བདག་འཛིན་རྣམ་རྟོག་འཆིང་གཅོད།
བདག་འཛིན་རྣམ་རྟོག་འཆིང་གཅོད་ཅེས་བྱ་བ་བཞུགས། ཕཊཿ རང་གི་སྙིང་ཁར་རང་གི་རྣམ་ཤེས་ནི། །རྡོ་རྗེ་ཕག་མོ་ཆེ་ཆུང་ཚོན་གང་ཙམ། །དབུ་མའི་ལམ་ནས་སྤྱི་བོར་རྒྱངས་སེ་ཐོན། །དེ་ཉིད་ཆེར་བསྐྱེད་སྐུ་ཡིས་ཁམས་གསུམ་ཁྱབ། །ཕྱག་གཡས་གྲི་གུག་བེམ་རོའི་ཐོད་པ་བཅད། །རང་བྱུང་སྣོད་མཆོག་སྟོང་གསུམ་ཁྱབ་པའི་ནང་། །རང་ལུས་ཤ་ཁྲག་རུས་པ་བདུད་རྩིར་སྒྱུར། །ཨོཾ་ཨཱཿཧཱུྃ་གིས་ཡེ་ཤེས་བདུད་རྩིར་གྱུར། །ལན་གསུམ། ཕཊ་ཕཊ་ཕཊཿ རང་ལས་སྤྲུལ་པའི་མཁའ་འགྲོ་གྲངས་མེད་ཀྱིས། །ཐོད་པའི་བདུད་རྩི་བཅུས་ནས་མགྲོན་རྣམས་མཆོད། །རྩ་བརྒྱུད་བླ་མ་གྲུབ་ཐོབ་རྒྱ་མཚོ་ལ། །ཤ་ཁྲག་ལུས་ཀྱི་ཚོགས་མཆོད་འདི་འབུལ་ལོ། །ཕཊཿ ཡི་དམ་ཐེག་པ་རིམ་དགུའི་ལྷ་ཚོགས་ལ། །ཤ་ཁྲག་ལུས་ཀྱི་ཚོགས་མཆོད་འདི་འབུལ་ལོ། །ཕཊཿ གནས་གསུམ་དཔའ་བོ་མཁའ་འགྲོ་ཐམས་ཅད་ལ། །ཤ་ཁྲག་ལུས་ཀྱི་ཚོགས་མཆོད་འདི་འབུལ་ལོ། །ཕཊཿ བཀའ་སྲུང་དམ་ཅན་རྒྱ་མཚོ་ཐམས་ཅད་ལ། །ཤ་ཁྲག་ལུས་ཀྱི་ཚོགས་མཆོད་འདི་འབུལ་ལོ། །ཕཊཿ འགྲོ་བ་རིགས་དྲུག་སེམས་ཅན་ཐམས་ཅད་ལ། །ཤ་ཁྲག་
ལུས་ཀྱི་ཚོགས་མཆོད་འདི་འབུལ་ལོ། །ཕཊཿ གནོད་བྱེད་བགེགས་རིགས་ལན་ཆགས་ཐམས་ཅད་ལ། །ཤ་ཁྲག་ལུས་ཀྱི་ཚོགས་མཆོད་འདི་འབུལ་ལོ། །ཕཊཿ བདག་དང་མགྲོན་དང་བདག་ལུས་མཆོད་པ་བཅས། །གདོད་ནས་མི་དམིགས་རང་བཞིན་རྫོགས་པ་ཆེ། །སྟོང་ཞིང་སྤྲོས་བྲལ་ཆེན་པོ་མངོན་དུ་གྱུར། །དགེ་བས་འགྲོ་ཀུན་བླ་མེད་བྱང་ཆུབ་ཤོག །ཅེས་སྤྲུལ་སྐུའི་གསུང་གིས་བསྐུལ་ནས། ཨ་རཱ་གས་བྲིས་པའོ། །འགྲོ་བ་སེམས་ཅན་ཐམས་ཅད་ལ་ཕན་ཐོགས་རྒྱ་ཆེ་བར་གྱུར་ཅིག། །།