གཅོད་ཀྱི་ས་འབེབས་བཀྲ་ཤིས་དགེ་ལེགས་རབ་རྒྱས།
གཅོད་ཀྱི་ས་འབེབས་བཀྲ་ཤིས་དགེ་ལེགས་རབ་རྒྱས་ཞེས་བྱ་བ་བཞུགས་སོ། །མ་གཅིག་ལབ་ཀྱི་སྒྲོལ་མའི་སྐུ་ལ་འདུད། མ་ཎི་ཚ་ཁང་གཤིན་དུར་ཐུན་མོང་དུ་ས་འབེབས་བྱེད་པ་ལ། ས་མིག་ལེགས་པར་བཙལ་ནས། དང་པོ་དཀར་འགྱེད་དམར་འགྱེད་དམིགས་པ་བྱ། དེ་ནས་མདའ་དར་གཡས་དང་། འཇོར་གཡོན་དར་སྣ་སྲོག་དང་མཐུན་པས་སྐད་དར་རྒྱབ་ཅིང་། ཤར་རམ་ལྷོ་ཕྱོགས་ལ་ཁ་རྒྱུ་ནས་འདོན་སྒོམ་སྦྲགས། ཕཊཿ རང་ཉིད་སྐད་ཅིག་གིས་ཁྲོས་མ་ནག་མོ་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་ཤིང་སྐུ་གྲོལ་བ། དུར་ཁྲོད་ཆས་བརྒྱད་དང་ལྡན་པའི་ཐུགས་ཀ་ནས། །རང་འདྲ་བའི་ས་འོག་སྤྱོད་པའི་ལྷ་མོ་གསེར་གྱི་མདངས་དང་ལྡན་པ་ཞིག་འཕྲོས། ས་འོག་ཏུ་སྤྱོད་པས་ས་འདིར་གནས་པ་རྣམས་གོམ་པ་དགུ་དགུའི་སར་དགྱེས་པར་འཁོད། ས་འོག་རྒྱ་མཚོའི་ཁ་ནས་ས་གཡང་ཀླུའི་ནོར་བུ་བསམ་འགྲུབ་རྒྱ་མཚོ་འོད་འབར་བ་གཅིག་ཡར་གྱི་ས་ལ་ཐིམ་པར་གྱུར། ཕཊ་ཕཊ་ཕཊཿ རྐང་པ་གཡོན་པས་ས་མིག་ནས་མནན་ཏེ། ཕཊཿ རང་ཉིད་ཁྲོས་མའི་སྐུ་སྨད་གསེར་གྱི་ཕུར་པ་ལ་ཡེ་ཤེས་ལྔ་ཡི་འོད་འབར་བ་ཞིག་ཏུ་གྱུར། ས་མིག་འདི་ལ་སྒབ་འདྲེ་བྱེད་པའི་ས་སྲིན་གནོད་བྱེད་སྡིག་པ་རྭ་ཅན་གྱི་གཟུགས་ཅན་དེ་ལ་
བདག་དང་ཡོན་བདག་གི་ནད་གདོན་བར་ཆད་ཐམས་ཅད་ཐིམ་པར་གྱུར། སྐུ་སྨད་ཕུར་པའི་དབལ་གྱིས་འཛེར་ནས་དུག་ལྔ་ཡེ་ཤེས་ལྔའི་འོད་ཀྱིས་བསྲེགས། ཕུར་ཤམ་ནས་རླུང་བུས་པས་འབྱུང་བ་བཞི་བརྩེགས་ས་ཡི་འོག་ཏུ་བཏང་། ཕཊ་ཕཊ་ཕཊཿ རང་གཞན་མཁའ་འགྲོ་རིགས་ལྔའི་གཙོ་དང་འཁོར། །རིམ་པར་བསྐུལ་ནས་ཤར་ནས་གཡས་བསྐོར་གྱིས། །ཀྱཻ། མ་ཤར་རྡོ་རྗེ་རིགས་ཀྱི་མཁའ་འགྲོ་མ། །དཀར་མོ་དུང་གི་ཐོར་ཚུགས་ཅན། །དར་དང་ཆེན་རུས་པའི་རྒྱན་གྱིས་སྤྲས། །འཁོར་ཡང་དཀར་མོ་འབུམ་གྱིས་བསྐོར། །མ་མཁའ་འགྲོའི་མཐུ་དང་བྱིན་རླབས་ཀྱིས། །ཤར་ཕྱོགས་ས་གཡང་དངོས་གྲུབ་རྣམས། །འོད་དཀར་པོའི་རྣམ་པར་བཅུད་བསྡུས་ལ། །ས་གཞི་འདི་ལ་ཐིམ་པར་གྱུར། །ཕཊ་ཕཊ་ཕཊཿ ཀྱཻ། མ་ལྷོ་རིན་ཆེན་རིགས་ཀྱི་མཁའ་འགྲོ་མ། །སེར་མོ་གསེར་གྱི་ཐོར་ཙུགས་ཅན། །དར་དང་རིན་ཆེན་རུས་པའི་རྒྱན་གྱིས་སྤྲས། །འཁོར་ཡང་སེར་མོ་འབུམ་གྱིས་བསྐོར། །མ་མཁའ་་འགྲོའི་མཐུ་དང་བྱིན་རླབས་ཀྱིས། །ལྷོ་ཕྱོགས་ས་པ་ཡང་དངོས་གྲུབ་རྣམས། །འོད་སེར་པོའི་རྣམ་པར་བཅུད་བསྡུས་ལ། །ས་གཞི་འདི་ལ་ཐིམ་པར་གྱུར། །ཕཊ་ཕཊ་ཕཊཿ ཀྱཻ།
མ་ནུབ་པདྨ་རིགས་ཀྱི་མཁའ་འགྲོ་མ། །དམར་མོ་བྱི་རུའི་ཐོར་ཚུགས་ཅན། །དར་དང་རིན་ཆེན་རུས་པའི་རྒྱན་གྱིས་སྤྲས། །འཁོར་ཡང་དམར་མོ་འབུམ་གྱིས་བསྐོར། །མ་མཁའ་འགྲོའི་མཐུ་དང་བྱིན་རླབས་ཀྱིས། །ནུབ་ཕྱོགས་ས་གཡང་དངོས་གྲུབ་རྣམས། །འོད་དམར་པོའི་རྣམ་པར་བཅུད་བསྡུས་ལ། །ས་གཞི་འདི་ལ་ཐིམ་པར་མཛོད། །ཕཊ་ཕཊ་ཕཊཿ ཀྱཻ། མ་བྱང་ལས་ཀྱི་རིགས་ཀྱི་མཁའ་འགྲོ་མ།་།ལྗང་མོ་གཡུ་ཡི་ཐོར་ཚུགས་ཅན། །དར་དང་རིན་ཆེན་རུས་པའི་རྒྱན་གྱིས་སྤྲས། །འཁོར་ཡང་ལྗང་མོ་འབུམ་གྱིས་བསྐོར། །མ་མཁའ་འགྲོའི་མཐུ་དང་བྱིན་རླབས་ཀྱིས། །བྱང་ཕྱོགས་ས་གཡང་དངོས་གྲུབ་རྣམས། །འོད་ལྗང་གུའི་རྣམ་པར་བཅུད་བསྡུས་ལ། །ས་གཞི་འདི་ལ་ཐིམ་པར་མཛོད། །ཕཊ་ཕཊ་ཕཊཿ ཀྱཻ། མ་དབུས་སངས་རྒྱས་རིགས་ཀྱི་མཁའ་འགྲོ་མ། །སྔོན་མོ་མུ་མིན་ཐོར་ཚུགས་ཅན། །དར་དང་རིན་ཆེན་རུས་པའི་རྒྱན་གྱིས་སྤྲས། །འཁོར་དུ་སྔོན་མོ་འབུམ་གྱིས་བསྐོར། །མ་མཁའ་འགྲོའི་མཐུ་དང་བྱིན་རླབས་ཀྱིས། །དབུས་ཕྱོགས་ས་གཡང་དངོས་གྲུབ་རྣམས། །འོད་སྔོན་པོའི་རྣམ་པར་བཅུད་བསྡུས་ལ། །
ས་གཞི་འདི་ལ་ཐིམ་པར་གྱུར། །ཕཊ་ཕཊ་ཕཊཿ ས་འདི་གསེར་གྱི་ཕུང་པོ་འོད་འབར་བ་ཞིག་ཏུ་གྱུར། །ཕཊ་ཕཊ་ཕཊཿ དམིགས་པ་ནི་རང་གི་རྐང་མཐིལ་གཡོན་འོག་ཐིམ་ནས་ས་བཅུད་འབྱུང་བ་ལྔའི་སྙིང་པོ་འོད་ཟེར་ལྔའི་མདངས་ལྡན་གྱེན་དུ་དྲངས་ནས་སྤྱི་བོ་མན་ཆད་གང་བས་ཚེ་བསོད་རྒྱས་ཤིང་འཆི་མེད་ལུས་ཐོབ་པར་བསམ། ཟན་གྱི་རུས་སྦལ་གཟུགས་དང་ས་སྙིང་རྣམས་འདོན་ཞིང་། ཡོན་བདག་དེ་ཁ་ཤར་དུ་རྒྱུ་ལ་གྲུ་གང་སོ་ནས་དོང་ནང་དུ་འཕེན་བཅུག །རུསྩལ་དེ་ལག་ཏུ་ཐོགས་ལ། ཀྱཻ། མ་ཧཱ་གསེར་གྱི་རུས་སྦལ་འདི། །སྲིད་པ་གཉེན་པོའི་ཞལ་ངོ་ཡིན། །ཤར་དུ་བསྟན་ན་བར་ཆད་ཞི། །ལྷོ་རུ་བསྟན་ན་ཚེ་བསོད་རྒྱས། །ནུབ་ཏུ་གཤིན་ལ་མ་བལྟ་ཞིག །བྱང་གི་དགྲ་ལ་མ་འབོད་ཅིག །ཤར་ལྷོ་མཚམས་སུ་དགའ་བདེའོ། །ཨོཾ་མ་ཧཱ་གསེར་གྱི་རུས་སྦལ་བྷྲཱུཾ་རཀྵ་སྭཱ་ཧཱ། ཞེས་འཕང་། ཁ་གྲུ་ཕྱོགས་ཡག་ན་མི་འགུལ་བར་བཞག །ངན་ན་ལན་གསུམ་འཕེན་ལ། ལྷོར་ཁ་བལྟས་བཞག །རིན་ཆེན་སྣ་ལྔ་དང་འབྲུ་སྣ་སྨན་སྣ་བཏབ། ཀྱི། མ་ཧཱ་གསེར་གྱི་རུས་སྦལ་འདི། །དབང་ཆེན་ས་ཡི་བདག་པོ་ཡིན། །མགོན་བྱེད་སྐྱོབ་བྱེད་ལོ་ལྷ་ཡིན། །ས་ཡི་གདན་དུ་བཏིང་བས་ན། །སྟེང་གི་གཟའ་སྐར་མ་འཁྲུགས་ཤིག །འོག་གི་འབྱུང་བ་མ་འཁྲུགས་ཤིག་
བར་གྱི་སྡེ་བརྒྱད་མ་འཁྲུགས་ཤིག །ལྷ་ཀླུ་གཞི་བདག་མ་འཁྲུགས་ཤིག །ཀུན་གྱི་བསྲུང་དུ་འགྱུར་བར་ཤོག །ཅེས་བརྗོད་པས་མདའ་དར་གཡབ། ས་ཆས་ས་མཁན་པ་རང་གིས་ཁྱེར། ཚས་ཀ་ལ་སོགས་ལྷག་མེད་བྱས། དེ་ནས་མཉམ་པར་བཞག་པའོ། །དཀྱིལ་འཁོར་ལ་སོགས་དགོས་པ་ན། འདི་དུས་ས་རྐོ་ཐབས་ལྟོ་འཕྱེ་བརྟག་ལ་ཕྱོགས་གཞན་ཀྱང་འཛེམ། དྲེད་དང་ཕྱི་བའི་སྦལ་མོའི་བྲད། དེ་ནས་ཀག་ལེ་རྒྱབ། རུས་སྤལ་ལ་སོགས་འཛོམས་ན་ལེགས། གཞན་ཡང་སྣང་བརྒྱད་དང་ཉེས་པ་ཀུན་སེལ་སོགས་སྤྱི་མཐུན་བཞིན་དུ་ཐོན་ན་ལེགས། དེ་རོ་བཤའ་དུར་གཅོད་བྱེད་དུས་དེ་དགོས་པ་མིན་ཀྱང་སྔགས་སྤྱོད་ཟུང་འཇུག་ལ་གལ་མི་ཆེ་ཀརྨ་ཨ་རཱ་ག་ཨ་སྱ་ཡིས། །དགོང་མོ་ཐུན་མཚམས་མར་མེའི་ངོགས། །བརྩོན་འགྲུས་རྒྱ་མཚོས་ཡི་གེར་བཀོད། །ཉེས་འགལ་མཆིས་ན་གཅོད་ཡུལ་བརྒྱུད་པ་དང་། །མ་རྒྱུད་མཁའ་འགྲོའི་དྲུང་དུ་བཤགས། །དགེ་བས་འགྲོ་ཀུན་ཨོ་རྒྱན་གནས་སུ་དྲོངས། །ས་ནི་རྐོ་དགོས་གསོན་གཤིན་རྩིས། །གང་ཡིན་དེ་ཡང་འདི་བཞིན་དུ། །ལྟོ་འཕྱེ་འཁོར་ཐབས་དཔྱིད་གསུམ་བྱང་། །དབྱར་གསུམ་ཤར་ལ་སྟོན་གསུམ་ལྷོ། །དགུན་གསུམ་ནུབ་ཏུ་ཁ་གྲུ་ཀོ། །ཚེས་གྲངས་བཅུ་གཉིས་ས་རྐོ་སྤངས། །ཐེ་སེ་སྤྲེལ་ཁོག་རྒྱུ་བས་ངན། །དེ་དུས་ཕྱིར་ནངས་རྐོས་པས་འགྲུབ། །སྔགས་གཅོད་ཟུང་འཇུག་ལུགས་ཀྱི་ཆ་ལགས་སོ། །ཕཊཿ ཨོ་རྒྱན་དག་པ་མཁའ་སྤྱོད་ཞིང་ཁམས་ནས། །
ཡུམ་ཆེན་མ་གཅིག་སྤྲུལ་པའི་མཁའ་འགྲོ་མ། །རྡོ་རྗེ་ཕག་མོ་གྲི་ཐོད་ཁ་ཊྭཱཾ་འཆང་། །དུར་ཁྲོད་ཆས་རྫོགས་ཞབས་གཉིས་བདུད་བཞི་མནན། །སྲིད་གསུམ་ཟིལ་གནོན་བམ་ཆེན་གདན་ལ་འགྱིང་། །མཁའ་འགྲོ་སྡེ་ལྔ་འཁོར་ཚོགས་འབུམ་སྡེར་བཅས། །སྡེ་ལྔའི་སྐུ་གསུང་ཐུགས་ཀྱི་བྱིན་རླབས་ཀྱིས། །གསེར་གཡུ་དུང་སོགས་དར་ཟབ་སྣ་ཚོགས་དང་། །འབྲུ་སྣ་ཤེལ་ཚིགས་ཁྲི་དཀར་སྟོང་ནག་འདིས། །ཚེ་འདས་ཟད་མེད་གཏེར་ལ་ལོངས་སྤྱོད་ཤོག །རྟེན་འབྲེལ་དམུ་ཐག་དཀར་པོ་ཡར་ལ་འཐེན། །མཐོ་རིས་ཐར་ལམ་དར་ཐག་དཀར་པོས་བསུས། །ཐབས་མཁས་ཐུགས་རྗེས་རིགས་དྲུག་གནས་ནས་དྲོངས། །ཚེ་འདས་བདེ་ཆེན་ཞིང་ཁམས་མྱུར་ཐོབ་ཤོག །སྦྱིན་བདག་ཚེ་བསོད་དཔལ་འབྱོར་གོང་འཕེལ་ཤོག །གཅོད་པ་བདུད་བཞིའི་གཡུ་ལས་རྣམ་རྒྱལ་ནས། །འབྲེལ་ཚད་དོན་ལྡན་འཇའ་ལུས་འགྲུབ་པར་ཤོག །ཕཊ། ཅེས་བརྗོད་ནས་གསེར་གཡུ་དུང་སོགས་ས་དམིགས་ལ་སྦས་སོ། །འབྲུ་སྣ་ཤེལ་ཚིགས་རྣམས་ས་དམིགས་དབྱིབས་ཉེ་ཕྱོགས་སུ་བཏབ་བོ། །དར་རས་གང་འཛོམ་དེ་མདའ་དར་དབྱིབས་ཅན་ལ་འཛུགས་སོ། །དམུ་ཐག་ཡར་ལ་འཐེན་ནོ། །ཨ་རཱ་གས་གཅོད་གཞུང་ཡིག་རྙིང་མང་པོའི་དོན་བསྡུས་སུ་སྦྱར་བའོ།། །།