གཅོད་ལུགས་ཆར་འབེབས་ཟབ་ཅིང་སྟབས་བདེ་བ།
མཚོ་རྒྱལ་མ་གཅིག་བླ་མ་རྗེ་ལ་འདུད། །གཅོད་ལུགས་ཆར་འབེབས་ཟབ་ཅིང་སྟབས་བདེ་བ། །ལུས་སྦྱིན་དམིགས་པ་དམར་འགྱེད་མང་དུ་བྱ། །རང་གི་པགས་པ་བཏིང་ནས་འཛམ་གླིང་ཁྱབ། །དེའི་སྟེང་དུ་ཀླུ་དང་གཞི་བདག་ལྷ་འདྲེ་ཐམས་ཅད་ཁྲོམ་ལྟར་འདུས་པ་ལ། ཤ་ཁྲག་རང་རང་གི་ཅི་འདོད་པའི་ལོངས་སྤྱོད་དུ་གྱུར་ནས་བྱིན་པས་དགའ་མགུ་ཡི་རང་། རང་ཁྲོས་མའམ་ཕག་མོ་རི་རབ་ཙམ་དུ་གྱུར་པའི་ཞལ་ནས་ད་ལྟ་ཆར་ཕོབ། ཅེས་བཀའ་བསྒོས་པས། ལྷ་འདྲེ་ཐམས་ཅད་ཀྱི་བུ་ག་ཐམས་ཅད་དང་བ་སྤུ་ཐམས་ཅད་ནས། །ན་བུན་དང་ཆར་ཞོད་ཕྱུ་རུ་རུ་བྱུང་། འཇིག་རྟེན་སྤྱི་དང་རང་གི་འདོད་པའི་ས་དེར། ཆུ་སྐྱོགས་ཆེན་པོའི་སྔོ་ལྟེམ་མེ་གང་བར་བྷེ། དམིགས་པ་གསལ་ཞིང་བརྟན་ན། ཞག་གསུམ་ལས་འགྱང་མི་སྲིད་པར་གསུངས་སོ། །དགོང་མོ་རང་སེང་གདོང་མར་སྒོམ་པའི་ཞབས་འོག་ན་རླུང་ལྷ་དང་ཚོར་བཀག་པའི་འདྲེ་ངན་ཐམས་ཅད་ཚུད་པ་ཞབས་ཀྱི་འོག་ཏུ་མནན་པས། ཁབ་ས་ལ་བརྡབས་པ་ལྟར། རིམ་དགུ་སའི་འོག་ཏུ་སོང་བར་བསྒོམ། སེང་གདོང་མའི་སྔགས་ཕྲེང་སྐོར་དང་ཐབ་བརྡེབ་བྱ། ཆར་བབས་ནས་གཏང་རག་དཀར་གཏོར་ཕུལ། རང་
སྤྱན་རས་གཟིགས་ནམ་མཁའ་ཁྱབ་པའི་ཕྱག་གཡས་ནས་བདུད་རྩི་འོ་མ་ལྟ་བུ་ཆུ་ཆེན་ལྟར་བབས་ཀླུ་དང་གཞི་བདག་ཐམས་ཅད་ཀྱིས་ཁྲུས་བྱས་པ་དང་འཐུང་པས། སོ་སོའི་ནད་དང་སྡུག་བསྔལ་ཐམས་ཅད་ཞི། བདེ་སྐྱིད་བཀྲག་མདངས་ཕུན་སུམ་ཚོགས། དགའ་ཞིང་ཡིག་དྲུག་འདོན་ཏེ་རང་གནས་སུ་སོང་བར་བསྒོམ། རྟོགས་ལྡན་དར་རྒྱས་དང་། སྟོབས་བཅུ་སོགས་ལ་ཕན་པའི་ཕྱིར། ཟབ་ཅིང་དོན་བསྡུས་གོ་བདེ་བར། རཱ་ག་ཨ་སྱས་ངག་ནས་སྨོས་པ་ལྟར། བེ་ཁྲོ་དཀར་པོས་བྲིས་པས་འགྲོ་ཕན་དཔག་ཏུ་མེད་པར་གྱུར་ཅིག། །།