ཀུ་སཱ་ལའི་ཚོགས་བསགས་ཞེས་བྱ་བའི་ལུས་སྦྱིན།
ཀུ་སཱ་ལའི་ཚོགས་བསགས་ཞེས་བྱ་བའི་ལུས་སྦྱིན་བཞུགས་སོ།། ན་མོ་པྲཛྙཱ་པཱ་ར་མི་ཏ་ཡེ། ཉལ་ཁ་ཀུ་སཱ་ལུའི་ཚོགས་གསོག་ནི། །དམིགས་རིམ་བསྡུས་པའི་འདོན་སྒོམ་སྦྲགས་པ་ནི། །བདག་འཛིན་གཅོད་པའི་སཱུ་རེ་འདི་ལྟ་སྟེ། ༈ ན་མོ་གུ་རུ། གཅེས་ཤིང་འཕངས་བའི་བདག་ལུས་ཕུང་པོ་འདི། །འགྲོ་ཀུན་བྱང་ཆུབ་འཐོབ་ཕྱིར་སྦྱིན་པར་གཏོང་། །ཕཊཿ རང་སེམས་སྙིང་དབུས་རྡོ་རྗེ་ཕག་མོ་ནི། །དབུ་མའི་ལམ་ནས་གཤེགས་ཏེ་ནམ་མཁར་བྱོན། །ཕཊ་ཕཊ་ཕཊཿ གྲི་གུག་ཚད་པས་ཐོད་པ་སྒར་གྱིས་འཕངས། །ཀེཾ་ལས་རང་བྱུང་ཐོད་སྐྱེད་སྟེང་དུ་བཙུགས། །ཚད་ནི་རྒྱ་ཁྱོན་སྟོང་གསུམ་མཉམ་པའི་ནང་། །དེ་ནང་གྲི་གུག་རྩེ་མོས་བེམ་རོ་འཕངས། །དེ་ལ་གྲི་གུག་ཚད་ཙམ་བྱས་པ་ཡིས། །ཤ་ཁྲག་དམར་ཉིལ་བྷནྡྷ་དམར་ལྟེམ་གང་། །ཡྃ་ལས་རླུང་གཡོས་རྃ་ལས་མེ་འབར་ཁོལ། །གྲི་གུག་གིས་དཀྲུག་ཤ་ལྔ་བདུད་རྩི་ལྔ། །ཟག་མེད་བདུད་རྩི་དཀར་ལ་དམར་མདངས་ཆགས། །རོ་བརྒྱ་ནུས་པ་སྟོང་དང་ལྡན་པར་གྱུར། །ཨོཾ་ཨཱཿཧཱུྃ་གིས་ཡེ་ཤེས་བདུད་རྩིར་གྱུར། །ཕཊ་ཕཊ་ཕཊཿ རང་ལས་སྤྲུལ་པའི་མཁའ་འགྲོ་གྲངས་མེད་པ། །སྐུ་མདོག་སྣ་ཚོགས་ཕྱག་
མཚན་བྷནྡྷའི་སྐྱོགས། །འཛིན་པ་རྣམས་ཀྱིས་བདུད་རྩི་ནས་བཅུས་ཏེ། །ནམ་མཁའ་ས་གཞི་མགྲོན་གྱིས་གང་བར་མཆོད། །ཕཊ་ཕཊ་ཕཊཿ བཀའ་བརྒྱུད་བླ་མ་ཡི་དམ་ལྷ་ཡི་ཚོགས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ། །བདག་ལུས་ཚོགས་མཆོད་བདུད་རྩི་འདི་འབུལ་བས། །ཚོགས་རྫོགས་སྒྲིབ་བྱང་ཉམས་ཆག་བསྐང་གྱུར་ཅིག །ཕཊ་ཕཊ་ཕཊཿ དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །དཔལ་མགོན་བདུན་ཅུ་དགེ་བསྙེན་བརྟན་མར་བཅས། །བདག་ལུས་ཚོགས་མཆོད་བདུད་རྩིའི་ཐུགས་དམ་བསྐང་། །ཕྱི་ནང་བར་ཆད་མ་ལུས་ཞི་བར་མཛོད། །ཕཊ་ཕཊ་ཕཊཿ འགྲོ་དྲུག་སེམས་ཅན་མ་ལུས་ཐམས་ཅད་ལ། །བདག་ལུས་ཚོགས་མཆོད་བདུད་རྩི་འདི་བསྔོས་པས། །ལན་ཆགས་བུ་ལོན་བྱང་ནས་ལས་སྒྲིབ་དག །ཀུན་ཀྱང་རྣམ་མཁྱེན་སངས་རྒྱས་ཐོབ་པར་ཤོག །ཕཊ་ཕཊ་ཕཊཿ གནོད་བྱེད་འབྱུང་པོ་རྦད་འདྲེ་གཞི་བདག་ལ། །བདག་ལུས་ཚོགས་མཆོད་བདུད་རྩིས་མགུ་གྱིས་ལ། །གནོད་འཚེ་ཞེ་སྡང་གདུག་རྩུབ་རབ་སྤངས་ནས། །ཕན་བདེ་བྱམས་པའི་སེམས་དང་ལྡན་གྱུར་ཅིག །ཕཊ་ཕཊ་
ཕཊཿ བདུད་རྩིའི་ལྷག་མ་ཤ་རི་ཁྲོག་གི་མཚོ། །རུས་པའི་གྲམ་ཁྲོད་ལྷ་འདྲེས་ཟོས་ཁྱེར་གྱུར། །ཕཊ་ཕཊ་ཕཊཿ དཀར་གསུམ་མངར་གསུམ་བདུད་རྩིས་འཇིག་རྟེན་གང་། །དམར་ལ་མི་དགྱེས་ལྷ་འདྲེ་ཐམས་ཅད་ཚིམ། །ཕཊཿཕཊཿཕཊཿ མགྲོན་རྣམས་ཐམས་ཅད་དགའ་མགུ་བཀྲག་མདངས་ལྡན། །བདག་དང་མགྲོན་དང་བདག་ལུས་ཚོགས་མཆོད་བཅས། །གདོད་ནས་མི་དམིགས་རང་བཞིན་རྫོགས་པ་ཆེ། །དགེ་བས་འགྲོ་ཀུན་སངས་རྒྱས་མྱུར་ཐོབ་ཤོག །ཕཊ་ཕཊ་ཕཊ། དམིགས་མེད་ངང་ལ་ཡུན་རིང་བཞག་ཅེས་པ་ཉལ་ཁ་ཀུ་སཱ་ལུ་ཡི་ཚོགས་གསོག་བདག་འཛིན་གཅོད་པའི་སྭཱ་རེ་ཞེས་བྱ་བ་འདི་རི་ཁྲོད་འགྲིམ་པ་རྣམས་ཀྱི་དོན་དུ་ཨ་རཱ་གས་སྦྱར་བའོ།། མངྒ་ལཾ།། །་