ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་བཅོ་བརྒྱད་པ་བསྔོ་བས་རྒྱས་འདེབས་ཀྱི་ཁྲིད།
༼ཚ༽ ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་ཐོས་པ་དོན་ལྡན་ལས་ཆོས་ཐུན་བཅོ་བརྒྱད་པ་བསྔོ་བས་རྒྱས་འདེབས་ཀྱི་ཁྲིད་བཞུགས་སོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། །རྗེས་ཞལ་གདམས་དང་བསྔོ་བས་རྒྱས་འདེབས་པ་ནི། དེ་ལྟར་ཉམས་སུ་ལེན་རྒྱུ་ངོ་སྤྱོད་པ་དེ་རྣམས་ཤེས་ཀྱང་། །ཉམས་སུ་མ་བླང་ན་མི་ཕན་ཏེ། མདོ་ལས། ཆོས་རྣམས་ཡོངས་སུ་མ་བསྒོམ་པར། །ཆོས་ཉིད་མཐོང་བར་མི་འགྱུར་ཏེ། །ཆུ་ནི་མཐོང་དང་ཐོས་པ་ཡིས། །མ་འཐུང་སྐོམ་པ་སེལ་མི་འགྱུར། །ཞེས་དང་། སྡོང་པོ་བཀོད་པའི་མདོ་ལས། ཇི་ལྟར་འགྲོ་བ་མང་པོ་ལ། །ཟས་དང་སྐོམ་དག་སྦྱིན་བྱས་ཀྱང་། །བདག་ཉིད་བསྐྱེས་པས་ཤི་བ་ལྟར། །མ་
བསྒོམས་ཆོས་ཀྱང་དེ་དང་འདྲ། །ཇི་ལྟར་དབྱིག་གི་བང་མཛོད་དུ། །རིན་ཆེན་མང་པོ་བགྲང་བྱེད་ཀྱང་། །བག་ཞད་ཙམ་ཡང་མི་ཐོབ་བཞིན། །ཆོས་ལ་མ་བསྒོམས་དེ་དང་འདྲ། །ཞེས་དང་། ཕལ་ཆེན་ལས། དཔེར་ན་འོན་པ་རོལ་མོ་མཁན། །གཞན་དག་དེ་ཡིས་དགའ་བྱེད་ཀྱང་། །བདག་ཉིད་ཀྱིས་ནི་མི་ཐོས་ན། །མ་བསྒོམས་ཆོས་ཀྱང་དེ་བཞིན་ནོ། །ཆུ་བོ་དག་གི་རྒྱ་མཚོ་ལ། །གྲུ་དང་གཟིངས་བཅས་བརྔན་པ་ཡིས། །གཞན་དག་དེ་ཡིས་སྒྲོལ་བྱེད་ཀྱང་། །བདག་ཉིད་ཆུ་ལ་ཤི་བ་ལྟར། །མ་བསྒོམས་ཆོས་ཀྱང་དེ་བཞིན་ནོ། །ཞེས་
དང་། འཕགས་པ་སྡོང་པོ་བཀོད་པ་ལས། ཡང་དག་སངས་རྒྱས་བསྟན་པ་འདི། །ཐོས་པ་ཙམ་གྱིས་མི་འགྲུབ་བོ། །དཔེར་ན་ལ་ལ་ཆུ་ཀླུང་གིས། །སྟོབས་མེད་ནན་གྱིས་ཁྱེར་བ་དག །སྐོམ་པས་ཤི་བར་གྱུར་པ་བཞིན། །མ་བསྒོམས་ཆོས་ཀྱང་དེ་བཞིན་ནོ། །ཞེས་དང་། ལྷག་པའི་བསམ་པས་བསྐུལ་བའི་མདོ་ལས། བདག་ནི་སྒྲུབ་སྙམ་ད་ནི་ཅི་བྱ་ཞེས། །འཆི་བའི་དུས་ཚེ་བྱིས་པ་མྱ་ངན་བྱེད། །གཏིང་རྙེད་མ་གྱུར་ཤིན་ཏུ་མྱ་ངན་གྱུར། །སྨྲ་ལ་དགའ་བའི་ཉེས་པ་འདི་དག་གོ །ཞེས་དང་། དཀོན་མཆོག་བརྩེགས་པ་ལས། འོད་སྲུང་འདི་ལྟ་སྟེ། དཔེར་ན། མི་ལ་ལ་ཞིག་རྒྱ་མཚོའི་ཆུ་བོ་ཆེན་པོས་ཁྱེར་ལ་ཆུས་སྐོམ་བཞིན་དུ་འཆི་བའི་དུས་བྱེད་པ་དེ་བཞིན་དུ། འོད་སྲུང་འདི་ལ་དགེ་སྦྱོང་དང་བྲམ་ཟེ་མང་པོ་ཁ་ཅིག་ཆོས་མང་པོ་བསླབས་ནས་ཀུན་ཆུབ་པར་བྱས་ཀྱང་འདོད་ཆགས་ལ་སྲེད་པ་མི་སེལ། ཞེ་སྡང་ལ་སྲེད་པ་མི་སེལ། གཏི་མུག་ལ་སྲེད་པ་མི་སེལ་བ་དེ་དག །ཆོས་ཀྱི་རྒྱ་མཚོར་ཁྱེར་ལ་ཉོན་མོངས་པས་བསྐོམས་པས་འཆི་བའི་དུས་བྱེད་པར་འགྱུར་ཏེ་ངན་འགྲོར་འགྲོ་བར་འགྱུར་རོ། །ཞེས་དང་། འོད་སྲུང་གིས་ཞུས་པའི་མདོ་
ལས། མི་གཅིག་རྒྱ་མཚོའི་ནང་དུ་སྐོམ་ནས་ཤི་བ་བཞིན་དུ། དགེ་སློང་མང་དུ་ཐོས་པ་ཡང་ཐོས་པས་རྒྱགས་ནས། ཉོན་མོངས་པ་མི་སྤངས་ནས་ངན་སོང་དུ་སྐྱེའོ། །ཞེས་དང་། འཕགས་པ་སྡོང་རྒྱན་ལས། ཆོས་མང་དུ་ཐོས་ནས་ཉམས་སུ་མི་ལེན་པ་ནི། དཔེར་ན་མི་དབུལ་པོས་ལས་སུ་མིའི་ནོར་བགྲང་ཡང་བདག་གི་གཅིག་ཀྱང་བྱར་མེད་པ་དང་འདྲའོ། །ཞེས་གསུངས་སོ། །འབྱུང་བ་མེའི་མདོ་ལས། སེམས་ཀྱི་རང་བཞིན་ཡོངས་སུ་མ་ཤེས་ན། །ཚིག་གི་དད་པས་བྱང་ཆུབ་སངས་མི་རྒྱ། །ཞེས་དང་། ཟླ་བ་སྙིང་པོའི་མདོ་ལས། དོན་མ་རྟོགས་ན་ཐ་སྙད་ལ་མཁས་པས་མི་ཕན་ཏེ། ལམ་ཕྲན་བསྟན་དང་ལྟེང་རྒྱས་འོད་སྲུང་གིས། བདེན་བཞིའི་ཚིགས་བཅད་རེའི་དོན་རྟོགས་པས་དགྲ་བཅོམ་ཐོབ་པ། ཀུན་དགའ་བོས་མདོ་སྡེ་ཐམས་ཅད་འཆད་ཤེས་ཀྱང་རྒྱུན་ཞུགས་ལས་མ་ཐོབ། ཅེས་དང་། ཨོ་རྒྱན་རིན་པོ་ཆེའི་ཞལ་ནས། དེ་ལྟར་རང་གི་རིག་པ་གསལ་སྟོང་ཧྲིག་གེ་བ། །རང་བཞིན་མེད་ཀྱང་ཉམས་སུ་མངོན་སུམ་མྱོང་། །འདི་ཉིད་ཉམས་སུ་མྱོང་ན་ཀུན་གྲོལ་ཏེ། །དབང་པོ་དག་ལ་རྣོ་རྟུལ་མེད་པ་ལ། །འོ་མ་
དག་ནི་མར་གྱི་རྒྱུ་ཡིན་ཀྱང་། །མ་བསྲུབས་མ་བཙིར་མར་ནི་མི་འབྱུང་ལྟར། །འགྲོ་ཀུན་སངས་རྒྱས་སྙིང་པོ་དངོས་ཡིན་ཀྱང་། །ཉམས་སུ་མ་བླངས་སེམས་ཅན་སངས་མི་རྒྱ། །ཉམས་སུ་བླངས་ན་བ་གླང་རྫི་ཡང་གྲོལ། །བཤད་མི་ཤེས་ཀྱང་མངོན་སུམ་གཏན་ལ་ཕེབ། །རང་གི་ཁ་རུ་མྱོང་བའི་བུ་རམ་ལ། །གཞན་གྱིས་དེ་ཡི་རོ་བཤད་མི་དགོས་ཤིང་། །འདི་ཉིད་མ་རྟོགས་པཎྜི་ཏ་ཡང་འཁྲུལ། །ཐེག་དགུའི་བཤད་པ་ཤེས་བྱ་མཁས་གྱུར་ཀྱང་། །མ་མཐོང་རྒྱང་གི་གཏམ་རྒྱུད་སྙན་པ་བཞིན། །སངས་རྒྱས་ལ་ནི་སྐད་ཅིག་ཉེ་མ་རིང་། །འདི་ཉིད་རྟོགས་ན་དགེ་སྡིག་རང་སར་གྲོལ། །འདི་ཉིད་མ་རྟོགས་དགེ་སྡིག་གང་སྤྱད་ཀྱང་། །མཐོ་རིས་ངན་སོང་འཁོར་བ་ལས་མི་འཕགས། །ཞེས་གསུངས་སོ། །གྲུབ་ཐོབ་ཨོ་རྒྱན་པའི་ཞལ་ནས། དེ་ལྟར་སྣང་སེམས་ཀྱི་སྟེང་དུ་ཉམས་མྱོང་སྐྱོང་རྒྱུ་མེད་ན། ཐོས་པས་ཀུན་བཀའ་བཞི་ལ་བློ་བཤད་བྱས་ཀྱང་། བར་དོའི་སྐྱེལ་མ་མི་ཐུབ། གདམས་པ་ཟབ་མོའི་དཔེ་ཆུང་མང་པོ་ལག་ན་ཡོད་ཀྱང་། དེ་རྣམས་ཀྱི་བར་དོའི་སྐྱེལ་མ་མི་སླེབ། བུ་རམ་གྱི་རོ་དེ་མྱོང་བ་མིག་དང་ཡིད་ཀྱིས་མྱོང་བ་དང་འདྲ། བུ་རམ་གྱིས་རོ་
དེ་ཡང་ལྕེས་མྱོང་དགོས་པ་བཞིན་དུ། དཔེ་ཆའི་དོན་ཟབ་མོ་ཐམས་ཅད་རང་གི་སེམས་ཐོག་ཏུ་འཕྲོད་དགོས། མི་གཅིག་ལ་མུ་གེ་བྱུང་ནས་བཀྲེས་པས་ཉན་པ་ལ། ཟན་ཟོས་པས་ཆོག་བྱས་པས་མི་ཕན་ལ། ཟན་དེ་ཙམ་པ་ལ་ཡོང་བ་ཡིན་བྱས་ཀྱང་བཀྲེས་པར་མི་ཕན། ནས་ཡོས་སུ་བརྔོས་ནས་ཕྱེ་རུ་འཐག །ཕྱེ་ལ་ཟན་བྱས་ནས་ཟ་དགོས་པ་ཡིན། དཔེ་དེ་བཞིན་དུ་འཁོར་བའི་གཡུལ་ངོ་བཟློག་པ་ལ། གང་ཤར་གྱི་སྣང་རིག་དེའི་སྟེང་དུ་ཉམས་ལེན་གྱི་ཐིལ་ཆུན་དགོས། ཞེས་གསུངས་སོ། །རྒྱལ་བ་ཡང་དགོན་པའི་ཞལ་ནས། ཆོས་རྫོགས་པ་ཆེན་པོ་ཡིན་པས་མི་ཕན། །གང་ཟག་རྫོགས་པ་ཆེན་པོར་འགྲོ་དགོས། ཆོས་སྐད་ལ་རྟ་རི་བ་བྱས་ཀྱང་། གང་ཟག་ལ་ཁྱི་རི་བ་མང་པོ་མཐོང་། །ཆོས་ལ་ཚིག་ཤེས་པ་དང་། བློ་ཡུལ་གྱི་གོ་བ་རྐྱང་པས་མི་ཕན། ཚིག་མིང་རྐྱང་པ་དང་ལག་ལེན་མི་རྒན་དུ་སོང་ནས། ཚིག་ཟིན་སྐམ་པོ་སྒྲིང་སྐྱེད་ཐམས་ཅད་ལ་ནེ་ཚོའི་འདོན་པ། པཀྵའི་གླུ་དང་ཁྱད་མེད། ཆོས་གཅིག་གོ་གཉིས་གོ་ཐམས་ཅད་ལག་ལེན་ལ་འདེབས་པ་ཞིག་དགོས། གཅིག་ཤེས་གཉིས་ཤེས་རང་རྒྱུད་ལ་སྦྱོར་བ་ཞིག་དགོས། ཆོས་
རང་གི་རྒྱུད་ཐོག་ཏུ་མ་བྱོན། སེམས་དང་ཆོས་ཀྱི་ཕྱེ་ཆུ་མ་འདྲེས་པར། ཆོས་དང་གང་ཟག་གི་བར་ན་ཧེམ་དཔོག་མི་ཤོང་བ་ཙམ་བྱས། ཆོས་བློ་བའི་ཚོད་མ་བཞིན་ཁ་ལ་ཡམ་མེ་བྱས་པ་དེས། ཆོས་ཀྱི་དོན་བྱེད་མ་ནུས་པ་ལགས་མོད། ཅེས་གསུངས་པས། ད་རེས་ངས་བཤད་པའི་དོན་དེ་དག་རང་གིས་ཆེ་གོ་ཆུང་གོ་དེ་མི་སྐྱུར་བར་ཉམས་སུ་ལེན་པ་གལ་ཆེ། དེ་ལྟར་ཉམས་སུ་བླང་བའི་ཕན་ཡོན་ནི། ཏིང་འཛིན་རྒྱལ་པོའི་མདོ་ལས། ཁམས་གསུམ་གྱི་སེམས་ཅན་ཐམས་ཅད་དགེ་བ་བཅུའི་ལམ་ལ་བཙུད་པ་བས། ཆོས་བདག་མེད་པ་ལ་མོས་ནས་དགོན་པའི་ཕྱོགས་སུ་གོམ་པ་བདུན་བོར་བ་བསོད་ནམས་ཆེའོ། །ཞེས་དང་། ཕལ་ཆེན་ལས། དཔེར་ན་བུ་རམ་མངར་བའི་སྒྲ། །བརྗོད་པ་ཙམ་གྱིས་མི་མྱོང་སྟེ། །ཟོས་ན་རོ་ནི་མྱོང་བར་འགྱུར། །དེ་བཞིན་སྟོང་པ་ཉིད་ཀྱི་སྒྲ། །བརྗོད་པ་ཙམ་གྱིས་མི་མྱོང་སྟེ། །བསྒོམས་ནས་རོ་ནི་མྱོང་བར་འགྱུར། ཞེས་པ་དང་། དེ་ཁོ་ན་ཉིད་ངེས་པར་བསྟན་པའི་མདོ་ལས། ཤཱ་རིའི་བུ་གང་གིས་བསྐལ་པ་བཅུའི་བར་དུ་མཉན་པ་བས། གང་གིས་སེ་གོལ་གཏོགས་པ་ཙམ་དུ་དེ་ཁོ་ན་ཉིད་ཀྱི་དོན་བསྒོམ་ན། དེའི་
བསོད་ནམས་མང་དུ་འཕེལ་ལོ། །ཤཱ་རིའི་བུ་དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་ཏན་གྱིས་གདོམ་པར་བྱའོ། །ཤཱ་རིའི་བུ་གང་སངས་རྒྱས་ཀྱི་བསྟན་པའི་བྱང་ཆུབ་སེམས་དཔའ་ཐམས་ཅད་ཀྱང་ཏིང་ངེ་འཛིན་འདི་ལ་གནས་པ་ཤ་སྟག་གོ །ཞེས་དང་། རྟོགས་ཆེན་གྱི་མདོ་ལས། ཐང་གཅིག་བསམ་གཏན་སྒོར་ཞུགས་ནས། །ཁམས་གསུམ་གང་བའི་མི་རྣམས་ལ། །སྲོག་བྱིན་པས་ནི་འདི་དོན་ཆེ། །ཞེས་དང་། གསང་བ་བསམ་གྱིས་མི་ཁྱབ་པའི་མདོ་ལས། བྱང་ཆུབ་སེམས་དཔའ་མྱུར་དུ་བླ་ན་མེད་པའི་བྱང་ཆུབ་ཐོབ་འདོད་པས་ཚིག་ལྷུར་བླང་བར་མི་བྱ། བྱང་ཆུབ་ཀྱི་ལམ་ལ་བརྩོན་པར་འདོད་པས་སྒྲུབ་པ་སྙིང་པོ་བླང་བར་བྱའོ། །ཞེས་གསུངས་པས། དགོངས་པ་འདུས་པའི་སྙིང་པོ་ལས། ཕྱོགས་བཅུ་འཇིག་རྟེན་གང་དུ་ཡང་། །རྫོགས་པའི་སངས་རྒྱས་མི་རྙེད་དེ། །སེམས་ཉིད་རྫོགས་པའི་སངས་རྒྱས་ཡིན། །སངས་རྒྱས་གཞན་དུ་མ་ཚོལ་ཅིག །ཅེས་དང་། ཐར་ཆེན་ལས། གང་ཞིག་ཆོས་འདི་འཇིག་པའི་ཚེ། །རྒྱལ་བའི་དྲིན་ལན་ལེན་འདོད་པས། །སྐད་ཅིག་ཡུད་ཙམ་སྒོམ་བྱེད་
པ། །སྟོང་ཁམས་གང་བའི་སེམས་ཅན་ལ། །སྲོག་གི་སྦྱིན་པ་བཏང་བ་བས། །བསམ་གཏན་སྒོམ་པ་བསོད་ནམས་ཆེ། །ཞེས་དང་། དམ་པ་འཇུག་པའི་མདོ་ལས། སེམས་ཅན་ཐམས་ཅད་ལ་ཇི་སྲིད་འཚོའི་བར་དུ། འཚོ་བ་དང་ཡོ་བྱད་ཀྱིས་ཚོགས་བསགས་པ་བས། སྟོང་པ་ཉིད་ཐུན་གཅིག་སྒོམ་པ་བསོད་ནམས་ཆེའོ། །ཞེས་དང་། མདོ་ལས། སྟོང་པ་ཉིད་ནི་བསྒོམས་བྱས་ན། །འཆི་བདག་གིས་ཀྱང་མི་ཚུགས་ཏེ། །བདུད་རྣམས་བྱེ་བ་བརྒྱ་ཡིས་ཀྱང་། །གནོད་པར་འགྱུར་བ་ག་ལ་སྲིད། །ཅེས་དང་། ཉི་ཁྲི་ལས། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ན་སེམས་ཅན་ཇི་སྙེད་འཁོད་པ་དེ་དག་ཐམས་ཅད་སྦྱིན་པས་ཡོངས་སུ་ཚིམས་པར་བྱས། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། རྒྱུན་དུ་ཞུགས་པ་དང་། རང་བྱང་ཆུབ་ལ་བཀོད་པ་བས། གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སེ་གོལ་གཏོགས་པ་ཙམ་ཞིག་སྒོམ་པ་བསོད་ནམས་ཆེས་མང་དུ་འཕེལ་ལོ། །ཞེས་དང་། ཏིང་འཛིན་རྒྱལ་པོ་ལས། མི་གང་ཏིང་འཛིན་མཆོག་འདི་འཛིན་པ་
ནི། །རབ་ཏུ་དགའ་དང་དྲི་མེད་འོད་བྱེད་པ། །འོད་འཕྲོ་ཤིན་ཏུ་སྦྱང་དཀའ་མངོན་དུ་གྱུར། །རིང་དུ་སོང་དང་མི་གཡོ་ལེགས་པའི་བློ། །ཆོས་སྤྲིན་ས་བཅུ་པ་དེ་ཐོབ་པར་འགྱུར། །ཞེས་དང་། དཀོན་བརྩེགས་ལས། སྐལ་པ་དམན་པས་ཆོས་འདི་ལ། །ཐེ་ཚོམ་ཙམ་ཡང་སྐྱེ་མི་འགྱུར། །ཐེ་ཚོམ་ཙམ་ཞིག་གང་སྐྱེས་པ། །སྲིད་པ་ཧྲུལ་པོར་བྱེད་པ་ཉིད། །ཅེས་དང་། སའི་སྙིང་པོའི་མདོ་ལས། གལ་ཏེ་ཏིང་འཛིན་མ་གྲུབ་ན། དགེ་བའི་ལས་ཅི་བསགས་ཀྱང་དོན་དུ་མི་འགྱུར་ཏེ། སེམས་དང་སེམས་ལས་བྱུང་བའི་ཆོས་ངན་པ་སྐྱེ་བར་འགྱུར་རོ། །ཞེས་དང་། རྡོ་རྗེ་གཙུག་ཏོར་གྱི་རྒྱུད་ལས། གཉུག་མའི་དོན་ལ་མཉམ་བཞག་ན། །དམ་ཚིག་མེད་ཅིང་སྔགས་སྤྱད་མེད། རྡོ་རྗེ་དྲིལ་བུ་བཟུང་མི་དགོས། །དེ་བཅུ་བྲལ་འབྲས་འགྲུབ་པར་འགྱུར། །ཞེས་དང་། གཙུག་ཏོར་ཆེན་པོའི་མདོ་ལས། བསྐལ་པ་མང་པོར་ཐོས་པ་བསགས་པ་བས་ནི། །ཉིན་གཅིག་ཆོས་ཉིད་ཀྱི་དོན་སྒོམ་པ་བསོད་ནམས་ཆེའོ། །དེ་ཅིའི་ཕྱིར་ཞེ་ན། སྐྱེ་ཤིའི་ལམ་དང་རིང་དུ་བྱེད་པའི་ཕྱིར་རོ། །ཞེས་དང་། བདེ་མཆོག་སྟོད་འགྲེལ་ལས། ཡང་
དག་ཕྱག་རྒྱ་ཆེ་བསྒོམས་པས། །རྣལ་འབྱོར་ཆེན་པོའི་ཀུན་མཁྱེན་ཉིད། །འགྱུར་མེད་བདེ་བའི་རང་བཞིན་འགྲུབ། །སྐྱེ་བ་འདིར་ནི་སངས་རྒྱས་ཉིད། །ཅེས་དང་། པདྨ་དབང་ཆེན་གྱི་རྒྱུད་ལས། དངོས་གྲུབ་དངོས་གྲུབ་ཅེས་བྱ་བ། །གུད་ན་ཡོད་པ་མ་ཡིན་ཏེ། །དངོས་ནི་བྱང་ཆུབ་སེམས་ལ་བྱ། །གྲུབ་པ་རྟོགས་པ་མངོན་དུ་གྱུར། །དངོས་གྲུབ་ཅེས་ནི་དེ་ལ་བྱ། །ཞེས་དང་། ཏེ་ལོ་པའི་ཞལ་ནས། དཔེར་ན་བསྐལ་པ་སྟོང་དུ་བསགས་པའི་མུན་པ་ཡང་། །སྒྲོན་མེ་གཅིག་གིས་མུན་པའི་ཚོགས་རྣམས་སེལ། །དེ་བཞིན་རང་སེམས་འོད་གསལ་སྐད་ཅིག་གིས། །བསྐལ་པར་བསགས་པའི་མ་རིག་སྡིག་སྒྲིབ་སེལ། །ཅེས་གསུངས་སོ། །ཏིང་ངེ་འཛིན་རྒྱལ་པོ་ལས། ཏིང་འཛིན་ཞི་བ་འདི་ནི་གང་འཛིན་པ། །དེ་ལ་དཔེ་བྱད་བཟང་དང་མཚན་རྣམས་དང་། །འདྲེན་པའི་སངས་རྒྱས་ཆོས་ནི་བཅོ་བརྒྱད་དང་། །སྟོབས་དང་མི་འཇིགས་གང་བརྗོད་རྙེད་མི་དཀའ། །ཞེས་དང་། སམ་བྷ་ཏྲི་ལས། མདོར་བསྡུས་པ་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་ཐོབ་པ། །གང་གིས་དམ་པས་བདེ་བ་ཁྱོད།།
སྐྱེ་བ་འདིས་ནི་ཐོབ་པར་འགྱུར། །ཡང་ན་རྡོ་རྗེ་འཛིན་པ་ཉིད། །ཡང་ན་འཁོར་ལོས་སྒྱུར་བའམ། །འདིས་ནི་དངོས་གྲུབ་ཆེན་པོ་བརྒྱད། །གཞན་ཡང་ཡིད་ལ་འདོད་པ་ཐོབ། །ཅེས་དང་། ཡེ་ཤེས་ཐིག་ལེར། ཡང་ན་ལུས་འདི་སྤང་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་དང་། དེ་ལྟར་ཉམས་ལེན་བྱས་པ་ལ་ཕན་ཡོན་དཔག་ཏུ་མེད་པ་ཡོད་ཅིང་། རབ་ཚེ་གཅིག་ལུས་གཅིག་ལ་སངས་རྒྱ། ཡང་ན་ཕྱི་དབུགས་ཆད་ཙ་ན་འཆི་བ་ཆོས་ཀྱི་སྐུར་སངས་རྒྱ། འབྲིང་ལུས་སེམས་བྲལ་ཙམ་ན་ད་ལྟ་སྒོམ་པའི་བསྐྱེད་རྫོགས་ཟུང་འཇུག་དེའི་དོན་དྲན་པས། བར་དོར་ལོངས་སྤྱོད་རྫོགས་སྐུར་ཡི་དམ་ལྷ་དང་དབྱེར་མེད་དུ་སངས་རྒྱ་བ་སོགས། གང་ཟག་དབང་པོའི་བྱེ་བྲག་གིས་འབྲས་བུ་སངས་རྒྱས་ཐོབ་ལུགས་ཉི་ཤུ་རྩ་གཅིག་གསུངས་པའི་ནང་ནས་ཐ་མའི་ཡང་ཐ་ནི། སྤྲུལ་སྐུའི་ཞིང་ཁམས་དག་པར་དབུགས་ཕྱུང་བ་ཞེས་བྱ་སྟེ། སྨོན་ལམ་གར་བཏབ་པའི་སངས་རྒྱས་ཀྱི་ཞིང་ཁམས་སུ་སྐྱེ་བར་གསུངས། དེ་ལ་མ་གཅིག་ལབ་སྒྲོན་གྱི་ཞལ་ནས། བདེ་བ་ཅན་མ་གཏོགས་པའི་ཞིང་ཁམས་རབ་རྣམས་སུ་ས་བརྒྱད་མ་ཐོབ་པར་མི་སྐྱེ།
ཞིང་ཁམས་འབྲིང་རྣམས་སུ་ཉོན་སྒྲིབ་ཕྲ་བ་སྤངས། བསྒོམ་ལམ་ཡན་ཐོབ་དགོས་དེ་མིན་མི་སྐྱེ། གཙང་མའི་གནས་ལྔ་འོག་མིན་སོགས་དང་ལྕང་ལོ་ཅན་སོགས་ན་བདག་འཛིན་རྩ་བ་ཆོད་ནས་ཆོས་ཉིད་བདེན་པ་མཐོང་བའི་མཐོང་ལམ་ཐོབ་དགོས་སོ། །དེ་མིན་ན་མི་སྐྱེ། འོན་ཀྱང་མཐོང་ལམ་མ་ཐོབ་པ་དམ་ཚིག་སྡོམ་པ་ལ་སྐྱོན་ཕྲ་མོ་ཡང་མེད་ཅིང་། དགེ་བ་ཁོ་ན་དང་སྨོན་ལམ་ལ་འབད་ན་དགའ་ལྡན་སོགས་ཞིང་ཁམས་ཆུང་ངུ་ཁ་ཅིག་ཏུ་སྐྱེ་རུང་ཙམ་སྟེ་དཀའ་བར་གདའོ། །དེས་ན་གང་ཟག་ཉོན་མོངས་པ་ཅན་སངས་རྒྱས་ཀྱི་ཞིང་དུ་སྐྱེ་བའི་རེ་བ་ཡོད་པ་མི་སྲིད་པ་ཡིན་ཏེ། འོན་ཀྱང་མགོན་པོ་འོད་དཔག་མེད་ཀྱི་སྨོན་ལམ་གྱི་དབང་གིས་ཞིང་དེ་རུ་སྐྱེ་བར་མགོན་པོ་ཉིད་ཀྱིས་ཞལ་གྱིས་བཞེས་པ་ཡིན་པས་ན། བདེ་བ་ཅན་གྱི་ཞིང་དུ་སྐྱེ་བའི་སྨོན་ལམ་ལ་སྒོ་ཐམས་ཅད་ནས་འབད་དགོས་སོ། །དེ་ལ་ཐེ་ཚོམ་དང་སོམ་ཉི་ལེ་ལོ་སྤང་སྟེ། ངེས་ཤེས་དང་བརྩོན་འགྲུས་དྲག་ལ་མྱུར་བའི་སྒོ་ནས་བདེ་བ་ཅན་གྱི་ཞིང་ཁམས་ཀྱི་བཀོད་པ་དང་ཕན་ཡོན་བཀོད་པ་རྣམས་དྲན་པར་བྱས་ལ་སྨོན་ལམ་བཏབ་པར་བྱའོ། །བདེ་བ་ཅན་ནི་སངས་རྒྱས་གཞན་གྱི་ཞིང་ཁམས་བས་ཁྱད་པར་ལྷག་
སྟེ། ཐ་མལ་པ་ཉོན་མོངས་པ་དང་བཅས་པའི་གང་ཟག་རྣམས་སྐྱེ་རུང་བས་ལྷག་པ་དང་། དེར་སྐྱེས་ན་བསམ་པའི་དོན་ཐམས་ཅད་ཀྱང་བསམ་མ་ཐག་ནས་འགྲུབ་ཅིང་ཉོན་མོངས་པ་ཕྲ་བས་ཀྱང་མི་གོས་པ་དང་། གཞན་སངས་རྒྱས་ཀྱི་ཞིང་དུ་འགྲོ་བར་ཆོག་པས་ལྷག་པ་དང་། གཞན་ཞིང་ཁམས་ལས་སངས་རྒྱས་པ་ཡང་མྱུར་བ་ལ་སོགས་པའི་ཕན་ཡོན་བསམ་གྱིས་མི་ཁྱབ་པ་དང་ལྡན་པས་བདེ་བ་ཅན་ལས་ཟིན་ཐག་ཉེ་བའི་ཞིང་ཁམས་གཞན་མེད་པས་བདེ་བ་ཅན་དུ་སྐྱེ་བའི་སྨོན་ལམ་ལ་འབད་པ་ཤིན་ཏུ་གལ་ཆེའོ། །ཞེས་གསུངས་སོ། །དེ་ལྟར་བདེ་བ་ཅན་གྱི་བཀོད་པའི་མདོ་དང་། དཀོན་མཆོག་བརྩེགས་པའི་ལེའུ་དང་། འོད་དཔག་མེད་ཀྱི་མདོ་དང་། པདྨ་དཀར་པོའི་མདོ་དང་། རྔ་སྒྲའི་གཟུངས་དང་། ཨོ་རྒྱན་རིན་པོ་ཆེའི་གསུང་རྣམས་མཐུན་པར། མཚམས་མེད་པ་ལྔ་དང་ཆོས་སྤང་བ་མ་གཏོགས། སེམས་རྩེ་གཅིག་གིས་ཞིང་ཁམས་དེར་སྨོན་ལམ་བཏབ་ན། བདེ་བ་ཅན་གྱི་ཞིང་ཁམས་སུ་སྐྱེ་ཐུབ་པར་གསུངས། དེ་ཡང་ཞེ་ཐག་པ་ནས་སྨོན་ལམ་བཅུ་བཏབ་ན་སྐྱེ་གསུངས། དེ་ནི་སངས་རྒྱས་འོད་དཔག་མེད་ཀྱི་སྨོན་
ལམ་གྱི་མཐུ་ཡིན། དེའི་ཕྱིར་ཞིང་ཁམས་དེར་སྨོན་ལམ་འདེབས་པ་གལ་ཆེ། བསྔོ་བ་སྨོན་ལམ་གྱིས་རྟ་ཁ་སྲབ་ཀྱིས་བསྒྱུར་བ་དང་འདྲ། བསྔོ་བས་ནི་རང་དོན་དང་། གཞན་དོན་ཐམས་ཅད་འགྲུབ་སྟེ། དཀོན་བརྩེགས་ལས། བྱང་ཆུབ་སེམས་དཔའ་སྦྱིན་བཏང་ནས། །བྱང་ཆུབ་ཏུ་ནི་བསྔོ་བྱེད་ན། །སེམས་ཅན་ཀུན་ལ་ཕན་བྱེད་ཅིང་། །རང་དོན་དཔག་མེད་ཐོབ་པར་འགྱུར། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང་། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་དང་། འཇམ་དཔལ་ཞིང་བཀོད་ལས། ཆོས་རྣམས་ཐམས་ཅད་རྐྱེན་བཞིན་དུ། །འདུན་པ་པའི་རྩེ་ལ་རབ་ཏུ་འདུས། །གང་གིས་སྨོན་ལམ་ཅི་བཏབ་པ། །འབྲས་བུའང་དེ་འདྲ་ཉིད་དུ་འབྱུང་། །ཞེས་དང་། ཨཱརྱ་དེ་བའི་ཞལ་ནས། བསྔོ་བ་མི་ཟད་མང་བ་སྟེ། ། འཕེལ་བར་འགྱུར་དང་བཅས་པའོ། །ཞེས་གསུངས་པས། བསྔོ་བ་བྱས་པས་དགེ་བ་ཆུང་ངུ་ཞིག་ཡིན་ཀྱང་། སངས་རྒྱས་མ་ཐོབ་བར་དུ་མི་ཟད་པ་དང་། ཞག་རེ་སོང་ཞིང་
སྐྱེད་རེ་འཕེལ་བའི་ཆུང་ངུ་ལ་ཆེན་པོར་འགྱུར་བ་དང་། མཐར་ཐུག་འབྲས་བུ་སངས་རྒྱས་ཐོབ་པར་འགྱུར་བས་ཤིན་ཏུ་གལ་ཆེ། དེ་ཡང་སེམས་ངོ་མ་ཡེངས་པའི་ངང་ནས་བསྔོ་བ་བྱས་ན་འཁོར་གསུམ་ཡོངས་དག་གི་བསྔོ་བར་འགྱུར་བས་ཤིན་ཏུ་ཕན་ཡོན་ཆེ་སྟེ། མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས་སོ། །དགེ་སྦྱོར་གང་བྱེད་ཀྱི་མཇུག་ཏུ་བསྔོ་བ་སྨོན་ལམ་གྱིས་རྒྱས་འདེབས་པ་ནི། ནོར་བུ་རིན་ཆེན་ལ་གསོལ་བ་འདེབས་པ་དང་འདྲ་སྟེ། ཇི་ལྟར་བསམ་པའི་དོན་ཐམས་ཅད་འགྲུབ་པའི་ཕྱིར། ལྔ་ལྡན་རྩ་བ་ལས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱིས་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་འབྱུང་བས། །རྗེས་བསྔོ་བ་འདི་ལ་འབད་ཀྱང་འཚལ། །ཞེས་གསུངས། དེས་ན་དགེ་སྦྱོར་གང་བྱེད་ཀྱང་། སེམས་ཅན་ཐམས་ཅད་ཀྱི་དོན་དུ་དགེ་སྦྱོར་འདི་བྱ་སྙམ་པའི་བསམ་པ་བཟང་པོས་སེམས་བསྐྱེད་པ་དང་། དངོས་གཞིའི་ཚེ་ཡང་དལ་འབྱོར་རྙེད་དཀའ་འཆི་བ་མི་རྟག་པ་
ལས་རྒྱུ་འབྲས་དང་འཁོར་བའི་ཉེས་དམིགས་རྣམས་དྲན་པར་བྱས། སྐྱབས་འགྲོ་སེམས་བསྐྱེད་རྡོར་སེམས་མཎྜལ་བླ་མའི་རྣལ་འབྱོར་རྣམས་ཀྱི་དམིགས་པ་ཐུན་རེ་བྱ། དེ་ནས་རང་ཉིད་ཐུགས་རྗེ་ཆེན་པོར་བསྒོམ། སྤྱི་བོར་བླ་མ་ཀུན་འདུས་འོད་དཔག་མེད་ཀྱི་སྐུ་གཅིག་བསྒོམ། བླ་མ་ཐམས་ཅད་སྤྱན་དྲངས་དེ་ལ་བསྟིམས་ནས། བླ་མ་ཀུན་འདུས་སུ་བསྒོམ། ཡི་དམ་ཐམས་ཅད་སྤྱན་དྲངས་ནས་རང་ལ་བསྟིམས་ནས། རང་ཉིད་ཡི་དམ་ཀུན་འདུས་སུ་བསྒོམ། རང་གི་ཐུགས་ཀར་ཟླ་བའི་སྟེང་དུ་ཧྲཱིཿཡིག་ལ་ཡིག་དྲུག་གཡས་སུ་འཁོར་བ། །དེ་གསང་སྔགས་རིག་སྔགས་གཟུངས་སྔགས་ཀུན་འདུས་སུ་བསྒོམ། དེ་ལྷ་གཅིག་བསྒྲུབས་པས་ཐམས་ཅད་འགྲུབ་པའི་གདམས་ངག་ཟབ་མོ་ཡིན། རང་གི་ཐུགས་ཀ་ནས་འོད་ཟེར་འཕྲོས་པས། སྣོད་ཀྱི་འཇིག་རྟེན་བདེ་བ་ཅན་གྱི་ཞིང་ཁམས་སུ་གྱུར། བཅུད་ཀྱི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར་པར་བསྒོམ། དེ་སྣང་བ་སྐུ་ཡི་ཁྱེར་སོ་ཡིན། དེ་རྣམས་ཀྱི་རང་གིས་རམ་བུ་བཀྱག་ནས་ཡིག་དྲུག་འུར་དི་རི་རི་འདོན་པར་བསྒོམ། སྒྲ་སྐད་ཐོས་ཚད་ཡི་གེ་དྲུག་པར་བསྒོམ། དེ་གྲག་པ་གསུང་གི་ཁྱེར་སོ་ཡིན་པས། །
སྐད་ཅིག་ལ་ཡང་དུང་ཕྱུར་མང་པོར་འགྲོ་བའི་གདམས་ངག་ཡིན། སེམས་ལ་བཟང་ངན་གྱི་རྟོག་པ་ཅི་ཤར་ན་ཡང་། དགག་སྒྲུབ་མེད་པར་དེའི་ངོ་བོ་ལ་བལྟས་ནས་མ་བཅོས་པར་བཞག་པ་ཡིན། དྲན་རྟོག་ཐུགས་ཀྱི་ཁྱེར་སོ་སྟེ། ཕྱག་རྒྱ་ཆེན་པོ་དང་རྫོགས་པ་ཆེན་པོ་གཞི་ཁྲེགས་ཆོད་ཀྱི་ཉམས་ལེན་ཡིན། དེ་གསུམ་ཀ་མི་ཤོར་བར་བྱུང་ན་བསྐྱེད་རྫོགས་ཟུང་འཇུག་གི་ཉམས་ལེན་མཆོག་ཡིན། ཐ་ནའང་དེ་གསུམ་གཅིག་དང་རྒྱུན་དུ་མི་འབྲལ་བར་བྱ། ཉི་མ་རྩེ་ཤར་དང་ནུབ་ཁ་ཟེར་གཉིས་ལ་རྫོགས་པ་ཆེན་པོ་འོད་གསལ་ཐོད་རྒལ་གྱི་དོན་ལ་ལྟ། ཞོགས་པ་ནམ་ལངས་དུས་སམ། ནུབ་མོ་སྲོད་ཀྱི་དུས་གཏོང་ལེན་གྱི་དམིགས་པ་ཐུན་རེ་མ་ཆག་པར་བསྒོམ། ཉལ་ཁ་དུས་དེ་རིང་དགེ་སྦྱོར་གང་འགྲུབ་ཐམས་ཅད། སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ། དེའི་ཕྱིར་དུ་བདག་མངོན་པར་རྫོགས་པར་སངས་རྒྱས་པར་བྱ། དེ་ཡང་བར་ཆད་མེད་ཅིང་མྱུར་དུ་སངས་རྒྱས་ཐོབ་པའི་ཕྱིར། འདི་ནས་ཚེ་འཕོས་མ་ཐག་ཏུ་བདེ་བ་ཅན་གྱི་ཞིང་ཁམས་སུ་སྐྱེ་བར་གྱུར་ཅིག་བསམ་པ་བྱས་ནས། ཤེས་ན་བདེ་བ་ཅན་དུ་སྐྱེ་བའི་བསྔོ་བ་དང་
བདེ་སྨོན་བཟང་སྤྱོད་སོགས་འདོན། མི་ཤེས་ན་བདེ་བ་ཅན་དུ་སྐྱེ་བར་ཤོག་ཟེར་བ་རང་གིས་ཆོག །ནམ་འཆི་བའི་ཚེ་བདེ་བ་ཅན་དུ་འགྲོ་བསམ་པའི་ཐག་རྦད་ཆོད་བྱ། མཚམས་མེད་ལྔ་དང་ཆོས་སྤངས་པ་མ་གཏོགས་སྐྱེ་ངེས་པ་ནི། སངས་རྒྱས་ཀྱི་སྨོན་ལམ་གྱི་སྟོབས་ཡིན། ཕ་དང་མ་དང་རྩ་བའི་བླ་མ་རྡོ་རྗེ་སློབ་དཔོན་དང་། འཕགས་པ་དགྲ་བཅོམ་པ་རྣམས་བསད་པ་དང་། རྫོགས་པའི་སངས་རྒྱས་ཤིག་དགྲོངས་བའམ་དགྲོང་ཤོམ་བྱས་ན་མཚམས་མེད་ཡིན་ཏེ། དེ་འདྲ་བྱེད་མཁན་ནི་སུ་མེད་དམ། །དམ་པའི་ཆོས་སྤང་ན་མི་སྐྱེ་སྟེ། ཆོས་ནི་མ་སྤངས་ཅི་འགྲུབ་བྱེད་པའི་རྩིས་ཡིན་ལ། སྐྱེའམ་མི་སྐྱེ་བསམ་པའི་ཐེ་ཚོམ་མི་རུང་། ཐེ་ཚོམ་བྱས་ན་ཞིང་དེར་སྐྱེས་ནའང་མེ་ཏོག་གི་ཁ་མི་བྱེ་བས་སངས་རྒྱས་ཀྱི་ཞལ་མཐོང་ཕྱི་བའི་སྐྱོན་ཡོད་གསུངས། དེ་ཕྱིར་དེར་སྐྱེའམ་མི་སྐྱེ་བསམ་པའི་ཐེ་ཚོམ་མི་ཟ། དེར་སྐྱེས་ན་ཅི་དགའ་སྙམ་ན། ཞིང་དེར་སྐྱེ་བ་ལ་སྡུག་བསྔལ་མེད་དེ། མེ་ཏོག་པདྨའི་སྦུབས་ལ་བརྫུས་སྐྱེས་སྐད་ཅིག་ལ་ལུས་གྲུབ་པ་ཡིན། དེར་སྐྱེས་ཚད་ལ་སྐུ་གསེར་གྱི་མདོག་ཅན་མཚན་དང་དཔེ་བྱད་ཀྱིས་བརྒྱན་པ་མངོན་ཤེས་རྫུ་འཕྲུལ་དཔག་ཏུ་མེད་པ་
དང་ལྡན་པ་ཁོ་ན་ཡིན། ཞིང་ཁམས་དེ་ན་ནད་དང་། གདོན་དང་། དགྲ་དང་མུ་གེ་ལ་སོགས་པའི་སྡུག་བསྔལ་གང་ཡང་རྣ་བས་ཀྱང་མི་ཐོས། འདོད་ཆགས་ཞེ་སྡང་གཏི་མུག་དང་ང་རྒྱལ་ཕྲག་དོག་སྟེ་དུག་ལྔ་ནི་དེར་སྐྱེས་ཚད་ལ་མེད། ཞིང་ཁམས་འདིའི་བསྐལ་པ་གཅིག་གི་ཡུན་ནི་བདེ་བ་ཅན་གྱི་ཞིང་གི་ཞག་གཅིག་ཡིན། དེའི་རྩིས་བྱས་པས་ལོ་བྱེ་བ་དུང་ཕྱུར་ལ་ཡང་འཆི་རྒྱུ་མེད། ན་རྒྱུ་མེད། རྒས་རྒྱུ་མེད། ཅི་འདོད་པའི་ཟས་གོས་ལོངས་སྤྱོད་དེ་དང་། སངས་རྒྱས་ལ་མཆོད་པ་འབུལ་རྒྱུ་རྣམས་བསམ་པ་ཙམ་གྱིས་ལྷུན་གྲུབ་ཏུ་འོང་། དེ་ལ་རྩོལ་སྒྲུབ་དང་ཉ་ར་འཚོ་སྐྱོང་མི་དགོས། ད་ལྟའི་སྡིག་སྒྲིབ་ཐམས་ཅད་དང་། རྣམ་སྨིན་གྱི་སྡུག་བསྔལ་མྱོང་མི་དགོས་པར། འོད་དཔག་མེད་ཀྱི་ཞལ་མཇལ། ཕྱག་ཕུལ་སྐོར་བ་བྱེད། མཆོད་པ་ཕུལ། ཆོས་ཉན་པས་དག་པར་འགྱུར། རྫུ་འཕྲུལ་མངོན་ཤེས་ཐོགས་པ་མེད་པས་སངས་རྒྱས་ཀྱི་ཞིང་ཐམས་ཅད་དུ་འགྲོ་ནས་སངས་རྒྱས་ཞལ་མཇལ་ཆོས་ཉན་འབྲེལ་ཐོགས་ཀྱི་སེམས་ཅན་རྣམས་འདྲེན། དེ་དགོང་སླར་ཡང་བདེ་བ་ཅན་དུ་ཚུར་སླེབས་པའི་རྫུ་འཕྲུལ་ལ་ཐོགས་པ་མེད། དེ་ལྟར་བདེ་
ཕུན་སུམ་ཚོགས་པའི་ངང་ནས། སངས་རྒྱས་ལ་ཆོས་ཉན། མཆོད་པ་ཕུལ། བསྐལ་པ་གྲངས་མེད་པར་ཏིང་ངེ་འཛིན་གྱི་རྩལ་སྦྱོང་བའི། མདོ་ལུགས་ཀྱི་ས་བཅུ་ལམ་ལྔ། སྔགས་ལུགས་ཀྱི་བཅུ་གསུམ་རྡོ་རྗེ་འཛིན་པའི་ས། རྫོགས་ཆེན་ལུགས་ཀྱི་བཅུ་དྲུག་ཡེ་ཤེས་བླ་མའི་ས་ཐོབ་སྟེ། མཐར་ནམ་ཞིག་ཚེ་འཕོས་མ་ཐག་ཏུ། སངས་རྒྱས་ཐམས་ཅད་དང་སྐུ་གསུང་ཐུགས་དབྱེར་མེད་དུ་སངས་རྒྱས་པར་བཤད་དོ། །དེས་ན་ཁྲིད་འདི་ཐོབ་ནས། ཚིག་རྣམས་ཡིད་ལ་མི་ཟིན་ཀྱང་། དོན་གྱི་རྩ་བ་རྣམས་ཡིད་ལ་བཟུང་ནས། བརྩོན་འགྲུས་ཀྱིས་ཉམས་སུ་བླང་ན་བདེ་བ་ཅན་དུ་སྐྱེ་བར་ཐེ་ཚོམ་མེད་དེ། །མདོ་རྒྱུད་དང་ཨོ་རྒྱན་གྱི་གསུང་དཔང་པོ་ཡིན་ཞིང་། བདག་རཱ་ག་ཨ་སྱས་ཁྲིད་ཡིག་འདི་བསྒྲིགས་ན་འགྲོ་དོན་འོང་ངམ་མི་འོང་ཞེས། ཐུགས་རྗེ་ཆེན་པོ་ལ་གསོལ་བ་རྩེ་གཅིག་ཏུ་བཏབ་སྟེ། ཚོགས་དང་མཆོད་པ་མཎྜལ་བརྒྱ་རྩ་བརྒྱད་ཕུལ་ནས་བརྟགས་པ་བྱས་ནུབ། །ཉམས་དང་རྨི་ལམ་གྱི་མཚམས་སུ་དུང་ཕྱུར་བདུན་བདེ་བ་ཅན་དུ་འགྲོ་ཟེར་ནས་ལུང་བསྟན་པའི་སྣང་བ་ཡང་བྱུང་འདི་ཉིད་བྲི་བའི་ཚེ་ཡང་། ཆོས་བདག་ཡེ་ཤེས་ཀྱི་མཁའ་འགྲོ་མ་
རྣམས་འདུ་ཞིང་། བྱིན་གྱིས་བརླབས་པའི་རྨིས་ལྟས་ཡང་མང་དུ་བྱུང་བས། ཁྱེད་ཁྲིད་ཕྲུག་རྣམས་ལ་ཡང་ཕན་ཐོགས་པའི་རྟེན་འབྲེལ་བཟང་པོ་ཡོད་དོ། །སྔར་དྲུང་ཆེན་ཀུན་དགའ་རྣམ་རྒྱལ་བའི་དྲུང་ནས། ཁྲིད་ཞག་བཅོ་བརྒྱད་པ་ཞིག་ཐོབ་པ། ཁྲིད་ཐོབ་པ་རྣམས་ཀྱི་ཐོག་མ་ཡིན་པས། དེའི་རྟེན་འབྲེལ་དང་མཚུངས་པར། །ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་ཁྲིད་འདི་ཡང་། ཆོས་ཐུན་བཅོ་བརྒྱད་ཀྱི་ཁྲིད་ཀྱི་རྩ་བ་ཡོངས་སུ་རྫོགས་པ་ཡིན་ཏེ། རྒྱབ་ཆོས་ནི་བཀའ་མདོ་རྒྱུད་ཐམས་ཅད་ཡིན་པས་མཐའ་ཡས་སོ། །མངྒ་ལཾ།། ༈ ཕྱག་ཆེན་རྫོགས་ཆེན་བློ་སྦྱོང་ལ་སོགས་པའི། །ཁྲིད་རིམ་མང་པོའི་ཁྲིད་རྒྱུན་ཐོབ་པ་དང་། །རང་གིས་བསྒོམས་ཤིང་བཤད་པའི་ཉམས་མྱོང་བསྟུན། །དེང་སང་མཆོག་དམན་སྐྱ་སེར་ཕལ་ཆེར་རྣམས། །ཕྱག་རྫོགས་ལམ་འབྲས་ཆོས་དྲུག་སྦྱོར་དྲུག་སོགས། །མིང་ཆེན་ཁྲིད་རིམ་མང་དུ་ཐོབ་པ་དང་། །གསར་རྙིང་དབང་ལུང་རྒྱ་མཚོ་ཙམ་ཐོབ་ཅིང་། །ཁྲིད་གཅིག་ལོ་གསུམ་བར་དུ་མི་རྫོགས་པའི། །ཁྲིད་ཆེན་ལན་གྲངས་དུ་མར་ཐོབ་རྣམས་ཀྱང་། །དེ་དག་ཐོབ་པའི་
ཕན་ཡོན་ཙམ་ཞིག་ལས། །དམིགས་པའི་རྐང་གྲངས་ཙམ་ཡང་ཡིད་ལ་མེད། །ཉམས་ལེན་ཐུགས་རྗེ་ཆེན་པོའི་སྒོམ་བཟླས་དང་། །སེམས་ངོ་སྐྱོང་བ་ཁོ་ནའི་སྟེང་དུ་བབ། །ཐུགས་རྗེ་ཆེན་པོའི་དམར་ཁྲིད་རིགས་མང་ཀྱང་། །རྩ་ཚིག་ཙམ་ལས་རྒྱས་པར་བཤད་པ་མེད། །དེ་ཕྱིར་ཐུགས་རྗེ་ཆེན་པོའི་དམར་ཁྲིད་ལ། །ཁོག་ཕུབ་ཕྱག་རྫོགས་ཟུང་འཇུག་ཁྲིད་ཆེན་འདི། །ཁྲིད་དང་ཉམས་ལེན་ཐ་དད་མ་ཡིན་པར། །ཁྲིད་དོན་ཉམས་སུ་ལེན་པ་ཀུན་ལ་ཕན། །དེ་ཕྱིར་མཁས་འདོད་གྲགས་འདོད་མ་ཡིན་ཏེ། །རང་གི་སློབ་བུ་དམ་ཚིག་གཙང་བ་དང་། །ཐུགས་རྗེ་ཆེན་པོ་ཡི་དམ་ལྷར་བཟུང་ནས། །ཕྱག་རྫོགས་ཉམས་རྟོགས་ལེགས་པོ་ཡོད་པའི་ཕྱིར། །གཞན་ལ་བཤད་ཀྱང་རུང་བ་མ་མཆིས་ཀྱང་། །ཤེས་རབ་ཆུང་ཞིང་སློབ་གཉེར་མ་བྱས་པས། །བཤད་རྒྱུའི་ཚིག་གི་ལུང་འདྲེན་དཀོན་པར་མཆིས། །ལུང་འདྲེན་ཤེས་ཀྱང་སྐབས་སུ་གང་བབ་དང་། །ཆོས་ཐུན་མང་ཉུང་ཚོད་ཀྱང་ཟིན་དཀའ་བས། །གབ་སྦས་མེད་པར་བཀླགས་པས་ཆོག་པ་འདི། །དཔེ་ཆ་ཆོད་ཅིང་ལུང་རྒྱུན་ཐོབ་ཕྱིན་ནས། །མཁས་བཙུན་མཐོན་པོ་སུས་ཀྱང་མི་གསན་ཏེ། །སྤྲང་པོ་བྱ་བྲལ་
རྒན་འཁོག་མང་པོ་ལ། །གཏན་བདེའི་འདུན་མ་འགྲུབ་པར་འགྱུར་བསམ་བྲིས། །སོ་སྐྱེས་དབང་གྱུར་ཆོས་སྤྱན་མ་ལྡན་པས། །ནོར་འཁྲུལ་བསྲེ་སླད་སྦ་འོས་གསལ་བཀོད་སོགས། །བྲི་ཉེས་བརྩམས་ཉེས་འགལ་བ་ཅི་མཆིས་པ། །རྩ་གསུམ་ཆོས་བདག་སྲུང་མའི་ཚོགས་རྣམས་ལ། །མཁྱེན་པའི་སྤྱན་ལྡན་རྣམས་ཀྱི་དྲུང་དུ་བཤགས། །ཚེ་འདིའི་བར་ཆད་རྐྱེན་དུ་མི་འགྱུར་ཞིང་། །ཕྱི་མ་ས་ལམ་སྒྲིབ་པར་མི་འགྱུར་བར། །ཐུགས་རྗེས་དགོངས་ལ་བྱིན་གྱིས་བརླབ་ཏུ་གསོལ། །འདི་ལྟར་ཆོས་ཐུན་བཅོ་བརྒྱད་རེ་རེ་ཡང་། །མགོ་ན་ལུང་འདྲེན་མང་བས་མཁས་རྣམས་མགུ། །གོ་བ་ཤེས་རབ་ཅན་ལ་ངེས་ཤེས་སྐྱེ། །མཇུག་ནི་དམིགས་རིམ་བསྡུས་པས་གོ་བར་སླ། །འོན་པ་མ་གཏོགས་ཀུན་ལ་ཉམས་རྟོགས་སྐྱེ། །དང་པོ་ཕེབས་ནུབ་དཀར་གཏོར་འབུལ་བ་དང་། །མཆོད་གཏོར་བཅའ་ཞིང་ས་གཞི་བྱིན་རླབས་དང་། །དགེ་བསྐུལ་རྟེན་འབྲེལ་ཙུནྡྷའི་དབང་བསྐུར་བྱ། །ཕྱིར་ནང་ཁྲོམ་ལ་བགེགས་བསྐྲད་མཚམས་གཅོད་དང་། །རིམ་སྲུང་ལོ་མ་གྱོན་མའི་དབང་བསྐུར་བྱ། །དེ་ནས་སྔ་དྲོ་ཞི་ཁྲོ་ལ་སོགས་པའི། །རྗེས་གནང་རེ་རེ་ཁྲོམ་མང་
རྣམས་ལ་བྱ། །དགོང་མོ་ཁྲིད་ཕྲུག་རྣམས་ལ་ཆོས་བཤད་དེ། །ཕྱིར་ཉིན་དེ་ཚོད་བར་དུ་དམིགས་པ་བསྒོམ། །དེ་ལྟར་དངོས་གཞི་ཞག་པོ་བཅོ་བརྒྱད་དེ། །གྲོལ་ཁ་ཉིན་པར་དགེ་བ་ཁས་ལེན་དང་། །དགའ་སྟོན་ཚོགས་འཁོར་ཚེ་དབང་བསྔོ་བ་དང་། །བཀྲ་ཤིས་རྒྱས་པར་བརྗོད་ལ་ཕྱག་ནས་འཐོར། །དེ་ལྟར་ཞག་པོ་ཉེར་གཅིག་ཁྲིད་ཆེན་རྫོགས། །མགྱོགས་ཁྲིད་འདོད་ན་སྔ་ཐུན་ཕྱི་ཐུན་གཉིས། །བཤད་པས་ཞག་པོ་དགུ་ནས་ཁྲིད་འདི་རྫོགས། །དབང་བསྐུར་དགོས་ན་ཉི་མའི་གུང་ལ་བྱ། །འདི་བྲིས་དགེ་བའི་རྩ་བ་གང་མཆིས་དེས། །བདག་དང་བདག་ལ་འབྲེལ་བ་ཐོབ་ཚད་དང་། །ཁྲིད་ཡིག་འདི་ལ་འབྲེལ་བ་ཐོབ་ཚད་ཀུན། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ནམ་ཞིག་འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་དུ་བརྫུས་སྐྱེས་ནས། །འོད་དཔག་མེད་དང་རྟག་ཏུ་འབྲལ་མེད་ཤོག །ཕྱག་ཆེན་རྒྱུད་ཀྱི་སྲུང་མ་མ་མགོན་གཉིས། །མགོན་པོ་བྱ་རོག་མ་དང་སེང་གེའི་གདོང་། །ཚེ་རིང་མཆེད་ལྔས་ལྔ་ལྡན་ཆོས་འདི་སྲུང་། །མ་ནིང་ལྕམ་དྲལ་སྲོག་སྒྲུབ་ནག་མོ་དང་། །མ་གཟའ་དམ་གསུམ་སྔོན་གྱི་དམ་ཚིག་ལྟར། །
རྫོགས་ཆེན་ཆོས་འདི་བསྲུང་ཞིང་འཕེལ་རྒྱས་མཛོད། །མྱུར་མཛད་མགོན་པོ་བྲག་མགོན་མདུང་འཛིན་གྱིས། །དམར་ཁྲིད་ཆོས་འདི་འཕེལ་ཞིང་རྒྱས་པར་མཛོད། །ཇོ་འབྲོམ་བཀའ་སྲུང་དཀར་པོ་བརྒྱད་ཅུ་དང་། །འཇིག་རྟེན་འདིར་གནས་སྒྲོལ་མ་བཅུ་གཉིས་ཀྱིས། །ལམ་རིམ་བློ་སྦྱོང་དོན་འདི་འཕེལ་རྒྱས་མཛོད། །ཏིང་འཛིན་སྐྱོང་བའི་ལྷ་བྲན་བརྒྱད་ཁྲི་ཡིས། །ཏིང་ངེ་འཛིན་གྱིས་ཆོས་འདི་འཕེལ་རྒྱས་མཛོད། །ཁྱེད་རྣམས་བསྟན་པའི་སྤྱི་སྲུང་ཡིན་པའི་ཕྱིར། །ལ་ཆེན་ཆོས་འདི་མི་ནུབ་དར་རྒྱས་མཛོད། །ཁྱད་པར་ཆོས་འདི་གཉེར་དུ་གཏད་པ་ནི། །ཆོས་མཛད་སྲུང་མ་སྤྱན་རས་གཟིགས་ཀྱི་ལྕམ། །མངོན་ཤེས་རྫུ་འཕྲུལ་དངོས་གྲུབ་ཀུན་གྱི་བདག །སྒྲུབ་པ་པོ་ལ་འདོད་དོན་འབྲས་སྩོལ་བ། །རྡོ་རྗེ་གཡུ་སྒྲོན་མ་ལ་བཀའ་འདི་གཏད། །དར་ཞིང་རྒྱས་ལ་ཡུན་རིང་གནས་པར་མཛོད། །རང་ལོ་རེ་གཅིག་མཁའ་ལྡིང་རྒྱལ་པོ་ལ། །སྤྲེལ་གྱི་ཟླ་བའི་ཉ་སྐོར་ནས་བཟུང་སྟེ། །བྱ་ཡི་ཟླ་བའི་བཅུ་བདུན་ཉིན་པར་འགྲུབ། །ཡི་གེ་པ་ནི་དགེ་སློང་བརྩོན་འགྲུས་ཡིན། །རྒྱུན་གྱི་ཐུགས་དམ་དུས་མཆོད་མང་བ་དང་། །རང་ལུས་མི་།
བདེ་ནད་ཀྱིས་མནར་ན་ཡང་། །རྒྱལ་པོའི་སྐུ་རིམ་རྒྱུན་ཁྱེར་དགོས་བྱུང་ཞིང་། །དབང་ལུང་ལ་སོགས་རྣམ་གཡེང་མང་བ་དེས། །ལུང་འདྲེན་འགའ་ཞིག་གོ་རིམ་འཆུག་སྲིད་པས། །མཁྱེན་ལྡན་རྣམས་ཀྱིས་ཐུགས་ཀྱི་མི་ཁྲེལ་ཞུ། །བྲིས་གསར་ཡིན་ཕྱིར་ཐོབ་ཆ་མ་དག་པ། །ཕྱི་རབས་བྲིས་མཁན་རྣམས་ཀྱིས་བཅོས་པར་མཛོད། །མངྒ་ལཾ། །༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །
༼ཛ༽ །ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ཐེག་ཆེན་སྐྱབས་འགྲོ་སེམས་བསྐྱེད་ཀྱི་སྡོམ་ལུང་བཞུགས་སོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རང་གི་གཡས་ཕྱོགས་སུ་སངས་རྒྱས་ཀྱི་སྐུ་གཟུགས་དང་ཁྲིད་དཔེ་སོགས་གླེགས་བམ་བཤམས། ཡོད་ན་པུ་རི་སོགས་མཆོད་རྟེན་ཡང་བཤམས། དེའི་མདུན་དུ་མཆོད་པ་སྣ་བདུན་མཎྜལ་སོགས་བཤམས། འོ་ན་ཁར་སང་ཁྲིད་སྔོན་འགྲོ་ལས། སྐྱབས་འགྲོ་སེམས་བསྐྱེད་ཀྱི་དོན་རྒྱས་པར་བཤད་པས། དེའི་དོན་གོ་བར་བྱས་ནས། སླར་སྡོམ་པ་ཞུས་པས། སྡོམ་པ་ཚད་ལྡན་སྐྱེ་ལ་དོན་མ་གོ་བར་རྗེས་ཟློས་ཙམ་གྱིས་སྐྱེ་བར་དཀའ་བའི་ཕྱིར། རྒྱབ་ཆོས་འདི་ལ་སྡོམ་པ་
འབོགས་པ་ཡིན། དེ་ལ་སྐྱབས་སྡོམ་ལ་ཡང་ཐེག་པ་ཐུན་མོང་དང་། ཐེག་པ་ཆེན་པོའི་སྐྱབས་སྡོམ་གཉིས་ལས། ད་རེས་ཐེག་པ་ཆེན་པོའི་སྐྱབས་སྡོམ་ཡིན། དེ་ལ་སྡོམ་པ་ཞུ་བའི་ཡུལ། ད་ལམ་ཁྲིད་འདི་ཡི་ལུགས་ཀྱི། མདུན་གྱི་ནམ་མཁར་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ་གྱད་དང་སེང་གེས་བཏེག་པ་སྣ་ཚོགས་པདྨ་འདབ་མ་འབུམ་ལྡན་གྱི་སྟེང་ན་ཟླ་བའི་དཀྱིལ་འཁོར་ཡོངས་སུ་རྒྱས་པ། དེ་ཡི་དབུས་སུ་རང་གི་རྩ་བའི་བླ་མ་འོད་དཔག་མེད་ལོངས་སྤྱོད་རྫོགས་པའི་སྐུའི་ཆ་ལུགས་སུ་བཞུགས་པ་ལ་བཀའ་བརྒྱུད་བླ་མས་བསྐོར་བ། མདུན་དུ་ཡི་དམ་
ཐུགས་རྗེ་ཆེན་པོ་ལ་ཡི་དམ་རྒྱ་མཚོས་བསྐོར་བ། གཡས་སུ་སངས་རྒྱས་ཤཱཀྱ་ཐུབ་པ་ལ་བསྐལ་བཟང་གི་སངས་རྒྱས་ལ་སོགས་པ་སངས་རྒྱས་རྒྱ་མཚོས་བསྐོར་བ། རྒྱབ་ཏུ་ཡུམ་ཆེན་མོ་ལ་པོ་ཏི་དང་གླེགས་བམ་དམ་ཆོས་རྒྱ་མཚོས་བསྐོར་བ། གཡོན་དུ་ཕྱག་ན་རྡོ་རྗེ་ལ་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་ཉན་ཐོས་ཆེན་པོ་མཆོག་བརྒྱད་ལ་ཐེག་ཆེན། དང་ཐེག་དམན་གྱི་དགེ་འདུན་རྒྱ་མཚོས་བསྐོར་བ། ཕྱོགས་དང་ཕྱོགས་མཚམས་ཐམས་ཅད་དཔའ་བོ་མཁའ་འགྲོས་གང་བ། འོག་ཏུ་ཕྱག་བཞི་དྲུག་པ་དང་། བྲག་ལྷ་མགོན་པོ་ལ་སོགས་ཆོས་སྐྱོང་བའི་སྲུང་མ་རྒྱ་མཚོས་བསྐོར་བ། དེ་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུ་ན་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་བའི་སྲུང་མའི་ཚོགས་ཐམས་ཅད་སྤྲིན་གཏིབས་པ་ལྟར་སྤྱན་དྲངས་ནས་མདུན་བསྐྱེད་ཀྱི་ལྷ་ལ་ཐིམ་པར་སྒོམས་ཤིག །རང་གིས་ཐལ་མོ་སྦྱར་སྤོས་ཐོགས། དཔོན་སློབ་རྣམས་ཀྱིས་མཉམ་དུ་གྱེར་ལ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །ཞེས་སོགས་སྤྱན་འདྲེན། བཅོམ་ཕྱོགས་བཅུ་ན་བཞེང་བའི་སྲུང་མ་རྒྱ་མཚོས་བསྐོར་བ། ལྡོགས་དང་ཕྱོགས་མཚམས་ཐམས་རྩ་བྲང་ཆུབ་སེམས་དཔའ་ཉེ་བའི་སྲསགས་པ་སངས་རྒྱས་རྒྱ་མ་
ལྡན་འདིར་ནི་བྱོན་པ་ལེགས། །སོགས། སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། སྤྲོ་ན་ཁྲུས་གསོལ་དང་མཎྜལ་རྒྱས་པར་བྱ། བསྡུ་ན་ཇི་ལྟར་བལྟམས་པ་སོགས། ས་གཞི་སྤོས་ཆུ་བྱུགས་སོགས། དེ་ལྟར་སྐྱབས་ཡུལ་རྣམས་མདུན་གྱི་ནམ་མཁར་མངོན་སུམ་དུ་བཞུགས་པའི་མོས་པ་མཛོད། དངོས་སུ་བཞུགས་པ་ཡང་ཡིན་ཏེ། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་དུ་ཐུབ་པ་བཞུགས། །ཞེས་དང་། ཆུ་ཟླ་བཞིན་དུ་གར་དམིགས་དེར་སྣང་བ། །ཞེས་གསུངས་པས། དངོས་སུ་བཞུགས་ཀྱང་བཞུགས་ལ། གཞན་ཡང་ཕྱོགས་བཅུའི་ཞིང་ཁམས་ན་བཞུགས་པའི་སངས་རྒྱས་བྱང་ཆུབ་སེམས་དཔའ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱིས་གཟིགས་ཤིང་། ཁྱེད་རང་རྣམས་ཀྱིས་རྗེས་ཟློས་བྱས་པ་རྣམས་ཀྱང་ངེས་པར་གསན་པས། སངས་རྒྱས་ཐམས་ཅད་ལ་སྡོམ་པ་ཞུས་པ་དང་མཉམ། མདུན་དུ་བཤམས་པའི་སྐུ་གསུང་ཐུགས་རྟེན་འདི་རྣམས་ལ་དམིགས་རྟེན་དུ་བྱས་ནས། ངེད་ལ་སློབ་དཔོན་དུ་ཞུས་ཏེ།
ཐེག་པ་ཆེན་པོའི་སྐྱབས་འགྲོའི་སྡོམ་པ་ཞུ་བསམ་པའི་མོས་པ་མཛོད། དེ་ཡང་སྐྱབས་ཡུལ་ནི། སྐུ་གསུམ་གྱི་བདག་ཉིད་སངས་རྒྱས་བཅོམ་ལྡན་འདས་རྣམས་ནི་སངས་རྒྱས་དཀོན་མཆོག །དེ་ལ་རྟེན་གྱི་སྐྱབས་གནས་ཞུ། ཐེག་པ་ཆེན་པོའི་ལུང་དང་རྟོགས་པའི་བདག་ཉིད་ཀྱི་དམ་པའི་ཆོས་དཀོན་མཆོག་ལ་ལམ་གྱི་ཚུལ་དུ་སྐྱབས་ཞུ། ས་དང་པོ་མན་ཆད་ལ་གནས་པའི་བྱང་ཆུབ་སེམས་དཔའ་རྣམས་ནི། ཐེག་པ་ཆེན་པོའི་དགེ་འདུན་དཀོན་མཆོག་སྟེ། དེ་ལ་གྲོགས་ཀྱི་ཚུལ་དུ་སྐྱབས་ཞུ་བསམ་པ་གྱིས་ལ། དེ་ཡང་རང་དོན་ཁོ་ནར་སྐྱབས་སུ་འགྲོ་བ་ནི་མ་ཡིན་ཏེ། སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པའི་ཕྱིར་དུ་སྐྱབས་ཞུ། །དེ་ཡང་ཐེག་དམན་ལྟར་ཇི་སྲིད་འཚོའི་བར་དུ་སྐྱབས་ཞུ་བ་ནི་མ་ཡིན་ཏེ། དུས་དེ་རིང་ནས་བཟུང་སྟེ་སངས་རྒྱས་མ་ཐོབ་ཀྱི་བར་ལ་སྐྱབས་ཞུ་བསམ་པ་གྱིས་ལ། པུས་བཙུགས་ཐལ་མོ་སྦྱར་ནས། །ཐེག་པ་ཆེན་པོའི་སྐྱབས་སྡོམ་ཞུ་བསམ་པའི་འདུན་པ་རྩེ་གཅིག་པས། འདིའི་རྗེས་ཟློས་ལན་གསུམ་གྱིས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་
དགོངས་སུ་གསོལ། བདག་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཆགས་པ་དང་བྲལ་བ་རྣམས་ཀྱི་མཆོག །དམ་པའི་ཆོས་རྣམས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །འཕགས་པ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་གསུམ། འོ་ད་ཁྱེད་རང་རྣམས་ཀྱི་རྒྱུད་ལ་ཐེག་པ་ཆེན་པོའི་སྐྱབས་འགྲོའི་སྡོམ་པ་སྐྱེས་བྱུང་བསམ་པ་གྱིས་ལ་ལེགས་སོ་བརྗོད། །སློབ་དཔོན་གྱིས། ཐབས་ཡིན་ནོ། བརྗོད། དེ་ལྟར་ཐེག་པ་ཆེན་པོའི་སྐྱབས་འགྲོའི་སྡོམ་པ་ཐོབ་པའི་ཕན་ཡོན་ནི། སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པའི་ཚེ་འདིར་གནོད་པ་དང་འཚེ་བ་ཐམས་ཅད་དང་། ལྟ་བ་ངན་པ་དང་། ཐེག་པ་དམན་པར་ལྟུང་བ་ལས་སྐྱོབ། ཕྱི་མ་ངན་སོང་གི་སྡུག་བསྔལ་དང་། འཁོར་བའི་འཇིགས་པ་ཐམས་ཤོལ་ཅད་ལས་སྐྱོབ་སྟེ། མདོ་སྡེ་རྒྱན་ལས། འཚེ་བ་དག་ནི་ཐམས་ཅད་དང་། །ངན་སོང་དང་ནི་ཐབས་མིན་དང་། །འཇིག་ཚོགས་ཐེག་པ་དམན་པ་ལས། །སྐྱོབ་ཕྱིར་སྐྱབས་ཀྱི་
དམ་པའོ། །ཞེས་གསུངས། དེ་ལྟར་སྐྱབས་སྡོམ་ཐོབ་ནས། དེའི་བསླབ་བྱ་ལ་བསླབ་དགོས་ཏེ། བསླབ་བྱ་ལ་སྤྱིར་གྱི་བསླབ་བྱ་གསུམ། བྱེ་བྲག་གི་བསླབ་བྱ་གསུམ། ཆ་མཐུན་གྱི་བསླབ་བྱ་གསུམ་སྟེ་དགུའོ། །དེ་ལ་དང་པོ་ནི། དུས་རྟག་ཏུ་དཀོན་མཆོག་མཆོད་པ་ལ་བརྩོན་པར་བྱ་ཞིང་། ཐ་ན་རང་ཟས་ཅི་ཟ་བའི་ཕུད་ཀྱིས་ཀྱང་མཆོད་པ་དང་། སྲོག་དང་བྱ་དགའི་ཕྱིར་དཀོན་མཆོག་མི་སྤང་པ་དང་། དཀོན་མཆོག་གི་ཡོན་ཏན་རྗེས་སུ་དྲན་པའི་སྒོ་ནས་ཡང་དང་ཡང་དུ་སྐྱབས་སུ་འགྲོ་བ་ལ་བསླབ་པའོ། །བྱེ་བྲག་གི་བསླབ་བྱ་ལ་གསུམ་ལས། སངས་རྒྱས་ལ་སྐྱབས་སུ་སོང་ནས་ལྷ་གཞན་ལ་སྐྱབས་སུ་མི་འགྲོ་བ་སྟེ། མདོ་མྱ་ངན་འདས་ཆེན་ལས་ཀྱང་། སངས་རྒྱས་དག་ལ་སྐྱབས་སོང་ནས། །དེ་ནི་ཡང་དག་དགེ་བསྙེན་ཏེ། །ནོམ་ཡང་ལྷ་རྣམས་གཞན་དག་ལ། །སྐྱབས་སུ་གསོལ་བར་མི་འགྱུར་རོ། །ཞེས་གསུངས་སོ། །ཆོས་ལ་སྐྱབས་སུ་སོང་བས་སེམས་ཅན་རྣམས་ལ་རྣམ་པར་འཚེ་བར་མི་བྱ་སྟེ། མདོ་ལས་ཀྱང་། དམ་པའི་ཆོས་ལ་སྐྱབས་སོང་ནས། །གནོད་ཅིང་འཚེ་བའི་སེམས་དང་བྲལ། །ཞེས་གསུངས་སོ། །དགེ་འདུན་ལ་སྐྱབས་
སུ་སོང་ནས་གྲོགས་མུ་སྟེགས་ཅན་ལ་མི་བསྟེན་པ་སྟེ། མདོ་ལས་ཀྱང་། དགེ་འདུན་ལ་ནི་སྐྱབས་སོང་ནས། །མུ་སྟེགས་ཅན་ལ་ཕྱོགས་མི་འགྱུར། །ཞེས་གསུངས་སོ། །ཆ་མཐུན་གྱི་བསླབ་བྱ་ལ་གསུམ་ལས། སངས་རྒྱས་དཀོན་མཆོག་གི་རྟེན་དེ་བཞིན་གཤེགས་པའི་སྐུ་གཟུགས་ཐ་ན་སཱཙྪའི་ཆག་དུམ་ཡན་ཆད་ལ་གུས་པར་བྱ་བ་དང་། ཆོས་དཀོན་མཆོག་གི་རྟེན་དམ་ཆོས་པོ་ཏི་གླེགས་བམ་ཐ་ན་དེ་ཡི་ཡིག་འབྲུ་རེ་ཡན་ཆད་ལ་གུས་པར་བྱ་བ་དང་། དགེ་འདུན་དཀོན་མཆོག་གི་རྟེན་སྟོན་པའི་ཆ་ལུགས་དང་ཐ་ན་སེར་མོའི་ལྷན་པ་བཏབ་པ་ཡན་ཆད་ལ་གུས་པར་བྱའོ། །སྐྱབས་སུ་སོང་བའི་ཕན་ཡོན་ནི་བརྒྱད་དེ། ནང་པ་སངས་རྒྱས་པར་ཆུད་པ་དང་། སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང་། སྔར་གྱི་སྡིག་པ་ཐམས་ཅད་ཟད་པར་འགྱུར་བ་དང་། མི་དང་མི་མ་ཡིན་གྱི་བར་ཆད་ཀྱིས་མི་ཚུགས་པ་དང་། བསམ་པའི་དངོས་པོ་ཐམས་ཅད་འགྲུབ་པ་དང་། །རྒྱུ་བསོད་ནམས་ཆེན་པོ་དང་ལྡན་པར་འགྱུར་བ་དང་། ངན་སོང་དུ་མི་ལྟུང་བ་དང་། མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེས་ཐེག་པ་ཆེན་པོའི་སྐྱབས་སྡོམ་
ཐོབ་པ་ཡིན་ནོ། །དེ་ནས་ཐེག་པ་ཆེན་པོའི་སེམས་བསྐྱེད་ཞུ་བ་ལ། དེའང་སྤྱིར་སེམས་བསྐྱེད་ལ་ཐེག་དམན་གྱི་སེམས་བསྐྱེད་དང་ཐེག་ཆེན་སེམས་བསྐྱེད་གཉིས་སུ་ཡོད་པ་ལས། དང་པོ་ནི། རང་ཉིད་ཞི་བདེ་འདོད་པའི་ཕྱིར། བྱང་ཆུབ་ཏུ་སེམས་བསྐྱེད་པ་ཡིན་ན་ནི་ལམ་ཆོད་ཆུང་སྟེ། ཉན་ཐོས་དང་ནི་རང་རྒྱལ་དག །བྱང་ཆུབ་ཐོབ་པའི་གཏན་གྱི་གེགས། །ཞེས་དང་། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྟུང་། ཞེས་གསུངས་སོ། །རང་ལམ་གྱི་བྱང་ཆུབ་ཙམ་མ་གཏོགས། མཐར་ཐུག་གི་བྱང་ཆུབ་ཐོབ་མི་ནུས་པས། འདིར་ནི་ཐེག་པ་ཆེན་པོའི་སེམས་བསྐྱེད་ལ་འབད་དགོས་ཤིང་། ཐེག་ཆེན་སེམས་བསྐྱེད་ངོ་བོའི་སྒོ་ནས་དབྱེ་བ། མཚན་ཉིད་རྒྱུ་རྐྱེན་དབྱེ་བ་དང་ས་མཚམས་སོགས་དུ་མ་ཡོད་པ་ལས། དང་པོ་ནི། ཐེག་ཆེན་ཀུན་རྫོབ་ཀྱི་སེམས་བསྐྱེད་དང་། དོན་དམ་སེམས་བསྐྱེད་གཉིས་ལ་བྱེད་དེ། དགོངས་པ་ངེས་འགྲེལ་ལས། བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ། དོན་དམ་པ་བྱང་ཆུབ་ཀྱི་སེམས་དང་། ཀུན་རྫོབ་བྱང་ཆུབ་ཀྱི་སེམས་སོ། །ཞེས་གསུངས་སོ། །མཚན་ཉིད་ནི་གཞན་དོན་དུ་རྫོགས་བྱང་ལ་དམིགས་
པའི་མཁྱེན་པ། ཐེག་ཆེན་ཀུན་རྫོབ་སེམས་བསྐྱེད་ཀྱི་མཚན་ཉིད་ཡིན་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་སོ། །རྒྱུ་རྐྱེན་ནི་མང་དུ་གསུངས་ཀྱང་མདོར་བསྡུ་ན། རྒྱལ་བ་སྲས་བཅས་ལ་དད་པ། སེམས་ཅན་ལ་སྙིང་བརྩེ་བ། དགེ་བའི་བཤེས་གཉེན་གྱིས་ཡོངས་སུ་ཟིན་པ་རྣམས་ཡིན་ཏེ། དེ་ཡི་རྩ་བ་སྙིང་རྗེར་འདོད། རྟག་ཏུ་སེམས་ཅན་ལ་ཕན་པར་སེམས། ཞེས་དང་། དཀོན་མཆོག་ཏ་ལའི་མདོ་ལས། རྒྱལ་དང་རྒྱལ་བའི་ཆོས་ལ་དད་འགྱུར་ཞིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ན། །སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། །ཞེས་གསུངས་སོ། །དབྱེ་བ་ལ་ས་ལྟ་བུའི་སེམས་བསྐྱེད་ནས། སྤྲིན་ལྟ་བུའི་སེམས་བསྐྱེད་ཀྱི་བར་ཉེར་གཉིས་སུ་ཡོད་དེ། རྒྱུན་ལས། དེ་ཡང་ས་གསེར་ཟླ་བ་མེ། །ཞེས་པ་ནས། རྣམ་པ་ཉི་ཤུ་རྩ་གཉིས་སོ། །ཞེས་པའི་བར་དུ་གསུངས་པ་ལྟར་རོ། །ཡང་ན་མོས་པས་སྤྱོད་པ། ལྷག་བསམ་རྣམ་དག་དང་། རྣམ་པར་སྨིན་པ་དང་། སྒྲིབ་པ་
སྤངས་བའི་སེམས་བསྐྱེད་དང་བཞིར་ཡོད་དེ། མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །དབྱེ་བ་ནི། མངོན་རྟོགས་རྒྱན་ལས་ཉི་ཤུ་རྩ་གཉིས་གསུངས་ཏེ། ས་ལྟ་བུ། གསེར་ལྟ་བུ། ཟླ་བ་ལྟ་བུ་གསུམ་ནི། ང་རང་ལས་དང་པོ་པའི་སེམས་བསྐྱེད་ཡིན། མདོ་སྡེ་རྒྱན་ལས་སེམས་བསྐྱེད་བཞིར་གསུངས་པ་ལས། མོས་པས་སྤྱོད་པ་ལས་དང་པོ་པའི་སྐབས་ཡིན། རབ་རྫི་བོ་ལྟ་བུའི་སེམས་བསྐྱེད་ནི། སེམས་ཅན་ཐམས་ཅད་སངས་རྒྱས་ཀྱི་ས་ལ་མ་བཀོད་ཀྱི་བར་རང་སངས་མི་རྒྱས་པ་སྟེ་སྤྱན་རེས་གཟིགས་ཀྱི་ཐུགས་བསྐྱེད་པ་ལྟ་བུ་ཡིན་ཏེ་དཀའ། འབྲིང་མཉན་པ་ལྟ་བུའི་སེམས་བསྐྱེད་ནི། རང་དང་སེམས་ཅན་ཐམས་ཅད་མཉམ་དུ་སངས་རྒྱས་པར་སེམས་བསྐྱེད་པ་ཡིན། ཐ་མ་རྒྱལ་པོ་ལྟ་བུའི་སེམས་བསྐྱེད་ནི། སེམས་ཅན་ཐམས་ཅད་ཕ་མ་ཤ་སྟག་ཡིན་པས། དེ་རྣམས་ཀྱི་དོན་སྒྲུབ་དགོས་ཀྱང་ད་ལྟ་བསྒྲུབ་མི་ནུས་པས། དང་པོ་རང་ཉིད་སངས་རྒྱས་ཐོབ་པར་བྱས་ནས། དེ་ལས་འབད་རྩོལ་མི་དགོས་པར། འབད་
མེད་ལྷུན་གྲུབ་ཀྱིས་ཕྲིན་ལས་ཀྱི་འཁོར་བ་མ་སྟོངས་ཀྱི་བར་དུ་སེམས་ཅན་ཐམས་ཀྱི་དོན་བྱ་བསམ་པ་འདི་གལ་ཆེ། དེ་ལྟར་ཀུན་རྫོབ་བྱང་ཆུབ་སེམས་བསྐྱེད་ཉམས་སུ་བླངས་པས། ས་དང་པོ་ཐོབ་པའི་ཚེ་དོན་དམ་སེམས་བསྐྱེད་སྐྱེ་བར་བཤད། ཕྱག་རྫོགས་ཀྱི་ལུགས་ལ་སྤྲོས་བྲལ་གྱི་རྟོགས་པ་སྐྱེས་པའི་དོན་དམ་སེམས་བསྐྱེད་ཡིན་པར་གསུངས། ཀུན་རྫོབ་སེམས་བསྐྱེད་སྨོན་འཇུག་གཉིས། །སོ་སོར་རྒྱས་པར་ལེན་ཐབས་ནི། བྱམས་པ་ནས་སློབ་དཔོན་ཐོག་མེད་ལ་བརྒྱུད་པ་ཡང་ཡོད་དེ། སོ་སོར་ཐར་པའི་སྡོམ་པ་གང་རུང་དང་ལྡན་པ། བྱང་ཆུབ་སེམས་དཔའི་སྡེ་སྣོད་ཤེས་པའི་དགེ་བའི་བཤེས་གཉེན་ཞིག་མ་གཏོགས་སུ་ཡིན་ལ་སྡོམ་པ་དེ་མི་སྐྱེ། སྨོན་འཇུག་སྟབས་གཅིག་ཏུ་ལེན་པའི་ཆོ་ག །འཇམ་དབྱངས་ནས་ཀླུ་སྒྲུབ་ལ་བརྒྱུད་པ། སློབ་དཔོན་ཞི་བ་ལྷ་ཡི་ལུགས་འདི་སུ་ལ་ཡང་སྐྱེ་བ་ཡིན་པ། ད་རེས་དེ་ཡི་ལུགས་ཡིན། དེ་ལ་སེམས་བསྐྱེད་པའི་རྟེན་ཚོགས་བསགས་དགོས་ཏེ། སྔོན་བྱང་ཆུབ་སེམས་དཔའ་འབྱོར་པ་ཆེ་བ་རྣམས་ཀྱིས། གཙུག་ལག་ཁང་བྱེ་བ་དང་ཡིད་བཞིན་གྱི་ནོར་བུ་ཕུལ་ནས་སེམས་བསྐྱེད་པའང་ཡོད། །
འབྱོར་པ་མེད་པ་རྣམས་ཀྱིས་ཕྱགས་དར་ཁྲོད་ཀྱི་གོས་དང་། རྩྭའི་སྒྲོན་མེ་ཕུལ་ནས་སེམས་བསྐྱེད་པའང་ཡོད། ཅི་ཡང་མ་འབྱོར་ནས་ཐལ་མོ་སྦྱར་ནས་སེམས་བསྐྱེད་པ་ཡང་ཡོད་དེ། ཚོགས་བསགས་ཀྱི་གཙོ་བོ་ཡན་ལག་བདུན་པ་ཡིན་པས། ཁྱེད་རང་རྣམས་ཀྱི་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བར་བསྒོམ། འདིར་བཤམས་པའི་མཆོད་པ་འདི་དམིགས་རྟེན་ཙམ་དུ་བྱས་ནས། ཁྱེད་རང་རྣམས་ཀྱི་ལུས་ལོངས་སྤྱོད་དགེ་བའི་རྩ་བ་དང་བཅས་པའི་ངོ་བོ་ཡིན་པ་ལ། རྣམ་པ་ཀུན་ཏུ་བཟང་པོའི་མཆོད་སྤྲིན་ལྟ་བུར་འཇིག་རྟེན་ཐམས་ཅད་བཀང་ནས། ཕྱོགས་བཅུའི་སངས་རྒྱས་ཐམས་ཅད་ལ་མཆོད་པ་འབུལ། དེ་རྣམས་ཀྱི་དྲུང་དུ་འཁོར་བ་ཐོག་མ་མེད་པ་ནས་དུས་དེ་རིང་ཕན་ཆད་ཀྱི་སྡིག་ལྟུང་ཅི་ཡོད་པ་ཐམས་ཅད་མཐོལ་ཞིང་བཤགས། འཕགས་པ་དང་སོ་སོའི་སྐྱེ་བོའི་དགེ་བའི་རྩ་བ་ཅི་མཛད་པ་ཐམས་ཅད་ལ་རྗེས་སུ་ཡི་རང་བསྒོམ། འཇིག་རྟེན་གྱི་ཁམས་གཞན་དང་གཞན་དག་ཏུ་མངོན་པར་རྫོགས་པར་སངས་རྒྱས་ནས་ཆོས་མི་གསུང་བར་བཞུགས་པ་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས། གང་དག་མྱ་ངན་ལས་འདའ་བ་དེ་
དག་ཐམས་ཅད་ལ་མྱ་ངན་ལས་མི་འདའ་བར་གསོལ་བ་འདེབས། དེ་ལྟ་བུའི་དགེ་བ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པའི་ཕྱིར་བསྔོ་བསམ་པ་གྱིས། སྤྲོ་ན་འདིར་སློབ་དཔོན་རྣམས་ཀྱིས་སྨོན་ཐུང་ཚར་གཅིག་འདོན། བསྡུ་ན་མི་དགོས། ད་འདི་ཡི་རྗེས་ཟློས་ལན་གསུམ་མཛོད། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །དེས་སེམས་བསྐྱེད་སྦྱོར་བའི་ཆོ་ག་སོང་ནས། དངོས་གཞི་ནི། ཐེག་པ་ཆེན་པོའི་དཀོན་མཆོག་གསུམ་ལ་སྐྱབས་སུ་བཟུང་ནས། སྔོན་གྱི་བྱང་ཆུབ་སེམས་དཔའ་རྣམས་ཀྱིས་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཏུ་སེམས་བསྐྱེད་པ་དེ་བཞིན་དུ། བདག་གིས་ཀྱང་སེམས་ཅན་ཐམས་ཅད་དྲིན་ཆེན་ཕ་མ་ཤ་སྟག་ཡིན་པས། དེའི་ཆེད་དུ་བྱང་ཆུབ་ཏུ་སེམས་བསྐྱེད་སྙམ་པའི་སྒོ་ནས་རྗེས་ཟློས་ལན་གསུམ་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །
སློབ་དཔོན་བདག་ལ་དགོངས་སུ་གསོལ། བདག་དུས་འདི་ནས་བཟུང་སྟེ། བྱང་ཆུབ་སྙིང་པོ་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །དེ་ལྟར་ལན་གསུམ་བརྗོད་པས་བྱང་ཆུབ་སེམས་བསྐྱེད་ཀྱི་སྡོམ་པ་སྐྱེས་བྱུང་བསམ་པ་གྱིས་ལ་ལེགས་སོ་བརྗོད། རྗེས་ཀྱི་བྱ་བ་བདག་དགའ་བ་བསྒོམ་པ་ནི། །བདག་མི་ལུས་ཐོབ་ནས་ད་བར་མ་ཤི་བར་དོན་དང་ལྡན། དེ་རིང་སེམས་བསྐྱེད་ཀྱི་སྡོམ་པ་ཐོབ་པས། གསེར་འགྱུར་གྱི་རྫས་ཀྱིས་ལྕགས་གསེར་དུ་བསྒྱུར་བ་ལྟར། སངས་རྒྱས་ཀྱི་རིགས་སུ་གྱུར་པ་ཡིན་བསམ་པ་གྱིས་ལ་རྗེས་ཟློས་མཛོད། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །
སངས་རྒྱས་སྲས་སུ་བདག་དེང་འགྱུར། །དེ་ལྟར་སྡོམ་པ་ཐོབ་པའི་བསླབ་བྱ་རྒྱས་པར་ཕྱེ་ན་མང་དུ་ཡོད་ཅིང་། མདོར་བསྡུས་ན། ཐེག་ཆེན་གྱི་བླ་མ་ལ་གུས་པ། ནག་པོའི་ཆོས་བཞི་སྤངས། དཀར་པོའི་ཆོས་བཞི་བསྟེན། སེམས་ཅན་བློས་མི་སྤངས་བའོ། །སྨོན་པའི་བསླབ་བྱ་བསྡུས་པ་ནི། སེམས་ཅན་གྱི་དོན་དུ་སངས་རྒྱས་ཐོབ་པར་བྱ་བསམ་པ་གྱིས་ལ་འདིའི་རྗེས་ཟློས་མཛོད། ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམ་སྟེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །གཞན་དགའ་བ་བསྒོམ་པ་ནི། དེ་རིང་བདག་གིས་སངས་རྒྱས་ཐམས་ཅད་ཀྱི་སྤྱན་སྔར། ཁྱེད་འགྲོ་བ་སེམས་ཅན་ཐམས་ཅད་སངས་རྒྱས་ཀྱི་སར་བཀོད་མ་ཚར་གྱི་བར་དུ། ཕན་པ་དང་བདེ་བ་བསྒྲུབ་པར་དམ་བཅས་པ་ཡིན་པས། ནམ་མཁའི་ལྷ་ཕྲན་དང་། གང་དག་སེམས་ཅན་ཡིད་ཀྱི་མངོན་ཤེས་ཅན་ཁྱེད་རྣམས་དགའ་བར་གྱིས་ཤིག་བསམ་པ་གྱིས་ལ་འདི་ཡི་རྗེས་ཟློས་མཛོད། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་
མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ད་སྨོན་ལམ་འདེབས་པ་འདི་ཡི་རྗེས་ཟློས་མཛོད། བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་ཀྱང་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལའང་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོང་པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །འོ་དེས་བྱང་ཆུབ་སེམས་བསྐྱེད་ཀྱི་སྡོམ་པ་ཐོབ་པ་ཡིན་པས་དེའི་བསླབ་བྱ་ནི། སེམས་ཅན་བློས་མི་བཏང་བ་དང་། སེམས་བསྐྱེད་དེའི་ཕན་ཡོན་དྲན་པ་དང་། ཚོགས་གཉིས་བསག་པར་བྱ་བ་དང་། ཡང་ཡང་བྱང་སེམས་སྦྱངས་བ་དང་། །དཀར་ནག་ཆོས
བརྒྱུད་བླང་དོར་ཏེ། ལྔ་པོས་སྨོན་པའི་བསླབ་བྱ་བསྡུས། །ཞེས་གསུངས་པ་ལྟར་རོ། །འཇུག་པའི་བསླབ་བྱ་ནི། གཙོ་བོར་བསླབ་བྱ་གསུམ་ཡིན་ཅིང་། དེའང་ཕར་ཕྱིན་དྲུག་ཏུ་འདུས་པས་དེའི་དབང་དུ་མཛད་ནས་སྡོམ་དུ་མཛད་པ་ནི། སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཤེས་རབ་སྟེ། །དེ་ལྟར་རྣམ་པ་དྲུག་པོ་ཡིས། །འཇུག་པའི་སེམས་བསྐྱེད་བསླབ་བྱ་བསྡུས། །ཞེས་གསུངས་པས། སེམས་ཙམ་པའི་ལུགས་ལ་ཕམ་འདྲ་བཞི། ཡན་ལག་གི་ཉེས་བྱས་བཞི་བཅུ་ཞེ་བཞི། བྱང་སྡོམ་དབུ་མ་ལུགས་དབང་རྣོན་ལ་རྒྱལ་པོ་བློན་པོ་སོགས་བཅོ་བརྒྱད། དབང་འབྲིང་བ་ལ་བཞི། དབང་རྟུལ་ལ་གཅིག་སྟེ། རྒྱལ་པོ་ལ་གདམས་པའི་མདོ་ལས། །རྒྱལ་པོ་ཆེན་པོ་ཁྱོད་ནི་འདི་ལྟར་བྱ་བ་བྱེད་པ་མང་བ་སྟེ། ཐམས་ཅད་ཀྱི་ཐམས་ཅད་ནས་ཐམས་ཅད་དུ་སྦྱིན་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་བསླབ་པར་མི་ནུས་ཀྱི། དེ་བས་རྒྱལ་པོ་ཆེན་པོ་ཁྱོད་ཡང་དག་པ་རྫོགས་པའི་བྱང་ཆུབ་ལ་འདུན་པ་དང་དད་པ་དོན་དུ་གཉེར་བ་དང་སྨོན་པས་འགྲོ་ཡང་རུང་། འགྲེང་ཡང་རུང་། འདུག་ཀྱང་རུང་། ཉལ་
ཡང་རུང་། སད་ཀྱང་རུང་། ཟ་ཡང་རུང་། འཐུང་ཡང་རུང་། རྟག་པར་རྒྱུན་དུ་དྲན་པས་ཡིད་ལ་བཟུང་སྟེ་སྒོམས་ཤིག །གཞན་གྱི་དགེ་བ་ལ་རྗེས་སུ་ཡི་རང་བར་གྱིས། །རྗེས་སུ་ཡི་རང་ནས་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་། རང་རྒྱལ་བ་ཐམས་ཅད་ལ་ཕུལ་ཅིག །ཕུལ་ནས་སེམས་ཅན་ཐམས་ཅད་དང་ཐུན་མོང་དུ་གྱིས་ཤིག །དེ་ནས་སེམས་ཅན་ཐམས་ཅད་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་བ་ཉིན་གཅིག་བཞིན་དུ་བླ་ན་མེད་པའི་བྱང་ཆུབ་ཏུ་བསྔོས་ཤིག །རྒྱལ་པོ་ཆེན་པོ་ཁྱོད་དེ་ལྟར་བྱེད་ན་རྒྱལ་སྲིད་ཡང་བྱེད་ལ་རྒྱལ་པོའི་བྱ་བ་ཡང་ཉམས་པར་མི་འགྱུར་རོ།། །བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར། ཞེས་གསུངས། དེས་ན་ཁྱེད་སྐུ་ཡོན་ཡོད་པ་རྣམས་ཀྱིས་ནི། བྱང་ཆུབ་སེམས་དཔའི་བསླབ་པ་དེ་རྣམས་ལ་བསླབ་པ་གལ་ཆེ། ཕལ་པ་རྣམས་ཀྱིས་ནི་དེ་རྣམས་ཤེས་དཀའ་སྟེ། དགེ་བའི་བཤེས་གཉེན་རྣམས་དབུས་གཙང་གྲྭ་སར་བྱོན་ནས། དབུ་མ་དང་ཕར་ཕྱིན་ལ་སློབ་གཉེར་མི་ཚེར་རྒྱོབ་རྒྱུའི་རྩ་བ་འདི་ཡིན་གོ་ཡང་དཀའ་ཞིང་བཤད་པ་ཤིན་ཏུ་རྒྱ་ཆེ་སྟེ། གོ་དཀའ་ཟེར་ན་བསྒྱུར་བཞག་པས་མི་ཆོག་
སྟེ། ཐེག་ཆེན་ཆོས་ཀྱི་རྩ་བ་འདི་ཡིན། འདི་མེད་ན་ཉམས་ལེན་ཇི་ལྟར་བཟང་ཡང་ཐེག་དམན་ཉན་རང་དུ་གོལ་འགྲོ། འདི་མེད་ན་ས་བོན་མ་བཏབ་པའི་སོ་ནམ་དང་འདྲ་སྟེ་འབྲས་བུ་སངས་རྒྱས་མི་ཐོབ། འདི་ཡི་ཕན་ཡོན་ལ་གཟུགས་མཆིས་ན་ནམ་མཁའ་ན་ཡང་མི་ཤོང་བ་ཡོད་ཅིང་། རང་ག་བག་མེད་དུ་བསྡད་ཀྱང་བསོད་ནམས་རྒྱུན་མི་འཚད་པར་སྐྱེ། སངས་རྒྱས་ཀྱི་སྲས་སུ་གྱུར་པས་འཇིག་རྟེན་ལྷ་མི་ཐམས་ཅད་ཀྱི་ཕྱག་འཚལ་བའི་གནས་སུ་གྱུར་པ་སྟེ། དཔལ་སྦྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་འདི་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ཆེར་ལྷག་འགྱུར། །ཞེས་དང་། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ནས་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པའི་ཕྱག་བྱ་འགྱུར། །ཞེས་དང་། སེམས་དེ་ཡང་དག་བླང་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་
ཤུགས། །རྒྱུན་མི་འཆད་པ་དུ་མ་ཞིག །ནམ་མཁའ་མཉམ་པ་རབ་ཏུ་འབྱུང་། །ཞེས་གསུངས། འདི་ཡི་བསླབ་བྱ་མདོར་བསྡུས་པ་གཅིག་ཏུ་དྲིལ་བ་ནི། དགེ་བའི་རྩ་བ་ཆེ་ཆུང་གང་བྱེད་ཀྱང་། རང་གི་དོན་ཁོ་ན་མ་ཡིན་པར། སེམས་ཅན་ཐམས་ཅད་ཀྱི་དོན་དུ་དམིགས་པ་དང་། རྗེས་ནས་ཀྱང་སེམས་ཅན་ཐམས་ཅད་ཀྱི་དོན་བྱ་བའི་ཕྱིར། རང་ཉིད་མངོན་པར་རྫོགས་པར་སངས་རྒྱས་པར་བྱ། དེ་ཡང་དཀའ་ཚེགས་མེད་པར་བར་ཆད་མེད་པར་མྱུར་དུ་སངས་རྒྱ་བའི་ཕྱིར། དེ་རིང་སྒྲུབ་པའི་དགེ་བའི་རྩ་བ་དེས་བདག་འདི་ནས་ཚེ་འཕོས་མ་ཐོག་ཏུ་བདེ་བ་ཅན་གྱི་ཞིང་ཁམས་སུ་སྐྱེ་བར་གྱུར་ཅིག་བསམ་པ་བྱས་ལ། ཤེས་ན་བདེ་སྨོན་དང་བསྔོ་བ་སོགས་བྱ། མི་ཤེས་ན་ཡང་བདེ་བ་ཅན་དུ་སྐྱེ་བར་ཤོག ཟེར་བ་དེ་ནུབ་མོ་རྒྱུན་དུ་བྱ། དེའི་ནང་དུ་བསླབ་བྱ་ཐམས་ཅད་འདུས་པ་ཡིན། དེ་ལྟར་མ་ཡིན་པར་རང་དོན་ཁོ་ནར་དགེ་བ་བྱས་ན་བྱང་སྡོམ་དང་འགལ་བས་ཉེས་པ་ཡང་ཆེ་སྟེ། །གལ་ཏེ་དེ་ལྟར་དམ་བཅས་ནས། །ལས་ཀྱིས་བསྒྲུབ་པར་མ་བྱས་ན། །སེམས་ཅན་དེ་དག་ཀུན་བསླས་པས། །བདག་གི་འགྲོ་བ་ཇི་ལྟར་འགྱུར། །ཞེས་གསུངས། བདེ་བ་
༄༅། །ཅན་དུ་སྐྱེ་བ་ལ་ཡང་བྱང་ཆུབ་སེམས་བསྐྱེད་འདི་གལ་ཆེ་སྟེ། །འོད་མདོ་དང་ཞིང་བཀོད་སོགས་ཀྱི་མདོ་ལས། བྱང་ཆུབ་ཀྱི་སེམས་བསྐྱེད་ནས་སྨོན་ལམ་བཏབ་ན་ཞིང་དེར་སྐྱེ་བར་གསུང་གིས། སྨོན་ལམ་མ་བཏབ་པར་སྐྱེ་བར་མ་གསུངས་སོ། །འདི་ཡི་བསྒོམ་བྱའི་དམིགས་པ་ནི་བྱམས་སྙིང་རྗེ་གཏོང་ལེན་གྱི་དམིགས་པ་ཁོ་ན་ཡིན་ནོ། །དེ་ལྟར་སྐྱབས་སེམས་ཀྱི་སྡོམ་པ་ཐོབ་ནས། རྒྱུན་གྱི་སྐྱབས་འགྲོ་དང་སེམས་བསྐྱེད་ཀྱང་མགོ་རྐང་ཚང་བར་འགྱུར་ལ། བསྐྱེད་རྫོགས་དང་སྔགས་བཟླས་པ་ཀུན་ཀྱང་རྨང་ལེགས་པའི་བའི་མཁར་དང་འདྲ་སྟེ་ལམ་དུ་འགྲོ་བ་ཡིན། འདི་མེད་ན་འཇིགས་སྐྱོབ་སྲུང་ཟློག་ཙམ་ལས། བྱང་ཆུབ་ཀྱི་ལམ་དུ་མི་འགྲོ། དེ་ལྟར་གལ་ཆེ་བ་སྐྱབས་སེམས་ཀྱི་སྡོམ་པ་ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ཝཾ༽ །ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་རྒྱུ་འབྲས་ཀྱི་གཏམ་རྒྱུད་བཞུགས་སོ།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ངན་སོང་སྡུག་བསྔལ་སྤང་བའི་ཐབས། ལས་རྒྱུ་འབྲས་ཀྱི་སྐབས་འདིར། གཏམ་རྒྱུད་འགའ་ཞིག་བཤད་ན། ཐ་མལ་པས་གོ་སླ་བས། མདོ་སྡེ་ལས་རྣམ་འབྱེད་ཀྱི་དོན་བསྡུས་ཏེ་བཤད་ན། སྔོན་གྲོང་ཁྱེར་ཁམ་མདུ་ན་ཚོང་པ་ཕྱུག་པོ་ཞིག་གིས་ལོ་དུས་སུ་ནོར་ཕྱུགས་མང་པོ་བསད་ནས་མཆོད་སྦྱིན་བྱས་ཏེ། འཆི་ཁ་བུ་ལ་ཡང་དེ་ལྟར་གྱིས་ཞེས་ཁ་ཆེམས་བཞག་པས། བུས་ཀྱང་དེ་བཞིན་ལོ་དུས་བྱས་སོ། །དེར་ནོར་ཕྱུགས་གཅིག་བཤའ་རྒྱུ་ལ་ཁྲིད་ནས་སོང་བ་དང་ང་རོ་ཆེན་
པོ་བྱེད་པ་ལ། དེ་ལ་དགྲ་བཅོམ་པ་ཞིག་གིས་གཟིགས་ནས། ཀྱེ་ཧུད་ཨེ་མ་ག་ལ་སྲིད་གསུངས། དེ་ཅི་ལགས་ཞེས་མི་གཅིག་གིས་དྲིས་པས་ལྐོག་ཏུ་བཤད་གསུངས་ནས་བཤད་པ། ནོར་བཤའ་རྒྱུ་དེ་ནི་སྔོན་ཚོང་པ་ཕྱུག་པོ་ལོ་དུས་སུ་བཤའ་ནས་མཆོད་སྦྱིན་བྱེད་ཅིང་ཁ་ཆེམས་བཞག་མི་དེ་ཡིན་ཏེ། ཁོ་རང་ཚང་གི་ནོར་ཕྱུགས་ལ་ཡང་ཡང་སྐྱེས་ཏེ་ད་རེས་འདི་དང་ལན་དྲུག་བཤས་པར་གྱུར། དགེ་སློང་དེས་རྟེན་ཡང་ཁྱོད་བདག་གིས་བཙུགས། མཆོད་སྦྱིན་ཡང་ཁྱོད་བདག་གིས་བྱས། ཕྱུགས་མང་པོ་ཡང་ཁྱོད་བདག་གིས་བསད་ནས་ད་སྐད་ཆེན་པོས་བོས་
པས་ཅི་ལ་ཕན། ཞེས་དུད་འགྲོ་ལ་གསུངས་པ་ལྟ་བུ་སྟེ། བཤས་མང་དུ་བྱེད་པ་ནི་རང་ཚང་གི་སྒོ་ནོར་དུ་སྐྱེས་ནས་ལན་མང་དུ་བཤའ་བར་འགྱུར་རོ། །ཡང་ལས་འབྲས་ཚེ་འདིའམ་ཕྱི་མ་ཚེ་གཞན་དུ་སྨིན་པ་ཡོད་དེ། དཔེར་ན་སྔོན་ཚེ་ལོ་དཔག་མེད་ཐུབ་དུས་དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བས་དགྲ་བཅོམ་པ་ཞིག་གི་མདུན་ནས་བསྙེན་གནས་ཡན་ལག་བརྒྱད་པ་ཞུས། ཉིན་ཞག་གཅིག་གི་ཁྲིམས་ལན་གཅིག་བསྲུང་། རེ་ཞིག་གི་ཚེ་ནོར་བུ་ལེན་དུ་འགྲོ་བ་ལ། མས་བཤོལ་ནས་མ་བཏང་བ་ལ། མའི་མགོ་ལ་བགོམས་ནས་སོང་ངོ་། །དེར་མགོ་མི་ཐོན་དོགས་ནས་ཁྲིམས་བརྒྱད་མནོས་ནས་གྲོགས་ལྔ་བརྒྱ་དང་བཅས་པ་རྒྱ་མཚོར་ཞུགས་པ་ལ་གྲུ་ཞིག་ནས་གཞན་རྣམས་ཤི་དེད་དཔོན་གྱི་བུས་ནི་ཟངས་ཀྱི་རིལ་ཆེན་གཅིག་ལ་འཇུས་ནས་ཕར་ཁར་ཕྱིན་པས། དེར་གྲོང་ཁྱེར་གསེར་གྱི་ར་བ་ཅན་ལྷའི་གནས་འདྲ་བར་ལྷ་མོ་བཞིས་ཁྲིད་དེ། ལོ་བརྒྱ་སྟོང་ཕྲག་མང་པོར་བདེ་སྐྱིད་མྱོང་ངོ་། །ཡང་སོང་བས་གྲོང་ཁྱེར་དངུལ་གྱི་ར་བ་ཅན་ན་ལྷ་མོ་བརྒྱད་ཀྱིས་ཁྲིད་དེ་བདེ་སྐྱིད་ལོ་བརྒྱ་སྟོང་དུ་མྱོང་ངོ་། །ཡང་སོང་བས་གྲོང་ཁྱེར་བཻཌཱུརྻའི་ར་བ་ཅན་ན་ཕྱིན་པས་
ན་ལྷ་མོ་བཅུ་དྲུག་གིས་ཁྲིད་དེ་ལོ་བརྒྱ་སྟོང་མང་པོར་བདེ་སྐྱིད་མྱོང་ངོ་། །ཡང་སོང་བས་གྲོང་ཁྱེར་ཤེལ་གྱི་ར་བ་ཅན་ནི་ལྷ་མོ་སུམ་ཅུ་སོ་གཉིས་ཀྱིས་ཁྲིད་དེ་ལོ་བརྒྱ་སྟོང་དུ་མར་བདེ་སྐྱིད་མྱོང་ངོ་། །དེ་ནས་སོང་བས་ཚེར་མའི་ནགས་ཚལ་ལྕགས་ཀྱི་ར་བ་ཅན་དུ་ཕྱིན་པས། རལ་གྲིས་འཁོར་ལོ་འཁོར་ཞིང་མགོ་ལ་གཅོད་པའི་མི་གཅིག་འདུག་འདི་ནི་ཉི་ཚེ་བའི་དམྱལ་བ་ཡིན་ཟེར། ཁྱོད་འདིར་འོང་བའི་ལས་ཅི་བྱས་དྲིས་པས། དེ་ཡི་ལོ་རྒྱུས་བཤད་པ་ན་ཁོང་གཉིས་བྱས་ལུགས་མཐུན་པར་སྣང་། ལམ་དུ་བདེ་སྐྱིད་འབྱུང་བ་ནི་ཡན་ལག་བརྒྱད་པའི་ཁྲིམས་བསྲུང་བའི་ཕན་ཡོན་ནོ། །རལ་གྲིས་འཁོར་ལོས་མགོ་བོ་གཅོད་པ་ནི་མའི་མགོ་ལ་བགོམས་པའི་ཉེས་པ་ཡིན་ཚུལ་ཟེར་ནས། བདག་གིས་སྒྲ་ཐོས་པ་ལ་ངའི་སྡིག་པ་ཟད་དེ། ཁྱོད་ངའི་མལ་དུ་འོང་བ་ཐོས་ཟེར་ནས་འཕོས་སོ། །དེ་ནས་ཁོ་རང་སྐག་ཅིང་བྱམས་སྙིང་རྗེ་གཏོང་ལེན་གྱི་དམིགས་པ་བསྒོམ་ཕ་མ་ལ་ཕྱག་འཚལ་སྐྱེ་བ་ཐམས་ཅད་དུ་ཕ་མ་ལ་བཀུར་སྟི་བྱེད་པར་སྨོན་ལམ་བཏབ། མ་དེས་ཀྱང་དགེ་བ་བྱས་ཤིང་བུ་ལ་བསྔོས་པས། འཁོར་ལོ་དེ་མགོ་ལ་མ་རེག་ཙམ་དུ་འཁོར་ཏེ་ལོ་
དྲུག་ཅུ་མ་ལོན་ཙམ་ཉི་ཚེ་བའི་དམྱལ་བ་དེར་སྡོད་ཅིང་དེ་ནས་ཚེ་འཕོས་ཏེ། འཁོར་ལོ་མགོ་ལ་མ་རེག་ཀྱང་བར་བར་ཀླད་པ་གཟེར་བར་གྱུར་ཏོ། །དེད་དཔོན་གྱི་བུ་དེ་ཕྱིས་སྟོན་པ་ཤཱཀྱ་ཐུབ་པ་ཉིད་ཡིན་པར་གསུངས་སོ། །དེ་ན་དཀོན་མཆོག་གསུམ་དང་ཕ་མ་དང་མཁན་སློབ་ལ་བཀུར་སྟི་གལ་ཆེ་བར་གསུངས་སོ། །ང་ལ་ཇི་ལྟར་བྱས་པ་དང་ཕ་མ་དང་མཁན་པོ་དང་སློབ་དཔོན་ལ་ཅི་ལྟར་བྱས་པ་དེ་དག་ནི་བྱེ་བྲག་མེད་ཅིང་མཚུངས་ཏེ། ཚེ་འདི་དང་ཕྱི་མ་ལ་རྣམ་པར་སྨིན་པ་མི་ཉམ་པ་མེད་དོ། །ཞེས་བཅོམ་ལྡན་འདས་ཀྱིས་གསུངས་སོ། །སྦྱིན་པ་བྱིན་ནས་ཕྱིས་འགྱོད་ན་ཕྱུག་པོར་སྐྱེས་ནའང་ཕྱིས་དབུལ་པོར་འགྱུར་ཏེ། སྔོན་ཁྱེའུ་གྲགས་པས་སངས་རྒྱས་ལོག་པར་དད་སེལ་དགེ་འདུན་དང་བཅས་པ་ལ་བ་བཞོན་ཞིག་ཕུལ་བས་ཕྱིས་དེ་ལ་འགྱོད་པ་སྐྱེས་པས། སྐྱེ་བ་ཐམས་ཅད་དུ་དང་པོ་ཕྱུག་ཅིང་ཕྱིས་དབུལ་པོར་གྱུར་ཏོ། །ཕྱིས་རྒྱལ་པོའི་ཁབ་ཏུ་སྐྱེས་པས་སྐྱེས་མ་ཐག་ཏུ་མ་ཤི་བས་སྐར་མ་ངན་པ་ལ་སྐྱེས་སོ་ཟེར་ནས་རོ་དང་མཉམ་དུ་དུར་ཁྲོད་དུ་བསྐྱལ་ཡང་བ་ཕུལ་བའི་འབྲས་བུས་རོའི་ནུ་མ་གཅིག་ལས་འོ་མ་བྱུང་ནས་མ་ཤི། ཕྱིས་ཤཱཀྱ་ཐུབ་པ་ལ་རབ་ཏུ་བྱུང་སྟེ་
ཐར་པ་ཐོབ་བོ། །ཡང་ཚེ་ཟད་ཀྱང་ལས་མ་ཟད་པ་ནི། རིགས་དྲུག་སོ་སོ་ནས་ཚེ་འཕོས་ནས་ཡང་དེར་སྐྱེས་ཏེ། མཉན་ཡོད་དུ་ཁྱིམ་བདག་དབུལ་པོ་ཞིག་ཁྱིམ་ལ་སེམས་ཆགས་ཤིང་ཤི་བ། ཁྱིམ་དེར་གླང་རྒལ་པ་ཅན་གཅིག་ཡོད་པའི་བུར་སྐྱེས་ཏེ། སྐྱེས་མ་ཐག་བྱ་རོག་གིས་ཟོས་སོ། །དེ་ལྟར་ལན་བདུན་དེར་སྐྱེས་ཤིང་ཟོས་སོ། །མོའུ་འགལ་གྱི་བུ་མ་ག་དྷར་བསོད་སྙོམས་ལ་བྱོན་པས། ཁྱིམ་བདག་ཅིག་གི་པང་དུ་བུ་ཐོགས། ཉ་ཤ་ཟ་ཞིང་ཉ་རུས་ཁྱི་མོ་ནག་མོ་གཅིག་འདུག་པར་འཕེན་ཞིང་འདུག །བསོད་སྙོམས་འབུལ་རྒྱུ་མེད་ཟེར། ཉ་ནི་ཚེ་སྔོན་གྱི་ཕ་སྟེ། ཕ་ཉ་པ་ཡིན་པས་ལན་དུ་མོ་ཉར་སྐྱེས་ནས་དེར་བསད་ཅིང་བྲོས་སོ། །ཁྱི་མོ་དེ་ནི་མ་ཡིན་ཏེ། སྦྱིན་པ་ཡང་མ་བཏང་སྡོམ་ནི། པ་ཡང་མ་བསྲུང་ནོར་དང་རིགས་རྒྱུད་ཀྱི་སེམས་རྩིས་བྱས་ནས་སེམས་ཀྱང་ཆགས་བཞིན་ཤི་བས། ཁྱིམ་དེ་ཡི་སྒོ་ཁྱི་ལ་ཡང་ནས་ཡང་དུ་སྐྱེས་ནས་ཁྱིམ་དེ་སྲུངས་ཤིང་བཀག་གོ །བུ་ཚ་དེ་ནི་ཚེ་སྔོན་གྱི་དགྲ་ཞིག་ཡིན་ཏེ་ཆུང་མའི་དོན་དུ་ཕ་བསད་དེ་ཁོ་བུད་མེད་དེ་ལ་ཆགས་པས་བུད་མེད་དེའི་ལྟོ་བར་སྐྱེས་སོ། །དེ་ལྟར་འཁོར་བ་ལ་སྙིང་པོ་མེད་ཚུལ་མོའུ་འགལ་གྱི་
བུས་གསུངས་སོ། །ཡང་སྔོན་འདས་པའི་དུས་ན་རྒྱལ་པོའི་ཞལ་ལྕེ་བ་ཞིག་ཡོད། ཡུལ་དེའི་ཆེས་ཀ་སྐྱེས་པ་ལ་དཔང་པོ་བྱེད་པ་ལ། དེའི་ཚ་བོ་ལ་མི་ཞིག་གིས་བུ་ལོན་མང་པོ་དགོས་པ་ལ། བློན་པོའི་ཆུང་མ་ལ་ལྐོག་བརྔན་བྱིན་ནས་ཆུང་མས་བློན་པོ་བསྐུལ་ཏེ། བུ་ལོན་པ་གཉིས་བློན་པོ་ལ་གཏུགས་པོས། བློན་པོས་རྫུན་སྨྲས་ཏེ་བུ་ལོན་མི་དགོས་སྨྲས་ནས་འཇལ་མ་བཅུག་གོ །དེའི་རྣམ་སྨིན་གྱིས་བློན་པོ་དེ་དམྱལ་བར་སྐྱེས་སོ། །དེ་ནས་སྐྱེ་བ་ལྔ་བརྒྱར་མིག་རྣ་བ་སོགས་དབང་པོ་མེད་པའི་ཤའི་གོང་བུར་སྐྱེས་སོ། །དེ་ནས་མཉན་ཡོད་དུ་ཁྱིམ་བདག་ཕྱུག་པོ་བུ་མེད་པ་ནོར་རྒྱལ་པོས་བཞེས་གྲབ་ཡོད་པ་ཞིག་གི་བུ་མཚན་མ་དང་ཁ་མ་གཏོགས་ཅི་ཡང་མེད་པ་ཞིག་བྱུང་ནས་བུག་པ་དང་ཁ་ཡོད་པས་གསོས་ནས་ནོར་རྒྱལ་པོས་མ་བཞེས་སོ། །དེ་ཅི་ལས་བྱུང་། བཅོམ་ལྡན་འདས་ལ་ཞུས་པས། །སྔོན་བྱུང་གསུངས། དེ་ཡང་བློན་པོ་དེ་སྦྱིན་པར་དགའ་བས་རྟག་ཏུ་ཕྱུག་པོར་སྐྱེས་ཀྱང་རྫུན་ཅིག་སྨྲས་པས་དབང་པོ་མ་ཚང་བར་གྱུར་ཏོ། །སྔོན་འདས་པའི་དུས་ན་མི་སུམ་ཅུ་སོ་གཉིས་ཀྱིས་བ་གླང་གཅིག་བརྐུས་ནས་རྒན་མོ་ཞིག་གི་ཁྱིམ་དུ་ཁྲིད་པས་བ་གླང་དེས་གསོད་པར་
ཤེས་ནས་ཁྱེད་རྣམས་གསོད་པར་གྱུར་ཅིག །ཅེས་སྨོན་ལམ་བཏབ་ནས། བ་གླང་དེ་བཤས་ནས་རྒན་མོ་དང་མཉམ་དུ་ཟོས་སོ། །ཡང་རྒན་མོ་ཞིག་གིས་སྤོས་ཉོས་ནས་མར་དང་སྦྱར་ཏེ་མཆོད་རྟེན་ལ་བྱུགས་པའི་རོགས་མི་སུམ་ཅུ་སོ་གཉིས་ཀྱིས་བྱས་ཏེ་སྐྱེ་བ་ཐམས་ཅད་དུ་མ་བུར་སྐྱེས་ཤིང་ཆོ་རིགས་བཙུན་ལ་ཕྱུག་པར་སྨོན་ལམ་བཏབ་བོ། །དགེ་སྡིག་དེ་དག་སོ་སོར་སྨིན་ཏེ། སྐྱེ་བ་ཐམས་ཅད་དུ་སྨོན་ལམ་བཏབ་བཞིན་སྐྱེས་ཀྱང་དུས་གཅིག་ཏུ་བ་གླང་གི་སྐྱེ་བ་དེས་གསོད་པ་ལན་ལྔ་བརྒྱ་བྱུང་ཞིང་། ཕྱིས་མཉན་ཡོད་ན་རྒྱལ་པོ་གསལ་རྒྱལ་གྱིས་བློན་པོ་རི་དྭགས་ཞེས་པའི་བུ་བདུན་གྱི་ཐ་ཆུང་ལ་མནའ་མ་ལྷ་མཚམས་མ་ཞེས་བྱ་བ་བུད་མེད་རིག་པ་ཅན་ཞིག་ཡོད་པ་རྒྱལ་པོས་ཀྱང་ཐུགས་གཅེས། དེ་ལ་སྒོ་ང་སུམ་ཅུ་རྩ་གཉིས་བྱུང་བ་ལས་བུ་དཔལ་རྩལ་དང་ལྡན་པ་སུམ་ཅུ་རྩ་གཉིས་ཚར་བ་ལ། བློན་པོ་གཞན་ཞིག་གིས་རྒྱལ་པོ་ལ་ཁྱེད་གསོད་པར་འདུག་གོ་ཞེས་དབྱེན་བྱས་པས་རྒྱལ་པོས་གྱད་སྟོབས་པོ་ཆེ་རྣམས་བཏང་ནས་དུས་གཅིག་ལ་བསད་དོ། །ལྷ་མཚམས་མ་ནི་བཅོམ་ལྡན་འདས་ཀྱི་དགེ་སློང་མར་གྱུར་ཏོ། །རྒྱལ་པོ་དེ་ནི་བ་གླང་གི་སྐྱེ་བ། མ་དེ་ནི་རྒན་
མོ་དེ། བུ་སུམ་ཅུ་སོ་གཉིས་ནི་རྐུན་མ་དེ་རྣམས་ཡིན་པར་གསུངས་སོ། །དེ་ལྟར་བ་གཅིག་བསད་པའི་འབྲས་བུ་ནི་དེ་ལྟར་རོ། །སྔོན་མི་ཕྱུག་པོ་ཞིག་ལ་བུ་མེད་ནས་ཆུན་མ་བཞག་པ་ལ་བུ་ཡོད་པ་ཆེན་མས་ཚང་སྨེ་ལ་ཁབ་བཙུགས་ནས་བསད། མོས་མ་བསད་ཟེར་ནས་སྨོན་ཚུལ་ལོག་པའི་མནའ་བསྐྱལ་ལོ། །ཡང་རང་སངས་རྒྱས་གཅིག་ལ་བསོད་སྙོམས་ཕུལ་བས། དེ་ནམ་མཁའ་ལ་འཕུར་བ་མཐོང་ནས་མོས་དད་པ་སྐྱེས་ཏེ། ང་ཡང་ཁྱེད་འདྲ་བར་གྱུར་ཅིག །ཅེས་སྨོན་ལམ་བཏབ་བོ། །དེར་བུ་བསད་པས་ངན་སོང་དུ་སྐྱེས་ནས་སྡུག་བསྔལ་དཔག་མེད་མྱོང་ངོ་། །ཕྱིས་མཉན་ཡོད་ན་བུད་མེད་མཆོག་ཏུ་གྱུར་པ་ཞིག་ཏུ་སྐྱེས་ནས་བག་མ་ལ་སོང་ནས་བུ་གཉིས་ཡོད་པ་ལ་མི་དེ་དུག་སྦྲུལ་གྱིས་བསད། །བུ་གཅིག་ཆུས་ཁྱེར། གཅིག་སྤྱང་ཀིས་ཟོས། ཕ་མིང་ལ་མེ་མཆེད་ནས་ཕ་མ་མིང་པོ་ཐམས་ཅད་ཚིག །ཡང་མི་གཞན་ཞིག་དང་མཉམ་དུ་བསྡད་ནས་བུ་གཅིག་ཡོད་ཛ། མི་དེས་ཆང་བཟི་བྱས་ནས་བུ་བསད་ནས་ཤ་མོ་ལ་མི་ཟ་བའི་དབང་མེད་བྱས་ནས། དེར་མོ་སྡུག་ནས་བྲོས་སོང་བས། མི་གཞན་ཞིག་གིས་བུད་མེད་ཤི་བ་དང་འཕྲད་ནས་མོ་བཞག་པ་
ལ་མི་དེ་ཤི། དེར་ས་ཆའི་སྲོལ་ཡིན་པས་མོ་རོ་དང་མཉམ་དུ་དུར་ནང་དུ་བཅུག་པ་ལ། རྐུན་མས་དུར་རློག་པས་མོ་ཁྱེར་ནས་ཆུང་མ་བྱས་པས། རྐུན་མ་ལ་ཁྲིམས་ཕོག་ནས་རྒྱལ་པོས་བསད། ཡང་རོ་དང་མཉམ་དུ་དུར་ནང་དུ་བཅུག་དུར་སྤྱང་ཀིས་རློག་པས་མོ་ཐར་ཏེ། བཅོམ་ལྡན་འདས་མཇལ་ནས་རབ་ཏུ་བྱུང་སྟེ། དགྲ་བཅོམ་ཐོབ་ཀྱང་ལྕགས་སྲེག་གི་ཐུར་མ་གཅིག་སྤྱི་བོ་ནས་རྐང་མཐིལ་གྱི་བར་དུ་ཟུག་ནས་དུས་རྟག་ཏུ་ཟུག་གཟེར་ཆེ་བར་བྱུང་ངོ་། །དེ་ནི་ཁབ་བཙུགས་པའི་ལས་ལྷག་མ་དང་། ཡུགས་སར་ལན་མང་དུ་གྱུར་པ་ནི་སྨོན་ཚུལ་ངན་པ་དང་། དགྲ་བཅོམ་ཐོབ་པ་རང་སངས་རྒྱས་ལ་བསྙེན་བཀུར་བ་སྟེ་སོ་སོར་ལུས་གཅིག་ལ་སྨིན་པའོ། །སྔོན་སངས་རྒྱས་རྣམ་པར་གཟིགས་ཀྱི་བསྟན་པ་ལ། དགེ་སློང་སྟོང་ཕྲག་བཅུས་དགྲ་བཅོམ་པའི་འབྲས་བུ་ཐོབ་སྟེ། དགོན་གཅིག་ན་བཞུགས་པ་ལ་ཚོང་པ་རྣམས་ཀྱིས་རིན་པོ་ཆེ་ཞིག་ཕུལ་བས། ལས་བྱེད་པའི་དགེ་སློང་རྣམས་ལ་གཏད་ནས་ཕྱིས་འཚོ་བ་བསྲབས་ནས་བཙོང་བསམ་པ་ལ། འདི་ང་ལ་བྱིན་པ་ཡིན་ཁྱེད་སྤྱི་ལ་མིན་ཟེར། ཡིན་ཚུལ་སྨྲས་པས་འདི་ངའི་ཡིན་ཁྱེད་རྣམས་སྐྱག་པ་ཟའམ་
ཟེར་བས། དེ་ཉིད་ཚེ་འཕོས་མ་ཐག་ཏུ་དམྱལ་བ་ཆེན་པོར་སྐྱེས། བསྐལ་པ་དགུ་བཅུ་རྩ་གཅིག་ཏུ་ངན་སྐྱུག་གི་ནང་དུ་སྐྱེས། འདས་པའི་སངས་རྒྱས་མང་པོའི་རིང་ལ་ངན་སྐྱུག་གི་ནང་དུ་སྐྱེས། དེ་ནས་བྱ་རྒོད་ཕུང་པོའི་ཉེ་ལོགས་གྲོང་ཁྱེར་མཚོ་ཆུང་གཅིག་ལ་མི་ཐམས་ཅད་ཀྱི་གཤང་གཅི་དོར་ཞིང་དྲི་ང་བའི་ནང་དུ་སྲིན་འབུ་ཆེན་པོ་སྦྲུལ་འདྲ་བ་རྐང་ལག་བཞི་དང་མིའི་ཁ་མིག་ཅན་གཅིག་ལ་སྲིན་འབུ་ཆུང་བ་མང་པོས་ཟ་ཞིང་མཚོ་དེའི་ནང་ན་ཟུག་གཟེར་གྱིས་སྟེང་འོག་ཏུ་རྒྱུག་གོ །དེ་རྒྱུག་པ་ན་ཡང་མི་གཙང་བའི་དྲི་ངད་ཁྱབ་སྟེ། ལོ་ཁྲི་ཕྲག་དུ་མ་ན་ཤི་ཡང་དེ་ཉིད་དུ་སྐྱེས་ཏེ། སངས་རྒྱས་སྟོང་མ་རྫོགས་ཀྱི་བར་དུ་དེར་གནས་དགོས་པར་གསུངས་སོ། །དགེ་སློང་ཀུན་ཏེའི་ལེའུའོ།། །།བསྐལ་པ་གྲངས་མེད་པའི་གོང་དུ་ཡུལ་ཝཱ་རཱ་ཎ་སཱིར་མི་ཞིག་གིས་ནོར་ཐམས་ཅད་གསེར་དུ་བསྒྱུར་ནས་གསེར་བུམ་པ་བདུན་སར་སྦས་སོ། །ཕྱིས་ཤི་ཁ་དེ་ལ་སེམས་ཐོགས་ནས་སྦྲུལ་དུ་སྐྱེས་ཏེ། གསེར་དེ་སྲུང་ཞིང་ལོ་དུ་མ་ལ་གནས། གྲོང་ཁྱེར་ཞིག་ནས་ས་སྟོང་དུ་གྱུར་ཀྱང་སྦྲུལ་དུ་ཡང་ཡང་སྐྱེས་ཤིང་འདུག་པ་ལ། མི་ཞིག་འོང་བ་ལ་སྦྲུལ་དེས་བོས་ནས། ང་ལ་གསེར་ཡོད་པ་
དགེ་འདུན་ལ་སྟོན་མོ་གྱིས། དེ་ཉིན་ང་ཡང་དེར་བསུས་དེ་ལྟར་མི་བྱེད་ན་གནོད་པ་བྱེད་ཟེར་བས། མིས་ཀྱང་གསེར་བུམ་གཅིག་ཁྱེར་ནས་བཙོང་སྟེ་དགེ་འདུན་ལ་སྟོན་མོ་བྱེད་ཉིན་སྨྱུག་གཟེབ་ཁྱེར་ནས་སྦྲུལ་བསུས། སྦྲུལ་ལ་དགེ་འདུན་གྱིས་ཆོས་བཤད་པས་གསེར་བུམ་པ་དྲུག་ཡང་ཕུལ་ལོ། །སྦྲུལ་ལྷར་སྐྱེས་སོ། །སྦྲུལ་ཤཱ་རིའི་བུ་མི་དེ་སྟོན་པ་ཡིན་པར་གསུངས་སོ། །སངས་རྒྱས་འོད་སྲུང་གི་ཚེ་དགེ་སློང་དགྲ་བཅོམ་པ་རྒན་པོ་སྐད་མི་སྙན་པ་གཅིག་དང་། གཞོན་ནུ་སྐད་སྙན་པ་གཉིས་འདོན་པ་དབྱངས་བྱེད་པ་ལ། གཞོན་པས་ཁྱོད་ཀྱི་དབྱངས་ནི་ཁྱི་ཟུག་པ་དང་འདྲའོ་སྨྲས་པ་ལ། དེ་སྐད་མ་སྨྲ་ང་ནི་དགྲ་བཅོམ་པའོ། །གསུངས་པས་འགྱོད་ནས་བཤགས་པ་བྱས་ཀྱང་སྐྱེ་བ་ལྔ་བརྒྱ་ལ་ཁྱིར་སྐྱེས་ཏེ། ཕྱིས་མཉན་ཡོད་ན་ཁྱི་གཅིག་ཏུ་སྐྱེས་པས་ཚོང་པའི་བུ་ཚས་རྐང་པ་བཅག་ནས་ས་སྟོང་དུ་བསྐྱུར་བ་ལ་ཤཱ་རིའི་བུས་ཟས་བྱིན་ཞིང་ཆོས་བཤད་པས་ཚེ་འཕོས་ནས་བྲམ་ཟེའི་བུར་སྐྱེས་པ་ཤཱ་རིའི་བུ་ལ་དགེ་ཚུལ་བྱས་ནས་དགྲ་བཅོམ་པ་ཐོབ་བོ། །དེ་ཡན་ཆད་སྡིག་པའི་ཉེས་དམིགས་ཀྱི་གཏམ་རྒྱུད་ཡིན་ལ། དགེ་བའི་ཕན་ཡོན་ནི། མདོ་སྡེ་མཛངས་
བླུན་ལས་གསུངས་པའི་དོན་བསྡུས་ཏེ་བཤད་ན། སྔོན་སངས་རྒྱས་འོད་སྲུང་གི་བསྟན་པའི་མཇུག་ཏུ། བྲམ་ཟེ་གཉིས་ཀྱིས་བསྙེན་གནས་སྲུང་བ་ལ། གཅིག་གིས་རྒྱལ་པོར་སྐྱེ་བའི་སྨོན་ལམ་བཏབ་པས་རྒྱལ་པོར་སྐྱེས། གཅིག་གིས་ལྷར་སྐྱེ་བའི་སྨོན་ལམ་བཏབ་ཀྱང་། དེ་ནུབ་ཆུང་མས་དགོང་མི་ཟ་ཁ་མེད་བྱས་ནས་ཟོས་པས་ཀླུར་སྐྱེས། རྒྱལ་པོ་དེའི་གཡོག་གཟའ་ཤིང་གི་ར་བ་སྲུང་མཁན་ཞིག་ཡོད་པས་ཆུ་མིག་ནང་ནས་ཤིང་ཏོག་ཤིན་ཏུ་ཆེ་ཞིང་མངར་བ་ཞིག་རྙེད་ནས། རྒྱལ་པོའི་སྒོ་སྲུང་ལ་ཕུལ། དེས་བཙུན་མོ་ལ། དེས་རྒྱལ་པོ་ལ་ཕུལ་བས། དེར་རྒྱལ་པོས་རྩད་བཅད་ནས་འདི་རྙེད་མཁན་དེས་འདི་འདྲ་བ་མང་དུ་ཕུལ་ཅིག །མ་ཕུལ་ན་གསོད་ཟེར་བས། མི་དེ་ངུ་ཞིང་ཆུ་མིག་རྩར་བསྡད་པས་ཀླུ་དེ་མིར་སྤྲུལ་ནས་ཅི་ཉེས་ན་ཟེར། ལོ་རྒྱུས་བཤད་པས། ཀླུ་དེས་ཤིང་ཐོག་གཞོང་པ་གང་བསྐུར་ནས་རྒྱལ་པོ་ཁྱོད་དང་ང་གཉིས་གྲོགས་ཡིན་པས། ཁྱོད་བསྙེན་གནས་གཙང་མ་གཅིག་བསྲུང་བས་རྒྱལ་པོར་སྐྱེས། ང་མ་གཙང་བས་ཀླུར་སྐྱེས། ང་ལ་བསྙེན་གནས་ཡན་ལག་བརྒྱད་པའི་དཔེ་ཞིག་བྱིན། དེ་མི་སྦྱིན་ན་ངེས་ཡུལ་འདི་མཚོར་བསྒྱུར་ནས་རླག་
པར་བྱེད་ཅེས་ཕྲིན་བསྐུར་བས། བསྟན་པ་ནུབ་ནས་དེའི་དཔེ་རྙེད་པར་མི་འདུག་ཟེར། རྒྱལ་པོས་བློན་པོ་ལ་ཚོལ་མ་རྙེད་ན་ཁྱོད་གསོད་ཟེར། བློན་པོས་ཕ་རྒན་པོ་གཅིག་ཡོད་པ་ལ་དྲིས་པས། ཁྱིམ་གྱི་ཀ་བ་འདི་ལ་རྟག་ཏུ་འོད་འབྱུང་དོ་བས་ལྟོས་ཟེར། ཀ་བ་གཤགས་པའི་ནང་ནས་རྟེན་འབྲེལ་འབྱུང་བ་བཅུ་གཉིས་ཀྱི་མདོ་དང་། །ཉིན་ཞག་གཅིག་གི་ཁྲིམས་བརྒྱད་པའི་དཔེ་བྱུང་། རྒྱལ་པོས་གསེར་གྱི་སྒྲོམ་བུར་བཅུག་ནས་ཀླུ་ལ་བསྐུར། ཀླུ་དགའ་ནས་རྒྱལ་པོ་ལ་རིན་པོ་ཆེ་མང་དུ་ཕུལ་ལོ། །ཀླུ་དང་རྒྱལ་པོ་གཉིས་བསྙེན་གནས་སྲུང་ཞིང་གཞན་ཡང་ཆོས་ལ་བསྐུལ་བས་ཁོང་གཉིས་ལྷར་སྐྱེས་ཏེ། ཕྱིས་ཤཱཀྱ་ཐུབ་པ་མཇལ་དུ་འོང་ནས་ཆོས་ཉན་ནས་རྒྱུན་ཞུགས་ཀྱི་འབྲས་བུ་ཐོབ། ནམ་ཡང་ངན་སོང་དུ་མི་ལྟུང་ཞིང་ལྷ་མིའི་བདེ་སྐྱིད་མྱོང་སྟེ་མཐར་མྱང་འདས་ཐོབ་པར་ལུང་བསྟན་ཏོ། །ཀུན་ཏུ་རྒྱུས་ཚུལ་ཁྲིམས་བསྲུང་བའི་ལེའུ་སྟེ་གསུམ་པའོ།། །།སྔོན་བསྐལ་པ་གྲངས་མེད་པའི་སྔོན་རོལ་དུ་རྒྱལ་པོ་ཚང་སྦྱིན་འཁོར་བཅས་སྐྱེད་མོས་ཚལ་དུ་བྱོན་པའི་ར་བའི་རྒྱབ་ནས་མི་ཞིག་སྐད་ཆེན་པོས་གླུ་བླངས་པས། རྒྱལ་པོ་ཁྲོས་ཏེ་བཙོན་དུ་བཟུང་།
ནས་བསད་པར་ཤོམས་པས་བློན་པོས་རྒྱལ་པོ་ལ་མ་གསོད་པར་ཞུས་ནས་མ་བསད་དེ་གཡོག་བྱེད་བཅུག །ཕྱིས་རབ་ཏུ་བྱུང་ནས་རང་སངས་རྒྱས་སུ་གྱུར་པ་ལ། བློན་པོས་བསྙེན་བཀུར་བྱས་སྨོན་ལམ་བཏབ་པས། བློན་པོ་སྐྱེ་བ་ཐམས་ཅད་དུ་རིགས་མཐོ་ཞིང་ཕྱུག་ལ་ཚེ་རིང་བའི་ལྷ་དང་མིའི་ལུས་གཞན་བས་བརྒྱ་སྟོང་འགྱུར་གྱི་ལྷག་པ་ཁོ་ནར་སྐྱེས། ཕྱིས་བློན་པོ་ཆེན་པོ་ཕྱུག་ཅིང་བུ་མེད་པ་གཅིག་གི་བུར་སྐྱེས་པ་ཕས་རབ་ཏུ་བྱུང་མ་བཅུག་པས། རིགས་དམའ་བ་ཞིག་ཏུ་སྐྱེས་ན་རབ་ཏུ་བྱུང་ཆོག་སྙམ་ནས། བྲག་མཐོན་པོ་ལ་མཆོངས་ནས་མ་གནོད། ཆུ་ལ་ལྕེབ་ཀྱང་མ་ཁྱེར། བཙན་དུག་ཟོས་ཀྱང་མ་གནོད། རྒྱལ་པོའི་ཁྲིམས་བཤིགས་པས་རྒྱལ་པོས་མདའ་ལན་གསུམ་འཕང་ཡང་མདའ་ཚུར་ལ་ལྷུང་། དེར་རྒྱལ་པོས་ཁྱོད་ལྷ་འདྲེ་ཡིན་ནམ་མི་ཡིན་ཟེར་བས། ཤི་འདོད་ཚུལ་ཞུས་པས། རྒྱལ་པོས་རབ་ཏུ་བྱུང་བ་གནང་སྟེ། ཤཱཀྱ་ཐུབ་པའི་དྲུང་དུ་རབ་ཏུ་བྱུང་སྟེ་དགྲ་བཅོམ་ཐོབ་བོ། །དེ་ལྟར་སྲོག་སྐྱབས་བྱས་པས་བློན་པོ་དེ་གར་སྐྱེས་ཀྱང་ཚེ་ལ་བར་ཆད་ཀྱིས་མི་ཚུགས་མཐར་དགྲ་བཅོམ་ཐོབ་བོ། །ཡང་སྔོན་བསྐལ་པ་དགུ་བཅུ་རྩ་གཅིག་གི་ཕ་རོལ་ན། མི་དབུལ་
པོ་གཅིག་གིས་ཤིང་བཅོང་ནས་གསེར་གྱི་དོང་ཙེ་གཉིས་ཐོན། དེ་སངས་རྒྱས་གསེར་ཐུབ་ཀྱི་དགེ་འདུན་དང་བཅས་པ་ལ་ཕུལ་བས། བསྐལ་པ་དགུ་བཅུ་རྩ་གཅིག་གི་བར་དུ་མིར་སྐྱེས་ཤིང་། གར་སྐྱེས་ཀྱང་ལག་ཏུ་གསེར་གྱི་དོང་ཙེ་ཡོད་པར་གྱུར། ནོར་ཕྱུག་ཅིང་ལོངས་སྤྱོད་ཟད་པ་མེད་པར་གྱུར་ཏེ། ཕྱིས་རྒྱལ་པོའི་ཁབ་ན་ཁྱིམ་བདག་མོ་གཅིག་ལ་བུར་སྐྱེས་པ་བལྟ་བས་ཆོག་མི་ཤེས་པ་ཁུ་ཚུར་བཅང་པ་ཞིག་སྐྱེས། ཁུ་ཚུར་གཉིས་ཕྱེས་པས་གསེར་གྱི་དོང་ཙེ་གཉིས་གདའ། དེ་བླངས་བས་ཀྱང་རེ་རེ་བྱུང་ནས་གསེར་གྱི་བང་མཛོད་གང་ཡང་བུའི་དོང་ཙེ་མ་ཟད། ཕྱིས་སྟོན་པ་ལ་རབ་ཏུ་བྱུང་ནས་དགྲ་བཅོམ་ཐོབ་སྟེ་དགེ་སློང་གསེར་གྱི་དབྱིག་གོ །ཡང་སྔོན་སངས་རྒྱས་གསེར་ཐུབ་ཀྱི་བསྟན་པ་ལ། །མི་དབུལ་པོ་ཞིག་གིས་དགེ་འདུན་ལ་དད་པས་ཕྱགས་དར་བྱས། སྤང་ནས་མེ་ཏོག་བཏུས་ཏེ་གཏོར་ནས་སྨོན་ལམ་བཏབ་པས། བསྐལ་པ་དགུ་བཅུ་རྩ་གཅིག་ཏུ་གར་སྐྱེས་ཀྱང་གཟུགས་བཟང་ཞིང་མཛེས་པ་དང་། བཟའ་བཏུང་ཁྲི་སྟན་ཕུན་སུམ་ཚོགས་པར་གྱུར་ཏེ། ཕྱིས་མཉན་ཡོད་ན་ཁྱིམ་བདག་ཆེ་ཞིང་མཐོ་བའི་བུར་སྐྱེས་ཏེ། གཟུགས་བལྟ་བས་
ཆོག་མི་ཤེས་པར་གྱུར་ཏེ་སྐྱེས་མ་ཐག་ཏུ་ལྷ་རྫས་མེ་ཏོག་གི་ཆར་བབས་པས་མིང་ཡང་ལྷའི་མེ་ཏོག་བཏགས། ཕྱིས་བུ་དེས་ཤཱཀྱ་ཐུབ་པ་འཁོར་དང་བཅས་པ་སྤྱན་དྲངས་བསྙེན་བཀུར་བྱས་པ་ལ། ཁྱིམ་དུ་སངས་རྒྱས་བྱོན་ཁར་རིན་པོ་ཆེའི་གདན་དང་ཞལ་ཟས་ཐམས་ཅད་བསམ་པ་ཙམ་ནས་བྱུང་། དེ་ནས་རབ་ཏུ་བྱུང་ནས་དགྲ་བཅོམ་པ་ཐོབ་བོ། །དེས་ན་སྦྱིན་པ་ཆུང་ངུ་ལ་ཡང་བསོད་ནམས་མེད་དོ་སྙམ་ནས་མ་བརྙས་ཤིག་གསུངས་སོ། །ཡང་སྔོན་སངས་རྒྱས་གསེར་ཐུབ་ཀྱི་བསྟན་པ་ལ། དགེ་འདུན་རྣམས་ཁྱིམ་བདག་སོ་སོས་བསྙེན་བཀུར་བྱས་པ་ལ་མི་དབུལ་པོ་ཞིག་གིས་ཡི་རང་ཞིང་རྡེའུ་དཀར་རྒྱུ་ལས་བྱས་པའི་ནོར་བུ་སྤར་གང་དགེ་འདུན་ལ་གཏོར་ཞིང་སྨོན་ལམ་བཏབ་པས། བསྐལ་པ་དགུ་བཅུ་རྩ་གཅིག་ཏུ་ནོར་བུ་དང་ཟས་གོས་ལོངས་སྤྱོད་ལྷུན་གྱིས་གྲུབ་པར་གྱུར། དེ་ནས་མཉན་ཡོད་དུ་ཁྱིམ་བདག་ཞིག་གི་བུར་སྐྱེས་མ་ཐག་ནམ་མཁའ་ནས་རིན་པོ་ཆེ་སྣ་བདུན་ཆར་བཞིན་བབས་ནས་ཁྱིམ་གང་བས་བུའི་མིང་ལྷའི་རིན་ཆེན་བཏེག་གོ ། །ཕྱིས་རབ་ཏུ་བྱུང་ནས་ཐུབ་པའི་དྲུང་དུ་དགྲ་བཅོམ་ཐོབ་བོ། །ཡང་སྔོན་སངས་རྒྱས་བསོད་སྐྱབས་བཞུགས་པའི་ཚེ། དགེ་སློང་
ཞིག་ཡུལ་ཐམས་ཅད་དུ་དགེ་བསྐུལ་ལ་བྱོན་ནོ། །དེར་བུད་མེད་འདའ་ནི་ཀ་བྱ་བ་ཤིན་ཏུ་དབུལ་ཞིང་ཕོངས་ཏེ། ཁྱོ་ཤུག་གཉིས་ལ་རས་ཡུག་གཅིག་ལས་མེད་དེ། སྒོ་ན་སུ་འགྲོ་དེ་ལ་གྱོན་རེས་བྱེད་ནས་གཅིག་གཅེར་བུར་འདུག་གོ །དེར་དགེ་སློང་གི་བུད་མེད་དེ་ལ་སྦྱིན་པའི་ཕན་ཡོན་གསུངས་པས། མོས་མི་བདག་ལ་ཡང་བསྟུན་ནས་རས་ཡུག་ཕུལ་ཏེ་གཉིས་ཀ་གཅེར་བུ་ཁྱིམ་ན་ཡིབ་སྟེ་བསྡད་དོ། །དགེ་སློང་གིས་རས་ཡུག་སངས་རྒྱས་ལ་ཕུལ་བས་རས་དྲི་མ་ཅན་དེ་ཕྱག་ཏུ་བསྣམས་ནས། སྦྱིན་པ་རྣམ་པར་དག་པ་འདི་ཁོ་ན་ཡིན་ནོ་གསུངས་པས་རྒྱལ་པོ་དང་བཙུན་མོས་ལུས་གོས་དང་རྒྱན་ཕུད་དེ་ཁོང་གཉིས་ལ་བསྐུར་རོ། །ཁོང་གཉིས་འོང་ནས་སངས་རྒྱས་ལ་ཆོས་ཉན་ནོ། །དེ་ནས་བསྐལ་པ་དགུ་བཅུ་རྩ་གཅིག་ཏུ་གར་སྐྱེས་ཀྱང་རས་གོས་དང་བཅས་ཏེ་སྐྱེས་ནས་ལོངས་སྤྱོད་ཆེན་པོ་དང་ལྡན་ནོ། །ཕྱིས་མཉན་ཡོད་ན་ཁྱིམ་བདག་མོ་ཞིག་ལ་བུ་མོ་བལྟ་བས་ཆོག་མི་ཤེས་པ་ཞིག་རས་དཀར་འཇམ་པོ་གྱོན་པ་ཞིག་སྐྱེས་ནས་རས་དཀར་མོ་བཏགས། བུ་མོ་ཚར་བཞིན་རས་ཡང་ཚར་ཏེ་གོས་གཞན་མ་དགོས་སོ། །དེ་ནས་ཐུབ་པའི་དྲུང་དུ་དགེ་སློང་མ་ཞུས་
ནས། དགེ་སློང་མའི་གོས་ཐམས་ཅད་རས་དེ་ལ་རང་གྲུབ་ཏུ་བྱུང་ངོ་། །དེ་ནས་དགྲ་བཅོམ་པ་ཐོབ་བོ། །སྔོན་ཡུལ་ཨ་པ་དེ་བ་ན། ཁྱིམ་བདག་ལོངས་སྤྱོད་ཆེ་ཞིང་སེར་སྣ་ཆེ་ལ་སྙིང་རྗེ་མེད་པ་ཞིག་ལ། གཡོག་མོ་རྒན་མོ་ཞིག་ཡོད་པས་མི་ཚེལ་ལས་ཀ་བྱས་ཀྱང་གོས་ཀྱིས་ལུས་མ་ཐུམ། ཟས་ཀྱང་མ་མྱོང་ནས། ད་ང་ལ་ཟས་གོས་ནི་མེད་རྒས་དྲག་ཀྱང་ལ་ས་ཀ་ནི་དགོས་འཆི་རྒྱུ་མེད་སྙམ་ནས་ཆུ་ལེན་སར་ངུ་འབོད་བྱེད་ཅིང་ཡོད་ཛ། དེར་འཕགས་པ་ཀ་ཏ་ཡ་ན་བྱོན་ནས། ཁྱོད་དབུལ་ཞིང་སྡུག་བསྔལ་བ་འདི་ཨེ་བཙོང་གསུངས། ཇི་ལྟར་བྱ་ཞུས་པས་ཁྱོད་རང་ཁྲུས་གྱིས་ལ་ང་ལ་ཆུ་ལྷུང་བཟེད་གང་ཕུལ་གསུངས་ནས་དེ་ལ་བསྔོ་བ་ཤོ་ལོ་ཀ་གཅིག་མཛད། བསླབ་པའི་ཚིག་རྐྱང་གཅིག་གནང་། སངས་རྒྱས་ཀྱི་མཚན་ནི་བརྗོད་དུ་བཅུག་གོ །དེར་མོ་ཚེ་འཕོས་ནས་སུམ་ཅུ་རྩ་གསུམ་པའི་ལྷའི་བུ་མོར་སྐྱེས་སོ། །དེ་ནས་ལྷ་མོ་དེ་འཁོར་ལྔ་བརྒྱ་དང་བཅས་ནས་རྒན་མོའི་རུས་བུ་ལ་མཆོད་པ་བྱེད་པ་ཡུལ་དེའི་མི་རྣམས་ཀྱིས་མཐོང་ནས། ཅི་ཡིན་དྲིས་པས་ལོ་རྒྱུས་བཤད་དེ་ལྷ་དེ་དག་ཀ་ཏ་ཡ་ན་ལ་ཆོས་ཞུས་པས་སོ་སོ་ནས་འབྲས་བུ་ཐོབ་བོ། །ཡང་སྔོན་སངས་རྒྱས་རྣམ་
པར་གཟིགས་མྱ་ངན་ལས་འདས་རྗེས་དགེ་སློང་མང་པོ་ལ། ཁྱིམ་བདག་རྣམས་ཀྱིས་བསྙེན་བཀུར་བྱེད་པ་ལ། མི་དབུལ་པོ་ཁྱོ་ཤུག་གཉིས་ལ་འབུལ་རྒྱུ་མེད་པས་མི་དེ་ངུས་པས། བུད་མེད་དེས་ཁྱིམ་དང་བང་མཛོད་རྣམས་ཉུག་དང་ཅུང་ཟད་ཅིག་གདའ་འབུལ་ཟེར། བཙལ་བས་གསེར་གྱི་དོང་ཙེ་གཅིག་གདའ་བ་བུམ་པ་ནང་དུ་བཅུག་སྟེ་ཆུ་གཙང་མས་བཀང་། མེ་ལོང་གི་ཁ་བཀབ་ནས་ཕུལ་ལོ། །དེའི་དགེ་བ་དེས་དེ་གཉིས་སུམ་ཅུ་རྩ་གསུམ་པའི་ལྷར་སྐྱེས་ཏེ། བསྐལ་པ་དགུ་བཅུ་རྩ་གཅིག་གར་སྐྱེས་ཀྱང་གཟུགས་མཛེས་ཤིང་བལྟ་ན་སྡུག་པ་གསེར་གྱི་ཁ་དོག་ཏུ་གྱུར། ལོངས་སྤྱོད་ཕུན་སུམ་ཚོགས་པར་གྱུར་ཏོ། །དེ་ནས་མཉན་ཡོད་ན་ཁྱིམ་བདག་ཕྱུག་པོ་ཞིག་ལ་བུ་གསེར་གྱི་མདོག་ཅན་ཞིག་དང་། ཡུལ་ཙམ་པ་ན་བུ་མོ་དེ་དང་འདྲ་བ་ཞིག་སྐྱེས་ཏེ། དེ་གཉིས་སྐྱེས་མ་ཐག་ཁྱིམ་དུ་ཁྲོན་པ་ཞིག་བྱུང་བ་ནས། ཆུ་བཅུས་ནས་རིན་པོ་ཆེ་དང་ཟས་གོས་ཡིད་ལ་ཅི་འདོད་པ་འོང་བར་གྱུར་ཏོ། །དེ་ནས་ཕ་མས་གཉེན་བྱས་ཏེ་བསུས་པ་ན་བཅོམ་ལྡན་འདས་སྤྱན་དྲངས་ནས་ཆོས་ཉན་ཏེ་གཉིས་ཀ་རབ་ཏུ་བྱུང་སྟེ་དགྲ་བཅོམ་ཐོབ་བོ། །དགེ་སློང་
གསེར་ལྷའོ། །དབུལ་པོ་དེས་ཅུང་ཟད་སྦྱིན་པའི་བསོད་ནམས་དེ་ལྟར་རོ། །ཡང་སངས་རྒྱས་རྣམ་པར་གཟིགས་ཀྱི་དུས་ཁྱིམ་བདག་ཞིག་གིས་གསེར་གྱི་དོང་ཙེ་གཅིག་ཕུལ་བ་ལ་བསླབ་པའི་ཚིག་གསུམ་མནོས་ཏེ། སྲོག་བཅད་སོགས་སྤངས་པས། བསྐལ་པ་དགུ་བཅུ་རྩ་གཉིས་སུ་ལོངས་སྤྱོད་ཆེ་ཞིང་ཚེ་རིང་ངོ་། །ཕྱིས་མཉན་ཡོད་ན་ཁྱིམ་བདག་ཕྱུག་པོ་བུ་མེད་པ་ཞིག་གིས་བུར་སྐྱེས་པ་པང་ནས་ལྷུང་སྟེ་ཆུ་ལ་ཤོར་བ་ཉ་ཆེན་པོ་ཞིག་གིས་མིད་ཉ་དེ་གྲོང་ཁྱེར་འོག་མའི་ཉ་པས་སོད་པའི་ཁོག་ནས་བུ་མ་ཤི་བ་བྱུང་བ་དེ་ཁྱིམ་བདག་ཕྱུག་པོ་བུ་མེད་པ་ཞིག་གིས་བུ་བྱས་པ། ཁྱིམ་བདག་གཉའ་མས་ཐོས་ཏེ་ང་ཡི་བུ་ཡིན་གཏོད་ཟེར། འོག་མས་ངས་ལྷ་མཆོད་པས་ལྷས་གནང་ནས་ཉ་ཡི་ཁོག་ནས་བྱུང་ཟེར། མ་འཆམས་ནས་རྒྱལ་པོ་ལ་གཏུགས་པས་ཁྱེད་གཉིས་ཀའི་ཐུན་མོང་གྱིས་གསུངས། གཉིས་ཀ་ཕྱུག་པས་བུ་དེ་ལོངས་སྤྱོད་ཕུན་སུམ་ཚོགས་པར་བསོས་ཏེ། ཆེར་སྐྱེས་ནས་ཕ་མ་གཉིས་ཀ་ལ་ང་རབ་ཏུ་བྱུང་དགོས་ཟེར་ནས། །ཕ་མ་གཉིས་ཀྱིས་བུ་གཅེས་དྲགས་པས་ངོ་མ་ཆོག་ནས། ཤཱཀྱ་ཐུབ་པའི་དྲུང་དུ་རབ་ཏུ་བྱུང་སྟེ་དགྲ་བཅོམ་པ་ཐོབ་ནས་དགེ་སློང་རིགས་གཉིས་པའོ། །
གསེར་ཕུལ་བས་ཚེ་རབས་ཀུན་ཏུ་ལོངས་སྤྱོད་ཆེ། སྲོག་བཅད་སྤངས་པས་ཆུར་བྲུལ་ནས་ཉེས་མིད་ཀྱང་མ་ཤི། སྐྱབས་སྡོམ་ཞུས་པས་དགྲ་བཅོམ་པ་ཐོབ་པ་ཡིན་གསུངས་སོ། །སྔོན་སངས་རྒྱས་འོད་སྲུང་འདས་ནས་ཁྱིམ་བདག་ཞིག་གིས་མཆོད་རྟེན་བརྩེགས་དགེ་འདུན་གྱི་འདུ་ཁང་བྱས་ནས་ཡུན་རིང་དུ་འཚོ་བ་སྦྱར་བ་ལ། ཕྱིས་དེ་རྣམས་ཞིག་ཅིང་འཚོ་བ་ཆད་པ་ལས། ཁྱིམ་བདག་དེའི་བུ་དགེ་སློང་ཞིག་ཡོད་པས་དེས་ཞིག་གསོས་སྔ་མ་བཞིན་བྱས་ནས་སྨོན་ལམ་བཏབ་པས། ཕྱིས་ཡུལ་དེར་གསེར་པའི་རྒྱལ་པོ་ཀ་པི་ན་ཆེན་པོར་སྐྱེས་ཏེ། ཡོ་བྱད་བཏང་བ་ནི་འཁོར་རྒྱལ་ཕྲན་ཁྲི་བརྒྱད་སྟོང་དུ་སྐྱེས་ནས་ཤིན་ཏུ་སྟོབས་ཆེ་ནས་ཡུལ་དབུས་ཀྱི་རྒྱལ་པོ་གསལ་རྒྱལ་མངའ་ཞབས་སུ་བཅུག་པར་ཤོམས་པ་ལ་བཅོམ་ལྡན་འདས་འཁོར་ལོས་བསྒྱུར་རྒྱལ་དུ་སྤྲུལ་ནས་བཏུལ་ཏེ། རྒྱལ་པོ་དེ་རབ་ཏུ་བྱུང་ནས་དགྲ་བཅོམ་པ་ཐོབ་བོ། །དེ་ལྟར་ཞིག་བསོས་ཀྱི་བསོད་ནམས་ཀྱིས་རྒྱལ་པོ་སྟོབས་ཆེན་དུ་སྐྱེས་ཤིང་འབྲས་བུ་ཐོབ་བོ། །སྔོན་སངས་རྒྱས་འོད་སྲུང་གི་མཆོད་རྟེན་མཇལ་དུ་མི་ཞིག་འོང་བས་མཆོད་རྟེན་དེ་ལ་བྱང་ཆུབ་སེམས་དཔའ་དགའ་ལྡན་ནས་འཕོ་དུས་ཀྱི་
གླང་པོ་ཆེའི་གཟུགས་ཆུང་ངུ་ཞིག་ཡོད་པ་ཅུང་ཟད་ཞིག་འདུག་པ་གསོས་ཏེ་སྡོང་རོས་བྱུགས་པས་མི་དེ་སྐྱེ་བ་ཐམས་ཅད་དུ་ཆོ་རིགས་བཙུན་ཞིང་ལོངས་སྤྱོད་མི་ཟད་པར་གྱུར། ཕྱིས་མཉན་ཡོད་ན་ཁྱིམ་བདག་ཞིག་ལ་བུ་ཞིག་ཡོད་མ་ཐག་མཛོད་ནང་ནས་གསེར་གྱི་གླང་པོ་ཆེའི་ཕྲུ་གུ་ཅིག་རང་བྱུང་དུ་བྱུང་། བུ་ཚར་བ་བཞིན་གླང་པོ་ཆེ་ཡང་ཚར། དེའི་གཅིན་རྟུག་པ་ཡང་གསེར་དུ་བྱུང་། དེ་ལ་རྟག་ཏུ་ཆིབས་ཏེ་འགྲོ་བ་ལ་རྒྱལ་པོ་ཆེན་པོ་མ་སྐྱེས་དགྲས་ཕྲོག་པས་ཀྱང་། རྒྱལ་པོའི་རྩར་མེད་ཅིང་ཁོང་གི་རྩར་ཕྱིན་ནོ། །དེ་ནས་བཅོམ་ལྡན་འདས་ལ་རབ་ཏུ་བྱུང་སྟེ། དགྲ་བཅོམ་པ་གླང་པོ་སྐྱོང་ཞེས་བྱ་སྟེ། གླང་པོ་ཆེ་ལ་ལྟ་མཁན་མང་བས་སོ་མ་གསོད་དེ། ད་ཁྱོད་མི་དགོས་སོ་ལན་གསུམ་སྨྲས་པས་ས་འོག་ཏུ་ནུབ་བོ། །སྔོན་སངས་རྒྱས་རྣམ་པར་གཟིགས་ཀྱི་བསྟན་པའི་མཇུག །གཟུགས་བརྙན་གྱི་ཆོས་ལ་སྤྱོད་པ་ན་དགེ་སློང་ལྔ་བརྒྱ་དབེན་པ་བསྟེན་པའི་ཚེ། དགེ་སློང་གཅིག་གིས་བསོད་སྙོམས་བྱས་ཏེ་འཚོ་བ་སྦྱར་བས། དེའི་དགེ་སློང་བཞིའི་འབྲས་བུ་ཐོབ་ནས་མཚམས་བརྒྱག་སྤྱད་མཁན་ལ་སྨོན་ལམ་བཟང་པོ་བཏབ་པས། བསོད་སྙོམས་པ་དེ་བསྐལ་པ་དྲུག་ཅུ་རྩ་
གཅིག་ཏུ་ལྷ་དང་མིའི་ལོངས་སྤྱོད་ཆེན་པོར་གྱུར། ཕྱིས་ཡུལ་ཀོ་ས་ལར་ཁྱིམ་བདག་ཅིག་ཏུ་སྐྱེས་པ་ཡང་། རིན་པོ་ཆེ་སྣ་བདུན་གྱི་ཁང་པ་བདུན་བརྩེགས་དང་ལྷའི་བུ་དང་བུ་མོའི་འཁོར་མང་པོ་སོགས་ལྷའི་ལོངས་སྤྱོད་ཅི་འདྲ་བ་ཡོད་པར་གྱུར་ཏེ། ཕྱིས་བཅོམ་ལྡན་འདས་ལ་རབ་ཏུ་བྱུང་ནས་དགྲ་བཅོམ་པ་ཐོབ་བོ། །སྔོན་བསྐལ་པ་གྲངས་མེད་པའི་གོང་དུ་རི་ཞིག་ན་དྲང་སྲོང་ཉིས་སྟོང་བཞུགས་པ་ལ། ལོ་བཅུ་གཉིས་ལ་ཆར་མི་འབབ་པ་ཐོས་ནས་ཁྱིམ་བདག་ཕྱུག་པོ་ཞིག་གིས་ལོ་བཅུ་གཉིས་ལ་ཡོན་བདག་བྱེད་པར་ཁས་བླངས། མི་ལྔ་བརྒྱར་འཚོ་བ་སྦྱར་བར་བསྐོས་པས་མ་འཁྱོངས་ནས་རྒྱུན་དུ་དཀའ་བླས་འདི་སྤྲང་པོ་འདི་ཚོའི་དོན་ཡིན་ཞེས་ཚིག་ངན་སྨྲས། གུང་ཚིགས་སུ་མི་ཞིག་གདན་འདྲེན་ལ་བཏང་བའི་རྗེས་སུ་ཁྱི་ཞིག་ཀྱང་རྒྱུན་དུ་འགྲོ་བ་ལ། ཉིན་ཅིག་གདན་འདྲེན་བརྗེད་ཀྱང་ཁྱི་དེ་སོང་ནས་ཟུག་པས་བྱོན། ལོ་བཅུ་གཉིས་སོང་ནས་ད་ཆར་འབབ་པས་སོ་ནམ་གྱིས་གསུངས་ནས་ཞིང་རྨོས་པས། ཀུ་བ་ཁོ་ན་སྐྱེས་པ་འབྲས་བུས་གང་ནས་བང་མཛོད་ཐམས་ཅད་གང་། དེར་མི་ལྔ་བརྒྱས་དད་པ་སྐྱེས་ནས་སྔར་ཚིག་ངན་སྨྲས་པ་ལ་བཤགས་པ་བྱས་
སོ། །སྤྲང་པོ་ཚོས་སྨྲས་པ་ལ་སྐྱེ་བ་ལྔ་བརྒྱར་སྤྲང་པོར་སྐྱེས་ཏེ་ཕྱིས་མཉན་ཡོད་ན་སྤྲང་པོ་ལྔ་བརྒྱུར་གྱུར་པ་རབ་ཏུ་བྱུང་སྟེ། དགྲ་བཅོམ་པ་ཐོབ་པ་ནི་བཤགས་པའི་ཕན་ཡོན་ཏེ། རྒྱལ་པོ་བློན་པོ་རྣམས་ཀྱིས་ཐུབ་པ་འཁོར་བཅས་སྤྱན་དྲངས་ཀྱང་སྤྲང་པོ་རབ་ཏུ་བྱུང་བ་མི་འབོད་ཟེར་བས་ཐུབ་པས་བཀའ་གནང་སྟེ། སྒྲ་མི་སྙན་ནས་མ་རྨོས་པའི་ལོ་ཏོག་གི་འབྲས་བུ་ལྷུང་བཟེད་རེ་བླངས་ནས་ནམ་མཁའ་ལ་བྱོན་ནས་ཐུབ་པ་དང་མཉམ་དུ་གུང་ཚིགས་གསོལ་བས་ཐམས་ཅད་དད་ཅིང་དེ་ཕྱིས་ཐམས་ཅད་མཉམ་དུ་གདན་དྲངས་སོ། །ཁྱིམ་བདག་དེ་ནི་བཅོམ་ལྡན་འདས། བང་མཛོད་སྲུང་བ་ནི་རྒྱལ་བུ་རྒྱལ་བྱེད། སྤྱན་འདྲེན་མི་ནི་རྒྱལ་པོ་ཨུ་པ་ན། ཁྱི་དེ་ནི་ཁྱིམ་བདག་སྐད་སྙན་ཏེ། སྐྱེ་བ་ཐམས་ཅད་དུ་སྐད་སྙན་ནོ། །མཉན་ཡོད་ན་བུད་མེད་སྙན་དགའ་མོ་ཞེས་བྱ་བ་དབུལ་ཞིང་ཕོངས་པ་གཅིག་སྤང་སྤང་བས་མར་ཅུང་ཟད་ཞིག་རྙེད་པ་བཅོམ་ལྡན་འདས་ལ་མར་མེ་ཆུང་ངུ་ཞིག་བྱས་ཏེ་ཕུལ་བས་མར་མེ་འཛིན་ནས་ཕྱི་ནང་ཡང་མ་དམའ། དེར་མོའུ་འགལ་གྱི་བུས་ཉིན་པར་མར་མེ་མི་དགོས་སྙམ་ནས་བསད་ཀྱང་མ་སོད། དེར་བཅོམ་ལྡན་འདས་ཀྱིས་བུད་མེད་དེ་མ་འོངས་གྲངས་
མེད་གཉིས་འདས་པ་ན་སངས་རྒྱས་མར་མེའི་འོད་དུ་ལུང་བསྟན་ཏོ། །དེ་ཡང་སྔོན་སངས་རྒྱས་འོད་སྲུང་འཁོར་བཅས་བུད་མེད་ཕྱུག་མོ་གཅིག་དང་། དབུལ་མོ་གཉིས་ཀྱིས་སྤྱན་འདྲེན་དུས་གཅིག་བྱུང་བས། སྔོན་ལ་དབུལ་མོ་སར་བྱོན་པ་ལ། མོ་རིགས་མཐོ་ཞིང་ཕྱུག་པའི་ང་རྒྱལ་གྱིས་ངའི་སར་སྔོན་མི་གཤེགས་པར་སྤང་མོ་སར་གཤེགས། ཤེས་པའི་ཚིག་ངན་སྨྲས་པས་མོ་སྐྱེ་བ་ལྔ་བརྒྱར་སྤྲང་མོར་སྐྱེས་ཏེ། ཕྱིར་ཉིན་མཆོད་ཅིང་དད་པས་ཐུབ་པ་དང་མཇལ་ཏེ་བྱང་ཆུབ་ལུང་བསྟན་ཐོབ་པའོ། །ཞེས་གསུངས་པས། །ཐམས་ཅད་ཀྱིས་བཅོམ་ལྡན་འདས་ལ་མར་མེ་དཔག་ཏུ་མེད་པ་ཕུལ་ལོ། །དེ་ཡང་སྔོན་སངས་རྒྱས་རིན་ཆེན་གཙུག་ཕུད་ཀྱི་དྲུང་དུ་དགེ་སློང་འཕགས་པའི་བཤེས་གཉེན་གྱིས་ཟླ་བ་གསུམ་དུ་མར་མེ་ཕུལ་བའི་ཕྱིར་བསོད་སྙོམས་བྱས་པ་ལ། རྒྱལ་པོའི་བུ་མོ་ཞིག་གིས་མར་མང་པོ་བྱིན་ནས། བསོད་སྙོམས་མི་དགོས་ཟླ་བ་གསུམ་དུ་མར་མེ་འབུལ་རྒྱུ་རྙེད་པས། །བསྐལ་པ་གྲངས་མེད་པར་ཁོང་རང་གཉིས་མི་དང་ལྷའི་བདེ་སྐྱིད་མྱོང་སྟེ་གཟུགས་ཀྱང་ཁྱད་པར་འཕགས་མཐར་དགེ་སློང་དེ་སངས་རྒྱས་མར་མེ་མཛད་དང་། བུ་མོ་ཤཱཀྱ་ཐུབ་པ་ཡིན་
ཅིང་སངས་རྒྱས་ནས་ཀྱང་མར་མེ་འབུལ་མཁན་མང་བ་ཡིན་གསུངས་སོ། །སངས་རྒྱས་འོད་སྲུང་གི་བསྟན་པ་ལ་དགེ་སློང་པར་པས་དགེ་སློང་ཞིག་ཡུར་བོ་ལ་མཆོང་བ་ལ། མཆོང་སྐྱེན་སྤྲེའུ་དང་འདྲའོ་སྨྲས་པ་ལ། ང་ནི་དགྲ་བཅོམ་པ་ཡིན་པས་ངག་འཁྱལ་མ་སྨྲ་གསུངས་པས། དེས་བཤགས་པ་བྱས་ཀྱང་སྐྱེ་བ་ལྔ་བརྒྱར་སྤྲེའུར་སྐྱེས་ཏེ་རྒྱབ་རེས་བཤགས་པ་བྱས་པས་ཤཱཀྱ་ཐུབ་པ་མཇལ་ནས་སྦྲང་རྩི་ཕུལ་ཏེ་ཚེ་འཕོས་ནས་མིར་སྐྱེས་མ་ཐག་ཁྱིམ་སྦྲང་རྩིས་གང་། ཕྱིས་རབ་ཏུ་བྱུང་བས་དགྲ་བཅོམ་པ་ཐོབ་པ་དགེ་སློང་སྦྲང་རྩི་མཆོག་གོ །དེ་ལྟར་ངག་འཁྱལ་བསྲུང་བ་གལ་ཆེ་གསུངས་སོ། །སྔོན་སངས་རྒྱས་ཐམས་ཅད་སྐྱོབ་ཀྱི་མཆོད་རྟེན་མང་པོ་ཡོད་པ་གཅིག་ཞིག་པ་ལ་རྒན་མོ་ཞིག་གིས་གསོ་བའི་རོགས་མི་བཅུས་བྱས་ནས་སྨོན་ལམ་བཏབ་པས། བསྐལ་པ་དགུ་བཅུ་རྩ་གཅིག་ཏུ་ལྷ་དང་མིར་ལྷན་ཅིག་ཏུ་སྐྱེས་ཏེ། གཟུགས་བཟང་ཞིང་མཛེས་པ་དང་ཀུན་གྱིས་བཀུར་བ་དང་། ནམ་ཡང་དམྱལ་བར་མི་ལྟུང་བར་གྱུར་ཏེ། ཕྱིས་ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཆུང་བ་སུ་མ་ན་ཞེས་བྱ་བར་གྱུར་ཏེ། བལྟ་ན་སྡུག་པར་གྱུར་པ་རྒྱལ་པོའི་བུ་ཞིག་གིས་བླངས་བ་ལ་སྒོ་ང་
བཅུ་བྱུང་བ་ལ་བུ་བཅུ་བྱུང་། བུ་རྣམས་ཕྱིས་རབ་ཏུ་བྱུང་ནས་དགྲ་བཅོམ་པར་གྱུར་ཏོ། །དེ་ལ་རྒན་མོ་ནི་བུ་མོ་དེ་དང་། མི་བཅུ་ནི་དགྲ་བཅོམ་པ་བཅུའོ། །ཡང་བཅོམ་ལྡན་འདས་ཀྱིས་ཆོས་གསུངས་པའི་ཚེ། ནམ་མཁའ་ལ་ངང་བ་ལྔ་བརྒྱ་འཕུར་བས་ཐོས་ནས་ཡིད་དགའ་སྟེ་འབབ་འདོད་པ་ལ་བརྔོན་པས་རྒྱ་བྲེས་ཏེ་ཟིན་ནས་བསད་མ་ཐག་ཏུ་སུམ་ཅུ་རྩ་གསུམ་པའི་ལྷར་སྐྱེས་ཏེ། སྐྱེ་བ་དྲན་ནས་བཅོམ་ལྡན་འདས་མཇལ་དུ་འོང་སྟེ་རྒྱུན་ཞུགས་ཐོབ་བོ། །དེས་ན་སངས་རྒྱས་ཀྱི་བསྟན་པའི་ཆོས་ལ་ནན་ཏན་གྱིས་གསུངས་སོ། །དགེ་སློང་གོས་ངུར་སྨིག་གྱོན་པ་ལ་ངན་སེམས་བསྐྱེད་ན། དུས་གསུམ་གྱི་འཕགས་པ་ཐམས་ཅད་ལ་ངན་སེམས་བསྐྱེད་པ་ཡིན་པས་སྡིག་པ་ཚད་མེད་ལ། དད་པ་བསྐྱེད་ན་བསོད་ནམས་ཚད་མེད་པར་གསུངས་ནས། སེང་གེ་ཡི་དམ་བརྟན་གྱིས་རྔོན་པ་ངུར་སྨྲིག་ཅན་ལ་གུས་པར་བྱས་པས་བསྐལ་པ་ཁྲི་ཕྲག་བཅུའི་བར་དུ་འཁོར་ལོས་སྒྱུར་རྒྱལ་དུ་ཤོལ་གྱུར་ནས་མཐར་སངས་རྒྱས་ཚུལ་རྒྱས་པར་གསུངས་སོ། །དེ་དག་ནི་མདོ་ནས་གསུངས་པའི་གཏམ་རྒྱུད་ཡིན་པས་ཡིད་ཆེས་པར་གྱིས། ལས་རྒྱུ་འབྲས་ཀྱི་རྒྱབ་ཆོས་སོ།། །། །
༼ཞ༽ ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་ལས་རྒྱུ་འབྲས་ཀྱི་རྒྱབ་ཆོས་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཁྲིད་འདི་ཡི་སྔོན་འགྲོ་ལ་ཡང་། ལས་རྒྱུ་འབྲས་ཆེ་ལོང་ཙམ་ཞིག་བཤད་མོད་ཀྱང་། ཕྱོགས་མགོ་ཙམ་ལས་གོ་དཀའ་སྟེ། རྩེ་གཅིག་ཆེན་པོའི་སྐབས་བར་ལ་ལས་འབྲས་ལ་འཕྲིག་མི་ཚུད། རོ་གཅིག་དུ་མར་འཆར་བའི་རྟོགས་པ་མ་འཁྲུངས་ཀྱི་བར་དུ། རྒྱུ་འབྲས་ཕྲ་ཞིབ་མི་ཕྱེད་པས། བཀའ་བརྒྱུད་གོང་མ་རྣམས་ཀྱིས། །རྒྱུ་འབྲས་ཕྲ་ཞིབ་ཕྱེད་པར་བྱིན་གྱིས་རློབས། ཞེས་གསུངས། རང་ཅག་རྣམས་སྐྱེ་བ་དང་འཆི་བ་སོགས། ལེགས་ཉེས་སྐྱིད་སྡུག་ཐམས་ཅད་
ལས་དབང་ཆེ་སྟེ། སྐྱེ་ཤི་འཁོར་བའི་ལེའུ་ལས། ཁམས་གསུམ་གང་ན་སྐྱེས་སོ་ཅོག །སྐྱེས་སོ་ཅོག་ཀྱང་ལས་ཀྱི་དབང་། །ལས་སོ་ཅོག་ཀྱང་སྔོན་བྱས་དོན། །ཤིའོ་ཅོག་ཀྱང་ལས་ཀྱི་དབང་། །སྐྱེ་ཤི་ཆོས་ཀྱི་དུས་བབ་ན། །གནམ་ས་རིམ་པའི་ལྷ་རྣམས་ལྟུང་། །འཕྲུལ་ཆེན་མཐུ་ཡང་འདུག་དབང་མེད། །ཅེས་གསུངས་སོ། །གོ་སླ་ཕྱིར་ས་བཅད་མི་བཀོད་དེ་བཤད་ན། ངེས་པའི་ལས་ནི་མདོ་སྡེ་ལས་རྣམ་འབྱེད་ལས། དེ་ལ་ངེས་པར་སྐྱེ་བར་འགྱུར་བའི་ལས་གང་ཞེ་ན། དགེ་བའི་ལས་གང་ཡིན་བྱས་ནས་འདིས་ནི་བདག་འདི་ལྟ་བུ་གཅིག་ཏུ་སྐྱེ་བར་
གྱུར་ཅིག །ཅེས་ངེས་པར་བསྔོ་བ་དང་། མཚམས་མེད་ལྔ་བྱས་པ་སྟེ། འདི་ནི་སྐྱེ་བར་འགྱུར་བའོ། །ཞེས་གསུངས་པའི་ཕྱིར་དགེ་སྦྱོར་ལ་འབད་ཅིང་། རབ་བདེ་བ་ཅན། །འབྲིང་ཟངས་མདོག་དཔལ་རི། ཐ་མ་མི་ལུས་ཆོས་ལྡན་དུ་སྐྱེ་བའི་སྨོན་ལམ་རྒྱུན་དུ་བཏབ་ན་དེར་སྐྱེ་ངེས་པས་གལ་ཆེ། མཚམས་མེད་པ་ལྔའམ་དམ་ཚིག་ཉམས་ཆག་ཆེན་པོ་བྱུང་ན་དེ་མ་བཤགས་པར་ཤི་ན། ངེས་པར་ངན་སོང་དུ་སྐྱེ་བས་བཤགས་པ་གལ་ཆེ། ཡང་དགེ་བའི་རྩ་བ་བསགས་ཀྱང་ནམ་ཞིག་སྨིན་ནི་སྨིན་གྱིས་སྨོན་ལམ་མ་བཏབ་ན་ཇི་ལྟར་སྨིན་ངེས་པ་མེད་དེ། ལས་རྣམ་འབྱེད་ལས། དེ་ལ་སྐྱེ་བར་འགྱུར་ལ་ངེས་པའི་ལས་གང་ཞེ་ན། དགེ་བའི་ལས་གང་བྱས་ནས་ཅིར་ཡང་ཡོངས་སུ་མི་བསྔོ་བའོ། །ཞེས་གསུངས་པ་སྟེ། དེ་ནི་ལས་ངེས་མ་ངེས་ཀྱི་མུ་བཞི་ཡིན་ནོ། །དགེ་སྡིག་གང་ཡང་ལས་ཚབ་ཆེན་སྤྱད་ན། ཚེ་འདིར་ད་ལྟ་ཉིད་དུ་སྨིན་པ་ཡང་སྲིད་དེ། དགོངས་ཅིག་རྡོ་རྗེའི་གསུང་ལས། ད་ལྟའི་ལས་འབྲས་ད་ལྟ་སྨིན་པའང་ཡོད་གསུངས། ཡང་དགེ་བ་དང་མི་དགེ་བའི་ལས་གང་ཡང་ཚེ་འདི་ལ་ཡུལ་འདིར་མི་སྨིན་པར་ཡུལ་གཞན་ཏུ་སྨིན་སོང་ན་སྨིན་པ་ཡང་ཡོད་དེ།
འཇིག་རྟེན་པའི་ཁ་ངག་ལ། སྦྱིན་འབྲས་ཚོལ་དུ་འགྲོ་ཟེར་བ་ལྟར། ལས་རྣམ་འབྱེད་ལས། འདིར་དགེ་བ་དང་མི་དགེ་བའི་ལས་ཡུལ་གཞན་དུ་སོང་ནས་སྨིན་པར་འགྱུར་བ་དཔེར་ན་ཚོང་པ་མཛའ་བོའི་བུ་མོ་ལྟ་བུའོ། །ལས་འདི་ནི་ཡུལ་གཞན་ན་སྨིན་པའོ། །དེ་བཞིན་དུ་མདོ་སྡེ་ལས་རྣམ་འབྱེད་ལས་རྒྱ་ཆེར་གསུངས་པའི་དོན་བསྡུས་ཏེ་བཤད་ན། །སྡིག་པ་མི་དགེ་བའི་ལས་བྱས་ནས། དེ་ལ་འགྱོད་པ་ཆེན་པོས་མཐོལ་ཞིང་བཤགས་ནས། ཕྱིན་ཆད་མི་བྱེད་པར་བསྡམ་ན་ལས་བྱས་ལ་མ་བསགས་པའོ། །དགེ་སྡིག་གང་ཡང་སེམས་ཀྱིས་ཚང་བར་བྱས་ཤིང་། ལུས་ཀྱིས་ལས་ནི་མ་བྱས་ངག་གིས་མི་བྱའོ་སྨྲས་ན། བསགས་ལ་མ་བྱས་པའོ། །སྡིག་པའི་ལས་ལ་མི་འཛེམ་པར་བསྒྲུབས། །འགྱོད་པ་མེད་པས་མི་བཤགས་ཕྱིན་ཆད་ཀྱང་འཕྲོ་མི་གཅོད་ཅིང་མི་སྡོམ་ན། །ལས་བྱས་ལོ་བསགས་པའོ། །དགེ་སྡིག་གང་ཡང་ཆེད་དུ་མ་བྱས་པ་ནི་མ་བྱས་མ་བསགས་པ་སྟེ། བྱས་ལ་བསགས་མ་བསགས་ཀྱི་མུ་བཞིའོ། །དམྱལ་བར་སྐྱེ་བའི་ལས་བྱས་ལ་བསགས་ནས། དེ་ལ་མི་བཤགས་ཤིང་མི་འགྱོད་ཕྱིན་ཆད་བསྡམས་པར་མི་བྱེད་པ་ནི། དམྱལ་
བར་སྐྱེས་ནས་ཚེ་ཚད་མ་རྫོགས་ཀྱི་བར་དུ་མི་ཐར་བའི་ལས་སོ།། །དམྱལ་བར་སྐྱེ་བའི་ལས་བྱས་ནས་ཅུང་ཟད་འཛེམ་པ་དང་བཤགས་པ་དང་བསྡམས་པར་བྱས་ན། དམྱལ་བའི་ཚེ་ཚད་ཕྱེད་རྫོགས་ནས་ཐར་རོ། །སེམས་ཅན་དམྱལ་བར་སྐྱེ་བའི་ལས་བྱས་ཤིང་བསགས་ནས། དེ་ལ་ཤིན་ཏུ་འགྱོད་ནས་བཤགས་པ་ཆེན་པོ་དང་ཕྱིན་ཆད་རབ་ཏུ་བསྡོམ་ན། དམྱལ་བར་སྐྱེས་མ་ཐག་ནས་ཐར་རོ། །དཔེར་ན་རྒྱལ་པོ་མ་སྐྱེས་དགྲེས་ཕ་བསད་པ་ལྟ་བུའོ། །དེ་སྐད་དུ། ཤིན་ཏུ་མི་བཟད་ལས་རྣམས་བྱས་པ་ནི། །བདག་ལ་སྨོད་དང་རབ་ཏུ་བཤིགས་པ་དང་།། །སྡོམ་པར་བྱས་པས་དེ་དག་སྲབ་འགྱུར་གྱིས། །ཤིན་ཏུ་རྩོད་ནས་ཕྱུང་ཞེས་མི་སྨྲའོ། །ཞེས་གསུངས་སོ། །དེ་ནི་ཚེ་ཚད་རྫོགས་མ་རྫོགས་མུ་བཞིའོ། །སྦྱིན་པ་ལ་སེམས་དགའ་ཞིང་སྦྱིན་པ་དང་ཕུལ་བ་སོགས་བྱས་ནས། རྗེས་ནས་སེར་སྣ་སྐྱེས་ཏེ་འགྱོད་པ་སྐྱེས་ན་ཕྱུག་པོ་ལོངས་སྤྱོད་ཅན་གྱི་བུར་སྐྱེས་ཏེ་ཚེ་སྟོད་ལ་བདེ་སྐྱིད་ལོངས་སྤྱོད་ཆེ་ཞིང་། ཚེ་སྨད་ལ་དབུལ་ཕོངས་སྡུག་བསྔལ་ཅན་དུ་འགྱུར། སྦྱིན་པ་དང་དབུལ་བ་སོགས་དང་པོ་མི་འདོད་ཅིང་མི་གུས་པར་ཁྲོ་ཞིང་བྱས་ལ། ཚར་ན་སེམས་དགའ་ཞིང་
འགྱོད་པ་མེད་ན་མི་དབུལ་པོའི་བུར་སྐྱེས་ཏེ་བསམ་ལུས་འཕྲོད་ནས་དཀའ་ལས་ཆེན་པོས་ཟོག་བཙལ་བས་རྙེད་དེ། དེ་འཕེལ་ཞིང་རྒྱས་ནས་ཚེ་སྨད་ཕྱུག་ཅིང་སྐྱིད་པར་འགྱུར་རོ། །སྦྱིན་པ་དང་དབུལ་བ་སོགས་དང་པོ་ཡིད་དགའ་ཞིང་དད་པའི་སྒོ་ནས་བྱས། རྗེས་ནས་སེར་སྣའི་འགྱོད་པ་མ་ཤོར་ན་ཕྱུག་པོའི་བུར་སྐྱེས་ཏེ། ལོངས་སྤྱོད་དེ་འཕེལ་ཞིང་རྒྱས་ནས་མི་ཚེར་ཕྱུག་ཅིང་སྐྱིད་པར་འགྱུར་རོ། །འགའ་ཞིག་ཆོས་སྣང་ཡེ་མེད་པར་དབུལ་བ་དང་སྦྱིན་པ་གཅིག་ཀྱང་མ་བྱས་ལ། གདན་གཅིག་སོགས་སྡོམ་པ་ཅུང་ཟད་བསྲུང་ན། མི་དབུལ་པོའི་ཁྱིམ་དུ་སྐྱེས་ཏེ། ལོངས་སྤྱོད་མི་ཚེ་ལ་ལྟོགས་ཤིང་དབུལ་ནས་སྡུག་བསྔལ་བར་འགྱུར་རོ། །དེ་ནི་བདེ་སྡུག་གི་ལས་འབྲས་མུ་བཞི་གོ་བདེ་བར་བཤད་པའོ། །ཡང་ཞིང་དག་པ་ལ་འབུལ་བ་དང་སྦྱིན་པ་ཆེན་པོ་བྱས་པས། ཕྱུག་པོར་གྱུར་ནས་སེར་སྣ་ཆུང་ཞིང་ཆོས་ཕྱོགས་ལ་གཏོང་ནུས་པ་འབྱུང་། ཡང་གང་ཟག་བཟང་པོ་ལ་འབུལ་བ་དང་། སྦྱིན་པ་ཆུང་ངུ་བྱས་པས་ཕྱུག་པོར་གྱུར་ཀྱང་སེར་སྣ་ཆེ་བས་ཆོས་ཕྱོགས་སུ་གཏོང་མི་ནུས་པ་འབྱུང་། ཡང་ཞིང་མ་དག་པ་ལ་འབུལ་བ་དང་སྦྱིན་པ་མང་དུ་བྱས་པས་
ལོངས་སྤྱོད་ཆེན་པོ་མེད་པར་འགྱུར་ཞིང་། ཅི་ཡོད་ཆོས་ལ་གཏོང་ནུས་ཏེ་ཟད་ཅིང་དབུལ་པོར་འགྱུར། གདན་གཅིག་སོགས་ཚུལ་ཁྲིམས་ཅུང་ཟད་རེ་བསྲུང་། སྡིག་པ་ནི་ཅི་ཡང་མ་བྱས། འབུལ་བ་དང་སྦྱིན་པ་ནི་ཅི་ཡང་མ་བྱས་པ་ནི་ཤིན་ཏུ་དབུལ་ཞིང་ཕོངས་པར་སྐྱེས་ཏེ།། དཀའ་ལས་ཆེན་པོས་བསྒྲུབས་པས་ཟས་གོས་ཅུང་ཟད་རྙེད་ཀྱང་། སེར་སྣ་ཆེ་བས་ཆོས་ཕྱོགས་སུ་ཅུང་ཟད་ཀྱང་གཏོང་མི་ནུས་པར་འགྱུར། དེ་ནི་མདོ་སྡེ་ལས་རྣམ་འབྱེད་ལས་གསུངས་པའི་གཏོང་ཕོད་ཆེ་ཆུང་གི་མུ་བཞིའོ། །ཚོགས་ཆེན་པོ་བསགས་པའི་སོ་སོའི་སྐྱེ་བོ་ནི་འཁོར་ལོས་སྒྱུར་བའི་རྒྱལ་པོ་སོགས་རྒྱལ་པོ་ཆེན་པོར་སྐྱེས་ཏེ། དེ་ཡི་ལུས་ནི་བདེ་སྟེ། སེམས་ནི་མི་བདེ། བསོད་ནམས་མ་བསགས་པ་ལ་དགྲ་བཅོམ་པ་ཐོབ་པ་དཔེར་ན་གནས་བརྟན་ལི་ཀུན་ཙི་ཀ་ལྟ་བུ་གསུངས་ཏེ། དོན་ལ་རྟོགས་པ་མཆོག་ཐོབ་པ་གཅོང་ནད་ཅན་ཏེ། ལུས་མི་བདེ་ལ་སེམས་བདེ་བ་ཡིན་ནོ། །བསོད་ནམས་བསགས་པའི་དགྲ་བཅོམ་པ་དཔེར་ན་གནས་བརྟན་ཆེན་པོ་སྟོབས་རྒྱས་ལྟ་བུ་གསུངས་ཏེ། སྔོན་ཚོགས་བསགས་ཤིང་ད་ལྟ་རྟོགས་པ་མཆོག་ཐོབ་པ་ནི། ལུས་སེམས་གཉིས་ཀ་བདེ་བ་དང་
ལྡན་ནོ། །སྔོན་ཚོགས་ཀྱང་མ་བསགས་ད་ལྟ་རྟོགས་པ་ཡང་མ་ཐོབ་པ་ནི་ལུས་སེམས་གཉིས་ཀ་མི་བདེ་སྟེ། ལས་རྒྱུ་འབྲས་ཀྱི་བདེ་སྡུག་མུ་བཞིའོ། །འགྲོ་བ་རིགས་དྲུག་གང་ཡང་འདྲ་སྟེ་ཤི་ན་ཡང་དེར་སྐྱེ་དགོས་པ་ནི་ཚེ་ཟད་ཀྱང་ལས་མ་ཟད་པའོ། །ཡང་དང་པོ་བདེ་སྐྱིད་དང་ལྡན་པ་ལ་ཚེ་སྨད་སྡུག་བསྔལ་ཅན་དུ་གྱུར་པ་དང་ཚེ་སྟོད་དབུལ་ཕོངས་སྡུག་བསྔལ་ཅན་ཡིན་པ་ལ་ཚེ་སྨད་བདེ་སྐྱིད་ལོངས་སྤྱོད་ཅན་དུ་གྱུར་པ་ནི་ལས་ཟད་ལ་ཚེ་མ་ཟད་པའོ། །འགྲོ་བ་རིགས་དྲུག་གང་ཡང་འདྲ་སྟེ་ཤི་ནས་དེར་མི་སྐྱེ་བར་རིགས་དྲུག་གཞན་ཞིག་ཏུ་སྐྱེ་བ་ནི། ཚེ་ཡང་ཟད་ལ་ལས་ཀྱང་ཟད་པའོ། །ཡང་བསྒོམས་པའི་སྟོབས་ཀྱིས་དགྲ་བཅོམ་པའམ། རང་སངས་རྒྱས་ཐོབ་པ་ནི། ཚེ་མ་ཟད་ལས་མ་ཟད་ཉོན་མོངས་ཟད་པའོ། །དེ་ནི་ལས་དང་ཚེ་ཟད་མ་ཟད་མུ་བཞིའོ། །ཡང་དུད་འགྲོ་ལ་སོགས་པ་ངན་སོང་གི་ལུས་སུ་སྐྱེས་ནའང་། གཟུགས་མཛེས་ཤིང་ཡིད་དུ་འོང་བ་ནི་ཞེ་སྡང་གིས་ཀུན་ནས་མ་བསླང་ནས་ཚུལ་ཁྲིམས་འཆལ་བའི་ལས་འབྲས་སོ། །དུད་འགྲོ་ལ་སོགས་པ་ངན་སོང་གི་ལུས་སུ་སྐྱེས་ནས། མདོག་ངན་ཞིང་གཟུགས་མི་སྡུག་པ་ནི། ཞེ་སྡང་
གིས་ཀུན་ནས་བསླངས་ནས་ཚུལ་ཁྲིམས་འཆལ་བའི་ལས་འབྲས་སོ། །ངན་སོང་དུ་དུད་འགྲོ་སོགས་སུ་སྐྱེས་ནས། དྲི་མི་ཞིམ་དབང་པོ་མི་གསལ་དབང་པོ་རྟུལ་བ་ནི། །གཏི་མུག་གི་སྒོ་ནས་ཚུལ་ཁྲིམས་འཆལ་བའི་ལས་འབྲས་སོ། །དེ་ནི་ངན་སོང་གི་གཟུགས་མུ་བཞིའོ། །ཡང་གཞན་ལ་གནོད་པའི་བསམ་པས་སྦྱོར་བ་དགེ་བ་ལྟར་བཅོས་ནས་བྱེད་པ་ནི། །དགེ་བའི་ལས་ལ་འབྲས་བུ་སྡུག་བསྔལ་འབྱུང་བའི་ལས་སོ། །ཡང་བསམ་པ་བྱང་ཆུབ་ཀྱི་སེམས་ཀྱིས་ཀུན་ནས་བསླངས་ནས། ། རྩ་བ་བཞི་སོགས་མི་དགེ་བ་བྱེད་པ་ནི། སྡིག་པའི་ལས་ལ་འབྲས་བུ་བདེ་བ་འབྱུང་བ་སྟེ། དཔེར་ན་གསང་སྔགས་ཀྱི་སྦྱོར་སྒྲོལ་སོགས་ཀྱང་འདི་ལ་དགོངས་པའོ། །བསམ་པ་སྡིག་པའི་སེམས་ཀྱིས་སྡིག་པ་བྱེད་པ་ནི་སྡིག་པའི་ལས་ལ་འབྲས་བུ་སྡུག་བསྔལ་འབྱུང་བ་ཉིད་དོ། །བསམ་པ་བྱང་ཆུབ་སེམས་ཀྱིས་དགེ་བ་སྒྲུབ་པ་ནི། དགེ་བའི་ལས་ཀྱི་འབྲས་བུ་བདེ་བ་འབྱུང་བ་སྟེ་བྱང་ཆུབ་སེམས་པའི་སྡེ་སྣོད་ལས་གསུངས་པའི། ཀུན་བསླང་མུ་བཞིའི་དོན་གོ་བདེ་བར་བྱས་པའོ། །ཡང་བསམ་པ་དགེ་བས་སྦྱོར་བ་སྡིག་པ་སྤྱད་ན་མཐོ་རིས་སུ་སྐྱེས་ཀྱང་དབུལ་ཕོངས་དང་། དཀའ་ལས་
ག་དང་། ན་ཚ་སོགས་སྡུག་བསྔལ་མྱོང་སྟེ། འཕེན་བྱེད་དགེ་བས་འཕང་ལ་རྫོགས་བྱེད་སྡིག་པས་རྫོགས་པའི་ལས་སོ། །བསམ་པ་སྡིག་པས་ལས་ཀྱི་སྦྱོར་བ་དགེ་བ་སྤྱད་ན། ངན་སོང་དུ་སྐྱེས་ཀྱང་ལོངས་སྤྱོད་དང་ལྡན་པ་སྟེ། དཔེར་ན་མཁའ་ལ་རྒྱུ་བའི་ཡི་དྭགས་དང་། ཀླུའི་རྒྱལ་པོ་ལྟ་བུ་སྟེ། ལུས་དུད་འགྲོ་དང་ཡི་དྭགས་ཡིན་ཀྱང་ཚེ་རིང་ཞིང་ལོངས་སྤྱོད་ཆེན་པོ་དང་ལྡན་པ་སྟེ། འཕེན་བྱེད་སྡིག་པས་འཕང་ལ་རྫོགས་བྱེད་དགེ་བས་རྫོགས་པའི་ལས་སོ། །ཡང་སྡིག་པའི་བསམ་པས་སྡིག་པ་བསགས་ན། ངན་སོང་དུ་སྐྱེས་ནས་སྡུག་བསྔལ་ཆེན་པོ་ཚབ་ཆེན་མྱོང་བ་སྟེ། འཕེན་བྱེད་སྡིག་པས་འཕང་ལ་རྫོགས་བྱེད་སྡིག་པས་རྫོགས་པའི་ལས་སོ། །བསམ་པ་དགེ་བས་སྦྱོར་བ་དགེ་བ་སྤྱད་ན། མཐོ་རིས་སུ་སྐྱེས་ནས་བདེ་སྐྱིད་ཕུན་སུམ་ཚོགས་པོ་ལ་རྟག་ཏུ་སྤྱོད་དེ། འཕེན་བྱེད་དགེ་བས་འཕང་ལ་རྫོགས་བྱེད་དགེ་བས་རྫོགས་པའི་ལས་སོ། །དེ་ནི་འཕེན་རྫོགས་མུ་བཞི་སྟེ་མདོ་ནས་གསུངས་པའི་དོན་གོ་བདེ་བར་བྱས་པའོ། །ཡང་ཞིང་དག་པ་ལ་བསམ་པ་ངན་པས་གནོད་པའམ་མི་དགེ་བ་ཆུང་ངུ་བྱས་ཀྱང་། འབྲས་བུ་སྡུག་
བསྔལ་རྒྱ་ཆེན་པོ་མྱོང་དགོས་པ་དང་། ཞིང་དག་པ་ལ་བསམ་པ་དད་གུས་ཀྱིས་བཀུར་སྟི་སོགས་དགེ་བ་ཅུང་ཟད་བྱས་པས། འབྲས་བུ་བདེ་སྐྱིད་རྒྱ་ཆེན་པོ་འབྱུང་སྟེ། ལས་ཆུང་ངུ་ལ་ཆེར་སྨིན་པའི་ལས་སོ། །ཡང་སྡིག་པའི་ལས་བསགས་ནས་འགྱོད་པ་དང་བཤགས་པ་དྲག་པོས་དེ་རྩ་བ་ནས་དག་ཐུབ་ན་མ་གཏོགས་དུས་ནམ་ཞིག་བསླུ་བ་མེད་པར་རང་གིས་མྱོང་དགོས་ཏེ། འདུལ་བ་ལུང་ལས། ལས་རྣམ་བསྐལ་པ་བརྒྱར་ཡང་ནི། །ཆུད་མི་ཟ་ཞིང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འབྱུང་བ་ཉིད། །ཅེས་གསུངས་སོ། །ཡང་སྡིག་པ་བྱས་ནས་བཤགས་པ་མ་བྱས་ན། ཞག་རེ་སོང་ནས་སྐྱེད་རེ་འགྱུར་བས་སྡིག་པ་ཆུང་ཡང་ཆེན་པོར་འགྱུར་རོ། །བཤགས་པ་བྱས་ན་རྩ་་བ་ནས་མ་དག་ཀྱང་སྐྱེད་དེ་མི་འགྲོ་སྟེ། མདོ་ལས། དགེ་དང་སྡིག་པའི་ལས་རྣམས་ནི། །དྲུང་ཕྱུང་གཉེན་པོ་མ་ཕྱུང་ན། །འཕེལ་བར་འགྱུར་དང་བཅས་པ་རུ། །བསྐལ་པར་སོང་ཡང་དེ་འབྱུང་འགྱུར། །ཞེས་གསུངས་སོ། །དེ་ནི་ལས་འབྲས་ཆུད་མི་ཟ་བར་བསྟན་པའོ། །འོ་ན་དགེ་སྡིག་འདྲེས་མར་སྤྱོད་པ་ནི་མང་བས། །སྔོན་ལ་གང་སྨིན་ཞེ་ན་
སྟོབས་གང་ཆེ་བ་དེ་སྔོན་ལ་སྨིན། དགེ་སྟོབས་སྡིག་སྟོབས་གཉིས་མཉམ་ན་གོམས་པའི་ཤས་གང་ཆེ་བ་དེ་སྔོན་ལ་སྨིན། དེ་ཡང་མཉམ་ན་འཆི་ཁའི་སེམས་ལ་གང་གསལ་བ་དེ་སྔོན་ལ་སྨིན། དེ་ཡང་མཉམ་ན་སྔོན་ལ་གང་བྱས་པ་དེ་སྔོན་ལ་སྨིན་ཏེ། འཕགས་པ་སྒྲ་གཅན་འཛིན་བཟང་པོས། ལས་ཀྱི་འབྲས་བུ་ལྗི་བ་གང་། །ཉེ་བ་གང་དང་གོམས་པ་གང་། །སྔར་བྱས་གང་ཡིན་དེ་དག་ལས། །འབྲས་བུ་ཐོག་མར་འབྱུང་བར་འགྱུར། །ཞེས་གསུངས། དེ་ནི་ཐོག་མར་ལས་འབྲས་གང་སྨིན་མདོ་ལས་གསུངས་པའི་དོན་བསྡུས་ཏེ་བཤད་པའོ། །ཡང་འདི་ན་སྐྱེ་བོ་ཕལ་པ་རྣམས་ཀྱི་བསམ་པ་ལ། ལས་དགེ་བ་བྱས་པས་བདེ་སྐྱིད་འབྱུང་བ་དང་། མི་དགེ་བ་བྱས་པས་སྡུག་བསྔལ་འབྱུང་ཟེར་བ་འདི་མི་བདེན་པར་འདུག །མི་ཚེ་ལ་ཆོས་དང་དགེ་བ་བྱས་པ་ཚོ་ཚེ་ཐུང་བ་དང་། ནད་མང་བ་དང་། དབུལ་ཕོངས་འབྱུང་བ་དང་། སྡུག་བསྔལ་སྣ་ཚོགས་འབྱུང་ཞིང་གདའ། མི་བསོད་པ་དང་། བརྔོན་རི་དྭགས་དང་། དམག་ཇག་རྐུ་ཕྲོག་བྱེད་པ་འདི་རྣམས་བདེ་སྐྱིད་དང་ལྡན་པར་གདའ་བསམ་ན། སྡིག་པ་བྱས་པ་རྣམས་བདེ་སྐྱིད་དང་
ལྡན་པ་ནི་ཚེ་སྔ་མའི་དགེ་བ་བྱས་པའི་འབྲས་བུ་ཚེ་འདིར་སྨིན་ནས་བསོད་ནམས་ཐམས་ཅད་ཚེ་འདིར་རྫོགས་ཏེ། ཕྱི་མ་ཐར་མེད་ཀྱི་གནས་སུ་འགྲོ་བས་དགེ་བ་མཐའ་རྫོགས་ཀྱི་ལས་ཡིན། དེ་ལ་ཚེ་འདིར་ཝ་ཟེར། ཚེ་འདིར་སྡིག་པ་བྱས་པ་ལ་ཕྱི་མ་ལ་སྡུག་བསྔལ་གྱི་འབྲས་བུ་རྒྱ་ཆེན་པོ་འབྱུང་བ་སྟེ། དཔེར་ན་དུག་དང་འདྲེས་པའི་ཁ་ཟས་ཟོས་པས་རེས་གཅིག་ལ་མངར་ཞིང་བརྒྱག་ཀྱང་ཕྱིས་ནས་སྡུག་བསྔལ་ཞིང་སྲོག་དང་བྲལ་བ་ལྟ་བུ་སྟེ། ཆེད་དུ་བརྗོད་པའི་ཚོམ་ལས། ཇི་སྲིད་སྡིག་པ་མ་སྨིན་པར། །དེ་སྲིད་བྱིས་པ་མངར་བར་སེམས། །གང་ཚེ་སྡིག་པ་སྨིན་གྱུར་པ། །དེ་ཡི་ཚེ་ནི་ཚ་བར་འགྱུར། །ཇི་སྲིད་སྡིག་པ་མ་སྨིན་པ། །དེ་ཡི་ཚེ་ནི་རུང་བར་བལྟ། །གང་ཚེ་སྡིག་པ་སྨིན་གྱུར་པ། །དེ་ཚེ་སྡུག་བསྔལ་མྱོང་བར་འགྱུར། ཞེས་དང་། །བཤེས་སྤྲིང་ལས། སྡིག་པའི་ལས་རྣམས་སྤྱོད་པར་གྱུར་ཡང་ནི། །དེ་ཡི་མོད་ལ་མཚོན་བཞིན་མི་གཅོད་ཀྱང་། །འཆི་བའི་དུས་ལ་བབ་ན་སྡིག་པ་ཡི། །ལས་ཀྱི་འབྲས་བུ་གང་ལགས་མངོན་སུམ་འགྱུར། །ཞེས་གསུངས། ཡང་ཆོས་དང་དགེ་བ་བྱས་པས་ཚེ་འདིར་སྡུག་བསྔལ་འབྱུང་བ་ནི། སྐྱེ་བ་སྔ་མ་སྡིག་
པ་བྱས་པའི་འབྲས་བུ་ཚེ་འདིར་མྱོང་བ་ཡིན་ལ། ཚེ་འདིར་དགེ་བ་དང་ཆོས་བྱས་པའི་འབྲས་བུ་མ་འོངས་པའི་ཚེ་རབས་རྣམས་སུ་བདེ་སྐྱིད་རྒྱ་ཆེན་པོ་ཐོབ་པར་འགྱུར་ཏེ། །ཚོམ་ལས། ཇི་སྲིད་བཟང་པོ་མ་སྨིན་པའང་། །དེ་སྲིད་དགེ་བ་དམན་པར་མཐོང་། །གང་ཆེ་དགེ་བ་སྨིན་གྱུར་པ། །དེ་ཚེ་དགེ་བ་བདེ་བར་མཐོང་། །ཞེས་གསུངས་སོ། །ཡང་ལ་ལ་ཞིག་གིས་ཆོས་སྒྲུབ་པའི་ཉམས་ལེན་རྩེ་གཅིག་བྱས་པའམ། དགེ་བའི་རྩ་བ་རླབས་པོ་ཆེ་བསྒྲུབས་པས། ཚེ་རབས་སྔ་མའི་ལས་ངན་སྡིག་སྒྲིབ་ཅི་ཡོད་ཚེ་འདིར་བླངས་ནས། ཚེ་རབས་གཞན་དུ་ངན་སོང་གི་སྡུག་བསྔལ་རྒྱ་ཆེར་མྱོང་རྒྱུ་ཐམས་ཅད། ཚེ་འདིར་ནད་ཀྱིས་མནར་བ་ཙམ་གྱིས་བྱང་བར་འགྱུར་ནས། ཚེ་ཕྱི་མ་ཕན་ཆད་བདེ་བ་ནས་བདེ་བའི་མཆོག་ཐོབ་པར་གསུངས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས། རབ་འབྱོར་རིགས་ཀྱི་བུའམ། རིགས་ཀྱི་བུ་མོ་གང་དག་འདི་ལྟ་བུའི་མདོ་སྡེའི་ཚིག་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། ནན་ཏན་དུ་བྱེད་པར་བསྒོམ་པ་དེ་དག་ནི་མནར་བར་འགྱུར། ཤིན་ཏུ་མནར་བར་འགྱུར།
དེ་ཅིའི་ཕྱིར་ཞེ་ན། འདི་ལྟར་སེམས་ཅན་དེ་དག་གིས་ཚེ་རབས་སྔ་མའི་མི་དགེ་བའི་ལས། ངན་སོང་དུ་སྐྱེ་བར་འགྱུར་བའི་ལས་དེ་དག་ཚེ་འདི་ལ་མནར་བས་བྱང་བར་འགྱུར་ཏེ། སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་རོ། །ཞེས་དང་། མྱ་ངན་འདས་མདོ་ལས། དམ་པའི་ཆོས་འདོད་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་ནི་སྡིག་པའི་ལས་གྲངས་མེད་པ་བྱས་པ་རྣམས་ཀླད་པ་ན་བ་དང་། རིམས་ཀྱིས་བཏབ་པ་དང་། ནད་དང་ཟུག་རྔུ་དང་། གཞན་གྱིས་སྐུར་པ་བཏབ་པ་ཙམ་གྱིས་བྱང་བར་འགྱུར་ལ་མྱུར་དུ་བླ་ན་མེད་པའི་བྱང་ཆུབ་ཀྱང་ཐོབ་པར་འགྱུར་རོ། །ཞེས་གསུངས་སོ། །ཚེ་འདིར་དམ་པའི་ཆོས་ལ་སྒྲུབ་པ་རྩེ་གཅིག་བྱས་པས་ཚེ་རབས་སྔ་མའི་ལས་ཀྱི་སྒྲིབ་པ་ཅི་ཡོད་པ་ཐམས་ཅད་མྱུར་དུ་སྨིན་ནས། མེ་འབར་བའི་སྔོན་ལ་དུ་བ་ཆེན་པོ་འབྱུང་བ་ལྟར། ནད་དང་སྡུག་བསྔལ་དྲག་པོ་འབྱུང་བ་ནི་མྱུར་དུ་མཆོག་གི་དངོས་གྲུབ་ཆེན་པོ་ཐོབ་པའི་སྔ་ལྟས་ལས་སློང་ཞེས་བྱ་སྟེ། ཨོ་རྒྱན་རིན་པོ་ཆེའི་ཞལ་ནས། གསང་སྔགས་ཀྱི་སྒྲུབ་པ་ཟབ་མོ་རྣམས་བྱས་པས། ནད་དང་སྡུག་བསྔལ་སོགས་མི་ཤིས་པ་མང་པོ་འབྱུང་བ་ནི། སྣོད་བཀྲུས་པའི་
དྲི་མ་ལྡང་བ་ལྟར་སྒྲིབ་པ་དག་པའི་ལས་སློང་ཡིན་ཚུལ་རྒྱ་ཆེར་གསུངས་ཏེ། རྒྱ་རས་དང་རྒོད་ཚང་པ་དང་། ལོ་རས་སོགས་ཀྱིས་སྒྲུབ་པ་རྩེ་གཅིག་བྱས་པས་གྲུབ་པ་ཐོབ་ཁརི་ཆུ་ནད་དང་། ཤིག་ནད་དང་། ཀླུ་ནད་ཀྱིས་འདས་ལ་ཁད་བྱུང་བ་ལྟ་བུའོ། །ཡང་མི་ཚེར་ཆོས་དང་སྒྲུབ་པ་རྩེ་གཅིག་བྱས། ཉམས་རྟོགས་བཟང་པོ་ཡོད་པའམ་ས་གནས་ཀྱི་སེམས་དཔའ་ཆེན་པོ་རྣམས་ཀྱང་འདས་ཁ་ནད་གཅོད་ཀྱི་སྡུག་བསྔལ་དྲག་པོ་ཡུན་རིང་དུ་སྦྱངས་བའི། བཟོད་གླགས་མེད་པའི་ཟུག་གཟེར་དྲག་པོ་འབྱུང་བ་ནི་ལས་ཀྱི་སྒྲིབ་པའི་ལྷག་མ་ཅི་ཡོད་པ་ཐམས་ཅད་འཆི་ཁ་དེར་སྦྱངས་ནས་འཆི་བ་ཆོས་ཀྱི་སྐུར་སངས་རྒྱ་བའམ། དག་པའི་ཞིང་ཁམས་སུ་གཤེགས་པའི་སྔ་ལྟས་ཡིན་ཏེ། རྗེ་བཙུན་མི་ལ་ལ་གསོལ་བའི་ཟུག་གཟེར་དྲག་པོ་བྱུང་དུས། གསོལ་བ་འདྲེན་མཁན་རྒན་མོས། ཟུག་གཟེར་མོས་ཁུར་རོགས་བྱེད་ཟེར་ནས་ཡུད་ཙམ་སྤྲོས་པས། མོས་སྐད་ངན་ཆེན་པོ་ཤོར་ཏེ་ཕར་ལོང་ཟེར། ས་རྡོ་ལ་སྤོས་པས་ས་རྡོ་གས། ལས་སྒྲིབ་ཀྱི་ལྷག་མ་སྦྱང་བ་ཡིན་གསུངས་ནས་མི་ལ་ཉིད་ཀྱིས་བླང་བ་དང་། རྗེ་ཕག་གྲུ་དང་། འབྲོམ་སྟོན་སོགས་ཀྱིས་ཀྱང་མཛེ་ནད་
བྱུང་བ་ལ། ལས་ཀྱི་སྒྲིབ་པ་ལྷག་མ་དག་གསུངས་ནས་ཐུགས་དགྱེས་བཞིན་གཤེགས། དོན་དེ་འདྲ་བ་ལ་དགོངས་ནས། རྗེ་དེ་བཞིན་གཤེགས་པས། ངན་སོང་གསུམ་སོགས་མི་ཟད་འཁོར་བ་ཡི། །མི་ཁོམ་འཇིག་རྟེན་རྣམས་སུ་སྐྱེ་འགྱུར་ལས། །གང་དག་ཚེ་འདི་ཉིད་ལ་རབ་སྨིན་ནས། །ལན་གྲངས་གཞན་དུ་མྱོང་བར་མ་གྱུར་ཅིག །ཅེས་སྨོན་ལམ་འདེབས་པར་མཛད་པས་འགྲུབ་སྟེ། སྣེའུ་རྫོང་ནག་པས་དབུ་བསུ་བ་ཡང་མཁྱེན་བཞིན་དུ་དེར་བྱོན་པ་ལྟ་བུའོ། །དེས་ན་ཆོས་པོ་རྣམ་དག་ལ་འཆི་ཁའི་མཚམས་སྦྱོར་ངན་པ་འབྱུང་ཡང་ངན་པའི་ངེས་པ་མེད་དེ། །བྱང་ཆུབ་སེམས་དཔའ་མེ་ཏོག་ཟླ་མཛེས་ཉེས་མེད་དུ་བསྒོངས་པ་དང་། ཀ་ལིང་ཀའི་རྒྱལ་པོས་ངའི་ཡན་ལག་དང་ཉིང་ལག་བཅད་ཀྱང་། །ཞེ་སྡང་གི་རྟོག་པ་མ་བྱུང་གསུངས་པ་ལྟ་བུའོ། །ཡང་མཐོང་ཆོས་མྱོང་འགྱུར་གྱི་ལས་ནི། ཚེ་སྔ་མའམ་ཡང་སྔ་མ་དགེ་བའམ་སྡིག་པ་ཚབས་ཆེན་ཞིག་བྱས་པ་ཚེ་འདི་ལ་ངེས་པོར་སྨིན་དགོས་པ་ཞིག་ཡོད་ན་ཚེ་འདིར་ཚེ་རིང་བ་དང་། ནད་མེད་པོ་སྔོན་གྱི་ལས་སྨིན་པ་དེ་ལ་མུ་སྟེགས་པ་དང་། བོན་གྱི་དྲང་སྲོང་དམོད་པ་གྲུབ་པ་སྟོང་གིས་བྲུབ་ཀྱང་གནོད་མི་
ནུས། ལོངས་སྤྱོད་མངའ་ཐང་ཆེ་བའི་ལས་སྨིན་པ་དེ་ལ། ཕྱོགས་བཞི་ནས་དགྲ་ལངས་ཀྱང་དེའི་མངའ་ཐང་འཕྲོག་པར་མི་ནུས། ཚེ་ཐུང་ཞིང་ནད་མང་བའི་ལས་སྨིན་པ་དེ་ལ། དྲང་སྲོང་བདེན་ཚིག་གྲུབ་པ་སྟོང་གིས་བསྲུངས་བ་བྱས། འཚོ་མཛད་གཞོན་ནུ་སྨན་པར་བོས་ཀྱང་མི་ཕན། ལོངས་སྤྱོད་དང་མངའ་ཐང་ཉམས་པའི་ལས་སྨིན་པ་དེ་ལ། ཟས་ནོར་ལོངས་སྤྱོད་ཐམས་ཅད་གྲམ་གསེང་དུ་ཆུ་བླུག་པ་དང་འདྲ། སྙིང་དང་འདྲ་བའི་ཉེ་དུ་དང་འཁོར་གཡོག་རྣམས་དགྲ་དང་བསྡོང་ནས་འོང་བ་ཡིན། དེ་ལ་དཀོན་མཆོག་གི་ཐུགས་རྗེས་ཀྱང་མི་སྐྱོབ་པས་གཞན་གྱིས་སྐྱོབ་པ་ལྟ་ཅི་སྨོས་ཏེ། མཐའ་འཁོབ་རྒྱལ་བོ་འཕགས་སྐྱེས་པོའི་དམག་བྱུང་དུས། མོའུ་མགལ་གྱི་བུས་གྲོང་ཁྱེར་སེར་སྐྱ་ལྷུང་བཟེད་གཅིག་གིས་བཀབ་ནས་མི་མཐོང་བར་བྱའམ་ཞུས་པས། ལས་བདག་གིར་བྱ་ཚུགས་གསུངས། དེར་ཤཱཀྱའི་རྒྱལ་རིགས་ལྔ་བརྒྱ་བསད། ཤཱཀྱའི་བུ་མོ་ལྔ་བརྒྱའི་སྐྱིད་པ་བྲགས། དེ་སྔོན་གྱི་ལས་ཡིན་ཚུལ་གསུངས་པ་མ་གཏོགས་ཐུབ་པ་ཉིད་བཞུགས་ཀྱང་སྐྱོབ་རྒྱུ་མ་བྱུང་བ་ལྟ་བུ་སྟེ། སངས་རྒྱས་ཀྱི་མཚན་དང་གཟུངས་སྔགས་ཀྱི་ཕན་ཡོན་ཀུན་ལ་
ཡང་། སྔོན་གྱི་ལས་ཀྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ། །ཞེས་གསུངས་པ་ནི། དེ་ལྟར་མཐོང་ཆོས་མྱོང་འགྱུར་གྱི་ལས་སོ། །མཚམས་མེད་པ་ལྔ་སོགས་སྡིག་པ་ཚབས་ཆེན་དང་། དགེ་བ་ཚབས་ཆེན་ནི། སྐྱེ་བ་གཞན་གྱིས་བར་མཚམས་མི་ཆོད་པར་སྐྱེ་བ་རྒྱབ་རེས་ངེས་པར་སྨིན་པས། མཚམས་མེད་པའི་ལས་སོ། །དགེ་སྡིག་འབྲིང་ཙམ་ནི། སྐྱེ་བ་རྒྱབ་མའི་རྒྱབ་མར་ངེས་པར་སྨིན་པ་ནི། སྐྱེ་གནས་མྱོང་འགྱུར་གྱི་ལས་སོ། །དགེ་སྡིག་ཆུང་ངུ་གང་ཡང་རྐྱེན་གྱིས་བསྐུལ་ན་ཚེ་འདིར་སྨིན་ཡང་སྲིད། རྐྱེན་དང་ཕྲད་ན་བསྐལ་པ་བརྒྱ་སྟོང་ལུས་ཀྱང་སྲིད། ཆུད་མི་ཟ་བར་ནམ་ཞིག་ངེས་པར་སྨིན་དགོས་པ་ནི་ལན་གྲངས་གཞན་དུ་མྱོང་འགྱུར་གྱི་ལས་ཏེ། ཚེ་ཐུང་ནད་མང་སོགས་ལས་ངན་གྱིས་བསྐུལ་ནས་ཚེ་འདིར་སྨིན་པ་ལ་རིམ་གྲོ་དང་སྨན་དཔྱད་ཀྱིས་བཟློག་ནས་ཕྱིར་བསྲིང་ནུས་ཏེ། དཔེར་ན་ཁ་མཆུ་དུས་བྱས་པ་ལྟ་བུའོ། །སྔོན་གྱི་ལས་ངན་ཡེ་མེད་ན་གདོན་གྱི་ཡང་གནོད་མི་ནུས་ནད་ཀྱང་མི་འབྱུང་། ཚེ་རིང་ནད་མེད་ལོངས་སྤྱོད་ཆེ་བའི་ལས། འཇིག་རྟེན་གྱི་ལྷ་མཆོད་ཅིང་བསྒྲུབས་པས་ཚུར་འཐེན་ནས། ཚེ་འདི་ལ་སྨིན་པ་ནི། སང་
ཕོད་གནང་ཕོད་ཀྱི་གཏེ་ཁྲལ་རྣམས་ད་ལོ་བླངས་ནས་ཟོས་པ་ལྟ་བུའོ། །ཡེ་ཤེས་ཀྱི་ལྷའི་དངོས་གྲུབ་ནི་དེ་ལྟར་མ་ཡིན་ཏེ། ལྷ་དེའི་སྔོན་གྱི་སྨོན་ལམ་དང་། ཐུགས་རྗེའི་སྟོབས་ལས་བྱུང་བའོ། །མྱོང་བར་མ་ངེས་པའི་ལས་ནི་དགྲ་བཅོམ་པའི་རྒྱུད་ཀྱི་ལས་ལྟ་བུ་གསུངས་ཏེ། དཔེར་ན་ཤཱཀྱ་ཐུབ་པ་སངས་རྒྱས་མ་སྔ་ན། འཁོར་ལོས་སྒྱུར་བའི་རྒྱལ་པོ་ལྔ་བརྒྱར་སྐྱེ་དགོས་པ་དེར་སྐྱེ་ལོང་མ་བྱུང་བར་སངས་རྒྱས་པས། དེའི་བསོད་ནམས་ཉན་ཐོས་རྣམས་ཀྱི་འཚོ་བ་ལ་བསྔོ་བར་མཛད་པས། མུ་ཏིག་བྲེ་གང་གིས་འབྲས་བྲེ་གང་ལས་མི་ཁུག་པའི་དུས་བྱུང་ཡང་། ངའི་ཉན་ཐོས་རྣམས་འཚོ་བས་མི་ཐོངས་གསུངས་པས་རང་རེ་རབ་ཏུ་བྱུང་བ་རྣམས་སྡོམ་པ་དམ་ཚིག་གཙང་མར་སྲུང་བས་ན། ཆོས་བརྒྱག་གིས་ཐབས་མི་ཆག་པའི་གནད་ཆེན་པོ་འདི་ཡིན་ནོ། །ཡང་འདོད་ཁམས་ཀྱི་དགེ་བ་ནི་བསོད་ནམས་ཀྱི་ལས་ཡིན། འདོད་ཁམས་ཀྱི་མི་དགེ་བ་ནི་བསོད་ནམས་མ་ཡིན་པའི་ལས་ཡིན། གཟུགས་ཁམས་དང་གཟུགས་མེད་ཀྱི་དགེ་བ་ནི་མི་གཡོ་བའི་ལས་ཡིན་ནོ། །ཡང་ཁམས་གོང་མའི་དགེ་བ་ནི་གཅིག་ཏུ་དཀར་བའི་ལས། འདོད་པའི་མི་དགེ་བ་ནི་།
གཅིག་ཏུ་ནག་པའི་ལས། འདོད་པའི་དགེ་བ་ནི་འདྲེས་མའི་ལས་སོ། །ཟག་མེད་ཀྱི་དགེ་བ་ནི་རྣམ་སྨིན་ཟད་བྱེད་ཀྱི་ལས་ཡིན་ཏེ། དཀར་བའི་ལས་ཀྱི་འབྲས་བུ་བདེ་བ། །ནག་པའི་ལས་ཀྱི་འབྲས་བུ་སྡུག་བསྔལ། འདྲེས་མའི་ལས་ཀྱི་བདེ་སྡུག་འདྲེས་མ། ཟག་མེད་ཀྱི་ལས་ཀྱི་ལས་དེ་དག་ཟད་པར་བྱེད་པའོ། །དེད་དཔོན་སྙིང་རྗེ་ཆེན་པོས་མི་ལྔ་བརྒྱའི་སྲོག་བཤོལ་བའི་ཕྱིར། བདུད་མི་ནག་མདུང་ཐུང་ཅན་བསད་པ་དང་། ལྷ་ལུང་དཔལ་གྱི་རྡོ་རྗེས་བསྟན་པའི་དོན་དུ་རྒྱལ་པོ་གླང་དར་བསད་པ་ལྟ་བུ་ནི་བསམ་པ་དཀར་ལ་སྦྱོར་བ་ནག་པའི་ལས་སོ། །སྲོག་གཅོད་པའི་ཕྱིར་སྦྱིན་པ་བཏང་བ་ལྟ་བུ་ནི། བསམ་པ་ནག་ལ་སྦྱོར་བ་དཀར་བའི་ལས་སོ། །བསམ་པ་དག་པས་སྦྱིན་པ་བཏང་བ་ལྟ་བུ་ནི། །བསམ་པ་དཀར་ལ་སྦྱོར་བ་དཀར་བའི་ལས་སོ། །ཤ་ཟ་བའི་ཕྱིར་སྲོག་གཅོད་པ་ལྟ་བུ་ནི། བསམ་པ་ནག་ལ་སྦྱོར་བ་ནག་པའི་ལས་སོ། །ཡང་འདོད་པའི་ཁམས་ནས་བསམ་གཏན་གསུམ་པའི་བར་གྱི་དགེ་བའི་ལས་ནི། བདེ་བ་མྱོང་འགྱུར་གྱི་ལས་སོ། །ཡང་འདོད་པའི་ཁམས་ཀྱི་མི་དགེ་བ་ནི། སྡུག་བསྔལ་མྱོང་འགྱུར་གྱི་ལས་སོ། །བསམ་གཏན་
གསུམ་པ་ཡན་ཆད་ཀྱི་དགེ་བ་ནི། བཏང་སྙོམས་མྱོང་འགྱུར་གྱི་ལས་སོ། །ཡང་ཟག་བཅས་ཟག་མེད་ཀྱི་དགེ་བ་བཅུ་ནི་དགེ་བའི་ལས། མི་དགེ་བ་བཅུ་ནི་མི་དགེ་བའི་ལས། ཐར་པ་མྱ་ངན་ལས་འདས་པ་ནི་ལུང་མ་བསྟན་གྱི་ལས། ཡང་ཁམས་གང་གིས་ཡང་ཉོན་མོངས་ཅན་གྱི་ལས་ནི། སྒྲིབ་པ་ལུང་མ་བསྟན་གྱི་ལས་སོ། །བཟོ་བྱེད་པ་ལྟ་བུ་ནི་མ་བསྒྲིབ་ལུང་མ་བསྟན་གྱི་ལས། ཡང་སྣོད་ཀྱི་འཇིག་རྟེན་འགྲུབ་བྱེད་ཀྱི་ལས་ནི། སེམས་ཅན་སྤྱི་མཐུན་ཐུན་མོང་གི་ལས། བཅུད་ཀྱི་སེམས་ཅན་འགྲུབ་བྱེད་ཀྱི་ལས་ནི་ཐུན་མོང་མ་ཡིན་པའི་ལས་སོ། །དེ་ལྟར་ལས་དཀར་ནག་ཐམས་ཅད་མདོར་བསྡུ་ན། བདག་གི་དོན་དུ་དཀོན་མཆོག་དང་སེམས་ཅན་ལ་གནོད་པ་བྱེད་པའི་ནང་དུ་མི་དགེ་བ་ཐམས་ཅད་འདུས། དཀོན་མཆོག་དང་སེམས་ཅན་ལ་བདག་གིས་ཕན་པ་དང་བདེ་བ་བསྒྲུབ་པའི་ནང་དུ་དགེ་བ་ཐམས་ཅད་འདུས་ཏེ། སྤྱོད་འཇུག་ལས། འཇིག་རྟེན་བདེ་བ་ཁྱུ། ཇི་སྙེད་པ། །དེ་ཀུན་གཞན་བདེ་འདོད་ལས་འབྱུང་། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་འབྱུང་། །མང་དུ་བཤད་པས་ཅི་ཞིག་བྱ། །ཐུབ་
པས་གཞན་གྱིས་དོན་མཛད་དང་། །བྱིས་པས་རང་དོན་བྱས་པ་གཉིས། །འདི་གཉིས་ཀྱི་ནི་ཁྱད་པར་ལྟོས། །ཞེས་གསུངས་སོ། །དེ་ཉིད་ཀྱང་། སྡིག་པ་སྤངས་ཤིང་དགེ་བ་སྒྲུབ་པའི་ནང་དུ་འདུས་ལ། དེ་ཉིད་ཀྱང་རང་སེམས་འདུལ་བའི་ནང་དུ་འདུས་སོ། །སོ་ཐར་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་ཏེ། སྡེ་སྣོད་གསུམ་ཡང་དེ་ལ་འདུས་པའོ། །སྤྱན་སྔ་བ་ལ་ཞུ་གཏུག་ཞུས་པ་ལ་ཡང་། ཕྱག་ལ་གཅོད་པ་བཞིན་དུ་མཛད་ཀྱིན། ཇོ་བོ་ངས་ཅད་ཀྱིས་བཅད། མི་དགེ་བ་བཅུ་སྤང་པ་ལས། གཞན་ཅི་ཡང་མེད་པ་ཡིན་གསུངས། པུ་ཏོ་བའི་ཞལ་ནས། སྟོང་ཉིད་རིག་པས་ཀྱང་གོ་ནུས། ནན་ལྟར་ཟབ་པ་ལས་དང་འབྲས་བུ་གཅེས་གསུངས། དེ་ཡང་མི་དགེ་བ་ལས་སྡུག་བསྔལ་ཐམས་ཅད་འབྱུང་བས། སྡུག་བསྔལ་གྱི་རྒྱུ་མི་དགེ་བ་ཆུང་ངུ་ནས་སྤང་དགོས་སྙམ་པ་དང་། བདེ་བ་མཐའ་དག་དགེ་བ་ལས་འབྱུང་བས་དགེ་བ་ཆུང་ངུ་ནས་རྒྱ་ཆེན་པོ་བསགས་དགོས་སྙམ་དུ་བསམས་ནས་ཉིན་མཚན་ཐམས་ཅད་དུ་སྡིག་པ་
བཤགས་ཤིང་སྤང་བ་དང་དགེ་བ་ནན་ཏན་དུ་བསྒྲུབ་པར་བྱའོ། །རྒྱུ་འབྲས་ཀྱི་རྒྱབ་ཆོས་རེ་ཞིག་རྫོགས་སོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ཟ༽ །ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་དཔེ་དོན་ངོ་སྤྲོད་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རང་གི་ཆོས་སྐུར་ངོ་སྤྲད་པ་ལ། དགེ་དང་དོན་སྦྱར་ཏེ་ངོ་སྤྱད་པ་ནི། ཞི་ཁྲོ་གསང་བ་ཡོངས་རྫོགས་ཀྱི་དབང་ཁྲིད་སྤེལ་མའི་སྐབས་སུ། ཨོ་རྒྱན་རིན་པོ་ཆེས་གསུངས་པ་ནི། སྔོན་རྒྱ་གར་གྱི་ཡུལ་འགོར་ཕར་འདས། ཨོ་རྒྱན་གྱི་ཡུལ་དབུས་ཞིག་ན། རིན་ཆེན་ཁང་པ་སྒོ་ལྔར་ལོངས་སྤྱོད་ཟད་མི་ཤེས་པའི་ཕོ་བྲང་ན། རྒྱལ་པོ་ཆེན་པོ་ནམ་མཁའི་སྙིང་པོ་ཞེས་བྱ་བ། རྒྱལ་ཕྲན་བརྒྱད་ཁྲི་བཞི་སྟོང་དང་འབངས་དུ་མ་ལ་དབང་བྱེད་པ་བཙུན་མོ་དྲི་མེད་འོད་དང་ལྡན་པ་ཡིད་འོང་མ་བྱ་བ་
ལ། སྲས་རྒྱལ་བུ་འོད་ཟེར་བྱ་བ་ཤེད་མ་བྱེ་བ་སྨུག་སེ་བ་ཅིག་ཡོད་སྐད། བློན་པོ་རིག་པ་ཅན་ཉི་མའི་འོད་ཟེར་བྱ་བ་དང་། །མདོར་ན་འཁོར་སྲིད་དབང་ཐང་ལོངས་སྤྱོད་ཕུན་སུམ་ཚོགས་པར་འདུག་པ་ལས། དུས་ལན་གཅིག་ཙ་ན་རྒྱལ་པོའི་ཕོ་བྲང་ན། ཉེ་བའི་ཚོང་དུས་ཆེན་པོ་ཞིག་ཡོད་པ་དེ་རུ། ལྟད་མོ་རབ་ཏུ་ཆེ་བ་ཞིག་བྱུང་ནས། རྒྱལ་བུ་འོད་ཟེར་འཁོར་བཅས་ལྟད་མོ་གཟིགས་སུ་བྱོན་པ་ལས། སྒྱུ་མ་མཁན་གྱི་ལྟད་མོ་སྣ་ཚོགས་ལ། རྒྱལ་བུ་ལྟར་འགྲོ་ནས་ཡེངས། འཁོར་དང་བྲལ། ཕོ་བྲང་དུ་འོང་བའི་ལམ་མཐའ་འཁྲུགས། །སྒོ་སྟོར་ནས་
མི་རིགས་མི་གཅིག་པའི་ཡུལ་དུ་རྒྱལ་བུ་རྐང་འཁྱམས་ཏེ། སྤྲང་པོར་གཞི་ལ་མི་གནས་དྲི་ཟའི་མངལ་གྱི་གྲོང་སྒོ་རེའི་སྐོར་ནས་སྤྲང་བ་འདྲ། རང་ཡུལ་བརྗེད་དེ། གྲོང་ཁྱེར་ཐམས་ཅད་ཀྱི་སྒོར་རེས་མོས་སུ་འཁྱམས་ཤིང་སྤྱང་ཟས་ཟོས། སྤྲང་གོས་ངན་པ་གྱོན། རྨོངས་སྤྲང་རྣམས་དང་འགྲོགས། སྤྲང་སྒོ་སྒོ་ཁང་ཀུན་ཏུ་ཉལ། རབ་ཏུ་སྡུག་བསྔལ་མྱོང་ཞིང་ལོ་ཟླ་མང་པོ་ལོན་ཅིང་། རྒྱལ་སྲིད་ཀྱང་རྒྱལ་བུ་སྟོར་བས་ཞིག་ཏུ་ཉེ། རྒྱལ་པོ་ནམ་མཁའི་སྙིང་པོའི་གདུང་ཆད་ཀྱིས་དོགས་ཙ་ན། དེར་རྒྱལ་བུ་སྤྲང་ཕྲུག་དེས། གྲོང་ཡུལ་ཐམས་ཅད་ཀྱི་སྒོ་འགྲིམ་སྟོབས་ཀྱིས། བློན་པོ་རིག་པ་ཅན་ཉི་མའི་འོད་ཟེར་ཅན་གྱི་སྒོ་རྩར་འཁོར་བ་ལ། བློན་པོས་རྒྱལ་བུ་ཡིན་པར་ངོ་ཤེས་ནས། འོ་སྔོན་ངེད་ཀྱི་རྒྱལ་བུ་སྟོར་བ་འདིར་བྱུང་བ། ཁྱེད་སྤུང་མི་དགོས་ཕོ་བྲང་དུ་འདོང་ཟེར་ནས་ཁྲིད་པ་ལ། རྒྱལ་སྤྲང་གིས་སྨྲས་པ། ང་ནི་རྒྱལ་བུ་མ་ཡིན་ནོ། །དྲན་པ་རྙེད་ནས་སྤྲང་པོ་ཁོ་ན་ཡིན་ཏེ། །ཕོ་བྲང་དུ་ཁྲིད་ཀྱང་རྒྱལ་པོ་མི་གཏུབ། མི་འགྲོ་ཟེར་བ་ལ། ཡོང་བློན་པོས་སྨྲས་པ་ལ། ཁྱེད་ནི་རྒྱལ་བུ་ཆུང་ངུ་ཁ་སྨུག་ཤེད་མ་བྱེ་བ་གཅིག་ཚོང་དུས་སུ་སྒྱུ་མ་མཁན་གྱི་ལྟད་མོ་
ལྟར་ཕྱིན་པས། ལྟད་མོ་ལ་ཡེངས་བས་ཕོ་བྲང་དང་བྲལ་ནས་འཁྱམས་པ་ཡིན་ནོ། །ད་སྤྲང་ཡང་རྒྱལ་བུ་ཡིན་པས། རྒྱལ་ས་གཏད་པ་ཡིན་གྱིས། གལ་ཏེ་ཁྱེད་ཐེ་ཚོམ་པ་ལྟར་རྒྱལ་བུ་མ་ཡིན་སྙམ་ན། ཁྱོད་ཀྱི་དང་པོ་ཡུལ་གང་ཡིན། ཕོ་བྲང་གང་ཡིན། གྲོང་གང་ཡིན། ཁྱིམ་གང་ཡིན། རིགས་གང་ཡིན། ཕ་མ་གང་། །འཁོར་གང་། བྱེད་སྤྱོད་གང་ཡིན་དྲིས་པས། འགྱུ་དྲན་འཛིན་ཆགས་ཕུག་བརྟགས་ནས། སྤྲང་པོས་སྨྲ་རྒྱུ་མ་རྙེད་པས་སྐྱེངས་ནས། འོ་ན་ངའི་དེ་དག་ཐམས་ཅད་ཡིན་ལུགས་ཞིབ་ཏུ་སྨོས་ལ་སྤྱོད་ཅིག་ཟེར་བ་ལས། བློན་པོས་མིང་དོན་སྦྱར་ཏེ་ཡུལ་བསྟན། དེ་བཞིན་ཏུ་གནས། ཕོ་བྲང་། གྲོང་། ཁྱིམ། མལ། རིགས། ཕ་མ། རྒྱལ་བུ་ཐམས་ཅད་བརྗོད་དེ། རིག་པ་ཅན་གྱིས་བྲམ་ཟེར་རྒྱལ་བུ་ཁྲུས་ནས་བཏོན། ཁྱིམ་ལ་བཞག །ཕོ་བྲང་ནང་དུ་བཅུག་ཅོད་པན་བཏགས། དབུ་བརྒྱན་སྐོན། རྒྱལ་གོས་སྐོན། མངའ་རིས་ལོངས་སྤྱོད་ཕོག །དགའ་སྟོན་མངའ་གསོལ་བྱས། རྒྱལ་སྲིད་གཏད། རྒྱལ་སར་དུས་གཅིག་བྱུང་། ཡབ་འདྲ་བར་གྱུར་ཏེ། སྐད་ཅིག་ལ་སྤྲང་པོ་མ་
སྤངས་ལ། སྤྱང་ཚུལ་མི་གནས། སྤྲང་པོའི་སྡུག་བསྔལ་རང་སངས་ཏེ། རྒྱལ་སྲིད་དང་མངའ་རིས་ཐམས་ཅད་མ་ལུས་པར་མངར་འདུས་ཏེ། བདེ་སྐྱིད་ཕུན་སུམ་ཚོགས་པར་གྱུར་སྐད། དེ་ཉིད་ཀྱི་དོན་ཅུང་ཟད་བཤད་ན། སྔོན་རྒྱ་གར་གྱི་ཡུལ་འགོ་ཕོ་བྲང་ཕར་འདས་ཞེས་བྱ་བ་ནི། རྟོགས་ཏེ་སངས་མ་རྒྱས། མ་རྟོགས་ཏེ་འཁོར་བའི་སྔོན་རོལ་གང་གིས་ཀྱང་མ་ཆོད་པའོ། །ཨོ་རྒྱན་གྱི་ཡུལ་དབུས་ཞིག་ན་ཞེས་པ་ནི། རྒྱ་ཆད་དང་ཕྱོགས་ལྷུང་མེད་པ་ཡིན་ནོ། །རིན་ཆེན་ཁང་པ་ཞེས་པ་ནི། ཀུན་གཞི་ངོ་བོ་སྟོང་པ་ལ་བྱའོ། །སྒོ་ལྔ་ཞེས་པ་ནི་མ་འགག་པ་ཟང་ཐལ་བའོ། །ལོངས་སྤྱོད་ཟད་མི་ཤེས་པ་ཞེས་པ་ནི། སྐྱོན་གྱིས་དབྲི་བ་དང་ཡོན་ཏན་གྱིས་གང་བ་མེད་པའོ། །ཕོ་བྲང་ཞེས་པ་ནི། །གཞི་སྙིང་པོ་ཁྱབ་བདལ་ཆེན་པོའོ། །རྒྱལ་པོ་ཆེན་པོ་ནམ་མཁའི་སྙིང་པོ་ཞེས་བྱ་བ་ནི། འཁོར་འདས་ཀྱི་མཐར་མ་ལྟུང་བའོ། །རྒྱལ་ཕྲན་བརྒྱད་ཁྲི་བཞི་སྟོང་ཞེས་པ་ནི། རྟོག་ཚོགས་ཐམས་ཅད་དབང་དུ་འདུས་པ་དང་། ཆོས་སྒོ་བརྒྱད་ཁྲི་བཞི་སྟོང་འདུས་པའོ། །འབངས་དུ་མ་ལ་དབང་བྱེད་པ་ཞེས་པ་ནི། ཉོན་མོངས་པ་ཐམས་ཅད་ཀྱི་འཕྲང་མི་ནུས་
པའོ། བཙུན་མོ་དྲི་མེད་འོད་ལྡན་ཡིད་འོང་མ་ཞེས་བྱ་བ་ནི། རྩལ་རང་འོད་ཀྱི་སྣང་བ་དང་ལྷན་ཅིག་གནས་པའོ། །སྲས་རྒྱལ་བུ་འོད་ཟེར་ཞེས་བྱ་བ་ནི། རང་རྩ་ལ་འགྱུ་བ་རྟོལ་སྐྱེས་པ་ལ་མི་རྟོག་པ་མ་འཁྲུལ་པའོ། །ཤེད་མ་བྱེ་བ་ཞེས་བྱ་བ་ནི། རྟོགས་པ་མངོན་དུ་མ་གྱུར་པའོ། །སྨུག་སེ་བ་ཞིག་ཡོད་སྐད་ཅེས་པ་ནི། ལྷུན་གྱིས་གྲུབ་པར་བརྗོད་དུ་མེད་པའོ། །བློན་པོ་རིག་པ་ཅན་ཞེས་བྱ་བ་ནི། རྟོགས་པ་མངོན་དུ་གྱུར་པའི་བླ་མ་ཡིན་ལ། ཉི་མའི་འོད་ཟེར་ཞེས་བྱ་བ་ནི། ཐུགས་རྗེས་འཁྲུལ་ཞེས་པའོ། །མདོར་ན་འཁོར་སྲིད་མངའ་ཐང་ལོངས་སྤྱོད་ཕུན་སུམ་ཚོགས་པ་བཟློག་པ་ལས་ཞེས་པ་ནི། ཀུན་གཞིའི་ཀློང་ནས་འཁོར་འདས་ཀྱི་ཆོས་ཀུན་རྫོབ་ཕུན་སུམ་ཚོགས་པ་བསྟན་པའོ། །དུས་ལན་གཅིག་ཙ་ན་ཞེས་པ་ནི། འཁྲུལ་སྙིང་འདོད་པའི་ཚེའོ། །རྒྱལ་པོའི་ཕོ་བྲང་དང་ཉེ་བའི་ཞེས་པ་ནི། ཀུན་གཞི་འཁོར་ཐག་ཉེ་བའོ། །ཚོང་དུས་གཅིག་ཡོད་པའི་དེ་རུ་ཞེས་པ་ནི། ཡེངས་པའི་ས་རང་སྣང་སྒོ་ལྔའོ། །ལྟད་མོ་རབ་ཏུ་ཆེ་བ་ཞིག་བྱུང་ནས་ཞེས་པ་ནི། ཚོགས་དྲུག་ཡུལ་གྱི་སྣང་བ་སྣ་ཚོགས་ཤར་བའོ། །རྒྱལ་བུ་ཞེས་
པ་ནི་རྟོག་པ་འཁྲུལ་པ་སྟེ། འགྱུ་བ་རྟོལ་སྐྱེས་སོ། །འོད་ཟེར་ཞེས་བྱ་བ་ནི་རྟོགས་དཔྱོད་དུ་མའོ། །འཁོར་བཅས་ལྟད་མོ་ལ་གཟིགས་སུ་བྱོན་པ་ལས་ཞེས་པ་ནི། སྒོ་ལྔའི་རྣམ་པར་རྟོག་པ་དང་བཅས་པའོ། །སྒྱུ་མ་ཞེས་པ་ནི་སྣང་བ་བསླུ་བྲིད་མཁན་སྣ་ཚོགས་སུ་འཆར་བའོ། །མཁན་གྱི་ལྟད་མོ་སྣ་ཚོགས་ལ་ཞེས་པ་ནི། ཅིར་ཡང་རང་སྣང་ཞིང་འཁྲུལ་པའོ། །རྒྱལ་བུ་ལྟར་འགྲོ་ནས་ཡེངས་ཞེས་པ་ནི། རྩལ་རྟོལ་སྐྱེས་སྒོ་ལྔ་ནས་སྟོན་པའོ། །འཁོར་དང་བྲལ་ཞེས་པ་ནི། ཚོགས་དྲུག་ཡུལ་དུ་འཁྱམས་པའོ། །ཕོ་བྲང་དུ་འོང་བའི་ལམ་མཐའོ་འཁྲུག་ཅེས་པ་ནི། གཞི་ཁུང་མ་ཆོད་པའོ། །སྒོ་སྟོར་ནས་ཞེས་པ་ནི། ཡེ་ཤེས་ཀྱི་འཆར་བ་བྱང་ཆུབ་ཀྱི་ལམ་མ་རྙེད་ནས་བཟུང་ཡུལ་ལ་འཛིན་པས་སྤྱོད་པའི་སྡུག་བསྔལ་དུ་འགྲོ་བའོ། །མི་རིགས་མི་གཅིག་པའི་ཡུལ་ཞེས་པ་ནི། འཁོར་འདས་ཀྱི་རྒྱབ་གྱེས་པའོ། །རྒྱལ་བུ་རྐང་འཁྱམས་ཏེ་ཞེས་པ་ནི། ཁམས་གསུམ་འགྲོ་བ་དྲུག་ཏུ་འཁོར་ཞིང་འཁྲུལ་པའི་འབྲས་བུ་སྨིན་པའོ། །སྤྲང་པོར་གྱུར་པ་ཞེས་པ་ནི་གཞི་ལ་མི་གནས་དྲི་ཟའི་མངལ་གྱི་གྲོང་ཁྱེར་གྱི་སྒོར་རེ་མོས་སུ་བསྐོར་ནས་སྤང་བ་དང་འདྲ་བའོ། །རང་
ཡུལ་བརྗེད་ཅེས་པ་ནི། དང་པོའི་གནས་ལུགས་ཀྱི་གཞི་དེ་བརྗེད་པའོ། །གྲོང་ཁྱེར་ཐམས་ཅད་ཀྱི་སྒོར་རེས་མོས་སུ་འཁྱམས་ཤིང་ཞེས་པ་ནི། གཡོ་བ་སྐྱོད་བྱེད་ཀྱི་རླུང་གིས་བསྐྱེད་དེ་རྟོག་པ་ལ་རྟོག་པས་འཁྲུལ། བཟུང་ཡུལ་ལ་འཛིན་པས་བསྐྱེད་དོ། །རིགས་དྲུག་སོ་སོའི་སྡུག་བསྔལ་ལ་ལོངས་སྤྱོད་ཅིང་འགྱུ་དྲན་འཛིན་ཆགས་སུ་འཁྲུལ་ལོ། །སྤྲང་ཟས་ཟོས་ཞེས་པ་ནི། སྡུག་བསྔལ་སྣ་ཚོགས་སྤྱོད་པའོ། །སྤྲང་གོས་ངན་པ་གྱོན་ཞེས་པ་ནི། གཟུང་འཛིན་ཆགས་སྡང་དུག་ལྔའི་ནང་དུ་བྱིང་བའམ་གནས་པའོ། །རྨོངས་སྤང་རྣམས་དང་འགྲོགས་ཞེས་པ་ནི། ཡུལ་དྲུག་འཁྲུལ་སྣང་གི་དབང་གིས་འཁྲུལ་བའི་གྲོགས་དང་འགྲོགས་པའོ། །སྤྲང་སྒོ་སྒོ་ཁང་ཀུན་ཏུ་ཉལ་ཞེས་པ་ནི། །བག་ཆགས་ཀྱི་ཞེན་སྣང་དུག་ལྔའི་ནང་དུ་ཉལ་བའོ། །རབ་ཏུ་སྡུག་བསྔལ་མྱོང་ཞེས་པ་ནི། ལས་དང་ལས་འབྲས་ལ་སྤྱོད་ཅིང་འཁོར་བར་འཁྱམས་པའོ། །ལོ་ཟླ་མང་པོ་ལོན་ཅིང་ཞེས་པ་ནི། ཀུན་གཞིའི་བདེ་བ་ཆེན་པོ་དང་བྲལ་ཞིང་། དུས་སྐལ་ཚད་ལས་འདས་པར་སྡུག་བསྔལ་གྱིས་གཟིར་བའོ། །རྒྱལ་སྲིད་ཀྱང་རྒྱལ་བུ་སྟོར་བ་བཞིན་ཞིག་ཏུ་ཉེ་
ཞེས་པ་ནི། སངས་རྒྱས་ཀྱི་རིགས་ལས་གོལ་བའོ། །རྒྱལ་པོ་ནམ་མཁའི་སྙིང་པོའི་གདུང་ཆད་ཀྱིས་དོགས་པར་གྱུར་ཙ་ན་ཞེས་པ་ནི། སངས་རྒྱས་ཀྱི་གསུང་ངམ་རིགས་ཞ་ནས་གདུང་ཆད་ཀྱིས་དོགས་པའོ། །དེར་རྒྱལ་བུ་སྤྱང་ཕྲུག་དེས་ཞེས་པ་ནི། རྟོལ་སྐྱེས་རྟོག་དཔྱོད་འཁྲུལ་པ་དེ་ཉིད་དོ། །གྲོང་ཁྱེར་ཐམས་ཅད་ཀྱི་ཞེས་པ་ནི། སྐྱེ་གནས་བཟང་ངན་ཐམས་ཅད་བསྒྲོད་དོ། །འགྲིམ་སྟོབས་ཀྱིས་ཞེས་པ་ནི། འགྲོ་དྲུག་ཐམས་ཅད་ཀྱི་སྡུག་བསྔལ་ཁ་བརྒྱུད་པའོ། །བློན་པོ་རིགས་པ་ཅན་ཉི་མའི་འོད་ཟེར་གྱི་སྒོ་རྩར་འཁོར་བོ་ལ་ཞེས་པ་ནི། དུས་ལན་གཅིག་ལ་ལས་འཕྲོས་སད་དེ། རྟོགས་པ་མངོན་གྱུར་གྱི་བླ་མ་མན་ངག་ཅན་མཇལ་བའི་ཐ་ཚིག་གོ །བློན་པོས་ཞེས་པ་ནི། བླ་མས་སློབ་བུ་འཁྲུལ་པའི་བློ་བཅོས་པའོ། །རྒྱལ་བུ་ཞེས་པ་ནི། རྟོལ་སྐྱེས་ཀྱི་རིག་པའོ། །ཡིན་པར་ངོ་ཤེས་ནས་ཞེས་པ་ནི། རང་སེམས་སངས་རྒྱས་ཡིན་པར་ངོ་ཤེས་པའོ། །འོ་སྔོན་ངེད་ཀྱི་རྒྱལ་བུ་སྟོར་བ་འདིར་བྱུང་ན་ཞེས་པ་ནི། ཀུན་གཞི་འཁྱམས་པོ་སངས་རྒྱས་ཀྱི་རིགས་ཡིན་ཀྱང་འཁོར་བར་འཁྱམས་པའོ། །ཁྱོད་སྤང་མི་དགོས་ཞེས་པ་ནི། འཁོར་བར་འཁྱམས་མི་
དགོས་ཞེས་པའི་ཐ་ཚིག་གོ །ཕོ་བྲང་དུ་འདོང་ཞེས་པ་ནི། རང་གནས་སངས་རྒྱས་ཀྱི་ཞིང་དུ་ངོ་སྤྲད་ཅེས་ཁ་དྲངས་པའོ། །རྒྱལ་སྤྲང་གིས་སྨྲས་པ་ཞེས་པ་ནི། རང་ལ་ཡིད་མ་ཆེས་ཏེ་སངས་རྒྱས་མ་ཡིན་ནོ་སྙམ་པའོ། །ང་ནི་རྒྱལ་བུ་མ་ཡིན་ནོ་ཞེས་པ་ནི། བདེ་འབྲས་མེད་པའོ། །དྲན་པ་རྙེད་པས་སྤྲང་པོ་ཁོ་ན་ཡིན་པས་ཞེས་པ་ནི། གཞིའི་གནས་ལུགས་ནི་བརྗེད་དེ། འཁོར་བའི་བག་ཆགས་ནི་དྲན་ནས་འཁྱམས་པ་ཁོ་ནའོ། །ཞེས་པའི་དོན་ནོ། །ཕོ་བྲང་དུ་ཁྲིད་ནས་རྒྱལ་བུ་མི་གཏུབ་ཅེས་པ་ནི། སེམས་སངས་རྒྱས་སུ་མི་གཏུབ་སྙམ་པའོ། །མི་འགྲོ་ཟེར་བ་ལ་ཞེས་པ་ནི། ཆོས་ཉིད་ལ་བློ་མི་འཇུག་ཅིང་། དམན་སྤྱོད་ལ་ཞེན་པ་ལ་བྱའོ། །ཡང་བློན་པོས་སྨྲས་པ་ཞེས་པ་ནི་བླ་མས་སོ། །ཁྱོད་ནི་རྒྱལ་བུ་ཆུང་ངུ་ཞེས་པ་ནི། ཀུན་གཞི་སྤྲང་འཁྱམས་ཀྱི་སློབ་བུ་རྩལ་རྟོལ་སྐྱེས་ཀྱི་ཚིག་གོ །ཁ་སྨུགས་ཤེད་མ་བྱེ་བ་ཞིག་ཅེས་པ་ནི། རྟོགས་པ་མངོན་དུ་མ་གྱུར་བའི་ཚེ་ན་ཞེས་པའོ། །ཚོང་དུས་སུ་སྒྱུ་མ་མཁན་གྱི་ལྟད་མོ་ལྟར་ཕྱིན་པས་ཞེས་པ་ནི། རང་གིས་རང་མ་རིག་ནས་བསླུ་བྱེད་ཀྱི་རླུང་གིས་བསྐྱོད་པའོ། །ལྟད་མོ་ལ་ཡེངས་
ཞེས་པ་ནི། ཚོགས་དྲུག་གི་ཡུལ་དུ་ཡེངས་པའོ། །ཕོ་བྲང་གི་སྲིད་དང་བྲལ་ཏེ་འཁྱམས་པ་ཡིན་ནོ་ཞེས་པ་ནི། གཞི་མ་འགྱུ་དྲན་འཛིན་ཆགས་སྡང་གི་དབང་གིས་འཁོར་བར་འཁྱམས་པའོ། །ད་ལྟ་སྤུང་ཡང་རྒྱལ་བུ་ཡིན་ཞེས་པ་ནི། ཀུན་གཞི་སྙིང་པོ་སངས་རྒྱས་ཀྱི་རིགས་ཡིན་པས་སོ། །རྒྱལ་ས་གཏད་པ་ཡིན་གྱིས་ཞེས་པ་ནི། གཞི་ཐོག་ཏུ་སྐྱེལ་བའོ། །གལ་ཏེ་ཁྱོད་ཐེ་ཚོམ་པ་ལྟར་རྒྱལ་བུ་མ་ཡིན་ནོ་སྙམ་ན་ཞེས་པ་ནི། སེམས་ལ་སངས་རྒྱས་མོ་ཡིན་སྙམ་པའོ། །ཁྱོད་ཀྱི་དང་པོ་ཡུལ་གང་ཡིན་ཞེས་པ་ནི། ཀུན་གཞི་ནས་མ་སྐྱེས་ནས། འགྱུ་བ་རྟོལ་སྐྱེས་ཞེས་པའི་ཐ་ཚིག་གོ །ཕོ་བྲང་གང་ཡིན་ཞེས་པ་ནི། བརྟན་པ་གང་ལ་གནས་ཞེས་པའོ། །གྲོང་གང་ཞེས་པ་ནི། འགྱུ་བའི་འདུག་ས་ནི་གང་ཡིན་ཞེས་པའོ། །ཁྱིམ་གང་ཡིན་ཞེས་པ་ནི། རྟོལ་སྐྱེས་ཀྱི་ཁྱིམ་ནི་གང་དུ་བྱས་ཞེས་པའོ། །རིགས་གང་ཡིན་ཞེས་པ་ནི། སེམས་འགྱུ་བ་རྟོལ་སྐྱེས་ཀྱི་རིགས་གང་ཡིན་ཅེས་པའོ། །ཕ་གང་ཞེས་པ་ནི་རྒྱུའོ། །མ་གང་ཞེས་པ་ནི་རྐྱེན་ནོ། །འཁོར་གང་ཞེས་པ་ནི་བསྡོང་ཟླའོ། །བྱ་སྤྱོད་གང་ཡིན་ཞེས་པ་ནི་ཕུ་ཐག་བཅད་པའོ། །དྲིས་པས་ཞེས་པ་ནི་
སྤྱད་བྱའི་ལས་རེ་དོགས་ངར་འཛིན་གྱི་མཁན་ཡང་དྲིས་པས་ཕུང་མཁན་ཡང་རྩད་ཆོད་པའོ། །ཞེས་པའི་ཐ་ཚིག་གོ །སྤྲང་པོས་སྨྲ་རྒྱུ་མ་རྙེད་པས་ནི་ཞེས་པ་ནི། །འགྱུ་དྲན་འཛིན་ཆགས་ཕུག་རྡུགས་ནས་གང་ཅིའི་ངོ་བོར་ཡང་མ་གྲུབ་པར་སྙིང་པོ་ཆོས་ཉིད་རྟོགས་པའོ། །སྐྱེངས་ནས་ཞེས་པ་ནི། སྨྲ་མ་ཤེས་ནས་ཞེས་པའི་དོན་ནོ། །འོ་ན་ང་ཡི་དེ་དག་ཐམས་ཅད་ཀྱི་ཡིན་ལུགས་ཞིབ་པར་སྨོས་ལ་ཞེས་པ། བླ་མ་གཙུག་ཏུ་བསྒོམས་ནས་སངས་རྒྱས་རང་ཞིག་ཀྱང་ཡིན་སྲིད་སྙམ་ཞེས་པའོ། །སྤྱོད་ཅིག་ཟེར་བ་ལས་ཞེས་པ་ནི། ཡིད་ཆེས་བླ་མ་ཁྱེད་ཀྱིས་སྟོན་དང་ཞེས་པའི་དོན་ནོ། །བློན་པོས་ཞེས་པ་ནི། བླ་མ་རྟོགས་པ་ཚད་མ་དང་ལྡན་པའི་ཞེས་པའོ། །མིང་དོན་སྦྱར་ཏེ་ཞེས་པ་ནི། མན་ངག་འདི་ནི་དཔེ་དོན་དང་སྦྱར་ཏེ་བསྟན་པའི་དོན་ནོ། །ཞེས་གསུངས་པ་ལྟར། རྒྱལ་བུས་རང་རྒྱལ་བུ་ཡིན་པར་མ་ཤེས་ནས་སྤྲང་པོར་གྱུར་པ་ལྟར། རང་གི་སེམས་ཉིད་ཆོས་སྐུ་ཡིན་པར་ངོ་མ་ཤེས་ནས་འཁོར་བར་འཁྱམས་པ། བློན་པོས་རྒྱལ་བུ་ངོ་ཤེས་ནས་རྒྱལ་སར་བཏོན་པ་ལྟར། བླ་མས་སེམས་ཉིད་ཆོས་སྐུར་ངོ་སྤྲད་པས། འཁོར་བའི་སྡུག་བསྔལ་ལས་ཐར་
ནས་སངས་རྒྱས་ཀྱི་ཡོན་ཏན་རྣམས་ཐོབ་པའོ། །ཡང་གྲུབ་ཆེན་ཨོ་རྒྱན་པས་གསུངས་པའི་དཔེ་དོན་ངོ་སྤྲོད་ནི། སྔོན་རྒྱ་གར་གྱི་ཡུལ་ན། ཕྱིའི་རྒྱ་མཚོ་ལས་ནོར་བུ་རིན་པོ་ཆེ་ལོན་པའི་དེད་དཔོན་ཅིག་ཡོད་པས། དེའི་དགོས་འདོད་ཐམས་ཅད་ནོར་བུ་ལས་འབྱུང་བ་ལས། ཁྱིམ་ཕྱུག་ཅིང་ལོངས་སྤྱོད་ཆེ་བ་དཔལ་འབྱོར་དང་ལྡན་པ་ཡོད་པ་ལས། དུས་ནམ་ཞིག་གི་ཚེ་དེད་དཔོན་དེ་ཤི་བར་གྱུར་ཏེ། དེའི་མ་སྨད་ཀུན་གྱིས་ལོངས་སྤྱོད་དེ་ཟད་པས་ཤིན་ཏུ་སྡུག་ཅིང་ཉམ་ཐག་ནས་སྤྲང་དུ་འཁྱམས་པས། དེད་དཔོན་དེའི་གྲོགས་པོ་ཞིག་དང་འཕྲད་དེ། སྔར་གྱི་ལོ་རྒྱུས་རྣམས་བཤད་དེ། གྲོགས་པོ་དེས་ན་རེ། ཁྱོད་ལ་འཕང་བ་ཡོངས་མི་སྲིད་ཁྱིམ་ན་དངོས་པོའི་རིགས་ཅི་འདུག་དྲིས་པས། དངོས་པོ་གཞན་ཅི་ཡང་མེད། རོས་ཀྱི་དུག་པོ་ཞིག་གི་གསེབ་ནང་གཏུན་པོ་འཇམ་པོ་ཞིག་འདུག་ཟེར། དེར་གྲོགས་པོ་དེས་མ་སྨད་ཚོ་ཁྲིད་ནས་ཁྱིམ་དུ་ཕྱིན་ནས་ལེགས་པར་བལྟས་པས། ནོར་བུ་དེ་སྔས་འོག་ན་ས་དང་བསྲེས་ནས་འདུག་པས་དེར་གྲོགས་པོ་དེས་དྲི་བཟང་གིས་ཁྲུས་བྱས་ཤིང་། རྒྱལ་མཚན་གྱི་རྩེ་མོར་ཕྱར་ནས།། མཆོད་པ་དཔག་ཏུ་མེད་པས་མཆོད་ཅིང་བསྟོད་
དེ་གསོལ་བ་བཏབ་པས། དགོས་འདོད་ཕུན་སུམ་ཚོགས་པ་བྱུང་སྐད། དེ་ལ་དེད་དཔོན་གྱི་གྲོགས་པོ་དེ་མེད་ན། ནོར་བུ་དེ་སྔས་འོག་ཏུ་ལུས་ནས་བུད་མེད་དེ་ཚོ་ལྟོགས་གྲིར་ཤི་བར་གདའ་སྐད། དཔེ་དེ་བཞིན་དུ། སེམས་ཉིད་ལྷན་ཅིག་སྐྱེས་པའི་ཆོས་སྐུ་རང་ལ་ཡེ་ནས་གནས་ཀྱང་། ནོར་བུ་སྔས་འོག་ཏུ་ལུས་པ་དང་འདྲའོ། །ཆོས་སྐུ་རང་ལ་ཡོད་པ་མ་རྟོགས་པའི་དབང་གིས་འཁོར་བར་འཁྱམས་སོ། །གྲོགས་པོ་དེས་ནོར་བུ་ངོས་བཟུང་ནས་མཆོད་པ་བྱས་པ་བཞིན་དུ། འདིར་བླ་མ་དམ་པས་ངོ་སྤྲད་པས་རང་གི་སེམས་ཉིད་ཆོས་སྐུར་རྟོགས་ནས་རང་གཞན་གྱི་དོན་ཕུན་སུམ་ཚོགས་པ་འབྱུང་བའོ། །ཡང་སྔོན་རྒྱ་གར་གྱི་ཡུལ་དུ་རྒྱལ་པོ་ཆེན་པོ་གཅིག་ཡོད་པ་གྲོངས་ནས། རྒྱལ་པོ་ད་འུར་ལུས་པ་བློན་པོས་བརྐུས་ནས་དམངས་ཀྱི་ཁྲོད་དུ་བསྐྱུར་ནས། གོས་དང་ཁ་ཟས་དང་གནས་མལ་གྱི་ཤིན་ཏུ་བཀྲེས་པར་གྱུར་ཏེ། དམངས་ཀྱི་བུ་ཚ་དང་དབྱེར་མི་ཕྱེད་པར་སོང་། དུས་ནམ་ཞིག་གི་ཚེ་ན་བྲམ་ཟེ་མཚན་མཁན་གཅིག་གིས་མཚན་བརྟགས་པས། རྒྱལ་རིགས་ཀྱི་མཚན་རྟགས་ཕུན་སུམ་ཚོགས་པར་འདུག་པ་དེ་ཤེས་ནས། དེ་ལ་དྲི་བཟང་གིས་ཁྲུས་
བྱས། སྤོས་བཟང་པོ་བདུག །གོས་བཟང་པོར་བཀོན། རྒྱུན་བཟང་པོས་བརྒྱན་ནས། ཁྲི་མཐོན་པོའི་ཁ་ལ་བཞག་ནས། རྒྱལ་སར་བསྐོས་པས། ད་བཟོད་ཀུན་གྱིས་རྒྱལ་རིགས་ཁྱད་པར་ཅན་དུ་ཤེས། དམངས་ཐམས་ཅད་བདེ་སྐྱིད་བྱུང་བར་གྱུར་ཏོ། །དེ་བཞིན་དུ་རང་གི་སེམས་ཉིད་འདི་ཡེ་གདོད་མ་ནས་ཆོས་སྐུ་ལྷུན་གྱིས་གྲུབ་པར་གནས་ཀྱང་། གློ་བུར་གྱི་དྲི་མས་བསྒྲིབས་ཏེ་ངོ་མ་ཤེས་པར་འཁོར་བར་འཁྱམས་པ་ལ། བླ་མ་དམ་པའི་བྱིན་རླབས་ཞུགས་ནས་ངོ་སྤྲད་པས། རང་གི་སེམས་གདོད་མ་ནས་ཆོས་སྐུར་བཞུགས་པ་དེ་ངོ་འཕྲོད་དེ། འཁོར་བར་འཁྱམས་པའི་སྡུག་བསྔལ་ལས་གྲོལ་ལོ། །ཡང་རྒད་པོ་ཐག་གུ་སྟོར་བའི་དཔེ་དོན་འདི་ལྟ་སྟེ། ཡུལ་ཞིག་ན་རྒན་རྒོན་གཉིས་ཡོད་པ་ལས། ལུང་པ་དེའི་མདའ་རུ་ལྟད་མོ་ཆེན་པོ་ཞིག་ཡོད་པ་ལ། རྒན་མོས་རྒད་པོ་ལྟད་མོ་ལ་བཏང་བས། །ང་མི་གཞན་དང་ནོར་འགྲོ་བས་མི་འགྲོ་ཟེར། །མི་ནོར་བའི་རྟགས་ལ་འདི་བཏགས་པས་ཆོག་གིས་ཟེར་ནས་སོང་ཞིག་ཟེར་ནས། ཐག་གུ་སྔོན་དམར་ཞིག་ཁོའི་རྐང་པ་ལ་བཏགས་ནས་བཏང་བ་ལ། ཁོ་ལྟད་མོ་ལ་ཡེངས་པའི་ངང་ལ། རྐང་པའི་
ཐག་གུ་ཆད་ནས། ཁོ་མི་གཞན་དང་ནོར་ནས་གཞན་ཐམས་ཅད་ལ། ཀྱེའོ་བདག་སུ་ལགས། བདག་སུ་ལགས་བྱས་པས། གཞན་རྣམས་ན་རེ་ཁྱོད་འཆལ་པ་ཞིག་འདུག །ཁྱོད་ཁྱོད་རང་ཡིན་མོད་ཅེས་ཟེར་ཡང་། ཁོས་ཁོ་རང་ངོ་མ་ཤེས་པར། དེར་ཁོ་རང་གི་རྒན་མོ་ཅན་དུ་བྱུང་ནས། ད་ནངས་དུས་གཞན་དང་ནོར་འགྲོ་བྱས་པས་ཁྱོད་མ་ཉན། ད་ངོ་མ་ཤེས་པ་འདི་ཁྱོད་ལན་པ་ཡིན་ཟེར་ནས་རྒན་མོ་བརྡུངས། ཁྱོད་ཀྱི་ངོ་བོ་ལྷས་སྟོན་པར་འགྱུར་གྱིས་ལྷ་ལ་ཕྱག་འཚོལ་ཅིག་བྱས་པས། ལྷ་ལ་ཕྱག་མང་པོ་འཚལ་དུ་བཅུག་པས་ཁོ་ཐང་ཆད་ནས་གཉིད་དུ་སོང་སྟེ་ཡང་ཁོའི་རྐང་པ་ལ་ཐག་གུ་སྔོན་དམར་ཞིག་བཏགས་ནས་བཞག་པས། ཁོ་གཉིད་སད་པ་དང་། ད་ང་རང་འདུག་ཟེར་ནས་ཁོས་ཁོ་རང་ངོ་ཤེས་པར་གྱུར་སྐད། དེ་ལ་རྒད་པོ་ཐག་པ་ཆད་ནས་ངོ་མ་ཤེས་པའི་དུས་ན་ཡང་། འཁྲུལ་པའི་དོན་མེད་ཅིང་། རྒད་པོ་རང་གི་དངོས་གཞིར་གནས། དངོས་གཞིར་གནས་བཞིན་ཏུ་འཁྲུལ་དོན་མེད་པའི་དོན་ལ་འཁྲུལ་པ་ཡིན། དེ་ལ་དཔེར་བརྗོད་ནས། ཐོག་མར་རྒད་པོ་འཁྲུལ་དོན་མེད་པའི་དོན་ལ་འཁྲུལ་པ་བཞིན་དུ། རང་གི་
སེམས་ཉིད་གདོད་མ་ནས་ཆོས་ཀྱི་སྐུར་བཞུགས་པ་བཞིན་དུ། ངོ་མ་ཤེས་པས་འཁོར་བར་འཁྱམས། རྒད་པོའི་རྐང་པ་ལ་ཐག་གུས་བཏགས་པས། ཁོས་ཁོ་རང་ངོ་ཤེས་པ་བཞིན་དུ། བླ་མའི་གདམས་ངག་ཟབ་མོ་ངོ་སྤྲད་པས་ཆོས་སྐུའི་རང་ཞལ་མཐོང་བ་སྟེ། འཁོར་བར་འཁྱམས་པའི་གཞི་རྩ་ཆོད་པའོ། །ཐག་པ་སྦྲུལ་དུ་མཐོང་བའི་དོན་འདི་ལྟ་སྟེ། རྩྭའི་ཁྲོད་ན་ཐག་པ་ཁྲ་བོ་ཞིག་འཁྱུགས་སེ་ཡོད་པ་ལ།། མི་དེ་འཁྲུལ་ནས་དུག་སྦྲུལ་དུ་འདུག་གོ་སྙམ་པའི་རྟོག་པ་བྱུང་བ་ལ། སྦྲུལ་གྱི་ཁ་རླངས་ཕོག་པའམ། ཁོས་ཕུགས་ཀྱི་དོགས་པ་ལ་སོགས་པས་ཤིན་ཏུ་སྐྲག་པར་གྱུར་ཏེ། དེ་ཡང་མིག་འཁྲུལ་པ་མ་ཡིན་ཏེ། མིག་གིས་ཐག་པ་ཁྲ་བོ་མཐོང་བ་ཙམ་ལས་སྤྲུལ་གྱི་ཁྲག་གམ་ཁ་མིག་ལ་སོགས་གང་ཡང་བརྟག་པ་མེད། འོ་དེ་ན་ཇི་ལྟར་འཁྲུལ་ནས། ཐག་པ་ཁྲ་ཁྱུག་གེ་བ་ལ་ཡིད་ཀྱིས་སྦྲུལ་དང་དུག་སྦྲུལ་དང་། དེའི་སྐྱོན་ལ་སོགས་པ་ཡིད་ཀྱིས་བརྟགས་ཏེ་འཁྲུལ་པའོ། །དེ་ལ་མི་གཞན་ཞིག་གིས། འདི་སྦྲུལ་མ་ཡིན་ཐག་པ་ཡིན་ཞེས་ལག་ཏུ་བླངས་ནས་བསྟན་པས། དུག་སྤྲུལ་གྱི་འཇིགས་པ་ལས་གྲོལ་བ་སྟེ། དེ་ཡང་དཔེར་བརྗོད་ན། ཐོག་མར་
ཐག་པ་སྦྲུལ་དུ་འཁྲུལ་དོན་མེད་དེ། དཔེ་དེ་བཞིན་དུ། སེམས་ཉིད་ཆོས་ཀྱི་སྐུར་བཞུགས་བཞིན་དུ། རང་ངོ་རང་གིས་མ་ཤེས། དེའི་མདངས་ལ་འཁོར་བའི་རྦ་ལ་གཡེང་སྟེ། སྡུག་བསྔལ་ཉམས་སུ་མྱོང་བ་ཡིན། མི་གཞན་གྱིས་ཐག་པ་ངོ་སྤྲད་པས། དུག་སྦྲུལ་གྱི་འཇིགས་པ་ལས་གྲོལ་བ་བཞིན་དུ། བླ་མས་སེམས་ཀྱི་ངོ་བོ་བསྟན་པའི་དུས་སུ། ཆོས་སྐུ་རང་ཞལ་བསྟན་པས་འཁོར་བར་མི་འཁྱམས་པའི་གདེང་དང་ལྡན་པར་འགྱུར་རོ། །དཔེ་དེ་བཞིན་དུ་འཁྲུལ་དོན་མེད་པའི་དོན་ལ་འཁྲུལ་པ་དེ་ལ། གློ་བུར་གྱི་དྲི་མ་ཞེས་བཏགས་པ་ཡིན་ནོ། །དེ་ལྟར་མ་ཡིན་པའི་གློ་བུར་གྱི་དྲི་མ་ཞེས་པའི་འཁོར་བར་འཁྱམས་པའི་བྱེད་པ་པོ་ཞིག་ལོགས་ནས། སེམས་ཀྱི་རྒྱུ་དེ་ངན་པར་བསྒྱུར་ནས། དེ་སྡུག་བསྔལ་ཉམས་སུ་མྱོང་བར་གོ་བ་གོ་དོན་དེས་སེམས་ཀྱི་གནས་ལུགས་གཏན་ལ་མི་ཕེབ་པ་ཡིན་ནོ། །འདིའི་དོན་ལ་ནན་ཏན་བསྐྱེད་ཅིང་། དེ་ལྟར་གྱི་དཔེ་དོན་གསུམ་པོ་དེས་སེམས་ཀྱི་འཁྲུལ་ལུགས་དེ་གཏན་ལ་ཕེབ་དགོས་པ་ཡིན་ནོ། །ཡང་སྔོན་རྒྱ་གར་གྱི་ཡུལ་ན། ཆོས་སྤྱོད་པའི་རྒྱལ་པོ་ཞིག་ལ་བུ་ཆོས་ལ་མི་དགའ་བ་ཞིག་བྱུང་། །
རྒྱལ་པོས་སྒྱུ་མ་མཁན་བོས་ནས། ཁྱོད་ཀྱི་སྒྱུ་མ་སྟོན་ལ་ང་ཡི་བུ་འདི་ཆོས་ལ་དགའ་བའི་ཐབས་ཤིག་གྱིས་ཟེར། སྒྱུ་མ་མཁན་གྱིས་རྒྱལ་པོའི་བུ་ལ་ཅི་མཉེས་ཟེར། རྟ་ལ་མཉེས་སྨྲས་པས། ཕྱིར་ནངས་སྒྱུ་མ་མཁན་གྱིས་རྟ་བཟང་པོ་སྒ་སྲབ་ཀྱིས་བརྒྱན་པ་ཞིག་ཁྱེར་འོང་ནས་ཨེ་ཉོ་ཟེར། རྒྱལ་པོའི་བུ་དགའ་ནས་རྟ་ཉོ་དང་པོ་རྒྱུག་ཚད་ཅིག་བྱེད་ཟེར་ནས་རྟ་དེ་ཆིབས་ནས་རྟ་ཁ་མ་ཐུབ་ནས་ལ་དགུ་ལུང་དགུའི་ཕ་རོལ་དུ་ཁྱེར། རྒྱ་མཚོའི་འགྲམ་བྱང་སྟོང་ཞིག་ཏུ་རྟ་ལ་བྲུལ་ནས་རྟ་ཡང་རྒྱ་མཚོའི་ནང་དུ་སོང་། རང་ཡུལ་དུ་སླེབ་པའི་ཐབས་ནི་མེད། མི་གཅིག་ཀྱང་མི་གདའ། སྐྲག་ཅིང་སྡུག་ཙ་ན། ག་ཤེད་ནས་རྒན་མོ་མགོ་སེ་བ་ཞིག་བྱུང་ནས་ས་ཕྱོགས་འདི་ན་མི་གཅིག་ཀྱང་ཡོད་པ་མིན་དང་པོ་ཁྱེད་ག་ནས་བྱོན་ཟེར། ལོ་རྒྱུས་རྣམས་བཤད་པས། འདི་མཐའི་རྒྱ་མཚོའི་འགྲམ་ཡིན་སྡེ་དང་མི་གཅིག་ཀྱང་མེད། ང་ལ་བུ་མོ་གཅིག་ཡོད་པ་དང་མཉམ་དུ་ཨི་འདུག་ཟེར། ང་རྒྱལ་པོའི་བུ་ཡིན་ཀྱང་དེ་བས་ཐབས་མེད་སྙམ་ནས་མཉམ་དུ་བསྡད། ཡུན་རིང་སོང་ནས་བུ་བུ་མོ་གཉིས་ཀྱང་བྱུང་། རེ་ཞིག་ན་རྒན་མོ་ཤི་བའི་རོ་རི་ལ་བསྐྱལ་དུ་སོང་ཙ་ན། བུད་མེད་དེ་ཡང་མའི་སེམས་
ནད་ཀྱིས་ཆུ་ལ་ལྕེབས་སོང་། དེ་ཨེ་ལོན་ལྟར་སོང་ཙ་ན། བུ་མོ་ཆུང་ངུ་ཡང་ལྕེབས་ནས་ཆུས་ཁྱེར་བྱུང་། དེ་འདོན་བསམ་ཙ་ན། བུ་ཆུང་དུ་བསྙལ་ནས་ཡོད་པ་སྤྱང་ཀིས་ཁྱེར་སོང་། སྡུག་དྲག་ནས་ངུ་ཞིང་བྲང་བརྡུངས་སྒྲ་འབལ་བས། རྒས་ནས་སྐྲ་ཡང་དཀར་པོར་གྱུར་འདུག །དེ་ཙམ་ན་སྒྱུ་མ་མཁན་གྱིས་སྒྱུ་མ་བཤིག་པས། རྒྱལ་བུ་ཡུས་ཀྱིས་མནངས་ནས་བློན་པོ་རྣམས་འདུས་དང་སྐྱིད་སྡུག་གི་ཟླ་བོ་བཤད་རྒྱུ་ཡོད་ཟེར། བློན་པོ་རྣམས་ཀྱིས་ཁྱེད་ལ་སྐྱིད་སྡུག་དེ་ཙམ་མ་བྱུང་། གདན་ཁྲི་ལས་མ་གཡོས། མདུན་དུ་གསོལ་བ་དྲངས་པ་རྣམས་མ་གྲང་པ་ཡོད་པ་འདི་ག་ལགས་ཞེས་སྨྲས་ཀྱང་མ་ཉན་པར། ལོ་རྒྱུས་རྣམས་ཞིབ་ཏུ་བཤད་ནས། ཅིས་ཀྱང་དགོས་པ་མི་འདུག་ཟེར་ནས་རྒྱལ་སྲིད་སྤངས་ཏེ་ཆོས་སྒོར་ཞུགས་སྐད། དཔེ་དེ་བཞིན་དུ་རྒྱལ་པོའི་བུ་ཁྲི་ལས་མ་གཡོས་བཞིན་དུ། སྒྱུ་མ་མཁན་གྱི་སྔགས་དང་རྫས་ཀྱི་ནུས་པས་འཁྲུལ་ནས། སྡུག་བསྔལ་ཡུན་རིང་དུ་མྱོང་བ་ལྟར། རང་རེ་སེམས་ཅན་རྣམས་ཀྱི་སེམས་ཉིད་བདེ་གཤེགས་སྙིང་པོ་ཡང་ངོ་བོ་ཆོས་སྐུ་ལས་མ་གཡོས་བཞིན་དུ། རང་ངོ་རང་གིས་མ་ཤེས་ཏེ་སྡིག་སྒྲིབ་སྣ་ཚོགས་
བསགས་པའི་ནུས་པས། འཁོར་བར་འཁྱམས་ཤིང་སྡུག་བསྔལ་ཡུན་རིང་དུ་མྱོང་། རྒྱལ་བུ་སྒྱུ་མས་བསླུས་ཚེ་ཡང་ཁྲི་ལས་མ་གཡོས་པ་བཞིན་དུ་རང་རེ་རྣམས་འཁོར་བར་འཁྱམས་པའི་ཚེ་ན་ཡང་རྒྱུ་བདེ་གཤེགས་སྙིང་པོ་དེ་ངན་དུ་མ་སོང་སྟེ། དཔེར་ན་གསེར་ས་ལེ་སྦྲམ་ལྷད་མེད་པ་ལ། གསེར་མགར་མཁས་པས་ཁྱིའི་སྣོད་དང་། མི་གཙང་བ་ཕྱགས་པའི་གཡག་པ་བྱས་པས་མི་གཙང་བས་གོས་ན་བཙོག་པར་འགྱུར་ལ། དེ་བཤིག་ནས་གསེར་སྒ་དང་། རྣ་རྒྱན་དང་གདུག་གུ་མགུ་ཡ་སོགས་བྱས་ན་མཛེས་པའི་རྒྱན་དུ་འགྱུར་ལ། དེ་བཤིག་ནས་སངས་རྒྱས་ཀྱི་སྐུ་གཟུགས་བཞེངས་ནས་རབ་གནས་བྱས་ན་ཀུན་གྱི་ཕྱག་དང་མཆོད་པའི་གནས་སུ་འགྱུར་ཏེ། དེ་ལྟར་བཟོ་ཁྱད་ཀྱིས་བཟང་ངན་འབྲིང་གསུམ་དུ་བྱུང་ཡང་། ངོ་བོ་གསེར་ལས་འགྱུར་བ་མེད་པ་ལྟར། འཁོར་བར་འཁྱམས་པ་དང་། ས་ལམ་ཐོབ་པ་དང་། མཐར་ཐུག་སངས་རྒྱས་དུས་ཀྱང་སེམས་ཀྱི་ངོ་བོ་དེ་ལ་འགྱུར་བ་མེད་དེ། དཔེར་ན་རྡོ་ཕལ་པ་བསྲེགས་ཀྱང་དངུལ་མི་འབྱུང་བ་ལྟར། རྒྱུ་སེམས་ཅན་གྱི་རྒྱུད་ལ་སངས་རྒྱས་ཀྱི་སྙིང་པོ་དེ་མེད་ན། ཆོས་བྱས་ཀྱང་འབྲས་བུ་སངས་རྒྱས་མི་འགྲུབ་
སྟེ། ཆོས་རྣམས་ཐམས་ཅད་རྒྱུ་ལས་བྱུང་། །ཞེས་གསུངས་སོ། །དངུལ་རྡོའི་ནང་དུ་དངུལ་ཡོད་པ་དེ་བཞུས་ན། དང་པོ་དངུལ་ཁྲབ་དང་། དེ་ནས་དངུལ་ལིང་མ་དང་། མཐར་རྒྱ་དངུལ་དུ་འགྱུར་བ་ལྟར། སེམས་ཅན་གྱི་རྒྱུད་ལ་བདེ་གཤེགས་སྙིང་པོ་ཡོད་པས། དེ་ཤེས་པར་བྱས་ནས་ཉམས་སུ་བླངས་ན་དང་པོ་ཉམས་རྟོགས་སྐྱེ། །རིམ་པར་ས་ལམ་བསྒྲོད། མཐར་སངས་རྒྱ་བ་ཡིན་ཏེ། ཟབ་མོ་ནང་དོན་ལས། དྲི་མེད་རྒྱལ་བའི་སྙིང་པོ་ནི། །མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་ལམ་ལ་གནས་པ་དང་། །དེ་བཞིན་གཤེགས་རྣམས་རིམ་པ་བཞིན། །གསུང་ཕྱིར་དེ་དོན་རྟོགས་པར་བྱ། །ཞེས་གསུངས། དེ་ལྟར་སེམས་ཉིད་འདི་ཨེ་ཡེ་གདོད་མ་ནས་ཆོས་སྐུའི་ངོ་བོར་བཞུགས་པས། དེ་ངོ་འཕྲོད་ངོ་ཤེས་ཐག་ཆོད་ནས། དེ་ལ་རེ་དོགས་ཀྱི་བཅོས་ལྷད་ཅི་ཡང་མི་བྱེད་པར་གང་ཤར་གྱི་ངོ་བོ་སྐྱོང་བ་དེ་རང་གིས་ཆོག་གོ །དཔེར་ན་བུ་རམ་ལ་ལྷ་གཟུགས། འདྲེ་གཟུགས་མི་གཟུགས་སྣ་ཚོགས་བཅས་ནས། རིམ་བཞིན་ཟོས་ན་གཟུགས་ཐ་དད་ཀྱང་བུ་རིམ་མངར་བ་རོ་གཅིག་པ་ལྟར། སེམས་
ལ་དགེ་མི་དགེའི་རྟོག་པ་ཅི་སྐྱེས་ཀྱང་། དེའི་ངོ་བོ་ལ་བལྟས་པས་ཕྱག་རྒྱ་ཆེན་པོར་འཆར་ཏེ། བུ་རམ་གྱི་གཟུགས་ཐ་དད་པ་ཐམས་ཅད་མངར་བར་རོ་གཅིག་པ་དང་འདྲའོ། །ངོ་སྤྲོད་ཀྱི་རྒྱབ་ཆོས་ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼འ༽ །ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་ངོ་སྤྲོད་ཚིག་ལྷུག་པ་བཞུགས་སོ། ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཕྱག་རྫོགས་ཟུང་འཇུག་གི་ཁྲིད་འདི་ཐོབ་པའི་ལ་དོན། སེམས་ངོ་ཤེས་པ་ཞིག་གལ་ཆེ། དེ་ལ་ངོ་སྤྲོད་དངོས་གཞིའི་སྐབས་སུ་སོང་མོད་ཀྱང་། གསར་བུ་རྣམས་ཀྱི་ད་རུང་ངོ་མ་འཕྲོད་དོགས་པ་དང་། ངོ་འཕྲོད་པ་རྣམས་ཀྱང་ངེས་ཤེས་བསྐྱེད་པའི་ཕྱིར། ངོ་སྤྲོད་ཚིག་ལྷུག་པོ་རྣམས་བཤད་ན་གོ་སླ་བས། སེམས་ངོ་ཤེས་པ་འདི་སྒྲིབ་པ་སྦྱོང་བའི་མཆོག་ཡིན་ཏེ། ཆོས་ཀྱི་རྒྱལ་པོའི་མདོ་ལས། སེམས་གཅིག་དང་གཉིས་སུ་མེད་པར་ཤེས་ན། དཔེར་ན་མེ་ལོང་གི་སྟེང་དུ་ལོ་སྟོང་
གིས་རྡུལ་ཆགས་པ། གོས་ཀྱིས་ཕྱིས་པས་རྡུལ་མེད་པ་དང་འདྲའོ། །མཚུངས་སོ། །ཁང་སྟོང་གི་མུན་པ་ལོ་སྟོང་ལོན་པ་མར་མེ་གཅིག་གིས་བཏེགས་ནས་སེལ་བ་བཞིན་དུ། སེམས་ལ་ངོ་བོ་ཉིད་མེད་པ་ཡང་དག་པའི་བདེན་པ་ཤེས་པ་ཙམ་གྱིས། བསྐལ་པ་གྲངས་མེད་པར་བསགས་པའི་སྡིག་པ་སྐད་ཅིག་གིས་འདག་གོ །ཞེས་གསུངས་སོ། །སེམས་ངོ་རྒྱུན་དུ་སྐྱོང་ནུས་ན། མཚམས་དང་དབེན་པ་བརྟེན་པ་མ་བྱུང་ཡང་ཆོག་སྟེ། ཟླ་བ་སྒྲོན་མེའི་མདོ་ལས། སེམས་ཀྱི་རང་བཞིན་ཤེས་ན་ལུས་ཚོང་དུས་སུ་གནས་ཀྱང་། སེམས་དགོན་པ་ལ་གནས་པ་
བའི་ཕངས་ཀྱིས་དེ་བཞིན་གག་ཕྲུགས་རང་བའི་དྲི་མས་སྔ་ཉིང་འོད་གས་ཡིན་ཏེ། ལུས་ཀྱི་དགོན་པ་ན་སེམས་ཀྱི་སངས་རྒྱས་བཞུགས་ཞེས་པའོ། །ཞེས་གསུངས་སོ། །དེ་ཡང་སེམས་ངོ་རྟོགས་པའི་དཔེ་ཇི་ལྟ་བུ་ཞེ་ན། དེ་བཞིན་གཤེགས་པ་ཉི་མའི་སྙིང་པོའི་མདོ་ལས། དཔེར་ན་རིན་པོ་ཆེ་ལས་བྱས་པའི་དེ་བཞིན་གཤེགས་པའི་སྐུ་གཟུགས། རས་དྲི་མ་ཅན་གྱིས་དྲིལ་ནས་བྲན་མོའི་ཨམ་ཕྲག་ཏུ་བཅུག་ན་བྲན་མོའི་རྗེ་བོའི་ཨམ་ཕྲག་ནས་བཀྲོལ་ནས། རིས་དྲི་མ་ཅན་བོར་ནས། རིན་པོ་ཆེའི་སྐུ་གཟུགས་རིང་གིས་ཀྱང་མཆོད་གནས་བྱས་པ་ལ། གཞན་གྱིས་ཀྱང་ཚོགས་བསགས་པའི་རྟེན་དུ་འགྱུར་བ་བཞིན་དུ། དེ་བཞིན་གཤེགས་པའི་སྙིང་པོ་སེམས་ཉིད་འོད་གསལ་བ་དེ། ཉོན་མོངས་པའི་དྲི་མས་སྦག་ནས་འཁོར་བའི་སེམས་ཅན་ཐམས་ཅད་ཀྱི་ལུས་ལ་གནས་ཀྱང་མ་ཤེས་པ་ལ། རྗེ་བོ་དང་འདྲ་བའི་དགེ་བའི་བཤེས་ལ་གཉེན་བསྟེན་ནས། དེ་བཞིན་གཤེགས་པའི་སྙིང་པོ་སེམས་ཉིད་འོད་གསལ་བ་དེ་རྟོགས་པར་བྱས་ན་རང་ཡང་འཁོར་བ་ལས་ཐར་ལ། གཞན་ཡང་གྲོལ་བར་བྱེད་དོ། །ཞེས་གསུངས་སོ། །བསམ་པ་རྣམ་པར་དག་པའི་མདོ་ལས། འཇམ་དཔལ་གྱིས་གསོལ་པ། བཅོམ་ལྡན་འདས་དགེ་སློང་རྣལ་འབྱོར་ལ་སྤྱོད་
པའི་ཏིང་ངེ་འཛིན་བསྒོམ་པའི་ཉམས་ཇི་ལྟར་ལགས། བཀའ་སྩལ་པ། དཔེར་ན་ཐབས་གང་གིས་མེ་བསད་ན། སྐར་ཁུང་གི་དུ་བ་ཆད་པ་བཞིན་དུ། །སེམས་རིག་པ་སྟོང་པར་ཤེས་ན། གཟུགས་སྣང་སྟོང་། སྒྲ་གྲག་སྟོང་། དྲི་ཚོར་སྟོང་། རོ་མྱོང་སྟོང་། རེག་རེག་སྟོང་གི་ཉམས་འབྱུང་ངོ་། །ཆུ་མ་རྙོག་ན་དྭངས། ནམ་མཁའ་མ་བསྒྲིབས་ན་གསལ། སེམས་མ་བཅོས་ན་བདེའོ། །དེ་ལ་འདི་སྐད་ཅེས་བྱ་སྟེ། སེམས་ངོ་ཤེས་པའི་རྣལ་འབྱོར་པས། །ཇི་ལྟར་བྱས་ཀྱང་སྒོམ་པའི་ངང་། །གཉུག་མའི་དོན་ལ་གནས་པ་ཡིན། །ཏིང་ངེ་འཛིན་གྱི་ཉམས་སུ་བཤད། །ཅེས་གསུངས་སོ། །རྒྱལ་པོ་མི་གཡོ་བས་ཞུས་པའི་མདོ་ལས། སྣང་བ་གཅིག་གིས་ཞེན་འཛིན་མེད་པོར་རང་གསལ་ཙ་ན་སྣང་བ་རང་སར་དག་པ་ཡིན། དེ་ལས་གཞན་དུ་བསམ་མི་བྱ། ཞེས་གསུངས་སོ། །ཚངས་པས་ཞུས་པའི་མདོ་ལས། དྲན་པ་རྣམ་རྟོག་ཡིན་དང་ཚོར་བ་ཡིན་ཞེས་བསམ་མི་བྱ། །བསམ་མེད་ཡེ་ཤེས་ཡིན་གྱིས་མ་སྤང་གསལ་བར་ཞོག །དེ་ལས་གཞན་དུ་བོགས་མི་ཐོན། ཅེས་གསུངས། ངང་པ་གིར་ཡིན་གྱིས་ཞུས་པའི་མདོ་ལས། །
མ་ཡེངས་ན་ཆོས་ཉིད་རང་གསལ་གྱི་དགོངས་པ་ཡིན་པར་ཤེས་པར་བྱའོ། །ཞེས་གསུངས། བྱམས་པས་ཞུས་པའི་མདོ་ལས། སྣང་བ་གཅེར་གྱིས་མཐོང་བ་དེ་ལ་མི་རྟོག་ཞོག དེ་ཙམ་ཉིད་ན་སྒོམ་པའི་མཆོག །ཅེས་གསུངས། བདེ་བ་བློ་གྲོས་ཀྱིས་ཞུས་པའི་མདོ་ལས། གང་ཡང་མི་བསམ་པ་ནི་སྒོམ་པ་ཆེན་པོར་བཤད། ཅེས་གསུངས། བྲམ་ཟེས་ཞུས་པའི་མདོ་ལས། ཆོས་ཐམས་ཅད་རང་བཞིན་གྱིས་འོད་གསལ་བ་ཞེས་བྱ་བ་ནི། བྱིང་རྒོད་དང་བྲལ་བའི་རིག་པ་གཉུག་མ་ལ་བྱའོ། །དེ་ཅིའི་ཕྱིར་ཞེ་ན། རིག་པ་སྐྱེ་འགགས་མེད་པ་གཉུག་མ་ཡིན་པའི་ཕྱིར་རོ། །ཞེས་གསུངས། དགེ་བའི་རྩ་བ་ཡོངས་སུ་འཛིན་པའི་མདོ་ལས། རང་གི་ཡེ་ཤེས་ནི་གང་ལའང་མི་རྟོག་པ་ལ་ཤེས་པ་གསལ་བ་དེ་ཆོས་སྐུར་ངོས་འཛིན་པ་ཡིན་ནོ། །ཞེས་གསུངས། དྲིན་ལན་བསབ་པའི་ནང་ནས། ཡུལ་སེམས་ཀྱིས་ཕར་ལ་མི་དཔྱོད། ཡིད་ཀྱི་ཚུལ་ལ་མི་བསམ་པ་ནི། བསམ་གཏན་གྱི་མཆོག་ཡིན་ནོ། །ཞེས་གསུངས། རྒྱལ་པོ་བཀའ་སྩལ་གྱིས་ཞུས་པའི་མདོ་ལས། ལྟ་བ་ཞེས་བྱ་བ་ནི་རང་གི་སེམས་ལ་མི་སྤྱོད་པ་ཡིན་ཏེ། དོན་དེ་ཉམས་སུ་མྱོང་བའི་མཆོག་
ཡིན་ནོ། །ཞེས་གསུངས། བྲམ་ཟེ་ཚངས་པས་ཞུས་པའི་མདོ་ལས། ལྟ་སྒོམ་གཅིག་ཏུ་ཤེས་པ་འདི། གསལ་ལ་མི་རྟོག་པ་རྒྱུན་དུ་གནས་ཏེ། སངས་རྒྱས་ཀྱི་ཐུགས་དང་མཉམ་མོ། །ཞེས་གསུངས། བུ་མོ་རས་གོས་མས་ཞུས་པའི་མདོ་ལས། རང་སེམས་རང་གི་དོན་ལ་གནས་ན་ཚོགས་གང་ཡང་མ་བསགས་པར་སྒྲིབ་པ་བྱང་ནས་སྐྱེ་བ་གནས་སུ་མི་ལེན་པར། སྐྱེ་བ་འདི་ཉིད་ལ་སངས་རྒྱས་ཀྱི་ས་ནོན་པར་ཐེ་ཚོམ་མེད་དོ། །ཞེས་གསུངས། རྒྱལ་པོ་བདེ་བས་ཞུས་པའི་མདོ་ལས། སེམས་ཀྱིས་སེམས་བལྟ་ཤེས་པ་ནི་རྣལ་འབྱོར་པའི་མཆོག་ཡིན་ནོ། །ཞེས་གསུངས། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས། སེམས་ལ་དངོས་པོར་མི་གསལ་བས། རིག་པ་རྒྱུན་མ་འགགས་ན་ཆོས་ཉིད་ལེགས་པར་ཤེས་པ་ཡིན། ཞེས་གསུངས། རྒྱལ་པོ་བདེ་བྱིན་གྱིས་ཞུས་པའི་མདོ་ལས། རང་གི་སེམས་ནི་མི་སྡུད་ནས་རང་ལུགས་སུ་བཞག་པ་ནི་སྒོམ་པའི་མཆོག་ཡིན་ནོ། །ཞེས་གསུངས་སོ། །ཚངས་པས་ཞུས་པའི་མདོ་ལས། སེམས་ལ་སེམས་མཉམ་པར་བཞག་སྟེ། སེམས་ཀྱིས་སེམས་མི་དམིགས་པའོ། །ཞེས་གསུངས། ནམ་
མཁའ་དང་མཉམ་པའི་རྒྱུད་ལས། སེམས་ཐ་མལ་པའི་ལུས་བླངས་པའི་ཚེ། རང་སེམས་ཆོས་སྐུར་རྟོགས་པའི་མི་དེ་ནི། སྐྱེ་བ་དེ་ཉིད་ཀྱིས་སངས་རྒྱས་ཏེ་འོང་ངོ་། །དེ་ཅིའི་ཕྱིར་ཞེ་ན། མ་རིག་པའི་རྩ་བ་ཆོད་པའི་ཕྱིར་རོ། །ཞེས་གསུངས་སོ། །ཡེ་ཤེས་མཁའ་འགྲོ་ལ་ཏེ་ལོ་པས་ཞུས་པ། སངས་རྒྱས་བྱ་བ་དེ་ཅི་ལྟ་བུ་ཞིག་ལགས། ཡེ་ཤེས་ཌཱཀྐི་མའི་ཞལ་ནས། ཏེ་ལོ་པ་སེམས་ཀྱིས་སེམས་ལ་བལྟས་ནས། ལྟ་བར་བྱེད་པའི་མཁན་པོ་ཡང་རང་གི་སེམས། ལྟ་རྒྱུ་ཡང་རང་གི་སེམས། དེ་ལྟར་སེམས་ལ་བལྟས་ཙ་ན། །ནམ་མཁའ་ལ་མཐོང་བ་མེད་པ་ལྟར། ལྟ་མཁན་དང་བལྟ་རྒྱུ་གཉིས་ཀ་དག་ནས་ས་ལེ་སིང་ངེ་བ་དེ་རྟོགས་པའི་དུས་ན། ལྷུན་གྱིས་གྲུབ་པའི་ཡེ་ཤེས་ཡང་དེ་ཡིན། ལམ་དུ་ཞུགས་པའི་སངས་རྒྱས་ཡང་དེ་ཡིན། རྟོགས་པ་མངོན་གྱུར་གྱི་སངས་རྒྱས་ཡང་དེ་ཡིན། དེ་རྟོགས་ཙ་ན་སེམས་ལ་སྐྱེ་འཆི་མེད་པས། འཆི་བདག་གི་བདུད་བཅོམ། སེམས་ལ་རང་བཞིན་མེད་པའི་ཡེ་ཤེས་སུ་ཐག་ཆོད་པས། ལྷའི་བུའི་བདུད་བཅོམ། སེམས་ལ་ཕུང་པོའི་གནས་མེད་པས། ཕུང་པོའི་བདུད་བཅོམ། སེམས་ལ་ཉོན་མོངས་པ་མི་མངའ་
བས། ཉོན་མོངས་པའི་བདུད་བཅོམ། དེ་ལྟར་བདུད་བཞི་བཅོམ་ཙ་ན། ཡུལ་སྣང་གི་རྟོག་པ་སྣ་ཚོགས་ཐམས་ཅད་རང་གི་སེམས་སུ་ཐག་ཆོད་ཙ་ན། །སེམས་སུ་ཐག་ཆོད་པའི་དུས་དེར། སེམས་སྐྱེ་འཆི་མེད་པའི་ཆོས་སྐུ་བྱ་བ་ཡིན་ནོ། །ཏེ་ལོ་པ་ཤེས་པར་གྱིས། ཞེས་གསུངས། ད་ལྟར་གྱི་ཤེས་པ་བཟོ་མེད་ཀྱི། ཡིད་བྱེད་དང་བྲལ་བའི་སྐད་ཅིག་མ་འདི་ནི་ཕྱག་རྒྱ་ཆེན་པོར་བཏགས་པ་དེ་ཡིན་ལ། དེ་ཉིད་དྲི་མས་མ་གོས་ལྟར། སྣང་ཡང་དུས་གསུམ་དུ་དྲི་མས་མ་གོས་པའོ། །ཤེས་པ་སྐད་ཅིག་མ་འདི་ངན་པ་དགག་པ་དང་། བཟང་པོ་བསྒྲུབ་ཏུ་མེད། བསྒྲོད་བྱའི་ལམ་མེད། ཉོན་མོངས་པ་མེད། དེ་གཞོམ་པའི་གཉེན་པོ་མེད་དོ། །དེ་དག་ཡོད་པ་མ་ཡིན་པས་བཙལ་ཡང་མི་རྙེད་དོ། །ད་ལྟར་གྱི་ཤེས་པ་སྐད་ཅིག་མ་འདི་ལ་ཐམས་ཅད་ཚང་བས་ན། འདི་ནི་སངས་རྒྱས་ཐམས་ཅད་ཀྱི་སྐུ་ཡིན་ཞེས་བཏགས་པའི་ཁ་ཚོན་བཅད་ཀྱང་རྒོལ་བ་མི་འབྱུང་ལ་བའོ། །ད་ལྟར་གྱི་ཤེས་པ་འདི་ནི་ཡོན་ཏན་ཐམས་ཅད་ཀྱི་གཞིའམ་རྟེན་ཡིན་པས། ཀུན་གཞི་བྱས་ཀྱང་འགལ་བ་མེད་དོ། །ད་ལྟར་གྱི་ཤེས་པ་འདི་ནི་སུས་ཀྱང་བྱས་པ་མ་ཡིན་
པས་ན། ལྷུན་གྲུབ་བརྗོད་ཀྱང་འགལ་བ་མེད་དོ། །དོན་ལ་འདི་འདྲ་ཞེ་ན། གང་ཡང་ཡིད་ཀྱི་ཡུལ་དུ་བྱར་མེད་ལ། ཅིའི་དངོས་པོར་ཡང་མེད་པས་ན་གཉིས་སུ་མེད་པའོ། །ད་ལྟར་གྱི་ཤེས་པ་འདི་ནི་སྒྲོ་འདོགས་སྐུར་འདེབས་ཀྱི་གཞི་དང་བྲལ་ཏེ། ཆོས་དབྱིངས་སམ་སྐྱེ་འགགས་གནས་གསུམ་དང་བྲལ་ལམ། ཆོས་ཀྱི་སྐུ་ཆེན་པོ་ཉིད་དུ་གནས་པ་ཡིན་ནོ། །དོན་དེ་ཉིད་ལ་བརྟག་ན། སྐྱེ་བ་དང་གནས་པ་གང་། རང་བཞིན་གང་། རྣམ་པ་གང་། མིང་གང་། གཟུགས་གང་། རྣམ་པར་ཤེས་པ་གང་། སྣང་བ་གང་། སྟོང་པ་གང་། ཡོད་པ་གང་། མེད་པ་གང་། སངས་རྒྱས་གང་། སེམས་ཅན་གང་། རིག་པ་གང་། མ་རིག་པ་གང་། ལེགས་པར་བལྟས་ན་དེ་དག་ལ་ནི་མཐོང་རྒྱུའི་ཡུལ་དང་ཡུལ་ཅན་གང་ཡང་གང་གི་ཅིའི་རྣམ་པ་མཐོང་དུ་མེད་དེ། དེ་ལྟ་བུའི་མཐོང་བ་དེ་ནི་མཐོང་བ་ཆེན་པོའོ། །དེ་ཁོ་ན་ཉིད་མཐོང་བ་ཡིན་ཏེ། ཡོད་པ་ཞིག་མ་མཐོང་བ་ནི་མ་ཡིན་ནོ། །དེ་ལྟར་ཡང་། རབ་ཏུ་མི་གནས་པའི་རྒྱུད་ལས། འདི་ནི་ཕྱག་རྒྱ་ཆེན་པོ་སྟེ། །འདི་ནི་དྲི་མས་མ་གོས་པའོ། །འདི་ལ་དགག་དང་སྒྲུབ་པ་མེད། །།
ལམ་དང་གཉན་པོས་རྙེད་པ་མེད། །འདི་ནི་སངས་རྒྱས་ཀུན་གྱི་སྐུ། །འདི་ནི་ཡོན་ཏན་ཀུན་གྱི་གཞི། །འདི་ནི་ལྷུན་གྱིས་གྲུབ་པ་སྟེ། །གང་ཡང་ཡིད་ལ་བྱར་མེད་ཅིང་། །ཅིར་ཡང་མེད་པའི་གཉིས་མེད་ནི། །འདི་ནི་སྒྲོ་སྐུར་བྲལ་བ་སྟེ། །ཆོས་སྐུ་ཆེན་པོ་ཉིད་དུ་གནས། །སྐྱེ་བ་དང་ནི་གནས་པ་དང་། །རང་བཞིན་འགོག་པ་བལྟས་བྱས་ན། །འདི་ལ་མཐོང་བ་ཅི་ཡང་མེད། །དེ་ཉིད་ཁོ་ན་མཐོང་བ་ཆེ། །ཞེས་གསུངས། དེ་ལྟ་བུའི་དོན་དེ་ནི་རང་གི་རྒྱུད་དག་པ་དང་། བླ་མ་ཁོ་ནའི་མཐུས་ངེས་པར་རྙེད་པ་ཡིན་ཏེ། དེ་ཉིད་ལས། གང་དང་བྱིན་གྱིས་བརླབས་པ་ཡིས། །བླ་མ་དང་ནི་འདི་རྙེད་འགྱུར། །ཞེས་གསུངས་སོ། །ཡང་ཐུགས་རྗེ་ཆེན་པོ་དོན་ཏྲིག་འགྲོ་བ་ཀུན་སྒྲོལ་རྒྱུད་ལས་དེ་ཉིད་དུས་གསུམ་རྩ་བ་བཅད། །སྒོ་གསུམ་མ་བཅོས་ཀློད་ལ་བསྒྲིམ།། །གཞི་མ་གསུམ་བྲལ་གཉུག་མ་དེ། །ཞི་གནས་ངང་ལ་ལྷག་མཐོང་སྐྱོང་། །ཞེས་པ་ནི་ཚིགས་སུ་བཅད་པ་གཅིག་བསྟན་ཏེ། དེ་ཡང་རང་གི་སེམས་དེ་དང་པོ་གང་ནས་བྱུང་། ད་ལྟ་གར་གནས། ཐ་མ་གར་འགྲོ་བལྟས་ཀྱང་ཐམས་ཅད་སྟོང་པ་ཉིད་དེ་གང་ཡང་མ་
གྲུབ། དེ་ཀའི་ངང་ལས་ལུས་མ་གཡོས་པས། ངག་མི་སྨྲ་བར། སེམས་མ་བཅོས་པར་ཀློད་པར་བྱའོ། །དཔེར་ན་གླང་པོ་སྐྱོང་བའི་རྫི་བོས། གྲིམ་ཐལ་ན་གླང་པོ་ཁྲོ་ནས་བུའོང་། མ་བལྟས་ན་བྲོས་ནས་འགྲོ་བས། ཀློད་ནས་བསྒྲིམ་ཅིང་རྒྱངས་སོ་བྱེད་པ་ལྟར་རང་སེམས་ཡང་གྲིམ་ཐལ་ན། ངལ་དུབ་རྟོག་པ་འཕྲོ་ཞིང་། མ་བསྒོམ་ན་ཡང་བག་ཆགས་རང་གར་འགྲོ་བས། ཀློད་ཅིང་བསྒྲིམ་པར་བྱ་སྟེ། ཤེས་བཞིན་གྱི་བྱ་ར་བས་རིག་པ་ངོས་འཛིན་པར་བྱའོ། །དེ་ལྟར་མ་བཅོས་པར་བཞག་པའི་ཚེ། འདས་པའི་རྟོག་པ་དང་། མ་འོངས་པའི་རྟོག་པ་དང་། ད་ལྟའི་རྟོག་པ་དང་། ཀུན་གཞི་མ་བཅོས་པ་དང་བཞི་ལས། གོང་མ་གསུམ་གྲོལ་ནས། མ་བཅོས་པར་གནས་པའི་ཞི་གནས་དང་། དེ་ལ་ཉམས་ཟག་མེད་ཀྱི་ཡེ་ཤེས་གསར་དུ་སྐྱེས་པའི་ལྷག་མཐོང་ལ་ཞེན་མེད་དུ་སྐྱོང་བར་བྱའོ། །ཞེས་གསུངས། དེ་བཞིན་དུ་ཐུགས་རྗེ་ཆེན་པོ་འོད་ཆོག་གི་ཁྲིད་གཞུང་ལས། །རྣམ་རྟོག་རང་གི་སེམས་སུ་ཤེས། །སེམས་ལ་ཤར་བས་སེམས་སུ་གྲོལ། །སེམས་ཀྱིས་བྱས་པར་ཤེས་ནས། སེམས་སུ་རིག་ཅིང་ཇི་ལྟར་ཤར་ཡང་དགག་སྒྲུབ་མེད་པར་རང་གི་
སེམས་སུ་ཤེས་པ་ནི་མ་རིག་རིག་པའི་སྤྲུལ་སྐུར་ཤར་བ་ཡིན་ཏེ། །ཅུང་ཟད་བདེ་སངས་སྟོང་ཕྱམ་པ་འོང་། །ཡེ་ནས་ཡིན་པའི་གནས་ལུགས་ཐ་མལ་གྱི་ཤེས་པ་མ་ཡེངས་མ་བཅོས་པ་དེ་ལ། སྟོང་པ་ཉིད་ལ་དངོས་པོར་འཛིན་རྒྱུ་མེད་བཞིན་དུ། སྟོང་ཉིད་རང་གི་རང་གསལ་འཛིན་མེད་དུ་ལོངས་སྤྱོད་དུ་བྱུང་བས་རིག་པའི་ཡེ་ཤེས་ལོངས་སྤྱོད་རྫོགས་པར་ཉམས་སུ་མྱོང་བ་ཡིན་ནོ། །ཕྱིའི་རྣམ་རྟོག་ཐམས་ཅད་རང་སེམས་སུ་རྟོགས། ནང་གི་སེམས་ཉིད་དངོས་མེད་སྟོང་པར་རྟོགས། བར་གྱི་ཉམས་མྱོང་བདེ་བ་ཆེན་པོར་རྟོགས། ཕྱི་ནང་བར་གསུམ་ཐ་དད་མ་བྱུང་བར་གཅིག་ཏུ་གྲོལ་ནས། གཅིག་པོ་དེ་ཡང་གཅིག་དང་མི་གཅིག །ཕྱི་ནང་ཕྱོགས་རིས་མེད་པའི་མཐའ་བྲལ་ཀུན་ལ་ཁྱབ། དངོས་མེད་རང་གསལ་རིག་པའི་ངོ་བོ་གཅེར་བུར་རྟེན་མེད་ཇི་ལྟར་བྱས་ཀྱང་གསལ་འགྲིབ་མེད་པར་ལྷག་གེ་བ་འདི་ཆོས་སྐུ་ཡིན། ཅེས་གསུངས། ཨོ་རྒྱན་རིན་པོ་ཆེ་པདྨ་འབྱུང་གནས་ལ། རྒྱལ་པོ་ཁྲི་སྲོང་ལྡེའུ་བཙན་གྱིས་ཞུས་པ། སློབ་དཔོན་ཆེན་པོ་ལགས། རྒྱུ་སེམས་ཅན་ལ་འབྲས་བུ་སངས་རྒྱས་སྒྲུབ་པར་བྱེད་པ་ལ། དང་པོ་ཁོ་ནར་རྟོགས་པའི་ལྟ་བ་
གཅེས་པར་གདའ་བས། རྟོགས་པའི་ལྟ་བ་དང་ལྡན་པ་གང་ལགས་ཞུས་པས། སློབ་དཔོན་གྱིས་གསུངས་པ། ལྟ་བ་ཐམས་ཅད་ཀྱི་ཡང་རྩེ། སྙིང་པོ་བྱང་ཆུབ་ཀྱི་མན་ངག་ཡིན་ཏེ། སྟོང་གསུམ་གྱི་སྟོང་ཆེན་པོ་ཐམས་ཅད་དང་། དུས་གསུམ་ཕྱོགས་བཅུའི་བདེ་བར་གཤེགས་པ་ཐམས་ཅད་དང་། ཁམས་གསུམ་གྱི་སེམས་ཅན་ཐམས་ཅད་དོན་གཅིག་སྟེ། སྙིང་པོ་བྱང་ཆུབ་ཀྱི་སེམས་ལ་འདུས་སོ། །དེ་ལ་སེམས་ཞེས་བྱ་བ་ནི་མ་བྱས་པ་སྣ་ཚོགས་སུ་འབྱུང་བའོ། །འོ་ན་སངས་རྒྱས་དང་སེམས་ཅན་ལ་ཁྱད་ཅི་ཡོད་ན། སེམས་རྟོགས་མ་རྟོགས་ལས་མེད་དེ། སངས་རྒྱས་རང་ལ་ཡོད་ཀྱང་ངོ་མ་ཤེས། སེམས་ངོ་མ་ཤེས་པས་རྒྱུད་དྲུག་ཏུ་འཁྱམས་པ་ཡིན། འོ་ན་སེམས་རྟོགས་པར་བྱེད་པའི་ཐབས་ཅི་ཡོད་ན། དེ་ལ་བླ་མ་དམ་པའི་གདམས་ངག་དགོས་གསུངས། དེ་ཡང་སེམས་ཞེས་བྱ་བ་དྲན་ཞིང་རིག་པ་ཉམས་སུ་མྱོང་བ་ཞིག་ཡོད་དེ། སེམས་དེ་ཕྱི་རུ་མ་ལྟ་ནང་དུ་ལྟོས།། སེམས་ཀྱིས་སེམས་ཚོལ། སེམས་ཀྱིས་སེམས་ཉིད་གཏན་ལ་ཕོབ། སེམས་དང་པོ་གང་ནས་བྱུང་། ད་ལྟ་གང་ན་གནས། ཐ་མ་གང་དུ་འགྲོ་བ་ལྟོས། དེ་ལ་རང་གི་སེམས་
འདི་ལ་རང་གིས་བལྟས་པས། བྱུང་ས་གནས་ས་འགྲོ་ས་མ་རྙེད། དཔེ་འདི་འདྲ་བ་ཞེས་ངོ་བོ་མཚོན་དུ་མེད་པས། སེམས་དེ་ལ་ཕྱི་ནང་དང་ལྟ་མཁན་དང་ལྟ་བྱེད་མེད་པས། མཐའ་དབུས་དང་བྲལ་བའི་ཡེ་ཤེས་ཆེན་པོ་ཡེ་ཤེས་སྟོང་པ་ཆེན་པོ། ཡེ་བྲལ་ཁྱབ་གདལ་ཆེན་པོ། ཡེ་ཤེས་རང་ལུགས་སུ་རང་ལ་གནས་པ་དེ། དེ་བྱས་པ་ལྟ་བུ་མ་ཡིན་ཏེ། ཡེ་ཤེས་དེ་ཉིད་དུ་རང་ལ་གནས་པ་དེ་ངོ་ཤེས་པ་དེ་ལྟ་བ་ཡིན་པ་ལ་ཆད་ཀྱིས་ཆོད་ཅིག་གསུངས། དེ་ལ་རྟེན་དང་བརྟེན་བཅའ་བ་ཞེས་བྱ་བ་ནི་ནམ་མཁའ་དང་འདྲ་བ་སྟེ། ཡེ་ནས་ལྷུན་གྱིས་གྲུབ། ཉི་མ་དང་འདྲ་སྟེ་མ་རིག་པའི་མུན་པའི་གཞི་མེད། པདྨ་དང་འདྲ་སྟེ་སྐྱོན་གྱིས་མ་གོས། གསེར་དང་འདྲ་སྟེ་ཆོས་ཉིད་དོན་ལས་མི་འགྱུར། །རྒྱ་མཚོ་དང་འདྲ་སྟེ་གཡོ་འགུལ་མེད། ཆུ་བོ་དང་འདྲ་སྟེ་རྒྱུན་ཆད་མེད། གནས་པ་དང་འདྲ་སྟེ་འདུ་འབྲལ་མེད། རི་རབ་དང་འདྲ་སྟེ་འཕོ་འགྱུར་མེད། དེ་ལྟ་བུའི་དོན་དེ་རྟོགས་ནས་བརྟན་པའི་དུས་ན། རྟོགས་པ་དང་ལྡན་པ་ཡིན་ནོ་གསུངས། ཡང་ཨོ་རྒྱན་རིན་པོ་ཆེས་རྗེ་འབངས་རྣམས་ལ་ངོ་སྤྲོད་གསུངས་པ། ཇོ་མོ་ལ་གདམས་པ། དད་པ་
ཅན་ཉོན་ཅིག་སེམས་ལ་ངོ་བོ་མེད་པ་ཡིན་པས། རྣལ་མ་མ་བཅོས་པ་ལྷུན་གྱིས་གྲུབ་པའི་ངང་དུ་བསྒོམ་དུ་མེད་པའི་ངང་དུ་མ་ཡེངས་པར་ཞོག་ཅིག །དེའི་ངང་ལ་གནས་པས་སེམས་ཉིད་རང་བཞིན་གྱིས་གྲོལ་བར་འགྱུར་རོ། །སངས་རྒྱས་པ་ཡིན་ནོ། །ཞེས་གསུངས་པས་མཚོ་རྒྱལ་དེ་ཉིད་དུ་གྲོལ་བར་འགྱུར་རོ། །གླང་དཔལ་གྱི་སེང་གེ་ལ་གདམས་པ། རིགས་ཀྱི་བུ་ཉོན་ཅིག །ཆོས་ཐམས་ཅད་རང་གི་སེམས་ཉིད་ཡིན། ལོགས་ནས་འབྱུང་བ་མེད། སེམས་ལ་རང་བཞིན་མེད་པས་སྨྲ་བསམ་བརྗོད་བྱ་ལས་འདས། བཟང་ངན་བླང་དོར་དང་དགག་སྒྲུབ་དང་ཕྱོགས་རིས་མེད་པར་མ་བཅོས་པའི་ངང་དུ་ལྷན་ནེ་ཞོག་ཅིག །དེའི་ངང་ལ་ལུས་སེམས་བདེ་ལ་ཤེས་པ་སྐྱེ་འགགས་མེད་པ་འབྱུང་བས། དེ་དྲོད་ཚད་ཡིན་པས། དེའི་ཚེ་སངས་རྒྱས་ཀྱི་དགོངས་པ་ལ་སླེབས་པ་ཡིན་ནོ། །ཞེས་གསུངས་པས། གླང་དཔལ་གྱི་སེང་གེ་ཡང་གྲོལ་བར་གྱུར་ཏོ། །བཻ་རོ་ཙཱ་ན་ལ་གདམས་པ། །རིགས་ཀྱི་བུ་ཉོན་ཅིག །ཆོས་ཐམས་ཅད་སེམས་ལས་བྱུང་། སེམས་ངོས་བཟུང་མེད་པ། མཐའ་དང་དབུས་མེད་པ་འདུ་འབྲལ་མེད་པ། མ་བཅོས་མཉམ་པ་ཆེན་པོའི་ངང་དུ་
མཉམ་པར་ཞོག་ཅིག །དེ་ལྟར་བསྒོམས་པས་རྣམ་རྟོག་ཡེ་ཤེས་སུ་འཆར་སངས་རྒྱས་པ་དེ་ཉིད་ཡིན་ནོ། །ཞེས་གསུངས་པས། བཻ་རོ་ཙཱ་ན་གྲོལ་བར་གྱུར་ཏོ། །གནུབས་ནམ་མཁའི་སྙིང་པོ་ལ་གདམས་པ། ནམ་མཁའི་སྙིང་པོ་ཉོན་ཅིག །སེམས་སྤྲོས་པ་བྲལ་བ། ང་བདག་མེད་པར་རང་བྱུང་རང་ཞི་བཅོས་ལྷད་མེད་པའི་ངང་དུ་ཞོག་ཅིག །དེའི་ངང་དུ་གནས་པས་དྲོད་ཚད་ཤུགས་ལས་འབྱུང་སྟེ། སངས་རྒྱས་པ་དེ་ཉིད་ཡིན་ནོ། །ཞེས་གསུངས་པས་ནམ་མཁའི་སྙིང་པོ་གྲོལ་བར་གྱུར་ཏོ། །ཀུ་མཱ་ར་ལ་གདམས་པ། ཛྙཱ་ན་ཉོན་ཅིག །སེམས་དང་པོ་རྒྱུས་མེ་བསྐྱེད། ཐ་མ་རྐྱེན་གྱིས་མི་འཇིག་བྱ་རྩོལ་དང་བྲལ་བ་བརྗོད་དུ་མེད་པ། མ་སྐྱེས་པའི་ངང་ལ་གནས་པར་གྱིས་ཤིག །དེའི་དུས་སུ་པའི་འབྲས་བུ་མ་བཙལ་བར་རང་ལ་རྙེད་དོ། །དེ་ལས་སངས་རྒྱས་ལོགས་ན་མེད་ཅེས་གསུངས་པས། ཀུ་མཱ་ར་གྲོལ་བར་གྱུར་ཏོ། །ངན་ལམ་རྒྱལ་བ་མཆོག་དབྱངས་ལ་གདམས་པ། རྒྱལ་བ་མཆོག་དབྱངས་ཁྱོད་ཉོན་ཅིག །རིག་པ་བྱང་ཆུབ་ཀྱི་སེམས་བསྒོམ་དུ་མེད་པ་བསམ་དུ་མེད་པ། སྤྲོ་བསྡུ་མེད་པ་དབང་པོ་རང་ཡན་རྣམ་རྟོག་རང་ཞིར་ཞོག་ཅིག །
དེའི་ངང་ལ་དྲན་པ་རང་ཞི། སེམས་རང་ལས་བྱུང་། སངས་རྒྱས་དེ་ཉིད་དུ་ཐོབ་པར་འགྱུར་རོ། །ཞེས་གསུངས་པས། རྒྱལ་བ་མཆོག་དབྱངས་དེ་ཉིད་དུ་གྲོལ་བར་གྱུར་ཏོ། །སྣ་ནམ་རྡོ་རྗེ་བདུད་འཇོམས་ལ་གདམས་པ། རྡོ་རྗེ་བདུད་འཇོམས་ཉོན་ཅིག །རིག་པ་བྱང་ཆུབ་ཀྱི་སེམས་ཡེ་ནས་རང་བྱུང་། ཡེ་ནས་རང་གནས་མཐའ་དབུས་མེད་པ་འདི། །མ་བཅོས་རང་བྱུང་རང་གསལ་གཞི་མ་གྲུབ་པར་ཞོག་ཅིག །དེ་ལྟར་བཞག་པ་དང་། ཡིད་ཀྱི་གཡོ་བ་དང་བྲལ་བར་གྱུར་ཏེ་དེ་ཁོ་ན་ཉིད་སངས་རྒྱས་པ་ཡིན་ནོ། །ཞེས་གསུངས་པས་རྡོ་རྗེ་བདུད་འཇོམས་གྲོལ་ཏེ་གྲུབ་པ་ཐོབ་བོ། །དཔལ་ཡེ་ཤེས་དབྱངས་ལ་གདམས་པ། ཡེ་ཤེས་དབྱངས་ཉོན་ཅིག །སེམས་ལ་གཟུང་འཛིན་མེད་པས་གཡོ་འགུལ་མེད་པ་བྱ་བཙལ་མེད་པ། རེ་དོགས་མེད་པ། སྤྲོ་བསྡུ་མེད་པ། བཅོས་སུ་མེད་པའི་ངང་ལ་ཞོག་ཅིག །དེའི་དོན་ལ་མ་ཡེངས་པ་ནི་སངས་རྒྱས་པ་ཡིན་ནོ། །ཞེས་གསུངས་པས་གྲོལ་བར་གྱུར་ཏོ། །སོག་པོ་ལྷ་དཔལ་གྱི་ཡེ་ཤེས་ལ་གདམས་པ། ལྷ་དཔལ་གྱི་ཡེ་ཤེས་ཉོན་ཅིག །བྱང་ཆུབ་ཀྱི་སེམས་བྱེད་པ་མེད་པས་མ་བཙལ་རང་བྱུང་། རྩོལ་སྒྲུབ་
མེད་པས་རང་གསལ་མ་བཅོས་པའི་ངང་ལ་ཞོག་ཅིག །དེའི་ངང་ལས་གཡོ་འགུལ་རྒྱུན་ཆད་པར་འགྱུར་རོ། །དེའི་དུས་ན་སངས་རྒྱས་པར་ཤེས་པར་གྱིས་ཤིག །ཅེས་གསུངས་པས་དཔལ་གྱི་ཡེ་ཤེས་གྲོལ་ལོ། །ཞང་ཡེ་ཤེས་སྡེ་ལ་གདམས་པ། ཡེ་ཤེས་སྡེ་ཉོན་ཅིག །སེམས་འདི་ལ་དགག་སྒྲུབ་མེད་པ། བྱ་བྱེད་གཟུང་འཛིན་མེད་པ། བཅོས་མ་དང་རྩོལ་བ་མེད་པ། བླང་ཞིང་དོར་དུ་མེད་པར་ཞོག་ཅིག །དེའི་ངང་ལས་མ་ཡེངས་པར་བཞག་ན་སངས་རྒྱས་དེ་ཉིད་ཡིན་ནོ། །ཞེས་གསུངས་པས་ཡེ་ཤེས་སྡེ་གྲོལ་བར་གྱུར་ཏོ། །མཁར་ཆེན་དཔལ་གྱི་དབང་ཕྱུག་ལ་གདམས་པ། དཔལ་གྱི་དབང་ཕྱུག་ཉོན་ཅིག །སེམས་ཡེ་ནས་དངོས་པོ་མེད་པ་བསྒོམ་དུ་མེད་པ། བློ་ལ་མ་གྲུབ་ཅིང་མ་བཅོས་པ། རང་བྱུང་རང་གསལ་དུ་ཞོག་ཅིག །དེའི་ངང་ལ་གནས་ནས་འཁོར་བ་མ་སྤང་བར་སངས་རྒྱས་པ་ཡིན་ནོ། །ཞེས་གསུངས་པས། དཔལ་གྱི་དབང་ཕྱུག་གྲོལ་བར་གྱུར་ཏོ། །འབྲོམ་རྒྱལ་བའི་བློ་གྲོས་ལ་གདམས་པ། སེམས་འདི་བསམ་དུ་མེད་ཅིང་དམིགས་སུ་མེད་པས། ཡོད་མེད་རྟག་ཆད་ལས་འདས་པ། བསྒོམ་བྱ་སྒོམ་བྱེད་མེད་པར་
ཞོག་ཅིག །དེའི་ངང་ལས་མ་གཡོས་ཤིང་མ་འགྱུར་ན་ཆོས་སྐུ་ཞེས་དེ་ལ་བྱའོ། །ཞེས་གསུངས་པས་གྲོལ་བར་གྱུར་ཏོ། །འོད་དཔལ་གྱི་ཆུང་བ་ལ་གདམས་པ། སེམས་ལ་ཤེས་པ་ཤེས་བྱེད་མེད་པ། འཛིན་པ་དང་སྨོན་བྱེད་མེད་པ། གསལ་བ་རང་བཞིན་མེད་པའི་ངང་ལ་ཞོག་ཅིག །དེ་ལ་ཤེས་པ་མི་རྟོག་མི་འགྱུ་ན། སངས་རྒྱས་ཞེས་དེ་ལ་བྱའོ། །ཞེས་གསུངས་པས་གྲོལ་ལོ། །དྲན་པ་ནམ་མཁའ་ལ་གདམས་པ། སེམས་འདི་སྣང་ལ་རང་བཞིན་མེད། གསལ་ལ་རྟོག་པ་མེད། བསམ་ཞིང་བརྗོད་དུ་མེད། ཉམས་རྟོགས་ཡིད་ཀྱི་གཡོ་བ་དང་བྲལ་བར་ཤོག་ཅིག །དེའི་དོན་ལ་གནས་པ་ནི་ལུས་མིར་འདུག་ཀྱང་སེམས་སངས་རྒྱས་པ་ཞེས་བྱའོ། །ཞེས་གསུངས་པས་དྲན་པ་ནམ་མཁའ་གྲུབ་པ་ཐོབ་འོ་བྲན་དཔལ་གྱི་དབང་ཕྱུག་ལ་གདམས་པ། བྱང་ཆུབ་ཀྱི་སེམས་སྣང་ལ་སྟོང་པ། སྟོང་པ་འོད་གསལ་བ། བཅས་བཅོས་བསྒོམ་དུ་མེད་པ། རང་བྱུང་ཡེ་ཤེས་ཆེན་པོའི་ངང་དུ་ཞོག་ཅིག །དེ་ལས་མ་འགྱུར་བ་ནི་སངས་རྒྱས་པ་ཞེས་བྱའོ། །ཞེས་གསུངས་པས་གྲོལ་བར་གྱུར་ཏོ། །རྨ་རིན་ཆེན་མཆོག་ལ་གདམས་པ། སེམས་ངོ་བོ་ཅི་ཡང་མ་
ཡིན་པ། བཞག་ཅིང་བསྒོམ་དུ་མེད་པ། མ་བཅོས་རང་བྱུང་སོ་མ་རང་། ཡེ་ནས་ལྷུན་གྱིས་གྲུབ་པའི་ངང་དུ་ཞོག་ལ་ལྷན་ནེ་སྒོམས་ཤིག །དེའི་ངང་ལས་ཡིད་གཡོ་འགུལ་དང་བྲལ་བར་འགྱུར་ཏེ། དེ་ལས་འབྲས་བུ་གཞན་མེད་དོ། །ཞེས་གསུངས་པས་གྲུབ་པ་ཐོབ་བོ། །གནུབས་སངས་རྒྱས་ཡེ་ཤེས་ལ་གདམས་པ། བྱང་ཆུབ་ཀྱི་སེམས་སྣང་ལ་སྟོང་པ་སྣང་སྟོང་དབྱེར་མེད་པའི་ངང་། རིག་སྟོང་དབྱེར་མེད་པའི་ངང་ལ་ཞོག །བསམ་དུ་མེད་པའི་ངང་ལེ་མ་ཡེངས་པར་ཞོག་ཅིག །དེའི་ངང་ལ་གནས་པ་ལ་ཆོས་སྐུ་ཞེས་དེ་ལ་བྱའོ། །ཞེས་གསུངས་པས་སངས་རྒྱས་ཡེ་ཤེས་གྲོལ་ལོ། །ལང་གྲོ་དཀོན་མཆོག་འབྱུང་གནས་ལ་གདམས་པ། སེམས་ཉིད་དངོས་པོ་མེད་པ་གདོད་ནས་རྣམ་པར་དག་པ། རང་བཞིན་གྱིས་སྟོང་ཞིང་བཅོས་སུ་མེད་པ། བསྒོམ་བྱ་དང་སྒོམ་བྱེད་མེད་པའི་ངང་དུ་ཞོག་ཅིག །དེ་ཁོ་ནས་འབྲས་བུ་སངས་རྒྱས་ཐོབ་པ་ཡིན་ནོ། །ཞེས་གསུངས་པས་གྲོལ་ལོ། །ལ་གསུམ་རྒྱལ་བ་བྱང་ཆུབ་ལ་གདམས་པ། སེམས་ཉིད་སྐྱེ་འགགས་མེད་པ་དངོས་པོ་དང་མཚན་མ་དང་བྲལ་བ། རང་བཞིན་སྟོང་པ་གསལ་ལ་མ་
འགགས་པ། དེ་ཉིད་ཀྱི་དོན་ལ་མ་ཡེངས་ན་དེ་ལ་སངས་རྒྱས་ཞེས་བྱ་སྟེ། ཆོས་ཀྱི་སྐུའི་དགོངས་པ་ཡིན་ཞེས་གསུངས་པས་རྒྱལ་བ་བྱང་ཆུབ་གྲོལ་བར་གྱུར་ཏོ། །ཨོ་རྒྱན་རིན་པོ་ཆེའི་གསང་སྔགས་ལམ་རིམ་ལས། བཞག་ཐབས་སེམས་ཀྱི་གནད་གསུམ་ནི། ཐ་མལ་དུ་མ་ཡེངས། རྟོག་པ་མི་འགྱུས། ཡིད་ཀྱིས་བཟོ་མ་བྱས་པར། ཤེས་པ་རང་ལུགས་སུ་ཕྱམ་མེར་བཞག་གོ །དེས་བསྒོམ་རང་བབས་སུ་འོང་ལ། ཡེངས་བ་དང་འགྱུས་ན་བསྒོམ་མི་སྐྱེའོ། །གཉིས་པ། བསྒོམ་སྐྱེས་པ་རང་གི་ངོ་བོ་ནི། དེ་ལྟར་རང་ལུགས་སུ་བཞག་པས། རྣམ་རྟོག་ཕྲ་རགས་ཐམས་ཅད་རང་སར་ཉལ། ཞི་ནས་རང་སར་ལྷན་ནེ་གནས་པ་འོང་ངོ་། །དེ་ལ་ཞི་གནས་ཟེར། དེའི་གདངས་མ་འགགས་པ་ཡུལ་མེད་རང་གསལ་དུ་རྗེན་ནེ་ལྷག་གེ་བ་ཞིག་འོང་། དེ་ཀ་ལ་ལྷག་མཐོང་ཟེར། དེ་གཉིས་ཤེས་པ་སྐད་ཅིག་དབྱེར་མེད་གཅིག་གི་ངོ་བོ་ཧྲིག་གེར་གནས་པ་ནའང་གཅིག་འོང་། དེ་ཀ་ལ་ཞི་གནས་ལྷག་མཐོང་ཟེར་བ་ཡིན་ནོ། །དེ་ཡུལ་དུ་གནས་ན་ཉམས། ཡུལ་མེད་དུ་གནས་ན་གོ་བ། ཤེས་པ་དེའི་ངོ་བོར་ཧྲིག་གེར་འདུག་ན་རྟོགས་པ་ཡིན་ནོ། །དེ་དུས་གསུམ་
སངས་རྒྱས་ཀྱི་དགོངས་པ་བྱ་བ་ཡིན་ནོ། །དེ་བླ་མའི་གདམས་ངག་ཁོ་ནས་བྱས་པ་མ་ཡིན། སློབ་མའི་ཤེས་རབ་ཆེན་པོས་འབྱུང་བ་མ་ཡིན། གནས་ལུགས་གཤིས་ཐོག་ཏུ་ཕེབ་པ་བྱ་བ་ཡིན་ནོ། །ཞེས་གསུངས་སོ། །ཕྱག་རྒྱ་ཆེན་པོ་ཡི་གེ་བཞི་པ་ལས། ལུས་རྣམ་པར་སྣང་མཛད་ཀྱི་ཆོས་བདུན་བྱས་ལ། ཁྱུང་ཆེན་ནམ་མཁའ་ལ་ལྡིང་བ་བཞིན་དུ། མ་བཅོས་གཉུག་མའི་ངང་ལོ་རྩོལ་སྒྲུབ་མེད་པར་བཞག །རྒྱ་མཚོ་རླབས་དང་བྲལ་བ་བཞིན་དུ། །གཡོ་འགུལ་མེད་པར་བཞག །ཉི་མ་སྤྲིན་དང་བྲལ་བ་བཞིན་དུ། ཀུན་གསལ་མདངས་དང་ལྡན་པར་བཞག །ཆུའི་རླབས་བཞིན་དུ། བྱུང་ཚོར་ཐམས་ཅད་སེམས་སུ་ཤེས་པར་བྱས་ལ་བཞག །བུ་ཆུང་ལྷ་ཁང་ལ་ལྟ་བ་བཞིན་དུ། །གསལ་ཆ་མ་འགགས་པར་འཛིན་པ་མེད་པར་ཞོག །ནམ་མཁའ་ལ་བྱ་འཕུར་བ་བཞིན་དུ་རྗེས་མེད་པར་བཞག་གོ། །ཞེས་གསུངས། ཕྱག་རྒྱ་ཆེན་པོ་ཐོག་བབ་ལས། ལུས་རྣམ་སྣང་གི་ཆོས་བདུན་བྱས་ལ། ལུས་སེམས་ཁོང་ཀློད་ནས། འདིས་མ་འོངས་ད་ལྟ་དུས་གསུམ་གང་ཡང་ཡིད་ལ་མི་བྱེད་པར། སེམས་མ་བཅོས་པའི་ངང་ལ་བཞག་པས། །
སེམས་སྔ་མ་འདས། ཕྱི་མ་མ་སྐྱེས་པའམ། ད་ལྟའི་ཤེས་པ་འདི་ཉིད་གསལ་སྟོང་སྤྲོས་བྲལ་ནམ་མཁའ་ལྟ་བུར་གནས་ཏེ། །དེ་ཀ་མ་འཁྲུལ་པའི་ཤེས་པ་ཞེས་བྱ། སེམས་ཉིད་འོད་གསལ་ཞེས་བྱ། གཉུག་མ་ལྷན་ཅིག་སྐྱེས་པའི་བདེ་བ་ཞེས་བྱ། ཆོས་སྐུ་བདེ་བ་ཆེན་པོ་ཞེས་བྱ། དེ་ཉིད་ངོ་ཤེས་པའི་ངང་ལས་མ་བཅོས་རྩོལ་སྒྲུབ་དང་བྲལ་བར་ཐོག་བབས་སུ་བཞག་པའོ། །འཁྲུལ་པའི་ཤེས་པ་ལ་བལྟས་ནས་བཞག་པ་ནི། དགེ་མི་དགེ་ལུང་མ་བསྟན་གྱི་རྣམ་རྟོག་གང་བྱུང་བྱུང་ལ། ཤེས་རབ་ཀྱི་མིག་གིས་གཅེར་གྱིས་བལྟས་ལོ་བཞག །མཐོང་ཚད་ནི་རྣམ་རྟོག་ཞི་བའི་རྗེས་ལ་སེམས་མེད་པ་མ་ཡིན། སེམས་ཀྱི་ངོ་བོ་སྟོང་གསལ་དྭངས་སེང་བ་ཡེ་རེ་འདུག་པ་སྟེ། དབྱིངས་དང་ཡེ་ཤེས་གཉིས་སུ་མེད་པའོ། །ངོ་བོ་ཅི་མཐོང་ན་སེམས་མཐོང་། སེམས་དེ་རྟོགས་ན་སངས་རྒྱས་སོ། །ཇི་ལྟར་མཐོང་ན་ཐོག་མ་མེད་པ་ནས་འདུ་འབྲལ་མེད་ཅིང་། ཆོས་ཐམས་ཅད་ཁྱབ་པ་དབང་པོ་དྲུག་གི་སྤྱོད་ཡུལ་ལས་འདས་ཤིང་། ཁ་དོག་དང་དབྱིབས་ལ་སོགས་གང་ཡང་མ་གྲུབ་པར་མཐོང་ངོ་། །འཁྲུལ་པ་དང་མ་འཁྲུལ་པ་གཉིས་སུ་མེད་པར་ངོ་སྤྲད་པ་ནི། རྣམ་
རྟོག་གང་ཤར་ཤར་ལ་ཤེས་རབ་ཀྱི་མིག་གིས་ཅེར་རེ་བལྟས་པས། །ངོས་བཟུང་ཅི་ཡང་མི་འདུག །རྣམ་རྟོག་འགྱུ་སྟོང་དུ་འདུག །འགྱུ་སྟོང་དེ་ལ་ཡང་སེམས་ཉིད་སྟོང་པའི་ངང་ལས་བྱུང་། སེམས་ཉིད་སྟོང་པའི་ངང་དུ་གནས། སེམས་ཉིད་སྟོང་པའི་ངང་དུ་ཞི། སེམས་ཉིད་སྟོང་པའི་ངང་ལས་མ་རྟོགས་པའི་རྣམ་རྟོག་ངན་པ་ཞིག་ལོགས་སུ་སྤང་དུ་མེད། རྒྱ་མཚོ་དང་རྦ་རླབས་ལྟར་དུ་འཁྲུལ་པ་དང་མ་འཁྲུལ་པའི་ཤེས་པ་ལ་ཐ་དད་པ་མེད་དོ། །དེ་ལྟར་རྣམ་རྟོག་གང་ཤར་ཤར་ལ་ཡང་ཐོག་བབས་སུ་ཅེར་གྱིས་བལྟས་ཤིང་། དེའི་ངང་ལ་མ་ཡེངས་པར་ཐོག་བབས་སུ་བཞག་གོ །ཞེས་གསུངས། སེམས་ཁྲིད་ཡིད་བཞིན་ནོར་བུ་ལས། མོ་ཡེངས་ལ་མི་བསྒོམ་པ། བཅུག་ཡག་ཏུ་ཀློད་དེ་བཞག་སྟེ། མ་ཡེངས་པ་ཞེས་པ། འདས་པ་ལ་ཡེངས་སུ་མི་འཇུག །མ་འོངས་པ་ལ་ཡེངས་སུ་མི་འཇུག །ད་ལྟ་བ་ལ་ཡེངས་སུ་མི་འཇུག་པའོ། །མི་བསྒོམ་པ་ཞེས་པ། །དམིགས་གཏད་ཀྱི་ངོས་བཟུང་གང་ཡང་མི་བྱེད་པའོ། །བཅུག་ཡག་ཅེས་པ། བློའི་རྩོལ་བ་ཐམས་ཅད་བོར་ནས་འཇོག་པའོ། །མ་ཡེངས་མི་བསྒོམ་པའི་ངང་ནས་རྟོག་པ་ཐོལ་
ཐོལ་བྱུང་ན། རྟོག་པའི་རྗེས་སུ་ཡང་མི་འབྲང་བར་གང་ཤར་གྱི་རྟོག་པ་ལ་མ་ཡེངས་པའི་དྲན་པ་བརྟན། ཅེས་གསུངས། རྒྱལ་སྲས་ཐོགས་མེད་པའི་ཞལ་ནས། སེམས་རྟོག་མེད་ཀྱི་ངང་ལ་གསལ་སེང་ངེ་བ་དེའི་ངོ་བོ་ལ་བལྟས་ན། ཅིར་ཡང་མ་གྲུབ་པ་སྟོང་སེང་ངེར་གནས་པ་དེ་ལ། རིག་པ་གསལ་སྟོང་འཛིན་མེད་ཟེར་བ་ཡིན། དེ་དང་པོ་ནས་ཐམས་ཅད་ལ་ཡོད་མོད་ཀྱི་གཟུང་འཛིན་གྱི་རྣམ་པར་རྟོག་པས་བསྒྲིབས་ནས་ངོ་མ་ཤེས་པ་ཡིན། ཁྱེད་རང་ཉམས་ལེན་སྟོབས་ཀྱིས་ངོ་བོ་མཐོང་བ་ཡིན་པས། སེམས་ཀྱི་ངོ་བོ་སྟོང་པར་འདུག་པ། དེ་ལ་ལེགས་པར་སྒྲོ་འདོགས་ཆོད་པར་ལྟོས་མཛོད། ཡོན་ཏན་གྱི་འཆར་ཚུལ་གོང་ནས་གོང་དུ་འབྱུང་ཞིང་། མཆོག་གི་དངོས་གྲུབ་ཀྱི་རྒྱུར་གྱུར་པའི་ལམ་ཡིན་པས། །དགའ་བ་བསྒོམ་ཞིང་ཉམས་སུ་ལོངས་མཛོད། ཅེས་གསུངས། རྒྱུ་སྟོན་པ་ཆོས་ཀྱི་བཟང་པོས་ཞལ་ནས། སྒོ་གསུམ་རྩོལ་མེད་ལྷུག་གེ་བཞག་པས་འདས་པའི་ཤེས་པ་འགགས། མ་འོངས་པའི་རྟོག་པ་མ་སྐྱེས་པའི་བར་དེར། སེམས་རྟོག་མེད་ས་ལེ་བ་དེ་ཀུན་གཞི་ཡིན། དེ་ལ་ཡེངས་མེད་དུ་བལྟ་བྱ་ལྟ་བྱེད་མེད་པར་ས་ལེ་ཧྲིག་གེ་བལྟས་པས་གསལ་སྟོང་སྤྲོས་
བྲལ་ངོས་བཟུང་ཐམས་ཅད་དང་བྲལ་བར་ཤར་ན་ངོ་འཕྲོད་པ་ཡིན། མ་ཤར་ན་མ་འཕྲོད་པ་ཡིན། དེ་ལྟར་བཞག་པས་རྣམ་རྟོག་ཐོལ་ཐོལ་གཟུང་འཛིན་ཙིར་ཙིར་བ་བྱུང་ན་འཁོར་བ་ཡིན་ཏེ། སྣང་སྲིད་ཐམས་ཅད་རྣམ་རྟོག་གི་ཆོ་འཕྲུལ་མིན་པ་མེད། རྣམ་རྟོག་དག་ནས་མྱང་འདས་ལོགས་སུ་ཚོལ་རྒྱུ་མེད་དེ་རང་སེམས་འོད་གསལ་སངས་རྒྱས་ཡིན་ནོ། །རྣམ་རྟོག་གང་ཤར་ལ་བལྟས་པས་གསལ་སྟོང་རྗེས་མེད་དུ་ཝལ་ཝལ་སོང་ན་དེ་མྱང་འདས་ཡིན། མྱ་ངན་འདས་པ་ཐམས་ཅད་རྣམ་རྟོག་ཡེ་ཤེས་སུ་འཆར་བ་ལས་ལོགས་སུ་མེད་དོ། །ཉམས་ལེན་ལ་དྲིལ་ན་རྣམ་རྟོག་བློས་སྒྲོ་བཏགས། སྔར་མ་སྐྱེས་པ་དང་། བར་དུ་མ་སྐྱེས་པ་དང་། ཐ་མ་གྲོལ་བ་གསུམ་ཀ་རང་བཞིན་མེད་པ། མ་བཅོས་རང་ལུགས་སུ་བཞག་ནས་གནས་ན་གནས་པའི་ངོ་བོ་ལ་བལྟ། འགྱུ་ན་འགྱུ་བའི་ངོ་བོ་ལ་ལྟ་བ་དེ་ལས་མེད་དོ། །བདེ་གསལ་གྱི་ངང་དུ་མ་ཡེངས་ཙམ་ས་ལེ་བ་དེ་ཉམས་ལེན་གྱི་ཐིལ་པོ་ཡིན། དེའི་ངང་དུ་བཞག་པ་ཡིན་པས་ཡོན་ཏན་རིམ་གྱིས་སྐྱེ་བ་ཡིན་པས་གོལ་ས་ཡོད་རུང་མེད་རུང་དེ་ལ་བསྐྱང་དགོས། ཉམས་བཟང་ངན་གང་ལ་ཡང་དགའ་སྡུག་མེད་
པར་བློ་ཀློད་དེ་བྱས་ནས་བསྐྱང་དགོས། ལར་གྱི་བཟང་ཡག་འཛོམས་པའི་བསྒོམ་ལ། འདོད་འདུན་མི་བྱེད་པར་གང་བྱུང་ལ་སེམས་བསྲེ་ཞིང་གཉུག་བསྲིང་དགོས་པར་སྣང་། །སྐྱིད་སྡུག་ན་ཚ་རྐྱེན་གྱོད་གང་བྱུང་ཡང་དེ་ཉིད་ལ་གཅེར་གྱིས་ལྟ། རིག་པ་ཧུར་ཕྱུང་ཞིང་ལྟ། རེས་ཉན་རུང་མ་ཉན་རུང་། གཉུག་བསྲིང་ཞིང་བལྟས་པས། ཅི་ཞིག་ན་སེམས་བདེ་འབོལ་གྱིས་འགྲོ། དེས་མཚོན་པས་རྣམ་རྟོག་གང་བྱུང་མ་ཆུན་པ་དེ་ལ་དེ་ལྟར་བསྲེས་པས་བོགས་འོང་བ་ཡིན། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དྲན་རྟོག་རང་གྲོལ་ཐུགས་སུ་ཁྱེར། ཅེས་པས། འདས་མ་འོངས་ད་ལྟར་གྱི་རྟོག་པ་གང་དྲན་ལ་ཡང་། དྲན་ཡུལ་དྲན་མཁན་རང་ཤར་དྲན་བདོ་ལ་སྟོང་སྟེ། རང་བཞིན་མེད་པོར་གྲོལ་བ་ནི་བདེ་གཤེགས་ཐུགས་ཏེ་ཆོས་རྣམས་དྲན་སྟོང་ཐུགས་ཀྱི་ལམ་ཁྱེར་རོ། །དེ་ནི་སེམས་ཀྱི་ངོ་སྤྲོད་ཚིག་ལྷུག་པར་བསྟན་པ་རྫོགས་སོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ཡ༽ །ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་ཕྱག་རྒྱ་ཆེན་པོའི་ངོ་སྤྲོད་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རང་གི་སེམས་ཉིད་དང་རིག་པ་འདི་ཕྱག་རྒྱ་ཆེན་པོར་ངོ་སྤྱོད་པ་དེ། མདོ་རྒྱུད་གྲུབ་ཐོབ་རྣམས་ཀྱི་གསུང་རྣམས། ས་ཕག་ཏུ་གྲོས་བྱས་པ་ལྟར་གཅིག་པས། ངེས་ཤེས་བསྐྱེད་པར་བྱ་སྟེ། རིན་པོ་ཆེའི་ཕུང་པོའི་མདོ་ལས། སངས་རྒྱས་ཀུན་གྱི་གསང་བའི་དོན། །སྤྲོས་པ་གཅོད་ཅིང་དངོས་པོ་མེད། །རང་བཞིན་མེད་ཅིང་འགྱུར་བ་མེད། །རྣལ་འབྱོར་པ་ཡིས་ཤེས་པར་བྱ། །ཞེས་གསུངས། འདུས་པ་ཆེན་པོའི་མདོ་ལས། ཐམས་ཅད་ཆོས་ཉིད་ངང་དུ་རྫོགས། །དེས་
ན་རྫོགས་པ་ཆེན་པོ་ཡིན། །ཞེས་གསུངས། བདག་མེད་པས་དྲིས་པའི་མདོ་ལས། ཆོས་རྣམས་སྤྲོས་པ་ཀུན་དང་བྲལ། །དེ་ནི་ཐིག་ལེ་ཉག་གཅིག་ཡིན། །ཞེས་གསུངས། དཔུང་པ་བཀོད་པའི་མདོ་ལས། དང་པོ་མཁས་པས་མ་བྱས་པ། །དངོས་པོ་རང་བཞིན་མ་བཅོས་པ། །རྟོགས་ན་ཕྱག་རྒྱ་ཆེན་པོ་ཡིན། །ཞེས་གསུངས། དཔལ་འཇིགས་བྱེད་ཀྱི་རྒྱུད་ལས། །ཆོས་རྣམས་ཀུན་གྱི་རྩ་བ་ནི། །རང་གི་སེམས་ཉིད་མ་རྟོགས་ན། །ཐོས་བསམ་སྒོམ་པར་རབ་སྦྱངས་ཀྱང་། །འབྲས་བུ་ཐོབ་པར་མི་འགྱུར་ཏེ། །དམུས་ལོང་མིག་བུ་མེད་པ་འདྲ། །
དེ་ཕྱིར་རང་སེམས་རྟོགས་པར་གྱིས། །ཞེས་གསུངས། ཐིག་ལེ་གཉིས་པའི་རྒྱུད་ལས། སེམས་ཉིད་རྟོགས་པའི་དོན་མེད་ན། །དཀྱིལ་འཁོར་མ་ལུས་བྲིས་ཀྱང་སངས་མི་རྒྱ། །ཞེས་གསུངས། རྡོ་རྗེ་གུར་གྱི་རྒྱུད་ལས། རྣལ་འབྱོར་འདི་ནི་སེམས་རྟོགས་མཆོག་རབ་སྟེ། །འདི་ལ་མ་བརྟེན་འབྱུང་བར་མི་འགྱུར་ཏེ། །འོག་མའི་ཕྲ་མོའི་ཏིང་འཛིན་ཅི་མནོས་ཀྱང་། །ཕྱག་རྒྱ་ཆེན་པོ་རྟོགས་པར་མི་འགྱུར་རོ། །མ་རིག་པ་ཡི་རྩ་བ་མ་ཆོད་ན། །ཐོས་བསམ་བསྒོམ་པ་ཅི་བྱས་ཀྱང་། །སྒྲོ་འདོགས་བག་ཆགས་བཅས་པ་ལས། །རང་གི་སྙིང་པོ་རྟོགས་པ་མེད། །དེ་ཕྱིར་ཐོག་མཐའ་བཅད་པར་བྱ། །ཞེས་གསུངས། རྒྱལ་པོ་བདེ་བ་བློ་གྲོས་ཀྱིས་ཞུས་པའི་མདོ་ལས། གང་ཞིག་སྟོང་དང་གསལ་བསྒོམས་པས། །གཞན་ལས་རབ་ཏུ་འབྱུང་བའི་ཕྱིར། །སྒོམ་ཆེན་པ་ཡི་གནས་ལུགས་ཡིན། །དེ་ཕྱིར་སེམས་རྟོགས་འདི་ཉིད་ཀྱིས། །བསླུ་མེད་སངས་རྒྱས་ཉིད་ཡིན་ནོ། །ཞེས་གསུངས། མངོན་པར་འབྱུང་བའི་རྒྱུད་ལས། རང་གི་སེམས་ཀྱི་མཚན་ཉིད་ནི། །རྫོགས་པའི་སངས་རྒྱས་གསང་བའི་མཆོག །རྟོག་གེ་ཀུན་གྱིས་མི་ཤེས་པས། །
ཐམས་ཅད་ཁྱོད་ལ་བཤད་པར་བྱ། །ཞེས་གསུངས། ཐིག་ལེ་ཉག་གཅིག་གི་རྒྱུད་ལས། སེམས་སུ་འཇོག་པའི་རྒྱུ་མཚན་ནི། སྣ་ཚོགས་པ་ལ་གང་དུའང་མ་ཞེན་ཅིག །དུས་གསུམ་དུ་ཡང་རྒྱུན་མ་ཆད་པའོ། །ཞེས་གསུངས། རྡོ་རྗེ་སེམས་དཔའ་མངོན་པར་བྱང་ཆུབ་པའི་རྒྱུད་ལས། །འཁོར་བ་མྱ་ངན་འདས་པའི་ཆོས། །རྩ་བ་རང་གི་སེམས་ཡིན་ཏེ། །སེམས་ལ་དྲན་རྟོག་ཅི་སྣང་ཡང་། །དངོས་པོ་ཙམ་དུ་མ་གྲུབ་པས། །དཔེར་ན་ནམ་མཁའི་སེར་བུ་བཞིན། །ཁ་དོག་དང་ནི་དབྱིབས་སུ་མེད། །སངས་རྒྱས་ཡེ་ཤེས་སྤྱན་གྱིས་ཀྱང་། །རྡུལ་ཙམ་དུ་ཡང་མི་གཟིགས་སོ། །ཞེས་གསུངས་སོ། །རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། ཡོད་མེད་འདུ་ཤེས་ཀུན་སྤང་ཕྱིར། །རང་གི་བརྗོད་དུ་མེད་པའི་ཕྱིར། །ཡེ་ཤེས་རང་གི་རྣལ་མ་རྣམས། །དེ་ལ་དེ་བཞིན་གཤེགས་ཞེས་བྱ། །ཞེས་གསུངས། ལུང་བསམ་གཏན་གྱི་རྒྱུད་ལས། རང་གི་སེམས་ཀྱི་སྙིང་པོའི་དོན། །དངོས་པོར་མ་གྲུབ་མཚན་ལས་འདས། །རིག་པ་རྒྱུན་ཆགས་ཉིད་ལ་ནི། །རྡོ་རྗེ་སེམས་ཉིད་མཚོན་དུ་མེད། །ཅེས་གསུངས། རང་བྱུང་
རིག་པ་ངོ་སྤྲོད་ཀྱི་རྒྱུད་ལས། ལྟ་བ་རང་གི་སེམས་ལ་བལྟ། །དེ་ཕྱིར་ཡུལ་མེད་ཆོས་སྐུར་གསལ། །དེ་ཉིད་མ་བྲལ་རྒྱུན་གནས་ན། །དོན་ལ་འགྱུར་བ་རྡུལ་ཙམ་མེད། །ཅེས་གསུངས། གཤིན་རྗེ་ཐོད་ནག་གི་རྒྱུད་ལས། གདོད་ནས་གཉིས་མེད་ནམ་མཁའི་ངོ་བོ་འདྲ། །བརྗོད་པ་ཐ་སྙད་བྲལ་བར་སྦར་ཞིང་བཅོས་སུ་མེད། །ཡེ་ནས་གནས་པས་གཞན་ནས་བཙལ་མི་དགོས། །ཞེས་གསུངས། བྱང་ཆུབ་སེམས་སྒོམ་པ་ལས། །སེམས་དང་ཆོས་ཉིད་ཡེ་ནས་གཉིས་སུ་མེད། །སེམས་ཀྱི་རང་བཞིན་བཙལ་ཡང་མི་རྙེད་ལ། །གཞན་ལ་འདི་འདྲ་ཞེས་ནི་བསྟན་དུ་མེད། །ཅེས་གསུངས། ནམ་མཁའ་དང་མཉམ་པའི་རྒྱུད་ལས། སངས་རྒྱས་མེད་པའི་གོང་རོལ་དུ། །སེམས་ཅན་བྱ་བའི་མིང་ཡང་མེད། །ཆོས་ཀྱི་སྙིང་པོ་ང་རང་དང་། །དེ་ཉིད་རྟོགས་ན་ཆོས་སྐུ་སྟེ། །ང་ལ་བསྟད་ན་མངོན་སངས་རྒྱས། །ཞེས་གསུངས། རང་བྱུང་བདེ་བའི་རྒྱུད་ལས། རང་རིག་ངེས་པའི་ལྟ་བ་ལ། །ཡེངས་བ་མེད་པར་ཡིད་ཀྱིས་བལྟ། །དེ་ཡང་ཡུལ་ཅན་མ་ཡིན་ཏེ། །རང་ལ་རང་བལྟས་ཡིད་ཀྱིས་གསལ། །ཞེས་གསུངས།། ལྟ་བ་ཐམས་ཅད་ཀྱི་རྒྱུད་
ལས། བྱང་ཆུབ་སེམས་ནི་རིག་པའི་དོན། །སྔ་མ་བག་ཆགས་ཉིད་ཡིན་ཏེ། །ཕྱི་མ་སྐྱེ་བ་ཉོན་མོངས་ཡིན། །རྟོག་པ་སྐྱེ་བ་སྒོ་ལྔ་སྟེ། །གསུམ་དུ་མ་སོང་གཉུག་མར་བཅས། །མིག་འཛིན་མེད་པ་ངང་གིས་གསལ། །ཡེ་ཤེས་ཟང་ཐལ་ཉིད་ཡིན་ཏེ། །རང་གི་ངོ་བོ་ཆོས་ཀྱི་སྐུ། །དངོས་པོ་མེད་ལ་ཤེས་པར་ཆོད། །དེ་ཉིད་མ་བཅོས་རང་གི་སེམས། །གཞན་ལས་མི་འབྱུང་རང་གི་སེམས། །ཞེས་གསུངས། དཔལ་དགྱེས་པ་རྡོ་རྗེ་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤང་། །དངོས་པོ་ཀུན་ལ་ཁྱབ་ཅིང་རིག །ཅེས་གསུངས། ཕུར་པ་རིག་པ་མཆོག་གི་རྒྱུད་ལས། ཆོས་སུ་སྣང་བ་ཐམས་ཅད་ནི། །རང་རིག་ཡེ་ཤེས་ཕུར་པ་སྟེ། །སེམས་ཀྱི་རང་བཞིན་བཟུང་དུ་མེད། །ནམ་མཁའི་རང་བཞིན་དངོས་པོ་མེད། །ཅེས་གསུངས། རྒྱུད་ཀྱི་སྙིང་པོ་ལས། སྣང་སྲིད་གསལ་བ་སྙིང་པོ་ཡིན། །ཤེས་པ་གསལ་ཤཱ་བ་ཆོས་ཀྱི་སྐུ། །འཛིན་པ་མེད་པ་ལྷུན་གྱིས་གྲུབ། །ཅེས་གསུངས། ཐིག་ལེ་ཉག་གཅིག་གི་རྒྱུད་ལས། མཚན་མའི་དཀོན་མཆོག་གསུམ་པོ་ཡང་། །མཚན་མ་མེད་པར་ཤེས་
པར་བྱ། །མཚན་མེད་རང་སེམས་ཆོས་སྐུར་རྟོགས། །དེ་ཕྱིར་དཀོན་མཆོག་གསུམ་པོ་རང་ལ་རྫོགས། །ཞེས་གསུངས། ནམ་མཁའ་ཆེ་ལས། སྣང་བ་མེད་པའི་ཆོས་ཉིད་ནི། །མ་བཅོས་བཞག་ན་སྒོམ་པ་ཡིན། །ཞེས་གསུངས། ནམ་མཁའ་དང་མཉམ་པའི་རྒྱུད་ལས། རྣམ་པར་རྟོག་པའི་མཚན་མ་ཅི་བྱུང་ཡང་། །མ་བཀག་རང་བྱུང་རང་ཞི་ཆེན་པོ་སྟེ། །མ་བཅོས་མ་བྱས་རང་གི་ངང་གིས་གསལ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུ་སྒོམ་ཞེས་དེ་ལ་བྱ། །ཞེས་གསུངས་སོ། །རྩོད་པ་དོན་ལྡན་གྱི་རྒྱུད་ལས། མ་ཡེངས་དྲན་པ་བཟླས་བརྗོད་ཡིན། །དེ་དང་མཐུན་པ་སྒྲུབ་པ་ཡིན། །ཞེས་གསུངས། ཀུན་འདུས་རིག་པའི་རྒྱུད་ལས། ཀུན་གཞི་སྟོང་ཉིད་ཆོས་སྐུ་སྟེ། །འདི་དོན་མཁས་པས་མ་བརྗེད་ན། །ཏིང་འཛིན་ཆེན་པོ་རྒྱུན་མི་འཆད། །སེམས་ནི་ཡང་དག་པ་ཡིན་ཏེ། །མཁའ་ལ་བྱ་འམ་རྗེས་མེད་བཞིན། །རང་བཞིན་མེད་པ་དེ་ལ་ནི། །སེམས་ཀྱི་སྐད་ཅིག་མ་ཡིན་ནི། །གཡོ་བ་རྒྱུན་དུ་དྲན་ཞེས་བྱ། །ཞེས་གསུངས་སོ། །ལྟ་བ་རང་བྱུང་སྙིང་པོ་ལས། རང་རིག་ཡེ་ཤེས་ངོས་འཛིན་ནི། །
ཐམས་ཅད་རང་བྱུང་ཉིད་ཀྱི་དོན། །མཁའ་ལྟར་དག་ཅིང་ཉི་ལྟར་གསལ། །གསལ་ཙམ་ཉིད་ནས་ནུབ་པ་མེད། །ཁྱོབ་ཙམ་ཉིད་ནས་དངོས་པོ་མེད། །མེད་པ་མ་ཡིན་ཤེས་ཤིང་རིག །རིག་ཙམ་ཉིད་ནས་ངང་གིས་སྟོང་། །ཞེས་གསུངས་སོ། །རང་བྱུང་བདེ་བའི་རྒྱུད་ལས། རང་སེམས་ཆོས་སྐུར་ངོ་སྤྲད་པས། །དམིགས་པ་མེད་པར་ངང་གིས་གསལ། །གཉུག་མར་གནས་ལ་འཕེལ་འགྲིབ་མེད། །ལུས་སེམས་གཉིས་ལ་སྤྲོད་དང་བྲལ། །ཞེས་གསུངས། ཡང་དེ་ཉིད་ལས། རང་རིག་བུ་ར་དངོས་མེད་བྲལ། །དྲན་པ་མི་འཆུག་འགྲོ་འོང་མེད། །དྲན་པ་རིག་པ་ཅི་བྱུང་ཡང་། །དེ་ཉིད་དུས་ན་དངོས་པོ་མེད། །ཅེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། ཡང་དག་ཟབ་མོའི་ཆོས་སྐུ་ནི། །སྐྱེ་བ་མེད་ཅིང་འགགས་པ་མེད། །རྣམ་རྟོག་མཚན་མ་གཞི་ནས་དག །ཉོན་མོངས་ངར་འཛིན་རྣམས་དང་བྲལ། །ཞེས་གསུངས། བསམ་གཏན་མཆོག་གི་རྒྱུད་ལས། ཤེས་པ་རང་ལུགས་སོ་མ་ལ། །གཞན་དུ་མི་གཡོ་སེམས་ལ་བལྟ། །བལྟས་པས་དངོས་མེད་ཤེས་པ་གསལ། །དེ་ཉིད་རྒྱུན་དུ་མ་ཡེངས་ཏེ། །
དེ་ལས་བསྒོམ་དུ་བཙལ་དུ་མེད། །ཅེས་གསུངས། ཡེ་ཤེས་རྣམ་པར་གྲོལ་བའི་མདོ་ལས། སེམས་ཉིད་འོད་གསལ་འདི་ཉིད་ལས། །ཡུལ་གྱི་སྣང་བ་ཅི་བྱུང་ཚེ། །དེ་ཉིད་སྐྱེ་མེད་དོན་དུ་སྟོན་པར་བྱ། །སྐྱེ་མེད་ཡིད་ལ་དྲན་ན་ནི། །ཆོས་སྐུ་རྒྱུན་ཏུ་བཞུགས་ཤེས་བྱ། །ཞེས་གསུངས་སོ། །གསང་བ་འདུས་པ་ཡིད་ལ་མི་བྱེད་པའི་རྒྱུད་ལས། སེམས་ཤིན་ཏུ་བཟང་བའི་དོན་རྟོགས་ན། །སྐྱེ་བ་གཅིག་གིས་འགྲུབ་པར་འགྱུར། །ཞེས་གསུངས། གསང་བ་བསམ་གྱིས་མི་ཁྱབ་པའི་རྒྱུད་ལས། ཆོས་རྣམས་ཀུན་གྱི་མཐར་ཐུག་པ། །རང་བཞིན་གནས་པ་མེད་པའི་དབྱིངས། །ལྟ་བ་མེད་པའི་སེམས་ཀྱིས་ནི། །ཕྱག་རྒྱ་ཆེན་པོར་ལྟ་བར་འགྱུར། །ཐམས་ཅད་བདག་གི་སེམས་ཀྱི་བདག་ཉིད་ཡིན། །ཞེས་གསུངས། ནམ་མཁའ་དང་མཉམ་པའི་རྒྱུད་ལས། འཁྲུལ་དང་མ་འཁྲུལ་ངོ་བོ་གཅིག །འགྲོ་ལ་སེམས་རྒྱུད་གཉིས་མི་འཆང་། །འོད་གསལ་རིག་པ་འདི་རང་ཡིན། །མ་བཅོས་རིག་པ་ཅོག་གེ་ཞོག །ཅེས་གསུངས། རྟོག་པ་མེད་པའི་རྒྱུད་ལས། གདོད་ནས་མ་གྲུབ་གཉུག་མའི་སེམས། །ཅིར་ཡང་མི་རྟོག་ཕྱག་རྒྱ་ཆེ། །ཆོས་
རྣམས་ཀུན་གྱིས་མ་རེག་པ། །མ་བཅོས་དེ་ཉིད་ངང་དུ་ཞོག །ཅེས་གསུངས། རབ་ཏུ་མི་གནས་པའི་རྒྱུད་ལས། རྣམ་རྟོག་མ་ལུས་ཤིང་དག་ལ། །འོད་གསལ་བ་ཡི་མེ་ཆེན་ནི། །ཕྱག་རྒྱ་ཆེན་པོ་རབ་འབར་བས། །མཉམ་ཉིད་ལྡན་པ་མཆོག་ཏུ་བྱེད། །ཐོག་མ་ཉིད་ནས་སངས་རྒྱས་པའི། །ཡེ་ཤེས་རང་གི་རྒྱུད་ལ་གནས། །བློ་སྦྱང་བ་ཡི་ཆོས་གསུམ་ནི། །གང་འདོད་འབྱུང་བ་ངེས་པ་མེད། །མ་ཡེངས་དྲན་པའི་རྒྱུན་གཅིག་པོ། །དུས་འདི་ཉིད་ལ་སྙིང་པོར་འབྱུང་། །བསམ་གྱིས་མི་ཁྱབ་སྙིང་རྗེ་ཡིན། །རྒྱས་ཤིང་གང་བས་ཐེག་པ་ཆེ། །མཉམ་པར་བཞག་པས་རྗེས་ཐོབ་མེད། །རྒྱུད་འདི་ལ་ནི་རྒྱུན་ཆད་མེད། །འདི་སྒོམ་རྣལ་འབྱོར་ཆེན་པོ་ཡང་། །དུམ་བུར་འགྱུར་བ་མ་ཡིན་ནོ། །ཞེས་གསུངས། བསམ་གྱིས་མི་ཁྱབ་པའི་རྒྱུད་ལས། སེམས་ནི་ཆོས་སྐུ་ཡིན་པས་ཅི་ཡང་མེད། །ལུས་ནི་ལོངས་སྤྱོད་རྫོགས་སྐུ་མཚན་དང་ལྡན། །དོན་རྣམས་གསལ་བར་ནུས་པས་སྤྲུལ་པའི་སྐུ། །སྐུ་གསུམ་འཁོར་ལོར་རྟག་ཏུ་མཆོད་པར་བྱ། །མཚན་མའི་འབྲས་བུ་མངོན་དུ་གྱུར་པ་བས། །བསམ་གྱིས་མི་ཁྱབ་ལྟ་བ་ལྷག་འགྱུར་
ཞེས། །སངས་རྒྱས་རྣམས་ཀྱིས་གསུངས་པའི་མགྲིན་གཅིག་ཏུ། །བླ་མེད་རྒྱུད་ཆེན་པོ་ནི་རབ་ཏུ་བསྒྲགས། །ཞེས་གསུངས། སཾ་བྷུ་ཏྲིའི་རྒྱུད་ལས། རང་ལས་དཔག་སྟེ་བཙལ་གྱུར་ན། །འཇིག་རྟེན་ཁམས་ནི་གང་ནས་ཀྱང་། །སངས་རྒྱས་གཞན་ལས་རྙེད་མི་འགྱུར། །ཞེས་གསུངས། བསམ་གྱིས་མི་ཁྱབ་པའི་རྒྱུད་ལས། ཆོས་རྣམས་ཀུན་གྱི་མཐར་ཐུག་པ། །རང་བཞིན་གནས་པ་མེད་པའི་དབྱིངས། །ལྟ་བ་མེད་པའི་སེམས་ཀྱིས་ནི། །ཕྱག་རྒྱ་ཆེན་པོར་བལྟ་བར་འགྱུར། །ཞེས་གསུངས། རྒྱུད་རྡོ་རྗེའི་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་གསུངས། དཔལ་གསང་བ་སྤྱོད་པའི་རྒྱུད་ལས། ཆོས་ཀུན་སེམས་ཀྱི་ངོ་བོ་སྟེ། །སེམས་ནི་སྟོང་པའི་ངོ་བོ་ཡིན། །ཐམས་ཅད་སྟོང་པར་རོ་གཅིག་པས། །འདི་ནི་སྤང་བླང་མེད་པའི་དབྱིངས། །ཞེས་གསུངས། རྡོ་རྗེ་མཁའ་འགྲོ་གསང་བའི་རྒྱུད་ལས་རང་སེམས་རང་གིས་རྟོགས་པས་ན། །སེམས་ཅན་གདོད་ནས་སངས་རྒྱས་སོ། །ཞེས་གསུངས། སཾ་བྷ་ཏྲིའི་ལས། མི་ཤེས་མུན་པས་སྒྲིབ་པ་ནི། །ལུས་ལས་
གཞན་པའི་སངས་རྒྱས་མེད། །ཅེས་གསུངས། རིམ་ལྔ་ལས། དེ་བས་འོད་གསལ་དག་པ་ལས། །ཡེ་ཤེས་གསུམ་ནི་འབྱུང་འགྱུར་ཏེ། །སུམ་ཅུ་རྩ་གཉིས་མཚན་འཆང་ཞིང་། །དཔེ་བྱད་བཟང་པོ་བརྒྱད་ཅུར་ལྡན། །རྣམ་པ་ཀུན་གྱི་མཆོག་ལྡན་པའི། །ཐམས་ཅད་མཁྱེན་པ་དེ་ནས་འགྱུར། །ཞེས་གསུངས། གསང་བ་སྤྱོད་པའི་རྒྱུད་ལས། གཟུང་བ་དང་ནི་འཛིན་པ་ཡི། །དམིགས་པ་ཐམས་ཅད་རྣམ་བསལ་ཏེ། །སེམས་ཉིད་བསམ་དུ་མེད་པས་ན། །ཅི་ཡང་བསམ་པར་མི་བྱའོ། །ཞེས་གསུངས། གསང་བ་འདུས་པ་ལས། དམ་པའི་དོན་དུ་དངོས་པོ་རྣམས། །སྲིད་གསུམ་དངོས་པོ་མེད་པར་བསྒོམ། །དངོས་པོ་མེད་པ་བསྒོམ་པ་དངོས། །བསྒོམ་པར་བྱ་བ་སྒོམ་པ་མིན། །དེ་བས་དངོས་པོ་དངོས་མེད་པ། །བསྒོམ་པ་དམིགས་སུ་མེད་པའོ། །ཞེས་གསུངས། རྩ་རྒྱུད་ལས། རྩེ་གཅིག་རྣལ་འབྱོར་སྒོམ་པར་བྱེད། །ཡིད་ལ་ཅི་ཡང་མི་བསམ་མོ། །ཞེས་གསུངས། དཔལ་བདུད་རྩི་རྒྱལ་པོའི་རྒྱུད་ལས། རང་བཞིན་སྟོང་པ་འོད་གསལ་བ། །བསྒོམས་པས་རྙེད་པ་མ་ཡིན་ཏེ།། །མ་བསྒོམས་པས་ཀྱང་
ང་མིན། །སྒོམ་པ་ཉིད་ཀྱང་རྟོག་པ་སྟེ། །མ་བསྒོམས་པ་ཡང་རྟོག་པ་ཉིད། །སྒོམ་རྒྱུ་རྡུལ་ཙམ་མེད་པ་ལ། །ཡེངས་སུ་སྐད་ཅིག་མེད་པའོ། །ཞེས་གསུངས། མ་དྲོས་པས་ཞུས་པའི་མདོ་ལས། ཤེས་རབ་མིག་གིས་བལྟས་པས་མཐོང་བ་སྟེ། །མཐོང་བ་མེད་པར་མཐོང་བ་ཆོས་མཐོང་བའོ། །ཤེས་རབ་མིག་གིས་བརྟེན་པ་གང་མཐོང་བ། །དེ་ནི་སངས་རྒྱས་མཐོང་བ་ཡིན། །ཞེས་གསུངས། མངོན་རྟོགས་རྒྱན་ལས། འདི་ཡི་དམིགས་པ་དངོས་མེད་དེ། །བདག་པོ་དྲན་པ་ཡིན་པར་བཞེད། །ཅེས་གསུངས། རྒྱལ་པོ་དྷོ་ཧ་ལས། ཀུན་རྫོབ་བདེན་པ་དྲན་པ་མེད་པ་སྟེ། །སེམས་གང་སེམས་ནི་མེད་པར་གྱུར་པའོ། །དེ་ཉིད་ཡོངས་སུ་གྱུར་པ་མཆོག་གི་མཆོག །མཆོག་གི་དམ་པ་མཆོག་དག་ཤེས་པར་གྱིས། །སེམས་ནི་དྲན་མེད་ཏིང་ངེ་འཛིན་དུ་སྦྱོར། །ཉོན་མོངས་ཡོངས་སུ་དག་པོ་དེ་ཉིད་དོ། །ཇི་ལྟར་འདམ་སྐྱེས་འདམ་གྱིས་མི་ཚུགས་བཞིན། །སྲིད་འབྱུང་ཉེས་པ་རྒྱ་མཚོས་མི་གོས་སོ། །ཞེས་གསུངས། །དྷོ་ཧ་མཛོད་བརྒྱ་ཅུ་པའི་གཞུང་ལས། ཕྱི་དང་ནང་དུ་ལྟ་བ་མེད་པའི་སེམས་དེ་ནི། །གང་གིས་མི་བསམ་གང་ལའང་བསམ་པ་
མེད། །འདུས་པའི་ཚོགས་སུ་སྤྲོས་པ་ཀུན་ཏུ་གཡེང་བའི་སེམས། །འཕོ་དང་འཇུག་པ་མེད་པར་རང་བཞིན་བསྟན་པ་ཉིད། །སེམས་ཀྱི་སྙིང་པོ་རང་དགའ་བར་ནི་བསྒོམ་པར་བྱ། །སྨྱོན་པ་ལྟ་བུའི་སེམས་ནི་བྱ་བ་དང་བྲལ་བ། །མཐའ་ཡིས་མ་གོས་ཡེ་ཤེས་དེ་ནི་བསྒོམ་པར་བྱ། །མིག་ནི་མི་བཙུམས་བསྒོམ་དུ་མེད་པའི་རྣལ་འབྱོར་པ། །དབེན་པའི་གནས་དང་གནས་མལ་མེད་པའི་གནས་ཉིད་དུ། །ཆགས་དང་སྡང་བའི་དྲི་མ་མེད་པ་ཡི། །དོན་ནི་སེམས་ཀྱི་ངོ་བོ་དེ་ནི་བསྒོམ་པར་བྱ། །རྒྱུ་དང་འབྲས་བུ་དབྱེར་མེད་འདི་ནི་སྙིང་པོའི་སེམས། །དེ་མྱོང་བ་ཡི་འབད་པ་ཀུན་ལ་རྩོལ་མི་དགོས། །ཞེས་གསུངས། འབངས་དྷོ་ཧ་བརྒྱ་དྲུག་ཅུ་པ་ལས། ཀྱེ་ཧོ་རྨོངས་པ་སེམས་ཀྱི་སེམས་ནི་རྟོགས་ནས་ནི། །ལྟ་བ་ངན་པ་ཐམས་ཅད་ལས་ནི་རང་གྲོལ་འགྱུར། །མཆོག་ཏུ་བདེ་བ་ཆེན་པོའི་དབང་གིས་ནི། །དེ་ལ་གནས་ན་དངོས་གྲུབ་དམ་པའོ། །ཞེས་གསུངས། སྐུ་གསང་བ་མཛོད་གཞུང་ལས། ཕྱག་རྒྱ་ཆེན་པོ་གཞན་ལ་མི་ལྟོས་ཕྱིར། །བསྒོམ་བྱ་རང་ལ་སྒོམ་བྱེད་རང་གི་སེམས། །བློ་འདས་ངང་ལས་དམིགས་པ་ཉིད་དང་བྲལ། །དེ་ཉིད་
འབྲས་བུ་ཡིན་ཕྱིར་གཞན་ལ་རག་མ་ལུས། །སྒོམ་སྒྲུབ་སྔགས་བཟླས་རང་གི་སེམས་ཡིན་ཏེ། །ཡི་དམ་ལྷ་ཡང་རང་གི་སེམས་ཡིན་པས། །དེ་ཕྱིར་མཁའ་འགྲོ་ལ་སོགས་ལུང་། བསྟན་རང་གི་སེམས། །བློ་འདས་ངང་ལ་དམིགས་པ་ཉིད་དང་བྲལ། །ཞེས་གསུངས། གསུང་གསང་བ་མཛོད་ལས། ཀྱཻ་ཧོ་དེ་ནས་འཁོར་བ་ཇི་ལྟར་བཏང་བར་འགྱུར། །རྒྱུ་རྐྱེན་མེད་པས་རྟོག་ཡུལ་མ་ཡིན་པས། །སེམས་ཀྱི་དེ་ཉིད་ཕྱག་རྒྱ་ཆེན་པོར་གནས། །དེ་ཉིད་སྟོབས་ཀྱི་མཚན་མ་དང་བྲལ་ཞིང་། །ཚེ་གཅིག་ཕྱག་རྒྱ་ཆེན་པོ་ཐོབ་པར་འགྱུར། ཞེས་གསུངས། ཐུགས་གསང་བ་མཛོད་ལས། གཟུང་འཛིན་བྲལ་བའི་ཕྱག་རྒྱ་ཆེན་པོ་ནི། །མཚན་ཉིད་བསྟན་པས་ཉེས་པ་ལ་སོགས་སྲེག །རྩེ་གཅིག་བལྟས་ན་ཡོན་ཏན་མཐར་ཐུག་པ། །རྩེ་གཅིག་བྱས་ཀྱི་ཡོན་ཏན་བསྒོམ་དུ་མེད། །རྣམ་རྟོག་རང་གསལ་དྲི་མེད་ངང་དུ་ཞི། །དྲན་མེད་སྣང་མེད་མེ་ལོང་གཟུགས་བརྙན་འདྲ། །ཞེས་གསུངས། སྐུ་གསུང་ཐུགས་ཡིད་ལ་མི་བྱེད་པ་ལས། གང་ན་འདི་དང་བྲལ་བ་མེད་པ་དེ། །དྲན་འཛིན་ཡུལ་ལས་མྱུར་དུ་སྐད་ཅིག་གྲོལ། །རྡོ་རྗེའི་སེམས་ནི་ཡོངས་སུ་བརྟག་
པར་བྱ། །སེམས་ལ་སེམས་སུ་མཐོང་བ་རོ་མཉམ་ནས། །ཕྱི་ནང་བསམ་གཏན་རྩེ་མོས་བརྟགས་པས་སྟོན། །རྣལ་མའི་དོན་ལ་གནས་པའི་རྣལ་འབྱོར་ནི། །ཤེས་རབ་ཡེ་ཤེས་གསང་བའི་དབྱིངས་ལ་རྫོགས། །ཞེས་གསུངས། དཔལ་རི་ཁྲོད་པ་ས་ར་ཧའི་དོ་ཧ་ལས། ཀྱེ་ཧོ་མ་ཡེངས་སེམས་ཀྱིས་རང་གིས་རང་ལ་ལྟོས། །རང་གི་སེམས་ཉིད་རང་གིས་རྟོགས་གྱུར་ན། །ཡེངས་པའི་སེམས་ཀྱང་ཕྱག་རྒྱ་ཆེན་པོར་འཆར། །མཚན་མ་རང་གྲོལ་བདེ་བ་ཆེན་པོའི་ངང་། །ཞེས་གསུངས། བིཪ་པའི་དྷོ་ཧ་ལས། སེམས་ཀྱི་ཆོས་ཉིད་ཀློང་ལ་འདི་ཡིན་མེད་པས་ན། །དེ་ལ་སྒོམ་དང་བསྒོམ་པར་བྱ་བ་གཉིས་སུ་མེད། །ཡོད་མེད་ཅི་ཡང་མི་རྟོག་ངང་ལ་མ་ཡེངས་བཞག །ཅེས་གསུངས། ཏཻ་ལོ་པའི་དྷོ་ཧ་ལས། ཏཻ་ལོ་ངས་ནི་ཅི་ཡང་བསྟན་དུ་མེད། །གནས་ནི་དབེན་པ་མ་ཡིན་མི་དབེན་མིན། །མིག་ནི་ཕྱེ་བ་མ་ཡིན་བཙུམ་པ་མིན། །སེམས་ནི་བཅོས་པ་མ་ཡིན་མ་བཅོས་མིན། །གཉུག་མ་ཡིད་ལ་བྱར་མེད་ཤེས་པར་གྱིས། །ཞེས་གསུངས། ནག་པོ་པའི་དྷོ་ཧ་ལས། ལམ་གྱི་འབད་རྩོལ་བྲལ་ན་གཉུག་མའི་ངང་། །
དེ་བཞིན་ཉིད་དུ་རྟོགས་པས་རྩིས་གདབ་མེད། །རྩིས་མེད་འཆུག་མེད་ངེས་པའི་དོན་མཐོང་ན། །སྟོང་དང་སྟོང་མིན་གཉིས་ཀྱི་འཛིན་པ་མེད། །ཆོས་ཟད་བློ་ཟད་མཐའ་རུ་དེ་ཡིས་སྐྱོལ། །ཞེས་གསུངས། མཻ་ཏྲི་པའི་དྷོ་ཧ་ལས།། ཐུགས་ཕྲད་སེམས་སུ་ཤེས་ན་ཡི་དམ་ལྷ། །ཤེས་པ་མ་བཀུག་རྟོག་པ་རིམ་གྱིས་སྤངས། །སེམས་ལ་རྣམ་རྟོག་བྱུང་ན་རྣལ་འབྱོར་པས། །རས་བལ་བཞིན་དུ་མ་བཅོས་ཀློད་ལ་ཞོག །བྱ་བ་སྤངས་ནས་རང་སེམས་རང་གིས་ལྟོས། །ཞེས་གསུངས། ཕྱག་རྒྱ་ཆེན་པོ་གང་གཱ་མ་ལས། སེམས་ནི་ནམ་མཁའི་དཀྱིལ་ལྟར་བསམ་པའི་ཡུལ་ལས་འདས། །དེ་ཡི་ངང་ལ་བཏང་བཞག་མེད་པར་ཀློད་ལ་ཞོག །སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །དེ་ལ་གོམས་ཤིང་འདྲིས་ན་བླ་མེད་བྱང་ཆུབ་ཐོབ། །ཅེས་གསུངས། ནཱ་རོ་པའི་ལྟ་བ་མདོར་བསྡུས་ལས། སེམས་ནི་ནམ་མཁའ་ལ་གནས་གསུངས། །རང་རིག་སྤྲོས་བྲལ་དེ་ཉིད་ཀྱང་། །སྣང་ཞིང་སྟོང་ལ་སྟོང་ཞིང་སྣང་། །དེ་ཕྱིར་སྣང་སྟོང་དབྱེར་མེད་དོ། །ཞེས་གསུངས། མཻ་ཏྲི་པའི་ཕྱག་རྒྱ་ཆེན་པོ་ཚིག་བསྡུས་ལས། རང་བཞིན་མ་བཅོས་རྣལ་མར་བཞག །
བསམ་དུ་མེད་པ་ཆོས་ཀྱི་སྐུ། །མ་བཙལ་བཞག་པས་སྒོམ་པ་སྟེ། །བཙལ་ཞིང་བསྒོམ་པ་འཁྲུལ་པའི་བློ། །ཞེས་གསུངས། པཎ་ཆེན་ཤཱཀྱ་ཤྲཱིའི་གདམས་ངག་རིན་ཆེན་འབྲུ་དགུ་ལས། ཅིར་སྣང་རང་སར་བཞག་ན་བྱ་བྲལ་ལྷུན་གྲུབ་ཡིན། །གང་ཤར་ངོ་བོར་བཟུང་ན་རིག་པ་རང་སར་གྲོལ། །འགྱུ་བའི་རྩོད་རྗེས་བཅད་ན་དྲན་རྟོག་དབྱིངས་སུ་ཡལ། །འདི་གསུམ་རང་སེམས་གནས་ལུགས་ཡིན་པས་དངོས་གཞིར་བསྒོམ། །ཞེས་གསུངས། ཕ་དམ་པའི་ཞི་བྱེད་སོ་ལུགས་ལས། སྒོ་ལྔའི་དབང་པོ་གསལ་བ་ལས། །ཡིད་ཀྱི་རྣམ་ཤེས་མི་འཕྲོ་བར། །རང་གསལ་འཛིན་པ་མེད་པ་ནི། །དེ་ནི་བཞག་ཐབས་ཆེན་པོ་ཡིན། །ཞེས་གསུངས། སྲོང་བཙན་སྒམ་པོའི་གབ་པ་མངོན་ཕྱུང་ལས་བལྟས་པས་མཐོང་བའི་ཡུལ་མེད་ཀྱིས། །མ་བལྟས་བཞག་པས་ཆོས་ཉིད་མཐོང་། །མ་བསྒྲུབས་བཞག་པས་སེམས་ཉིད་གྲུབ། །མ་བཟུང་མ་ཀློད་རང་སར་གྲོལ། །སྣ་ཚོགས་འཛིན་པ་མེད་པར་ཞོག །སྣ་ཚོགས་སྤང་བླང་མེད་པར་ཞོག །བློ་ཐག་ཆོད་པ་གྲོལ་བར་གྱིས། །ཞེས་གསུངས། རྫོགས་ཆེན་ནས་སེམས་དང་རིག་པའི་ཁྱད་པར་
མང་དུ་གསུངས་ཀྱང་། དོན་གྱི་འབབ་ས་གཅིག་སྟེ། མཁའ་འགྲོ་ཀློང་གསལ་འབར་མའི་རྒྱུད་ལས། །རིག་པ་རིག་པ་ཅེས་པ་ནི། །རིག་ཅིང་གསལ་བས་རིག་པ་ཡིན། །རྣམ་རྟོག་སྔ་མ་རང་སར་གྲོལ། །ཕྱི་མའི་དེར་འཛིན་མ་ཤར་བ། །བར་དེར་གཉན་པོའི་བཅོས་སླད་བྲལ། །དྲི་བྲལ་སེང་དང་ཕྱེད་པ་འདི། །རིག་པ་ཡིན་པར་ངོས་ཟུངས་ཤིག །ངོ་བོ་སྟོང་པ་རང་བཞིན་གསལ། །ཐུགས་རྗེ་ཀུན་ལ་སྣང་ནུས་པ། །དེ་ནི་རིག་པའི་གནས་ལུགས་ཡིན། །ཞེས་གསུངས། བདེ་ཆེན་གླིང་པའི་སྤྲིངས་ཡིག་ལས། །ཡེ་ནས་ཡིན་པའི་རིག་པ་ཆོས་སྐུ་འདི།། །རང་བྱུང་རང་ཤར་རང་ངོ་མ་ཤེས་པས། །འཁོར་བ་ལུ་གུ་རྒྱུད་དུ་འཁོར་བ་འདི། །དེ་རིང་ཉིད་ནས་རང་ངོ་ཤེས་པར་གྱིས། །སྣང་སྲིད་ཐམས་ཅད་ཁྱོད་རང་ཡིན་བཞིན་དུ། སྤང་བླང་དགག་སྒྲུབ་བྱས་ན་ཁྱོད་རང་འཆིང་། །ཆོས་རྣམས་དོན་ལ་གྲུབ་པ་མེད་པ་ལ། །འཁྲུལ་སྣང་མེད་བཞིན་འཛིན་པའི་རྙེད་མ་བྱེད། །རང་བབ་མ་བཅོས་སོ་མ་ལྷུག་པ་འདི། །གདོད་མའི་སངས་རྒྱས་ཡེ་ནས་ཡིན་པ་ལ། །བཟང་ངན་བཅོས་ལྷད་རྟོག་དཔྱོད་མ་བྱེད་པར། །ཡེངས་མེད་དྲན་པའི་སོ་པ་
རྒྱུན་དུ་ཚུགས། །འཁོར་འདས་རོ་མཉམ་ཕྱམ་གདལ་ཆེན་པོ་ལ། །མ་ཤེས་མ་བྱུང་བྱ་བ་ཅི་ལ་ཟེར། །སྡུག་བཙིར་བྱས་ཆོས་རྣམ་རྟོག་རྒྱུན་ཆད་ལ། །བྱར་མེད་རྩོལ་བྲལ་ངང་ལ་གནས་པར་གྱིས། །ད་ལྟའི་ཤེས་པ་སོ་མ་འདི་ཀ་རང་། །ཕྱག་རྒྱ་ཆེན་པོ་རྒྱལ་བའི་དགོངས་པ་ཡིན། །མཉམ་བཞག་རྗེས་ཐོབ་ཉམས་རྟོགས་ཡེ་ཤེས་སོགས། །གང་དང་ཅི་ལའང་ཞེན་པ་མེད་པར་ཞོག །སངས་རྒྱས་བྱས་ཀྱང་ཁྱོད་རང་རིག་པ་ཡིན། །འཁོར་བ་ངོན་སོང་ཁྱོད་རང་འཁྲུལ་པ་ཡིན། །དེ་ཕྱིར་ཁྱོད་རང་རང་གི་རིག་ཙམ་ལས། །རེ་དོགས་སྤང་བླང་དགག་སྒྲུབ་མ་བྱེད་ཅིག །ཅེས་གསུངས། རེ་མདའ་བ་གཞོན་ནུ་བློ་གྲོས་ཀྱི་ཞལ་ནས། གཉུག་མའི་སེམས་ཀྱི་དབྱིངས་ལ་འདི་ལྟར་ལྟོས། །ཐབས་ཤེས་དབྱེར་མེད་རོ་གཅིག་ཕྱག་རྒྱ་ཆེ། །གསལ་སྒྲིབ་བྱིང་རྒོད་སྤང་པ་གདོད་མའི་སེམས། །སྒོམ་འདོད་བློ་ཡིས་མ་ལྷད་རང་སར་ཞོག །ལྷག་པར་ཐོངས་ལ་དྲན་པའི་རྒྱངས་སོ་ཚུགས། །རྒྱ་མཚོའི་ཀློང་དུ་གཟིངས་ལ་འཕུར་བའི་བྱ། །ཕྱོགས་རྣམས་བསྐོར་ཞིང་དེ་རུ་འབབ་པ་ལྟར། །ཇི་ཙམ་རྣམ་པར་རྟོག་པའི་ཚོགས་འཕྲོས་ཀྱང་། །
ཐ་མལ་རང་གནས་ཆོས་ཀྱི་དབྱིངས་སུ་འབབ། །དེ་ཕྱིར་རྣམ་རྟོག་ཆེད་དུ་དགག་མི་དགོས། །ཕྱལ་བར་ཐོངས་ལ་དྲན་པའི་བྱ་ར་གྱིས། །དུག་ལ་སྔགས་ཀྱིས་བཏབ་པ་ཇི་བཞིན་དུ། །རྣམ་རྟོག་ཉོན་མོངས་ཡེ་ཤེས་ཆེན་པོར་འཆརོ། །འབད་རྩོལ་རྐྱེན་གྱིས་སྒྲུབ་པའི་མི་རྟོག་པ། །རང་བྱུང་འོད་གསལ་སྒྲིབ་པའི་མུན་ཆེན་ཡིན། །དེ་ཕྱིར་རང་བྱུང་འོད་གསལ་འཆར་འདོད་ན། །མི་རྟོག་རྐྱེན་གྱིས་མ་སྒྲུབ་རྣལ་འབྱོར་པ། །ཇི་ལྟར་གངྒཱའི་ཆུ་རླབས་ཞི་འདོད་ན། །འབད་པ་བྱས་ཚེ་ཕྱིར་ཕྱིར་འཕེལ་བ་ལྟར། །རྣམ་རྟོག་དགག་ཕྱིར་གཉེན་པོ་བརྟེན་ན་ཡང་། །རྣམ་པར་རྟོག་པའི་རྦ་རླབས་ཕྱི་ཕྱིར་འཕྲོ། །གང་ཚེ་འགའ་ཡིས་རང་གར་བཞག་པ་ན། །ཇི་ཞིག་ལྟར་ཚེ་ཆུ་ཡི་རྦ་རླབས་ཞི། །དེ་བཞིན་རྩོལ་མེད་ལྷུག་པར་སྐྱོང་ཤེས་ན། །རྣམ་པར་རྟོག་པའི་རྦ་རླབས་ངང་གིས་དེང་། །རྣམ་རྟོག་དབྱིངས་སུ་གྲོལ་བ་ཞི་གནས་ཏེ། །སྒྲོ་འདོགས་ནང་ནས་ཆོད་ན་ལྷག་མཐོང་ཡིན། །སྣང་སེམས་དབྱེར་མེད་འདྲེས་ན་ཟུང་འཇུག་ལམ། །ཤེལ་སྣོད་ཆུ་ཡིས་བཀང་བ་ཇི་བཞིན་ནོ། །གདོད་ནས་རྣམ་དག་ལྷུན་གྲུབ་དབྱིངས་ཉིད་ལ། །ཉོན་མོངས་དྲི་མའི་བག་ཆགས་
བསལ་དུ་མེད། །མི་རྟོག་གཉེན་པོའི་བག་ཀྱང་བསྐྱེད་དུ་མེད། །དེ་ཕྱིར་གང་གི་གཉེན་པོ་གང་ཞིག་བསྒོམ། །གང་ཚེ་རང་སེམས་སྐྱེ་མེད་དབྱིངས་ལ་གནས། སྤང་གཉེན་བླང་དོར་མཚན་མ་མ་མཐོང་ཞིང་། །བསྒོམ་བྱ་སྒོམ་བྱེད་མེད་པ་དེ་ཡི་ཚེ། །སྤང་བྱ་རང་གྲོལ་གཉེན་པོ་རང་ཤར་ཡིན། །དང་པོ་བྱིས་ལམ་གཅོང་རོང་ཆུ་ལྟར་གཡོ། །བར་དུ་འཕགས་ལམ་གངྒཱའི་རྒྱུན་བཞིན་དལ། །ཐ་མར་རྒྱ་མཚོའི་འཇིང་ལྟར་གང་གིས་ཀྱང་། །གཡོ་བ་མེད་པ་དེ་ནི་ཀུན་མཁྱེན་ལམ། །ཞེས་གསུངས། སྐྱེ་མེད་ཞང་རིན་པོ་ཆེའི་ཞལ་ནས། ཕྱག་རྒྱ་ཆེན་པོ་བསྒོམ་པ་ལ། །འདི་བྱའི་ཏིག་པོ་མི་འདོག་གིས། །སྔོན་འགྲོ་དངོས་གཞི་རྗེས་གསུམ་གྱི། །གོ་རིམ་ཇི་བཞིན་གྲངས་ངེས་མེད། །དུས་ཚོད་ཚེས་གྲངས་བརྩི་མི་དགོས། །ནམ་དྲན་དུས་སུ་ཀློད་ལ་ཞོག །དང་པོ་བར་དང་ཐ་མ་མེད། །རང་སེམས་སྐྱེ་མེད་རྒྱུན་མི་འཆད། །ཆུ་རླབས་རྙོག་མ་ལོང་ལོང་སྟེ། །མ་བཅོས་རང་སར་བཞག་ན་དྭངས། །རང་གིས་རྟོག་པའི་སྒྲིབ་གཡོགས་དེ། །མ་བཅོས་རང་བཞག་ཆོས་སྐུ་དངོས། །བཟོ་བཅོས་མ་བྱེད་ཀློད་ལ་ཞོག །ཤེས་པ་མ་བཀུག་ཡིན་པར་
ཐོངས། །ཞེ་འདོད་མ་བྱེད་ཕྱལ་བར་ཞོག །དམིགས་གཏད་མ་བྱེད་ཕྱལ་བར་ཞོག །བྱ་བྱེད་མ་མང་ཙན་ནེ་ཞོག །སེམས་ཀྱི་བཞག་པ་མ་ཚོལ་བར། །རྟེན་མེད་བར་སྣང་ལྟ་བུར་ཞོག །འདས་དང་མ་འོངས་ད་ལྟ་ལ། །མི་བསམ་ཤེས་པ་སོ་མར་ཞོག །རྣམ་རྟོག་འཕྲོ་རུང་མི་འཕྲོ་རུང་། །ཆེད་དུ་མ་བསྒོམ་ལྷུག་པར་ཞོག །མདོར་ན་ཅི་ཡང་མི་བསྒོམ་པར། །ཤེས་པ་ཅི་དུགའ་ཐོལ་གྱིས་ཐོངས། །གང་ལའང་ཉམ་ང་བྱ་མི་དགོས། །ཆོས་སྐུའི་ངང་ལས་གཡོ་རེ་ཤི །ཞེས་གསུངས། །གསེར་གླིང་པས་གསུངས་པའི་མཐའ་འཁོབ་འདུལ་བའི་ཆོས་བཞི་ལས། རྒྱངས་ཀྱིས་སྒྱུར་ལ་ཀློད་ཀྱིས་ཀློད། །ཤིག་གིས་ཤིག་ལ་འབོལ་ལེ་ཞོག །ཅེས་གསུངས། དཔལ་ལྡན་ས་སྐྱ་པ་གྲགས་པ་རྒྱལ་མཚན་གྱི་ཞལ་ནས། སེམས་མེད་སེམས་ཀྱིས་སེམས་ལ་ལྟོས། །མཐོང་རྒྱུ་བྱུང་ན་སེམས་ཉིད་མིན། །མཐོང་མེད་མཐོང་བས་སེམས་ཉིད་མཐོང་། །མཐོང་མེད་སེམས་ལ་མ་ཡེངས་ཞོག །ཅེས་གསུངས། ས་སྐྱ་པཎྜི་ཏའི་ཚིགས་སུ་བཅད་པ་བརྒྱད་པ་ལས། རིང་དུ་བསྲིང་ན་མི་འགྲོ་ལ། །ཉེ་བར་བརྟག་ན་མི་ཆགས་ཤིང་། །ལེགས་པར་བརྟག་ན་མ་གྲུབ་
པ། །འདི་ཡི་རང་བཞིན་ཇི་ལྟ་བུ། །གལ་ཏེ་དེ་ལ་ཅུང་ཟད་ཞོག །ཇི་ལྟར་བུས་ཀྱང་འཆིང་བར་འགྱུར། །གལ་ཏེ་དེ་ཡི་རང་བཞིན་ཤེས། །འཆིང་བ་ཀུན་ལས་རྣམ་པར་གྲོལ། །ཞེས་གསུངས། མ་ཇོ་མོ་ལབ་སྒྲོན་གྱི་བཀའ་ཚོམ་ལས་ཀྱང་། དེས་ན་མི་བསམ་ངང་ལ་ཞོག །བྱུང་ཚོར་རྟོག་པའི་རྗེས་མི་གཅོད། །མཁའ་ལ་གློག་འགྱུའི་རང་འོད་ལྟར། །རྣམ་རྟོག་བྱུང་ན་དེ་བཞིན་བཞག །ཅེས་དང་། དེ་བཞིན་རང་སེམས་ངོ་ཤེས་ན། །སངས་རྒྱས་གཞན་ནས་བསྒྲུབ་མི་དགོས། །ཞེས་གསུངས། དུས་ཕྱིས་བྱོན་པའི་རྒྱལ་སྲས་ཐོགས་མེད་པའི་གསུང་ལས་ཀྱང་། ཇི་ལྟར་སྣང་བ་འདི་དག་རང་གི་སེམས། །སེམས་ཉིད་གདོད་ནས་སྤྲོས་པའི་མཐའ་དང་བྲལ། །དེ་ལྟར་ཤེས་ནས་གཟུང་འཛིན་མཚན་མ་རྣམས། །ཡིད་ལ་མི་བྱེད་རྒྱལ་སྲས་ལག་ལེན་ཡིན། །ཞེས་དང་། ཐག་པ་ཆད་པའི་སོག་ཕོན་བཞིན། །ལུས་ཀྱི་བྱ་བ་ཀློད་ལ་ཞོག །རྒྱུད་གསུམ་ཆད་པའི་པི་ཝང་བཞིན། །ངག་གི་བྱ་བ་ཀློད་ལ་ཞོག །རྟག་ཆུ་ཆད་པའི་རན་ཐག་བཞིན། །སེམས་ཀྱི་བྱ་བ་ཀློད་ལ་ཞོག །ཅེས་གསུངས། རྗེ་མར་པ་ལོ་ཙཱས། །
ཡིད་ཀྱི་འགྱུ་བ་གཟུང་འཛིན་གཉིས། །སྤྲོས་བྲལ་ཆོས་ཀྱི་དབྱིངས་སུ་ཐིམ། །ཕྱི་སྣང་བ་འགྱུ་བའི་འཁྲུལ་འཁོར་འདི། །སྐྱེ་མེད་གདལ་བ་ཆེན་པོར་རྟོགས། །ནང་འཛིན་པ་སེམས་ཀྱི་ངོ་བོ་དེ། །སྔར་འདྲིས་ཀྱི་མི་དང་འཕྲད་པ་འདྲ། །ཞེས་དང་། ཕྱི་བཟུང་བ་ཡིད་ཀྱི་སྣང་ཡུལ་འདི། །བརྡལ་བ་ཆེན་པོར་རྒྱུན་ཆད་མེད། །སྐྱེ་མེད་ཆོས་ཀྱི་སྐུ་རུ་རྟོགས། །ཞེས་གསུངས། རྗེ་མི་ལ་རས་པས། ཁམས་གསུམ་འཁོར་བའི་སེམས་ཅན་དང་། །མྱ་ངན་འདས་པའི་སངས་རྒྱས་གཉིས། །དངོས་པོ་གཤིས་ཀྱི་ངང་དུ་གཅིག་ཅེས་དང་། ཚོགས་དྲུག་ཤར་བའི་ཡུལ་སྣང་དང་། །རང་སེམས་སྐྱེ་བ་མེད་པ་གཉིས། །གཉིས་མེད་ལྷན་ཅིག་སྐྱེས་པར་གཅིག །ཅེས་གསུངས། རྗེ་རས་ཆུང་པས། ཨེ་མ་ངོ་མཚར་རྨད་ཀྱི་ཆོས། །གཟུགས་ནི་སྣང་སྟོང་གཉིས་སུ་མེད། །སྒྲ་ནི་གྲག་སྟོང་བརྗོད་དུ་མེད། །རྟོག་པ་བདེ་སྟོང་ཟུང་དུ་འཇུག །ཅེས་དང་། སྣང་བ་ཆོས་སྐུའི་རང་བཞིན་ལས། །བལྟ་བྱ་ལྟ་བྱེད་མེད་པར་རྟོགས། ཞེས་གསུངས། རྗེ་སྒམ་པོ་པས། སྣང་རིག་ངོ་བོ་སྟོང་གསལ་འདི། །ཆོས་སྐུ་ཡིན་པར་ད་གཟོད་ཤེས། །
ཞེས་དང་། སྣང་གྲག་སེམས་སུ་ཤེས་པ་ཡི། །དགའ་བ་སྤྲོ་བ་རྒྱུན་ཆད་མེད། །བདེ་བ་ཆེན་པོའི་གནད་ཅིག་རྙེད། །ཅེས་གསུངས། དུས་གསུམ་མཁྱེན་པས། སངས་རྒྱས་རང་གི་སེམས་ལས་རྙེད། །གྲུབ་པ་ཐོབ་འདོད་བློ་དང་བྲལ། །གཅིག་ཤེས་ཀུན་གྲོལ་གྱི་རྟོགས་པ་ཤེས། །ཐོས་བསམ་བྱ་བའི་བློ་དང་བྲལ། །སྲིད་ཞི་གཉིས་མེད་ཀྱི་དོན་ཞིག་རྟོགས། །སང་སྐབས་དབྱེ་བའི་བློ་དང་བྲལ། །ཞེས་གསུངས། འགྲོ་མགོན་རས་ཆེན་པས། རིག་པ་གཅེར་བུ་ལྡིང་བ་ལས། །རྣམ་རྟོག་མཚན་མའི་གོས་མི་བཀོན། །སྙིང་པོ་གཉུག་མའི་རང་གསལ་ལ། །རྩིས་གདབ་ཅི་གྲོལ་གྱི་དོན་མེད་དོ། །ཞེས་གསུངས། སྤོམ་བྲག་པས། རང་བྱུང་རིག་པའི་གསལ་ཐེབ་པས། །དགོངས་པ་སྐད་ཅིག་ཡོངས་སུ་མེད། །མུན་པར་སྒྲོན་མེ་བལྟམས་པ་འདྲ། །གོལ་སྒྲིབ་མེད་པར་ངོ་མཚར་ཆེ། །ཞེས་གསུངས། ཀརྨ་པཀིས། རང་སེམས་ཕྱག་རྒྱ་ཆེན་པོ་འདི། །སྐུ་གསུམ་མ་བསྒྲུབ་ལྷུན་གྲུབ་ཏུ། །གཞི་ལ་རྙེད་པས་བཙལ་མི་དགོས། །ཞེས་དང་། མ་བཅོས་གཉུག་མ་རང་གསལ་རིག་པ་འདི། །རང་ངོ་ཤེས་པ་གང་ཤར་སྟེང་
དུ་བཞག །ཅེས་དང་། བློ་བྲལ་ཡིད་ལ་མི་བྱེད་པར། །མཉམ་བཞག་དུས་ཀྱི་ཉམས་ལེན་ཡིན། །དེ་ཡང་གསལ་རིག་ངར་དང་བཅས། །གོལ་ས་བཅད་པའི་མན་ངག་ཡིན། །གང་སྣང་སྒྱུ་མ་ལྟ་བུར་སྦྱངས། །འགགས་མེད་རིག་པའི་རྩལ་སྦྱང་བྱ། །རྗེས་ཐོབ་དུས་ཀྱི་ཉམས་ལེན་ཡིན། །ཞེས་གསུངས། ཨོ་རྒྱན་པས། ཐ་མལ་རིག་པའི་རང་ངོ་ཤེས། །འཁོར་བའི་རང་གཟུགས་བསྒོམ་པ་ལ། །ཐར་པ་ཐོབ་ནས་དགོས་པ་མེད། །སྣང་བ་སྣ་ཚོགས་བསྒོམ་པ་ལ། །མཉམ་པོར་བཞག་ན་དགོས་པ་མེད། །དྲན་ཤར་ཕྱག་རྒྱ་ཆེན་པོ་ལ། །སྣང་བ་བཀག་པས་དགོས་པ་མེད། །ཉམས་འོད་གསལ་མ་བུ་འདྲེས་པ་ལ། །དྲན་པས་བཟུང་ནས་དགོས་པ་མེད། །ཅེས་གསུངས། རང་བྱུང་རྡོ་རྗེས། ལར་ལྟ་བ་ལྟ་བ་ཟེར་ཙ་ན། །ལྟ་ན་རང་གི་སེམས་ལ་ལྟོས། །བལྟས་པས་མཐོང་རྒྱུ་མ་བྱུང་ན། །མཐོང་བའི་རྒྱལ་པོ་དེ་ཀ་རང་། །ཡང་ལྟོས་ཡང་ལྟོས་སེམས་ལ་ལྟོས། །སེམས་སྐྱེ་བ་མེད་པའི་གཞལ་ཡས་ནས། །འགྱུར་མེད་བདེ་ཆེན་ཆོས་སྐུ་བཞུགས། །སེམས་རིག་པའི་རང་ངོ་མ་མཐོང་ན། །དོན་ལོགས་སུ་བཙལ་བས་ག་ལ་
རྙེད། །ཅེས་གསུངས། རོལ་པའི་རྡོ་རྗེས། དང་པོའི་ཐ་མལ་ཤེས་པ་འདི། །ཆོས་སྐུ་ཡིན་པར་ཤེས་པར་མཛོད། །མི་དྲན་དགུ་དྲན་རྟོག་པ་འདི། །ཡེ་ཤེས་ཡིན་པར་ཤེས་པར་མཛོད། །ཅེས་གསུངས། མཁའ་སྤྱོད་དབང་པོས། གཞུང་ལུགས་ཀྱི་ལྟ་བ་ཅི་བཟང་ཡང་། །གནས་ལུགས་ཀྱི་དོན་དང་ཕྱིན་ཅི་ལོག །བློས་བྱས་ཀྱི་ལྟ་བ་ཅི་མཐོ་ཡང་། །རྟོགས་ལྡན་གྱི་གནས་སུ་བག་ལ་ཉལ། །ཞེས་གསུངས། རང་སེམས་རང་ངོ་ཤེས་ན་སངས་རྒྱས་རང་། །ཐ་སྙད་ཐོས་བསམ་མང་པོས་ཅི་ཞིག་བྱ། །གཞུང་ལུགས་རྟོགས་པའི་རི་མོ་ཡལ་དུ་ཚུག །གཅེར་མཐོང་རང་གྲོལ་འདི་ནི་བྱང་ཆུབ་ལམ། །ཞེས་གསུངས། དྲུང་སྐྱིད་ཀུན་དགའ་རྣམ་རྒྱལ་གྱི་གསུང་ལས། རྟོགས་པའི་སྔ་ལྟས་ཉམས་མྱོང་དྲོད་ཐོབ་པ། །བདེ་གསལ་མི་རྟོག་སེམས་ཀྱི་ལས་རུང་ཐོབ། །གོལ་བའི་སྐྱོན་བྲལ་དེ་ལ་རྩེ་གཅིག་ཟེར། །ཉམས་མྱོང་ཞེན་འཛིན་དག་ནས་ཡུལ་དུ་མེད། །རང་བཞིན་དབྱིངས་རིག་སྟོང་པར་རྟོགས་པ་ཡིན། །མཉམ་བཞག་ཕུང་པོ་ལྔ་བྲལ་རྗེས་སྒྱུ་མ། །ཤོར་བའི་དྲི་བྲལ་དེ་ལ་ངོ་མཐོང་དང་། །སྤྲོས་བྲལ་མཐོང་ལམ་མི་རྟོག་ཡེ་ཤེས་
ཟེར། །སྣང་སྲིད་འཁོར་འདས་བསྡུས་པའི་ཆོས་རྣམས་ཀུན། །ཟུང་འཇུག་སེམས་ཀྱི་མཚན་ཉིད་རྟོགས་པར་འགྱུར། །འབད་རྩོལ་མེད་ཅིང་རང་སྣང་དབང་བསྒྱུར་བ། །མཁྱེན་པའི་ཟབ་རྒྱས་རྟོགས་ལ་རོ་གཅིག་ཟེར། །དེས་གྲོལ་ཉིན་མཚན་ཀུན་ཏུ་འཛིན་པ་དག །རང་སྣང་རྣམ་དག་གཉུག་མའི་རྒྱལ་ཁམས་བསྟན། །དབྱིངས་རིག་གཅིག་གྱུར་འོད་གསལ་མ་བུ་མཇལ། །སྐུ་གསུམ་ལྷུན་གྱིས་གྲུབ་ལ་སྒོམ་མེད་ཟེར། །ཞེས་གསུངས་པ་ལྟར་རིམ་གྱིས་འཆར་བའོ། །ངོ་སྤྲོད་རྫོགས་སོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ར༽ །ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་སྣང་བཞི་ཐོད་རྒལ་གྱི་ས་ལམ་བསྒྲོད་ཚུལ་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རྫོགས་པ་ཆེན་པོའི་ཁྲེགས་ཆོད་ཐོད་རྒལ་གཉིས་ཀྱི་ངོ་སྤྲོད་གོང་དུ་སོང་ནས། དེ་གཉིས་ཟུང་འཇུག་དགོས་པའི་རྒྱུ་མཚན། མཁའ་འགྲོ་ཀློང་གསལ་འབར་མ་ཉི་མའི་གསང་རྒྱུད་ལས། ཁྲེགས་མ་ཆོད་པ་ཐོད་མི་རྒལ། ཐོད་མི་རྒལ་བ་ཁྲེགས་མི་ཆོད། ཅེས་དང་། ཀུན་བཟང་དགོངས་པ་ཀུན་འདུས་རྒྱུད་ལས། ཁྲེགས་ཆོད་དོན་འདི་མ་རྟོགས་ན། །ཐོད་རྒལ་ཤར་ཡང་གཟུང་འཛིན་ཅན། །མྱོང་མེད་ཁ་ལྟ་ཡུག་པོ་ལ། །དོན་གོལ་གསེར་ཕྱེ་ཆུར་འཕོ་མཚུངས། །ཞེས་
གསུངས་པས། གཞི་ཁྲེགས་ཆོད་ཕྱག་རྒྱ་ཆེན་པོའི་སྐྱོང་བ་དང་། ལམ་ཐོད་རྒལ་འོད་གསལ་ལ་མིག་གིས་ལྟོ་བ་གཉིས། །ཟུང་དུ་འཇུག་པ་ནི་ཐེག་པ་དགུའི་ཡང་རྩེ་ཡིན་ནོ། །དེ་ཡང་དུས་སྙིགས་མའི་ཚེ། བྱང་ཕྱོགས་ཁ་བ་ཅན་གྱི་ཡུལ་འདིར་དར་ཞིང་འབྲས་བུ་ཐོབ་པར་ལུང་བསྟན་ཏེ། རྫོགས་པ་ཆེན་པོ་འཁྲུལ་སྣང་རྩད་གཅོད་ཀྱི་རྒྱུད་ལས། ང་ནི་མྱ་ངན་འདས་ནས་ཀྱང་། །ལོ་ནི་དུ་མར་གྱུར་པ་ན། །འབྲས་བུ་མཆོག་ནི་བྱང་ཕྱོགས་སུ། །ཐོབ་པ་དཔག་ཏུ་མེད་པ་འབྱུང་། །ཞེས་དང་། གཏོར་རྒྱུད་ལས། ལྔ་བརྒྱ་པ་ན་གསང་སྔགས་བྱང་
ཕྱོགས་ཀྱི་རྒྱུད་དུ་དར་བར་འགྱུར་རོ། །དུས་དེ་ཙམ་ན་གསང་སྔགས་འབྲས་བུའི་ཆོས་འདི་གང་ཟག་འགས་སྤྱོད་པར་འགྱུར་རོ། །དེ་དག་ནི་འབྲས་བུ་གོ་འཕང་མི་ཞན་པ་ཐོབ་པར་འགྱུར་རོ། །ཞེས་དང་། ཨོ་རྒྱན་རིན་པོ་ཆེ་སྲིན་ཡུལ་དུ་ཕེབས་ཁར། མ་འོངས་པ་ན་སྐལ་ལྡན་གྱི་སྐྱེས་བུ་རིམ་པར་སྣང་བར་འགྱུར་ཏེ། རྩེ་གཅིག་ཉམས་སུ་བླང་ན་དུས་སྙིགས་མར་གྱུར་ཀྱང་འབྲས་བུ་རིང་བར་མི་འགྱུར་ཏེ། གྲུབ་པ་ཐོབ་པའང་མང་དུ་འབྱུང་བར་འགྱུར་རོ། །ཞེས་གསུངས་པའི་ཕྱིར། འོད་གསལ་ཐོད་རྒལ་ཉམས་སུ་བླང་བར་བྱ་སྟེ། འདི་ལ་དོན་བཞི་ཏེ། སྔོན་ལ་ལུས་ངག་ཡིད་གསུམ་གནད་ལ་གཟིར་བ་དང་གཅིག །གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་དང་གཉིས། ། ཉམས་སུ་བླངས་ནས་སྣང་བ་བཞི་འཆར་ཚུལ་བསྟན་པ་དང་གསུམ། མཐའ་རྟེན་རྗེས་ཀྱི་མན་ངག་དང་བཞིའོ། །དང་པོ་གནད་གཟིར་བ་ལ་གསུམ་སྟེ། ལུས་ཀྱི་གནད། ངག་ཡིད་ཀྱི་གནད་གསུམ་མོ། །དང་པོ་ལུས་ཀྱི་གནད་གཟིར་བ་ལ་གསུམ་སྟེ། སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟར་བྱས་པ་དང་། ལོངས་སྐུའི་བཞུགས་
སྟངས་གླང་པོ་ཆེ་ཉལ་བ་ལྟ་བུ་དང་། ཆོས་སྐུའི་བཞུགས་སྟངས་སེང་གེ་ཁྱི་ཚུགས་ལྟར་བྱས་པ་དང་གསུམ་མོ། །ཐལ་འགྱུར་ལས། ཆོས་སྐུའི་བཞུགས་། སྟངས་སེང་གེ་ཡིས། །འཁྲུལ་པའི་འཇིགས་པ་ཀུན་བྲལ་ནས། །རྡོ་རྗེའི་མིག་གིས་མཐོང་བར་འགྱུར། །ལོངས་སྤྱོད་རྫོགས་སྐུའི་བཞུགས་སྟངས་ཀྱིས། །གླང་ཆེན་ཉལ་བ་ལྟ་བུར་བསྟན། །ཆོས་ཉིད་རྣམ་པར་ལོངས་སྤྱོད་ནས། །པདྨའི་སྤྱན་གྱིས་མཐོང་བར་འགྱུར། །སྤྲུལ་པའི་སྐུ་ཡི་བཞུགས་སྟངས་ཀྱི། །དྲང་སྲོང་ཙོག་པུ་ལ་བརྟེན་ནས། །ཆོས་ཉིད་རྣམ་པར་རང་སྤྲུལ་ནས། །ཆོས་ཀྱི་མིག་གིས་མཐོང་བར་འགྱུར། །ཞེས་པ་དང་། མུ་ཏིག་ཕྲེང་བ་ལས། ལུས་ཀྱི་ལས་ནི་རྣམ་གསུམ་སྟེ། །སེང་གེའི་ཚུལ་དང་གླང་ཆེན་དང་། །དྲང་སྲོང་ཙོག་པུར་གནས་པ་དང་། །ཞེས་གསུངས་པས། ཁྲིད་ཞུ་བ་མང་ན་ནི། སྤྲུལ་སྐུའི་འདུག་སྟངས་ཀྱིས་ཆོག་སྟེ། ཐུགས་རྗེ་ཆེན་པོ་འོད་མཆོག་གི་དཀར་ཁྲིད་ཉིན་མོའི་རྣལ་འབྱོར་ལས། སྐབས་སུ་སྤྲུལ་སྐུའི་འདུག་སྟངས་དྲང་སྲོང་ཙོག་པུར་བྱ། །ཞེས་གསུངས་པས། ཁྲོམ་ཆོས་མ་ཡིན་པར་སློབ་བུ་ཉུང་ན། སློབ་བུ་བདུན་ལས་མི་
མང་བར་བྱས་ལ། ནམ་མཁའ་དྭངས་ཤིང་སེར་བུ་མེད་པའི་དུས་སུ། སློབ་བུ་རྣམས་དབེན་གནས་སུ་ཁྲིད་དེ། དང་པོ་ཆོས་སྐུའི་འདུག་སྟངས་སེང་གེ་ཁྱི་ཚུགས་ལྟ་བུ་ནི། ལུས་ཁྱི་ཚུགས་སུ་འདུག །རྐང་མཐིལ་གཉིས་སར་ཕབ། ལག་པ་རྡོ་རྗེའི་ཁུ་ཚུར་བཅང་སྟེ། རྐང་པའི་མཐེ་བོང་གཉིས་ས་ལ་བཙུགས། རོ་སྟོད་སེང་གེ་ལྟར་བརྒྱང་སྟེ་སེང་ལ་བོར། རྩལ་མཇིང་པ་ལ་བསྐུར། དབང་པོ་ཡུལ་ལ་གཏད་དོ། །གཉིས་པ་ལོངས་སྐུའི་འདུག་སྟངས་གླང་ཆེན་ཉལ་བ་ལྟ་བུ་ནི། གླང་ཆེན་ལྟར་ལུས་ཁ་སྦུབས་སུ་ཉལ། པུས་མོ་གཉིས་བྲང་ལ་སྤྲད། རྐང་སོར་ཕྱིར་ཕུལ། གྲུ་མོ་གཉིས་ས་ལ་སྦྱར། མཇིང་པ་ཡིད་ཙམ་གྱེན་ལ་བཏེག་པའོ། །གསུམ་པ་སྤྲུལ་སྐུའི་འདུག་སྟངས་དྲང་སྲོང་ཙོག་པུ་ནི། ལུས་ཙོག་པུ་བྱས་ལ། རྐང་པའི་ལོང་བུ་གཉིས་གཤིབ། རྐང་མཐིལ་གཉིས་ས་ལ་ཕབ། ལུས་ཆ་བསྲང་། པུས་མོ་གཉིས་བྲང་ལ་སྦྱར། ལག་པའི་མཁྲིག་མ་གཉིས་བསྣོལ་ལ་པུས་མོ་ལ་འཁྱུད། སྒལ་ཚིགས་དྲང་པོར་བསྲང་ངོ་། དེ་ལྟར་ལུས་གནད་རྣམ་པ་གསུམ་གཟིར་བས། ལུས་ལ་རིག་པའི་ཡེ་ཤེས་ཡོད་པ་སྟེ། གནད་གཟིར་བས་མངོན་སུམ་
དུ་འཆར་ཏེ། དཔེར་ན་སྦྲུལ་ལ་རྐང་ལག་ཡོད་ཀྱང་། མ་གཅུས་ན་མི་གསལ་བ་ལྟ་བུའོ། །གཉིས་པ་ངག་གི་གནད་ལ་རྣམ་པ་གསུམ་སྟེ། ངག་ལ་བསྟེན་པར་བྱ་བ་དང་། གནས་པར་བྱ་བ་དང་། བརྟན་པར་བྱ་བ་དང་གསུམ་མོ། །དང་པོ་ངག་ལ་བསྟེན་པ་ནི། ཉི་མ་གསུམ་བཞི་ལ་མི་སྨྲ་བར་ཇེ་ཉུང་བཅད་པར་བྱའོ། །གཉིས་པ་གནས་པ་ནི། གཞན་ཚིག་གིས་བར་མ་འདྲེས་པ་ངག་ཁྲིག་གིས་བཅད་པར་བྱའོ། །གསུམ་པ་བརྟན་པ་ནི། ཅི་ཡང་མི་བརྗོད་པར་ལྐུགས་པ་ལྟར་བརྟན་པར་བྱའོ། །གསུམ་པ་སེམས་ཀྱི་གནད་ནི། རིག་པ་གཞན་དུ་མ་ཡེངས་པར་བྱ། གཏད་པའི་འབེན་དང་མ་བྲལ་བར་བྱའོ། །གསུམ་པ་གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་ལ་གསུམ་སྟེ། སྒོའི་གནད། ཡུལ་གྱི་གནད། རླུང་གི་གནད་དང་གསུམ་མོ། དང་པོ་སྒྲོའི་གནད་ནི་མིག་ཡིན་ཏེ་ཐལ་འགྱུར་ལས། སྒོ་ནི་སྐུ་གསུམ་མིག་གིས་བལྟ། །ཞེས་དང་། ཡི་གེ་མེད་པ་ལས། མིག་ནི་ནམ་མཁའི་ཁམས་སུ་བལྟ། །ཞེས་དང་། མུ་ཏིག་ཕྲེང་བ་ལས། སྒོ་ནི་དེ་ཉིད་མི་འགུལ་དང་། །ཞེས་གསུངས། །
འདས་རྗེས་ལས། སྒོ་གནད་ལྡོག་ཕབ་ཟུར་གྱིས་ལྟ། ཞེས་པ་འདི་ལ་གསུམ་སྟེ། ཆོས་སྐུའི་གཟིགས་སྟངས་གྱེན་ལ་བཟློག་ནས་ལྟ་བས། འཁྲུལ་པའི་སྣང་བ་དུས་གཅིག་ལ་འགག་པའི་དགོས་པ་ཡོད། ལོངས་སྐུའི་གཟིགས་སྟངས་ཐད་ཀར་ལྟ་བས། ངོ་བོ་རྗེན་པར་མཐོང་བའི་དགོས་པ་ཡོད། སྤྲུལ་སྐུའི་གཟིགས་སྟངས་ཐུར་དུ་ཕབ་པའི་ཚུལ་དུ་ལྟ་བས། རླུང་སེམས་ལ་རང་དབང་ཐོབ་པའི་དགོས་པ་ཡོད། དེ་ལྟར་གཟིགས་སྟངས་གསུམ་དང་མ་བྲལ་བར་བྱའོ། །གཉིས་པ་ཡུལ་གྱི་གནད་ནི་གཉིས་ཏེ། ཕྱིའི་དབྱིངས་དང་ནང་གི་དབྱིངས་གཉིས་སོ། །ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་མཁའ་ལ་འཛིན། །ནང་གི་སྒྲོན་མའི་ལམ་དུའོ། །ཞེས་དང་། སྒྲོན་མེ་འབར་བ་ལས། རིག་པ་ཕྱི་ཡི་དབྱིངས་ལ་བཞག་པས། །རང་རིག་རང་སར་དག་སྟེ་སྣང་། །ཞེས་གསུངས་པ་དང་། རིག་པ་རང་ཤར་ལས། དབྱིངས་ཀྱི་རང་བཞིན་འོད་ཀྱི་ཁྱིམ། །ཞེས་དང་། འདས་རྗེས་ལས། ཡུལ་གནད་ནམ་མཁའ་རྐྱེན་དང་བྲལ་ལ། ཕྱི་དབྱིངས་མཁའ་རྐྱེན་བྲལ་བ་ལས། ནང་དབྱིངས་རྣམ་པར་དག་པའི་སྒྲོན་མའོ། །
དེ་ཡང་ནམ་མཁའ་སྟོང་པ་ལ་ཆགས་པའི་ཡུལ་ཡིན་པའི་ཕྱིར། ཡུལ་གྱི་གནད་དབྱིངས་ལ་གཏད་པས་ཡེ་ཤེས་ལྷུག་པར་གནས་པའི་ཕྱིར་རོ། །གསུམ་པ་རླུང་གི་གནད་ནི་གསུམ་སྟེ། བཟུང་བ་དང་། འཕང་བ་དང་། དལ་ལ་བསྟན་པ་གསུམ་མོ། །ཐལ་འགྱུར་ལས། རླུང་ནི་ཅི་ལས་དལ་བྱ་སྟེ། །རབ་ཏུ་འཕང་བ་ལས་བྱུང་བ། །ཞེས་དང་། འདས་རྗེས་ལས། རླུང་གནད་ཤིན་ཏུ་དལ་བར་བརྟེན། ཞེས་དང་། དང་པོ་དལ་བར་བཟུང་། དེ་ནས་རྒྱང་རིང་པོར་མདའ་ལྟར་འཕངས་ལ། རྗེས་སུ་རླུང་རང་བབས་སུ་ཤིན་ཏུ་དལ་བར་བྱའོ། །རིག་པའི་གནད་ནི། ལུ་གུ་རྒྱུད་བཙོན་དུ་བཟུང་བར་བྱ་སྟེ། ཡི་གེ་མེད་པ་ལས། ངོ་བོ་ལུ་གུ་རྒྱུད་ལྟར་འབྱུང་། །འཕྲ་དང་འཁྱུག་དང་འགྱུ་བའོ། །ཞེས་དང་། རང་ཤར་ལས། ཡེ་ཤེས་ལྔ་ལྡན་འོད་ཀྱི་སྐུ། །ལུ་གུ་རྒྱུད་ཏུ་རབ་ཏུ་གསལ། །དེ་ཡང་འགྲོ་དང་འོང་བ་དང་། །འགུལ་བ་དང་ནི་འཕྲིག་པའོ། །ཞེས་དང་། ཡེ་ཤེས་རྩལ་རྫོགས་ལས། རང་སྣང་རིག་པའི་གཙོ་བོ་སྟེ། །ཡེ་ཤེས་ལུ་གུ་རྒྱུད་དུ་གནས། །ཞེས་དང་། འདས་རྗེས་ལས། ལུག་རྒྱུད་རིག་པ་
བཙོན་དུ་བཟུང་། །ཞེས་དང་། དེ་ལྟར་གནད་གསུམ་དང་མ་བྲལ་བའི་རིག་པ་ལུ་གུ་རྒྱུད་དུ་ལྟའོ། །དང་པོ་ཐུན་ཆུང་གྲངས་མང་བར་བྱ། དེ་ནས་ཐུན་ཇེ་རིང་ཇེ་རིང་ལ་ཡུན་བསྲིང་། དེ་ནས་ཉིན་མཚན་ཁྱད་པར་གྱི་དུས་སུ་ཉམས་སུ་ལེན་པའོ། །ཟླ་བ་ཕྱེད་དང་གཉིས་ཀྱིས་འབྱོང་བར་འགྱུར་རོ། །དེ་ལྟར་ཉམས་སུ་བླངས་བས་འཆར་ཚུལ་ནི། ཐུགས་རྗེ་ཆེན་པོའི་དོན་ཏིག་གི་ཀ་ཁྲིད་ཉིན་མོའི་རྣལ་འབྱོར་ལས་གསུངས་པ། ཆོས་ཉིད་མངོན་སུམ་གྱི་སྣང་བ་རིག་པ་རྡོ་རྗེ་ལུ་གུ་རྒྱུད་ཅེས་བྱ་བ་ཤེལ་གྱི་ཕྲེང་བ་ལྟ་བུ་སྣང་སྟོང་གི་མཐའ་དང་བྲལ་བ་ཞིག་འཆར་བ་དེ་སྨིན་མཚམས་སུ་གཡོ་འགུལ་མེད་པར་ཨར་ལ་གཏད་པས། ལས་རླུང་ཕྱིར་ཟད་ཡེ་ཤེས་ཀྱི་རླུང་དབུ་མར་ཚུད་པའི་སྣང་བ་ཉིན་མོའི་རྟགས་དྲུག་ཅེས་བྱ་བ་འཆར་ཏེ། མཚན་བརྗོད་ལས། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །ཞེས་པས། རྒྱས་རྩའི་རླུང་དབུ་མར་ཚུད་པས་མེ་འབར་བ་ལྟ་བུ་དམར་ལམ་མེ་བ་དང་། འོད་ཆེན་རྣམ་པར་སྣང་བར་བྱེད། །ཅེས་པས། མདུན་གྱི་རླུང་དབུ་མར་འདུས་པས། གློག་ལྟར་ཁྱུག་ཁྱུག་པ་དང་། ཡེ་ཤེས་སྣང་བ་ལམ་མེ་བ།
ཅེས་པས། གཡོན་གྱི་རླུང་འདུས་པས། ཟླ་བ་བཞིན་དཀར་ཀྱི་ལེ་བ་དང་། འགྲོ་བའི་མར་མེ་ཞེས་པས། གཡས་ཀྱི་རླུང་འདུས་པས། ཉི་མ་བཞིན་དམར་ཀྱི་ལེ་བ་དང་། ཡེ་ཤེས་སྒྲོན། །ཞེས་པས། སྟེང་གི་རླུང་འདུས་པས། སྒྲ་གཅན་བཞིན་ནག་ཀྱི་ལེ་བ་དང་། གཟི་བརྗིད་ཆེན་པོ་འོད་གསལ་བ། །ཞེས་པས། དུང་ཅན་གྱི་རླུང་འདུས་པས། ཤིན་ཏུ་ཕྲ་བའི་ཐིག་ལེ་ནག་པོ་དང་འཇའ་འོད་སྣང་བར་འགྱུར་རོ། །ཞེས་དང་། རཏྣ་གླིང་པའི་ཀློང་གསལ་སྙིང་ཐིག་གི་ཁྲིད་ཡིག་ཡིད་བཞིན་ནོར་བུ་ལས། དེ་ལྟར་བསྒོམས་པས་ཐོག་མར་རང་གི་སྨིན་ཕྲག་ཏུ་དབྱིངས་རྣམ་པར་དག་པའི་སྒྲོན་མ་ཞེས་བྱ་བ་འཇའ་ཚོན་ལྟ་བུ་ཞིག་འཆར་རོ། །དེའི་ནང་དུ་ཐིག་ལེ་སྟོང་པའི་སྒྲོན་མ་ཞེས་བྱ་བ་ཀོ་མོག་ལ་རྡོ་བསྐྱུར་བ་ལྟ་བུའམ། ཕུབ་ཀྱི་སྦ་འཁོར་ལྟ་བུ། དེའི་ནང་དུ་ཐིག་ལེ་ཉུངས་འབྲུའམ། སྲན་འབྲུ་ཙམ་དུ་འཆར་རོ། །དེའི་ནང་དུ་རིག་པ་རྡོ་རྗེ་ལུ་གུ་རྒྱུད་ཅེས་བྱ་བ་ཕྲ་བ་ལ་རྟ་རྔ་ལ་མདུད་པ་བྱས་པ་ལྟ་བུ་དང་། མུ་ཏིག་སྟར་ལ་བརྒྱུས་པ་ལྟ་བུ་དང་། ལྕགས་ཐག་ལྟ་བུ་དང་། མེ་ཏོག་གི་དྲ་བ་རླུང་གིས་བསྐྱོད་པ་ལྟ་བུ་ལ་སོགས་པ་དེ་
དག་ཐམས་ཅད་གཉིས་འབྲེལ་དང་གསུམ་འབྲེལ་ལ་སོགས་སུ་འཆར་ཏེ། དེ་དག་ནི་རང་གི་རིག་པ་རྡོ་རྗེ་ལུ་གུ་རྒྱུད་ཐིག་ལེ་ཉག་གཅིག་ཅེས་བྱ་བ་དེ་ཡིན་ནོ། །དེ་ཡང་དབྱིངས་རིག་འདུ་འབྲལ་མེད་པ་ཉི་མ་དང་ཟེར་གྱི་ཚུལ་དུ་གནས་སོ། །དེ་ཡང་དབྱིངས་ཀྱི་རྟགས་སུ་འོད་ཁྱིམ། ཡེ་ཤེས་ཀྱི་རྟགས་སུ་ཐིག་ལེ། སྐུའི་རྟགས་སུ་ལུ་གུ་རྒྱུད་དོ། །དེ་རྣམས་ཀྱི་གནས་ལུགས་ཙིཏྟའི་ནང་ན་གནས་ཡེ་ཤེས་ཀྱི་རྟགས་སུ་ཐིག་ལེ། སྐུའི་རྟགས་སུ་ལུ་གུ་རྒྱུད། ལམ་དབང་པོའི་མངོན་སུམ་དུ་འཆར་ཏེ་དེ་ནི་ཡིད་དཔྱོད་འཛིན་པའི་ལྟ་བ་ཚིག་དང་བློས་བྱས་ཤེས་རབ་ལ་སོགས་རྟོག་དཔྱོད་ཀྱི་ལྟ་བ་བསྣུབ་པའོ། །ཞེས་དང་། མཁའ་འགྲོ་སྙིང་ཏིག་ཁྲིད་ཡིག་རིན་ཆེན་སྤུངས་པ་ལས། ཆོས་ཉིད་མངོན་སུམ་གྱི་སྣང་བ་ཆ་ཕྲ་ལ་དྭངས་པ། གསལ་ལ་འཚེར་བ། རང་བཞིན་བཀྲག་པ། ཉམས་ང་བ་མངོན་སུམ་དུ་འཆར་ཏེ། དག་པ་དབྱིངས་ཀྱི་སྒྲོན་མ། གྱེན་འགྲེང་དང་རྩིབ་ཤར་དང་། ། མདའ་དང་མདུང་རྩེ་ལྟ་བུ་དང་། ཉ་མིག་ལྟ་བུ་དང་། མིག་ཚག་ལྟ་བུ་དང་། དྲ་མིག་ལྟ་བུ་དང་། རིན་པོ་ཆེ་འབར་བ་ལྟ་བུ་དང་། མཆོད་རྟེན་ལྟ་བུ་དང་། ཐིག་ལེ་དང་
ཐིག་ཕྲན་གྱིས་འཁྲིགས་པ། འཇའ་ཚོན་ཁ་དོག་ལྔ་ལྡན་མངོན་སུམ་དུ་འཆར་རོ། །དེ་རྣམས་ཀྱི་ནང་དང་བར་ཐམས་ཅད་དུ། རིག་པའི་ངོ་བོ་རྡོ་རྗེ་ལུ་གུ་རྒྱུད་དུ་གསལ་ལོ། །དེ་ངོས་ཟིན་པར་བྱས་ལ། མགུལ་འཕྲིག་མེད་པར། ཉམས་སུ་བླང་བར་བྱའོ། །ཞེས་གསུངས། ཀརྨ་གླིང་པའི་ཆོས་ཉིད་བར་དོ་ངོ་སྤྱོད་མཐོང་བ་རང་གྲོལ་ལས། དང་པོ་ཆོས་ཉིད་མངོན་སུམ་གྱི་སྣང་བ་ནི། བླ་མས་ལུས་གནད་འདི་ལྟར་གྱིས་ལ། ངག་གནད་འདི་ལྟར་བྱ་སྟེ། སེམས་གནད་འདི་ལྟར་སྡོད་ཅིག །ཅེས་ཚིག་གསུམ་གྱིས་བསྟན་པས། སློབ་མས་དེ་ལྟར་ཉམས་སུ་བླངས་པ་ལ། ཡིད་དཔྱོད་ཚིག་གིས་སྒྲོ་འདོགས་ལ་རག་མ་ལུས་པར་ཡུལ་ནམ་མཁའ་སྟོང་པ་ལ། ཆོས་ཉིད་རིག་པའི་སྣང་བ་མངོན་སུམ་དུ་རྣམ་རྟོག་གང་གིས་ཀྱང་མ་ལྷད་པར་མཐོང་བས་ཆོས་ཉིད་མངོན་སུམ་གྱི་སྣང་བ་ཞེས་བྱའོ། །དེ་ལྟར་གནད་གསུམ་དུ་བསྡུས་ནས་ཉམས་སུ་བླངས་པས། རང་གི་ཤོས་སྨིན་ཕྲག་ཏུ་དབྱིངས་རྣམ་པར་དག་པའི་སྒྲོན་མ་ཞེས་བྱ་བ། འཇའ་ཚོན་ལྟ་བུ། རྨ་བྱའི་མདོངས་ལྟ་བུ་འཆར་རོ། །དེའི་ནང་དུ་ཐིག་ལེ་སྟོང་པའི་སྒྲོན་མ་ཞེས་བྱ་བ་ཀོ་མོག་ནང་དུ་
རྡོ་བསྐྱུར་བའི་ཆུའི་གཉེར་མ་ལྟ་བུའམ། ཕུབ་ཀྱི་སྦ་འཁོར་ལྟ་བུའི་ནང་དུ། ཐིག་ལེ་ཡུངས་འབྲུ་ཙམ་མམ། སྲན་འབྲུ་ཙམ་འཆར་རོ། །དེའི་ནང་དུ་རིག་པ་རྡོ་རྗེ་ལུ་གུ་རྒྱུད་ཅེས་བྱ་བ། ཕྲ་བ་རྟ་རྔའི་མདུད་པ་ལྟ་བུ་དང་། མུ་ཏིག་རྩར་ལ་བརྒྱུས་པ་ལྟ་བུ་དང་། ལྕགས་ཐག་ལྟ་བུ་དང་། མེ་ཏོག་གི་དྲ་བ་རླུང་གིས་བསྐྱོད་པ་ལྟ་བུ་ལ་སོགས་ཏེ། དེ་དག་ཐམས་ཅད་ཀྱང་གཉིས་སྦྲེལ་གསུམ་སྦྲེལ་ལ་སོགས་པ་འཆར་ཏེ། དེ་ནས་རང་གི་རིག་པ་ལུ་གུ་རྒྱུད། ཐིག་ལེ་ཉག་གཅིག་བྱ་བ་དེ་ཡིན་ནོ། །དེ་ཡང་དབྱིངས་དང་རིག་པ་འདུ་འབྲལ་མེད་པ། ཉི་མ་དང་ཟེར་གྱི་ཚུལ་དུ་གནས་སོ། །དེ་ཡང་དབྱིངས་ཀྱི་རྟགས་སུ་འོད་ཁྱིམ། ཡེ་ཤེས་ཀྱི་རྟགས་སུ་ཐིག་ལེ། རིག་པ་སྐུའི་རྟགས་སུ་ལུ་གུ་རྒྱུད། དེ་རྣམས་གནས་ལུགས་ཙིཏྟའི་དཀྱིལ་ན་གནས། ལམ་དབང་པོའི་མིག་ལ་མངོན་སུམ་དུ་འཆར་རོ། །ཞེས་གསུངས། ཐལ་འགྱུར་ལས། ཆོས་ཉིད་མངོན་སུམ་སྣང་བ་ནི། །དབང་པོའི་སྒོ་ལ་ངེས་ཐོན་ཏེ། །སྤྲིན་མེད་ནམ་མཁའ་དག་ལ་གསལ། །ཞེས་གསུངས་སོ། །ཡིད་དཔྱོད་འཛིན་པའི་ལྟ་བ་ཚིག་དང་བློས་བྱས་ཤེས་རབ་རྟོག་དཔྱོད་ཀྱི་ལྟ་བ་ནུབ་པའོ། །
ཞེས་དང་། འདས་རྗེས་ལས། ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ལྟ་བ་ནུབ། །ཅེས་གསུངས་སོ། །ཀློང་གསལ་ལས། རྐྱེན་བྲལ་ནམ་མཁའ་དག་པ་ལ། །གཟིགས་སྟངས་གཅུན་ནས་ངོ་སྤྲད་པས། །དབང་པོའི་སྒོ་ལ་སྒྲོན་མ་ནི། །མཛེས་པ་རྨ་བྱའི་མདོངས་ལྟ་བུ། །ཐིག་ལེ་ལུ་གུ་རྒྱུད་དུ་འབྲེལ། །འགུལ་འཕྲིག་འགྱུ་བའི་རྣམ་པར་འགྱུ། །ཞེས་དང་། རིག་པ་རང་ཤར་ལས་ཀྱང་། ཡེ་ཤེས་ལྔ་ལྡན་འོད་ཀྱི་སྐུ། །ལུ་གུ་རྒྱུད་དུ་རབ་ཏུ་གསལ། །དེ་ཡང་འོང་དང་འགྲོ་བ་དང་། །འགུལ་བ་དང་ནི་འཕྲིགས་པའོ། །ཞེས་དང་། སེངྒེ་རྩལ་རྫོགས་ལས་ཀྱང་། རང་སྣང་རིག་པའི་དངོས་པོ་འདི། །ཡེ་ཤེས་ལུ་གུ་རྒྱུད་དུ་གསལ། །ཞེས་དང་། ནོར་བུ་ཕྲ་བཀོད་ལས། རྐྱང་ཞགས་ཆུ་ཡི་སྒྲོན་མ་ལས། །ཡང་དག་རྫོགས་པའི་སངས་རྒྱས་ཀྱང་། །རིག་པ་ལུ་གུ་རྒྱུད་ཀྱི་སྐུ། །ཡོངས་སུ་གསལ་བའི་རྣམ་པ་ཅན། །ཞེས་དང་། ཀློང་གསལ་ལས། དེ་ཡང་ངོ་བོ་ཀ་དག་ལ། །རང་བཞིན་ལྷུན་གྲུབ་ཉིད་གནས་ཏེ། །ཐུགས་རྗེས་ཀུན་ལ་ཁྱབ་པ་ཉིད། །ཙིཏྟ་དག་ནས་རྩ་ལ་ཤར། །ངོ་བོ་དབང་
པོའི་སྒོ་ལ་འཆར། །རིག་པ་མངོན་སུམ་ཞེས་སུ་བརྗོད། །ཡིད་དཔྱོད་རྣམས་དང་བྲལ་བའོ། །ཞེས་དང་། འདས་རྗེས་ལས། མངོན་སུམ་གནད་འདི་སུས་མཐོང་བ། །ཁམས་གསུམ་ལྡོག་པ་མ་ཡིན་ནོ། །ཞེས་དང་། ཀློང་གསལ་ལས། རིག་པ་མངོན་སུམ་མཐོང་བ་ནི། །བདེན་པ་མཐོང་བའི་གནད་ཀྱིས་སུ། །ཁམས་གསུམ་འཁོར་བར་ལྡོག་པ་མེད། །ཅེས་གསུངས་པས། ད་ལྟ་འཇའ་འོད་ཐིག་ལེར་བལྟས་པས། བར་དོར་འཇའ་འོད་ཟེར་གསུམ་ཤར་བའི་ཚེ། ཡེ་ཤེས་ལྔ་རང་ངོ་འཕྲོད་ནས་གྲོལ་ཏེ། །ཐུགས་རྗེ་ཆེན་པོ་ཡེ་ཤེས་འོད་མཆོག་གི་གསང་ལམ་ངོ་སྤྲོད་རྒྱུད་ལས། རིགས་ཀྱི་བུ་རང་དབུགས་ཆད་པ་དང་། སངས་རྒྱས་ཀྱི་ཞིང་ཁམས་རྣམ་པར་དག་པ་མེ་ལོང་ངོས་ལ་ཉི་མ་ཤར་བ་ལྟ་བུར་དུས་གཅིག་ལ་འཆར་རོ། །དེའི་དུས་སུ་འོད་ཁ་དོག་མཐིང་ཁ་མཐོང་བའི་ཚེ་ན། འདི་ཀ་རང་གི་རིག་པའི་ངོ་བོ་སྟོང་པ་ཆོས་ཀྱི་དབྱིངས་ཀྱི་ཡེ་ཤེས་ཡིན་སྙམ་པ་དང་། རང་བྱུང་རྡོ་རྗེ་སེམས་དཔའ་ཡབ་ཡུམ་འཁོར་དང་བཅས་པ་འགྲུབ་པར་འགྱུར་རོ། །འོད་ཟེར་སེར་པོ་མཐོང་བའི་ཚེ། འདི་ཀ་རང་གི་རིག་པའི་ངོ་བོ་སྟོང་པ་མཉམ་པ་ཉིད་
ཀྱི་ཡེ་ཤེས་ཡིན་སྙམ་པ་དང་། རང་བྱུང་རིན་ཆེན་འབྱུང་ལྡན་ཡབ་ཡུམ་འཁོར་དང་བཅས་པ་འགྲུབ་པར་འགྱུར་རོ། །འོད་དམར་པོ་མཐོང་བའི་ཚེ། འདི་ཀ་རང་གི་རིག་པའི་ངོ་བོ་སྟོང་པ་སོ་སོར་རྟོག་པའི་ཡེ་ཤེས་ཡིན་སྙམ་པ་དང་། རང་བྱུང་སྣང་བ་མཐའ་ཡས་ཡབ་ཡུམ་འཁོར་དང་བཅས་པ་འགྲུབ་པར་འགྱུར་རོ། །འོད་ལྗང་གུ་མཐོང་བའི་ཚེ། འདི་ཀ་རང་གི་རིག་པའི་ངོ་བོ་སྟོང་པ་བྱ་བ་གྲུབ་པའི་ཡེ་ཤེས་ཡིན་སྙམ་པ་དང་། རང་བྱུང་དོན་ཡོད་གྲུབ་པ་ཡབ་ཡུམ་འཁོར་དང་བཅས་པ་འགྲུབ་པར་འགྱུར་རོ། །འོད་དཀར་པོ་མཐོང་བའི་ཚེ། འདི་ཀ་རང་གི་རིག་པའི་ངོ་བོ་སྟོང་པ་མེ་ལོང་ལྟ་བུའི་ཡེ་ཤེས་ཡིན་སྙམ་པ་དང་། རང་བྱུང་རྣམ་པར་སྣང་མཛད་ཡབ་ཡུམ་འཁོར་དང་བཅས་པ་འགྲུབ་པར་འགྱུར་རོ། །གསང་བའི་བདག་པོ་དག་སྣང་ཤར་བའི་ཚེ། ཡེ་ཤེས་ལྔར་ཤེས་ཤིང་དྲན་པས་སངས་རྒྱས་ཐོབ་བོ། །ཞེས་གསུངས་པའི་ཕྱིར། འཇའ་འོད་ཐིག་ལེ་ཐིག་ཕྲན་འདི་རྒྱུན་དུ་བལྟས་པས་འཁོར་བར་ཕྱིར་མི་ལྡོག་པར་གསུངས་སོ། །དེ་ཡང་རྒྱུད་ལས། ལུ་གུ་རྒྱུད་ཀྱི་རང་བཞིན་ནི། །རྣམ་པར་དག་པ་ཡེ་དག་པ། །མ་འཁྲུལ་པ་ཡི་སངས་རྒྱས་
སོ། །ཞེས་པས། དེས་ཆོས་ཉིད་མངོན་སུམ་གྱི་སྣང་བ་བསྟན་ནས་དེ་ལྟར་ཉམས་སུ་བླངས་པས། ཉམས་གོང་འཕེལ་གྱི་སྣང་བ་འཆར་ཏེ། །ཐིག་ལེའི་ནང་དུ་སྐུ་རྐྱང་པ་དང་། ཕྱེད་སྐུ་དང་ལྷ་ཡབ་ཡུམ་གྱི་རྣམ་པ་དང་། ལུ་གུ་རྒྱུད་གར་གཏད་དུ་སྡོད་པ་རྣམས་འབྱུང་ངོ་། །དེ་རྣམས་ནི་ཉམས་གོང་དུ་འཕེལ་བའོ། །གཞན་ཡང་ཉམས་སུ་ལེན་ཚུལ་ནི། ཐེར་མ་དང་རྔ་ཡབ་ལ་སོགས་པས། མིག་བཀབ་ནས་བལྟས་པས་ཤིན་ཏུ་ཡང་གསལ་བར་འགྱུར་རོ། །ཞེས་རིག་འཛིན་ཀུ་མཱ་ར་ཛས་གསུངས་སོ། །ཨོ་རྒྱན་རིན་པོ་ཆེས་གསུངས་པའི་ངོ་སྤྲོད་མཐོང་བ་རང་གྲོལ་ལས། གཉིས་པ་ཉམས་གོང་འཕེལ་གྱི་སྣང་བ་ནི། སྣང་ཉམས་དང་ཤེས་ཉམས་གཉིས་ལས། ཤེས་ཉམས་ནི་བདེ་ཉམས་དང་གསལ་ཉམས་སྟོང་ཉམས་ལ་སོགས་པ་སྣ་ཚོགས་སུ་འཆར་ཞིང་མི་བརྟན་པར་འགྱུར་བ་ཡིན་པས། གཙོ་ཆུང་ཞིང་དེར་མ་ཟད། ཕྱག་རྒྱ་ཆེན་པོ་ལ་སོགས་པ་རྣམས་ཀྱང་ཤེས་པའི་ཉམས་ནི་ན་བུན་དང་འདྲ་ཞེས། ཉམས་མཐོ་དམན་ལ་ཡིད་ཆེས་མི་བྱེད་ཅིང་། རྟོགས་པ་མཐོ་དམན་ལ་གཙོ་བོར་བྱེད་པའི་ཕྱིར་རོ། །འདིར་ཡང་རྟོགས་པ་མཐོ་དམན་གྱི་ཚད་
སྣང་ཉམས་ཀྱིས་བཟུང་ཞིང་། སྣང་བ་མི་འགྱུར་བས་སྣང་ཉམས་གཙོ་ཆེའོ། །དེ་ལྟར་སྣང་བ་ཉམས་སུ་བླངས་པས་དབྱིངས་རིག་རེས་གསལ། རེས་མི་གསལ་བར་འབྱུང་ངོ་། །ད་རུང་ཉམས་སུ་བླངས་པས། དབྱིངས་རིག་སྨིན་མཚམས་ལ་འབྲེལ་ཏེ། ཐིག་ལེ་སྟོང་པའི་སྒྲོན་མ་རྩོལ་བ་མེད་པར་འཆར་ནས་འོང་ངོ་། །ཐིག་ལེ་རྣམས་སྲན་མ་ཙམ་དུ་འགྲོ། རིག་པ་ནི་འདབ་ཆགས་འཕུར་སྐྱེན་ཙམ་དུ་འགྲོ། ད་རུང་ཉམས་སུ་བླངས་པས་འོད་ལྔའི་སྣང་བ་དུམ་བུར་སྣང་བ་དང་། གྱེན་འགྲེང་དང་། རྩིབ་ཤར་དང་། མདུང་རྩེ་ལྟ་བུ་དང་། རེ་ལྡེའི་རྣམ་པ་ལྟ་བུ་དང་། གྲུ་ཆད་ཀྱི་རྣམ་པ་ལྟ་བུར་འགྱུར་ཞིང་། འོད་དེ་དག་རང་མདུན་ཙམ་དུ་ཁྱབ་པར་འཆར། ཐིག་ལེ་ཡང་མེ་ལོང་ཙམ་དུ་འགྱུར་ཞིང་རིག་པ་ནི་རི་དྭགས་སྤང་རྩིབ་ལ་རྒྱུག་པ་ཙམ་དུ་འཆར་རོ། །ད་རུང་ཉམས་སུ་བླངས་པས། དབྱིངས་ཀྱི་སྣང་བ་དེ་ལས་རིན་པོ་ཆེའི་དྲྭ་བ་དང་། འོད་ཀྱི་དྲྭ་བ་དང་། དྲྭ་ཕྱེད་དང་། མིག་མང་རིས་ལྟ་བུ་དང་། མིག་ཚག་དང་། མདུང་རྩེ་དང་། མདུང་རྩེ་ལྟ་བུ་དང་། མཆོད་རྟེན་བརྩེགས་པ་ལྟ་བུ་དང་། པདྨ་སྟོང་ལྡན་དང་།
གུར་ཁྱིམ་དང་། ཉི་ཟླ་དང་། མཁར་ཐབ་རིས་དང་། རལ་གྲི་དང་། འཁོར་ལོ་དང་། ཉ་མིག་གི་རྣམ་པ་ལྟ་བུར་འགྱུར་རོ། །འོད་དེ་ཡང་རང་གནས་པའི་ལུང་པ་དེ་གང་བར་འགྱུར་རོ། །ཐིག་ལེ་མཁར་ཕོར་ཙམ་དུ་འགྱུར་ཞིང་། རིག་པ་ནི་བུང་བ་བཅུད་ལ་ལྡིང་བ་ལྟ་བུ་ཙམ་དུ་འགྱུར་རོ། །ད་རུང་ཉམས་སུ་བླངས་པས། འོད་ཀྱིས་ཡུལ་ཁམས་ཙམ་དུ་ཁེང་། ཐིག་ལེ་ཡང་བསྲེ་ཕུབ་ཙམ་དུ་འགྱུར་རོ། །འོད་ཀྱིས་བལྟས་ཚད་ལ་ཁྱབ། དབྱིངས་རིག་ཉིན་མཚན་མེད་པར་འཆར། ཐིག་ལེའི་ནང་དུ་ལྷ་སྐུ་རྐྱང་པ་རེ་རེ་སྣང་། རིག་པའི་བར་དུ་ཡང་སྐུ་ཕྲ་མོ་རེ་རེ་ཡང་འབྱུང་ངོ་། །རིག་པ་འགུལ་འཕྲིག་མེད་པར་སྡོད། དེ་ལྟར་ཤར་བའི་དུས་ན། བར་དོའི་སྣང་བ་ད་ལྟར་གཏན་ལ་ཕབ་པས། ཕྱིས་བར་དོ་མེད་དོ། །དེ་ནི་ཆོས་ཉིད་བར་དོའི་ཉམས་ལེན་དངོས་གཞི་འདི་ཁོ་ནའོ། །ཐུགས་རྗེ་ཆེན་པོའི་དོན་ཏྲིག་ལས། སྤྲུལ་སྐུའི་འདུག་སྟངས་ཀྱིས་གོང་འཕེལ་དུ་བསྒྱུར་བ་ལ། སྤྲུལ་སྐུའི་འདུག་སྟངས་ཀྱིས་སྲོག་རྩོལ་བར་འཛག་ཙཎྜ་ལཱི་བསྒོམ་ཞིང་། ཆོས་ཉིད་རིག་པ་མངོན་སུམ་གྱི་སྣང་བ་དང་མ་བྲལ་བར་བྱས་པས། ཐིག་ལེ་ནག་པོ་གསལ་ལ་
འཚེར་བ། ཉུངས་འབྲུ་ཙམ་ལ་ཕེབས་པའི་འོད་སྣང་ཡིད་ཡུལ་དུ་ཉིན་མཚན་ངེས་མེད་དུ་མཐོང་བར་འགྱུར་རོ། །དེ་ཡང་ཡིད་དཔྱོད་མ་ཡིན་མངོན་སུམ་དུ་སྣང་བ། ཡོད་པ་མ་ཡིན་ཕྱི་རོལ་ཏུ་སྤུ་ཙམ་ཡང་མེད་པ། རླུང་གི་སྟོབས་ཀྱིས་འཕེལ་འགྲིབ་བྱུང་ཡང་། དོན་ལ་འཕེལ་འགྲིབ་མེད་པར་ཡེ་ཤེས་ཀྱི་རང་མདངས་འོད་ལྔ་ཤར་ཏེ། དེ་ལ་འོད་ཁ་དོག་ལྔ་གྱེན་ལ་འགྲེང་བ། རྩིབ་ལ་ཤར་བ། རེ་ལྡེ་དང་། གྲུ་ཆད་དང་། ཡུལ་གྲུ་ཙམ་ལ་སོགས་པ་དབྱིབས་ཅན་མཆོད་རྟེན་དང་། པདྨ་སྟོང་ལྡན་དང་། །གུར་ཁྱིམ་དང་། མིག་མང་རིས་དང་། ལྷ་ཁང་དང་། མིག་ཚག་དང་། དྲྭ་བ་དྲྭ་ཕྱེད་ལ་སོགས་པ་མ་ངེས་པ་འབྱུང་ངོ་། །ཞེས་དང་། ཐལ་འགྱུར་ལས། ཉམས་ཀྱི་སྣང་བ་གོང་འཕེལ་ནི། །ཡེ་ཤེས་ཁ་དོག་དབྱིབས་འབྱུང་ལས། །གྱེན་འགྲེང་དང་ནི་རྩིབ་ཤར་དང་། །ཐིག་ལེ་སྣ་ཚོགས་སྐུ་གཉིས་དང་། །རིག་པ་སྣང་བའི་ཡུལ་ལ་གསལ། ཞེས་དང་། འདས་རྗེས་ལས། ཉམས་སྣང་གོང་དུ་འཕེལ་བ་ཡི། །བར་དོའི་ཡེ་ཤེས་མངོན་དུ་བྱས། །ཞེས་གསུངས་སོ། །བར་དོ་དུས་ཀྱི་སྒྲོན་མ་ནི། དཔེ་ཇི་འདྲ་ན།
སྔར་འདྲིས་ཀྱི་མི་དང་འཕྲད་པ་ལྟ་བུའོ། །དཔེ་ཇི་བཞིན་དུ་འོད་གསལ་ཆོས་ཉིད་མངོན་སུམ་པོ་དེ་ལ། གོམས་འདྲིས་མཐར་ཕྱིན་ནས་ཉམས་སྣང་གོང་དུ་འཕེལ་ཏེ། རིག་པ་ཚད་ལ་ཕེབ་ཕྱིར་ཆོས་ཉིད་བར་དོའི་ཡེ་ཤེས་མངོན་དུ་གྱུར་ནས་ཡིད་ཆེས་ཏེ། རང་སྣང་སངས་རྒྱས་ཀྱི་ཞིང་ཁམས་སུ་འོད་གསལ་གྱི་ངང་ལ་སངས་རྒྱས་པ་ཡིན་ཏེ། གང་ལ་གང་འདུལ་གྱི་འགྲོ་བའི་དོན་འབྱུང་ངོ་། །ཞེས་གསུངས་སོ། །མཁའ་འགྲོ་སྙིང་ཐིག་གི་ཁྲིད་ཡིག་རིན་ཆེན་སྤུངས་པ་ལས། དེ་ནས་ཉམས་སུ་བླངས་པས། རིག་པ་ཚད་ལ་ཕེབས་པའི་སྣང་བ་འཆར་རོ། །ཐིག་ལེ་རེ་རེའི་ནང་དུ་རིགས་ལྔ་ཡབ་ཡུམ་གྱི་ཚོམ་བུ་རྫོགས་པ་དང་། སྟོང་གསུམ་ཐམས་ཅད་ལུ་གུ་རྒྱུད་ཁྲ་ཤིག་ཤིག་པ་དང་། རང་སྣང་རིག་པའི་འཆར་ཚུལ་ལ་དབང་ཐོབ་པའོ། །ཞེས་དང་། ངོ་སྤྱོད་མཐོང་བ་རང་གྲོལ་ལས། གསུམ་པ་རིག་པ་ཚད་ཕེབས་ཀྱི་སྣང་བ་ནི། དེ་ནས་ཡང་ཉམས་སུ་བླངས་པས། གོང་གི་ཐིག་ལེ་རེ་རེའི་ནང་དུ་སྐུ་ཡབ་ཡུམ་ལྔ་ལྔར་འཆར། དེ་དག་ཀྱང་གྲངས་ལས་འདས་པ་ལས། འགྱུར་བ་མེད་པའི་བྲེ་ཚད་སྲང་ཚད་ལ་འཕེལ་བ་ལྟར་ཚད་ལ་ཕེབས། དེ་ནས་མ་བསྒོམས་
ཀྱང་ཆོག་པའོ། །དེ་ཙམ་ནས་ལུས་འོད་གསལ་དུ་གྲོལ། འབྱུང་བ་རང་དག་ཏུ་སོང་བས། གདོས་བཅས་ཀྱི་ཕུང་པོ་རང་སར་གྲོལ་ཏེ། སྣང་བ་རང་བཞིན་མ་གྲུབ་པར་ལོངས་སྤྱོད་རྫོགས་པའི་སྐུར་རང་གྲོལ་ཏེ། ལོངས་སྤྱོད་རྫོགས་པའི་སྐུ་རྗེན་པར་ངོས་ཟིན་པས། སྐུའི་འཛིན་པ་རང་སར་གྲོལ་བའོ། །ཞེས་དང་། ཐུགས་རྗེ་ཆེན་པོའི་དོན་ཊཱིཀ་ལས། ལོངས་སྐུའི་འདུག་སྟངས་ཀྱིས་ཚད་ཕེབས་སུ་བསྒྱུར་བ་ནི། ལོངས་སྐུའི་འདུག་སྟངས་ཀྱིས་ལས་ཀྱི་ཕྱག་རྒྱའམ། །འོད་ཀྱི་ཕྱག་རྒྱུའམ། ཡེ་ཤེས་ཀྱི་ཕྱག་རྒྱ་བསྟེན་ཅིང་གོང་འཕེལ་གྱི་ཞིང་ཁམས་དང་མ་བྲལ་བར་ཉམས་སུ་བླངས་ན་ལས་རླུང་ཡེ་ཤེས་ཀྱི་རླུང་དུ་འགྱུར་ཞིང་། དབུ་མར་ཚུད་ཅིང་རྟོག་པ་འགྱུ་བའི་ལམ་འཁྲུལ་པའི་རྩ་མིག་ཐམས་ཅད་བྱང་ཆུབ་སེམས་ཀྱི་ཐིག་ལེས་གང་བས། སྔགས་ཀྱི་ཡོན་ཏན་བྱིན་རླབས་ལ་རང་དབང་ཐོབ་པ། སྤྱན་དང་མངོན་ཤེས་དང་། མཆོག་ཐུན་མོང་གི་དངོས་གྲུབ་བརྙེས་ཤིང་སྟོང་གསུམ་གསལ་བ་དང་། ཉམས་ཀྱི་འོད་དྲུག་ལ་ལོངས་སྤྱོད་དེ། སྣང་སྲིད་ཐིག་ལེས་གང་བའི་ཐིག་ལེ་རེ་རེའི་ནང་དུ་རིག་པའི་ཡེ་ཤེས་ཀྱི་སྐུ་ལྔ་ལྔར་འཆར་བར་འགྱུར་
རོ། །ཞེས་དང་། ཐལ་འགྱུར་ལས། རིག་པ་ཚད་ཕེབས་སྣང་བ་ལ། །ལོངས་སྐུ་མཚན་དཔེ་སྣང་བ་ནི། །མ་ངེས་ཁ་དོག་འཇའ་ཚོན་ལས། །རིགས་ལྔ་ཡབ་དང་ཡུམ་དུ་སྣང་། །དེ་ནཱས་ལྔ་ལྔ་ཟུང་དུ་བཅས། །རབ་ཏུ་གསལ་བའི་ཐིག་ལེ་འབྲེལ། །ཡབ་ཡུམ་སྐུ་ཡི་སྣང་བ་ཅན། །འཁྲུལ་སྣང་ཟད་ནས་སངས་རྒྱས་སོ། །ཞེས་དང་། འདས་རྗེས་ལས། རིག་པ་ཚད་ཕེབས་སྣང་བ་ཡི། །ལོངས་སྤྱོད་རྫོགས་པའི་སྐུ་ངོས་ཟིན། །ཞེས་གསུངས། འདི་ལྟ་བུ་རྟོགས་ན་བར་དོ་མེད་པར་གསུངས་ཏེ། ཐུགས་རྗེ་ཆེན་པོ་ཡེ་ཤེས་འོད་མཆོག་གསང་ལམ་ངོ་སྤྲོད་ཀྱི་རྒྱུད་ལས། འཆི་ཁ་དབུགས་འགྲོ་དུས་ཐ་མ་ཧ་ཟེར་ནས་ཧ་ཚུར་ལ་མ་འདུས་པའི་ཚེ། རང་གི་མདུན་གྱི་ནམ་མཁའ་ལ་ཡེ་ཤེས་ཀྱི་མཐོང་ཞེས་བྱ་བ། འོད་ཁ་དོག་ལྔ་ལྡན་བཀྲག་ལམ་མེར་རང་ལ་སྣང་ངོ་། །དེ་ངོ་ཤེས་པས་ལྕགས་ལ་གསེར་འགྱུར་གྱི་རྩི་བཏང་བ་ལྟ་བུའམ། མུན་ཁང་དུ་སྒྲོན་མེ་བཏེག་པ་ལྟར་ཡར་གྱི་ཟང་ཐལ་དུ་སྐད་ཅིག་མ་ལ་གྲོལ། རིགས་ཀྱི་བུ་རང་དབུགས་དང་མ་བྲལ་གྱི་བར་ལ་རྡོ་རྗེ་སེམས་དཔའི་སྣ་ཐག་ཅེས་བྱའོ། །ཐུགས་རྗེ་རྒྱུན་གྱི་ཐག་པ་ཞེས་ཀྱང་བྱའོ། །རང་
གི་མིག་ནས་མདུན་གྱི་ནམ་མཁའ་ལ་འོད་ཁ་དོག་སྣ་ལྔ་ཐག་པ་བརྐྱང་བའམ། སྐས་བཙུགས་པ་ལྟར་སྣང་ངོ་། །དེའི་དུས་སུ་རིག་པ་མིག་ལ་གཏད་དེ། མིག་ཐུགས་རྗེ་རྒྱུན་ཆད་མེད་པའི་ཐག་པ་ལ་གཏད་པས། ཡར་གྱི་ཟང་ཐལ་ལས་གྲོལ། ཡང་ན་ཐུགས་རྗེའི་ཐག་པ་དེ་ནི་ཁ་དོག་ལྔར་ཤར་བའི་ཚེ། ཡེ་ཤེས་དེར་ཤེས་པས་ཡེ་ཤེས་ལྔ་ལྡན་གྱི་དཀྱིལ་འཁོར་ཐོབ་ནས་དབུགས་མེད་པར་སངས་རྒྱའོ། །གསང་བའི་བདག་པོ་ཕྱི་ནང་གསང་བའི་དབང་རྫོགས་པ་ལ་སྟོན་ཅིག །ཅེས་བཀའ་སྩལ་ཏེ། རྫོགས་ཆེན་རིན་ཆེན་སྤུངས་པ་ལས། དེ་ནས་ཆོས་ཉིད་ཟད་པའི་སྣང་བ་འཆར་ཏེ། ཉམས་ཀྱི་འཕེལ་དེ་རྣམས་ཐམས་ཅད་ཟད་ནས། སྐུ་གསུམ་གྱི་འཛིན་པ་རང་སར་སྟོང་སྟེ། རིག་པ་གཞི་ཐོག་ཏུ་ལྷང་ངེར་ཕེབས་ནས། བསྒོམ་བྱ་སྒོམ་བྱེད་ཀྱི་འཛིན་པ་རང་སར་གྲོལ་ཏེ། མ་རིག་པའི་འཁྲུལ་པ་རྩ་བ་ནས་དག་ནས། ཀ་དག་ཀུན་ཏུ་བཟང་པོའི་དགོངས་པ་ལ་སླེབ་པའོ། །ཞེས་དང་། ཐུགས་རྗེ་ཆེན་པོའི་དོན་ཊིཀ་ལས། ཆོས་རྣམས་ཟད་པའི་སྣང་བ་ནི། འདུག་སྟངས་གསུམ་པོ་གང་བདེར་བྱ་སྟེ། མ་བཅོས་བློ་འདས་ཀྱི་ངང་ལ་སྐུ་དང་
ཐིག་ལེ་ལ་བདག་གཞན་གྱི་འཛིན་པ་མ་ཞུགས་པར་ཉམས་སུ་བླངས་ནས། ཡེ་ནས་འཁྲུལ་མ་མྱོང་བར་རྟོགས་པས་འཁོར་བ་ལ་ཡ་མི་ང་བར། སངས་རྒྱས་རང་ལ་ཡོད་པས་སངས་རྒྱས་ལ་རེ་ལྟོས་མེད་པ། སྐུ་གསུམ་རང་ལ་ཚང་ཞིང་རང་གཞན་གཉིས་མེད་མཐའ་བྲལ་གྱི་ངང་དུ་སངས་རྒྱས་ཀྱི་ཡོན་ཏན་མ་ལུས་པར་རྫོགས་ཤིང་། ལུས་འབྱུང་བའི་བག་ཆགས་ཟད་ནས། དྭངས་མ་འོད་ལྔ་ཡལ། ངག་བརྗོད་པ་སྨྲ་ཚིག་ཟད་ནས་སྨྲ་བསམ་བརྗོད་མེད་དུ་ཡལ། །སེམས་བློ་ཟད་ཆོས་ཟད་ནས་བློ་འདས་ཀ་དག་ཏུ་ཡལ། དེ་ཉིད་ཆོས་སྐུར་སངས་རྒྱས་སོ། །ཞེས་དང་། ངོ་སྤྲོད་མཐོང་བ་རང་གྲོལ་ལས། བཞི་པ་ཆོས་ཉིད་ཟད་པའི་སྣང་བ་ནི། དེ་ཡང་གོང་གི་ཉམས་དེ་རྣམས་ཀྱི་འཕེལ་བ་ཟད་དེ། སྣང་བའི་ཉམས་དེ་དག་ལ་སྣང་དང་མི་སྣང་དུ་འཛིན་པའི་ངོ་བོ་མེད་དོ། །དེའི་ཚེ་ཆོས་ཉིད་ཟད་པའི་སྣང་བ་ཞེས་ཐ་སྙད་དུ་བཏགས་པའོ། །ཉམས་ཟད་གདོས་བཅས་ཀྱི་ལུས་ཟད། དབང་པོའི་འཛིན་པ་ཟད། འཁྲུལ་པའི་རྟོག་པ་ཟད། གྲུབ་མཐའ་དང་འཁྲུལ་སྣང་ཐམས་ཅད་ཟད། ཟག་བཅས་ཀྱི་ཕུང་པོ་མི་སྣང་བར་སངས་རྒྱས་པ་ཡིན་ཏེ། ཆོས་ཉིད་ཟད་
པ་ཞེས་བྱ་བ། ཆོས་དང་འཁྲུལ་སྣང་དང་ཉམས་སྣང་གི་འཕེལ་ཟད་པའི་ཕྱིར། ཆོས་ཉིད་ཟད་ཅེས་མིང་དུ་བཏག་པ་ལ། ཅི་ཡང་མེད་པར་ཟད་ནས། ཆད་ལྟ་ལྟ་བུ་མེད་པ་ནི་མ་ཡིན་ཏེ། མཁྱེན་པའི་ཡེ་ཤེས་དང་། ཡོན་ཏན་ནི་བརྗོད་ཀྱིས་མི་ལོང་བ་ལྟ་བུར་མངོན་དུ་འགྱུར་ཏེ། མདོར་ན་སྐུ་གསུམ་ཡོན་ཏན་རྩལ་རྫོགས་ཟིན་པའོ། །ཞེས་དང་། ཐལ་འགྱུར་ལས། ཆོས་ཉིད་ཟད་པའི་སྣང་བ་ནི། །ཉམས་ཀྱི་སྣང་བ་སྟོང་པས་ན། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་པ་རང་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་དང་། དེ་ལྟར་ལུས་རྒྱུན་ཆད་ནས། ཟག་བཅས་ཀྱི་ཕུང་པོ་མི་སྣང་བར། འདི་ལ་མངོན་པར་སངས་རྒྱས་སོ། །ཞེས་གསུངས་སོ། །འདས་རྗེས་ལས། ཆོས་ཉིད་ཟད་པའི་སྣང་བ་ཡིས། །རྫོགས་ཆེན་བྱ་བྲལ་འབྲས་བུ་ཐོབ། །འདི་ལྟར་གཞི་ལམ་མཐར་ཕྱིན་ནས། །མྱང་འདས་གཞན་ནས་ཤོས་བཙལ་དུ་མེད། །ཅེས་གསུངས་པས། རབ་འཕོ་བ་ཆེན་པོའི་སྐུ་ཐོབ་པས་སྐྱེ་ཤི་དང་འདས་གྲོངས་མེད་པར་ཨོ་རྒྱན་དང་བི་མ་ལ་ལྟ་བུའམ། ཟག་བཅས་ཀྱི་ཕུང་པོ་འོད་ཕུང་དུ་
ཡལ་བ་དགའ་རབ་རྡོ་རྗེ་དང་ཤྲཱི་སེང་ཧ་ལྟ་བུ་སྟེ། དོན་ཊིཀ་ལས། ཡང་དག་པར་རྫོགས་པའི་སངས་རྒྱས་ནི། ཕུང་པོ་ལྷག་མ་མེད་པར་སངས་རྒྱས་པའོ།། །གསུངས་སོ། །འབྲིང་ནི་ཚེ་འདིར་ས་བཅུ་ནོན་ཏེ། རིག་པ་རང་ཤར་གྱི་རྒྱུད་ལས། ས་ཞེས་བྱ་བ་གུད་ན་ཡོད་པ་མ་ཡིན་ནོ། །བདེན་པ་མཐོང་བའི་གང་ཟག་གཅིག་ལ་ས་རྣམས་རྫོགས་ནས་ཡོད་དོ། །ཞེས་ས་བཅུ་ཐོབ་ཚུལ་རྒྱས་པར་གསུངས་ནས། དེ་ནི་གང་ཟག་བདེན་པ་མཐོང་བའི་སྒྲུབ་འདི་ཉིད་མ་བོར་ལ་ནོན་པའོ། །གང་ཟག་སྦྱབ་བོར་བ་རྣམས་ཀྱིས་ནི་ས་འདི་ལྟར་ནོན་པ་ཡིན་ནོ། །ཞེས་ས་བཅུ་དྲུག་ནོན་ཚུལ་རྒྱས་པར་གསུངས་སོ། །དེ་ལ་ས་བཅུའི་མིང་ནི་སྤྱི་མིང་དང་འདྲ་ལ། གཞན་རྣམས་གོ་རིམ་ཅུང་ཟད་དཀྲུགས་ནས་གསུངས་པས་འདྲ་མིན་མང་དུ་སྣང་ཡང་བཅུ་གཅིག་ཀུན་ཏུ་འོད། བཅུ་གཉིས་མ་ཆགས་པདྨ་སྤྱན། བཅུ་གསུམ་རྡོ་རྗེ་འཛིན། བཅུ་བཞི་འཁོར་ལོ་ཚོགས་ཆེན། བཅོ་ལྔ་བཀོད་པ་རབ་རྫོགས། བཅུ་དྲུག་ཡེ་ཤེས་བླ་མ། དྷེ་ཝ་ཀོ་ཤ། བདེ་བ་ཅན། ཐར་པ་ཆེན་པོའི་གྲོང་རྣམས་དོན་གཅིག །བཅུ་བདུན་རྡོ་རྗེ་འཛིན་པའི་མིང་འཛིན། བཅོ་བརྒྱད་ལྕང་ལོ་
ཅན། བཅུ་དགུ་རྫོགས་པ་བླ་མེད་དམ་བླ་མ། ཉི་ཤུ་སྲིད་གསུམ་ངང་རྫོགས། ཉེར་གཅིག་བྱ་རྩལ་གཉིས་སམ། རྩོད་བྲལ་ཐིག་ལེའི་ས་སྟེ། མཐར་ཐུག་པའོ། །ཨོ་རྒྱན་རིན་པོ་ཆེའི་ཞལ་ནས། རྫོགས་པ་ཆེན་པོ་མཐར་ཕྱིན་པའི་ལམ་ཡིན་ཏེ། དེ་ནི་མྱ་ངན་ལས་འདས་པའི་ཆོས་དང་། གཞན་ནས་བཙལ་རྒྱུ་མེད་དེ། མཐར་ཐུག་པའོ། །ཐེག་པ་འོག་མའི་མཐར་ཕྱིན་པའི་ལམ་ཐོབ་ཀྱང་། སྔགས་ཀྱི་ཡོན་ཏན་སྒོ་མ་མཐོང་ན། དེ་ནས་སྔགས་ལ་འཇུག་ཅིང་། ཐོས་བསམ་སྦྱང་དགོས་པའི་ཕྱིར། མདོས་མཐར་ཕྱིན་ཀྱང་སྔགས་ཀྱིས་མཐར་མ་ཕྱིན་པའི་ཕྱིར་རོ། །འདི་ནི་ལམ་ཐམས་ཅད་ཀྱི་མཐར་ཕྱིན་པའོ། །དེ་ནས་ཡར་ཕུལ་ས་མེད་པས། ས་རྫོགས་ལམ་རྫོགས། དེ་ལས་ཡར་ཆེ་བ་གཞན་མེད་པས། རྫོགས་པ་ཆེན་པོ་ཞེས་མིང་དུ་བཏགས་པའོ། །ཞེས་གསུངས། རཏྣའི་ཀློང་གསལ་གྱི་ཁྲིད་ཡིག་ཡིད་བཞིན་ནོར་བུ་ལས། རབ་ཟག་བཅས་ཡོངས་ཀྱི་ཕུང་པོ་འོད་གསལ་ཏུ་གྲོལ། །འབྲིང་ཆོས་ཉིད་བར་དོར་སངས་རྒྱས། ཐ་མ་སྤྲུལ་སྐུའི་ཞིང་ཁམས་ལྟར་བརྫུས་ཏེ་སྐྱེས་ནས་བར་དོ་མེད་པར་སངས་རྒྱས་སོ། །ཞེས་
གསུངས། །དོན་ཊིཀ་ལས། མངོན་པར་རྫོགས་པར་སངས་རྒྱས་པ་ནི།། ནམ་མཁའ་གཡའ་དག་པ་དང་། འཇའ་དང་མེ་ཏོག་གི་ཆར་དང་། ས་གཡོས་དང་། སྒྲ་དང་། དྲི་ཞིམ་པོ་དང་། གདུང་དང་། སྐུ་གསུང་ཐུགས་རང་བྱུང་། རིང་བསྲེལ་ལ་སོགས་པ་མངོན་པར་བསྟན་ནས་སངས་རྒྱས་པའོ། །ཞེས་གསུངས། དེ་དག་གིས་དོན། །འདས་རྗེས་ལས། ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འདས་པའི་ཚིག་ལས་འདས། །ཉམས་སྣང་གོང་དུ་འཕེལ་བ་ཡིས། །བར་དོའི་ཡེ་ཤེས་མངོན་དུ་བྱས། །རིག་པ་ཚད་ཕེབས་སྣང་བ་ཡིས། །ལོངས་སྤྱོད་རྫོགས་པའི་སྐུ་ངོས་ཟིན། །ཆོས་ཉིད་ཟད་པའི་སྣང་བ་ཡིས། །རྫོགས་ཆེན་བྱ་བྲལ་འབྲས་བུ་ཐོབ། །འདི་ལྟར་གཞི་ལམ་མཐར་ཕྱིན་ནས། །མྱ་ངན་འདའ་བར་ཐེ་ཚོམ་མེད། །ཅེས་དང་། ཐལ་འགྱུར་ལས། དེ་ལ་སྣང་བ་བཞིར་འགྱུར་ཏེ། །ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ཚིག་ལས་འདས། །གོང་དུ་འཕེལ་བའི་ཉམས་སྣང་གིས། །འཁྲུལ་པའི་སྣང་བ་ནུབ་པར་བྱེད། །རིག་པ་ཚད་ཕེབས་སྣང་བ་ཡིས། །སྐུ་གསུམ་རྟོགས་པའི་ལམ་སྣང་
འདས། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ལམ་བཅད། །ཅེས་གསུངས་པས། རབ་ཕུང་པོ་ལྷག་མེད་དུ་སངས་རྒྱུ་བའམ། ཕུང་པོ་ལྷག་མ་དང་བཅས་ཏེ་སངས་རྒྱ། འབྲིང་བར་དོར་སངས་རྒྱ་སྟེ་ས་བཅུ་དྲུག་ནོན། ཐ་མ་སྤྲུལ་སྐུའི་ཞིང་ཁམས་སུ་དབུགས་ཕྱུང་སྟེ། དག་པའི་ཞིང་ཁམས་ལྔར་ལོ་བརྒྱ་དང་ཉི་ཤུ་རེ་གནས་ནས། རྒྱལ་བ་རིགས་ལྔ་ལས་དབང་དང་བྱིན་རླབས་ལུང་བསྟན་ཐོབ་ནས་ལོ་ལྔ་བརྒྱ་ནས། སྟེང་ཕྱོགས་མེ་རི་འབར་བའི་ཞིང་ཁམས་སུ་ཕྱིན་པས། ཆེ་མཆོག་ཧེ་རུ་ཀ་ཞལ་མཐོང་མ་ཐག་ཏུ་ཀུན་ཏུ་བཟང་པོ་དང་དབྱེར་མེད་པར། གཞོན་ནུའི་བུམ་སྐུའི་ཀློང་དུ་སངས་རྒྱས་པར་གྱུར་ཏེ། ཀུན་ཟླུམ་ཐིག་ལེའམ་རྩོད་བྲལ་ཐིག་ལེའི་ས་ཡང་དེ་ཉིད་ཡིན་ཏེ། དོན་ལ་ཆོས་སྐུ་ཉག་གཅིག་ཡིན་པར་གསུངས་སོ། །དེ་ནི་རྫོགས་པ་ཆེན་པོ་ཐོད་རྒལ་གྱི་ལམ་བགྲོད་ཚུལ་མདོར་བསྡུས་ཚང་བ་སྟེ། རྒྱས་པར་ཤེས་འདོད་ན། རྒྱུད་བཅུ་བདུན་དང་། མཛོད་བདུན་ལ་སོགས་པ་རྣམས་ལ་ལྟ་བར་མཛོད་ཅིག །ཚར་རོ།། །།
༼ལ༽ །ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་འཕོ་བ་ལམ་གྱི་གདམས་པ་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། །འདི་བསྒོམས་པས་ཉམས་ལེན་མཐར་མ་ཕྱིན་པར་འཆི་བའི་དུས་བྱུང་ན། འཕོ་བ་ལམ་གྱི་སྐྱེལ་མ་འདི་བསྒོམ། ཉམས་ལེན་མེད་པ་གཅིག་ཡིན་ཀྱང་ཕན་ཏེ།། ཐུགས་རྗེ་ཆེན་པོའི་དམར་ཁྲིད་དཔལ་མོ་ལུགས། ཟླ་བ་རྒྱལ་མཚན་གྱི་ལུགས། ཚེམ་བུ་ལུགས་གསུམ་ཀ་ནས། མ་བསྒོམ་སངས་རྒྱས་འཕོ་བའི་གདམས་ངག །ཅེས་གསུངས། དེ་ཡང་དཔལ་ཀུན་བཟང་དགོངས་པ་ཀུན་འདུས་རྒྱུད་ལས། འཆི་རྟགས་མ་བྱུང་བཏབ་གྱུར་ན། །ལྷ་བསད་ཉེས་པ་ཤིན་ཏུ་ཆེ། །
སྐྱེ་བ་ལྔ་བརྒྱར་མི་ལུས་སྒྲིབ། །ཅེས་གསུངས་པས། མོ་རྩིས་རྨི་ལམ་གྱི་རྟེན་འབྲེལ་ངན་པ་དང་། སྤྱོད་གཤིས་སྔར་ལས་འགྱུར་བ་དང་། རླུང་གཡས་གཡོན་གང་རུང་ནས་ཟླ་ཕྱེད་ཡན་ཆད་རྒྱུ་བ་དང་། ནམ་མཁའི་ཚེ་གཟུགས་མེད་པའམ་མགོ་ཐུར་རམ། གྲུ་གསུམ་དང་བསྡུམ་ར་འཆར་བ་མིག་གི་འོད་སྐོར་དང་། རྣ་བའི་འབྲུག་སྒྲ་མེད་པ་སོགས། རྒྱས་པར་གཞན་ནས་འབྱུང་བ་ལྟར་བརྟགེ །མི་ཤེས་ན་ཡང་ལྷ་རྗེས་རྩ་ཆུ་ངན་པ་དང་། ནད་ཡུན་རིང་ཞིང་ལུས་ཉམས་ངན་པ་སོགས་བྱུང་ན། འཆི་བསླུའི་རིགས་རྣམས་གང་ཤེས་ལན་གསུམ་བྱ། མི་
ཤེས་ནི་ཡང་རིམ་གྲོ་ཅི་འགྲུབ་ལ་འབད། དེས་ཀྱང་མ་ཕན་འཆི་ངེས་པར་གྱུར་ན། ཐུགས་དམ་མི་ཟིན་དོགས་པའམ། ཟིན་ཀྱང་རོ་བདག་མེད་ཡིན་ན་འཕོ་བ་བསྒོམ་པར་བྱ་སྟེ། དེ་ཡང་འཕོ་བའམ་ཐུགས་དམ་གང་བྱེད་ཀྱང་ཚིགས་ཞེན་མེད་པ་གལ་ཆེ་སྟེ། རྫོགས་ཆེན་རྒྱུད་རྣམས་ལས། ཀྱེ་མ་བདག་ལ་འཆི་ཁ་བར་དོ་འཆར་དུས་འདིར། །ཀུན་ལ་ཆགས་སེམས་ཞེན་འཛིན་སྤངས་བྱས་ནས། །གདམས་ངག་གསལ་བའི་ངང་དུ་མ་ཡེངས་འཇུག །རང་རིག་སྐྱེ་མེད་ནམ་མཁའི་དབྱིངས་སུ་འཕོ། །འདུས་བྱས་ཤ་ཁྲག་ལུས་དང་བྲལ་ལ་ཁད། །མི་རྟག་སྒྱུ་མ་ཡིན་པར་ཤེས་པར་བྱ། །ཞེས་གསུངས་པས། མདུན་གྱི་ནམ་མཁར་བླ་མ་ཡི་དམ་ཐམས་ཅད་སྐྱབས་འགྲོའི་དུས་ལྟར་གསལ་བཏབ། རང་གི་ལུས་ལོངས་སྤྱོད་སྦྲ་གུར་ཁང་པ་ས་ཞིང་ནོར་རྫ་ས་ཉེ་དུ་སོགས་ཆགས་ཞེན་སྐྱེ་བའི་ཡུལ་ཐམས་ཅད་མཎྜལ་གཅིག་ཏུ་བསྡུས་ཏེ། བླ་མ་དཀོན་མཆོག་ལ་ཞེ་ཐག་པ་ནས་ལན་གསུམ་འབུལ་བར་དམིགས་ཏེ། ས་གཞི་སྤོས་བྱུག་མ་ཚར་གསུམ་འདོན། དེ་ནས་འབུལ་བ་ཚར་བའི་ཡོན་བདག་ལྟར་སུས་ཁྱེར་སུས་ཟོས་ཀྱི་བདག་པོ་མེད་པར་བློས་བཅད། དེ་ནས་འཕོ་
བའམ་ཐུགས་དམ་གང་བྱེད་ལ་རིག་པ་གཏད་དེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། འཕོ་བའི་དོན་མཁས་སྦྱངས་ལྡན་པས། །འཆི་རྟགས་ནང་མཆེད་ཉེར་ཐོབ་དང་། །ལྷན་སྐྱེས་འོད་གསལ་ལ་གོམས་པས། །སྐུ་གསུང་ཐུགས་ཀྱི་སྒོ་ནས་འཕོ། །ཞེས་དང་། མཁའ་འགྲོ་མ་ཀུན་ཏུ་རྟོགས་པའི་རྒྱུད་ལས། རྣམ་ཤེས་ལ་ཞོན་ནས་ནི། །འོག་གི་ལམ་ནས་འཕོས་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་དག་ཏུ་སྐྱེ་བར་འགྱུར། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །རྣམ་ཤེས་རླུང་ལ་ཞོན་ནས་ནི། །སྟེང་གི་ལམ་ནས་འཕོས་གྱུར་ན། །སྡིག་ལ་གོམས་པའི་གང་ཟག་ཀྱང་། །མཐོ་རིས་གནས་སུ་སྐྱེ་བར་འགྱུར། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་། ཀུན་བཟང་དགོངས་པ་ཀུན་འདུས་རྒྱུད་ལས། དེ་ལྟར་འཕོས་པས་ཕྱིར་མི་ལྡོག བར་དོའི་སྔངས་སྐྲག་མི་འབྱུང་ཞིང་། །མངོན་པར་རྫོགས་པར་སངས་རྒྱས་འགྱུར། །ཞེས་གསུངས་པའི་དོན། འཕོ་བ་འདིའི་བཤད་པ་རྒྱས་པ་དང་། དམིགས་རིམ་
མི་འདྲ་བ་དུ་མ་ཡོད་དེ། འཕོ་བ་འདི་གྲགས་ཆེ་ཞིང་ཀུན་གྱིས་ཤེས་པས། འདིར་རྒྱས་པར་བཤད་མི་དགོས། ཐུགས་རྗེ་ཆེན་པོའི་དམར་ཁྲིད་ཚེམ་བུ་ལུགས། ཟླ་བ་རྒྱལ་མཚན་གྱི་ལུགས། དཔལ་མོ་ལུགས་གསུམ་གྱི་དོན་བསྡུས། སངས་རྒྱས་སྣང་བ་མཐའ་ཡས་ཀྱིས་སློབ་དཔོན་པདྨ་ལ་གདམས་པ། བདེ་ཆེན་ཡེ་ཤེས་ཀྱི་འཕོ་བ་འཁོར་བ་དོང་སྤྲུགས་ཀྱི་གདམས་ངག །གྲུབ་ཆེན་ཀརྨ་པཀྵིའི་ཁྱད་ཆོས། ཀརྨ་པཀིས་ཞལ་ནས། ཁྲོམ་ཆོས་ནམ་བྱེད་གོ་ཅོག་ཀྱང་གདམས་ངག་འདི་སྤྱོད་པར་བྱའོ། །གཞན་གྱི་ཤི་ཆོས་བྱེད་ན་ཡང་འདི་ཀུན་གྱིས་སྐད་ཆེན་པོར་བསྒྲང་ནས་འཕོ་བ་བཏབ་ན་སྐད་ཅིག་ཉིད་ལ་སངས་རྒྱས་པར་འགྱུར་རོ། །འཕོ་བ་འདི་མི་ཀུན་ལ་བསྟན་ན་ཕྲིན་ལས་ཤིན་ཏུ་ཆེ་བར་གསུངས་པ་ཡིན་ནོ། །རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ་སྐུ་ལུས་ཀྱི་ནང་སྟོང་སང་ངེ་བ་བསྒོམ། འོག་སྒོ་དང་གསང་གནས་དང་། ཁ་དང་། ལྟེ་བ་དང་། སྣ་བུག་གཉིས། རྣ་བ་གཉིས། སྨིན་མཚམས། ཚངས་སྨེ་རྣམས་ཡིག་དམར་པོ་རེ་རེས་བཀག་པར་བསྒོམ། རང་གི་ལུས་ཀྱི་དབུས་སུ་རྩ་དབུ་མ་ཕྱི་དཀར་
ལ་ནང་དམར་བ་ཡར་སྣེ་ཚངས་བུག་ཏུ་རག་དུང་གི་ཁ་ལྟར་ཧད་པོར་ཡོད་པ། མར་སྣེ་ལྟེ་འོག་སུམ་མདོར་ཕཊ་ཀྱིས་བཀག་ནས་ཕུག་རྡུགས་སུ་ཡོད་པ། རང་གི་སྙིང་ཁར་པདྨ་དང་ཟླ་བའི་གདན་ལ་རང་གི་རླུང་སེམས་རྣམ་པར་ཤེས་པའི་ངོ་བོ། སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་བཞི་པ་ཚོན་གང་པ་སྐུ་ཆུང་ལ་ཡན་ལག་དོད་པ་བཀྲག་མདངས་གཟི་བརྗིད་དང་ལྡན་པ་ཞིག་བསྒོམ། རང་གི་སྤྱི་བོར་མཐོ་གང་ཙམ་དུ་པདྨ་དམར་པོ་འདབ་མ་སྟོང་ལྡན་དང་ཟླ་བའི་དཀྱིལ་འཁོར་ཉ་རྒྱས་པའི་སྟེང་དུ། རྩ་བ་དང་བརྒྱུད་པའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་གཅིག་ཏུ་བསྡུས་པའི་ངོ་བོ་སངས་རྒྱས་འོད་དཔག་ཏུ་མེད་པ་སྐུ་མདོག་པདྨ་རཱ་ག་ལྟར་དམར་བ་ཞལ་གཅིག་ཕྱག་གཉིས་མཉམ་བཞག་གི་སྟེང་ན་བདུད་རྩིས་བཀང་བའི་ལྷུང་བཟེད་བསྣམས་པ། དབུ་གཙུག་ཏོར་ཞབས་འཁོར་ལོ་སོགས་མཚན་དང་དཔེ་བྱད་ཀྱིས་བརྒྱན་ཅིང་། ཆོས་གོས་རྣམ་གསུམ་གསོལ་ཞིང་རྡོ་རྗེའི་སྐྱིལ་ཀྲུང་གིས་བཞུགས་པར་བསྒོམ། བདེ་བ་ཅན་ནས་འོད་དཔག་མེད་དང་། ཕྱོགས་བཅུའི་ཞིང་ཁམས་ནས་བླ་མ་ཡི་དམ་སངས་རྒྱས་བྱང་སེམས་རང་
གི་རེ་ཞིང་ལྟོས་པ་ཐམས་ཅད་ཡིད་ཀྱིས་སྤྱན་དྲངས་ལ་བསྟིམ། དེར་སྐྱབས་གནས་ཀུན་འདུས་སུ་བློ་ཐག་བཅད་ནས། སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །ཞེས་ལན་མང་དུ་བརྗོད། དེ་ནས་ཨོཾ་བརྗོད་པ་ཙམ་གྱིས་རང་སེམས་ཐུགས་རྗེ་ཆེན་པོ་དེ་སྤྱི་བོར་རྒྱང་གིས་བྱོན་ནས་སྤྱི་གཙུག་ཏུ་སྐུ་སྟོད་དཀར་ལྷག་ལྷག་བྱུང་བར་བསྒོམ། མ་ཎི་པདྨེ་ཧཱུྃ་བརྗོད་པས། རང་སེམས་ཐུགས་རྗེ་ཆེན་པོ་མར་བྱོན་སྙིང་གར་བཞུགས་པར་བསྒོམ། སྔར་ནས་དེ་འདྲ་ལན་འགའ་སྦྱངས་ན་ལེགས། རང་ཉིད་ནམ་འཆི་ལ་ཁད་རེད་པ་དང་། དེར་ཡོད་པ་རྣམས་ལ་ཡིག་དྲུག་སྐད་ཆེན་པོས་དབྱངས་ཐབས་སུ་འདོན་བཅུག་ལ། ཨོཾ་དྲག་ཏུ་བརྗོད་པ་ཙམ་གྱིས་རང་གི་རྣམ་ཤེས་ཐུགས་རྗེ་ཆེན་པོའི་དབུ་མའི་ལམ་ནས་སྤྱི་བོར་རྐྱང་གིས་འཕང་སྟེ་འོད་དཔག་མེད་ཀྱི་ཐུགས་ཀར་བསྟིམ། ཡང་སྙིང་གར་ཐུགས་རྗེ་ཆེན་པོ་སྒོམ་ཝིག་བྱེད་ལ་སྤར། ཡང་སྤར་ཝིག་སྤར་ཝིག་བྱ། དབུགས་མ་སོང་གི་བར་དུ་དེ་ལྟར་བསྒོམ་མོ། །འཕོ་བ་ཐེབས་པའི་རྟགས་སུ་དྲོད་སྤྱི་བོར་འདུས་པ་དང་། རླངས་པ་དང་། སྤྱི་བོ་འབུར་བ་འབྱུང་། དེ་དུས་སམ་ཞག་གསུམ་ལྔ་བདུན་སོགས་ཀྱི་
སོར། ནམ་མཁའ་ལ་འཇའ་ཚོན་འཁྲིགས་པ་དང་། རྟེན་རིང་བསྲེལ་གང་རུང་ཞིག་འབྱོན་ནོ། །ཡང་ཚེ་འདིར་རྫོགས་ཆེན་ལ་གོམས་འདྲིས་ཆེ། ཐོད་རྒལ་གྱི་ལྷ་སྐུ་ཞིག་རྟག་ཏུ་མཐོང་བ་གཅིག་ཡིན་ན། ཐུགས་དམ་ལ་འདུག་རྒྱུ་མེད་དེ། ཀློང་གསལ་སྙིང་ཐིག་གི་ངོ་སྤྲོད་ལས། སྐྱེས་བུ་ནད་ཀྱིས་བཏབ་སྟེ། འཆི་བའི་རྟགས་རྣམས་རྫོགས་ཤིང་། ཁྱད་པར་དུ་འབྱུང་བ་འདུས་ཏེ། དབུགས་ཕྱིར་རིང་ལ་ནང་དུ་སྡུད་དཀའ་བ། སྣང་བ་དཀར་དམར་དུ་འཆར་ཞིང་ཤེས་པ་ཟིང་ལོང་པའི་དུས་དེར་རྡོ་རྗེ་སེམས་དཔའི་གསང་ལམ་ཞེས་བྱ་བ་རང་གི་མདུན་གྱི་ནམ་མཁའ་ལ་རང་གི་ཙཀླུའི་ནང་ནས་འོད་ཀྱི་ཐག་པ་དཀར་པོ་བ་ཐག་འཐེན་པ་ལྟ་བུའམ། མདུང་ཤིང་སློང་བ་ལྟ་བུའམ། སྐས་ཀ་ལྟ་བུ་ན་རེ་བ་གཅིག་ནམ་མཁའ་ལ་ཟུག་པར་འཆར་རོ། །འོན་ཀྱང་ཁ་དོག་ལྔ་ལྡན་དུ་འབྱུང་བ་ཡང་སྲིད་དོ། །དེའི་དུས་སུ་རང་རིག་དབང་པོ་ལ་གཏད། དབང་པོ་འོད་ཀྱི་ཐག་པ་ལ་གཏད་པས། རིག་པ་འོད་ལ་ཐིམ་ནས་དུས་དེ་ཉིད་དུ་མངོན་པར་རྫོགས་པར་སངས་རྒྱས་པར་ཐེ་ཚོམ་མེད་དོ། །དེ་ལ་ཡར་གྱི་ཟང་ཐལ་དག་པའི་ཞིང་དུ་ཁྲིད་པའི་སྣ་ཐག །
ཡེ་ཤེས་བཞི་སྦྱོར་གྱི་ལམ་ཞེས་བྱ་སྟེ། མཐོང་བས་ཆོག་པའི་ལམ་དེ་དགེ་སྡིག་དང་ལས་ལ་བཟང་ངན་མེད་དེ། སྡིག་པོ་ཆེ་བཙན་ཐབས་སུ་སངས་རྒྱས་པའི་གནད་དོ། །ཞེས་ཨོ་རྒྱན་རིན་པོ་ཆེས་གསུངས་སོ། །སྒོམ་མེད་རྟོགས་པའི་གང་ཟག་ནི་ཐུགས་དམ་ལ་འདུག་རྒྱུ་མེད་དེ། ཚེ་འདིར་སངས་རྒྱས་ཚར་བའི་ཕྱིར། ཐུགས་དམ་ལ་བཞུགས་པ་ནི་ལམ་བསྒོམ་པའི་འཕྲོ་གཅིག་ལུས་པ་སྐྱོང་རྒྱུ་ཡོད་པ་ཡིན་ཏེ། རོ་གཅིག་རྟོགས་པའི་གང་ཟག་དེ་ཞག་གསུམ་ལྔ་བདུན་ཙམ་ལས་མི་བཞུགས་ཏེ་འཆི་བ་ཆོས་སྐུར་སངས་རྒྱས། སྤོས་བྲལ་རྟོགས་པའི་གང་ཟག་དེ་ཡུན་རིང་ཐུང་ཇི་ཙམ་བཞུགས་མི་བཞུགས་རང་དབང་ཆེ། རྩེ་གཅིག་ཆེན་པོ་ནི་ཡུན་རིང་ཞིང་བརྟན་པོ་འོང་སྟེ། བདེ་གསལ་མི་རྟོག་པའི་ཉམས་ལ་ཆགས་ཞེན་ཡོད་ན་ལྷ་གནས་གསུམ་དུ་གོལ། དེ་གོལ་མི་གོལ་གསོན་ཚེ་གོལ་ལམ་མ་གོལ་ཤེས། རྩེ་གཅིག་འབྲིང་ནི་ནད་གཅོད་འཇམ་ཞིང་བསྐུལ་མ་ཡོད་ན་ཟིན། འཆི་ཁ་འཆོལ་བ་དང་བསྐལ་མ་མེད་ན་མི་ཟིན། འཆི་ཁ་ཞག་འདི་ཙམ་འདུག་སྙམ་པའི་དམ་བཅའ་གང་བྱས་སྟེང་དུ་འགྲོ་སྟེ། འཆི་ཁའི་སེམས་སྟོབས་དང་ལྡན་པའི་ཕྱིར་རོ། །རྩེ་གཅིག་ཆུང་ངུས་
ནི་མི་ཟིན། ཞེས་པ་རྣམས་དྲུང་ཆེན་ཀུན་དགའ་རྣམ་རྒྱལ་གྱི་གསུང་རྒྱུན་ཡིན་ནོ། །ཁྲག་འཐུང་མངོན་འབྱུང་རྒྱུད་ལས། འཆི་བའི་དུས་ཀྱི་དངོས་གྲུབ་ནི། །འཆི་བ་ལས་ནི་བརྗོད་པར་འགྱུར། །ཅེས་གསུངས་པའི་དོན། རྗེ་ཆོས་ཀྱི་དབང་ཕྱུག་གིས་ཆོས་དྲུག་གི་གཞུང་ལས། རྣལ་འབྱོར་པ་རང་ཉིད་འཆི་བའི། ཉམས་ཁོང་དུ་ཆུད་པ་ན་འདི་ལྟར་བསམ་པར་བྱ་སྟེ། གལ་ཏེ་དངོས་པོ་རྣམས་ཡང་དག་པར་བདེན་ན་འཆི་མི་སྲིད་ལ། འཆི་བ་དང་འཇིགས་པ་མཐོང་བའི་ཚེ་བདེན་པར་མ་གྲུབ་སྟེ། དེས་ན་འཆི་བ་ཉིད་ཀྱང་དོན་ལ་གྲུབ་པ་མེད་བཞིན་དུ་སྣང་ངོ་། །སྙམ་པས་འཆི་བ་ལ་ཇི་མི་སྙམ་དུ་བཟུང་ནས། རྫས་དང་ཡོད་བྱད་རྣམས་དཀོན་མཆོག་གི་ཕྱོགས་སུ་བཏང་། གཉེན་བཤེས་ཀྱི་གདུང་སེམས་སོགས་ཏིང་ངེ་འཛིན་གཡེང་བའི་རྒྱུ་རྣམས་སྤང་། ནུས་ན་ལུས་གནད་གཏུམ་མོ་ལྟར་དང་། མ་ནུས་ན་སེང་གེའི་ཉལ་སྟབས་བྱས་ལ། བླ་མ་དཀོན་མཆོག་ཡིད་ཡུལ་དུ་བྱས་ལ། སྙིང་ཁུང་རུས་པའི་གཏིང་ནས་དད་པ་བསྐྱེད་ལ་སྐྱབས་འགྲོ་ཁྱད་པར་ཅན་བྱ། བདག་འཆི་བ་དེ་ཁོ་ན་ཉིད་འོད་གསལ་དོན་དམ་པའི་བདེན་པ་རྟོགས་པར་བྱས་ལ། །
སེམས་ཅན་ཐམས་ཅད་ཀྱི་དོན་དུ་སྲིད་པ་བར་དོར་ཟུང་འཇུག་ཕྱག་རྒྱ་ཆེན་པོའི་གོ་འཕང་མངོན་དུ་བྱའོ་སྙམ་དུ་སེམས་ཡང་ཡང་བསྐྱེད། འཕེན་པ་དྲག་པོ་བྱའོ། །དེ་ནས་འཆི་བའི་ཚེ་མིག་གི་སྣང་བ་ཐིམ་པས་གཟུགས་མི་གསལ། རྣ་བའི་སྣང་བ་ཐིམ་པས་སྒྲ་མི་ཐོས། སྣའི་སྣང་བ་ཐིམ་པས་དྲི་མི་ཚོར། ལྕེའི་སྣང་བ་ཐིམ་པས་རོ་མི་མྱོང་། ལུས་ཀྱི་སྣང་བ་ཐིམ་པས་ཚོར་བ་བརྟུལ། ས་ཆུ་ལ་ཐིམ་པས་ལུས་ཀྱི་ཟུངས་མི་ཐུབ། ཆུ་མེ་ལ་ཐིམ་པས་ཁ་སྣ་སྐམ། མེ་རླུང་ལ་ཐིམ་པས་ལུས་ཀྱི་དྲོད་རྣམས་སྡུད། རླུང་རྣམ་པར་ཤེས་པ་ལ་ཐིམ་པས་ཕྱི་དབུགས་ཆད། ནང་དབུགས་ཅུང་ཟད་མི་ཆད། དེའི་ཚེ་སྐད་ཅིག་དང་པོ་སྣང་བའི་དུས་སུ་ནང་རྟགས་དུ་བ་ལྟ་བུ། ཕྱི་རྟགས་ཟླ་བ་ཤར་བ་ལྟ་བུ། གཉིས་པ་མཆེད་པའི་དུས་སུ་ནང་རྟགས་སྲིན་བུ་མེ་ཁྱེར་ལྟ་བུ། ཕྱི་རྟགས་ཉི་མ་ཤར་བ་ལྟ་བུ། གསུམ་པ་ཐོབ་པའི་ཚེ་ནང་རྟགས་མར་མེ་ལྟ་བུ། ཕྱི་རྟགས་མུན་པ་ལྟ་བུ། དེ་རྣམས་སྐད་ཅིག་བཞི་པར་ཐོབ་པ་འོད་གསལ་ལ་ཐིམ། ཕྱི་རྟགས་སྐྱ་རེངས་ཤར་བ་ལྟ་བུ། ནང་རྟགས་ཤེས་པ་ནམ་མཁའ་སྤྲིན་དང་བྲལ་བ་ལྟ་བུ།། མི་རྟོག་པའི་བློ་ལས་འདས་པའི་འོད་གསལ་
མཐའ་དབུས་མེད་པ་ཞིག་འཆར་རོ། །དུས་དེར་ད་ལྟ་བསྒོམ་པའི་འོད་གསལ་དང་། རང་བཞིན་གྱི་འོད་གསལ་གཉིས་མ་བུ་འཕྲད་པའི་ཚུལ་ཅན་དེའི་སྟེང་དུ་གནས་པས། རྟོག་བཅས་ཀྱི་རང་བཞིན་བརྒྱད་ཅུ་འགགས་ནས། རྟོག་མེད་འོད་གསལ་ཆོས་སྐུ་མངོན་དུ་གྱུར། ཞེས་གསུངས་སོ། །ཨོ་རྒྱན་རིན་པོ་ཆེས་གསུངས་པའི་ངོ་སྤྲོད་མཐོང་བ་རང་གྲོལ་ལས། རང་ཉིད་འཆི་བའི་དུས་སུ། ས་ཆུ་ལ་ཐིམ། ཆུ་མེ་ལ་ཐིམ། མེ་རླུང་ལ་ཐིམ། རླུང་རྣམ་པར་ཤེས་པ་ལ་ཐིམ། རྣམ་པ་ཤེས་པ་འོད་གསལ་ལ་ཐིམ་པའི་དུས་སུ། དཀར་ལམ། དམར་ལམ། ནག་ལམ་གྱི་སྣང་བ་ཤར་བའི་མཐར། གཞིའི་འོད་གསལ་གདོད་མའི་སངས་རྒྱས་ཀ་དག་ཆེན་པོ་དོན་གྱི་ཀུན་བཟང་དང་མཇལ་ཏེ། རིག་པ་གཞི་ཐོག་ཏུ་རང་སར་གནས་པར་གྱུར་ན། དཔེར་ན་བཅོ་ལྔའི་ཉི་མ་ནུབ་པ་དང་། ཟླ་བ་ཤར་བ་དུས་མཚུངས་པས། བར་མཚམས་མུན་པ་མེད་པ་བཞིན་དུ་འདིར་དབུགས་ཆད་པ་དང་། རང་སྣང་ཆོས་ཉིད་ཀྱི་དཀྱིལ་འཁོར་འོད་གསལ་འཆར་བ་དུས་མཉམ་སྟེ། ཐལ་འགྱུར་ལས། འདི་ནི་ཆོས་ཉིད་བར་དོ་བཤད། །འཆི་བ་ལ་ནི་
ཐར་པའི་ཚེ། །རྣམ་ཤེས་ནམ་མཁའ་དག་ལ་ཐིམ། །ནམ་མཁའ་འོད་གསལ་དག་ལ་ཐིམ་པའི་དུས། །ཕྲ་རགས་སྣང་བ་ཀུན་འགགས་ཏེ། །ཞེས་གསུངས་པས། ཕྱིའི་འབྱུང་བཞི་འགགས་ནས། ནང་གི་འབྱུང་བ་འོད་གསལ་དུ་གྲོལ་ལོ། །ཞེས་དང་། ཐུགས་རྗེ་ཆེན་པོའི་དོན་ཊིཀ་ལས། ཀྱེ་རིགས་ཀྱི་བུ་རང་རེ་རྣམས་འཆི་བའི་དུས་གདམས་པ་འདི་མ་ཡེངས་པར་ཡིད་ལ་ཞོག་ཅིག །འཇིག་རྟེན་པའི་སྣང་བ་མ་དག་པ་འདི་ལ་མ་ཆགས་ཤིག །མ་ཞེན་ཅིག །ཤེས་པ་སྤྱི་བོར་གཏོད་ལ་སེམས་མ་འཕྲོ་ཞིག །བར་དོ་དང་པོ་ལ་དབྱིངས་དང་རིག་པ་འདྲེས་པའི་སྣང་བ་ནམ་མཁའ་གཡའ་དག་པ་ལྟ་བུ། བདེ་གསལ་མི་རྟོག་པ་གཅིག་ཏུ་འདྲེས་པའི་ཉམས། ཡིད་ལ་རྟོག་པ་མེད་ཅིང་། དྭངས་ལ་གསལ་བ་ཞིག་འོང་ངོ་། །དེ་སེམས་ཅན་ཀུན་ལ་ཐུན་མོང་དུ་འོང་ཞིང་། རླུང་སེམས་དབུ་མར་འདུས་པའི་རྟགས་ཡིན་པས། དེའི་ཚེ་སྔར་བསྒོམས་པའི་ཉམས་དང་གཉིས་སུ་མེད་པའི་ཆོས་སྐུ་དེ་ཡིན་པར་ཤེས་པར་གྱིས་ཤིག །དེས་བར་དོ་དང་པོར་སངས་རྒྱས་པ་ཡིན་ནོ། །ཞེས་དང་། ཐུགས་རྗེ་ཆེན་པོ་ངན་སོང་རང་གྲོལ་ལས། དེ་ནས་དབུགས་ཕྱིར་
བཏང་ནས། ནང་དུ་བསྡུ་མི་ཚུགས་པས་དབུགས་ཆད། དེ་ཚེ་དགེ་སྡིག་ཆེ་འབྲིང་ཆུང་གསུམ་གྱི་འབྲས་བུ་སྡུག་བསྔལ་ཆེ་འབྲིང་ཆུང་གསུམ་འབྱུང་། དེའི་དུས་སུ་རྣལ་འབྱོར་པ་རང་དབང་རང་གིས་ཐོབ་པ་ཞིག་ཡིན་ན་སེམས་ལ་འཆི་རྒྱུ་མེད་པས། འོད་གསལ་མ་བུ་འདྲེས་པའམ། ཡང་ན་དབྱིངས་རིག་འདྲེས་པ་ཞེས་བྱ་བ་ཡང་དེའི་ཚེ་ཡིན་པས། རང་བཞིན་རྫོགས་པ་ཆེན་པོ། ཀ་དག་སྣང་བ་མཐའ་ཡས་ཀྱི་ངང་ནས་སངས་རྒྱས་པ་ཡིན་ནོ། །ཞེས་དང་། ཐུགས་རྗེ་ཆེན་པོ་པདྨ་ཞི་ཁྲོ་ལས། དེ་ནས་ཕྱི་དབུགས་ཆད་གྲབས་འདུག་ན། གཞོགས་གཡས་ས་ལ་ཕབས་ནས་སེང་གེའི་འདུག་སྟངས་བཅས་ལ། རྦ་རླབས་བཙིར་བ་ཡིན་ཏེ། གཉིད་ལོག་གཉིས་འཕར་འཕྲོ་ཆད་ནས་དྲག་ཏུ་མནན་ནོ། །དེས་རླུང་དྷུ་ཏིར་ནས་ཕྱིར་ལོག་མི་ཤེས་ཏེ། ཚངས་བུག་གི་ལམ་དུ་ཐོན་ངེས་སོ། །ངོ་སྤྲོད་ཀྱང་འདིའི་དུས་སུ་གདབ་བོ། །ཞེས་གསུངས་པས། སྐེ་རྩིས་ཆད་འཕྲོ་མཐེབ་མཛུབ་ཀྱིས་ཅུང་ཟད་མནན་པས་ཐུགས་དམ་ཟིན་པའི་གནད་ཆེའོ། །ཡང་ཐུགས་དམ་མི་ཟིན་དོགས་པའམ། ཟིན་ཀྱང་གྲིབ་དང་། བྱི་ལ་སྲེ་མོང་། ཀུ་ཅོ་སོགས་ཀྱིས་
འགྲོགས་དོགས་ནས། ཐུགས་དམ་དང་ཆོས་སྐུའི་འཕོ་བ་ཟུང་འཇུག་ནི། དང་པོ་རང་ལུས་སྤྱན་རས་གཟིགས་སོགས་ཡི་དམ་གྱི་སྐུར་བསྒོམ། སྒོ་བརྒྱད་ཧཱིཝཡིག་གིས་བཀག་། དབུ་མ་གསལ་གདབ་སྤྱི་བོར་སངས་རྒྱས་འོད་དཔག་མེད་བསྒོམས་ལ། སྙིང་གར་རྣམ་ཤེས་ཐིག་ལེ་དཀར་པོ་ཧཱིས་མཚན་པ། སྤྱི་བོའི་འོད་དཔག་མེད་ཀྱི་ཐུགས་ཀར་ལན་མང་དུ་སྤར། དེ་ནས་ཅི་ཡང་མི་བསྒོམ་པར་རིག་པ་སྙིང་གར་གཏད་ནས་ཉམས་ལེན་སེམས་ངོ་སྐྱོང་ངོ་། །དཀར་ལམ་དམར་ལམ་སོགས་ཅི་ཤར་ཡང་གང་ཤར་གྱི་ངོ་བོ་ལ་བལྟས། ཕྱི་དབུགས་ཆད་ཙམ་ནས་གདུང་གཡོགས་པས་གདུང་བཅས་གཟབ། མཐེབ་མཛུབ་ཀྱིས་སྐེ་རྩིས་ཅུང་ཟད་མནན། ཐུགས་དམ་གསལ་འདེབས་ཤེས་ན་གང་ཤེས་བྱ། མི་ཤེས་ན་མིང་ནས་བོས་ལ་ཐུགས་དམ་མ་ཡེངས་ཞེས་ལན་གསུམ་བརྗོད། དེས་དང་པོ་སྔར་བླ་མས་ངོ་སྤྲད་པ་དེ་དྲན་ནས། གཉིས་པ་རང་རིག་རྗེན་པ་འོད་གསལ་དུ་ངོ་འཕྲོད། གསུམ་པ་རང་ངོ་ཤེས་ནས་ཆོས་སྐུ་འདུ་འབྲལ་མེད་པར་གྱུར་ཏེ་གྲོལ་བར་ངེས་སོ། །དེས་འོད་གསལ་དང་པོ་ལ་ངོ་འཕྲོད་དེ་གྲོལ་ལོ། །ཞེས་གསུངས་སོ། །ཀུན་མཁྱེན་དོལ་པུ་པས། །
བཟང་ངན་དུ་མར་སྣང་ཡང་བཟང་ངན་མེད། །ཐམས་ཅད་ཆོས་སྐུའི་རྣམ་པར་རོལ་པ་ཡིན། །དེ་ཕྱིར་གང་ཤར་དེ་ལ་ལྟ་བ་ཙམ། །རེ་དོགས་སྤང་བླང་དགག་སྒྲུབ་མི་བྱ་བར། །སྤྲོས་བྲལ་མཉམ་ཉིད་ངང་དུ་ལྷན་གྱིས་བཞག །དྲུང་ན་ཡོད་པས་གཡེང་འཚམས་མ་བྱས་ན། །ཕྱི་དབུགས་ཆད་དང་ནང་དབུགས་མ་ཆད་བར། །ཉིན་ཞག་གསུམ་བཞི་ཡང་ན་ལྔ་དྲུག་སོགས། །འོད་གསལ་ངང་དུ་བརྒྱལ་བ་བཞིན་དུ་གནས། །སྔོན་དུ་ཆེར་གོམས་ངོ་ཡང་ལེགས་འཕྲོད་ན། །རིག་པ་འོད་གསལ་ངང་དུ་ཐིམ་པར་འགྱུར། །མ་ཐིམ་ན་ཡང་གཞན་དུ་ལོ་ཟླ་ནི། །མང་པོར་འབད་དེ་བསྒོམ་པ་བས་ཀྱང་ལྷག །ཅེས་གསུངས་ཏེ། ལུས་ཀྱི་ཚུགས་བཟང་ངན་ནི་གདུང་བཅས་པའི་བྱེད་ལས་ཡིན། ལུས་སེང་གེའི་ཉལ་སྟབས་ཡིན་ཀྱང་རུང་སྟེ། ཕུང་པོ་བཀྲག་མདངས་བཟང་བ་དང་། མིག་ཟིམ་བུ་ཁ་འཛུམ་པ་འདྲ་བ། སེམས་ངོ་ཉམས་ལེན་ཡོད་པ་དེའི་དྲུང་དུ་བསྡད་ན། ཉམས་རྟོགས་བཟང་པོར་འཆར་ན་ཐུགས་དམ་ཡིན། ཞི་གནས་བདེ་གསལ་མི་རྟོག་པའི་ཉམས་ལ་ཆགས་པའི་རིགས། བཀྲག་མདངས་བཟང་བ་སོགས་ལེགས་པར་
འོང་། བསྐྱེད་རིམ་བརྟན་པོས་ཐུགས་ཀའི་ས་བོན་ལ་རིག་པ་གནས་པ་ལྷག་པར་ཐུགས་དམ་བརྟན། དེ་དག་ལ་ལྷག་མཐོང་གིས་ངོ་སྤྲོད་ཡང་ཡང་གདབ་ན། གོལ་སར་མི་འཆོར་ལམ་དུ་འགྲོའོ། །ཉམས་ལེན་མེད་ཅིང་ཁྲིད་ཀྱང་ཞུ་མ་མྱོང་བ། ཐུགས་དམ་ལ་བསྡད་པ་འདྲ་བ་འབྱུང་བ་ནི། དྲི་ཟ་བགེགས་དང་གཤེད་ཀྱི་བདག་ཏུ་བཟུང་བ་ཡིན་ཞེས་ཆོས་དྲུག་ཆེན་མོ་ལས་བཤད། འོད་གསལ་ཐུགས་དམ་དེ་ངོས་མ་ཟིན་ན། བེམ་རིག་བྲལ་མ་ཐག་ཡང་འོད་གསལ་གཉིས་པ་འཆར་ཏེ། དེ་ཚེ་ཡང་ཐུགས་དམ་མ་ཡེངས་ཞེས་བརྗོད་ན། བེམ་རིག་བྲལ་ཚར་ཡང་ཉམས་ལེན་ངོས་ཟིན་ནས་མི་འཁྲུལ་པ་ཡང་སྲིད་གསུངས། དེ་སྐབས་སུ་ཐིམ་ལུགས་བརྒྱད་ཤར་ནས་གྲོལ་ཚུལ་རྒྱ་ཆེར་རྫོགས་ཆེན་ནས་བཤད། དེ་ནས་ཆོས་ཉིད་བར་དོ་འཆར་ཚུལ་ཆོས་དྲུག་སོགས་གསར་མ་ནས་མ་བཤད་པས། ཐེ་ཚོམ་ཟེར་མཁན་ཡོད་ཀྱང་། ཇོ་བོ་རྗེའི་བཀའ་གདམས་གླེགས་བམ་དང་། མ་གཅིག་གིས་གཅོད་གྱི་རྣམ་བཤད་ནས། སྒྲ་འོད་ཟེར་གསུམ་ཞི་ཁྲོའི་ལྷ་ཚོགས་འཆར་ཚུལ་ཚིག་བསྡུས་ཏེ་གསུངས་པས། གསར་མ་ནས་མ་བཤད་པ་ཡང་མ་ཡིན་ནོ། །ཐུགས་
དམ་མ་ཟིན་ན་ཡང་རྣམ་ཤེས་དྲན་མེད་དུ་ལུས་ལ་གནས་ཏེ། སྡིག་ཅན་དང་རྩ་ངན་པའི་རིགས་ནི་ཟན་ཟ་ཡུན་ཙམ་ན་འོག་སྒོ་ནས་དམྱལ་བར་འགྲོ། འཕོ་བ་ཐེབ་ན་སྤྱི་གཙུག་ནས་ཡར་དག་པའི་ཞིང་དུ་འགྲོ། གཟུགས་མེད་ཁམས་སུ་སྐྱེ་རྒྱུ་ཡིན་ན། སྲོག་ཆད་དུས་ཀྱི་སྙིང་གི་ཐད་ཀྱི་བར་སྣང་དེར་སེམས་གནས་ཏེ། ལོ་བརྒྱད་ཁྲིའི་བར་དུ་བརྒྱལ་ནས་དྲན་པ་མེད་དོ། །དེ་གསུམ་མ་གཏོགས་ལ་བར་དོ་འཆར་ཏེ། བ་བཞོ་ཡུན་དང་། ཞག་གཅིག་དང་། ཕལ་ཆེར་ཞག་གསུམ་ཉི་མ་དྲོས་བཞིར་གནས། བཀའ་གདམས་གླེགས་བམ་ནས་ལ་ལ་ཞག་བདུན་གནས་པ་ཡང་ཡོད་གསུངས་པས། དེ་ཚུན་ལ་འཕོ་བ་འདེབས་རུང་། དེ་ནས་ཐུགས་དམ་མ་ཟིན་ན་ཇི་ལྟར་འཆར་ཚུལ་ནི། ཐུགས་རྗེ་ཆེན་པོ་ངན་སོང་རང་གྲོལ་ལས། དེ་ལ་རང་དབང་མ་འདུས་ན། ཞག་གསུམ་ནས་བརྒྱལ་སངས་པ་དང་། ང་ཅི་ཡིན་བསམ་པའི་རང་གི་རང་ལ་ཡིད་མི་ཆེས་པའི་ཕྱེད་ཕྱེད་སྣང་བ་འོད་དང་ཐིག་ལེ་འཇའ་ཚོན་གྱི་སྦུབས་སུ་ཚུད་པ་ལྟ་བུ་འབྱུང་། དེ་ལ་རང་ལུས་ཐུགས་རྗེ་ཆེན་པོ་འོལ་གྱིས་བསྐྱེད་ནས་སེམས་མཉམ་བཞག་གི་ངང་དུ་གནས་པས་རང་ལུས་
མཚན་དཔེས་བརྒྱན་པའི་ད་ལྟ་དང་མི་འདྲ་བ་ཞིག་དེས་འགྲུབ་པའོ། །སྣང་སྲིད་ཐམས་ཅད་ལྷའི་རང་བཞིན་དུ་འཆར་རོ། །སྐད་ཅིག་གཅིག་གིས་རྫོགས་སངས་རྒྱས་ཞེས་པ་ཡང་དེ་ཡིན་ནོ། །དེའི་ཚེ་སྐུ་གསུམ་དང་ཡེ་ཤེས་ལྔ་ཡི་རང་མདངས་ཐམས་ཅད་དང་། རྫུ་འཕྲུལ་མངོན་མཁྱེན་གྱི་ཡོན་ཏན་ལ་སོགས་པ་བརྗོད་དུ་མེད་པ་ཡོད་པས། དག་པའི་ཞིང་གང་དང་གང་དུ་འགྲོ་ཡང་རང་དབང་ཐོབ་པ་ཡིན་ཏེ། བདེ་བ་ཅན་ནམ་པདྨ་འོད་ཀྱི་ཕོ་བྲང་ངམ། མངོན་པར་དགའ་བ་ལ་སོགས་པ་ཡིད་ལ་དྲན་པ་ཙམ་གྱིས་སླེབས་སོ། །ཞེས་དང་། ཐུགས་རྗེ་ཆེན་པོའི་དོན་ཊིཀ་ལས། ཀྱི་རིགས་ཀྱི་བུ་བར་དོ་དང་པོ་ངོ་མ་ཤེས་ན། བར་དོ་གཉིས་པ་ལྷུན་གྲུབ་ཡེ་ཤེས་ཀྱི་སྣང་བ་འཇིག་རྟེན་གྱི་ཁམས་ཐམས་ཅད་འོད་ཁ་དོག་ལྔས་གང་། འོད་ཐམས་ཅད་འགུལ་ཞིང་འཕྲིག་པ། ཟེར་མཚོན་ཆ་ལྟར་འཕྲོ་བ་འཆར་ཏེ། དེ་དག་རང་གི་རིག་པའི་ཡེ་ཤེས་ཀྱི་རང་མདངས་སུ་ཤེས་པར་གྱིས་ཤིག །དེས་བར་དོ་གཉིས་པ་ལ་སངས་རྒྱས་པ་ཡིན་ནོ། །ཀྱེ་ཀྱེ་རིགས་ཀྱི་བུ་དེ་ལ་ངོས་མ་ཟིན་ན་བར་དོ་གསུམ་པ་སྒྲ་འོད་ཟེར་གསུམ་ཞེས་བྱ་བ་འབྱུང་སྟེ། འོད་དེ་རྣམས་ཀྱི་ནང་ན་ཐུགས་རྗེ་
ཆེན་པོའི་སྐུ་ཞི་བ་དང་། ཁྲོ་བོ་གང་ལ་གང་འདུལ་ཞལ་ཕྱག་སྣ་ཚོགས་དང་བཅས་ཏེ་འབྱོན་པར་འགྱུར་རོ། །དེ་དག་ཀྱང་རང་ལས་འབྱུང་བར་ཤེས་པར་གྱིས་ཤིག །དེ་དག་གི་ཀློང་ན་འབྲུག་སྟོང་གི་སྒྲ་ཙམ་པ་དང་། འོད་འགུལ་བ་དང་། འཕྲིག་པ་དང་། ཟེར་མཚོན་ཆའི་ཆར་ལྟར་འབྱུང་བར་འགྱུར་རོ། །སྐུ་ལ་མ་བྱེད་ཅིག །སྒྲ་ལ་མ་འཇིགས་ཤིག །འོད་ལ་མ་སྔངས་ཤིག །ཟེར་ལ་མ་སྐྲག་ཅིག །རང་སྣང་དུ་ངོ་ཤེས་པར་གྱིས་ཤིག །ཅེས་གསུངས། དེ་བཞིན་དུ་ཐུགས་རྗེ་ཆེན་པོ་ངན་སོང་རང་གྲོལ་ལས་ཀྱང་། སྒོ་གསུམ་གྱི་ཉམས་ལེན་ཐམས་ཅད་དེ་དུས་བརྒྱ་འགྱུར་གྱི་གསལ་བས་ལུས་ལྷའི་ང་རྒྱལ་གྱིས་སྣང་སྲིད་ཐམས་ཅད་འོད་དང་འོད་ཟེར་འདྲེས་པ་ལྟ་བུའི་ལྷའི་རྣལ་འབྱོར་དང་། ངག་སྔགས་ཀྱི་རྣལ་འབྱོར་གྱིས་སྒྲ་ཐམས་ཅད་གྲག་སྟོང་ཡི་གེ་དྲུག་པའི་སྒྲ་དབྱངས་བྲག་ཆ་ལྟ་བུ་དང་། སེམས་ཆོས་ཉིད་ཀྱི་རྣལ་འབྱོར་གསལ་སྟོང་དབྱེར་མེད་ཉི་མ་དང་། ཉི་མའི་འོད་ཟེར་འབྲལ་མི་ཤེས་པ་ལྟ་བུ་དང་། སྒྲ་དང་། འོད་དང་། ཟེར་དང་། གཟུགས་སྣ་ཚོགས་ཅི་ཤར་ཡང་འཇིགས་པ་མེད་པར་རང་ལ་རང་ཤར་དུ་གྲོལ་
བས་འདི་ནི་གདམས་པ་དང་མན་ངག་ཟབ་མོ་ཐམས་ཅད་ཀྱི་མཆོག་ཏུ་འགྱུར་རོ། །དེ་ལ་མ་གྲོལ་ན། ཞི་བ་དང་། ཁྲོ་བོ་དང་། ཞི་མ་ཁྲོ་ལ་སོགས་ཞི་ཁྲོ་དམ་པ་རིགས་བརྒྱའི་ལྷ་ཚོགས་ཐམས་ཅད་རིམ་གྱིས་འཆར་རོ། །ཞག་བདུན་དང་། ། བཅུ་བཞི་དང་། ཉི་ཤུའི་བར་དུ་སྤྲུལ་པའི་སྣང་བ་འཆར་ཏེ། གཟུགས་ལ་བྲོས། འོད་ལ་སྐྲག །ཐིག་ལེ་ལ་སྔངས། སྒྲ་ལ་འཇིགས། ཟེར་ཐག་ལ་ལྟ་མི་བཟོད་པའི་དུས་ཤིག་འོང་། དེའི་ཚེ་ཇོ་བོ་ཐུགས་རྗེ་ཆེན་པོ་སྒོམས་ཤིག །སྙིང་པོ་ཡི་གེ་དྲུག་པ་སྒྲོངས་ཤིག །འོད་ཐམས་ཅད་རང་འོད། སྒྲ་ཐམས་ཅད་རང་སྒྲ། གཟུགས་ཐམས་ཅད་རང་གཟུགས་སྣང་སྟོང་། ཟེར་ཐམས་ཅད་རང་ཟེར་རང་ཤར་དུ་སྒོམས་ཤིག །ཞག་བདུན་ཕྲག་ཕྱེད་གསུམ་ནས། རང་གིས་རང་ཤི་བ་མ་ཤེས་ཏེ། སྔར་གྱི་རོ་ལ་བལྟས་པས་ལོག་ས་མ་རྙེད་ཉེ་བ་དང་གྲོགས་ལ་ཅི་སྨྲས་ཀྱང་ལན་མི་སྟེར། དེ་ཡི་ཚེ་ཡི་མུག་ལང་སྟེ་སྡུག་བསྔལ་བཟོད་གླགས་མེད་པར་འབྱུང་། དེའི་ཚེ་ཡང་ལྷ་སྤྱན་རས་གཟིགས་དང་། སྔགས་ཡི་གེ་དྲུག་མ་ཡིད་ལ་བྱས་ན། འཇིགས་སྐག་ཐམས་ཅད་རང་བཞིན་དུ་ཞི་བར་འགྱུར་རོ་ཞེས་དང་།
ཐུགས་རྗེ་ཆེན་པོ་པདྨ་ཞི་ཁྲོ་ལས། རབ་དག་པ་མཁའ་སྤྱོད་ཀྱི་གནས་སུ་འཕོ་བ་ནི། འཕེན་པ་འདི་ལྟ་བུར་བཏང་སྟེ། ཀྱེ་མ་བདག་བསྐལ་པ་གྲངས་མེད་པ་ཚད་མེད་ཐོག་མ་མེད་པའི་དུས་རིང་པོ་དེ་ཙམ་ཞིག་ནས་ད་རུང་ཡང་འཁོར་བའི་འདམ་འདིར་ལུས་པ་ལ་སྐྱོ་བ་ལ། སྔོན་ནས་དེ་སྙེད་ཅིག་སངས་རྒྱས་པའི་རིང་ལ་བདག་མ་གྲོལ་བ་འདི་ཨ་ཙ་མ། ད་ནི་འཁོར་བ་ལ་སྐྱགས་རེ་ལོག །ཞེ་རེ་འཇིགས། གོཉུག་རེ་བུད། ད་ནི་བྲོས་པའི་གྲབ་བྱ་རན་ནས་འདུག །བདག་རང་ནུབ་བདེ་ཆེན་གྱི་ཞིང་ཁམས་སུ་སངས་རྒྱས་སྣང་བ་མཐའ་ཡས་ཀྱི་ཞབས་དྲུང་དུ་མེ་ཏོག་པདྨའི་ཁ་ལ་བརྫུས་ཏེ་སྐྱེ་བར་བྱ་དགོས་སྙམ་པས་ནུབ་བདེ་བ་ཅན་གྱི་ཞིང་ཁམས་སུ་འདུན་པ་དྲག་ཏུ་གཏོད། གཞན་ཡང་མོས་པའི་ཞིང་ཁམས་མངོན་པར་དགའ་བའམ། འཐུག་པོ་བཀོད་པའམ། ལྕང་ལོ་ཅན་ནམ། རི་བོ་ཏ་ལའམ། པདྨ་འོད་ཀྱི་གཞལ་ཡས་སུ་ཨོ་རྒྱན་གྱི་དྲུང་དུའམ། གང་མོས་ཀྱི་ཞིང་དུ་འདུན་པ་གཏད་དེ་རྩེ་གཅིག་ཏུ་མ་ཡེངས་པར་བྱ། དེ་མ་ཐག་ཏུ་ཞིང་ཁམས་དེར་སྐྱེ་བར་འགྱུར་ཏེ། གཞན་ཡང་དགའ་ལྡན་ན་བྱམས་པའི་དྲུང་དུ་འགྲོ་བར་མོས་ན་
ཡང་། དེ་མ་ཐག་ཏུ་ཞིང་ཁམས་དེར་སྐྱེ་བར་འགྱུར་ཏེ། བདག་བར་དོའི་སྐབས་འདིར། དགའ་ལྡན་ན་མི་ཕམ་ཆོས་ཀྱི་རྒྱལ་པོའི་དྲུང་དུ་འགྲོ་བའི་དུས་ལ་བབ་པས་འགྲོ་བར་བྱའོ། །སྙམ་པའི་འདུན་པ་གཏད་ནས་བྱམས་པའི་དྲུང་དུ་པདྨའི་སྙིང་པོ་ལ་བརྫུས་ཏེ་སྐྱེའོ། །ཞེས་དང་། ཡེ་ཤེས་རྒྱ་མཚོའི་རྒྱུད་ལས། བར་དོའི་འཇིགས་པ་ཆེན་པོ་ལ། །རྟོགས་པ་བརྟན་པའི་གདམས་ངག་གཅེས། །བར་དོའི་འཇིགས་པ་ཆེན་པོ་ལ། །འཆུག་པ་མེད་པའི་གདམས་ངག་གཅེས། །ཞེས་དང་། ཐུགས་རྗེ་ཆེན་པོའི་དམར་ཁྲིད་ཟླ་བ་རྒྱལ་མཚན་གྱི་ལུགས་ལས། སྲིད་པ་བར་དོའི་རྣལ་འབྱོར་ནི། སྔོན་མེད་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་ལྡན། །རིགས་མཐུན་ལྷ་མིག་དག་པས་མཐོང་། །ཞེས་གསུངས་པས། བར་དོའི་དུས་སུ་ལུས་ལྷའི་དཀྱིལ་འཁོར། ངག་སྔགས་ཀྱི་དཀྱིལ་འཁོར། སེམས་ཏིང་ངེ་འཛིན་གྱི་དཀྱིལ་འཁོར། དཀྱིལ་འཁོར་གསུམ་དང་མ་བྲལ་བ་ཞིག་བྱུང་ན་བར་དོའི་འཇིགས་པ་བཅུ་གཅིག་ལ་སོགས་པར་སངས་རྒྱས་སོ། །ཞེས་དང་། ཐུགས་རྗེ་ཆེན་པོ་ཚེམ་བུ་ལུགས་ཀྱི་དམར་ཁྲིད་ལས། མངལ་སྒོ་ཡང་
བསྐྱེད་རྫོགས་རང་བསྒོམས་པས་ཁེག་པས་གཞན་བསྒོམ་མི་དགོས་གསུངས། ཐུགས་རྗེ་ཆེན་པོ་ངན་སོང་རང་གྲོལ་ལས། ཞག་བདུན་ཕྲག་དྲུག་ནས་ཡིད་འཁྲུག་སྟེ། འཇིགས་པའི་སྒྲ་དཔག་ཏུ་མེད་པ་འབྱུང་ངོ་། ས་སྒྲ་ཆུ་སྒྲ་མེ་སྒྲ་རླུང་སྒྲ་འབྱུང་བ་ལྔ་འདུས་པའི་སྒྲ་དང་བཅས་པ་འཆར་ཡོང་། །དེ་ཡི་ཚེ་མ་ཎི་པདྨོའི་སྒྲ་ཡིད་ལ་དྲན་པར་བྱས་ན་ཕན་པར་ཡོང་ངོ་། །དེ་ནས་འོད་ཟེར་གྱིས་འཐུམ་ནས་ལམ་མེད་པའི་སྣང་བ་འཆར་ཏེ། དེ་དུས་དྲན་རྟོག་ཐུགས་ཀྱི་ཁྱེར་སོ་སེམས་ཉིད་མ་བཅོས་མཉམ་བཞག་གི་དོན་དྲན་ན་ཕན་པར་འགྱུར་རོ། །དེ་ནས་འོད་ལམ་དྲུག་འཆར་ཏེ། དཀར་སེར་དམར་ལྗང་སྔོ་ནག་དྲུག་སྟེ། རིགས་དྲུག་གི་ལམ་ཡིན་ཏེ། དཀར་པོ་ལ་ཕྱིན་ཚེ་ལྷའི་སྣང་བ་འཆར། དེ་བཞིན་དུ་ལྗང་གུ་ལྷ་མ་ཡིན་གྱི་ལམ། སེར་པོ་མིའི་ལམ། ནག་པོ་དུད་འགྲོའི་ལམ། ཐལ་སྐྱ་ཡི་དྭགས་ཀྱི་ལམ། དམར་ནག་དམྱལ་བའི་ལམ། དེའི་ཚེ་བླ་མ་ཡི་དམ་མཁའ་འགྲོ་ལ་གསོལ་བ་བཏབ་ན་ལུང་བསྟན་ཏེ། ཁྱོད་ཀྱི་ཡི་དམ་ང་ཡིན་ནོ། །སྙིང་པོ་སྒྲོངས་ཤིག་ལམ་དཀར་པོ་ལ་སོང་ཞིག །ཁྱོད་སྐྱེ་གནས་འདི་ལ་བཟང་ངོ་ལུས་འདི་ལྟ་བུ་ཡིན་
ནོ། །ཆོས་འདི་ཡིན་ནོ་ཞེས་ལུང་བསྟན་ངེས་པར་འོང་། དེ་ནས་ལྷན་ཅིག་སྐྱེས་པའི་ལྷ་དང་འདྲེ་གཉིས་ཀྱིས་དགེ་སྡིག་རྩོད་པའི་སྣང་བ་འཆར་རོ། །དེ་དུས་ཡང་ཐུགས་རྗེ་ཆེན་པོ་ཡིད་ལ་བྱས་ན་རྒྱལ་ཁ་བཟུང་སྟེ་མཐོ་རིས་སུ་སྐྱེ་ནུས་སོ། །ཞག་བདུན་ཕྲག་བདུན་སོང་ནས་ནི། ལུས་ལེན་པའི་སྣང་བ་འགྱུར་ཏེ། གང་ལ་སྐྱེ་འགྱུར་གྱི་ལུས་ཡིན་སྙམ་བྱེད། །རང་རླུང་གིས་དེད་ནས་སྐྱེ་བ་ཕྱི་མ་ལ་ཆོས་དང་མཇལ་བར་འགྱུར་རོ། །ལྷ་ཐུགས་རྗེ་ཆེན་པོ་ནི་བྱིན་རླབས་བསམ་གྱིས་མི་ཁྱབ། བརྗོད་པས་མི་ལེང་། ཞེས་དང་། མཁའ་འགྲོ་ཀུན་གྱི་སྙིང་ཐིག་ཀློང་གསལ་རྒྱུད་ལས། ཀྱཻ་ལས་དག་པ་དང་། ངོ་སྤྲོད་ཐོབ་པ་རྣམས་ནི། དུས་དེ་ཉིད་ལ་སྣང་བ་འགྱུར་ནས། ནུབ་ཕྱོགས་བདེ་བ་ཅན་གྱི་ཞིང་ཁམས་བྱ་བར་འགྱུར་ཏེ། དེར་སངས་རྒྱས་སྣང་བ་མཐའ་ཡས་ཀྱི་ཐུགས་ཀར་ཐིམ། ཡུམ་གྱི་པདྨོ་ལས་ཐོན་ཏེ། པདྨ་རིགས་ཀྱི་གཙོ་འཁོར་འགྱུར་ཏེ། སངས་རྒྱས་ནས་འཁོར་བ་དོང་ནས་སྤྲུགས་པའོ། །ཞེས་དང་། ཕག་གྲུའི་ཐབས་ལམ་ཚིགས་བཅད་མ་ལས། དེ་ཡང་འཕེན་པ་འདི་བཞིན་བཏང་། །བདེ་བ་ཅན་གྱི་ཞིང་ཁམས་སམ། །པདྨ་ཅན་གྱི་ཞིང་
ཁམས་སུ། །བརྫུས་ཏེ་སྐྱེ་བར་བསམ་པ་ཡི། །འདུན་པ་དྲག་པོ་བཏང་བར་བྱ། །ཞེས་གསུངས་པ་ལྟར་ཞིང་ཁམས་དེར་འགྲོ་བར་གྱིས་ཤིག །ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །
༼ཤ༽ །ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་གཞི་ལམ་འབྲས་གསུམ་གྱི་ངོ་སྤྲོད་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། །རྒྱུ་སེམས་ཅན་ལ་འབྲས་བུ་སངས་རྒྱས་བསྒྲུབ་པའི་ཐབས། གཞི་ལམ་འབྲས་བུ་གསུམ་བསྡུས་ཏེ་བཤད་ན། གཞི་ནི་སངས་རྒྱས་ཀྱི་ཐུགས་གཉིས་སུ་མེད་པའི་འཕགས་པའི་གང་ཟག་གིས་རྟོགས་ཤིང་མངོན་དུ་བྱ་བ། ཁམས་གསུམ་འཁོར་བའི་གཤིས་རང་བབས། ཆོས་ཐམས་ཅད་གདོད་མའི་གནས་ལུགས་ལྷན་ཅིག་སྐྱེས་པའི་ཡེ་ཤེས། གཞི་ཀུན་ལ་ཁྱབ་པ། འོ་སྐོལ་འཇག་མའི་སྲིན་བུ་ཡན་ཆད་ནས། སངས་རྒྱས་མར་བཅད་པ་ཐམས་ཅད་ཀྱི་རྒྱུད་ལ་ཡོད་པ་བཟང་ངན་
དང་ཆེ་ཆུང་ལ་སོགས་པ་མེད་པའི་རང་བཞིན་རྣམ་དག་དེ་ཡིན། དེ་ལྟར་ཡང་། ཏིང་འཛིན་རྒྱལ་པོའི་མདོ་ལས། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་དང་། མདོ་སྡེ་མྱ་ངན་འདས་ཆུང་ལས། སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་དང་། མདོ་སྡེ་མྱ་ངན་འདས་ཆེན་ལས་ཀྱང་། དཔེར་ན་འོ་མ་ལ་མར་གྱིས་ཁྱབ་པར་གནས་སོ། །དེ་བཞིན་དུ་དེ་བཞིན་གཤེགས་པའི་སྙིང་པོས་ཀྱང་སེམས་ཅན་ཡོངས་ལ་ཁྱབ་པར་གནས་སོ། །ཞེས་དང་། མདོ་སྡེ་རྒྱན་ལས་ཀྱང་། དེ་བཞིན་ཉིད་ནི་
ཐམས་ཅད་ལ། །ཁྱད་པར་མེད་པར་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་སོ། །རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་། ཀྱཻ་རྡོ་རྗེ་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་གསུངས་སོ། །གློ་བུར་གྱི་དྲི་མ་དེ་བསལ་ནས། ཚེ་གཅིག་ལུས་གཅིག་ལ་སངས་རྒྱས་པའི་ཐབས། ཕྱག་རྫོགས་ཟུང་འཇུག་འདི་ཉིད་ཉམས་སུ་བླངས་པས་ལམ་བསྒྲོད་དེ། ཁྲིད་ཆེན་ལས། རྣལ་འབྱོར་པ་ཞིག་གིས་ཉམས་ཐོག་ཏུ་དྲིལ་ནས་སེམས་གསལ་ལ་མི་རྟོག་པའི་སེང་ངེ་ཡེ་རེ་བ་དེ་ལ་གཞན་དུ་མི་འཕྲོ་བའམ། ཞི་ལྷག་ཟུང་དུ་འབྲེལ་བའི་རྒྱུན་ལ་རྩེ་གཅིག་ཏུ་གནས་པ་རྩེ་གཅིག །ཅེས་གསུངས། དྲན་པ་ཉེ་བར་བཞག་པ་བཞི་སྟེ། ལུས་གཙང་མི་གཙང་གཉིས་ཀའི་དྲན་རྟོག་བྲལ་ནས་འདུས་མ་བྱས་ཉིད་དུ་དྲན་པ་ཉེ་བར་བཞག །ཚོར་བ་སྡུག་བསྔལ་དང་བདེ་བར་ཡང་མི་རྟོག་པར་ཟག་མེད་ཀྱི་བདེ་བར་དྲན་པ་ཉེ་བར་བཞག །སེམས་རྟག་
མི་རྟག་སྤྲོས་པ་དང་བྲལ་བར་སེམས་དྲན་པ་ཉེ་བར་བཞག །ཆོས་བདག་ཡོད་མེད་གཉིས་ཀར་མི་རྟོག་པར་མྱང་འདས་ཀྱི་དོན་ལ་སྒྲོ་འདོགས་ཆོད་པར་ཆོས་དྲན་པ་ཉེ་བར་བཞག །རྩེ་གཅིག་འབྲིང་གི་དུས་སུ། བག་ལ་ཉལ་སྤངས་བས་རྩེ་གཅིག་ཏུ་སྐྱོང་བས་ལོག་ལྟ་སྐྱེ་མི་འཇུག་པ། ལོག་ལྟ་སོགས་མི་དགེ་བའི་སྤྱོད་པ་ངང་གིས་འགག ། དེས་ཤུགས་འབྱུང་གི་རྟོགས་པ་ནང་ནས་སྐྱེའོ། །དེས་ཡོན་ཏན་གོང་དུ་འཕེལ་ལོ།། །རྩེ་གཅིག་ཆེན་པོའི་སྐབས་སུ། རྫུ་འཕྲུལ་གྱི་རྐང་པ་བཞི་ཉམས་སུ་ལེན་ཏེ། ཡེངས་བ་མེད་པ་འདུན་པའི་རྫུ་འཕྲུལ་གྱི་རྐང་པ། སྙོམས་ལས་མེད་པ་བརྩོན་འགྲུས་ཀྱི་རྐང་པ། མི་མཐུན་ཕྱོགས་སྤོང་པ་དཔྱོད་པའི་རྐང་པ། སེམས་ཟིན་པས་སེམས་ཀྱི་རྫུ་འཕྲུལ་རྐང་པ། གླིང་རས་ཀྱི་ཞལ་ནས། བཞི་གསུམ་བཅུ་གཉིས་ཚོགས་ཀྱི་ལམ། །རྟོགས་པ་གཅིག་གིས་བསྒྲོད་པ་ཡིན། །ཞེས་གསུངས། རྟོགས་པ་དེས་དེད་པའི་དབང་པོ་མི་ཕྱེད་པ། དེས་བརྩོན་འགྲུས་ཀྱི་དབང་པོ་བར་མེད་པ། དེས་བརྗེད་པ་མེད་པ་དྲན་པའི་དབང་པོ། ཏིང་ངེ་འཛིན་དེ་རྒྱུན་ཆད་མེད་པ་ཏིང་ངེ་འཛིན་གྱི་དབང་པོ། སོ་སོར་རྟོག་པའི་
ཤེས་རབ་ཀྱི་དོན་ཏིང་ངེ་འཛིན་རྟོགས། དེ་རྣམས་སྦྱོར་ལམ་རྩེ་གཅིག་ཆེན་པོ། དྲོད་དང་རྩེ་མོའི་བདག་ཉིད་ཅན། །དབང་པོ་ལྔ་ཡི་ངོ་བོ་འདིས། །གཉུག་མའི་དོན་ལ་ལྟ་བ་ཡིན། །ཞེས་གསུངས། དེས་ལོག་ལྟ་འཛོམས་ཏེ་དད་པའི་སྟོབས། ལེ་ལོ་འཇོམས་པ་བརྩོན་འགྲུས་སྟོབས། བག་མེད་འཇོམས་པ་དྲན་པའི་སྟོབས། དེས་གཟུང་འཛིན་འཇོམས་པ་ཏིང་ངེ་འཛིན་གྱི་སྟོབས། དེས་དངོས་པོའི་མཚན་མ་འཇོམས་པས་ཤེས་རབ་ཀྱི་སྟོབས། བཟོད་པ་ཆོས་མཆོག་བདག་ཉིད་ཅན། །སྟོབས་ཆེན་ལྔ་ཡི་ངོ་བོ་འདིས། །མི་མཐུན་ཕྱོགས་རྣམས་འཇོམས་པ་ཡིན། །སྟོབས་དང་དབང་པོ་སྦྱོར་བའི་ལམ། །རྟོགས་པ་གཅིག་གིས་བསྒྲོད་པ་ཡིན། །ཅེས་གསུངས། ཁྲིད་ཆེན་ལས། སེམས་ཀྱི་སེམས་ཉིད་སྐྱེ་མེད་དུ་གསལ་སེང་གི་ཤར་བ་དེའི་རང་ངོས་ནས་འཁོར་གསུམ་གྱི་སྤྲོས་པ་བྲལ་བ་སྤྲོས་བྲལ། རང་སེམས་ནམ་མཁའ་ལྟ་བུའི་ངོ་བོ་དེ་རྟོགས་པ་མངོན་དུ་གྱུར་པ་ཡང་དག་པའི་ཏིང་ངེ་འཛིན། འབད་རྩོལ་མེད་པ་བརྩོན་འགྲུས་བྱང་ཆུབ་ཡན་ལག །ཟུག་རྔུ་མེད་པ་དགའ་བ་བྱང་ཆུབ་ཡན་ལག །དྲི་མ་མེད་པ་སྦྱངས་བའི་བྱང་ཆུབ་ཡན་ལག །
འཁོར་འདས་བྱེ་བྲག་མེད་པ་ཆོས་རབ་འབྱེད་བྱང་ཆུབ་ཡན་ལག །མི་བརྗེད་བཟུང་བ་དྲན་པ་བྱང་ཆུབ་ཡན་ལག །ཀུན་ལ་སྙོམས་པ་བཏང་སྙོམས་བྱང་ཆུབ་ཡན་ལག །བྱང་ཆུབ་ཡན་ལག་མཐོང་བའི་ལམ། །རྟོགས་པ་གཅིག་གིས་བསྒྲོད་པ་ཡིན། །ཅེས་གསུངས་སོ། །སྣང་བ་སྣ་ཚོགས་སུ་སྣང་ཡང་རང་གི་སེམས་ཉིད་དུ་རོ་གཅིག་ཅིང་། བདག་གཞན་འཁོར་འདས་སོགས་གཉིས་ཆོས་ཐམས་ཅད་རོ་གཅིག་ཏུ་གྱུར་པ་རོ་གཅིག །རྟོགས་པ་དེ་མཐའ་དང་བྲལ་བ་ཡང་དག་ལྟ་བ། དེ་བློ་ལས་འདས་པ་ཡང་དག་རྟོགས་པ། བརྗོད་དུ་མེད་པ་ཡང་དག་ངག །རྒྱུན་ཆད་མེད་པ་ཡང་དག་དྲན་པ། རྣམ་གྲོལ་ཟས་ཀྱི་འཚོ་བ། དོན་ཆེན་བསྒྲུབས་པས་རྩོལ་བ། བྱ་བ་རྫོགས་པའི་ལས་ཀྱི་མཐའ། མཉམ་རྗེས་མེད་པས་ཡང་དག་ཏིང་འཛིན་རྡོ་རྗེ་འདྲ་བ། འཕགས་ལམ་བརྒྱད་པ་བསྒོམ་པའི་ལམ། །རྟོགས་པ་གཅིག་གིས་བསྒྲོད་པ་ཡིན། །ཅེས་གསུངས། ཁྲིད་ཆེན་ལས། ཡིན་མིན་ཕན་ཚུན་གང་དུ་བལྟས་ཀྱང་རང་གི་སེམས་ཉིད་དེའང་བསྒོམ་བྱ་སྒོམ་བྱེད་ལ་སོགས་པ་གང་དུ་མ་གྲུབ་པར་འོད་གསལ་དུ་ཆམ་ཆམ་འཆར་བ་སྒོམ་མེད་ཀྱི་
རྣལ་འབྱོར། ཞེས་གསུངས་སོ། །འབྲས་བུ་འོད་གསལ་ཆོས་ཀྱི་སྐུ། །གཟུགས་སྐུ་གཉིས་པོ་ཤུགས་ལས་འབྱུང་། །དབྱེར་མེད་ངོ་བོ་ཉིད་ཀྱི་སྐུ། །ཟག་མེད་བདེ་བ་ཆེན་པོའི་སྐུ། །སངས་རྒྱས་སྐུ་ལྔའི་བདག་ཉིད་ཅན། །ཅེས་དང་། བླ་མ་སངས་རྒྱས་མཇལ་བས་ཚོགས། གསོལ་བཏབ་ངེས་ཤེས་སྐྱེས་པས་སྦྱོར། བྱིན་རླབས་ཀྱི་རྟོགས་པ་ཤར་བ་མཐོང་ལམ། དེ་ཇེ་ཆེ་འཕེལ་བ་སྒོམ་ལམ། མཉམ་རྗེས་མེད་པ་མཐར་ཕྱིན་ལམ། རང་སེམས་མངོན་དུ་གྱུར་པ་རབ་དགའ། དེས་དྲི་མ་ཉོན་མོངས་པ་སྤངས་པ་གཉིས་པ། འོད་གསལ་ལྷན་ཅིག་འོད་བྱེད། དེ་ལ་སངས་རྒྱས་ཀྱི་ཡོན་ཏན་འབྱུང་ཕྱིར་འོད་འཕྲོ། ཟབ་ཅིང་གཏིང་དཔག་དཀའ་བས་སྦྱང་དཀའ། རང་རིག་ཡེ་ཤེས་སུ་མངོན་ཚེ་དུ་གྱུར་པས་དྲུག་པ། འཁོར་བའི་ཕ་རོལ་བརྒལ་ཕྱིར་རིང་དུ་སོང་བ། རང་དོན་དྲི་མས་མི་གཡོ་བ་བརྒྱད་པ། ཤེས་རབ་ཕུན་སུམ་ཚོགས་ཕྱིར་དགུ་པ། རྟོགས་པའི་རྩལ་རྫོགས་པ་བཅུ་པ་རྒྱུན་མཐའ། སྣང་བ་ཆོས་སྐུར་ཤར་བ་བཅུ་གཅིག །ཞེན་མེད་འགྲོ་དོན་བཅུ་གཉིས། དོན་དམ་ཕུན་སུམ་ཚོགས་པ་བཅུ་གསུམ། ཡིད་ལ་མི་བྱེད་བློ་འདས་
བཅུ་བཞི་བདེ་བ་ཆེན་པོ། །འདི་སྐབས་ལ་སྔོན་གྱི་བླ་མ་རྣམས་ཀྱིས་ཉམས་དང་རྟོགས་པའི་རྣལ་འབྱོར་བཞི་སོ་སོར་འབྱུང་བར་གསུངས་པའི་དོན། དང་པོ་ཉམས་ཀྱི་རྣལ་འབྱོར་ལ། དེ་ལྟར་བསམ་གཏན་གྱི་བདེ་གསལ་མི་རྟོག་པ་འདྲེས་ཤིང་ཇི་ཙམ་འཇོག་ལ་དབང་ཐོབ་པ་ཉམས་ཀྱི་རྩེ་གཅིག །དེའི་ངང་ནས་ངོ་བོ་སྟོང་ཉིད་དུ་བཞུགས་པ་ལ་བློས་མ་བཅོས་པར་སྟོང་པ་དང་འབྲེལ་ན་ཉམས་ཀྱི་སྤྲོས་བྲལ། རྗེས་ཐོབ་སྤྱོད་ལམ་ལ་རྐྱེན་གྱིས་མི་ཆོད་པར་རོ་སྙོམས་པ་ཉམས་ཀྱི་རོ་གཅིག །དེ་ནས་རིང་པོར་མི་ཐོགས་པར་འཁོར་ཡུག་ཏུ་སྒོམ་མེད་འབྱུང་བ་རྣམས་སྦྱོར་ལམ་ཡིན་ལ། དེ་ནས་འཇིག་རྟེན་ལས་འདས་པ་ནི་མཐོང་བའི་ལམ་དང་སྒོམ་པའི་ལམ་མོ། །སྔར་བསམ་གཏན་བཞི་པའི་ཡང་དག་ལྟ་བ་དང་། བཞི་པའི་ཉམས་ཀྱི་རྟོགས་དཔྱོད་དང་། དགའ་མི་དགའ། བདེ་སྡུག་དང་དྲན་རིག་གཡོ་བ་དང་རླུང་རྒྱུ་བའི་སྐྱོན་བརྒྱད་དང་བྲལ་ཞིང་རྩེ་གཅིག་ཏུ་གྱུར་པ་དང་འདྲེས་པས། སྐད་ཅིག་གཅིག་དང་ལྷན་ཅིག་པ། འཕགས་པའི་བདེན་པ་བཞི་མངོན་སུམ་དུ་བྱེད་པ་ཐོབ་ན་ཉམས་ཀྱི་སྒོམ་མེད་ཡིན་ཡང་། རྟོགས་པའི་རྣལ་འབྱོར་བཞིའི་རྩེ་
གཅིག་གི་རྣལ་འབྱོར་ཡིན། སྐབས་འདིར་ཆོས་རྣམ་པར་འབྱེད་པའི་ཤེས་རབ་ངོ་བོ་ཏིང་ངེ་འཛིན་དང་འདྲེས་པ་ཐོབ་ལ་དྲན་པ་ལ་གནས་པ་སངས་རྒྱས་ཀྱི་བར་དུ་རྒྱུན་མི་འཆད་པར་སྦྱོར་བའི་བརྩོན་འགྲུས་དང་འབྲེལ་བ། ལུས་དང་སེམས་ཤིན་ཏུ་སྦྱངས་བ། རང་གཞན་གྱི་དོན་རྒྱ་ཆེན་པོ་གྲུབ་པའི་དགའ་བ་ཁྱད་པར་ཅན་ལེ་ལོ་མེད་པའི་བཏང་སྙོམས་ཆེན་པོ་རྣམས་གཅིག་ཏུ་འབྱུང་བ་རྣམས་ཉམས་མྱོང་རྟགས་དང་འབྲེལ་བའོ། །དེ་རྣམས་མ་འབྲེལ་ན་ཉམས་ཡིན་གྱི། ཕྱག་རྒྱ་ཆེན་པོའི་རྟོགས་པ་མ་ཡིན་ནོ། །དེ་ནས་མཐོང་ལམ་ཐོབ་ཅིང་མཐོང་བ་དེ་ཉིད་གོམས་པར་བྱེད་པའི་སྒོམ་པའི་ལམ་སྟེ། སྲིད་ཞི་གཉིས་ཀྱི་མཐའ་སྤངས་པའི་མཉམ་བཞག་གི་ངོ་བོ་ནམ་མཁའི་དཀྱིལ་ལྟ་བུར་སྣང་ཞིང་། འདུ་བྱེད་སྒྱུ་མ་དང་། རྨི་ལམ་ལྟ་བུར་གྱུར་ནས་རྣམ་པར་མི་རྟོག་པའི་ཡེ་ཤེས་བསྒྲུབ་ཅིང་རྗེས་ཐོབ་སྒྱུ་མ་ལྟ་བུར་སེམས་ཅན་ཡོངས་སུ་སྨིན་པ་དང་། ཞིང་ཡོངས་སུ་སྦྱོང་བར་བྱེད་པས་ཇི་སྙེད་མཁྱེན་པའི་ཡེ་ཤེས་བསྒྲུབ། ས་དྲུག་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྩལ་རྫོགས་པའི་ཚེ་རྟོགས་པའི་སྤྲོས་བྲལ་ཏེ། སྲིད་ཞི་གཉིས་ལ་སྐྲག་པ་དང་། འགག་པའི་སེམས་བྲལ་
བས་སོ། །གོང་གི་ཚེ་ཡིད་ཀྱི་དྲི་མ་དྲུངས་ནས་ཕྱུངས་བ་ན་སངས་རྒྱས་ཐམས་ཅད་ཀྱི་གསང་བའི་གནས་ལ་ཞུགས་པས་ས་བརྒྱད་པ་ཐོབ་པ་ན་སྲིད་ཞི་གཉིས་སུ་མི་རྟོག་ཅིང་དེ་བཞིན་ཉིད་དང་། འབྲས་བུ་མཚན་མའི་འདུ་ཤེས་གཉིས་ཀྱིས་མི་གཡོ་བས་རོ་གཅིག་ཆེན་པོ་ཞེས་བྱའོ། །གོང་གི་ཚེ་སེམས་ལ་ཟག་པ་མེད་པའི་ལས་འདུ་བྱེད་དང་། བག་ཆགས་ཕྲ་མོའི་ནད་དང་། ཡིད་ཀྱི་རང་བཞིན་གྱི་ལས་དང་། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བའི་རྣམ་པ་དང་བྲལ་བའི་སངས་རྒྱས་ཀྱི་ས་ཐོབ་པ་ནི་སྒོམ་དུ་མེད་པ་སྟེ། མཐར་ཐུག་པའི་ཕྱིར་རོ། །དོན་འདི་ལྟར་དུ་ཐོབ་ན་ལམ་གྱི་མིང་དུ་བཏགས་ཀྱང་རུང་། མ་བཏགས་ཀྱང་རུང་། རྣལ་འབྱོར་བཞིའི་མིང་གིས་བཤད་པ་ཡིན་ནོ། །གསུངས་སོ། །བདེ་མཆོག་སྡོམ་པ་འབྱུང་བ་ལས། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་པ་ཡིན་ཏེ། །ཉེ་བའི་ཞིང་ནི་འོད་འཕྲོ་བ། །མངོན་དུ་གྱུར་པ་ཚན་དོ་ཞེས། །ཉེ་བའི་ཚནོ་སྦྱང་དཀའ་བའོ། །འདུ་པ་རིང་དུ་སོང་བ་སྟེ། །མི་གཡོ་བར་གྲགས་ཉེར་འདུ་པ། །དུར་ཁྲོད་དེ་བཞིན་ལེགས་བློ་
གྲོས། །ཉེ་བའི་དུར་ཁྲོད་ཆོས་ཀྱི་སྤྲིན། །གནས་སོགས་ས་ཡི་རྣམ་དག་པ། །རིམ་པ་ཇི་བཞིན་བཤད་པ་ཡིན། །ཅེས་གསུངས་ཏེ། སྔགས་ལམ་དབང་བཞིའི་འགྲོས་དང་ཡང་མཚུངས་ཏེ། རྗེ་ནཱ་རོ་པས་ཀྱང་བཞེད་དེ་སནྣ་པས་རོལ་པའི་རྡོ་རྗེ་ལ་གསུངས་པ། ཕྱག་རྒྱ་ཆེན་པོ་རྟོགས་པ་ཡི། །དང་པོ་རྣམ་རྟོག་གློ་བུར་པ། །དེ་ཉིད་ལ་ནི་ལྟ་བ་ཡི། །མ་རིག་པ་ལས་ལོག་པ་ནི། །རིག་པ་གསལ་ལ་འཛིན་མེད་དུ། །རྟོགས་ན་རིག་པའི་དབང་ཞེས་བྱ། །དུག་ལྔ་ཡེ་ཤེས་ལྔར་གནས་ན། །བུམ་པའི་དབང་དུ་འདོད་པའོ། །དེ་ལ་འགག་པ་མེད་པའི་རྩལ། །ཕྱོགས་ཆ་མེད་པར་འཆར་བས་ན། །སྟོང་པའི་ངང་ནས་བདེ་བར་འཆར། །གསལ་བ་གཉིས་པའི་དབང་དུ་འདོད། །ལྷན་ཅིག་སྐྱེས་པའི་ཡེ་ཤེས་ནི། །བདེ་སྟོང་དབྱེར་མེད་ནམ་མཁའི་ངང་། །ཟུང་འཇུག་རོ་གཅིག་ཆེན་པོ་ལ། །སྣང་སེམས་བདེ་བ་ཆེན་པོར་མྱོང་། །ཤེས་རབ་ཡེ་ཤེས་དབང་དུ་བཤད། །དབང་གསུམ་དབྱེར་མེད་སེམས་སུ་འདུས། །སེམས་ཉིད་མཁའ་ལྟར་དག་པ་ལ། །མཉམ་བཞག་རྗེས་འཇོག་མེད་པ་ཉིད། །བདེན་གཉིས་ཟུང་འཇུག་བཞི་པ་
ཡིན། །ཅེས་གསུངས་པ་དང་། རྒྱལ་པོའི་བཙུན་མོ་ཀ་པ་ར་བྷུ་ཛ་ཡིས། བྲམ་ཟེ་ཆེན་པོ་ས་ར་ཧ་ལ་ཞུས་པ་ལ་གསུངས་པ། རིག་པ་རྩེ་གཅིག་བུམ་པའི་དབང་། །བདེ་བ་སྤྲོས་བྲལ་གསང་བའི་དབང་། །གསུམ་པ་མཉམ་པ་ཉིད་དུ་སྦྱོར། །བསྒོམ་དུ་མེད་པ་བཞི་པའོ། །ཞེས་གསུངས། རྗེ་རང་བྱུང་པའི་དགོངས་པ་ལྟར། རྟོགས་པའི་རྣལ་འབྱོར་བཞི་ས་ལམ་དང་སྦྱོར་ཚུལ། ཁྲིད་ཡིག་ཆེན་མོ་ལས། རྩེ་གཅིག་ཚོགས་སྦྱོར་སྤྲོས་བྲལ་མཐོང་བའི་ལམ། །རོ་གཅིག་སྒོམ་མེད་འབྲིང་ཡན་སྒོམ་ལམ་སྟེ། །སྒོམ་མེད་ཆེན་པོ་རྫོགས་པའི་སངས་རྒྱས་སོ། །ཞེས་གསུངས། དེ་ལ་ས་ལམ་དེ་རྣམས་ཐོབ་མཁན་ཡང་མང་ན། དངོས་སུ་རྟགས་དང་ཡོན་ཏན་མེད་པ་ཅི་ཞེ་ན། །རྟོགས་པ་ཤར་ཡང་ཡོན་ཏན་མེད་པ་ནི་ཁྱུང་སྒོ་ང་ནང་ནས་གཤོག་དྲུག་རྒྱས་ཀྱང་སྒོང་རྒྱས་འཕུར་མི་ནུས་པ་ལྟར་གཞན་སྣང་དུ་ཡོན་ཏན་མི་འཆར་ཀྱང་བར་དོར་རང་དོན་ཆོས་སྐུ་མངོན་དུ་གྱུར་ནས། གཞན་སྣང་གཟུགས་སྐུ་གཉིས་འཆར་བར་ངེས་སོ། །རྣལ་འབྱོར་པ་ལུས་རྒྱ། སེང་གེ་མངལ་རྒྱུ། ཁྱུང་སྒོང་རྒྱ། མཁྱེན་པ་ནང་ནས་རྒྱས་ཀྱང་བུམ་ནང་མར་
མེ་ལྟར་མངོན་ཤེས་སོགས་ལུས་འབྱུང་བའི་སྙིགས་མས་བསྒྲིབས་ནས་རུལ་བའི་ལྗང་བུ་ལྟར་དེ་ལྟ་འཁྲུལ་པ་ཅུང་ཟད་ཡོད་པ་བར་དོར་ཡལ་ལོ། །ཞེས་བཀའ་བརྒྱུད་གོང་མ་རྣམས་ཀྱིས་མགྲིན་གཅིག་ཏུ་གསུངས་པ་ལ། འགྲོ་བའི་མགོན་པོ་ས་སྐྱ་པཎྜི་ཏས། ཅོ་འདྲའི་ཚུལ་དུ་བགག་པ་མཛད་པ་ནི། །ལ་ལ་ཞི་གནས་ཅུང་ཟད་དང་། །སྣང་སྟོང་རྟོགས་པ་ཕྲ་མོ་ལ། །མཐོང་ལམ་ཡིན་ཞེས་ངོ་སྤྲོད་བྱེད། །ཁྱུང་གི་སྒོང་རྒྱ་ཇི་བཞིན་དུ། །ལུས་ཀྱི་རྒྱ་ཡིས་བཅིངས་པས་ན། །ད་ལྟ་ཡོན་ཏན་མི་འབྱུང་བས། །ལུས་རྒྱུ་ཞིག་ནས་ཤི་མ་ཐག །ཡོན་ཏན་ཕྱི་ནས་འབྱུང་ཞེས་ཟེར། །ཐེག་པ་ཆེན་པོའི་མདོ་རྒྱུད་ལས།། །འདི་འདྲའི་ཆོས་ལུགས་བཤད་པ་མེད། །ཉི་མ་དེ་རིང་ཤར་བ་ཡི། །འོད་ཟེར་ནངས་པར་འབྱུང་བ་མཚར། །ཚེ་འདིར་མཐོང་ལམ་སྐྱེས་པ་ལ། །ཡོན་ཏན་ཤི་ནས་འབྱུང་བ་ནི། །བླུན་པོ་རྣམས་ཀྱི་རྫུན་རབ་ཡིན། །མདོ་རྒྱུད་ཀུན་དང་མི་མཐུན་པས། །འདི་འདྲའི་ཆོས་ལུགས་མཁས་པས་སྤངས། །ཞེས་གསུངས་པ་ནི། ངེས་པའི་དོན་མ་ཡིན་ཏེ། ས་པཎ་ཉིད་འཇམ་དབྱངས་དངོས་ཡིན་པར་ཡོངས་སུ་གྲགས་ན། ཉིད་ཀྱི་རྣམ་ཐར་ན། །
རིག་པའི་གནས་ལྔ་ལ་མཁས་ཚུལ་རྒྱ་ཆེར་འདུག་སྟེ། རིག་པའི་གནས་ལྔ་ལ་མཁས་པའི་པཎྜི་ཏ་ནི། ཕྱི་རོལ་མུ་སྟེགས་པ་ལ་ཡང་སྟོང་ཕྲག་མང་པོ་བྱུང་བས། འཇམ་དབྱངས་ཡིན་པའི་རྟགས་སུ་མ་གྲུབ། འཇམ་དབྱངས་ཡིན་ན་ས་བཅུ་ཡིན་པས། ས་བཅུ་པའི་ཡོན་ཏན་དབུ་མ་འཇུག་པ་ལས། བ་སྤུའི་ཁུང་ནས་རྫོགས་པའི་སངས་རྒྱས་རྣམས། །གྲངས་མེད་བྱང་ཆུབ་སེམས་དཔའ་འཁོར་དང་བཅས། །གཞན་ཡང་ལྷ་དང་མི་དང་ལྷ་མ་ཡིན། །སྐད་ཅིག་གཅིག་ལ་སྟོན་པར་ནུས་པ་ཡིན། །ཞེས་གསུངས་པ་ལྟ་བུའི་ཡོན་ཏན་ཆེ་ཙམ་ཡང་རྣམ་ཐར་ན་མི་འདུག་པས་སོ། །མདོ་སྡེ་པདྨ་དཀར་པོ་ལས། ཀུན་དགའ་བོ་འདི་ས་བཅུ་པ་ཡིན་ཀྱང་ཅི་ཡང་མ་ཐོབ་པར་སེམས་སོ། བྱང་ཆུབ་སེམས་པའི་གསང་ཆེན་གྱི་བྱིན་གྱིས་བརླབས་པས་མི་ཤེས་སོ། །ཞེས་གསུངས་ཏེ། སྟོན་པ་འདས་རྗེས་བར་དགྲ་བཅོམ་པ་མ་ཐོབ་པར། རྟགས་ཅི་ཡང་མེད་སྐད། བྱམས་པ་ལུང་བསྟན་པའི་མདོ་ལས། དགེ་སློང་མ་ཕམ་པ་འདི་བསྐལ་བཟང་སངས་རྒྱས་ལྔ་པར་ལུང་བསྟན་ནས། འདི་ལ་རྟགས་དང་ཡོན་ཏན་ཅི་ཡང་མི་འདུག་པས། འདི་རྒྱལ་བ་བྱམས་
པར་འགྱུར་སྲིད་དམ། ཞེས་དགེ་སློང་རྣམས་ཐེ་ཚོམ་དུ་གྱུར་པས། །བཅོམ་ལྡན་འདས་ཀྱིས་བྱམས་པ་ལུང་བསྟན་གྱི་མདོ་གསུངས་པ་དེས། རྟགས་དང་ཡོན་ཏན་ཡོད་མེད་ཀྱིས་རྟོགས་པ་མཐོ་དམན་གྱི་ཚོད་མི་ཟིན་པ་དེས་གསལ། རྗེ་འཇིག་རྟེན་གསུམ་མགོན་གྱིས། འཚོགས་པ་ཁྲི་ཚོ་བཅོ་བརྒྱད་ཀྱི་དབུས་སུ། རྟགས་དང་ཡོན་ཏན་ཡོད་ན་མཐོང་ལམ་ཐོབ། མེད་ན་མ་ཐོབ་ཟེར་བའི་ལུང་། བཀའ་བསྟན་བཅོས་ཚད་ལྡན་ནས་རྙེད་ན། ངའི་ཆིབས་པ་འདི་ལ་གོས་ཡུག་གཅིག་བཏགས་ནས་སྦྱིན། ཞེས་ཉི་མ་མང་པོར་གསུངས་ཀྱང་སུས་མ་རྙེད་སྐད། ངེས་པའི་དོན་ནི། རྗེ་ཕག་གྲུའི་ཞལ་ནས། འདི་ལ་ཐེ་ཚོམ་མི་དགོས་ཏེ། །ཉི་མ་ཤར་བ་ཙམ་གྱིས་ནི། །ས་གཞི་དྲོ་བར་མི་ནུས་ཀྱང་། །རིམ་ང་བཞིན་འོད་ཟེར་རྒྱས་ནས་དྲོས། །ནོར་བུ་ལོན་པ་ཙམ་གྱིས་ནི། །དགོས་འདོད་འབྱུང་བར་མི་འགྱུར་ཏེ། །མཆོད་དང་གསོལ་བ་བཏབ་ན་འབྱུང་། །བྱིས་པ་མི་ལས་མ་འདས་ཀྱང་། །སྐྱེས་མ་ཐག་ཏུ་སྟོབས་ལྡན་མིན། །རིམ་གྱིས་བསླབས་པས་སྣ་ཚོགས་ཤེས། །དེ་བཞིན་བདེན་པའི་དོན་མཐོང་ཡང་། །མ་གོམས་ཡོན་ཏན་འབྱུང་མི་འགྱུར། །
གོམས་པ་ལ་ནི་མཆོག་ཐོབ་བོ། །ཐུན་མོང་གྲུབ་ཆེན་བརྒྱད་ལ་སོགས། །འདི་ཀུན་རྟེན་ཅིང་འབྲེལ་བའི་མཐུས། །ང་རྒྱལ་རློམ་པར་བཅས་པ་ཡིས། །མངོན་པ་ཤེས་པ་འཆར་བས་ཕུང་། །མཆོག་ལ་མ་སླེབ་དེ་ཡིས་སྒྲིབ། །ལྷ་སོགས་འགྲོ་བ་མ་ལུས་ལ། །ལས་ཀྱི་རྫུ་འཕྲུལ་བསམ་མི་ཁྱབ། །དེ་ཀུན་ཐར་པའི་རྒྱུར་མ་གསུངས། །ཡང་དག་བདེན་རྫུན་ཟད་པ་ལ། །རྟགས་དང་མཚན་མ་ག་ལ་ཡོད། །འོན་ཀྱང་འདི་ལ་ཐེ་ཚོམ་འབྱུང་། །ཞེས་དང་། སྐྱེ་མེད་ཞང་གི་ཞལ་ནས། གཉིས་མེད་རྟོག་མ་ཐག་ཉིད་དུ། །སྡུག་བསྔལ་སངས་བར་མ་གྱུར་ཅིང་། །ཡོན་ཏན་ནུས་པ་མ་སྐྱེས་ཀྱང་། །མཐོང་ལམ་མིན་ཞེས་སུ་ཞིག་སྨོད། །ནངས་པར་ཉི་མ་ཤར་མ་ཐག །ཆབ་བྲོམ་ཞུ་བར་མ་ནུས་ཤིང་། །ས་རྡོ་དྲོས་པར་མ་གྱུར་ཀྱང་། །ཉི་མ་མིན་ཞེས་སུ་ཞིག་བརྗོད། །ཅེས་དང་། མདོ་སྔགས་ཀྱི་འབྲས་བུ་སངས་རྒྱས་དོན་དུ་གཉེར་བ་ཡིན་པས། གནས་ཕྱོགས་སྐབས་ཀྱི་རྟགས་དང་ཡོན་ཏན་ཡོད་མེད་ལ་མ་ལྟོས། ལས་དབང་གི་མངོན་ཤེས་དང་རྫུ་འཕྲུལ་ཕྲན་བུ། མཁའ་ལ་རྒྱུ་བའི་ཡི་དྭགས་དང་འབྱུང་པོ། བྱ་དང་གཅན་གཟན་འགའ་
པང་ཡོད་པས། ཚད་མ་རྣམ་འགྲེལ་ལས། ཚུར་ཤོག་བྱ་རྒོད་བསྟེན་པར་བྱོས། །ཞེས་སོགས་གསུངས། །ཞི་གནས་ཁ་རྐྱང་ལ་བསྟན་པའི་མངོན་ཤེས་གྲུབ་རྟགས་ནི། མུ་སྟེགས་པ་དང་། བོན་ལ་ཡང་ཡོད་པས། གླིང་རྗེ་རས་པས། གྲུབ་ཆེན་བརྒྱད་ལ་མངའ་བརྙེས་ཀྱང་། །ངོ་མཚར་ཆེ་ཙམ་མ་གཏོགས་པ། །བྱང་ཆུབ་ཐོབ་ལ་ཕན་རྒྱུ་ཆུང་། །ཞེས་གསུངས། འདི་སྐབས་མདོ་སྔགས་འབྲས་བུའི་ཁྱད་པར་ནི། དགེ་བའི་བཤེས་གཉེན་འགའ་ཞིག་གི་བཞེད་པ་ལས། མདོ་ལུགས་ཁོ་ནས་སངས་རྒྱས་མི་ཐོབ་པས། ས་བརྒྱད་པ་ནས་སྔགས་ལ་འཇུག་དགོས་ཟེར། ལ་ལས་ས་བཅུའི་མཇུག་ཏུ། ཕྱོགས་བཅུའི་སངས་རྒྱས་ཀྱི་འོད་ཟེར་ཆེན་པོས་དབང་བསྐུར་བ་དེས་ཆོག །སྔགས་ལ་འཇུག་མི་དགོས་མདོ་ལུགས་ཀྱི་སངས་རྒྱས་ཡོད་ཟེར། ལ་ལ་ན་རེ། མདོ་ནས་རྟོགས་པའི་རྣམ་བཞག་གསུངས་པ། བྲོད་པ་བསྐྱེད་པ་ཙམ་སྟེ། སྔགས་ལ་མ་བརྟེན་པར་རྟོགས་པ་མཚན་ཉིད་པ་སྐྱེ་མི་སྲིད། མདོ་ནས་གསུངས་པ་ཐམས་ཅད་དབང་བཞི་དང་འབྲེལ་དགོས། ཚོགས་ལམ་ཆེན་པོ་ནས་སྔགས་ལ་ཞུགས། སངས་རྒྱས་དང་མཇལ་
བས། དེས་ཐེག་པའི་མཐའ་སྟོན་པས་སོ། །ཞེས་ཟེར་ཏེ། དེ་ལྟར་ན་ཤེར་ཕྱིན་ཡུམ་སྲས་བཅུ་བདུན་སོགས་བཀའ་བར་པ་དང་། དཀོན་མཆོག་བརྩེགས་པ་མྱ་ངན་འདས་མདོ་སོགས་བཀའ་ཐ་མ། དབུ་མ་རིག་པའི་ཚོགས་དྲུག་བྱམས་ཆོས་སྡེ་ལྔ་སོགས་བཀའ་བསྟན་བཅོས་གཞུང་ཆེ་བ་ཐམས་ཅད་ལ་སེར་བརྒྱབ་པར་འགྲོ་བས་མི་འཐད། འཇུག་ཊིཀ་མི་བསྐྱོད་རྡོ་རྗེས་མཛད་པ་ལས། །རང་ལུགས་མདོ་ལུགས་ཀྱི་སངས་རྒྱས་བསྒྲུབས་པས་སྔགས་ལུགས་ཀྱི་སངས་རྒྱས་ཞོར་བྱུང་དུ་མི་ཐོབ་ལ། སྔགས་ལུགས་ཀྱི་སངས་རྒྱས་བསྒྲུབས་པས་མདོ་ལུགས་ཀྱི་སངས་རྒྱས་ཞོར་བྱུང་དུ་འགྲུབ་པར་བཞེད་དོ། །དེ་བཞིན་དུ་ཨོ་རྒྱན་རིན་པོ་ཆེའི་ཞལ་ནས། དེ་ཡང་རྫོགས་ཆེན་གྱི་ཆོས་ཉིད་ཟད་ས་དང་། མདོ་ལུགས་ཀྱི་ལམ་ལྔ་ལས། མཐར་ཕྱིན་པའི་ལམ་དང་། ཡོན་ཏན་མཉམ་མོ་སྙམ་ན་གཏན་ནས་མི་མཉམ་སྟེ། མདོ་ལུགས་ཁོ་རང་གི་ས་བཅུ་ལམ་ལྔའི་ཡོན་ཏན་བརྒྱ་ཕྲག་དྲུག་ཅུའི་ཡོན་ཏན་རྩལ་རྫོགས་ནས་མཐར་ཕྱིན་པ་ཡིན་ཀྱང་། ད་རུང་སྔགས་ཀྱི་ཡོན་ཏན་རྩལ་མ་རྫོགས་པར་མཐོང་ཞིང་། མ་རྫོགས་པའི་ཕྱིར་རོ། །ཆོས་ཉིད་ཟད་ས་དང་།
མཐར་ཕྱིན་པའི་ལམ་གཉིས། ཁྱད་པར་ཤིན་ཏུ་གལ་ཆེའོ། །འདིར་ཁ་ཅིག་སངས་རྒྱས་ལ་ཡེ་ཤེས་རྒྱུན་ཆད་ཡིན་ཟེར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས་ཀྱང་ཡང་དག་པར་རྫོགས་པའི་སངས་རྒྱས་ནི། ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་བརྙེས་པ་དེ། ཞེས་དང་། ཅིའི་ཕྱིར་སངས་རྒྱས་ཞེས་བྱ་ན། མ་རིག་པ་གཉིད་དང་འདྲ་བ་ལས་སངས་ནས། ཤེས་བྱ་གཉིས་ལ་བློ་རྒྱས་པས་ན་སངས་རྒྱས་ཞེས་ཟེར་རོ། །དེ་ལྟར་ཡང་། མ་རིག་གཉིད་ལས་སངས་ཕྱིར་དང་། །བློ་རྒྱས་གཉིས་ཕྱིར་སངས་རྒྱས་ཡིན། །ཞེས་གསུངས། དེ་ཡང་མ་རིག་པ་གཉིད་ལས་སངས་ཞེས་པའི་དོན་ནི་སྔར་བཤད་པ་སྤངས་པ་ཕུན་སུམ་ཚོགས་པ་ཉིད་ཡིན་ནོ། །ཤེས་བྱ་ལ་བློ་རྒྱས་ཞེས་བྱ་བ་ཡང་སྔར་བཤད་པའི་ཡེ་ཤེས་ཕུན་སུམ་ཚོགས་པ་ཉིད་ཡིན་ནོ། །དབྱེ་བ་བཤད་ན། སངས་རྒྱས་ལ་སྐུ་རྣམ་པ་གསུམ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །དེ་ལྟར་ཡང་། གསེར་འོད་དམ་པའི་མདོ་ལས། དེ་བཞིན་གཤེགས་པ་ཐམས་ཅད་ལ་སྐུ་གསུམ་མངའ་སྟེ། ཆོས་ཀྱི་སྐུ་དང་། ལོངས་སྤྱོད་
རྫོགས་པའི་སྐུ་དང་། སྤྲུལ་པའི་སྐུའོ། །ཞེས་གསུངས་སོ། །འོ་ན་གཞུང་ཁ་ཅིག་ལ་ནི་སྐུ་གཉིས་སུ་བཤད་པ་ཡོད། སྐུ་བཞིར་བཤད་པ་ཡང་ཡོད། སྐུ་ལྔར་བཤད་པ་ཡང་ཡོད་དོ། ཞེ་ན། དེ་ལྟར་བཤད་ཀྱང་། སྐུ་ཐམས་ཅད་སྐུ་གསུམ་པོ་རང་དུ་འདུས་པ་དེ་ཡིན་ཏེ། མདོ་སྡེ་རྒྱན་ལས། སྐུ་གསུམ་ལ་དམིགས་སངས་རྒྱས་སྐུ། །སྐུ་བསྡུས་པ་ནི་ཤེས་པར་བྱ། །ཞེས་གསུངས། སྐུ་གསུམ་གྱི་རྣམ་པར་བཞག་པ་བཤད་ན། ཆོས་ཀྱི་སྐུ་ནི་སངས་རྒྱས་དངོས་ཡིན་ཏེ། འཕགས་པ་བརྒྱད་སྟོང་པ་ལས་ཀྱང་། དེ་བཞིན་གཤེགས་པ་ནི་གཟུགས་ཀྱི་སྐུར་མི་ལྟ་སྟེ། དེ་བཞིན་གཤེགས་པ་ནི་ཆོས་ཀྱི་སྐུའོ། །ཞེས་གསུངས་སོ། །མདོ་ཏིང་འཛིན་རྒྱལ་པོའི་མདོ་ལས་ཀྱང་། རྒྱལ་བའི་དབང་པོ་གཟུགས་ཀྱི་སྐུར་མི་ལྟ། ཞེས་གསུངས་སོ། །གཟུགས་སྐུ་གཉིས་ནི་ཆོས་ཀྱི་སྐུའི་བྱིན་རླབས་དང་། གདུལ་བྱའི་སྣང་བ་དང་། སྔོན་གྱི་སྨོན་ལམ་ལས་གྲུབ་པའི་སྐུ་སྟེ། དེ་གསུམ་འཛོམ་པ་ལས་བྱུང་བ་ཤེས་པར་བྱའོ། །དེ་ཡང་ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་འདི་ནི། ཐེག་པ་དགུའི་ཉམས་ལེན་ཐམས་ཅད་ཚང་བ་
ཡིན་ཏེ། ས་ལམ་དང་འབྲས་བུ་ཡང་། གྲུབ་ཆེན་ཀརྨ་པཀིས་ཞལ་ནས། ཐེག་དགུའི་སྒྲ་དོན་རྟོགས་པ་དང་། །ནཱ་རོའི་བརྒྱུད་པས་བྱིན་བརླབས་ཤིང་། །རྣལ་འབྱོར་རང་བྱུང་རྡོ་རྗེ་ཡང་། །དག་སྣང་ས་ར་ཧ་དང་མཇལ། །སངས་རྒྱས་རྣམས་ཀྱི་བསྟན་པ་ནི། །རྒྱ་མཚོ་མཐའ་ཡས་གཏིང་དཔག་དཀའ། །དབང་པོ་རབ་འབྲིང་ཐ་མ་རྣམས། །འགའ་ཞིག་བསྒྲོད་ནས་མངོན་སངས་རྒྱས། །ཅིག་ཆར་བ་ཡི་གང་ཟག་རྣམས། །རྟོགས་ཐོབ་དུས་མཚུངས་ཀུན་ཏུ་བཟང་། །ས་ལམ་བསྒྲོད་དང་མི་བསྒྲོད་པའི། །འཁོར་འདས་ཀུན་ལ་ཁྱབ་པར་ཡང་། །ས་ལམ་རིམ་པ་ཉི་ཤུ་གཅིག །ཡང་དག་དོན་གྱི་འོག་མིན་དུ། །ཐམས་ཅད་རྫོགས་པ་སྤྱི་གཅིག་པ། །གནས་ལུགས་ཀུན་བཟང་ཆོས་ཀྱི་དབྱིངས། །རྫོགས་ཆེན་ཨ་ཏི་ཡོ་ག་ནི། །ཐེག་པ་ཀུན་ལས་འདས་པ་སྟེ། །ས་ལམ་རིམ་པ་བཅུ་དྲུག་ཀྱང་། །ཡང་དག་དོན་གྱི་འོག་མིན་དུ། །གདོད་ནས་ཐམས་ཅད་རང་བཞིན་རྫོགས། །འབྲས་བུ་ལམ་རྟགས་བྱེ་བྲག་རྣམས། །རྩོལ་མེད་ལྷུན་གྱིས་གྲུབ་པ་ཡི། །རང་རིག་འོག་མིན་གནས་སུ་རྫོགས། །ཞེས་གསུངས་སོ། །མཁའ་འགྲོ་སྙིང་
ཏིག་ལས་ཀྱང་། ཐོབ་པ་གསུམ་གྱི་གཟེར་ཐེབ་པ་ནི། ཆོས་སྐུ་སྐྱེ་བ་མེད་པ་ཐོབ་པས། རང་སེམས་ཆོས་སྐུ་ལ་རང་དབང་ཐོབ། ལོངས་སྐུ་འགགས་པ་མེད་པ་ཐོབ་པས། རང་སེམས་ལོངས་སྤྱོད་རྫོགས་པའི་སྐུ་ལ་རང་དབང་ཐོབ། སྤྲུལ་སྐུ་གཉིས་སུ་མེད་པ་ཐོབ་པས། རང་སེམས་སྤྲུལ་པའི་སྐུ་ལ་རང་དབང་ཐོབ། ཚད་ནི་གདེང་བཞིའི་རྣལ་འབྱོར་ཉིད་ཅེས་པས། ཡར་སངས་རྒྱས་ལ་རེ་བ་མེད་པའི་གདེང་ཐོབ། རང་སེམས་རིག་པ་མ་གཏོགས་པ། སངས་རྒྱས་ལོགས་ན་མེད་པར་ཐག་ཆོད། སངས་རྒྱས་ཀྱི་ཆེ་བའི་ཡོན་ཏན་དང་། མཛད་པའི་ཕྲིན་ལས་དང་། བརྩེ་བའི་ཐུགས་རྗེ་ཐམས་ཅད་ཀྱང་། རང་སེམས་རིག་པའི་རང་རྩལ་དུ། ཐག་ཆོད་ནས་གདེང་ཐོབ་པའོ། །མར་ངན་སོང་གསུམ་དུ་དམྱལ་བའི་སྡུག་བསྔལ་ཐམས་ཅད་ཀྱང་། རང་སེམས་འཁྲུལ་པ་མ་གཏོགས་ལོགས་ན་མེད་པ་ཐག་ཆོད། ངན་སོང་གསུམ་དང་དམྱལ་བ་ཚ་གྲང་དང་སྡུག་བསྔལ་ཚེ་ཚད་རྣམས་ཀྱང་། མ་རིག་འཁྲུལ་པའི་རྩལ་དུ་ཐག་ཆོད་པས། ཕྱིར་འཁོར་བ་ལས་མི་ལྡོག་པའི་གདེང་གཉིས་དང་བཞིའོ། །རེ་དོགས་མེད་པའི་འབྲས་བུ་མངོན་དུ་
གྱུར་ནས། སྐུ་ལྔ་དང་། ཡེ་ཤེས་ལྔ་དང་། ཕྲིན་ལས་བཞི་ཡི་བདག་ཉིད་དུ་སངས་རྒྱས་ནས། སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ། །སེམས་ཅན་ཐམས་ཅད་ཀྱི་དོན་ཇི་སྲིད་འཁོར་བ་མ་སྟོངས་ཀྱི་བར་དུ། རྒྱུན་མི་ཆད་པར་ལྷུན་གྱིས་གྲུབ་པའོ། །ཞེས་དང་། ཁྲིད་ཆེན་ལས། སྒོམ་མེད་མཐོར་ཕྱིན་པ་རྫོགས་པའི་སངས་རྒྱས་ཐོབ་པ་ཡིན་ལ། དེ་ལའང་དབྱིངས་དང་ཡེ་ཤེས་རོ་མཉམ་པ་བཞིའི་དོན་ལ་ཞི་ལྷག་ཟུང་དུ་འཇུག་པ་མཆོག་བསྒྲུབས་པས་འབྲས་བུ་ཆོས་ཀྱི་སྐུ་དང་། གཟུགས་ཀྱི་སྐུ་གཉིས་མངོན་དུ་བྱེད་དེ། ཆོས་སྐུ་ནི་ལྷག་མཐོང་གི་ངོ་བོ་རྟོགས་པའམ། །རྣམ་པར་མི་རྟོག་པའི་རང་བཞིན་མཐར་སོན་པའི་འབྲས་བུ་དང་། གཟུགས་སྐུ་ནི་སྒྱུ་མ་ལྟ་བུའི་ཏིང་འཛིན་ལ་སོགས་པ་མངོན་དུ་བྱས་པ་ལས། ཇི་སྙེད་མཁྱེན་པའི་ཤེས་རབ་ཀྱི་ཆ་ལས་འབྱུང་བ་ཡིན་ལ་དེའང་སྤྲོས་པ་ཐམས་ཅད་དང་བྲལ་བ་ནི། ཆོས་སྐུ་དག་མ་དག་གང་འདུལ་གྱི་ཚུལ་གྱིས་སེམས་ཅན་གྱི་དོན་མཛད་པར་གཟུགས་སྐུ་སྟེ། འདི་ལ་སྐུ་གསུམ་དང་བཞི་ལ་སོགས་པ་དབྱེ་རུང་བའོ། །དེས་ན་རང་དོན་ཆོས་སྐུ་ལས་མ་གཡོས་བཞིན་གཞན་དོན་
གཟུགས་སྐུ་གཉིས་ཀྱིས་སེམས་ཅན་གྱི་དོན་མཛད་ཅིང་། དེའང་ཕྲིན་ལས་རྣམ་པ་བཞིའི་སྒོ་ནས་འགྲོ་དོན་རྒྱ་ཆེན་པོ་ཀུན་ཁྱབ་ཐ་གྲུར་རྒྱས་པར་འབྱུང་ངོ་། །དེར་མ་ཟད་བྱེད་པ་པོ་ལ་ཡོད་པའི་ཕྲིན་ལས་ཀྱིས་རང་དོན་མཐར་ཐུག་རྫོགས་སོ། །བྱ་བ་ཡུལ་ལ་ཡོད་པའི་ཕྲིན་ལས་ཀྱིས་འཁོར་བ་མ་སྟོངས་ཀྱི་བར་དུ་སེམས་ཅན་ཐམས་ཅད་ཀྱི་དོན་རྒྱུན་ཆད་མེད་པར་མཛད་ནས་གང་ཟག་གི་དབང་པོའི་རིམ་པ་དང་བསྟུན་ནས་རིམ་གྱིས་ལམ་ལ་ཁྲིད་དེ། གནས་ལུགས་ཕྱག་རྒྱ་ཆེན་པོ་ལྷན་ཅིག་སྐྱེས་པའི་ཡེ་ཤེས་སྐུ་གསུམ་ཡེ་ཤེས་ལྔའི་བདག་ཉིད་ཅན་འདི་ཉིད། ཚེ་གཅིག་ལུས་གཅིག་ལ་སྟན་ཐོག་གཅིག་ཏུ་མངོན་དུ་གྱུར་པའི་ཐབས་མཆོག་ཏུ་གྱུར་པ་འདི་ཉིད་བསྟན་པས་གདུལ་བྱ་རྣམས་ཀྱི་རྒྱུད་ལ་མཆོག་དང་ཐུན་མོང་གི་དངོས་གྲུབ་ཐམས་ཅད་འབད་མེད་དུ་བསྐྲུན་ཏེ། ཕྱག་རྒྱ་ཆེན་པོའི་ཡེ་ཤེས་རྒྱུད་ལ་སྐྱེས། རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱས་ཏེ། ཕྲིན་ལས་ཕྱག་རྒྱ་ཆེན་པོའི་སྒོ་ནས་འགྲོ་བ་སེམས་ཅད་ཐམས་ཅད་སྨིན་གྲོལ་གྱི་ལམ་ལ་འགོད་པའི་མཐུ་ཕུན་སུམ་ཚོགས་པ་ཐོབ་པར་འགྱུར་རོ། །ཞེས་དང་། ཟབ་མོ་ནང་དོན་ལས། རྒྱལ་བ་
ནམ་མཁའི་སྐུ་ཅན་ཡེ་ཤེས་ཉི་མའི་དཀྱིལ་འཁོར་ལས། །ཕྱོགས་བཅུའི་འཇིག་རྟེན་ཀུན་ཏུ་གཟུགས་སྐུ་འཁོར་བ་ཇི་སྲིད་སྟོན། །ལྷ་ཡི་རྔ་སྒྲ་ལྟ་བུའི་གསུང་ནི་འདུ་མི་མཛད་པར་ཡང་། །ནམ་མཁའི་མཐའ་མཉམ་འབད་མེད་འགྲོ་བ་ཀུན་གྱིས་ཐོས་པར་མཛད། །ཐུགས་ནི་ཡིད་བཞིན་ནོར་ལྟར་འབད་མེད་ཡེ་ཤེས་ལྷན་ཅིག་ཏུ། །སྤྲོས་པ་མི་མངའ་སྤྲོས་ལྡན་རྣམས་ལ་ཡིད་བཞིན་རེ་བ་སྐོང་། །སེམས་ཅན་ཉོན་མོངས་ལྷན་ཅིག་འཇུག་ཀྱང་ཁྱོད་ལ་གོས་པ་མེད། །དེ་ཕྱིར་རང་བྱུང་རྒྱལ་བ་ཁྱོད་ལ་བདག་ནི་གུས་པས་ཕྱག་འཚལ་ལོ། ། ཞེས་གསུངས་སོ། །ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ས༽ །ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་རྣལ་འབྱོར་བཞི་རིམ་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། འདི་ཉིད་བསྒོམས་པས་ས་ལམ་ཇི་ལྟར་བསྒོད་པའི་ཚུལ། མདོ་རྒྱུད་དང་གྲུབ་ཐོབ་རྣམས་ཀྱི་ཇི་ལྟར་གསུངས་བཞིན་བཤད་ན། མདོ་ལུགས་ཀྱི་ས་བཅུ་ལམ་ལྔ་དང་། སྔགས་ལུགས་ཀྱི་རྣལ་འབྱོར་བཞི་རིམ་གཉིས། མདོ་སྔགས་ལམ་སོ་སོ་ཡིན་པས། །ཁྲིག་ཁྲིག་འགྲིག་པར་ཡང་དཀའ། དེ་བཞིན་དུ་རྫོགས་ཆེན་གྱི་སྣང་བཞི་དང་ཡང་འགྲིག་དཀའ་སྟེ་ལམ་སོ་སོ་ཡིན་པའི་ཕྱིར། ཞང་རིན་པོ་ཆེའི་ཞལ་ནས། ཕྱག་རྒྱ་ཆེན་པོ་གཅིག་ཆོད་ལ། །རྨོངས་པས་ས་ལམ་རྩི་བ་
འཁྲུལ། །ཞེས་གསུངས། དེ་ནི་གཅིག་ཆར་བ་དང་། ཐོད་རྒལ་བ་ལ་དགོངས། རིམ་སྐྱེས་པ་ལ་ས་བཅུ་ལམ་ལྔ་དང་ཡང་བསྟུན་པར་མཛད་པས། ནཱ་རོ་པའི་ཞལ་ནས། དང་པོ་རྩེ་གཅིག་ཉམས་སུ་མྱོང་། །ཞེས་དང་། ཁྲིད་ཆེན་རྩ་ཚིག་ལས། རྩེ་གཅིག་ཞི་ལྷག་དབྱེར་མེད་དོན་ལ་གནས། །ཞེས་གསུངས་པའི་དོན། སྟོང་གསལ་ནམ་མཁའ་ལྟ་བུའི་དོན་ལ་གནས་པ་ནི་རྩེ་གཅིག །དེའི་དུས་སུ་སྒོམ་གྱི་ངོ་བོ་སྟོང་གསལ་ནམ་མཁའ་ལྟ་བུ་རྟོགས་ཀྱང་། གསལ་སྟོང་ནམ་མཁའ་ལྟ་བུ་ལ་ངེས་ཤེས་ཀྱི་ལྷག་མཐོང་མ་ཤར་བས། རྩེ་གཅིག་མུན་ལ་
ཁྱི་སྣེར་འཁྱམས། དེ་དུས་རྗེས་ཤེས་ཐ་མལ་ངོས་འཛིན་དུ་ཨ་འཐས་པས། མཉམ་བཞག་གི་དུས་གསལ་སྟོང་དུ་རིག་ཀྱང་། རྗེས་ཤེས་ཐ་མལ་དུ་འཁྲུལ་པས་དངོས་འཛིན་གྱི་དྲི་མ་ཡོད། ལས་ཀྱི་དྲི་མ་དག །མ་དྲན་ན་སྒོམ་དང་བྲལ་བས་བྲལ་བ་ཡོད། དྲན་ཡང་ངོ་བོ་མ་མཐོང་བས་ཐོབ་པ་མེད། ཉམས་ལ་སྒྲོ་འདོགས་མ་ཆོད། བསྒོམ་བྱ་སྒོམ་བྱེད་དང་བཅས་པས། སེམས་ཉིད་ཨ་འཐས་སུ་སྒོམ་པའི་དུས་ཡིན། གཟུགས་ཀྱི་ཕུང་པོ་སྒོ་ལྔའི་རྣམ་པར་ཤེས་པ་དག་སྟེ། ངོ་བོ་མ་གྲུབ་པའི་རང་སྟོང་དུ་རིག །འཛིན་པ་དང་བཅས་པ་འབའ་ཞིག་ཡིན་པས། ཉམས་རྟོགས་དྲི་མ་ཅན། རིག་པ་དྭངས་བའི་འཆར་སྒོ་ལ། རྒྱུ་འབྲས་ཕྲ་རགས་ལ་འཕྲིག་ཚུད་ཀྱང་། དངོས་འཛིན་དུ་ཡོད་པས། རྒྱུ་འབྲས་ལ་ཨ་འཐས། མ་ཡེངས་ན་མཉམ་བཞག་ཡེངས་ན་རྗེས་ཐོབ་ཡིན། འདིའི་དུས་སུ་མཚན་འཛིན་སྤངས་ཏེ་བློ་བྲལ་གྱི་ངང་ནས་ཞི་གནས་གཙོ་བོར་བསྒོམ། གསལ་སྟོང་གི་རང་ངོ་ཤེས་པའོ། །དྭགས་པོ་རིན་པོ་ཆེས། རྩེ་གཅིག་གི་རྣལ་འབྱོར་ནི། གསལ་ལ་མ་འགག་པ་སྐད་ཅིག་མའི་ཤེས་པ་དེ་ཡིན་གསུངས། ས་ར་ཧས། དྲན་པ་མེད་པར་
འཇུས་པས་སྟོང་པ་མི་འགོག་པར། ཤེས་པ་རང་ལུགས་སུ་བཞག་ན་གནས་པར་འགྱུར་ཞེས་དང་། །འདི་ལ་གནས་ན་བདེ་ཉམས་འབྱུང་སྟེ། དང་པོ་སྣང་བ་སྟོང་པར་མྱོང་བའི་སེམས། །ཆབ་བྲོམ་སྣང་ཡང་ཆུ་རུ་ངོ་ཤེས་བཞིན། །ཅེས་གསུངས། ཀླུ་སྒྲུབ་ཀྱིས་རིམ་ལྔ་ནས་གསུངས་པའི་སེམས་དབེན་དང་། ལ་བ་པས་གསུངས་པའི་ལྷུན་གྱིས་གྲུབ་པའི་རྣལ་འབྱོར་དང་། ཤ་ཝ་རི་པས་གསུངས་པའི་ཏིང་ངེ་འཛིན་ཉམས་སུ་མྱོང་བའི་རྣལ་འབྱོར་དང་། མེ་ཏྲི་པས་སྒྲོ་འདོགས་ཆོད་པའི་དུས་དང་། ལང་ཀར་གཤེགས་པའི་མདོ་ལས། བདག་མེད་ཀྱི་རྣལ་འབྱོར་དང་། བྱིས་པ་ཉེར་སྤྱོད་བསམ་གཏན་དང་། ཆོས་དྲུག་གི་ཟིལ་པ་དང་། བུམ་དབང་གི་དོན། དེ་རྣམས་དོན་གཅིག་པར་བཞེད། ཁྲིད་ཆེན་ལས། རྩེ་གཅིག་འབྲིང་པོ་ནི་རེས་མ་བསྒོམས་ཀྱང་ཏིང་ངེ་འཛིན་དེར་འགྲོ་ཞིང་། སྒོམ་པའི་ཚེ་ཡང་བརྟན་པར་འོང་བ་དེ། བདེ་གསལ་མི་རྟོག་པའི་ཏིང་ངེ་འཛིན་དེ་སྦྱོང་བའི་དྭངས་ཆ་ལ། ཟག་བཅས་ཀྱི་མངོན་ཤེས་རྫུ་འཕྲུལ་དུ་མ་སྟོན་ནུས་ཏེ། ཉམས་དེའི་ངང་ནས་རྣམ་རྟོག་སྔར་བས་འཆར་བ་ཉུང་ཞིང་གང་ཤར་རང་དྭངས་སུ་
འགྲོ་རྗེས་སུ་གསལ་སྟོང་གི་ཉམས་དང་བཅས་པས་སྣང་བ་གུ་ཡངས་པ་ནི་ནམ་དྲན་སྒོམ་དུ་འཆར། རེས་ཨ་འཐས་སུ་འཆར། རྨི་ལམ་དུ་སྔར་བས་གྲངས་ཉུང་ངུ་འགྲོ། །ཉམས་དེས་རེས་སླེབ། རེས་མི་སླེབ། སྒོམ་ལ་བྲོད་པ་ཆེན་པོ་ཡོང་ངོ་། །རྒྱལ་བ་ཡང་དགོན་པས། དེ་ལ་བརྟན་པས་རྟོག་མེད་ཀྱི་ཤེས་པ་ངོས་བཟུང་མེད་པའི་ས་ལེ་སེང་ངེ་བ་དེ་ལ། ནམོ་བཞག་གིས་གནས་པ་དེ་ལ། རྩེ་གཅིག་འབྲིང་པོའི་ཏིང་ངེ་འཛིན་ལ་རང་དབང་ཐོབ་པར་བྱ་བ་ཡིན། ཕག་མོ་གྲུ་པས། རྩེ་གཅིག་འབྲིང་པོའི་ཏིང་ངེ་འཛིན་ལ་དབང་ཐོབ་གསུངས། གྲུབ་ཐོབ་རྒྱུད་པའི་ཞལ་ལུང་ལས། དེ་ལྟར་བསམ་གཏན་གྱི་བདེ་གསལ་མི་རྟོག་པ་འདྲེས་ཤིང་ཇི་ཙམ་འཇོག་ལ་དབང་ཐོབ་པ་རྣམས་ཀྱི་ཉམས་ཀྱི་རྩེ་གཅིག་གསུངས་པ་དོན་མཐུན། རྩེ་གཅིག་འབྲིང་གསལ་སྟོང་འདྲ་བ་དེ་དྲན་པོས་ཟིན་ན། །རྒྱུན་དུ་མ་ཟིན་ནའང་རེས་ཡོང་བ་དེ་སྦྱོར་ལམ་དྲོད་རྩེ་ཟེར་ཏེ། མྱོང་བ་བརྟན་དུ་སོང་ནས་གསལ་སྟོང་དེ་དྲན་པས་ཟིན་ན་རྒྱུན་དུ་ཡང་ཡོང་ངོ་། །འདི་རེས་མ་ཟིན་ཀྱང་ཡོང་། ། འདི་ཀ་ལ་དྲོད་རྩེ་མོ་ཡང་ཟེར་ཏེ། དེ་ནི་རྒོད་ཚང་པའི་གསུང་ཡིན། ཕག་གྲུའི་ཞལ་
ནས། རྩེ་གཅིག་ཆེན་པོ་ཉམས་ཀྱི་འཁོར་ཡུག་ཏུ་སོང་བའོ། །ཞེས་དང་། ཡང་དགོན་པའི་ཞལ་ནས། དེ་རྒྱུན་ཆད་མེད་པར་ཤར་ནས། རྣམ་རྟོག་ཐམས་ཅད་དེའི་ངང་དུ་ཞི། གཉིད་ཀྱང་དེའི་ངང་དུ་ཚུད་ནས། སྤྱོད་ལམ་རྣམ་པ་བཞི་དང་འབྲལ་བ་མེད་པ་ནི། རྩེ་གཅིག་ཆེན་པོ་ཉམས་ཀྱི་འཁོར་ཡུག་བྱ་བ་ཡིན། དེའི་དུས་སུ་སྒོམ་མེད་ཡིན་སྙམ་པའི་ངེས་ཤེས་ཆེན་པོ་སྐྱེས་ཏེ་ཉམས་རྟོགས་པ་ལ་ཤར་རོ་བྱ་བ་ཡིན། ཕྱོགས་རེའི་རྟོགས་པ་དང་སྦྱར་ན། ཞང་རིན་པོ་ཆེའི་ཞལ་ནས། རྩེ་གཅིག་དུས་སུ་ངོ་བོ་རྟོགས་གསུངས་པས། ངོ་བོ་གསལ་ལ་མ་འགགས་པ་ཞེས་པས། གསལ་ལ་མ་འགགས་པའི་ཤེས་པ་ནམ་མཁའ་དྭངས་པའི་དཀྱིལ་ལྟ་བུ་དེ་ལ། ཡིད་ཆེས་ཤིང་རྟོག་མེད་ཀྱི་ངེས་ཤེས་སྐྱེས་པ་ནི། རྩེ་གཅིག་གི་ངོ་བོ་མཐོང་བ་ཡིན། སེམས་བདེ་གསལ་མི་རྟོག་པའི་ངང་ལ། གསལ་སིང་ངེ་གནས་ཙམ་དུ་འདུག་ཀྱང་། ཡིད་ཆེས་ཀྱི་ངེས་ཤེས་མ་སྐྱེས་སྒོ་ན། ལྷག་མཐོང་གི་ཉམས་དང་མ་འབྲེལ། གནས་ལུགས་ཞལ་མ་མཇལ་བས། རྩེ་གཅིག་མུན་པའི་དཀྱིལ་ན་འཁྱམས་ཞེས་བྱ་སྟེ། ངོ་བོ་མ་མཐོང་བ་ཡིན་ནོ། །སེམས་
རང་ངོ་མ་ཤེས་པས་ཉམས་རྟོགས་ཀྱི་མཚམས་མི་ཕྱེད་དེ། སྣང་ལ་མ་ངེས་པའི་བསམ་གཏན་བུ་ཆུང་གིས་ཟླ་བ་མཐོང་བའམ། བླུན་པོས་ལྷ་ཁང་བལྟས་པ་ལྟ་བུའོ། །ངེས་ཤེས་ཡུལ་འཛིན་དང་བཅས་པས་ཉམས་རྟོགས་དྲི་མ་ཅན་ཡིན། རྩེ་གཅིག་མན་ཆད་ལ་མི་རྟོག་པའི་ཡེ་ཤེས་མ་སྐྱེས་པའི་མཉམ་བཞག་མཚན་ཉིད་པ་མེད་པས། རྗེས་སྣང་སྒྱུ་མར་མི་འཆར་བར་རྗེས་ཐོབ་མཚན་ཉིད་པ་མེད། རང་སའི་མཉམ་རྗེས་ཡོད། སེམས་གསལ་སྟོང་རྟོག་མེད་དུ་གནས་ཀྱང་། ཡུལ་འཛིན་གྱི་ཡིད་བྱེད་མ་དག་པས། མཉམ་བཞག་བཏགས་པ་བ་ཡིན། རྗེས་ལ་དངོས་འཛིན་ཨ་འཐས་སུ་སྐྱེས་པས་མི་ལ་ཁྱི་རྗེས་བྱུང་བ་དང་འདྲ་སྟེ་རྗེས་ཐོབ་བཏགས་པ་བ་ཡིན། དེ་ལ་མཉམ་བཞག་བདེ་གསལ་རྟོག་མེད་ཀྱི་སྒོམ་དེ་ལ་ནམ་བཞག་བཞག་གིས་གནས་པ་དེ་ལ་རྩེ་གཅིག་གི་རྩལ་རྫོགས་པ་ཡིན། རེས་བསྒོམས་ཀྱང་མི་འོང་། རེས་མ་བསྒོམས་ཀྱང་འོང་ན། ད་རུང་རྩལ་མ་རྫོགས། རྣམ་རྟོག་སྐྱེས་ཚད་དྲན་པ་ཙམ་གྱིས་སྒོམ་དེའི་ངང་དུ་ཞི་ཞིང་། གཉིད་ཀྱང་ཉམས་ཀྱི་འོད་གསལ་དུ་ཚུད་ནས་རྣམ་རྟོག་སྒོམ་དུ་ཤར། དྲན་པས་རྣམ་རྟོག་ཞི་མི་ནུས་པར། བསྒོམ་
ལྕགས་ཀྱུ་མ་འགྱུས་པས་བསྒོམ་ལ་བཀུག་ཅིང་བཞག་དགོས་ན། རྣམ་རྟོག་བསྒོམ་དུ་མ་ཤར། དྲན་པས་མ་ཟིན་ན་སྒོམ་ཤོར་བས་བྲལ་བ་ཡོད། ཟིན་ཀྱང་སྔར་གྱི་རྒྱུན་དེ་ལ་བཞག་པ་ལས། རྣམ་རྟོག་གི་ངོ་བོ་མ་མཐོང་བས་ཐོབ་པ་མེད། སྒོམ་དེ་ལ་སྐྱོང་ཡུན་རིང་བས་འཇིག་རྟེན་གྱི་ཆོས་བརྒྱད་ལ་བློ་ལྡོག །ཕྱི་ནང་གི་སྲིན་བུ་སྤངས། མངོན་ཤེས་དང་། ཟད་པར་དང་། ཟིལ་གནོན་ལ་སོགས་པའི་རྫུ་འཕྲུལ་ལ་སོགས་སྟོན་ནུས་ན། །རྩེ་གཅིག་གི་ཡོན་ཏན་སྐྱེས་པ་ཡིན། སེམས་ལས་སུ་མ་རུང་ཞིང་། ཡིད་ཞི་བ་མ་ཐོབ་པས། སྒོམ་དྭངས་སྙིགས་མ་ཕྱེད་པར། ཐུན་མོང་གི་དྲོད་རྟགས་འབྱིན་པར་མ་ནུས་ན་ཡོན་ཏན་མ་སྐྱེས། ཏིང་ངེ་འཛིན་དྭངས་བའི་འཆར་སྒོ་ལ་ཕྱི་ནང་གི་རྒྱུ་འབྲས་དག་པ་ལ་འཕྲིག་ཚུད་ནས། སྐྱེ་བྱ་དང་སྐྱེ་བྱེད་ཨ་འཐས། རྒྱུ་འབྲས་གོ་ན་ཀུན་རྫོབ་ལ་བྱན་ཚུད་པ་ཡིན། ཟག་བཅས་འཇིག་རྟེན་པའི་ལམ་དེ་ལས་རང་རྒྱུད་ལ་སོགས། བག་ཆགས་ཀྱི་འབྲལ་མི་ཕོད་སྟོང་ཆའི་རྟོགས་པའི་ཏིང་ངེ་འཛིན་ཡོད་ཀྱང་། སྣང་ཆ་རྟེན་འབྲེལ་ལ་གོ་བ་མ་སྐྱེས་ན། ཀུན་རྫོབ་ལ་བྱན་མ་ཚུད། སྒོམ་དེ་ཡི་གདངས་
ལ་རྣམ་རྟོག་སྣ་ཚོགས་ཀྱིས་དུབ་པའི་སེམས་ཅན་ལ་དམིགས་བཅས་ཀྱི་གདུང་ཤུགས་སྐྱེས་ན། གཟུགས་སྐུའི་ས་བོན་ཐེབས་པ་ཡིན། རང་སའི་འགྲོ་ཕན་འབྱུང་། ཉམས་ཀྱི་ཚན་ཁའི་སྙིང་རྗེའི་སྐྱེ་སྒོ་འགགས་ན། གཞན་དོན་གྱི་ས་བོན་མ་ཐེབས་ཏེ། ཉན་ཐོས་འགོག་པ་དང་འདྲའོ། ཁྲིད་ཆེན་ལས། རྩེ་གཅིག་ཆེན་པོ་ནི་མཉམ་རྗེས་དང་སྤྱོད་ལམ་རྣམ་བཞི་ཉིན་མཚན་འཁོར་ཡུག་ཏུ་རྒྱུན་ཆད་མེད་པར་གསལ་སྟོང་གི་ངང་དུ་ཆམ་གྱིས་འགྲོ། རྣམ་རྟོག་ཐམས་ཅད་རྗེས་སྣང་། རྨི་ལམ་ཐམས་ཅད་ཀྱང་དེའི་ངང་དུ་སོང་། སེམས་ཉིད་བདེ་སྟོང་། རིག་སྟོང་། སྣང་སྟོང་། གསལ་སྟོང་ལ་སོགས་སྟོང་ཉམས་དང་། ཐམས་ཅད་སྒྱུ་མ་རྨི་ལམ་ལྟ་བུའི་མྱོང་བ་མང་པོ་གཙོ་བོར་འཆར། ཟས་ཀྱི་ཡོན་ཏན་དུ་མ་དང་། འདི་ལས་བཟང་བའི་སྒོམ་མེད་པས་སྒོམ་མེད་ཆེན་པོ་ཡིན་ནམ་སྙམ་པ་འབྱུང་ཡང་། ཉམས་རྟོགས་དེ་དག་ལ་མ་ཞེན་པར་རྣམ་རྟོག་གསལ་སྟོང་དང་སྣང་སྟོང་དུ་རྟོགས་ཏེ་ཐམས་ཅད་སེམས། སེམས་སྐྱེ་མེད་རང་གྲོལ་དུ་ཡིད་ཆེས་པའི་ངེས་ཤེས་ཀྱི་དྲན་པ་རྙེད་ཅིང་མངོན་རྒྱུའི་རྟོག་པ་འགག་ཅིང་། བླ་མ་ལ་སངས་རྒྱས་ཀྱི་འདུས་ཤེས་སྐྱེ། །གསལ་
སྟོང་དེའི་ངང་ལས། ཉིན་མཚན་འཁོར་ཡུག་ཏུ་འགྲོ་ཞིང་འཁོར་བ་ལ་ཞེན་པ་ལྡོག་གོ །རྟོག་མེད་ལ་ངོ་བོ་མཐོང་ནས་བསྒོམ་དུ་མེད་པར་སོང་ནས་རྩེ་གཅིག་གི་རྩལ་རྫོགས། ཡོན་ཏན་སྐྱེ། ངོ་བོ་མཐོང་བ་ཡིན་པས། དེ་ལྟར་མ་བྱུང་གི་བར་དུ་བརྩོན་པ་བསྐྱེད་ནས་ཉམས་སུ་བླངས། འདིའི་སྤང་བྱ་ནི། འདོད་ཡོན་ལྔ་ཡིན་པས། །ཚེ་འདི་ལ་ཞེན་པ། ལོངས་སྤྱོད་ལ་ཞེན་པ། ཏིང་ངེ་འཛིན་ལ་ཞེན་པ་སོགས་སྤངས་ཏེ། གཙང་སྦྲ་དང་ལྡན་པས།། དབེན་པར་གནས་པར་བྱ་དགོས་ལ། འདིའི་མཉམ་རྗེས་གཉིས་ཀྱི་ཁྱད་པར་ནི། གནས་མི་གནས་ཀྱིས་འབྱེད་དེ། བདེ་གསལ་མི་རྟོག་པར་གནས་པ་དེ་མཉམ་བཞག །དེ་ལ་མི་གནས་ན་རྗེས་ཐོབ་ཡིན་ནོ། །རྩེ་གཅིག་ཆེན་པོའི་ངང་ཉམས་འཁོར་རྟོག་པ་ཐམས་ཅད་དེའི་ངང་དུ་ཐིམ། ཉིན་མཚན་མེད་པར་གསལ་སྟོང་ནམ་མཁའ་ལྟ་བུར་འཆར། སྒོམ་མེད་དུ་སླེབ་སྙམ་པ་སོགས་འབྱུང་བ་དེ་སྦྱོར་ལམ་བཟོད་པ་དང་ཆོས་མཆོག་ཡིན་ནོ། །ཞེས་དང་། གྲུབ་ཐོབ་བརྒྱུད་པའི་ཞལ་ལུང་ལས། །སྐབས་འདིར་ཆོས་རྣམ་པར་འབྱེད་པའི་ཤེས་རབ་ངོ་བོ་ཏིང་ངེ་འཛིན་དང་འདྲེས་པ་ཐོབ་ལ་དྲན་པ་
ལ་གནས་པ་སངས་རྒྱས་ཀྱི་བར་དུ་རྒྱུན་མི་ཆད་པར་སྦྱོར་བའི་བརྩོན་འགྲུས་དང་འབྲེལ་པ། ལུས་དང་སེམས་ཤིན་ཏུ་སྦྱངས་བ། རང་གཞན་གྱི་དོན་རྒྱ་ཆེན་པོ་འགྲུབ་པའི་དགའ་བ་ཁྱད་པར་ཅན། ལེ་ལོ་མེད་པའི་བཏང་སྙོམས་ཆེན་པོ་རྣམས་གཅིག་ཏུ་འབྱུང་བ་ཉམས་མྱོང་རྟགས་དང་འབྲེལ་བའོ། །དེ་རྣམས་དང་མ་འབྲེལ་ན་ཉམེས་ཡིན་གྱིས། ཕྱག་རྒྱ་ཆེན་པོའི་རྟོགས་པ་མ་ཡིན་ནོ། །ཞེས་དང་། ཉམས་ཀྱི་སྒོམ་མེད་ཡིན་ཡང་། རྟོགས་པའི་རྣལ་འབྱོར་བཞི་ཡི་རྩེ་གཅིག་གི་རྣལ་འབྱོར་ཡིན། ཞེས་གསུངས་པ་དང་། བདག་གི་སློབ་དཔོན་མཁས་པ་ཆེན་པོ། རྒྱལ་རོང་པའི་ཞལ་ནས། སྦྱོར་ལམ་ཆོས་མཆོག་གི་སྐབས་སུ། སྟོང་ཉིད་མངོན་སུམ་དུ་རྟོགས་སྙམ་པ་འབྱུང་ཡང་། ད་རུང་སྟོང་ཉིད་རྟོགས་པ་ནི་མིན་གསུངས། དེ་རྣམས་དོན་གཅིག་པར་སྣང་། རྩེ་གཅིག་དང་སྤྲོས་བྲལ་གྱི་ཁྱད་པར་ནི། རྣམ་རྟོག་ཆོས་སྐུར་ཤར་མ་ཤར་ཡིན་ནོ། །ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་ལས། གཉིས་པ་སྒྱུ་མ་ལྟ་བུའི་ཏིང་འཛིན་གྱི། །སྤྲོས་དང་བྲལ་བའི་མཉམ་བཞག་ཆེན་པོ་ལ། །བསམ་གྱིས་མི་ཁྱབ་ཏིང་འཛིན་རྩལ་དུ་ཤར། །དྲོད་ཐོབ་ནས་ནི་སྐྱེ་ལ་རང་
དབང་བསྒྱུར། །གསུངས་སོ། །མཉམ་ཉིད་གྱི་རྟོགས་པ་ལ་སྒྲོ་འདོགས་ཆོད་པ་སྤྲོས་བྲལ་ཡིན་ཏེ། སེམས་ཀྱི་རང་བཞིན་སྤྲོས་པ་དང་བྲལ་བར་རྟོགས། སྟོང་ཉིད་ཡིན་ཅི་ཡང་མེད་སྙམ་ནས་ཀུན་རྫོབ་ཁྱད་དུ་གསོད་པས། སྤྲོས་བྲལ་མེད་པའི་སྟོང་རྫིས་ཁྱེར་ཟེར། ཡུལ་ལམ་ཡུལ་དུ་སྣང་ཡང་། རང་བཞིན་མེད་པའི་རྗེས་ཤེས་སྒྱུ་མ་ལྟ་བུ། དངོས་པོ་བདེན་འཛིན་མེད་ཀྱང་། །སྣང་ལ་མ་ངེས་པ། ངོ་མ་ཤེས་པའི་དྲི་མ། ཉོན་མོངས་པའི་དྲི་མ་དག་ཡེངས་མེད་ཀྱི་དྲན་པས་མ་ཟིན་ན། སྒོམ་པ་དང་བྲལ་ལ། ཟིན་པ་དང་གང་ཤར་གྱི་ངོ་བོ་མཐོང་བས། བྲལ་ཐོབ་གཉིས་ཀ་ཡོད། གནས་ལུགས་ཀྱི་དོན་རྟོགས་པ་ཡུལ་མེད་དུ་ཤར་བ། རྣམ་པར་མི་རྟོག་པའི་ཡེ་ཤེས་དང་། །རྗེས་ཤེས་སྒྱུ་མ་ལྟ་བུར་མཉམ་རྗེས་གཉིས་ཤགས་ཀྱིས་བྱེ། མཉམ་བཞག་ཏུ་ངོ་བོ་ཡུལ་མེད་དུ་རྟོགས་པའི་རྣམ་པར་མི་རྟོག་པའི་ཡེ་ཤེས་བསྒོམས་པ་ལ། རྗེས་ཤེས་སུ་བདེན་མེད་སྒྱུ་མ་ལྟ་བུ་བསྒོམས་པས། སེམས་ཉིད་མཉམ་རྗེས་སུ་སྒོམ་པའི་དུས་ཡིན། མྱོང་རིག་གི་འཛིན་པ་དག་པས། ཚོར་བའི་ཕུང་པོ་དག །ཐ་སྙད་ཀྱི་གདག་པ་མེད་པས། འདུ་
ཤེས་ཀྱི་ཕུང་པོ་དག །ཡིད་དང་ཆོས་སྤྲོས་བྲལ་དུ་རྟོགས་པས། ཡིད་ཀྱི་རྣམ་པར་ཤེས་པ་དག །ཉམས་མྱོང་དག་ནས་རྟོག་པ་ཡུལ་མེད་དུ་ཤར། ཉམས་རྟོགས་མ་འདྲེས་པར་རིག་པས། ཉམས་རྟོགས་ཤན་ཕྱེད། སྟོང་པ་ཉིད་ཀྱི་རྩལ་རྟེན་ཅིང་འབྲེལ་བར་འབྱུང་བ། སྒྱུ་མ་ལྟ་བུའི་སྒྱུ་འབྲས་གོ་བས། རྒྱུ་འབྲས་སྒྱུ་མ་ལྟ་བུ། འདི་སྐབས་ཚེ་འདི་བློས་བཏང་ཞིང་། མཚན་མའི་རྟོག་པ་རང་གྲོལ་གྱི་ངང་ནས། སྟོང་ཉིད་གཙོ་བོར་བསྒོམ། རྣམ་རྟོག་གི་རང་ངོ་ཤེས་པ་སྟེ། བཏང་སྙོམས་སུ་མ་ལུས་པར་ཤེས་པ་ངར་དང་བཅས་པ་གལ་ཆེ། རྗེ་དྭགས་པོ་རིན་པོ་ཆེས། སྤྲོས་བྲལ་གྱི་རྣལ་འབྱོར་ནི། རིག་པའི་ངོ་བོ་སྐྱེ་མེད་དུ་མཐོང་བས། ཡར་སངས་རྒྱས་ལ་མི་རེ། མར་འཁོར་བ་ལ་མི་དོགས། བར་དུ་སྣང་བ་ལ་མི་འཛིན། གཞན་གྱིས་བསྒྱུར་དུ་མི་བཏུབ་པའོ། །ཞེས་དང་། བྲམ་ཟེ་ཆེན་པོས། ཆབ་བྲོམ་སྣང་ཡང་ཆུ་རུ་ངོ་ཤེས་བཞིན། །གཉིས་པ་དྲན་པའི་སྣང་བ་མ་འགགས་པར། །སྟོང་པ་བདེ་དང་ཐ་མི་དད་པ་འབྱུང་། །ཆབ་བྲོམ་ཆུ་རུ་ཞུ་བའི་གནས་སྐབས་བཞིན། །ཅེས་དང་། རིམ་ལྔ་ལས། འོད་གསལ་དང་། ལ་བ་པས།
བསམ་གྱིས་མི་ཁྱབ་པ་དང་། ཤ་བ་རི་པས། རྣལ་འབྱོར་དང་། མེ་ཏྲི་པས་དབང་ཐོབ་པའི་དུས་དང་། ལང་དཀར་གཤེགས་པའི་མདོ་ལས། གཟུགས་མེད་ཀྱི་རྣལ་འབྱོར་དང་། དོན་རབ་འབྱེད་པའི་བསམ་གཏན་དང་། གསང་དབང་གི་དོན་རྣམས་གཅིག་པར་བཞེད། རྒྱལ་བ་ཡང་དགོན་པས། དེ་ལྟར་རྩེ་གཅིག་གི་སྒོམ་འདི་ཞེན་པ་མེད་པར་བསྐྱངས་པས། ཉམས་མྱོང་དེ་རྣམ་པར་དག་པའི་ངང་དུ། ཅི་ཞིག་ལྟར་ན་སྤྲོས་བྲལ་ཆོས་ཉིད་ཀྱི་བདེན་པ་མཐོང་སྟེ། གང་མཐོང་ན་རང་མཐོང་། གང་གིས་མཐོང་ན་རང་གིས་མཐོང་། ཡུལ་དང་ཡུལ་ཅན་མེད་པར་མཐོང་སྟེ། འདས་པའི་ཤེས་པ་རྒྱུན་ཆད། མ་འོངས་པའི་ཤེས་པ་མ་སྐྱེས་པའི་བར་ན། ད་ལྟར་གྱི་ཤེས་པ་རྣམ་རྟོག་སྐད་ཅིག་མའམ། རྣམ་པར་མི་རྟོག་པའི་ངོ་བོ། ཁོ་རང་གིས་ཁོ་རང་ཡུལ་མེད་དུ་རང་ངོ་ཤེས་པའོ། །འདིའི་དུས་སུ་འཁོར་འདས་ཀྱི་ས་མཚམས་ཕྱེད། སྔར་གྱི་གོ་བ་དང་། ཆོས་སྐད་ཉམས་མྱོང་གི་བཟང་འཛིན་ཐམས་ཅད་ཕྱི་ཤུན་དུ་འགྲོ། སེམས་ཁོ་རང་ཕྱི་རུ་བལྟས་པས་སྤྲོས་པ་དང་བྲལ། ནང་དུ་བལྟས་པས་སྤྲོས་པ་དང་བྲལ། སྤྲོས་བྲལ་གྱི་ངོ་
བོ་ལ་མཐོང་བས་ངོས་བཟུང་མ་གྲུབ། ཐ་སྙད་ཀྱི་བཏགས་པ་མ་རྙེད། བློ་ཡུལ་དུ་བྱར་མི་བཏུབ་པའི། ཡུལ་མེད་དུ་རང་ངོ་ཤེས་པ་ལ། རྟོག་མེད་དུ་སྒྲོ་འདོགས་ཆོད་པ་དེ། །སྤྲོས་བྲལ་ངོ་བོ་མཐོང་བ་ཡིན་ཏེ། སྡུད་པ་ལས། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་ཡང་མི་མཐོང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་འདྲེན་པས་རབ་ཏུ་བཤད། །མཐོང་བ་དཔེ་གཞན་གྱིས་ནི་རྙེད་པར་ནུས་མ་ཡིན། །ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་ན། །ནམ་མཁའ་ཇི་ལྟར་མཐོང་བ་དེ་ཡི་དོན་དེ་བསམ་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །ཞེས་པའི་དོན་ནོ། །དེ་ལྟར་སྒོམ་ཉམས་ཀྱི་གོ་ར་ནས་ཐོན་པའི། ཐ་མལ་དུ་ཁྲིགས་སེ་བའི་རྟོགས་པ་དེ། ཕུང་པོ་ལྔ་དང་བྲལ་བ་ཡིན་ཏེ། དངོས་པོའི་ངོ་བོར་མ་གྲུབ་པས། །གཟུགས་ཀྱི་ཕུང་པོ་དང་བྲལ། །མྱོང་རིག་འཛིན་པ་དག་པས། ཚོར་བའི་ཕུང་པོ་དང་བྲལ། ཐ་སྙད་ཀྱི་བཏགས་པ་མེད་པས། འདུ་ཤེས་ཀྱི་ཕུང་པོ་དང་བྲལ། ཀུན་སྦྱོར་གྱི་
སེམས་མེད་པས། འདུ་བྱེད་ཀྱི་ཕུང་པོ་དང་བྲལ། ངེས་ཤེས་ཀྱི་ཡུལ་འཛིན་མེད་པས། རྣམ་ཤེས་ཀྱི་ཕུང་པོ་དང་བྲལ་ཏེ། ཕུང་པོ་ལྔ་བྲལ་གྱི་རྟོགས་པ་དེ་ནི། སངས་རྒྱས་ཀྱི་དགོངས་པ། རྣལ་འབྱོར་གྱི་མངོན་སུམ་དུ་གྲུབ་པ་ཡིན་ཏེ། དོན་ཡོད་ཞགས་པའི་མདོ་ལས། ཕུང་པོ་ལྔ་བྲལ་གྱི་སྦྱོར་བ་འདི་ནི། སངས་རྒྱས་རྗེས་སུ་དྲན་པའོ། །ཞེས་པའི་དོན་ནོ། །ཁྲིད་ཆེན་ལས། ཅི་ཞིག་ན་སྒོམ་དྲན་འཛིན་གྱི་རྩོལ་བ་ལ་མ་ལྟོས་པར་གནས་འགྱུ་གཉིས་དང་། སེམས་ཀྱི་ངོ་བོ་ལྷན་ཅིག་སྐྱེས་པའི་ཡེ་ཤེས་དང་། རྣམ་རྟོག་སྐྱེ་འགག་གནས་གསུམ་གྱི་མཐའ་དང་བྲལ་བའི་རང་བཞིན་དུ་རྟོགས། ཆོས་ཐམས་ཅད་སྤྲོས་དང་བྲལ་བའི་བཅོས་མིན་དུ་གོ །ཉམས་ཐམས་ཅད་ཡུལ་མེད་དུ་སྟོང་པར་གོ །རིག་པའི་ངོ་བོ་དེ་ཤུན་པ་བཤུས་པའམ། གཏེར་རྙེད་པ་ལྟར་སྤྲོས་པ་དང་བྲལ་བར་རྗེན་ལྷང་གིས་རྟོགས་པ་སེམས་ལ་རང་དབང་ཐོབ་པ་སྙམ་བྱེད་ཅིང་འདི་ཁོ་ན་ཡིན་པར་འདུག་པས། དང་པོ་ནས་ངོ་ཤེས་ཐང་སྙམ་པ་དང་། ཉམས་ལ་འཕེལ་འགྲིབ་མི་འབྱུང་། གལ་ཏེ་བྱུང་ཡང་དགའ་སྡུག་མེད། ཕྱིའི་སྣང་བ་ལ་སེམས་བཏང་ན་ཐམས་ཅད་
སྒྱུ་མ་ལྟ་བུར་འཆར་ཡང་སྟོང་པར་འགྲོ། མ་སོང་ཡང་འགལ་བ་མེད། དེས་ན་སྣང་བ་ངེས་པ་མེད་པ་སྟེ། སྒྲོ་འདོགས་དང་བྲལ་བར་ངེས་ཤེས་སྐྱེས་པ། དེ་ལྟར་ཡིན་པར་འདུག་སྙམ་པའི་རྟོགས་པ་སྐྱེ་ཞིང་། ཞི་ལྷག་ཟུང་དུ་ཆུད་པ་དེ་རྣམ་རྟོག་གི་མཚན་མ་རང་སར་གྲོལ་བས་རྟོགས་པ་ཆོས་སྐུར་འཆར། སྣང་བ་ཡང་རང་གི་སེམས་སུ་རྟོགས། སེམས་ཉིད་ཆོས་སྐུར་ཤེས་པས། ལྟ་བ་སྟོང་ཉིད་ཤས་ཆེ་བས། སྣང་བ་འདི་ཡང་སྟོང་པ་མེད་ཅིང་མ་གྲུབ་པ་གཅིག་ཏུ་གཤིས་བྱེད་ཅིང་། སྟོང་ཐོག་ཏུ་བདེ། རྒྱུ་འབྲས་དང་སྟོང་ཤས་ཆེར་རྟོགས་པ་ནི། སྤྲོས་བྲལ་གྱི་རྣལ་འབྱོར་ཞེས་བྱའོ། །ཞེས་དང་། ཡང་དགོན་པས། དེ་ལྟར་གསལ་སྟོང་གི་ངོ་བོ་མཐོང་ཡང་། སྟོང་འཛིན་ངེས་ཤེས་ཀྱི་འཛིན་པའི་འཁྲིས་ཤིག་མ་བྲལ་བར་འདུག་ན། ཉམས་རྟོགས་ཀྱི་ཤན་མ་ཕྱེད་པས། སྤྲོས་བྲལ་ཆུང་ངུ་ཡིན་ཞེས་དང་། ཁྲིད་ཆེན་ལས། དེ་ལའང་ཆུང་འབྲིང་ཆེན་པོ་གསུམ་ཡོད་པ་ལས། དང་པོ་ནི། སྣང་སེམས་རིག་པའི་ངོ་བོ་སྐྱེ་འགག་དང་བྲལ་བ་ཙམ་དུ་རྟོགས་ཀྱང་སྟོང་ཕྱོགས་ལ་ངེས་ཤེས་ཀྱི་འཛིན་པའི་འཁྲིས་ཤིག་ཞུགས་ཤིང་དེ་དང་མ་བྲལ་བས་ཉམས་
རྟོགས་ཀྱི་ཤན་ཆེར་མ་ཕྱེད། རྗེས་ཤེས་སུ་དྲན་པས་མ་ཟིན་པའི་དུས། དགྲ་གཉེན་དུ་འཛིན་པ་མ་འགག་ཅིང་། ཡུལ་ཐོག་ཏུ་འཛིན་པ་མ་ཆོད་པས། །ཚོགས་དྲུག་གི་སྣང་བ་གང་ཤར་ལ་ལེགས་པ་ལ་འཛིན་པ་ཆགས། མི་ལེགས་པ་ལ་འཛིན་པ་སྡང་། རྨོངས་སེ་འདུག་པས་གཏི་མུག་པ་ཡིན་པས། དགེ་མི་དགེ་གང་རུང་གི་འཛིན་པ་འབྱུང་སྟེ། ཕྱག་ཆེན་གྱི་ཉམས་ལེན་དང་བྲལ་ན་མི་དགེ་ལ། མ་བྲལ་ན་དགེ་བ་ཡིན་པའི་ཕྱིར། སྐབས་འདིར་ལུང་ནི་བདེན་པ་མཐོང་བ་ལ་ཆེར་མ་བྱུང་གསུངས། གཉིད་རྨི་ལམ་ཡང་འཁྲུལ་ཤས་ཆེ་ཙམ་ཡང་སྤང་། དགེ་སྦྱོར་ལ་མཐོ་དམན་ཅུང་ཟད་འབྱུང་ངེས། རྗེ་ཕག་མོ་གྲུ་པས། འབྲིང་པོ་རྩ་བྲལ་རྟོགས། ཞེས་དང་། རྒྱལ་བ་ཡང་དགོན་པས། དེའི་དུས་སུ་སེམས་སྐྱེ་འགག་དང་བྲལ་ན་རྟོགས་པ་སྟེ། ཐ་མལ་གྱི་ཤེས་པ་རྗེན་པ། རྣམ་རྟོག་བག་ཆགས་ཀྱི་འཆར་སྒོ་བཀྲ་ཧྲིག་གེ་བའི། རིག་སྟོང་། འགྱུ་སྟོང་། དངོས་པོའི་ཆོས་སུ་མ་སྐྱེས། དངོས་མེད་ཀྱི་ཆོས་སུ་མི་འགགས། ཐ་དད་ཀྱི་ཆོས་ལ་མི་གནས་པས། སྐྱེ་འགག་གནས་གསུམ་དང་བྲལ་བ། རྣམ་ཐར་སྒོ་གསུམ་
གྱི་དོན་མཐོང་ཡིད་བྱེད་ཀྱི་མི་དགེ་བ་མེད་པས། དགེ་སྦྱོར་སྐྱེས་པ་ཟེར། ཟག་མེད་ཀྱི་ལམ་དུ་ཚུད་པས་ཐར་ལམ་དངོས་ཡིན། རྟོགས་པ་དེ་བརྟན་པོར་སོང་བ་དང་། སྟོང་འཛིན་ངེས་ཤེས་ཀྱི་ཆ། ཉམས་ཀྱི་དྲི་མ་དེ་རྩ་བ་ནས་དག་ནས། ཐ་མལ་གྱི་ཤེས་པ་ཡུལ་མེད་དུ་ལྷན་ནེར་སོང་བ་དང་། སྣང་འཛིན་སྟོང་འཛིན་གྱི་གཞི་རྩ་བྲལ་བས། སྤྲོས་བྲལ་འབྲིང་པོ་རྩ་བ་བྲལ་བར་རྟོགས་པ་བྱ་བ་ཡིན། ཅེས་དང་། དོ་ཧ་ལས། རྩ་བ་བྲལ་བ་དེ་ཉིད་སུས་ཤེས་པ། །བླ་མའི་བཀའ་དྲིན་ཐོབ་པ་དེ་ཡི་མཆོག །ཅེས་གསུངས། །ཁྲིད་ཆེན་ལས། སྤྲོས་བྲལ་འབྲིང་ནི། སྔར་སེམས་སྐྱེ་འགག་གནས་གསུམ་དང་བྲལ་བའི་མྱོང་ཚོར་རགས་པ་དང་། སྟོང་འཛིན་གྱི་དྲི་མ་རགས་པ་དེ་དག་ནས། དག་ཚོར་རམ། ཞེན་པ་དང་བྲལ་ཞིང་ཐ་མལ་གྱི་ཤེས་པ་ཡུལ་མེད་དུ་ལྷང་ངེར་སོང་། སྣང་སྟོང་གི་འཛིན་པ་ཉོན་མོངས་པ་དང་། རྣམ་རྟོག་ཐམས་ཅད་གཞི་མེད་རྩ་བྲལ་རང་སར་རང་ངོ་ཤེས་ཙམ་གྱིས་ཆོག །ད་དུང་ཕྱི་རོལ་ཡུལ་ལ་ཅུང་ཟད་འཕྲིག་མ་ཚུད་པས་སྣང་ཐོག་ཏུ་ཅུང་ཟད་མི་བདེ་བ་འདི་གང་ནས་འབྱུང་བ་ཡིན། སྟོང་པ་ཡིན་ཡང་སྣང་བ་འདི་འགགས་ཏེ། །
རྟེན་འབྲེལ་དུ་མ་སོང་སྙམ་པ་སོགས་རེ་དོགས་ཕྲན་བུ་ཡང་རྗེས་ཤེས་དང་། རྨི་ལམ་གྱི་ཚེ་འཁྲུལ་མ་འཁྲུལ་སྣ་ཚོགས་འབྱུང་། དེའི་རྗེས་ཤེས་ངོ་ཤེས་པ་དེ་ལ་ཟེར། མཉམ་བཞག་ངོ་ཤེས་ཀྱི་ངང་ལ་རྩོལ་མེད་དུ་གནས་པ་དེའོ། །ཞེས་དང་། རྒོད་ཚང་པའི་ཞལ་ནས། སྤྲོས་བྲལ་དང་པོ་རྟོགས་པ་ལ་ཆོས་ཐམས་ཅད་སྐྱེ་འགག་གནས་གསུམ་དང་བྲལ་བར་རྟོགས་པ་དེས། ཡོན་ཏན་ཐམས་ཅད་ཀྱི་གཞི་རྟེན་བྱེད་པ་ལ། དགའ་བ་ཁྱད་པར་ཅན་སྐྱེ་བས་ས་དང་པོ་རབ་ཏུ་དགའ་བ་ཟེར། ཞེས་དང་། ཆོས་ཐམས་ཅད་སྤྲོས་བྲལ་དུ་རྟོགས་པས། ཉོན་མོངས་པ་སྒོམ་སྤང་གི་དྲི་མ་དང་བྲལ་བས་ས་གཉིས་པ་དྲི་མ་མེད་པ་ཟེར། ཞེས་དང་། སེམས་སྐྱེ་འགག་ཐམས་ཅད་དང་བྲལ་བར་ཡེ་ནས་ཡོད་པས། བླ་མའི་བྱིན་རླབས་ཀྱིས་མངོན་དུ་བྱེད་པ་ལ། ས་གསུམ་པ་འོད་བྱེད་པ་ཟེར། ཞེས་དང་། རྩ་བྲལ་གྱི་རྟོགས་པ་དེ་ལ་སངས་རྒྱས་ཀྱི་ཆེ་བའི་ཡོན་ཏན་འབྱུང་ཞིང་སེམས་ཅན་གྱི་དོན་གྲུབ་པ་ལ། ས་བཞི་པ་འོད་འཕྲོ་བ་ཞེས་ཟེར། ཞེས་དང་། བག་ཆགས་ཀྱི་དྲི་མ་སྦྱང་དཀའ་བ་རྣམས་སྦྱོང་བས། ས་ལྔ་པ་སྦྱང་དཀའ་བ་ཞེས་ཟེར།
ཞེས་གསུངས། རྗེ་ཕག་མོ་གྲུ་པས། སྤྲོས་བྲལ་ཆེན་པོས་ཕྱི་ནང་གི་ཆོས་ལ་སྒྲོ་འདོགས་ཆོད་པའོ། །ཞེས་གསུངས། རྒྱལ་བ་ཡང་དགོན་པས། དེའི་དུས་སུ་རྟོགས་པའི་རང་བཞིན་ཤེས་པ། རྒྱུད་ཐོག་ཏུ་མེད་སྣང་ཐོག་ཏུ་བདེ་སྡུག་གི་འཛིན་པ་འབྱུང་བ་ཡིན། འདི་ནས་ཉམས་རྟོགས་ཀྱི་ཤན་ཕྱེད་པས། རྟོགས་པ་དང་ཉམས་འདྲེས་ཤིང་། ཉམས་རྟོགས་པ་དང་མ་བྲལ་བར་ཉམས་ཀྱི་དག་བྱེད་རྟོགས་པས་བྱས། རྟོགས་པའི་བོགས་ཉམས་ཀྱིས་འདོན་ནས་བསྐྱངས་པས། རྟོགས་པ་དེ་མཐར་ཐུག་པ་དང་། འཁོར་འདས་ལམ་གྱིས་བསྡུས་པའི་ཤེས་བྱ་སྲིད་ཚད་ཀྱི་ཕྱི་ནང་གི་ཆོས་ལ་སྤྲོས་པ་དང་བྲལ་བའམ། མི་སྟོང་པ་སྐྲའི་རྩེ་མོ་ཙམ་ཡང་མེད་པར་རྟོགས་ནས་སྣང་བ་བདག་མེད་དུ་འཆར། སྣང་བ་རང་སེམས་དོན་སྤྱིའི་ཚུལ་དུ་རྟོགས་པ་ཡིན་ཏེ། ཕྱི་རོལ་ན་ཡང་སྣང་བ་མེད་པར་རང་གི་སེམས་སུ་རྟོགས། སེམས་ཙམ་པ་ནི་འདུན་པ་ཡིན། ཅེས་པའི་དོན་ཡང་དེ་ཡིན་ནོ། །སྤྲོས་བྲལ་བྱང་ཆུབ་སེམས་ཀྱི་རང་བཞིན་རྟོགས་པས། སྟོང་ཐོག་ཏུ་སྒྲོ་འདོགས་ཆོད་པ་དོན་དམ་པའི་ཤེས་རབ་ཡིན་ཏེ། ཆོས་ཐམས་ཅད་རང་བཞིན་མེད་པའམ། མ་སྐྱེས་
པའམ། མ་གྲུབ་པ་ཞིག་བདེ། གང་ཤར་ཉམས་ཀྱི་རྣམ་རྟོག་སོ་མ་ཉམས་པ་འདི་ཅུང་མི་བདེ། ཕྱག་རྒྱ་ཆེན་པོ་ཕྱོགས་གཅིག་ལས་མ་རྟོགས། རོ་གཅིག་སྐྱེས་པ་དང་། སྤྲོས་བྲལ་མ་བྲལ་མེད། སྟོང་མི་སྟོང་མེད་པར། སྣང་བ་སོ་མ། རྟོག་པ་སོ་མ། ཅི་སྐྱེས་གང་སྣང་གང་ཤར་གྱིས་ཆོག་པ་དེ། ཕྱག་རྒྱ་ཆེན་པོ་མཚན་ཉིད་པ་བཟོད་རྟོགས་པ་ཡིན་ནོ། །སྤྲོས་བྲལ་འོད་གསལ་རྟོགས་པ་ཡིན། ཅེས་དང་། ཁྲིད་ཆེན་ལས། སྤྲོས་བྲལ་ཆེན་པོ་ནི། ཕྱི་ནང་གི་ཆོས་ཐམས་ཅད་ལ་སྒྲོ་འདོགས་ཆོད་དེ། །སྣང་བ་རང་སེམས་སུ་ཤེས། སེམས་སྣང་བ་རང་བཞིན་མེད་པ། ཡུལ་དམིགས་གཏད་དང་བྲལ་ཞིང་ནམ་མཁའི་དཀྱིལ་ལྟ་བུ་བདེ་ཕྱམ་གྱིས་རྟོགས་པ། སྔར་སྣང་ཐོག་ཏུ་མ་བདེ། རིག་ཐོག་ཏུ་བདེ། ཉམས་ལེན་རིག་ཐོག་ཏུ་བྱེད་པ་དེ། འདིར་སྣང་བ་སེམས་སུ་ཤེས། སེམས་སྟོང་པར་ཤེས། སྟོང་པའི་གོ་ཆོད། །སྟོང་པ་ལ་སྒོམ་གྱི་གཙོ་བོ་བྱེད། སྟོང་ཐོག་ཏུ་སྒྲོ་འདོགས་ཆོད་པས་ཆོས་ཐམས་ཅད་རང་བཞིན་མེད་པའམ། མ་གྲུབ་པ་འདི་ད་ལྟར་གྱི་སྣང་ཐོག་སོ་མ་ཉམས་པ་འདི་ཅུང་མི་བདེ་བ་འདི་གཞི་མེད་འཁྲུལ་སྣང་
དུ་འདོད་པ་བྱུང་། འདིའི་སྐབས་སུ་ཉིན་པར་སྒོམ་ལ་རྒྱུན་ཆད་མེད། མཚན་མོ་རྨི་ལམ་དུ་འཛིན་པ་དེ་ལ་རྗེས་ཤེས་སུ་འཁྲུལ་པ་དང་རྟོག་པ་དུམ་རེ་འཆར། དེ་འབྱུང་བ་ཡང་གཉིད་ཀྱི་དྲན་འདུན་ཉམས་པས་ལན་པ་ཡིན། ཡུལ་རྐྱེན་དྲག་པོས་དཀྲུགས་པའི་དུས་སུ་རྗེས་ཤེས་ལ་ཅུང་ཟད་འགྲོ་བའང་འབྱུང་། དེ་ཡན་ཆད་ལ་སྒོམ་སྐྱེས་བདག་པོ་མེད་པར་མ་སོང་ན། དུས་ཀུན་ཏུ་འབྲལ་མེད་དུ་འོང་། དྲན་པ་རྒྱུན་ཆད་མེད་པར་མི་ཡེངས་པར་བཟུང་། དྲན་པ་ལ་ཅུང་ཟད་ལྟོས་པས་དྲན་པ་གལ་ཆེ། སྤྲོས་བྲལ་དང་མཉམ་རྗེས་དྲན་པས་འབྱེད། སྤྲོས་བྲལ་དང་འཁོར་འདས་ཀྱི་བར་ན་དྲན་མ་དྲན་ལས་མེད། བདག་གི་གཙོ་བོ་དྲན་པ་ཡིན། གང་ལ་འཛིན་པ་མ་ཞུགས་ན་ཞེ་སྡང་ཀོ་རེ་བའང་རང་སྟོང་ཡིན།ངོ་མ་ཤེས་ཤིང་འཛིན་པ་ཞུགས་ན། ཉོན་མོངས་པ་དང་རྣམ་རྟོག་མེད་པ་ལྟར་སྣང་ཡང་། མ་རིག་པ་ཡིན། དེ་ངོ་ཤེས་དང་མ་བྲལ་ཚེ། ཉོན་མོངས་སུ་སྣང་བ་རྒྱུན་ཆད་ཀྱང་དགག་སྒྲུབ་ཏུ་བྱར་མེད་དེ། དེའི་རྟགས་སུ་གང་ཤར་ལས་སྟོང་པ་ལོགས་སུ་ཚོལ་བའི་བློ་མི་སྐྱེ། རྟོག་པ་དག་པའི་རྗེས་ཀྱི་ཤེས་པ་འཆར་སྒོ་དྭངས་སང་ངེ་བ། དེའི་ངང་དུ་དུས་
རྟག་ཏུ་འགྲོ་བ་མི་ཡོང་བས་བཟུང་དྲན་ལ་ལྟོས། རང་གི་རྟོག་པ་རེ་ལ་དྲན་པ་རེས་ཟིན་པའང་དཀའ། དེས་ན་དྲན་པ་རྒྱུན་ཆད་མེད་པར་བརྟེན་ཏེ། ཉིན་གྱི་རྐྱེན་གྱིས་མི་གནོད་པར་གྱུར་ན། སྤྲོས་བྲལ་ཆེན་པོ་རྟོགས་པ་ཞེས་བྱའོ། །དེའང་སེམས་ངོ་བོ་སྐྱེ་འགག་གནས་གསུམ་དང་བྲལ་བ་རྟོགས། བློ་འདས་སུ་མཐོང་། འཇིག་རྟེན་བློས་ཐེངས། གཞན་ལ་ཕྲག་མི་དག །མངོན་ཤེས་སོགས་དུ་མའི་ཡོན་ཏན་འཆར། རྗེས་ཐོབ་སྣང་བ་སྒྱུ་མར་འཆར། བྱང་ཆུབ་ཀྱི་སེམས་ཀྱི་རང་བཞིན་རྟོགས། རེ་དོགས་བྲལ། འཛིན་པའི་རྩ་བ་ཆོད། མཐོང་སྤང་བརྒྱད་ཅུ་གྱ་གཉིས་སྤངས། འཁོར་བར་ཕྱིར་མི་ལྡོག །སྨོན་ལམ་དབང་གིས་མ་གཏོགས་སྲིད་པར་ལས་དབང་གིས་མི་སྐྱེ་ན། །སྤྲོས་བྲལ་གྱི་ངོ་བོ་མཐོང་ཞིང་རྩ་ལ་རྫོགས་ཡོན་ཏན་སྐྱེས་པ་ཞེས་བྱའོ། །འདིར་ཡང་ཞེན་པ་གསུམ་བཏང་སྟེ། དབེན་པ་དང་འདག་སྦྱར་དང་། དགོན་པ་བརྟེན་དང་སྨྲ་བཅད་བྱའོ། །རྒོད་ཚང་པས། སྤྲོས་བྲལ་ཆེན་པོ་ནར་སོན་པའི་རྟོགས་པས་འཁོར་བ་དང་མྱ་ངན་ལས་འདས་པ་གཉིས་ཀ་སྐྱེ་མེད་མངོན་དུ་གྱུར་པས། ས་དྲུག་པ་མངོན་དུ་གྱུར་པ་
ཟེར། ཞེས་དང་། སྒོམ་ལམ་ལ་ཟུག་བཅས་ཟག་མེད་ཀྱི་དབྱེ་བ་སྤྲོས་བྲལ་འབྲིང་པོ་དང་སྦྱར་ནས། ས་བདུན་པ་རིང་དུ་སོང་བའི་ས་ཡིན་ནོ། །ཞེས་དང་། ས་དང་བསྟུན་ན་ས་བརྒྱད་པ་མི་གཡོ་བའི་ས་ཡིན་ནོ། །གསུངས་སོ། །རྒྱལ་དབང་ཆོས་རྗེས། སྤྲོས་བྲལ་གྱི་རྩེ་གཅིག་ནི། གང་ཤར་གྱི་ངོ་བོ་ལ་ཡང་དག་པའི་དྲན་པས་མ་ཡེངས་པར་རྩེ་གཅིག་ཏུ་ལྟ་བ་དེ་ཡིན། སྤྲོས་བྲལ་གྱི་སྤྲོས་བྲལ་ནི། བལྟས་པའི་ཚེ་ན་སྤོས་པའི་མཐའ་གང་ཡང་མ་གྲུབ་པ་དེ་ཡིན། སྤྲོས་བྲལ་གྱི་རོ་གཅིག་ནི། ཆོས་ཐམས་ཅད་སྟོང་པ་ཉིད་ཀྱི་ངང་དུ་རོ་གཅིག་པ་དེ་ཡིན། སྤྲོས་བྲལ་གྱི་སྒོམ་མེད་ནི། དེ་ལ་བརྟན་པ་ཐོབ་ནས་ཉིན་མཚན་འཁོར་ཡུག་ཏུ་སོང་བ་དེ་ཡིན། ཞེས་གསུངས་པས། ཉམས་ཀྱི་སྤྲོས་བྲལ་ཆེ་འབྲིང་ཆུང་གསུམ་སོགས་ནི་སྐྱེ་མཁན་ཡང་མང་བས། །རང་ཕོར་ངོས་ལེན་གྱི་ཚུལ་དུ་སོ་སོའི་ཉམས་རྟོགས་ངོ་ཤེས་པར་གྱིས་ལ་སོ་སོའི་སྐབས་སུ་གསུངས་པའི་ཉམས་ལེན་ལ་འབུང་ཞུ། ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །
༼ཧ༽ །ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་ས་ལམ་བསྒྲོད་ཚུལ་བཞུགས་སོ། །
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། གཞི་ཁྲེགས་ཆོད་ཀྱི་ཕྱག་རྒྱ་ཆེན་པོ་ཉམས་སུ་བླངས་པས་ས་ལམ་བསྒྲོད་ཚུལ། འདི་ཡན་ཆད་ཉམས་ཐོག་ནས་བཤད་པར་དཀའ་ཞིང་། དེ་ཡན་ཆད་ཀྱི་ཉམས་རྟོགས་སྐྱེ་མཁན་ཡང་དཀོན་པས། ཧ་ཅང་རྒྱས་པར་མ་བཤད་ན་ཡང་ཆོག་མོད། །འོན་ཀྱང་བརྩོན་འགྲུས་དང་ལས་འཕྲོ་བཟང་བས་ཡུན་རིང་བསྒོམས་པ་འགའ་ཞིག་ལ། ཉམས་ཀྱི་རོ་གཅིག་ཙམ་སྐྱེས་པ་ཡང་འགའ་རེ་འོང་དོ་བ་དང་། ཁྲོམ་མང་ལ་ཡང་ཆོས་མགོ་རྐང་ཚང་བ་དང་། ཐོས་པའི་ཕན་ཡོན་ཡོད་ཕྱིར་ཅུང་
ཟད་བཤད་ན། ཨཱ་ལི་ཀཱ་ལི་ཆུ་རླུང་ཆེན་པོའི་རྒྱུད་ལས། གསུམ་པ་དཔའ་བར་འགྲོ་བའི་ཏིང་ངེ་འཛིན་གྱིས། །དུ་མ་རོ་གཅིག་ས་བཅུའི་རྟོགས་པ་འཆར། །དུས་གསུམ་རྒྱལ་བའི་སྲས་པོས་འགྲོ་དོན་མཛད། །རྩེ་ཐོབ་ནས་ནི་འཕེལ་བ་རྒྱུན་མི་འཆད། །ཅེས་དང་། ནཱ་རོ་པཎ་ཆེན་གྱི་ཞལ་ནས། གསུམ་པ་རོ་གཅིག་རྣལ་འབྱོར་འཆར། །ཞེས་གསུངས་ཏེ། གང་ཤར་ཐམས་ཅད་སྒོམ་དུ་ཤར་བས། །སྤང་བླང་མེད་པར་རོ་གཅིག་ཡིན། སེམས་ཉིད་འཁོར་འདས་སྣ་ཚོགས་སུ་སྣང་བའི་མཚན་ཉིད་རྟོགས། བདག་མེད་རྟོགས་ནས། མོས་གུས་
དང་སྙིང་རྗེ་ལ་སོགས་ཁྱད་དུ་གསོད་ན། རོ་གཅིག་འདྲེས་པའི་རྦ་ལ་གཡེང་བའོ། །གཉིས་མེད་དུ་རང་ངོ་མ་ཤེས་པས། སྟོང་པ་ཕྱོགས་གཅིག་ཏུ་སྐྱེ་བས་རྗེས་ཤེས་སྟོང་པ། སྟོང་འཛིན་དྭངས་པ་ཡུལ་དུ་ངོ་མ་ཤེས་པས་ཉམས་ཀྱི་དྲི་མའོ། །བག་ཆགས་ཀྱི་དྲི་མ་དག །དྲན་པས་མ་ཟིན་ན་མ་གཏོགས་པ་ངོས་བཟུང་མེད་པས་འབྲལ་བ་མེད། ཟིན་པ་དང་ངོ་བོ་རང་གསལ་དུ་འཆར་བས་ཐོབ་པ་ཡོད། དྲན་རྟོག་སྒོམ་དུ་ཤར་ནས། སྒོམ་དང་བྲལ་བའི་ངོས་འཛིན་མེད་པས་མཉམ་རྗེས་འདྲེས། བདེན་པ་གཉིས་དང་མཉམ་རྗེས་འདྲེས་པས། སེམས་ཉིད་ཟུང་འཇུག་ཏུ་སྒོམ་པའི་དུས་ཡིན་ཀུན་སྦྱོར་གྱི་སེམས་པོ་མེད་པས། འདུ་ཤེས་ཀྱི་ཕུང་པོ་དག །ང་དང་ང་ཡིར་འཛིན་པ་གཞི་མེད་དུ་རྟོགས་པས། ཉོན་མོངས་པ་ཅན་གྱི་ཡིད་དག །ཉམས་མྱོང་ཉིད་རྟོགས་པར་ཤར་ནས་དབྱེར་མེད་པས། །ཉམས་རྟོགས་ཟུང་དུ་འཇུག །ཆོས་ཀྱི་དབྱིངས་ཀྱི་སྟོང་པ་ལས། རྟེན་ཅིང་འབྲེལ་བར་འབྱུང་བའི་ཆོས་སྟོང་པར་འབྱུང་བས། རྡུལ་བྲལ་ནམ་མཁའ་ལྟ་བུ། མཉམ་རྗེས་ཀྱི་ཁྱད་ནི་འཛིན་མི་འཛིན་ཡིན།། འདི་དུས་གོ་ཡུལ་དོན་སྤྱིའི་རྣམ་པ་དང་། རྟོགས་པའི་
ཉམས་མྱོང་བས་མ་ནོར་ཞིང་མ་འདྲེས་པ་གལ་ཆེ། ཚོགས་དྲུག་རྒྱ་ཡན་ཟུང་འཇུག་ཡངས་པའི་ངང་ནས། ཟུང་འཇུག་གཙོ་བོར་བསྒོམ། སྣང་བའི་རང་ངོ་ཤེས་དྭགས་པོ་རིན་པོ་ཆེས། རོ་གཅིག་གི་རྣལ་འབྱོར་ནི་སྣང་སྟོང་དབྱེར་མེད་དུ་རྟོགས་པའོ། །ཞེས་དང་། བྲམ་ཟེ་ཆེན་པོས། གསུམ་པ་དྲན་མེད་སྐྱེ་བ་མེད་ལ་ཐིམ། །ཐམས་ཅད་ཐ་མི་དད་པ་བདེ་བ་ཆེན་པོར་གཅིག །དེ་ཉིད་ཆབ་བྲོམ་ཆུ་དང་དབྱེར་མེད་བཞིན། །ཞེས་དང་། རིམ་ལྔ་ལས། སློབ་པའི་ཟུང་འཇུག་དང་། ལ་བ་པས། ཟུང་དུ་འཇུག་པ་དང་། །མེ་ཏྲི་པས་གདེང་ཐོབ་པའི་དུས་དང་། ལང་དཀར་གཤེགས་པའི་མདོ་ལས། འཛིན་མེད་ཀྱི་རྣལ་འབྱོར་དང་། དེ་བཞིན་ཉིད་དམིགས་བསམ་གཏན་དང་། དབང་གསུམ་པའི་དོན་དང་། དེ་རྣམས་དོན་གཅིག་པའོ། །ཕག་མོ་གྲུ་པས། རོ་གཅིག་ཆུང་ངུའི་འཁོར་འདས་གཅིག་ཏུ་འདྲེས། གསུངས། ཁྲིད་ཆེན་ལས། རོ་གཅིག་ནི། སྔར་སྤྲོས་བྲལ་གྱི་སྐབས་ཀྱི་ཆོས་ཐམས་ཅད་རང་བཞིན་མ་གྲུབ་པའི། སྟོང་ཐོག་ཏུ་བདེ། གང་ཤར་གྱི་རྣམ་རྟོག་སོ་མའམ་སྣང་ཐོག་ཏུ་ཅུང་མི་བདེ་
བའི་དེ་དག་ནས་འཁོར་འདས་གཉིས་སུ་འདྲེས་ཞེས་པ་དེ་འོང་བ་ཡིན། དེའི་དོན་ཀྱང་མ་འགགས་སྣང་བ་སོ་མ་འདི་ལ་སྣང་བར་འཛིན་པའི་དངོས་འཛིན་ཀྱང་མེད། སྟོང་པར་འཛིན་པའི་སྟོང་འཛིན་ཀྱང་མེད། ཕྱི་རོལ་གྱི་སྣང་བ་འདི་རང་གི་བློས་རང་བཞིན་མེད་པར་བསྒོམ་པའམ། གཉིས་སུ་སྣང་བའི་ཆོས་གང་ཡང་མ་གྲུབ། བློས་གཞལ་བ་ཙམ་མ་ཡིན་པར། སྣང་མི་སྣང་། སྟོང་མི་སྟོང་། སྣང་དམིགས་སྟོང་པ་བསྐྱེད་རྫོགས་ཀུན་རྫོབ་དོན་དམ་འཁོར་བ་དང་། མྱ་ངན་ལས་འདས་པ་སོགས། མདོར་ན་བདེ་སྡུག་སོགས་གཉིས་བསྡུས་ཀྱི་ཆོས་ཇི་སྙེད་པ་ཐམས་ཅད་ཐ་མི་དད་པར་དབྱེར་མེད་ཟུང་འཇུག་རོ་གཅིག་པར་རྟོགས་ཏེ། ལྷན་ཅིག་སྐྱེས་པའི་ཡེ་ཤེས་སུ་འཆར། གང་ཤར་གྱི་སྣང་བ་སོ་མ་རྟོག་པ་སོ་མ་དགག་སྒྲུབ་དང་བྲལ་བ། རང་རིག་རང་གསལ་རྩོལ་མེད་ཡང་དག་གིས་དྲན་པས་སེམས་དང་། དྲན་པ་སྣང་བ་གསུམ་མེ་དང་ཚ་བ་བཞིན་རྒྱུ་འབྲས་ཀྱི་རྟེན་འབྲེལ་མངོན་དུ་གྱུར། སྣང་ཐོག་ཏུ་བདེ་བ་ནི་རོ་གཅིག་གི་རྣལ་འབྱོར་ཞེས་བྱའོ། །ཞེས་པ་དང་། རྒྱལ་བ་ཡང་དགོན་པས། དེ་ལྟར་སྤྲོས་བྲལ་གྱི་རྟོགས་པ་དེ་བསྐྱངས་བ་ལ། སྣང་སྲིད་
འཁོར་འདས་ཀྱི་ཆོས་ཐམས་ཅད། སྤྲོས་དང་བྲལ་མ་བྲལ་མེད། སྟོང་དང་མི་སྟོང་མེད། བསལ་བཞག་དང་དགག་སྒྲུབ་མེད་པར། རང་སར་རང་གྲོལ་རང་ངོ་ཤེས་པས། སྣང་བ་དུ་མར་སྣང་ཡང་རྟོགས་པ་གཅིག་གིས་ངོ་བོར་རྟོགས་པ། དུ་མ་རོ་གཅིག་གི་རྣལ་འབྱོར་ཏེ། དེ་ལ་རོ་གཅིག་ཆུང་ངུ་། འཁོར་འདས་གཅིག་ཏུ་འདྲེས་པ་ནི། སྣང་བོ་དང་སྟོང་པ། དོན་དམ་དང་ཀུན་རྫོབ། བསྐྱེད་རིམ་དང་རྫོགས་རིམ་ལ་སོགས་པ་གཉིས་ཆོས་ཇི་སྙེད་པ་ཐམས་ཅད། རྟོགས་པ་གཅིག་གི་ངོ་བོར་དབྱེར་མེད་པས་ཟུང་འཇུག་མངོན་དུ་གྱུར། སྣང་བ་དང་སྟོང་པ་གཉིས་འབྲལ་མ་མྱོང་ལ། སྟོང་པ་དང་སྣང་བ་འབྲལ་མ་མྱོང་བས། སྣང་སྟོང་གང་རུང་རེའི་ཐོག་ནས། ལམ་གྱི་ཆོས་ཇི་སྙེད་ཐམས་ཅད་ཚང་ཞིང་གཉིས་མེད་ཟུང་དུ་འཇུག་པས་ཟུང་འཇུག་ཆེན་པོ་ཡིན་ནོ། །དེ་ལྟར་དུ་མ་རོ་གཅིག་རྟོགས་ཀྱང་། ད་རུང་དེར་འཛིན་གྱི་ངེས་ཤེས་ཀྱི་ཆ་འདྲའམ། འདྲེས་པའི་མྱོང་བ་ངེས་ཤེས་ཀྱི་དྲི་མ་ཅུང་ཟད་འདུག་ན་རོ་གཅིག་ཆུང་ངུའོ། །ཁྲིད་ཆེན་ལས། རོ་གཅིག་ཆུང་ངུ་ནི། སྣང་སྟོང་དབྱེར་མེད་དུ་འདྲེས། ཐམས་ཅད་གཉུག་མའི་རང་
བཞིན་དུ་རྟོགས། སྟོང་མ་སྟོང་མེད་པར་གང་ཤར་གྱི་ཤེས་པ་སོ་མ་དེས་ཆོག །ཆོས་སུ་རྟོགས་སྣང་སྟོང་གང་རུང་རེའི་ཐོག་ཏུ་ཡང་ལམ་གྱི་ཆོས་ཇི་སྙེད་པ་ཚང་བར་རྟོགས་ཀྱང་ལུས་སྣང་སེམས་གསུམ་དབྱེར་མི་ཕྱེད། རེས་སེམས་སུ་ངེས་ཙུག་ཡང་དེར་མྱོང་རྒྱུ་དང་འཛིན་པའི་འདུ་ཤེས་ཅུང་ཟད་ཡོད། རྗེས་སུ་ས་ཕྱོགས་སྲ་འཐས་ཅན་དུ་སྣང་བ་དང་། ཡུལ་རྐྱེན་དྲག་པོས་དཀྲུག་པའི་ཚོགས་དྲུག་གི་སྣང་བ་ལ་དགེ་སྦྱོར་མི་བདེ་བ་དང་། གཟུང་འཛིན་གྱི་སྣང་བ་དུམ་པ་རེ་ཡོད་པ་དང་། ཆོས་བྱེད་པ་ལ་ལྐོགས་ཅུང་མི་ཐུབ་པ་འདྲ་ཡང་འབྱུང་། རྗེས་སྣང་སྒྱུ་མ་ལྟ་བུ་ཞེས་བྱ་ཞིང་རྨི་ལམ་ནའང་འཁྲུལ་པ་དང་འཛིན་པ་དུམ་པ་རེ་འབྱུང་། རེས་ལུས་སྣང་སེམས་གསུམ་དབྱེར་མེད་པའི་ཉམས་ཀྱང་འབྱུང་། རྒྱུ་འབྲས་ལ་རྩིས་འཇོག་དང་མོས་གུས་སྙིང་རྗེ་ཆུང་བ་འདྲ་ཡང་སྲིད་པས་དེར་མ་སོང་བ་བྱའོ། །ཞེས་དང་། །ཡང་དགོན་པའི་ཞལ་ནས། རོ་གཅིག་འབྲིང་པོ་གཟུང་འཛིན་རྩ་བ་རྦད་ཀྱིས་ཆོད་པ་ནི་རྟོགས་པ་དེ་བརྟན་དུ་མ་སོང་བས། རྟོགས་མཁན་དེ་དུ་མ་རོ་གཅིག་ཏུ་འདྲེས་ཏེ། ཡུལ་འཛིན་རྩ་བ་ནས་དག་པས་བེམ་པོ་ཕྱི་རུ་མ་ལུས། རིག་པ་ནང་དུ་མ་ལུས་པར་
སྣང་སེམས་གཅིག་ཏུ་ཀྲོང་ངེ་བ་དེ། རོ་གཅིག་འབྲིང་པོ་ཡིད་ལ་བྱེད་པ་དེ་མཚན་ཉིད་པ་དེ་མངོན་དུ་གྱུར་པའོ། །གསུངས། ཁྲིད་ཆེན་ལས། རོ་གཅིག་འབྲིང་པོ་ནི། སྔར་གྱི་མྱོང་བ་དེ་ངེས་ཤེས་ཀྱི་འཛིན་པ་ཆ་གཅིག་འདྲེས་པས། དེ་དག་ནི་བེམ་པོ་ཕྱིར་མ་ལུས། རིག་པ་ནང་དུ་མ་ལུས། སྣང་སེམས་ཟུང་འཇུག་གཅིག་ཏུ་ཀྲོང་ངེ་བ། གཟུང་འཛིན་གྱི་རྩ་བ་རྦད་ཀྱིས་ཆོད། འཛིན་པ་དེའང་ཡུལ་ལ་བརྟེན་ནས་སྐྱེ་བ་ལས། འདིར་གཟུང་ཡུལ་ཐམས་ཅད་གཉུག་མ་རང་གསལ་དུ་ཤར་བ་དེ་མེད་ཙ་ན་འཛིན་བྱེད་ཀྱི་ཤེས་པ་དང་བྲལ། འཛིན་པ་ཡུལ་ཐོག་ཏུ་ཤར་བའི་ཤེས་པ་གཅིག་གི་གྲོགས་སུ་ཐམས་ཅད་འཆར། གཟུགས་ལ་སོགས་ཡུལ་རྣམས་མི་རྟོག་པར་འཆར་བས་གཟུང་འཛིན་དེ་ཡུལ་ཐོག་ཏུ་འཆར། རོ་གཅིག་ཆུང་ངུ་དང་། ཟུང་འཇུག་གི་ངོ་བོ་ལ་ཁྱད་པར་མེད་ཀྱང་མྱོང་བ་བརྟན་དུ་སོང་བ་ཡིན། ལུས་སྣང་སེམས་གསུམ་གཅིག་ཏུ་འདྲེས་པའི་ཉམས་འབྱུང་། རྗེས་ཤེས་དང་རྨི་ལམ་ཡང་སྔར་བས་ཀྱང་འཁྲུལ་པ་ཆུང་ཞིང་ཨ་འཐས་ཀྱི་འཛིན་པ་ཡང་ཆེར་མི་ཡོང་། འོན་ཀྱང་རྨི་ལམ་དུས་སམ་གཞན་དུ་ཡང་རུང་། ཡང་
དག་པའི་དྲན་པས་ཡེངས་མ་ཡེངས་སུ་འཛིན་པའི་གཉིས་སྣང་སྒྱུ་མ་ལྟ་བུ་བྱ་བ་ཡང་ཡད་ཡུད་དུ་འོང་བ་ཡིན་ནོ། །བཟུང་དྲན་དང་ཡང་དག་གི་དྲན་པའི་ཁྱད་པར་ཡེངས་དུས་སུ་ཡེངས་འདུག་སྙམ་པའི་རྗེས་ལ། དགེ་སྦྱོར་རྒྱུད་ཐོག་ཏུ་ཡེ་རེ་ཡོང་བ་དེ་བཟུང་དྲན་ཡིན་ཞིང་སྔར་འཛིན་པ་ཞུགས་པའི་རྟགས་ཡིན། རྟོགས་འཛིན་མེད་པར་དྲན་པ་ཙམ་གྱིས་ཉམས་ལེན་གྱི་སྟེང་དུ་ཡེ་རེ་ཡོང་བ་དེ་རྟོགས་ཆོས་ཡང་དག་གི་དྲན་པ་བྱ་བ་ཡིན་ཏེ། སྔར་ངེས་ཤེས་མ་ཟིན་ཀྱང་འཛིན་པ་མ་ཞུགས་པའི་རྟགས་ཡིན། ཞེས་དང་། རྗེ་ཕག་མོ་གྲུ་པས། རོ་གཅིག་ཆེན་པོས། ཆོས་རྣམས་མཉམ་པ་ཉིད་དུ་ཞི་བའོ། །གསུངས། རྒྱལ་བ་ཡང་དགོན་པས། རོ་གཅིག་ཆེན་པོ་སྣང་ཞིང་སྲིད་པས་བསྡུས་པའི་ཆོས་ཐམས་ཅད་སྐྱེ་མེད་ཀྱི་ངང་དུ་ཞི་བ་ནི། རོ་གཅིག་གི་རྟོགས་པ་དེ། དུ་མའི་སྣང་བ་ཤར་བས་འཁོར་འདས་ཀྱི་ཆོས་ཐམས་ཅད་སྟོང་པ་དེའི་དངོས་གཞིར་གནས་པ་ནི། རོ་གཅིག་དུ་མ་ཞེས་པ་ཟབ་རྒྱས་དབྱེར་མེད་ཀྱི་རྟོགས་པ་སྟེ། མདོ་ལས། ཆོས་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་མཉམ་པ་ཉིད་སྤྲོས་པ་མེད་པའི་ཏིང་ངེ་འཛིན་ཞེས་གསུངས་པའི་
ཏིང་ངེ་འཛིན་ནོ། །སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་ས་རང་ས་ནས། སོ་མ་ཉམས་མདོག་མ་བསྒྱུར་བར་ཇི་ལྟར་གནས་པ་དེ་རང་། གཉིས་མེད་དུ་རྟོགས་པའི་ངོ་བོར་འདུག་ཅིང་། དེ་བས་ལ་ལ་མཉམ་བཞག་གམ་བྲལ་ཐོབ་བམ། གཉེན་པོས་བཟོ་བཅོས་སྤུ་རྩེ་ཙམ་ཡང་མི་འདུག་པ་ནི། རོ་གཅིག་ཆེན་པོའོ། །ཞེས་གསུངས། ཁྲིད་ཆེན་ལས། རོ་གཅིག་ཆེན་པོ་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་སྐྱེ་མེད་དུ་མཉམ་པ་ཉིད་ཀྱི་ངང་དུ་རྟོགས། སྣང་སེམས་གཅིག་ཏུ་ངེས་ཤིང་སྔར་གྱི་དེ་ཀ་མྱོང་བ་བརྟན་དུ་སོང་ནས། སྣང་བ་མ་འགགས་པ་འདི་ལ་བདེན་འཛིན་དག་པས་གཉིས་མེད་ཀྱི་རྟོགས་པ་དེ་ཉིན་མཚན་འཁོར་མོར་འབྱུང་། མི་རྟོག་པའི་འཆར་སྒོ་གསལ་ཙམ་གྱི་སྣང་ལ་མ་ངེས་པའི་མྱོང་ཚོར་ཅུང་ཟད་རེ་འབྱུང་། འཛིན་མེད་ཀྱི་གསལ་སྣང་མི་འགགས། རེས་འཁོར་འདས་ལ་སོགས་པའི་སྣང་ཚད་རྟོགས་པ་དེའི་ངོ་བོར་ཤར། གཉིས་འཛིན་གྱི་རྒྱུན་ཆད། ངོས་འཛིན་མེད་པའི་རྗེས་སྣང་སྒྱུ་མ་ལྟ་བུ་ཙམ་ཞིག་ཡོད། དེའང་སྒྱུ་མ་མཁན་པོའི་སྣང་བ་དང་འདྲ་སྟེ། མེད་པར་ཤེས་བཞིན་དུ་།
གཉིས་སྣང་ཕྲ་མོ་མི་འགགས་སམ། གཉིས་འཛིན་གྱི་རྨི་ལམ་ཡང་འལ་འོལ་ཙམ་འབྱུང་། རེས་རྨི་ལམ་མི་འབྱུང་བ་ཡང་ཡོད། འདི་ཡི་གཉིས་སྣང་གི་འཆར་སྒོ་ཕྲ་མོ་རྣམས། ཉམས་ལེན་ངང་དུ་དག་པའི་མདངས་སམ་སྣང་ངམ། སྟོང་སྣང་དུ་ཡད་ཡུད་འབྱུང་བ་དེ་ལ་རོ་གཅིག་གི་རྗེས་ཤེས་སྟོང་པ་འཆར་བ་ཟེར། དོན་ལ་གཉེན་པོའི་ལྷག་རོལ་ཡིན་པས། །སྒོམ་གྱི་མྱོང་ཚོར་ཡོད་རིང་ལ་དེ་ལྟར་ལྟོས་པའི་གཞན་ཞིག་ཤུགས་ལ་ཡོང་བས་གཉིས་སྣང་ཕྲ་མོ་མ་དག་པ་ཡིན་ཡང་། མི་རྟོག་པའམ་འཆར་སྒོ་འགའ་ཞིག་སྣང་ལ་མ་ངེས་པའི་རང་རྩལ་དུ་མ་ཤར་བ་ལ། དྲན་པས་ཡེངས་མ་ཡེངས་སུ་ཁྱད་པར་གནས་པའི་འཆར་སྒོ་རྐྱང་པ་མི་བདེ་བ་གསལ་ཙམ་གྱི་མྱོང་ཚོར་དམ་དུམ་འབྱུང་སྟེ་སྤང་བྱའི་ལྷག་མ་ཡིན་ཏེ། ཡོད་རིང་དེ་ལ་ལྟོས་པའི་ཕྲ་མོ་དེ་མ་ཡིན་པའི་གཞན་ཞིག་ཤུགས་ལ་འབྱུང་བའི་རོ་གཅིག་ཆེན་པོ་སྒྱུ་མ་ཕྲ་མོ་དེ་ལ་ཟེར། དེས་ན་གང་ཤར་གྱི་སྣང་བ་སྤང་བླང་དགག་སྒྲུབ་མེད་ཅིང་མཉམ་ཉིད་གཉུག་མ་ཡུལ་མེད་གསལ་སྟོང་དུ་རང་ངོ་ཤེས། འཁོར་འདས་ལ་སོགས་པ་གཉིས་བསྡུས་ཀྱི་ཆོས་ཐམས་ཅད་རོ་གཅིག་ཏུ་རྟོགས་པ་དང་། འཇིག་རྟེན་ཆོས་བརྒྱད་མགོ་སྙོམས་
རྟེན་འབྲེལ་མཐའ་དག་འཆར། སྣང་ཐོག་ཏུ་གོ་ན་རོ་གཅིག་གི་ངོ་བོ་མཐོང་ཞིང་རྩ་ལ་རྫོགས། ཡོན་ཏན་སྐྱེས་པ་ཞེས་བྱའོ། །ཞེས་དང་། རྒོད་ཚང་པས། །རོ་གཅིག་པ་ནི་ས་བརྒྱད་པ་ཡིན་གསུངས། ཞེས་དང་། རོ་གཅིག་ཆེན་པོ་སྒྱུ་མ་ཕྲ་མོ་བྱ་བ་དེ་ལ་འདོད་པ་ཡིན་གསུངས། ས་དང་སྦྱར་ན་ས་དགུ་པ་ཡིན། ཡོངས་སུ་རྫོགས་པ་ས་བཅུ་པ་ཐོབ་མ་ཐག་པ་དེ་ཡིན་ནོ། །དུ་མ་རོ་གཅིག་ས་བཅུའི་རྟོགས་པ་འཆར་གསུངས་ཀྱང་། འདི་ནི་དོན་ལ་ས་དགུ་པ་རང་ཡིན་གསུངས། ས་བཅུ་པའི་མཚན་གསོལ་བ་ཙམ་ལས་མེད་གསུངས། རྒྱལ་དབང་རྗེས། རོ་གཅིག་གི་རྩེ་གཅིག་ནི་སྣང་གྲག་གི་ཆོས་ཐམས་ཅད་མཉམ་པ་ཉིད་ཀྱི་ངང་དུ་སྒྲོ་འདོགས་ཆོད་པ་དེ་ཡིན། རོ་གཅིག་གི་སྤྲོས་བྲལ་ནི། ཐ་དད་དམ་གཉིས་སུ་འཛིན་པའི་སྤྲོས་པ་ཐམས་ཅད་མཉམ་པ་ཉིད་དེའི་ངང་དུ་འབྲལ་བ་མེད་པ་དེ་ཡིན། རོ་གཅིག་གི་རོ་གཅིག་ནི། མཉམ་པ་ཉིད་དེས་ཆོས་ཐམས་ཅད་ཕྱོགས་ལ་ལོངས་སྤྱོད་པའམ། འཇུག་པའམ། ཐམས་ཅད་ལ་ཁྱབ་པར་རོལ་པ་ཡིན། རོ་གཅིག་གི་སྒོམ་མེད་ནི། དེ་ལ་བརྟན་པ་ཐོབ་ནས་ཉིན་མཚན་འཁོར་ཡུག་ཏུ་སོང་བ་དེ་
ཡིན། རྗེ་ནཱ་རོ་པས། བཞི་པ་སྒོམ་མེད་རྣལ་འབྱོར་འཆར་གསུངས་པའི་དོན། གསང་བ་བསམ་གྱིས་མི་ཁྱབ་པའི་རྒྱུད་དང་། ཆུ་ཀླུང་ཆེན་པོའི་རྒྱུད་གཉིས་ཀ་ནས། བཞི་པ་རྡོ་རྗེ་ལྟ་བུའི་ཏིང་འཛིན་གྱིས། །བསྒོམ་དུ་མེད་པའི་ཉམས་ལེན་བརྩོན་པ་ལ། །རྣམ་མཁྱེན་སངས་རྒྱས་ཞིང་ཁམས་དཔག་མེད་མཐོང་། །མ་བཙལ་ལྷུན་གྲུབ་ཆོས་མཆོག་ཆེན་པོ་ཡིན། །ཅེས་གསུངས། བྲམ་ཟེ་ཆེན་པོ་འཆི་མེད་རྡོ་རྗེའི་གླུ་ལས། བློ་འདས་འབྲས་བུ་འདོད་པ་མེད་འགྲུབ་པས། །སྨན་མཆོག་ནང་ནས་སེ་ཏ་ཇི་བཞིན་ནོ། །ཞེས་གསུངས་ཏེ། སྟོང་པ་ཉིད་ལ་སོགས་པ། སྒོམ་གྱི་མྱོང་ཚོར་ཐམས་ཅད་དག་པས། མྱོང་བ་དག་པས་སྒོམ་མེད་ཡིན། སེམས་ཉིད་འཁོར་འདས་སྣ་ཚོགས་སུ་སྣང་ཡང་། རྟོག་པའི་འཁོར་ཡུག་གོ །མི་རྟོག་ངོ་མ་ཤེས། མ་དག་ན། སྒོམ་མེད་ཀྱི་ཉི་མ་སྤྲིན་གྱིས་སྒྲིབ། རྗེས་ཤེས་ཀྱང་དམིགས་མེད་ཀྱི་སྙིང་རྗེ་སྐྱེའོ། མི་རྟོག་ངོ་མ་ཤེས་པ་དེས་གཉུག་མ་ལ་བསྒྲིབས་པས། རྗེས་ཤེས་ཀྱི་དྲི་མའོ། །ཤེས་བྱའི་དྲི་མ་དག །དྲན་པས་མ་ཟིན་པ་དང་། ངོ་བོ་མཐོང་མ་མཐོང་མེད་པས་བྲལ་ཐོབ་གཉིས་གཅིག །རྟོགས་པའི་ཡེ་
ཤེས་འཁོར་ཡུག་ཏུ་གྱུར་པས། མཉམ་བཞག་འབའ་ཞིག་ཡིན་ནོ། །དུས་ཐམས་ཅད་དུ་གཞུག་མ་མཉམ་ཉིད་ཀྱི་དབྱིངས་སུ་དབྱེར་མེད་དུ་རྟོགས་པས། །སེམས་མཉམ་ཉིད་མངོན་དུ་གྱུར་པའི་དུས་ཡིན། རྟོག་མེད་ལུང་མ་བསྟན་འདུག་པས། རྣམ་ཤེས་ཀྱི་ཕུང་པོ་དང་། ཀུན་གཞིའི་རྣམ་པར་ཤེས་པ་དང་གཉིས་སུ་མེད་པའི་ཡེ་ཤེས་རྒྱུན་མི་འཆད་པས་རྟོགས་པའི་འཁོར་ཡུག་གོ །དབྱིངས་དང་ཡེ་ཤེས་གཉིས་སུ་མེད་པའི་རྟེན་ཅིང་འབྲེལ་བར་འབྱུང་བ། ཇི་སྙེད་པ་ཐམས་ཅད། ཇི་ལྟ་བ་མངོན་དུ་གྱུར་ཀྱང་། གཉིས་སྣང་མེད་པས། གཞི་མེད་ཀྱི་རྟེན་ཅིང་འབྲེལ་བར་འབྱུང་བ་མཁྱེན་པའོ། །རོ་གཅིག་དང་། སྒོམ་མེད་ཀྱི་ཁྱད་པར། གཉིས་སྣང་ཕྲ་མོ་དང་། དྲན་པའི་རྩོལ་བ་དག་མ་དག་ཡིན་ནོ། །འདི་སྐབས་མཉམ་རྗེས་ནི་མེད་དེ། གཉིས་སྣང་ཕྲ་ཞིང་ཕྲ་བ། གནས་ངན་ལེན་དང་བཅས་པ་འདག་པ་ཡིན།། ཉམས་མྱོང་གི་རྩི་ལ་མ་འབྱར་བ་གལ་ཆེ། །དྲན་འཛིན་ཐམས་ཅད་ཞིག་པའི་ངང་ནས། གཉིས་མེད་གཙོ་བོར་བསྒོམ། ལྷུན་གྲུབ་ཀྱི་རང་ངོ་ཤེས་པ་ཡིན་གསུངས། གཞི་རིམ་གྱི་ཞིབ་ཆ་འདི་རྣམས། སྙན་དུ་བརྒྱུད་པའི་
རྩ་ཚིག་ལ། རྒྱ་སྟོན་ཆོས་ཀྱི་བཟང་པོས་མཆན་བུ་རྒྱབ། དེ་དྲུང་ཆེན་ཀུན་དགའ་རྣམ་རྒྱལ་བའི་ཁྲིད་ཡིག་ཏུ་དྲང་བར་མཛད་པ། བདག་གིས་གོ་བདེ་བར་བཀྲོལ་བའོ། །རྗེ་དྭགས་པོ་རིན་པོ་ཆེས་སྒོམ་མེད་ཀྱི་རྣལ་འབྱོར་ནི། ཅི་སྣང་ཅི་སྐྱེས་ངོ་བོ་གཅིག་ཏུ་ཤར་བས་དྲན་རྟོག་ཐམས་ཅད་སྒོམ་དུ་སོང་བ་ཡིན་གསུངས། རིམ་ལྔ་ལས། མི་སློབ་པའི་ཟུང་འཇུག །ལ་བ་པས། རྣམ་པར་དག་པ། ཤ་བ་རི་པས་རྣལ་འབྱོར་ཆེན་པོ། མེ་ཏྲི་པས་རིག་པ་དེ་ཉིད་དུ་གྲོལ་བའི་དུས། ལང་དཀར་གཤེགས་པའི་མདོ་ལས་སྤྲོས་མེད་ཀྱི་རྣལ་འབྱོར་དང་། དེ་བཞིན་གཤེགས་པའི་བསམ་གཏན། དབང་བཞི་པའི་དོན་རྣམས་གཅིག་པར་བཞེད། ཁྲིད་ཆེན་ལས། སྒོམ་མེད་ཀྱི་རྣལ་འབྱོར་ནི། དེ་ལ་གོམས་ཤིང་འདྲིས་པར་བྱས་པས། རོ་གཅིག་ཆེན་མོ་མན་ཆད་ལ་རྗེས་ཤེས་ལ་གཉིས་སྣང་སྒྱུ་མ་ཙམ་དེ་དག་རྟོགས་ཆོས་ཡང་དག་གི་དྲན་པ་མ་ཡེངས་ཙམ་དང་། སྟོང་འཛིན་གྱི་དྲི་མ་ཅུང་ཟད་ཡོད་པ་ཡང་དག་གི་དྲན་པས་རྩོལ་བ་ཟིན་པ་ཡོད་པ་དང་། གཉིས་སྣང་ཕྲ་མོ་དེ་དག་ཐམས་ཅད་དག་ནས་ལྷུན་གྲུབ་ཀྱི་རང་ས་ཟིན། བསྒོམ་བྱ་སྒོམ་བྱེད་དང་བྲལ་བར་རྟོག་ཙམ་
བྱས་ཀྱང་བདེ། མ་བསྒོམས་ཀྱང་རྒྱུན་ཆད་མེད་པར་སྒོམ་དུ་འཆར། མཉམ་པར་བཞག་མ་བཞག་དྲན་པས་ཟིན་མ་ཟིན། ཡེངས་མ་ཡེངས་ལ་མ་ལྟོས་སྒོམ་དུ་འཆར། བློ་གཤིས་ཐོག་ཏུ་སྒོམ་པའི་འོད་གསལ་དང་། ཤི་བའི་འོད་གསལ་མ་བུ་གཉིས་གཅིག་ཏུ་འདྲེས། །ནམ་མཁའ་ལ་སྤྲིན་དྭངས་པའམ། ཆུ་རླབས་དང་བྲལ་བ་བཞིན། འོད་གསལ་གཉིས་གཅིག་ཏུ་འདྲེས། ཆོས་སྐུ་འབའ་ཞིག་ཏུ་གྱུར། སྤང་བླང་བྱ་བྱེད་དང་བྲལ། ཤི་མ་ཤི་མེད་སྙམ་པ་དང་། མཉམ་རྗེས་མེད་པའི་ངེས་ཤེས་ལྷང་གིས་སྐྱེ། གཞན་སྣང་དུ་མཁའ་འགྲོས་བསྐོར་བ་དང་ལུས་དུ་མར་མཐོང་། མོས་གུས་ཅན་གྱི་གང་ཟག་ལ་སངས་རྒྱས་རང་སྣང་ལ་ཤིར། ངག་ཅི་བྱས་ཀྱང་ཆོས་སུ་འགྲོ། ལུས་ཇི་ལྟར་བྱས་ཀྱང་སེམས་ཅན་དེད། གནས་གར་བསྡད་ཀྱང་བྱིན་རླབས་སྐྱེ། གཅིག་པུར་བསྡད་ཀྱང་སྐྱོ་དུབ་མེད། ལུང་པ་གར་ཕྱིན་ཀྱང་བདེ་ལེགས་འབྱུང་། རེས་ཕྱིའི་སྤྱོད་པ་དང་། འཇིག་རྟེན་པ་དགའ་འདུག་སྙམ་པ་གཞན་སྣང་ལ་ཡོད། བྱང་སེམས་བསྟན། ལས་འབྲས་མངོན་དུ་གྱུར། ཐམས་ཅད་སྐྱེ་མེད་དུ་རྟོགས། ས་གང་ལའང་ཞེན་པ་
ཅང་རོ་གཅིག་ནི་སློབ་པའི་ཟུང་མཁྱེད་མེད་པ་ནི། སྒོམ་མ་རྒྱུའམ། ཉམས་ཀྱི་མེད། གཙང་བཙོག་དང་ངོ་ཚའི་རྣམ་རྟོག་ཆད། དཔའ་བོ་དང་མཁའ་འགྲོ་ཐམས་ཅད་ཀྱིས་མཆོད་པ་འབུལ་ཞིང་སེམས་ཅན་གྱི་དོན་བྱེད་པའི་གྲོགས་བྱེད། སེམས་ཅན་ཐམས་ཅད་ཀྱི་ཡིད་བཞིན་གྱི་ནོར་བུར་འགྱུར་རོ། །ཞེས་དང་། རྗེ་ཕག་མོ་གྲུ་པས། སྒོམ་མེད་ཆུང་ངུ་བསྒོམ་བྱ་སྒོམ་བྱེད་དང་བྲལ། གསུངས། རྒྱལ་བ་ཡང་དགོན་པས། དེ་ལྟར་རོ་གཅིག་ནི་སློབ་པའི་ཟུང་འཇུག་ཡིན། སྒོམ་མེད་ནི་མི་སློབ་པའི་ཟུང་འཇུག་ཡིན། རྟོགས་པ་དེ་ལས་གོམས་པར་བྱ་རྒྱུ་མེད་པས་ན་སྒོམ་མེད་མངོན་དུ་གྱུར་པའོ། །དེ་ལ་སྒོམ་མེད་ཆུང་ངུས་བསྒོམ་བྱ་སྒོམ་བྱེད་མེད་པ་ནི། སྒོམ་མཁན་ནམ་རྟོག་མཁན་རྩ་བ་ནས་དག་པ་ན། །བསྒོམ་བྱ་སྒོམ་བྱེད་མེད། རྟོག་བྱ་རྟོག་བྱེད་མེད། ཤེས་བྱ་ཤེས་བྱེད་མེད། དྲན་བྱ་དྲན་བྱེད་མེད་པ་ལ་སོགས་པའི་བསྒོམ་པར་བྱ་རྒྱུའམ། །ཉམས་ཀྱི་དྲི་མ་སངས་ཀྱིས་དག་ནས་ཉིན་པར་མཉམ་རྗེས་མེད། ཡེངས་མ་ཡེངས་མེད་པར་ཤར་བ་ལ།། མཚན་མོ་ངོ་མ་ཤེས་ཀྱི་འཛིན་པའི་དྲི་མ་ཅུང་ཟད་འདུག་པ་དེ་སྒོམ་མེད་ཆུང་ངུའོ། །ཞེས་གསུངས། ཁྲིད་ཆེན་ལས། སྒོམ་མེད་ཆུང་དུ་ནི། དྲན་པས་བཟུང་མ་དགོས་པར་ཅི་
བྱས་ཀྱང་བསྒོམ་དུ་ཤར། བསྒོམ་བྱ་སྒོམ་བྱེད་དང་བྲལ། མཉམ་པར་བཞག་མ་བཞག་ལ་ལྟོས་མ་དགོས་པར་སྒོམ་དུ་འཆར། གོང་གི་རོ་གཅིག་ཆེན་པོའི་དུས་ཀྱི་རྗེས་སྣང་སྒྱུ་མ་ལྟ་བུ་དེའང་ཕྲ་མོར་སོང་ནས་ཡང་དག་གི་དྲན་པས་ཀྱང་བཟུང་མི་དགོས། ཁོ་རང་རང་དག་ལ་འགྲོ། རྗེས་སྣང་མི་རྟོག་པ་ངོ་མ་ཤེས་ཞེས་བྱ་བ་ཉོན་མོངས་པ་དང་། རྣམ་རྟོག་ཐམས་ཅད་རོ་གཅིག་མན་ཆད་དུ་དག་ནས་མ་རིག་པའི་ལྷག་མ་ཀུན་གཞིའི་རྣམ་པར་ཤེས་པ་རྟོག་བྲལ་ལུང་མ་བསྟན་དུ་གནས་པ་དེ་ཡེ་ཤེས་སུ་མ་གྱུར་ཙམ་གྱིས་ནུས་པ་མེད་པས་སྤང་བྱ་རབ་ཆད་དོ། །རྟོག་མེད་རང་ངོ་ཤེས་པ་ཙམ་ཞིག་ཡོད་པས་དེའང་མ་རིག་པའི་ཆ་ལས། སྒྱུ་མ་ལྟ་བུ་དུས་ཐུང་བས་སྐད་ཅིག་མ་རེས་འབྱུང་སྟེ། རང་གི་ངོ་བོ་མི་རྟོག་པར་ཡོད་པ་གཉེན་པོ་བརྟེན་མི་དགོས། གཉིད་དུས་སུའང་རེས་འགའ་འཛིན་པའི་དྲི་མ་ཅུང་ཟད་ཙམ་འབྱུང་ཡང་སྲིད་པས། རང་གསལ་དུ་མ་ཤེས་པས་ཤེས་བྱ་ལ་སྐུ་སྒྲིབ་བོ། །ཞེས་དང་། རྗེ་ཕག་མོ་གྲུ་པས། སྒོམ་མེད་འབྲིང་པོ་ལྷུན་གྲུབ་ཀྱི་རང་ས་ཟིན་གསུངས། རྗེ་རྒོད་ཚང་པས། ཉིན་མོའི་དུས་སུ་ཡང་རྗེས་སྣང་སྒྱུ་མ་ཙམ་མངོན།
ཡུན་སེ་གོལ་གཏོགས་པ་ཙམ་དུ་གནས་འདུག་ཀྱང་། དྲན་པས་བཟུང་རྒྱུའི་ཐ་སྙད་མེད་པར་དེ་ཉིད་ངོ་བོ་རང་དག་ཏུ་འགྲོ་གསུངས། ཡང་དགོན་པས། སྒོམ་མེད་འབྲིང་པོ་ལྷུན་གྲུབ་ཀྱི་རང་ས་ཟིན་པ་ནི། གཞི་ཐོག་ཏུ་འབྲས་བུ་ཕྱིན། སྐུ་གསུམ་མ་དང་འཕྲད། ཡིད་བཞིན་མངོན་དུ་གྱུར་པས་ཉིན་མཚན་མེད་གཉིད་དུ་སོང་མ་སོང་མེད་པ། དྲན་པས་བཟུང་རྒྱུའམ། ངེས་ཤེས་སྐྱེ་རྒྱུ་གཏན་ནས་མེད། མཉམ་བཞག་ཆེན་པོ་གཅིག་ཏུ་གྱུར་པ་ལ། ཡེ་ཤེས་ཀྱི་རང་གྲིབ་ལ་མི་ཤེས་པའི་ཟེར་ཤེས་བྱའི་དྲི་མ་ཅུང་ཟད་དང་བཅས་པ་ནི། སྒོམ་མེད་འབྲིང་པོའོ། །ཞེས་དང་། ཁྲིད་ཆེན་ལས། སྒོམ་མེད་འབྲིང་པོ་ནི། ལྷུན་གྲུབ་ཀྱི་རང་ས་ཙིར་གྱིས་ཟིན། སྔར་བས་མྱོང་བ་བརྟན་དུ་སོང་། འཁོར་འདས་གཉིས་ཡེ་ནས་ལྷུན་གྲུབ་ཏུ་གནས་པ་དེ་མངོན་དུ་གྱུར། འཛིན་པ་ཐམས་ཅད་དང་བྲལ། གཉུག་མའི་རང་ས་ཟིན་ནས། ཉིན་མཚན་མེད་པར་མཉམ་བཞག་ཡེ་ཤེས་ཀྱི་འཁོར་ལོས་སྒྱུར་ཏེ། མཉམ་བཞག་ཡེ་ཤེས་དེའི་ཤུགས་ཀྱིས་འཕངས་བའི་རྗེས་སྣང་མི་རྟོག །ངོ་མ་ཤེས་ཀྱི་ཕྲ་ཞིབ་སྔར་བས་ཕྲ་བ་ཡུལ་ལ་སྤྱོད་ལོང་མེད་པ་སེ་གོལ་གཏོགས་པ་ཙམ་
དུ་སྣང་བ་སྒྱུ་མ་ལྟ་བུར་རང་གསལ་དུ་གྲོལ་དུས་ཐམས་ཅད་དུ་ངོ་བོ་མི་རྟོག་པར་རང་གསལ་དུ་མ་ཤར་ཙམ་གྱིས། གནས་ངན་ལེན་གྱི་དྲི་མ་ཐམས་ཅད་རང་རྗེས་ཕྲ་མོ་ཙམ་དང་། བཅས་པའི་མཉམ་བཞག་ཐམས་ཅད་ཟག་མེད། རྗེས་སྣང་ཉམས་སུ་ལེན་པའི་འཕགས་ལམ་ཡན་ལག་བརྒྱད་པོ་སོགས་ཟག་བཅས་ཡིན་ནོ། །ཞེས་དང་། རྗེ་ཕག་གྲུའི་ཞལ་ནས། སྒོམ་མེད་ཆེན་པོས་འོད་གསལ་གཉིས་འདྲེས་པའོ། གསུངས། རྒྱལ་བ་ཡང་དགོན་པའི་ཞལ་ནས། སྒོམ་མེད་ཆེན་པོ་འོད་གསལ་གཅིག་ཏུ་འདྲེས་པ་ནི། ཆོས་དབྱིངས་ཡེ་ཤེས་དང་། བདེ་བར་གཤེགས་པའི་ཆོས་དབྱིངས་དབྱེར་མེད་པས། ལམ་དང་རང་བཞིན་གྱི་འོད་གསལ་གཅིག་ཏུ་འདྲེས་ནས། འོད་གསལ་ཆེན་པོ་སྤྲོས་མེད་ཀྱི་ཡེ་ཤེས་ལ། མི་ཤེས་པ་དང་ཤེས་པ་དང་ཤེས་བྱའི་དྲི་མ་རྩ་བ་ནས་དག་པས། ཚེ་འདི་ཕྱི་ལས་རྒྱུ་འབྲས་ཀྱི་འཛིན་པ་ཕྲ་མོ་ཙམ་ཡང་མེད་པར། རང་གཞན་འཁོར་འདས་གཅིག་ཏུ་གྱུར་པ་ནི། སྒོམ་མེད་ཆེན་པོ་འོད་གསལ་གཅིག་ཏུ་འདྲེས་པས། མི་སློབ་པའི་ཟུང་འཇུག་གོ །ཞེས་དང་། ཁྲིད་ཆེན་ལས། སྒོམ་མེད་ཆེན་པོ་ནི། རྣམ་
ཤེས་ཐམས་ཅད་ཡེ་ཤེས་སུ་གནས་འགྱུར། ཡེ་ཤེས་ཀྱི་རལ་གྲིས་ཤེས་བྱའི་སྒྲིབ་པ་གནས་ངན་ལེན་གྱི་དྲི་མ་དང་བཅས་པ་དག་ནས་བཅད་དེ། ཆོས་ཀྱི་དབྱིངས་ཤིན་ཏུ་རྣམ་པར་དག་པ་མའི་འོད་གསལ་དང་། མེ་ལོང་ལྟ་བུའི་ཡེ་ཤེས་བུའི་འོད་གསལ་གཉིས་འདྲེས། མི་སློབ་པའི་ཟུང་འཇུག །བླ་ན་མེད་པའི་བྱང་ཆུབ་མངོན་དུ་གྱུར། མཉམ་རྗེས་མེད། གཉུག་མ་མ་བཅོས་པའི་ཐོག་ཏུ་བསླེབས་པས། རང་དོན་ཆོས་སྐུ་གཉུག་མའི་རང་རྩལ་ཕྱོགས་མེད་དུ་འབྱོངས་པས། གཞན་དོན་གཟུགས་སྐུ་གཉིས་ཀྱིས་འཁོར་བ་མ་སྟོངས་ཀྱི་བར་དུ། འགྲོ་དོན་མཛད་པ་མཐར་ཕྱིན་པའི་ལམ་མངོན་དུ་ཕྱིན་པའོ། །སྒོམ་མེད་ལ་མཉམ་བཞག་རྗེས་ཆེར་འབྱེད། ཕལ་ཆེར་མཉམ་བཞག་ལས་མ་གཡོས་པའོ། །དེས་ན་དྲན་རྒྱུ་བསྒོམ་རྒྱུ་མེད་པར་མྱོང་བ་དག །ངེས་ཤེས་ལ་སོགས་པ་དྲན་འཛིན་གྱི་རྩོལ་བ་དང་བྲལ། ཆོས་ཉིད་ཟད་སར་འཁྱོལ་སྣང་བ་ལ་བདེན་འཛིན་བྲལ། སྒོམ་མེད་དང་པོ་རྟོགས་པའི་དུས་སུ་སངས་རྒྱས་ཀྱི་ཆེ་བའི་ཡོན་ཏན་ཐམས་ཅད་སྤྲིན་ལྟར་གཏིབས་པས། བཅུ་པ་ཆོས་ཀྱི་སྤྲིན་ཞེས་པ་དང་། སྒོམ་མེད་འབྲིང་པོ་ལྷུན་གྲུབ་ཀྱི་རིང་ས་ཙིར་
གྱིས་ཟིན་ཏེ། སྔར་བས་མྱོང་བ་བརྟན་དུ་སོང་ཞེས་པ་ནས། རང་གསལ་དུ་ཤར་བའི་གྲོལ་བ་དེ་ལ་ས་བཅུ་རྒྱུན་གྱི་ཐ་མ་ཁྱད་པར་གྱི་ལམ་ཟེར། ཞེས་པའི་བར་གསུངས་པ་དང་། སྒོམ་མེད་ཆེན་པོ་འོད་གསལ་མ་བུ་འདྲེས་ནས་མཉམ་བཞག་རྗེས་ཐོབ་མེད་ཅིང་། གཉུག་མ་བཅོས་ཐོག་ཏུ་སླེབས་པ། རང་དོན་ཆོས་སྐུ་ཐོབ། གཉུག་མའི་རང་རྩལ་ཕྱོགས་མེད་དུ་འབྱོངས་པས། གཞན་དོན་གཟུགས་སྐུ་གཉིས་ཀྱིས་འཁོར་བ་མ་སྟོངས་ཀྱི་བར་དུ་འགྲོ་དོན་མཛད་པ་འདི་ལ་བཅུ་གཅིག་ཀུན་ཏུ་འོད་དེ། ཆོས་རྗེས་སྒོམ་མེད་བཅུ་གཅིག་མཐར་ཕྱིན་ལམ། ཞེས་གསུངས་པས། ལམ་ལྔ་པ་མཐར་ཕྱིན་ལམ། ཞེས་དང་། རྒྱལ་དབང་རྗེས། སྒོམ་མེད་ཀྱི་རྩེ་གཅིག་ནི། བསྒོམ་བྱ་སྒོམ་བྱེད་དང་བྲལ་བའི་ངང་ལ་རྩེ་གཅིག་ཏུ་མཉམ་པར་བཞག་པ་དེ་ཡིན། སྒོམ་མེད་ཀྱི་སྤྲོས་བྲལ་ནི། བློ་ལས་འདས་པ་སྟེ། བློའི་སྤྲོས་པ་ཐམས་ཅད་ལས་གྲོལ་བ་དེ་ཡིན། སྒོམ་ཕྱོགས་མེད་ཀྱི་རོ་གཅིག་ནི། སྲིད་པ་དང་ཞི་བ་ཐམས་ཅད་སྒོམ་མེད་དེའི་དབྱིངས་སུ་རོ་གཅིག་པ་དེ་ལས་དབྱེ་རྒྱུ་རྡུལ་ཙམ་མེད་པ་དེ་ཡིན། སྒོམ་མེད་ཀྱི་སྒོམ་མེད་ནི། དེ་ལ་བརྟན་པ་
ཐོབ་པ་དེ་ཡིན་ཏེ། རོ་གཅིག་མན་ཆད་ཀྱི་བརྟན་པ་ཐོབ་པ་ནི། འདྲེས་པའོ། །དཔེར་ན་བསྐྱེད་རིམ་ལ་བརྟན་པ་ཐོབ་པ་དང་། གནས་སྐབས་ཀྱི་མཉམ་རྗེས་འདྲེས་པ་ཡིན་ལ། སྒོམ་མེད་ཀྱི་བརྟན་པ་ཐོབ་པ་ནི། མཐར་ཐུག་གི་མཉམ་རྗེས་རྫོགས་རིམ་ལ་བརྟན་པ་ཐོབ་པ་ལྟ་བུའོ། །ཚར་རོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ཨ༽ ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་ལས་ཚར་ཆོས་བཞུགས་སོ།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཕྱག་རྫོགས་ཟུང་འཇུག་གི་ཁྲིད་ཆོས་ཐུན་སུམ་ཅུའི་མཇུག་འདིར་དོན་བསྡུ་དགོས་ཏེ། ཨོ་རྒྱན་རིན་པོ་ཆེའི་ཞལ་ནས། གཏམ་ལ་དགའ་བ་བསྡུ་དོན་ཡིན། །ཞེས་གསུངས་པ་ལྟར་དོན་བསྡུ་ལུགས། ཨོ་རྒྱན་རིན་པོ་ཆེའི་ལུང་བསྟན་ལས། ང་ཡི་གསུང་སྤྲུལ་དཱི་པཾ་ཀ་ར་ཞེས༔ བྱང་ཆུབ་སེམས་དཔའ་བོད་གནས་དཀར་པོར་བཏང་། ཞེས་གསུངས་པ་ལྟར། ཇོ་བོ་རྗེ་དཔལ་ལྡན་ཨ་ཏི་ཤ་དེ། རྒྱ་གར་དུ་པཎྜི་ཏ་ལྔ་བརྒྱའི་གཙུག་གི་ནོར་བུ་དེ་ལྟ་བུ་དེ་བོད་དུ་བྱོན་དུས། བོད་དུ་
ལོ་ཆེན་རིན་ཆེན་བཟང་པོ་ཞེས་བྱ་བ་འཇམ་དབྱངས་ཀྱི་སྤྲུལ་པ། པཎྜི་ཏ་ཉི་ཤུ་རྩ་ལྷག་བླ་མར་བསྟེན། གསར་མའི་ཆོས་ཐམས་ཅད་ཀྱི་ཆུ་མགོ་གངས་ལ་ཐུག་པ་ལྟ་བུ་ཁོང་ཡིན། ཁོང་གིས་དེང་སང་ང་ལས་ཡོན་ཏན་ཆེ་བ་མེད། པཎྜི་ཏ་ལའང་ཞུ་རྒྱུ་མེད། འོན་ཀྱང་རྨིས་ལྟས་བཟང་བས་བསྙེན་བཀུར་ཙམ་ཞིག་བྱ་སྙམ་པས། དེ་ནུབ་རྨི་ལམ་དུ་མི་དཀར་པོ་ཞིག་བྱུང་ནས། ཁོ་བོ་སེམས་ཅན་གྱི་དོན་ལ་བྱས་ཡུས་ཆེ། ད་རུང་ཞུ་རྒྱུ་མང་དུ་མཆིས། རྒྱ་བོད་ཀྱི་ལོ་པཎ་ཐམས་ཅད་དྲིལ་ཀྱང་པཎྜི་ཏ་འདི་ཡི་ཡོན་ཏན་མི་རྫོགས། མན་ངག་ཐམས་ཅད་བོད་ཀྱིས་
མི་ལོན་གསུངས་ནས་ཡལ། དེ་ནས་ཐག་རིང་ནས་བསུས་ཏེ་ཁང་པར་སྤྱན་དྲངས་ནས་གདན་མཉམ་པ་ཙམ་བྱས། ལྷ་ཁང་འོག་མ་ལ་ཐེག་པ་ཐུན་མོང་གི་ལྷ། བར་ཁང་ན་ཐེག་ཆེན། སུམ་ཐོག་ན་སྔགས་སྐུ་ཡོད་པ་ཐམས་ཅད་ལ་བསྟོད་པ་ཤོ་ལོ་ཀ་རེ་མཛད། དང་པོ་ཚིག་དང་སྙན་ངག་སོགས་ལ་དད་ནས། རང་གི་སྟན་ལ་ལོ་ཙཱ་བས་ཕྲི་ཐེབ་གསུམ་བྱས་ནས་སྟན་མེད་པར་བཞུགས། ལོ་ཙཱ་བས་དྲི་བ་མང་པོ་བྱས་པས། ལོཙྪ་བས་རྣ་བར་མ་ཐོས་པ་མང་པོ་ལའང་མཁས་པར་སྣང་བས་ང་རྒྱལ་ཆག །ལོཙཱ་བ་ལ་གང་དྲིས་དྲིས་ལ་ཁོང་མཁས་ཟེར་བ་ལས་མ་བྱུང་། ལོཙྪ་བ་ལའང་མཉེས་ནས་ཁྱེད་དང་འདྲ་བ་བོད་དུ་ཡོད་པ་ཁོ་བོ་བོད་དུ་འོང་མི་འཚལ་བར་འདུག་པ་ལ་གསུངས། ཡང་ལོཙྩ་བ་དེ་དག་ཐམས་ཅད་གདན་ཐོག་གཅིག་ཏུ་ཧྲིལ་ཏེ་དྲིལ་ནས་ཉམས་སུ་ལེན་ན་ཅི་ཚུགས་བྱེད་གསུངས། ལོཙྪབས་ན་རེ། ཐེག་པ་མ་འདྲེས་སོ་སོར་གསལ་བྱ་བ་བྱེད་ལ་མ་འདྲེས་པར་རང་སར་ཉམས་སུ་ལེན་པ་ལགས་མོད་ཞུས་པས། ཇོ་བོས། ལོཙྪ་ངན་པར་ཐལ། བོད་ལ་ཁོ་བོ་དགོས་པར་འདུག་གསུངས། དེ་ནུབ་ལོཙཱ་བས་ནམ་ཐུན་གསུམ་དུ་བསྒོམས་ནས་གནས་གསུམ་
དུ་རིམ་གྱིས་ཐེག་པ་མཐོ་དམན་དང་བསྟུན་ནས་བསྒོམས་པས་ཁོང་གི་སྤྱོད་པ་པཎྜི་ཏས་མཁྱེན་ནས། ལོཙྪ་བ་མ་བཟང་དེས་མི་ཡོང་གསུངས། འོ་ན་ཁྱེད་རང་ཇི་ལྟར་མཛད་ལགས་ཞུས་པས། ཅི་ཟེར་གནས་གར་སྡོད། གྲོགས་སུ་འགྲོགས། སྤྱོད་ལམ་ཅི་བྱེད་ཀྱང་། འདུལ་ཁྲིམས་ལ་གཞི་བྱས་ལ། སེམས་ཅན་ཐམས་ཅད་མ་ཡིན་པས་དེར་བསྒོམ་དགོས། མ་ལྟར་དག་སྣང་སྦྱོངས། ལྷ་སྐྱེ་མེད་ཡིན་པས་དེར་བསྒོམ། འདྲིལ་མ་ཤེས་ན་སྙིང་པོ་མི་ལོན་གསུངས། ཡང་ཇོ་བོའི་ཞལ་ནས། ཁྲིམས་ནི་ཡོན་ཏན་ཀུན་གྱི་གཞིར། །རང་གི་སྟོན་པས་ལེགས་པར་གསུངས། །སྙིང་རྗེ་ཆེ་དང་འབྲེལ་པ་ཡི། །བྱང་ཆུབ་སེམས་ནི་མཆོག་ཏུ་བསྔགས། །བཟང་རྟོག་མཚན་མས་མ་བཅིངས་པའི། །བསྐྱེད་རྫོགས་ཟུང་འབྲེལ་ངེས་འཚང་རྒྱ། །སྐྱེས་བུ་ཆུང་དང་ཆེར་གྱུར་པའི། །བྱ་བ་འདི་ཡིན་འབྲིང་པོ་ལའང་། །མི་རྟག་མཆོད་པ་བསྐུལ་བ་གཅེས། །རང་དགའ་སྤང་ནས་རྒྱལ་བའི་བཀའ། །རྒྱས་པར་བྱེད་པ་མཁས་པ་ཡིན། །སྙིང་པོར་བསྡུས་ནས་ཉམས་ལེན་པའི། །སྐྱེས་བུ་དེ་ནི་བཟང་པོ་ཡིན། །ལས་འབྲས་ཁྱད་དུ་མི་གསོད་
པའི། །བག་ཡོད་ཅན་དེར་བཙུན་པོར་བཞེད། །ཀུན་ཤེས་གཅིག་སྡུག་མཁས་པའི་སྐྱོན།། །ལག་ལེན་མི་བྱེད་འཆལ་བ་ཡིན། །བླང་དོར་མི་བྱེད་བཙུན་པའི་གསེབ། །ཤེས་རབ་སྤྱོད་ཅིག་རིན་ཆེན་བཟང་། །ཐུགས་རྗེ་ཆེན་པོས་བསྐུལ་བར་ཟད། །ཅེས་གསུངས་སོ། །ལོ་ཆེན་རིན་ཆེན་བཟང་པོ་ངེས་ཤེས་སྐྱེས་ནས། །ཚེ་མཚམས་ཀྱི་དམ་བཅའ་ཕུལ་ཏེ་བསྒྲུབས་པས་ལུས་མ་སྤང་བར་མཁའ་སྤྱོད་དུ་གཤེགས་སོ། །ཇོ་བོས་ཀྱང་རྒྱུད་སྡེ་བཞི་སྟན་ཐོག་གཅིག་ཏུ་ཉམས་སུ་ལེན་པའི་གདམས་ངག་དང་། ལྔ་གདན་གྱི་རྒྱ་གཞུང་ཡང་མཛད། དེ་ལ་དཔལ་ཕག་མོ་གྲུ་པས། སློབ་མ་གདུགས་ཐོགས་པ་ལྔ་སྟོང་དང་བརྒྱད་བརྒྱ་བྱུང་བ། ལྔ་ལྡན་ཁོ་ནས་གྲོལ་བར་མཛད། སྐྱོབ་པ་འཇིག་རྟེན་གསུམ་གྱི་མགོན་པོས། ཕྱག་རྒྱ་ཆེན་པོ་སེང་གེ་འདྲ། །ལྔ་ལྡན་མེད་ན་མིག་མེད་ཡིན། །ཞེས་གསུངས་ཏེ། ལྔ་ལྡན་གྱི་སྒོ་ནས་སློབ་མ་རྣམས་བསྐྱང་བས། སློབ་མ་མངོན་ཤེས་དང་རྫུ་འཕྲུལ་ཐོབ་པ་ཁྲི་ཚོ་བཅོ་བརྒྱད་ཙམ་བྱུང་བར་གྲགས། དེ་ལ་བྱང་ཆུབ་སེམས་དང་ཡི་དམ་ལྷ། །བླ་མ་ཕྱག་རྒྱ་ཆེན་པོར་བསྒོམ། །བསྔོ་བའི་ཆོས་ཀྱི་ཉམས་སུ་ལོངས། །ཞེས་
གསུངས་པས། དོན་ལྔ་པོ་དེའི་ནང་དུ་གསར་མའི་ལུགས་ཀྱི་མདོ་སྔགས་གཉིས་ཀྱི་ཉམས་ལེན་རིགས་ཅི་ཡང་མ་ཚང་བ་མེད་པ་ཡིན། ཁྲིད་འདི་ཡི་ལུགས་ཀྱི་དེའི་སྟེང་དུ་རྫོགས་པ་ཆེན་པོ་ཐོད་རྒལ་བསྣན་པས། ཐེག་པ་དགུའི་ཉམས་ལེན་རྫོགས་པ་ཡིན། དེ་ཡང་སྟན་ཐོག་གཅིག་གམ་ཐུན་གཅིག་ཉམས་སུ་ལེན་དགོས་ཏེ། དེའི་དོན་རྗེ་ཕག་གྲུའི་མཛད་པའི་ཕྱག་ཆེན་རེ་མིག་མ་དང་། རྗེ་འཇིག་རྟེན་གསུམ་མགོན་གྱི། སུམ་ཆོས་ཀྱི་དོན་བསྡུས་ཏེ་བཤད་ན། ལྷ་མ་བསྒོམས་ན་བར་ཆད་འོང་། རིགས་འཆོལ་ན་རང་གི་ཚེ་གཅིག་ཏུ་བསྐྱངས་ཀྱང་དྲིན་ལན་མེད་ཟེར་ནས་གཞན་ཞིག་ཏུ་འགྲོ། ཡི་དམ་གྱི་ལྷ་མེད་ན་ཐ་མལ་པ་ཡིན། ལྷ་མ་བསྒོམས་པར་ཉམས་ལེན་ཅི་བྱས་ཀྱང་ཚེ་གཅིག་གིས་སངས་རྒྱས་མི་ཐོབ་སྟེ། མདོ་ལུགས་ཡིན། སངས་རྒྱ་བ་ལ་བསྐལ་པ་གྲངས་མེད་གསུམ་འགོར། ལྷ་བསྒོམས་པས་བསེན་མོའི་གདོན་ཞི། འདོད་ཆགས་ཅན་ཐམས་ཅད་དབང་དུ་འདུ། སྣང་བ་ཟིལ་གྱིས་ནོན། སོར་རྟོག་ཡེ་ཤེས་འཆར། འདོད་ཆགས་ལ་གནད་དུ་འགྲོ། གཞན་གྱི་འཁོར་འདུ་ཞིང་རང་གི་རིགས་མི་འཆོལ། ཕྱག་རྒྱ་ཆེན་པོ་
མེད་ན་འཁོར་བ་ནས་མི་ཐར། ཆོས་དང་དགེ་སྦྱོར་ལ་བརྩོན་ཀྱང་ལྷ་མིའི་བདེ་སྐྱིད་ཙམ་ལས་མི་ཐོབ། ལྷ་མིའི་ཐེག་པ་བྱ་བ་ཡིན། གཞན་བྱིན་གྱིས་རློབས་མི་ནུས། ཕྱག་རྒྱ་ཆེན་པོ་བསྒོམས་པས་གཏི་མུག་ལ་གནད་དུ་འགྲོ། ཀླུའི་གདོན་ཞི། གཏི་མུག་ཅན་རྣམས་དབང་དུ་འདུ་འཁོར་བ་ལས་གྲོལ། ཆོས་དབྱིངས་ཡེ་ཤེས་ཐོབ། འཁོར་འདས་བདག་པོར་འགྱུར། ཆོས་ཀྱི་སྐུ་དང་ངོ་བོ་ཉིད་ཀྱི་སྐུ་ཐོབ་བོ། །དེ་ལྟར་ལུས་ཡི་དམ་ལྷའི་བསྐྱེད་རིམ་དང་། སེམས་རྫོགས་རིམ་སྟོང་པ་ཉིད་ཀྱི་དོན་སྒོམ་པ་གཉིས། ལས་དང་པོ་པས་ཐུན་གྱི་སྟོད་སྨད་གཉིས་སུ་བསྒོམ། དེ་ལ་གོམས་ནས་ཟུང་འཇུག་ཏུ་སྒོམ་པ་ནི། གསང་སྔགས་རྡོ་རྗེ་ཐེག་པའི་བསྟན་པའི་དངོས་གཞི་ཡིན་ཏེ། བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པ་སྟེ། །རིམ་གཉིས་མཉམ་པར་གང་བཞག་པ། །འདི་ནི་སངས་རྒྱས་བསྟན་པ་ཡིན། །ཞེས་གསུངས། དེ་ལྟར་དངོས་གཞི་བསྐྱེད་རྫོགས་གེགས་སེལ་བོགས་འདོན་མཆོག་ཏུ་གྱུར་པ་ནི་བླ་མའི་རྣལ་འབྱོར་ཡིན་པས་གལ་ཆེ། དེ་མ་བསྒོམས་ན་འབད་ཀྱང་བླ་མའི་ཐུགས་མི་ཟིན། བྱིན་རླབས་མི་འབྱུང་། ཉམས་རྟོགས་
མི་སྐྱེ། རང་གི་འཁོར་རྣམས་ལ་ཡང་མོས་གུས་མེད་པར་མཉམ་འགྲོགས་བྱེད། བླ་མ་བསྒོམས་པས་ང་རྒྱལ་ལ་གནད་དུ་འགྲོ། ལྷའི་བུའི་བདུད་ཞི། ང་རྒྱལ་ཅན་རྣམས་དབང་དུ་འདུ། རིག་པ་འཛིན་ཅིང་བྱིན་རླབས། མཉམ་ཉིད་ཡེ་ཤེས་འཆར། ཀུན་གྱིས་བཀུར་ཞིང་བླ་མའི་གོ་འཕང་ཐོབ། བྱང་ཆུབ་ཀྱི་སེམས་བསྒོམ་པ་འདི་ནི། སངས་རྒྱས་ཐོབ་པ་ལ་དང་པོ་གལ་ཆེ་བ་ས་བོན་ལྟ་བུ། བར་དུ་ཆུ་ལུད་ལྟ་བུ། ཐ་མ་སྟོན་ཐོག་ཕུན་སུམ་ཚོགས་པ་ལྟ་བུ་ཡིན། འདི་མ་བསྒོམས་ན་མི་ཚེ་ཆོས་ལ་བསྐྱལ་ཡང་ཐེག་དམན་ཉན་རང་དུ་གོལ། འབྲས་བུ་སངས་རྒྱས་མི་ཐོབ། གྲྭ་འཁོར་ཡང་མི་འདུ། གལ་ཏེ་འདུས་ཀྱང་འཐབ་ཅིང་ཁ་མཆུ་ཁ་སྨྲས་མང་། སེམས་བསྐྱེད་བསྒོམས་པས་ཞེ་སྡང་ལ་གནད་དུ་འགྲོ། རྒྱལ་འགོང་གི་གདོན་ཞི། ཞེ་སྡང་ཅན་ཐམས་ཅད་དབང་དུ་འདུ། འགྲོ་དོན་འབྱུང་། མེ་ལོང་ཡེ་ཤེས་འཆར། འཁོར་རྣམས་མཐུན་ཞིང་མུ་འཇམ། འབྲས་བུ་སྣ་ཚོགས་སྤྲུལ་པའི་སྐུ་འགྲུབ། ཐུགས་དམ་དགེ་སྦྱོར་རྣམས་ནི་རྟ་བཟང་པོ་སྒ་སྲབ་བྱས་པ་ལྟ་བུ་ཡིན། བསྔོ་བ་ནི་རྟ་ཁ་སྲབ་ཀྱིས་བསྒྱུར་བ་ལྟར་གང་འདོད་དུ་
ཕྱིན་པ་ཡིན་པས་གལ་ཆེ། མ་བསྔོས་ན་འབྲས་བུ་འདོད་བཞིན་མི་ཐོབ། ཐང་གཅིག་འཁོར་འདུས་ཀྱང་གཞན་དབང་དུ་འཆོར། བསྔོ་བ་བྱས་ན་ཕྲག་དོག་ལ་གནད་དུ་འགྲོ། ཀླུ་བཙན་གྱི་གདོན་ཞི། ཕྲག་དོག་ཅན་དབང་དུ་འདུས། དགེ་རྩ་གཞན་དུ་མི་འགྱུར། བྱ་གྲུབ་ཡེ་ཤེས་འཆར། འཁོར་རྣམས་གཞན་དབང་དུ་མི་འགྲོ། འོད་གསལ་ཐོད་རྒལ་མ་བསྒོམས་ན། ཐེག་པ་དགུའི་ཉམས་ལེན་མི་རྫོགས། བལྟས་པས་གྲོལ་བའི་གདམས་ངག་མི་ཐོབ། ལྟ་བ་ཡིད་དཔྱོད་ཀྱི་འཛིན་པ་ཅན་དུ་ལུས། །བར་དོའི་འཁྲུལ་སྣང་ཤར་དུས་ངོས་ཟིན་དཀའ། འོད་གསལ་ཐོད་རྒལ་འདི་ལ་རྒྱུན་དུ་བལྟས་ན། ལྟ་བ་ཡིད་དཔྱོད་དུ་མི་ལུས་ཡེ་ཤེས་ལྔ་མངོན་སུམ་དུ་མཐོང་། རབ་ལ་ཞི་ཁྲོའི་ལྷ་ཚོགས་དངོས་སུ་མཇལ། དེ་ལ་མཇལ་ན་ཡང་བར་དོ་ན་མཇལ་དུས་ངོ་འཕྲོད་དེ་ངེས་པར་གྲོལ། ཐེག་པ་དགུའི་ཉམས་ལེན་ཡོངས་སུ་རྫོ་གས། །གཟའི་གདོན་ཞི། མཁའ་འགྲོ་ཆོས་སྐྱོང་རྣམས་ཀྱིས་བུ་བཞིན་འཚོ། མཐར་ཐུག་འཇའ་ལུས་ཆོས་སྐུ་འཕོ་བ་ཆེན་པོའི་སྐུ་ཐོབ། འཇའ་འོད་ཀྱི་ཐིག་ལེ་བཀྲག་མདངས་ཁྱད་པར་དུ་འཕགས་པ་མྱུར་དུ་མཐོང་སྟེ།
མཐོང་ན་ཆོས་ཉིད་མངོན་སུམ་གྱི་སྣང་བ་ཡིན་པས་དེའི་ཕན་ཡོན་ནི། མཁའ་འགྲོ་ཀློང་གསལ་འབར་མ་ཉི་མའི་གསང་རྒྱུད་ལས། དུས་གསུམ་སངས་རྒྱས་ཐམས་ཅད་དང་། །བདེ་གཤེགས་རིགས་ལྔ་རིགས་གསུམ་མགོན། །ཞི་ཁྲོ་མཁའ་འགྲོ་དཔའ་བོ་རྣམས། །མངོན་སུམ་ཉིད་དུ་མཐོང་བ་ཡིན། །ལས་སྒྲིབ་བག་ཆགས་ཟད་པ་ཡིན། །འདི་ཉིད་མཐོང་བའི་རྣལ་འབྱོར་པ། །ཁམས་གསུམ་འཁོར་བའི་མིང་མེད་ཅིང་། །སྲིད་གསུམ་བརྡར་ཤ་ཆོད་པ་ཡིན། །གྲོལ་ས་འདི་ཉིད་ལན་གཅིག་མཐོང་། །སྲིད་པ་བར་དོ་ཤར་མ་ཐག །རང་བཞིན་སྤྲུལ་སྐུའི་ཞིང་ཁམས་སུ། །བརྫུས་ནས་སྐྱེ་བར་ཐེ་ཚོམ་མེད། །ཅེས་གསུངས། དེ་ལྟར་ཡི་དམ། ཕྱག་ཆེན། བླ་མ། སེམས་བསྐྱེད། འོད་གསལ། བསྔོ་བ་དང་དྲུག་པོ་འདི་རྒྱུན་དུ་ཉམས་སུ་ལེན་དགོས། ལོ་བཅུ་གསུམ་དང་། ལོ་དྲུག་དང་། ལོ་གསུམ་ཕྱོགས་གསུམ་དང་། ཟླ་མཚམས་དང་། བདུན་གསུམ་དང་། བདུན་གཉིས། བདུན་གཅིག་ཡན་ཆོད། མཚམས་ལ་འདུག་ཀྱང་ཉམས་ལེན་འདི་ཡིན། རྒྱུན་ཁྱེར་དུ་ཐུན་བཞིའམ་ཐུན་གསུམ་མམ་སྔ་དྲོ་
དགོང་མོ་ཐུན་གཉིས་སམ། ཐ་ན་ཉིན་རེ་ཐུན་རེ་བས་ཉམས་ལེན་ལོང་མེད་ན་ཡང་བསྒོམ་རྒྱུ་འདི་ཡིན། དེའི་བསྒོམ་ལུགས་ཅི་ལྟ་བུ་ཞེ་ན། བདེ་བའི་སྟན་ལ་རྣམ་སྣང་ཆོས་བདུན་རབ། དེ་མི་ནུས་ན་མེ་ཐབ་དྲུག་ཆིངས་བྱས་ཀྱང་རུང་སྟེ། ཀྱེ་མ་ཐམས་ཅད་མི་རྟག་པའི་ཆོས་ཉིད་ཡིན། དེ་རིང་དགེ་སྦྱོར་ཡིད་ཚིམ་པ་ཞིག་བྱེད་དགོས། སང་ཕྱི་ནས་ཅི་ཆ་བསམ་པ་བྱས་ལ། སེམས་ཅན་ཐམས་ཅད་ཀྱི་དོན་དུ་བདག་གིས་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་བསྐྱེད་རྫོགས་ཟབ་མོ་ཉམས་སུ་བླངས་བསམ་པའི་ཀུན་སློང་བཟང་པོས་རང་གི་ལུས་འདི་ཡི་དམ་ཐུགས་རྗེ་ཆེན་པོའི་སྐུར་ཝལ་གྱིས་བསྒོམ་སྟེ། དེ་ཡང་སྐུ་མདོག་སྟོན་ཁའི་ཟླ་བ་ལྟར་དཀར་བ། ཞལ་གཅིག་ཞི་ཞིང་འཛུམ་པ། རིན་པོ་ཆེའི་དབུ་རྒྱན་དང་། སྤྱི་གཙུག་ན་བླ་མ་འོད་དཔག་མེད་བཞུགས་པ། ཕྱག་བཞི་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་ཤེལ་དཀར་གྱི་ཕྲེང་བ་དང་། གཡོན་འོག་མས་མེ་ཏོག་པདྨ་དཀར་པོ་འདབ་མ་བརྒྱད་པ་འཛིན་པ། དར་སྣ་ཚོགས་ཀྱི་སྟོད་གཡོགས་དང་སྨད་གཡོགས་དང་། ཤམ་ཐབས་དང་། རི་དྭགས་ཀྲིཥྛ་ས་རའི་པགས་པ་ཕྲག་
པ་གཡོན་ལ་བཀལ་བ། ཞབས་རྡོ་རྗེའི་སྐྱིལ་ཀྲུང་གིས་སྣ་ཚོགས་པདྨའི་ཟེའུ་འབྲུ་ཟླ་བའི་དཀྱིལ་འཁོར་གྱི་སྟེང་ན་བཞུགས་པར་བསྒོམ། དེའི་སྐུའི་ནང་སྟོང་སང་ངེ་བའི་ཐུགས་ཀར་ཟླ་བའི་དཀྱིལ་འཁོར་ཉ་རྒྱས་པའི་དབུས་སུ་ཧྲི༔ཡིག་དཀར་པོ་འགྲེང་སྟེ་གནས་པ། དེའི་མཐར་ཡི་གེ་དྲུག་པ་དཀར་པོ་གཡས་ཕྱོགས་སུ་འཁོར་བ། དེ་ལས་འོད་ཟེར་ཁ་དོག་སྣ་ཚོགས་འཇའ་ཟེར་ལྟ་བུར་ཕྱོགས་བཅུར་འཕྲོས་པས། ཕྱོགས་བཅུ་དུས་གསུམ་ན་བཞུགས་པའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་ཁ་བ་བུ་ཡུག་འཚུབ་པ་ལྟར་ཆི་ལི་ལི་བྱོན་ནས། རྩ་བ་དང་བརྒྱུད་པའི་བླ་མ་ཐམས་ཅད་རིགས་བདག་འོད་དཔག་མེད་ལ་ཐིམ་པས་བླ་མ་ཀུན་འདུས། ཡི་དམ་སངས་རྒྱས་བྱང་སེམས་ཐམས་ཅད་རང་ཉིད་ཐུགས་རྗེ་ཆེན་པོ་ལ་ཐིམ་པས་ཡི་དམ་ཀུན་འདུས། དེ་རྣམས་ཀྱི་རྩ་སྔགས་དང་སྙིང་པོ་དང་། ཉེ་སྙིང་ཐམས་ཅད་ཐུགས་ཀའི་ཡིག་འབྲུ་དྲུག་ལ་ཐིམ་པས། གསང་སྔགས་དང་། རིག་སྔགས་དང་། གཟུངས་སྔགས་ཀུན་འདུས་སུ་བསྒོམ། དེའང་ལན་གཅིག་མིན་པ་ནན་ཏན་དུ་བསྒོམས་པས། བླ་མ་གཅིག་དང་། ལྷ་གཅིག་
དང་། སྔགས་གཅིག་གིས་ཐམས་ཅད་འགྲུབ་པའི་མན་ངག་ཡིན། དེ་ནས་ཡིག་འབྲུ་འཁོར་བཞིན་ལས་འོད་ཟེར་འཕྲོས་པས། ཕྱི་སྣོད་ཀྱི་འཇིག་རྟེན་ཐམས་ཅད་བདེ་བ་ཅན་གྱི་ཞིང་ཁམས་སུ་གྱུར། ནང་བཅུད་ཀྱི་འགྲོ་དྲུག་གི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར། སྐྱེ་འགྲོ་མིག་གིས་མཐོང་ཚད་ཐམས་ཅད་ཐུགས་རྗེ་ཆེན་པོའི་སྐུར་ལམ་ལམ་བསྒོམ། གལ་ཏེ་གསལ་པོ་མ་ཟིན་ན་ཡང་ཐུགས་རྗེ་ཆེན་པོ་ཡིན་སྙམ་པའི་མོས་པ་བྱ། དེ་སྣང་བ་སྐུའི་ཁྱེར་སོ་ཡིན་ཏེ། དེ་གསལ་ན་མཚམས་མ་ཐོན་ཀྱང་བཟོད། མཚམས་དུས་ཕན་ཚུན་ངོ་མཐོང་བ་སོགས་ལ་ཡང་མཚམས་བུག་རལ་གྱི་སྐྱོན་མི་འབྱུང་བའི་གདམས་ངག་ཡིན། །དེ་ནས་ཡི་གེ་དྲུག་པ་སྐད་ཧ་ཅང་ཆེ་ན་མི་འཁྱོང་། འགྲུབ་ཐག་ཀྱང་རིང་། གཞི་བདག་ནག་ཕྱོགས་ཡོད་ས་ཡིན་ན་ཕོག་ཐུག་ཀྱང་འགྲོ། ཆུང་དྲགས་ན་འབྲུ་མི་གསལ་བས་ནུས་པ་མི་འབྱུང་བས། གསལ་ལ་དག་པ་བུང་བའི་སྐད་ཙམ་སི་ལི་ལི་བཟླས། །རང་གིས་རམ་བུ་བཀྱག་པའི་ཚུལ་དུ་རིགས་དྲུག་གི་སེམས་ཅན་ཐམས་ཅད་ཀྱིས་ཡི་གེ་དྲུག་པ་འུ་རུ་རུ་བཟླ་བར་བསྒོམ། །མེ་སྒྲ་རླུང་སྒྲ་འགྲོ་བའི་སྒྲ་སྐད་ཐམས་ཅད་ཡི་གེ་དྲུག་པའི་
སྒྲར་བསྒོམ། དེ་གྲག་པ་གསུང་གི་ཁྱེར་སོ་སྟེ། དེ་གསལ་ན་སྐད་ཅིག་ལ་དུང་ཕྱུར་མང་པོ་འགྲོ་བས། སྔགས་བརྒྱ་རྩས་འཕགས་པ་འགྲུབ་པའི་གདམས་ངག །ངག་བཅད་མ་འགྲུབ་ཀྱང་བཟོད། མཚམས་དུས་ངག་བསྲེས་ཀྱང་མི་ཏོ་སྟེ། སྒྲ་སྐད་ཐམས་ཅད་སྔགས་ཡིན། ཕྲེང་བ་ལ་སློབ་སོང་ཡང་ཆད་ལྷག་ཁ་བཀང་དེས་འོང་བར་གསུངས། དེ་ཡང་ཉམས་ལེན་བཟང་ནི་དམིགས་པ་དེ་དག་སེམས་ངོ་མ་ཡེངས་པའི་ངང་ནས་བསྒོམས་ན་བསྐྱེད་རྫོགས་ཟུང་འཇུག་མཆོག་ཡིན། རྣམ་རྟོག་སྒྲོམ་དུ་ཤར་ནས་དེ་འོང་བ་ཡིན་ཏེ། བསྐྱེད་རིམ་ནི་རྣམ་རྟོག་ཡིན། རྣམ་རྟོག་ནི་སེམས་ཡིན། སེམས་སྟོང་པ་ཉིད་ཡིན། རྣམ་རྟོག་དང་སེམས་གཉིས་ཆུ་དང་རླབས་ལྟ་བུ་ཡིན་པས། འགྲུ་བ་དེ་ཉིད་སྒོམ་དུ་ཤར་བའི་ཚེ་ཟུང་དུ་འཇུག་པ་ཡིན། ལས་དང་པོ་པས་དེ་ཟུང་དུ་འཇུག་མ་ཐུབ་ན། དང་པོ་བསྐྱེད་རིམ་གྱི་དམིགས་པ་དེ་དག་རྩེ་གཅིག་ཏུ་བསྒོམས་པས། དམིགས་པ་དེ་དག་གིས་ཅུང་ཟད་སུན་པའི་ཉམས་ཞིག་བྱུང་བ་དང་། དམིགས་པ་ལ་སེམས་གནས་པ་དེ་ཞི་གནས་ཡིན་པས། དེ་སྒོམ་མཁན་གྱི་སེམས་ལ་སེམས་ཀྱིས་ཧྲིག་གེ་བལྟས་
པས། ཅིར་ཡང་མ་གྲུབ་པའི་སྟོང་པ་ཉིད་དུ་ལྷག་གིས་མཐོང་བ་དེ་ལྷག་མཐོང་ཡིན། དེའི་ངང་ཅི་གནས་སུ་མཉམ་པར་བཞག །ཡང་རྣམ་རྟོག་འཕྲོ་ན། དེའི་ངོ་བོ་ལ་བལྟས་ནས་རང་གྲོལ་དུ་བཞག་གོ །དེ་ནི་ཉམས་གསར་བུ་བའི་ལུགས་ཡིན་ལ། དེ་ལ་གོམས་ནས་རྣམ་རྟོག་གི་ངོ་བོ་ཅི་རེ་བ་ལྟ་མི་དགོས། དཔེར་ན་དཔྱིད་དུས་ཀྱི་ཆུ་མཚོ་དྲུང་མོ་ལ་ལྟད་མོ་ལྟ་བ་ལྟར། སེམས་ཀྱི་ངོ་བོ་ལ་མ་ཡེངས་ཙམ་དུ་ལྷོད་དེ་བལྟས་པས་ཆུ་རླབས་མཚོ་ལས་བྱུང་ཞིང་མཚོ་ལ་ཐིམ་ཡང་མཚོ་ལ་མི་གནོད་པ་ལྟར། གནས་པའི་ངང་ནས་འགྱུ་བ་ཅུང་ཟད་བྱུང་ཡང་། གནས་པ་ལ་མི་གནོད། གནས་པའི་ངང་དུ་ཐིམ་པར་འབྱུང་། དེ་ལ་གོམས་ནས་རྣམ་རྟོག་ཅི་མང་ཡང་གནས་པ་ལ་མི་གནོད་པར་མཚོ་ལ་ཁ་བ་བབ་པ་ལྟར་གནས་པའི་ངང་དུ་ཐིམ། དེ་ལ་གོམས་པས་རྣམ་རྟོག་སྒོམ་དུ་འཆར། རྣམ་རྟོག་སྒོམ་དུ་ཤར་ཚེ་བསྐྱེད་རིམ་རྣམ་རྟོག་ཡིན་པས་བསྐྱེད་རྫོགས་ཟུང་དུ་འཇུག་པ་ཡིན། ད་དུང་སེམས་ལ་བལྟ་རྒྱུ་ཞིག་ཡོད་པས་ངོ་བོ་མ་མཐོང་བ་ཡིན། དེ་ནས་ལྟ་མི་དང་ལྟ་རྒྱུ་གཉིས་གཅིག་ཏུ་འདྲེས། གསལ་སེང་ངེ་བ་བདེ་མེ་རེ། སྟོང་ཕྱམ་མེ་བ་སོགས་ལ་ངེས་ཤེས་དང་
འཆང་རྒྱུ་ཡོད་པ་དེ་ཞིག །འདི་ཡིན་ཅི་ཡང་མེད་འདི་བསྒོམ་ཅི་ཡང་མེད་པ། སྔོན་གྱི་དུས་དང་མི་འདྲ་བས། རང་ཡང་ཐེ་ཚོམ་སྐྱེ་བ། མ་ཡེངས་ཙམ་དུ་ཁ་རོག་སྡོད་པ་ལ་བྱ་རྒྱུ་ཅི་ཡང་མེད་པ། དེ་བྱུང་ན་ཐ་མལ་གྱི་ཤེས་པ་ངོ་མཐོང་བ་ཡིན། དེའི་དྲན་རྫི་དང་བྲལ་ན་ཐ་མལ་དུ་འཁྲུལ་འགྲོ་བས་མ་ཡེངས་པའི་དྲན་རྫི་དང་མ་བྲལ་བ་ཙམ་བྱ། ཏེ་ལོ་པའི་ཞལ་ནས། སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །དེ་ལ་གོམས་ཤིང་འདྲིས་ན་བླ་མེད་བྱང་ཆུབ་ཐོབ། །ཅེས་གསུངས་པ་ནི་དེ་ཡིན་ནོ། །དྲན་དང་མ་བྲལ་ན་སྒོམ་མཉམ་བཞག་ཡིན། དྲན་རྫི་དང་བྲལ་ན་རྗེས་ཐོབ་ཡིན་ནོ། །དེའི་གེགས་དང་གོལ་ས་གཅོད་པ་དང་། བོགས་འདོན་པའི་མཆོག་བླ་མའི་རྣལ་འབྱོར་ཡིན་པས། རང་ཐུགས་རྗེ་ཆེན་པོའི་སྤྱི་གཙུག་གི་རིགས་བདག་འོད་དཔག་མེད་དེ་དྲན་རྫོགས་སུ་གསལ་གདབ་སྟེ། དེ་ཡང་སྐུ་མདོག་དམར་པོ་བྱི་རུ་ལྟ་བུ། དབུ་གཙུག་ཏོར་སོགས་མཚན་དང་དཔེ་བྱད་ཡོངས་སུ་རྫོགས་པ། ཕྱག་མཉམ་བཞག་གི་སྟེང་ན་བདུད་རྩིས་བཀང་བའི་ལྷུང་བཟེད་བསྣམས་པ། ཞབས་རྡོ་རྗེའི་སྐྱིལ་ཀྲུང་གིས་པདྨ་དང་ཟླ་བའི་གདན་ལ་
བཞུགས་པར་བསྒོམ། རྩ་བརྒྱུད་ཀྱི་བླ་མ་ཐམས་ཅད་སྤྱན་དྲངས་དེ་ལ་བསྟིམ། རང་གི་གསོལ་འདེབས་གང་ཤེས་སམ། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། ། ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བརྒྱུད་བླ་མ་ལ་གསོལ་བ་འདེབས། །ཞེས་སམ། ཡིག་དྲུག་གསོལ་འདེབས་ཚུལ་དུ་བཟླས་པའམ། གསོལ་འདེབས་ཀྱི་སྙིང་པོ་ཡིན་པས་བཛྲ་གུ་རུ་ཕྲེང་སྐོར་ཙམ་བཟླ། དེ་ཡང་ཁ་ཙམ་ཚིག་ཙམ་མ་ཡིན་པར་སྙིང་ཁོང་རུས་པའི་གཏིང་ནས། ཚེ་འདི་ཕྱི་བར་གསུམ་ཅི་མཛད་ཁྱེད་ཤེས་ཀྱི་བློ་ལིང་གིས་གཏད། མོས་གུས་ཀྱི་གདུང་ཤུགས་དྲག་པོས་བ་སྤུ་ལྡང་ཞིང་མཆི་མ་འཁྲུགས་པར་བྱ། གསོལ་འདེབས་ལན་ཁ་ཡར་རྒྱང་འབོད་ཀྱི་ཚུལ་དུ་བྱ། དེ་ལྟར་བྱས་པས་ཕྱིའི་རྟོག་པ་བན་བུན་ལང་ལོང་དུ་འགྲོ། ནང་གི་རྟོག་པ་གསལ་སྟོང་རྗེན་པར་འཆོར། དེ་ལྟར་གསོལ་བ་བཏབ་པས་བྱིན་རླབས་ཀྱི་སྟོབས་ལས་ཉམས་གང་ཤར་དེ་བསྐྱངས་བས། གེགས་དང་གོལ་ས་གཅིག་ཀྱང་མེད་གསུངས། དེ་ནས་སེམས་བསྐྱེད་བྱམས་སྙིང་རྗེ་ལ་བརྟེན་ནས་བོགས་འདོན་པ་ནི། འགྲོ་
བ་རིགས་དྲུག་གི་སེམས་ཅན་ཐམས་ཅད་ལན་དུ་མར་ཕ་མ་བྱས་པའི་མ་དྲིན་ཆེན་ཡིན་ན། རིགས་དྲུག་གི་སྡུག་བསྔལ་འདི་ལས་ཐར་དུས་མེད་པ་ལ་སྙིང་རྗེ་དྲག་པོ་བསྐྱེད་ནས། སྣ་བུག་ནས་རླུང་ཞིག་ཕར་བུས་པ་དང་མཉམ་དུ། རང་གི་བསོད་ནམས་དང་དགེ་རྩ་ཅི་ཡོད་པ་ཐམས་ཅད་སེམས་ཅན་ཐམས་ཅད་ལ་སིབས་སེ་ཐིམ་པས། སེམས་ཅན་ཐམས་ཅད་བདེ་སྐྱིད་ཚད་མེད་པ་ཐོབ། བདེ་བའི་རྒྱུ་བསོད་ནམས་དཔག་ཏུ་མེད་པ་དང་ལྡན་པར་བསྒོམ། ངག་གམ་ཡིད་ཀྱིས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་བརྗོད། རླུང་ཚུར་རྔུབ་པ་དང་མཉམ་དུ། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་ཅི་ཡོད་པ་ཐམས་ཅད་སིབས་སེ་བསྡུས་ནས་རང་ལ་ཐིམ་པས། རང་ཉིད་སྤྱན་རས་གཟིགས་ཀྱི་སྐུ་དེ་མེ་ལ་ཤིང་བསྣན་པ་ལྟར་གཟི་བརྗིད་ཆེར་འབར། སེམས་ཅན་ཐམས་ཅད་རིགས་དྲུག་སོ་སོའི་སྡུག་བསྔལ་དང་བྲལ། སྡུག་བསྔལ་གྱི་རྒྱུ་སྡིག་སྒྲིབ་ཐམས་ཅད་དང་བྲལ་བར་བསྒོམ། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །ཅེས་ངག་གམ་ཡིད་ཀྱིས་བརྗོད། དེ་ནི་
སྙིང་རྗེ་བསྒོམ་པའོ། །བྱམས་སྙིང་རྗེའི་དབང་གིས་མཆི་མ་འཁྲུགས་པ་བྱུང་ན་བྱམས་པ་ཆེན་པོ་དང་སྙིང་རྗེ་ཆེན་པོའོ། །དེ་ཕྱོགས་རིས་མེད་པར་སེམས་ཅན་ཐམས་ཅད་ལ་མཉམ་ཐུན་བྱམས་པ་ཚད་མེད་དང་སྙིང་རྗེ་ཚད་མེད། དེ་ཡང་སེམས་ངོ་ཉམས་ལེན་མ་ཡེངས་པའི་ངང་ནས་བསྒོམ་ཐུབ་ན་བྱམས་ཆེན་གཉུག་མའི་ཏིང་ངེ་འཛིན་དང་སྟོང་ཉིད་སྙིང་རྗེའི་སྙིང་པོ་ཅན་ཡིན་པས། མདོ་ལུགས་ཐེག་ཆེན་གྱི་ཆོས་ཀྱི་རྩ་བ་ཡང་འདི་ཡིན། རང་གི་ཚོགས་རྫོགས་པ་དང་། སྒྲིབ་པ་སྦྱངས་བ་དང་། སྲུང་འཁོར་ལ་ཡང་འདི་ལས་ཟབ་པ་མེད་གསུངས། རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ཡོད་པར་བཤད། ད་ལྟ་དངོས་སུ་མཐོང་བ་ཡང་རྒྱུད་བཅུ་བདུན། རྒྱུད་བུ་ཆུང་བཅུ་བདུན། སེམས་སྨད་མ་བུ་བཅུ་བདུན། མཁའ་འགྲོ་སྙིང་ཐིག །ཀློང་གསལ་སྙིང་ཏིག །བླ་མ་ཡང་ཏིག་ལ་སོགས་པ་ཐམས་ཅད་ཀྱི་དོན་གྱི་རྩ་བ་ནི། འོད་གསལ་ཐོད་རྒལ་འདི་ཉིད་ཡིན། འདི་ནི་མ་བསྒོམས་པར་སངས་རྒྱས་པའི་གདམས་ངག །བལྟས་པས་གྲོལ་བའི་གདམས་ངག་ཟབ་མོ་ཡིན། འོད་ཁ་དོག་ལྔ་མཐོང་བ་འདི་ཡང་འཇའ་མཐོང་བ་དང་མི་འདྲ། ཡེ་ཤེས་ལྔ་
མངོན་སུམ་དུ་མཐོང་བ་ཡིན། རྒྱལ་བ་རིགས་ལྔ་དངོས་སུ་མཇལ་བ་དང་ཁྱད་མེད་གསུངས། དང་པོ་བལྟ་དུས་དང་མི་འདྲ་བར་བཀྲག་མདངས་ངོ་མཚར་ཅན་ཞིག་མཐོང་རྒྱུ་ཡོད། དེ་མཐོང་ན་བར་དོར་ཞི་ཁྲོའི་ལྷ་ཚོགས་འཆར་བའི་ཚེ་བར་དོར་ངེས་པར་གྲོལ་བར་གསུངས་པས། འདི་ལས་ལམ་ཐག་ཉེ་བ་མེད། རྒྱུན་དུ་བལྟས་ན་རྒྱལ་བ་རིགས་ལྔ་སོགས་ཞི་ཁྲོའི་ལྷ་ཚོགས་མང་པོ་དངོས་སུ་མཐོང་འོང་། དེ་མཐོང་ན་བར་དོ་བསྒྲོད་མི་དགོས་པར་གསུངས་པས། ཁྱེད་རྣམས་ཀྱིས་ནངས་ནུབ་རྒྱུན་དུ་ལྟ་བ་གལ་ཆེའོ། །དོ་དགོང་ཉལ་ཁ་དེ་རིང་བྱས་པའི་དགེ་སྦྱོར་གང་འགྲུབ་བསྔོ་བ་སྨོན་ལམ་རྒྱས་འདེབས་དགོས་ཏེ། བསྔོ་མི་དང་བསྔོ་རྒྱུ་དང་། བསྔོ་བ་གསུམ་པོ་དངོས་པོར་འཛིན་པས་བསྔོས་ན་བསྔོ་བ་དུག་ཅན་ཡིན་པས་བྱང་ཆུབ་ཀྱི་ལམ་དུ་མི་འགྲོ། སེམས་ངོ་མ་ཡེངས་པའི་ངང་ནས་བསྔོ་བ་བྱེད་པ་ནི་འཁོར་གསུམ་ཡོངས་དག་གི་བསྔོ་བ་ཡིན་པས་བྱང་ཆུབ་ལམ་དུ་འགྲོ། དེ་ལ་ཆོས་དང་དགེ་སྦྱོར་གང་བྱེད་ཀྱང་། མཇུག་ཏུ་སེམས་མ་ཡེངས་པར་བསྔོ་བ་སྨོན་ལམ་གང་བྱེད་པ་དེ་ཕྱི་མ་འགྲུབ་ངེས་པ་ཡིན་པས་བསྔོ་བ་སྨོན་ལམ་ཡང་གོ་མ་ལོག་པ་
གཅིག་གལ་ཆེ། ཁྱེད་རྣམས་ཀྱི་ཁྲིད་ཞུ་དགེ་སྦྱོར་བྱེད་པ་འདི་ཕྱི་མ་ཅི་འདྲ་ཞིག་འདོད་པ་ཡིན་བསམ་བློ་ཐོང་། རང་བློས་བཏང་ནས་འཁོར་བ་ཇི་སྲིད་དུ་སེམས་ཅན་གྱི་དོན་བྱེད་པར་སྨོན་ལམ་བཏབ་པ་ནི་མཆོག་ཡིན་ཏེ། སངས་རྒྱས་ནང་ནས་ཤཱཀྱ་ཐུབ་པ་དང་། བྱང་ཆུབ་སེམས་དཔའི་ནང་ནས་རིགས་གསུམ་མགོན་པོ་ཙམ་ལས་མེད་གསུངས། རང་རེ་ཚོས་དེ་ཙམ་ཨེ་འོང་ན། འཁོར་བའི་སྡུག་བསྔལ་འདི་ལ་ཨི་འཇིགས། སྐྱེ་བ་དང་འཆི་བའི་སྡུག་བསྔལ་ལན་དུང་ཕྱུར་མང་པོ་མྱོང་དགོས་པ་ལ་འཚེར་རོམ། སྡུག་བསྔལ་མ་མྱོང་བདེ་སྐྱིད་ཀྱི་ངང་ནས་སངས་རྒྱས་ཐོབ་པ་ནི། བྱང་ཆུབ་སེམས་དཔའ་ལེ་ལོ་ཅན་ཞེས་བྱང་ཆུབ་སེམས་དཔའི་ནང་ནས་ཐ་མ་སྟེ། རྒྱལ་བ་བྱམས་པ་ཡིན་གསུངས། །རིང་རེ་དེ་ཙམ་བྱུང་ན་ཨེ་མི་ཆོག་བསམ། དེ་འོང་བ་ལ་ཕྱི་མ་དག་པའི་ཞིང་ཁམས་ཞིག་ཏུ་སྐྱེ་དགོས་སོ། །པོ་ཊ་ལ་དང་དགའ་ལྡན་དང་། ཟངས་མདོག་དཔལ་རིར་སྐྱེས་ཀྱང་ཕྱིར་མི་ལྟུང་བའི་ངེས་པ་མེད། མངོན་དགའ་ལ་སོགས་དག་པའི་ཞིང་ཁམས་གཞན་རྣམས་སུ་ནི། ས་དང་པོ་ཡན་ཆད་མ་ཐོབ་ཀྱི་བར་དུ་མི་སྐྱེ་གསུངས། སྨོན་ལམ་བཏབ་ཀྱང་མི་རྩེབ་པའི་ས་ལ་
སྙབ་པའི་དཔེ་ཡིན། བྱང་ཆུབ་སེམས་དཔའ་བསམ་བཞིན་དུ་འགྲོ་བའི་དོན་བྱེད་པ་རྣམས་ནི་འཁོར་བའི་སྡུག་བསྔལ་ལ་མི་སྐག་པ་ཡིན། རང་རེ་རྣམས་འཁོར་བའི་སྡུག་བསྔལ་ལ་སྐྲག་པས། སྡུག་བསྔལ་མི་མྱོང་ཞིང་བདེ་སྐྱིད་ཀྱི་ངང་ནས་སངས་རྒྱས་ཐོབ་པར་འདོད་ན། བདེ་བ་ཅན་གྱི་ཞིང་ཁམས་སུ་སྐྱེ་བའི་སྨོན་ལམ་འདེབས་དགོས། །དེར་སྨོན་ལམ་བཏབ་ན། མཚམས་མེད་པ་ལྔ་དང་། ཆོས་སྤངས་པ་མ་གཏོགས་སྐྱེ་བ་ནི། འོད་དཔག་མེད་ཀྱི་སྨོན་ལམ་གྱི་སྟོབས་ཡིན། དེར་སྐྱེས་ན་སྡུག་བསྔལ་ཅུང་ཟད་ཀྱང་མེད་ཅིང་བདེ་སྐྱིད་ཕུན་སུམ་ཚོགས། མངོན་དགའ་ཟངས་མདོག་དཔལ་རི་དགའ་ལྡན་དུ་ཡང་རྫུ་འཕྲུལ་གྱིས་འགྲོ་ནས་ཞལ་མཇལ་ཆོས་ཞུ། མངོན་ཤེས་རྫུ་འཕྲུལ་ཐོགས་པ་མེད་པས། འབྲེལ་ཐོགས་རྣམས་བར་དོ་ནས་འདྲེན་ནུས། བསྐལ་པ་དུང་ཕྱུར་གྲངས་མེད་པར་ན་རྒྱུ་དང་། རྒས་རྒྱུ་འཆི་རྒྱུ་མེད་པས། སངས་རྒྱས་འོད་དཔག་མེད་ཀྱི་ཞལ་ལྟ་ཆོས་ཉན་ནོ། །རང་གི་ལག་མཐིལ་ནས་མཆོད་སྤྲིན་དཔག་ཏུ་མེད་པ་སྤྲུལ་ཏེ་སངས་རྒྱས་ལ་མཆོད་པས། ས་ལམ་གྱི་ཡོན་ཏན་རྫོགས་ནས་སངས་རྒྱ་བ་ཡིན་ཏེ། དེར་སྐྱེ་སླ་བའི་
ཚད་ནི། ཞེ་ཐག་པ་ནས་ལན་བཅུ་སྨོན་ལམ་བཏབ་ན་སྐྱེ་བར་གསུངས། སྐྱེའམ་མི་སྐྱེ་ཐེ་ཚོམ་བྱ་མི་རུང་། ཐེ་ཚོམ་བྱས་ན་ཞིང་དེར་སྐྱེས་ཏེ་ལོ་ལྔ་བརྒྱར་མེ་ཏོག་པདྨའི་ཁ་མི་བྱེ་་བར། བདེ་སྐྱིད་ལོངས་སྤྱོད་དང་ལྡན་ཞིང་སངས་རྒྱས་ཀྱི་གསུང་ཐོས་ཀྱང་། ཞལ་མཐོང་འཕྱི་བའི་སྐྱོན་ཡོད་པར་བཤད་པས་ཐེ་ཚོམ་མི་བྱེད་པར། དོ་དགོང་ཉལ་ཁར་དེ་རིང་དགེ་སྦྱོར་བྱས་ཚད་ཞིང་དེར་སྐྱེ་ཕྱིར་བསྔོ་དགོས་པས། དེ་ལ་ཤེས་ན་བཟང་སྤྱོད་དང་བདེ་སྨོན་འདོན། མི་ཤེས་ན་ཡང་བདེ་བ་ཅན་དུ་སྐྱེ་བར་ཤོག་ཟེར་བ་དེས་འཐུས། དེ་ལྟར་བྱས་པས་འཆི་དུས་ཐུགས་དམ་ཟིན་རུང་མ་ཟིན་རུང་། འཕོ་བ་ཐེབས་རུང་མ་ཐེབས་རུང་། ཆོས་ཉིད་བར་དོར་ཞི་ཁྲོའི་ལྷ་ཚོགས་ངོས་ཟིན་རུང་མ་ཟིན་རུང་། ཤི་ནས་ཞག་བདུན་གཉིས་ཡོལ་ཙམ་ནས་རང་ཤི་བར་ཡང་ཐག་ཆོད། ད་རུང་གཤིན་རྗེའི་ཕོ་ཉ་ཡང་མ་བསླེབས་པས། ལས་རྒྱུ་འབྲས་ཀྱི་གཤག་རལ་ཡང་མ་བྱུང་། ཟག་བཅས་མངོན་ཤེས་ཀྱིས་ཚེ་སྔ་ཕྱི་བར་གསུམ་ཡང་དྲན། རྫུ་འཕྲུལ་སྣ་ཚོགས་ཡང་སྟོན་ནུས། གར་འགྲོ་རང་དབང་ཆེ་བའི་དུས་ཤིག་འོང་། དེ་དུས་སངས་རྒྱས་འོད་དཔག་མེད་ཡིད་ལ་དྲན་པར་གྱིས་ལ་
བདེ་བ་ཅན་དུ་སོངས་ཤིག །བསམ་པ་ཙམ་གྱིས་ཕྱིན་པར་ཐེ་ཚོམ་མེད་དོ། །ད་རེས་ཆོས་ཞུས་པའི་དོན་དེ་མ་བརྗེད་རེམ་རེམ། དེ་སུས་ཀྱང་ཉམས་སུ་ལོན་ངེས་ཀྱི་ཆོས་གཏམ་དམའུ་ཡིན། བཀའ་མདོ་རྒྱུད་གསར་རྙིང་གཏེར་གསུམ་གྱི་ཆོས་ཀྱི་སྙིང་པོ་ཡིན། འོ་དེ་ལྟར་རྩ་བའི་ཆོས་ཐུན་བཅོ་བརྒྱད་རྒྱབ་ཆོས་ཆོས་ཐུན་བཅུ་གཉིས་ཏེ། །ཟླ་ཁྲིད་གཅིག་ལེགས་པར་གྲུབ་པ་ཡིན་ནོ། །སློབ་དཔོན་པདྨའི་བཀྲ་ཤིས་ཤོག །ཐུགས་རྗེ་ཆེན་པོའི་བཀྲ་ཤིས་ཤོག །དཔའ་བོ་རྒྱ་མཚོའི་བཀྲ་ཤིས་ཤོག །དཔའ་མོ་རྒྱ་མཚོའི་བཀྲ་ཤིས་ཤོག །དམ་ཅན་རྒྱ་མཚོའི་བཀྲ་ཤིས་ཤོག །དེ་ནས་བསྔོ་བ་རྒྱས་པར་བྱ། བཀྲ་ཤིས་བརྗོད་ལ་ཕྱག་ནས་འཐོར་ལ་ཆོས་ར་གྲོལ་ལོ།། ༈ ཨེ་མ་ཧོ། གསར་རྙིང་མདོ་རྒྱུད་ཀུན་གྱི་དགོངས་པ་འདུས། །གསར་རྙིང་གཏེར་གསུམ་བརྒྱུད་པའི་བྱིན་རླབས་འདུས། །ཕྱག་རྫོགས་དམར་ཁྲིད་ཀུན་གྱི་ཉམས་ལེན་འདུས། །མདོ་རྒྱུད་རྒྱ་མཚོ་ཀུན་གྱི་ལུང་འདྲེན་འདུས། །རིག་འཛིན་གྲུབ་ཐོབ་ཀུན་གྱི་དགོངས་པ་འདུས། །གང་ཟག་མཆོག་དམན་ཀུན་གྱི་ཉམས་ལེན་འདུས། །གྲུབ་མཐའ་ཀུན་འདུས་ཀུན་ལས་ཁྱད་
པར་འཕགས། །གསང་སྔགས་ཡིན་ཀྱང་བཀའ་ཡང་ཀུན་ལ་ཕན། །འདི་ནི་སྤྱན་རས་གཟིགས་ཀྱི་ཐུགས་རྗེའི་མཐུས། །སྙིགས་དུས་ཐུགས་རྗེ་ཆེན་པོའི་རྣལ་འབྱོར་པ། །རཱ་ག་ཨ་སྱས་ལེགས་པར་བསྒྲིགས་པ་ལ། །དགེ་སློང་བརྩོན་འགྲུས་ཞེས་བྱས་ཡི་གེར་བཀོད། །འདི་ལ་འགལ་འཁྲུལ་དྲི་མ་ཅི་མཆིས་པ། །རྩ་བ་གསུམ་གྱི་ལྷ་ཚོགས་རྣམས་ལ་བཤགས། །འདི་བྲིས་དགེ་བས་བདག་དང་བྲིས་མཁན་དང་། །ཁྲིད་ཡིག་འདི་ལ་འབྲེལ་བ་ཐོགས་ཚད་རྣམས། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ནམ་ཞིག་དུས་ལ་བབས་ཏེ་འཕོ་བའི་ཚེ། །སྐྱེ་བ་གཞན་གྱིས་བར་མ་ཆོད་པ་རུ། །བདེ་བ་ཅན་གྱི་ཞིང་དུ་བརྫུས་སྐྱེས་ནས། །འོད་དཔག་མེད་མགོན་མཆོད་པས་མཉེས་བྱས་ཤིང་། །ལུས་རྟེན་འདི་ལ་མངོན་པར་བྱང་ཆུབ་ཤོག །རྫོགས་སངས་རྒྱས་ནས་ནམ་མཁའ་ཇི་སྲིད་དུ། །སྤྲུལ་པས་ཕྱོགས་བཅུར་འགྲོ་དོན་བྱེད་པ་ལ། །སྤྲུལ་པའི་ཆ་ཤས་རེ་ཡི་ཡོན་ཏན་ཀྱང་། །ཕྱག་རྡོར་བྱེ་བ་ཕྲག་བརྒྱའི་མཐུ་སྟོབས་དང་། །འཇམ་དབྱངས་བྱེ་བ་ཕྲག་བརྒྱའི་མཁྱེན་རབ་དང་། །པད་འབྱུང་བྱེ་བ་ཕྲག་བརྒྱའི་རྫུ་འཕྲུལ་དང་། །ཐུགས་རྗེ་ཆེན་པོ་
བྱེ་བ་ཕྲག་བརྒྱ་ཡི། །འགྲོ་དོན་གཅིག་ཏུ་བསྡུས་པ་ལྟ་བུར་ཤོག །ཁྲིད་འདིའི་ཁྲིད་རྒྱུན་དང་ནི་ལུང་གི་རྒྱུན། །དེ་བཞིན་སྒོམ་སྒྲུབ་ཉམས་དང་རྟོགས་པའི་རྒྱུན། །ཡར་འཕེལ་ཚེ་ལོ་དྲུག་བརྒྱའི་བར་དག་ཏུ། །ནམ་ཡང་ནུབ་མེད་འཕེལ་ཞིང་རྒྱས་གྱུར་ཅིག །མ་མགོན་ལ་སོགས་དམ་ཅན་རྒྱ་མཚོའི་ཚོགས། །དམ་ཆོས་འདི་ཉིད་འཕེལ་ཞིང་རྒྱས་པ་དང་། །འདི་ཉིད་ཉམས་སུ་ལེན་རྣམས་སྲུང་སྐྱོབ་མཛོད། །རྣམ་སྲས་ལ་སོགས་ནོར་ལྷ་རྒྱ་མཚོའི་ཚོགས། །འདི་ཉིད་ཉམས་ལེན་སྒྲུབ་པའི་མཐུན་རྐྱེན་སྦྱོར། །བརྟན་མ་མགུར་ལྷ་དགེ་བསྙེན་གཞི་བདག་ཚོགས། །ཆོས་འདི་འཕེལ་ཞིང་རྒྱས་པའི་སྟོང་གྲོགས་མཛོད། །སྔོན་གྱི་དམ་ལས་མ་འདའ་ས་མ་ཡ། །ཆོས་འདི་འཆད་ཉན་སྒོམ་སྒྲུབ་བྱེད་པ་ལ། །བར་དུ་གཅོད་པའི་དགྲ་བགེགས་ལོག་འདྲེན་དང་། །རང་བཟོའི་བཅོས་སླད་འདྲ་མིན་བྱེད་གྱུར་ན། །འཕྲལ་དུ་བཀའ་ཡི་ཆད་པ་དྲག་པོ་ཆོད། །དམ་ཅན་རྒྱ་མཚོའི་མཐུ་རྩལ་ཡོད་དམ་མེད། །དེ་དུས་ལྟ་བས་དེ་དོན་ཐུགས་ཀྱིས་དགོངས། །ཁྲིད་ཡིག་འདི་ལ་བྱིན་རླབས་ཡོད་དམ་མེད། །གཞུང་ནས་བཤད་ལྟར་ཉམས་སུ་ལོངས་དང་གསལ། །
འདི་ཉིད་མདོ་རྒྱུད་དོན་དང་མཐུན་མི་མཐུན། །གསར་རྙིང་གཏེར་གསུམ་གཟིགས་རྒྱ་ཆེ་བ་དང་། །བསྐྱེད་རྫོགས་ཉམས་ལེན་ཡོད་པ་ཞིག་གིས་གཟིགས། །ཕྱོགས་རིས་ཅན་དང་ཕྱོགས་རེར་མཁས་པ་ཡི། །བཤེས་གཉེན་འགའ་རེས་ཐུགས་ཁྲེལ་འཇོག་སྲིད་ཀྱང་། །གནོང་འགྱོད་མེད་དེ་མདོ་རྒྱུད་དཔང་པོ་ཡོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མངྒ་ལཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
༼ལཾ༽ །ཐུགས་རྗེ་ཆེན་པོ་ཕྱག་རྫོགས་ཟུང་འཇུག་གི་ཁྲིད་ཀྱི་རྒྱབ་ཆོས་ལས་གཏུམ་མོ་བདེ་བའི་བོགས་འདོན་ཁྲོམ་ལ་མི་བཤད་སོ་སོར་གང་ལ་གང་དགོས་སུ་བྱའོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོའི་རྒྱབ་ཆོས། བདེ་བ་ལ་བརྟེན་ནས་བོགས་འདོན་པ་ནི། རྒྱུད་ལས། ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་མ་ལ་སོགས་ཡོངས་བསྲེགས་ནས། །ཧཾ་བསྲེགས་ས་ལ་ཟླ་རྒྱུན་འབབས། །ཞེས་གསུངས་པའི་དོན། ཐུགས་རྗེ་ཆེན་པོ་ངན་སོང་རང་གྲོལ་དང་། སྲོང་བཙན་སྒམ་པོའི་རྩ་རླུང་གི་ཞལ་གདམས། དོན་བསྡུ་ཉམས་སུ་བླངས་བདེ་བ་ནི། རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱི་
དར་དཀར་གྱི་གུར་ཕུབ་པ་ལྟ་བུ། ནང་སྟོང་པ་ཕྲུ་མ་ཕུས་བཏབ་པ་ལྟ་བུ་དེའི་དབུས་སུ་རྩ་དབུ་མ་མཐིང་ཀ་མདའ་སྨྱུག་འབྲིང་པོ་ཙམ་པ། ཡར་སྣེ་སྤྱི་གཙུག་དང་མར་སྣེ་གསང་གནས་སུ་ཟུག་པ། གསང་བའི་སྦྱབ་དང་ཅུང་ཟད་མ་འབྲེལ་བར། གཡས་སུ་རོ་མ་དམར་པོ། གཡོན་དུ་རྐྱང་མ་དཀར་པོ་གཉིས་མདའ་སྨྱུག་ཕྲ་ཤོས་ཙམ། ཡར་སྣེ་ཀླད་རྒྱའི་སྟེང་ནས་ཐུར་དུ་སྣ་བུག་གཉིས་སུ་ཟུག་པ། མར་སྣེ་ལྟེ་འོག་སོར་བཞི་ནས་ཡི་གེ་ཆའི་འཕོང་ལྟར་དབུ་མ་དང་གཅིག་ཏུ་གྱུར་པ། སྤྱི་བོ་བདེ་ཆེན་གྱི་འཁོར་ལོའི་རྩ་འདབ་སུམ་ཅུ་སོ་གཉིས། ཁ་དོག་དཀར་པོ་གྲོ་
སོག་འབྲིང་པོ་ཙམ་གདུགས་ཕུབ་པ་ལྟ་བུ། དབུས་སུ་ཧཾ་ཡིག་དཀར་པོ་མགོ་ཐུར་བསྟན་ལ་ཡིག་དྲུག་དཀར་པོས་བསྐོར་བ། མགྲིན་པ་ལོངས་སྤྱོད་ཀྱི་འཁོར་ལོའི་རྩ་འདབ་བཅུ་དྲུག་དམར་པོ་རྩ་སྣེ་ཅུང་ཟད་གྱེན་དུ་ཕྱོགས་པའི་དབུས་སུ། ཨཱཿདམར་པོ་ལ་ཡིག་དྲུག་དམར་པོས་བསྐོར་བ། སྙིང་ཁ་ཆོས་ཀྱི་འཁོར་ལོའི་རྩ་འདབ་བརྒྱད་ཁ་དོག་སྔོན་པོ་གུར་ཕུབ་པ་ལྟ་བུའི་དབུས་སུ་ཧཱུྃ་མཐིང་ནག་ལ་ཡིག་དྲུག་མཐིང་གས་བསྐོར་བ། ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི་ཁ་དོག་སྣ་ཚོགས་རྩ་སྣེ་ཅུང་ཟད་གྱེན་དུ་ཕྱོགས་པ། ལྟེ་བར་ཨོཾ་སྣ་ཚོགས་མདོག་ཅན་ལ་ཡིག་དྲུག་ཁ་དོག་སྣ་ཚོགས་པས་བསྐོར་བ། རྩ་གསུམ་མདོས་མདོར་ཡི་གེ་ཨ་ཡིག་དམར་པོ་ལྕགས་སྲེག་མདོག་ལྟར་རེག་བྱ་ཤིན་ཏུ་ཚ་བ་ཞིག་བསྒོམ། རླུང་སྣ་བུག་གཡས་ནས་རྒྱུ་དུས་ཕོ་རླུང་ཉོན་མོངས་པ་ཡིན་པས་མི་བཟུང་། བཟུང་ན་རླུང་སྐྱོན་འོང་། གཡོན་ནས་རྒྱུ་དུས་མོ་རླུང་ཡེ་ཤེས་ཀྱི་རླུང་ཡིན་པས་བཟུང་། །སྣ་བུག་གཉིས་ཀ་ནས་རྒྱུ་དུས་ཆོས་སྐུའི་རླུང་ཡིན་པས་ངོ་བོ་སྐྱོང་། རླུང་རོ་ཞི་དྭངས་སྙོམས་གསུམ་དུས་གཡས་གཡོན་གཉིས་མཉམ་དུ་དང་ལན་དགུ་བུས། དེ་ནས་དལ་བུས་རྡུབ་
སྟེ་ལྟོ་བར་བཀང་བས། རོ་རྐྱང་གཉིས་ནས་ལྟེ་འོག་གི་ཨ་ཡིག་ལ་ཕོག་པས་མེ་ལ་སྦྱད་པ་བརྒྱབ་པ་ལྟར་མེ་འབར་ཏེ། རྩ་གནས་ཐམས་ཅད་རིམ་གྱིས་གང་། །མཐར་ལུས་ཐམས་ཅད་གང་ཞིང་བ་སྤུའི་བུ་ག་ནས་མེ་ལྕེ་ཕྱིར་འཕྲོས། ལུས་ཀྱི་ཕྱིར་མེ་དཔུང་ཆེན་པོ་འབར། སྡིག་སྒྲིབ་མ་དག་པའི་ཕུང་ཁམས་སྐྱེ་མཆེད་ཐམས་ཅད་ཡེ་ཤེས་ཀྱི་མེས་བསྲེགས། དག་པ་ཡེ་ཤེས་ཀྱི་ལུས་སུ་གྱུར། སྤྱི་བོའི་ཧཾ་ཡིག་ལས་བྱང་སེམས་དཀར་པོའི་རྒྱུན་བབས། སྤྱི་བོ་དང་མགྲིན་པའི་རྩ་གནས་གང་། དགའ་བའི་ཡེ་ཤེས་སྐྱེས། སྙིང་གའི་རྩ་གནས་གང་བས་མཆོག་དགའི་ཡེ་ཤེས་སྐྱེས། ལྟེ་བའི་རྩ་འདབ་གང་བས་དགའ་བྲལ་ཡེ་ཤེས་སྐྱེས། དགའ་བ་ཞེས་པ་ནི་ལུས་ལ་བདེ་བ་སྐྱེས་པ་དེ་ཡིན། །ཡེ་ཤེས་ཞེས་པ་ནི་བདེ་བའི་ངོ་བོ་ལ་བལྟས་པས་སྟོང་པར་མཐོང་བ་དེ་ཡིན། དེ་ནས་བྱང་སེམས་གསང་བའི་རྩར་བབས་པས། དེའི་ངོ་བོ་ལ་མ་བལྟས་ན་ཉོན་མོངས་པ་ལ་ཆགས་པ་རང་ཁ་མ་ཡིན། ངོ་བོ་ལ་བལྟས་པས་བདེ་བ་དང་སྟོང་པ་དབྱེར་མེད་དུ་འདྲེས་པ་དེ་ལྷན་ཅིག་སྐྱེས་དགའི་ཡེ་ཤེས་ཡིན། དེ་ནས་གསང་བའི་བུ་ག་ཧཱུྃ་ཞིག་གིས་བགག་པས་ཐིག་
ལེ་བཟུང་། ལྕེ་ཡ་རྐན་ལ་སྦྱར་མིག་གྱེན་དུ་ལྡོག །རིག་པ་སྤྱི་བོའི་ཧཾ་ཡིག་ལ་གཏད། ཧྲིང་ཧྲིང་དྲག་ཏུ་བརྗོད། ཐིག་ལེ་ཆུའི་རླབས་ལོག་པ་ལྟར་སྐྱ་ཆི་ལི་ལི་གསང་གནས་ནས་ལྟེ་བར་ཡར་ལོག་པས། མས་བརྟན་གྱི་དགའ་བ་དང་པོ། སྙིང་གར་ལོག་པས་གཉིས་པ། མགྲིན་པར་ལོག་པས་གསུམ་པ། སྤྱི་བོར་ལོག་པས་བཞི་པ། དེ་ནས་ཐིག་ལེ་ཐམས་ཅད་སྤྱི་བོའི་ཧཾ་ཡིག་ལ་ཐིམ་པར་བསྒོམས་ལ་སེམས་ཀ་དག་གི་ངང་ལ་དལ་ཅིག་བཞག །དེ་ནས་སྤྱི་བོའི་ཧཾ་ཡིག་ལ་རིག་པ་གཏད་ནས་ལུས་རྟའི་སྤྲུག་སེལ་འདྲ་བ་ཞིག་བྱས་སྤྱི་བོའི་ཧཾ་ལས་བདུད་རྩི་བྱང་སེམས་དཀར་ལ་དམར་བའི་མདངས་ཆགས་པོ་ཆར་ལྟར་བབས་པས། ལུས་ཐམས་ཅད་ལྡེམས་སེ་གང་བར་བསྒོམས་ལ། ཉམས་ལེན་སེམས་ངོ་བསྐྱང་བས། བདེ་སྟོང་འདྲེས་པའི་ཉམས་བཟང་པོ་འཆར་ཏེ། །ཐུགས་རྗེ་ཆེན་པོ་ངན་སོང་རང་གྲོལ་ལས། དམ་ཆོས་གཞན་ལས་ཁྱད་པར་འཕགས། །ཚེ་རིང་ནད་མེད་བདེ་བ་ཐོབ། །ཅེས་དང་། སྲོང་བཙན་སྒམ་པོས། ཚེ་རིང་ནད་མེད་བདེ་བ་ཐོབ། །ཆགས་པ་སྤྱད་པས་ཡེ་ཤེས་འབར། །ཉོན་མོངས་ཆགས་པ་ལམ་དུ་སློངས། །
ཞེས་དང་། སཾ་བྷུ་ཊི་ལས། ཆགས་པ་ཡིས་ནི་ཆགས་པ་སྦྱངས། །ཞེས་དང་། བརྟག་གཉིས་ལས། སྐྱེ་བོ་མི་ཟད་པ་ཡི་ལས། །གང་དང་གང་གིས་འཆིང་གྱུར་པ། །ཐབས་དང་ལྡན་ན་དེ་ཉིད་ཀྱིས། །སྲིད་པའི་འཆིང་བ་ལས་སྒྲོལ་གྱུར། །ཅེས་དང་། དེ་ཡང་རླུང་བཟུང་བའི་སྐབས་སུ་རྣམ་སྣང་ཆོས་བདུན། མེ་དང་ཐིག་ལེ་བསྒོམ་དུས་མེ་ཐབས་དྲུག་ཆིང་བྱ། གཞན་འཁྲུལ་འཁོར་ཤེས་ཀྱང་ལེགས་ལ་མ་ཤེས་ཀྱང་མི་དགོས་ཏེ། སྲོང་བཙན་སྒམ་པོས་ཀྱང་མ་གསུངས་སོ། །དག་པའི་སྒྱུ་ལུས་བསྐྱེད་རྫོགས་ཟུང་འཇུག་གི་སྒོ་ནས་བོགས་འདོན་པ་ནི། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། ཆོས་ཀུན་སྒྱུ་མའི་དཔེ་འདྲར་ལྟ། །རླུང་སེམས་འདྲེས་མར་རང་སྣང་བའི། །སྒྱུ་མ་ལྷ་སྐུར་བསྒོམ་པར་བྱ། །ཞེས་དང་། ལྷ་མོ་བཞིས་ཞུས་པ་ལས། ནགས་ཁྲོད་གཅིག་པུར་གནས་བཅས་ནས། །ཆོས་རྣམས་སྒྱུ་མར་ཉམས་བླངས་པས། །རྨི་ལམ་སྣ་ཚོགས་རྨི་ལམ་ཤེས། །བཟོད་པ་ལ་གནས་ངན་སོང་བྲལ། །ཅེས་དང་། དམ་ཚིག་གསུམ་བཀོད་པ་ལས། ཉིན་པར་སྣང་སྟོང་སྒྱུ་མ་དང་། །མཚན་མོ་རྨི་ལམ་ལྷ་
ཡི་སྐུ། །རང་ཤར་དེ་ལས་མ་གཡོས་ཚེ། །དེ་ནི་རྒྱལ་བ་ལོངས་སྤྱོད་རྫོགས། །སྐད་ཅིག་བར་དེར་མྱ་ངན་འདས། །རྒྱུན་ལ་གནས་ན་སྨོས་ཅི་དགོས། །སྒྱུ་མ་འོད་གསལ་དེ་བཞིན་ནོ། །ཞེས་དང་། སྤྱིར་སྣང་སྲིད་འཁོར་འདས་ཀུན་རྫོབ་ཀྱིས་བསྡུས་པའི་ཆོས་ཐམས་ཅད་མི་རྟག་པ་མི་བརྟན་པ་སྒྱུ་མ་རྨི་ལམ་ལྟ་བུ་ཡིན་ཏེ། དེའི་དོན་བསྒོམ་པའི་ཚུལ་ཡང་འཁོར་འདས་ཀྱི་ཆོས་འདི་དག་ཐམས་ཅད་སྟེང་འོག་ཕྱོགས་མཚམས་གང་ནས་བྱུང་གང་དུ་འགྲོ་སྙམ་དུ་བརྟགས་ཤིང་དཔྱད་པ་ན་གང་ནས་ཀྱང་མ་བྱུང་གང་དུ་ཡང་མི་འགྲོ་གང་དུ་ཡང་གནས་པ་མེད་དེ། སེམས་དག་མ་དག་གི་སྣང་བ་ཙམ་མོ། །དཔེར་ན་སྒྱུ་མ་དང་རྨི་ལམ། སྤྲུལ་པ་དང་དྲི་ཟའི་གྲོང་ཁྱེར་ལྟ་བུར་སྣང་ཙམ་ལས་རང་བཞིན་གྲུབ་པ་མེད་པ་ཤེས་པར་བྱའོ། །ཞེས་མི་ཏྲ་ཛཱ་ཀིས་གསུངས་ཏེ། བཅོམ་ལྡན་འདས་ཐུབ་པ་ཆེན་པོས། ཆོས་ཐམས་ཅད་སྒྱུ་མའི་དཔེ་བཅུ་གསུངས་ཏེ། འདུས་བྱས་ཀྱི་ཆོས་ཐམས་ཅད་སྒྱུ་མ་ལྟ་བུ། སྨིག་སྒྱུ་ལྟ་བུ། རྨི་ལམ་ལྟ་བུ། གཟུགས་བརྙན་ལྟ་བུ། དྲི་ཟའི་གྲོང་ཁྱེར་ལྟ་བུ། བྲག་ཆ་ལྟ་བུ། ཆུ་ཟླ་ལྟ་བུ། ཆུ་བུར་ལྟ་བུ། མིག་ཡོར་ལྟ་བུ། སྤྲུལ་པ་ལྟ་
བུ་ཡིན་ཏེ། བདེན་པར་གྲུབ་པ་མེད་བསམ་པ་ཐུན་མཚམས་ཐམས་ཅད་དུ་བྱ། ཐུན་དངོས་གཞི་ལ། དག་པའི་སྒྱུ་ལུས་སྦྱངས་བ་ནི། སྣང་བ་ཐམས་ཅད་ཐུགས་རྗེ་ཆེན་པོར་བསྒོམ། སྒྲ་གྲག་པ་ཐམས་ཅད་ཡི་གེ་དྲུག་པའི་སྒྲ་དི་རི་རི་གྲག་པར་བསྒོམས་ལ། ལྷ་འདི་དག་ནི་གང་ནས་ཀྱང་མ་བྱུང་། གང་དུ་ཡང་མི་འགྲོ། གང་དུ་ཡང་མི་གནས། རང་རང་གི་སེམས་སྣང་ཙམ་དུ་རྨི་ལམ་སྒྱུ་མ་ཡིན་སྙམ་དུ་བསྒོམས་ལ་སྤྲོས་བྲལ་དུ་བཞག་གོ་དེ་ཡང་ལས་དང་པོ་པའི་སྐབས་སུ་རང་ཉིད་ཐུགས་རྗེ་ཆེན་པོར་སྒོམ་པ་དེ་ཡང་། རྣམ་པ་གསལ་བ་ནམ་མཁའི་འཇའ་ཚོན་ལྟ་བུ། སྣང་ལ་རང་བཞིན་མ་གྲུབ་པ་ཆུ་ནང་གི་ཟླ་བ་ལྟ་བུ། རྒྱན་ཆ་ལུགས་གསལ་ལ་དོད་པ་མེ་ལོང་ནང་གི་གཟུགས་བརྙན་ལྟ་བུ། ང་རྒྱལ་བརྟན་པ་ནི་རང་ཉིད་ལྷ་དངོས་ཡིན་བསམ་པའི་ང་རྒྱལ་དྲག་པོར་བསྒོམ། རང་དེ་ལྟར་སྒོམ་པ་ལྷར་གཟུགས་སུ་སྣང་བ་ཐམས་ཅད་ཐུགས་རྗེ་ཆེན་པོའི་སྐུ་ཆེ་ཕྲ་སྣ་ཚོགས་པ། སྒྲ་རུ་གྲག་པ་ཐམས་ཅད་ཡི་གེ་དྲུག་པའི་སྒྲ་གྲག་སྟོང་བྲག་ཆ་ལྟ་བུ། དེ་ཐམས་ཅད་ཀྱང་བདེན་གྲུབ་ཨ་འཐས་མ་ཡིན་པར། རང་གི་སེམས་ཀྱི་སྣང་བ་སྒྱུ་མ་རྨི་
ལམ་ཙམ་དུ་བསྒོམ། སྐབས་སུ་དེ་ལྟར་སྒོམ་མཁན་གྱི་སེམས་ཀྱི་ངོ་བོ་ལ་བལྟས་པས། ཅིའི་ངོ་བོར་ཡང་མ་གྲུབ་པ་སྟོང་པ་ཉིད་ཀྱི་ངང་དུ་ཅི་གནས་སུ་བཞག །དེ་གཉིས་རེས་མོས་སུ་བསྒོམ། རྟོགས་པ་ཅུང་ཞིག་གོམས་ནས་འགྱུ་བས་སྒོམ་ལ་མི་གནོད་པའི་དུས་ན། ཉམས་ལེན་སེམས་ངོ་སྐྱོང་བའི་གཤིས་མ་ཤོར་བའི་ངང་ནས། རང་ལུས་ལྷའི་སྐུ་གསལ་སྟོང་འཇའ་ཚོན་ལྟ་བུར་བསྒོམ་སྟེ། འཇའ་ཁ་དོག་ལྔ་གསལ་ཡང་ནམ་མཁའ་སྟོང་པ་ལ་མ་བསྒྲིབས་པ་ལྟར། ལྷའི་སྐུ་རྒྱན་ཆ་ལུགས་གསལ་བར་བསྒོམས་ཀྱང་། སེམས་ངོ་ཉམས་ལེན་སྟོང་པའི་གཤིས་དེ་མ་བསྒྲིབས་པ་ལྟར། ཉམས་ལེན་སེམས་ངོ་སྟོང་པའི་གཤིས་དེས། ལྷའི་སྐུ་མདོག་ཕྱག་མཚན་གསལ་བར་མ་བསྒྲིབས་ཏེ། ནམ་མཁའ་སྟོང་པ་ལ་འཇས་མི་སྒྲིབ་པ་ལྟ་བུར་བསྒོམ། དེ་ནི་བསྐྱེད་རྫོགས་ཟུང་འཇུག་ཉམས་ལེན་གྱི་གཙོ་བོ་ཡིན་ཏེ། སྒྱུ་ལུས་ལམ་གྱི་གཞུང་ཤིང་ཞེས་གྲགས། དེ་ལྟ་བུ་སྒོམ་ཐུབ་པའི་ཚེ། །སྟོང་གསུམ་འཇིག་རྟེན་གྱི་ཁམས་གླིང་བཞི་བྱེ་བ་ཕྲག་བརྒྱ་ན། རང་ཉིད་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་པ་བྱེ་བ་ཕྲག་བརྒྱ་སྐད་ཅིག་ལ་བསྒོམ། དེ་ལས་ཀྱང་རྒྱ་ཆེ་བ་གང་གཱའི་
ཀླུང་གི་བྱེ་མ་སྙེད་ཀྱི་སྟོང་གསུམ་གྱི་འཇིག་རྟེན་གྱི་ཁམས་ན་ཡང་དེ་ལྟར་དུ་བསྒོམ། དེ་ཐམས་ཅད་ཀྱི་ཞལ་ནས་ཡི་གེ་དྲུག་པ་གསུངས་པས། ནམ་མཁས་ཁྱབ་ཚད་ཀྱི་གཟུགས་ཅན་གཟུགས་མེད་ཀྱི་སེམས་ཅན་ཐམས་ཅད་ཐུགས་རྗེ་ཆེན་པོ་འགྲོ་འདུལ་གྱི་སྐུ་ཤ་སྟག་ཏུ་གྱུར་ཏེ། འབྲུག་སྟོང་དུས་གཅིག་ལ་གྲག་པ་བཞིན་ཡི་གེ་དྲུག་པ་འུར་དི་རི་རི་འདོན་པར་བསྒོམ། དེ་ཐམས་ཅད་ཀྱང་གདོས་བཅས་ཨ་འཐས་མ་ཡིན་པར། སྒྱུ་མ་རྨི་ལམ་ལྟ་བུར་བསྐྱེད་རྫོགས་ཟུང་འཇུག་གི་ངང་ནས་བསྒོམ་སྟེ། དམིགས་པ་དེ་བསྡུ་ཡང་མི་དགོས་པ་འཁོར་བ་དོང་སྤྲུགས་ཀྱི་མན་ངག་ཡིན། སྲོང་བཙན་སྒམ་པོའི་ཐུགས་དམ་ཨོ་རྒྱན་གྱི་གསུང་། དེ་ལྟར་ཡིག་དྲུག་བརྒྱ་རྩ་བརྒྱད་བཟླས་པས་ཀྱང་ཐུགས་རྗེ་ཆེན་པོ་འགྲུབ་གསུངས། དེ་ལྟར་བསྐྱེད་རྫོགས་ཟུང་འཇུག་གི་གསང་སྔགས་རྡོ་རྗེ་ཐེག་པའི་བསྟན་པ་དངོས་ཡིན་ཏེ། བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པ་གཉིས། །རིམ་གཉིས་མཉམ་པར་གང་བཞག་པ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་སོ། །མི་རྟོག་པ་ལ་བརྟེན་ནས་བོགས་འདོན་པ་ནི། གཏི་མུག་ལམ་ཁྱེར་རྨི་ལམ་།
བཟུང་བ་དང་། འོད་གསལ་འཛིན་པ་གཉིས་ཏེ། ཐེག་པ་ཐུན་མོང་གི་ལུགས་ལ་གཉིད་ནི་དགེ་བའི་ཆོམ་པོ་ཡིན་པས་སྤངས་ཅི་ཐུབ་དགོས་ཀྱང་། གསང་སྔགས་བླ་མེད་ལུགས་ལ་མི་སྤངས་ལམ་དུ་ཁྱེར་ཏེ། རྡོ་རྗེ་གུར་ལས། གཉིད་ནི་སྤང་བར་མི་བྱ་སྟེ། །དབང་པོ་རྣམས་ནི་མི་དགགས་སོ། །ཞེས་དང་། གཉིད་ལོག་སད་པར་མི་བྱེད་པ། །རྟག་ཏུ་རྨི་ལམ་འདྲ་བར་འགྱུར། །ཞེས་དང་། རིག་འཛིན་རྒྱ་མཚོའི་རྒྱུད་ཕྱི་མ་ལས། རྨི་ལམ་ནུབ་གཅིག་ཟིན་གྱུར་ན། །རྣལ་འབྱོར་ཟླ་ཕྱེད་བར་དུ་བདེ། །ལྷ་ཀླུ་དྲི་ཟས་མཆོད་ཅིང་བསྟོད། །དཔའ་བོ་མཁའ་འགྲོ་དངོས་སུ་འདུ། །ངན་སོང་མཚོ་ལས་སྒྲོལ་བའི་གྲུ། །ཞེས་དང་། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། རྨི་ལམ་འཛིན་དང་སྤྲུལ་བསྒྱུར་སྤེལ། །གཏན་ཕབ་བགེགས་འདུལ་ཞིང་སྦྱང་ཞིང་། །རྨི་ལམ་ལོངས་སྤྱོད་རྫོགས་སྐུར་བསླབ། །ཅེས་དང་། མི་ཏྲའི་དམར་ཁྲིད་ལས། ཕྱི་རོལ་གྱི་སྣང་བ་འདི་དག་རྨི་ལམ་གྱི་སྣང་བ་ཡིན། ལུས་འདི་ཡང་རྨི་ལམ་གྱི་ལུས་ཡིན། རྨི་ལམ་གྱི་ཡུལ་དུ་ལུས་ལ་བདེན་པ་མེད། ཇི་ལྟར་སྤྲུལ་ཞིང་བསྒྱུར་ཡང་རུང་སྙམ་དུ་བསམ་ལ་སྤྲུལ་བསྒྱུར་
ཞེས་དང་། ཉལ་དུས་སེང་གེའི་ཉལ་སྟབས་བྱས་ལ། བླ་མ་སྤྱི་བོར་བསྒོམས་ལ་ཏིང་ངེ་འཛིན་གྱི་དབང་བསྐུར་ཞུ། རྨི་ལམ་ཟིན་པར་གསོལ་བ་བཏབ། དེ་ནས་རང་གི་མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཐིག་ལེ་དམར་པོ་འོད་ཟེར་དང་བཅས་པ་ལ་སེམས་བཟུང་ལ་གཉིད་ལོག་པས་ཟིན་ནོ། །གསུང་ཡིག་འབྲུ་ལ་བརྟེན་ནས་སེམས་འཛིན་པ་ནི། མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཧཱི༔དམར་པོ་འོད་ཟེར་དང་བཅས་པ་ལ་དམིགས་པ་གཏད་ན་ཟིན་པར་འགྱུར་རོ། །སྐུ་ལ་བརྟེན་ནས་རྨི་ལམ་འཛིན་པ་ནི། མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཐུགས་རྗེ་ཆེན་པོ་ཚོན་གང་བ་འོད་ཟེར་དང་བཅས་པ་ལ་དམིགས་པ་གཏད་ནས་འཛིན་པ་ཡིན་ནོ། །རྨི་ལམ་རྨི་ལམ་དུ་ངོ་ཤེས་པ་ནི་ཟིན་པ་ཡིན་ཏེ། ཉིན་པར་གྱི་ཉམས་ལེན་སྐྱོང་། རང་ཉིད་ཐུགས་རྗེ་ཆེན་པོ་དུང་ཕྱུར་དུ་སྤྲུལ་ནས་ཡིག་དྲུག་འདོན། བྱ་རྒོད་དུ་སྤྲུལ་ནས་གནས་མཇལ་བ་སོགས་བྱ། ཞིང་སྦྱོང་བ་ནི། ཁྱུང་ལ་སོགས་སུ་སྤྲུལ་ནས་བདེ་བ་ཅན། མངོན་དགའ། བེེཌཱུརྨ་སྣང་བ་དང་། དགའ་ལྡན་
ལ་སོགས་པར་འགྲོ་ཞིང་། ཞིང་ཁམས་དེ་དག་རྣམས་ན་བཞུགས་པའི་སངས་རྒྱས་རྣམས་ལ་མཆོད་པ་དུ་མ་སྤྲུལ་ནས་མཆོད་པ་དང་། ཆོས་ཞུ་བ་དང་། དེ་བཞིན་དུ་རང་གིས་ཀྱང་སངས་རྒྱས་ཀྱི་ཞིང་དུ་མར་སྤྲུལ་ནས་མཆོད་པ་དཔག་ཏུ་མེད་པར་སྤྲུལ་ཞིང་མཆོད་པ་དང་། ཆོས་ཉན་པར་བྱའོ། །བགེགས་འདུལ་བ་ནི། གདོན་རྒྱལ་པོ་ལྟ་བུ་ལ་རྟ་མགྲིན་དུ་སྤྲུལ་ནས་འདུལ། ཀླུ་ལ་ཁྱུང་དུ་སྤྲུལ་ནས་འདུལ། མ་མོ་ལ་ཕྱག་རྡོར་དུ་སྤྲུལ་ནས་འདུལ། ལྷ་འདྲེ་སྤྱི་ལ་འཇིགས་བྱེད་དུ་སྤྲུལ་ནས་འདུལ། གདོན་ཆུར་སྤྲུལ་ན། རང་ཉིད་མེ་སྟོང་དུ་སྤྲུལ་ནས་བསྐམ་པ་དང་། གདོན་མེར་སྤྲུལ་ན་རང་ཉིད་ཆུར་སྤྲུལ་ནས་བསད་པ་དང་། གདོན་བྱ་རྒོད་ལ་སོགས་པར་སྤྲུལ་ན། རང་བྱ་ཁྱུང་དུ་སྤྲུལ་ནས་འདུལ། །རུ་སྤྲུལ་ན་རང་གླག་ཏུ་སྤྲུལ་ནས་འདུལ། དེ་བཞིན་དུ་ཁྱི་ལ་སྟག་དང་བྱིའུ་ལ་ཁྲ་དང་། རི་དྭགས་ལ་གཅན་གཟན་དང་། གཅན་གཟན་ལ་སེང་གེ་དང་། སེང་གེ་ལ་གས་པ་གང་གི་གཉེན་པོར་གང་འགྲོ་བ་དེར་སྤྲུལ་ནས་འདུལ་ཞིང་སྲོག་སྔགས་འབུལ་དུ་འཇུག །མཐར་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་ཞིང་སྟོང་པ་ཉིད་ཀྱི་
ངང་ལ་འཇོག་པའོ། །རིན་ཆེན་རྒྱ་མཚོའི་རྒྱུད་ལས། བླ་མའི་བྱིན་རླབས་འོད་གསལ་ནི། །ཐོ་རངས་ཚེ་འམ་དུས་གཞན་དུ། །གསལ་སྟོང་བདེ་ཆེན་དབྱེར་མེད་པའི། །འཆར་སྒོ་བླ་མའི་ཞལ་ལས་ཤེས། །ཞེས་དང་། ཐོག་མར་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། །དེའི་ཆེད་དུ་འོད་གསལ་གཏི་མུག་རང་གྲོལ་བསྒོམ་པར་བྱ་སྙམ་དུ་སེམས་བསྐྱེད། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་གཏི་མུག་འོད་གསལ་དུ་འཆར་བར་བྱིན་གྱིས་བརླབ་ཏུ་གསོལ། འོད་གསལ་ཟིན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ལ། མགོ་བྱང་དུ་གཏད་ལ་སེང་གེ་ཉལ་སྟབས་སུ་ཉལ། རླུང་ཅུང་ཟད་བཟུང་ལ་མགྲིན་པ་བཀུག །མིག་གྱེན་ལ་ཧྲིག་གེར་བལྟ། སྙིང་ཁར་ཐིག་ལེ་དཀར་པོ་འོད་ཀྱི་རྣམ་པ་ཅན་ཅིག་ཡེ་རེ་གསལ་བ་ལ་དམིགས་པ་གཏད་དེ། རིག་པ་གསལ་ཡེ་རེ་བ་འོད་གསལ་གྱི་ངང་ལ་གཉིད་དུ་སོང་བ་དང་། རྨི་ལམ་དུ་སེམས་འོད་གསལ་ནམ་མཁའ་དྭངས་བའི་དཀྱིལ་ལྟ་བུ་གསལ་སྟོང་བློ་བྲལ་དུ་འཆར་རོ། །ཐུགས་རྗེ་ཆེན་པོ་མི་ཏྲའི་ཁྲིད་
ཡིག་ལས། རང་ཐུགས་རྗེ་ཆེན་པོ་ཕྱི་གསལ་ནང་གསལ་དུ་བསྒོམས་པའི་ཐུགས་ཀར་ཟླ་བའི་སྟེང་དུ་ཧྲིདཀར་པོ་ཚེག་དྲག་དང་བཅས་པ་ལས་འོད་ཟེར་ཉི་མ་འབུམ་ལས་ལྷག་པ་འཕྲོས་པས། ལུས་ཀྱི་ཕྱི་ནང་གླིང་བཞི་སྟོང་གསུམ་ཐམས་ཅད་ཕྱི་གསལ་ནང་གསལ་དུ་གྱུར་པ་ལ་དམིགས་པ་བཟུང་ནས་གཉིད་ལོག་པས་འོད་གསལ་ཟིན་པར་འགྱུར་རོ། །དོན་ལ་གཉིད་ལ་སོང་རྨི་ལམ་མ་རྨིས་པའི་བར་དེར་ཉམས་ལེན་སེམས་ངོ་ཟིན་པ་ནི་གཉིད་ཀྱི་འོད་གསོལ་ཟིན། རྨི་ལམ་རྨི་ལམ་དུ་ངོ་ཤེས་ནས་ཉམས་ལེན་སེམས་ངོ་ཟིན་པ་ནི་རྨི་ལམ་གྱི་འོད་གསལ་ཡིན། ཐུགས་རྗེ་ཆེན་པོའི་ཚེམ་བུ་དམར་ཁྲིད་དང་། ཐུགས་རྗེ་ཆེན་པོའི་དམར་ཁྲིད་ཟླ་བ་རྒྱལ་མཚན་གྱི་ལུགས་གཉིས་ཀ་ལས། གདམས་ངག་འདི་ཡོད་ན། །གཉིད་ཐུན་ཆེ་ན་སྒོམ་ཐུན་ཆེ། གཉིད་ཐུན་མང་ན་སྒོམ་ཐུན་མང་། མི་ཚེའི་ཕྱེད་དགེ་སྦྱོར་དུ་བསྒྱུར་བའི་གདམས་ངག་ཡིན་གསུངས། ཐུགས་རྗེ་ཆེན་པོ་གསང་འདུས་དམར་ཁྲིད་ལས་། ཁྱད་པར་དུ་གཉིད་ལོག་ཁར་རྟོག་པ་གཞན་གྱིས་བར་མ་ཆོད་པའི་ངང་ལ་ཉལ་ལོ། །དེ་ལྟར་བསྐྱངས་པས་ཉིན་མཚན་འཁོར་ཡུག་ཏུ་འགྲོ་སྟེ། རྣལ་འབྱོར་པ་རབ་གོམས་
པ་ཆེན་པོར་གྱུར་པ་རྣམས་ལ་ནི་བར་དོ་མེད་དོ། །རང་བཞིན་དང་པོ་འོད་གསལ་གྱི་བར་དོ་ལ་འོད་གསལ་བདེ་བ་ཆེན་པོ་མ་བུ་འཕྲད་དེ། འཁྲུལ་པས་བར་མི་ཆོད་དེ་སངས་རྒྱ་བ་ལ་ཐེ་ཚོམ་ཡོད་པ་མ་ཡིན་ཏེ། དཔེར་ན་ཚེས་བཅོ་ལྔའི་ཟླ་བ་རྒས་པ་དང་ཉི་མ་ཤར་བ་དུས་མཉམ་སྟེ། མ་རིག་པའི་མུན་པས་བར་མ་ཆོད་པའོ། །འབྲིང་ཡེང་གོམས་པ་མཐའ་བལྟས་པ་རྨི་ལམ་དུ་སྐྱོང་ཐུབ་པ་ཙམ་ནི་ཆོས་ཉིད་བར་དོ་ལ་རང་ངོ་ཤེས་བདེན་པ་མཐོང་ནས་འཚང་རྒྱ་བར་ངེས་སོ། །ཐ་མ་རྨི་ལམ་ཟིན་པ་ཙམ་དང་། རྨི་ལམ་དུ་གནས་ལུགས་ཀྱི་ངོ་བོ་ཅུང་ཟད་སྐྱོང་ཐུབ་པ་ཡང་སྲིད་པ་བར་དོར་རང་སྣང་ངོ་ཤེས་འཁྲུལ་པ་སེམས་སུ་ཤེས་པས་ལོངས་སྐུའི་ཞིང་དུ་འཕོ་བ་ཡིན་ནོ། །ཡང་ཐ་ན་རྨི་ལམ་ཟིན་པ་དང་། སྒོམ་དྲན་པས་ཅུང་ཟད་ཟིན་པས་ཀྱང་ལས་བཟང་གི་འཕྲོ་འཐུད་ནས་ཆོས་ལྡན་གྱི་སྐྱེ་བ་ཁྱད་པར་ཅན་བརྒྱུད་ནས་སྐྱེ་མེད་ལ་གྲོལ་བར་འགྱུར་རོ། །ཞེས་གསུངས་སོ། །ཐུགས་རྗེ་ཆེན་པོ་མི་ཏྲའི་དམར་ཁྲིད་ཀྱི་སྒྱུ་ལུས་དང་རྨི་ལམ་འོད་གསལ་སོགས་ཀྱི་སྔོན་འགྲོ་ཡང་ཡིན་ལ་ཚོགས་བསགས་པ་དང་། ཉམས་ཆག་བསྐང་བ་དང་། ནད་དང་གདོན་གྱི་
གེགས་སེལ། བདག་འཛིན་གྱི་རྩ་བ་གཅོད་པའི་ཐབས། ཀུ་སཱ་ལུའི་ཚོགས་གསོག་ཡིན་ཏེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། སྒྱུ་ལུས་ཚོགས་སུ་འབུལ་བྱ་ཞིང་། །ཞེས་དང་། ཨུ་རྒྱན་རིན་པོ་ཆེ་དང་མར་པ་ལོ་ཙཱའི་གསུངས་ལས་ཀྱང་། ལྷ་འདྲེ་དབང་དུ་འདུ། བར་ཆད་དངོས་གྲུབ་ཏུ་འགྱུར། བཀའ་སྲུང་གི་འཁུ་ལྡོག་ཞི་བ་སོགས་ཕན་ཡོན་དགུ་གསུངས། བཀའ་བརྒྱད་བདེ་གཤེགས་འདུས་ཆེན་ནས་གསང་བའི་གཏོར་ཟློག་ཀྱང་ཡིན་གསུངས། མ་གཅིག་གི་ཞལ་ནས། སྲུངས་ཤིག་སྐྱོབས་ཤིག་བརྒྱ་བས་ཀྱང་། །ཟོ་ཞིག་ཁྱེར་ཅིག་གཅིག་གིས་དགའ། །འདི་ལ་རིགས་མི་གཅིག་པ་མང་དུ་ཡོད་ཀྱང་། གྲུབ་ཆེན་མི་ཏྲའི་སྙན་བརྒྱུད་ན། རང་གི་སྤྱི་གཙུག་ནམ་མཁར་ཡེ་ཤེས་ཀྱི་མཁའ་འགྲོ་མ་དཀར་མོ་གཡས་གྲི་གུག །གཡོན་ཐོད་ཁྲག་འཛིན་པ་གར་སྟབས་ཀྱིས་བཞུགས་པ་རིན་པོ་ཆེ་དང་རུས་པའི་རྒྱན་གྱིས་བརྒྱན་པ་ཞིག་བསྒོམས་ལ། རང་གི་རྣམ་པར་ཤེས་པའི་ངོ་བོ་ཨཱདཀར་པོ་ཞིག་ཏུ་གྱུར་ནས་གསང་གནས་སུ་གནས་པ་དེ་སྤྱི་བོའི་ཚངས་བུག་ནས་སྐར་མདའ་འཕང་བ་ལྟར་ཐོན་ནས་ལྷ་མོའི་ཐུགས་ཀར་ཐིམ་པར་བསྒོམ།
དེ་ནས་རང་ཉིད་ཡེ་ཤེས་ཀྱི་མཁའ་འགྲོ་མར་གྱུར་པ་དེས་མདུན་དུ་ཐོད་པའི་སྒྱེད་པུ་གསུམ་སྤྲུལ་པའི་སྟེང་དུ་རང་གི་མགོ་བོ་སྨིན་མཚམས་ནས་བཅད་པའི་ཀ་པཱ་ལ་ཕྱི་དཀར་ལ་ནང་དམར་བ་སྟོང་གསུམ་གྱི་ཚད་ཙམ་དུ་གསལ་བའི་ནང་དུ་རང་གི་ཤ་ཁྲག་དུམ་བུར་གཏུབ་ནས་བླུག་པའི་འོག་ནས་མེ་སྦར་ཨོཾ་ཨཱཿཧཱུྃ་ཞེས་བརྗོད་པས་ཤ་ཁྲག་ཐམས་ཅད་བདུད་རྩིར་དཀར་མེར་གྱིས་ཞུ་ནས། ཡང་ཨོཾ་ཨཱཿཧཱུྃ་ཞེས་བརྗོད་པས་ཡེ་ཤེས་ཀྱི་བདུད་རྩིར་བྱིན་གྱིས་བརླབས། རང་གི་ཐུགས་ཀར་ཧྲཱིཿབསམ། དེ་ནས་འོད་ཟེར་ཞགས་པ་དང་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས། ཕྱོགས་བཅུའི་རྩ་བརྒྱུད་ཀྱི་བླ་མ། རྒྱུད་སྡེ་བཞིའི་ལྷ་ཚོགས་སངས་རྒྱས་ཆོས་དགེ་འདུན་མཁའ་འགྲོ་ཆོས་སྐྱོང་སྲུང་མ་ཐམས་ཅད་དང་། །འགྲོ་བ་རིགས་དྲུག་གི་གནས་ཐམས་ཅད་ལ་ཕོག་པས་ཐམས་ཅད་ཐུགས་རྗེ་ཆེན་པོར་གྱུར་པའི་ཐུགས་ཀ་ནས་འོད་ཟེར་གྱིས་བཀུག་སྟེ་རང་གི་མདུན་དུ་བཞུགས་པའི་ཞལ་དུ་བདུད་རྩི་དཀར་སིབ་སིབ་དྲངས་བས་ལུས་ཐམས་ཅད་ཟག་མེད་ཀྱི་བདེ་བས་གང་བར་བསམས་ནས། རྩ་བརྒྱུད་ཀྱི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཡི་དམ་ལྷ་ཚོགས་རྣམས་ཀྱི་ཞལ་དུ་ཨོཾ
ཨཱཿཧཱུྃ། སངས་རྒྱས་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། དམ་ཆོས་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། དགེ་འདུན་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། བྱང་སེམས་རྣམས་ཀྱི་ཞལ་དུ་ཨོཾ་ཨཱཿཧཱུྃ། དཔའ་བོ་མཁའ་འགྲོ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཆོས་སྐྱོང་སྲུང་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞི་བདག་གནས་བདག་རྣམས་ཀྱི་ཞལ་དུ་ཨོཾ་ཨཱཿཧཱུྃ། འགྲོ་བ་རིགས་དྲུག་གི་ཞལ་དུ་ཨོཾ་ཨཱཿཧཱུྃ། ཞེས་བརྗོད་པས་ཐམས་ཅད་ཚིམ་པར་བསམ་ཞིང་དེ་དག་ཐམས་ཅད་སྤྱན་རས་གཟིགས་ཀྱི་སྐུ་དང་སྒྲོལ་མར་གྱུར་ནས་ཡི་གེ་དྲུག་པའི་སྒྲ་དི་རི་རི་འདོན་པར་བསྒོམ་པ། འདི་དག་ཐམས་ཅད་ཀྱང་སྒྱུ་མ་ཡིན་རྨི་ལམ་ཡིན་སྙམ་དུ་བསྒོམ་ཞིང་དེ་ཉིད་རང་གི་བློས་བཀོད་པ་མ་གཏོགས་པ་ལོགས་སུ་གྲུབ་པ་མེད། །བདེན་མེད་ཀྱི་ངང་ལ་ཉམས་སུ་བླང་བར་བྱའོ། །ཡང་གོང་ལྟར་བེམ་རིག་ཕྲལ་ཏེ་རང་མཁའ་འགྲོ་མར་གསལ་བས། ཕྱག་གཡས་གྲི་གུག་ཚད་ཙམ་བྱས་པས་པགས་པ་དབང་ཆེན་གསེར་གྱི་ས་གཞི། བེམ་པོ་གླིང་བཞི་རི་རབ་བྱེ་བ་ཕྲག་བརྒྱ། ཤ་ཁྲག་དོན་སྙིང་ནང་ཁྲོལ་ཐམས་ཅད་ཚེའི་བུམ་པ་འཆི་མེད་བདུད་རྩིས་བཀང་བ་དང་། དངུལ་ཆུ་གྲུབ་པའི་རྫ་ས་
དང་འཆི་མེད་གྲུབ་པའི་ཚེ་རིལ་དང་ཚེ་ཆུ། ཚེའི་རིག་པ་གྲུབ་པའི་ཚེ་ཟས་གསེར་ལྷད་མེད། སྒྲ་མི་སྙན་གྱི་ཚེ་ཆུ་ཚེའི་རིག་འཛིན་དྲང་སྲོང་ལྷ་མོ་དཔག་ཏུ་མེད་པ། །ཚེ་གཏོར་ཚེ་མདའ་ལ་སོགས་པས་འཇིག་རྟེན་གང་བར་དམིགས་ལ། རང་གི་གས་ཀའི་ཧྲིལས་འོད་ཟེར་འཕྲོས་པས་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཚེ་དཔག་མེད་ཀྱི་སྐུར་གྱུར་པར་སྤྱན་དྲངས་ནམ་མཁའ་གང་བར་བཞུགས་པ་ལ་ཕུལ། བདུད་རྩི་རྣམས་ཀྱང་གསོལ་བར་བསྒོམས་པས། ཚེའི་བར་ཆད་བཟློག་པར་འགྱུར་ཏེ། གྲུབ་ཆེན་ནག་པོ་པའི་ཞལ་ནས། རང་ལུས་ཐ་མལ་པའི་ཕུང་པོ་འདི། །ཚེ་རྫས་རིག་འཛིན་དྲང་སྲོང་སོགས། །དམིགས་ནས་དཀོན་མཆོག་ཚེ་དཔག་མེད། །གསལ་བའི་སྤྱན་སྔར་ཕུལ་བས་ན། །ཚེ་ཉམས་བར་ཆད་བཟློག་པར་འགྱུར། །ཞེས་གསུངས་སོ། །ཡང་གོང་ལྟར་ལས། རང་གི་ཕུང་པོ་དེ་རྒྱལ་སྲིད་སྣ་བདུན། བཀྲ་ཤིས་པའི་རྟགས་བརྒྱད། ནོར་བུ་ཆ་བདུན། རིན་པོ་ཆེ་སྣ་ཚོགས། འབྲུ་སྣ་ཚོགས། ཟས་སྣ་ཚོགས། གོས་སྣ་ཚོགས། རྟ་དྲེལ་ནོར་ཕྱུགས་སོགས། ལྷ་མིའི་ལོངས་སྤྱོད་དཔག་ཏུ་མེད་པར་དམིགས་ནས། །
རང་གི་ཐུགས་ཀའི་འོད་ཟེར་གྱིས། རྩ་བརྒྱུད་བླ་མ་ཡི་དམ་སངས་རྒྱས་བྱང་སེམས་ཐམས་ཅད། །ཛམ་བྷ་ལྷ་རིགས་ལྔ། རྣམ་སྲས་སེར་ལྗང་དམར་གསུམ། ནོར་རྒྱུན་མ་མཆེད་ལྔའི་སྐུར་གྱུར་པས་སྤྱན་དྲངས་ཏེ་ནམ་མཁའ་གང་བར་བཞུགས་པ་ལ་ཕུལ་བས། ཟས་ཀྱི་རིགས་རྣམས་གསོལ། གོས་ཀྱི་རིགས་རྣམས་མནབ། ལོངས་སྤྱོད་ཐམས་ཅད་བཞེས་པར་བསྒོམས་པས། ཆོས་བསྒྲུབ་པའི་མཐུན་རྐྱེན་དཀོན་པའི་གེགས་སེལ། ནོར་སྒྲུབ་ཀྱི་མཆོག་ཏུ་འགྱུར་ཏེ། ཨོ་རྒྱན་རིན་པོ་ཆེའི་ཞལ་ནས། མཚོ་རྒྱལ་རང་དབུལ་ཕོངས་བསྒྲེས་སྐོམ་དང་ལྡན་པ་ནི་རང་ལུས་གང་འདོད་པའི་ལོངས་སྤྱོད་དུ་དམིགས་ཏེ། བླ་མ་དང་དཀོན་མཆོག་ནོར་ལྷར་དམིགས་ཏེ་ཕུལ་ན་གང་འདོད་ཀྱི་ལོངས་སྤྱོད་ཆར་བཞིན་དུ་འབབ་ཅི་སྟེ། སྐྱེ་བ་ནས་ཚེ་རབས་ཐམས་ཅད་དུ་ཅི་འདོད་པ་ཟད་མི་ཤེས་པ་ཐོབ་ལ་མཐར་ནམ་མཁའ་མཛོད་ཀྱི་ངོ་བོར་སངས་རྒྱས་པར་འགྱུར་རོ། །ཞེས་གསུངས་སོ། །ཡང་གོང་ལྟར་བེམ་རིག་ཕྲལ་ལ། རང་གི་ཕུང་པོ་དེ་མཁས་པ་པཎྜི་ཏའི་ཚོགས་དང་། མཆོད་པའི་ལྷ་མོ་དབྱངས་ཅན་མ་དཀར་སེར་དམར་ལྗང་བྱེ་བ་དུང་ཕྱུར་ཕྲག་དཔག་ཏུ་མེད་པ་ལག་ན་མཆོད་
རྫས་སྣ་ཚོགས་ཐོགས་པ་དང་། སྡེ་སྣོད་གསུམ་རྒྱུད་སྡེ་བཞི་བཀའ་བསྟན་བཅོས་ཀྱི་གླེགས་བམ་དཔག་ཏུ་མེད་པ་མཛེས་ཤིང་ཡིད་དུ་འོང་བ། སྤྱིར་སྨྱུག་མཚལ་སྣག་ཤོག་བུ་ཤེས་རིབ་ཀྱི་རལ་གྲི་མེ་འབར་བ། ཤེས་རབ་གྲུབ་པའི་རྫས་ཀྱི་རིགས་དཀར་གསུམ་མངར་གསུམ་དཔག་ཏུ་མེད་པོར་དམིགས་ལ། རང་གི་ཐུགས་ཀའི་འོད་ཟེར་གྱིས་བླ་མ་ཡི་དམ་སངས་རྒྱས་བྱང་སེམས་ཐམས་ཅད་འཇམ་དབྱངས་རིགས་ལྔའི་སྐུར་གྱུར་པ་སྤྱན་དྲངས་ནམ་མཁའ་གང་བར་བཞུགས་པ་ལ་དེ་དག་ཕུལ་བས་མཉེས་ཤིང་། མཆོད་པའི་ལྷ་མོ་རྣམས་ཀྱིས་ཚངས་པའི་དབྱངས་ཀྱིས། སྙན་ངག་གི་བསྟོད་པ་དཔག་ཏུ་མེད་པས་བསྟོད་པར་བསྒོམས་པས། ཤེས་རབ་དང་གོ་བ་ཆུང་བའི་གེགས་སེལ་ཏེ། སྐྱེ་བ་འདི་དང་ཚེ་རབས་ཀུན་ཏུ་འཆད་རྩོད་རྩོམ་གསུམ་ལ་མཁས་པར་འགྱུར་ཏེ། ཨཱརྱ་དེ་བའི་ཞལ་ནས། རང་ལུས་ཐ་མལ་ཞེན་བོར་ཏེ། །སྡེ་སྣོད་འཛིན་དང་པོ་ཏི་སོགས། །ཤེས་རབ་ཐོབ་པའི་ཆ་རྐྱེན་དུ། །དམིགས་ནས་དཀོན་མཆོག་ལ་ཕུལ་ན། །ཚེ་རབས་ཀུན་ཏུ་འཆད་རྩོམ་ལ། །འགྲན་བྲལ་ཤེས་རབ་མཐུ་ཡང་འཛིན། །ཞེས་གསུངས་སོ། །དེ་བཞིན་
དུ་རང་ལུས་ཨ་རུ་ར་རྣམ་པར་རྒྱལ་བ་དང་། ནད་སེལ་སྨན་གྱི་བདུད་རྩིས་བཀང་བའི་ལྷུང་བཟེད་དང་། སྨན་གྱི་ཚོགས་དཔག་ཏུ་མེད་པར་སྤྲུལ་ཏེ། དཀོན་མཆོག་རྣམས་སངས་རྒྱས་སྨན་བླའི་སྐུར་གྱུར་པ་ནམ་མཁར་སྤྱན་དྲངས་བ་ལ་ཕུལ་བས། ནད་མང་བའི་གེགས་སེལ་བ་སོགས། གོང་གི་རིགས་འགྲེས་སོ། །གོང་ལྟར་བེམ་རིག་ཕྲལ་བའི་བེམ་པོ་ལ། རང་ལ་གནོད་པའི་གདོན་བགེགས་ཐམས་ཅད་བསྟིམ། དེ་གོང་ལྟར་བྷནྡྷའི་ནང་དུ་བདུད་རྩིར་བསྒྱུར་བ་མགྲོན་རྣམས་ཡི་དམ་ཁྲོ་བོ་དང་ཁྲོས་མ་ནག་མོ་སོགས་ཁྲོ་མོའི་ཚོགས་ཀྱི་ཞལ་དུ་ཕུལ་ནས་ལྷག་མ་མ་ལུས་པར་བསྒོམས་པས་གདོན་གྱི་གནོད་པའི་བགེགས་ཐམས་ཅད་སེལ་བའི་མཆོག་སྟེ། གཅོད་ལུགས་བསྟབ་པ་ཀུན་གྱི་དོན་འདུས་སོ། །དེ་ཐམས་ཅད་ལ་མགྲོན་གཤེགས་པ་སོགས་མི་དགོས་དམིགས་མེད་ཉམས་ལེན་གྱི་ངང་ལ་བཞག་གོ །བོགས་འདོན་གྱི་གཙོ་བོ་གསུམ་དང་གེགས་སེལ་ཕྲན་བུ་ཚར་རོ། །སརྦ་མངྒ་ལཾ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།