རྗེ་རང་བྱུང་རྡོ་རྗེས་མཛད་པའི་གཅོད་ཀྱི་ཚོགས་མཆོད་རིན་ཆེན་དོན་བསྡུས་ཡིད་བཞིན་གཏེར་འབྱུང་།
རྗེ་རང་བྱུང་རྡོ་རྗེས་མཛད་པའི་གཅོད་ཀྱི་ཚོགས་མཆོད་རིན་ཆེན་དོན་བསྡུས་ཡིད་བཞིན་གཏེར་འབྱུང་བཞུགས་སོ། །
ན་མོ་པྲཛྙཱ་པཱ་ར་མི་ཏ་ཡེ། ཡུམ་ཆེན་མཁའ་འགྲོའི་ཚོགས་ལ་ཕྱག་འཚལ་ལོ། །སྤྲོས་མེད་རྣལ་འབྱོར་ཀུན་གྱི་སྤྱོད་ཡུལ་ལྟར། །གཅོད་ཀྱི་ཚོགས་མཆོད་བརྒྱ་སྟོང་བསག་ལ་མཁོ། །གཅོད་ཚོགས་མདོ་རུ་བསྡུས་པའི་ཚོགས་མཆོད་བཏང་ཚུལ་ལོ། །མཆོད་རྫས་གང་འཛོམས་བཤམས། སྐྱབས་ཡུལ་མདུན་གྱི་ནམ་མཁར་བསམས་ལ། མདུན་གྱི་ནམ་མཁར་མ་གཅིག་ལབ་ཀྱི་སྒྲོན་མ་ལ་ཕྱོགས་བཅུའི་སྐྱབས་ཡུལ་རྩ་གསུམ་རྒྱ་མཚོས་བསྐོར་བ་གསལ་བར་གྱུར། བདག་གཞན་འགྲོ་རྣམས་སྐྱབས་མཆི་སེམས་བསྐྱེད་དོ། །ལུས་ངག་ཡིད་ཀྱིས་ཕྱག་འཚལ་མཆོད་པ་འབུལ། །ཉམས་ཆག་སྡིག་ལྟུང་སྙིང་ནས་འགྱོད་པས་བཤགས། །དགེ་
ལ་ཡི་རང་ཆོས་འཁོར་བསྐོར་བར་བསྐུལ། །བཞུགས་གསོལ་འདེབས་སོ་དགེ་རྩ་བྱང་ཆུབ་བསྔོ། །འགྲོ་ཀུན་འཁོར་བ་དོང་ནས་སྤྲུགས་ནས་ཀྱང་། །མ་གཅིག་ལབ་སྒྲོན་གོ་འཕང་མྱུར་ཐོབ་ཤོག །ཚོགས་བསགས་ཡན་ལག་བདུན་པའོ། །རང་མདུན་ནམ་མཁར་དག་པའི་ཞིང་ཁམས་དབུས། །རིན་ཆེན་སེང་ཁྲི་པདྨ་ཉི་ཟླའི་སྟེང་། །རྩ་བའི་བླ་མ་མ་གཅིག་ལབ་ཀྱི་སྒྲོན། །དཀར་གསལ་མཛེས་འཛུམ་དར་དང་རིན་ཆེན་བརྒྱན། །དབུ་སྐྲ་ཐོར་ཚུགས་ཟལ་བུ་སྐུ་རྒྱབ་གྲོལ། །ཕྱག་གཡས་སེང་ལྡེང་ཌཱ་རུ་ནམ་མཁར་འཁྲོལ། །གཡོན་པས་དངུལ་དཀར་དྲིལ་བུ་དཀུ་
ལ་བརྟེན། །ཞབས་གཉིས་སྐྱིལ་ཀྲུང་ཕྱེད་པའི་གར་གྱིས་རོལ། །སྙན་གོང་གཡས་ཕྱོགས་དམ་པ་རྒྱ་གར་ལ། །ཕ་རྒྱུད་ཐབས་ཀྱི་བརྒྱུད་པའི་བླ་མས་བསྐོར། །གཡོན་དུ་རྗེ་བཙུན་ཕག་མོ་ལྷ་ལྔ་ལ། །མ་རྒྱུད་ཤེས་རབ་བརྒྱུད་པའི་བླ་མས་བསྐོར། །སྟེང་དུ་ཡུམ་ཆེན་རྒྱལ་བ་ཤཱཀ་ཐུབ་ལ། །གཉིས་མེད་དོན་གྱི་བརྒྱུད་པའི་བླ་མས་བསྐོར། །གདན་ཁྲིའི་མཐའ་བསྐོར་གཅོད་ཡུལ་བཀའ་སྲུང་ཚོགས། །མགོན་པོ་ཡོན་ཏན་མགྲོན་རིགས་དེ་རྒྱབ་ཏུ། །ལན་ཆགས་ཤ་འཁོན་སྙིང་རྗེའི་མགྲོན་ཀུན་གསལ། །མ་གཅིག་གནས་གསུམ་འབྲུ་གསུམ་འོད་ཟེར་གྱིས། །འོག་མིན་གནས་ནས་གཅོད་ཡུལ་བརྒྱུད་པའི་ཚོགས། །མདུན་གྱི་ནམ་མཁར་སྤྱན་དྲངས་བྱོན་པར་གྱུར། །བཛྲ་ས་མ་ཡ་ཛ༔ སྤོས་བདུག་ལ། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །ཡུམ་ཆེན་འཁོར་བཅས་གནས་འདིར་གཤེགས་སུ་གསོལ། །ཛཿཧཱུྃ་བཾ་ཧོཿགཉིས་སུ་མེད་པར་གྱུར། །ཞེས་དང་། ་སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་
བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །པདྨ་ཀཱ་མ་ལུ་སྟྭཾ། ཞེས་སྤྱན་དྲངས་པར་བཞུགས་གསོལ་ཕྱག་འཚལ་མཆོད་པ་ནི། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་བཟང་ཆབ། །ཞལ་ཟས་རོལ་མོ་ཇི་སྙེད་པ། །བདག་གིས་གུས་པས་བཤམས་པ་འདི། །ཡུམ་ཆེན་འཁོར་དང་བཅས་ལ་འབུལ། །རྒྱལ་སྲིད་བཀྲ་ཤིས་རྫས་རྟགས་བརྒྱད། །འདོད་པའི་ཡོན་ཏན་རྣམ་པ་ལྔ། །ཕྱི་ནང་སྒེག་སོགས་ལྷ་མོ་བཅས། །ཡུམ་ཆེན་འཁོར་དང་བཅས་ལ་འབུལ། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུར་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །བསགས་སྦྱངས་སྤེལ་གསུམ་སྤྱི་ལྟར་ལ། བྱེ་བྲག་ཏུ་མཎྜལ་འབུལ་བ་ལ། ཐོག་མར་ནམ་མཁའ་སྒོ་འབྱེད་དུ་འཕོ་བ་ལ། བདག་ལུས་དབུ་མ་སྙིང་གི་པད་མོར་ཟུག །རྣམ་ཤེས་འུབ་འདུས་འོད་ཀྱི་ཐིག་ལེར་འདྲིལ། ་།ཚངས་བུག་ནས་འཕོས་མ་གཅིག་ཐུགས་ཀར་ཐིམ། །དགོངས་པ་མཉམ་ཉིད་ངང་དུ་རོ་
གཅིག་གྱུར། །ཕཊ་ཕཊ་ཕཊ། ཅེས་སྤྲོས་བྲལ་དུ་བཞག །མ་གཅིག་ཐུགས་ལས་རང་རིག་གི །ཕག་མོ་དམར་མོ་ཕྱིར་འཕྲོས་པས། །དེ་ཡིས་བེམ་པོ་བཤས་གྱུར་པའི། ། པགས་པ་གསེར་གྱི་ས་གཞི་ལ། །རང་ལུས་རི་མཆོག་ཉི་ཟླས་བརྒྱན། །སྡེབ་བཞི་གླིང་བཞི་འཁོར་ཡུག་བཅས། །ལུས་མཎྜལ་ཡོངས་སུ་རྫོགས་པ་འདི། །ཡུམ་ཆེན་རྒྱལ་བའི་དཀྱིལ་འཁོར་ལ། །ཀུན་ནས་དད་པས་བདག་འབུལ་ལོ། །ཕཊ་ཕཊ་ཕཊ། ཅེས་དང་། སླར་ཡང་བེམ་རིག་ཕྲལ་ནས་མཆོད་མགྲོན་ལ་ལུས་ཀྱི་ཚོགས་འབུལ་བ་ནི། ཕཊ། རང་རིག་རང་ལུས་ནས་ཐོན་ནམ་མཁར་འཕངས། །མཁའ་འགྲོ་མ་རུ་གྱུར་ནས་ཕྱག་གཡས་ཀྱི། །གྲི་གུག་བེམ་པོའི་ཐོད་པར་ཚད་ཙམ་གྱིས། །བྲེག་ནས་རང་བྱུང་ཐོད་སྐྱེད་སྟེང་དུ་བཙུགས། །དེ་ནང་བེམ་པོ་བཅུག་པར་མེ་རླུང་གཡོས། །ཞུ་ཞིང་ཁོལ་ནས་འབྲུ་གསུམ་བྱིན་བརླབས་པས། །རང་རང་ཅི་འདོད་མཆོད་པའི་སྤྲིན་འཕྲོ་བ། །ཟག་མེད་བདུད་རྩིའི་རྒྱ་མཚོར་གྱུར་པ་འདི། །བླ་མ་ཡི་དམ་དཀོན་མཆོག་སྲིད་ཞུའི་མགྲོན། །ཕྲིན་ལས་མགྲོན་དང་གནོད་བྱེད་ཤ་འཁོན་མགྲོན། །རིགས་དྲུག་བྱམས་དང་སྙིང་རྗེའི་མགྲོན་།
རྣམས་ལ། །བདག་ལུས་ཟག་མེད་བདུད་རྩིའི་ཚོགས་མཆོད་འབུལ། །རྩ་གསུམ་ཆོས་སྐྱོང་ཐུགས་དམ་བསྐང་གྱུར་ཅིག །བགེགས་རིགས་ལན་ཆགས་ཤ་འཁོན་བྱང་གྱུར་ནས། །གནོད་སེམས་ཀུན་ཞི་ཕན་སེམས་ལྡན་གྱུར་ཅིག །རིགས་དྲུག་ཀུན་ཚིམ་སྡུག་བསྔལ་ཞི་གྱུར་ཅིག །ཐམས་ཅད་སངས་རྒྱས་གོ་འཕང་ཐོབ་གྱུར་ཅིག ། ཕཊ་ཕཊ་ཕཊ། ཅེས་དཀར་འགྱེད་དང་དམར་འགྱེད་ཕུང་པོ་ཤ་ཁྱེར་ཁྲག་ཁྱེར་ལ་ཐོག་མར་ཟིལ་གནོན་དབང་སྡུད་ནི། ཕཊ། རང་ཉིད་སྐད་ཅིག་ཁྲོས་མ་ནག་མོར་གསལ། །ཐུགས་ལས་འོད་འཕྲོས་སྣང་སྲིད་ལྷ་འདྲེ་ཀུན། །སྐད་ཅིག་དབང་སྡུད་རང་མདུན་ཁྲོམ་ལྟར་འཚོགས། །ཐམས་ཅད་མ་ལུས་ཟིལ་གྱིས་གནོན་པར་གྱུར། །ཕཊ་ཕཊ་ཕཊ། རྐང་དུང་དྲག་འབུད་ལན་གསུམ་བྱ། ཀྱེ་མ། འདུས་ཤིག་འདུས་ཤིག་ཤ་ཟ་འདུས། །དབུགས་ལེན་ཐམས་ཅད་འདིར་འདུས་ཤིག །བཤའ་བཤུས་རོ་ཡི་རྩ་འདིར་འདུས། །ཤ་བགོས་རོགས་ལ་སླེབ་པར་གྱིས། །འདྲེ་ཁྱེད་རྣམས་བདག་གི་ཕ་མ་ཡིན། །བུ་ཡི་ཤ་ཁྲག་རོལ་དུ་ཤོག །ཁྱེད་རྣམས་དྲིན་ཆེན་ཕ་མ་ཡིན། །ད་རེས་བཟང་ལེན་ལེན་དུ་ཤོག །སྔོན་ཆད་ལུས་འདི་
གཅེས་པར་བཟུང་། །རྒྱུ་དེས་ད་རུང་འཁོར་བར་འཁྱམས། །ད་ནི་མི་ཆགས་སྟོན་མོ་འགྱེད། །མགྲོན་རིགས་སྲིད་རྩེ་མན་ཆད་ནས། །ན་རཀ་དམྱལ་བ་ཡན་ཆད་ཀྱི། །གནས་པའི་ལྷ་དང་ལྷ་མ་སྲིན། །ཕོ་བདུད་ལས་ཀྱི་རྒྱལ་འགོང་འདུས། །མོ་བདུད་ལས་ཀྱི་འདྲེ་མོ་འདུས། །ཕོ་བདུད་རྒྱལ་འགོང་སྲོག་བདག་འདུས། །མོ་བདུད་འདྲེ་མོ་བསེན་མོ་འདུས། །སྲིད་པ་ཡི་ནི་འདྲེ་དགུ་འདུས། །གཙུག་ལག་ཁང་གི་གདོན་བཅུ་འདུས། །གཙོ་བོ་གདོན་ཆེན་བཅོ་ལྔ་འདུས། །བགེགས་རིགས་སྟོང་ཕྲག་བརྒྱད་ཅུ་འདུས། །བྱིས་པའི་གདོན་ཆེན་བཅོ་ལྔ་འདུས། །གློ་བུར་དགུ་བཅུ་རྩ་གཅིག་འདུས། །ཡེ་འདྲོགས་སུམ་བརྒྱ་དྲུག་ཅུ་འདུས། །འདིར་ཤོག་འདིར་འདུས་ཤ་ཁྲག་རོལ། །སྤྱི་བོ་ཚངས་བུག་མན་ཆད་ནས། །རྐང་མཐིལ་སེན་མོ་ཡན་ཆད་ཀྱི། །ལུས་འདི་ཕྱི་ནང་ཐམས་ཅད་ལ། །ཁོ་བོས་ཆགས་ཞེན་མི་བྱེད་དོ། །ཤ་ཟོ་ཁྲག་འཐུང་རུས་པ་མུར། །། མགོ་བོ་ཡན་ལག་དོན་སྙིང་ཁྱེར། །ཐམས་ཅད་བག་ཕོབ་ཚིམ་པར་རོལ། །ཞི་བར་གྱིས་ཤིག་བརླག་པར་གྱིས། །ཕུང་བར་གྱིས་ཤིག་རྩ་བ་ཆོད། །ཐུལ་ཅིག་ཆོམས་ཤིག་མཱ་ར་
ཡ། །ཕཊ་ཕཊ་ཕཊ། ཅེས་བློ་སྦྱོང་མཚོན་ཆའི་འཁོར་ལོ་ལས་བྱུང་བའོ། །དེ་ནས་གཅོད་ཡུལ་བརྒྱུད་པའི་བླ་མ་ལ་གསོལ་བ་འདེབས་པ་ནི། ན་མོ་གུ་རུ། གནས་འོག་མིན་ཆོས་། དབྱིངས་ཕོ་བྲང་ནས། །ཡུམ་ཆེན་ཤེར་ཕྱིན་བཅོམ་ལྡན་ཤཱཀྱ་ཐུབ། །འཇམ་དཔལ་སྨྲ་སེང་ཨརྱ་དེ་ཝ་དང་། །དམ་པ་རྒྱ་གར་ཨ་མ་ལབ་ཀྱི་སྒྲོན། །ཁམ་བུ་ཡ་ལེ་གྲུབ་ཆེན་ཡེ་ཤེས་འབར། །གནམ་མཚོ་བ་དང་རང་བྱུང་གཡུང་སྟོན་ཞབས། །རོལ་པའི་རྡོ་རྗེ་དར་རྒྱལ་མཁའ་སྤྱོད་དབང་། །དེ་བཞིན་གཤེགས་པ་རིན་ཆེན་བཟང་པོ་དང་། །མཐོང་བ་དོན་ལྡན་ཀུན་མཁྱེན་འཇམ་དཔལ་བཟང་། །སངས་རྒྱས་མཉན་པ་འཇིགས་མེད་མི་བསྐྱོད་རྗེ། །མཚུངས་མེད་རྒྱལ་བ་དཀོན་མཆོག་ཡན་ལག་དང་། །དབང་ཕྱུག་རྡོ་རྗེ་ཆོས་ཀྱི་དབང་ཕྱུག་ཞབས། །ཀུན་དགའ་རྣམ་རྒྱལ་ཀརྨ་ཆགས་མེད་སོགས། །གྲུབ་ཐོབ་གཅོད་ཡུལ་བརྒྱུད་པའི་བླ་མ་ལ། །གསོལ་བ་འདེབས་སོ་ཡུམ་ཆེན་མོས་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཕཊ་ཕཊ་ཕཊ། དེ་ནས་ལྷ་ཚོགས་རྣམས་ལ་བསྟོད་པ་ནི། ཕཊ། རང་རིག་ཡེ་ཤེས་སྟོན་མཛད་པའི། །ཕ་བླ་མ་རྣམས་ལ་ཕྱག་
འཚལ་བསྟོད། །དངོས་གྲུབ་ངེས་པར་སྩོལ་མཛད་པའི། །ཡི་དམ་ལྷ་ཚོགས་རྣམས་ལ་ཕྱག་འཚལ་བསྟོད། །བར་ཆད་ཐམས་ཅད་སེལ་མཛད་པའི། །མཁའ་འགྲོ་ཆོས་སྐྱོང་རྣམས་ལ་ཕྱག་འཚལ་བསྟོད། །སྐྱེ་བ་བདུན་ལ་འགྲོ་དོན་མཛད། །དམ་པ་རྒྱ་གར་སྐུ་ལ་ཕྱག་འཚལ་བསྟོད། །མ་མི་མིན་ཡེ་ཤེས་ཀྱི་མཁའ་འགྲོ་མ། །ལབ་ཀྱི་སྒྲོན་མ་དེ་ལ་ཕྱག་འཚལ་བསྟོད། །གང་ལ་གང་འདུལ་འགྲོ་དོན་མཛད། །ཕ་གྲུབ་ཐོབ་གཅོད་ཡུལ་བརྒྱུད་པ་ལ་ཕྱག་འཚལ་བསྟོད། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་བསྟོད། །ཕཊ་ཕཊ་ཕཊ། བསྙེན་པ་ནི། ཕཊ། ཡུམ་ཆེན་ཐུགས་ཀར་པད་ཟླའི་སྟེང་། །ཨ་ཡིག་མཐའ་མར་གཱ་ཏེའི་སྔགས། །གཡོན་དུ་འཁོར་བས་སྣོད་བཅུད་ཀུན། །དག་པ་གསུམ་གྱི་རང་བཞིན་གྱུར། །ཏདྱ་ཐཱ། ཨོཾ་གཱ་ཏེ་གཱ་ཏེ་པ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཅི་འགྲུབ་བཟླ་བར་བྱའོ། །དེ་ནས་ཚོགས་བསང་ཆུས་བྲན་ལ། ཨོཾ་ཨཱཿཧཱུྃ། ལན་གསུམ། ཕཊ། མདུན་གྱི་གཅོད་ཡུལ་བརྒྱུད་པ་ཐམས་ཅད་ཀྱི། །སྐུ་ལས་འོད་ཟེར་དཔག་
ཏུ་མེད་པ་འཕྲོས། །ཡུལ་དེར་ཕོག་པས་ཨོ་རྒྱན་ཡུལ་དུ་གྱུར། །གནས་ཁང་ལ་ཕོག་གཞལ་ཡས་ཁང་དུ་གྱུར། །མགྲོན་ལ་ཕོག་པས་དཔའ་བོ་དཔའ་མོར་གྱུར། །སྣོད་བཅུད་ལ་ཕོག་པདྨ་བྷཉྫར་གྱུར། །ཚོགས་རྫས་ལ་ཕོག་ཡེ་ཤེས་བདུད་རྩིར་གྱུར། །ཕཊ་ཕཊ་ཕཊ། གནས་འོག་མིན་ཆོས་དབྱིངས་ཕོ་བྲང་ནས། །གཅོད་ཡུལ་གྱི་གྲུབ་ཐོབ་བརྒྱུད་པ་རྣམས། །དཔའ་བོ་དང་དཔའ་མོའི་དབུས་ན་བཞུགས། །ཚོགས་ལ་སྤྱན་འདྲེན་གཤེགས་སུ་གསོལ། །ཨོཾ་ཨཱཿཧཱུྃ་གིས་བྱིན་གྱིས་རློབས། །གཞོང་པ་ཉི་ཟླའི་གཏོར་གཞུང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདི། །བླ་མ་ཡི་དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཕཊ་ཕཊ། ཚོགས་མཆོད་བདུད་རྩིའི་ཕུད་རླངས་ལས། །མཆོད་ལྷ་བཅུ་དྲུག་བར་སྣང་གང་། །བཀྲ་ཤིས་རྟགས་བརྒྱད་རྒྱལ་སྲིད་བདུན། །ཕྱི་ནང་གསང་མཆོད་འདོད་ཡོན་ལྔ། །ཟག་མེད་བདེ་སྟོང་མཆོད་པ་འབུལ། །ཕཊ་ཕཊ་ཕཊ། རྡོ་རྗེ་འཆང་ཆེན་མན་ཆད་ནས། །རྩ་བའི་བླ་མ་ཡན་ཆད་བཅས། །མ་ལུས་འཁོར་བཅས་
ཚོགས་ལ་རོལ། །ཡི་དམ་ལྷ་ཚོགས་མན་ཆད་ནས། །དཔའ་བོ་མཁའ་འགྲོ་ཡན་ཆད་བཅས། །མ་ལུས་འཁོར་བཅས་ཚོགས་ལ་རོལ། །རྡོ་རྗེ་ཕག་མོ་མན་ཆད་ནས། །རིགས་བཞིའི་མཁའ་འགྲོ་ཡན་ཆད་བཅས། །མ་ལུས་འཁོར་བཅས་ཚོགས་ལ་རོལ། །ཆོས་སྐྱོང་མ་མགོན་མན་ཆད་ནས། །དཀྱིལ་འཁོར་མཐའ་སྐྱོང་ཡན་ཆད་བཅས། །མ་ལུས་འཁོར་བཅས་ཚོགས་ལ་རོལ། །ཤཱཀྱ་ཐུབ་པ་མན་ཆད་ནས། །དམྱལ་ཁམས་བཅོ་བརྒྱད་ཡན་ཆད་བཅས། །མ་ལུས་འཁོར་བཅས་ཚོགས་ལ་རོལ། །སྟོང་གསུམ་གཞི་བདག་མན་ཆད་ནས། །གནས་པོ་དགེ་བསྙེན་ཡན་ཆད་བཅས། །མ་ལུས་འཁོར་བཅས་ཚོགས་ལ་རོལ། །ལ་ལ་ཕྱི་ཡི་ཚོགས་ལ་རོལ། །ལ་ལ་ནང་གི་ཚོགས་ལ་རོལ། །ལ་ལ་གསང་བའི་ཚོགས་ལ་རོལ། །དེ་ཁོ་ན་ཉིད་ཀྱི་ཚོགས་ལ་རོལ། །ཨ་ཨ་ལ་ལ་སྟེ་དགྱེས་པར་མཛོད། །ཕཊ་ཕཊ་ཕཊ། དབུས་དང་ཕྱོགས་བཅུའི་གཙོ་མོ་རེ་རེ་ལ། །མཁའ་འགྲོ་འབུམ་ཕྲག་རེ་རེའི་མཐའ་བསྐོར་དུ། །ཕྱོགས་མཚམས་སོ་སོའི་ལྷ་འདྲེ་ཀུན་གྱིས་བསྐོར། །ལས་བྱེད་མཁའ་འགྲོ་འབུམ་ཚོ་འབུམ་ཚོ་ཡིས། །ཕྱོགས་བཅུའི་མགྲོན་
རྣམས་ཀུན་ལ་སོ་སོར་མཆོད། །ཐམས་ཅད་མཉེས་ཤིང་དགའ་མགུ་ཡི་རང་གྱུར། །ཕཊ་ཕཊ་ཕཊ། གཏོར་བསྔོས་ལས་རིམ་ནི། ཕཊ། ཡཾ་ལས་རླུང་དང་རཾ་ལས་མེ། །ཀཾ་ལས་ཐོད་སྐྱེད་གསུམ་གྱི་སྟེང་། །གཏོར་སྣོད་ཨ་ལས་ཀ་པཱ་ལར། །གཏོར་མ་ཤ་ལྔ་བདུད་རྩི་ལྔ། །མེ་སྦར་སྣོད་དྲོས་རྫས་རྣམས་ཁོལ། །ཡེ་ཤེས་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ། ལན་གསུམ། ཕོ་ཕོ་ཡེ། ན་མོ་པྲཛྙཱ་པཱ་ར་མི་ཏ་སརྦ་ཏ་ཐཱ་ག་ཏ་གུ་རུ་དྷེ་ཝ་ཌཱཀི་ནི་དྷརྨ་པཱ་ལ་བ་སུ་དེ་ཝ་སརྦ་ལོ་ཀ་པཱ་ལ་ནཱ་ག་རཱ་ཛ་བྷུ་མི་པཱ་ཏི་ས་པ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སངས་རྒྱས་ཐམས་ཅད་ཀྱི་སྙིང་པོ་གཅོད་ཡུལ་ཕྱག་རྒྱ་ཆེན་པོ་དར་ཞིང་རྒྱས་པ་དང་། རྣལ་འབྱོར་པ་བདག་གི་ཕྲིན་ལས་རྣམ་པ་བཞི་ཐོགས་པ་མེད་པར་བསྒྲུབས་པའི་ཕྲིན་ལས་མཛོད་ཅིག །དེ་ནས་བསྔོ་བ་ནི། ཨོཾ་ཨཱཿཧཱུྃ། ཁམས་གསུམ་མ་ལུས་སྐུ་གསུང་ཐུགས། །སྐུ་གསུམ་འཁོར་འདས་ཐུགས་རྗེའི་མགྲོན། །སྟོང་གསུམ་བདུད་རྩིས་ཁེངས་པའི་རྫས། །གཏོར་མ་འདོད་ཡོན་ལྔ་རུ་བསྔོ། །ཕྱི་སྣོད་འཇིག་རྟེན་གཏོར་གཞོང་དུ། །ནང་བཅུད་སེམས་ཅན་གཏོར་མས་བསྐང་། །སྐྱེ་འཆི་མེད་
པར་བཞེས་སུ་གསོལ། །ཀ་པཱ་ལ་ཡི་གཏོར་གཞོང་དུ། །ཤ་ཁྲག་དོན་སྙིང་གཏོར་མས་བཀང་། །ཆགས་ཞེན་མེད་པའི་མཆོད་པ་བཞེས། །དོན་གཉིས་ལྷུན་གྱིས་གྲུབ་པར་མཛོད། །ཕཊ་ཕཊ་ཕཊ། དེ་ནས་བསྐང་བ་ནི། ཧཱུྃ། བེམ་ཤུན་རང་བྱུང་ལྷུན་གྲུབ་མཎྜལ་ཆེ། །ཡན་ལག་གླིང་བཞི་མིག་གཉིས་ཉི་ཟླ་སྟེ།། །སྒལ་ཚིགས་རི་རབ་མགོ་བོ་རྣམ་རྒྱལ་ཁང་། །རྣམ་ཤེས་ཚོགས་བརྒྱད་འདོད་ཡོན་ལྷ་མོ་འཕྲོ། །ཀུན་བཟང་མཆོད་སྤྲིན་ཟག་མེད་སྐོང་རྫ་ས་འདིས། །གྲུབ་ཐོབ་གཅོད་ཡུལ་བརྒྱུད་པའི་ཐུགས་དམ་བསྐང་། །ཡི་དམ་དཔའ་བོ་མཁའ་འགྲོའི་ཐུགས་དམ་བསྐང་། །གཅོད་ཡུལ་བཀའ་སྲུང་དམ་ཅན་ཐུགས་དམ་བསྐང་། །སྣང་སྲིད་ལྷ་འདྲེ་ཀུན་གྱི་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །ལོངས་སྤྱོད་འཛད་མེད་ཆུ་བོའི་རྒྱུན་བཞིན་སྩོལ། །གཞི་བྱེས་ལམ་གསུམ་གར་འགྲོ་གར་འདུག་ཀྱང་། །སྐྱེལ་བསུ་རོགས་དན་ཁ་འཛིན་མ་གཡེལ་ཅིག །ཉིན་མཚན་བྱ་ར་མེལ་ཚེ་མགོན་སྐྱབས་མཛོད། །བཀྲ་ཤིས་བདེ་ལེགས་འགྲུབ་པར་མཛད་དུ་གསོལ། །བཤགས་པ་ནི། ཕཊ། མཐོལ་ལོ་བཤགས་སོ་ཡེ་ཤེས་
མཁའ་འགྲོ་མ། །གནོང་ངོ་འགྱོད་དོ་གཅོད་ཡུལ་བརྒྱུད་པ་རྣམས། །དག་ཚངས་སྐུ་གསུང་ཐུགས་ཀྱི་དངོས་གྲུབ་སྩོལ། །ལམ་མ་ནོར་ཆོས་ཀྱི་དབྱིངས་སུ་དྲོངས། །མི་ལྡོག་བདེ་ཆེན་གྱི་ས་ལ་འགོད་གྱུར་ཅིག །ཕཊ་ཕཊ་ཕཊ། དེ་ནས་ཚོགས་ལ་རོལ་ཞིང་ལྷག་མ་ནི། ཨོཾ་ཨཱཿཧཱུྃ། བྷནྡྷའི་སྣོད་དུ་ལྷག་མའི་གཏོར་མ་ནི། །འདོད་ཡོན་ལྔ་ལྡན་ཡེ་ཤེས་བདུད་རྩིར་གྱུར། །ལས་བྱེད་མཁའ་འགྲོའི་སྤྲུལ་པ་ཀེང་རུས་ཀྱི། །གཟུགས་ཅན་མཁའ་འགྲོ་མང་པོས་ལྷག་གཏོར་ཁྱེར། །ལྷག་སྡུད་འཇིག་རྟེན་རིགས་ཀྱི་ཌཱཀི་ལྔ། །རང་རང་མདོག་མཚུངས་ཐོར་ཚུགས་རལ་པ་ཅན། །ལག་ན་རང་རྟགས་གྲི་གུག་ཐོད་ཁྲག་བསྣམས། །ཤ་ཟ་ཞིང་སྐྱོང་ལྷག་མགྲོན་འཁོར་བཅས་ལ། །སོ་སོར་ཅི་འདོད་སྦྱིན་པས་དགྱེས་པར་རོལ། །དགྲ་བགེགས་བསྒྲལ་བའི་ཕྲིན་ལས་མཛད་དུ་གསོལ། །ཨོཾ་ཨུཙྪིཥྛ་བྷཀྵ་བྷཀྵ་སྭཱ་ཧཱ། ཕཊ། ལྷག་མ་གཙང་སར་བླུག །དེ་ནས་གཏོར་མ་འབུལ་བ་ནི། ། དཀོན་མཆོག་གསུམ་དང་གཅོད་ཡུལ་བརྒྱུད་པའི་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱི་བདེན་པས་དགྲ་བགེགས་གནོད་བྱེད་ཐམས་ཅད་གཏོར་མ་ལིངྒང་འདི་ཉིད་ལ་ཁུག་ཅིག །
ཛཿཧཱུྃ་བཾ་ཧོཿ ཨོཾ་ཨཱཿཧཱུྃ། ཧཱུྃ། མ་གཅིག་ཁྲོས་མ་ནག་མོ་ནི། །ཤ་ཟ་ཌཱཀི་འཁོར་དང་བཅས། །གཞན་ཡང་གཅོད་ཡུལ་བརྒྱུད་པ་ཡི། །བསྟན་སྲུང་དམ་ཅན་རྒྱ་མཚོ་རྣམས། །འདིར་གཤེགས་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔ་རུ། །ཁས་བླངས་དམ་བཅས་དྲན་མཛོད་ལ། །གཅོད་ཡུལ་བསྟན་པ་སྲུང་བ་དང་། །གཅོད་མཁན་བདག་གི་སྡོང་གྲོགས་མཛོད། །ཡིད་ལ་མནག་པའི་དགྲ་བགེགས་སྒྲོལ། །བཅོལ་བའི་ཕྲིན་ལས་འགྲུབ་པར་མཛོད། །སྦྱོ། འཇིག་རྟེན་བོད་ཀྱི་ཞིང་ཁམས་། སྐྱོང་མཛད་བརྟན་མ་བཅུ་གཉིས་ནི། །ནམ་མཁའི་མཐོངས་ནས་འདིར་གཤེགས་ལ། །དམ་རྫས་བདུད་རྩིའི་བཤལ་ཆུ་བཞེས། །ལབ་སྒྲོན་སྤྱན་སྔར་ཁས་བླངས་བཞིན། །བོད་ཁམས་བདེ་བའི་ཕྲིན་ལས་མཛོད། །ཅེས་དམིགས་པའི་ཕྱོགས་སམ་ཕྱི་རོལ་དུ་ཕུལ་གཏོར་གཞོང་སྦུབ་ལ་རྡོ་རྗེ་རྒྱ་གྲམ་གྱིས་མནན་ལ། ཕཊ། གནོད་བྱེད་དམ་སྲི་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག །ཕཊ། ཕྱོགས་བཞི་འཁོར་ལོའི་རྩིབས་སྟེང་དུ། །རིགས་བཞི་མཁའ་འགྲོས་བྲོ་བརྡུངས་བས། །དཔའ་བོས་བྲོ་བརྡུང་ཁྲིགས་སེ་
ཁྲིག །དཔའ་མོས་གར་བྱེད་ཁྱུགས་སེ་ཁྱུག །རྣལ་འབྱོར་བདག་གིས་བྲོ་བརྡུངས་བས། །དགྲ་དམ་སྲིའི་མགོ་ལ་ཆེམས་སེ་ཆེམ། །དུག་གསུམ་མགོ་ལ་ནེམས་སེ་ནེམ། །དུག་ལྔའི་མགོ་ལ་ད་རོལ་ཅིག །ཨོཾ་ལཾ་ཨཱལཾ་ཧཱུཾ་ལཾ་ཙཱ་བྷ་ཡ་ནན། དེ་ནས་མགྲོན་རྣམས་འཁོན་སེམས་སྦྱང་ཞིང་གསོ་བ་ནི། བདག་ཉིད་ཐུགས་རྗེ་ཆེན་པོ་སྐུ་མདོག་དཀར། །ཐུགས་ཀར་ཟླ་སྟེང་ཧྲིལ་ཡིག་དྲུག་བསྐོར། །སྐུ་ལས་བདུད་རྩི་བབས་པས་མགྲོན་རྣམས་འཐུང་། །གདུག་རྩུབ་ཀུན་ཞི་སྤྱན་གཟིགས་སྐུར་གྱུར་ནས། །ཐམས་ཅད་མགྲིན་གཅིག་ཡིག་དྲུག་འདོན་པར་གྱུར། །ཡི་གེ་དྲུག་པ་ཅི་ནུས་བཟླ། ཕཊ། ལུས་སྦྱིན་ཚོགས་འཁོར་འདི་ཕུལ་བས། །བདག་སོགས་སེམས་ཅན་ཐམས་ཅད་ཀྱི། །ལན་ཆགས་བུ་ལོན་ཤ་འཁོན་བྱང་། །ཐམས་ཅད་སངས་རྒྱས་ཐོབ་པར་ཤོག །ཕཊ་ཕཊ་ཕཊ། ན་མོ། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས།་།རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་
ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བར་ཆད་མེད་པའི་ལམ་བསྒྲོད་ནས། །མ་ཡུམ་ཆེན་གོ་འཕང་ཐོབ་པར་ཤོག །ཕཊ་ཕཊ་ཕཊ། དེ་ནས་རྗེས་ཆོག་ནི། གུ་རུ་དྷེ་ཝ་ཌཱཀི་ནཱི་སརྦ་དྷརྨ་པཱ་ལ་ས་པ་རི་ཝཱ་ར་ཨབྷཾ་སོགས་ནས་ཤརྡ་པྲ་ཏིཙྪ་ཧོས་མཆོད། །བསྟོད་པར་འོས་པ་ཐམས་ཅད་ལ་སོགས་ཀྱིས་བསྟོད། མ་འབྱོར་པ་དང་སོགས། ཡི་གེ་བརྒྱ་པ་བརྗོད། བསྔོ་བ་ནི། ཡུམ་ཆེན་རྩ་གསུམ་ལྷ་ཚོགས་དགོངས། །འཕགས་པ་སོ་སོའི་སྐྱེ་བོ་ཡིས། །དགེ་བ་ཀུན་ལ་རྗེས་ཡི་རང་། །དེ་ཡི་དགེ་བའི་རྩ་བ་དང་། །ཚོགས་འཁོར་ཕུལ་བའི་དགེ་བ་རྣམས། །ཡུམ་ཆེན་སྲས་བཅས་སྤྱན་སྔར་འབུལ། །ཀུན་བཟང་མཆོད་སྤྲིན་འབྱུང་གྱུར་ཅིག །དེ་ཡི་དགེ་བས་གནོད་བྱེད་གཙོས། །སེམས་ཅན་བདེ་ལྡན་སྡུག་བསྔལ་བྲལ། །མྱུར་དུ་མངོན་སངས་རྒྱས་གྱུར་ཅིག །དགེ་རྩ་བདག་དང་བསྲུང་བྱར་སྨིན། །ནད་གདོན་བར་ཆད་ཀུན་བྱང་ནས། །ཚེ་བསོད་ཉམས་དང་རྟོགས་པ་འཕེལ། །མཆོག་གི་དངོས་གྲུབ་ཐོབ་གྱུར་ཅིག །ནམ་ཞིག་འཆི་བའི་དུས་བྱུང་ཚེ། །བདེ་བ་ཅན་
དུ་སྐྱེ་གྱུར་ཅིག །དེ་ནས་བཀྲ་ཤིས་ནི། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱི་བཀྲ་ཤིས་ཤོག །མི་འགྱུར་ལྷུན་པོ་སྐུ་ཡི་བཀྲ་ཤིས་ཤོག །ཡན་ལག་དྲུག་ཅུའི་གསུང་གི་བཀྲ་ཤིས་ཤོག །མཐའ་བྲལ་འཁྲུལ་མེད་ཐུགས་ཀྱི་བཀྲ་ཤིས་ཤོག །རྒྱལ་བའི་སྐུ་གསུང་ཐུགས་ཀྱི་བཀྲ་ཤིས་ཤོག །དམ་ཆོས་བདུད་ཀྱི་གཅོད་ཡུལ་འདི། །མཁའ་ལ་ཉི་མ་ཤར་བ་བཞིན། །ཕྱོགས་དུས་ཀུན་ཏུ་ཁྱབ་གྱུར་ཅིག །ཕཊ་ཕཊ་ཕཊ། སྦྱིན་པ་རྒྱ་ཆེན་གྱུར་པ་འདི་ཡིས་མཐུས། །འགྲོ་བའི་དོན་དུ་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་འགྲོའི་ཚོགས་རྣམས་སྦྱིན་པས་གྲོལ་གྱུར་ཅིག །འཇིག་རྟེན་ཆོས་སྐྱོང་སྲུང་མ་རྣམས། །སོ་སོའི་ཡུལ་དུ་གཤེགས་སུ་གསོལ། །སོ་སོའི་ཡུལ་དུ་གཤེགས་ནས་ཀྱང་། ། སེམས་ཅན་རྣམས་ཀྱི་དོན་གྱི་ཕྱིར། །སླར་ཡང་འབྱོན་པར་མཛད་དུ་གསོལ། །བཛྲ་མུ༔ རྣམ་ཤེས་དབབ་པ་ནི། ཕཊ། མ་གཅིག་ཐུགས་ཀ་ནས་རང་གི་རྣམ་ཤེས་ཀྱི་ངོ་བོ་ཐིག་
ལེ་དཀར་པོ་མར་བབས། །རང་གི་ཚངས་བུག་ནས་ཞུགས། །སྙིང་གི་དབུས་སུ་ཐིམ་པར་གྱུར། ཕཊ་ཕཊ་ཕཊ། དེ་ནས་བྱིན་རླབས་ཞུ་བ་ནི། ཕཊ། མ་གཅིག་ཐུགས་ལས་འོད་ཟེར་དཀར་དམར་མཐིང་། །འཕྲོས་པས་བདག་དང་བསྲུང་བྱའི་སྒོ་གསུམ་ལ། །སྐུ་གསུང་ཐུགས་ཀྱི་བྱིན་རླབས་ཞུགས་པར་གྱུར། །མ་གཅིག་འོད་ཞུ་རང་ལ་ཐིམ་པར་གྱུར། །ཡེ་སྟོང་ཐིག་ལེ་ཆེན་པོའི་ངང་དུ་ཕཊ། །ཕཊ་ཕཊ་ཕཊ། ཅེས་དང་། སེམས་ཀ་དག་ངང་ལ་མཉམ་པར་བཞག་གོ །དགེ་བ་འདི་ཡིས་མྱུར་དུ་བདག །གཅོད་ཡུལ་ཕྱག་རྒྱ་ཆེན་པོ་འགྲུབ་གྱུར་ནས། །འགྲོ་བ་སེམས་ཅན་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །སླར་ཡང་ལྷ་སྐུ་སྒྱུ་མ་ལྟ་བུའི་སྤྱོད་ལམ་ལ་འཇུག་པར་བྱའོ། །ཞེས་པ་འདི་ནང་ཆེན་གཅོད་ཚིག་མའི་བརྒྱུད་འཛིན་གཅོད་ཀྱི་རྣལ་འབྱོར་པ་པདྨ་དབང་དྲག་ནས་འདི་ལྟར་དགོས་ཞེས་ཡང་ཡང་བསྐུལ་ངོར་གཅོད་རྒན་ཨ་རཱ་གས་མདོར་བསྡུས་བྲིས་པས་གཅོད་ཡུལ་ཕྱག་རྒྱ་ཆེན་པོའི་བསྟན་པ་དར་ཞིང་རྒྱས་ལ་ཡུན་རིང་དུ་བརྟན་པར་གྱུར་ཅིག །དགེའོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
རྡོ་ཁྲམ་གཅོད་པ་གྲགས་པ་ལ་གནང་བའི་གཅོད་ཀྱི་ཞལ་གདམས་བཞུགས་སོ།། ན་མོ་པྲཛྙཱ་པཱ་ར་མི་ཏ་ཡེ། ཡུམ་ཆེན་ཤེར་ཕྱིན་ཞབས་ལ་ཕྱག་འཚལ་ནས། །དེང་སང་གཅོད་ཡུལ་ཕྱག་རྒྱ་ཆེན་པོ་ལ། །མངའ་བརྙེས་རྡོ་ཁྲམ་གཅོད་པ་གྲགས་པ་ཁྱེད། །དེང་འདིར་བདག་གི་ཕུག་སྒོར་བྱོན་པ་ལེགས། །ངག་བཅད་དམ་ཕྱིར་གསུང་གླེང་ཡི་གེར་བྲི། །ཁྱེད་ནི་བླ་མ་མང་བསྟེན་ཁྲིད་མང་ཞུས། །ད་ལྟ་ཡུམ་ཆེན་ཤེར་ཕྱིན་མངོན་སུམ་རྟོགས། །ད་ཡང་གཅོད་ལུགས་འདི་ལྟར་བཅད་ན་ལེགས། །མི་རྟག་འཆི་བ་དྲན་པས་བདག་འཛིན་གཅོད། །ནམ་འཆི་ངེས་མེད་དྲན་པས་ལེ་ལོ་གཅོད། །བློ་སྣ་བཏུང་བས་ཆོས་ལ་ཕྱི་གཤོལ་གཅོད། །ལས་འབྲས་བསླུ་མེད་དྲན་པས་སྤྱོད་ཅིང་གཅོད། །ངན་འགྲོའི་སྡུག་བསྔལ་དྲན་པས་སྡིག་ལྟུང་གཅོད། །འཁོར་བའི་ཉེས་དམིགས་དྲན་པས་ཞེན་ཚིགས་གཅོད། །དལ་འབྱོར་ཆུད་ཟོས་རྙེད་དཀའ་དྲན་པས་གཅོད། །སྐྱབས་འགྲོ་ངེས་ཤེས་འཁོར་བའི་འཇིགས་པ་གཅོད། །སེམས་བསྐྱེད་བརྟན་པོས་ཐེག་དམན་གོལ་ས་གཅོད། །བཤགས་སྦྱངས་དྲག་པོས་སྡིག་སྒྲིབ་ཐམས་ཅད་གཅོད། །མཎྜལ་མཆོད་པས་བསོད་ནམས་ཆུང་བ་གཅོད། །
ཉམས་རྟོགས་གེགས་སྐྱོན་གསོལ་འདེབས་དྲག་པོས་གཅོད། །རྣམ་རྟོག་འཕྲོ་རྒོད་ཞི་གནས་འཐུག་པོས་གཅོད། །མི་གསལ་བྱིང་འཐིབ་རིག་པ་ངར་གྱིས་གཅོད། །གང་ཤར་ཐམས་ཅད་རང་ངོ་ལྟ་བས་གཅོད། །ཞེ་སྡང་མེ་ལོང་ཡེ་ཤེས་ངང་དུ་གཅོད། །ང་རྒྱལ་མཉམ་ཉིད་ཡེ་ཤེས་ངང་དུ་གཅོད། །འདོད་ཆགས་སོར་རྟོག་ཡེ་ཤེས་ངང་དུ་གཅོད། །ཕྲག་དོག་བྱ་གྲུབ་ཡེ་ཤེས་ངང་དུ་གཅོད། །གཏི་མུག་ཆོས་དབྱིངས་ཡེ་ཤེས་ངང་དུ་གཅོད། །གཟུགས་རྣམས་ཐམས་ཅད་སྣང་སྟོང་ངང་དུ་གཅོད། །སྒྲ་རྣམས་ཐམས་ཅད་གྲག་སྟོང་ངང་དུ་གཅོད། །དྲི་རྣམས་ཐམས་ཅད་ཚོར་སྟོང་ངང་དུ་གཅོད། །རོ་རྣམས་ཐམས་ཅད་མྱང་སྟོང་ངང་དུ་གཅོད། །རེག་རྣམས་ཐམས་ཅད་རེག་སྟོང་ངང་དུ་གཅོད། །བདེ་གསལ་མི་རྟོག་ཉམས་ལ་ཞེན་ཆགས་གཅོད། །བཟང་པོའི་རྟགས་ལ་དགའ་བྲོད་མེད་པར་གཅོད། །ངན་པའི་རྟགས་ལ་རྣམ་རྟོག་མེད་པར་གཅོད། །ཐ་མལ་རྣམ་རྟོག་བྱུང་གནས་རྩད་རྗེས་གཅོད། །འབྲིང་གིས་ཉམས་རྟོགས་ཐུག་འཕྲད་རང་གྲོལ་གཅོད། །རབ་ཀྱིས་རྣམ་རྟོག་མ་བཅོས་རང་གར་གཅོད། །དུས་རྣམས་ཀུན་ཏུ་དྲན་པའི་རྒྱང་སོས་གཅོད། །ཐ་མལ་སྣང་བ་བསྐྱེད་རིམ་བསྒོམས་
པས་གཅོད། །ཐ་མལ་ངག་འཆལ་བསྙེན་སྒྲུབ་བཟླས་པས་གཅོད། །སྟོང་ཉིད་སྙིང་རྗེ་འབྲེལ་བའི་ལམ་གོལ་གཅོད། །མཁའ་འགྲོ་ཆོས་སྐྱོང་མཆོད་པས་རྐྱེན་ངན་གཅོད། །ནད་ཀྱི་ཟུག་གཟེར་ཚོར་སྟོང་ངང་དུ་གཅོད། །གདོན་གྱི་ཆོ་འཕྲུལ་བྱམས་དང་སྙིང་རྗེས་གཅོད། །ནམ་ཞིག་ཚེ་ཟད་འཆི་བའི་དུས་བྱུང་ཚེ། །འབྱུང་བཞིའི་ཐིམ་སྡུད་རང་ངོར་བལྟས་པས་གཅོད། །དཀར་ལམ་ཤར་ཚེ་གསལ་སྟོང་ངང་དུ་གཅོད། །དམར་ལམ་ཤར་ཚེ་བདེ་སྟོང་ངང་དུ་གཅོད། ་།ནག་ལམ་ཤར་ཚེ་རིག་སྟོང་ངང་དུ་གཅོད། །འོད་གསལ་ཤར་ཚེ་རང་ངོ་ཤེས་པར་གཅོད། །ཡུན་གྱི་རིང་ཐུང་འཆི་ཁ་ཕན་པས་གཅོད། །བར་དོ་ཤར་ནས་རང་ངོ་ཤེས་པས་གཅོད། །འཁོར་བའི་གནས་ལ་ཆགས་ཞེན་སྤངས་བས་གཅོད། ། སྨོན་ལམ་བསྔོ་བས་འཁོར་བའི་གཡང་ས་གཅོད། །སྤྲུལ་སྐུའི་འགྲོ་བ་ཀུན་གྱི་སྡུག་བསྔལ་གཅོད། །དེ་ལྟར་བཅད་ནི་གཅོད་པ་མཆོག་ཏུ་འགྱུར། །དེ་སྐད་གདམས་པ་རཱ་ག་ཨ་སྱ་ཡིས། །འཕྲལ་དུ་ཡིད་ལ་གང་དྲན་སྨྲས་པ་རྫོགས། །སརྦ་མངྒ་ལཾ། དགེའོ།། །།