མི་བསྐྱོད་རྡོ་རྗེས་མཛད་པའི་གཅོད་ཚིགས་བཅད་མའི་དམིགས་རིམ་མདོར་བསྡུས་དང་དམིགས་པ་ཉེར་མཁོ་འགའ་ཞིག
མི་བསྐྱོད་རྡོ་རྗེས་མཛད་པའི་གཅོད་ཚིགས་བཅད་མའི་དམིགས་རིམ་མདོར་བསྡུས་དང་དམིགས་པ་ཉེར་མཁོ་འགའ་ཞིག་བཞུགས་སོ། །
ན་མོ་ཛྙཱ་ན་ཌཱ་ཀི་ཡེ། ཡེ་ཤེས་མཁའ་འགྲོ་མ་གཅིག་ཞབས་ལ་འདུད། །མ་གཅིག་གིས་མཛད་གཅོད་ཀྱི་གདམས་པ་ནི། །ཟབ་ཅིང་རྒྱ་ཆེ་ཉི་ཟླ་ལྟར་གྲགས་ཀྱང་། །སྨོན་ལམ་དབང་གིས་ཧོར་མོ་ཅོག་ལ་སྒྲོན། །ཕོ་བདུད་ཐོད་པ་བྷ་ར་ལ་སོགས་པས། །གཅོད་ལོག་རྩོམ་མཁན་བདུད་སྤྲུལ་མང་པོའི་དཀྲུག །ཤ་སྤུ་རྟ་སྤུ་འདྲེས་ལྟར་དབྱེ་གསལ་དཀའ། །ཤར་གཅོད་ལ་སོགས་ཚད་ལྡན་འགའ་ལ་ཡང་། །ཟླ་བ་ལ་སོགས་དམ་སྲི་སྒབ་འདྲེ་དང་། །ལ་ལ་བར་སྐབས་དམ་སེལ་བརྒྱུད་པ་ཆད། །ལ་ལ་མཁས་བླུན་མང་པོས་བཅོས་པས་བསླད། །དེ་ཕྱིར་གཅོད་དཔེ་ཕལ་ལ་བློ་
གཏད་མེད། །མ་གཅིག་ཉིད་ནས་ད་ལྟ་ཡན་ཆད་དུ། །སངས་རྒྱས་སྤྲུལ་པ་གྲུབ་ཐོབ་བརྒྱུད་པ་ནི། །བར་མ་ཆད་པའི་བརྒྱུད་པ་ཀཾ་ཚང་ཡིན། །སྔགས་ལུགས་གཅོད་ཀྱི་བརྒྱུད་པ་པཀི་སྟེ། །མདོ་སྔགས་ཟུང་འཇུག་གཅོད་ཀྱི་བཀའ་བབས་ནི། །རང་བྱུང་རྡོ་རྗེས་གཉན་ཐོག་བརྒྱ་རྩ་བཅད། །རི་གཉན་ཕལ་ཆེར་མགོ་ལ་བཞུགས་མལ་ཡོད། །དེ་ཡི་གཞུང་ལུགས་མན་ངག་བཅུད་བསྡུས་ནས། །མི་བསྐྱོད་རྡོ་རྗེས་ཚིགས་བཅད་མ་འདི་མཛད། །བརྒྱུད་པ་ཁུངས་བཙུན་དོན་འདུས་བྱིན་རླབས་ཆེ། །རྩ་བ་རྡོ་རྗེའི་ཚིག་རྐང་རྒྱུད་དང་འདྲ། །འདི་ཡི་རི་འགྲིམ་དཀོན་མཆོག་ཡན་
ལག་གིས། །མཛད་ཀྱང་གཉན་ཐོག་གཅོད་མཁན་དེང་སང་དཀོན། །འདི་ཡི་འགྲེལ་པ་སིདྡྷཱ་སྤྲུལ་སྐུ་དང་། །ཚེར་ལུང་པ་ཡིས་མཛད་ངེས་ཡོད་ན་ཡང་། །ཧ་ཅང་སྒོམ་ཆེ་ཕལ་པས་ཉམས་ལེན་དཀའ། །ཧ་ཅང་དམིགས་པ་མང་ནའང་ཟིན་དཀའ་བས། །གཞན་ནས་ཁ་སབ་ལ་སོགས་མི་བྱེད་པར། །གཞུང་ཚིག་ཁོ་ན་རྡོ་རྗེའི་གསུངས་ཡིན་པས། །གཞུང་འདི་ཁོ་ན་འདོན་སྒོམ་སྦྲགས་པས་འཐུས། །རྒྱུན་དུ་གར་འདུག་གནས་དེར་ལུས་སྦྱིན་བྱ། །གཉན་ས་རང་གི་མལ་ས་གྲུ་བཞི་གཉན། །གཅོད་རྒྱུ་ལུས་ཀྱི་ན་ཚ་ལུས་གདོན་དང་། །བདུད་བཞིའི་བར་ཆད་སེམས་ཀྱི་དུག་ལྔ་གཅོད། །ཆོད་ཚད་ནད་ཞི་གདོན་ཞི་ཉམས་རྟོགས་འཕེལ། །ས་ཆ་གར་ཕྱིན་དེ་རུ་གནས་འབྲེལ་ཚུལ། །ལུས་སྦྱིན་བྱས་པས་གཉན་ཐོག་བརྒྱ་རྩ་་མ། །བཅད་དང་འདྲ་བར་ཡིན་ཞེས་གསུང་རྒྱུན་ཐོས། །གནས་འབྲེལ་ལུས་སྦྱིན་ཚར་ལྷོང་མ་འགྲིགས་ཀྱང་། །ཉེས་སྐྱོན་མེད་ཅིང་རྗེས་གཅོད་མི་དགོས་གསུངས། །དེས་ན་མང་ཉུང་འཚམས་ཤིང་བྱིན་རླབས་ཅན། །ཚིགས་བཅད་མ་འདིའི་དམིགས་རིམ་མདོར་བསྡུས་ནི། །མདུན་གྱི་ནམ་མཁར་སྐད་ཅིག་དྲན་རྫོགས་ཀྱིས། །མ་གཅིག་ལ་སོགས་རྩ་བརྒྱུད་བློ་མ་
དང་། །སངས་རྒྱས་ཆོས་དང་དགེ་འདུན་ལ་སོགས་པ། །སྐུ་མདོག་ཆ་ལུགས་ལ་སོགས་བསྒོམ་མི་དགོས། །ནམ་མཁའི་སྤྲིན་ལྟར་ནམ་མཁའ་གང་བར་མོས། །བདག་དང་གནོད་བྱེད་གཙོར་བྱས་སེམས་ཅན་ཀུན། །ཁ་ཞེ་མེད་པར་སྙིང་ནས་དད་པ་ཡིས། །ཐལ་མོ་སྦྱར་ནས་སྐྱབས་འགྲོ་དི་རི་རི། །རང་གིས་རིམ་བུ་བཀྱག་ཚུལ་བྱེད་པ་ཡིན། །བྱམས་དང་སྙིང་རྗེ་དགའ་བ་བཏང་སྙོམས་ཏེ། །ཚད་མེད་བཞི་པོ་གནོད་བྱེད་གཙོར་བྱས་པའི། །སེམས་ཅན་ཀུན་གྱི་རྒྱུད་ལ་སྐྱེ་བར་བསྒོམ། །ཁྱད་པར་བདག་གི་གདོན་གྱིས་གཙོར་བྱས་པ། །འགྲོ་ཀུན་སངས་རྒྱས་ས་ལ་འགོད་སྙམ་པའི། །སེམས་བསྐྱེད་དང་ནི་དམ་བཅའ་དྲག་པོ་ཡིས། །ན་མོ་གུ་རུ། དེང་ནས་བཟུང་སྟེ་ཞེས་པ་ནས། །རྫོགས་བྱང་ཉིད་ལ་འགོད་པར་བྱ་ཡན་གྱིས། །ཤོ་ལོ་ཀ་དེ་དམིགས་པ་མ་ཟིན་བར། །གསུམ་ལྔ་བདུན་སོགས་དབྱངས་དང་བཅས་པ་བྱ། །འཇམ་པོའི་ཕཊ་རིང་བརྗོད་ཀྱང་འགལ་བ་མེད། །དེ་ནས་ཆོས་ཀུན་རང་བཞིན་སྟོང་པ་ཉིད། །དྲན་པར་བྱས་རྗེས་ནམ་མཁར་ཤཱཀྱ་ཐུབ། །ཆོས་སྐུ་ཡུམ་ཆེན་ལོངས་སྐུ་རྣམ་པར་སྣང་། །ཉེ་སྲས་བརྒྱད་སོགས་འཁོར་རྣམས་མོས་པ་ཙམ། །
གཙོ་བོ་ཐུབ་པའི་སྐུ་ནི་གསལ་བར་བསྒོམ། །དེ་འོག་མ་གཅིག་གཅོད་ཡུལ་བརྒྱུད་པ་དང་། །རྩ་བརྒྱུད་བླ་མ་ཡི་དམ་མཁའ་འགྲོ་དང་། །མ་མགོན་ལ་སོགས་ཆོས་སྐྱོང་སྲུང་མའི་ཚོགས། །འཁོར་རྣམས་མོས་ཙམ་གཙོ་མོ་གསལ་བར་བསྒོམ། །ཡེ་ཤེས་སེམས་དཔའ་སྤྱན་དྲངས་དབྱེར་མེད་བསྟིམ། །ཡིད་ལས་སྤྲུལ་པའི་མཆོད་པའི་ལྷ་མོ་དང་། །སྣང་སྲིད་ཐམས་ཅད་མཆོད་པའི་སྤྲིན་དུ་གྱུར། །ཕྱི་ནང་གསང་གསུམ་མཆོད་པས་མཆོད་པར་དམིགས། །ཕྱི་ནང་ཆོས་ཀུན་ནས་བཟུང་འབུལ་གྱི་བར། །དམིགས་པ་མ་ཟིན་བར་དུ་དབྱངས་བཅས་ཝིག །སྐབས་སུ་དོལ་ཞིང་འཇམ་པའི་ཕཊ་མང་བརྗོད། །དེ་ནས་རང་དང་ནད་པའི་ལུས་དབུས་སུ། །དབུ་མ་ཁང་སྟོང་ཀ་བ་བཙུགས་འདྲ་བསྒོམ། །རྐང་མཐིལ་གཉིས་སུ་ཐིག་ལེ་དཀར་དམར་ནི། །སྲན་མ་ཙམ་གཉིས་ཡར་འཕར་གསང་གནས་སུ།། །འདྲེས་པས་མ་སར་བྱ་ཡི་སྒོ་ང་ཙམ། །རང་གི་རྐང་པའི་མཐེ་བོང་རྩེ་ཙམ་ཡིན། །དེ་ཡང་ཁ་དོག་ལྔ་ལྡན་བཀྲག་མདངས་ཅན། །རང་གི་ཚེ་བསོད་རྣམ་ཤེས་ཡེ་ཤེས་དང་། །བྱིན་རླབས་ནུས་པ་ལྷ་སྒོམ་སྔགས་བཟླས་པའི། །བྱིན་རླབས་ལུས་ལྷ་ཐམས་ཅད་དབྱེར་མེད་བསྒོམ། །དེ་ལྟར་མ་ཤེས་
ལུས་སྦྱིན་བྱས་པ་ན། །ལུས་ལྷ་གཏུབ་ཕྱིར་གསང་སྔགས་རྩ་ལྟུང་ཕོག །སྔགས་ནུས་ཉམས་ཤིང་རང་གིས་རང་བྲུབ་ཡིན། །དེ་ལྟར་ཤེས་ན་གསང་སྔགས་བསྙེན་སྒྲུབ་ཀྱི། །ཐུན་སྐབས་ནུབ་མོ་ལུས་སྦྱིན་བྱས་ཀྱང་རུང་། །འདི་ལ་གནད་ཆེན་ཡོད་དོ་སྔགས་གཅོད་ཀུན། །དེ་ནས་ཐིག་ལེ་སྐར་ཁུང་མདའ་འཕང་ལྟར་། །སྤྱི་བོར་རྒྱངས་སེ་ཐོན་ནས་དེ་མ་ཐག །ཐིག་ལེ་རྡོ་རྗེ་ཕག་མོར་གྱུར་པར་བསྒོམ། །འདི་ལ་གོམས་པས་འཕོ་བ་ཞོར་ལ་འབྱོངས། །ལུས་ལ་ཆགས་ཞེན་ཆུང་ཞིང་འཆི་དུས་ཀྱང་། །གོམས་པའི་སྟོབས་ཀྱིས་ཆགས་ཞེན་ཆུང་བར་འགྱུར། །དེ་ནས་རང་ཉིད་ཕག་མོ་ཆེར་སྐྱེས་ཏེ། །སྐུ་ཚད་སྲིད་པའི་རྩེ་ལ་སླེབ་པ་ཡིན། །ཕྱག་གཡས་གྲི་གུག་བེམ་པོར་ཚད་ཙམ་གྱིས། །པགས་པ་བཤུས་པས་གསེར་གྱི་ས་གཞི་དང་། །མགོ་བོ་རི་རབ་ལ་སོགས་གཞུང་ཚིག་ལྟར། །གླིང་བཞི་ལྷ་མི་ལོངས་སྤྱོད་དཔག་མེད་བཅས། །དེ་ཡང་དེ་འདྲ་ཆ་ཚང་གྲངས་མེད་པ། །སྟོང་ངམ་ལྔ་བརྒྱ་ལ་སོགས་སྐད་ཅིག་གིས། །རྨི་ལམ་སྒྱུ་མ་བཞིན་དུ་ཡིད་ཀྱིས་སྤྲུལ། །སྔོན་དུ་བསྒོམས་པའི་ཐུབ་པ་མ་གཅིག་སོགས། །སྐྱབས་ཡུལ་ཚོགས་ཞིང་རྣམས་ལ་འབུལ་བར་དམིགས། །བདག་ལས་
སྤྲུལ་པའི་མཁའ་འགྲོ་གྲངས་མེད་དང་། །གདོན་དང་ནད་པ་སེམས་ཅན་ཐམས་ཅད་ཀྱིས། །ཕྱག་འཚལ་སྔར་བྱས་སྡིག་པ་བཤགས་པ་དང་། །རྒྱལ་བ་སྲས་བཅས་དགེ་བ་གང་མཛད་ལ། །རྗེས་སུ་ཡི་རང་འབུལ་ཞིང་སངས་རྒྱས་རྣམས། །ཆོས་མི་གསུང་ལ་ཆོས་གསུངས་ཞུ་བ་འབུལ། །མྱ་ངན་འདའ་བར་བཞེད་པའི་སངས་རྒྱས་རྣམས། །བསྐལ་པའི་བར་དུ་བཞུགས་པར་གསོལ་བ་འདེབས། །དེ་ལྟར་བྱས་པའི་དགེ་བས་རྡོ་རྗེ་འཆང་། །རྒྱ་གར་གྲུབ་ཆེན་ཀུ་ཀུ་རི་པར་སྤྲུལ། །དེ་ཉིད་བོད་དུ་སངས་རྒྱས་མཉན་པ་སྟེ། །ཧེ་རུ་ཀ་དེ་འགྲུབ་པའི་ཕྱིར་དུ་བསྔོ། །བསམ་པ་དང་བཅས་རང་རིག་རང་ལུས་ནས། །འགྲུབ་གྱུར་ཅིག་གི་བར་དུ་ལན་གསུམ་སྟེ། །དམིགས་པ་མ་ཟིན་བར་དུ་ཕཊ་རེ་བརྗོད། །དེ་ནས་ནམ་མཁར་ཐུབ་པ་མ་གཅིག་ལ། །རྩ་བརྒྱུད་བླ་མ་ཡི་དམ་ལྷ་ཚོགས་ཀྱིས། །བསྐོར་བ་སྔོན་ནས་སྒོམ་ནི་ཡོད་པ་ཡི། །ལྷ་ཚོགས་རྣམས་ལས་འོད་ཟེར་འཕྲོས་པ་ཡིས། །ཕྱོགས་བཅུའི་རྒྱལ་བ་སྲས་བཅས་བྱིན་རླབས་བསྡུས། །ཐུབ་དབང་ལ་ཐིམ་སྐུ་ལས་བདུད་རྩི་བབས། །མ་གཅིག་སྤྱི་བོ་ནས་ཞུགས་སྐུ་ལུས་གང་། །ཞབས་གཡོན་མཐེ་བོང་ནས་ནི་ངང་རྒྱང་རྒྱང་། །བབས་པས་བདག་དང་ནད་པའི་
སྤྱི་བོ་ནས། །ཞུགས་ཏེ་ལུས་གང་ནད་གདོན་སྡིག་སྒྲིབ་རྣམས། །དུད་ཁུ་སོལ་ཁུ་ལྟར་ཐོན་ས་འོག་སོང་། །ལུས་ཀུན་ཤེལ་སྒོང་གཡའ་དག་ལྟ་བུར་གྱུར། །དེ་ལྟར་དམིགས་ནས་གནས་སྤྱི་ཞེས་སོགས་ནས། །ཡུམ་ཆེན་བྱིན་གྱིས་རློབས་བར་གསུམ་ལྔ་བདུན། །གསོལ་འདེབས་བྱའམ་ཕཊ་རིང་ཅི་མང་ནི། །དམིགས་པ་གསལ་བར་མ་ཟིན་བར་དུ་བརྗོད། །དེ་ནས་ཐུབ་དབང་མ་གཅིག་དང་བཅས་པ། །རང་དང་བསྲུང་བྱ་ལ་ཐིམ་སྟོང་པར་ཡལ། །ཉམས་ལེན་སྟོང་པའི་ཏིང་འཛིན་དལ་གཅིག་བསྒོམ། །དེ་ནས་བདག་ལུས་གཞན་ལུས་བསྲེ་བ་དང་། །གཞན་ལུས་ཚོགས་འཁོར་བསྲེ་བའི་ཉམས་མྱོང་གནད། །རྟོགས་པ་མཐོ་ན་བདག་དང་བསྲུང་བྱ་ཡི། །ལུས་ངག་ཡིད་གསུམ་དབྱེར་མེད་གཅིག་ཏུ་དམིགས། ། རྟོགས་པ་དམའ་ན་རང་ལ་གྲིབ་འོང་བས། །བདག་གཞན་སོ་སོར་རྣམ་ཤེས་སྤར་བྱས་ནས། །སེམས་ནི་གཅིག་བསྲེ་ཕག་མོར་བསྒོམ་པ་སྟེ། །སླར་ལུགས་གོང་ལྟར་སྤར་བའི་རྣམ་ཤེས་ནི། །ཕག་མོ་དམར་མོ་རི་རབ་ལས་ཆེ་བསམ། །གྲི་གུག་ཚད་པས་བེམ་པོའི་པགས་པ་བཤུས། །སྟོང་གསུམ་ཁྱབ་སྟེང་བེམ་པོར་གྲི་གུག་དེ། །ཚད་ཙམ་བྱས་པས་ཤ་རི་ཁྲག་གི་མཚོ། །
སྟོང་གསུམ་འཇིག་རྟེན་དམར་དང་ལྟེམ་མེ་གང་། །འབྲུ་གསུམ་བརྗོད་པས་རྣམ་པ་ཤ་ཁྲག་ལ། །ངོ་བོ་ཟག་མེད་བདུད་རྩིའི་རྒྱ་མཚོ་སྟེ། །ཕྱི་ཤ་ནང་ཁྲོལ་རྐང་ཀླད་རྒྱུས་པ་སོགས། །གང་འདོད་ཁྱེར་དམིགས་སྤུས་འདོད་མ་ཞེས་གྲགས། །ཤ་ཁྲག་ཚིལ་རུས་ནང་ཆ་སྣ་ཚང་བར། །རྒྱུ་སྐར་བགོས་ལྟར་ཁྱེར་དམིགས་སྤྱང་སྟོན་མ། །པགས་པའི་སྟེང་དུ་གྲི་གུག་ཚད་ཙམ་གྱིས། །བང་བའི་མིག་ལྟར་རེ་ཆོད་བྱས་པ་ལ། །ལ་ལ་ཤ་དང་ལ་ལ་ཁྲག་གིས་གང་། །ལ་ལ་རུས་པ་ལ་ལ་ནང་ཆོས་བཀང་། །ལ་ལ་གསེར་གཡུ་ལ་སོགས་རིན་པོ་ཆེ། །ལ་ལ་འབྲུ་སྣ་ལ་ལ་སྨན་སྣ་དང་། །ལ་ལ་དར་ཟབ་ལ་ལ་གོ་ཁྲབ་གང་། །སུ་ལ་སུ་འདོད་ཁྱེར་དམིགས་བང་མིག་མ། །ཁྱད་པར་རང་གཞན་ན་བར་གྱུར་པ་ལ། །མིག་དང་རྣ་བ་མགོ་དང་རྐང་པ་སོགས། །གང་ནའི་ཤ་དེ་འཇིག་རྟེན་གང་བ་ལ། །ལྷ་འདྲེ་རྣམས་ཀྱིས་ཡོས་ལྟར་འགམ་པར་དམིགས། །དེ་ནས་རྐང་དུང་འབུད་པ་འདི་ལྟ་སྟེ། །དེ་ཡང་ཐོག་མར་ཁ་རྡེབ་ལན་གསུམ་རེ། །མ་འཇིགས་མ་སྐྲག་མ་དངངས་སྒྲ་རུ་བསམ། །རྐང་དུང་ལན་གསུམ་འབུད་པའི་སྒྲ་ལ་ནི། །འདུས་ཤིག་མྱུར་དུ་འདུས་ཤིག་ད་ལྟ་འདུས། །སྲིད་རྩེ་མནར་མེད་བར་
དུ་ཐོས་པར་བསམ། །འོ་མཐོ་སྲིད་རྩེ་ནས་འཁྱེར་བར་གྱིས་ཀྱི་བར། །དམིགས་པ་གསལ་བར་མ་ཟིན་བར་དུ་ནི། །འདོན་སྒོམ་སྦྲགས་ཤིང་ཝིག་ལ་འདོན་པ་དང་། །ཕཊ་སྒྲ་ཐུང་ལ་དྲག་པ་ཅི་མང་བརྗོད། །སླར་ཡང་ཁས་ཞེན་དབང་ཆུང་བང་བུལ་བ། །རྣམས་ལ་ལྷག་རོལ་བྱིན་པས་ལྷག་མེད་བསམ། །སྔ་མ་ཞེས་ནས་དོན་དུ་བསྔོ་བའི་བར། །ལན་གཅིག་གམ་ནི་གསུམ་བརྗོད་སྟོང་ཉིད་བསྒོམ། །ཕཊ་ཀྱང་སྟོང་ཉིད་མ་གསལ་བར་དུའོ། །དེ་ཡན་དམར་འགྱེད་མདོ་ལུགས་ཉམས་ལེན་ཏེ། །སྟག་མོ་ལུས་སྦྱིན་སོགས་ཀྱི་དགོངས་པ་ཡིན། །བྱང་ཆུབ་སེམས་དཔའི་ས་ནི་མ་ཐོབ་བར། །དངོས་སུ་ལུས་ནི་སྦྱིན་པར་མི་རུང་སྟེ། །ཡིད་ཀྱིས་བྱིན་པས་དངོས་དང་བསོད་ནམས་མཉམ། །དེ་ནས་བསྲེ་ལུགས་རྣམ་ཤེས་སྤར་ལུགས་འདྲ། །རང་ཉིད་ཕག་མོ་ནམ་མཁའ་མཉམ་པའི་སྐུ། །བེམ་པོ་ཆེ་ཚོ་མདངས་རྒྱས་འཛམ་གླིང་གང་། །གྲི་གུག་ཚད་པས་ཐོད་པ་སྒར་གྱིས་ཀོག །མི་མགོའི་སྐྱེད་པུ་རང་བྱུང་རི་རབ་ཙམ། །གསུམ་གྱི་སྟེང་དུ་ཐོད་པ་བཞུགས་པ་ཡི། །རྒྱ་ཁྱོན་སྟོང་གསུམ་འཇིག་རྟེན་ཚད་དང་མཉམ། །དེ་ནང་གྲི་གུག་རྩེ་ཡིས་བེམ་པོ་བསྒྱུར། །གྲི་གུག་ཚད་
པས་ཤ་ཁྲག་སིལ་བུ་སོང་། །འོག་ནས་རླུང་གཡོས་མེ་འབར་ཞུ་ཞིང་ཁོལ། །བྱང་སེམས་དཀར་དམར་འདྲེས་པས་ཡེ་ཤེས་ཀྱི། །བདུད་རྩི་དཀར་ལ་དམར་མདངས་ཆགས་པ་ཡིས། ། ཐོད་པ་གང་བས་རྒྱ་མཚོ་འདྲ་བར་གྱུར། །ནམ་མཁའི་ཁམས་སུ་བཀའ་བརྒྱུད་གྲུབ་ཐོབ་ཚོགས། །བར་སྣང་མཐོ་སར་ཡི་དམ་རྒྱུད་སྡེའི་ལྷ། །དེ་འོག་ཡེ་ཤེས་འཇིག་རྟེན་ཆོས་སྐྱོང་དང་། །བྱང་སེམས་ཉན་རང་ས་གཞིར་གནོད་བྱེད་དང་། །ལན་ཆགས་བདག་པོ་ལ་སོགས་ཐེམ་འགག་གང་། །རང་གི་ཐུགས་ལས་ཌཱ་ཀི་དཀར་སེར་དམར། །ལྗང་མོ་ལ་སོགས་བྱེ་བ་དུང་ཕྱུར་འཕྲོས། །ཐོད་པའི་སྐྱོགས་ཀྱིས་བདུད་རྩིའི་རྒྱ་མཚོ་ནས། །བཅུས་ཤིང་མགྲོན་རྣམས་ཀུན་གྱི་ཕྱག་ཏུ་བཞག །གསོལ་བས་ཐམས་ཅད་མཉེས་ཤིང་ཚིམ་པ་དང་། །བུམ་པ་ཐོགས་པ་ཌཱ་ཀི་མང་པོ་ཡིས། །བདུད་རྩི་བཅུས་ནས་རིགས་དྲུག་སེམས་ཅན་ལ། །སོ་སོའི་གནས་སུ་བྱིན་པས་སྡུག་བསྔལ་ཞི། །དེ་ནི་ཐོད་ཞལ་མ་ཡི་དམིགས་པ་སྟེ། །མགྲོན་རྣམས་རང་རང་སོ་སོའི་གང་དགྱེས་པའི། །བཀྲ་ཤིས་རྫ་ས་རྟགས་མཆོད་པ་སྣ་བདུན་དང་། །འདོད་ཡོན་ལྔ་དང་སྒྲུབ་རྫས་བསྐང་བའི་རྫས། །རིན་ཆེན་འབྲུ་སྨན་དར་ཟབ་གོ་ཁྲབ་སོགས། །
བདུད་རྩི་བཅུས་ནས་གང་འདོད་དེར་གྱུར་ཏེ། །ཀླུ་ལ་དཀར་གསུམ་མངར་གསུམ་གྱུར་དམིགས་ནས། །ཐམས་ཅད་མཉེས་ཚིམ་དགའ་མགུ་ཡི་རང་གྱུར། །གནོད་བྱེད་ཐམས་ཅད་བདུད་རྩི་མྱོང་ཙམ་གྱིས། །བྱམས་དང་སྙིང་རྗེ་བྱང་ཆུབ་སེམས་ལྡན་གྱུར། ། །རང་གི་དགེ་རྩ་བདེ་སྐྱིད་ཐམས་ཅད་ནི། །རིགས་དྲུག་གནོད་བྱེད་རྣམས་ལ་སིབ་སིབ་ཐིམ། །ཁོང་རྣམས་བདེ་བ་ཚད་མེད་རྒྱུད་ལ་སྐྱེས། །གདོན་གྱིས་གཙོར་བྱས་སེམས་ཅན་ཐམས་ཅད་ཀྱི། །ནད་དང་སྡིག་སྒྲིབ་སྡུག་བསྔལ་མ་ལུས་པ། །རང་ལ་སིབ་སིབ་ཐིམ་པས་ཁོང་རྣམས་ཀུན། །སྡུག་བསྔལ་སྡིག་སྒྲིབ་ཀུན་དང་བྲལ་བར་དམིགས། །དེ་ལྟར་ལུས་ནི་ཚོགས་ཀྱི་འཁོར་ལོར་ཕུལ། །བདག་གཞན་བརྗེ་བའི་བྱམས་དང་སྙིང་རྗེ་དེས། །འགྲོ་བའི་དོན་དུ་རྫོགས་པའི་བྱང་ཆུབ་མཆོག །བདག་གིས་མྱུར་དུ་ཐོབ་པར་ཤོག་སྙམ་པའི། །དམིགས་པ་མ་ཡེངས་ངང་ནས་རང་རིག་ནས། །རྒྱུར་གྱུར་ཅིག་བར་ལན་གསུམ་ཝིག་པ་དང་། །ཕཊ་ནི་ཅི་མང་དམིགས་པ་ཟིན་ངེས་བྱ། །དེ་ནི་སྔགས་ལུགས་དོན་བསྡུས་རང་གི་ལུས། །ཚོགས་ཀྱི་འཁོར་ལོ་བྱ་བའི་མན་ངག་སྟེ། །དམ་ཚིག་ཉམས་ཆག་བསྐང་བའི་མཆོག་ཡིན་ཅིང་། །
ཆོས་སྐྱོང་འཁུ་ལྡོག་ཞི་བའི་ཐབས་ཀྱི་མཆོག །དམིགས་པ་དེ་ཉིད་བརྒྱ་རྩ་སོགས་བྱས་ན། །རྐྱེན་ཟློག་འཆི་བ་བསླུ་བའི་གདམས་ངག་ཟབ། །རང་ཉིད་ཚབས་ཆེན་ན་བར་གྱུར་པའི་དུས། །ངག་ནས་ལུས་སྦྱིན་འདོན་པར་མི་ནུས་ན། །ཡིད་ཀྱིས་དམིགས་པ་ལོ་གྲངས་སམ་བརྒྱ་རྩ་སོགས། །བསྒོམ་ཞིང་ཕཊ་ནི་ཅུང་ཟད་བརྗོད་པ་ཡིས། །ནད་ལས་འཕྲལ་དུ་གྲོལ་བ་མྱོང་བས་གྲུབ། །ནད་པ་གཞན་ལ་དེ་དང་ཁྱད་པར་མེད། །དེ་ནས་བསྲེ་བའི་དམིགས་རིམ་ཟབ་མོ་ནི། །ནམ་མཁར་དམ་པ་མ་གཅིག་པཀྴི་གསུམ། །ཐོ་བརྩེགས་སམ་ནི་གྲངས་སུ་བཞུགས་པ་ནི། །སངས་རྒྱས་ཀུན་དང་དབྱེར་མེད་ངོ་བོ་བསྒོམ། །རྟོགས་པ་མཐོ་ན་བདག་གཞན་ལུས་སེམས་བསྲེ། །དམའ་ན་སོ་སོར་བསྒོམ་པར་བྱ་བ་ཡིན། །ལུས་དང་སེམས་དང་ནད་གདོན་དབྱེར་མེད་པར། །ཡི་གེ་ཨ་ཡིག་དཀར་པོ་ཞིག་ཏུ་བསྒོམ། །ཡར་འཕྲོས་དམ་པ་རྒྱ་གར་ཐུགས་ཀར་ཐིམ། །དམ་པ་མ་གཅིག་ལ་ཐིམ་པཀྴིར་ཐིམ། །པཀྴི་ནམ་མཁར་ཐིམ་པས་ནམ་མཁའ་དང་། །དབྱེར་མེད་ནམ་མཁས་གར་ཁྱབ་རིག་པས་ཁྱབ། །རིག་པས་གར་ཁྱབ་ཆོས་སྐུས་ཁྱབ་པར་དམིགས། །དེ་ལྟར་དམིགས་པ་དབང་པོ་ཐ་མ་ཡིན། །འབྲིང་
གིས་དེ་ལྟར་བསྒོམས་པས་དེ་ལྟར་མཐོང་། །རབ་ཀྱིས་ཡེ་ནས་སྣང་སྲིད་དེ་ལྟར་རྟོགས། །དེ་ལྟར་རྟོགས་ཚེ་ནད་གདོན་སྡུག་བསྔལ་སོགས། །ཡེ་ནས་མ་གྲུབ་ཆོས་སྐུ་རྗེན་པར་མཐོང་། །དེ་ལྟར་མ་རྟོགས་མ་རྒན་སེམས་ཅན་ལ། །འཁྲུལ་པའི་དབང་གིས་ནད་གདོན་ན་ཚ་བྱུང་། །དེ་ཚེ་མེད་བཞིན་སྣང་བའི་སེམས་ཅན་ལ། །ཤུགས་འབྱུང་དམིགས་མེད་སྙིང་རྗེ་རང་ཤུགས་སྐྱེ། །སྙིང་རྗེ་གཟུགས་ཀྱི་སྐུ་ཡི་རྒྱུ་ཡིན་ཕྱིར། །སྟོང་པ་ཉིད་དེ་གཟུགས་ཀྱི་སྐུར་བཞེངས་ཏེ། །ནམ་མཁའ་ཐམས་ཅད་དམ་པ་རྒྱ་གར་སྐུ། །ས་གཞི་ཐམས་ཅད་མ་གཅིག་ལབ་སྒྲོན་སྐུ། །བྱེ་བ་དུང་ཕྱུར་གྱུར་པས་ཐམས་ཅད་གང་། །སྐུ་ཡི་གར་སྟབས་ཌཱ་དྲིལ་ཕཊ་སྒྲ་ཡིས། །སྟོང་གསུམ་འཇིག་རྟེན་ཤིག་ཤིག་ཡོམ་ཡོམ་འགུལ། །སྣོད་བཅུད་སྣང་སྲིད་འོད་ཞུ་ལྷ་ལ་ཐིམ། །ལྷ་རྣམས་གཅིག་ལ་གཅིག་ཐིམ་མ་གཅིག་ཐིམ། །མ་གཅིག་བདག་དང་བསྲུང་བྱ་ལ་ཐིམ་པས། །བདག་དང་བསྲུང་བྱ་དངོས་མེད་སྟོང་པར་ཡལ། །ནད་གདོན་མ་གྲུབ་སྟོང་ཉིད་ངོ་བོར་བལྟ། །དེ་ཡི་དགེ་བས་སེམས་ཅན་ཐམས་ཅད་ཀུན། །སྟོང་ཉིད་མངོན་སུམ་རྟོགས་ནས་ཡུམ་ཆེན་གྱི། །གོ་འཕང་མྱུར་དུ་ཐོབ་པར་ཤོག་
སྙམ་ནས། །འཇིག་རྟེན་ན་ནད་གདོན་གྱི་གནོད་སོགས་ནས། །གཏན་ནས་ཐར་གྱུར་ཅིག་གི་བར་དུ་ནི། །ལན་གྲངས་གསུམ་ལྔ་བདུན་དགུ་བཅུ་ལ་སོགས། །ཝིག་ཅིང་དམིགས་པ་རྩེ་གཅིག་གཟེར་བ་ན། །ནད་གདོན་ཐམས་ཅད་སེལ་བའི་བསྲེ་བ་མཆོག །དེ་བས་རྒྱུན་ཁྱེར་ཆག་མེད་ལུས་སྦྱིན་ལ། །རྟོགས་པ་མཐོ་ན་མགྲོན་རྣམས་རང་ལ་བསྟིམ། །ཉམས་ལེན་བསྐྱོངས་བས་བོགས་ཆེན་ཚར་ལྟོང་འབྱུང་། །རྟོགས་པ་དམའ་ན་རྩུབ་ཅིང་སེམས་མི་བདེ། །དེ་ཕྱིར་མགྲོན་རྣམས་དགའ་མགུ་བཞད་དེ་རི། །སོ་སོ་རང་རང་གནས་སུ་སོང་བར་བསྒོམ། །ནད་པ་སྲིའུ་གསོ་དང་གདོན་གཅོད་དང་། །དུར་གཅོད་ལ་སོགས་གཅོད་ལ་གཞུང་བཟུང་ནས། །ཞོགས་པ་ཉིན་ཕྱེད་དགོང་མོ་སྲོད་དང་བཞི། །ཉལ་ཁ་ཐོ་རངས་དུས་དྲུག་ལུས་སྦྱིན་ནི། །གོང་ལྟར་དམིགས་རིམ་མ་འཆོལ་ཐུན་དྲུག་བྱ། །སྔ་དྲོ་བསང་དང་གཏོར་མ་ལ་སོགས་དང་། །ཕག་མོ་ཁྲོས་མ་ལ་སོགས་ལྷ་གཞུང་དང་། །དགོང་མོ་བསྐང་བ་གཅོད་ཚོགས་ལ་སོགས་བྱོ། །ནུབ་མོ་གཏོར་འབུལ་བསྟབ་པ་ལ་སོགས་བྱ། །མཐའ་གཏད་མི་བྱེད་ཁ་མེད་བྱེད་དགོས་ན། །སྲོད་ལ་བྱ་བ་ཕྱག་ལེན་ཐམས་ཅད་མཐུན། །བར་སྐབས་ཐུན་
མཚམས་གསེབ་དམིགས་བཏང་ཞེས་པ། །ནད་གདོན་གང་ཡིན་དམིགས་པ་སོ་སོར་གཟེར། །དེང་སང་གཉན་ཐོག་གཅོད་མཁན་ཤིན་ཏུ་དཀོན། །རང་སེམས་སྟོང་ཉིད་དངོས་སུ་རྟོགས་ན་ཡང་། །སྣང་བ་སེམས་སུ་མ་རྟོགས་གང་ཟག་གི །གཉན་ཐོག་བཅད་ན་སྣང་བ་སེམས་སུ་ཆོད། །བོགས་ཆེན་འབྱུང་སྟེ་སྐབས་སུ་བབས་པ་ཡིན། །སྣང་བ་ངེས་པར་སེམས་སུ་རྟོགས་པ་ལ། །གཉན་ཐོག་གཅོད་རྒྱུ་མེད་པས་དགོས་རྒྱུ་མེད། །རང་སེམས་སྟོང་ཉིད་དངོས་སུ་མ་རྟོགས་པར། །གཉན་ཐོག་གཅོད་པ་བར་ཆད་འབྱུང་བའི་གཞི། །དེང་སང་ནད་གདོན་གཅོད་མཁན་ཤིན་ཏུ་མང་། །དེ་ཕྱིར་ནད་དང་གདོན་ལ་ཕན་པ་ཡི། །དམིགས་པ་ཉེར་མཁོ་འགའ་ཞིག་བཤད་པ་ནི། །ནད་པ་གདོན་ཆེན་བྱིན་རླབས་ལ་སོགས་དུས། །རང་ཉིད་སྐད་ཅིག་དམ་པ་རྒྱ་གར་བསྒོམ། །སྐུ་དང་ཕྱག་མཚན་ལས་ནི་མེ་དཔུང་འཕྲོས། །ནད་པའི་ནད་གདོན་ལུས་དང་བཅས་པ་རྣམས། །ཐུལ་གྱིས་བསྲེགས་རྗེས་རང་ལས་རླུང་ནག་འཕྲོས། །བསྲེགས་པའི་ཐལ་བ་གཏོར་ནས་སྟོང་པར་གྱུར། །དེ་འདྲའི་དམིགས་པ་ལན་བདུན་ཚར་རྗེས་སུ། །ནད་པ་གདོན་དང་བཅས་ལ་སྙིང་རྗེ་བསྒོམ། །
དེ་ནས་ཉམས་ལེན་སྟོང་ཉིད་ངང་ལ་བཞག །ཡང་ན་རང་ཉིད་མ་གཅིག་སེར་མོ་ནི། །ཌཱ་དྲིལ་འཁྲོལ་བས་གར་སྟབས་བྱེད་པར་བསྒོམ། །ཧ་ཕཊ་དྲག་པོ་ལན་གསུམ་བརྗོད་པ་ཡིས། །རང་ལས་རླུང་འཚུབ་འདྲ་བའི་འོད་ཟེར་འཕྲོས། །ནད་པའི་ལུས་གདོན་ནད་དང་བཅས་པ་དེ། །ན་བུན་རླུང་འཚུབ་ཆེན་པོས་དེད་པ་ལྟར། །རྒྱ་མཚོའི་ཕར་འགྲམ་མུན་པར་སེབས་སེ་སོང་། །དེ་རྗེས་སྟོང་ཉིད་ངང་ལ་བཞག་པར་བྱ། །བགེགས་བསྲེགས་དམིགས་པ་ཡབ་ཡུམ་གཉིས་ཀྱི་ལུགས། །ཟབ་བོ་ཨྠྀི་སྙིང་ལ་འཆང་བར་བྱ། ། །རང་ངམ་གཞན་གྱི་ལུས་པོ་གང་ན་སར། །སེམས་ཅན་ཀུན་གྱི་ནད་གདོན་ཐམས་ཅད་བསྟིམ། །ཐིམ་པས་རྡུལ་བ་ལྟར་གྱུར་ཁྲག་གི་རྒྱུན། །བབས་པས་ས་ཕྱོགས་རི་ཀླུང་ཁྲག་གིས་གང་། །ལན་ཆགས་གདོན་བགེགས་ཀུན་གྱིས་ཁྲག་འཐུང་བས། །དགའ་མགུ་ལན་ཆགས་བུ་ལོན་བྱང་བར་བསྒོམ། །ཨྠྀི། །རྐང་ལག་བཞི་པོ་གང་རུང་ན་བ་ལ། །རྐང་མཐིང་ལག་མཐིལ་གཉིས་ཀྱི་དཀྱིལ་དེ་རུ། །ཡི་གེ་རཾ་ཡིག་དམར་སེར་མེ་འབར་ནས། །སྤོས་ཐུར་སྦར་ལྟར་བེམ་པོར་མ་ཐུག་པར། །རྐང་ལག་གང་ན་ཚིག་ནས་མེད་པར་བསྒོམ། །ནད་གཅོད་དམིགས་པའི་གཏར་བསྲེགས་
ཟབ་མོ་རྒྱ། །སྟོད་འཚང་ལ་སོགས་བཤུལ་རྒྱུད་ན་བ་ལ། །དེ་རུ་ནོར་བུའི་དབྱིབས་ཅན་བུག་པ་གསུམ། །དེ་ནས་ནད་གདོན་སྔོ་དམར་དུ་བ་དང་། །རླངས་པའི་ཚུལ་དུ་ནམ་མཁར་ཐོན་པར་བསྒོམ། །ཕོ་བ་ན་ན་ཕོ་བར་ཁུང་བུག་ནས། །ནད་དང་བད་སྣབས་ཐམས་ཅད་རྡོ་རོ་རོ། །ཝ་ཆུ་ལྟ་བུར་བབས་པས་ས་ཕྱོགས་གང་། །གདོན་དང་ནད་བདག་རྣམས་ཀྱིས་འཐུང་བར་དམིགས། །བད་ཀན་སྐྱ་བོ་ཟས་མི་འཇུ་བ་ལ། །ཤ་སྦྲང་ལྕགས་ཀྱི་མཆུ་ཅན་མང་པོ་ཡིས། །ཕོ་བ་བད་ཀན་བཅས་པ་ཟོས་པར་བསྒོམ། །བད་ཀན་སྨུག་པོ་ལ་སོགས་གཅོང་ནད་ལ། །ཕོ་བ་ལ་སོགས་ལུས་ཀྱི་ནད་ཐམས་ཅད། །ཡི་གེ་ཨ་ཡིག་དཀར་པོ་མང་པོ་ཡིས། །ལུས་ཀྱི་ནང་ཀུན་ཐམས་ཅད་གང་བར་བསྒོམ། །ཚད་པའི་ནད་ལ་སྙིང་དཀྱིལ་བཾ་ཡིག་དཀར། །དེ་ལས་ག་པུར་རང་བཞིན་ཆུ་འཁྱག་བབས། །ལུས་གང་ཚད་ནད་ཐམས་ཅད་བཤལ་ཞིང་དག །འོག་སྒོ་ནས་ཐོན་ས་འོག་སོང་བར་དམིགས། །གྲང་བའི་ནད་ལ་ལྟེ་འོག་སུམ་མདོ་ནས། །རཾ་ཡིག་དམར་པོ་ཞིག་ལས་མེ་འབར་བས། །ལུས་གང་ལུས་ནང་ཐམས་ཅད་ལྕགས་སྲེག་མདོག །དམར་དང་ལྷང་ངེ་རབ་ཏུ་ཚ་བར་བསྒོམ། །
དམུ་ཆུ་ལ་སོགས་གྲང་བའི་ནད་སེལ་ལོ། །ཆམ་པས་སྣ་དང་གྲེ་བ་འགག་པ་ལ། །མགོ་བོ་ཤེལ་གྱི་བུམ་པ་སྣ་ནི་མཆུ། །ནད་རྣམས་བདུད་རྩི་དཀར་ལ་སེར་མདངས་ཅན། །མཆུ་ནས་བབས་པས་ས་ཕྱོགས་གང་བ་ལ། །ནད་བདག་རྣམས་ཀྱིས་འཐུངས་བས་ཚིམ་པར་བསྒོམ། །མིག་ནད་རིམས་ལ་ལུས་སེམས་ཕྲལ་བྱས་ཏེ། །མིག་གི་ཐང་མས་འཇིག་རྟེན་གང་བར་གདལ། །ལྷ་འདྲེ་རྣམས་ཀྱིས་ཡོས་ལྟར་འགམ་པ་དང་། །མིག་ནི་བྲུས་པ་བྱ་རོག་རྣམས་ལ་བྱིན། །མིག་ལས་སྟོང་པ་ལྟག་ཁུང་བར་དུ་ནི། །བུག་པ་ཧ་རེ་ཡོད་པར་བསྒོམ་པར་བྱ། །སོ་ནད་མི་ནག་ལྕགས་ཀྱི་སྐམ་ཐོགས་པས། །སོ་ཕུད་ཆུ་རྡོའི་བར་དུ་བརྡུངས་ནས་ཀྱང་། །ཐལ་བ་རླུང་བསྐུར་རྗེས་ཀྱང་མེད་པར་བསྒོམ། །གཉན་དང་ལྷོག་པ་སྐྲང་པོའི་རིགས་རྣམས་ལ། །ལུས་སྦྱིན་བྱས་རྗེས་ཤ་ཁྲག་ལྷག་མ་རྣམས། །བྱ་ཁྱུང་མེ་ཡི་གཤོག་པ་ཅན་གྱིས་ཟོས། །མེ་གཤོག་བརྡབས་པས་བསྲེགས་ནས་རྗེས་མེད་བསྒོམ། །མི་ནོར་གང་ལའང་ཕན་པའི་དམིགས་པ་ནི། །ཐོད་པ་ཡངས་ཤིང་རྒྱ་ཆེའི་ནང་དུ་ནི། །ནད་པའི་ནོར་ལུག་ལ་སོགས་བསྒོམ་པ་ལ། །མ་གཅིག་ཕྱག་ནས་བདུད་རྩི་བྷན་ཡིས། །བདུད་རྩི་བླུགས་པས་ཁྲུས་
བྱས་ནད་གདོན་དག །བྷན་ཁྲུས་ཆུས་གང་བ་བདུད་རྩི་ཡི། །རྒྱ་མཚོར་གྱུར་པ་གནོད་བྱེད་གདོན་གྱིས་འཐུང་། །བུ་ལོན་ལན་ཆགས་བྱང་ནས་དགའ་མགུ་བསྒོམ། །བློ་སེམས་མ་བདེ་སྙིང་གི་དཀྱིལ་དེ་རུ། །མ་གཅིག་རྡོ་རྗེ་སྐྱིལ་ཀྲུང་མཉམ་བཞག་ཅན། །སྙིང་གི་རྒྱབ་ནས་འོད་ཟེར་ཁ་དོག་ལྔ། །སྣལ་མ་འདྲ་བས་ཕུད་པ་ལྟར་དཀྲིས་བསྒོམ། །གོང་གི་དམར་འགྱེད་སྐབས་སུ་གཟའ་རྒྱལ་པོ། །འདྲེ་མོ་བཙན་བདུད་ཀླུ་དང་ཐེའུ་རང་སོགས། །གང་འདོད་མི་ཡི་ཁྲོམ་ལྟར་འཚོགས་པ་ལ། །ཤ་ཁྲག་རི་རབ་རྒྱ་མཚོ་ལྟར་བྱིན་ཕྱི་པས། །ངོམ་ཞིང་ཚིམས་ནས་དགའ་མགུ་ཡི་རང་བར། །བསྒོམས་པས་གང་གནོད་ལན་ཆགས་བྲལ་ཞིང་ཞི། །སྤྱིར་ནི་ལུས་སྦྱིན་ཁོ་ནར་འབད་པས་ཆོག །ཤིང་གཉན་གཅོད་དང་ཁྲག་ཐབ་རྫོགས་པ་དང་། །རོ་བཤའི་དུས་སུ་མི་ཤ་ཟ་བ་དང་། །རོ་ཡི་ཁྲག་ལོ་འཐུང་དང་ལྡག་པ་དང་། །ཆུ་མིག་ནང་དུ་ཁྲག་བླུག་རྡོ་བསྲེགས་འཕེན། །དེ་དག་བྱེད་པའི་གཅོད་ལོག་བདུད་ཀྱི་ལས། །ཡོན་བདག་ཡུལ་ཕྱོགས་བཅས་ལ་གནོད་པ་ཆེ། །རང་ཉིད་མནར་མེད་དམྱལ་བའི་བུད་ཤིང་སྟེ། །ཕོ་བདུད་ཐོད་པ་བྷ་ར་ཞེས་བྱ་དང་། །ཧོར་མོ་ཅོག་ལ་སྒྲོན་
གྱི་གཅོད་ལོག་ཡིན། །ལྷ་འདྲེའི་སྟེང་དུ་ཞེ་སྡང་ཐུབ་ཐུབ་བྱེད། །དེ་ཡང་གཅོད་ལོག་ཡིན་པས་ཤེས་པར་གྱིས། ༈ །ནད་པ་གདོན་ཆེན་ལྷ་འདྲེ་ཐམས་ཅད་ནི། །སྐྱེ་བ་དུ་མའི་ཕ་དང་མ་ཡིན་པས། །ཕན་པར་འདོད་པའི་བྱམས་དང་སྙིང་རྗེ་ཡིས། །ཤ་ཁྲག་སྦྱིན་པར་བསྔོ་ཞིང་བཟང་འབྲེལ་བཞག །བསྔོ་བ་སྨོན་ལམ་བཟང་པོས་རྒྱས་བཏབ་སྟེ། །ལྷ་འདྲེ་དགྲ་རུ་མི་ལྟ་སློབ་མ་དང་། །ཡོན་བདག་འདྲེས་ཆེན་ལྟ་བུར་བྱམས་པ་བསྒོམ། །དེ་ནི་མ་གཅིག་ལབ་སྒྲོན་ལུགས་ཡིན་ནོ། །ལྷ་འདྲེ་ནད་གདོན་ལ་སོགས་མི་མཐུན་ཕྱོགས། །གང་བྱུང་ཉམས་ལེན་ཉིད་དང་བསྲེས་བྱས་ཏེ། །བོགས་སུ་ཐོན་པར་བྱེད་པ་མ་གཅིག་གཅོད། །དམ་པའི་ཞི་བྱེད་ནཱ་རོའི་རོ་སྙོམས་དང་། །ཨོ་རྒྱན་འཕྲུལ་གཅོད་ལ་སོགས་དགོངས་པ་ཡིན། །ཀུན་གྱི་དོན་འདུས་མི་བསྐྱོད་རྒྱལ་བས་གསུངས། །ཚིག་ཉུང་དོན་ཆེན་ཅུང་ཟད་གོ་དཀའ་བ། །རྨོངས་པ་རྣམས་ཀྱིས་ཉམས་ལེན་བདེ་བའི་ཕྱིར། །དགེ་སློང་ཕུན་ཚོགས་ཁོང་དང་གཅོད་ཆུང་སོགས། །འགའ་རེའི་བསྐུལ་ནས་རཱ་ག་ཨ་སྱ་ཡིས། །འཕྲལ་དུ་བྲིས་པས་གཅོད་པ་འགའ་རེ་ལ། །ཕན་ཐོགས་འགྲོ་དོན་དཔག་མེད་འབྱུང་བར་ཤོག །སརྦ་མངྒ་ལཾ། །