ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་རྒྱབ་ཆོས།
ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་རྒྱབ་ཆོས་འདི་ཁྲོམ་ལ་བཤད་མི་རུང་སློབ་མ་ཁྲིད་འཛུགས་རེ་ཡོད་པ་རྣམས་ལ་ཉུང་ཆོས་སུ་བཤད་པར་བྱའོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་འདི། སྡེ་སྣོད་གསུམ་དང་རྒྱུད་སྡེ་དྲུག་གི་དོན་ཐམས་ཅད་འདུས་པ་ཡིན་པས། འདི་གཞན་ལ་འཆད་རུང་ངམ་མི་རུང་ནི། བླ་མའི་མཚན་ཉིད་འདི་རྣམས། རབ་ཐམས་ཅད་ཚང་བ། འབྲིང་ཐམས་ཅད་མ་མཐུན་ཀྱང་ཕལ་ཆེར་ཆ་མཐུན་པ། ཐ་མ་ཕྱེད་ཙམ་ཚང་བ། རྩ་་བའི་སྡོམ་པ་དམ་ཚིག་ལ་སྐྱོན་མེད་ཅིང་། ཐུགས་རྗེ་ཆེན་པོ་ཡི་དམ་དུ་བཟུང་ནས་བསྙེན་སྒྲུབ་ཐེམས་པ། རྟོགས་པ་རབ་རོ་གཅིག །འབྲིང་
སྤྲོས་བྲལ། ཐ་མ་རྩེ་གཅིག་ཆེན་པོ་རྟོགས་ནས་སེམས་ཅན་ལ་ཕན་འདོད་ཀྱི་སྙིང་རྗེ་ཆེ་བ། དེ་ལྟ་བུ་ཞིག་དགོས་ཏེ། རང་གི་རྒྱུད་ལ་མཚན་ཉིད་དང་ལྡན་མི་ལྡན་ལེགས་པར་བརྟག་པར་བྱ་སྟེ། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་དང་། མདོ་སྡེ་རྒྱན་ལས། སེམས་དཔའ་མཆོག་གིས་སྟོན་པ་ནི། །འཇམ་ཞིང་རྒྱགས་བྲལ་མི་སྐྱོ་བར། །གསལ་ཞིང་སྣ་ཚོགས་རིག་པ་དང་། །གོ་ཞིང་ཟང་ཟིང་མེད་ཀུན་འགྲོ། །བྱང་ཆུབ་སེམས་དཔའ་ཐོས་མང་དང་། །བདེ་མཐོང་སྨྲ་མཁས་བརྩེ་
བ་ཅན། །སྐྱེ་མེད་སྐྱེས་བུ་དམ་པ་ནི། །ཆེན་པོ་ཡིན་པར་ཤེས་པར་བྱ། །རྒྱུ་ཆེན་ཐེ་ཚོམ་སྤངས་བ་དང་། །བཟུང་འོས་དེ་ཉིད་གཉིས་སྟོན་པ། །འདི་ནི་བྱང་ཆུབ་སེམས་དཔའ་ཡི། །སྟོན་པ་ཕུན་སུམ་ཚོགས་ཤེས་བྱ། །བཤེས་གཉེན་ཞི་ཞིང་དུལ་བ་ཉེར་ཞི་བ། །ཡོན་ཏན་ལྷག་པར་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁན་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཞེས་དང་། བླ་མ་ལྔ་བཅུ་པ་ལས། བློ་ལྡན་སློབ་མས་བླ་མར་ནི། །སྙིང་རྗེ་མེད་ཅིང་ཁྲོ་ལ་གདུག །ཁེངས་ཤིང་ཆགས་པ་མ་བསྡམ་དང་། །ཕྱོམ་དང་བཅས་ལ་མི་བྱའོ། །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེ་ལྡན་ཞིང་བསྟན་བཅོས་མཁས། །དེ་ཉིད་བཅུ་ཡི་ཡོངས་སུ་ཤེས། །དཀྱིལ་འཁོར་འབྲི་བའི་ལས་ལ་མཁས། །སྔགས་དང་བཤད་པའི་སྦྱོར་བ་ཤེས། །རབ་ཏུ་དྭངས་ཤིང་དབང་པོ་དུལ། །ཅེས་དང་། ཀླུ་སྒྲུབ་ཀྱི་ཞལ་ནས། མང་དུ་ཐོས་ཤིང་ཤེས་རབ་ཆེ། །ཟང་ཟིང་རྙེད་པ་དོན་མི་གཉེར། །བྱང་ཆུབ་སེམས་ལྡན་སྙིང་རྗེ་ཆེ། །དཀའ་བ་
བཟོད་ཅིང་སྐྱོ་ངལ་ཆུང་། །མན་ངག་ཆེ་ཞིང་ལམ་ལས་གྲོལ། །རིགས་ལ་མཁས་ཤིང་དྲོད་ཚད་ཤེས། །བཅུ་གཉིས་ལྡན་པ་བསྟེན་པར་བྱ། །ཞེས་གསུངས་སོ། །རྡོ་རྗེ་གུར་ལས། རྡོ་རྗེ་སློབ་དཔོན་མཚན་ཉིད་ལྔ་ལྡན་ཉིད། །དེ་ཡིས་ཉེ་བར་བསྟན་པའི་སྔགས། །སྒྲུབ་པ་པོ་ལ་གྲུབ་པོ་སྐྱེ། །བརྟན་ཞིང་ཟབ་མོའི་ཆོས་ལྡན་དང་། །རིག་པའི་གནས་རྣམས་ཀུན་ལ་མཁས། །སྦྱིན་སྲེག་དཀྱིལ་འཁོར་སྔགས་ཤེས་ཤིང་། །རབ་གནས་གཏོར་མའི་ཕ་རོལ་སོན། །དེ་ཉིད་བཅུ་པོ་རྣམ་པར་རིག །ཉན་ཐོས་སྤྱོད་པ་སྐྱོང་བྱེད་ཅིང་། །སྔགས་ཀྱི་ཐེག་པའི་རིམ་པར་དགུས། །གཟུགས་ལྡན་མཐོང་ན་དགའ་བ་དང་། །དཀྱིལ་འཁོར་བྲི་མཁས་བཟླས་པར་ལྡན། །རྩ་བའི་ལྟུང་བ་རབ་འཇོམས་ཤིང་། །སྔགས་དང་རྒྱུད་ཀྱི་རབ་སྦྱོར་གྱིས། །འཇིག་རྟེན་རྣམས་ལ་བདེ་སྟེར་བ། །དེ་འདྲའི་བླ་མ་དངོས་བྱས་ན། །གང་གིས་ཀྱང་ནི་སྨད་མི་བྱ། །ཞེས་དང་། རྡོ་རྗེ་མཁའ་འགྲོ་ལས། གང་ཡང་ཁྲོ་དང་རྒྱུ་ཅན་དང་། །ངག་ནི་ཤིན་ཏུ་རྩུབ་པ་དང་། །ཡོན་ཏན་དག་གིས་ཆོག་ཤེས་པས། །དེ་ནི་བླ་མར་བསྟེན་མི་བྱ། །ཞེས་
དང་། ཨ་ཏི་ཤའི་ལམ་སྒྲོན་ལས། སྡོམ་པ་ཆོ་ག་ལ་མཁས་དང་། །བླ་མ་གང་ཞིག་སྡོམ་ལ་གནས། །སྡོམ་པ་འབོགས་བཟོད་སྙིང་རྗེ་ལྡན། །བླ་མ་བཟང་པོར་ཤེས་པར་བྱ། །ཞེས་དང་། གདན་བཞི་ལས། དུལ་ཞིང་ཞི་བའི་ཆ་བྱད་ཅན། །སེམས་ཅན་རྣམས་ལ་མི་འཇིགས་སྦྱིན། །སྔགས་དང་རྒྱུད་ཀྱི་སྦྱོར་ཤེས་ཤིང་། །སྦྱོར་དང་བཟོད་དང་ཐབས་དག་དང་། །ཐམས་ཅད་དུ་ནི་ངག་འཇམ་ཞིང་། །སེམས་ཅན་རྣམས་ལ་བུ་གཅིག་བཞིན། །རྣལ་འབྱོར་བསམ་གཏན་མཆོག་སྦྱོར་ན། །སྙིང་རྗེས་ཕན་པའི་སེམས་ཀྱིས་ནི། །བདེན་པར་སྨྲ་ཞིང་གསོད་མི་བྱེད། །དེ་ཉིད་བཅུ་པོ་ཡོངས་ཤེས་ན། །དེ་ཉིད་སློབ་དཔོན་དུ་བསྟེན་ནོ། །ཞེས་དང་། དེ་ལྟར་མདོ་རྒྱུད་ནས་གསུངས་པའི་བླ་མའི་མཚན་ཉིད་བཟང་ངན་དང་། འཕགས་པ་སྤྱན་རས་གཟིགས་དབང་ཕྱུག་མིའི་ཚུལ་འཛིན་པ། །རྗེ་མི་བསྐྱོད་རྡོ་རྗེའི་ཞལ་ནས། སྙིང་ལ་མདོ་མེད་ཀྱི་གྲུང་གྲུང་པོ། །སེམས་གཏད་སོ་མེད་པར་བྱ་སྒྲོ་འདྲ། །གཟུགས་སེར་པོར་བསྒྱུར་བའི་གྲུབ་དོན་ལ། །ནོར་ཟང་ཟིང་བསོགས་པའི་ཆོས་བརྒྱད་ཅན། །བུན་བསྐྱེད་རྩིས་བཏང་གི་བདག་གཉེར་བྱེད། །
སོ་ནམ་ལས་བརྒྱད་ཀྱི་འགོ་ལོ་འཛིན། །ཁེ་སྤོགས་སྤུས་བསྒྱུར་གྱི་གཞི་མ་འདིངས། །མཁར་ལས་དང་བཞོན་མའི་འཕེལ་རྒྱས་བྱེད། །ཁ་མཆུ་གཤར་སྦྱང་གི་ཁྲིམས་དཔོན་འཛིན། །ཁ་བཙན་གྱི་ཡ་བོ་ཐད་དུ་སློང་། །ནོར་ཡོད་ཀྱིས་རྒྱལ་ཁ་བདག་རིས་བྱེད། །བྲན་གཡོག་གི་ཚོགས་ལ་ཆད་པ་འབེབས། །སྐབས་ལ་ལར་ཟང་ཟིང་བསྒྲུབ་པའི་ཕྱིར། །ལར་ཁྱི་ཕག་ཚོགས་པའི་གྲོང་དབུས་སུ། །སྐལ་མེད་ཀུན་འདུས་ནས་དབང་བསྐུར་སྐད། །ཆོས་ཐོས་བསམ་སྒོམ་པ་མ་ནུས་ཀྱང་། །གོ་བདེ་ཞིང་ལག་ལེན་སྐྱོང་སླ་བ། །ཆོས་ལུང་ཁྲིད་སྦྲགས་མ་བྱེད་དོ་སྐད། །མཚར་ཆེས་སོ་སྙིགས་དུས་ཆོས་པའི་གཟུགས། །མཚར་ཆེས་སོ་སྙིགས་དུས་ཀྱི་བླ་མ་སྤངས། །འཁོར་སློབ་འདོད་ཡོན་གྱིས་སྡུད་པར་བྱེད། །དེ་ཆགས་སྡང་རྩ་བར་སོང་བ་ལས། །དཔོན་སློབ་འཐབ་རྩོད་ཀྱི་རེས་མོས་འཁོར། །དམ་ཉམས་མགུ་འཁང་གིས་གདིང་ལ་འཆའ། །ང་རྒྱལ་གྱི་བདག་འཛིན་གཏིང་ནས་འཁྲུགས། །ཆོས་བརྒྱད་ཀྱི་གང་ཟག་མ་འཆམས་པས། །རྙེད་བཀུར་གྱི་ང་ཁྱོད་ཕྱོགས་རིས་ཅན། །བླ་གཟུགས་ཀྱིས་ཟོག་པོ་མགོ་སྐོར་མཁན། །སྐལ་ལྡན་
གྱི་སྐྱེས་བུ་འགའ་སྲིད་ན། །ཚུལ་འདི་འདྲ་བ་ལ་ཞེ་ཟོན་གྱིས། །ཞེས་དང་། གཞན་སྨིན་ནུས་ཀྱི་ཐོས་པ་ག་ལ་ཞིག །ཞག་རེ་འགྲོགས་ན་བྱ་བཏང་ཆོས་པས་ཁྲེལ། །རང་ཉིད་བསྟན་འཛིན་ཆེན་པོ་ཡིན་སྙམ་བྱེད། །ད་བསམས་ཤིང་གྲོགས་པོས་ཅི་ཞིག་བྱ། །ཚུལ་གནས་ཐོས་བསམ་བསྒོམ་པ་གང་ཡང་མེད། །བསོད་ནམས་ཟད་པ་འགའ་ཡིས་བླ་མར་བསྐུར། །སྡིག་པ་སྤྱོད་བཞིན་དད་ཟས་དཔག་མེད་ལེན། །ད་བསམས་ཤིང་བླ་མའི་མིང་འཛིན་ཕུང་། །རྙེད་པ་བསྡུས་ཚད་རང་གི་ལོངས་སྤྱོད་བྱེད། །འཁོར་དུ་བསྡུས་ཀུན་གཅན་གཟན་བས་ཀྱང་སྡུག །ཚེ་འདི་བསྒྲུབ་པའི་ཆོས་བཤད་ཅི་ཡང་བྱེད། །ད་བསམ་ཞིང་བླ་མའི་མིང་འཛིན་ཕུང་། །ནོར་རྫས་ཁབ་ཙམ་ཞིག་གི་དོན་དུ་ནི། །འདི་ཕྱིའི་དགེ་ལེགས་བསྒྲུབ་པ་ཀུན་དོར་ནས། །ཆོས་དང་འཇིག་རྟེན་གཉིས་ཀ་སྒྲུབ་བྱེད་ཅིང་། །བྱ་བྲལ་མིང་ཅན་རང་ལ་བསླུས་ཏེ་འོང་། །དགོན་གནས་གྲྭ་པ་ནོར་རྫས་སྣ་ཚོགས་བསོགས། །བུན་བསྐྱེད་ཁང་བཙན་ཐབས་ཀ་རྒྱ་ཆེར་སྐྱོང་། །ཞི་དྲག་བྱ་བ་འཇིག་རྟེན་པ་དང་བསྟུན། །གཞན་སྐྱབས་བྱེད་པ་རང་ལ་བསླུས་ཏེ་འོང་། །སྡིག་པ་འབའ་ཞིག་ལས་
སུ་བྱེད་བཞིན་པར། །རང་སེམས་ཕྱག་རྒྱ་ཆེ་ལ་ངོ་སྤྲོད་དེ། །རང་སེམས་གསལ་རིག་ལྟ་སྒོམ་བྱེད་པ་ཡི། །དཔོན་སློབ་བྱེད་པ་རྣམས་ལ་ཐུགས་རྗེས་གཟིགས། །ཚུལ་ཁྲིམས་སྣ་གཅིག་བསྲུང་བར་མི་ནུས་བཞིན། །ཐུགས་ལ་རྟོགས་པ་སྐྱེས་པའི་བློ་ངར་ཅན། །ཚེ་འདི་ཁོ་ནའི་འདུན་མ་བསྒྲུབས་བསྒྲུབ་ནས། །བསྟན་པ་འཛིན་པར་རློམ་ལ་ཐུགས་རྗེས་གཟིགས། །ཚེ་འདིར་བསྙེན་གནས་ཞིག་གི་བསླབ་བྱ་ཙམ། །སློབ་མའི་ནུས་པ་བཟོད་པ་མེད་པར་ཡང་། །དབང་ཁྲིད་ཟབ་མོ་ཞུ་སྒོམ་སྐྱོང་རློམ་པར། །མནར་མེད་ལམ་དུ་འཇུག་ལ་ཐུགས་རྗེས་གཟིགས། །རང་གི་ལོངས་སྤྱོད་ཆུང་ངུའི་ཆུང་ངུ་ཡང་། །མཆོད་སྦྱིན་ཇ་ཞལ་ཙམ་ཡང་མི་ཐེངས་པར། །དཀོན་མཆོག་གསུམ་ཅིའི་གྱི་ནོར་ལ་རང་དབང་འདུ། །ཟས་གོས་གནས་མལ་སྤྱོད་པ་ཐུགས་རྗེས་གཟིགས། །སྐད་ཅིག་ཙམ་ཡང་རྒྱུད་ལ་གཉེན་པོ་ནི། །ཐུན་གཅིག་ཙམ་ཡང་སྒོམ་པར་མ་མྱོང་ཡང་། །ཤ་ཆང་ཙམ་རེ་སྤངས་ནས་བཙུན་པར་རློམ། །ཁྲེལ་འདས་བག་མེད་ཅན་ལ་ཐུགས་རྗེས་གཟིགས། །སྨྲ་ན་རང་བསྟོད་གཞན་སྨོད་ཁོ་ན་གླེང་། །བསམ་ན་རང་གིས་བསོད་ནམས་
འཕེལ་ཐབས་བསམ། །བྱེད་ཚད་རང་དོན་མནོག་ཆུང་དོན་གཉེར་པ། །བསམ་ཆུང་དྲེད་པོ་རྣམས་ལ་ཐུགས་རྗེས་གཟིགས། །ཞེས་དང་། འོད་སྲུང་གིས་ཞུས་པའི་མདོ་ལས། ཆོས་བཞི་དང་ལྡན་ན། སྡིག་ཆེན་གྱི་དགེ་སློང་དུ་རིག་པར་བྱ་སྟེ། ཕྱི་དང་ནང་ལ་ཆགས་པ་དང་། །ཡུལ་དང་འཁོར་ལ་ལོངས་སྤྱོད་དང་། ཚིག་གི་ཕྱིར་རྩོད་ཅིང་ཞེ་སྡང་བ་དང་། ཆོས་དང་ཆོས་མ་ཡིན་པའི་བྱེ་བྲག་མི་ཤེས་ཤིང་གཏི་མུག་པ་དང་། མངོན་པའི་ང་རྒྱལ་གྱིས་དྲེགས་ཤིང་མུ་ཅོར་སྨྲ་བའོ། །འོད་སྲུང་དེ་ལྟ་བུའི་དགེ་སློང་སྡིག་ཅན་གྱིས་འདི་བསྟན་པ་སྣུབ་པར་བྱེད་དོ། །ཡ་མཚན་དགུ་བཅུ་རྩ་ལྔ་དང་། ཕས་ཀྱི་རྒོལ་བས་ངའི་བསྟན་པ་བསྣུབ་པར་མི་ནུས་སོ། །དཔེར་ན་རི་དྭགས་ཀྱི་རྒྱལ་པོ་སེང་གེ་ཤི་བའི་ཤ་ནི་གཅན་གཟན་ནམ། བྱ་རྒོད་ཀྱིས་ཀྱང་ཟ་བར་མི་ནུས་སོ། །སེང་གེའི་རོ་ཉིད་ལས་འབུ་སྲིན་བྱུང་བས་དེ་ཉིད་ཟའོ། །ཞེས་དང་། རྒྱན་སྡུག་པོ་བཀོད་པར། ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །རྣམ་པར་རྟོག་པའི་བདག་ཉིད་དེ། །རང་ཉིད་ཆུད་ཟོས་གཞན་ཆུད་གསན། །ཞེས་གསུངས། སངས་རྒྱས་མཛོད་
ཀྱི་མདོ་ལས། འཇིག་རྟེན་གྱི་དགྲས་ནི་སྲོག་ཙམ་ཕྲོག་གིས། ལུས་གཅིག་སྟོང་དུ་ཟད་དོ། །མི་གཏི་མུག་ཅན་གྱིས་ཆོས་བཤད་ན་བསྐལ་པ་བརྒྱད་ཁྲི་བཞི་སྟོང་གི་བར་དུ་དམྱལ་བར་སྐྱེའོ། །ཞེས་གསུངས་སོ། །འཇམ་དཔལ་རྣམ་པར་འཕྲུལ་པའི་མདོ་ལས། ཆོས་སྟོན་ཀྱང་ཆོས་ཉན་པ་རྣམས་སྙིང་རྗེ་ཆེན་པོས་མི་བསྐྱེད་པ་ནི་བདུད་ཀྱི་ལས་སོ། །ཞེས་དང་། མང་དུ་ཐོས་ཀྱང་གཞན་གྱིས་ཤེས་ཀྱི་དོགས་ནས་ཆོས་ལ་སློབ་དཔོན་གྱིས་དཔེ་མཁྱུད་བྱེད་པ་ནི་བདུད་ཀྱི་ལས་སོ། །ཞེས་དང་། དགོངས་འགྲེལ་ལས། འདོད་ཕྱིར་སུ་དག་དམ་ཆོས་སྟོན་བྱེད་པ། །དེ་དག་འདོད་པ་བཏང་བ་ཕྱིར་ལེན་ཏེ། །མྱོས་པ་དེ་དག་ཐང་མེད་རིན་ཆེན་ཆོས། །ཐོས་པར་གྱུར་ཀྱང་སྤྲང་པོར་རྒྱུ་བར་བྱེད། །ཅེས་གསུངས་པའི་བླ་མ་བཟང་པོའི་མཚན་ཉིད་དུས་ཀྱི་དབང་གིས་ཚང་བར་དཀའ་ནའང་། རང་རྒྱུད་ལ་ལེགས་པར་བརྟགས་ནས་ངན་པའི་མཚན་ཉིད་རྣམས་ཤས་ཆེར་མ་ཚང་བ་གལ་ཆེ། འགའ་ཞིག་ཚང་བར་འདུག་ན་རང་གི་རྒྱུད་རང་གིས་ལེགས་པར་བཅོས་ཏེ་མེད་པར་བྱ། སྐྱོན་དེ་དག་གི་རྩ་བ་ཡང་། འཇིག་རྟེན་ཆོས་བརྒྱད་ཀྱི་རྟོག་པ་དང་། །
སྙན་གྲགས་དང་བཀུར་སྟི་འདོད་པ་ཁོ་ནའི་སྐྱོན་ཡིན་ཞིང་། དེ་དག་བསམ་པ་བསྒྱུར་ཤེས་ན་བཅོས་སླ་བ་ཡིན་ཏེ། འཇིག་རྟེན་ཆོས་བརྒྱུད་ནི། དད་པའི་སྟོབས་བསྐྱེད་པའི་མདོ་ལས། རྙེད་པ་དང་ནི་མ་རྙེད་དང་། །དེ་བཞིན་གྲགས་དང་མ་གྲགས་དང་། །བསྟོད་སྨད་བདེ་དང་སྡུག་བསྔལ་དང་། །དེ་དག་གིས་ནི་འཇིག་རྟེན་སྐྱོང་། །ཤེས་རབ་ཆེན་པོས་རྟེན་དེ་རྣམས། །འཇིག་རྟེན་ཆོས་རྣམས་རབ་རྟོགས་ཤིང་། །འཇིག་རྟེན་འཇིགས་པར་མཐོང་ནས་ནི། །འདི་དག་ལ་ཡང་མི་གཡོ་གྱུར། །རྙེད་པས་མཐོ་བར་མི་སེམས་ཤིང་། །མ་རྙེད་པས་ཀྱང་དམའ་བ་མེད། །རི་རབ་བཞིན་དུ་མགུ་བསྟན་པ། །རྣམ་པ་ཀུན་ཏུ་གནོད་མི་འགྱུར། །དེ་བཞིན་གྲགས་དང་མ་གྲགས་ཀྱང་། །རྟག་ཏུ་མཚུངས་པར་འགྱུར་བ་ཡིན། །བདེ་དང་སྡུག་བསྔལ་བསྟོད་སྨད་ལ། །མཉམ་པ་ཉིད་དུ་གནས་པར་འགྱུར། །ཞེས་དང་། ལྷག་བསམ་བསྐུལ་བའི་མདོ་ལས། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་རྙེད་པ་དང་། བཀུར་སྟི་ནི་འདོད་པ་བསྐྱེད་པ་ཡིན་པར་བརྟག་པར་བྱའོ། །དྲན་པ་འཇོམས་པར་བརྟག་པར་བྱའོ། །གཏི་
མུག་བསྐྱེད་པར་བརྟག་པར་བྱའོ། །སངས་རྒྱས་ཐམས་ཅད་ཀྱི་མ་གནང་བར་བརྟག་པར་བྱའོ། །ཞེས་པ་ནས་རྙེད་པ་དང་བཀུར་སྟིས་ངན་སོང་གསུམ་དུ་ལྟུང་བར་བརྟག་པར་བྱའོ། །བྱམས་པ་བྱང་སེམས་ཀྱིས་རྙེད་བཀུར་གྱི་ཉེས་དམིགས་བརྟག་པ་ནི་འདི་དག་གོ །བརྟགས་ནས་ཀྱང་འདོད་པ་ཆུང་བར་བྱའི་ཡོངས་སུ་གདུང་བར་མི་བྱའོ། །དེ་ཅིའི་ཕྱིར་ཞེ་ན། བྱམས་པ་འདོད་པ་ཆུང་བ་ལ་སྐྱོན་འདི་ལྟ་བུ་དག་མེད་པའི་ཕྱིར་རོ། །ཞེས་དང་། དེ་ལྟར་འཇིག་རྟེན་ཆོས་བརྒྱད་བཀུར་སྟི་དང་། གྲགས་པ་འདོད་ཕྱིར་ཆོས་བཤད་ན་ངན་སོང་གི་རྒྱུ། བྱམས་སྙིང་རྗེས་ཀུན་ནས་བསླང་ནས་གཞན་ཕན་གྱི་ཆོས་བཤད་པ་ན་ཕན་ཡོན་ཆེ། དེ་ལྟར་ཕན་ཡོན་ཉེས་དམིགས་ཀྱང་བྱེད་ལུགས་འདྲ་སྟེ་བསམ་པའི་ཁྱད་པར་རོ། །བྱང་ཆུབ་སེམས་དཔའ་འགྲོ་དོན་མཛད་པའི་སྒོ་ནི་བསྡུ་བའི་དངོས་པོ་བཞི་ཡིན་ཏེ། བློ་གྲོས་མི་ཟད་པའི་མདོ་ལས། ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱི་བསྡུ་བའི་དངོས་པོ་བཞི་མི་ཟད་པ་སྟེ། བཞི་གང་ཞེ་ན། སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པའོ། །སྦྱིན་པ་ནི་
ཟང་ཟིང་གིས་བསླུས་ཏེ་ཆོས་སྦྱིན་པའོ། །སྙན་པར་སྨྲ་བ་ནི་གོ་སླ་བ་དང་། ཆོས་ཉན་པ་རྣམས་ལ་ཚིག་འཇམ་ཞིང་དེས་པ་དང་སྙན་པར་སྨྲ་བའོ། །དོན་སྤྱོད་པ་ནི་བདག་དང་གཞན་གྱི་དོན་གྱི་བྱ་བ་ཐམས་ཅད་བསམ་བཞིན་དུ་ཡོངས་སུ་རྫོགས་པར་བྱེད་པའོ། །དོན་མཐུན་པ་ནི་ཐེག་པ་གང་ལ་བདག་ཏུ་འཛིན་ཅིང་ཡོན་ཏན་འདུ་ཤེས་པ་རྣམས་ཆོས་དང་ཟང་ཟིང་གི་སྒོ་ནས་ཐེག་པ་ཆེན་པོ་ལ་མཐུན་པར་འགོད་པའོ། །ཞེས་དང་། དེ་ཉིད་ལས། སྦྱིན་པ་ནི་ཆོས་བཞིན་བཙལ་བའི་ལོངས་སྤྱོད་རྣམས་ཆོས་ཀྱི་དོན་དུ་བཏང་བའོ། །སྙན་པར་སྨྲ་བ་ནི་གང་སྦྱིན་པ་དེ་དག་ཆོས་ལ་འཛུད་པའོ། །དོན་སྤྱོད་པ་ནི་བདག་གི་དོན་དང་། གཞན་གྱི་དོན་རྗེས་སུ་བསྒྲུབ་པར་རྫོགས་པའོ། །དོན་མཐུན་པ་ནི་སེམས་ཅན་གྱི་ཐམས་ཅད་མཁྱེན་པ་ཉིད་དུ་སེམས་བསྐྱེད་དུ་འཇུག་པའོ། །ཞེས་དང་། དོན་དམ་བསྙེན་པ་ལས། སྙིགས་དུས་དབང་གིས་བླ་མའི་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་བཤད་ནས། །བུ་རྣམས་ཀྱིས་ནི་དེ་ལ་བརྟེན་པར་འགྱུར་བའོ། །ཞེས་གསུངས་པ་ལྟར་རང་གི་
སྐྱོན་དང་ཡོན་ཏན་ཐམས་ཅད་ཆ་སྙམ་པས། སྐྱོན་ཤས་ཆུང་ཡོན་ཏན་ཤས་ཆེ་ན་ཆོས་བཤད་རུང་། དེ་ཡང་མི་ལ་བཤད་པའི་ཆོས་དེ་རང་གིས་ཀྱང་ཉམས་སུ་ལེན་དགོས་ཏེ། མྱ་ངན་འདས་མདོ་ལས། ཀོ་ཀ་ལི་ཀ་དང་ལེགས་པའི་སྐར་མས། མདོ་སྡེ་བཅུ་གཉིས་བཤད་ཤེས་ཀྱང་དོན་མ་གོ་བར། གསོན་པོར་དམྱལ་བར་ས་ཡི་བར་མཐོང་བྱེ་ནས་སོང་བར་བཤད་པའོ། །རང་གི་བཀུར་སྟི་ལ་ཞེ་འདོད་གཏིང་ནས་མེད་པར་བྱས་ནས། དབང་དང་ཆོས་ཁྲིད་སོགས་ཀྱི་ཡོན་དུ་འབུལ་བ་ཆེ་ཕྲ་ཅི་བྱུང་ཡང་། ཆོས་ཀྱི་ཆེ་བ་ཡིན་པས་རང་ལ་དཀོར་སྒྲིབ་མི་འབྱུང་ཞིང་། ཁོ་རང་རྣམས་ཀྱི་ཚོགས་རྫོགས་བསོད་ནམས་དཔག་ཏུ་མེད་པ་ཐོབ་སྟེ། བཀོད་པ་ཆེན་པོའི་རྒྱུད་ལས། རྟ་དང་གླང་པོ་ནོར་གྱི་དབྱིག །རྒྱལ་སྲིད་བུ་དང་ཆུང་མ་དང་། །གསེར་དངུལ་ཟངས་ལྕགས་རིན་པོ་ཆེ། །བཟའ་བཅའ་དགའ་སྟོན་ན་བཟའ་དང་། །སྙིང་པོ་སྨན་འབྲུ་མེ་ཏོག་དང་། །ཆོས་དང་ཟང་ཟིང་ལོངས་སྤྱོད་རྣམས། །བླ་མ་མཉེས་ཕྱིར་ཡོན་དུ་འབུལ། །དེ་ནི་དངོས་གྲུབ་མ་ལུས་པ། །ད་ལྟ་ཉིད་དུ་ཐོགས་མེད་འགྲུབ། །ཅེས་དང་། མེ་ལྕེ་ཕྲེང་བའི་རྒྱུད་
ལས། གལ་ཏེ་རྣལ་འབྱོར་བློ་ལྡན་གྱིས། །རང་ཟས་གོས་ལ་གྱོང་ཁུར་ནས། །བླ་མ་རྡོ་རྗེ་མཆོད་པ་ན། །ཞིང་གི་འཁོར་ཡུག་རྒྱལ་ཁམས་ན། །དགེ་སློང་དཔག་ཏུ་མེད་པ་ཤུལ། །སྟོན་མོ་ལན་སྟོང་བྱས་པ་པས། །ཟས་སམ་ཡང་ན་གོས་ཀྱང་རུང་། །བླ་མ་ལན་གཅིག་མཆོད་པ་ཡི། །བསོད་ནམས་བརྒྱ་ཕྲག་བརྗོད་མི་རྫོགས། །ཞེས་གསུངས་སོ། །དང་པོ་ཆོས་འཆད་པ་པོ་རང་ཉིད་བསྲུང་བ་ནི། དམ་པའི་ཆོས་པདྨ་དཀར་པོའི་ལེའུ་ཉེར་གཅིག་པ་ལས། ཏདྱ་ཐཱ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ནི་མེ། ནི་མེ། ནི་མེ། ནི་མེ། ཏུ་ཧེ། ཏུ་ཧེ། ཏུ་ཧེ། ཏུ་ཧེ། སྟ་ཧེ། སྟ་ཧེ། སྟ་ཧེ། སྟ་ཧེ། འདི་སྤྱི་བོར་བཞག་ནས་ཆོས་སྨྲ་བ་ལ་སུ་ཡང་འཁུ་བར་མ་གྱུར་ཅིག །གནོད་སྦྱིན་ནམ། སྲིན་པོའམ། ཡི་དྭགས་སམ། ཤ་ཟའམ། སྲུལ་པོའམ། གཤེད་བྱེད་དམ། རོ་ལངས་སམ། རེངས་པའམ། གནོད་པའམ། །བརྗེད་བྱེད་ཀྱི་གཟུགས་སམ། གནོད་སྦྱིན་གྱིས་བྱས་པའམ། མིས་བྱས་པའམ། མི་མ་ཡིན་གྱིས་བྱས་པའམ། རིམས་ཉིན་གཅིག་པའམ། ཉིན་གཉིས་པའམ། ཉིན་
གསུམ་པའམ། །ཉིན་བཞི་པའམ། རྟག་པའི་རིམས་སམ། ཐ་མ་རྨི་ལམ་ན་བུད་མེད་ཀྱི་གཟུགས་སམ། བུད་མེད་ཀྱི་གཟུགས་ཀྱིས་མཐོ་འཚམས་པར་འགྱུར་བ་དེ་ནི་གནས་མ་མཆིས་སོ། །ཞེས་གསུངས་པས། དེ་ཤོག་དྲིལ་དུ་བྱས་ནས་ཆོས་བཤད་དུས་ཞྭའི་ནང་དུ་བཏགས། རང་ཉིད་འགྲོ་བའི་ཚེ། པདྨ་འདབ་བཞི་དང་ཟླ་བའི་གདན་ལ་རང་ཉིད་ཐུགས་རྗེ་ཆེན་པོར་གསལ་བ་དེ། འོག་ནས་མཁའ་འགྲོ་སྡེ་བཞིས་བཀྱག །སྟེང་དུ་རྩ་བརྒྱུད་བླ་མ་རྣམས་སྤྲིན་ལྟར་འཁྲིགས་པས་བྱིན་གྱིས་བརླབས། །རྒྱབ་ཏུ་ཡི་དམ་གྱི་ལྷ་ཚོགས་རྣམས་ན་བུན་ལྟར་འཁྲིགས་པས་རྒྱབ་རྟེན་མཛད། གཡས་སུ་སེང་གེ་འགྱིང་། གཡོན་དུ་སྟག་མོ་ངར། མདུན་དུ་སྟོབས་ལྡན་གླང་པོ་ཆེའི་སྣ་ལ་མཚོན་ཆའི་འཁོར་ལོ་བསྐོར་ཞིང་འགྲོ། མིག་མཐོང་ཙམ་གྱིས་སར་དམ་ཅན་ཆོས་སྐྱོང་རྣམས་དམག་ལྟར་གཤར་ནས་སྣ་ཁྲིད་དེ། འགྲོ་བ་སེམས་ཅན་གྱི་དོན་ལ་འབྱོན་པར་བསྒོམས་ནས་འགྲོ། དེ་ནས་ཆོས་འཛུགས་པའི་གནས་ནི། མཐུན་རྐྱེན་འཛོམས་ཤིང་འཚེ་བ་མེད་པ། ས་དཔལ་བཟང་བ་གཅིག་ཏུ་འདུག་སྟེ། གུར་རམ་ཅོག་པུའི་སྒོ་ཡང་ས་
དཔལ་བཟང་པོ་ལ་སྟོན། གལ་ཏེ་ས་དཔལ་བཟང་བ་མ་ཡིན་པའི་ས་དགྲ་འདུག་ན་དེ་ཉིད་ལ་ཐུགས་རྗེ་ཆེན་པོ་བསྐྱེད་བསྟིམས་བྱས་ལ་མཆོད་བསྟོད་ཡིད་ཀྱིས་བྱ་སྟེ། མཁའ་འགྲོ་ཀློང་གསལ་འབར་མའི་གསང་རྒྱུད་ལས། དུས་དང་མཐུན་པའི་སྤྱོད་པ་ལ། །དུས་དང་མཐུན་པའི་གནས་ཚོལ་ཅིག །དེ་ཡི་དུས་ཀྱི་མྱོང་བ་སྐྱེ། །དེ་ཡི་སྐུ་གསུམ་ཉིད་ལ་རེག །སྔར་སངས་རྒྱས་པ་ཐམས་ཅད་ཀྱང་། །གནས་བཟང་བརྟེན་པས་སངས་རྒྱས་སོ། །དེ་བཞིན་གནས་ལ་བརྟག་པར་བྱ། །མཚན་ཉིད་ལྡན་པའི་གནས་གཅིག་དགོས། །གལ་ཏེ་གནས་ངན་ཞིག་ཕྲད་ན། །འཕྲལ་རྐྱེན་ངན་དགུ་འབྱུང་སྲིད་པས། །གནས་བཟང་འདི་ལྟར་བཙལ་བར་གཅེས། །ཕུ་ན་གངས་དཀར་ཆུ་མགོ་ཡོད། །མདའ་ནི་ཕྱག་རྒྱ་བསྣོལ་བ་འདྲ། །བར་དུ་ཐུ་བ་གཏིང་བ་འདྲ། །སྐྱིལ་ཀྲུང་བཅས་པ་ལྟ་བུ་ཡོད། །ཚ་གྲང་སྙོམས་ཤིང་ཆུ་ཤིང་འཛོམས། །སྐྱེས་བུ་ཐ་མལ་པ་ལས་འཕགས། །བཙན་ཞིང་དབེན་ལ་དངས་མཐོ་བ། །འབྲས་བུ་འཚོ་བ་ཤུགས་ཀྱིས་ཡོད། །མི་རྒོད་འཚེ་བ་གཅན་གཟན་མེད། །སྔོན་ཡང་གྲུབ་ཐོབ་བཞུགས་པ་ཡི། །གཞི་བདག་འཇམ་ལ་བློ་ཕན་
པ། །རང་དབང་ཐོབ་ཅིང་དགུ་འབག་བདེ། །ལྟ་སྤྱོད་མི་གཅིག་མ་འདྲེས་ཤིང་། །མཛེ་ཡུགས་ལ་སོགས་མ་འབགས་པར། །དེ་ལྟར་བུ་ཞིག་བཙལ་ལ་བརྟེན། །ཅེས་གསུངས་སོ། །དེ་ནས་གནས་མལ་ཚར་ནས་རང་ཉིད་གདན་ལ་འདུག་སྟེ། ས་ཕྱོགས་དེ་ཉིད་སངས་རྒྱས་ཀྱི་ཞིང་ཁམས་རྣམ་པར་དག་པའི་དབུས་སུ། ས་གཞི་གསེར་གྱི་རྡོ་རྗེ་རྒྱ་གྲམ་སྲ་ཞིང་བརྟན་པ་ཡངས་ཤིང་རྒྱ་ཆེ་བའི་ལྟེ་བར། མེ་ཏོག་པདྨའི་སྡོང་པོ་འདབ་མ་སྟོང་དང་ལྡན་པ་ས་ཕྱོགས་དེ་ཁེབས་པའི་སྟེང་དུ། ཟླ་བའི་དཀྱིལ་འཁོར་ཉ་རྒྱས་པའི་སྟེང་དུ་རང་ཉིད་ཐུགས་རྗེ་ཆེན་པོ་གསལ་བར་བསྒོམས་ལ། ཡུལ་ཕྱོགས་དེའི་གཟུགས་ཅན་གྱི་མི་དང་། གཟུགས་མེད་ཀྱི་ལྷ་འདྲེ་ཐམས་ཅད་ལ་གཏོང་ལེན་གྱི་དམིགས་པ་ལན་འགའ་བསྒོམས་པས། ཐམས་ཅད་འདུས་ནས་རང་ལ་ཕྱག་དང་སྐོར་བ་བྱེད་ཅིང་། ས་ཕྱོགས་འདིར་ཆོས་ཀྱི་འཁོར་ལོ་སྐོར་ཅིག །ས་རྡོ་ཆུ་ཤིང་རྣམས་འབུལ་གྱིས། ཅི་བདེ་བར་ལོངས་སྤྱོད་ལ་དགེ་བའི་ཆ་ཤས་ངེད་ལ་ཡང་ཡང་བསྔོས་ཤིག་ཟེར་བར་བསྒོམ། དེ་ཚེ་ཡིག་དྲུག་བཟླའོ། །དེ་ནི་ས་བསླང་ཞིང་ས་གཞི་བྱིན་རླབས་པའོ། །དེ་ནས་སྐད་
ཅིག་གིས་སེང་གེ་དང་ཟླ་བའི་གདན་ལ་རང་ཉིད་བཅོམ་ལྡན་འདས་ཤཱཀྱ་ཐུབ་པའི་སྐུར་ལམ་གྱིས་བསྒོམ། གསུང་ཚངས་པའི་དབྱངས་ལྟ་བུས་འཇིག་རྟེན་གསུམ་དུ་ཐོས་པར་བསྒྲག་པར་བསྒོམ། ལག་པ་ཐལ་མོ་སྦྱར་སངས་རྒྱས་ཡིད་ལ་བྱེད་བཞིན་པས། གང་ཞིག་གསེར་མཆོག་རང་བཞིན་རི་རབ་ལ་གནས་མན་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རི་ན་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ནི་འདིར་གཤེགས་ཤིག །ལྷ་དང་ལྷ་མིན་མི་འམ་ཅི་ཡི་དབང་པོ་དང་། །བརྒྱ་བྱིན་ལ་སོགས་ཆོས་ཀྱི་ཕྱོགས་ལ་བྱ་བ་བྱས་པ་རྣམས། །སངས་རྒྱས་གསུང་རབ་རབ་ཏུ་ཞི་ཞིང་བདེ་བའི་རྒྱུར་གྱུར་པ། །དེ་དག་བཤད་ཀྱིས་དམ་པའི་ཆོས་ཉན་ཕྱིར་ནི་འདིར་གཤེགས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པའི་ཆོས་ཀྱི་ཆར་འབེབས་ཀྱི། །ཉན་པར་འདོད་པ་ཐམས་ཅད་
འདིར་གཤེགས་ཤིག །ཅེས་དང་། མདོ་སྡེ་ཟ་མ་ཏོག་བཀོད་པ་ལས། ཡི་གེ་དྲུག་པའི་རིག་སྔགས་འདི་ལ་སློབ་པའི་ཚེ། གཞན་ཡང་ལྷའི་སྡེ་སུམ་ཅུ་རྩ་གསུམ་གྱི་ལྷའི་བུ་དག་འདུས་པར་འགྱུར་རོ། །རྒྱལ་པོ་ཆེན་པོ་བཞི་དག་ཀྱང་ཕྱོགས་བཞི་བསྲུང་བར་འགྱུར་རོ། །ཀླུའི་རྒྱལ་པོ་རྒྱ་མཚོའི་འཆིང་ནམ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་འཇོག་པོ་ལ་སོགས་ཏེ། ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ནི་ཡོངས་སུ་སྲུང་བར་བྱེད་དོ། །གཞན་ཡང་ས་བླའི་གདོན་གནོད་སྦྱིན་བླ་གབ་མེད་པར་ཡོངས་སུ་སྲུང་བར་བྱེད་དོ། །ཞེས་གསུངས་པ་ལྟར་རོ། །ཟ་མ་ཏོག་གི་མདོ་སྡེ་གསུངས་པའི་ཚེ། ཚོགས་པའི་དབང་ཕྱུག་དང་། མཐུ་བོ་ཆེ་དང་། ཉི་ཟླ་དང་། །རླུང་ལྷ་དང་། བརྒྱ་བྱིན་དང་། ཚངས་པ་དང་། དགའ་བོ་ལ་སོགས་པའི་ཀླུའི་རྒྱལ་པོ་བརྒྱ་སྟོང་དུ་མ་དང་། ཆོས་དགའ་བ་ལ་སོགས་པའི་དྲི་ཟའི་རྒྱལ་པོ་བརྒྱ་སྟོང་དུ་མ་དང་། བཞི་བརྒྱ་པ་ལ་སོགས་པའི་མིའམ་ཅིའི་རྒྱལ་པོ་བརྒྱ་སྟོང་དུ་མ་དང་། གཙུག་ཕུད་ཅན་ལ་སོགས་པ་ལྷའི་བུ་མོ་བརྒྱ་ཕྲག་དུ་མ་དང་། ཀླུའི་བུ་མོ་བདེ་བྱེད་མ་ལ་སོགས་
པའི་ཀླུའི་བུ་མོ་བརྒྱ་ཕྲག་དུ་མ་དང་། ཕྲེང་བ་བཟང་མོ་ལ་སོགས་པ་དྲི་ཟའི་བུ་མོ་བརྒྱ་ཕྲག་དུ་མ་དང་། ཡིད་ལས་བྱུང་བ་ལ་སོགས་མིའམ་ཅིའི་བུ་མོ་བརྒྱ་ཕྲག་དུ་མ་འཚོགས་པ་ཐམས་ཅད་ཀྱང་། བཅོམ་ལྡན་འདས་ལ་ཟ་མ་ཏོག་གི་མདོ་སྡེ་ཡི་གེ་དྲུག་པ་འདི་བཅོམ་ལྡན་འདས་ལས་དངོས་སུ་ཐོབ་པས། མི་ཕྱེད་པའི་དད་པ་ཐོབ་སྟེ་བསྟན་པ་སྲུང་བར་དམ་བཅས་ནས། དེ་ལྟར་ཡི་དམ་ཐུགས་རྗེ་ཆེན་པོ་ཡི་གེ་དྲུག་མ་གང་དུ་བསྒྲུབ་ཅིང་ཉམས་སུ་ལེན་པའི་གནས་དེར་འཚོགས་ནས་སྲུང་སྐྱོབ་དང་སྡོང་གྲོགས་བྱེད་པ་ཤ་སྟག་ཡིན་ལ། །དེར་མ་ཟད་སྔོན་ཆོས་རྒྱལ་སྲོང་བཙན་དང་། སློབ་དཔོན་པདྨ། རིན་པོ་ཆེ་ཀརྨ་པཀི་སོགས་ཆོས་འདི་ཡི་བཀའ་བརྒྱུད་རིག་འཛིན་ཐམས་ཅད་ཀྱིས་དམ་ལ་བཏགས་པའི་ལྷ་སྲིན་ཡུལ་ལྷ་ཐམས་ཅད་དང་།། ཁྱད་པར་དུ་གནས་དེ་ཉིད་ཀྱི་གཉུག་མར་གནས་པའི་དཀར་ཕྱོགས་རྣམས་དང་། རྫོགས་ཆེན་སྐྱོང་བའི་མ་གཟའ་དམ་གསུམ་བཀའ་སྲུང་ཐམས་ཅད་དང་། ཕྱག་ཆེན་གྱི་ཏིང་ངེ་འཛིན་སྐྱོང་བ་བརྒྱད་ཁྲི་དང་། ཚེ་རིང་མཆེད་ལྔ་འཁོར་བཅས་སོགས། བློ་སྦྱོང་སྲུང་བའི་ལྷ་དཀར་པོ་བརྒྱད་ཅུ་རྣམས་འདུས་ནས་ཆོས་ཉན་ཞིང་སྲུང་
སྐྱོབ་བྱེད་པར་བསྒོམས་ལ། ཆོས་རྣམས་ཐམས་ཅད་རྒྱུ་ལས་བྱུང་། །ཞེས་སོགས་ཞལ་ནས་གསུངས་པའི་ཚིགས་བཅད་བརྗོད། རྒྱས་པར་འགྲུབ་ན་ཞི་བརྔན་བསང་གསུམ་བྱ། གསེར་སྐྱེམས་ཀྱང་མཆོད། བསྡུ་ན་དེ་རྣམས་ལ་དམིགས་ནས་དཀར་གཏོར་ཞིག་ཕུལ། ཁྲིད་འདི་མཐར་མ་ཕྱིན་གྱི་བར་དུ་བར་ཆད་མ་བཏང་སྲུང་སྐྱོབ་མཛོད་ཅེས་བཀའ་བསྒོ། རྒྱལ་ཆེན་སྡེ་བཞིས་ཕྱོགས་བཞི་ནས་བསྲུང་བར་བསྒོམ། དབང་ཁྲིད་ཟབ་མོ་ལ་བར་དུ་གཅོད་པ་ནི། དཔུང་བཟང་གིས་ཞུས་པའི་རྒྱུད་ལས། །རྒྱ་ཆེར་གསུངས་པ་བསྡུས་ཏེ་བཤད་ན། བགེགས་རྣམས་སྒྲུབ་པ་ལ་མི་དགའ་སྟེ། སྒྲུབ་པ་པོ་ལ་གླག་སྣ་ཚོགས་ཚོལ་ཞིང་མདུན་དུ་རྒྱུ་སྟེ་དེ་ལ་རིགས་བཞི་སྟེ་རྒྱལ་པོ་ཆེན་པོ་བཞིའི་འཁོར་རྣམས་ཡིན་ནོ། །གྲངས་ནི་བྱེ་བ་ཕྲག་བདུན་ཏེ་སྔགས་སྒྲུབ་པ་ལ་གེགས་བྱེད་དོ། །ཝའི་རིགས་བྱེ་བ་བཅོ་བརྒྱད་དེ། གཙོ་བོ་ནི་གླང་ཆེན་གདོང་ཡིན་ལ་དབང་ཕྱུག་གི་འཁོར་ཡིན་ཅིང་ས་སྟེང་ཐམས་ཅད་ལ་གེགས་བྱེད་དོ། །སོ་གཅིག་གི་གཙུག་ཕུད་དཔུང་འཁོར་བྱེ་བ་ཕྲག་བཅུ་སྟེ། ཚངས་པ་དང་། ཁྱབ་འཇུག་དང་། ཉི་ཟླ་དང་། རླུང་ལྷས་
བཤད་པའི་སྔགས་ལ་གེགས་བྱེད་དོ། །ནེའུ་ལེའི་རིགས་ཁྲི་ཕྲག་བྱེ་བ་ཐེར་འབུམ་སྟོང་ཕྲག་སྟེ། དེའི་དཔོན་ནི་གཙུག་ན་འབྱུང་བ་སྟེ། ཕྱག་ན་རྡོ་རྗེའི་རིག་སྔགས་ལ་གེགས་བྱེད། དགའ་བྱེད་ནི་རྔ་རྩེན་རིགས་ཀྱི་སྔགས་ལ་གེགས་བྱེད། ནོར་སྤྱོད་བུ་གསང་བ་པས་རང་གི་སྔགས་རྒྱུད་ལ་གེགས་བྱེད། དེ་ལྟར་རང་རང་གི་རིགས་ཀྱི་སྔགས་རྒྱུད་ལ་གེགས་བྱེད། གསང་སྔགས་ཀྱི་ལྷར་སྤྲུལ་ནས་གཏོར་མ་ལེན་ནོ། །བགེགས་ཀྱིས་དེ་བྱས་པ་ལྷས་མཐོང་ནས་མི་དགའ་བར་ཁྲོས་ནས་ཕྱིར་ལོག་ནས་འབྱོན་ནོ། །བགེགས་འདི་རྣམས་ནི་ལྷ་དང་ཀླུ་དང་སུམ་ཅུ་རྩ་གསུམ་པའི་ལྷས་ཀྱང་བཟློག་མི་ནུས་ཏེ། མཆོད་པ་ལ་ཆོ་ག་མེད་པ་དང་། བསྙེན་པ་ལ་སྦྱིན་སྲེག་མེད་པ་དང་། བསྙེན་པ་གང་བྱ་སྙམ་པ་སོགས་སེམས་ཡེངས་བ་ལ་བགེགས་དེ་དག་འཇུག་གོ །དེ་བཞིན་དུ་སྦྱིན་སྲེག་སོགས་བྱ་བ་གང་བྱེད་ཀྱང་བགེགས་སོ་སོར་འཇུག་གོ །བགེགས་ཞུགས་ན་འདོད་ཆགས་ཆེན་པོ་སྐྱེའོ། །གཡོ་འགུ་ལ་ཞེས་བྱ་བའི་བགེགས་ནི་ཁྲུས་བྱེད་དུས་འཇུག་སྟེ། བཀྲེས་ཤིང་སྐོམ་ལ་གཉིད་ཆེ་བ་དང་ལུས་ལྕི་ཞིང་ཁྲོ་བར་འགྱུར་རོ། །བགེགས་དྲི་ཟ་བ་དྲི་འབུལ་དུས་
འཇུག་སྟེ། ཡུལ་དང་རྒྱལ་པོ་གཉེན་དང་ནོར་ལ་སེམས་ཤིང་བུད་མེད་ལ་ཆགས་པར་འགྱུར། ནག་པོ་ལུས་ཆེན་ས་ལས་ལངས་ནས་བདུག་པ་འབུལ་དུས་འཇུག་སྟེ། སེར་སྣ་དང་གཡོ་སྒྱུ་འདོད་ཆགས་ཆེ་ལ་གཏུམ་ཞིང་ཁུ་ཆུ་འཛག་གོ །མར་མེ་འབུལ་དུས་གཙུག་ཕུད་ཅན་འཇུག་སྟེ། སྙིང་ཁ་འཚང་ཞིང་གཟེར་ཐབས་ན་ཞིང་སེམས་རྒྱའོ། །ལངས་དུས་གཙུག་ཕུད་ཅན་འཇུག་སྟེ། རིམས་དང་འཁྲུ་སྐྱུག་དྲག་པོ་འབྱུང་། མེ་ཏོག་འབུལ་དུས་མེ་ཏོག་ཆེར་རྒོད་འཇུག་སྟེ། རིམས་དང་ཆམ་པ་རྒྱུ་ཤིང་ན་བ་དང་གྲོགས་དང་བྲལ་བར་བྱེད་དོ། །དེ་ལྟར་བགེགས་ཞུགས་ན་ལམ་མ་ཡིན་པ་ལ་ལམ་དུ་མཐོང་། འདོད་པ་ཆེན་པོ་མྱོང་ཞིང་སྤྱོད་ངན་སྣ་ཚོགས་བྱེད། གློ་བུར་ཅི་ཡང་སྨྲ་བ་དོན་མེད་དུ་འཁྱམས་པ་དང་། དོན་གྱིས་སྒྲུབ་པ་ལ་ཐེ་ཚོམ་ཡིད་གཉིས་བྱེད། སེམས་ལོག་ལྟ་ཆེ་ཞིང་ངག་འཁྱལ་དོན་མེད་སྨྲའོ། །དེ་ནི་འབྲས་བུ་ཅི་ཡང་མེད་པར་སྙོམས་ལས་སུ་ལུས་སོ། །ཡང་དཔུང་བཟང་གིས་ཞུས་པའི་མདོ་ལས། བགེགས་ཞུགས་པའི་རྟགས་གསུངས་སོ། །སེན་མོས་རྩ་གཅོད་བོང་རྡོས་འཇིགས་པ་དང་། །མཚན་མོ་སོ་ནི་ཀྲིག་ཀྲིག་
འཆའ་བ་དང་། །བུ་མོ་བདག་འདོད་ཁྱོ་ནི་མི་རྙེད་དང་། །སྐྱེས་པ་བདག་འདོད་ཆུང་མ་གཞན་མི་རྙེད། །དགོས་པའི་དོན་མི་འགྲུབ་ཅིང་མི་དགོས་པའང་འགྲུབ། །གཞན་ཡང་འགྲོ་འདོད་གཉིད་མེད་མི་ཡང་རློམ། །དེ་བཞིན་སྟག་གཟིག་དོམ་དྲེད་ཁྱི་དང་ཕག་།བོང་བུ་རྔ་མོང་བྱི་ལ་ཤ་ཟ་ཝ། །བྱ་རྒོད་འུག་པོ་སྐྱར་མོ་མི་ཐུང་ཧྲག །གཅེར་བུ་ཐལ་རིས་ཅན་དང་མི་ནག་པོ། །ཁྲོན་སྐེམ་ཐང་རུང་སྒྲུང་བ་ཕུང་པོ་དང་། །ལྕགས་དང་རྡོ་ཁུང་མི་གཙང་ཁང་རུལ་དང་། །ཁ་བཞིན་བསྒྱུར་ཞིང་རལ་གྲི་མདུང་ཐོགས་པ། །རྨི་ལམ་འདི་རྣམས་རྨིས་པའི་མི་ཡང་རློམ། །ཞེས་གསུངས་པ་དང་། རིག་པ་མཆོག་གི་རྒྱུད་ལས་ཀྱང་རྒྱ་ཆེར་གསུངས་པ་དོན་བསྡུས་ཏེ་བཤད་ན། ལོག་འདྲེན་པའི་སྤྱི་ཕུད་ས་ལས་གོམ་པ་འདོར་བ་ན་འཛིན་ཏེ། ལེ་ལོ་དང་སྐྱུག་པོ་དང་མགོ་འཁོར་ཞིང་ལོ་སྟོང་དུ་བསགས་པའི་བསོད་ནམས་དང་སྔགས་ཀྱི་ནུས་པ་མེད་པར་བྱེད་དོ། །ལོག་འདྲེན་ཆུ་ལྟར་གཡོ་བ་ཁྲུས་བྱེད་དུས་འཛིན་ཏེ། སེམས་འཁྲུགས་འདོད་པ་དང་ཁ་ཟས་ལྷུར་ལེན་ཅིང་འཇིགས་སེམས་སྐྱེ། རིག་སྔགས་ཀྱི་མངག་གཞུག་བྱ་བ་སྔགས་ལས་ལྡང་བ་ན་ཞུགས་ཏེ་ལུས་ཚ་ཞིང་སྡིག་
སེམས་སྐྱེའོ། །ལོག་འདྲེན་འདི་དག་ནི་རིག་སྔགས་ཀྱི་ལྷ་ཐམས་ཅད་ཀྱི་ཕྱི་བཞིན་དུ་འབྲང་སྟེ་སྔགས་འདོན་པ་དང་སྒྲུབ་པ་དང་མཆོད་པ་བྱེད་པ་ཐམས་ཅད་ལ་བགེགས་བྱེད། འདུན་པ་བཟློག །ལེ་ལོ་བསྐྱེད་གླན་ཀ་ཚོལ་ལོ། །གཞན་ཡང་ལོག་འདྲེན་འཇིག་རྟེན་ལྷ་ལ་མེ་ཏོག་ཕུལ་དུས་མེ་ཏོག་ལ་འཇུག་གོ་།ཟས་སུ་དྲི་ཟ་བ་ནི་དྲི་ལ་རེག་པ་ན་ཞུགས་ནས་ལྷ་མི་དགའ་བར་བྱེད་དོ། །ལོག་འདྲེན་ནག་པོ་ནི་སྤོས་ཕུལ་བའི་ཚེ་ཞུགས་ནས་དྲན་པ་ཉམས་ཤིང་སྔགས་དེ་སྒྱུར་བར་བྱེད་ཅིང་ལྷ་མི་དགའ་བར་བྱེད་དོ། །གཙུག་ཕུད་གཅིག་པ་ནི་མར་མེ་ལ་འཇུག་པ་སོགས་གསུངས་སོ། །གཞན་ཡང་དངོས་གྲུབ་ཕལ་པ་བསྒྲུབ་ན་ལྷོ་ནས་ཡི་དྭགས་ནག་མོས་ཝ་དང་སྟག་གི་གཟུགས་ཀྱིས་བར་ཆད་བྱེད། དངོས་གྲུབ་ཆེན་པོ་སྒྲུབ་པ་ན་ཡི་དྭགས་ཀུ་མུ་ཏས་ཁྱི་དང་རྔ་མོང་བོང་བུའི་མགོ་ཅན་དང་། སྲིན་པོའི་གཟུགས་ཀྱིས་ཧ་ཧའི་སྒྲ་དང་ཁ་ནས་སྐར་མདའ་འཕེན་ཅིང་བར་ཆད་བྱེད། སྣ་ཆད་མ་ནི་སྐར་མདའ་འཕེན་ཅིང་བཤུག་གླུ་ལེན་ཅིང་འོང་ནས་བར་ཆད་བྱེད་དེ་སྔགས་དང་ཏིང་འཛིན་གང་གིས་ཀྱང་བཟློག་པར་མི་ནུས་པར་གསུངས་པ་དང་། ཐུན་མོང་
གི་དངོས་གྲུབ་སྒྲུབ་པའི་ཚེ་ན་སྲིན་མོ་རྩད་ཅན་གྱིས་བྱའི་གཟུགས་ཀྱིས་ང་རོ་མི་སྙན་པར་སྒྲོག་ཅིང་བར་ཆད་བྱེད། དངོས་གྲུབ་ཆེན་པོ་བསྒྲུབ་ན་སྲིན་མོ་མི་སྡུག་པས་ཁྱི་དང་གླང་པོ་ཆེ་དང་སེངྒེའི་མགོ་ཅན་གྱི་ཁ་ནས་སྐར་མདའ་འཕེན་ཅིང་འཇིགས་པའི་སྒྲ་དང་བྲག་འཕེན་ཅིང་བར་ཆད་བྱེད། སྲིན་མོ་ལོ་དཀར་གྱིས་ངུ་འབོད་བྱེད་ཅིང་རི་རྣམས་གཡོ། ཡི་དྭགས་རྣམས་གར་བྱེད་ཝ་རྣམས་རྩེ་གླང་པོ་ཆེའི་སྐད་འབྱིན་ཅིང་བར་ཆད་བྱེད་དེ། ལྷའི་གཟུགས་སམ་བུང་བའི་གཟུགས་ཀྱིས་སྒྲ་འབྱིན་ཅིང་ནམ་གུང་གི་ཐུན་ལ་བར་ཆད་བྱེད་དོ། །དངོས་གྲུབ་ཕལ་པ་བསྒྲུབ་ན་ནུབ་བྱང་ནས་གཡོག་མོ་སོ་ལྔ་མོས་མར་མེ་གསོད་ལྷ་བཤོས་འབགས་པར་བྱེད་ཅིང་སྲོད་ལ་བར་ཆད་བྱེད་དེ། དངོས་གྲུབ་ཆེན་པོ་བསྒྲུབ་ན་གནོད་སྦྱིན་འཚུབས་མ་གཅིག་པས་ཝ་དང་སྟག་དང་གླང་གི་གཟུགས་ཀྱིས་ཧ་ཧཾ་ཟེར་ཞིང་གནམ་གྲུམ་པ་དང་། སྐར་མདའ་ལྟུང་ཞིང་འགྱིང་གི་ཐུན་ལ་བར་ཆད་བྱེད། ལྕགས་ཀྱུ་དཀར་མོས་དུས་མ་ཡིན་པར་འབྲུག་སྒྲ་དང་ཆར་འབེབས། གནམ་གྲུམ་པར་བྱེད་ཅིང་མདོག་དཀར་པོར་བསྟན་ནས་དཀྱིལ་འཁོར་བཤིག་གོ །ཐུན་མོང་གི་དངོས་གྲུབ་སྒྲུབ་པ་ལ། ཀླུ་མོ་
རྒྱལ་བ་མོས་ཐོག་ཏུ་འོང་ནས་ཁོག་སྐམ་དང་། ཕ་གུ་འཕེན་ཅིང་སྲོད་ལ་བར་ཆད་བྱེད། ཀླུ་མོ་སོ་གཙིགས་ཀྱིས་ཀུན་ཏུ་རྒྱུ་དང་། གཅེར་བུ་དབང་དང་དུད་འགྲོ་སྣ་ཚོགས་གཟུགས་ཀྱིས་སྐར་མདའ་འཕེན་ཅིང་ངུ་འབོད་དང་བཅས་འགྱིང་ཐུན་ལ་བར་ཆད་བྱེད། མིག་སེར་མས་སྐར་མདའ་ལྟུང་ཞིང་སྒྲ་ཕྱུང་བས་དཀྱིལ་འཁོར་བཤིགས་ཏེ་ནམ་གུང་ལ་བར་ཆད་བྱེད་པར་བཤད་ལ། གསང་སྔགས་སྔ་འགྱུར་གྱི་བདུད་རྩི་སྨན་སྒྲུབ་དང་། སྒྲུབ་པ་ཆེན་པོའི་རིགས་གང་བྱེད་ཀྱང་ཞག་རེ་ལའང་དུས་ཚོད་བཅུ་ལ་ཉུལ་ཞིང་བར་ཆད་བྱེད་པའི་ཉུལ་ལེ་བཅུ་ཡོད་པར་གསུངས་ཏེ། ཨོ་རྒྱན་རིན་པོ་ཆེས། ཉི་ནུབ་ཟེར་དང་དགུང་མོའི་དུས་དག་ལ། །ཞུ་ལེ་ནག་མོ་བྱ་རོག་སྐད་བསྒྱུར་འོང་། །རྟག་ཏུ་ཉམས་མི་དགའ་ཞིང་བག་མི་དྲོ། །ཤེས་པ་བྱིང་འཐིབས་གཉིད་དུ་འགྲོ་བ་འོང་། །སྲོད་ལ་གྲོང་རྐུན་ནག་མོ་འོང་བར་འགྱུར། །བཀྲག་ཉམས་པ་དང་ཆགས་པ་དབང་མེད་སྐྱེ། །ནམ་ཕྱེད་འདོད་ཆགས་དམར་མོ་ར་ནུ་འོང་། །དཀྱིལ་འཁོར་སྟེང་དུ་ཞིང་ལྤགས་ཐུར་ལ་གོན། །སྲུང་མར་བརྫུ་ཞིང་ཆགས་པ་སྤྱོད་ཚུལ་སྟོན། །ནམ་ཕྱེད་ཡོལ་དུས་གནམ་སྨན་
དུན་རྩེ་འོང་། །ཉམས་ནི་སང་སང་བྱིན་མེད་རིག་པ་ནི། །ཐོ་རངས་དང་པོ་ལག་བསེ་མགོ་དམར་འོང་། །རིག་པ་འཕྲོ་རྒོད་མི་སྡོད་ལང་སྙིང་འདོད། །ཉི་མ་རྩེ་ཤར་གནམ་ཐེལ་ནག་མོ་འོང་། །རིག་པ་ཕྱ་ཕྱོ་རེས་འགའ་བྱིང་དང་རེས་འགའ་རྨུགས། །ཉི་མ་དྲོས་ཁ་ཀླུ་སྲིན་སྔོན་མོ་འོང་། །སྙིང་ནི་ལྕི་ཧྲིལ་ཡང་ན་ན་སོགས་འོང་། །ཉི་མ་ཕྱེད་ན་ཀླུ་ཆེན་འཁྱམས་པ་འོང་། །བྱིང་རྨུགས་གཉིད་ལོག་དཀར་དམར་ཟས་ལ་གདུང་། །ཉི་མ་ཕྱེད་ཡོལ་ས་བདག་མ་ཡམས་འོང་། །ཉམས་ཤེད་དམའ་ཞིང་རིག་པ་ངར་མེད་འཐིབས། །ཉི་མ་ཕྱི་དྲོ་བདུད་དང་ཐེའུ་རང་འོང་། །དགེ་སྡིག་མི་འཛེམ་ཚིག་པ་ཟ་ཞིང་འཁྲུགས། །དེ་ལྟར་དུས་བཅུར་ཉུལ་ལེ་བཅུ་ཡིས་ཉུལ། །མདོར་ན་དམ་སྲི་རྒྱལ་འགོང་ཀླུ་སྲིན་དང་། །བཙུན་པ་ཁྲིམས་ཉམས་སྔགས་པ་དམ་ཉམས་དང་། །བོན་པོ་ལྟ་ལོག་དྲེད་པོ་དཀོར་སྲེད་སོགས། །ཉིན་མཚན་ཀུན་ཏུ་སྒྲུབ་ལ་བར་ཆད་བརྩམ། །བཟང་རྟགས་སྟོན་ཡང་ཉམས་མེད་བྱིན་མི་ཆགས། །དེ་དག་ནག་ཕྱོགས་བདུད་ཀྱིས་རབ་བསྐུལ་ནས། །རྟག་ཏུ་དྲི་ངན་མནམ་ཞིང་སྙིང་མི་དགའ། །ཆོག་ཁྲིག་བྱེད་སྙིང་མི་འདོད་ཐེ་ཚོམ་སྐྱེ། །
མོས་གུས་དག་སྣང་བཟློག་ཅིང་འགྲོ་སྙིང་འདོད། །རིག་པ་བཀྲ་ཡལ་འཚུབས་ཤིང་ཀླུ་གཞས་དགའ། །ཞེས་སོགས་གསུངས་པས། རིག་སྔགས་སྒྲུབ་པ་ལ་བར་ཆད་བྱེད་པའི་བགེགས་འདི་དག་གིས་གཙོར་བྱས་པའི་བགེགས་རིགས་སྟོང་ཕྲག་བརྒྱད་ཅུ་སོགས་བྱང་ཆུབ་སྒྲུབ་པ་ལ་བར་ཆད་བྱེད་པ་ཐམས་ཅད་ཡིན་ནོ། །དེ་རྣམས་ལ་དམིགས་ནས་བགེགས་གཏོར་གཅིག་བསྔོའོ། །རྒྱལ་མགྱོགས་བསྡུས་པ་གྲུབ་ན་ལེགས། རང་ཉིད་རྟ་མགྲིན་དུ་བསྒོམས་ལ་བཀའ་བསྒོ་མཚམས་གཅོད་བྱ། སྤྲུལ་པའི་ཁྲོ་ཆུང་གིས་བགེགས་རྣམས་རྒྱ་མཚོའི་ཕར་འགྲམ་དུ་བསྐྲད་ནས། སྲུང་འཁོར་བསྒོམ་པ་ནི། རྡོ་རྗེ་ས་གཞི་ནི་བརྟན་པ་མནར་མེད་པར་ཁྱབ་པ། །སྟེང་དང་ལོགས་རྣམས་སུ་རྡོ་རྗེའི་ར་གུར། དེ་རྒྱབ་མེ་ཁ་དོག་ལྔ་ལྡན་གྱི་གུར་དང་། སྟེང་འོག་རྡོ་རྗེ་ས་གཞི་ར་གུར་གྱི་རྒྱབ་ཏུ་གསེར་གྱི་འཁོར་ལོ་ཞྭ་ཐེབས་ཁ་སྦྱོར་ལྟ་བུའི་རྩིབས་བྱེ་བ་གྲངས་མེད་སྤུ་གྲི་ལྟར་གཡས་སུ་འཁོར་བའམ། འཁོར་ལོ་གཉིས་ཁ་སྦྱོར་རྩིབས་སོ་འཐབས་པས་གཡས་གཡོན་དུ་འཁོར་བའི་བར་དུ་གནོད་བྱེད་ཐམས་ཅད་གཏུབ་པའམ། འཁོར་ལོ་རྩིབས་བརྒྱད་པ་ཆུང་ངུ་
གྲངས་མེད་པ་ས་གཞི་དུ་བ་ར་བ་གུར་དུ་གྱུར་པ་ཐམས་ཅད་སོ་སོར་གསོར་ལོ་ལྟར་འཁོར་བའི་བར་མཚམས་སུ་གནོད་བྱེད་ཐམས་ཅད་གཏུབ་པ་སྟེ་གསུམ་པོ་གང་འདོད་ཡིན་ལ། དེ་རྒྱབ་རལ་གྲི་རིན་པོ་ཆེའི་ཡུ་བ་ཅན་གྱི་གུར་ས་གཞི་དྲྭ་བ་ར་བ་སྟེ། འདི་དག་རལ་གྲི་རྣམས་རྒྱ་གྲམ་དུ་འཁོར་བའི་དྲྭ་བའི་བར་རྣམས་དེ་བས་ཆུང་བས་གཏམས་པའོ། །དེ་རྒྱབ་པདྨས་མཚན་པའི་དབྱུག་ཐོའི་ར་གུར་རོ། །དེ་རྒྱབ་སྣ་ཚོགས་རྡོ་རྗེ་ར་རྣོ་དབལ་ཅན་ཁ་གདེང་ཞིང་དྲག་ཏུ་འཁོར་བའི་ས་གཞི་ར་གུར་རོ། །དེ་རྒྱབ་ཕུར་པའི་ས་གཞི་དྲྭ་བ་གུར་ར་བ། དེ་རྒྱབ་མཚོན་ཆ་སྣ་ཚོགས་རྩེ་ཕྱིར་བསྟན་པ་སྟེ། དགྲ་སྟ། སྤུ་གྲི། ཆུ་གྲི། མདའ། མདུང་། སྟ་རེ། ཐོ་བ། ཞགས་པ་ལ་སོགས་བར་མཚམས་མེད་ཅིང་རྩ་བ་གཅིག་ཏུ་གྱུར་པ་དྲག་ཏུ་འཁོར་བའོ། །དེ་རྒྱབ་མེ་ཁ་དོག་ལྔ་ལྡན་འུར་རྒྱང་དུ་དུས་མཐའི་མེ་ལྟར་འབར་བས་སྒོ་ང་ལྟར་སྲུབ་མེད་ཅིང་ལྟ་བར་མི་བཟོད་པ་དུམ་བུ་གཅིག་ཏུ་གྱུར་པའོ། །དེ་ནས་རྟ་མགྲིན་གྱི་ཚོགས་སྔར་སྤྲོས་པའི་ཁྲོ་བོ་དེ་དག་ཚུར་འདུས་ནས་སྲུང་འཁོར་གྱི་བར་མཚམས་རྣམས་སུ་ཞལ་ཕྱིར་གྱུ་བའི་ཁྲོ་ཆུང་དཔག་ཏུ་མེད་པས་ཧཱུྃ་ཕཊ་ཀྱི་
སྒྲས་བཟློག་པའི་ལས་མཛད་པ་དང་། འཁོར་ལོའི་རྩིབས་ནང་དུ་ཞལ་ནང་དུ་གཟིགས་པ་རྣམས་རཀྟ་ཞེས་སྲུང་སྔགས་དང་སྲུང་བའི་ལས་མཛད་པར་བསྒོམ་པ་སྟེ། ཁྲོ་བོ་གཉིས་གཅིག་ཏུ་བརྩིས་པའི་སྲུང་འཁོར་དགུ་རིམ། སྲུང་འཁོར་གྱི་ནང་དུ་ཆོས་ར་དེར་འདུས་ཚར་བ་དང་། འདུ་རྒྱུ་ཐམས་ཅད་ཚུད་པར་བསྒོམ། དང་པོ་ཉིན་པར་དགེ་བསྐུལ་གྱི་རྟེན་འབྲེལ་དུ་ལྷ་མོ་བསྐུལ་བྱེད་མའི་རྗེས་གནང་བྱ། དེ་ནས་རྒྱུན་དུ་སྔ་དྲོ་ཁྲོམ་མང་ལ་རྗེས་གནང་རེ་དང་། ཕྱི་དྲོ་ཆོས་ཕྲུག་རྣམས་ལ་ཁྲིད་ཆོས་ཐུན་རེ་བཤད། །ཕྱིར་ནངས་ཆོས་ཐུན་མ་བྱུང་བའི་བར་དུ་དམིགས་པ་རྩེ་གཅིག་ཏུ་བསྒོམ་འཇུག །དང་པོ་ཉིན་པར་ཁྲོམ་ལ་རིམས་ནད་མི་འབྱུང་བའི་རྟེན་འབྲེལ་དུ། ལོ་མ་གྱོན་མའི་རྗེས་གནང་བྱས་ལ། ཨོཾ་པི་ཤ་ཙི་སྭཱ་ཧཱ། ཞེས་པ་ཉིན་གཅིག་བཞིན་ཁྲོམ་ལ་ཕྲེང་བསྐོར་ཡ་ཟུང་འུར་འདོན་འཇུག །དེ་ནས་ཁྲོམ་ནང་དུ་མི་སྡིག་ཅན་དང་གྲིབ་ཅན་དང་། དམ་ཚིག་ཉམས་པ་ཡང་འགའ་རེ་ཡོད་པས། དེའི་གྲིབ་ཀྱིས་གཞན་རྣམས་ལ་མི་གནོད་པའི་ཕྱིར། ཁྲོ་བོ་རྨེ་བརྩེགས་ཀྱི་རྗེས་གནང་བྱ། རང་ཉིད་ལའང་ཁྲོམ་གྲིབ་མི་འོང་བའི་ཕྱིར། ནངས་
སྔ་ལོ་གྱོན་མ་དང་། སྨེ་བརྩེགས་ཀྱི་རྒྱུན་བསྙེན་རེ་བྱ། ལས་བུམ་དུ་སྨེ་བརྩེགས་སོགས་བསྐྱེད་ལ་མེ་ལོང་ངོས་ནས་ཁྲོམ་མང་ལ་ཡང་ཁྲུས་བྱས་པས། ཉམས་གྲིབ་སེལ་ཞིང་ཆབ་བླང་པའི་གོ་ཆོད། མེ་ཏོག་ནས་བཀྱེ་མི་དགོས་པར། ཁྲོམ་སྤྱིའི་མཎྜལ་དུ་དམིགས་ནས། མཆོད་གཡོག་པས་ལག་ཏུ་མཎྜལ་ཐོགས་ཏེ་ལངས་ནས། གྲྭ་པ་རྣམས་ཀྱིས་མཎྜལ་འབུལ་བ་ཕྱག་སྲོལ་ཡོད་དོ། །དེ་ནས་སྔོན་འགྲོ་བགེགས་གཏོར་ཕུལ་ནས་བགེགས་སྐྲད་སྔགས་དམིགས་བྱ་བ་རྒྱུན་དུ་གལ་ཆེ་བར་གྲུབ་ཐོབ་སྐྱེར་སྒང་པས་གསུངས། ཁྲོམ་མང་ལ་དབང་དང་ཆོས་བཤད་རུང་བའི་ལུགས་ནི། ཁྲོ་བོ་ཁམས་གསུམ་རྣམ་རྒྱལ་གྱི་རྒྱུད་ལས། ཁམས་གསུམ་གྱི་སེམས་ཅན་ཐམས་ཅད་ལ་དབང་བསྐུར་བར་བྱའོ། །འདིར་སྣོད་དང་ལྡན་པ་དང་མི་ལྡན་པར་ཡོངས་སུ་བརྟག་པར་མི་བྱའོ། །དེ་ཅིའི་ཕྱིར་ཞེ་ན། དཀྱིལ་འཁོར་འདི་མཐོང་བ་ཙམ་གྱིས་བྱང་ཆུབ་ཐོབ་པའི་ཕྱིར་རོ། །ཞེས་གསུངས་པ་དང་། །གཞན་ཡང་། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །འགྲོ་བ་འདི་དག་ཐམས་ཅད་སངས་རྒྱས་ཉིད། །གར་མཁན་དང་ནི་རི་མོ་བཟང་བཞིན་གནས། །ཞེས་
གསུངས་པའི་དོན་ཡིན། རང་རྟོགས་པ་མཐོ་བར་ཡོད་ན། སངས་རྒྱས་ཐམས་ཅད་ཀྱི་ཐུགས་དང་སེམས་ཅན་ཐམས་ཅད་ཀྱི་སེམས་རྒྱུད་དང་། རང་གི་སེམས་ཉིད་དང་། དེ་གསུམ་ངོ་བོ་དབྱེར་མེད་པར་རྟོགས་ན། ཁྲོམ་མང་ལ་གསང་སྔགས་ཟབ་མོ་བཤད་ཀྱང་། རང་ལ་གསང་སྒྲོག་གི་ལྟུང་བར་མི་འབྱུང་། ཁྲོམ་ཕན་ཚུན་རྣམས། །དབང་དང་ཆོས་མཉམ་པོར་ཐོབ་ནས་མཆེད་གྲོགས་ཡིན་ཀྱང་དམ་ཚིག་བསྲུང་དཀའ་བས། ཁྲོམ་རེ་རེ་བཞིན་དུ་སོ་སོར་རྡོ་རྗེའི་གུར་ཁང་རེ་རེའི་ནང་དུ་ཚུད་པར་བསྒོམ། དེ་ནི་འདུལ་བ་ནས་ཐག་གྲ་བཤད་པ་དང་མཚུངས། དེ་ནས་རྨི་ལམ་རྩུབ་བམ་ཁྲོམ་ལ་བར་ཆད་བྱུང་དོགས་ན། བགེགས་མཐར་བྱེད། བདུད་རྩི་འཁྱིལ་བ། རྡོ་རྗེ་གྲོ་ལོད་སོགས་ཀྱི་དབང་བྱས་ལ། དབང་འགྲིམ་ཚེ་སྔགས་འུར་འདོན་བཅུག །དེ་བཞིན་དུ་ནད་ཞི་ཕྱིར་སྨན་ལྷའི་དབང་བསྐུར་ལ་སྔགས་འུར་འདོན་བཅུག །ཁྲོམ་རྒྱས་ཡག་རེད་པ་དང་། ཐེག་པ་ཐུན་མོང་གི་སྐྱབས་སྡོམ། བསྙེན་གནས་ཡན་ལག་བརྒྱད་པའི་སྡོམ་ལུང་། སྨྱུང་གནས་ཀྱི་སྡོམ་ལུང་། སྨྱུང་གནས་ཀྱི་ཆོ་ག་བཅུ་གཅིག་ཞལ་གྱི་དབང་། གུ་རུ་ཞི་བ་
དང་། འབྱུང་པོ་འདུལ་བྱེད་ཀྱི་དབང་། གནམ་ཆོས་ལྟར་པདྨ་གཙུག་ཏོར་དྲི་མེད་དང་། ཐུགས་རྗེ་ཆེན་པོ་ཡིད་བཞིན་འཁོར་ལོ་དང་། ཕན་ཡོན་གང་ཆེ་རྣམས་ཀྱི་རྗེས་གནང་བྱ། གནམ་ཆོས་ལྟར་སའི་སྙིང་པོའི་རྗེས་གནང་གྲུབ་ན་རབ། མ་འགྲུབ་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་ཕྱག་འཚལ་ལོ། །ཞེས་པ་དེ་འུར་འདོན་ལན་མང་དུ་བྱེད་བཅུག་པས། ལོ་ལེགས་པ་དང་། རྩྭ་ཀ་སྐྱེ་བ་ལ་ཕན། ཆོས་དབུ་འཛུགས་དུས་དང་། རྗེས་ནས་དགའ་སྟོན་གྱི་ཚོགས་ཆེན་འགྲུབ་ན་ལེགས་ཏེ། མ་འགྲུབ་ཀྱང་དཀའ་གནད་མི་བྱེད་པར། ཤ་ཐུད་ཇ་མར་ཆང་སོགས་ཟས་ཀྱི་རིགས། དེ་ཉིན་བྱུང་ཚད་བསྡུས་ལ་ཚོགས་འཁོར་རྒྱུན་དུ་བྱ། དེས་ཚོགས་རྫོགས་པ་དང་། སྐུ་རིམ་དང་ཉམས་རྟོགས་སྐྱེ་བའི་གནད་ཆེ། རང་གིས་ཐོན་ན་བཟང་། མ་ཁོམ་ན་གྲྭ་པ་དྲག་རིམ་རྣམས་ཀྱིས་གཏོར་བསྔོས་དང་། བསྐང་བ་བཀའ་སྲུང་རྣམས་ཀྱི་གསོལ་ཁ་གཟབ་པ་གལ་ཆེ། ཁྲོམ་ལ་ནད་མུག་སོགས་འོང་གྲབ་བྱུང་ན། རྒྱལ་འགྱོགས་དང་ལྷ་མོ་བརྒྱ་རྩ་མཁའ་འགྲོ་གཏོར་ཟློག་རྣམས་གྲྭ་པ་རྣམས་ལ་བྱེད་བཅུག །རང་གིས་ནི་ཉམས་ལེན་གྱི་
ངང་ནས་སྔགས་དང་དམིགས་པ་ཁོ་ན་བྱའི། འདོན་པ་ཡང་མང་བར་མི་བྱ། འབུལ་བ་སོགས་གང་བྱུང་ཉམས་ལེན་སོགས་མ་ཡེངས་པར་བསྔོ་བས་རྒྱས་འདེབས། འབྲུ་དང་རིན་པོ་ཆེ་སོགས་སྐམ་སྤྱད་གང་བྱུང་རྣམས་མནྜལ་དུ་དམིགས་ལ་མཎྜལ་ཤོ་ལོ་ཀ་རེས་ཕུལ། གོ་མཚོན་དང་རྐང་བཞི་བ་བྱུང་ཚད་བསྐང་རྫས་སུ་དམིགས་ལ་གཏོར་བསྔོས་ཞོར་ལ་བསྐང་ཐུང་འདོན། འོ་ཞོ་སོགས་འཕྲལ་དུ་ལོངས་སྤྱོད་དགོས་པའི་བྱུང་ཚད་བྲན་ལ། ཐུགས་རྗེ་ཆེན་པོ་དང་། ལོ་མ་ཅན་དང་། ཛི་ལྷའི་སྔགས་ལ་ཁཱ་ཧི་བཏགས་ལ་ཕུལ་བས་དཀོར་སྒྲིབ་ཆུང་། ཚོགས་རྫོགས། །བར་ཆད་ཞི། དངོས་གྲུབ་འབྱུང་། བཟའ་བཏུང་གང་བྱུང་ཡང་ནང་གི་ཚོགས་འཁོར་ལྟར་ལོངས་སྤྱོད། ཚོགས་མ་རྫོགས་པར་ཆོས་བརྒྱགས་ཆད་པའི་ཉམ་ཆུང་འདུག་ན། ཆོས་བརྒྱགས་ཅུང་ཟད་སྦྱིན། གཞན་ཡང་ཟང་ཟིང་རྣམས་ཆོས་ཕྱོགས་སུ་རྩི་ཐེངས་བྱ། གྲོལ་ཁ་མང་བ་ལ་ཚེ་དབང་དང་དགེ་བ་ཁས་ལེན་བྱ། འབྲེལ་པ་ཐོགས་ཚད་ལ་བསྔོ་བ་རྒྱས་པ། བཀྲ་ཤིས་རྒྱས་པར་བརྗོད་ལ་མེ་ཏོག་འཐོར། དེ་ནས་ཁྲོམ་གྲོལ་ནས། གཞི་བདག་རྣམས་ལ་གཏང་རག་གི་
དཀར་གཏོར་ཞིག་འབུལ། གཟུགས་མེད་ཀྱི་ཆོས་ཉན་པ་རྣམས་ཀྱང་གྲོལ་བར་བསྒོམ། གནས་བདག་ལ་ཡང་བསྔོ་བ་སྨོན་ལམ་བྱ། སྲུང་འཁོར་གྱི་དམིགས་པ་ཡང་བསྡུ་སྟེ། ཉམས་ལེན་སྟོང་ཉིད་ཀྱི་ངང་དུ་ཡུན་རིང་བཞག །དེ་ནས་འགྲོ་བའི་ཚེ་སྔོན་ལྟར་དམིགས་པ་བྱས་ལ་འགྲོའོ། །དེ་ལྟར་ཕྱོགས་ཀུན་ཏུ་འགྲོ་ཞིང་འགྲོ་དོན་བྱ་བ་ནི། ཨོ་རྒྱན་རིན་པོ་ཆེས་གསུངས་པའི་ཚོང་དཔོན་ལྟ་བུའི་འགྲོ་དོན་ཡིན་ལ། མང་བ་ནས་གཅིག་ཏུ་མཚམས་བསྡམས་ནས། རང་གི་ཐུགས་དམ་ཡང་ཡང་བཤོལ་བའི་ངང་ནས། དབང་ལུང་ཁྲིད་སོགས་ཞེ་ཐག་པ་ནས་ཞུ་མཁན་ཞོར་ལས་མ་ཡིན་པར་ཐག་རིང་ནས་རྐང་གཏད་ཀྱིས་བྱུང་ན། དེའི་རེ་འདོད་བསྐང་བར་བྱ་བ་ནི། མཉན་པ་ལྟ་བུའི་འགྲོ་དོན་ཡིན་པར་གསུངས་སོ། །འགྲོ་དོན་བྱུང་ན་ཐུགས་དམ་ཆག་བསམ་པར་མི་བྱ་སྟེ། ཐུགས་དམ་ནི་བྱང་ཆུབ་སྒྲུབ་པ་ལས་ལྷག་པའི་ཐུགས་དམ་བྱ་རྒྱུ་མེད་ཅིང་། སེམས་ཅན་ལ་ཕན་ཐོགས་ནུས་ན་བྱང་ཆུབ་སེམས་དཔའི་ཐུགས་དམ་རྩ་བ་དེ་ཡིན། སངས་རྒྱས་ནས་ཀྱང་འགྲོ་དོན་མ་གཏོགས་གཞན་བྱ་རྒྱུ་མེད་པའི་ཕྱིར། སངས་རྒྱས་རྣམས་ཀྱང་དེ་ལ་མཉེས་སོ། །བཀུར་སྟི་
དང་། དད་གུས་ཀྱིས་མི་ཆེན་བླ་ཆེན་རྣམས་ཀྱང་དབུ་རྒྱ་བའི་ཚེ། རང་ཉིད་རང་མཐོང་དང་། ང་རྒྱལ་སྐྱེ་ཞིང་། རྒྱུ་རྩིས་དང་ཆགས་འཛིན། ཕྲག་དོག་དང་འགྲན་སེམས་སྐྱེས་ན། ལྷའི་བུ་བདུད་ཞུགས་པ་ཡིན། གདུལ་བྱ་འགྲོ་དོན་ཆེ་ཚུགས་ངན། རང་དམན་ས་འཛིན་ཅིང་། ང་རྒྱལ་མེད། ཉམས་རྟོགས་ཇེ་འཕེལ་དུ་སོང་ན་དངོས་གྲུབ་ཡིན། འོན་ཀྱང་ཟང་ཟིང་ཨེ་འོང་བསམ་པའི་བསམ་པ་གཏན་ནས་སྤངས་ཏེ། སེར་མོ་བ་ཤེས་རབ་ཅན་རྣམས་ལ་དབང་རྒྱུན་ལུང་རྒྱུན་ཁྲིད་རྒྱུན་མང་དུ་འཕེལ་ན། །སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་དུ་རྒྱུན་མི་འཆད་པར་འགྱུར་བ་ལུང་གི་བསྟན་པ་ཡིན་པ་ལོ། སེར་མོ་བ་དག་ལ་ཉམས་དང་རྟོགས་པ་སྐྱེས་ནས་ཁྲིད་འཛུགས་ཐུབ་རེ་བྱུང་ན། དེའི་རྒྱུད་འཕེལ་ཐུབ་ན་རྟོགས་པ་དོན་བརྒྱུད་དུ་འགྱུར་ལ། ཁྲིད་གཞན་ལ་འཕེལ་མ་ཐུབ་ཀྱང་རང་གི་ཉམས་ལེན་སྒྲུབ་པ་བྱེད་པ་བྱུང་ན། ཉམས་སུ་ལེན་པ་སྒྲུབ་པའི་བསྟན་པ་ཡིན་ཏེ། ཐུབ་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་ཡིན། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ཞེས་
གསུངས་ཏེ། ཐ་མལ་པ་རྣམས་ལ་ཡང་། དགེ་སྒྲུབ་སྡིག་སྤངས་ཙམ་བྱེད་པ་དང་། བསྙེན་གནས་ངག་བཅད་ཡིག་དྲུག་སོགས་དགེ་བ་ལ་བློ་ཁ་འགྱུར་བ་དང་། ཞི་ལྷག་གི་ཏིང་ངེ་འཛིན་སྐྱོང་ཤེས་པ་མང་དུ་འོང་དོ་བས། དེའི་ཕན་ཡོན་ཁོ་ན་ལ་བསམ་པར་བྱའོ། །དེ་དག་ལ་ཚོགས་བཤད་ཀྱི་སྣོད་ཅེས་བྱ་སྟེ། ཁྲོམ་ཆོས་སུ་རུང་བ་ཡིན། གནད་ཀྱི་ངོ་སྤྲོད་ཟབ་མོ་དང་། གེགས་སེལ་བོགས་འདོན་ཁྱད་པར་ཅན་རྣམས་ནི། རྟོགས་འབུལ་ཞིག་ཞུས་ཀྱི་སྐབས་སུ་གང་ལ་གང་ཕན་ཚིག་རེ་རེ་བཤད་པར་བྱའམ། ཁྲོམ་ཆོས་དང་འབྱམས་བཤད་མི་རུང་ངོ་། །བྱས་ཀྱང་མི་ཕན་གནོད་ཉན་ཆེ་བའི་ཕྱིར་རོ། །དམ་ཉམས་དང་སྡིག་ཅན་ལ་ཡང་། དེའི་མཚང་ལ་རྒྱག་མི་རུང་། དེ་བཤགས་ཐབས་དང་སྦྱོང་ཐབས་ཀྱི་མན་ངག་ཟབ་མོ་རེ་རེ་བསྟན་པར་བྱའོ། །ཞི་བ་དང་བསྲུང་བའི་མན་ངག་རྣམས་ནི་གང་ལ་གང་ཕན་སྟོན་པར་བྱ། རྒྱས་པ་དང་དབང་གི་ལས་ཚོགས་ནི་བསྟན་པ་ལ་ཕན་ངེས་མ་གཏོགས་མི་སྟོན། སྦྱོར་སྒྲོལ་དང་གནོད་བྱའི་སྐོར་རྣམས་ནི་ཤིན་ཏུ་བསྡམས། གལ་ཏེ་མི་བྱེད་དཀའ་མེད་བྱུང་ན། མགྱོགས་ལུང་ཤོག་ངོ་བཀྲུ་ཙམ་ཞིག་བྱའོ། །ཕྱག་
ལེན་སོགས་ངག་ཁྲིད་ནི་པིར་གྱི་ཁ་བཞིན་བསྡམས། རྒྱུད་འཛིན་གྱི་སློབ་མ་ལ་གཅིག་བརྒྱུད་དུ་བྱའོ། །དེ་ལྟར་སེམས་བསྐྱེད་དང་ལྡན་པས་སྤེལ་མཁས་པར་བྱས་ན། རང་ཉིད་ཀྱང་བསྟན་འཛིན་གྱི་གྲལ་དུ་ཚུད་ཅིང་། ལུང་དང་རྟོགས་པའི་ཆོས་ཡུན་རིང་གནས་པར་འགྱུར་རོ། །ཁྲིད་ཀྱི་རྒྱབ་ཆོས་ལེའུ་ཐ་མ་སྟེ་རྫོགས་སོ།། འདི་བྲིས་ཉེས་པའི་ཆ་རྣམས་གང་མཆིས་པ། །རྩ་གསུམ་ཆོས་བདག་སྲུང་མའི་ཚོགས་ལ་བཤགས། །འདི་བྲིས་དགེ་བའི་རྩ་བ་གང་མཆིས་དེས། །ཐུགས་རྗེ་ཆེན་པོའི་བསྟན་པ་འཕེལ་རྒྱས་ནས། །འདི་དང་འབྲེལ་བ་ཐོགས་ཚད་འགྲོ་བ་ཀུན། །བདེ་ཆེན་དག་པའི་ཞིང་དུ་སྐྱེ་གྱུར་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མངྒ་ལཾ། བྷ་ཝནྟུ། ཤུ་བྷཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
རི་མོ་ཡོད།