དགྲ་ཕྱོགས་སུ་གཏོར་མ་འཕངས་ནས་དམོད་བཅོལ་བྱ་བ།
དགྲ་ཕྱོགས་སུ་གཏོར་མ་འཕངས་ནས་དམོད་བཅོལ་བྱ་བ་ནི། འོ། མ་མཁའ་འགྲོ་ཆེན་མོ་ཁྱེད་རྣམས་ཀྱིས། དམ་ཉམས་པའི་དགྲ་བོ་ཆེ་གེ་མོའི་སྲོག་ཆོད་དབུགས་ལོང་། ཤ་ཟོ་ཁྲག་འཐུང་དགྲ་མཁར་ཤིག །དགྲ་ལ་ལྟས་ངན་ཐོངས། འོ་དོད་གནམ་ལ་འབོད་དུ་ཆུག །རྐང་ལག་སྡེར་བཞི་ས་ལ་གཡབ་ཏུ་ཆུག །རྒན་པ་སྡོང་རོལ་མེ་ཚིག་བཞིན་དུ་ཐོངས། བུ་སྲིང་ཧ་ལོ་སད་པ་བཞིན་དུ་ཐོངས། གཞོན་ནུ་ལྕུག་ཕྲན་བརྔས་པ་བཞིན་དུ་ཐོངས། བྲན་གཡོག་སྲན་ཕུང་གཏོར་བ་བཞིན་དུ་ཐོངས། ནོར་རྫས་ཐལ་བ་རླུང་ཆེར་བཞིན་དུ་ཐོངས། ཕོ་རྒྱུད་རྩད་ནས་ཆོད་ལ་ཤོག །མོ་རྒྱུད་མངལ་ནས་སྐེམ་ལ་ཤོག །ཡུགས་སས་རལ་ནག་བཤིག་ཏུ་ཆུག །བུ་ཚ་མིང་སྲིང་སྡུག་ཡུས་སྦྱང་དུ་ཆུག །ནད་ཀྱི་བདག་མོས་ནད་ཁ་ཆེ་ལ་ཐོངས། །རིམས་ཀྱི་བདག་མོས་རིམས་ཁ་ཤད་ལ་ཐོངས། །དལ་གྱི་བདག་མོས་དལ་ཀ་དགྲ་ལ་ཕོབ། །དགྲ་བོས་ཚོགས་དྲུག་ཡུལ་མཁར་ཁྱིམ་ལ་ཟོ། །ཉི་ཟླ་གཟའ་ཡིས་བཟུང་ལྟར་མདངས་དང་ཕྲོལ། །ལོ་ཏོག་ཟོར་བས་བྲེག་ལྟར་མགོ་བོ་ཆོད། །རྩི་ཐོག་སད་ཀྱིས་ཁྱེར་ལྟར་ཉམས་ཀྱིས་ཐོངས། །ར་ལ་སྤྱང་ཤོར་ལྟ་བུར་
གཏོགས་ཀྱིས་ཁྱེར། །ནགས་ཚལ་ཡེལ་གྱིས་བརྡབ་ལྟར་བཀའ་ཆད་ཐོངས། ས་གཞི་ཐོག་གི་ཕུག་བཞིན་བདུན་རྒྱུད་ཆོད། །སྤང་ལ་མེ་ཆེན་ཤོར་ལྟར་རྗེས་མེད་ཐོངས། །ལུག་ཁྱུ་སྤྱང་ཀའི་གཏོར་ལྟར་ཕྱོགས་བཅུར་གཏོར། །བྱ་བྲན་ཁྲ་ཡིས་གཏོར་ལྟར་དུམ་བུར་ཐོངས། །རྒྱལ་པོའི་ཆད་པས་བཅད་ལྟར་མཐའ་ལ་སྤྱག །དགུ་སྦྲུལ་མེ་ཡིས་གཞོབ་ལྟར་རྗེས་མེད་ཐོངས། །ཆུ་གླིང་ཀླུ་དང་བྲལ་ལྟར་སྐྱབས་དང་ཕྲོལ། །སྐྱབས་བྲལ་གཤེད་མས་དེད་བཞིན་སྙིང་རྒལ་ཐོངས། །བོང་བ་རྦབ་པས་འགྲེལ་བཞིན་རྗེས་མེད་ཐོངས། །བདག་དང་འགྲས་པའི་སྡང་དགྲ་གནོད་བྱེད་རྣམས། །རྩད་ནས་ཆོད་ཅིག་དྲུང་ནས་མྱུར་དུ་ཕྱུང་། །བཅོལ་བའི་ལས་ལ་མཐུ་རྩལ་དྲག་ཏུ་བསྐྱེད། །བསྐལ་བའི་ལས་ལ་མ་གཡེལ་བརྩོན་འགྲུས་བསྐྱེད། །མངག་པའི་ལས་ལ་མགྱོག་ཐོབ་བང་མ་བུལ། །བཀའ་ཆད་མེ་སྟག་ཆུ་ལ་ཡལ་བཞིན་ཐོངས། །ལྷ་གང་ཡིན་གྱི་སྔགས་ལ་འདི་བཏགས། མ་མ་ཏྲག་རཀྵ་མ་ཏྲ་རུ་ཏྲ་སྙིང་ཁ་རག་ཐུན་བྷོ། སརྦ་དྷཱ་ཀི་ནི་རག་མོ་ཁ་ལ་ཁ་ཚེ། དགྲ་བོ་མཱ་ར་ཡ་ཐུན་བྷོ། དགྲ་བོའི་སྙིང་ཁྲག་ཚལ་པ་ཐུན་བྷོ། དགྲ་བོའི་སྙིང་ཁྲག་བམ་རིལ་ཐུན་བྷོ། དགྲ་བོའི་
སྙིང་ཁྲག་ཧུར་ཐུམ་ཐུན་བྷོ། ཟློག་ཟློག ༈ འཕང་བསྲེགས་ལས་རིམ་ཚར་བའི་རྗེས་ལ། དགྲ་བགེགས་འགུགས་ཤིང་མནན་པ་ནི། སྡང་བར་བྱེད་པའི་དགྲ། གནོད་པར་། བྱེད་པའི་བགེགས། རྒྱལ་བསེན་དམ་སྲི་འགོང་པོ། སྒབ་འདྲེ་ཡུལ་འདྲེ་ཟ་འདྲེ་ཤི་གཤེད། ཐད་དུ་ལང་བའི་དགྲ་བོ་བྱད་མ་རྦད་འདྲེ་རྦོད་གཏོང་ཐམས་ཅད་གཏོར་གཞོང་རི་རབ་ཆེན་པོའི་འོག །རྒྱ་མཚོ་ཆེན་པོའི་གཏིང་། ཀླུ་རྒྱལ་ཆེན་པོའི་ཁ། སྡིག་པ་ནག་པོའི་ལྟོ་བར་ཁུག །ཛཿཧཱུྃ་བཾ་ཧོཿ དེའི་ཕྱི་ནས་གནམ་ལྕགས་ཀྱི་སྡིག་པ་ཕོ་མོ་གཉིས་ལྟོ་སྦྱར་བའི་ཕྱི་རིམ། སྦྲུལ་ནག་འདོམ་པ་དགུ་བརྒྱ་དང་བཅུ་གསུམ་གྲུ་གུ་ཆིངས་སུ་བཅིང་བར་གྱུར། དེའི་ཕྱི་རིམ་གནམ་ལྕགས་འཁོར་ལོ་རྩིབས་བརྒྱད་པ། ཞབས་སུ་ཟངས་ཀྱི་འཁོར་ལོ་རྩིབས་བརྒྱད་པ་གཉིས་ཁ་རྩེ་བསྣོལ་བའི་ཕྱི་རིམ། རྡོ་རྗེ་ནག་པོའི་ཐག་པས་གྲུ་གུ་ཆིངས་སུ་དཀྲིས་པར་གྱུར། སྟེང་དུ་ཟླ་བའི་དཀྱིལ་འཁོར་རྩིབས་འབུམ་དང་ལྡན་པ་ལ་ཆུ་ཁོལ་བ། འོག་ཏུ་ཉི་མའི་དཀྱིལ་འཁོར་རྩིབས་འབུམ་དང་ལྡན་པ་ལ་མེ་འབར་བ། དེ་གཉིས་ཉི་ཟླ་གའུ་ཁ་སྦྱོར་བའི་ཕྱི་རིམ་འོད་ཟེར་ཁ་དོག་སྣ་ཚོགས་ལྔས་གྲུ་གུ་བཞིན་དུ་བཅིང་།
བར་གྱུར། དེའི་སྟེང་དུ་གནམ་ལྕགས་ཀྱི་རྡོ་རྗེ་རྒྱ་གྲམ་གཉིས་རྩེ་བསྣོལ་བའི་ཕྱི་རིམ། རྡོ་རྗེ་ནག་པོའི་ཐག་པས་གྲུ་གུ་བཞིན་དུ་བཅིང་བར་བསྒོམ། ཕཊཿ དེའི་སྟེང་དུ་ཡཾ་ལས་རླུང་གི་དཀྱིལ་འཁོར་ཟླ་གམ་ལྗང་གུ་སྟོང་གསུམ་དང་མཉམ་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་སྟོང་གསུམ་དང་མཉམ་པ། དེའི་སྟེང་དུ་ཁཾ་ལས་དབང་ཆེན་གསེར་གྱི་ས་གཞི་དཀྱིལ་འཁོར་གྲུ་བཞི་སེར་པོ་སྟོང་གསུམ་དང་མཉམ་པ། དེའི་སྟེང་དུ་ཧཱུྃ་ལས་ལྕགས་ཀྱི་རི་རབ་ནག་པོ་མཆོད་རྟེན་གྱི་རྣམ་པ་ཅན་ཁ་དོག་དང་བཅས་པ། །སྟོད་ན་ཡི་དམ་ལྷ་ཚོགས། བར་ན་ཡེ་ཤེས་ཀྱི་མཁའ་འགྲོའི་ཚོགས། སྨད་ན་འཇིག་རྟེན་སྲུང་མའི་ལྷ་ཚོགས་ཐམས་ཅད་བྲོ་གར་ཁྲིག་ཁྲིག་བྱེད་པར་གྱུར། ཧཱུྃ། ཁྲོ་བོ་ཁྲོ་མོས་བྲོ་བརྡུང་ཆེམས་སེ་ཆེམ། །དྲག་པོ་སྔགས་ཀྱི་སྒྲ་སྐད་དི་རི་རི། །མ་མོ་མཁའ་འགྲོས་གར་བྱེད་ཤིགས་སེ་ཤིག །ཕོ་ཉ་ལས་མཁན་རྒྱུག་སྡང་སྤྲེངས་སེ་སྤྲེང་། །དགྲ་བགེགས་ཤ་ཁྲག་དུམ་བུ་ཐ་ར་ར། །མཆེད་ལྕམ་རོལ་པའི་འཆམ་སྟབས་ལམས་སེ་ལམ། །མནན་ཅིང་གཟིར་བ་ལས་ཀྱི་དོན་ཆེན་འགྲུབ། །ཇི་སྲིད་སངས་རྒྱས་བསྟན་པ་གནས་ཀྱི་བར། །
དེ་སྲིད་དགྲ་བགེགས་གནོད་བྱེད་གདུག་པ་ཅན། །བསྐལ་པ་སྟོང་གི་བར་དུ་མ་སྐྱེ་ཅིག །མ་སྡང་ཞིག །སརྦ་ཤ་ཏྲུཾ་ཨ་མུ་ཀ །ཨོཾ་ལཾ་ཐུཾ་དང་། སྟྭཾ་བྷ་ཡ། ནཱ་ཤ་ཡ། མཱ་ར་ཡ་ཧཱུྃ་ཕཊཿ གཅིག་ནི་ཐིག་ལེ་ཉག་གཅིག་རྒྱ། །གཉིས་ནི་ཐབས་ཤེས་ཟུང་འཇུག་རྒྱ། །གསུམ་ནི་སྐུ་གསུམ་ལྷུན་གྲུབ་རྒྱ། །བཞི་ནི་ཚད་མེད་བཞི་ཡི་རྒྱ། །ལྔ་ནི་ཡེ་ཤེས་ལྔ་ཡི་རྒྱ། །དྲུག་ནི་ཕ་རོལ་ཕྱིན་དྲུག་རྒྱ། །བདུན་པ་ཡན་ལག་བདུན་གྱི་རྒྱ། །བརྒྱད་ནི་རྣམ་ཐར་བརྒྱད་ཀྱི་རྒྱ། །དགུ་ནི་ཐེག་པ་དགུ་ཡི་རྒྱ། །བཅུ་ནི་ས་བཅུ་ནོན་པའི་རྒྱ། །དོན་རྟག་གཉིས་མེད་རྒྱས་གདབ་བོ། །ཞེས་མི་དམིགས་པས་རྒྱས་གདབ་བོ། །ཞེས་རཱ་ག་ཨ་སྱས་མཛད་པའོ།། །།