ཆངས་བུ་ཁྲུས་ཆུ་གཉན་ས་དུར་ཁྲོད་ལ་གཏོར་བའི་ཐབས།
ཆངས་བུ་ཁྲུས་ཆུ་གཉན་ས་དུར་ཁྲོད་ལ་གཏོར་བའི་ཐབས་ལ་འདི་ལྟ་སྟེ། བེམ་པོ་ལུས་གདོན་དབྱེར་མེད་པའི་ངོ་བོ་དྲི་ཆུ་ཆངས་བུ་ཤ་དུམ་འདི་ཉིད་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ནད་པ་དངོས་དང་འདྲ་བ་དངོས་ལས་ལྷག་པའི་ཕུང་ཁམས་སྐྱེ་མཆེད་ཚང་བ། རེ་རེ་ལའང་བརྒྱ་ཕྲག་སྟོང་ཕྲག་འཕྲོ་བ་གྲངས་མེད་པ་འདི། གནོད་བྱེད་ཀྱི་གདོན་རྣམས་དང་། གྲིབ་གནོན་གྱི་གདོན་རྣམས་དང་། སྨྱོ་བྱེད་ཀྱི་གདོན་རྣམས་དང་། ལུས་སྲུལ་པོའི་གདོན་རྣམས་དང་། མཚན་མོ་ནག་མོའི་གདོན་རྣམས་ལ། དགོས་འདོད་མཁོ་དགུར་གྱུར་ནས་ཀྱང་། ཟད་མེད་ལོངས་སྤྱོད་ཐོབ་པར་ཤོག །མཉེས་ཤིང་ཚིམས་པས་འཁོར་བ་ཐོག་མ་མེད་པ་ནས་བསགས་པའི་བུ་ལོན་ལན་ཆགས་ཐམས་ཅད་བྱང་ནས་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཕཊ་ཕཊ་ཕཊ། ཕཊ། བེམ་པོ་ལུས་གདོན་དབྱེར་མེད་པའི་ངོ་བོ་དྲི་ཆུ་ཆངས་བུ་ཤ་དུམ་འདི་ཉིད་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ནད་པ་དངོས་དང་འདྲ་བ་དངོས་ལས་ལྷག་པའི་ཕུང་ཁམས་སྐྱེ་མཆེད་ཚང་བ། རེ་རེ་ལའང་བརྒྱ་ཕྲག་སྟོང་ཕྲག་འཕྲོ་བ་གྲངས་མེད་པ་འདི་ཉིད། ཟ་འདྲེ་ཤི་གཤེད། ཉེ་དུ་ཉེ་འབྲེལ་གྱི་གཤེད་ཁ། །
ཟ་རེ་འཐུང་སྐོམ་བྱེད་པ། ཤི་གསོན་གཉིས་ཀྱི་དཀོར་ནོར་གྱི་རྗེས་སུ་འབྲང་བ། དོན་མེད་ཀྱི་འདྲེ་གཏོགས་གཤེད་འཁྱམས་དང་གཏོང་བཞིན་དུ་བླ་ལ་བཏགས་པ། ཐག་ནག་བཞིན་དུ་རྒྱུད་ལ་འཕྲི་བ། ཤ་ཁྱི་བཞིན་དུ་རྗེས་སུ་འབྲང་བ། ཡས་དང་གླུད་ལ་རེ་ཆེ་བ་ཐམས་ཅད་ལ་དགོས་འདོད་མཁོ་དགུར་གྱུར་ནས་ཀྱང་། ཟད་མེད་ལོངས་སྤྱོད་ཐོབ་པར་ཤོག མཉེས་ཤིང་ཚིམས་ནས་འཁོར་བ་ཐོག་མ་མེད་པ་ནས་བསགས་པའི་བུ་ལོན་ལན་ཆགས་ཐམས་ཅད་བྱང་ཞིང་དག་ནས་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཕཊ་ཕཊ་ཕཊ། བེམ་པོ་ལུས་གདོན་དབྱེར་མེད་པའི་ངོ་བོ་དྲི་ཆུ་ཚངས་བུ་ཤ་དུམ་འདི་རྣམས། ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ནད་པ་དངོས་དང་འདྲ་བ་དངོས་ལས་ལྷག་པ། ཕུང་ཁམས་སྐྱེ་མཆེད་ཚང་བ་རེ་རེ་ལ་ཡང་བརྒྱ་ཕྲག་སྟོང་ཕྲག་གྲངས་མེད་པ་འཕྲོ་བ་འདི་ཉིད། བདག་ཅག་དཔོན་སློབ་རྣམས་ཀྱི་ཚེ་རབས་ཐོག་མ་མེད་པ་ནས་སྐྱེ་བ་སྔ་མ་ནས་ལན་ཆགས་འཁོར་བ། ཕྱི་མ་ནས་ལན་ཆགས་པ། ད་ལྟའི་ལན་ཆགས་པ། ལན་ཆགས་ཀྱི་བདག་པོ་བདག་མོ་བསད་བསད་བཅད་བཅད་ཚེ་ཐུང་བའི་ལན་ཆགས། །རྒྱབ་རྒྱབ་
བརྡུང་བརྡུང་ནད་མང་བའི་ལན་ཆགས། བརྐུས་བརྐུས་འཕྲོག་འཕྲོག་ནོར་དབུལ་བའི་ལན་ཆགས། བརྒྱ་ལན་དང་སྟོང་ལན། སྔ་མའི་ལན་ཆགས་པའི་ལན་ཆགས། གདོན་བགེགས་ཀྱི་རིགས་སུ་གྱུར་པ་རྣམས་ལ་དགོས་འདོད་མཁོ་དགུར་གྱུར་ནས་ཀྱང་། ཟད་མེད་ལོངས་སྤྱོད་ཐོབ་པར་ཤོག །མཉེས་ཤིང་ཚིམས་ནས་འཁོར་བ་ཐོག་མ་མེད་པ་ནས་བསགས་པའི་ལན་ཆགས་བུ་ལོན་ཐམས་ཅད་བྱང་ནས་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཕཊ་ཕཊ་ཕཊ། བེམ་པོ་ལུས་གདོན་དབྱེར་མེད་པའི་ངོ་བོ་དྲི་ཆུ་ཆངས་བུ་ཤ་དུམ་འདི་ཉིད་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ནད་པ་དངོས་དང་འདྲ་བ་དངོས་ལས་ལྷག་པའི་ཕུང་ཁམས་སྐྱེ་མཆེད་ཚང་བ། རེ་རེ་ལའང་བརྒྱ་ཕྲག་སྟོང་ཕྲག་གྲངས་མེད་པ་འཕྲོ་བ་འདི་ཉིད་བདག་ཅག་ཡོན་མཆོད་འཁོར་དང་བཅས་པ་རྣམས་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པ། ཚེ་ལ་རྐུ་བ། སྲོག་ལ་འཇབ་པར་བྱེད་པ། བླ་ལ་ཁྱེར་བ། ཡིད་ལ་རློམ་པ། ལུས་གདོན་རྒྱབ་རྟེན། ནད་ནད་བདག་དང་བཅས་པ། གདོན་སྣ་འདྲེན་དང་བཅས་པ་རྣམས་
ལ་དགོས་འདོད་མཁོ་དགུར་གྱུར་ནས་ཀྱང་། ཟད་མེད་ལོངས་སྤྱོད་ཐོབ་པར་ཤོག །ཕཊ་ཕཊ་ཕཊཿ མཉེས་ཤིང་ཚིམས་ནས་འཁོར་བ་ཐོག་མ་མེད་པ་ནས་བསགས་པའི་ལན་ཆགས་བུ་ལོན་ཐམས་ཅད་བྱང་ནས་བྱང་ཆུབ་ཀྱི་སེམས་དང་ལྡན་པར་གྱུར་ཅིག །དེ་བཞིན་གཤེགས་པ་བཞི་ཡི་མཚན་དང་། སཾ་བྷ་ར་སོགས་ཀྱིས་བསྔོས། ཆངས་བུ་གཉན་སའམ། དུར་ཁྲོད་དམ་གང་གནོད་པའི་ཕྱོགས་སུ་གཏོར། ༧ རཱ་ག་ཨ་སྱས་ཉེ་འཁོར་རྣམས་ལ་ཆག་ཆེ་ཉམ་ང་འཚུབ་པ་ཆེ་སྐབས་བྲིས་པས་ཕན་པ་རྒྱ་ཆེན་པོ་འབྱུང་བར་གྱུར་ཅིག། །།