གཅོད་ཀྱི་ལྷག་མའི་ལས་བྱང་།
གཅོད་ཀྱི་ལྷག་མའི་ལས་བྱང་བཞུགས་སོ། །འདིར་གཅོད་ཀྱི་ལྷག་མའི་མཚམས་སུ་ལས་བྱང་དང་བསྐུལ་བ་ཤིན་ཏུ་གནད་ཆེ་བ་མན་ངག་ཞལ་ཤེས་ཡིན་ལ། སྐྱེ་མེད་སྤྲོས་བྲལ་གྱི་ངང་ནས་འདི་སྐད་དོ། །ན་མོ་གུ་རུ། དེང་ནས་བཟུང་སྟེ་བླ་མ་དཀོན་མཆོག་གསུམ། །ངེས་པར་སྙིང་ནས་སྐྱབས་གསོལ་སེམས་བསྐྱེད་ནས། །ཚད་མེད་བཞི་པོས་སྣང་སྲིད་ཟིལ་གྱིས་གནོན། །བདག་གིས་རྫོགས་བྱང་ཉིད་ལ་འགོད་པར་བྱ། །ཕཊ་ཕཊཿ ཕྱི་ནང་ཆོས་རྣམས་སྟོང་པའི་རང་བཞིན་ལ། །རང་ཉིད་མ་གཅིག་ལབ་སྒྲོན་སྐུ་མདོག་དམར། །ཞལ་གཅིག་སྤྱན་གསུམ་ནམ་མཁའི་མཐོངས་ལ་གཟིགས། །སྐུ་ལུས་གཅེར་བུར་རུས་པའི་རྒྱན་དྲུག་གསོལ། །ཕྱག་གཡས་ལྕགས་ཀྱུས་ཁམས་གསུམ་དབང་དུ་སྡུད། །གཡོན་པས་ཁ་ཊྭཱཾ་མི་རྐང་གླིང་བུ་འབུད། །བུས་པས་སྣང་སྲིད་ལྷ་འདྲེ་དབང་དུ་སྡུད། །དབུ་སྐྲ་སིལ་མའི་གསེབ་ནས་ཕག་ཞལ་ངུར། །སྐྱིལ་ཀྲུང་ཕྱེད་པའི་སྟབས་ཀྱིས་བཾ་གདན་བཞུགས། །རིགས་བཞིའི་མཁའ་འགྲོ་འབུམ་གྱི་དབུས་ན་རོལ། །རང་ཉིད་ལྷར་གསལ་གནས་གསུམ་འབྲུ་གསུམ་ལས། །འོད་འཕྲོས་རང་བཞིན་གནས་ནས་མ་གཅིག་མ། །ཛཿཧཱུྃ་བཾ་ཧོཿས་
གཉིས་སུ་མེད་པར་གྱུར། །མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མ་ལུས་འཇོམས་མཛད་པའི། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །མ་གཅིག་འཁོར་བཅས་གནས་འདིར་གཤེགས་སུ་གསོལ། །ཛཿཧཱུྃ་བཾ་ཧོཿདམ་ཚིག་གཉིས་མེད་གྱུར། །དབང་ལྷ་རིགས་ལྔ་སྤྱན་དྲངས་དབང་བསྐུར་ནས། །དབང་རྟག་མི་བསྐྱོད་པ་ཡིས་དབུ་བརྒྱན་གྱུར། །རང་ཉིད་མཁའ་འགྲོ་མ་རྣམས་ཐམས་ཅད་ཀྱི། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །ཐུགས་ཀར་ཧཱུྃ་མཐིང་ལྟེ་བར་ཐཾ་དམར་པོ། །དེ་བཞིའི་མཐའ་མར་ཧ་རི་ནི་ས་དང་། །མཐའ་མར་སྔགས་ཀྱིས་གཡས་སུ་བསྐོར་བར་གྱུར། །རང་གི་ཐུགས་ཀའི་ཧཱུྃ་ལས་འོད་འཕྲོས་པས། །ཕྱོགས་བཅུའི་རྒྱལ་བ་སྲས་བཅས་མ་ལུས་དང་། །དཔའ་བོ་མཁའ་འགྲོ་ཀུན་གྱིས་བྱིན་རླབས་བསྡུས། །འོད་ཟེར་ཚུར་འདུས་རང་ལ་ཐིམ་པར་གྱུར། །དམིགས་པ་དེ་ཡི་ངང་ལས་བསྙེན་པ་བྱ། །ཨོཾ་ཨཱཿཧཱུྃ་བཾ་གུ་རུ་ཧ་རི་ནི་ས་སིདྡྷི་ཧཱུྃ། མ་ཡེངས་པར་བཟླ། རྟོགས་ཚད་ལྡན་པའི་རྣལ་འབྱོར་པས། མཁའ་འགྲོ་སྡེ་བརྒྱད་ཀྱི་བསྐུལ་བ་བྱེད་ན། ལྷག་མ་ལ་བདེན་སྟོབས་དྲག་ཏུ་བརྗོད་ལ། བྷན་དྷའི་སྣོད་དུ་ལྷག་གཏོར་ཤ་
ཁྲག་གི །ཕུང་པོ་འདོད་ཡོན་ལྔ་ལྡན་རྒྱ་མཚོར་གྱུར། ཕཊ་ཕཊཿ ཧཱུྃ། མ་ཡུམ་ཆེན་ཐུགས་ལས་སྤྲུལ་པའི་ལྷ། །མ་གཅིག་ཇོ་མོ་རྣལ་འབྱོར་མ། །ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །མ་ཐུགས་དམ་བསྐུལ་ལོ་ཕྲིན་ལས་མཛོད། །ཀྱཻ། མ་སངས་རྒྱས་མཁའ་འགྲོ་གཤིན་རྗེ་མོ། །དཀར་མོ་ཀེང་རུས་མཆེ་བ་གཙིགས། །ཕྱག་ན་ཟངས་ཀྱི་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཀྱཻ། མ་ཤར་ཕྱོགས་གཏུམ་དྲག་དུར་ཁྲོད་ནས། །རྡོ་རྗེ་མཁའ་འགྲོ་འཇིགས་གཟུགས་ཅན། །དཀར་མོ་ཀེང་རུས་བྲོ་བརྡུང་ཞིང་། །ཕྱག་ན་གྲི་གུག་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཀྱཻ། ལྷོ་ཕྱོགས་གད་རྒྱངས་དུར་ཁྲོད་ནས། །རིན་ཆེན་མཁའ་འགྲོ་གཟི་བརྗིད་ཅན། །སེར་མོ་ཀེང་རུས་བརྐྱང་བསྐུམ་བཞུགས། །ཕྱག་ན་རིན་ཆེན་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཀྱཻ། ནུབ་ཕྱོགས་
པདྨ་འཁྱིལ་བའི་དུར་ཁྲོད་ནས། །པདྨ་མཁའ་འགྲོ་དྲི་མེད་མ། །དམར་མོ་ཀེང་རུས་ཕྱེད་སྐྱིལ་བཞུགས། །ཕྱག་ན་པདྨ་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཀྱཻ། བྱང་ཕྱོགས་ཀི་ལ་སྒྲོགས་པའི་དུར་ཁྲོད་ནས། །ལས་ཀྱི་མཁའ་འགྲོ་བདེ་བ་ཅན། །ལྗང་མོ་ཀེང་རུས་འདོར་ཐབས་བཞུགས། །ཕྱག་ན་རྒྱ་གྲམ་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཤར་ལྷོ་རབ་འཇིགས་དུར་ཁྲོད་ནས། །དམ་ཚིག་མཁའ་འགྲོ་དམིགས་པ་ཅན། །དཀར་སེར་ཀེང་རུས་བརྐྱང་བསྐུམ་བཞུགས། །ཕྱག་ན་ལྕགས་ཀྱུ་ཐོད་ཁྲག་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ལྷོ་ནུབ་གཏུམ་པོའི་དུར་ཁྲོད་ནས། །སྣ་ཚོགས་མཁའ་འགྲོ་མི་ཐུབ་མ། །དམར་སེར་ཀེང་རུས་བརྐྱང་བསྐུམ་བཞུགས། །ཕྱག་ན་ཐོད་དབྱུག་བྷནྡ་ཐོགས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ནུབ་བྱང་རབ་རྒྱུའི་དུར་ཁྲོད་ན། །
ཐམས་ཅད་མཁའ་འགྲོ་ཀུན་རྒྱུ་མ། །དམར་ལྗང་ཀེང་རུས་མཆེ་བ་གཙིགས། །ཕྱག་ན་ཐོ་བ་བྷནྡྷ་ཐོགས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །བྱང་ཤར་གཏུམ་དྲག་དུར་ཁྲོད་ནས། །རྒྱུད་འཛིན་འཇིག་རྟེན་མཁའ་འགྲོ་མ། །དཀར་ལྗང་ཀེང་རུས་བརྐྱང་བསྐུམ་བཞུགས། །ཕྱག་ན་ཁ་ཊཾ་བྷན་བསྣམས། །ལྷག་མའི་གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །སྲིད་པའི་མ་མོ་བྱེ་བ་འབུམ། །དམག་དཔུང་བསྐྱེད་ལ་རུ་མཚོན་ཕྱིར། །ལྷག་མའི་བདག་མོ་སྐུ་སྐྱོད་ཅིག །འཁོར་གྱི་མཁའ་འགྲོ་ཅི་ལ་སྡོད། །སྲིད་པའི་མཁའ་འགྲོ་ཅི་ལ་སྡོད། །སྣང་སྲིད་མཁའ་འགྲོ་ཅི་ལ་སྡོད། །མཁའ་འགྲོ་ཅི་ལ་སྡོད། །དགྲ་བོའི་ཡུལ་དུ་ལྷག་གཏོར་ཁྱེར། །དགྲ་བོའི་ཡུལ་མཁར་རྨིང་ནས་བསྐྱེལ། །དགྲ་བོའི་བདུན་རྒྱུད་རྩད་ནས་ཆོད། །སྟེང་གི་ཕོ་ལ་ལྷག་ག་ཁྱེར། །འོག་གི་མོ་ལ་ལྷག་གཏོར་ཁྱེར། །མཆེན་གྱི་བུ་ལ་ལྷག་གཏོར་ཁྱེར། །སྒོ་ཡི་ནོར་ལ་ལྷག་གཏོར་ཁྱེར། །དགྲ་བོའི་བདུན་རྒྱུད་རྩད་ནས་ཆོད། །ལྷག་གཏོར་འདི་དང་
དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །བཻ་ཌཱཀྐི་རག་མོ་ཁ་ལ་དུན་རྩེ་ཨུཙིཏྟཾ་བྷཀྵ་ཁ་དུན་ཨི་དཾ་བྷ་ལི་ཏ་ཁཱ་ཧི་ཁཱ་ཧི། ཞེས་ལྷག་མའི་བསྐུལ་པ་འདི། ཤུལ་གསང་། །དུག་མཚོན་འདྲ་བའི་མན་ངག་འདི། །སྔགས་རྒན་རཱ་ག་ཨ་སྱས་སྦྱར་བའོ། །ཉེས་འགལ་མཆིས་ན་མཁའ་འགྲོའི་ཚོགས་ལ་བཤགས། །དགེ་བས་ཡུམ་ཆེན་གོ་འཕང་མྱུར་ཐོབ་ཤོག །སརྦ་མངྒ་ལཾ།།