གཉན་འབོད་ལ་རི་འགྲིམ་སྐབས་ས་གཉན་ཆུ་གཉན་སོགས་བྱ་རྒྱུ་ཁྱད་པར་ཅན།
གཉན་འབོད་ལ་རི་འགྲིམ་སྐབས་ས་གཉན་ཆུ་གཉན་སོགས་བྱ་རྒྱུ་ཁྱད་པར་ཅན་བཞུགས་སོ།། ཨོཾ་མ་ཎི་པདྨེ་ཧཱུཾ་ཧྲཱིཿ ལྷ་འདྲེ་ལ་འབོད་པ་ནི། ཕཊ་ཕཊ་ཕཊཿ སྤྱིར་ཞིང་སྲིད་པའི་ལྷ་འདྲེ་དང་། །སྒོས་གཉན་ས་འདིར་གནས་ཀྱི་ལྷ་འདྲེ་སྟེ། །ཡང་སྒོས་རྣལ་འབྱོར་བདག་ལ་ཆོ་འཕྲུལ་སྟོན་པའི་ལྷ་འདྲེ་སོགས། །ལྷ་འདྲེ་སྡེ་བརྒྱད་མ་ལུས་འདིར་འདུས་ཤིག །དེ་ནས་ལན་གསུམ་བྱ། དངོས་གཞི་ལ། ༀ་མ་ཎི་པདྨེ་ཧཱུྃ་ཧཱུྃ༔ ཕཊ་ཕཊ་ཕཊཿ འོ་ཉོན་ཉོན་ལྷ་འདྲེའི་རིགས་གྱུར་ཉོན། །ཤོག་ཤོག་ལྷ་འདྲེ་སྡེ་བརྒྱད་ཤོག །རྒྱུག་རྒྱག་གནོད་བྱེད་འབྱུང་པོ་རྒྱུག །འཚོགས་འཚོགས་ཡུལ་ལྷ་གཞི་བདག་འཚོགས། །འདུས་འདུས་ལྷ་འདྲེ་ཡོད་ཚད་འདུས། །སྟོན་སྟོན་ཆོ་འཕྲུལ་ཡོད་ཚད་སྟོན། །གདོངས་གདོངས་ཁ་སྣ་མིག་གསུམ་གདོངས། །མཆོངས་མཆོངས་ང་ཡི་ཐོག་ཏུ་མཆོངས། །འཇུས་འཇུས་བདག་གི་ལུས་ལ་འཇུས། །ཆོད་ཆོད་འདྲེར་འཛིན་གྱི་རྩ་བ་ཆོད། །ཆད་ཆད་རྣམ་རྟོག་གི་སྙིང་ལ་རྦད། །སོད་སོད་དགྲར་སྣང་གི་གཉིས་འཛིན་སོད། །གཏུབ་གཏུབ་གཅེས་འཛིན་གྱི་ལུས་འདི་གཏུབ། །བརྡུང་བརྡུང་བདག་འཛིན་གྱི་མགོ་བོ་བརྡུང་། །
ཕོད་ཕོད་ལྟོ་བའི་དཀྱིལ་ནས་ཕོད། །གཏོར་གཏོར་གློ་སྙིང་བྲང་གསུམ་གཏོར། །འཐེན་འཐེན་ནང་ཆ་བུ་དགུ་འཐེན། །ཟོ་ཟོ་ཕྱི་ཤ་གཟུགས་དྲུག་ཟོ། །འཐུང་འཐུང་ཁྲུག་དང་ཆུ་སེར་འཐུང་། །འཇིབ་འཇིབ་རྐང་དང་སླ་བ་འཇིབ། །མུར་མུར་ཚིལ་དང་རུས་པ་མུར། །རོལ་རོལ་མ་ལུས་མེད་པར་རོལ། །གྱོན་གྱོན་པགས་པ་བཤུས་ལ་གྱོན། །དྲུད་དྲུད་ད་ལྟ་དངོས་སུ་དྲུད། །རྩལ་ཆེན་ཡོད་ན་ད་སོད་ཅིག །སྟོབས་ཆེན་ཡོད་ན་ད་འཇོག་ཅིག །ཤད་ཆེན་ཡོད་ན་ད་ཁུག་ཅིག །ང་སེམས་སྐྱེ་མེད་ལྡན་པའི་རྣལ་འབྱོར་གྱིས། །ཁྱོད་ལྷ་འདྲེ་རྣམས་ལ་སྙིང་རྗེ་ནས། །ལུས་ཤ་ཁྲག་སྦྱིན་པ་གཏོང་བ་ཡིན། །སྤྱི་གཙུག་མན་དང་རྐང་མཐིལ་ཡན། །ཤ་ཁྲག་རུས་གསུམ་ཅི་མཆིས་རྣམས། །རྡུལ་ཙམ་མེད་པར་ད་འཐུང་ཞིག །བདག་གི་ཤ་ཁྲག་འདི་ཟོས་ནས། །སེམས་ཅན་ཡོངས་ལ་གནོད་མ་བྱེད། །བྱང་ཆུབ་སེམས་དང་ལྡན་པར་མཛོད། །ཕཊ་ཕཊཿ ཧ་ཧ། སྟོང་གསུམ་ལྷ་འདྲེ་བྱུང་ན་དགའ་བ་ལ། །གཟུགས་དང་ཆོ་འཕྲུལ་སྟོན་ན་མཚར་བ་ལ། །ཕུང་པོ་དངོས་སུ་ཁྱེར་ན་སྐྱིད་པ་ལ། །ལྷ་འདྲེ་རྣམས་ལ་ང་མི་སྐྲག །ལྷ་འདྲེ་རྣམས་ལ་ང་སྐྲག་ན། །
གཉན་ས་འདི་རུ་ཅི་ལ་འོང་། །ལྷ་འདྲེ་འདིར་ཤོག་ཅི་ལ་ཟེར། །རང་ལུས་ལྷ་འདྲེར་ཅི་ལ་སྦྱིན། །འདྲེ་བརྒྱ་བས་མི་ཚད་སྟོང་བྱུང་ན། ང་སྟོང་ཉིད་རྟོགས་པའི་རྣལ་འབྱོར་ལ། །དགའ་ཞིང་སྤྲོ་ལ་ངོ་མཚར་ཆེ། །སྟོང་ཉིད་ཆོས་སྐུའི་རང་བཞིན་ལ། །གཅིག་ཀྱང་ང་ཡིས་མ་མཐོང་བར། །ལྷ་འདྲེའི་གནོད་པ་སུ་ལ་བྱ། །བདག་དང་ལྷ་འདྲེ་གཉིས་མེད་པར། །འོད་གསལ་ཆོས་སྐུའི་ངང་དུ་བཞག །ཅེས་གཉན་འབོད་འདི་རཱ་ག་ཨ་སྱས་སྦྱར་བ། གདོན་ཚོགས་དགུ་མ་དང་ས་བདག་དྲུག་སྦྱོར་སོགས་ལ་རི་འགྲིམས་དུས་གཉན་སར་ལྷ་འདྲེ་སློང་མ་སྒྱུ་ཐུབ་ན། ལྷན་ཐབས་གབ་སྤྲད་འདི་འགྲོ་བ་ཀུན་ལ་ཕན་ཐོགས་རྒྱ་ཆེན་ཤོག། །།