁན་རཱ་ག་ཨ་སྱ་ཞེས་བྱ་བས། །མ་གཅིག་བྱིན་གྱིས་བརླབས་པའི་རྟགས་མཚན་ཡང་། །ལན་འགའ་བྱུང་བས་ཉེས་འགལ་མེད་སྙམ་ནས། །རུ་པའི་གཅོད་རྒྱུད་ཀརྨ་བཱིརྱར་གདམས། །ཉེས་འགལ་མཆིས་བཤགས་དགེ་བ་བྱང་ཆུབ་བསྔོ། །མངྒ་ལཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།