ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་དྲུག་པ་སྐྱབས་འགྲོའི་ཁྲིད།
༼ཆ༽ ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་དྲུག་པ་སྐྱབས་འགྲོའི་ཁྲིད་བཞུགས་སོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་གདམས་ངག་ཟབ་མོ། །འཁོར་བའི་སྡུག་བསྔལ་ལས་སྐྱོབ་པའི་ཐབས། སྐྱབས་འགྲོ་གལ་ཆེ་སྟེ། སྤྱན་རས་གཟིགས་ཀྱིས་གསུངས་པའི་རྡོ་རྗེའི་ཚིག་རྐང་ལས། འཁོར་བའི་སྡུག་བསྔལ་གྱིས་འཇིགས་པ་རྣམས། །རིན་ཆེན་གསུམ་ལ་སྐྱབས་འགྲོ་ཞིང་། །དེ་ཡི་བསླབ་བྱ་བསྲུང་བ་ལ། །རང་གི་ལུས་ལྟར་གཅེས་པར་བསྲུང་། །ཞེས་གསུངས་སོ། །འོ་ན་ཕ་མ་དང་གཉེན་གྲོགས་ལ་སོགས་པ་རང་ལ་བརྩེ་ཞིང་ཕན་པར་དགའོ་བ་རྣམས་ལ་སྐྱབས་སུ་འགྲོའམ་ཞེ་ན། དེས་ཀྱང་སྐྱབས་མི་
ཐུབ་སྟེ། འཇམ་དཔལ་རྣམ་པར་རོལ་པའི་མདོ་ལས། ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །ཅི་ལྟར་འདོད་པ་བཞིན་དུ་འགྲོ། །ཞེས་གསུངས་སོ། །རང་རང་གི་ཡུལ་གྱི་རི་བྲག་གམ། མཚོའམ་ལྗོན་ཤིང་ལ་སོགས་པ་ལ་གནས་པའི་ལྷ་ཀླུ་མཐུ་བོ་ཆེ་རྣམས་ལ་སྐྱབས་སུ་འགྲོ་བར་བྱའམ་ཞེ་ན། དེ་ཀུན་གྱིས་ཀྱང་སྐྱབས་མི་ཐུབ་པས་སྐྱབས་གནས་མ་ཡིན་ཏེ། ཇི་སྐད་དུ། མདོ་ལས། འཇིག་རྟེན་རྣམས་ལ་རི་དང་ནི། །ནགས་ཚལ་དང་ནི་མཆོག་གནས་ཀྱི། །ཀུན་དགའ་
དང་ནི་རྡོ་བ་དང་། །ལྗོན་ཤིང་ལྷ་ལ་སྐྱབས་འགྲོ་ན། །སྐྱབས་དེ་གཙོ་བོ་མ་ཡིན་ཞིང་། །ཞེས་དང་། མདོ་རྒྱལ་མཚན་དམ་པ་ལས། འཇིགས་པས་ཉེན་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ལྗོན་ཤིང་སོགས་ལ་སྐྱབས་འགྲོ་སྟེ། །སྐྱབས་དེ་མཆོག་གྱུར་མ་ཡིན་པས། །སྐྱབས་དེ་དག་ལ་བརྟེན་ནས་ནི། །འཇིགས་པ་ཀུན་ལས་གྲོལ་མི་འགྱུར། །ཞེས་དང་། སྐྱབས་སུ་འགྲོ་བ་འདི་ཡང་འཇིག་རྟེན་གྱི་དྲག་རྩལ་ཅན་ཚངས་པ་དང་ཁྱབ་འཇུག་དང་མ་ཧཱ་དེ་ཝ་ལ་སོགས་པ་ལ་སྐྱབས་ཞུས་ན། ཚེ་འདིའི་ནད་གདོན་སོགས་ཅུང་ཟད་སྐྱོབ་ནུས་ཀྱིས། འཁོར་བའི་སྡུག་བསྔལ་ལས་མི་སྐྱོབ་སྟེ། ཁོ་རང་ཡང་མ་ཐར་བའི་ཕྱིར། ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་ཉིད་གྱུར་པའི། །སྡུག་བསྔལ་རྒྱུན་མི་ཆད་པ་བསྟེན་འཚལ་ལོ། །ཞེས་དང་། བརྒྱ་བྱིན་མཆོད་འོས་ཉིད་དུ་གྱུར་ནས་ཀྱང་། །ལས་ཀྱི་དབང་གིས་སླར་ཡང་ས་སྟེང་ལྟུང་། །ཞེས་གསུངས་སོ། །འོ་ན་སྐྱབས་སུ་འགྲོ་བའི་ཡུལ་གང་ཡིན་ཞེ་ན། མདོ་རྒྱལ་མཚན་དམ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་
རྣམས་ཀྱི་སྐྱབས། །གང་ཞིག་སངས་རྒྱས་ཆོས་དང་ནི། །དགེ་འདུན་དག་ལ་སྐྱབས་འགྲོ་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགགས་པ་དང་། །བདེ་ཞི་མྱ་ངན་འདས་བྱས་ནས། །སྡུག་བསྔལ་ཀུན་ལས་གྲོལ་བར་འགྱུར། །ཞེས་དང་། འཇམ་དཔལ་རྣལ་རོལ་ལས། འཇིགས་གྱུར་འཇིགས་པ་སེལ་མཛད་ཕྱིར། །སྐྱབས་མེད་སྐྱོབ་པའི་སངས་རྒྱས་དང་། །ཆོས་དང་ཚོགས་མཆོག་དགེ་འདུན་ལ། །རྟག་པར་སྐྱབས་སུ་འགྲོ་བར་གྱིས། །གང་དག་དེ་ལ་སྐྱབས་སོང་བ། །འཇིགས་པ་ཀུན་ལས་ཐར་བར་འགྱུར། །ཞེས་གསུངས་སོ། །སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ཏེ། །ཐར་པ་འདོད་པ་རྣམས་ཀྱི་སྐྱབས། །སྐྱབས་དེ་དག་ལ་བརྟེན་ནས་ནི། །འཇིགས་པ་ཀུན་ལས་ཐར་བར་འགྱུར། །ཞེས་དང་། འབྲས་བུ་དཀོན་མཆོག་གསུམ་སྐྱབས་གནས་ཀྱི་མཐར་ཐུག་ཡིན། །སངས་རྒྱས་འཇིག་རྟེན་དུ་འབྱུང་བར་དཀོན་ཏེ། འཇིག་རྟེན་གྱི་རྒྱན་ཡིན་པའི་ཕྱིར་དང་། ཆོས་དྲི་མ་མེད་པ་ཡིན་ཏེ། འཇིག་རྟེན་གྱི་ལམ་མཆོག་ཡིན་པའི་ཕྱིར། །དགེ་འདུན་
འགྲོ་བ་སྐྱོབ་པའི་མཐུ་དང་ལྡན་ཏེ། འཇིག་རྟེན་གྱི་ཉེས་པས་འགྱུར་བ་མེད་པའི་ཕྱིར་དང་། མཐར་ཐུག་འབྲས་བུའི་དཀོན་མཆོག་གསུམ་སྐྱབས་གནས་སུ་བཞག་པ་ཡིན་ཏེ། རྒྱུད་བླ་མ་ལས། འབྱུང་བར་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་འགྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་རིན་ཆེན་ཉིད། །ཅེས་གསུངས་པ་དང་། དེ་ལྟ་བུའི་དཀོན་མཆོག་གསུམ་ལ་སྐྱབས་སུ་འོས་ཏེ། བསྟོད་པ་བརྒྱ་ལྔ་བཅུ་པ་ལས། གང་ཞིག་ལ་ནི་ཉེས་པ་ཀུན། །གཏན་ནས་ཡོང་ཡེ་མི་མངའ་ཞིང་། །གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གང་ལ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང་། །དེ་བསྟོད་དེ་ནི་བཀུར་བ་དང་། །དེ་ཡི་བསྟན་ལ་གནས་པར་རིགས། །ཞེས་གསུངས་པ་ལྟ་བུའོ། །མདོ་ལས། གང་ཞིག་སངས་རྒྱས་ཆོས་དང་ནི། །དགེ་འདུན་དག་ལ་སྐྱབས་སོང་ནས། །ལྷ་དང་དྲི་ཟ་ལྷ་མ་ཡིན། །ཀླུ་དང་གནོད་སྦྱིན་ལ་སོགས་པ། །འཇིགས་པ་ཀུན་ལས་ཐར་བར་འགྱུར། །ཞེས་དང་། དཀོན་མཆོག་དྲི་མ་མེད་པའི་མདོ་ལས། རྐང་གཉིས་གཙོ་
བོ་མ་གཏོགས་པ། །འཇིག་རྟེན་དག་ན་སྐྱབས་གཞན་མེད། །སྐྱོན་མེད་ཡོན་ཏན་རབ་རྫོགས་ཕྱིར། །ཐུབ་པ་སྐྱབས་མེད་རྣམས་ཀྱི་སྐྱབས། །གང་ཞིག་སངས་རྒྱས་ཆོས་དང་ནི། །དགེ་འདུན་བསྟན་ལ་མི་བརྟེན་པ། །དེ་དག་འཇིག་རྟེན་ཕྱི་རོལ་ཞེས། །ལྷ་དང་བཅས་པ་ཀུན་གྱིས་སྨད། །ཅེས་དང་། དེ་ལ་དང་པོ་སྐྱབས་འགྲོའི་དབྱེ་བ་ལ་གཉིས་ཏེ། ཐུན་མོང་གི་སྐྱབས་འགྲོ་དང་། ཁྱད་པར་གྱི་སྐྱབས་འགྲོའོ། །རྟེན་གྱི་གང་ཟག་ལ་ཡང་གཉིས་ལས། ཐུན་མོང་པའི་རྟེན་གྱི་གང་ཟག་ནི། འཁོར་བའི་སྡུག་བསྔལ་གྱིས་འཇིགས་ཤིང་། དཀོན་མཆོག་གསུམ་ལ་ལྷར་འཛིན་པའོ། །ཁྱད་པར་གྱི་རྟེན་གྱི་གང་ཟག་ནི། ཐེག་པ་ཆེན་པོའི་རིགས་ཅན་ལྷ་མིའི་ལུས་རྣམ་པར་དག་པ་ཐོབ་པ་རྣམས་སོ། །ཡུལ་ལ་ཡང་གཉིས་ལས། ཐུན་མོང་པའི་ཡུལ་འཆད་པ་ལ། སངས་རྒྱས་དཀོན་མཆོག་ནི་སྤངས་བ་དང་ཡེ་ཤེས་ཆེ་བའི་བདག་ཉིད་ཕུན་སུམ་ཚོགས་པ་དང་ལྡན་པའི་སངས་རྒྱས་བཅོམ་ལྡན་འདས་སོ། །ཆོས་དཀོན་མཆོག་ལ་གཉིས་ལས། བསྟན་པའི་ཆོས་ནི་གསུང་རབ་ཡན་ལག་བཅུ་གཉིས་སོ། །རྟོགས་པའི་ཆོས་ནི་ལམ་གྱི་
བདེན་པ་དང་འགོགས་པའི་བདེན་པའོ། །དགེ་འདུན་དཀོན་མཆོག་ལ་གཉིས་ལས། སོ་སོའི་སྐྱེ་བོའི་དགེ་འདུན་ནི། དགེ་སློང་རྣམ་པར་དག་པ་བཞི་ཡན་ཆད་འཚོགས་པ་ཡིན་ལ། འཕགས་པའི་དགེ་འདུན་ནི། སྐྱེས་བུ་ཟུང་བཞི་དང་གང་ཟག་ཡ་བརྒྱད་དག་གོ །སྐྱབས་གནས་ཁྱད་པར་གྱི་ཡུལ་ནི་མདུན་ན་བཞུགས་པའི་ཡུལ་དང་མངོན་པར་རྟོགས་པའི་ཡུལ་དང་། དེ་ཁོ་ན་ཉིད་ཀྱི་ཡུལ་དང་གསུམ་མོ། །དེ་ལ་མདུན་ན་བཞུགས་པའི་ཡུལ་ནི། སངས་རྒྱས་ནི་དེ་བཞིན་གཤེགས་པའི་སྐུ་གཟུགས། ཆོས་ནི་ཐེག་པ་ཆེན་པོའི་པོ་ཏི། བྱང་ཆུབ་མཆོག་ཏུ་སེམས་བསྐྱེད་པའི་དགེ་འདུན་ནི། བྱང་ཆུབ་སེམས་དཔའི་དགེ་འདུན་ནོ། །ཆོས་མངོན་པར་རྟོགས་པའི་ཡུལ་ནི། སངས་རྒྱས་སྐུ་གསུམ་གྱི་བདག་ཉིད་ཅན་ནོ། །ཆོས་ནི་དམ་པའི་ཆོས་ཞི་བ་མྱ་ངན་ལས་འདས་པའོ། །དགེ་འདུན་ནི་ས་ཆེན་པོ་ལ་གནས་པའི་བྱང་ཆུབ་སེམས་དཔའོ། ། །དེ་ཁོ་ན་ཉིད་ཀྱི་ཡུལ་གྱི་དབང་དུ་བྱས་ན་སྐྱབས་སུ་འགྲོ་བའི་ཡུལ་སངས་རྒྱས་ཉག་གཅིག་ཡིན་ནོ། །དེ་ལྟར་ཡང་། ཐེག་པ་ཆེན་པོ་རྒྱུད་བླ་མ་ལས། །དམ་པའི་དོན་དུ་འགྲོ་བའི་སྐྱབས་ནི་སངས་རྒྱས་ཉག་གཅིག་
ཡིན། །ཞེས་གསུངས་སོ། །འོ་ན་སངས་རྒྱས་ཀྱིས་གཏན་གྱི་སྐྱབས་ཐུབ་པ་ཅིའི་ཕྱིར་ཞེ་ན། ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་གསུངས་ཏེ། ཐུབ་པ་རྣམས་སྐྱེ་འགགས་མེད་པ། རྣམ་པ་རྣམ་པར་བྱང་བ། འདོད་ཆགས་དང་བྲལ་བ་སྟེ། ཆོས་ཀྱི་སྐུ་ཅན་ཡིན་པའི་ཕྱིར་ན་ཡང་དམ་པའི་སྐྱབས་ཡིན་ལ། ཐེག་པ་གསུམ་གྱི་ཚོགས་ཀྱང་ཆོས་སྐུ་རྣམ་པར་དག་པ་མཐར་ཐུག་ཐོབ་པས་མཐར་ཕྱིན་པར་འགྱུར་བའི་ཕྱིར་དམ་པའི་སྐྱབས་ཡིན་ནོ། །འོ་ན་ཆོས་དང་དགེ་འདུན་གཉིས་གཏན་གྱི་སྐྱབས་མ་ཡིན་ནམ་ཞེ་ན། རྒྱུད་བླ་མ་ལས། ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །ཞེས་གསུངས་སོ། །དེ་དག་ཅིའི་ཕྱིར་གཏན་གྱི་སྐྱབས་མཆོག་མ་ཡིན་ཞེ་ན། ཆོས་ལ་གཉིས་ཡོད་པ་ལས། བསྟན་པའི་ཆོས་ནི་མིང་གི་ཚོགས་དང་ཡི་གེའི་ཚོགས་ཡིན་པས་ལམ་བསྒྲོད་ཟིན་ནས་གཟིངས་ལྟར་སྤང་བྱ་ཡིན་པས། གཏན་གྱི་སྐྱབས་མ་ཡིན་པའོ། །རྟོགས་པའི་ཆོས་ལ་ཡང་གཉིས་ལས། ལམ་གྱི་བདེན་པ་ནི་འདུས་བྱས་ཡིན་པས་མི་རྟག་པ་སྟེ། བསླ་བའི་ཆོས་ཡིན་
པའི་ཕྱིར་སྐྱབས་མ་ཡིན་པའོ། །འགོགས་པའི་བདེན་པ་ནི་ཉན་ཐོས་ཀྱིས་ལུགས་ཀྱི་མར་མེ་ཤི་བ་ལྟར་རྒྱུན་ཆད་དུ་འདོད་པས། མེད་པའི་ཕྱིར་གཏན་གྱི་སྐྱབས་མ་ཡིན་པའོ། །དགེ་འདུན་ནི་ཁོ་རང་ཡང་འཁོར་བས་འཇིགས་ནས་སངས་རྒྱས་ལ་སྐྱབས་སུ་སོང་བ་ཡིན་ཏེ། འཇིགས་བཅས་ཡིན་པས་གཏན་གྱི་སྐྱབས་མ་ཡིན་པའོ། །དེ་ལྟར་ཡང་། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །ཞེས་གསུངས་སོ། །དེས་ན་སློབ་དཔོན་ཐོགས་མེད་ཀྱི་ཞལ་ནས་ཀྱང་། མི་ཟད་པའི་སྐྱབས། རྟག་པའི་སྐྱབས། གཡུང་དྲུང་གི་སྐྱབས། དམ་པའི་སྐྱབས་ནི་གཅིག་ཉིད་དེ། འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །ཞེས་གསུངས་སོ། །འོ་ན་གོང་དུ་སྐྱབས་གསུམ་དུ་གསུངས་པ་དང་འགལ་ལོ་ཞེ་ན་ཐབས་ཀྱིས་གསུམ་མོ། །དེ་ནི་གདུལ་བྱ་དྲངས་བའི་ཐབས་སུ་བྱུང་བ་ཡིན་ཏེ། ཐར་པ་ཆེན་པོའི་མདོ་ལས། མདོར་ན་སྐྱབས་གཅིག་སྟེ། ཐབས་ཀྱིས་ནི་
གསུམ་མོ། །ཞེས་གསུངས་སོ། ཐབས་ཀྱིས་གསུམ་དུ་ཇི་ལྟར་བཞག་ཅེ་ན། ཐེག་པ་ཆེན་པོ་རྒྱུད་བླ་མ་ལས། སྟོན་པ་བསྟན་པ་སློབ་དོན་གྱི། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་གསུངས་སོ། །ཡོན་ཏན་གསུམ་དང་། ཐེག་པ་གསུམ་དང་། བྱེད་པ་གསུམ་དང་། མོས་པ་གསུམ་གྱི་དབང་དུ་བྱས་ནས་བཞག་པ་ཡིན་ནོ། །དེ་ཡང་སྟོན་པའི་ཡོན་ཏན་བསྟན་པའི་དོན་དུ། བྱང་ཆུབ་སེམས་དཔའི་ཐེག་པའི་གང་ཟག་དང་། སངས་རྒྱས་ལ་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་དབང་དུ་བྱས་ན། སངས་རྒྱས་ལ་སྐྱབས་ཡིན། བསྟན་པའི་ཡོན་ཏན་སྟོན་པའི་དོན་དུ། རང་རྒྱལ་གྱི་ཐེག་པའི་གང་ཟག་དང་། ཆོས་ལ་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་དབང་དུ་བྱས་ན་ཆོས་ལ་སྐྱབས་ཡིན། སློབ་མའི་ཡོན་ཏན་བསྟན་པའི་དོན་དུ། ཉན་ཐོས་ཀྱི་ཐེག་པའི་གང་ཟག་དང་། དགེ་འདུན་ལ་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་དབང་དུ་བྱས་ན། དགེ་འདུན་ལ་སྐྱབས་ཡིན། དེ་ལྟར་སངས་རྒྱས་ཆོས་དང་དགེ་འདུན་གསུམ་ནི་
ཕྱིའི་སྐྱབས་ཡུལ། བླ་མ་ཡི་དམ་མཁའ་འགྲོ་གསུམ་ནི་ནང་གི་སྐྱབས་ཡུལ། ཆོས་སྐུ་ལོངས་སྐུ་སྤྲུལ་སྐུ་གསུམ་ནི་གསང་བའི་སྐྱབས་ཡུལ། ངོ་བོ་རང་བཞིན་ཐུགས་རྗེ་གསུམ་ནི་དེ་ཁོ་ན་ཉིད་ཀྱི་སྐྱབས་ཡུལ། དེ་ཐམས་ཅད་ཀྱང་རྩ་བའི་བླ་མར་འདུས་པའི་ཕྱིར། བླ་མ་ཐོག་མར་བརྗོད་པ་ཡིན་ནོ། །དེ་ཡང་དུས་ད་ནས་བཟུང་སྟེ། རང་ཉིད་འཁོར་བའི་སྡུག་བསྔལ་ལས་སྐྱོབ་པའི་ཕྱིར། ཇི་སྲིད་འཚོའི་བར་དུ་སྐྱབས་སུ་འགྲོ་བ་ནི། ཐེག་པ་ཐུན་མོང་གི་སྐྱབས་འགྲོ་ཡིན་ལ། བདག་དང་སེམས་ཅན་ཐམས་ཅད་སངས་རྒྱས་མ་ཐོབ་ཀྱི་བར་དུ་སྐྱབས་སུ་འགྲོ་བ་ནི་ཐེག་པ་ཆེན་པོའི་སྐྱབས་འགྲོ་ཡིན། སྐྱབས་སུ་སོང་ནས་བསླབ་བྱ་དགུ་ལ་བསླབ་དགོས་སོ། །སངས་རྒྱས་ལ་སྐྱབས་སུ་སོང་ནས་ཕྱི་རོལ་པའི་ལྷ་ལ་ཕྱག་མི་འཚལ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེའི་བསམ་པ་དྲག་པོ་སྤང་། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་མི་བསྟེན་པ་དང་གསུམ་ནི། ཁྱད་པར་གྱི་བསླབ་བྱ་དང་། སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་དོད་ཙམ་ཡན་ཆད་ལ་གུས་པ་དང་། ཆོས་ལ་སྐྱབས་སུ་སོང་ནས་ཡི་གེ་འབྲུ་གཅིག་ཡན་
ལ་གུས་པར་བྱ། དགེ་འདུན་ལ་སྐྱབས་སུ་སོང་ནས་ལྷན་པ་སེར་པོ་གྲུ་བཞི་བཏབ་པ་ཡན་ལ་གུས་པར་བྱ། དེ་གསུམ་ཆ་མཐུན་གྱི་བསླབ་བྱ་གསུམ་མོ། །རྒྱུན་དུ་སྐྱབས་འགྲོ་ལ་བརྩོན་པ་དང་། ཅི་ཟ་ཅི་འཐུང་གི་ཕུད་ཀྱིས་དཀོན་མཆོག་མཆོད་པ། ན་ཚ་སྡུག་བསྔལ་ཅི་དང་ཅི་བྱུང་ཡང་དཀོན་མཆོག་གསུམ་ལས་སྐྱབས་གཞན་མི་ཚོལ་བ་དང་དགུ་སྟེ། མདོ་མྱ་ངན་འདས་ཆེན་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་སོང་ནས། །འཚེ་ཞིང་གནོད་པའི་སེམས་དང་བྲལ། །དགེ་འདུན་དག་ལ་སྐྱབས་སོང་བ། །མུ་སྟེགས་ཅན་ལ་ཕྱག་མི་བྱ། །ཞེས་གསུངས་སོ། །སྐྱབས་གསུམ་བདུན་ཅུ་པ་ལས། གང་ཞིག་གསུམ་ལ་སྐྱབས་འགྲོ་བས། །དགེ་བསྙེན་དུ་ནི་དམ་བཅས་པས། །སྐྱབས་ནི་གསུམ་པོ་བསྲུང་བར་བྱ། །མུ་ཧྥསྟེགས་ཅན་ལ་གུས་པ་ཡི། །མཆོད་དང་ཕྱག་འཚལ་མི་བྱའོ། །མདོ་རྩ་བ་ལས། ལྷ་གཞན་ལ་ཕྱག་མི་འཚལ། མཆོད་པ་མི་བྱ། བཀུར་སྟི་མི་བྱའོ། །གནས་སུ་ཕྱིན་ནས་
མངོན་སུམ་དུ་འགྲེང་སྟེ་གཙུག་ལག་གི་ཚིགས་སུ་བཅད་པ་གདོན་པས་དེ་ལ་ཕན་གདག་པར་བྱའོ། །ལྷའི་དབང་པོས་ཞུས་པའི་མདོ་ལས། ཁེ་ཕྱིར་ཚོང་དང་གྲགས་ཕྱིར་བསླུས། །དེ་ཡི་གཅོད་སྦྱོང་བྱེད་པ་རྣམས། །མནར་མེད་ལ་སོགས་དམྱལ་བ་ནི། །སྐྱེས་བུས་མདའ་འཕང་བཞིན་དུ་འགྲོ། །ཞེས་དང་། སྐྱབས་འགྲོ་ཡན་ལག་དྲུག་པར། སྐུ་གཟུགས་ཚིགས་སུ་བཅད་པ་དང་། །ལྷན་པ་སེར་པོ་བཏབ་པ་ལ། །དད་མོས་འདུན་པས་སྟོན་པར་ལྟ། །ཞལ་ནས་གསུངས་པ་མཐའ་དག་ལ། །སྐུར་པ་མི་གདབ་སྤྱི་བོར་བླངས། །གང་ཟག་དག་དང་མ་དག་ལ། །དམ་པར་བལྟ་བར་བྱ་བ་ཡིན། །ཅེས་དང་། མདོ་ལས། ཚལ་བུ་ཙམ་ཞིག་འཛིན་པ་ལ། །སྟོན་པའི་འདུ་ཤེས་མི་བསྐྱེད་བར། །སྡང་ཞིང་མཚང་རྣམས་འབྲུ་བ་ནི། །ང་ཡི་འཁོར་དུ་མ་གཏོགས་སོ། །ཞེས་དང་། བཤེས་སྤྲིངས་ལས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། བགྱིས་པ་ཅི་འདྲའང་རུང་སྟེ་མཁས་པས་མཆོད། །ཅེས་དང་། ཆེད་དུ་བརྗོད་པའི་ཚོམས་ལས། ཐུབ་པའི་ངུར་སྨིག་བརྒྱན་པ་ནི། །ཚངས་དང་བརྒྱ་བྱིན་ལ་སོགས་པ། །
འཇིག་རྟེན་ཆེན་པོ་རྣམས་ཀྱིས་ཀྱང་། །སྤྱི་བོའི་ཅོད་པན་རྩེར་བླངས་ཏེ། །མཆོད་པའི་གནས་སུ་བཞག་པ་ཡིན། །ཅེས་དང་། སྔོན་གླང་པོ་ཆེའི་རྒྱལ་པོས། རྔོན་པ་ངུར་སྨྲིག་གྱོན་པ་ལ། ཆོས་གོས་ངུར་སྨིག་གྱོན་པ་འདི་དག་ནི། །འཁོར་བའི་རྒྱ་མཚོ་ལས་ནི་སྒྲོལ་མཛད་པའོ། །ཞེས་གུས་པས་གནོད་པ་སྐྱོབ། སྟོན་པས་ཀྱང་། མེ་ཏོག་ཙམ་པ་ཀ་ནི་རྙིང་གྱུར་ཀྱང་། །མེ་ཏོག་ཕལ་པ་རྣམས་ཀྱི་དོ་ཟླ་མིན། །ང་ཡི་དགེ་སློང་ཚུལ་ཁྲིམས་འཆལ་གྱུར་ཀྱང་། །སྐྱེ་བོ་ཕལ་པ་རྣམས་ཀྱི་དོ་ཟླ་མིན། །གསུངས་སོ། །སའི་སྙིང་པོའི་མདོ་ལས། སྔོན་རྒྱལ་པོའི་ཁྲིམས་ལ་ཐུག་པའི་མི་ཞིག་དུར་ཁྲོད་དུ་བོར་བའི་མགུལ་དུ། ཆོས་གོས་ཀྱི་ཚལ་པ་ཅིག་རྙེད་པ་བཏགས་པ་སྲིན་པོས་མཐོང་ནས་ཁྱོད་ཀྱི་མགུལ་དུ་བཏགས་པའི་ཚལ་བུ་འདི། དྲང་སྲོང་ཆེན་པོའི་རྒྱལ་མཚན་ན་བཟའ་ལགས། དེ་ལ་མཆོད་ཅིང་བདག་ཅག་ཕྱག་འཚལ་ལོ། །ཞེས་གསུངས་སོ། ཕྱོགས། ཚོམ་ལས། གང་ཞིག་ཉིན་དང་མཚན་རྣམས་སུ། །སངས་རྒྱས་རྗེས་སུ་དྲན་བྱེད་ཅིང་། །གང་དག་སངས་རྒྱས་སྐྱབས་སོང་བ། །དེ་དག་མི་ཡི་རྙེད་པ་ཡིན། །ཆོས་དང་དགེ་
འདུན་ལ་ཡང་སྦྱོར། །ཅེས་དང་། སྙིང་རྗེ་པདྨ་དཀར་པོ་ལས། ཀུན་དགའ་བོ་གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་གཏོར་ན། །ཀུན་དགའ་བོ་དགེ་བའི་རྩ་བ་དེས་འབྲས་བུ་མྱ་ངན་ལས་འདས་པ་ཐོབ་སྟེ་ཐ་མ་མྱ་ངན་ལས་འདའ་བར་ངས་སྨྲའོ། །དེ་ལྟར་སྐྱབས་སུ་སོང་ཞིང་སྐྱབས་འགྲོའི་སྡོམ་པ་བསྲུང་བའི་ཕན་ཡོན་ནི། སྐྱབས་འགྲོའི་ཕན་ཡོན་བཀའ་བསྟན་བཅོས་ནས་མང་དུ་གསུངས་པ་རྣམས། ཇོ་བོ་རྗེས་བརྒྱད་དུ་བསྡུས་པ་ནི། ནང་པ་སངས་རྒྱས་པར་ཚུད་པའི་ཕན་ཡོན་ནི། སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང་། མི་དང་མི་མ་ཡིན་པའི་གནོད་པས་མི་ཚུགས་པ་དང་། སྡིག་པ་དང་སྒྲིབ་པ་ཐམས་ཅད་བྱང་ཞིང་སྲབ་པར་འགྱུར་བ་དང་། རྒྱུད་ལས། བསོད་ནམས་ཀྱི་ཚོགས་རྒྱ་ཆེན་པོ་བསགས་ཤིང་འཕེལ་བར་འགྱུར་བ་དང་། ཤི་ནས་ངན་སོང་ངན་འགྲོ་ལོག་པར་མི་ལྟུང་བ་དང་། ལམ་ཁྱད་པར་དུ་འཕགས་པ་རྒྱུད་ལ་སྐྱེ་བ་དང་། མཐར་བླ་ན་མེད་པའི་བྱང་ཆུབ་ཐོབ་པའི་ཕན་ཡོན་དང་བརྒྱད་དོ། །ཞེས་དང་། མདོ་ཉི་མའི་སྙིང་པོ་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ།།
བདུད་རྣམས་བྱེ་བས་བསད་པར་མི་ནུས་ཏེ། །ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཡང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་དང་། །དཔའ་བོ་ཕར་ཕྱིན་བསྡུས་པར། སྐྱབས་སོང་བསོད་ནམས་གཟུགས་མཆིས་ན། །སྟོང་གསུམ་འདི་ཡང་སྣོད་དུ་ཆུང་། །རྒྱ་མཚོ་ཆེན་པོ་ཆུ་ཡི་གཏེར། །ཕུལ་ལ་གཞལ་ཡང་ལང་མི་འགྱུར། །ཞེས་གསུངས་སོ། །ཕག་མོའི་རྟོགས་བརྗོད་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ངན་འགྲོར་མི་འགྲོ་སྟེ། །ལྷ་ཡི་ལུས་ནི་སྤངས་ནས་ཀྱང་། །ལྷ་ཡི་ལུས་སུ་སྐྱེ་བར་འགྱུར། །ཆོས་དང་དགེ་འདུན་ལ་ཡང་སྦྱར་ནས་གསུངས། །ཞེས་དང་། མདོ་ལས། རྩྭ་སྐམ་ཕུང་པོ་རི་རབ་ཙམ། །མེ་སྟག་ཆུང་ངུས་བསྲེགས་པ་ལྟར། །དཀོན་མཆོག་གསུམ་ལ་སྐྱབས་སོང་ན། །སྡིག་པ་རི་རབ་ཙམ་ཡང་འབྱངས། །ཞེས་དང་། སྡུད་པ་ལས། གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །སངས་རྒྱས་ཆོས་དང་དགེ་འདུན་སྐྱབས་སོང་སྟེ། །སངས་རྒྱས་སྒྲུབ་པར་བྱ་སྙམ་ཀུན་མཁྱེན་ཡིད་བྱེད་ན། །མཁས་པས་ཚུལ་ཁྲིམས་ཕ་རོལ་ཕྱིན་གནས་རིག་པར་
བྱ། །ཞེས་དང་། མདོ་ལས། ཇི་ལྟར་ནམ་མཁའ་མཐར་ཐུག་མེད་པ་ལ། །འདོམ་ལ་གཞལ་བ་ཚད་བཟུང་མེད་པ་ལྟར། །དེ་བཞིན་དཀོན་མཆོག་གསུམ་ལ་བརྟེན་པ་ཡི། །ཡོན་ཏན་དང་ནི་སྡིག་པའི་མཐའ་མི་དཔོག །ཅེས་གསུངས་སོ། །དེ་ལྟར་དཀོན་མཆོག་གསུམ་གྱི་སྐྱོབ་པ་ལ། དད་པ་དགོས་ཏེ། ཆོས་བཅུ་པའི་མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་སོ། །སངས་རྒྱས་ཕལ་པོ་ཆེ་ལས་ཀྱང་། སྲིད་པའི་གནས་ཅན་དད་པ་ཆུང་བ་ཡིས། །སངས་རྒྱས་བྱང་ཆུབ་ཤེས་པར་མི་ནུས་སོ། །ཞེས་གསུངས་སོ། །དེས་ནི་དད་པ་བསྐྱེད་པར་བྱ་སྟེ། འཕགས་པ་རྒྱ་ཆེ་རོལ་པ་ལས་ཀྱང་། ཀུན་དགའ་བོ་དད་པ་ལ་སྦྱོར་བར་གྱིས་ཤིག །འདི་ནི་དེ་བཞིན་གཤེགས་པས་གསོལ་བ་འདེབས་པའོ། །ཞེས་གསུངས་སོ། །དད་པ་ལ་གསུམ་སྟེ། །སངས་རྒྱས་ལ་འདོད་པའི་དད་པ། ཆོས་ལ་ཡིད་ཆེས་པའི་དད་པ། དགེ་འདུན་ལ་དྭངས་བའི་དད་པ་སྟེ། ཆོས་མངོན་པ་མཛོད་ལས་ཀྱང། དད་པ་གང་ཞེ་ན། ལས་དང་
འབྲས་བུ་དང་བདེན་པ་དང་། དཀོན་མཆོག་ལ་མངོན་པར་ཡིད་ཆེས་པ་དང་། འདོད་པ་དང་སེམས་དྭངས་བའོ། །གསུངས་སོ། །དེ་ལྟར་དཀོན་མཆོག་གསུམ་ལ་དད་པ་མེད་ན། ཚེ་འདིར་ཡང་ཤི་བའི་རོ་དང་འདྲ། ཕྱི་མ་ཡང་ངན་སོང་ནས་ཐར་བའི་ཐབས་མེད་དེ། འཕགས་པ་ཡུལ་འཁོར་སྲུང་གི་མདོ་ལས། སངས་རྒྱས་ལ་ཡང་མོས་པ་ཡོད་མིན་པ། །ཆོས་དང་ཚོགས་ལའང་དེ་ནི་མོས་པ་མེད། །བསླབ་དང་སྦྱང་བ་དག་ལའང་དེ་མི་མོས། །སྡིག་པའི་བློ་ཅན་ངན་སོང་གསུམ་ཕྱོགས་པ། །དེ་ནི་མི་ནང་འདི་ནས་ཤི་འཕོས་ནས། །ལས་ཀྱི་དབང་གིས་མི་མཁས་རྣམ་པར་རྨོངས། །དམྱལ་བའམ་འོན་ཏེ་དུད་འགྲོའི་འགྲོ་རྣམས་སམ། །ཡི་དྭགས་འགྲོ་བ་རྣམས་སུ་སྡུག་བསྔལ་རྙེད། །ཅེས་དང་། དྲན་ཉེར་དུ། སངས་རྒྱས་དང་ནི་བྲལ་བ་ཡི། །གསོན་པ་གསོན་པ་མིན་པར་འདོད། །ཆོས་དང་རྣམ་པར་བྲལ་བ་ཡི། །གསོན་པ་གསོན་པ་མིན་པར་འདོད། །དགེ་འདུན་རྣམ་པར་སྤྱང་པ་ཡི། །གསོན་པ་གསོན་པ་མིན་པར་འདོད། །ཅེས་གསུངས་སོ། །དེས་ན་དཀོན་མཆོག་གསུམ་སྤངས་ན་རྒྱལ་སྲིད་ལ་སོགས་པའི་བརྔན་
པ་ཆེན་པོ་སྟེར་ཟེར་ཡང་མི་སྤང་། སྔར་ཡང་གནོད་པ་ཆེན་པོ་བྱས། ད་ཡང་བྱེད་པས་དགྲ་ཞིག་བསད་ན་ཐུབ་པར་འདུག་ཀྱང་སྡོམ་པ་ཤོར་ན་ཆོས་དང་འགལ་བས་མི་གསོད།། རྒྱལ་པོ་དབང་ཆེན་ཞིག་གིས་དཀོན་མཆོག་གསུམ་མི་སྤངས་ན་བརྔན་གསོད་བྱེད་ཟེར་ཡང་མི་སྤང་། པཎྜི་ཏ་མཁས་པ་ཆེན་པོ་ཞིག་གིས། དཀོན་མཆོག་གསུམ་དང་ཆོས་མི་བདེན་པའི་ལོ་རྒྱུས་མང་པོ་བཤད་ཀྱང་ཞེ་མི་འཁྲུགས་ན་དད་པ་ཅན་ཡིན་ཏེ། རིན་ཆེན་ཕྲེང་བ་ལས། འདུན་དང་ཞེ་སྡང་འཇིགས་པ་དང་། །རྨོངས་པ་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ངེས་པར་ལེགས་པའི་སྣོད་མཆོག་ཡིན། །ཞེས་གསུངས་སོ། །ཨོ་རྒྱན་རིན་པོ་ཆེའི་ཞལ་ནས། ཡིད་ཁྱེད་ཤེས་ཀྱི་བློ་མ་བཀལ་ན། །དཀོན་མཆོག་གསུམ་གྱི་བྱིན་རླབས་རྒྱང་རིང་། །ཡིད་ཁྱེད་ཤེས་ཀྱི་དད་པ་བརྟན་པར་གྱིས། བློ་དཀོན་མཆོག་གསུམ་ལ་གཏོད། ཅེས་གསུངས་སོ། །རོང་སྟོན་ཆེན་པོ་ཤེས་བྱ་ཀུན་རིག་གི་ཞལ་ནས། ཆོས་ལ་འཇུག་པ་ལ་དད་པ་གལ་ཆེ་སྟེ། ཐར་པའི་རྟེན་དུ་དད་པ་དགོས། ཡོན་ཏན་གྱི་གཞི་ཡང་དད་པས་བྱེད། བརྩོན་འགྲུས་ཀྱི་གྲོགས་ཀྱང་དད་པས་
བྱེད། ཤེས་རབ་ཀྱི་མཛོད་ཀྱང་དད་པས་བྱེད། མན་ངག་གི་སྣོད་ཀྱང་དད་པས་བྱེད། དད་པ་མེད་ན་དཀར་པོའི་ཕྱོགས་ཀྱི་ཡོན་ཏན་གང་ཡང་མི་འཆར། །ཆོས་དང་འཕྲད་ནས་དད་པ་མེད་ན། གཟུགས་ཆོས་པར་འདུག་པས་མི་ཕན། ཞིང་མེད་པའི་སོ་ནམ་དང་འདྲ། གྲུ་མེད་པའི་འགྲུལ་པོ་དང་འདྲ། ས་བོན་ཚིག་པའི་མྱུ་གུ་དང་འདྲ། ལག་སྡུམ་གསེར་གླིང་དུ་ཕྱིན་པ་དང་འདྲ། སྲོག་མ་ཆད་པའི་རོ་ཡིན། འདྲེས་མ་ཁྱེར་པའི་སྨོན་པ་ཡིན། སུག་བཞི་ས་ལ་མི་འཛུགས་པའི་བྱོལ་སོང་ཡིན། མིག་ཅེ་རེ་ལྟ་བའི་ལོང་བ་ཡིན། རྣ་བ་ཀྲོང་ངེ་ཉན་པའི་འོན་པ་ཡིན། སྐྱེས་པ་དད་པ་མེད་ན་གླང་ལ་རལ་པ་སྐྱེས་པ་ཡིན། བུད་མེད་དད་པ་མེད་ན་བ་ལ་ནོར་དུ་བཏགས་པ་ཡིན། གཞོན་པ་དད་པ་མེད་ན་དུག་གི་མེ་ཏོག་ཡིན། རྒན་པ་དད་པ་མེད་ན་མུན་གྱི་ས་མཁན་ཡིན། སྤྱིར་དད་པ་འདི་རྒྱུ་ཚོགས་བསགས་པ་ལས་འབྱུང་བས་ཀུན་ལ་སྐྱེ་བར་དཀའ། རྐྱེན་གྱིས་ཡུམ་བསྐུལ་བའི་དད་པ་འདི། གང་ཟག་སྐལ་ལྡན་འགའི་སྤྱོད་ཡུལ་ཡིན། ཞེས་གསུངས་སོ། །དེ་ལ་ཐེག་པ་ཐུན་མོང་གི་སྐྱབས་སྡོམ་ནི། ཁྲིད་འདི་དང་འབྲེལ་ཆུང་བས་མ་ཐོབ་
ཀྱང་རུང་ལ། ཞུ་བར་འདོད་པ་ལ་གུད་དུ་གསལ་བ་ལྟར་བྱ། ཐེག་ཆེན་སྐྱབས་སྡོམ་ནི། དབང་དང་སེམས་བསྐྱེད་ཀྱི་ཞོར་ལ་ཐོབ་པས་ཆོག་ལ། རྒྱས་པར་བྱེད་ན་དཀོན་མཆོག་གི་རྟེན་དང་། མཆོད་པ་བཤམས་པ་དང་། སྦྱོར་དངོས་རྗེས་གསུམ་ཞག་གསུམ་དགོས་པས། སྤྲོ་ན་གུད་དུ་གསལ་བ་ལྟར་ཡིན། སྐྱབས་འགྲོའི་འདོན་ཆ་ཡང་རྒྱས་བསྡུས་འབྲིང་གསུམ་སྣ་ཚོགས་པ་ཡོད་དེ། བློ་ལ་ཡོད་ཅིང་སྤྲོས་པ་ལ་དགའ་ན། རང་གིས་གང་ཤེས་དེ་ལྟར་འདོན་ན་ཆོག །སྤྲོས་པ་ལ་མི་དགའ་བ་བློ་ལ་མེད་ན། གསར་དུ་སློབ་པ་སོགས་མི་བྱ་སྟེ། ད་ལམ་འདི་ལ་སློབ་གཉེར་བྱེད་དུ་འོང་བ་མིན། དམིགས་ཐུན་ཞུ་བ་ལ་འོང་བ་ཡིན་པས། ཟིན་ཐུན་བཟུང་ཞིང་བསྡད་པས་དམིགས་པ་མི་ཟིན། ད་རེས་དམིགས་པ་བསྒོམ་པ་གལ་ཆེ། སྐྱབས་ཡུལ་དམིགས་པ་སྒོམ་པ་འདི་ལ། ཡང་རིགས་མི་གཅིག་པ་མང་དུ་ཡོད་དེ། །ད་རེས་ཆོས་འདི་དང་འབྲེལ་ཆེ་བས། གྲུབ་ཆེན་མི་ཏྲ་ཛཱ་ཀིའི་ལུགས་ལྟར་བསྒོམ་པར་བྱ་སྟེ། དེ་ཡང་སྐྱབས་ཡུལ་འདི་ལ་ཡེ་ཤེས་པ་སྤྱན་འདྲེན་མི་དགོས་པའི་དོན་ནི། ནམ་མཁས་གར་ཁྱབ་སངས་རྒྱས་ཀྱི་སྐུ་གསུང་ཐུགས་ཀྱིས་ཁྱབ་
པའི་ཕྱིར། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །གསུངས་སོ། །དམིགས་པ་དངོས་ནི། མདུན་གྱི་ནམ་མཁར་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ་གྱད་དང་སེང་གེས་བཏེག་པ་སྣ་ཚོགས་པདྨ་འབུམ་ལྡན་གྱི་སྟེང་ན་ཟླ་བའི་དཀྱིལ་འཁོར་ཡོངས་སུ་རྒྱས་པ། དེ་ཡི་དབུས་སུ་རང་གི་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་པའི་སྐུའི་ཆ་ལུགས་སུ་བཞུགས་པ་ལ་བཀའ་བརྒྱུད་བླ་མས་བསྐོར་བ། །མདུན་དུ་ཡི་དམ་ཐུགས་རྗེ་ཆེན་པོ་ལ་ཡི་དམ་རྒྱ་མཚོས་བསྐོར་བ། གཡས་སུ་སངས་རྒྱས་ཤཱཀྱ་ཐུབ་པ་ལ་སྐལ་བཟང་གི་སངས་རྒྱས་སྟོང་ལ་སོགས་པ་སངས་རྒྱས་རྒྱ་མཚོས་བསྐོར་བ། རྒྱབ་ཏུ་ཡུམ་ཆེན་མོ་ལ་པོ་ཏི་དང་གླེགས་བམ་དམ་ཆོས་རྒྱ་མཚོས་བསྐོར་བ། གཡོན་དུ་ཕྱག་ན་རྡོ་རྗེ་ལ་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་ཉན་ཐོས་མཆོག་བརྒྱད་ལ་ཐེག་ཆེན་དང་ཐེག་དམན་གྱི་དགེ་འདུན་རྒྱ་མཚོས་བསྐོར་བ་ཕྱོགས་དང་ཕྱོགས་ཕྱོགས་མཚམས་ཐམས་ཅད་དཔའ་བོ་མཁའ་འགྲོས་གང་བ། འོག་ཏུ་ཕྱག་བཞི་དྲུག་བེར་གུར་དང་། ལྷ་མོ་དཔོན་གཡོག་དང་བྲག་ལྷ་མགོན་པོ་ལ་སོགས་པ་ཆོས་སྐྱོང་བའི་སྲུང་མ་རྒྱ་
མཚོས་བསྐོར་བ། སྲུང་སྐྱོབ་ཀྱི་ཚུལ་དུ་བཞུགས་པ། དེ་དག་གི་སྐྱབས་ཞབས་ན་བདག་དང་མཐའ་ཡས་པའི་སེམས་ཅན་ཐམས་ཅད་ཚུད་པར་བསྒོམ་ལ། ཕྱག་ཆེན་ལུགས་ལྟར་ན། མ་ནམ་བཞི་སྐོར་གྱི་ཚིག་སྐྱབས་འགྲོ་ལ་བསྒྱུར་ནས། སྟོང་ཕྱག་གམ་བརྒྱ་ཕྱག་ཅི་འགྲུབ་འཚལ་ན་བར་ཆད་ཞི་བ་དང་། སྒྲིབ་པ་དག་པ་དང་། ཉམས་རྟོགས་སྐྱེ་སླ་བའི་གནད་ཡོད། ཡང་དམིགས་པ་རྒྱས་པ་དེ་ཙམ་ཟིན་དཀའ་ན། མདུན་གྱི་ནམ་མཁར་རིན་པོ་ཆེའི་ཁྲི་པདྨ་དང་ཟླ་བའི་གདན་ལ་རྩ་བའི་བླ་མ་དང་དབྱེར་མེད་པའི་སངས་རྒྱས་འོད་དཔག་མེད་སྐུ་མདོག་དམར་པོ་ཆོས་གོས་རྣམ་གསུམ་གསོལ་བ། རྡོ་རྗེའི་སྐྱིལ་ཀྲུང་གིས་བཞུགས་ཤིང་མཉམ་བཞག་གི་ཕྱག་རྒྱས་ལྷུང་བཟེད་འཛིན་པ། ཞལ་འཛུམ་པ་མཛོད་སྤུ་དཀར་པོ་ཅན། སྤྱན་ཞི་བས་བདག་ལ་གཟིགས་པར་བསྒོམ། དེ་ཡང་སྐུ་དགེ་འདུན་ཀུན་འདུས། གསུང་དམ་ཆོས་ཀུན་འདུས། ཐུགས་སངས་རྒྱས་ཀུན་འདུས།། ཡོན་ཏན་ཡི་དམ་ཀུན་འདུས། ཕྲིན་ལས་ཆོས་སྐྱོང་ཀུན་འདུས་སུ་བསྒོམས་ལ། ཚེ་འདི་ཕྱི་བར་གསུམ་ལ་ཅི་མཛད་ཁྱེད་ཤེས་ཀྱི་བློ་ལིངས་ཀྱིས་གཏད་ལ། བླ་མ་དཀོན་མཆོག་གསུམ་ལ་
སྐྱབས་སུ་མཆི། ཞེས་པ་དེ་ཚར་བརྒྱ་ཙམ་འདོན། དེ་ནས་སྐྱབས་ཡུལ་རྒྱས་བསྡུས་གང་སྒོམ་པ་དེ་འོད་དུ་ཞུ་ནས་རང་ལ་ཐིམ་པས། རང་གི་ལུས་ངག་ཡིད་གསུམ་དང་སྐྱབས་ཡུལ་གྱི་སྐུ་གསུང་ཐུགས་དབྱེར་མེད་དུ་འདྲེས་པར་བསྒོམ། དེ་ལྟར་སྒོམ་མཁན་གྱི་སེམས་ལ་བལྟས་པས། ངོ་བོ་སྟོང་ཞིང་རང་བཞིན་གསལ་བ། ཐུགས་རྗེ་འགགས་མེད་ཅི་ཡང་འཆར་བ། དེ་ནི་དོན་དམ་པའི་སྐྱབས་འགྲོ་ཡིན་ཏེ། མ་གཅིག་ལབ་སྒྲོན་གྱིས། རང་སེམས་སྟོང་པ་ཆོས་ཀྱི་སྐུ་ལ་སྐྱབས་སུ་མཆིའོ། །ཞེས་དང་། ཨོ་རྒྱན་རིན་པོ་ཆེས། ཡེ་ནས་སྟོང་ཉིད་སྤྲོས་དང་བྲལ་བ་ལ། །སྤྲོས་མེད་སྤྲོས་བྲལ་འདུས་མ་བྱས་པའི་ངང་། །འཛིན་མེད་བློ་འདས་ངང་དུ་སྐྱབས་སུ་མཆི། །ངོ་བོ་རང་བཞིན་ཐུགས་རྗེ་ཀ་ནས་དག །མཉམ་རྫོགས་ཀློང་ཡངས་ཆེན་པོའི་རང་བཞིན་ལ། །རྟོགས་མེད་རང་གསལ་རྗེན་པར་སྐྱབས་སུ་མཆི། །ཞེས་དང་། ཐར་རྒྱན་ལས། ཆོས་ཐམས་ཅད་གདོད་མ་ནས་བདག་མེད་ཅིང་། ཅིའི་ངོ་བོར་ཡང་མ་གྲུབ་པས། སངས་རྒྱས་དང་ཆོས་དང་། དགེ་འདུན་ཡང་དེ་བཞིན་དུ་མཐོང་བར་བྱ་སྟེ། དེ་ནི་མི་ཟད་པའི་སྐྱབས།
རྟག་པའི་སྐྱབས། གཡུང་དྲུང་གི་སྐྱབས་ཡིན་ནོ། །ཞེས་གསུངས་སོ། མ་དྲོས་པས་ཞུས་པའི་མདོ་ལས་ཀྱང་། ཟང་ཟིང་མེད་པའི་སེམས་ཀྱིས་སྐྱབས་སུ་སོང་བ་གང་ཞེ་ན། །ཆོས་ཐམས་ཅད་མེད་པར་ཤེས་ནས། གཟུགས་སུ་མ་ཡིན།། མཚན་དུ་མ་ཡིན། ཆོས་སུ་མ་ཡིན། སངས་རྒྱས་ཡང་དག་པར་མཐོང་བ་ནི། སངས་རྒྱས་ལ་སྐྱབས་སུ་སོང་བའོ། །ཆོས་ཐམས་ཅད་དབྱིངས་ཀྱི་རྗེས་སུ་མཐོང་བ་ནི། ཆོས་ལ་སྐྱབས་སུ་སོང་བའོ། །འདུས་བྱས་དང་འདུས་མ་བྱས་གཉིས་སུ་མེད་པར་མཐོང་བ་ནི། དགེ་འདུན་ལ་སྐྱབས་སུ་སོང་བའོ། །ཞེས་གསུངས་སོ། །རྒྱུད་སྡེ་རྣམས་ལས་ཀྱང་། རང་སེམས་སྐྱབས་ཀྱི་མཆོག་ཏུ་གསུངས་པའི་ཕྱིར། ཁྱེད་ཁྲིད་ཐོབ་པ་རྣམས་ཀྱིས་དེ་ལྟར་ཉམས་སུ་ལོངས། གསར་པ་རྣམས་ཀྱིས་ཀྱང་། སྐྱབས་ཡུལ་བསྒོམ་ནས་སྐྱབས་འགྲོ་བརྒྱ་རྩ་དང་། སྐྱབས་ཡུལ་རང་ལ་བསྟིམ་ནས་སེམས་ལ་ལྟ་བ་དེ་ལན་མང་དུ་གྱིས་དང་དེས་འཐུས་སོ། །སྐྱབས་འགྲོའི་ཆོས་ཐུན་ཚར་རོ།། །། ༈ ནང་ཆེན་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །