རྗེ་ཞྭ་དམར་ལྔ་པས་བསྩལ་བའི་གཅོད་ཁྲིད་ལ་མཁོ་བའི་མེ་མཆོད་ཤིན་ཏུ་བསྡུས་པའི་ཟིན་བྲིས།
རྗེ་ཞྭ་དམར་ལྔ་པས་བསྩལ་བའི་གཅོད་ཁྲིད་ལ་མཁོ་བའི་མེ་མཆོད་ཤིན་ཏུ་བསྡུས་པའི་ཟིན་བྲིས་བཞུགས་སོ། །ན་མོ་གུ་རུ་དེ་བ་ཌཱ་ཀི་ནཱི་ཡེ། བླ་མ་དང་ལབ་ཀྱི་སྒྲོན་མ་ལ་ཕྱག་འཚལ་ལོ། །འདིར་གཅོད་ཀྱི་མེ་མཆོད་ཤིན་ཏུ་བསྡུས་པ་བྱ་ཚུལ་ནི། འོག་ཏུ་ཤིང་སྤུན་ནམ་རྡོ་ལེབ་བཀོད། དེའི་སྟེང་དུ་ས་བཀོད་པ་འཇམ་པོར་བརྡུངས་ལ། རྡུལ་ཚོན་གྱིས་ཟླུམ་པོ་གྲུ་བཞི་ཟླ་གམ་གྲུ་གསུམ་བརྩེགས་མར་བྲིས་པའམ། ཡང་ན་ཆོས་འབྱུང་ཟུར་དྲུག་དམར་པོའམ། ནག་པོའི་ཕྱིར་རི་མོ་དཀར་པོ་བྲི། དེའི་ནང་དུ་པདྨ་འདབ་བཞི་ཕྱོགས་མདོག་དབུས་མཐིང་ག་བྲི། དབུས་སུ་པཾ་ཡིག་མཐིང་ནག །ཤར་དུ་ཧ་དཀར་པོ། ལྷོར་རི་སེར་པོ། ནུབ་ཏུ་ནི་དམར་པོ། བྱང་དུ་ས་ལྗང་གུ་བྲིས། དེའི་སྟེང་དུ་ཐབ་ཇི་ལྟར་བྲིས་པའི་དབྱིབས་སུ་ཤིང་སྣ་ཚོགས་བརྩེགས། རང་གི་གཡས་སུ་ཤིང་སྣ་གང་འཛོམ་གྱི་ཡམ་ཤིང་བརྒྱའམ་ཉེར་གཅིག །མདུན་དུ་མར་ཁུ། གཡས་སུ་ཟངས་གཞོང་ནང་དུ། སྨན་སྣ་འབྲུ་སྣ་དར་ཟབ་མེ་ཏོག་ཟས་སྣ་རྣམས་བསྲེས་ནས་བཤམ། དེ་ཉིད་དུ་ཚོགས་བྱ་བའམ་མིན་ན་སྔར་གྱི་ཚོགས་ཕུད་ཀྱང་བསྲེ། གཏོར་མ་བཤམ། དེ་ཐམས་ཅད་བྲན་ལ། ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷ་ཝ་སོགས། ཕྱི་ནང་ཆོས་ཀུན་སྟོང་པའི་རང་བཞིན་ལས། །ལས་བཞི་ཕུན་སུམ་ཚོགས་པའི་མེ་ཐབ་དབུས། །རཾ་ལས་མེ་ལྷ་དྲང་སྲོང་ར་སྐྱེས་བཅིབས། །བགྲང་ཕྲེང་རིལ་བ་བསྣམས་པའི་ལྟོ་བ་རུ། །
བླ་མ་མ་གཅིག་ལབ་སྒྲོན་སྐུ་མདོག་མཐིང་། །ཞལ་གཅིག་སྤྱན་གསུམ་ནམ་མཁའི་མཐོངས་ལ་གཟིགས། །སྐུ་ལུས་གཅེར་བུ་རུས་པའི་རྒྱན་དྲུག་གསོལ། །ཕྱག་གཡས་སེང་ལྡེང་ཌཱ་རུ་ཏིང་ཤག་སྒྲོག །ཕྱག་གཡོན་བྷན་ཁ་ཊཾ་དཀུ་ལ་བརྟེན། །དབུ་སྐྲ་སིལ་མའི་གསེབ་ནས་ཕག་ཞལ་ངུར། །སྐྱིལ་ཀྲུང་ཕྱེད་པའི་སྟབས་ཀྱིས་མཁའ་ལ་གར། །རིགས་བཞིའི་མཁའ་འགྲོ་འབུམ་གྱི་དབུས་ན་རོལ། །ལྷ་ཚོགས་དེ་དག་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་མ་གཅིག་མ། །བཀའ་བརྒྱུད་ཡི་དམ་ཆོས་སྐྱོང་སྤྱན་དྲངས་གྱུར། །ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། ། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །མ་གཅིག་ལབ་སྒྲོན་འཁོར་བཅས་གཤེགས་སུ་གསོལ། །ཛཿཧཱུྃ་བཾ་ཧོཿགཉིས་སུ་མེད་པར་གྱུར། །དབང་ལྷ་རིགས་ལྔ་སྤྱན་དྲངས་དབང་བསྐུར་ནས། །དབང་རྟོགས་མི་བསྐྱོད་པ་ཡིས་དབུར་བརྒྱན་གྱུར། །དེ་ནས། ཨོཾ་བཛྲ་ཛྭ་ལ་ཛྭ་ལ་ཧཱུྃ། ཞེས་ཐབ་ཀྱི་ཤར་ལྷོ་ནས་མེ་སྦར། དགང་གཟར་བླུགས་གཟར་ཀྱིས་རེག་ཅིང་བསྲེག་རྫས་ཐམས་ཅད་བྱིན་གྱིས་བརླབ་པ་ནི། ཨོཾ་ཨཱཿཧཱུྃ། ཨོཾ་ཋ་
ཋ་ཋ་ཋ་ཋ་ཋ་ཋ། དེ་ནས་རྫས་ཐམས་ཅད་བཀྲུ་བར་བསམས་ལ། ཨོཾ་ཨཱཿཧཱུྃ་སྭཱ་ཧཱ། ཡམ་ཤིང་ལ། ཨོཾ་ཤྲཱི་སྭཱ་ཧཱ། མར་ཁུ་ལ། ཨོཾ་ཨཱཿསྭཱ་ཧཱ། འབྲུ་སྣ་ལ། ཨོཾ་ཛྲིཾ་སྭཱ་ཧཱ། རྫས་ཐམས་ཅད་ལ། ཨོཾ་ཀུ་རུ་ཀུ་རུ་སྭཱ་ཧཱ། དངོས་འབྱོར་ཡིད་ཀྱིས་སྤྲུལ་པ་ཡི། །ལྷ་རྫས་དག་པའི་ཉེར་སྤྱོད་རྣམས། །བླ་མ་མཁའ་འགྲོའི་ཚོགས་ལ་འབུལ། །གཟུགས་སྒྲ་དྲི་རོ་རེག་བྱ་རྣམ་དག་པའི། །ཟག་མེད་བདེ་ཆེན་མཆོད་སྤྲིན་རྒྱ་མཚོ་འབུལ། །ཨོཾ་མ་ཧཱ་གུ་རུ་བྃ་ཌཱ་ཀི་ནཱི་ཧ་རི་ནི་ས་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་ཏྱཱ་ཤབྡ་ཨཱཿཧཱུྃ། དེ་ནས་ཡམ་ཤིང་བརྒྱའམ་ཉེར་གཅིག་གམ་བདུན་འབུལ་ཏེ། ཨོཾ་ཨཱཿཧཱུྃ་བཾ་གུ་རུ་ཧ་རི་ནི་ས་ཨགྣེ་ཡེ་བོ་དྷི་བྲིཀྵ་ཡེ་གཟི་བརྗིད་ཕུན་སུམ་ཚོགས་པ་སིདྡྷི་ཧཱུྃ། དེ་ནས་མར་ཁུ་བརྒྱའམ་ཉེར་གཅིག་གམ་བདུན་འབུལ་ཏེ། ཨོཾ་ཨཱཿཧཱུྃ་བཾ་གུ་རུ་ཧ་རི་ནི་ས་ཨགྷེ་ཡེ་ཨགྷེ་ཡེ་འབྱོར་བ་ཕུན་སུམ་ཚོགས་པ་སིདྡྷི་ཧཱུྃ། དེ་ནས་རྫས་ཐམས་ཅད་ལ་སྔགས་འདི་ཁོ་ནས་བརྒྱ་རྩ་བརྒྱད་རེ་འབུལ་ལོ། །ཨོཾ་ཨཱཿཧཱུྃ་གུ་རུ་དྷེ་ཝ་ཀི་ནཱི་བཾ་ཧ་རི་ནི་ས་ཛྭ་ལ་རཾ་ཨགྷ་ཡེ་པཱུ་ཛ་ཧོཿ དེ་ནས་གཏོར་མ་བྲན་ལ། ཨོཾ་ཨཱཿཧཱུྃ་སྐུ་གསུང་ཐུགས་ཀྱི་བདུད་རྩིར་གྱུར། ཨོཾ་ཨཱཿཧཱུྃ་བོ་གུ་རུ་ཧ་རི་ནི་ས་ཨག་ཡེ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ཕུལ། ཧཱུྃ། འབར་བ་མེ་ཡི་དཀྱིལ་འཁོར་
དུ། །བླ་མ་ལབ་སྒྲོན་མཁའ་འགྲོའི་ཚོགས། །སྣ་ཚོགས་བསྲེག་རྫས་འདི་བཞེས་ལ། །ནད་གདོན་བར་ཆད་ཞི་བར་མཛོད། །ཨོཾ་ཤཱནྟཾ་ཀུ་རུ་ཡེ་སྭཱ་ཧཱ། ཚེ་བསོད་དཔལ་འབྱོར་རྒྱས་པར་མཛོད། །བྷྲཱུཾ་པུཥྚིཾ་ཀུ་རུ་ཡེ་སྭཱ་ཧཱ། སྣང་སྲིད་དབང་དུ་འདུ་བར་མཛོད། །ཧྲཱིཿབ་ཤཾ་ཀུ་རུ་ཡེ་སྭཱ་ཧཱ། དགྲ་བགེགས་གནོད་བྱེད་ཚར་ཆོད་ཅིག །ཧཱུྃ་མཱ་ར་ཡ་ཕཊ། རོལ་མོ་བྱ། །རང་རིག་ཡེ་ཤེས་སྟོན་མཛད་པ། །ཕ་བླ་མ་རྣམས་ལ་ཕྱག་འཚལ་བསྟོད། །མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་དེ་ལ་ཕྱག་འཚལ་བསྟོད། །རིགས་བཞིའི་མཁའ་ཚེའགྲོའི་ཚོགས་ལ་ཕྱག་འཚལ་བསྟོད། །མཁའ་འགྲོ་བྱེ་བ་འབུམ་ལ་ཕྱག་འཚལ་བསྟོད། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །དེ་ནས་མཆོད་རྫས་ལྷག་མ་རྣམས་ཅུང་ཟད་ཕུལ་ཏེ། ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནཱི་བཾ་ཧ་རི་ནི་ས་ཛྭ་ལ་རཾ། ཨགྷ་ཡེ་པཱུ་ཛ་ཧཱུྃ། ཞེས་ཕུལ། ལྷ་རྣམས་ནོངས་པ་གང་མཆིས་བཟོད་པར་གསོལ། །ཡེ་ཤེས་པ་གཤེགས་དམ་ཚིག་པ་རང་ཐིམ། །འཇིག་རྟེན་འཇིག་རྟེན་འདས་པའི་དགེ་ལེགས་གང་། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཐལ་བ་གཙང་སར་དོར་རོ། །ཞེས་པ་ཀརྨ་ཨ་རཱ་གས་བཀོད་པའོ། །མངྒ་ལཾ།། །།