གཅོད་ཁྲིད་གདན་ཐོག་གཅིག་མའི་སྒྲུབ་ཐབས་དངོས་གྲུབ་སྒོ་འབྱེད་ཀྱི་ཟིན་བྲིས།
གཅོད་ཁྲིད་གདན་ཐོག་གཅིག་མའི་སྒྲུབ་ཐབས་དངོས་གྲུབ་སྒོ་འབྱེད་ཀྱི་ཟིན་བྲིས་བཞུགས་སོ། །
རང་རིག་ཡེ་ཤེས་སྟོན་མཛད་པ། །ཀུན་དགའི་མཚན་ཅན་ཞབས་ལ་འདུད། །རང་གཞན་ཕན་ཕྱིར་སྒྲུབ་ཐབས་བྲི། །མཁའ་འགྲོའི་ཚོགས་ཀྱིས་གནང་བ་སྩོལ། །འདི་རྗེ་ཐམས་ཅད་མཁྱེན་པ་དམ་པ་རྒྱ་གར་གྱི་སྤྲུལ་པར་ཉིད་ཀྱི་ཞལ་གྱིས་བཞེས་པ་ཀརྨ་པ་མི་བསྐྱོད་རྡོ་རྗེས་མཛད་པའི་ཚིགས་བཅད་མ་དང་། ། དེའི་ཁྲིད་རིམ་རྒྱས་པ་ཞྭ་དམར་ལྔ་པས་མཛད་པའི་ཉེ་བར་མཁོ་བའི་མན་ངག་སྒྲུབ་ཐབས་དངོས་གྲུབ་སྒོ་འབྱེད་ཀྱི་ཟིན་བྲིས་ལ། དབེན་པའི་གནས་སུ་མཎྜལ་གྲུ་བཞི་པ་ལ་པདྨ་འདབ་བཞི་ཕྱོགས་མཚོན། དབུས་མ་མཐིང་ག །མུ་ཁྱུད་དཀར་པོ། ལྟེ་བར་ཐཾ། ཤར་དུ་ཧ། ལྷོར་རི། ནུབ་ཏུ་ནི། བྱང་དུ་ས་བྲིས་པ་ལ། མེ་ཏོག་གི་ཚོམ་བུ་བཀོད་པའི་དབུས་སུ་མཉྫིའི་ཁར་ཟངས་
གཞོང་ནས་ཀྱིས་བཀང་བའི་སྟེང་དུ་ཀ་པཱ་ལ་ཆང་གིས་བཀང་བར་བདུད་རྩི་རིལ་བུ་བཏབ་ལ་བཞག །དེའི་སྟེང་མེ་ལོང་ལ་སིནྡྷུ་ར་བྱུགས་ལ། ལབ་ཀྱི་སྒྲོལ་མ་ཁྲོས་མའི་ཆ་ལུགས་སུ་བྲིས་ལ་བཞག །མཐར་མཆོད་པས་བསྐོར། ཚོགས་དང་གཏོར་མ་བཤམས། ཌ་དྲིལ་དང་རྐང་གླིང་ཡང་རང་མདུན་དུ་བཀོད། མཚམས་དམ་དུ་བཅད་ལ། ན་མོ་གུ་རུ་དེང་ནས་བཟུང་སྟེ་བླ་མ་དཀོན་མཆོག་གསུམ། །ངེས་པར་སྙིང་ནས་སྐྱབས་གསོལ་སེམས་ཅན་རྣམས། །ཚད་མེད་བཞི་པོ་རྒྱུད་ལ་སྐྱེ་བ་ནས། །བདག་གི་རྫོགས་བྱང་ཉིད་ལ་འགོད་པར་བྱ། །ཞེས་ལན་གསུམ་བརྗོད། ཕྱི་ནང་ཆོས་ཀུན་སྟོང་པའི་རང་བཞིན་ལས། །རང་ཉིད་མ་
གཅིག་ལབ་སྒྲོན་སྐུ་མདོག་མཐིང་། །ཞལ་གཅིག་སྤྱན་གསུམ་ནམ་མཁའི་མཐོངས་ལ་གཟིགས། །སྐུ་ལུས་གཅེར་བུ་རུས་པའི་རྒྱན་དྲུག་གསོལ། །ཕྱག་གཡས་སེང་ལྡེང་ཌཱ་རུ་ཏིང་ཤག་སྒྲོག །ཕྱག་གཡོན་བྷནྡྲ་ཁ་ཊཾ་དཀུ་ལ་བརྟེན། །དབུ་སྐྲ་སིལ་མའི་གསེབ་ནས་ཕག་ཞལ་ངུར། །སྐྱིལ་ཀྲུང་ཕྱེད་པའི་སྟབས་ཀྱིས་པད་ཉིར་བཞུགས། །རང་ཉིད་ལྷར་གསལ་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་མ་གཅིག་མ། །ཛཿཧཱུྃ་བཾ་ཧོཿས་གཉིས་སུ་མེད་པར་གྱུར། །ཕཊཿ རང་གི་ཐུགས་ཀར་ཨ་ཡིག་སྔོན་པོ་ལས། །འོད་འཕྲོས་སྤྱི་བོའི་གཙུག་ནས་ཡར་སོང་ནས། །མེ་ལོང་ནང་དང་མདུན་གྱི་བར་སྣང་ལ། །བླ་མ་མ་གཅིག་ལབ་སྒྲོན་སྐུ་མདོག་མཐིང་། །ཞལ་གཅིག་སྤྱན་གསུམ་ནམ་མཁའི་མཐོངས་ལ་གཟིགས། །སྐུ་ལུས་གཅེར་བུ་རུས་པའི་རྒྱན་དྲུག་གསོལ། །ཕྱག་གཡས་སེང་ལྡེང་ཌཱ་རུ་ཏིང་ཤག་སྒྲོག །ཕྱག་གཡོན་བྷནྡྷ་ཁ་ཊཾ་དཀུ་ལ་བརྟེན། ། དབུ་སྐྲ་སིལ་མའི་གསེབ་ནས་ཕག་ཞལ་ངུར། །སྐྱིལ་ཀྲུང་ཕྱེད་པའི་སྟབས་ཀྱིས་མཁའ་ལ་གར། །རིགས་བཞིའི་མཁའ་འགྲོ་འབུམ་གྱི་དབུས་ན་རོལ། །ལྷ་ཚོགས་དེ་དག་གནས་
གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་མ་གཅིག་མ། །བཀའ་བརྒྱུད་ཡི་དམ་ཆོས་སྐྱོང་སྤྱན་དྲངས་གྱུར།། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །མ་གཅིག་ལབ་སྒྲོན་འཁོར་བཅས་གཤེགས་སུ་གསོལ། །ཛཿཧཱུྃ་བཾ་ཧོ༔གཉིས་སུ་མེད་པར་གྱུར། །དབང་ལྷ་རིགས་ལྔ་སྤྱན་དྲངས་དབང་བསྐུར་ནས། །དབང་རྟགས་མི་བསྐྱོད་པ་ཡིས་དབུ་བརྒྱན་གྱུར། །བདག་མདུན་མཁའ་འགྲོ་མ་རྣམས་ཐམས་ཅད་ཀྱི། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །ཐུགས་ཀར་ཧཱུྃ་མཐིང་ལྟེ་བར་བཻ་དམར་པོ། །དེ་བཞིའི་མཐའ་མར་ཧ་རི་ནི་ས་དང་། །དེ་ཡི་ཐ་མར་སྔགས་ཀྱིས་བསྐོར་བར་གྱུར། །རང་གི་སྙིང་གའི་སྔགས་ལས་འོད་འཕྲོས་ནས། །མདུན་བསྐྱེད་དང་ནི་མེ་ལོང་ལྷ་ལ་ཐིམ། །དེ་ལས་འོད་འཕྲོས་ཕྱོགས་བཅུའི་རྒྱལ་བ་དང་། ། དཔའ་བོ་མཁའ་འགྲོའི་བྱིན་རླབས་ཐམས་ཅད་བསྡུས། །མདུན་བསྐྱེད་དང་ནི་མེ་ལོང་ལྷ་ལ་ཐིམ། །དེ་ཡི་ཐུགས་ལས་བྱིན་རླབས་དངོས་གྲུབ་ཀུན། །འོད་ཟེར་ཚུར་འདུས་རང་
ལ་ཐིམ་པར་གྱུར། །དམིགས་པ་དེའི་ངང་ནས་བསྙེན་པ་བྱ་སྟེ། །ཨོཾ་ཨཱཿཧཱུྃ་བཾ་གུ་རུ་ཧ་རི་ནི་ས་སིདྡྷི་ཧཱུྃ། ཞེས་མང་དུ་བཟླས་ལ་ཐུན་མཚམས་སུ་མཆོད་པ་འབུལ་བ་ནི། དངོས་འབྱོར་ཡིད་ཀྱིས་རྣམ་སྤྲུལ་པའི། །ལྷ་རྫས་དག་པའི་ཉེར་སྤྱོད་རྣམས། །བླ་མ་མཁའ་འགྲོའི་ཚོགས་ལ་འབུལ། །གཟུགས་སྒྲ་དྲི་རོ་རེག་བྱ་རྣམ་དག་པའི། །ཟག་མེད་བདེ་ཆེན་མཆོད་སྤྲིན་རྒྱ་མཚོ་འབུལ། །ཨོཾ་མ་ཧཱ་གུ་རུ་ཌཱ་ཀི་ནཱི་ཧ་རི་ནི་ས་པུལླེ་དྷུ་པེ་ཨཱ་ལོ་ཀེ་གནྡྷེ་ནེ་ཝི་དུ་ཤབྡ་ཨཱཿཧཱུྃ། རང་རིག་ཡེ་ཤེས་སྟོན་མཛད་པའི། །བླ་མ་རྣམས་ལ་ཕྱག་འཚལ་བསྟོད། །མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་དེ་ལ་ཕྱག་འཚལ་བསྟོད། །རིགས་བཞི་མཁའ་འགྲོའི་ཚོགས་ལ་ཕྱག་འཚལ་བསྟོད། །མཁའ་འགྲོ་བྱེ་བ་འབུམ་ལ་ཕྱག་འཚལ་བསྟོད། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཐུན་མཚམས་འདི་དག་ཏུ་གཅོད་ཚོགས་གཞུང་ལེགས་པར་བསྲང་། གཅོད་ཀྱི་གཏོར་བསྔོས་དང་གཏོར་འབུལ་བྱ། མཚམས་གྲོལ་ཁ་མེ་མཆོད་ཅི་རིགས་བྱ། སྒྲུབ་པ་ཐོན་ནས་མེ་ལོང་ནང་གི་མཁའ་འགྲོ་མ་ནམ་མཁའི་མཁའ་འགྲོ་མ་རྣམས་ལ་ཐིམ་པར་བསྒོམ། དེ་ནས་མེ་ལོང་ཐོད་པའི་ནང་གི་ཆང་གིས་བཀྲུ་ནས་འཐུང་། མེ་ལོང་ནང་གི་མ་གཅིག་མཁའ་འགྲོ་རྣམས། །མདུན་བསྐྱེད་མཁའ་འགྲོ་
ལྔ་ལ་ཐིམ་གྱུར་ནས། །མདུན་བསྐྱེད་མ་གཅིག་མཁའ་འགྲོ་སྡེ་ལྔར་བཅས། །འོད་ཞུ་རང་གི་སྙིང་གར་ཐིམ་པར་གྱུར། །དེ་ནས་བཀྲ་ཤིས་བསྔོ་བ་སྨོན་ལམ་བྱ་སྟེ། མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་དེ་ཡི་བཀྲ་ཤིས་ཤོག །དགེ་བ་འདི་ཡིས་མྱུར་དུ་བདག །ལབ་ཀྱི་སྒྲོན་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །དེ་ནས་མཚམས་གྲོལ་ནས་གསང་སྤྱོད་ཞག་བདུན་ལ་བྱ་སྟེ། རང་ཉིད་ལྷ་མོ་ཁྲོ་མོ་སྐུ་མདོག་ནག །སྤྱི་བོར་ཤཱཀྱ་ཐུབ་པ་དཀོན་མཆོག་གསུམ། །མགྲིན་པར་བླ་མ་དམ་པ་རྒྱ་གར་སྐུ། །སྙིང་གར་ཡི་དམ་མཁའ་འགྲོ་སྡེ་ལྔ་དང་། །ལྟེ་བར་ལས་ཀྱི་མཁའ་འགྲོ་ལྗང་གུ་གསལ། །བདག་ཉིད་མཁའ་འགྲོ་ལབ་སྒྲོན་དངོས་ཡིན་ཕྱིར། །ཕྱི་རུ་ཡ་ང་བག་ཚ་འཇིགས་སྐག་མེད། །ནང་དུ་ཆགས་སྡང་བདེ་སྡུག་ཆོས་བརྒྱད་མེད། །དགྲ་གཉེན་ཁྱད་མེད་ཕ་མ་ཡིན་པར་མཉམ། །ལྷ་འདྲེ་ཁྱད་མེད་རྣམ་རྟོག་ཡིན་པར་མཉམ། །གཙང་བཙོག་ཁྱད་མེད་བདུད་རྩི་ཡིན་པར་མཉམ། །སྐྱིད་སྡུག་ཁྱད་མེད་རང་སེམས་ཡིན་པར་མཉམ། །འདི་ཕྱི་ཁྱད་མེད་ནམ་འཆི་སངས་རྒྱས་ཡིན། །རང་སེམས་སྐྱེ་མེད་མ་
གཅིག་ལབ་སྒྲོན་ཡིན། །འདི་ཉིད་མ་བཅོས་བཞག་པ་ཆོས་སྐུ་ཡིན། །ཆོས་སྐུ་རང་ལ་རྙེད་པས་ང་རེ་དགའ། །སྣང་བ་འདི་ཀུན་བདེན་མེད་སྟོང་པ་ཡིན། །དཔེར་ན་རྨི་ལམ་ལྷརྨིས་དང་ཁྱད་པར་མེད། །ཅེས་བརྗོད་ལ་ཌ་རུ་འཁྲོལ་ཞིང་བྲོ་བརྡུང་། མཆོངས་འཁྲབ་གར་རྒྱུག་བྱེད་པ་ལ་སོགས་སྨྱོན་པའི་བརྟུལ་ཞུགས་བྱེད། གཅེར་བུར་བུད་ལ་ཟས་གཙང་བཙོག་མི་བྱ་བར་ཟ། ངག་ཏུ་གླུ་དབྱངས་འོ་དོད་དུ་འབོད་སྣ་ཚོགས་བྱ། ནང་དུ་རང་སེམས་མ་ཡེངས་པར་བལྟའོ། །དེ་ལྟར་བྱས་པས་ལུས་ངག་ཡིད་གསུམ་མཁའ་འགྲོ་མས་བྱིན་གྱིས་བརླབས་ནས། ལུས་ལ་ཅི་བྱས་ཀྱང་སྐྱོན་མི་འབྱུང་། བདེ་བ་འཆར་ངག་ནུས་མཐུ་དང་ལྡན། །སེམས་ལ་བདེ་སྟོང་གི་ཉམས་སྐྱེའོ། །དེའང་མ་གཅིག་གི་ཞལ་ནས། ང་ལ་འགྲོ་འོང་མི་གདའ་སྟེ། །ང་བསྒོམ་གསོལ་བ་འདེབས་པ་དང་། །ཡི་གེ་བཅུ་གསུམ་བཟླས་པ་ལ། །དུས་གསུམ་སངས་རྒྱས་སྲས་བཅས་དང་། །དབྱིངས་ཀྱི་ཡུམ་ཆེན་ང་ཉིད་དང་། །ཡེ་ཤེས་མཁའ་འགྲོ་དཔའ་བོའི་ཚོགས། །ཞེ་ནས་བྱིན་གྱིས་མི་བརླབ་རེ། །དངོས་གྲུབ་རྣམ་གཉིས་མི་སྟེར་རེ། །ཅི་བསམ་དགོས་འདོད་མི་འབྱུང་རེ། །ཞེས་གསུངས་སོ། །གཅོད་ཁྲིད་གདན་ཐོག་གཅིག་མའི་སྒྲུབ་ཐབས་ཟིན་བྲིས་མདོར་བསྡུས་བལྟས་ཆོག་ཏུ་བཀོད་པ་ཀརྨ་ཨ་རཱ་གས་སྦྱར་བའོ། །འདི་ལ་ཉེས་འགལ་གང་མཆིས་པ། །མ་གཅིག་མཁའ་འགྲོའི་ཚོགས་ལ་བཤགས། །དགེ་བས་ཡུམ་ཆེན་དོན་རྟོགས་ཤོག །ཨྠྀི། མངྒ་ལཾ།། །།