ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་བདུན་པ་སེམས་བསྐྱེད་ཀྱི་ཁྲིད།
༼ཇ༽ ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་བདུན་པ་སེམས་བསྐྱེད་ཀྱི་ཁྲིད་བཞུགས་སོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་གདམས་ངག་ཟབ་མོ། ཅི་བྱས་བྱང་ཆུབ་ཀྱི་ལམ་དུ་འགྲོ་བའི་ཐབས། བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པར་བྱ་སྟེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། མཁའ་ཁྱབ་འགྲོ་བ་ཀུན་དོན་དུ། །བྱང་ཆུབ་མཆོག་ཏུ་སེམས་བསྐྱེད་ཅིང་། །ཕ་རོལ་ཕྱིན་དྲུག་བསླབ་བྱ་ལ། །རྒྱལ་བའི་སྲས་ཀྱིས་རྟག་ཏུ་བསླབ། །ཅེས་གསུངས་སོ། །རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་ནི་གང་ལགས། རྩ་བ་ནི་གང་ལགས།
མཐར་ཐུག་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གང་ཁྱོད་ང་ལ་དོན་འདྲི་བ་ལེགས་སོ། །དེའི་ཕྱིར་ལེགས་པར་ཉོན་ལ་ཡིད་ལ་ཟུངས་ཤིག ངས་ཁྱོད་ལ་བཤད་དོ། །རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོའོ། །མཐར་ཐུག་པ་ནི་ཐབས་སོ། །ཞེས་གསུངས་པ་དང་། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་དང་ལྡན་ན། སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་
ཡོངས་སུ་འཛིན་ཏོ། །ཆོས་གཅིག་པུ་གང་ཞེ་ན། འདི་ལྟ་སྟེ། བསམ་པ་ཕུན་སུམ་ཚོགས་པ་བྱང་ཆུབ་ཀྱི་སེམས་སོ། །ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་པུ་དེ་དང་ལྡན་ན། སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་ཡོངས་སུ་འཛིན་ཏོ། །གསོལ་པ། བཅོམ་ལྡན་འོད་ས་བསམ་པ་ཇི་ལྟ་བུ། བྱང་ཆུབ་ཀྱི་སེམས་ཇི་ལྟ་བུ། བཀའ་སྩལ་པ། ཤཱ་རིའི་བུ་བསམ་པ་ཞེས་བྱ་བ་ནི་མི་ཕྱེད་པའི་ཕྱིར་སྙིང་རྗེའོ། །མི་གཡོ་བའི་ཕྱིར་སྙིང་རྗེ་བརྟན་པའོ། །ཞེས་གསུངས་སོ། །འཕགས་པ་ཀླུ་སྒྲུབ་ཀྱིས། བདག་ཉིད་དང་ནི་འཇིག་རྟེན་འདིས། །བླ་མེད་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐའ་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཅེས་གསུངས་སོ། །ཕལ་པོ་ཆེ་ལས། གང་ཞིག་ཕྱོགས་བཅུའི་རྒྱལ་བ་ལྟ་བ་འདོད་པ་དང་། །གང་ཞིག་སྦྱིན་གཏོང་བསོད་ནམས་མི་ཟད་མཛོད་འདོད་དང་། །འགྲོ་བ་ཀུན་གྱི་སྡུག་བསྔལ་མི་བཟོད་རྟོགས་འདོད་ན། །དེས་ནི་ཡོན་ཏན་མཐའ་ཡས་བྱང་ཆུབ་སེམས་བསྐྱེད་བྱ། །ཞེས་
དང་། །བསླབ་བཏུས་ལས། སྡུག་བསྔལ་མཐར་ཕྱིན་འདོད་པ་དང་། །བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བསྟན་བྱས་ཏེ། །བྱང་ཆུབ་དང་ནི་བློ་བརྟན་བྱ། །ཞེས་དང་། །ངེས་པ་དང་མ་ངེས་པ་ཕྱག་རྒྱ་ལ་འཇུག་པའི་མདོར། འཇམ་དཔལ་གང་དང་གང་གིས་བྱང་ཆུབ་ཏུ་སེམས་བསྐྱེད་པ་དེའི་ཕྱིར། །སེམས་དེ་ལ་མི་དགེའི་ལས་རྣམས་ལ་མ་སྤངས་པ་ཅི་ཡང་མེད་ལ། དེ་ཡང་སངས་རྒྱས་ཀྱི་ཆོས་རྣམས་ལ་མ་བཟུང་བ་གང་ཡང་མེད་པའི་ཕྱིར། །འཇམ་དཔལ་བྱང་ཆུབ་སེམས་དཔའོ་རྣམས་ཀྱི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །ཞེས་དང་། །བསོད་ནམས་ཐམས་ཅད་བསྡུས་པའི་མདོ་ལས། སྲེད་མེད་ཀྱི་བུ་དཔེར་ན། ཆུ་ཀླུང་དང་ཆུ་མིག་དང་། ཆུ་བྲན་དང་། འབབ་ཆུ་ཐམས་ཅད་ནི་རྒྱ་མཚོ་ཆེན་པོའི་ཁོང་དུ་འདུ་ཞིང་རྗེས་སུ་ཞུགས་པར་རིག་པར་བྱའོ། །དེ་བཞིན་དུ་བསོད་ནམས་བྱ་བའི་དངོས་པོ་གང་ཅི་ཡང་རུང་བ། སྦྱིན་པ་ལས་བྱུང་བ་དང་། ཚུལ་ཁྲིམས་ལས་བྱུང་བ་དང་། སྒོམ་པ་ལས་བྱུང་བ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་དང་།
འཇིག་རྟེན་ལས་འདས་པའི་བསོད་ནམས་ཅི་སྙེད་པ་དེ་དག་ཐམས་ཅད་བྱང་ཆུབ་ཀྱི་སེམས་ཀྱི་རྗེས་སུ་འདུ་ཤིང་རྗེས་སུ་ཞུགས་པ་དག་གོ །སྲེད་མེད་ཀྱི་བུ་དེའི་ཕྱིར་བསོད་ནམས་ཐམས་ཅད་ཡོངས་སུ་བཟུང་བར་འདོད་པའི་རིགས་ཀྱི་བུའམ་རིགས་ཀྱི་བུ་མོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །ཞེས་དང་། །བྱམས་པས་ཞུས་པའི་མདོ་ལས། བྱང་ཆུབ་སེམས་དཔའ་ཆོས་གཅིག་དང་ལྡན་ན་ངན་སོང་ཐམས་ཅད་སྤངས་ཤིང་། སྡིག་པའི་གྲོགས་པོའི་ལག་ཏུ་མི་འགྲོ་ལ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ཆོས་གཅིག་པོ་དེ་གང་ཞེ་ན་འདི་ལྟ་སྟེ། ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ། །ཞེས་དང་། །བྱམས་པས་ནོར་བཟང་ལ་བྱང་ཆུབ་སེམས་ཀྱི་ཕན་ཡོན་གསུངས་པ་ནི། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །དཀར་པོའི་ཡོན་ཏན་ཐམས་ཅད་འཕེལ་བར་བྱེད་པའི་ཞིང་ས་ལྟ་བུའོ། །འཇིག་རྟེན་ཐོམས་ཅད་བརྟེན་པས་ས་ལྟ་བུའོ། །དབུལ་བ་ཐམས་ཅད་ཡོང་དག་པར་གཅོད་པས་
རྣམ་ཐོས་ཀྱི་བུ་ལྟ་བུའོ། །རེ་བ་ཐམས་ཅད་སྐོང་བས་དཔག་བསམ་གྱི་ཤིང་ལྟ་བུའོ། །དོན་ཐམས་ཅད་འགྲུབ་པས་ཡིད་བཞིན་གྱི་ནོར་བུ་ལྟ་བུའོ། །ཞེས་སྡོང་པོ་བཀོད་པ་ལས་བམ་པོ་གཉིས་བཞུགས་སོ།། །།སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་པའི་སྐལ་ལྡན་ལ། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །རྒྱལ་བ་རྣམས་ཀྱི་སྲས་ཞེས་རབ་བརྗོད་དེ། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །གསེར་འགྱུར་རྩི་ཡིས་རྣམ་པ་མཆོག་ལྟ་བུ། །མི་གཙང་ལུས་འདི་བོར་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བར་རབ་བརྟན་ཟུང་། །དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་སྦྱིན་ཅིང་མི་ཟད་འཕེལ་བར་འགྱུར། །སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་གྱུར་པ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །དེས་ནི་དུས་མཐའི་མེ་
བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །འགྲོ་བའི་འཆི་བདག་འཇོམས་མཛད་པའི། །བདུད་རྩི་མཆོག་ཀྱང་འདི་ཉིད་ཡིན། །འགྲོ་བའི་དབུལ་བ་སེལ་བྱེད་པའི། །མི་ཟད་གཏེར་ཡང་འདི་ཉིད་ཡིན། །འགྲོ་བའི་ཉོན་མོངས་གདུང་སེལ་བའི། །སེམས་ཀྱི་ཟླ་བ་ཤར་བ་ཡིན། །འགྲོ་བའི་མི་ཤེས་རབ་རིབ་དག །དཔྱིས་འབྱིན་ཉི་མ་ཆེན་པོ་ཡིན། །ཞེས་དང་། དེ་བཞིན་གཤེགས་པའི་གསང་བའི་མཛོད་ལས། བྱང་ཆུབ་སེམས་སྐྱེས་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། །སེམས་ཅན་ཀུན་གྱིས་བསོད་ནམས་ཀྱི། །ཕུང་པོ་ཇི་སྙེད་ཡོངས་བཟུང་བ། །དེ་སྙེད་བྱང་ཆུབ་སེམས་དཔའ་ཡིན། །བྱང་ཆུབ་སེམས་ལ་རབ་ཏུ་འབྱུང་། །ཞེས་དང་། བསླབ་བཏུས་སུ། འདི་ཉིད་དེ་བཞིན་གཤེགས་པ་མཉེས་བྱེད་ཡིན། །སེམས་ཅན་མགུ་བར་བྱེད་པའང་འདི་ཉིད་དེ། །རང་དོན་ཡང་དག་བསྒྲུབ་པོ་ཡང་འདི་ཉིད་དོ། །ཞེས་དང་། སྤྱོད་འཇུག་ལས། དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་
ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །རྒྱལ་སྲས་རྣམས་ལ་དོ་གལ་ཆེ་བ་སྟེ། །སྡིག་པ་མི་འབྱུང་དགེ་བ་ངང་གིས་འཕེལ། །དེ་ཚེ་བདག་གི་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །རྒྱལ་བའི་སྲས་སུ་ད་གྱུར་ཏོ། །འདི་ནི་བྱང་ཆུབ་སེམས་སྟོབས་ཀྱིས། །སྔོན་གྱི་བསོད་ནམས་ཀུན་གྱི་གཏེར། །དེ་ནི་རྒྱལ་སྲས་ཆགས་མེད་རབ་ཏུ་ཐོབ། །ཅེས་དང་། དཔལ་སྦྱིན་གྱིས་ཞུས་པའི་མདོ་ལས། གང་གཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་ཀུན་མི་གང་གིས། །རིན་ཆེན་བདུན་གྱིས་ཡོངས་བཀང་ཞིང་། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བྱས་ཏེ། །བྱང་ཆུབ་སེམས་ནི་བསྐྱེད་པ་ན། །མཆོད་པ་འདི་ནི་ཁྱད་འཕགས་ཏེ། །དེ་ལ་མཐའ་ནི་མ་མཆིས་སོ། །ཞེས་གསུངས་སོ། །དེ་ལྟར་ཐེག་པ་ཆེན་པོའི་ཆོས་ཐམས་ཅད་ཀྱི་རྩི་བ། བྱང་ཆུབ་སེམས་བསྐྱེད་འདིའི་དབྱེ་བ་དང་། ས་མཚམས་སོགས་བཤད་པ་རྒྱ་ཆེན་པོ་ནི། དབུ་མ་དང་ཕར་ཕྱིན་གྱི་ཊཱིཀ་ཆེན་པོ་རྣམས་ནས་གསལ་ཏེ། མཚན་ཉིད་
པ་རྣམས་ཀྱིས་སློབ་གཉེར་བྱེད་རྒྱུ་དེ་ཡིན། གོ་དཀའ་ཞིང་ཉམས་ཐོག་ཏུ་ལོན་པར་དཀའ་བས་འདིར་མ་བཤད། དེའི་སྡོམ་པ་ཞུ་བ་ལ་ཡང་། རྒྱ་ཆེན་སྤྱོད་བརྒྱུད་ལུགས་ནི། དགེ་བའི་བཤེས་གཉེན་གཅིག་མ་གཏོགས་མི་སྐྱེ། ཟབ་མོ་ལྟ་བརྒྱུད་ལུགས་ནི་སུ་ལ་ཡང་སྐྱེ། དེ་ཞུ་བར་འདོད་ན་གུད་དུ་གསལ་བ་ལྟར་ཡིན་ཏེ། དབང་གི་ཞོར་ལ་ཡང་ཐོབ་པས་དེས་ཆོག །བྱང་སྡོམ་གྱི་བསྲུང་བྱ་མང་དུ་ཡོད་ཀྱང་། ཐ་མལ་པ་རྣམས་ཀྱིས་ཤེས་དཀའ་ཞིང་བསྲུང་བར་མི་ནུས་པས། རང་གིས་དགེ་རྩ་ཆེ་ཕྲ་ཅི་བྱས་ཀྱང་སེམས་ཅན་ཐམས་ཅད་ཀྱི་དོན་དུ་འདི་བྱེད་བསམ་པའི་སེམས་བསྐྱེད་དང་། རྗེས་ནས་དགེ་བ་འདིས་སེམས་ཅན་ཐམས་ཅད་ཀྱི་དོན་དུ་བདག་སངས་རྒྱས་ཐོབ་པར་ཤོག་བསམ་པ་དེས་འཐུས་ཏེ། །མདོ་ལས། རྒྱལ་པོ་ཆེན་པོ་ཁྱོད་ནི་བྱ་བ་མང་པོ་བྱེད་པ་མང་བས་ཁྱོད་ཀྱིས་བྱང་ཆུབ་སེམས་དཔའི་བྱ་བ་མཐའ་དག་སྒྲུབ་པར་མི་ནུས་ཀྱིས། ཁྱོད་འགྲོའམ་འགྲེང་ངམ་འདུག་ཀྱང་རུང་སྟེ། བྱང་ཆུབ་ཀྱི་སེམས་ཡིད་ལ་བྱེད་པ་དང་མ་བྲལ་བར་གྱིས་ཤིག་དང་། ཁྱོད་ཀྱིས་བྱང་ཆུབ་སེམས་དཔའི་སྤྱོད་པ་ལེགས་པར་སྤྱད་པར་འགྱུར་རོ། །ཞེས་དང་། བྱང་
ཆུབ་ཏུ་སེམས་བསྐྱེད་ནས་ཉམས་སུ་ལེན་རྒྱུ་ཕ་རོལ་ཕྱིན་དྲུག་ཡིན་ཀྱང་། བསྒོམ་རྒྱུ་དམིགས་པ་ནི་བྱམས་སྙིང་རྗེ་གཙོ་བོ་ཡིན་པས། དེ་ལ་བྱམས་པ་བསྒོམ་པའི་ཕན་ཡོན་ནི། རྒྱ་ཆེར་རོལ་པ་ལས། བྱམས་སེམས་ལྡན་པ་དུག་དང་མཚོན་མི་ཚུགས། །རོ་ལངས་དང་ནི་འཇིགས་པ་གཞན་མི་འབྱུང་། །བྱམས་སེམས་ལྡན་པར་གཞན་གྱིས་གནོད་མི་འགྱུར། །དཔུང་བཅས་བདུད་རྣམས་རྒྱལ་ཆེན་སྡེ་བཅས་པའི། །ནག་པོའི་རྩ་ལག་བྱམས་པའི་སྟོབས་ཀྱིས་འཇོམས། །བླ་མེད་བྱང་ཆུབ་ཞི་བར་སངས་ཡང་རྒྱ། །ཞེས་དང་། ཐར་པ་ཆེན་པོ་ལས། གང་ཞིག་འཇིག་རྟེན་རྣམ་དག་ན། །བསྐལ་པ་གཅིག་གི་བར་དག་ཏུ། །ཚུལ་ཁྲིམས་དམ་པ་བསྲུངས་བ་བས། །སྐྱེས་བུ་དེ་ནི་སྐད་ཅིག་ཙམ། །དེ་བས་བྱམས་པ་བསྒོམ་པ་མཆོག །གང་ཞིག་འཇིག་རྟེན་ས་འདི་རུ། །ལུས་ངག་ཡིད་གསུམ་སྡིག་བསགས་པས། །ངན་སོང་གསུམ་དུ་སྐྱེ་ངེས་ཀྱང་། །བྱམས་པའི་སེམས་དེས་འཕྲལ་དུ་འབྱངས། །གསུངས་སོ། །དཔལ་སྦྱིན་གྱིས་ཞུས་པའི་མདོ་ལས། བྱེ་བ་ཁྲག་ཁྲིག་གཏམ་པའི་ཞིང་རྣམས་སུ། །མཆོད་པ་རྣམས་མང་དཔག་མེད་ཇི་སྙེད་
པས། །སྐྱེས་མཆོག་རྣམས་ལ་ཉིན་རེ་རྟག་མཆོད་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཅེས་གསུངས་སོ། །དཀོན་བརྩེགས་དང་རིན་ཆེན་ཕྲེང་བར། །རྗེའུ་ཚོད་སུམ་བརྒྱའི་ཁ་ཟས་དག །ཉིན་རེ་དུས་གསུམ་སྦྱིན་པས་ཀྱང་། །བྱམས་པ་ཡུད་ཙམ་ཐང་ཅིག་གི །བསོད་ནམས་དག་ལ་ཆར་མི་ཕོད། །ལྷ་མི་བྱམས་པར་འགྱུར་བ་དང་། །དེ་དག་ཀྱང་ནི་བསྲུང་བ་དང་། །ཡིད་དགེ་བ་དང་བདེ་མང་དང་། །དུག་དང་མཚོན་གྱི་གནོད་མེད་དང་། །འབད་པ་མེད་པར་དོན་ཐོབ་དང་། །ཚངས་པའི་འཇིག་རྟེན་སྐྱེ་འགྱུར་ཏེ། །གལ་ཏེ་གྲོལ་བར་མ་གྱུར་ཀྱང་། །བྱམས་ཆོས་ཡོན་ཏན་བརྒྱད་འཐོབ་བོ། །ཞེས་དང་། དེ་སྐད་དུ། ཉེས་པ་འདི་ཀུན་བྱམས་སོགས་ལ། །ལེགས་པར་གནས་ལ་མི་འབྱུང་སྟེ། །ཉོན་མོངས་ཅན་མིན་སེམས་ཅན་གྱི། །དོན་དུ་སྐྱེ་བ་ཡང་འཛིན་པར་བྱེད། །ཅེས་གསུངས་སོ། །འཇམ་དཔལ་ཞིང་བཀོད་ལས། བྱང་ཤར་གྱི་མཚམས་ནས་སངས་རྒྱས་དབང་ཕྱུག་ཆེན་པོའི་རྒྱལ་པོའི་འཇིག་རྟེན་གྱི་ཁམས་སྟོང་གིས་བརྒྱན་པ་ཞེས་བྱ་བ་དེ་ན། དགེ་སློང་འགོགས་པ་ལ་ཞུགས་པའི་བདེ་བ་བཞིན་དུ་སེམས་ཅན་
རྣམས་ཀྱང་བདེ་བ་དང་ལྡན་ནོ། །དེར་ལོ་བྱེ་བ་བརྒྱ་སྟོང་དུ་ཚངས་པར་སྤྱོད་པ་སྤྱད་པ་བས་ནི། ཞིང་འདིར་ཐ་ནའང་སེ་གོལ་གཏོགས་པའི་ཡུན་ཙམ་སེམས་ཅན་ཐམས་ཅད་ལ་བྱམས་པའི་སེམས་བསྐྱེད་ན། སྔ་མ་བས་བསོད་ནམས་ཆེས་མང་དུ་བསྐྱེད་ན་ཉིན་མཚན་དུ་གནས་པ་ལྟ་ཅི་སྨོས། ཞེས་དང་། དེ་བཞིན་དུ་བྱམས་སྙིང་རྗེ་བསྒོམས་པའི་ཕན་ཡོན་ཡང་། སྤྱན་རས་གཟིགས་ཀྱི་རྟོགས་པ་བརྗོད་པ་ལས་ཀྱང་། ཆོས་གཅིག་ཡོད་ན་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་བཞག་པ་ལྟ་བུར་འགྱུར་ཏེ། གཅིག་གང་ཞེ་ན། འདི་ལྟ་སྟེ། སྙིང་རྗེ་ཆེན་པོའོ། །ཞེས་གསུངས་སོ། །ཆོས་ཡང་དག་པར་སྡུད་པའི་མདོ་ལས་ཀྱང་། བཅོམ་ལྡན་འདས་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར། དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར། སངས་རྒྱས་ཀྱི་ཆོས་ཐམས་ཅད་མཆིའོ། །ཞེས་གསུངས་སོ། །དེ་བཞིན་གཤེགས་པ་གསང་བའི་མདོ་ལས་ཀྱང་། །གསང་བའི་བདག་པོ་ཐམས་ཅད་མཁྱེན་
པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན་ནོ། །ཞེས་གསུངས་སོ། །དོ་ཧ་ལས། སྙིང་རྗེའི་མེ་ཏོག་གཞན་ཕན་འབྲས་བུ་འབྱིན། །མིང་ནི་གཞན་ལ་ཕན་པའོ། །ཞེས་དང་། རྣམ་སྣང་མངོན་བྱང་གི་རྒྱུད་ལས། ཐམས་ཅད་མཁྱེན་པའི་ཡེ་ཤེས་ནི། །སྙིང་རྗེའི་རྩ་ལས་བྱུང་བ་ཡིན། །བྱང་ཆུབ་ཀྱི་རྒྱུ་ལས་བྱུང་བ་ཡིན། །ཐབས་ཀྱི་མཐར་ཕྱིན་པ་ཡིན་ནོ། །ཞེས་དང་། སངས་རྒྱས་ཐོབ་པ་ལ་དང་པོ་གལ་ཆེ་བ་ས་བོན་ལྟ་བུ། བར་དུ་ཆུ་ལུད་ལྟ་བུ། ཐ་མ་སྟོན་ཐོག་ཕུན་སུམ་ཚོགས་པ་ལྟ་བུ་ཡིན་ཏེ། དབུ་མ་འཇུག་པ་ལས། གང་ཕྱིར་བརྩེ་ཉིད་རྒྱལ་བའི་ལོ་ཐོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། ། དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །ཞེས་གསུངས་སོ། །སྙིང་རྗེ་དེ་ལ་ཡང་། སེམས་ཅན་ལ་དམིགས་པ་ཆོས་ལ་དམིགས་པ་དམིགས་པ་མེད་པ་གསུམ་ལས། ཐོག་མར་སེམས་ཅན་ལ་དམིགས་པའི་སྙིང་རྗེ་གལ་ཆེ་སྟེ། རྣམ་པར་འཕྲུལ་པའི་རྒྱལ་པོས་ཞུས་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། རྣམ་པར་
འཕྲུལ་པའི་རྒྱལ་པོ། ཐམས་ཅད་མཁྱེན་པའི་སྟོབས་ཀྱི་རྩ་བ་ནི་སྙིང་རྗེ་ཆེན་པོ་ཡིན་ནོ། །གཞི་ནི་སྙིང་རྗེ་ཆེན་པོ་ཡིན་ནོ། །ཡང་དག་པར་འདུ་བ་ལ་ཡང་སྙིང་། །རྗེ་ཆེན་པོ་ཡིན། སྙིང་རྗེ་ཆེན་པོའི་རྩ་བ་གང་ལགས། གཞི་གང་ལགས། ཡང་དག་པར་འདུ་བ་གང་ལགས། རྣམ་པར་འཕྲུལ་པའི་རྒྱལ་པོ། སྙིང་རྗེ་ཆེན་པོའི་རྩ་བ་ནི་སེམས་ཅན་ཡིན། གཞི་ནི་སེམས་ཅན་ཡིན། ཡང་དག་པར་འདུ་བ་ཡང་སེམས་ཅན་ཡིན་ནོ། །དེ་ཅིའི་ཕྱིར་ཞེ་ན། རྣམ་པར་འཕྲུལ་པའི་རྒྱལ་པོ། སེམས་ཅན་ཐམས་ཅད་རབ་ཏུ་སྒྲོལ་བའི་ཕྱིར། བྱང་ཆུབ་སེམས་དཔའ་སྙིང་རྗེ་ཆེན་པོ་ལས་ཐམས་ཅད་མཁྱེན་པ་ཉིད་ཀྱི་སེམས་སྐྱེ་བའི་ཕྱིར་རོ། །རྣམ་པར་འཕྲུལ་པའི་རྒྱལ་པོ། འདི་བྱང་ཆུབ་སེམས་དཔའི་ཤེས་རབ་རྣམ་པར་འཕྲུལ་པ་ལས་འབྱུང་ངོ་། །ཞེས་གསུངས་པ་དང་། གསང་བ་བསམ་གྱིས་མི་ཁྱབ་པའི་མདོ་ལས། གསང་བའི་བདག་པོས་གསོལ་པ། བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་གང་ལ་བཙལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་ནི་སྙིང་རྗེའི་རྩ་
བ་ལས་བྱུང་བ་ཡིན། ཐབས་ཀྱི་མཐའ་ཕྱིན་པ་ལས་བྱུང་བ་ཡིན། གསོལ་པ། སྙིང་རྗེའི་རྩ་བ་གང་ལས་བྱུང་བ་ཡིན། བཀའ་སྩལ་པ། གསང་བའི་བདག་པོ། སྙིང་རྗེའི་ལྟརྩ་བ་ནི་སེམས་ཅན་ལས་བྱུང་བའོ། །ཞེས་གསུངས་སོ། །དེ་བཞིན་དུ་འོད་སྲུང་གིས་ཞུས་པའི་མདོ་ལས། དཔེར་ན་ནམ་མཁར་ས་བོན་སྐྱེ་བ་ནི། འདས་དང་མ་འོངས་ད་ལྟ་མེད་དོ། །དེ་བཞིན་དུ་འདུས་མ་བྱས་ལ་སྐྱེ་བ་གང་དུའང་མ་བྱུང་འབྱུང་བར་མི་འགྱུར། དཔེར་ན་ཆུ་ལུད་བཅས་པའི་ས་གཞི་ལ། །ས་བོན་སྐྱེ་བའི་དཀོན་རུང་རྣམས་ལ་མིན། །དེ་བཞིན་ཉོན་མོངས་ལོག་ལྡན་སྐྱེ་བོ་ལ། །རྒྱལ་སྲས་རྣམས་ཀྱི་རྒྱལ་པོའི་ཆོས་རྣམས་སྐྱེ། །དཔེར་ན་པདྨ་ཆུ་རྫིང་རྣམས་ན་སྐྱེ། །དཀོན་རུང་རྣམས་ལ་ནམ་ཡང་སྐྱེ་མི་འགྱུར། །དེ་བཞིན་འདུས་མ་བྱས་ལ་སངས་རྒྱས་ཆོས། །སྐྱེ་བ་གང་ནའང་མ་བྱུང་འབྱུང་མི་འགྱུར། །དཔེར་ན་ལུད་བཅས་འདམ་རྫབ་ཆུ་ལས་ནི། །པདྨ་སྐྱེ་ཡི་ཐང་ལ་ནམ་ཡང་མིན། །དེ་བཞིན་ཉོན་མོངས་ལོག་ལྡན་སྐྱེ་བོ་ལ། །རྒྱལ་སྲས་རྣམས་ཀྱི་སྙིང་རྗེ་ཆེན་པོ་སྐྱེ། །ཞེས་གསུངས་པའོ། །དེ་ལ་ཐོག་མར་བྱམས་པ་བསྒོམས་པས་སྙིང་རྗེ་སྐྱེ་སླ། དེ་ལ་ཚེ་འདི་
ལ་ནང་གི་དྲིན་ཆེ་ཤོས་ནི་རང་གི་མ་ཡིན་ཏེ། མའི་དྲིན་ཅི་ཙམ་ཡོད་ཅེ་ན། ལུས་བསྐྱེད་པའི་དྲིན་དང་། དཀའ་བ་སྤྱད་པའི་དྲིན་དང་། སྲོག་བྱིན་པའི་དྲིན་དང་། འཇིག་རྟེན་བསྟན་པའི་དྲིན་དང་བཞི་ཡོད་དོ། །དེ་ལྟར་ཡང་། འཕགས་པ་བརྒྱད་སྟོང་པ་ལས། ཅིའི་ཕྱིར་ཞེ་ན། མ་འདིས་ནི་བདག་ཅག་བསྐྱེད་པ། འདིས་ནི་དཀའ་བ་སྤྱད་པ། བདག་ཅག་གི་ནི་སྲོག་བྱིན་པ། འཇིག་རྟེན་ཀུན་བསྟན་པ་ཡིན་ནོ། །ཞེས་གསུངས་སོ། །ཚེ་འདིའི་མ་དྲིན་ཆེ་བ་ལྟར། སེམས་ཅན་ཐམས་ཅད་ཀྱང་ཚེ་རབས་མང་པོའི་ཕ་མ་ཡིན་ཞིང་དྲིན་ཆེ་བ་སྟེ། བཤེས་སྤྲིངས་ལས། རེ་རེའི་བདག་ཉིད་རུས་པའི་ཕུང་པོ་འདི། །ལྷུན་པོ་མཉམ་པར་སྐད་ཅིག་འདས་གྱུར་ཀྱང་། །མ་ཡི་ཐོག་མཐའ་རྒྱ་ཤུག་ཚིག་གུ་ཙམ། །རིལ་བུར་བྱས་ཀྱང་ས་ཡིས་ལོངས་མི་འགྱུར། །ཞེས་དང་། གང་གིས་བདག་གི་མ་བྱས་ཤིང་། །མ་ཡི་ནུ་ཞོ་འཐུང་བ་ཙམ། །རྒྱ་མཚོ་བཞི་ཡི་ཆུ་ཡང་མེད། །གང་གིས་བདག་གི་ཕ་བྱས་ཤིང་། །རྟ་དང་གླང་པོ་བྱིན་པ་ཡང་། །ཚངས་པའི་འཇིག་རྟེན་ལས་ཀྱང་ཐལ། །ཞེས་དང་། སྤྱོད་འཇུག་ལས། གང་གིས་
ལྟོར་མ་ཉལ་བའི་སེམས་ཅན་གཅིག་མེད་ཅིང་། །གང་གིས་ནོར་རྫས་བྱིན་དང་སྲུང་ལ་སོགས། །བདག་གི་དོན་དུ་དཀའ་བ་མ་བསྐྱེད་སེམས་ཅན་ནི། །གཅིག་ཀྱང་མེད་ཕྱིར་ཀུན་ལ་སྙོམ་པར་བྱ། །ཞེས་དང་། སློབ་སྤྲིངས་ལས། བྱིས་པ་སང་ནས་བཙའ་བ་ཅི་ཡང་མི་ནུས་པ། །གང་གི་ནུ་ཞོ་བྱམས་པའི་ཤུགས་ཀྱི་ཟག་བཏུང་བ། །ངལ་བ་མང་བསྟན་བྱམས་པ་བསྟན་པ་དེ་དག་འདིར། །ཤིན་ཏུ་མ་རབས་ཞིང་ན་ཡང་སྤང་བར་སུ་ཞིག་སྤྲོ། །ཞེས་གསུངས་སོ། །ཨོ་རྒྱན་རིན་པོ་ཆེའི་ཞལ་ནས། ཁྱད་པར་ཐུགས་རྗེ་ཆེན་པོ་བྱམས་དང་སྙིང་རྗེའི་བདག་ཉིད་ཡིན་པས། བྱམས་སྙིང་རྗེའི་ཁྲིད་ཅེས་དང་། ཕ་མ་ད་ལྟའི་དྲིན་ཆེན་འདི། ཀུན་གྱིས་དཀའ་བ་དང་དྲིན་དེ་ཙམ་གྱིས་བསྐྱང་རུང་། ཁྱོད་ཞེ་ཐག་པས་སྙིང་རྗེ་བྱམས་པ་མི་སྐྱེ་བ་ཁྱོད་འདྲ་བ་གདེང་མེད་པོ། ཁྲེལ་མེད་པ་པོ། ངོ་ཚ་མེད་པ། སྙིང་རྗེ་མེད། ཕྱི་ཐག་མེད། དྲིན་དུ་མི་བཟོ་ཁ་ཆོས་ཞེ་ངན་པོ། ཁྱོད་རེ་སྡུག །ཞེ་རེ་ཁྲེལ། ལས་རེ་ངན། དཀོན་མཆོག་གི་ཞེ་རེ་ཁྲེལ་བྱས་ལ་སྙིང་ནས་བྱམས་དང་སྙིང་རྗེ་བསྒོམ། དེ་ཡང་བློ་སྦྱོང་གཞུང་ལས། གཏོང་ལེན་གཉིས་པོ་སྤེལ་མར་
སྦྱང་། །དེ་གཉིས་རླུང་ལ་བསྐྱོན་པར་བྱ། །ལེགས་པའི་གོ་རིམ་རང་ནས་བརྩམ། །ཞེས་གསུངས་སོ། །གཏོང་ལེན་སྒོམ་པ་འདི་ནི་བདག་གཞན་གོ་བརྗེ་བ་ཡིན་པས་ཤིན་ཏུ་གལ་ཆེ་བ་ཡིན་ཏེ། སྤྱོད་འཇུག་ལས། གང་ཞིག་བདག་དང་གཞན་རྣམས་ནི། །མྱུར་དུ་སྐྱོབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་དང་། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྱུར་ཞིང་། །འཁོར་བ་ན་ཡང་བདེ་བ་མེད། །ཅེས་དང་། དེ་ལྟར་བདག་གནོད་ཞི་བ་དང་། །གཞན་གྱི་སྡུག་བསྔལ་ཞི་བའི་ཕྱིར། །བདག་ཉིད་གཞན་ལ་གཏོང་བ་དང་། །གཞན་རྣམས་བདག་བཞིན་བཟུང་བར་བྱ། །ཞེས་གསུངས་སོ། །བདག་གཞན་བརྗེ་བའི་དོན་རང་ཡང་། སྔར་རང་ལ་གཅེས་པར་འཛིན། གཞན་ཡལ་བར་འདོར་བའི་བློ་འདི་གོ་ས་བརྗེས་ནས་ད་ནི་གཞན་གཅེས་པར་བཟུང་ནས་བདག་བདེ་གཞན་ལ་གཏོང་། རང་ཡལ་བར་དོར་ནས་གཞན་གྱི་སྡུག་བསྔལ་བདག་ལ་ལེན་པ་ཡིན་ནོ། །ཕྱག་ཆེན་ལྔ་ལྡན་གྱི་རྩ་བ་ཡང་འདི་ཡིན་
ཏེ། བྱང་ཆུབ་སེམས་ཀྱི་རྟ་ཕོ་ལ། །གཞན་ཕན་གྱི་དཀྱུས་ཐོག་མ་བཅད་ན། །ཁྲོམ་ལྷ་མའི་འཁོར་ཆེ་མི་འབྱུང་བས། །བྱང་ཆུབ་ཀྱི་སེམས་ལ་འབད་ཀྱང་འཚལ། །ཞེས་གསུངས་སོ། །སེམས་བསྐྱེད་བླང་བའི་ཡུལ་ཡང་། བསྟན་པ་སྤྱི་ཡི་ལུགས་ལ། སྟོན་པ་ཤཱཀྱ་ཐུབ་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བར་སྒོམ་པ་ཡིན་ནའང་། ཆོས་འདིའི་ལུགས་ཀྱི་སངས་རྒྱས་འོད་དཔག་མེད་སྒོམ་པ་ཡིན། སེམས་བསྐྱེད་ཀྱི་འདོན་ཆ་མི་འདྲ་བ་མང་དུ་ཡོད་པ། ཐུགས་ལ་ཡོད་པ་རྣམས་ཀྱིས་རང་རང་གཞུང་ལྟར་འདོན་ཆོག །བློ་ལ་མེད་ན་གསར་དུ་བཟུང་བ་སོགས་མི་བྱ་སྟེ། ཚིག་གཅིག་པོ་འདིས་ཆོག །དམིགས་པ་སྒོམ་པ་གལ་ཆེ་སྟེ། དམིགས་པ་ནི། མདུན་གྱི་ནམ་མཁར་རིན་པོ་ཆེའི་ཁྲི་དང་པད་ཟླའི་སྟེང་དུ། རྩ་བའི་བླ་མ་དང་དབྱེར་མེད་པ། སྟོན་པ་ཆོས་སྐུ་སྣང་བ་མཐའ་ཡས། སྐུ་མདོག་དམར་པོ་དབུ་གཙུག་ཏོར་ཞབས་འཁོར་ལོ་སོགས་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། སྐུ་ལ་ཆོས་གོས་རྣམ་གསུམ་གསོལ་ཞིང་རྡོ་རྗེའི་སྐྱིལ་ཀྲུང་གིས་བཞུགས་པ་ཕྱག་གཉིས་མཉམ་བཞག་གི་
སྟེང་ན་ལྷུང་བཟེད་བདུད་རྩིས་བཀང་བ་བསྣམས་པ། དེའི་གཡས་སུ་བྱང་ཆུབ་སེམས་དཔའ་སྤྱན་རས་གཟིགས་དཀར་པོ་གཡོན་དུ་མཐུ་ཆེན་ཐོབ་སྔོན་པོ། །གཉིས་ཀ་བྱང་ཆུབ་སེམས་དཔའི་ཆ་ལུགས་ཅན། བསྡུ་ན་དེ་གསུམ་གྱིས་ཆོག །དམིགས་པ་ཟིན་ན་སྐྱབས་འགྲོའི་སྐབས་ལྟར་དཀོན་མཆོག་ལྔ་ཚོམ་བསྒོམ། དེའི་དྲུང་དུ་དད་གུས་རྩེ་གཅིག་པས། ད་ནི་སྡུག་བསྔལ་གྱི་རྒྱ་མཚོར་བྱིང་བའི་ཕ་མ་སེམས་ཅན་འདི་རྣམས་སྡུག་བསྔལ་ལས་བསྒྲལ་བའི་དོན་དུ་བདག་གིས་རྫོགས་པའི་སངས་རྒྱས་མྱུར་དུ་ཐོབ་པར་བྱའོ། །སྙམ་དུ་སེམས་ཐག་པ་ནས་བསམ་སྟེ། སངས་རྒྱས་ཆོས་ཚོགས་མ་ཚར་མང་དུ་བརྗོད་པས་བྱང་སྡོམ་སྐྱེ་བར་དཔལ་གཙུག་ལག་ཕྲེང་བས་གསུངས། ཚིགས་བཅད་དེ་ཡང་མང་མས་ཤེས་དཀའ་བས། ཇོ་བོ་རྗེའི། བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་བྱང་ཆུབ་སེམས་བསྐྱེད་དོ། །ཞེས་པ་འདི་བརྒྱ་ཚར་ཙམ་འདོན། མཐར་ནམ་མཁའི་སྐྱབས་ཡུལ་འོད་དུ་ཞུ་ནས་རང་ལ་ཐིམ་པས། རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ། ཞལ་གཅིག་ཕྱག་བཞི་གཞུང་ལྟར་བསྒོམ། དེ་ནས་
རླུང་ཕར་བུས་པས། རང་གི་བདེ་སྐྱིད་དང་དགེ་བའི་རྩ་བ་ཅི་ཡོད་པ་ཐམས་ཅད་སེམས་ཅན་ཐམས་ཅད་ལ་སིབ་ཀྱིས་ཐིམ་ནས། སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན། བདེ་བའི་རྒྱུ་བསོད་ནམས་ཡེ་ཤེས་ཀྱི་ཚོགས་གཉིས་དང་ལྡན་པར་བསྒོམས་ལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་བརྗོད་པ་ནི་བྱམས་པ་བསྒོམ་པ་ཡིན་ལ། རླུང་ནང་དུ་རྔུབ་པའི་ཚེ། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་ཅི་ཡོད་པ་ཐམས་ཅད་སིབས་སེ་རང་ལ་ཐིམ་པས། མེ་ལ་ཤིང་བསྣན་པ་ལྟར། རང་ཐུགས་རྗེ་ཆེན་པོའི་བཀྲག་མདངས་སྔར་ལས་རྒྱས། སེམས་ཅན་ཐམས་ཅད་རིགས་དྲུག་སོ་སོའི་སྡུག་བསྔལ་དང་། སྡུག་བསྔལ་གྱི་རྒྱུ་སྡིག་སྒྲིབ་ཐམས་ཅད་དང་བྲལ་བ་བསྒོམས་ལ། སེམས་ཅན་ཐམས་ཅད་སྡུག་བསྔལ་དང་སྡུལ་བསྔལ་གྱི་རྒྱུ་དང་བྲལ་བར་གྱུར་ཅིག །ཅེས་བརྗོད་པ་ནི་སྙིང་རྗེ་བསྒོམ་པ་སྟེ། དེ་ཡང་སྐྱེ་སླ་ཕྱིར་དང་པོ་རང་གི་མ་ལ་བསྒོམ། དེ་ནས་རང་གི་མཐུན་ཕྱོགས་ལ་བསྒོམ། དེ་ནས་ཆོས་དང་བསམ་པ་གཅིག་པ་རྣམས་ལ་བསྒོམ། དེ་ནས་དགྲ་གཉེན་མེད་པར་ཀུན་ལ་
བསྒོམ། དེ་ཡང་བྱམས་སྙིང་རྗེའི་དབང་གིས་མཆི་མ་འཁྲུགས་པ་བྱུང་ན། བྱམས་པ་ཆེན་པོ་དང་སྙིང་རྗེ་ཆེན་པོ་ཡིན། དེ་ཡང་དགྲ་གཉེན་དང་ཕྱོགས་རིས་མེད་པ་སེམས་ཅན་ཐམས་ཅད་ལ་མཉམ་ན། བྱམས་པ་ཚད་མེད་དང་སྙིང་རྗེ་ཚད་མེད་ཡིན། གཏོང་ལེན་དམིགས་པ་དེ་གཉིས་ཐུན་རེ་ལ་བརྒྱ་རེའམ། རང་གི་ལོ་གྲངས་སམ་ཉེར་གཅིག་ཙམ་རེ་བསྒོམ། དེ་ནས་དེ་སྒོམ་མཁན་གྱི་སེམས་ལ་བལྟས་པས། བསོད་ནམས་དགེ་རྩ་ཕར་བཏང་བ་དང་། སྡིག་སྒྲིབ་ཚུར་བླངས་པ་དེ་ཐམས་ཅད་སེམས་ཡིན། སེམས་ནི་གདོད་མ་ནས་མ་སྐྱེས་པ་ནམ་མཁའ་ལྟ་བུ། སྟོང་པ་ཉིད་ཀྱི་ངོ་བོ། ཡེ་ནས་འོད་གསལ་བ་ཡིན་ཏེ། སེམས་བསྐྱེད་ཆེན་པོའི་མདོ་ལས། འོད་སྲུང་ནམ་མཁའ་ལྟར་མཚན་ཉིད་མེད་ཅིང་། ཡེ་ནས་འོད་གསལ་བ་རྣམ་པར་དག་པ་དེ་ལ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ། །ཞེས་དང་། སེམས་བསྐྱེད་ཀྱི་ཆོ་ག་རྒྱས་པ་ནས། དངོས་པོ་ཐམས་ཅད་དང་བྲལ་བ། ཕུང་པོ་དང་ཁམས་དང་སྐྱེ་མཆེད་དང་། གཟུང་བ་དང་འཛིན་པ་ཐམས་ཅད་རྣམ་པར་སྤང་བ། ཆོས་བདག་མེད་པ་མཉམ་པ་ཉིད་ཀྱི་རང་གི་སེམས་
གདོད་མ་ནས་མ་སྐྱེས་པ། སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་ཀྱི་སེམས་བསྐྱེད་པར་བགྱིའོ། །ཞེས་གསུངས་པའི་ཕྱིར་ཁྱེད་རང་ཉམས་ལེན་ཡོད་པ་རྣམས་ཀྱིས་སེམས་ངོ་མ་ཡེངས་པའི་ངང་ནས་གཏོང་ལེན་གྱི་དམིགས་པ་བསྒོམ་དང་། བྱམས་པ་ནི་བྱམས་ཆེན་གཉུག་མའི་ཏིང་ངེ་འཛིན་དང་། སྙིང་རྗེ་ནི་སྟོང་ཉིད་སྙིང་རྗེའི་སྙིང་པོ་ཅན་ཡིན་པས། དེ་ལས་ཟབ་པའི་ཆོས་མདོ་ལུགས་ལ་མེད་པ་ཡིན། གསར་བུ་རྣམས་ཀྱིས་ཀྱང་གཏོང་ལེན་དེ་ཡུན་རིང་བསྒོམ་རྗེས། དེ་སྒོམ་མཁན་གྱི་སེམས་དེ་ལ་ལྟོས་ནི་སྡོད་དང་། ལས་འཕྲོ་ཡོད་ན་འདི་སྐབས་ནས་ཉམས་རྟོགས་བཟང་པོར་སྐྱེ་ཡང་སྲིད་པ་ཡིན། གཏོང་ལེན་གྱི་སྐབས་སུ་རང་ལུས་ལྷར་མ་བསྒོམས་ཀྱང་རུང་སྟེ། གསར་བུ་རྣམས་དམིགས་པ་དེ་ལ་རྣམ་ཀ་འོང་དོགས་པས་དེ་བགགས་པ་དང་། མི་ཏྲ་ལུགས་ཀྱི་ཐུགས་རྗེ་ཆེན་པོའི་དམར་ཁྲིད་ལས། རང་ལུས་ལྷར་བསྒོམ་པར་གསུངས་ཏེ་སྒོམ་པ་དེ་ལེགས། མ་བསྒོམས་ཀྱང་རང་ལ་གནོད་དོགས་མི་དགོས་ཏེ། རྡོ་རྗེའི་གསུང་དགོངས་པ་གཅིག་པ་ལས། སྲུང་འཁོར་རྨད་བྱུང་བྱང་ཆུབ་གོ་ཆ་ཡིན། །ཅེས་དང་། མཚན་བརྗོད་ལས། བྱམས་པའི་གོ་ཆ་
ཆས་པ་སྟེ། །སྙིང་རྗེ་ཡི་ནི་ཡ་ལད་བགོས། །ཞེས་གསུངས་པས་གཏོང་ལེན་གྱི་དམིགས་པ་དེ་ཐུན་རེ་རྒྱུན་དུ་བསྒོམས་ན། བར་ཆད་གང་གིས་ཀྱང་མི་ཚུགས་ཏེ་སྲུང་བའི་མཆོག་ཡིན། ཕོ་གདོན་མོ་གདོན་ཀླུ་གདོན་སོགས་གདོན་གྱིས་གནོད་ན་ཡང་། གདོན་དེ་རང་ལ་བྱམས་སྙིང་རྗེ་གཏོང་ལེན་གྱི་དམིགས་པ་ཕུར་ཚུགས་སུ་བྱས་ན། གདོན་དེ་དམ་ལ་ཐོགས་ནས་རང་གི་ཆོས་སྐྱོང་དུ་འོང་བ་ཡིན་ཏེ། སྔོན་བཅོམ་ལྡན་འདས་ཀྱིས་ཀྱང་བྱམས་པའི་ཏིང་ངེ་འཛིན་གྱིས་བདུད་བཏུལ། ། མཚོན་ཆའི་ཆར་རྣམས་ཀྱང་མེ་ཏོག་གི་ཆར་དུ་གྱུར་པ་ཡིན།། རང་ཉིད་ནད་ཀྱིས་བཏབ་ན་ཡང་། སེམས་ཅན་ཐམས་ཅད་ཀྱི་ནད་དང་སྡུག་བསྔལ་ཐམས་ཅད་རང་གི་ན་སར་བསྟིམས་པས། གཏོང་ལེན་གྱི་དམིགས་པ་དེ་ཕུར་ཚུགས་སུ་བསྒོམ་ན། ལས་ཀྱི་རྣམ་པར་སྨིན་པ་མ་གཏོགས་པའི་ནད་ཐམས་ཅད་ལ་ཕན་ཏེ། སྔོན་དགེ་བའི་བཤེས་གཉེན་འཆད་དཀའ་བས། གཏོང་ལེན་གྱི་དམིགས་པ་འདི་ཁོ་ན་ལ་བརྟེན་ནས་མཛེ་ཕོ་ལྔ་བརྒྱ་ཙམ་ལ་ཕན་པས། བཀའ་གདམས་པའི་མཛེ་ཆོས་སུ་གྲགས། སྐྱོབ་པ་འཇིག་རྟེན་མགོན་པོ་ལ་མཛེ་བྱུང་བས། གཏོང་ལེན་
སྒོམ་དུས་ཤངས་བུག་ནས་སྦྲུལ་དཀར་པོ་གཅིག་ཕྱིར་ཐོན་སྐུ་ལུས་བདེ། མི་བསྒོམ་དུས་སུ་ཚུར་ཞུགས་ནས་བསྙུང་གཞི་ཐུ་བ་བྱུང་། །གདམས་པ་འདི་གཞན་ལ་གནང་བས་མཛེ་ཕོ་མང་པོར་ཕན་པས། ཀྱུ་རས་མཛེ་ལ་འུར་དེད་བྱས་ཞེས་གྲགས། །གལ་ཏེ་ལས་ནད་ཡིན་ནས་མ་ཕན་ན་ཡང་དམིགས་པ་དེ་བསྒོམས་པས། ན་བའི་ཟུག་གཟེར་དེས། ཚེ་སྔོན་གྱི་སྡིག་སྒྲིབ་ཅི་ཡོད་པ་དག་པར་འགྱུར་ཏེ། ཕ་དམ་པའི་ཞལ་ནས། ན་བ་ན་བ་མ་ཡིན་ཏེ། །རྣལ་འབྱོར་སྒྲིབ་པའི་ཕྱགས་ཤིང་ཡིན། །ཞེས་གསུངས་པས། ན་བ་དེ་བྱང་ཆུབ་ཀྱི་ལམ་དུ་འགྱུར་རོ། །དེ་བཞིན་དུ་རང་ལ་སྡུག་བསྔལ་ཅི་བྱུང་ཡང་རུང་སྟེ། སེམས་ཅན་ཐམས་ཅད་ཀྱི་སྡུག་བསྔལ་དེ་རང་གི་སྡུག་བསྔལ་དེ་ལ་བསྟིམས་ནས། གཏོང་ལེན་གྱི་དམིགས་པ་དེ་བསྒོམས་པས། སྡུག་བསྔལ་ཅི་བྱུང་ཡང་བྱང་ཆུབ་ཀྱི་ལམ་དུ་འགྱུར་རོ། །དེ་བཞིན་དུ་མ་ཉེས་པའི་ཁ་ཡོག་གཤེ་སྐུར་སྒྲ་ཕབ་གཏམ་ངན་སེམས་ལ་མི་བཟོད་པ་གང་བྱུང་ཚེ། ནད་བརྒྱ་སྨན་གཅིག་ལྟར་གཏོང་ལེན་དེ་ཁོ་ན་བསྒོམས་པས། སྡིག་སྒྲིབ་ཐམས་ཅད་རྩད་ནས་གཅོད་དེ། དུས་སྙིགས་མ་ལྔ་འདི་བྱང་ཆུབ་ཀྱི་ལམ་དུ་འགྱུར་བའི་
ཐབས། ཇོ་བོ་གསེར་གླིང་པ་ནས་ཨ་ཏི་ཤ་ལ་བརྒྱུད་པའི་གདམས་ངག །བཀའ་སྡེ་སྣོད་བདེ་བ་ཡིན་པས་ཉམས་སུ་ལོངས་ཤིག །སེམས་བསྐྱེད་ཀྱི་ཆོས་ཐུན་ཚར་རོ།། ། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།