གཅོད་ཀྱི་ཚོགས་ལས་རིན་ཆེན་ཕྲེང་བ་ཞེས་བྱ་བའི་རྔ་མཚམས་རོལ་མོ་དང་འདོན་ཐབས།
གཅོད་ཀྱི་ཚོགས་ལས་རིན་ཆེན་ཕྲེང་བ་ཞེས་བྱ་བའི་རྔ་མཚམས་རོལ་མོ་དང་འདོན་ཐབས་བཞུགས་སོ། །ན་མོ་ཌཱཀིའི་ཚོགས་ལ་ཕྱག་འཚལ་ལོ། །སྔོན་གྱི་གཅོད་མཁན་ཆོས་བརྒྱུད་མ་མཐོང་བ་རྣམས་པ་འགས། བརྒྱུད་པ་ཕྱག་ལེན་ཀུན་ལ་མི་འཐད་པའི་གཅོད་ཀྱི་མགོ་མཐའ་བར་ལ། ཇོ་ཅི་ཡིན་གང་ཡིན་མེད་པའི་སྔགས་ནག་གཏོ་མཁན་མིག་ལྟོས་ཡིན་ཞེས་ཟེར། ཞར་བའི་མིག་མཐོང་བཞིན་དུ་རིག་པ་མ་རིག་མཐོང་འདུག་པ་ལ། རྔ་བརྡུང་དང་འདོན་ལུགས་ནི། བདེ་མཆོག་དང་། ཕག་མོ། རྒྱལ་བ་རྒྱ་མཚོ་སོགས་ལས་ཀྱང་། མཆོད་རོལ་དང་མཚམས་རྒྱག་མ་གཏོགས་རྔ་བརྡུང་བའི་འོས་མེད། འདི་ཡང་ཆོ་གའི་དབྱིབས་ལྟར་གསོལ་འདེབས་ལུས་སྦྱིན་དམིགས་རིམ་ཡིན་པས་གལ་ཆེ་བ་ནི་དོན་ཡིད་ཤིང་ལ་འདྲེས་ངེས་དང་། རྟོགས་པ་དང་སྟོང་ཉིད་མེད་ན། ཁ་ནག་ཡིག་ནག་སྤྱད་པ་ཙམ་གྱིས་ཕན་པ་མེད་པས། སྤྲང་པོ་ང་ཡི་ཆོས་ལུགས་ལ་མི་འཐད་དོ། །མ་གཅིག་གི་རྣམ་ཐར་ལས། རྒྱུད་ཀུན་ནས་ཌ་དྲིལ་རྐང་གླིང་གསུངས་པ་བྱིན་རླབས་ཤིན་ཏུ་ཆེ། རྣལ་འབྱོར་པ་སྤྲོས་པ་ལ་བརྡ་ཙམ་དགའ་ན། དགའ་བྲོད་ཀྱི་བདུད་ཚར་གཅོད་པའི་ཕྱིར། རོལ་མོ་
འདོད་ན། མཆོད་པ་བྱིན་རླབས་ཀྱིས་མཚོན་འཚམ་རྒྱག་ཏུ། ཨཱཧཱུྃ་ཟེར་མཚམས་དེར། ཌཱ་དྲིལ་རོལ་མོ་འུར་བརྡུང་དང་། ཧཱུྃ་ཧཱུྃ་ཧཱུྃ་ནས་འུར་བརྡུང་དང་། ཧཱུྃ་ང་ནི་ཁྲོས་མ་ནག་མོ་སོགས་ཞེས་པ་དྲག་པོའི་བསྐུལ་ཡིན་པས་གཟི་བྱིན་བསྐྱེད་ཕྱིར་འུར་བརྡུང་བདུན་བརྡུང་དགུ་བརྡུང་བྱ། དཀར་པོ་དགེ་བ་ལ་གནས་པའི་བར་དུ་བརྡུང་ཆོག་གོ །དེ་ནས་སྤྱན་འདྲེན་མཚམས་སུ་རོལ་མོ་ཆེན་པོ་དང་། ཧཱུྃ། མ་ལུས་སེམས་ཅན་ཀུན་གྱི་སོགས་ནས། མཆོད་པ་བསྟོད་པ་རྣམས་ལ་མི་འགལ་གསུངས། བཟླས་དམིགས་མཎྜལ་ལུས་སྦྱིན་ཀུན་དཀར་འགྱེད་དམར་འགྱེད་ལ་མི་བརྡུང་། ཚོགས་ཀྱི་སྤྱན་འདྲེན་ལ་རྔ་བརྡུང་བ་རྒྱུད་ནས་གསུངས། རྔ་སྒྲ་དུང་སྒྲ་འུ་རུ་རུ་ཞེས་པས་བྱ། དེ་ཕྱིན་གདོན་ཚོགས་དགུ་མ་སོགས་ལ་མི་བྱ། །བསྐང་བ་གཏོར་འབུལ་སོགས་ལ་རྔ་བརྡུང་། རྟ་བྲོ་བཅས་ལ་བྱའོ། །དེ་ཡི་རོལ་མོ་མཚམས་འཛིན་མ་ཤེས་ན། སྨོན་པ་ཕྲུ་གུ་ལྟར་གྱིས་ཅི་བྱ་དེ་བྱེད་མེད་པའི་དབྱུག་པ་དང་འདྲ། ཕོར་ཁ་སྣོད་ཁ་བརྡུངས་བས་འབྲས་བུ་མེད་བཞིན་བྱ་བར་མ་མཛད་གོ་བར་གྱིས། རོལ་མོ་ཆོས་ལུགས་ལྟར་བྱས་ན་དཀྱིལ་འཁོར་གྱི་ལྷ་མཉེས། མཆོད་རྫས་ལ་བྱིན་ཆགས། རྣལ་
འབྱོར་པ་ཚོགས་རྫོགས། ཡོན་བདག་རྐྱེན་འགྱུར། ཡོན་ཏན་དུ་མ་དང་ལྡན་པོ་རྒྱུད་དང་ཕྱག་བཞེས་ཐམས་ཅད་ནས་གསུངས། ཕྲུག་འགའ་ལ་གདམས་པ་ཉམ་ཆུང་འགའ་ལ་ཕན་ཐོགས་པར་ཤོག །དགེའོ། །བཀྲ་ཤིས་ཤོག། །།