རྗེ་མཆོག་གི་སྤྲུལ་སྐུ་རང་བྱུང་རྡོ་རྗེས་བསྩལ་བའི་གཅོད་གདོན་ཚོགས་དགུ་མ་ལ་ཉེ་བར་མཁོ་བའི་ཟིན་བྲིས་ལས་བྱེད་གཅོད་ཀྱི་སྐོར་གྱི་དམིགས་པ་འགའ་རེ།
རྗེ་མཆོག་གི་སྤྲུལ་སྐུ་རང་བྱུང་རྡོ་རྗེས་བསྩལ་བའི་གཅོད་གདོན་ཚོགས་དགུ་མ་ལ་ཉེ་བར་མཁོ་བའི་ཟིན་བྲིས་ལས་བྱེད་གཅོད་ཀྱི་སྐོར་གྱི་དམིགས་པ་འགའ་རེ་བཞུགས་སོ། །
ན་མོ་གུ་རུ་ཡེ། རང་སེམས་སྨྲ་བསམ་བརྗོད་ལས་འདས། །རྒྱལ་ཡུམ་ལབ་ཀྱི་སྒྲོན་མ་དང་། །བླ་མ་དམ་པ་སངས་རྒྱས་ལ། །རྩེ་གཅིག་གུས་པས་ཕྱག་འཚལ་ནས། །རང་གཞན་འགའ་ལ་ཕན་པའི་ཕྱིར། །བྱེད་གཅོད་མན་ངག་ཅུང་ཞིག་བྲི། །སྙིགས་མ་ལྔ་བདོའི་ཐ་མ་ལ། །བན་བོན་སྔགས་ནག་ཞེ་སྡང་ཆེ། །ཕྲག་དོག་མཐུ་གཏད་ངན་སྔགས་བསྒྲུབ། །དེ་དུས་གདམས་ངག་འདི་མེད་ན། །རང་གཞན་དོན་ཆེན་མི་འགྲུབ་པས། །མན་ངག་འདི་ལ་ནན་ཏན་གཅེས། །དེ་ལ་དངོས་སུ་བྱད་མའི་ཆོ་འཕྲུལ་ལམ། །མཐུ་རྟགས་ལྟས་ངན་ཆེན་པོ་འབབ་པ་དང་། །ཤི་ཁ་བྱེ་
བ་དང་། ཉམས་དང་རྨི་ལམ་དུ་མདའ་དང་མཚོན་ཆ་སྣ་ཚོགས་ཀྱིས་ཆར་བབ་པ་ཆབ་ཀྱིས་དེད་པ། ཐོག་བརྒྱབ་པ་དང་བརྒྱབ་ལ་ཁད་བྱེད། འབྲུག་དང་གློག་དང་སེར་བ་དྲག་པོ་བརྒྱབ་ལ་ཁད་དང་རྒྱབ་པ་དང་། ཧོ་ཁུང་ནང་དུ་ཕྱིན་པ་དང་། རང་བཙོན་དུ་བཟུང་བ་བཀྱིག་པ། །དོང་དུ་ཚུད་པ། ལྕགས་བླུགས་པ་དེ་ལ་སོགས་བྱེད་ཁ་དྲག་པོའི་ལྟས་ངན་བྱུང་ན། དུས་དེ་དེར་ལུས་སྦྱིན་བྱ། གཅོད་ཚོགས་ལ་གཞུང་བཟུང་ནས། ཐུན་མཚམས་ཐམས་ཅད་དུ་དམིགས་པ་འདི་བཞིན་བཟུང་ངོ་།། ༈ ཕཊཿ སྐད་ཅིག་གིས་རང་གི་ལུས་གནམ་ལྕགས་ལས་གྲུབ་པའི་
རྡོ་རྗེ་རྩེ་དགུ་པ་དབུས་ཀྱི་རི་བོ་མཆོག་རབ་ཙམ་དུ་བྷཻཾ། བྱད་མ་ཐམས་ཅད་རང་དབང་མེད་པར་བཀུག་ནས་རང་གི་མདུན་དུ་ཡོད་པར་བསམ། །དེ་ནས་རྡོ་རྗེའི་ཡར་གྱི་རྭ་དགུ་ལ་གནམ་ལྕགས་ཀྱི་ཐོག་རྒོད་དུས་རེ་རེ་ལ་ཡང་འབུམ་ཕྲག་རེ་ཡར་འཕྲོས་ཤིང་མར་བྱེད་མ་ལ་བརྒྱབས་པས། སྐད་ངན་ཙེ་རེ་རེ་བྱེད་ཅིང་གཞོབ་གསུར་གྱིས་སོང་བར་བསམ། མར་གྱི་རྭ་དགུ་ལས་མཚོན་ཆ་སྣ་ཚོགས་ཀྱི་ཆར་ཉི་ལི་ལི་འཕྲོས་ནས་བྱད་མ་དུམ་བུ་ཕྱེ་མར་གཏུབ། རྡོ་རྗེའི་ལྟེ་བའི་ཧཱུྃ་ལས་ཧཱུྃ་ནག་པོ་རྣོ་ངར་ཐོག་ལྟ་བུ་འཕྲོས་ནས་བྱད་མ་རྣམས་ཕུག་ཅིང་བརྡུངས་ནས་དྲྭ་ཟློབ་དྲ་ཚིག་ལྟར་བྱས་ནས་བརླག་པར་བྷཻ། བྱད་ཟློག་རྡོ་རྗེའི་གོ་ཁྲབ་ཨྠྀི། ༈ ཡང་མཐུ་གཅོད་རི་བོ་རྩེ་ཟློག་ནི། རང་ཕག་མོའམ་ཁྲོས་མར་བྷཻ། མདུན་དུ་རི་བོ་མཆོག་རབ་ཀྱི་སྟེང་དུ་བྱད་མ་ལྷ་སྲུང་འཁོར་ལོངས་སྤྱོད་ཞིང་ཁང་དང་བཅས་པ་དམིགས་ལ། ཁོ་རང་དབང་མེད་པར་བཀུག་གཞུག་དྲག་པོ་བྱས་ལ། རི་བོ་དང་བཅས་པ་རང་གི་ལག་མཐིལ་གཡས་སུ་བླངས་ལ་སྲིད་པའི་རྩེར་བཀྱག་ནས་མགོ་མཇུག་ལྡོག་སྟེ། དབང་ཆེན་གསེར་གྱི་ས་གཞི་ལ་བརྡབས་པས། དམར་ཆལ་གྱིས་སོང་ཤ་ཁྲག་ཐམས་ཅད་ཕག་མོའམ་ཁྲོས་མ་རང་དང་འདྲ་
བས་ཟོས་པར་བྷཻཾ། ཕཊ་ཕཊཿ ཕྱག་རྒྱ་ཆེན་པོའི་ངང་ལ་བཞག །ཟབ་ཨྠྀི། ༈ རང་རང་གི་བེམ་རིག་ཕྲལ་ལ་རིག་པ་ཐིག་ལེ་ལྗང་ནག་ཚྭ་ཚྭ་འཁྲུགས་པ་ནམ་མཁའ་ལ་སྤར་ནས་བཞག །བེམ་པོ་དེ་ཤ་གཏན་ནས་མེད་པའི་ཀེང་རུས་ངང་སེང་ངེ་བ་བསམ་གྱིས་མི་ཁྱབ་པ་ཞིག་གན་རྐྱལ་ཡོད་པའི་བྲང་དཀྱིལ་དུ་ཧོ་ཁུང་ཆེན་པོ་ཡོད་པའི་ནང་དུ་བྱད་མ་ཡོད་པར་དམིགས་ལ་འོད་ཟེར་གྱིས་བཀུག་ལ་བསྟིམ། དེ་ནས་ཀེང་རུས་དེ་བྱིས་ཤ་མེད་རླུང་གིས་ཁྱེར་བ་ནམ་མཁའི་དབྱིངས་སུ་ཡར་ཁྱེར། མར་ཁ་སྦུབས་སུ་གསེར་གྱི་ས་གཞི་ལ་བརྡབས་པས། བྱད་མ་དེ་ས་འོག་ཏུ་ཀླུ་བདུད་ཁ་གདང་བའི་ནང་དུ་ནག་སྐེམ་གྱིས་སོང་བར་བསམ། ཁོའི་རྣམ་ཤེས་དང་རང་གི་རྣམ་ཤེས་བསྲེས་ལ་ཕྱག་རྒྱ་ཆེན་པོའི་ངང་ལ་བཞག །དེ་ཐུན་གྱིས་འཇུག་ལ་ལན་རེ་བྱའོ། །ཟབ་ཨྠྀི། ༈ ཡང་བྱད་བཟློག་ལ། རང་ཉིད་མ་གཅིག་ཁྲོས་མའི་མདུན་དུ་རྣག་ཁྲག་གི་རྒྱ་མཚོ་ཁོལ་མ་རྦ་རླབས་འཁྲུགས་པའི་དབུས་སུ་རི་བོ་ནག་པོ་མུན་པའི་མདོག་ཅན་ཟུར་གསུམ་ལ་མཚོན་ཆ་སྣ་ཚོགས་སྐྱེས་པ། ངོས་གསུམ་ལས་མེ་འབར་བ་རྩེ་ལ་ཚྭ་ཚྭ་ཁོལ་ཞིང་དུད་པའི་ཕྱིར་རྩེར་བྱད་མ་ལྷ་སྲུང་ཡུལ་ཞིང་མི་ནོར་ཐམས་ཅད་
ཡོད་པར་དམིགས། རང་གི་ཐུགས་ཀའི་འོད་ཟེར་ལྕགས་ཀྱུ་ལྟ་བུའི་བཀུག་ལ་བསྟིམ། བཀུག་གཞུག་བདེན་བདར་བྱ། རི་དེ་ཕྱག་གཡས་པས་ནམ་མཁའི་དབྱིངས་སུ་བཏེགས་ནས། མགོ་སྟེང་ཟློག་སྟེ་རྒྱ་མཚོའི་དཀྱིལ་དུ་བརྒྱབས་པས་དབང་ཆེན་གསེར་གྱི་ས་གཞི་ལ་འཛེར་ནས་རྗེས་མེད་དུ་སོང་བར་བྷེ་ལ་ཕཊ་ཕཊཿ དེ་ནས་སྟོང་ཉིད་སྙིང་རྗེ་བྷེ། ཨྠྀི། ༈ ཡང་རང་གི་རྣམ་ཤེས་དམ་པ་རྒྱ་གར་མཐིང་ནག་འཇིགས་སུ་རུང་བའི་མདུན་དུ། དུག་ཁྲག་གི་རྒྱ་མཚོ་ཁོལ་མའི་དབུས་སུ། ལྗོན་ཤིང་ཆེན་པོ་ཡལ་ག་ཐམས་ཅད་མཚོན་ཆ་སྣ་ཚོགས་པ་ལོ་མ་ཐམས་ཅད་དུག་ཧ་ལ་ཆེན་པོ་ལས་གྲུབ་པའི་རྩེ་ཀོག་ཏུ་བྱད་མ་ལྷ་སྲུང་མཆོད་ཁང་དཀྱིལ་འཁོར་དང་བཅས་པ་དམིགས། ཡིད་ཀྱིས་བཀུག་གཞུག་བྱས་ལ་བསྟིམ། རང་གིས་བེམ་པོ་དེ་དཀྱིལ་འཁོར་དེའི་སྟེང་དུ་འཕང་བས་ཤ་ཁྲག་གི་ཉིལ་གྱིས་གང་ནས། རང་དམ་ཚིག་ཅན་གྱི་ཤ་ཁྲག་ལ་ཁོའི་ལྷ་ཐམས་ཅད་བྲོས་ཏེ། ཁོ་དམ་ཚིག་ཉམས་ནས་ལྷ་ཐམས་ཅད་ཀྱིས་སྤང་སྟེ། སྐྱེ་སྟོང་བསྒྱུར་བ་ལྟར། དེ་ནས་རང་གི་ཕྱག་གཡས་ཀྱིས་ལྗོན་ཤིང་དེ་བཏེགས་ནས་ནམ་མཁའི་དབྱིངས་སུ་ཁྱེར།། མགོ་སྟེང་ལྡོག་ནས་རྣག་ཁྲག་རྒྱ་མཚོ་ཁོལ་མ་དེ་
ལ་བརྒྱབས་པས་དབང་ཆེན་གསེར་གྱི་ས་གཞི་ལ་གཏུག །རྩ་བ་རྡོ་རྗེ་རྒྱ་གྲམ་དང་རི་རབ་གླིང་བཞིའི་མནན་པར་བསམ། ཕཊ་ཕཊཿ སྟོང་ཉིད་ངང་ལ་བཞག་གོ། ཨྠྀི། ༈ ཡང་བྱེད་མའི་སྲོག་གི་སྤུ་གྲི་སྔགས་པ་སྟོང་གིས་ཟློག་པ་བས་དམིགས་ཐུན་རེ་བཟུང་བར་དགའ་བའི་གདམས་ངག་སྙིང་ཁུ་ནི། རང་གི་བེམ་རིག་ཕྲལ་ནས་རྣམ་ཤེས་ཁྲོས་མར་བྷེ་པའི་མདུན་དུ་གཏི་མུག་གི་རྒྱ་མཚོ་ནག་མེ་རེ་རེ་ཁོལ་བའི་དཀྱིལ་དུ་ཞེ་སྡང་གི་བྲག་རི་ཟུར་གསུམ་པ་ཤིན་ཏུ་ཆེ་བ་རྣོ་ངར་དང་ལྡན་པ།། དེའི་རྩེ་མོ་ན་བྱད་མའི་དགྲ་ཁོ་རང་དམིགས། ཁོ་ཡི་སྤྱི་བོར་པད་ཟླ་ལ་ཁོའི་བླ་མ། ཁོའི་མདུན་དུ་ཡི་དམ་ཆོས་སྐྱོང་། གཡས་སུ་བུ་དང་སྤུན་ཟླ། གཡོན་དུ་ཡོན་བདག །རྒྱབ་ཏུ་ཟས་ནོར་རྣམས། ཁོ་བཀུག་ལ་བསྟིམ༔ ཕཊ་ཕཊཿ རང་གི་ཤ་ཁྲག་སྦྱིན་པ་བཏང་དུས་ཁོའི་སྒྲུབ་ཁང་དེ་རང་ཤ་ཁྲག་གིས་ལྟེམ་གྱིས་གང་ནས་ཁྲག་གི་ལྦུ་བ་རླུང་འཚུབ་ལྟར་གྱུར་ནས་འུར་སྒྲ་དང་བཅས་པ་གཡོན་སྐོར་དུ་ཀྱི་ལི་ལི་འཁོར་ནས། ཁོའི་བླ་མ་ཡི་དམ་ཆོས་སྐྱོང་ཐམས་ཅད་ཁྲག་གི་འཚུབས་མས་ཁ་ཕྱིན་ཆུར་བསྐོར་བས་ཁོ་དང་ཞེ་འགྲས་ནས། བླ་མ་ཡི་དམ་ཆོས་སྐྱོང་ཁྲོ་བོ་ཁྲོ་མོ་བྲན་གཡོག་ཤ་
ཉེ་ཡོན་བདག་ཟས་ནོར་ཐམས་ཅད་ཀྱང་ཁོ་དང་ཕྱེས་ཏེ་ནམ་མཁའི་ཕ་མཐར་ན་སོང་བར་བསམ། གདོན་ལ་བྱེད་ན་ཡང་གདོན་དེའི་རྒྱབ་རྟེན་དང་ཕྱེས་པར་བསམ། ཕཊཿ །ཨྠྀི། རང་གི་ཕྱག་གཡས་པས་རི་རོབ་དེ་རྒྱ་མཚོའི་འོག་ནས་བླང་སྟེ་ནམ་མཁའི་དབྱིངས་སུ་ཁྱེར་ནས། མར་ས་གཞི་ལ་བརྒྱབས་པས། རི་རབ་ཀྱི་རྩེ་མོས་ཁོའི་སྲོག་སྙིང་འཛེར་ཤ་ཁྲག་དམར་ཐ་རེ་འཐོར། རྣམ་ཤེས་ཆོས་ཀྱི་དབྱིངས་སུ་ཐིམ་པར་བསམས་ལ་ཕྱག་རྒྱ་ཆེན་པོའི་ངང་ལ་བཞག་གོ །སྙིང་རྗེ་རང་ཤུགས་ལ་སྐྱེས་ན་ཚར་ཚད་ཡིན་ནོ། །ཆོ་འཕྲུལ་ཆེར་སོང་ཡང་བཟང་ད་རུང་དམིགས་པས་གཅུན་ནོ། །དགྲ་ལ་བྱེད་ན་ནི་ལས་བྱེད་མའི་མལ་དུ་དགྲ་བོ་བསྐྱེད། གདོན་དང་འབྱུང་པོ་ལ་བྱེད་ན་རི་རབ་རྩེར་མཆོད་ཁང་ནང་དུ་ཏྲི་ལས་གདོན་དེ་བསྐྱེད། །སྨྱོན་པ་ལ་བྱེད་ན་ལུས་དེ་ལྷ་ཁང་ནང་དུ་སྨྱོ་འདྲེར་བསྐྱེད། ཆོ་འཕྲུལ་དང་ན་ཚ་ཆེར་སོང་ན་བཟང་བས་དམིགས་པ་ནན་གཏན་དུ་བཟུང་། ནུབ་གཅིག་གཉིས་ནས་ཆོ་འཕྲུལ་ཞི་ནས་འགྲོའོ། །ཚར་ཚད་བྱུང་ན་བྱམས་སྙིང་རྗེ་བྷེ་པ་གལ་ཆེའོ། །འདི་ཡོངས་སུ་གྲགས་པའི་གདམས་ངག་ཆེན་པོ་ཡིན་ནོ།། །། ༈ ཡང་བཟློག་པའི་དམིགས་པ་ནི། རང་ཉིད་མ་
གཅིག་ཁྲོས་མ་ནག་མོའི་ཕྱག་གཡས་གཡོན་གཉིས་སུ་རི་རབ་གཉིས་བྷེ། བྱད་མ་ལྷ་སྲུང་དང་བཅས་པ་རི་རབ་ཀྱི་ཁར་ཡོད་པར་བསམས་ལ་དམིགས་པས་བཀུག་ལ་བསྟིམ། རི་རབ་གཉིས་ཁ་བརྡབས་པའི་བར་དུ་ཐལ་བར་བརླགས་པར་བསམས་ལ་ཕཊ༔ཅེས་ཐལ་མོ་བརྡབ། དེ་ནས་སྟོང་ཉིད་ངང་དུ་བཞག །ཟབ་ཨྠྀི། ༈ ཡངསྐབས་ཕལ་གྱི་དམིགས་པ་ནི་རང་གཞན་བེམ་རིག་ཕྲལ་བའི་ཤ་ཁྲག་རྒྱ་མཚོ་ཆེན་པོར་བསམས་ལ། བན་དེ་ཆེན་པོ་བརྒྱ་ཕྲག་མང་པོ་དང་། བོན་པོ་ཆེན་པོ་སྟོང་ཕྲག་མང་པོ་དང་། ལས་མཁན་ཤན་པ་སྤུ་གྲི་ཐོགས་པ་འབུམ་ཕྲག་མང་པོ་དང་། ལས་མཁན་ལས་བྱེད་དཔག་ཏུ་མེད་པ་དང་། བྱད་མ་ལྷ་སྲུང་དང་བཅས་པས་ཟོས་ངོམས་ཤིང་ཚིམས། དགའ་ཞིང་མགུ་ནས། །ལན་ཆགས་བུ་ལོན་ཤ་འཁོན་ཐམས་ཅད་བྱང་བར་བྷེ་ལ། བན་ཆེན་བརྒྱ་དང་བོན་ཆེན་སྟོང་ཞེས་སོགས་ཚིགས་བཅད་དམིགས་པ་ཡང་དང་ཡང་དུ་བྷེ་པར་བྱའོ། །ཨྠྀི། ༈ གཅོད་ཀྱི་ལས་ཕྲན་ལས་ཚོགས་བཞུགས། མ་གཅིག་ཡུམ་ཆེན་ལ་ན་མོ། དམ་ཆོས་བདུད་ཀྱི་གཅོད་ཡུལ་ཉམས་སུ་ལེན་པའི་རྣལ་འབྱོར་པས། ལས་ཕྲན་ལས་ཚོགས་བྱ་བ་ནི། སྐྱབས་
སེམས་བྱས་ལ། རྡོ་ལེབ་ཟུར་གསུམ་གཅིག་ལ་ཐེག་རིས་བསྣོལ་མ་ཅིག་བྲིས་ལ། དེ་ཉིད་མ་གཅིག་ལབ་སྒྲོན་ཁྲོམ་མ་ནག་མོའི་ཆ་ལུགས་ཅན། གཅེར་བུ་སྤུན་གསུམ་བསྒྲད་པ་མཆེ་བ་གཞི་གཙིགས་པའི་ཕྱག་གཉིས་དྲག་པོའི་ཐོག་རྒོད་འབར་བ་བསྣམས་ནས། ཞོ་ལད་དང་ཆང་འདྲེ་ལ་བརྡེག་པར་བྷེ་ལ་ཕཊཿ དེ་ནས་རྡོ་དེ་ཞོ་ཆང་གི་སྟེང་དུ་བཞག་པས་ཞོ་ལད་པ་ཚང་ལད་པ་ཐུབ་པར་ངེས་སོ། །ཨྠྀི། ༈ གཅོད་ཚོགས་ལས་ཚོགས་ཆ་དྲུག་གི་མན་ངག་བཞུགས་སོ། །ན་མོ་གུ་རུ་ཌཱཀི་ནཱི་ཡེ། ཆ་དྲུག་གི་མན་ངག་ལ། གཅོད་ཚོགས་གཞུང་བཞིན་ཞག་གསུམ་བདུན་ལྔ་སོགས་སོང་ནས། གཏོར་ཆུང་དམར་གཏོར་བྱ། ཚོགས་གཅིག །ནད་པའི་ལུས་བཀྲུས་པའི་དྲི་ཆུ་ཡང་སྣོད་གཅིག་ཏུ་བཞག །དེས་སྦྲུས་པའི་ལིང་ག་ཆེ་བ་གཅིག་བྱ། ནད་པའི་ཆངས་བུ་དྲུག་བྱས་ལ་བཞག །གཅོད་ཚོགས་གཞུང་ལྟར་གྱེར་ལ། ཚོགས་ལས་སྐབས་སུ་ཆ་དྲུག་གི་བསྐྱེད་ཆོག་སྤྱན་འདྲེན་བྱ། ནད་པའི་རྣམ་ཤེས་ནམ་མཁའ་ལ་སྤར། ནད་པའི་ཕུང་པོ་དེ་དང་ཚོགས་གཉིས་དབྱེར་མེད་དུ་ཚོགས་ལས་བྱ། དེ་ནས་ཡང་ནད་པའི་རྣམ་ཤེས་སྤར་ལ་ནམ་མཁའ་ལ་འདྲེས། རོ་དེ་དང་ལིང་ག་དེ་དབྱེར་མེད་
དུ་དམིགས་ལ་གནོད་བྱེད་ཐམས་ཅད་བཀུག་གཞུག་བྱས་ལ་བསྟིམ། དེ་ནས་དེ་ལ་གྲི་གུག་གིས་བུམ་བུ་དྲུག་ཏུ་གཏུབ་སྟེ་མགོ་དང་གཅིག །ཡན་ལག་བཞི་དང་ལྔ། ཅིང་ཁོག་དང་དྲུག་བྱས་ལ། ནད་པའི་ཤ་ཁྲག་གནོད་བྱད་དང་དབྱེར་མེད་པའི་གཏོར་མ་ཤ་ཁྲག་བདུད་རྩིའི་རང་བཞིན་དུ་བྷེ་ལ། དང་པོ་མགོ་དེ་དང་དམར་གཏོར་གཅིག་ཚངས་བུ་གཅིག་རྣམས་སྐྱོགས་སམ་གཟར་བུ་ནང་དུ་བླུག་ནད་པའི་དྲི་མ་བཀྲུས་པའི་ཁུ་བས་མང་བར་བྲན་ལ། ༈ ཧཱུྃ་ཐོད་པ་དམར་སྨུག་ཅེས་སོ། །འགྲོ་དྲུག་མ་ལུས་ཚིམས་གྱུར་ཅིག །ཕཊ་ཕཊ་ཕཊཿ ཅེས་ནམ་མཁའ་ལ་གཏོར་བཅུག་སྟེ་མ་ཁྲོས་མ་ནག་མོ་དང་འཁོར་སྟེང་ཕྱོགས་ཀྱི་ལྷ་སྣང་སྲིད་ལྷ་འདྲེ་ཐམས་ཅད་ཞལ་གདངས་བའི་ནང་དུ་ནད་གདོན་ལུས་ཤ་ཁྲག་གཏོར་མ་དང་བཅས་པ་བསྟབས་པས་ཐམས་ཅད་ཀྱིས་ཧབ་དི་རེ་ཟོས་ནས་མཉེས་ཤིང་ཚིམ་པར་བསམ། དེ་བཞིན་ཏུ་ལག་པ་གཡས་རྡོ་རྗེ་མཁའ་འགྲོ་དང་ཤར་ཕྱོགས་ཀྱི་ལྷ་འདྲེ། ལག་པ་གཡོན་རིན་ཆེན་མཁའ་འགྲོ་དང་ལྷོ་ཕྱོགས་ཀྱི་ལྷ་འདྲེ། རྐང་པ་གཡོན་པདྨ་མཁའ་འགྲོ་དང་ནུབ་ཕྱོགས་ཀྱི་ལྷ་འདྲེ། རྐང་པ་གཡས་ལས་ཀྱི་མཁའ་འགྲོ་དང་བྱང་ཕྱོགས་ཀྱི་ལྷ་འདྲེ།
ཅིང་ཁོག་དེ་སངས་རྒྱས་མཁའ་འགྲོ་དང་འོག་ཕྱོགས་ཀྱི་ལྷ་འདྲེས་ཟོས་པར་བསམས་ལ་ཕྱོགས་སོ་སོར་འཕངས་ཤིང་། དེ་འཕེན་བཅུག་པའི་ཚེ། རང་གིས་ཌ་དྲིལ་རྐང་དུང་བཅས་པས་ནད་པ་ཆེ་གེ་མོའི་ལུས་གདོན་ལུས་དང་བཅས་པ། ནད་ནད་འདྲེ་དང་བཅས་པ། གདོན་སྣ་འདྲེན་དང་བཅས་པ་ཐམས་ཅད། ཁྲོས་མ་ནག་མོ་དང་སྟེང་ཕྱོགས་ཀྱི་སྣང་སྲིད་ལྷ་འདྲེ་ཐམས་ཅད་ཀྱིས་ཟོ་ཞིག །ཁྱེར་ཅིག་ཕཊ་ཕཊཿ ཅེས་རོལ་མོ་བྱའོ། །དེ་བཞིན་དུ་ཕྱོགས་དྲུག་ཀ་ལ་འགྲེས་སུ་ཤེས་པར་བྱའོ། །འདི་ནི་ཆ་དྲུག་གི་མཐའ་གཏད་ཡིན་ཏེ་ཤིན་ཏུ་གཉན་ཅིང་ཆོད་ཆེ་བ་ཡིན་ནོ། །ཆ་དྲུག་འདི་མན་ངག་བརྒྱུད་པ་ལྟར། རྗེ་རང་བྱུང་རྡོ་རྗེའི་ལུགས་གཅོད་ཚོགས་བུ་ཡིག་ཏུ་ཀརྨ་ཨ་རཱ་གས་བྲིས་པའོ། །འདི་ལ་ཉེས་པ་གང་མཆིས་མ་གཅིག ༈ ཉིད་ལ་བཤགས། །དགེ་བས་འགྲོ་ཀུན་ཡུམ་ཆེན་ཉིད་ཐོབ་ཤོག །ཨྠྀི། ༈ དུར་གཅོད་བསྡུས་པ་བཞུགས་སོ།། མ་གཅིག་སྤྲུལ་པའི་སྐུ་ལ་ཕྱག་འཚལ་ལོ། །དུར་གཅོད་བསྡུས་པ་ནི། དང་པོ་ཚེ་འདས་རྣམ་ཤེས་སྤར། ཕུང་པོ་ཡོན་འབུལ་བྱ། རོ་དེ་བྲན་ཚོགས་གཞུང་དེ་ཚར་གཅིག་བྱ། ཚོགས་ལུང་མ་བྱུང་ཡང་ཆོག །དུར་གཅོད་ཀྱི་དམིགས་
པ་ནང་གསེས་དམིགས་བཏང་། དེ་ནས་རོ་ཁུར་ཁ་ཕཊཿ རང་རྡོ་རྗེ་རྣལ་འབྱོར་མ་དཀར་མོ་གཅིག་ཏུ་བསམ། ཕཊཿ རང་གི་འོད་ཟེར་གྱིས་སངས་རྒྱས་བྱང་སེམས་ལ་མཆོད་པ་ཕུལ་བས། བྱིན་རླབས་དང་ནུས་མཐུ་ཐམས་ཅད་ཚུར་བསྡུས་ནས་རང་ལ་ཐིམ་ནས། རང་གི་སྐུ་ལུས་ལས་ཡེ་ཤེས་ཀྱི་བདུད་རྩིའི་རྒྱུན་ངང་ན་ར་ར་བབ་ནས་རོ་ལ་ཐིམ་པས། རོ་དེ་བདུད་རྩི་རྐྱལ་པ་གང་དུ་བྷཻཾ། ཕཊཿ རང་མ་ལབ་སྒྲོན་དམར་མོ་གཅིག་ཏུ་རེད་པར་བྷཻཾ། ཌཱ་དྲིལ་དཀྲོལ་ཞིང་ཕག་ཤར་རེ་དང་བཅས་པས། རོ་དེའི་རོ་སྟོད་ལ་རྡོག་ཐོ་གསུམ་བརྒྱབ། མཁར་ཁུང་གཉིས་ན་ལན་གསུམ་རེ། གཡས་ངོས་ན་གཅིག །གཡོན་ངོས་ན་གཅིག་བརྡེག་སྟེ། སྐོར་བ་དང་འཆམ་སྟབས་བྱེད་ཅིང་རྒྱོབ། དེ་ནས་བདུད་རྩི་རྐྱལ་པ་གང་ཁུར་བར་བྷཻཾ་ལ། ཁུར་བཅོལ་བའི་ཁུར་བར་བྱ། ༈ འགོས་ནད་ཀྱི་རོ་ཡིན་ན་ཚེ་འདས་རྣམ་ཤེས་རང་ལ་བསྡུས་ནས་ནམ་མཁར་མ་གཅིག་གི་ཐུགས་ཀར་འཕང་། ནད་འགོས་སམ་མི་འགོས་བསམ་པའི་རྣམ་རྟོག་མི་བྱ་བར་སྟོང་ཉིད་ངང་ལ་བཞག་ལ་ཁུར་རོ། །དེ་ནས་གཉན་སར་ཕྱིན་ནས་རོ་ལ་རྣམ་ཤེས་བཀུག་ལ་རང་ལ་བསྡུས་ནས་ནམ་
མཁར་སྤར། གཉིས་མེད་བསྲེས་ལ་ཡར་མཆོད་མར་སྦྱིན་བསྔོ་བ་སྨོན་ལམ་བྱའོ། །རོ་ཁྱེར་དུས་ཀྱི་དམིགས་པ་འདི་རྣམས་གསལ་བར་ཟིན་ནས་ཕྱོགས་དང་སྐརྨ་མ་བརྩིས་ཀྱང་སྐྱོན་མེད་བདུད་རྩིའི་རྐྱལ་པ་ཁུར་བ་ཡིན་པའི་ཕྱིར། ཟབ་ཨྠྀི། ས་མ་ཡ་རྒྱ་རྒྱ་རྒྱ་ཁ་ཐཾ། ༈ གཅོད་ཀྱི་བསད་དམིགས་བཞུགས་སོ།། མ་གཅིག་ལབ་ཀྱི་སྒྲོན་མ་ལ་ཕྱག་འཚལ་ལོ། །བསད་པ་དྲག་སྔགས་རིང་མོའི་དམིགས་པ་ལ། བསྟན་དགྲ་དམ་ཉམས་འདི་མ་བསྒྲལ་ན། འདིས་མི་དགེ་བཅུ་དང་སྡིག་ཆེན་པོ་འཕེལ་ནས་ཐར་དུས་མེད་པས་སྙིང་རེ་རྗེ། ད་སངས་རྒྱས་ཀྱི་བསྟན་པ་བསྲུང་བའི་ཕྱིར་དུ་ཁོ་ཡི་བེམ་རིག་ཕྲལ་ལ་སྡིག་འཕྲོ་གཅོད་ནས་སངས་རྒྱས་ཀྱི་གོ་འཕང་ཐོབ་པར་བྱའོ། །ཞེས་བསམས་ལ།། ཕཊཿ རང་རིག་བེམ་རིག་ཕྲལ་ལ་བེམ་པོ་འབྱུང་བ་ལྔ་ལ་ཐིམ། རང་གི་རིག་པ་འོད་ཀྱི་ཐིག་ལེ་ལྕགས་སྲེག་ལྟ་བུ་ཚྭ་ཚྭ་འཕྲོ་བ་ཞིག །ཁོའི་ཐེད་ནམ་མཁའི་མདུང་གར་སོར་བཞག །ཕཊཿ དེ་ལས་བྱུང་བའི་འོད་ཟེར་དམར་ནག་དེས་ཁོའི་སྙིང་དེ་ཤག་གིས་བཀས། ཁོའི་རྣམ་ཤེས་དེ་ཐག་གིས་བླངས་ནས་རང་གི་ཐིག་ལེ་དེ་ལ་བསྟིམས་པས། ཁོ་སྐྱེ་སྟོང་བཞིན་དུ་ནག་ལྷེབ་ཀྱིས་སོང་བར་བསམ། །
དམིགས་པ་དེ་ཐུན་རེ་ལ་ཡང་བརྒྱ་རྩ་རེ་བྱ། དེས་ལས་འགྲུབ་པར་ཐེ་ཚོམ་མེད་དོ། །ཨྠྀི། ཡང་རང་ཉིད་མ་གཅིག་སྨུག་ནག་འཇིགས་སུ་རུང་བ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། སྐུ་ལས་མེ་དཔུང་འབར་བར་བྷེ། རང་གི་མདུན་དུ་རྣག་ཁྲག་གི་རྒྱ་མཚོའི་སྟེང་དུ་ལྕགས་སྲེག་གི་ས་གཞིའི་དཀྱིལ་ན། ལྕགས་སྲེག་གི་རི་བོ་ཟུར་གསུམ་པ་མཚོན་ཆ་སྣ་ཚོགས་སྐྱེས་པའི་རྩེ་ལ་དགྲ་བགེགས་དམིགས་བཀུག་གཞུག་བྱས་ལ་བསྟིམ། རང་གི་ཕྱག་གཡས་པས་ལྕགས་སྲེག་གི་ས་གཞི་དང་བཅས་པ་ནམ་མཁའི་དབྱིངས་སུ་བཏེགས་ནས་རྣག་ཁྲག་གི་རྒྱ་མཚོ་ལ་བརྒྱབས་པས། འོག་གསེར་གྱི་ས་གཞི་ལ་གཏུགས་ནས་རྗེས་མེད་དུ་སོང་བར་བསམ། ཕཊཿ རྗེས་སུ་སྟོང་ཉིད་བྷེ། །ཨྠྀི། ༈ ཡང་རང་ཉིད་མ་གཅིག་ཁྲོས་མའི་མདུན་དུ་རྒྱ་མཚོ་ནག་ལ་འཇིགས་པ་ཞིག་སྟེ། རང་གི་ཕྱག་གཡས་པས་དགྲ་བོ་དེ་ཐག་གིས་བླངས་ནས་ནམ་མཁའི་དབྱིངས་སུ་ཁྱེར་ནས། སྐད་ཅིག་ལ་རྒྱ་མཚོ་ལ་བརྒྱབས་པས་ལྟེམ་མེ་སོང་། དེའི་སྟེང་དུ་གསེར་གྱི་ས་གཞི་སྐད་དེ་ཆགས། དེའི་སྟེང་དུ་གསེར་གྱི་རྡོ་རྗེ་རྒྱ་གྲམ་བསམ་གྱིས་མི་ཁྱབ་པ་ཞིག་གིས་མནན། རྡོ་རྗེའི་ལྟེ་བའི་སྟེང་དུ་རང་
ཉིད་མ་གཅིག་བཞུགས་ནས་མནན་པར་བྷཻཾ། ཕཊ་ཕཊ་ཕཊ། ཕྱག་རྒྱ་ཆེན་པོའི་ངང་ལ་བཞག་གོ །ཟབ་ཨྠྀི། ༈ ཡང་རང་ཉིད་མ་གཅིག་ཁྲོས་མའི་སྐུར་བྷོ་པའི་མདུན་དུ། དགྲ་ཡིན་ན་ནི་འདྲེ་ཡིན་ན་ཏྲཿལས་མངོན་སུམ་ལྟ་བུར་བསྐྱེད་ལ་དམིགས་པས་ཡང་ཡང་བཀུག་ལ་བསྟིམ། རང་གི་ཕྱག་གཡས་པས་ཁོའི་རྐང་པ་གཉིས་ནས་བཟུང་ནས་ཀླད་ལ་བསྐོར་ནས། འོག་ལྕགས་སྲེག་གི་ས་གཞི་ལ་བརྒྱབས་པས། ཀླད་ཁྲག་ཐ་རེ་གཞོབ་བུན་ནེ་སོང་བར་བསམ་ཕཊ་ཕཊ་ཕཊཿ མཐར་ཕྱག་རྒྱ་ཆེན་པོའི་ངང་ལ་བཞག་གོ །འདི་ནི་དགྲ་དང་གདོན་གང་ལ་ཡང་བྱེད་ཆོག་གོ །ཨྠྀི། ༈ ཡང་རང་ཉིད་ཁྲོས་མར་བསྐྱེད་པའི་ཕྱག་གཡོན་མཐིལ་དུ་ལྕགས་སྲེག་གི་བྲུབ་ཁུང་མེ་འབར་ཚྭ་ཚྭ་འཕྲོ་བའི་ནང་དུ། དམིགས་བྱའི་དགྲ་བགེགས་གང་ཡིན་པ་རང་གི་ཐུགས་ཀའི་འོད་ཟེར་ལྕགས་ལྟ་བུས་བཀུག་ནས་ངུ་སྒྲ་ཙི་རི་རི་བྲུབ་ཁུང་ནང་དུ་ཚུད་པར་བྷཻཾ། ཕྱག་གཡས་མཐིལ་དུ་གནམ་ལྕགས་རི་རབ་ཟུར་གསུམ་རྣོ་ངར་དང་ལྡན་པ་མེ་དཔུང་འབར་ཞིང་ཚྭ་ཚྭ་འཕྲོ་བ་ཞིག་བྷེ། ལག་པ་གཉིས་བརྡབས་པས་དགྲ་བོ་ཧོ་ཁུང་བཅས་པ་གནམ་ལྕགས་ཐོག་རྒོད་འབར་བའི་རི་རབ་དེས་འཛེར་གཞོབ་དཔུང་ངེ་
སོང་ནས་ཁོའི་རྣམ་ཤེས་ཚེ་བསོད་ཐམས་ཅད་འོད་ཟེར་གྱི་ཚུལ་དུ་རང་ལ་ཐིམ་པར་བྷེ་ལ་ཕྱག་རྒྱ་ཆེན་པོའི་ངང་ལ་བཞག་གོ །བསད་པ་སྲོག་གི་སྤུ་གྲི་ཨྠྀི། ༈ གཅོད་ཚོགས་མན་ངག་ཉེར་མཁོ་བཞུགས། ན་མོ་གུ་རུ། གཅོད་ཚོགས་མན་ངག་ལ། རང་གི་གྲ་མལ་གྱི་འོག་མདུན་ངོས་སུ་གྲུ་གསུམ་བྲུས་པའི་ནང་དུ་རྡོ་ལེབ་ཀྱིས་ཧོ་ཁུང་གི་གཟུགས་བྱས་ལ་ནང་དུ་ཁྲག་གམ་སོལ་བ་བྱུག །དེའི་ནང་དུ་མི་ཤི་བའི་དུར་གཅོད་ཡིན་ན་ཟ་འདྲེའི་ལིང་ག །གོད་གཅོད་ཡིན་ན་གོད་འདྲེའི་ལིང་ག །བྱིས་སྦ་ཤི་བ་ཡིན་ན་ཆུང་སྲིའི་ལིང་ག །བྱད་ཁ་ཟློག་ན་བྱད་མའི་ལིང་ག །མཐུ་གཏད་བྱེད་ན་དགྲའི་ལིང་ག་དེ་གང་ཡིན་པ་ཤོག་བུ་ལ་མིང་བྲིས་ཟན་ལིང་ནང་དུ་བཅུག་ལ། དེ་ཧོ་ཁུང་དེར་བཅུག་ལ་དེའི་སྟེང་དུ་གདན་བཏིང་ལ་རང་ཉལ་ས་བྱས་གཅོད་ཚོགས་གཞུང་ལྟར་བྱས་ལ། ཚོགས་ལས་ཚར་ནས་བསྒྲལ་ཚོགས་སྐབས་སུ་ཚོགས་ཟན་ལ་ལིང་ག་བྱས་ལ་འགུགས་གཞུག་དང་བསྒྲལ་ལས་བསྟབས་པ་བྱས་ནས། གཏོར་མར་འབུལ། ཐུན་མཚམས་ཐམས་ཅད་དུ་རང་མ་གཅིག་ཁྲོས་མའི་ཆ་ལུགས་སུ་བསྐྱེད་ལ་ཕྱག་གཡས་པའི་ལྕགས་ཀྱུ་ལས་འོད་ཟེར་ཉི་ཟེར་ལྟ་བུ་འཕྲོས་
ནས། གནོད་བྱེད་གང་ཡིན་གྱི་སྙིང་ནས་བཟུང་སྟེ་རང་གི་ཧོ་ཁུང་གྲུ་གསུམ་ཕྱི་ནག་པོ་མུན་པ་འཐིབ་པ། ནང་དམར་བ་ཁ་རུབ་ལ་ཟབ་པ་ཟིན་ནས་ཐར་ས་མེད་པའི་ནང་དུ་ལིང་ག་ལ་ཡང་ཡང་བསྟིམ། གང་ཡིན་དེའི་བླ་ཚེ་སྲོག་གསུམ་བཀུག་ལ་བསྟིམ། དེ་རྨི་ལམ་དུ་ཚར་ཚད་མ་བྱུང་བར་དུ་གཅུན། ཚད་ཚད་བྱུང་ནས་བསྒྲལ་ལས་བྱས་ལ་གཏོར་མའི་ནང་དུ་བཞག་ལ། གནོད་བྱེད་ཀྱི་ཤ་ཁྲག་སྲོག་སྙིང་ཐམས་ཅད་མཁའ་འགྲོ་དང་ལྷ་འདྲེ་ཐམས་ཅད་ཀྱིས་ཟོས་པར་བྷེ་ལ་གཏོར་འབུལ་བྱ། གཏོར་མ་དགྲ་དང་བྱད་མ་ཡོད་ན་དེ་ཕྱོགས་སུ་གཟར་བུས་འཕངས་ལ་བཞེས་འབོད་བྱེད་ལིང་རོ་དང་ཤོག་ལིང་དེ་དགྲ་ཡིན་ན་ས་ངན་སར་མནན། ཟ་འདྲེ་དང་ཆུང་སྲི་གོད་འདྲེ་ཡིན་ན་གཅོད་ཐོན་ནས་འོང་ཁ་གྲ་མལ་ཞབས་ཀྱི་དོང་དེར་མནན་ས་རིམ་རེ་རྒྱ་གྲམ་དགུ་བྲི། ཆུ་ཐིགས་རེ། མེ་ཁྲོལ་རེ་བཞག་པའི་ཁར་རྡོ་ལེབ་ལ་སོལ་བས་རྒྱ་གྲམ་བྲིས་པར་མར་ཁ་སྦུབས་ལ་མནན། ཟ་འདྲེའམ་གོད་འདྲེ་སྨྱོ་འདྲེ་ཆུངཧྲི་སོགས་གང་ཡིན་པ། གཉན་ས་འདིའི་ལྷ་འདྲེ་གཞི་བདག་ཁྱེད་རྣམས་ལ་གཏད་དོ་མ་ཤོར་ཅིག །ཅེས་འབོད་པ་བྱ། སྟེང་དུ་གཞུང་གི་བྲོ་དེ་བརྡུང་ངོ་། །གོད་གཅོད་ལྟ་བུ་ལ་གོད་མགོ་ལ་ལིང་ག་
བྲིས་ནས་ས་དཔལ་བཟང་སར་ཡང་དེ་ལྟར་གཏད་དོ། །མི་ཤི་བའི་དུར་གཅོད་ཡིན་ན་ཚོགས་ལས་བསྒྲལ་ཚོགས་སྐབས་དེར་གཤེད་སྒྲོ་རྡེབ་པ་དང་གདོང་ཅན་བཞི་བསྐུལ་སོགས་བྱེད་ཅིང་ལིང་ག་སླ་ང་ནང་དུ་བྱོ་ནས། ཡང་སླ་ང་ནང་གི་ལིང་ག་ལ་ཡང་བསྒྲལ་ལས་བྱས་ནས། ལིང་རོ་རང་གི་གྲྭ་མལ་འོག་གི་ཧོ་ཁུང་དུ་བླུག་པ་དེ་འདྲ་ཉིན་རེ་བཞིན་དུ་བྱའོ། །སླར་ལིང་རོ་ཅུང་ཟད་ཅིག་འབུལ་གཏོར་ནང་དུ་བླུག་དེ་འཕྲོ་མལ་དེར་བླུགས་ལ་མནན་ནོ། །གྲུབ་ཁུང་ཁ་དེར་རི་རབ་གླིང་བཞིའི་མནན་པའི་སྟེང་དུ་གསེར་གྱི་ཁྲི་འཕང་དགུ་པ་ཞིག་གིས་མནན་པར་བྷེ། རྗེ་རང་བྱུང་བས་མཛད་པའི་དྲག་པོའི་གཅོད་ཚོགས་ཀྱི་མན་ངག་ཟུར་འདེབས་ཡིག་ཆུང་ཀརྨ་ཨ་རཱ་གས་བཀོད་པའོ། །འདི་ལ་ཉེས་འགལ་གང་མཆིས་མ་གཅིག་སྤྲུལ་པའི་སྐུ་ལ་བཤགས། དགེ་བས་འགྲོ་ཀུན་ཡུམ་ཆེན་མ་གཅིག་ཞལ་མཐོང་ནས། སྲིད་ཞི་མི་གནས་རང་བྱུང་རྡོ་རྗེ་ཀརྨ་པ་ཉིད་འགྲུབ་པར་ཤོག །རྒྱལ་བའི་ཡུམ་ཆེན་མ་གཅིག་མཁའ་འགྲོ་རྒྱ་མཚོའི་བཀྲ་ཤིས་འདིར་འབྱུང་ཤོག །མངྒ་ལཾ།། །། ༈ ནང་ཆེན་བཟོ་རིག་གནས་མདོ་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།