ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་རྒན་མོ་མཛུབ་ཚུགས།
ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་ཀྱི་རྒྱབ་ཆོས་རྒན་མོ་མཛུབ་ཚུགས་ཞེས་བྱ་བ་བཞུགས་སོ།།
ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ་འདིའི་རྒྱབ་ཆོས་ནི། སྔོན་དུ་སྐྱབས་འགྲོ་སེམས་བསྐྱེད་བཤད་ནས་དོན་གོ་བར་བྱས་ཏེ། དེ་ནས་སྡོམ་པ་ཞུས་པས་ཚད་ལྡན་སྐྱེ་བ་ཡིན་ལ། ལས་རྒྱུ་འབྲས་འདི་ལག་ཏུ་ལོན་དཀའ་བ་རྗེས་ནས་ནན་ཏན་དུ་བཤད་པ་དང་། གནས་འགྱུ་སྲུང་ཤེས་པ་དེ་ཐེ་ཚོམ་སྐྱེས་ནས་སྐྱུར་དོགས་ཡོད་པས་ངོ་སྤྲོད་ལ་ནན་ཏན་དང་། དེ་ཀ་སྐྱེད་འཕེལ་འབྱུང་བའི་ཕྱིར་བོགས་འདོན་དང་། གོ་བ་སྐྱེ་ཕྱིར་གཞི་ལམ་འབྲས་གསུམ་དང་། ཉམས་ལེན་བདེ་ཕྱིར་བསྡུ་དོན་རྣམས་ཡིན། དང་པོ་སྐྱབས་
སེམས་ཀྱི་སྡོམ་པ་ནི། སྐྱ་སེར་ཀུན་ལ་རུང་སྟེ། གཡས་ཕྱོགས་སུ་སངས་རྒྱས་ཀྱི་སྐུ་གཟུགས། དེའི་མདུན་དུ་མཆོད་པ་སྣ་བདུན་མཎྜལ་སོགས་བཤམས། རྒྱབ་ཆོས་འདི་ལ་ད་རེས་ཐེག་པ་ཆེན་པོའི་སྐྱབས་སྡོམ་ཡིན། མདུན་གྱི་ནམ་མཁར་རིན་པོ་ཆེའི་ཁྲི་པདྨ་དང་ཟླ་བའི་དབུས་སུ་འོད་དཔག་མེད་ལོངས་སྤྱོད་རྫོགས་པའི་སྐུའི་ཆ་ལུགས་སུ་བཞུགས་པ། ཕྱོགས་བཅུ་ན་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་སྤྲིན་ལྟར་གཏིབས་པ་ལྟར་བཞུགས་པའི་མོས་པ་མཛོད། ཆུ་ཟླ་བཞིན་དུ་གར་དམིགས་དེར་སྣང་བ་ཞེས་གསུངས།
ཐེག་པ་ཆེན་པོའི་སྐྱབས་སྡོམ་ཞུ་བསམ་པའི་འདུན་པ་རྩེ་གཅིག་པས་འདི་ཡི་རྗེས་ཟློས་ལན་གསུམ་གྱིས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཆགས་པ་དང་བྲལ་བ་རྣམས་ཀྱི་མཆོག །དམ་པའི་ཆོས་རྣམས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །འཕགས་པ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །ལན་གསུམ། ལེགས་སོ་ཟློས། སློབ་དཔོན་གྱིས་ཐབས་ཡིན་ནོ་བརྗོད། དེས་ཐེག་པ་ཆེན་པོའི་སྐྱབས་སྡོམ་ཐོབ་པ་ཡིན་ནོ། །དེ་ནས་ཐེག་པ་ཆེན་པོའི་སེམས་བསྐྱེད་ཞུ་བ་ལ། སྨོན་འཇུག་སྟབས་གཅིག་ཏུ་ལེན་པའི་ཆོ་ག །འཇམ་དབྱངས་ནས་ཀླུ་སྒྲུབ་ལ་བརྒྱུད་པ། སུ་ལ་ཡང་སྐྱེ་བ་ཡིན་པས། ད་རེས་དེའི་ལུགས་ཡིན། དེ་ལ་སེམས་བསྐྱེད་པའི་རྟེན་ཚོགས་བསགས་དགོས་ཏེ། ད་འདིའི་རྗེས་ཟློས་ལན་གསུམ་མཛོད། ཕྱག་འཚལ་བ་དང་མཆོད་ཅིང་བཤགས་
པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །དངོས་གཞི་ནི། བྱང་ཆུབ་ཏུ་སེམས་བསྐྱེད་སྙམ་པའི་རྗེས་ཟློས་ལན་གསུམ་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་དུས་དེང་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ། སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་འི་བསླེབ་པ་ལ། །དེ་དག་རིམ་བཞིན་བསླབ་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ལན་གསུམ། ལེགས་སོ་ཟློས། བདག་དགའ་བ་སྒོམ་པའི་རྗེས་ཟློས་མཛོད། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་།
པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་དེང་གྱུར། །སྨོན་པའི་བསླབ་བྱ་བསྡུས་པ་ནི། །སེམས་ཅན་གྱི་དོན་དུ་སངས་རྒྱས་ཐོབ་པར་བྱ་བསམ་པར་གྱིས་ལ་རྗེས་ཟློས་མཛོད། ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྟོགས་པར་མི་འགྱུར་དེ་ལྟར་བྱ། །གཞན་ལ་དགའ་བ་བསྒོམ་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱིས། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། །ད་སྨོན་ལམ་འདེབས་པ་འདི་ཡི་རྗེས་ཟློས་མཛོད། བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་ཀྱང་སྤོངས་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་
ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག་བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །འོ་དེས་བྱང་ཆུབ་སེམས་བསྐྱེད་ཀྱི་སྡོམ་པ་ཐོབ་པ་ཡིན་པས། ཕན་ཡོན་དུ་མ་ཞིག་ནམ་མཁའ་དང་མཉམ་པར་རབ་ཏུ་འབྱུང་། །ཞེས་གསུངས་སོ། །འདི་ཡི་བསླབ་བྱ་མདོར་བསྡུས་པ། དགེ་བའི་བྱ་བ་ཆེ་ཆུང་གང་བྱེད་ཀྱང་། རང་གི་དོན་ཁོ་ན་མ་ཡིན་པར། སེམས་ཅན་ཐམས་ཅད་ཀྱི་དོན་དུ་དམིགས་པ་དང་། རྗེས་ནས་ཀྱང་སེམས་ཅན་གྱི་དོན་བྱ་བའི་ཕྱིར། རང་ཉིད་མངོན་པར་རྫོགས་པར་སངས་རྒྱས་པར་བྱ་བསམ་པ་བྱས་ལ་བསྔོ་བ་སོགས་བྱ།། ༼༡༩༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ལས་རྒྱུ་འབྲས་གཏམ་རྒྱུད་མདོ་སྡེ་ལས་རྣམ་འབྱེད་ཀྱི་དོན་བསྡུས་ཏེ་བཤད་ན། བཤས་མང་དུ་བྱས་པ་ནི། རང་ཚང་མའི་སྒོ་ནོར་དུ་སྐྱེས་ནས་ལན་མང་དུ་བཤའ་བར་འགྱུར་རོ། །སྟོན་པ་ཤཱཀྱ་ཐུབ་པས། དཀོན་མཆོག་གསུམ་དང་ཕ་།
མ་མཁན་སློབ་ལ་བཀུར་སྟི་གལ་ཆེ་བར་གསུངས་ཏེ། ང་ལ་ཅི་ལྟར་བྱས་པ་དང་། ཕ་མ་དང་མཁན་པོ་དང་སློབ་དཔོན་ལ་ཅི་བྱས་པ། དེ་དག་ནི་བྱེ་བྲག་མེད་ཅིང་མཚུངས་ཏེ་ཚེ་འདི་དང་ཕྱི་མ་ལ་རྣམ་པར་སྨིན་པ་མི་མཉམ་པ་མེད་དོ། །ཞེས་བཅོམ་ལྡན་འདས་ཀྱིས་གསུངས་སོ། །ཁྱིམ་བདག་དབུལ་པོ་ཞིག་ཁྱིམ་ལ་སེམས་ཆགས་ཤིང་ཤི་ནས། ཁྱིམ་དེ་ལ་གླང་རྒལ་པ་ཅན་གཅིག་ཡོད་པའི་བུར་སྐྱེས་ཏེ། སྐྱེས་མ་ཐག་བྱ་རོག་གིས་ཟོས། དེ་ལྟར་ལན་བདུན་དེར་སྐྱེས་ཤིང་ཟོས་སོ། །སངས་རྒྱས་འོད་སྲུང་གི་ཚེ་དགེ་སློང་དགྲ་བཅོམ་པ་རྒན་པོ་སྐད་མི་སྙན་པ་ཞིག་དང་། གཞོན་ནུ་སྐད་སྙན་པ་གཉིས་འདོན་པ་དབྱངས་བྱེད་པ་དང་། གཞོན་པས་ཁྱེད་ཀྱིས་དབྱངས་ནི་ཁྱི་ཟུག་པ་དང་འདྲ་དོ་སྨྲས་པས། བཤགས་པོ་བྱས་ཀྱང་སྐྱེ་བ་ལྔ་བརྒྱ་ལ་ཁྱིར་སྐྱེས་ཏེ། མདོ་སྡེ་མཛངས་བླུན་ནས་གསུངས་པའི་དོན་བསྡུས་ཏེ་བཤད་ན། སྔོན་སངས་རྒྱས་འོད་སྲུང་གི་བསྟན་པའི་མཇུག་ཏུ། བྲམ་ཟེ་གཉིས་བསྙེན་གནས་བསྲུང་བ་ལ། གཅིག་གིས་རྒྱལ་པོར་སྐྱེ་བའི་སྨོན་ལམ་བཏབ་པས་རྒྱལ་པོར་སྐྱེས། གཅིག་གིས་ལྷར་སྐྱེ་བའི་སྨོན་ལམ་བཏབ་ཀྱང་དེ་ནུབ་ཆུང་མས་དགོང་མི་
ཟ་ཁ་མེད་བྱས་ནས་ཟོས་པས་ཀླུར་སྐྱེས། རྒྱལ་པོ་ཚངས་སྦྱིན་ཁྲོས་ཏེ་བཙོན་དུ་བཟུང་ནས་བསད་པར་ཤོམ་པ་བློན་པོས་རྒྱལ་པོ་ལ་ཞུས་ནས་མ་བསད་དེ་གཡོག་བྱེད་བཅུག །དེ་ལྟར་སྲོག་སྐྱབས་བྱས་པ་བློན་པོ་དེ་གར་སྐྱེས་ཀྱང་ཚེ་ལ་བར་ཆད་ཀྱིས་མི་ཚུགས་པར་དགྲ་བཅོམ་ཐོབ་བོ། །ཡང་སྔོན་སངས་རྒྱས་གསེར་ཐུབ་ཀྱི་བསྟན་པ་ལ། མི་དབུལ་པོ་ཞིག་གིས་དགེ་འདུན་ལ་དད་པས་ཕྱགས་དར་བྱས། སྤང་ནས་མེ་ཏོག་བཏུས་ཏེ་གཏོར་ནས་སྨོན་ལམ་བཏབ་པས། བསྐལ་པ་དགུ་བཅུ་རྩ་གཅིག་ཏུ་གར་སྐྱེས་ཀྱང་གཟུགས་བཟང་ཞིང་མཛེས་པ། བཟའ་བཏུང་ཁྲི་སྟན་ཕུན་སུམ་ཚོགས་པར་གྱུར་ཏེ་དགྲ་བཅོམ་ཐོབ་བོ། །ཡང་སྔོན་སངས་རྒྱས་གསེར་ཐུབ་ཀྱི་བསྟན་པ་ལ། མི་དབུལ་པོ་ཞིག་གིས་ཡིད་རང་ཞིང་རྡེའུ་དཀར་རྒྱུ་ལས་བྱས་པའི་ནོར་བུ་སྤར་གང་དགེ་འདུན་ལ་གཏོར་ཞིང་སྨོན་ལམ་བཏབ་པས་བསྐལ་པ་དགུ་བཅུ་རྩ་གཅིག་ཏུ་ནོར་བུ་དང་ཟས་གོས་དང་ལོངས་སྤྱོད་ལྷུན་གྱིས་གྲུབ་པར་གྱུར་ཏེ་དགྲ་བཅོམ་པ་ཐོབ་བོ། །རྒན་མོ་གཅིག་ཟས་གོས་ནི་མེད། རྒས་དྲགས་ཀྱང་ལས་ཀ་ནི་དགོས། འཆི་རྒྱུ་མེད་པ་སྙམ་ནས་ཆུ་ལེན་ས་ན་ངུ་འབོད་བྱེད་
ཅིང་ཡོད་ཛ། དེར་འཕགས་པ་ཀ་ཏ་ཡ་ན་བྱོན་ནས་ཆུ་ལྷུང་བཟེད་གང་ཕུལ་གསུངས་ནས་ཕུལ། དེ་ལ་བསྔོ་བ་ཤོ་ལོ་ཀ་གཅིག་མཛད་པས་ལྷའི་བུ་མོར་སྐྱེས་སོ། །སྔོན་སངས་རྒྱས་འོད་སྲུང་འདས་ནས་མཆོད་རྟེན་བརྩེགས། ཕྱིས་དེ་རྣམས་ཞིག །དགེ་སློང་ཞིག་ཡོད་པས་ཞིག་སོས་སྔར་བཞིན་བྱས་ནས་སྨོན་ལམ་བཏབ་པས། ཕྱིས་ཡུལ་དེར་སའི་རྒྱལ་པོ་ཀ་པི་ན་ཆེན་པོར་སྐྱེས་ཏེ། ཡོ་བྱད་བཏང་བ་ནི་དེ་འཁོར་རྒྱལ་ཕྲན་ཁྲི་བརྒྱད་སྟོང་དུ་སྐྱེས་ནས་ཤིན་ཏུ་སྟོབས་ཆེ། རྒྱལ་པོ་དེ་རབ་ཏུ་བྱུང་ནས་དགྲ་བཅོམ་པ་ཐོབ་བོ། །སྔོན་དགེ་སློང་ལྔ་བརྒྱ་དབེན་པ་བསྟེན་པ་ནི། དགེ་སློང་གཅིག་གིས་བསོད་སྙོམས་བྱས་ཏེ་འཚོ་བ་སྦྱར་བས། བསོད་སྙོམས་པ་དེས་བསྐལ་པ་དྲུག་ཅུ་རྩ་གཅིག་ཏུ་ལྷ་དང་མིའི་ལོངས་སྤྱོད་ཆེན་པོར་གྱུར། ཕྱིས་བཅོམ་ལྡན་འདས་ལ་རབ་ཏུ་བྱུང་ནས་དགྲ་བཅོམ་ཐོབ་བོ། །མཉན་ཡོད་ན་བུད་མེད་བསྙེན་དགའ་མོ་ཞེས་བྱ་བ་དབུལ་ཞིང་འཕང་པ་ཞིག་སྤྲང་སྤྲང་བས་མར་ཅུང་ཟད་རྙེད་པ་བཅོམ་ལྡན་འདས་ལ་མར་མེ་ཆུང་ངུ་གཅིག་བྱས་ཏེ་ཕུལ་བ་མར་མེ་འཛིན་ནས་ཕྱིར་ནངས་མ་དམའ། སངས་རྒྱས་མར་མེའི་འོད་དུ་ལུང་བསྟན་ནོ། །དགེ་སློང་
སར་པས་དགེ་སློང་གཅིག་ཡུར་བ་ལ་མཆོང་བ་ལ། མཆོང་རྐྱེན་སྤྲེའུར་དང་འདྲ་དོ་སྨྲས་པ་ལ། བཤགས་པ་བྱས་ཀྱང་སྐྱེ་བ་ལྔ་བརྒྱར་སྤྲེའུ་སྐྱེས་ཏེ། ངག་འཁྱལ་བསྲུང་བ་གལ་ཆེ་གསུངས་སོ། །ཡང་བཅོམ་ལྡན་འདས་ཀྱིས་ཆོས་གསུངས་པའི་ཚེ་ནམ་མཁའ་ལ་ངང་པ་ལྔ་བརྒྱ་འཕུར་བས་ཐོས་ནས་ཡིད་དགའ་སྟེ་འབབ་འདོད་པ་ལ་རྔོན་པས་རྒྱ་བྲེས་ཏེ་ཟིན་ནས་བསད་མ་ཐག་སུམ་ཅུ་རྩ་གསུམ་པའི་ལྷར་སྐྱེས། སེང་གེ་ཡི་དམ་བརྟེན་གྱིས་རྔོན་པ་ངུར་སྨྲིག་ཅན་ལ་གུས་པར་བྱས་པས་བསྐལ་པ་ཁྲི་ཕྲག་བཅུའི་བར་དུ་འཁོར་ལོས་སྒྱུར་རྒྱལ་དུ་གྱུར་ནས་མཐར་སངས་རྒྱས་སོ།། ༼༢༠༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། སྔོན་འགྲོ་ལ་ལས་རྒྱུ་འབྲས་ཆེ་ལོང་ཙམ་ཞིག་བཤད་མོད་ཀྱང་གོ་དཀའ་སྟེ། རོ་གཅིག་དུ་མར་ཤར་བའི་རྟོགས་པ་མ་འཁྲུངས་ཀྱི་བར་དུ། རྒྱུ་འབྲས་ཕྲ་ཞིབ་མི་ཕྱེད་པས། སྐྱེ་ཤི་འཁོར་བའི་ལེའུ་ལས། །ཁམས་གསུམ་གང་ན་སྐྱེས་སོ་ཅོག །སྐྱེས་སོ་ཅོག་ཀྱང་ལས་ཀྱི་དབང་། །ལས་སོ་ཅོག་ཀྱང་སྔོན་བྱས་དོན། །ཤིའོ་ཅོག་ཀྱང་ལས་ཀྱི་དབང་། །སྐྱེ་ཤི་ཆོས་ཀྱི་དུས་
བབ་ན། །གནམ་ས་རིམ་པའི་ལྷ་རྣམས་ལྟུང་། །འཕྲུལ་ཆེན་མཐུ་མང་འདུག་དབང་མེད། །ཅེས་གསུངས་སོ། །མདོ་སྡེ་ལས་རྣམ་འབྱེད་ལས། དེ་ལ་ངེས་པར་སྐྱེ་བར་འགྱུར་བའི་ལས་གང་ཞེ་ན། དགེ་བའི་ལས་གང་ཡིན་བྱས་ནས་འདིས་ནི་བདག་འདི་ལྟ་བུ་གཅིག་ཏུ་སྐྱེ་བར་གྱུར་ཅིག །ཅེས་ངེས་པར་བསྔོ་བ་དང་། མཚམས་མེད་པ་ལྔ་བྱས་པ་འདི་ནི་སྐྱེ་བར་འགྱུར་བའོ། །ཡང་དགེ་བའི་རྩ་བ་བསགས་ཀྱང་། ནམ་ཞིག་སྨིན་ནི་སྨིན་གྱི། སྨོན་ལམ་མ་བཏབ་ན་ཅི་ལྟར་སྨིན་ངེས་པ་མེད་དེ། ལས་རྣམ་འབྱེད་ལས། དེ་ལ་སྐྱེ་བར་འགྱུར་བ་མ་ངེས་པའི་ལས་གང་ཞེ་ན། དགེ་བའི་ལས་གང་བྱས་ནས་ཅིར་ཡོངས་སུ་མི་བསྔོ་བའོ། །དགེ་སྡིག་གང་ཡང་ལས་ཚབས་ཆེན་སྤྱད་ན། དགོངས་གཅིག་རྡོ་རྗེའི་གསུངས་ལས། ད་ལྟའི་ལས་འབྲས་ད་ལྟ་སྨིན་པ་ཡང་ཡོད་གསུངས། ལས་གང་ཡང་ཡུལ་འདིར་མི་སྨིན་པར་ཡུལ་གཞན་དུ་སོང་ན་སྨིན་པའང་ཡོད་དེ། སྡིག་པ་བྱས་ནས། དེ་ལ་འགྱོད་བཤགས་ཕྱིན་ཆད་མི་བྱེད་པར་བསྡོམ་ན། ལས་བྱས་ནས་མ་བསགས་པའོ། །དགེ་སྡིག་གང་ཡང་སེམས་ཀྱིས་ཚང་བར་བྱས་ཤིང་། ལུས་
ཀྱིས་ནི་མ་བྱས། ངག་གིས་ནི་མི་བྱའོ་སྨྲས་ན། བསགས་ལ་མ་བྱས་པའོ། །སྡིག་པ་མི་འཛེམ་འགྱོད་པ་མེད་པས་མི་བཤགས། །འཕྲོ་མི་གཅོད་ན་ལས་བྱས་ལ་བསགས་པའོ། །དགེ་སྡིག་མ་བྱས་པ་ནི། མབྱས་མ་བསགས་པའོ། །དམྱལ་བར་སྐྱེ་བའི་ལས་བྱས་ལ། མི་བཤགས་མི་འགྱོད་སྡོམ་པར་མི་བྱེད་པ་ནི། དམྱལ་བར་སྐྱེས་ནས་ཚེ་ཚད་མ་རྫོགས་ཀྱི་བར་དུ་མི་ཐར། ཅུང་ཟད་འཛེམ་པ་དང་བཤགས་པ་དང་བསྡོམས་པར་བྱས་ན། ཚེ་ཚད་ཕྱེད་རྫོགས་ནས་ཐར་རོ།། །ཤིན་ཏུ་འགྱོད་ནས་བཤགས་པ་ཆེན་པོ་དང་། ཕྱིན་ཆད་རབ་ཏུ་བསྡོམས་ན། དམྱལ་བར་སྐྱེས་མ་ཐག་ནས་ཐར་རོ། །སྦྱིན་པ་ལ་སེམས་དགའ་ཞིང་སྦྱིན་པ་དང་འབུལ་བ་སོགས་བྱས་ནས། རྗེས་ནས་སེར་སྣ་སྐྱེས་ཏེ་འགྱོད་པ་སྐྱེས་ན། ཕྱུག་པོ་ལོངས་སྤྱོད་ཅན་གྱི་བུར་སྐྱེས་ཏེ་ཚེ་སྟོད་བདེ་སྐྱིད་ལོངས་སྤྱོད་ཆེ་ཞིང་། ཚེ་སྨད་དབུལ་ཕོངས་སྡུག་བསྔལ་ཅན་དུ་འགྱུར། དང་པོ་མི་འདོད་ཅིང་། ཚར་ནས་སེམས་དགའ་ཞིང་འགྱོད་པ་མེད་ན། མི་དབུལ་པོའི་བུར་སྐྱེས་ཏེ། དཀའ་ལས་ཆེན་པོ་ཟོག་བཙལ་བས་རྙེད་དེ། དེ་འཕེལ་ཞིང་རྒྱས་ནས་ཚེ་སྨད་ཕྱུག །
སྦྱིན་པ་དང་དབུལ་བ་སོགས་དང་པོ་ཡིད་དགའ་ཞིང་དད་པའི་སྒོ་ནས་བྱས། རྗེས་ནས་སེར་སྣའི་འགྱོད་པ་མ་ཤོར་ན། ཕྱུག་པོའི་བུར་སྐྱེ་སྟེ། ལོངས་སྤྱོད་འཕེལ་ཞིང་རྒྱས་ནས་མི་ཚེར་ཕྱུག །འབུལ་བ་དང་ནི་སྦྱིན་པ་གཅིག་ཀྱང་མ་བྱས་ལ། གདན་གཅིག་སོགས་སྡོམ་པ་ཅུང་ཟད་བསྲུང་ན། མི་དབུལ་པོའི་ཁྱིམ་དུ་སྐྱེས་ཏེ། མི་ཚེ་ལ་ལྟོགས་ཤིང་དབུལ་ནས་སྡུག་བསྔལ་བར་འགྱུར་རོ། །ཞིང་དག་པ་ལ་འབུལ་བ་དང་སྦྱིན་པ་ཆེན་པོ་བྱས་ན། ཕྱུག་པོར་གྱུར་ནས་སེར་སྣ་ཆུང་ཞིང་ཆོས་ཕྱོགས་ལ་གཏོང་ནུས་པ་འབྱུང་། འབུལ་བ་དང་སྦྱིན་པ་ཆུང་ངུ་བྱས་པས། ཕྱུག་པོར་གྱུར་ཀྱང་སེར་སྣ་ཆེ་བས། ཆོས་ཕྱོགས་སུ་གཏོང་མི་ནུས་པ་འབྱུང་། ཞིང་མ་དག་པ་ལ་འབུལ་བ་དང་སྦྱིན་པ་མང་དུ་བྱས་པས་ལོངས་སྤྱོད་ཆེན་པོ་མེད་པར་འགྱུར་ཞིང་ཅི་ཡོད་ཆོས་ལ་གཏོང་ནུས་ཏེ་ཟད་ཅིང་དབུལ་པོར་འགྱུར་རོ། །ཚོགས་ཆེན་པོ་བསགས་པའི་སོ་སོའི་སྐྱེ་བོ་ནི། རྒྱལ་པོ་ཆེན་པོར་སྐྱེས་ཏེ། དེའི་ལུས་ནི་བདེ་སྟེ། སེམས་ནི་མི་བདེ། བསོད་ནམས་མ་བསགས་པ་ལ་རྟོགས་པ་མཆོག་ཐོབ་པ། ལུས་མི་བདེ་བ་སེམས་བདེ་བ་ཡིན་ནོ། །སྔོན་ཚོགས་བསགས་ཤིང་ད་ལྟ་
རྟོགས་པ་མཆོག་ཐོབ་པ་ནི། ལུས་སེམས་གཉིས་ཀ་བདེ་བ་དང་ལྡན་ནོ། །སྔོན་ཚོགས་ཀྱང་མ་བསགས་ད་ལྟར་རྟོགས་པ་ཡང་མི་ཐོབ་པ་ནི། ལུས་སེམས་གཉིས་ཀ་མི་བདེ་སྟེ། འགྲོ་བ་རིགས་དྲུག་གང་ཡང་འདྲ་སྟེ། ཤི་ནས་ཡང་དེར་སྐྱེ་དགོས་པ་ནི། ཚེ་ཟད་ཀྱང་ལས་མ་ཟད་པའོ། །དང་པོ་བདེ་སྐྱིད་ལྡན་པ་ལ་ཚེ་སྨད་ནས་སྡུག་བསྔལ་ཅན་དུ་གྱུར་པ་དང་། ཚེ་སྟོད་དབུལ་ཕོངས་སྡུག་བསྔལ་ཅན་ཡིན་པ་ལ། ཚེ་སྨད་བདེ་སྐྱིད་ལོངས་སྤྱོད་ཅན་དུ་གྱུར་པ་ནི། ལས་ཟད་ལ་ཚེ་ཟད་པའོ། །ཤི་ནས་དེར་མི་སྐྱེ་བར་རིགས་དྲུག་གཞན་ཞིག་ཏུ་སྐྱེ་བ་ནི། ཚེ་ཡང་ཟད་ལ་ལས་ཀྱང་ཟད་པའོ། །དགྲ་བཅོམ་པའམ། རང་སངས་རྒྱས་ཐོབ་པ་ནི། ཚེ་མ་ཟད་ལས་མ་ཟད་ཉོན་མོངས་པ་ཟད་པའོ། །ངན་སོང་གི་ལུས་སུ་སྐྱེས་ན་ཡང་། གཟུགས་མཛེས་ཤིང་ཡིད་དུ་འོང་བ་ནི། ཞེ་སྡང་གི་ཀུན་ནས་བསླང་ནས་ཚུལ་ཁྲིམས་བསྲུང་བའོ། །མདོག་ངན་ཞིང་གཟུགས་མི་སྡུག་པ་ནི། ཞེ་སྡང་གིས་ཀུན་ནས་བསླང་ནས་ཚུལ་ཁྲིམས་འཆལ་པའི་ལས་འབྲས་སོ། །དུད་འགྲོ་སོགས་དྲི་མི་ཞིམ་དབང་པོ་མི་གསལ་བ་ནི། གཏི་མུག་གི་སྒོ་ནས་ཚུལ་
ཁྲིམས་འཆལ་པའི་ལས་འབྲས་སོ། །གཞན་ལ་གནོད་པའི་བསམས་པས། དགེ་བ་བྱས་པ་ནི་དགེ་བའི་ལས་ལ་འབྲས་བུས་སྡུག་བསྔལ་འབྱུང་བའི་ལས་སོ། །བྱང་ཆུབ་སེམས་ཀྱིས་ཀུན་ནས་བསླང་ནས། རྩ་བ་བཞི་སོགས་མི་དགེ་བ་བྱེད་པ་ནི། སྡིག་པའི་ལས་ལ་འབྲས་བུ་བདེ་བ་འབྱུང་སྟེ། དཔེར་ན་གསང་སྔགས་ཀྱི་སྦྱོར་སྒྲོལ་སོགས་ཀྱང་འདི་ལ་དགོངས་པའོ། །སྡིག་པའི་སེམས་ཀྱིས་སྡིག་པའི་ལས་ལ་འབྲས་བུ་སྡུག་བསྔལ་འབྱུང་བ་ཉིད་དོ། །བསམ་པ་བྱང་ཆུབ་སེམས་ཀྱི་དགེ་བ་བསྒྲུབ་པ་ནི། དགེ་བའི་ལས་ཀྱི་འབྲས་བུས་བདེ་བ་འབྱུང་སྟེ། ཀུན་བསླང་མུ་བཞི། བསམ་པ་དགེ་བས་སྦྱོར་བ་སྡིག་པ་སྤྱད་ན། མཐོ་རིས་སུ་སྐྱེས་ཀྱང་དབུལ་ཕོངས་དང་། དཀའ་ལས་སྐྱིད་སྡུག་དང་། ན་ཚ་སོགས་སྡུག་བསྔལ་མྱོང་། བསམ་པ་སྡིག་པའི་ལས་ཀྱིས་སྦྱོར་བ་དགེ་བ་བྱས་ན། ངན་སོང་དུ་སྐྱེས་ཀྱང་ལོངས་སྤྱོད་དང་ལྡན་པ་སྟེ། ཀླུའི་རྒྱལ་པོ་ལྟ་བུའོ། །སྡིག་པའི་བསམ་པས་སྡིག་པ་བསགས་ན། ངན་སོང་དུ་སྐྱེས་ནས་སྡུག་བསྔལ་ཚབས་ཆེན་མྱོང་སྟེ། བསམ་པ་དགེ་བས་སྦྱོར་བ་དགེ་བ་སྤྱད་ན། མཐོ་རིས་སུ་སྐྱེས་ནས་བདེ་སྐྱིད་ཕུན་སུམ་ཚོགས།
ཞིང་དག་པ་ལ་བསམ་པ་ངན་པས། གནོད་པའི་མི་དགེ་བ་ཆུང་ངུ་བྱས་ཀྱང་། འབྲས་བུ་སྡུག་བསྔལ་རྒྱ་ཆེན་པོ་མྱོང་དགོས། ཞིང་དག་པ་ལ་བསམ་པ་དད་གུས་ཀྱིས་བཀུར་སྟི་སོགས་དགེ་བ་ཅུང་ཟད་བྱས་པས། འབྲས་བུ་བདེ་སྐྱིད་རྒྱ་ཆེན་པོ་འབྱུང་། སྡིག་པའི་ལས་ལ་འགྱོད་པ་དང་བཤགས་པ་དྲག་པོས་དེ་རྩ་བ་ནས་དག་ཐུབ་ན་མ་གཏོགས། དུས་ནམ་ཞིག་བསླུ་བ་མེད་པར་ངེས་པར་རང་གིས་མྱོང་དགོས་ཏེ། འདུལ་བ་ལུང་ལས། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་ཞིང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ཅེས་གསུངས། སྡིག་པ་བྱས་ནས་བཤགས་པ་མ་བྱས་ན། ཞག་རེ་སོང་ཞིང་སྐྱེད་རེ་འགྱུར་བས། སྡིག་པ་ཆུང་ཡང་ཆེན་པོར་འགྱུར། བཤགས་པ་བྱས་ན་རྩ་བ་ནས་མ་དག་ཀྱང་སྐྱེད་དེ་མི་འགྲོ། སྔོན་ལ་གང་སྨིན་ཞེ་ན། སྟོབས་གང་ཆེ་བ་དེ་སྔོན་ལ་སྨིན། དགེ་སྟོབས་སྡིག་སྟོབས་གཉིས་མཉམ་ན། གོམས་པའི་གཤིས་གང་ཆེ་བ་སྔོན་ལ་སྨིན། དེ་ཡང་མཉམ་ན་འཆི་ཁའི་སེམས་ལ་གང་གསལ་བ་དེ་སྔོན་ལ་སྨིན་ཏེ། སྡིག་པ་བྱས་པ་
རྣམས་བདེ་སྐྱིད་ལྡན་པ་ནི། ཚེ་སྔ་མ། དགེ་བ་བྱས་པའི་འབྲས་བུ་ཚེ་འདིར་སྨིན་ནས། བསོད་ནམས་ཐམས་ཅད་ཚེ་འདིར་རྫོགས་ཏེ། ཕྱི་མ་ཐར་མེད་པའི་གནས་སུ་འགྲོ། །དེ་ལ་ཚེ་འདི་ཝ་ཟེར། ཡང་ཆོས་དང་དགེ་བ་བྱས་པས་ཚེ་འདིར་སྡུག་བསྔལ་འབྱུང་བ་ནི། སྐྱེ་བ་སྔ་མ་སྡིག་པ་བྱས་པའི་འབྲས་བུ་ཚེ་འདིར་མྱོང་བ་ཡིན་ལ། ཚེ་འདིར་དགེ་བ་དང་ཆོས་བྱས་པའི་འབྲས་བུ་མ་འོངས་པའི་ཚེ་རབས་རྣམས་སུ་བདེ་སྐྱིད་རྒྱ་ཆེན་པོ་ཐོབ་པར་འགྱུར། ཆོས་བསྒྲུབ་པའི་ཉམས་ལེན་རྩེ་གཅིག་བྱས་པའམ། དགེ་བའི་རྩ་བ་རླབས་པོ་ཆེ་བསྒྲུབས་པས། ཚེ་རབས་སྐྱེ་བ་སྔ་མའི་ལས་ངན་སྡིག་སྒྲིབ་ཅི་ཡོད་བླངས་ནས། ཚེ་རབས་གཞན་དུ་ངན་སོང་གི་སྡུག་བསྔལ་རྒྱ་ཆེན་པོ་མྱོང་རྒྱུ་ཐམས་ཅད། ཚེ་འདིར་ནད་ཀྱིས་མནར་བ་ཙམ་གྱིས་བྱང་བར་གྱུར་ནས། ཚེ་ཕྱི་མ་ཕན་ཆད་བདེ་བ་ནས་བདེ་བའི་མཆོག་ཐོབ། མྱ་ངན་འདས་མདོ་ལས། དམ་པའི་ཆོས་འདོད་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི་སྡིག་པའི་ལས་གྲངས་མེད་པ་བྱས་པ་རྣམས། ཀླད་པ་ན་བ་དང་། རིམས་ཀྱིས་བཏབ་པ་དང་། ནད་དང་ཟུག་རྔུ་དང་། གཞན་གྱིས་སྐུར་པ་བཏབ་པ་ཙམ་གྱིས་
བྱང་བར་འགྱུར་ལ་མྱུར་དུ་བླ་ན་མེད་པའི་བྱང་ཆུབ་ཀྱང་ཐོབ་པར་འགྱུར་རོ། །ཞེས་གསུངས་སོ། །ཨོ་རྒྱན་རིན་པོ་ཆེའི་ཞལ་ནས། གསང་སྔགས་ཀྱི་བསྒྲུབ་པ་ཟབ་མོ་རྣམས་བྱས་པས། ནད་དང་སྡུག་བསྔལ་སོགས་མི་ཤིས་པ་མང་པོ་བྱུང་བ་ནི། སྣོད་བཀྲུས་པས་དྲི་མ་ལྡང་བ་ལྟར། སྒྲིབ་པ་དག་པའི་ལས་སློང་ཡིན་ཚུལ་རྒྱ་ཆེར་གསུངས། ཡང་མི་ཚེར་ཆོས་དང་བསྒྲུབ་པ་རྩེ་གཅིག་བྱས། ཉམས་རྟོགས་བཟང་པོ་ཡོད་པའི་ས་གནས་ཀྱི་སེམས་དཔའ་ཆེན་པོ་རྣམས་ཀྱང་། འདས་ཁ་གནད་གཅོད་ཀྱི་སྡུག་བསྔལ་དྲག་པོ་ཡུན་རིང་དུ་སྦྱངས་པ་དང་། བཟོད་གླགས་མེད་པའི་ཟུག་ཟེར་དྲག་པོ་འབྱུང་བ་ནི། ལས་ཀྱི་སྒྲིབ་པའི་ལྷག་མ་ཅི་ཡོད་པ་ཐམས་ཅད་འཆི་ཁ་དེར་སྦྱངས་ནས། འཆི་བ་ཆོས་ཀྱི་སྐུར་སངས་རྒྱས་པའམ། དག་པའི་ཞིང་ཁམས་སུ་གཤེགས་པའི་སྔ་ལྟས་ཡིན། རྗེ་བཙུན་མི་ལ་ལ་གསོལ་བའི་ཟུག་གཟེར་དྲག་པོ་བྱུང་། རྗེ་ཕག་གྲུ་དང་། འབྲོམ་སྟོན་པ་སོགས་ལ་མཛེ་ནད་བྱུང་། དོན་དེ་འདྲ་ལ་དགོངས་ནས། རྗེ་དེ་བཞིན་གཤེགས་པས། ངན་སོང་གསུམ་སོགས་མི་ཟད་འཁོར་བ་ཡི། །མི་ཁོམ་འཇིག་རྟེན་རྣམས་སུ་སྐྱེ་
འགྱུར་ལས། །གང་དེ་ཚེ་འདི་ཉིད་ལ་རབ་སྨིན་ནས། །ལན་གྲངས་གཞན་དུ་མྱོང་བར་མ་གྱུར་ཅིག །ཅེས་སྨོན་ལམ་འདེབས་པ་མཛད་ནས་འགྲུབ་པ་སྟེ། སྣེའུ་རྫོང་ནག་པས་དབུ་བསིལ་བ་ཡང་མཁྱེན་བཞིན་དུ་དེར་བྱོན་པ་ལྟ་བུའོ། །དེས་ན་ཆོས་པ་རྣམ་དག་ལ་འཆི་ཁའི་མཚམས་སྦྱོར་ངན་པ་བྱུང་ཡང་ངན་པའི་ངེས་པ་མེད་དེ། བྱང་ཆུབ་སེམས་དཔའ་མེ་ཏོག་ཟླ་མཛེས་ཉེས་མེད་དུ་བཀྲོངས་བས། ཀ་ལིང་ཀའི་རྒྱལ་པོས་ང་ཡི་ཡན་ལག་དང་ཉིང་ལག་བཅད་ཀྱང་། ཞེ་སྡང་གི་རྟོག་པ་མ་བྱུང་གསུངས་པ་ལྟ་བུའོ། །ཚེ་སྔ་མའི་ཡང་སྔ་མ་དགེ་བའམ་སྡིག་པ་ཚབས་ཆེན་ཞིག་བྱས་པ། ཚེ་འདི་ལ་ངེས་པར་སྨིན་དགོས་པ་ཅིག་ཡོད་ན། ཚེ་འདིར་ཚེ་རིང་བ་དང་ནད་མེད་པའི་སྔོན་གྱི་ལས་སྨིན་པ་དེ་ལ། མུ་སྟེགས་དང་བོན་གྱི་དྲང་སྲོང་དམོད་པ་གྲུབ་པ་སྟོང་གིས་བྲུབ་ཀྱང་གནོད་མི་ནུས། ལོངས་སྤྱོད་དང་མངའ་ཐང་ཆེ་བའི་ལས་སྨིན་པ་དེ་ལ། ཕྱོགས་བཞི་ནས་དགྲ་ལངས་ཀྱང་དེའི་མངའ་ཐང་འཕྲོག་པར་མི་ནུས། ཚེ་ཐུང་ནད་མང་བའི་ལས་སྨིན་པ་དེ་དྲང་སྲོང་བདེན་ཚིག་གྲུབ་པ་སྟོང་གིས་བསྲུང་བར་བྱས། འཚོ་མཛད་གཞོན་ནུ་སྨན་པ་བོས་ཀྱང་མི་ཕན། །
ལོངས་སྤྱོད་དང་མངའ་ཐང་ཉམས་པའི་ལས་སྨིན་པ་དེ་ལ། ཟས་ནོར་ལོངས་སྤྱོད་ཐམས་ཅད་གྲམ་གསེང་དུ་ཆུ་བླུགས་པ་དང་འདྲ། སྙིང་དང་འདྲ་བའི་ཉེ་དུ་དང་། འཁོར་གཡོག་རྣམས་དགྲ་དང་བསྡོང་ནས་འོང་བ་ཡིན། དེ་ནི་དཀོན་མཆོག་གི་ཐུགས་རྗེས་ཡང་མི་སྐྱོབས་པས། གཞན་གྱིས་སྐྱོབ་པ་ལྟ་ཅི་སྨོས་ཏེ། སྔགས་ཀྱི་ཕན་ཡོན་ཀུན་ལ་ཡང་། སྔོན་གྱི་ལས་ཀྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ། །ཞེས་གསུངས། སྡིག་པ་ཚབས་ཆེན་དང་། དགེ་བ་ཚབས་ཆེན་ནི། སྐྱེ་བ་སྔོན་གཞན་གྱི་བར་མཚམས་མི་ཆོད་པར་སྐྱེ་བ་རྒྱབ་རེས་ངེས་པར་སྨིན་པས། མཚམས་མེད་པ་དགེ་སྡིག་འབྲིང་ཙམ་རྣམས་ནི། སྐྱེ་བ་རྒྱབ་མའི་རྒྱབ་མ་ངེས་པར་སྨིན་པ་ནི། སྐྱེ་གནས་མྱོང་འགྱུར་གྱི་ལས་སོ། །དགེ་སྡིག་ཆུང་ངུ་གང་ཡང་རྐྱེན་གྱིས་བསྐུལ་ན་ཚེ་འདིར་སྨིན་ཡང་སྲིད། རྐྱེན་དང་མ་འཕྲད་ན་བསྐལ་པ་བརྒྱ་སྟོང་དུ་ལུས་ཀྱང་སྲིད། ཆུད་མི་ཟ་བར་ནམ་ཞིག་ངེས་པར་སྨིན་དགོས་པ་ནི། ལན་གྲངས་གཞན་དུ་མྱོང་གྱུར་གྱི་ལས་ཏེ། ཚེ་ཐུང་ནད་མང་སོགས་ལས་ངན་གདོན་གྱིས་བསྐུལ་ནས། ཚེ་འདིར་སྨིན་པ་ལས་རིམ་གྲོ་དང་སྨན་
དཔྱད་ཀྱིས་ཟློག །ཚེ་རིང་ནད་མེད་ལོངས་སྤྱོད་ཆེ་བའི་ལས། འཇིག་རྟེན་གྱི་ལྷ་མཆོད་ཅིང་བསྒྲུབས་པས་ཚུར་འཐེན་ནས་ཚེ་འདི་ལ་སྨིན། ཡེ་ཤེས་ཀྱི་ལྷའི་དངོས་གྲུབ་ནི་དེ་ལྟར་མ་ཡིན་ཏེ། ལྷ་དེའི་སྔོན་གྱི་སྨོན་ལམ་དང་ཐུགས་རྗེའི་སྟོབས་ལས་བྱུང་བའོ། །མྱོང་བར་མ་ངེས་པའི་ལས་ནི། དགྲ་བཅོམ་པའི་རྒྱུད་ཀྱི་ལས་ལྟ་བུ་གསུང་སྟེ། དཔེར་ན་ཤཱཀྱ་ཐུབ་པ་སངས་རྒྱས་མ་སྔ་ན། འཁོར་ལོས་སྒྱུར་བའི་རྒྱལ་པོ་ལྔ་བརྒྱར་སྐྱེ་དགོས་པ། དེར་སྐྱེ་ལོང་མ་བྱུང་བར་སངས་རྒྱས་པས། དེའི་བསོད་ནམས་ཉན་ཐོས་རྣམས་ཀྱི་འཚོ་བ་ལ་བསྔོ་བར་མཛད་པས། མུ་ཏིག་བྲེ་གང་གིས་འབྲས་བྲེ་གང་ལས་མི་ཁུག་པའི་དུས་བྱུང་ཡང་། ངའི་ཉན་ཐོས་རྣམས་འཚོ་བས་མི་འཕང་གསུངས་པས། རང་རེ་རབ་ཏུ་བྱུང་བ་རྣམས་སྡོམ་པ་དམ་ཚིག་གཙང་མ་བསྲུང་བ་ན། ཆོས་བརྒྱག་གི་ཐབས་མི་ཆགས་པའི་གནད་ཆེན་པོ་གཅིག་འདི་ཡིན་ནོ། །འདོད་ཁམས་ཀྱི་དགེ་བ་ནི། བསོད་ནམས་ཀྱི་ལས་ཡིན། འདོད་ཁམས་ཀྱི་མི་དགེ་བ་ནི་བསོད་ནམས་མ་ཡིན་པའི་ལས་ཡིན། གཟུགས་ཁམས་དང་གཟུགས་མེད་ཀྱི་དགེ་བ་ནི་མི་གཡོ་བའི་ལས་ཡིན་ནོ། །ཁམས་གོང་མའི་དགེ་
བ་ནི་གཅིག་ཏུ་དཀར་བའི་ལས། འདོད་པའི་མི་དགེ་བ་ནི་གཅིག་ཏུ་མནག་པའི་ལས། འདོད་པའི་དགེ་བ་ནི་འདྲེས་པའི་ལས་སོ། །ཟག་མེད་ཀྱི་དགེ་བ་ནི་རྣམ་སྨིན་ཟད་བྱེད་ཀྱི་ལས་ཡིན་ཏེ། དེད་དཔོན་སྙིང་རྗེ་ཆེན་པོས་མི་ལྔ་བརྒྱའི་སྲོག་ཤུགས་པའི་ཕྱིར། བདུད་མི་ནག་མདུང་ཐུང་ཅན་བསད་པ་དང་། ལྷ་ལུང་དཔལ་གྱི་རྡོ་རྗེས་བསྟན་པའི་དོན་དུ་རྒྱལ་པོ་གླང་དར་བསད་པ་ལྟ་བུ་ནི། བསམ་པ་དཀར་ལ་སྦྱོར་བ་ནག་པའི་ལས་སོ། །སྲོག་གཅོད་པའི་ཕྱིར་སྦྱིན་པ་བཏང་བ་ལྟ་བུ་ནི། བསམ་པ་ནག་ལ་སྦྱོར་བ་དཀར་བའི་ལས་སོ། །བསམ་པ་དག་པས་སྦྱིན་པ་བཏང་བ་ལྟ་བུ་ནི། བསམ་པ་དཀར་ལ་སྦྱོར་བ་དཀར་བའི་ལས་སོ། །ཤ་ཟ་བའི་ཕྱིར་སྲོག་གཅོད་པ་ལྟ་བུ་ནི། བསམ་པ་ནག་ལ་སྦྱོར་བ་ནག་པའི་ལས་སོ། །ཡང་འདོད་པའི་ཁམས་ནས་བསམ་གཏན་གསུམ་པའི་བར་གྱི་དགེ་བའི་ལས་ནི། བདེ་བ་མྱོང་གྱུར་གྱི་ལས་སོ། །འདོད་པའི་ཁམས་ཀྱི་མི་དགེ་བ་ནི་སྡུག་བསྔལ་མྱོང་འགྱུར་གྱི་ལས་སོ། །བསམ་གཏན་གསུམ་པ་ཡན་ཆོད་དགེ་བ་ནི། བཏང་སྙོམས་མྱོང་འགྱུར་གྱི་ལས་སོ། །ཡང་ཟག་བཅས་ཟག་མེད་ཀྱི་
དགེ་བ་བཅུ་ནི་དགེ་བའི་ལས། མི་དགེ་བ་བཅུ་ནི་མི་དགེ་བའི་ལས། ཐར་པ་དང་མྱ་ངན་ལས་འདས་པ་ནི། ལུང་མ་བསྟན་གྱི་ལས། ཡང་ཁམས་གོང་གི་ཉོན་མོངས་པ་ཅན་གྱི་ལས་ནི། སྒྲིབ་པ་ཅན་གྱི་ལུང་མ་བསྟན་གྱི་ལས་སོ། །བཟོ་བྱེད་པ་ལྟ་བུ་ནི། མ་བསྒྲིབས་ལུང་མ་བསྟན་གྱི་ལས། སྣོད་ཀྱི་འཇིག་རྟེན་གྲུབ་བྱེད་ཀྱི་ལས་ནི། སེམས་ཅན་སྤྱི་མཐུན་ཐུན་མོང་གི་ལས་སོ། །བཅུད་ཀྱི་སེམས་ཅན་གྲུབ་བྱེད་ཀྱི་ལས་ནི། ཐུན་མོང་མ་ཡིན་པའི་ལས་སོ། །མདོར་བསྡུས་ན། བདག་གི་དོན་དུ་དཀོན་མཆོག་དང་སེམས་ཅན་ལ་གནོད་པ་བྱེད་པའི་ནང་དུ་མི་དགེ་བ་ཐམས་ཅད་འདུས། དཀོན་མཆོག་དང་སེམས་ཅན་ལ་བདག་གི་ཕན་པ་དང་བདེ་བ་བསྒྲུབ་པའི་ནང་དུ་དགེ་བ་ཐམས་ཅད་འདུས་ཏེ། ། ༈ དེ་ཡང་མི་དགེ་བ་ལས་སྡུག་བསྔལ་ཐམས་ཅད་འབྱུང་བས་སྡུག་བསྔལ་གྱི་རྒྱུ་མི་དགེ་བ་ཆུང་ངུ་ནས་སྤངས་དགོས་སྙམ་དུ་བསམ་པ་དང་། བདེ་བ་མཐའ་དག་དགེ་བ་ལས་འབྱུང་བ་ཆུང་ངུ་ནས་རྒྱ་ཆེན་པོ་བསགས་དགོས་སྙམ་དུ་བསམ་ནས་ཉིན་མཚན་ཐམས་ཅད་དུ་སྡིག་པ་བཤགས་ཤིང་སྤང་བ་དང་དགེ་བ་ནན་ཏན་དུ་བསྒྲུབ་པར་བྱའོ།། ༢༡༽ ཐུགས་
རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རང་གི་སེམས་ཉིད་ཆོས་སྐུར་དཔེ་དང་དོན་སྦྱར་ཏེ་ངོ་སྤྲད་པ་ནི། ཨོ་རྒྱན་གྱི་ཡུལ་དབུས་སུ་རྒྱལ་པོ་ནམ་མཁའི་སྙིང་པོ་ཞེས་བྱ་བ། སྲས་རྒྱལ་བུ་འོད་ཟེར་བྱ་བ་བློན་པོ་རིག་པ་ཅན། ཉི་མའི་འོད་ཟེར་བྱ་བ། རྒྱལ་བུ་འོད་ཟེར་ལྟད་མོ་གཟིགས་སུ་བྱོན་པ་ལས། འཁྱམས་ཏེ། རང་ཡུལ་བརྗེད། གྲོང་ཁྱེར་ཐམས་ཅད་ཀྱི་སྒོར། སྤང་ཟས་ཟོས། སྤང་གོས་ངན་པ་གྱོན། སྤང་སྒོ་སྒོ་ཁང་ཀུན་ཏུ་ཉལ། ལོ་ཟླ་མང་པོ་ལོན། རྒྱལ་སྲིད་ཀྱང་རྒྱལ་བུ་གཏོར་བས་ཞིག་ཏུ་ཉེ། བློན་པོ་རིག་པ་ཅན་ཉི་མའི་འོད་ཟེར་ཅན་གྱི་སྒོ་རྩར་འཁོར་བ་ལ། འོ་སྔོན་ངེད་ཀྱི་རྒྱལ་བུ་གཏོར་བ་འདི་བྱུང་། ཕོ་བྲང་དུ་འདོངས་ཟེར་ཏེ་ཁྲིད་པ་ལས། ང་ནི་རྒྱལ་བུ་མ་ཡིན་ནོ། །དྲན་པ་རྙེད་ནས་སྤྲང་པོ་ཁོ་ན་ཡིན་ཏེ། ཕོ་བྲང་དུ་ཁྲིད་ཀྱང་རྒྱལ་པོ་མི་གཏུབ། མི་འགྲོ་ཟེར་བ་ལ། གལ་ཏེ་ཁྱོད་རྒྱལ་བུ་མ་ཡིན་ན། ཁྱེད་ཀྱི་ཡུལ་གང་ཡིན། ཕོ་བྲང་གང་ཡིན། གྲོང་གང་ཡིན། ཁྱིམ་གང་ཡིན། རིགས་གང་ཡིན། ཕ་མ་གང་ཡིན། འཁོར་གང་ཡིན། བྱེད་སྤྱོད་གང་ཡིན་དྲིས་
པས། སྤྲང་པོས་སྨྲ་རྒྱུ་མ་རྙེད། འོ་ན་ང་ཡི་ཡིན་ལུགས་ཞིབ་ཏུ་སྨྲོས་ལ་སྤྱོད་ཅིག །བློན་པོས་དེ་ཐམས་ཅད་བརྗོད་དེ། རྒྱལ་སྲིད་གཏད། ཡབ་འདྲ་བར་གྱུར་ཏེ། བདེ་སྐྱིད་ཕུན་སུམ་ཚོགས་པར་གྱུར་སྐད། རྒྱལ་བུས་རང་རྒྱལ་བུ་ཡིན་པར་མ་ཤེས་ནས་སྤྲང་པོར་གྱུར་པ་ལྟར། རང་གི་སེམས་ཉིད་ཆོས་སྐུ་ཡིན་པར་ངོ་མ་ཤེས་ནས་འཁོར་བར་འཁྱམ་པ། བློན་པོས་རྒྱལ་བུ་ངོ་ཤེས་ནས་རྒྱལ་སར་བཏོན་པ་ལྟར། བླ་མས་སེམས་ཉིད་ཆོས་སྐུར་ངོ་སྤྲད་པས། འཁོར་བའི་སྡུག་བསྔལ་ལས་ཐར་ནས་སངས་རྒྱས་ཀྱི་ཡོན་ཏན་ཐོབ་པའོ། །སྔོན་རྒྱ་གར་གྱི་ཡུལ་ན། དེད་དཔོན་གཅིག་ཡོད་པས། དེའི་དགོས་འདོད་ཐམས་ཅད་ནོར་བུ་ལས་འབྱུང་བ་ལས། དེད་དཔོན་དེ་ཤི་བར་གྱུར་ཏེ། དེའི་མ་སྨད་ཀུན་གྱིས་ལོངས་སྤྱོད་དེ་ཟད་པས་སྤྱང་དུ་ཕྱིན་པས། དེད་དཔོན་དེའི་གྲོགས་པོ་བུ་དང་ཕྲད། དེ་ན་རེ། ཁྱོད་ལ་འཕང་བ་འོང་མི་སྲིད། ཁྱིམ་ན་དངོས་པོའི་རིགས་ཅི་འདུག་དྲིས་པས། དངོས་པོ་གཞན་ཅི་ཡང་མེད། རས་ཀྱི་དུག་པོ་གཅིག་གི་གསེབ་ན་བཏུམ་པོ་འཇམ་པོ་གཅིག་འདུག་ཟེར། ཁྱིམ་དུ་ཕྱིན་པས་ནོར་བུ་དེ་སྔས་འོག་ན་ས་དང་བསྲེས་འདུག་བླ་མས་སེམས་ཉིད་སྤྲང་པོར་གྱུར་པ་ལྟར། རང་གི་སེམས་རྒྱལ་སྲིད་གཏད།
པས། དེས་དྲི་བཟང་གིས་ཁྲུས་བྱས་ཤིང་། རྒྱལ་མཚན་གྱི་རྩེ་ལ་ཕྱར་ནས་མཆོད་ཅིང་བསྟོད་གསོལ་བ་བཏབ་པས། དགོས་འདོད་ཕུན་སུམ་ཚོགས་པ་བྱུང་སྐད། དཔེ་དེ་བཞིན་དུ། སེམས་ཉིད་ལྷན་ཅིག་སྐྱེས་པའི་ཆོས་སྐུ་རང་སར་ཡེ་ནས་གནས་ཀྱང་། ནོར་བུ་སྔས་འོག་ཏུ་ལུས་པ་དང་འདྲའོ། །གྲོགས་པོ་དེས་ནོར་བུ་ངོས་བཟུང་ནས་མཆོད་པ་བྱས་པ་བཞིན་དུ། འདིར་བླ་མ་དམ་པས་ངོ་སྤྲད་པས། རང་གི་སེམས་ཉིད་ཆོས་སྐུར་རྟོགས་ནས། རང་གཞན་གྱི་དོན་ཕུན་སུམ་ཚོགས་པ་འབྱུང་ངོ་། །སྔོན་རྒྱ་ཚོ་གར་གྱི་ཡུལ་དུ་རྒྱལ་པོ་ཆེན་པོ་གཅིག་ཡོད་པ་གྲོངས་ནས། རྒྱལ་བུ་ད་འུར་ལུས་པ་བློན་པོས་བརྐུས་ནས་རྨང་གི་ཁྲོད་དུ་བསྒྱུར་ནས། གོས་དང་ཁ་ཟས་དང་གནས་མལ་གྱིས་ཤིན་ཏུ་བཀྲེས་པར་གྱུར་ཏེ། ནམ་ཞིག་གི་ཚེ་ན་བྲམ་ཟེ་མཚན་མཁན་གཅིག་གིས་མཚན་བཏགས་ལས། རྒྱལ་སར་བསྐོས་པས། རྨོངས་ཐམས་ཅད་བདེ་སྐྱིད་བྱུང་བར་གྱུར་ཏོ། །དེ་བཞིན་དུ་རང་གི་སེམས་ཉིད་འདི་ཡེ་གདོད་མ་ནས་ཆོས་སྐུ་ལྷུན་གྱིས་གྲུབ་པར་གནས་ཀྱང་། ངོ་མ་ཤེས་པར་འཁོར་བར་འཁྱམས་པ་ལས། བླ་མ་དམ་པས་ངོ་སྤྲད་པས། འཁོར་
བར་འཁྱམས་པའི་སྡུག་བསྔལ་ལས་གྲོལ་ལོ། །ཡུལ་གཅིག་ན་རྒན་རྒོག་གཉིས་ཡོད་པ་ལས། ལུང་པ་དེ་ཡི་མདའ་རུ་ལྟད་མོ་ཆེན་པོ་གཅིག་ཡོད་པ་ལ། རྒད་པོ་ལྟད་མོ་ལ་བཏང་བས། ཐ་གུ་སྔོ་དམར་གཅིག་ཁོའི་རྐང་པ་ལ་བཏགས་ནས་བཏང་བ་ལ། ཁོ་ལྟད་མོ་ལ་ཡེངས་པ་རང་ལ་རྐང་པའི་ཐ་གུ་ཆད་ནས། གཞན་ཐམས་ཅད་ལ་ཀྱེའོ་བདག་སུ་ལགས། བྱས་པས་ཁྱོད་འཆལ་པ་གཅིག་འདུག །ཁྱོད་ཁྱོད་རང་ཡིན་མོད་ཟེར་ཡང་། ད་ངོ་མ་ཤེས་པ་འདི་ཁྱོད་ལེན་པ་ཡིན་ཟེར་ནས། རྒན་མོ་བརྡུངས་ཁྱེད་ཀྱི་ངོ་བོ་ལྷས་སྟོན་པར་འགྱུར་གྱིས། ལྷ་ལ་ཕྱག་འཚོལ་ཅིག་བྱས་ནས། ལྷ་ལ་ཕྱག་མང་པོ་འཚལ་དུ་བཅུག་པས། ཁོ་ཐང་ཆད་ནས་གཉིད་དུ་སོང་སྟེ། ཁོའི་རྐང་པ་ལ་ཐ་གུ་སྔོ་དམར་གཅིག་བཏགས་ནས་བཞག་པས། ཁོ་གཉིད་སད་པ་དང་། ད་ང་རང་འདུག་ཟེར་ནས་ཁོ་རང་ངོ་ཤེས་པར་གྱུར་སྐད། འཁྲུལ་དོན་མེད་པའི་དོན་ལ་འཁྲུལ་པ་ཡིན། རང་གི་སེམས་ཉིད་གདོད་མ་ནས་ཆོས་ཀྱི་སྐུར་བཞུགས་བཞིན་དུ། ངོ་མ་ཤེས་པས་འཁོར་བར་འཁྱམས། རྒད་པོའི་རྐང་པ་ལ་ཐ་གུ་བཏགས་པས། ཁོས་ཁོ་རང་ངོ་ཤེས་པ་བཞིན་དུ།
གདམས་ངག་ཟབ་མོ་ངོ་སྤྲད་པས་ཆོས་སྐུའི་རང་ཞལ་མཐོང་བའོ། །རྩྭའི་ཁྲོད་ན་ཐག་པ་ཁྲ་བོ་གཅིག་ཁྱུག་གེར་ཡོད་པ་ལ། སྦྲུལ་དུ་འདུག་གོ་སྙམ་པའི་རྟོགས་པ་བྱུང་བ་ལ། མི་གཞན་ཞིག་གིས། འདི་སྦྲུལ་མ་ཡིན་ཐག་པ་ཡིན། ཞེས་ལག་ཏུ་བླངས་ནས་བསྟན་པས། དུག་སྦྲུལ་གྱི་འཇིགས་པ་ལས་གྲོལ། དཔེ་དེ་བཞིན་དུ། སེམས་ཉིད་ཆོས་ཀྱི་སྐུར་རང་ངོ་མ་ཤེས། སེམས་ཀྱི་ངོ་བོ་བསྟན་པའི་དུས་སུ། ཆོས་སྐུའི་རང་ཞལ་བསྟན་པས་འཁོར་བར་འཁྱམས་པར་མི་འགྱུར་རོ། །ཡང་སྔོན་རྒྱ་གར་གྱི་ཡུལ་ན། ཆོས་སྤྱོད་པའི་རྒྱལ་པོ་གཅིག་ལ། བུ་ཆོས་ལ་མི་དགའ་བ་གཅིག་བྱུང་། རྒྱལ་པོས་སྒྱུ་མ་མཁན་བོས་ནས། ཁྱོད་ཀྱི་སྒྱུ་མ་སྟོན་ལ་ངའི་བུ་འདི་ཆོས་ལ་དགའ་བའི་ཐབས་ཤིག་གྱིས་ཟེར། བུ་རྟ་ལ་མཉེས་པས། སྒྱུ་མ་མཁན་གྱིས་རྟ་བཟང་པོ་སྒ་སྲབ་ཀྱིས་བརྒྱན་པ་ཞིག་ཁྱེར་ནས་འོང་ནས་ཨི་ཉོ་ཟེར། རྒྱུག་ཚད་ཅིག་བྱེད་ཟེར་ནས། རྟ་དེ་ལ་ཆིབས་པས། ལ་དགུའི་ལུང་དགུའི་ཕ་རོལ་ཐོ་ཁྱེར། རྒྱ་མཚོའི་འགྲམ་བྱང་སྟོང་ཞིག་ཏུ་རྟ་ལས་བྲུལ་ནས་རྟ་ཡང་རྒྱ་མཚོའི་ནང་དུ་སོང་། རང་ཡུལ་དུ་སླེབས་པའི་ཐབས་ནི་
མེད། མི་གཅིག་ཀྱང་མི་གདའ་སྐྲག་ཅིང་སྡུག་ཙམ་ན། ག་ཤེད་ནས་རྒན་མོ་གཅིག་བྱུང་། འདི་མཐའ་ཡི་རྒྱ་མཚོའི་འགྲམ་ཡིན། སྡེ་དང་མི་གཅིག་ཀྱང་མེད། ང་ལ་བུ་མོ་གཅིག་ཡོད་པ་དང་མཉམ་དུ་ཨེ་འདུག་ཟེར་ནས་མཉམ་དུ་བསྡད། ཡུན་རིང་དུ་སོང་ཞིང་བུ་བུ་མོ་གཉིས་ཀྱང་བྱུང་། རྒན་མོ་ཤི་བས་རོ་རི་ལ་བསྐྱལ་དུ་སོང་ཙ་ན། བུད་མེད་དེ་ཡང་མ་ཡི་སེམས་ནད་ཀྱིས་ཆུ་ལ་ལྕེབས་སོང་། དེ་ཨེ་ལོན་ལྟར་སོང་ཚེ། བུ་མོ་ཆུང་ངུ་ཡང་ལྕེབས་ནས་ཆུས་ཁྱེར་བྱུང་། བུ་ཆུང་ངུ་ཡང་བསྙལ་ནས་ཡོད་པ་ལ་སྤྱང་ཀིས་ཁྱེར་སོང་། སྡུག་བསྔལ་དྲགས་ནས་ངུ་ཞིང་བྲང་བརྡུངས་སྐུ་འབར་བས། རྒས་ནས་སྐྲ་ཡང་དཀར་པོར་གྱུར་འདུག །དེ་ཙམ་ན་སྒྱུ་མ་མཁན་གྱི་སྒྱུ་མ་བཤིགས་པས། རྒྱལ་བུ་ཡུས་ཀྱིས་མནང་ནས་བློན་པོ་རྣམས་འདུས་དང་སྐྱིད་སྡུག་གི་བླ་བོ་བཤད་རྒྱུ་ཡོད་ཟེར། ཁྱེད་ལ་སྐྱིད་སྡུག་དེ་ཙམ་མ་བྱུང་། གདན་ཁྲི་ལས་མ་གཡོས། མདུན་དུ་གསོལ་བ་དྲངས་བར་ཡོད་པའང་འདི་གང་ལགས། ཞེས་སྨྲས་ཀྱང་མི་ཉན། ལོ་རྒྱུས་རྣམས་ཞིབ་ཏུ་བཤད་ནས། ཅིས་ཀྱང་དགོས་པ་མི་འདུག་ཟེར་ནས། རྒྱལ་སྲིད་སྤངས་ཏེ་ཆོས་སྒོར་ཞུགས་སྐད་
དོ། །དཔེ་དེ་བཞིན་དུ། སེམས་ཉིད་བདེར་གཤེགས་སྙིང་པོ་ཡང་། རང་ངོ་རང་གིས་མ་ཤེས་ཏེ། འཁོར་བར་འཁྱམས་ཤིང་སྡུག་བསྔལ་ཡུན་རིང་དུ་མྱོང་། འཁོར་བར་འཁྱམས་པའི་ཚེ་ན་ཡང་། རྒྱུ་བདེ་གཤེགས་སྙིང་པོ་དེ་ངན་དུ་མ་སོང་སྟེ། དཔེར་ན། གསེར་ལྷད་མེད་ལ། ཁྱིའི་སྣོད་དང་མི་གཙང་བ་ཕྱགས་པའི་དབྱག་པ་བྱས་པས་བཙོག་པར་གྱུར་ལ། རྣ་རྒྱན་དང་གདུག་གུ་འགུ་ཡ་སོགས་བྱས་ན་མཛེས་པའི་རྒྱན་དུ་འགྱུར་ལ། དེ་བཤིགས་ནས་སངས་རྒྱས་ཀྱི་སྐུ་གཟུགས་བཞེངས་ནས་རབ་གནས་བྱས་ན་ཀུན་གྱིས་ཕྱག་དང་མཆོད་པའི་གནས་སུ་འགྱུར་ཏེ། བཟང་ངན་གསུམ་དུ་བྱུང་ཡང་། ངོ་བོ་གསེར་ལ་འགྱུར་བ་མེད་པ་ལྟར། འཁོར་བར་འཁྱམས་པ་དང་། ས་ལམ་ཐོབ་པ་དང་། མཐར་ཐུག་སངས་རྒྱས་དུས་ཀྱང་། སེམས་ཀྱི་ངོ་བོ་དེ་ལ་འགྱུར་བ་མེད་དོ། །དཔེར་ན། རྡོ་ཕལ་པ་བསྲེགས་ཀྱང་དངུལ་མི་འབྱུང་བ་ལྟར། རྒྱུ་སེམས་ཅན་གྱི་རྒྱུད་ལ་སངས་རྒྱས་ཀྱི་སྙིང་པོ་དེ་མེད་ན། ཆོས་བྱས་ཀྱང་འབྲས་བུ་སངས་རྒྱས་མི་འགྲུབ་སྟེ། དངུལ་རྡོ་ཡི་ནང་ན་དངུལ་ཡོད་པ་དེ་བཞུས་ན། དང་པོ་དངུལ་ཁྲེབ་དང་དེ་
ནས་དངུལ་ལིང་མ་དང་མཐར་རྒྱ་དངུལ་དུ་འགྱུར་བ་ལྟར། སེམས་ཅན་གྱི་རྒྱུད་ལ་རྒྱུ་བདེ་གཤེགས་སྙིང་པོ་ཡོད་པས། དེ་ཤེས་པར་བྱས་ནས་ཉམས་སུ་བླངས་ན། དང་པོ་ཉམས་རྟོགས་སྐྱེ། རིམ་པར་ས་ལམ་བགྲོད། མཐར་སངས་རྒྱ་བ་ཡིན་ཏེ། སེམས་ཉིད་དེ་ངོ་འཕྲོད་ན། གང་ཤར་གྱི་ངོ་བོ་སྐྱོང་བ་དེ་རང་གིས་ཆོག་གོ །བུ་རམ་གྱི་གཟུགས་ཐ་དད་ཐམས་ཅད་མངར་བ་རོ་གཅིག་པ་དང་འདྲའོ།། ༼༢༢༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཁྲིད་འདི་ཐོབ་པའི་ལ་དོན། །སེམས་ངོ་ཤེས་པ་གལ་ཆེ། འདི་སྒྲིབ་པ་སྦྱངས་བའི་མཆོག་ཡིན་ཏེ། ཆོས་ཀྱི་རྒྱལ་པོའི་མདོ་ལས། སེམས་གཅིག་དང་གཉིས་མེད་པར་ཤེས་ན། དཔེར་ན་མེ་ལོང་གི་སྟེང་དུ་ལོ་སྟོང་གི་རྡུལ་ཆགས་པ། གོས་ཀྱིས་ཕྱིས་པས་རྡུལ་མེད་པ་དང་འདྲའོ། །མཚུངས་སོ། །བསྐལ་པ་གྲངས་མེད་པར་བསགས་པའི་སྡིག་པ་སྐད་ཅིག་གིས་འདག་གོ །དེ་བཞིན་གཤེགས་པའི་སྙིང་པོའི་མདོ་ལས། དེ་བཞིན་གཤེགས་པའི་སྙིང་པོ་སེམས་ཉིད་འོད་གསལ་བ་དེ། ཉོན་མོངས་དྲི་མས་སྦག་ནས་འཁོར་བའི་སེམས་ཅན་ཐམས་ཅད་ཀྱི་ལུས་ལ་
གནས་ཀྱང་མ་ཤེས་པ་ལ། དགེ་བའི་བཤེས་གཉེན་བསྟེན་ནས། དེ་རྟོགས་པར་བྱས་ན་རང་ཡང་འཁོར་བ་ལས་ཐར་ལ། གཞན་གྲོལ་བར་བྱེད་དོ། །ཞེས་ཡི་གསུངས་སོ། །བསམ་པ་རྣམ་པར་དག་པའི་མདོ་ལས། སེམས་ངོ་ཤེས་པའི་རྣལ་འབྱོར་པས། །ཇི་ལྟར་བྱས་ཀྱང་བསྒོམ་པའི་ངང་། །གཉུག་མའི་དོན་ལ་གནས་པ་ཡིན། །ཏིང་ངེ་འཛིན་ནི་ཉམས་སུ་བཤད། །ཅེས་གསུངས་སོ། །ཚངས་པས་ཞུས་པའི་མདོ་ལས། དྲན་པ་རྣམ་རྟོག་ཡིན་པས་ཚོར་བ་ཡིན་ཞེས་བསམ་མི་བྱ། །བསམ་མེད་ཡེ་ཤེས་ཡིན་གྱི་མ་སྤངས་གསལ་བར་ཤོག །དེ་ལས་གཞན་དུ་བོགས་མི་ཐོན། ཞེས་གསུངས། ངད་པ་གིར་ཡིན་གྱི་ཞུས་པའི་མདོ་ལས། མ་ཡེངས་ན་ཆོས་ཉིད་ཀྱི་དགོངས་པ་ཡིན་པར་ཤེས་པར་བྱའོ། །ཞེས་གསུངས་སོ། །བྱམས་སེམས་ཞུས་པའི་མདོ་ལས། སྣང་བ་གཅེར་གྱིས་མཐོང་བ་དེ་ལ་མི་རྟོག་ཞོག །དེ་ཙམ་ཉིད་ནས་བསྒོམ་པའི་མཆོག །ཅེས་གསུངས། བདེ་བ་བློ་གྲོས་ཀྱིས་ཞུས་པའི་མདོ་ལས། གང་ཡང་མི་བསམ་པ་ནི་བསྒོམ་པ་ཆེན་པོར་བཤད། ཅེས་གསུངས། བྲམ་ཟེས་ཞུས་པའི་མདོ་ལས། ཆོས་རྣམས་
ཐམས་ཅད་རང་བཞིན་གྱིས་འོད་གསལ་བ་ཞེས་བྱ་བ་ནི། བྱིང་རྒོད་དང་བྲལ་བའི་རིག་པ་གཉུག་མ་ལ་བྱའོ། །དེ་ཅིའི་ཕྱིར་ཞེ་ན། རིག་པ་སྐྱེ་འགགས་མེད་པ་གཉུག་མ་ཡིན་པའི་ཕྱིར། ཞེས་གསུངས། དགེ་བའི་རྩ་བ་ཡོངས་སུ་འཛིན་པའི་མདོ་ལས། རང་གི་ཡེ་ཤེས་ནི་གང་ལ་ཡང་མི་རྟོགས་པ་ལ། ཤེས་པ་གསལ་བ་དེ་ཆོས་སྐུར་ངོས་འཛིན་པ་ཡིན་ནོ། །ཞེས་གསུངས། དྲིན་ལེན་བསབ་པའི་ནང་ནས། ཡུལ་སེམས་ཀྱི་ཕར་ལ་མི་དཔྱོད། ཡིད་ཀྱིས་ཚུར་ལ་མི་བསམ་པ་ནི་བསམ་གཏན་གྱི་མཆོག་ཡིན་ནོ། །ཞེས་གསུངས། རྒྱལ་པོ་བཀའ་སྩལ་གྱིས་ཞུས་པའི་མདོ་ལས། བལྟ་བ་ཞེས་བྱ་བ་ནི་རང་གི་སེམས་ལ་མི་དཔྱོད་པ་ཡིན་ཏེ། དོན་དེ་ཉམས་སུ་མྱོང་བའི་མཆོག་ཡིན་ནོ། །ཞེས་གསུངས། རྒྱལ་པོ་བདེ་བས་ཞུས་པའི་མདོ་ལས། སེམས་ཀྱིས་སེམས་ལ་བལྟ་བ་ཤེས་པ་ནི་རྣལ་འབྱོར་པ་ཡི་མཆོག་ཡིན་ནོ། །ཞེས་གསུངས། རྒྱལ་པོ་བདེ་བ་ཞུ་བྱིན་གྱིས་ཞུས་པའི་མདོ་ལས། རང་གི་སེམས་ནི་མི་སྡུད་ནས་རང་ལུགས་སུ་བཞག་པ་ནི་བསྒོམ་པའི་མཆོག་ཡིན་ནོ། །ཞེས་གསུངས། ཚངས་པས་ཞུས་པའི་མདོ་ལས། སེམས་ལ་
སེམས་མཉམ་པར་བཞག་པ་སྟེ། སེམས་ཀྱིས་སེམས་མི་དམིགས་སོ། །ཞེས་གསུངས། ཡེ་ཤེས་ཌཱཀི་མའི་ཞལ་ནས། ཏེ་ལོ་པ་སེམས་ཀྱི་སེམས་ལ་བལྟས་ཙ་ན། ལྟ་བར་བྱེད་པའི་མཁན་པོ་ཡང་རང་གི་སེམས། བལྟ་རྒྱུ་ཡང་རང་གི་སེམས། དེ་ལྟར་སེམས་ལ་བལྟས་ཙ་ན། ནམ་མཁའ་མཐོང་བ་མེད་པ་ལྟར། བལྟ་མཁན་བལྟ་རྒྱུ་གཉིས་ཀ་དག་ནས། ས་ལེ་སེང་ངེ་བ་དེ་རྟོགས་པའི་དུས་ན། ་ལྷུན་གྱིས་གྲུབ་པའི་སངས་རྒྱས་ཡང་དེ་ཡིན། ལམ་དུ་ཞུགས་པའི་སངས་རྒྱས་ཡང་དེ་ཡིན། རྟོགས་པ་མངོན་གྱུར་གྱི་སངས་རྒྱས་ཡང་དེ་ཡིན། ཏེ་ལོ་པ་ཤེས་པར་གྱིས། ཞེས་གསུངས། ཐུགས་རྗེ་ཆེན་པོ་དོན་ཏྲིག་འགྲོ་བ་ཀུན་སྒྲོལ་རྒྱུད་ལས། རང་གི་སེམས་དེ་དང་པོ་གང་ནས་བྱུང་། ད་ལྟ་གར་གནས། ཐ་མ་གར་འགྲོ་བལྟས་ཀྱང་ཐམས་ཅད་སྟོང་པ་ཉིད་དེ་གང་ཡང་མ་གྲུབ། དེ་གའི་ངང་ལས་སེམས་མ་བཅོས་པར་ཀློད་པར་བྱའོ། །ཞེས་གསུངས་སོ། །ཐུགས་རྗེ་ཆེན་པོའི་འོད་མཆོག་གི་ཁྲིད་གཞུང་ལས། རྣམ་རྟོག་རང་གི་སེམས་སུ་ཤེས། སེམས་ལས་ཤར། སེམས་སུ་གྲོལ། སེམས་ཀྱིས་བྱས་པ་ཤེས་ནས་སེམས་
སུ་རིག་ཅིང་ཅི་ལྟར་ཤར་ཡང་དགག་སྒྲུབ་མེད་པར་རང་གི་སེམས་སུ་ངོ་ཤེས་པ་ནི། མ་རིག་པའི་སྤྲུལ་སྐུ་ཤར་བ་ཡིན་ཏེ། ཅུང་ཟད་བདེ་སང་བ་སྟོང་ཕྱམ་པ་འོངས། དངོས་མེད་རང་གསལ་རིག་པའི་ངོ་བོ་གཅེར་བུར་རྟེན་མེད་དུ་ཇི་ལྟར་བྱས་ཀྱང་གསལ་འགྲིབ་མེད་པར་ལྷག་གེ་བ་འདི་ཆོས་སྐུ་ཡིན། ཞེས་གསུངས། ཨོ་རྒྱན་རིན་པོ་ཆེ་པདྨ་འབྱུང་གནས་ཀྱིས་གསུངས་པ། དེ་ཡང་སེམས་ཞེས་བྱ་བ་དྲན་ཞིང་རིག་པ་ཉམས་སུ་མྱོང་བ་གཅིག་ཡོད་དེ་སེམས་དེ་ཕྱི་རུ་མ་བལྟ་ནང་དུ་ལྟོས། སེམས་ཀྱིས་སེམས་ཚོལ་སེམས་ཀྱི་སེམས་ཉིད་གཏན་ལ་ཕོབ། སེམས་དེ་ལ་ཕྱི་ནང་དང་བལྟ་མཁན་དང་ལྟ་བྱེད་མེད་པས། ཡེ་ཤེས་རང་ལུགས་སུ་རང་ལ་གནས་པ་དེ། ངོ་ཤེས་པ་དེ་ལྟ་བ་ཡིན་པ་ལ་རྦད་ཀྱིས་ཆོད་ཅིག་གསུངས། ཇོ་མོ་ལ་གདམས་པ། སེམས་ལ་ངོ་བོ་མེད་པ་ཡིན་པས། རྣལ་མ་མ་བཅོས་པ་ལྷུན་གྱིས་གྲུབ་པའི་ངང་དུ་བསྒོམ་དུ་མེད་པའི་ངང་དུ་མ་ཡེངས་པར་ཞོག་ཅིག །དེའི་ངང་ལ་གནས་པས་སེམས་ཉིད་རང་བཞིན་གྱིས་གྲོལ་བར་འགྱུར་རོ། །སངས་རྒྱས་པ་ཡིན་ནོ། །ཞེས་གསུངས། བེ་རོ་ཙཱ་ན་ལ་གདམས་པ་དང་། ཆོས་ཐམས་ཅད་སེམས་
ལས་བྱུང་། སེམས་ངོས་བཟུང་མེད་པ་མཐའ་དང་དབུས་མེད་པ་འདུ་འབྲལ་མེད་པ། མ་བཅོས་པར་མཉམ་པ་ཆེན་པོའི་ངང་དུ་མ་ཡེངས་པར་ཞོག་ཅིག །དེ་ལྟར་བསྒོམས་པས་རྣམ་རྟོག་ཡེ་ཤེས་སུ་འཆར། སངས་རྒྱས་དེ་ཉིད་ཡིན་ནོ། །ཞེས་གསུངས། དཔལ་གྱི་དབང་ཕྱུག་ཉོན་ཅིག །སེམས་ཡེ་ནས་དངོས་པོ་མེད་པ་བསྒོམ་དུ་མེད་པ། བློ་ལ་མ་གྲུབ་ཅིང་མ་བཅོས་པ། རང་བྱུང་རང་གསལ་དུ་ཞོག་ཅིག །དེའི་ངང་ལ་གནས་ན་འཁོར་བ་མ་སྤངས་པར་སངས་རྒྱས་པ་ཡིན་ནོ། །ཞེས་གསུངས། རྨི་རིན་ཆེན་མཆོག་ལ་གདམས་པ། སེམས་ངོ་བོ་ཅི་ཡང་མ་ཡིན་པ། བཞག་ཅིང་བསྒོམ་དུ་མེད་པ། མ་བཅོས་རང་བྱུང་སོ་མ་རང་། ཡེ་ནས་ལྷུན་གྱིས་གྲུབ་པའི་ངང་དུ་ཞོག་ལ་ལྷན་ནེ་སྒོམས་ཤིག །དེའི་ངང་ལས་ཡིད་གཡོ་འགུལ་དང་བྲལ་བར་འགྱུར་ཏེ། དེ་ལས་འབྲས་བུ་གཞན་མེད་དོ། །ཞེས་གསུངས། རྒྱལ་སྲས་ཐོགས་མེད་པའི་ཞལ་ནས། །སེམས་རྟོགས་མེད་ཀྱི་ངང་ལ་གསལ་སེང་ངེ་བ་དེའི་ངོ་བོ་ལ་བལྟས་ན་ཅིར་ཡང་མ་གྲུབ་པ་སྟོང་སང་ངེར་གནས་པ་དེ་ལ། རིག་པ་གསལ་སྟོང་འཛིན་མེད་ཟེར་བ་ཡིན། དེ་དང་པོ་
ནས་ཐམས་ཅད་ལ་ཡོད་མོད་ཀྱི། གཟུགས་འཛིན་གྱི་རྣམ་པར་རྟོག་པས་བསྒྲིབ་ནས་ངོ་མ་ཤེས་པ་ཡིན། ཁྱེད་རང་ཉམས་ལེན་སྟོབས་ཀྱིས་ངོ་བོ་མཐོང་བ་ཡིན་པས། སེམས་ཀྱི་ངོ་བོ་སྟོང་པར་འདུག་པ་དེ་ལ་ལེགས་པར་སྒྲོ་འདོགས་ཆོད་པ་ལྟོས་མཛོད། ཡོན་ཏན་གྱི་འཆར་ཚུལ་གོང་ནས་གོང་དུ་འབྱུང་ཞིང་། མཆོག་གི་དངོས་གྲུབ་ཀྱི་རྒྱུར་འགྱུར་བའི་ལམ་ཡིན་པས། དགའ་བ་བསྒོམ་ཞིང་ཉམས་སུ་ལོངས་མཛོད། ཅེས་གསུངས། ཐུགས་རྗེ་ཆེན་པོ་ཡང་སྙིང་འདུས་པ་ལས། དྲན་རྟོག་རང་གྲོལ་ཐུགས་སུ་ཁྱེར། ཞེས་པས་འདས་མ་འོངས་ད་ལྟར་གྱི་རྟོག་པ་གང་དྲན་ཡང་། དྲན་ཡུལ་དྲན་མཁན་རང་ཤར་དྲན་བདོ་ལ་སྟོང་སྟེ། རང་བཞིན་མེད་པར་གྲོལ་བ་ནི་བདེ་གཤེགས་ཐུགས་ཏེ་ཆོས་རྣམས་དྲན་སྟོང་ཐུགས་ཀྱི་ལམ་ཁྱེར་རོ།། ༼༢༣༽ ཐུགས་རྗེ་ཆེན་པོ་ལ་ཕྱག་འཚལ་ལོ། ཐུགས་རྗེ་ཆེན་པོའི་མན་ངག་ཟབ་མོ། རང་གི་སེམས་ཉིད་དང་རིག་པ་འདི་ཕྱག་རྒྱ་ཆེན་པོར་ངོ་སྤྲད་པ་དེ་ངེས་ཤེས་བསྐྱེད་པར་བྱ་སྟེ། དཔལ་འཇིགས་བྱེད་ཀྱི་རྒྱུད་ལས། ཆོས་རྣམས་ཀུན་གྱི་རྩ་བ་ནི། །རང་གི་སེམས་ཉིད་མ་གཏོགས་ན། །ཐོས་བསམ་བསྒོམ་པར་རབ་
སྦྱངས་ཀྱང་། །འབྲས་བུ་ཐོབ་པར་མི་འགྱུར་ཏེ། །དམུས་ལོང་མིག་བུ་མེད་པ་འདྲ། །དེ་ཕྱིར་རང་སེམས་རྟོགས་པར་གྱིས། །ཞེས་གསུངས་སོ། །ཐིག་ལེ་གཉིས་པའི་རྒྱུད་ལས། སེམས་ཉིད་རྟོགས་པའི་དོན་མེད་ན། །དཀྱིལ་འཁོར་མ་ལུས་བྲིས་ཀྱང་སངས་མི་རྒྱ། །ཞེས་གསུངས། རྡོ་རྗེ་སེམས་དཔའ་མངོན་པར་བྱང་ཆུབ་པའི་རྒྱུད་ལས། འཁོར་བ་མྱ་ངན་འདས་པའི་ཆོས། །རྩ་བ་རང་གི་སེམས་ཡིན་ཏེ། །སེམས་ལས་དྲན་རྟོག་ཅིར་སྣང་ཡང་། །དངོས་པོ་ཙམ་དུ་མ་གྲུབ་པས། །དཔེར་ན་ནམ་མཁའི་སེར་བུ་བཞིན། །ཁ་དོག་དང་ནི་དབྱིབས་སུ་མེད། །སངས་རྒྱས་ཡེ་ཤེས་སྤྱན་གྱིས་ཀྱང་། །རྡུལ་ཙམ་དུ་ཡང་མི་གཟིགས་སོ། །ཞེས་གསུངས། རང་བྱུང་རིག་པ་ངོ་སྤྱོད་གྱི་རྒྱུད་ལས། བལྟ་བ་རང་གི་སེམས་ལ་ལྟ། །དེ་ཕྱིར་ཡུལ་མེད་ཆོས་སྐུར་གསལ། །དེ་ཉིད་མ་བྲལ་རྒྱུན་གནས་ན། །དོན་ལ་འགྱུར་བ་རྡུལ་ཙམ་མེད། །ཅེས་གསུངས། རང་བྱུང་བདེ་བའི་རྒྱུད་ལས། རང་རིག་ངེས་པའི་ལྟ་བ་ལ། །ཡེངས་བ་མེད་པར་ཡིད་ཀྱིས་བལྟ། །དེ་ཡང་ཡུལ་ཅན་མ་ཡིན་ཏེ། །རང་ལ་རང་བལྟས་ཡིད་ཀྱིས་
གསལ། །ཞེས་གསུངས། ནམ་མཁའ་དང་མཉམ་པའི་རྒྱུད་ལས། རྣམ་པར་རྟོག་པའི་མཚན་མ་ཅི་བྱུང་ཡང་། །མ་བཀག་རང་བྱུང་རང་ཞི་ཆེན་པོ་སྟེ། །མ་བཅོས་མ་བྱས་རང་བཞིན་ངང་གིས་གསལ། །བཏང་སྙོམས་ཆེན་པོར་མ་བཅོས་ངང་བཞག་ན། །ཐ་སྙད་ཙམ་དུ་བསྒོམ་ཞེས་དེ་ལ་བྱ། །ཞེས་གསུངས། རང་བྱུང་བདེ་བའི་རྒྱུད་ལས། །རང་སེམས་ཆོས་སྐུར་ངོ་སྤྲད་པས། །དམིགས་འཛིན་མེད་པར་ངང་གིས་གསལ། །གཉུག་མར་གནས་པ་འཕེལ་འགྲིབ་མེད། །ལུས་སེམས་གཉིས་ལ་སྤྱོད་དང་བྲལ། །རང་རིག་བྱ་ར་དངོས་མེད་བྲལ། །དྲན་པ་མི་འཆུག་འགྲོ་འོང་མེད། །དྲན་པ་རིག་པ་ཅི་བྱུང་ཡང་། །དེ་ཉིད་དུས་ན་དངོས་པོ་མེད། །ཅེས་གསུངས། བསམ་གཏན་མཆོག་གི་རྒྱུད་ལས། ཤེས་པ་རང་ལུགས་སོ་མ་ལ། །གཞན་དུ་མི་གཡོ་སེམས་ལ་བལྟ། །བལྟས་པས་དངོས་མེད་ཤེས་པ་གསལ། །དེ་ཉིད་རྒྱུན་དུ་མ་ཡེངས་ཏེ། །དེ་ལས་བསྒོམ་དུ་བཙལ་དུ་མེད། །ཅེས་གསུངས། ནམ་མཁའ་དང་མཉམ་པའི་རྒྱུད་ལས། འཁྲུལ་དང་མ་འཁྲུལ་ངོ་བོ་གཅིག །འགྲོ་ལ་སེམས་རྒྱུད་གཉིས་མི་འཆང་། །འོད་གསལ་རིག་པ་
འདི་རང་ཡིན། །མ་བཅོས་རིག་པ་ཅོག་གེར་ཞོག །ཅེས་གསུངས། རྡོ་རྗེ་མཁའ་འགྲོ་གསང་བའི་རྒྱུད་ལས། རང་སེམས་རང་གིས་རྟོགས་པས་ན། །སེམས་ཅན་གདོད་ནས་སངས་རྒྱས་སོ། །ཞེས་གསུངས་སོ། །འབང་རྡོ་ཧ་བརྒྱ་དྲུག་ཅུ་པ་ལས། ཀྱེ་ཧོ་རྨོངས་པ་སེམས་ཀྱི་སེམས་ནི་རྟོགས་ནས་ནི། །ལྟ་བ་ངན་པ་ཐམས་ཅད་ལ་ནི་རང་གྲོལ་འགྱུར། །མཆོག་ཏུ་བདེ་བ་ཆེན་པོའི་དབང་གིས་ནི། །དེ་ལ་གནས་ན་དངོས་གྲུབ་དམ་པའོ། །ཞེས་གསུངས་སོ། །དཔལ་རི་ཁྲོད་པ་ས་ར་ཧའི་དྷོ་ཧ་ལས། །ཀྱེ་ཧོ་མ་ཡེངས་སེམས་ཀྱིས་རང་གིས་རང་ལ་ལྟོས། །རང་གི་སེམས་ཉིད་རང་གིས་རྟོགས་གྱུར་ན། །ཡེངས་བའི་སེམས་ཀྱང་ཕྱག་རྒྱ་ཆེན་པོར་འཆར། །མཚན་མ་རང་གྲོལ་བདེ་བ་ཆེན་པོའི་ངང་། །ཞེས་གསུངས་སོ། །བིར་ཝ་པའི་དྷོ་ཧ་ལས། སེམས་ཀྱི་ཆོས་ཉིད་ཀློང་ལ་འདི་ཡིན་མེད་པས་ན། །དེ་ལ་སྒོམ་དང་བསྒོམ་པར་བྱ་བ་གཉིས་སུ་མེད། །ཡོད་མེད་ཅི་ཡང་མི་རྟོག་ངང་ལ་མ་ཡེངས་བཞག །ཅེས་གསུངས། མེ་ཏྲི་པའི་དྷོ་ཧ་ལས། ཐུགས་ཕྲད་སེམས་སུ་ཤེས་ན་ཡི་དམ་ལྷ། །ཤེས་པ་མ་བཀུག་རྟོག་པ་རིམ་གྱིས་
སྤངས། །སེམས་ལ་རྣམ་རྟོག་བྱུང་ན་རྣལ་འབྱོར་པས། །རས་བལ་བཞིན་དུ་མ་བཅོས་ཀློད་ལ་ཞོག །བྱ་བ་སྤངས་ལ་རང་སེམས་རང་གིས་ལྟོས། །ཞེས་གསུངས། ཕྱག་རྒྱ་ཆེན་པོ་གང་གཱ་མ་ལས། སེམས་ནི་ནམ་མཁའི་དཀྱིལ་ལྟར་བསམ་པའི་ཡུལ་ལས་འདས། །དེ་ཡི་ངང་ལ་བཏང་བཞག་མེད་པར་ཀློད་ལ་ཞོག །སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །སེམས་ནི་ནམ་མཁའི་དཀྱིལ་ལྟར་བསམ་པའི་ཡུལ་ལས་འདས། །དེ་ཡི་ངང་ལ་བཏང་བཞག་མེད་པར་ཀློད་ལ་ཞོག །སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །དེ་ལ་གོམས་ཤིང་འདྲིས་ན་བླ་མེད་བྱང་ཆུབ་ཐོབ། །ཅེས་གསུངས། པཎ་ཆེན་ཤཱཀྱ་ཤྲཱིའི་རིན་ཆེན་འབྲུ་དགུ་ལས། ཅིར་སྣང་རང་གསལ་བཞག་ན་བྱ་བྲལ་ལྷུན་གྲུབ་ཡིན། །གང་ཤར་ངོ་བོ་བཟུང་ནས་རིག་པ་རང་སར་གྲོལ། །འགྱུ་བའི་རྩད་རྗེས་བཅད་ན་དྲན་རྟོག་དབྱིངས་སུ་ཡལ། །འདི་གསུམ་རང་སེམས་གནས་ལུགས་ཡིན་པས་དངོས་གཞིར་བསྒོམ། །ཞེས་གསུངས། མཁའ་འགྲོ་ཀློང་གསལ་འབར་མའི་རྒྱུད་ལས། རིག་པ་རིག་པ་ཅེས་པ་ནི། །རིག་ཅིང་གསལ་བས་རིག་པ་ཡིན། །རྣམ་རྟོག་སྔ་མ་རང་
སར་གྲོལ། །ཕྱི་མའི་རྗེས་འཛིན་མ་ཤོར་བ། །བར་དེར་གཉེན་པོས་བཅོས་སླད་བྲལ། །དྲི་བྲལ་སེང་དང་བྱེད་པ་འདི། །རིག་པ་ཡིན་པར་ངོས་ཟུངས་ཤིག །ངོ་བོ་སྟོང་པ་རང་བཞིན་གསལ། །ཐུགས་རྗེ་ཀུན་ལ་སྣང་ནུས་པ། །དེ་ནི་རིག་པའི་གནས་ལུགས་ཡིན། །ཞེས་གསུངས། སྐྱེ་མེད་ཞང་རིན་པོ་ཆེའི་ཞལ་ནས། ཕྱག་རྒྱ་ཆེན་པོ་བསྒོམ་པ་ལ། །འདི་བྱའི་ཏིག་པོ་མི་འདོག་གིས། །སྔོན་འགྲོ་དངོས་གཞི་རྗེས་གསུམ་གྱི། །གོ་རིམ་ཇི་བཞིན་གྲངས་མེད་ངེས། །དུས་ཚོད་ཚེས་གྲངས་བརྩི་མི་དགོས། །ནམ་དྲན་དུས་སུ་ཀློད་ལ་ཞོག །དང་པོ་བར་དང་ཐ་མ་མེད། །རང་སེམས་སྐྱེ་མེད་རྒྱུན་མི་ཆད། །ཅེས་གསུངས། གསེར་གླིང་པས་གསུངས་པའི་མཐའ་འཁོབ་འདུལ་བའི་ཆོས་བཞི་ལས། རྒྱངས་ཀྱིས་སྒྱུར་ལ་ལྷོད་ཀྱིས་ཀློད། །ཤིག་གིས་ཤིག་ལ་འབོལ་ལེ་ཞོག །ཅེས་གསུངས། དཔལ་ལྡན་ས་སྐྱ་པ་གྲགས་པ་རྒྱལ་མཚན་གྱི་ཞལ་ནས། སེམས་མེད་སེམས་ཀྱི་སེམས་ལ་ལྟོས། །མཐོང་རྒྱུ་བྱུང་ན་སེམས་ཉིད་མིན། །མཐོང་མེད་མཐོང་བས་སེམས་ཉིད་མཐོང་། །མཐོང་མེད་སེམས་ལ་མ་ཡེངས་ཞོག །ཅེས་གསུངས། །
རྗེ་སྒམ་པོ་པས། སྣང་རིག་ངོ་བོ་སྟོང་གསལ་འདི། །ཆོས་སྐུ་ཡིན་པར་ད་གཟོད་ཤེས། ཞེས་དང་། སྣང་གྲག་སེམས་སུ་ཤེས་པ་ཡི། །དགའ་བ་སྤྲོ་བ་རྒྱུན་ཆད་མེད། །བདེ་བ་ཆེན་པོའི་གནད་ཅིག་རྙེད། །ཅེས་གསུངས། ཀརྨ་པཀིས། རང་སེམས་ཕྱག་རྒྱ་ཆེན་པོ་འདི། །སྐུ་གསུམ་མ་བསྒྲུབས་ལྷུན་གྲུབ་ཏུ། །གཞི་ལ་རྙེད་པས་བཙལ་མི་དགོས། །ཞེས་གསུངས། རང་བྱུང་རྡོ་རྗེས། ལར་ལྟ་བ་ལྟ་བ་ཟེར་ཙམ་ན། །ལྟ་བ་རང་གི་སེམས་ལ་ལྟོས། །བལྟས་པས་མཐོང་རྒྱུ་མ་བྱུང་ན། །མཐོང་བའི་རྒྱལ་པོ་དེ་ཀ་རང་། །ཞེས་གསུངས། རོལ་པའི་རྡོ་རྗེས། དང་པོ་ཐ་མལ་ཤེས་པ་འདི། །ཆོས་སྐུ་ཡིན་པར་ཤེས་པར་མཛོད། །མི་དྲན་དགུ་དྲན་རྟོག་པ་འདི། །ཡེ་ཤེས་ཡིན་པར་ཤེས་པར་མཛོད། །ཅེས་གསུངས། མཁའ་སྤྱོད་དབང་པོས། རང་སེམས་རང་ངོ་ཤེས་ན་སངས་རྒྱས་རང་། །ཐ་སྙད་ཐོས་བསམ་མང་པོས་ཅི་ཞིག་བྱ། །གཞུང་ལུགས་རྟོག་པའི་དྲི་མ་ཡལ་དུ་ཆུག །གཅེར་མཐོང་རང་གྲོལ་འདི་ནི་བྱང་ཆུབ་ལམ། །ཞེས་གསུངས་སོ།། ༼༢༤༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་
ཟབ་མོ། རྫོགས་པ་ཆེན་པོའི་ཁྲེགས་ཆོད། ཐོད་རྒལ་གཉིས་ལས། ཟུང་འཇུག་དགོས་པའི་རྒྱུ་མཚན། མཁའ་འགྲོ་ཀློང་གསལ་འབར་བ་ཉི་མའི་གསང་རྒྱུད་ལས། ཁྲེགས་མ་ཆོད་ན་ཐོད་མི་རྒལ། །ཐོད་མ་རྒལ་བར་ཁྲེགས་མི་ཆོད། །ཅེས་གསུངས། མུ་ཏིག་ཕྲེང་བ་ལས། ལུས་ཀྱི་ལས་ནི་རྣམ་གསུམ་ལས། །སེང་གེའི་ཚུལ་དང་གླང་ཆེན་ཚུལ། །དྲང་སྲོང་ཙོག་པུར་གནས་པ་དང་། །ཞེས་གསུངས་པས། ཁྲིད་ཞུ་བ་མང་ན་ནི། སྤྲུལ་སྐུའི་འདུག་སྟངས་ཀྱིས་ཆོག་སྟེ། ཐུགས་རྗེ་ཆེན་པོ་འོད་མཆོག་གི་དཀར་ཁྲིད་ཉིན་མོའི་རྣལ་འབྱོར་ལས། སྐབས་སུ་སྤྲུལ་སྐུའི་འདུག་སྟངས་དྲང་སྲོང་ཙོག་པུ་བྱ། ཞེས་གསུངས་པས། སྤྲུལ་སྐུའི་འདུག་སྟངས་དྲང་སྲོང་ཙོག་པུ་ནི། ། ལུས་ཙོག་པུ་བྱས་ལ་རྐང་པའི་ལོང་བུ་གཉིས་གཤིབ་རྐང་མཐིལ་གཉིས་ས་ལ་ཕབ་ཅུང་ཆ་བསྲང་། པུས་མོ་གཉིས་བྲང་ལ་སྦྱར། ལག་པའི་མཁྲིགས་གཉིས་བསྣོལ་ལ་པུས་མོ་ལ་འཁྱུད། སྒལ་ཚིགས་དྲང་པོར་བསྲངས་སོ། །འདི་ལྟར་ལུས་གནད་རྣམ་གསུམ་གཟིར་བས། ལུས་ལ་རིག་པའི་ཡེ་ཤེས་ཡོད་པ་དེ། གནད་གཟིར་བས་མངོན་སུམ་དུ་མཐོང་
ཉི་མ་གསུམ་བཞི་ལ་མི་སྨྲ་བར་ཇེ་ཉུང་ཇེ་ཉུང་བཅད་པར་བྱའོ། །གཞན་ཚིག་གིས་མ་འདྲེས་པར་ངག་ཁྲིགས་གིས་བཅད་པར་བྱའོ། །ཅི་ཡང་མི་བརྗོད་པར་ལྐུགས་པ་ལྟར་བརྟན་པར་བྱའོ། །རིག་པ་གཞན་དུ་མ་ཡེངས་པར་བྱའོ། །གཏད་པའི་འབེན་དང་བྲལ་བར་བྱའོ། ༈ །དེ་ཡང་ནམ་མཁའ་སྟོང་པ་ལས་ཆགས་པའི་ཡུལ་མིན་པའི་ཕྱིར། ཡུལ་གྱིས་གནད་དབྱིངས་ལ་གཏད་པས་ཡེ་ཤེས་རྒྱུག་པར་གནས་པའི་ཕྱིར་རོ། །རླུང་རང་བབས་སུ་ཤིན་ཏུ་དལ་བར་བྱའོ། །དང་པོ་ཐུན་ཆུང་ལ་གྲངས་མང་བར་བྱའོ། །དེ་ནས་ཐུན་ཇེ་རིང་ཇེ་རིང་ལ་ཡུན་བསྲིང་། ཟླ་བ་ཕྱེད་དང་གཉིས་ཀྱི་འབྱངས་བར་འགྱུར་རོ། །དེ་ལྟར་ཉམས་སུ་བླངས་བས་འཆར་ཚུལ་ནི། མཁའ་འགྲོ་སྙིང་ཐིག་གི་ཁྲིད་ཡིག་རིན་ཆེན་དཔུང་པ་ལས། ཆོས་ཉིད་མངོན་སུམ་གྱི་སྣང་བ་ཆ་ཕྲ་ལ་དང་པོ་གསལ་ལ་འཚེར་བ། རང་བཞིན་བཀྲག་པ། ཉམ་ང་བ། མངོན་སུམ་དུ་འཆར་ཏེ། དག་པ་དབྱིངས་ཀྱི་སྒྲོན་མ། གྱེན་འགྲེང་དང་རྩིབ་ཤར་པ། མདའ་དང་མདུང་རྩེ་ལྟ་བུ། ཉ་མིག་ལྟ་བུ་དང་། མིག་ཚག་ལྟ་བུ་དང་། གྲ་མིག་ལྟ་བུ་དང་། རིན་པོ་ཆེ་འབར་བ་ལྟ་བུ་དང་།
མཆོད་རྟེན་ལྟ་བུ་དང་། ཐིག་ལེ་དང་ཐིག་ཕྲན་གྱིས་འཁྲིགས་པ། འཇའ་ཚོན་ཁ་དོག་ལྔ་ལྡན་མངོན་སུམ་དུ་འཆར་རོ། །དེ་རྣམས་ཀྱི་ནང་དང་བར་ཐམས་ཅད་དུ། རིག་པའི་ངོ་བོ་རྡོ་རྗེ་ལུ་གུ་རྒྱུད་དུ་གསལ་ལོ། །དེ་ངོས་ཟིན་པར་བྱས་ལ། འགུལ་འཕྲིག་མེད་པར་ཉམས་སུ་བླང་བར་བྱའོ། །ཞེས་གསུངས། ད་ལྟ་འཇའ་འོད་ཐིག་ལེ་བལྟས་པས། བར་དོར་འཇའ་འོད་ཟེར་གསུམ་ཤར་བའི་ཚེ། ཡེ་ཤེས་ལྔ་ངོ་འཕྲོད་ནས་གྲོལ་ཏེ། ཐུགས་རྗེ་ཆེན་པོ་འོད་མཆོག་གི་གསང་ལམ་ངོ་སྤྲོད་རྒྱུད་ལས། རིགས་ཀྱི་བུ་རང་དབུགས་ཆད་པ་དང་སངས་རྒྱས་ཀྱི་ཞིང་ཁམས་རྣམ་པར་དག་པ་མེ་ལོང་ལ་ཉི་མ་ཤར་བ་ལྟ་བུ་དུས་གཅིག་ལ་འཆར་རོ། །དེའི་དུས་སུ་འོད་ཁ་དོག་མཐིང་ཀ་མཐོང་བའི་ཚེ་ན། གསང་བའི་བདག་པོ་དག་སྣང་ཤར་བའི་ཚེ། ཡེ་ཤེས་ལྔ་ངོ་ཤེས་ཤིང་དྲན་པས་སངས་རྒྱས་ཐོབ་བོ། །ཞེས་གསུངས་པའི་ཕྱིར། འཇའ་འོད་ཐིག་ལེ་ཐིག་ཕྲན་འདི་རྒྱུན་དུ་བལྟས་པས་འཁོར་བར་ཕྱིར་མི་ལྡོག་པར་གསུངས་སོ། །ཉམས་གོང་འཕེལ་གྱི་སྣང་བ་འཆར་ཏེ། ཐིག་ལེ་ནང་དུ་སྐུ་རྐྱང་པ་དང་། ཕྱེད་སྐུ་དང་། ལྷ་ཡབ་ཡུམ་གྱི་རྣམ་པ་
དང་། ལུ་གུ་རྒྱུད་གར་གཏད་དུ་སྡོད་པ་རྣམས་འབྱུང་ངོ་། །ཐེར་མ་དང་རྔ་ཡབ་ལ་སོགས་མིག་བཀག་ནས། བལྟས་པས་ཤིན་ཏུ་ཡང་གསལ་བར་འགྱུར་རོ། །ཞེས་རིག་འཛིན་ཀུ་མ་རཱ་ཛས་གསུངས་སོ། །ཐལ་འགྱུར་ལས། ཉམས་ཀྱི་སྣང་བ་གོང་འཕེལ་ནི། །ཡེ་ཤེས་ཁ་དོག་དབྱིབས་འཆར་ནས། །གྱེན་འགྲེངས་དང་ནི་རྩིབ་ཤར་དང་། །ཐིག་ལེ་སྣ་ཚོགས་སྐུ་གཉིས་དང་། །རིག་པ་སྣང་བའི་ཡུལ་ལ་གསལ། །ཅེས་དང་། འདས་རྗེས་ལས། ཉམས་སྣང་གོང་དུ་འཕེལ་བ་ནི། །བར་དོ་ཡེ་ཤེས་མངོན་དུ་བྱས། །ཞེས་གསུངས་སོ། །མཁའ་འགྲོ་སྙིང་ཐིག་གི་ཁྲིད་ཡིག་རིན་ཆེན་དཔུང་པ་ལས། དེ་ནས་ཉམས་སུ་བླངས་པས། རིག་པ་ཚད་ལ་ཕེབས་པའི་སྣང་བ་འཆར་རོ། ། ཐིག་ལེ་རེ་རེའི་ནང་དུ་རིགས་ལྔ་ཡབ་ཡུམ་གྱི་ཚོམ་བུ་རྫོགས་པ་དང་། སྟོང་གསུམ་ཐམས་ཅད་ཀྱང་ལུ་གུ་རྒྱུད་ཁྲ་ཤིག་ཤིག་པ་དང་། རང་སྣང་རིག་པའི་འཆར་ཚུལ་ལ་དབང་ཐོབ་པའོ། །ཐལ་འགྱུར་ལས། རིག་པ་ཚད་ཕེབས་སྣང་བ་ནི། །ལོངས་སྐུ་མཚན་དཔེར་གསལ་བ་ནི། །མ་ངེས་ཁ་དོག་འཇའ་ཚོན་ལས། །རིགས་ལྔ་ཡབ་དང་ཡུམ་དུ་
སྣང་། །དེ་ནས་ལྔ་ལྔ་ཟུང་དུ་བཅས། །རབ་ཏུ་གསལ་བའི་ཐིག་ལེ་འབྲེལ། །ཡབ་ཡུམ་སྐུ་ཡི་སྣང་བ་ཅན། །འཁྲུལ་སྣང་ཟད་ནས་ཞིང་ཁམས་སོ། །ཞེས་དང་། འདས་རྗེས་ལས། རིག་པ་ཚད་ཕེབས་སྣང་བ་ཡི། །ལོངས་སྤྱོད་རྫོགས་པའི་སྐུ་ངོས་ཟིན། །ཞེས་གསུངས་སོ། །རྫོགས་ཆེན་རིན་ཆེན་སྤུང་པ་ལས། དེ་ནས་ཆོས་ཉིད་ཟད་པའི་སྣང་བ་འཆར་ཏེ། ཉམས་ཀྱི་འཕེལ་དེ་རྣམས་ཐམས་ཅད་ཟད་ནས། སྐུ་གསུམ་གྱི་འཛིན་པ་རང་སར་སྟོང་སྟེ། རིག་པ་གཞི་ཐོག་ཏུ་ལྷང་ངེར་ཕེབས་ནས། །བསྒོམ་བྱ་སྒོམ་བྱེད་ཀྱི་འཛིན་པ་རང་སར་གྲོལ་ཏེ། མ་རིག་པའི་འཁྲུལ་པ་རྩ་བ་ནས་དག་ནས། ཀ་དག་ཀུན་ཏུ་བཟང་པོའི་དགོངས་པ་ལ་སླེབས་པའོ། །ཐལ་འགྱུར་ལས། ། ཆོས་ཉིད་ཟད་པའི་སྣང་བ་ནི། །ཉམས་ཀྱི་སྣང་བ་སྟོང་པ་ནི། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་པ་རང་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་དང་། དེ་ལྟར་ལུས་རྒྱུན་ཆད་ནས། ཟག་བཅས་ཀྱི་ཕུང་པོ་མི་སྣང་བར། འདི་ལ་མངོན་པར་སངས་རྒྱས་སོ། །ཞེས་གསུངས། འདས་རྗེས་ལས། ཆོས་
ཉིད་ཟད་པའི་སྣང་བ་ཡིས། །རྫོགས་ཆེན་བྱ་བྲལ་འབྲས་བུ་ཐོབ། །འདི་ལྟར་གཞི་ལམ་མཐར་ཕྱིན་ནས། །མྱང་འདས་གཞན་ནས་བཙལ་དུ་མེད། །ཅེས་གསུངས་པས། །རབ་ཟག་བཅས་ཀྱི་ཕུང་པོ་འོད་གསལ་དུ་གྲོལ། འབྲིང་ཆོས་ཉིད་བར་དོར་སངས་རྒྱས། ཐ་མ་སྤྲུལ་སྐུའི་ཞིང་ཁམས་ལྔར་བརྫུས་ཏེ་སྐྱེས་ནས་བར་དོ་མེད་པར་སངས་རྒྱས་སོ། །ཞེས་གསུངས་སོ།། ༼༢༥༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། འདི་བསྒོམས་པས་ཉམས་ལེན་མཐར་མ་ཕྱིན་བར་འཆི་བའི་དུས་བྱུང་ན། འཕོ་བ་ལམ་གྱི་སྐྱེལ་མ་འདི་བསྒོམ། དེ་ཡང་ཀུན་བཟང་དགོངས་པ་ཀུན་འདུས་རྒྱུད་ལས། འཆི་རྟགས་མ་བྱུང་བཏབ་གྱུར་ན། །ལྷ་བསད་ཉེས་པ་ཤིན་ཏུ་ཆེ། །སྐྱེ་བ་ལྔ་བརྒྱར་མི་ལུས་བསྒྲིབས། །ཞེས་གསུངས་པས། རིམ་གྲོ་ཅི་འགྲུབ་ལ་འབད། དེས་ཀྱང་མ་ཕན་འཆི་ངེས་པར་གྱུར་ནས། ཐུགས་དམ་མི་ཟིན་དོགས་པའམ། ཟིན་ཀྱང་རོ་བདག་མེད་ཡིན་ན། འཕོ་བ་བསྒོམ་པར་བྱ་སྟེ། ཆགས་ཞེན་མེད་པ་གལ་ཆེ་བས། མདུན་གྱི་ནམ་མཁར་བླ་མ་ཡི་དམ་ཐམས་ཅད་སྐྱབས་འགྲོ་དུས་ལྟར་གསལ་བཏབ་
ལ། རང་གི་ལུས་ལོངས་སྤྱོད་སྦྲ་གུར་ཁང་པ་ཞིང་ནོར་རྫས་ཉེ་དུ་སོགས། ཆགས་ཞེན་སྐྱེ་བའི་ཡུལ་ཐམས་ཅད་མཎྜལ་གཅིག་ཏུ་བསྡུས་ཏེ། ལན་གསུམ་འབུལ་བར་དམིགས་ཏེ། ས་གཞི་སྤོས་བྱུགས་མ་ཚར་གསུམ་འདོན། ཀརྨ་པཀྵིའི་ཞལ་ནས། ཁྲོམ་ཆོས་ནམ་བྱེད་དོ་ཅོག་གདམས་ངག་འདི་སྤྲོད་པར་བྱའོ། །གཞན་གྱི་ཤི་ཆོས་བྱེད་ན་ཡང་འདི་ཀུན་གྱིས་སྐད་ཆེན་པོར་བསྒྲགས་ནས་འཕོ་བ་བཏབ་ན་སྐད་ཅིག་ཉིད་ལ་སངས་རྒྱས་པར་འགྱུར་རོ། །འཕོ་བ་འདི་མི་རྣམས་ཀུན་ལ་བསྟན་ན་ཕྲིན་ལས་ཤིན་ཏུ་ཆེ་བར་གསུངས་པ་ཡིན་ནོ།། ༈ །རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ། སྐུ་ལུས་ཀྱི་ནང་སྟོང་སང་ངེ་བར་བསྒོམ། འོག་སྒོ་དང་གསང་གནས་དང་ཁ་དང་། ལྟེ་བ་དང་སྣ་བུག་གཉིས་རྣ་བ་གཉིས། སྨིན་མཚམས་ཚངས་སྨེ་རྣམས་ཧྲཱིཿཡིག་དམར་པོ་རེ་རེས་བཀག་པར་བསྒོམ། རང་གི་ལུས་ཀྱི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ། ཡར་སྣེ་ཚངས་བུགས་སུ་རིག་དུང་གི་ཁ་ལྟར་ཧད་པོར་ཡོད་པ། མར་སྣེ་ལྟེ་འོག་སུམ་མདོར་ཕཊ་ཀྱིས་བཀག་ནས་ཕུག་རྡུགས་སུ་ཡོད་པར་རང་གི་སྙིང་གར་པདྨ་དང་
ཟླ་བའི་གདན་ལ། རང་གི་རླུང་སེམས་རྣམ་པར་ཤེས་པའི་ངོ་བོ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་བཞི་པ་ཚོན་གང་བ་སྐུ་ཆུང་ལ་ཡན་ལག་དོད་པ། བཀྲག་མདངས་གཟི་བརྗིད་དང་ལྡན་པ་ཞིག་བསྒོམ། རང་གི་སྤྱི་བོར་མཐོ་གང་ཙམ་དུ་པདྨ་དམར་པོ་འདབ་མ་སྟོང་ལྡན་དང་ཟླ་བའི་དཀྱིལ་འཁོར་ཉ་གང་བའི་སྟེང་དུ། རྩ་བ་དང་བརྒྱུད་པའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་གཅིག་ཏུ་བསྡུས་པའི་ངོ་བོ་སངས་རྒྱས་འོད་དཔག་ཏུ་མེད་པ་སྐུ་མདོག་པདྨ་རཱ་ག་ལྟར་དམར་བ། ཞལ་གཅིག་ཕྱག་གཉིས་མཉམ་བཞག་གི་སྟེང་ན་བདུད་རྩིས་བཀང་བའི་ལྷུང་བཟེད་བསྣམས་པ། དབུ་གཙུག་ཏོར་ཞབས་འཁོར་ལོ་སོགས་མཚན་དང་དཔེ་བྱད་ཀྱིས་བརྒྱན་ཅིང་ཆོས་གོས་རྣམ་གསུམ་གསོལ་ཞིང་། རྡོ་རྗེའི་སྐྱིལ་ཀྲུང་གིས་བཞུགས་པར་བསྒོམ། བདེ་བ་ཅན་ནས་འོད་དཔག་མེད་དང་། ཕྱོགས་བཅུའི་ཞིང་ཁམས་ནས་བླ་མ་ཡི་དམ་སངས་རྒྱས་བྱང་སེམས་རང་གིས་རེ་ཞིང་ལྟོས་པ་ཐམས་ཅད་ཡིད་ཀྱིས་སྤྱན་དྲངས་ལ་བསྟིམ། དེ་སྐྱབས་གནས་ཀུན་འདུས་སུ་བློ་ཐག་བཅད་ནས། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཞེས་ལན་མང་དུ་བརྗོད། །
དེ་ནས་ཨོཾ་བརྗོད་པ་ཙམ་གྱིས་རང་སེམས་ཐུགས་རྗེ་ཆེན་པོ་དེ་སྤྱི་བོར་རྒྱངས་ཀྱིས་བྱོན་ནས། སྤྱི་གཙུག་ཏུ་སྐུ་མདོག་དཀར་ལྷག་ལྷག་བྱུང་བར་བསྒོམ་མ་ཎི་པདྨེ་ཧཱུྃ། བརྗོད་པས། རང་སེམས་ཐུགས་རྗེ་ཆེན་པོ་དེ་མར་བྱོན་སྙིང་གར་བཞུགས་པར་བསྒོམ། སྔར་ནས་དེ་འདྲ་ལན་འགའ་སྦྱངས་ན་ལེགས། རང་ཉིད་ནམ་འཆི་ལ་ཁད་རེད་པ་དང་། དེར་ཡོད་པ་རྣམས་ལ་ཡིག་དྲུག་སྐད་ཆེན་པོས་དབྱངས་ཐབས་སུ་འདོན་བཅུག་ལ། ཨོ་དྲག་ཏུ་བརྗོད་པ་ཙམ་གྱིས་རང་གི་རྣམ་ཤེས་ཐུགས་རྗེ་ཆེན་པོ་དབུ་མའི་ལམ་ནས་སྤྱི་བོར་རྒྱངས་ཀྱིས་འཕངས་ཏེ་འོད་དཔག་མེད་ཀྱི་ཐུགས་ཀར་བསྟིམ། ཡང་སྙིང་གར་ཐུགས་རྗེ་ཆེན་པོ་བསྒོམ་ཝིག་བྱེད་ལ་སྤར། ཡང་སྤུར་ཝིག་སྤར་ཝིག་བྱ། དབུགས་མ་སོང་གི་བར་དུ་དེ་ལྟར་བསྒོམ་མོ། །འཕོ་བ་ཐེབ་པའི་རྟགས་སུ། དྲོད་སྤྱི་བོར་འདུས་པ་དང་། རླངས་པ་དང་། སྤྱི་བོར་འབུར་བ་འབྱུང་། དེ་དུས་སམ་ཞག་གསུམ་ལྔ་བདུན་སོགས་ཀྱི་སོར། ནམ་མཁའ་ལ་འཇའ་ཚོན་འཁྲིགས་པ་དང་། རྟེན་རིང་བསྲེལ་གང་རུང་འབྱོན་ནོ། །ཡང་ཚེ་འདིར་རྫོགས་ཆེན་ལ་གོམས་འདྲིས་ཆེ། ཐོད་རྒལ་གྱི་ལྷ་སྐུ་རྟག་
ཏུ་མཐོང་བ་གཅིག་ཡིན་ན། ཐུགས་དམ་འདུག་རྒྱུ་མེད་དེ། ཀློང་གསལ་སྙིང་ཐིག་གི་ངོ་སྤྲོད་ལས། སྐྱེས་བུ་ནད་ཀྱིས་བཏབ་སྟེ། འཆི་བའི་རྟགས་རྣམས་རྫོགས་ཤིང་། །ཁྱད་པར་དུ་འབྱུང་བ་འདུས་ཏེ། དབུགས་ཕྱིར་རིང་ལ་ནང་དུ་སྡུད་དཀའ་བ། སྣང་བ་དཀར་དམར་དུ་འཆར་ཞིང་། ཤེས་པ་ཟིང་ལང་བའི་དུས་དེར། རྡོ་རྗེ་སེམས་དཔའི་གསང་ལམ་ཞེས་བྱ་བ། རང་གི་མདུན་གྱི་ནམ་མཁའ་ལ་རང་གི་ཙཀྵའི་ནང་ནས། འོད་ཀྱི་ཐག་པ་དཀར་པོ་བ་དག་འཐེན་པ་ལྟ་བུའམ་མདུང་ཤིང་བསླང་བ་ལྟ་བུའམ། སྐས་ཁ་ལྟ་བུ་ན་རེ་བ་གཅིག་ནམ་མཁའ་ལ་ཟུག་པར་འཆར་རོ། །འོན་ཏེ་ཁ་དོག་ལྔ་ལྡན་དུ་འབྱུང་ཡང་སྲིད་དོ། །དེའི་དུས་སུ་རང་རིག་དབང་པོ་ལ་གཏད། དབང་པོ་འོད་ཀྱི་ཐག་པ་ལ་པས། རིག་པ་འོད་ལ་ཐིམ་ནས་དུས་དེ་ཉིད་དུ་མངོན་པར་རྫོགས་པར་སངས་རྒྱས་པར་ཐེ་ཚོམ་མེད་དོ། །ཞེས་ཨོ་རྒྱན་ཆེན་པོས་གསུངས། སྒོམ་མེད་རྟོགས་པའི་གང་ཟག་ནི། ཐུགས་དམ་ལ་འདུག་རྒྱུ་མེད་དེ། ཚེ་འདིར་སངས་རྒྱས་ཚར་བའི་ཕྱིར། །རོ་གཅིག་རྟོགས་པའི་གང་ཟག་དེ་ཞག་གསུམ་ལྔ་བདུན་ཙམ་ལས་མི་བཞུགས་ཏེ་འཆི་བ་ཆོས་
སྐུར་སངས་རྒྱས། སྤྲོས་བྲལ་རྟོགས་པའི་གང་ཟག་དེ་ཡུན་རིང་ཐུང་ཅི་ཙམ་བཞུགས་མི་བཞུགས་རང་དབང་ཆེ་སྟེ། རྩེ་གཅིག་ཆེན་པོ་ནི་ཡུན་རིང་ཞིང་བརྟན་པོ་འོང་སྟེ། རྩེ་གཅིག་འབྲིང་ནི་གནད་གཅོད་འཇམ་ཞིང་བསྐུལ་མ་ཡོད་ན་ཟིན། འཆི་ཁ་ཞག་འདི་ཙམ་འདུག་སྙམ་པའི་དམ་བཅའ་གང་བྱས་སྟེང་དུ་འགྲོ་སྟེ། འཆི་སེམས་སྟོབས་དང་ལྡན་པའི་ཕྱིར་རོ། །རྩེ་གཅིག་ཆུང་ངུ་ནི་མི་ཟིན། ནུས་ན་ལུས་གནད་གཏུམ་མོ་ལྟར་དང་། མ་ནུས་ན་སེང་གེ་ཉལ་སྟབས་བྱས་ལ། སྐྱབས་འགྲོ་ཁྱད་པར་ཅན་བྱ། །བདག་འཆི་བའི་དེ་ཁོ་ན་ཉིད་འོད་གསལ་དོན་དམ་པའི་བདེན་པ་རྟོགས་པ་བྱས་ལ། སེམས་ཅན་ཐམས་ཅད་ཀྱི་དོན་དུ་སྲིད་པ་བར་དོར་ཟུང་འཇུག་ཕྱག་རྒྱ་ཆེན་པོའི་གོ་འཕང་མངོན་དུ་བྱའོ་སྙམ་དུ་སེམས་ཡང་ཡང་བསྐྱེད་འཕེན་པ་དྲག་པོ་བྱ། དེ་ནས་འཆི་བའི་ཚེ་མིག༴ རྣ་བར༴ སྣ༴ ལྕེ༴ ལུས༴ ས༴ ཆུ༴ མེ༴ རླུང་རྣམས་ཐིམ། ནང་རྟགས་དུ་བ་ལྟ་བུ། ཟླ་བ་ཤར་བ་ལྟ་བུ། ནང་རྟགས་སྲིན་བུ་མེ་ཁྱེར་ལྟ་བུ། ཕྱི་རྟགས་ཉི་མ་ཤར་བ་ལྟ་བུ། ནང་རྟགས་མར་མེ་ལྟ་བུ། ཕྱི་རྟགས་མུན་པ་ལྟ་བུ། ཕྱི་རྟགས་
སྐྱ་རེངས་ཤར་བ་ལྟ་བུ། ནང་རྟགས་ཤེས་པ་ནམ་མཁའ་སྤྲིན་དང་བྲལ་བ་ལྟ་བུ། འོད་གསལ་མཐའ་དབུས་མེད་པ་ཞིག་འཆར་རོ། །འོད་གསལ་ཆོས་སྐུ་མངོན་དུ་གྱུར། ཞེས་གསུངས་སོ། །ཐལ་འགྱུར་ལས། འདིར་ནི་ཆོས་ཉིད་བར་དོར་བཤད། །འཆི་བ་ལས་ནི་ཐར་བའི་ཚེ། །རྣམ་ཤེས་ནམ་མཁའ་དག་ལ་ཐིམ། །ནམ་མཁའ་འོད་གསལ་དག་ལ་ཐིམ་པའི་དུས། །ཕྲ་རགས་སྣང་བ་ཀུན་འགགས་ཏེ། །ཞེས་གསུངས་པས། སྐེ་རྩིས་ཆད་འཕྲོ་མཐེབ་མཛུབ་ཀྱིས་ཅུང་ཟད་མནན་པས། ཐུགས་དམ་ཟིན་པའི་གནད་ཆེའོ། །ཡང་ཐུགས་དམ་མི་ཟིན་དོགས་པའམ། འགྲོགས་དོགས་ན། ཐུགས་དམ་དང་ཆོས་སྐུའི་འཕོ་བ་ཟུང་འཇུག་ནི། དང་པོར་རང་ལུས་སྤྱན་རས་གཟིགས་སོགས་ཡི་དམ་གྱི་སྐུར་བསྒོམ། སྒོ་བརྒྱད་ཧིཡིག་གིས་བཀག །དབུ་མ་གསལ་གདབ། །སྤྱི་བོར་སངས་རྒྱས་འོད་དཔག་མེད་བསྒོམ་ལ། སྙིང་ཁར་རྣམ་ཤེས་ཐིག་ལེ་དཀར་པོ་ཧཱིས་མཚན་པ། སྤྱི་བོར་འོད་དཔག་མེད་ཀྱི་ཐུགས་ཀར་ལན་མང་སྤར། དེ་ནས་ཅི་ཡང་མི་བསྒོམ་པར་རིག་པ་སྙིང་ཁར་གཏད་ནས་ཉམས་ལེན་སེམས་ངོ་སྐྱོང་། དཀར་ལམ་དམར་ལམ་ཅི་ཤར་
ཡང་གང་ཤར་གྱི་ངོ་བོ་ལ་བལྟས། ཕྱི་དབུགས་ཆད་ཙམ་ནས་གདུང་གཡོགས་པས་གདུང་བཅས་གཟབ། མཐེབ་མཛུབ་ཀྱིས་སྐེ་རྩིས་ཅུང་ཟད་མནན། ཐུགས་ཡི་དམ་གསལ་འདེབས་ཤེས་ན་གང་ཤེས་བྱ། མ་ཤེས་ན་མིང་ནས་བོས་ལ། ཐུགས་དམ་མ་ཡེངས་ཞེས་ལན་གསུམ་བརྗོད། དེས་འོད་གསལ་དང་པོ་ལ་ངོ་འཕྲོད་དེ་གྲོལ་ལོ་གསུངས། ལུས་ཀྱི་གཟུགས་བཟང་ངན་ནི་གདུང་བཅས་པའི་བྱེད་ལས་ཡིན། ལུས་སེང་གེའི་ཉལ་སྟབས་ཡིན་ཀྱང་རུང་སྟེ། ཕུང་པོ་བཀྲག་མདངས་བཟང་བ་དང་། མིག་ཟིམ་བུ་ཁ་འཛུམ་པ་འདྲ། སེམས་ངོ་ཉམས་ལེན་ཡོད་པ་དེ་ཡི་དྲུང་དུ་བསྡད་ན། ཉམས་རྟོགས་བཟང་པོ་འཆར་བ་ནི་ཐུགས་དམ་ཡིན། ཞི་གནས་བདེ་གསལ་མི་རྟོག་པའི་ཉམས་ལ་ཆགས་པའི་རིགས། བཀྲག་མདངས་བཟང་བ་སོགས་ལེགས་པར་འོང་། བསྐྱེད་རིམ་བརྟན་པོས་ཐུགས་ཀའི་ས་བོན་ལ་རིག་པ་གནས་པར་ལྷག་པར་ཐུགས་དམ་བརྟན། དེ་དག་ལ་ལྷག་མཐོང་གི་ངོ་སྤྲོད་ཡང་ཡང་གདབ་ན། གོལ་སར་མི་འཆོར་ལམ་དུ་འགྲོའོ། །ཉམས་ལེན་མེད་ཅིང་ཁྲིད་ཀྱང་ཞུ་མ་མྱོང་ན། ཐུགས་དམ་ལ་བསྡད་པ་འདྲ་བ་འབྱུང་བ་
ནི། དྲི་ཟ་དང་བགེགས་དང་གཤེད་ཀྱིས་བདག་ཏུ་བཟུང་བ་ཡིན་ཞེས་ཆོས་དྲུག་ཆེན་མོ་ལས་བཤད། འོད་གསལ་ཐུགས་དམ་དེ་ངོས་མ་ཟིན། བེམ་རིག་བྲལ་མ་ཐག །ཡང་འོད་གསལ་གཉིས་པ་འཆར་ཏེ། དེ་ཚེ་ཡང་ཐུགས་དམ་མ་ཡེངས་ཞེས་བརྗོད་ན། བེམ་རིག་བྲལ་ཚར་ཡང་། ཉམས་ལེན་ངོས་ཟིན་ནས་མི་འཁྲུལ་བར་ཡང་སྲིད་གསུངས། བ་བཞོ་ཡུན་དང་ཞག་གཅིག་དང་། །ཕལ་ཆེར་ཞག་གསུམ་ཉི་མའི་དྲོས་བཞིར་གནས། བཀའ་གདམས་གླེགས་བམ་ནས་ལ་ལ་ཞག་བདུན་གནས་པ་ཡང་ཡོད་གསུངས་པས། དེ་ཚུན་ལ་འཕོ་བ་འདེབས་རུང་། དེ་ནས་ཐུགས་དམ་མ་ཟིན་ན་ཇི་ལྟར་འཆར་ཚུལ་ནི། ཐུགས་རྗེ་ཆེན་པོ་ངན་སོང་རང་གྲོལ་ལས་ཀྱང་། སྒོ་གསུམ་གྱི་ཉམས་ལེན་ཐམས་ཅད་དེ་ལ་དུས་བརྒྱ་འགྱུར་གྱིས་གསོལ་བས་ལུས་ལྷའི་ང་རྒྱལ་གྱིས་སྣང་སྲིད་ཐམས་ཅད་འོད་དང་འོད་ཟེར་འདྲེས་པ་ལྟ་བུ་ལྷའི་རྣལ་འབྱོར་དང་། ངག་སྔགས་ཀྱི་རྣལ་འབྱོར་གྱིས་སྒྲ་ཐམས་ཅད་གྲག་སྟོང་ཡི་གེ་དྲུག་པའི་སྒྲ་དབྱངས་བྲག་ཆ་ལྟ་བུ་དང་། སེམས་ཆོས་ཉིད་ཀྱི་རྣལ་འབྱོར་གསལ་སྟོང་དབྱེར་མེད་ཉི་མ་དང་ཉི་མའི་འོད་འབྲལ་མི་ཤེས་པ་ལྟ་བུ་དང་། སྒྲ་དང་འོད་
དང་ཟེར་དང་གཟུགས་སྣ་ཚོགས་ཅི་ཤར་ཡང་འཇིགས་པ་མེད་པར་རང་ལ་རང་ཤར་དུ་གྲོལ་བས་འདི་ནི་གདམས་པ་མན་ངག་ཟབ་མོ་ཐམས་ཅད་ཀྱི་མཆོག་ཏུ་འགྱུར་རོ། །དེ་ལས་མ་གྲོལ་ན་ཞི་བ་དང་ཁྲོ་བོ་དང་། ཞི་མ་ཁྲོ་ལ་སོགས་པ་ཞི་ཁྲོ་དམ་པ་རིགས་བརྒྱའི་ལྷ་ཚོགས་ཐམས་ཅད་རིམ་གྱིས་འཆར་རོ། །ཞག་བདུན་དང་བཅུ་བཞི། ཉི་ཤུའི་བར་དུ་སྤྲུལ་པའི་སྣང་བ་འཆར་བ། གཟུགས་ལ་འབྲོས། འོད་ལ་སྐྲག །ཐིག་ལེ་ལ་བསྔངས། སྒྲ་ལ་འཇིགས། ཟེར་ཐག་ལ་ལྟར་མི་བཟོད་པའི་དུས་གཅིག་འོང་། །དེའི་དུས་ཇོ་བོ་ཐུགས་རྗེ་ཆེན་པོ་སྒོམས་ཤིག །སྙིང་པོ་ཡི་གེ་དྲུག་པ་སྒྲོངས་ཤིག །འོད་ཐམས་ཅད་རང་འོད། སྒྲ་ཐམས་ཅད་རང་སྒྲ། གཟུགས་ཐམས་ཅད་རང་གཟུགས་སྣང་སྟོང་། ཟེར་ཐམས་ཅད་རང་ཟེར་རང་ཤར་དུ་སྒོམས་ཤིག །ཅེས་དང་། ཐུགས་རྗེ་ཆེན་པོ་པདྨ་ཞི་ཁྲོ་ལས། རབ་དག་པ་མཁའ་སྤྱོད་ཀྱི་གནས་སུ་འགྲོ་བ་ནི། འཕེན་པ་འདི་ལྟ་བུར་བཏང་སྟེ། ཀྱེ་མ་བདག་བསྐལ་པ་གྲངས་མེད་ཚད་མེད་ཐོག་མ་མེད་པའི་དུས་རིང་པོ་དེ་ཙམ་ཞིག་ནས་ད་རུང་ཡང་འཁོར་བའི་འདམ་འདིར་ལུས་པ་ནི་སྐྱོ་བ་ལ། སྔོན་ནས་
དེ་སྙེད་ཅིག་སངས་རྒྱས་པའི་རིང་ལ་བདག་མ་གྲོལ་བ་འདི་ཨ་ཙ་མ། ད་ནི་འཁོར་བ་ལ་སྐྱུགས་རེ་ལོག །ཞེ་རེ་འཇིགས། གཞུག་རེ་བུད། ད་ནི་བོས་པའི་གྲབ་བྱས་རེ་རན་ནས་འདུག །བདག་རང་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སངས་རྒྱས་སྣང་བ་མཐའ་ཡས་ཀྱི་ཞབས་དྲུང་དུ་མེ་ཏོག་པདྨའི་ཁ་ནས་བརྫུས་ཏེ་སྐྱེ་བ་བྱ་དགོས་སྙམ་པའི་ནུབ་བདེ་བ་ཅན་གྱི་ཞིང་ཁམས་སུ་འདུན་པ་དྲག་ཏུ་གཏད་དོ། །རྩེ་གཅིག་ཏུ་མ་ཡེངས་པར་བྱས། པདྨའི་སྙིང་པོ་ལ་བརྫུས་ཏེ་སྐྱེའོ། །ཞེས་དང་། མཁའ་འགྲོ་ཀུན་གྱི་སྙིང་ཐིག་ཀློང་གསལ་རྒྱུད་ལས། ཀྱི་ལས་དག་པ་དང་། ངོ་སྤྲོད་ཐོབ་པ་རྣམས་དང་། དུས་དེ་ཉིད་ལ་སྣང་བ་འགྱུར་ནས། ནུབ་ཕྱོགས་བདེ་བ་ཅན་གྱི་ཞིང་ཁམས་སུ་ཡར་འགྱུར་ཏེ། དེར་སངས་རྒྱས་སྣང་བ་མཐའ་ཡས་ཀྱི་ཐུགས་ཀར་ཐིམ། ཡུམ་གྱི་པདྨ་ལས་ཐོན་ནས། པདྨ་རིགས་ཀྱི་གཙོ་འཁོར་འགྱུར་ཏེ། སངས་རྒྱས་ནས་འཁོར་བ་དོང་སྤྲུགས་པའོ། །ཞེས་དང་། ཕག་གྲུའི་ཐབས་ལམ་ཚིགས་བཅད་མ་ལས། དེ་ཡང་འཕེན་པ་འདི་བཞིན་བཏང་། །བདེ་བ་ཅན་གྱི་ཞིང་ཁམས་སམ། །པདྨོ་ཅན་གྱི་ཞིང་ཁམས་སུ། །བརྫུས་སྐྱེས་ལ་ཁ་འགྱུར་ནས། ནུབ་སངས་རྒྱས་ནས་འཁོར་བ་བས། །བརྫུས་སྐྱེས་
སྐྱེ་བ་བསམ་པ་ཡི། །འདུན་པ་དྲག་པོ་བཏང་བར་བྱ། །ཞེས་གསུངས་པ་ལྟར་ཞིང་ཁམས་དེར་འགྲོ་བར་གྱིས་ཤིག། ༼༢༦༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། རྒྱུ་སེམས་ཅན་ལ་འབྲས་བུ་སངས་རྒྱས་སྒྲུབ་པའི་ཐབས། གཞི་ལམ་འབྲས་གསུམ་དུ་བསྡུས་ཏེ་བཤད་ན། མདོ་སྡེ་མྱ་ངན་འདས་ཆེན་ལས་ཀྱང་། དཔེར་ན་འོ་མ་ལ་མར་གྱིས་ཁྱབ་པར་གནས་སོ། །དེ་བཞིན་དུ་དེ་བཞིན་གཤེགས་པའི་སྙིང་པོས་ཀྱང་སེམས་ཅན་ཡོངས་ལ་ཁྱབ་པར་གནས་སོ། །ཞེས་དང་། མདོ་སྡེ་རྒྱན་ལས་ཀྱང་། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་པ་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། ། ཞེས་གསུངས། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་། ཀྱེ་རྡོ་རྗེ་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབ། །ཅེས་གསུངས་སོ། །གློ་བུར་དྲི་མ་དེ་བསལ་ནས། ཚེ་གཅིག་ལུས་གཅིག་ལ་སངས་རྒྱས་པའི་ཐབས། ཕྱག་རྫོགས་
ཟུང་འཇུག་འདི་ཉིད་ཉམས་སུ་བླངས་བས་ལམ་བགྲོད་དེ། གླིང་རས་ཀྱི་ཞལ་ནས། བཞི་གསུམ་བཅུ་གཉིས་ཚོགས་ཀྱི་ལམ། །རྟོགས་པ་གཅིག་གིས་བགྲོད་པ་ཡིན། །ཞེས་གསུངས། ཁྲིད་ཡིག་ཆེན་མོ་ལས། རྩེ་གཅིག་ཚོགས་སྦྱོར་སྤྲོས་བྲལ་མཐོང་བའི་ལམ། །རོ་གཅིག་སྒོམ་མེད་འབྲིང་མན་བསྒོམ་ལམ་སྟེ། །སྒོམ་མེད་ཆེན་པོ་རྫོགས་པའི་སངས་རྒྱས་སོ། །ཞེས་གསུངས་སོ། །དེ་ལ་ས་ལམ་དེ་ཡང་ཐོབ་མཁན་ཡང་མང་ན། དངོས་སུ་རྟགས་དང་ཡོན་ཏན་མེད་པ་ཅི་ཞེ་ན། བྱམས་པ་ལུང་བསྟན་པའི་མདོ་ལས། །དགེ་སློང་མ་ཕམ་འདི་བསྐལ་བཟང་སངས་རྒྱས་ལྔ་པར་ལུང་བསྟན་ན། འདི་ལ་རྟགས་དང་ཡོན་ཏན་ཅི་ཡང་མི་འདུག་པས། འདི་རྒྱལ་བ་བྱམས་པར་འགྱུར་སྲིད་དམ་ཞེས་དགེ་སློང་རྣམས་ཐེ་ཚོམ་དུ་གྱུར་པས། བཅོམ་ལྡན་འདས་ཀྱིས་བྱམས་པ་ལུང་བསྟན་གྱི་མདོ་གསུངས་པ་དེས། རྟགས་དང་ཡོན་ཏན་ཡོད་མེད་ཀྱིས་རྟོགས་པ་མཐོ་དམན་གྱི་ཚོད་མི་ཟིན་པ་དེ་གསལ། རྗེ་ཕག་མོ་གྲུ་པའི་ཞལ་ནས། འདི་ལ་ཐེ་ཚོམ་མི་དགོས་ཏེ། །ཉི་མ་ཤར་བ་ཙམ་གྱིས་ནི། །ས་གཞི་དྲོ་བར་མི་ནུས་ཀྱང་། །རིམ་གྱིས་འོད་ཟེར་རྒྱས་ནས་
གྲོལ། །མདོ་སྔགས་ཀྱི་འབྲས་བུ་སངས་རྒྱས་དོན་དུ་གཉེར་བ་ཡིན་པས། གནས་སྐབས་ཀྱི་རྟགས་དང་ཡོན་ཏན་ཡོད་མེད་ལ་མ་ལྟོས། མཁའ་ལ་རྒྱུ་བའི་ཡི་ལ་དྭགས་དང་འབྱུང་པོ། བྱ་དང་གཅན་གཟན་འགའ་ཞིག་ལའང་ཡོད་པར། ཞི་གནས་ཁ་རྐྱང་ལ་བརྟེན་པའི་མངོན་ཤེས་གྲུབ་རྟགས་ནི། མུ་སྟེགས་པ་དང་བོན་པོ་ལ་ཡང་ཡོད་པས། གླིང་རྗེ་རས་པས། གྲུབ་ཆེན་བརྒྱད་ལ་མངའ་བརྙེས་ཀྱང་། །ངོ་མཚར་ཆེ་ཙམ་མ་རྟོགས་པ། །བྱང་ཆུབ་ཐོབ་ལ་ཕན་རྒྱུ་ཆུང་། །ཞེས་གསུངས་སོ། །འདི་སྐབས་མདོ་སྔགས་འབྲས་བུའི་ཁྱད་པར་ནི། དགེ་བའི་བཤེས་གཉེན་འགའ་ཞིག་གི་བཞེད་པ་ལ། མདོ་ལུགས་ཁོ་ནས་སངས་རྒྱས་མི་ཐོབ་པར། ས་བརྒྱད་ཡན་ནས་སྔགས་ལ་འཇུག་དགོས་ཟེར། ལ་ལས་ས་བཅུའི་མཇུག་ཏུ། ཕྱོགས་བཅུའི་སངས་རྒྱས་ཀྱི་འོད་ཟེར་ཆེན་པོས་དབང་བསྐུར་བ་དེས་ཆོག་སྔགས་ལ་འཇུག་མི་དགོས་པ་མདོ་ལུགས་ཀྱིས་སངས་རྒྱས་ཡོད་ཟེར། མི་བསྐྱོད་རྡོ་རྗེས། རང་ལུགས་མདོ་ལུགས་ཀྱིས་སངས་རྒྱས་བསྒྲུབ་པས། སྔགས་ལུགས་ཀྱིས་སངས་རྒྱས་ཞོར་འབྱུང་དུ་མི་ཐོབ་ལ། སྔགས་ལུགས་ཀྱིས་སངས་
རྒྱས་བསྒྲུབ་པས་མདོ་ལུགས་ཀྱིས་སངས་རྒྱས་ཞོར་འབྱུང་དུ་འགྲུབ་པར་བཞེད་དོ། །དེ་བཞིན་དུ་ཨོ་རྒྱན་རིན་པོ་ཆེའི་ཞལ་ནས། དེ་ཡང་རྫོགས་ཆེན་གྱི་ཆོས་ཉིད་ཟད་པ་དང་། མདོ་ལུགས་ཀྱི་ལམ་ལྔ་ལས། མཐར་ཕྱིན་པའི་ལམ་དང་། ཡོན་ཏན་མཉམ་མོ་སྙམ་ན། གཏན་ནས་མི་མཉམ་སྟེ། མདོ་ལུགས་ཁོ་རང་གིས་ས་བཅུ་ལམ་ལྔའི། ཡོན་ཏན་བརྒྱ་ཕྲག་དྲུག་ཅུའི་རྩལ་རྫོགས་ནས་མཐར་ཕྱིན་པ་ཡིན་ཀྱང་། ད་རུང་སྔགས་ཀྱི་ཡོན་ཏན་དང་རྩལ་མ་མཐོང་ཞིང་མ་རྫོགས་པའི་ཕྱིར་རོ། །ཆོས་ཉིད་ཟད་ས་དང་། མཐར་ཕྱིན་པའི་ལམ་གཉིས། ཁྱད་པར་ཤིན་ཏུ་གལ་ཆེའོ། །དེ་ཡང་ཕྱག་རྫོགས་ཟུང་འཇུག་ཐུགས་རྗེ་ཆེན་པོའི་དམར་ཁྲིད་འདི་ནི། ཐེག་པ་དགུའི་ཉམས་ལེན་ཐམས་ཅད་ཚང་བ་ཡིན་པས། ས་ལམ་དང་འབྲས་བུ་ཡང་། གྲུབ་ཆེན་ཀརྨ་པཀྵིའི་ཞལ་ནས། ཐེག་དགུའི་སྒྲ་དོན་རྟོགས་པ་དང་། །ནཱ་རོའི་བརྒྱུད་པས་བྱིན་བརླབ་ཅིང་། །རྣལ་འབྱོར་རང་བྱུང་རྡོ་རྗེ་ཡང་། །དག་སྣང་ས་ར་ཧ་དང་མཇལ། །སངས་རྒྱས་རྣམས་ཀྱི་བསྟན་པ་ནི། །རྒྱ་མཚོ་མཐའ་ཡས་གཏིང་དཔག་དཀའ། །དབང་པོ་རབ་འབྲིང་ཐ་མ་རྣམས། །འགའ་
ཞིག་བསྒྲོད་ནས་མངོན་སངས་རྒྱས། །གཅིག་ཆར་བ་ཡི་གང་ཟག་རྣམས། །རྟོགས་ཐོབ་དུས་མཚུངས་ཀུན་ཏུ་བཟང་། །ས་ལམ་བསྒྲོད་དང་མི་བསྒྲོད་པའི། །འཁོར་འདས་ཀུན་ལ་ཁྱབ་པར་ཡང་། །ས་ལམ་རིམ་པ་ཉི་ཤུ་གཅིག །ཡང་དག་དོན་གྱི་འོག་མིན་དུ། །ཐམས་ཅད་རྫོགས་པ་སྤྱི་གཅིག་ས། །གནས་ལུགས་ཀུན་བཟང་ཆོས་ཀྱི་དབྱིངས། །རྫོགས་ཆེན་ཨ་ཏི་ཡོ་ག་ནི། །ཐེག་པ་ཀུན་ལས་འདས་པ་སྟེ། །ས་ལམ་རིམ་པ་བཅུ་དྲུག་ཀྱང་། །ཡང་དག་དོན་གྱི་འོག་མིན་དུ། །གདོད་ནས་ཐམས་ཅད་རང་བཞིན་རྫོགས། །འབྲས་བུ་ལམ་རྟགས་བྱེ་བྲག་རྣམས། །རྩོལ་མེད་ལྷུན་གྱིས་གྲུབ་པ་ཡི། །རང་རིག་འོག་མིན་གནས་སུ་རྫོགས། །ཞེས་གསུངས།། ༼༢༧༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། འདི་ཉིད་བསྒོམས་པས་ས་ལམ་ཇི་ལྟར་བགྲོད་པའི་ཚུལ། ཁྲིད་ཆེན་རྩ་ཚིག་ལས། རྩེ་གཅིག་ཞི་ལྷག་དབྱེར་མེད་དོན་ལ་གནས། །ཞེས་གསུངས། དྭགས་པོ་རིན་པོ་ཆེས། རྩེ་གཅིག་གི་རྣལ་འབྱོར་ནི། གསལ་ལ་མ་འགགས་པ། སྐད་ཅིག་མའི་ཤེས་པ་དེ་ཡིན་གསུངས། །
ཀླུ་སྒྲུབ་ཀྱི་རིམ་ལྔ་ནས་གསུངས་པའི་སེམས་དབེན་དང་། ལྭ་ཝ་པོས་གསུངས་པའི་ལྷུན་གྱིས་གྲུབ་པའི་རྣལ་འབྱོར་དང་། ཤ་ཝ་རི་པས་ཏིང་འཛིན་ཉམས་སུ་མྱོང་བའི་རྣལ་འབྱོར་དང་། མེ་ཏྲི་པས་སྒྲོ་འདོགས་ཆོད་པའི་དུས་དང་། ལང་ཀར་གཤེགས་པའི་མདོ་ལས། བདག་མེད་ཀྱི་རྣལ་འབྱོར་དང་། བྱིས་པ་ཉེར་སྤྱོད་བསམ་གཏན་ཆོས་དྲུག་གི་ཟིན་པ་དང་། བུམ་དབང་གི་དོན་དེ་རྣམས་དོན་གཅིག་པར་བཞེད། ཕག་མོ་གྲུ་པས། རྩེ་གཅིག་འབྲིང་པོའི་ཏིང་ངེ་འཛིན་ལ་དབང་ཐོབ་གསུངས། རྩེ་གཅིག་འབྲིང་གསལ་སྟོང་འདྲ་ཟློབ་དྲན་པས་ཟིན་ན། རྒྱུན་དུ་མ་ཟིན་ནའང་རེས་ཡོངས་བ་དེར་སྦྱོར་ལམ་དྲོད་རྩེ་ཟེར་ཏེ། མྱོང་བ་བརྟན་དུ་སོང་ནས་གསལ་སྟོང་དེ་དྲན་པས་ཟིན་ན་རྒྱུན་དུ་ལོང་ངོ་། །རེས་མ་ཟིན་ཡང་ཡོང་ངོ་། །ཕག་གྲུའི་ཞལ་ནས། རྩེ་གཅིག་ཆེན་པོ་ཉམས་ཀྱི་འཁོར་ཡུག་ཏུ་སོང་བའོ། །ཞེས་དང་། གྲུབ་ཐོབ་བརྒྱུད་པའི་ཞལ་ལུང་ལས། ཉམས་ཀྱི་སྒོམ་མེད་ཡིན་ཀྱང་། རྟོགས་པའི་རྣལ་འབྱོར་བཞིའི་རྩེ་གཅིག་གི་རྣལ་འབྱོར་ཡིན། ཞེས་གསུངས་པ་དང་། བདག་གི་སློབ་དཔོན་མཁས་པ་ཆེན་པོ་རྒྱལ་རོང་པའི་ཞལ་ནས། སྦྱོར་ལམ་
ཆོས་མཆོག་གི་སྐབས་སུ། སྟོང་ཉིད་མངོན་དུ་རྫོགས་སྙམ་བྱུང་ཡང་། ད་རུང་སྟོང་ཉིད་རྫོགས་པ་ནི་མིན་གསུངས། དེ་རྣམས་དོན་གཅིག་པར་སྣང་། རྩེ་གཅིག་དང་སྤྲོས་བྲལ་གྱི་ཁྱད་པར་ནི། རྣམ་རྟོག་ཆོས་སྐུར་ཤར་མ་ཤར་ཡིན་ནོ། །ཨཱ་ལི་ཀཱ་ལི་ཆུ་ཀླུང་ཆེན་པོའི་མདོ་ལས། གཉིས་པ་སྒྱུ་མ་ལྟ་བུའི་ཏིང་འཛིན་གྱིས། །སྤྲོས་དང་བྲལ་བའི་མཉམ་བཞག་ཆེན་པོ་ལས། །བསམ་གྱིས་མི་ཁྱབ་ཏིང་འཛིན་རྩལ་དུ་ཤར། །དྲོད་ཐོབ་ནས་ནི་སྐྱེ་བ་རང་དབང་འགྱུར། །ཞེས་གསུང་སོ། །རྗེ་དྭགས་པོ་རིན་པོ་ཆེས། སྤྲོས་བྲལ་གྱི་རྣལ་འབྱོར་ནི། རིག་པའི་ངོ་བོ་སྐྱེ་མེད་དུ་མཐོང་ནས། ཡར་སངས་རྒྱས་ལ་མི་རེ། མར་འཁོར་བ་ལ་མི་དོགས། བར་དུ་སྣང་བ་ལ་མི་འཛིན། །གཞན་གྱིས་བསྒྱུར་དུ་མི་མཏུབ་པའོ། །ཞེས་དང་། རིམ་ལྔ་ལས། འོད་གསལ་དང་། ལྭ་བ་པས། བསམ་གྱིས་མི་ཁྱབ་དང་། ཤ་ཝ་རི་པས་རྣལ་འབྱོར་དང་། མཻ་ཏྲི་པས་དབང་ཐོབ་པའི་དུས་དང་། ལང་ཀར་གཤེགས་པའི་མདོ་ལས། གཟུགས་མེད་ཀྱི་རྣལ་འབྱོར་དང་། དོན་རབ་འབྱེད་པའི་བསམ་གཏན་དང་། གསང་དབང་གི་དོན་
རྣམས་གཅིག་པར་བཞེད། སྤྲོས་བྲལ་ངོ་བོ་མཐོང་བ་ཡིན་ཏེ། སྡུད་པ་ལས། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །ཀུན་ཤེས་མཐོང་བ་མེད་པ་སེམས་དཔའ་ཡང་མི་མཐོང་། །གང་ལ་རྣམ་པར་ཤེས་དང་ཡིད་སེམས་མཐོང་མེད་པ། །འདི་ནི་ཆོས་མཐོང་ཡིན་ཞེས་འདྲེན་པས་རབ་ཏུ་བཤད། །མཐོང་བ་དཔེ་གཞན་གྱིས་ནི་རྙེད་པར་ནུས་མ་ཡིན། །ནམ་མཁའ་མཐོང་ཞེས་སེམས་ཅན་ཚིག་ཏུ་རབ་ཏུ་བརྗོད། །ནམ་མཁའ་ཅི་ལྟར་མཐོང་བ་དེའི་དོན་དེ་བསམ་པར་གྱིས། །དེ་ལྟར་ཆོས་མཐོང་བ་དེ་བཞིན་གཤེགས་པས་བསྟན། །ཞེས་པའི་དོན་ནོ། །ཡང་དགོན་པས། དེ་ལྟར་གསལ་སྟོང་གི་ངོ་བོ་མཐོང་ཡང་། སྟོང་འཛིན་ངེས་ཤེས་ཀྱི་འཛིན་པའི་འཁྲིས་ཤིག་མ་བྲལ་བར་འདུག་ན། ཉམས་རྟོགས་ཀྱི་ཤན་མ་ཕྱེད་པས། སྤྲོས་བྲལ་ཆུང་ངུ་ཡིན།། ཞེས་དང་། རྗེ་ཕག་གྲུས་འབྲིང་པོས་རྩ་བྲལ་རྟོགས། ཞེས་དང་། དོ་ཧ་ལས། རྩ་བ་བྲལ་བ་དེ་ཉིད་སུས་ཤེས་པ། བླ་མའི་བཀའ་དྲིན་ཐོབ་པ་དེ་ཡི་མཆོག །ཅེས་གསུངས། རྗེ་ཕག་མོ་གྲུ་པས། སྤྲོས་བྲལ་ཆེན་པོས་ཕྱི་ནང་གི་ཆོས་ལ་སྒྲོ་འདོགས་ཆོད་པའོ། །ཞེས་
གསུངས། རྒྱལ་དབང་ཆོས་རྗེས། སྤྲོས་བྲལ་གྱི་རྩེ་གཅིག་ནི། གང་ཤར་གྱི་ངོ་བོ་ལ་ཡང་དག་གིས་དྲན་པས་མ་ཡེངས་པར། རྩེ་གཅིག་ཏུ་ལྟ་བ་དེ་ཡིན། སྤྲོས་བྲལ་གྱི་སྤྲོས་བྲལ་ནི། བལྟས་པའི་ཚེ་ན་སྤྲོས་པའི་མཐའ་གང་ལ་ཡང་མ་གྲུབ་པ་དེ་ཡིན། སྤྲོས་བྲལ་གྱི་རོ་གཅིག་ནི། ཐམས་ཅད་སྟོང་ཉིད་ཀྱི་ངང་དུ་རོ་གཅིག་པ་དེ་ཡིན། སྤྲོས་བྲལ་གྱི་སྒོམ་མེད་ནི་དེ་ལས་བརྟན་པ་ཐོབ་ནས་ཉིན་མཚན་ཁོར་ཡུག་ཏུ་སོང་བ་དེ་ཡིན། ཞེས་གསུངས་པས། ཉམས་ཀྱི་སྤྲོས་བྲལ་ཆེ་འབྲིང་སོགས་ནི་སྐྱེ་མཁན་ཡང་མང་བས། རང་ཕོར་ངོས་ལེན་གྱི་ཚུལ་དུ་སོ་སོའི་ཉམས་རྟོགས་ངོ་ཤེས་པར་གྱིས་ལ། སོ་སོའི་སྐབས་སུ་གསུངས་པའི་ཉམས་ལེན་ལ་འབུངས་ཞུ། ༼༢༨༽་ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། གཞི་ཁྲེགས་ཆོད་ཕྱག་རྒྱ་ཆེན་པོ་ཉམས་སུ་བླངས་པས། ས་ལམ་བགྲོད་ཚུལ། འདི་ཡན་ཆད་ཉམས་ཐོག་ནས་བཤད་པར་དཀའ་ཞིང་། ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་ལས། གསུམ་པ་དཔའ་བར་འགྲོ་བའི་ཏིང་འཛིན་གྱིས། །དུ་མ་རོ་གཅིག་ས་བཅུའི་རྟོགས་པ་འཆར། །དུས་
གསུམ་རྒྱལ་བའི་སྲས་པོས་འགྲོ་དོན་མཛད། །རྩེ་ཐོབ་ནས་ནི་འཕེལ་བ་རྒྱུན་མི་འཆད། །ཅེས་དང་། ནཱ་རོ་པཎ་ཆེན་གྱི་ཞལ་ནས། གསུམ་པ་རོ་གཅིག་རྣལ་འབྱོར་འཆར། །ཞེས་གསུངས་ཏེ། དྭགས་པོ་རིན་པོ་ཆེས། རོ་གཅིག་གི་རྣལ་འབྱོར་ནི་སྣང་སྟོང་དབྱེར་མེད་དུ་རྟོགས་པའོ། །ཞེས་དང་། རིམ་ལྔ་ལས་སློབ་པའི་ཟུང་འཇུག་དང་། ལྭ་བ་པས་ཟུང་དུ་འཇུག་པ་དང་། མེ་ཏྲི་པས་གདེང་ཐོབ་པའི་དུས་དང་། ལང་ཀར་གཤེགས་པའི་མདོ་ལས། འཛིན་མེད་ཀྱི་རྣལ་འབྱོར་དང་། དེ་བཞིན་ཉིད་དམིགས་བསམ་གཏན་དང་། དབང་གསུམ་པའི་དོན་དང་། དེ་རྣམས་དོན་གཅིག་པའོ། །ཕག་མོ་གྲུ་པས། རོ་གཅིག་དུས་འཁོར་འདས་གཅིག་ཏུ་འདྲེས་གསུངས། ཡང་དགོན་པའི་ཞལ་ནས་། །རོ་གཅིག་འབྲིང་པོས་གཟུང་འཛིན་རྩ་བ་རྦད་ཀྱིས་ཆོད་པ་ནི། རྟོགས་པ་དེ་བརྟན་དུ་སོང་བས་རྟོགས་མཁན་དེ་དུ་མ་རོ་གཅིག་ཏུ་འདྲེས་ཏེ། ཡུལ་འཛིན་རྩ་བ་ནས་དག་པས་བེམ་པོ་ཕྱི་རུ་མ་ལུས། རིག་པ་ནང་དུ་མ་ལུས། སྣང་སེམས་གཅིག་ཏུ་ཀྲོང་ངེ་བ་དེ། རོ་གཅིག་འབྲིང་པོ་ཡིད་ལ་མི་བྱེད་པ་མཚན་ཉིད་པ་དེ་མངོན་དུ་གྱུར་པའོ་གསུངས། རྗེ་ཕག་མོ་
གྲུ་པས། རོ་གཅིག་ཆེན་པོ་ཆོས་རྣམས་མཉམ་པ་ཉིད་ཀྱི་ངང་དུ་ཞི་བའོ་གསུངས། རྒོད་ཚང་པས། རོ་གཅིག་པ་ནི་བརྒྱད་པ་ཡིན། །ཞེས་གསུངས། །རྒྱལ་དབང་ཆོས་རྗེས། རོ་གཅིག་གི་རྩེ་གཅིག་ནི། སྣང་གྲག་གི་ཆོས་ཐམས་ཅད་མཉམ་པ་ཉིད་ཀྱི་ངང་དུ་སྒྲོ་འདོགས་ཆོད་པ་དེ་ཡིན། རོ་གཅིག་གི་སྤྲོས་བྲལ་ནི། ཐ་དད་དམ་གཉིས་སུ་འཛིན་པའི་སྤྲོས་བྲལ་ཐམས་ཅད་མཉམ་པ་ཉིད་དེའི་ངང་དུ་འབྲལ་བ་མེད་པ་དེ་ཡིན། རོ་གཅིག་གི་རོ་གཅིག་ནི། མཉམ་པ་ཉིད་དེས་ཆོས་ཐམས་ཅད་ལ་ལོངས་སྤྱོད་པའམ། འཇུག་པའམ། ཐམས་ཅད་ལ་ཁྱབ་པར་རོལ་པ་ཡིན། རོ་གཅིག་གི་སྒོམ་མེད་ནི། དེ་ལ་བརྟན་པ་ཐོབ་ནས་ཉིན་མཚན་ཁོར་ཡུག་ཏུ་སོང་བ་དེ་ཡིན། རྗེ་ནཱ་རོ་པས། བཞི་པ་སྒོམ་མེད་རྣལ་འབྱོར་འཚར་གསུངས་པའི་དོན། གསང་བ་བསམ་གྱིས་མི་ཁྱབ་པའི་རྒྱུད་དང་། ཆུ་ཀླུང་ཆེན་པོའི་རྒྱུད་གཉིས་ཀ་ནས། བཞི་པ་རྡོ་རྗེ་ལྟ་བུའི་ཏིང་སྒྱུ་འཛིན་གྱིས། །བསྒོམ་དུ་མེད་པའི་ཉམས་ལེན་བརྩོན་པ་ལ། །རྣམ་མཁྱེན་སངས་རྒྱས་ཞིང་ཁམས་དཔག་མེད་མཐོང་། །མ་བཙལ་ལྷུན་གྲུབ་ཆོས་མཆོག་ཆེན་པོ་ཡིན། །ཞེས་
གསུངས། རྗེ་དྭགས་པོ་རིན་པོ་ཆེས། སྒོམ་མེད་ཀྱི་རྣལ་འབྱོར་ནི། ཅི་སྣང་ལྷན་སྐྱེས་ངོ་བོ་གཅིག་ཏུ་ཤར་བས། དྲན་རྟོག་ཐམས་ཅད་བསྒོམ་དུ་སོང་བ་ཡིན་གསུངས། རིམ་ལྔ་ལས་མི་སློབ་པའི་ཟུང་འཇུག །ལ་བ་པས་རྣམ་པར་དག་པ། ཤ་བ་རི་པས་རྣལ་འབྱོར་ཆེན་པོ། མེ་ཏྲི་པས་དེ་ཉིད་དུ་གྲོལ་བའི་དུས། ལང་ཀར་གཤེགས་པའི་མདོ་ལས། སྤྲོས་མེད་ཀྱི་རྣལ་འབྱོར་དང་། དེ་བཞིན་གཤེགས་པའི་བསམ་གཏན། དབང་བཞི་པའི་དོན་རྣམས་གཅིག་པར་བཞེད། རྗེ་ཕག་མོ་གྲུ་པས། སྒོམ་མེད་ཆུང་ངུའི་བསྒོམ་བྱ་སྒོམ་བྱེད་དང་བྲལ་གསུངས། རྗེ་ཕག་མོ་གྲུ་པས། སྒོམ་མེད་འབྲིང་པོས་ལྷུན་གྲུབ་ཀྱི་རང་ས་ཟིན་གསུངས། རྗེ་རྒོད་ཚང་པས། ཉིན་མོའི་དུས་སུ་ཡང་རྗེས་སྣང་སྒྱུ་མ་ཙམ་མངོན་ཡུན་སེ་གོལ་གཏོགས་པ་ཙམ་འདུག་ཀྱང་དྲན་པས་བཟུང་རྒྱུའི་ཐ་སྙད་མེད་པར་དེ་ཉིད་ངོ་བོ་རང་དགས་སུ་འགྲོ་གསུངས། རྗེ་ཕག་གྲུའི་ཞལ་ནས། སྒོམ་མེད་ཆེན་པོ་འོད་གསལ་གཉིས་འདྲེས་པའོ་གསུངས། རྒྱལ་དབང་ཆོས་རྗེས། སྒོམ་མེད་ཀྱི་རྩེ་གཅིག་ནི། བསྒོམ་བྱ་སྒོམ་བྱེད་དང་བྲལ་བའི་ངང་ལ་རྩེ་གཅིག་ཏུ་མཉམ་པར་བཞག་པ་དེ་
ཡིན། སྒོམ་མེད་ཀྱི་སྤྲོས་བྲལ་ནི། བློ་ལས་འདས་པ་སྟེ། བློ་ཡི་སྤྲོས་པ་ཐམས་ཅད་དང་བྲལ་བ་དེ་ཡིན། སྒོམ་མེད་ཀྱི་རོ་གཅིག་ནི། སྲིད་པ་དང་ཞི་བ་ཐམས་ཅད་སྒོམ་མེད་དེའི་དབྱིངས་སུ་རོ་གཅིག་པ་དེ་ལས་དབྱེར་རྒྱུ་རྡུལ་ཙམ་མེད་པ་དེ་ཡིན། སྒོམ་མེད་ཀྱི་སྒོམ་མེད་ནི། དེ་ལ་བརྟན་པ་ཐོབ་པ་དེ་ཡིན་ཏེ། རོ་གཅིག་མན་ཆད་ཀྱི་བརྟན་པ་ཐོབ་པ་ནི། གནས་སྐབས་ཀྱི་མཉམ་རྗེས་མེད་པ་ཡིན་ལ། སྒོམ་མེད་ཀྱི་བརྟན་པ་ཐོབ་པའི་ཚེ། མཐར་ཐུག་གི་མཉམ་རྗེས་མེད་པའོ། །དཔེར་ན་བསྐྱེད་རིམ་ལ་བརྟན་པ་ཐོབ་པ་དང་། རྫོགས་རིམ་ལ་བརྟན་པ་ཐོབ་པ་ལྟ་བུའོ།། ༼༢༩༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོ། ཕྱག་རྫོགས་ཟུང་འཇུག་གི་ཁྲིད་དོན་བསྡུ་དགོས་ཏེ། ཨོ་རྒྱན་རིན་པོ་ཆེའི་ཞལ་ནས། གཏམ་ལ་དགའ་བ་བསྡུ་དོན་ཡིན་ཞེས་གསུངས། དེ་ལ་བྱང་ཆུབ་སེམས་ང་ཡི་དམ་ལྷ། །བླ་མ་ཕྱག་རྒྱ་ཆེན་པོར་བསྒོམ། །བསྔོ་བའི་ཆོས་ཉིད་ཉམས་སུ་བླངས། །ཞེས་གསུངས་པས། དོན་ལྔ་པོ་དེའི་ནང་དུ་གསར་མའི་ལུགས་ཀྱི་མདོ་སྔགས་ཀྱི་ཉམས་ལེན་གྱི་རིགས་ཅི་
ཡང་མ་ཚང་བ་མེད་པ་ཡིན། ཁྲིད་འདི་ཡི་ལུགས་ཀྱིས་དེའི་སྟེང་དུ་རྫོགས་པ་ཆེན་པོ་ཐོད་རྒལ་བསྣན་པས། ཐེག་པ་དགུའི་ཉམས་ལེན་རྫོགས་པ་ཡིན། དེ་ཡང་གདན་ཐོག་གཅིག་གམ་ཐུན་གཅིག་ཉམས་སུ་ལེན་དགོས་ཏེ། དེ་ལྟར་ཡི་དམ་ཕྱག་ཆེན་བླ་མ་སེམས་བསྐྱེད། འོད་གསལ་བསྔོ་བ་དང་དྲུག་པོ་འདི། རྒྱུན་དུ་ཉམས་སུ་ལེན་དགོས། མཚམས་ལ་འདུག་ཀྱང་ཉམས་ལེན་འདི་ཡིན། རྒྱུན་ཁྱེར་དུ་ཐུན་བཞིའམ་གསུམ་མམ་སྔ་དྲོ་དགོང་མོ་ཐུན་གཉིས་སམ། ཐ་ན་ཉིན་རེར་ཐུན་རེ་བས་ཉམས་སུ་ལེན་ལོང་མེད་ན། ཡང་སྒོམ་རྒྱུ་འདི་ཡིན་ནོ། །དེའི་བསྒོམ་ལུགས་ཅི་ལྟ་བུ་ཞེ་ན། བདེ་བའི་སྟན་ལ་རྣམ་སྣང་ཆོས་བདུན་རབ། དེ་མི་ནུས་ན་མེ་ཐབས་དྲུག་ཆིངས་བྱས་ཀྱང་རུང་སྟེ། ཀྱེ་མ་ཐམས་ཅད་མི་རྟག་པའི་ཆོས་ཉིད་ཡིན་ཏེ། དེ་རིང་དགེ་སྦྱོར་ཡིད་ཚིམས་པ་ཞིག་བྱ་དགོས། སང་ཕྱི་ནས་ཅི་ཆ་བསམ་པ་བྱས་པས། སེམས་ཅན་ཐམས་ཅད་ཀྱི་དོན་དུ་བདག་གིས་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་བསྐྱེད་རྫོགས་ཟབ་མོ་ཉམས་སུ་བླངས་བསམ་པའི་ཀུན་སློང་བཟང་པོས། རང་གི་ལུས་འདི་ཐུགས་རྗེ་ཆེན་པོའི་སྐུར་ཝལ་གྱིས་བསྒོམ་སྟེ། །
དེའི་སྐུའི་ནང་སྟོང་སང་ངེ་བའི་ཐུགས་ཀར་ཟླ་བའི་དཀྱིལ་འཁོར་ཉ་རྒྱས་པའི་དབུས་སུ་ཧཱི༔ཡིག་དཀར་པོ་འགྲེང་སྟེ་གནས་པ། དེའི་མཐར་ཡི་གེ་དྲུག་པ་དཀར་པོ་གཡས་ཕྱོགས་སུ་འཁོར་བ། དེ་ལས་འོད་ཟེར་ཁ་དོག་སྣ་ཚོགས་འཇའ་ཟེར་ལྟ་བུར་ཕྱོགས་བཅུར་འཕྲོས་པས། ཕྱོགས་བཅུ་དུས་གསུམ་ན་བཞུགས་པའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་ཁ་བ་བུ་ཡུག་འཚུབ་པ་ལྟར་ཀྱི་ལི་ལི་བྱོན་ནས། རྩ་བ་དང་བརྒྱུད་པའི་བླ་མ་ཐམས་ཅད་རིགས་བདག་འོད་དཔག་མེད་ལ་ཐིམ་པས་བླ་མ་ཀུན་འདུས། ཡི་དམ་སངས་རྒྱས་བྱང་སེམས་ཐམས་ཅད་རང་ཉིད་ཡི་དམ་ཐུགས་རྗེ་ཆེན་པོ་ལ་ཐིམ་པས་ཡི་དམ་ཀུན་འདུས། དེ་རྣམས་ཀྱི་རྩ་སྔགས་དང་སྙིང་པོ་དང་ཉེ་སྙིང་ཐམས་ཅད་སྙིང་ཁའི་ཡིག་འབྲུ་དྲུག་ལ་ཐིམ་པས། གསང་སྔགས་དང་རིག་སྔགས་དང་གཟུངས་སྔགས་ཀུན་འདུས་སུ་བསྒོམ། དེ་ཡང་ལན་གཅིག་མིན་པར་ནན་ཏན་དུ་བསྒོམས་པས། བླ་མ་གཅིག་དང་ལྷ་གཅིག་དང་སྔགས་གཅིག་གིས་ཐམས་ཅད་འགྲུབ་པའི་མན་ངག་ཡིན། དེ་ནས་ཡིག་འབྲུ་འཁོར་བཞིན་པ་ལས་འོད་ཟེར་འཕྲོས་པས། ཕྱི་སྣོད་ཀྱི་འཇིག་རྟེན་
ཐམས་ཅད་བདེ་བ་ཅན་གྱི་ཞིང་ཁམས་སུ་གྱུར། ནང་བཅུད་འགྲོ་དྲུག་གི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར། སྐྱེ་འགྲོ་མིག་གིས་མཐོང་ཚད་ཐུགས་རྗེ་ཆེན་པོའི་སྐུར་ལམ་ལམ་བསྒོམ། གལ་ཏེ་གསལ་པོར་མ་ཟིན་ན་ཡང་། ཐུགས་རྗེ་ཆེན་པོ་ཡིན་སྙམ་པའི་མོས་པ་བྱ། དེ་སྣང་བ་སྐུའི་ཁྱེར་སོ་ཡིན་ཏེ། དེ་གསལ་ན་མཚམས་མ་ཐོན་ཀྱང་བཟོད། ཡི་གེ་དྲུག་པ་བུང་བའི་སྐད་ཙམ་སི་ལི་ལི་བཟླས། རང་གི་རམ་བུ་བཀྱག་པའི་ཚུལ་དུ་རིགས་དྲུག་གི་སེམས་ཅན་ཐམས་ཅད་ཀྱིས་ཡི་གེ་དྲུག་པ་འུ་རུ་རུ་བཟླས་པར་བསྒོམ། སྒྲ་སྐད་ཐམས་ཅད་ཡི་གེ་དྲུག་པའི་སྒྲར་བསྒོམ། དེ་གྲག་པ་གསུང་གི་ཁྱེར་སོ་ཡིན། དེ་གསལ་ན་སྐད་ཅིག་ལ་དུང་ཕྱུར་མང་པོ་འགྲོ་བས། སྔགས་བརྒྱ་རྩས་འཕགས་པ་འགྲུབ་པའི་གདམ་ངག །ངག་བཅད་མ་གྲུབ་ཀྱང་བཟོད། ཕྲེང་བ་ལ་སློབ་སོང་ཚད་ཀྱང་ཆད་ལྷག་ཁ་བཀང་དེས་འོང་བར་གསུངས། །དེ་ཡང་ཉམས་ལེན་བཟང་ན་དམིགས་པ་དེ་དག་སེམས་ངོ་མ་ཡེངས་པའི་ངང་ནས་བསྒོམ་ན་བསྐྱེད་རྫོགས་ཟུང་འཇུག་མཆོག་ཡིན། རྣམ་རྟོག་བསྒོམ་དུ་ཤར་ནས་དེ་འོང་བ་ཡིན་ཏེ། འགྱུ་བ་དེ་ཉིད་བསྒོམ་དུ་ཤར་བའི་ཚེ་
ཟུང་དུ་འཇུག་པ་ཡིན། ལས་དང་པོ་པས་དེས་ཟུང་འཇུག་མ་ཐུབ་ན། དང་པོ་བསྐྱེད་རིམ་གྱི་དམིགས་པ་དེ་དག་རྩེ་གཅིག་ཏུ་བསྒོམས་པས། དམིགས་པ་དེ་ལ་སེམས་གནས་པ་ཞི་གནས་ཡིན་པས། དེ་སྒོམ་མཁན་གྱི་སེམས་ལ་སེམས་ཀྱིས་ཧྲིག་གེར་བལྟས་པས། ཅིར་ཡང་མ་གྲུབ་པའི་སྟོང་པ་ཉིད་དུ་ལྷག་གེར་མཐོང་བ་དེ་ལྷག་མཐོང་ཡིན། དེའི་ངང་ལ་ཅི་གནས་སུ་མཉམ་པར་བཞག །ཡང་རྣམ་རྟོག་འཕྲོ་བ་དེའི་ངོ་བོ་ལ་བལྟས་ནས་རང་གྲོལ་དུ་བཞག་གོ །དེ་ལ་གོམས་ནས་རྣམ་རྟོག་གི་ངོ་བོར་གཅེར་རེ་ལྟ་མི་དགོས། གནས་པའི་ངང་ནས་འགྱུ་བ་ཅུང་ཟད་བྱུང་ཡང་གནས་པ་ལ་མི་གནོད། གནས་པའི་ངང་དུ་ཐིམ་པ་འབྱུང་། དེ་ལ་གོམས་པས་རྣམ་རྟོག་བསྒོམ་དུ་འཆར། ད་དུང་སེམས་ལ་ལྟ་རྒྱུ་གཅིག་ཡོད་པས་ངོ་བོ་མ་མཐོང་བ་ཡིན། དེ་ནས་ལྟ་མི་དང་ལྟ་རྒྱུ་གཉིས་གཅིག་ཏུ་འདྲེས། གསལ་སེང་ངེ་བདེ་མེ་རེ་བ་སྟོང་ཕྱམ་མེ་བ་སོགས་ལ་ངེས་ཤེས་དང་འཆང་རྒྱུ་ཡོད་པ་དེ་ཞིག །འདི་ཡིན་ཅི་ཡང་མེད་འདི་བསྒོམ་ཅི་ཡང་མེད་པ། སྔོན་དུས་དང་མི་འདྲ་བས་རང་ཡང་ཐེ་ཚོམ་སྐྱེ་བ། མ་ཡེངས་ཙམ་དུ་ཁ་རོག་བསྡད་པ་ལས་བྱ་རྒྱུ་ཅི་
ཡང་མེད་པ། དེ་བྱུང་ན་ཐ་མལ་གྱི་ཤེས་པ་ངོ་བོ་མཐོང་བ་ཡིན། དེའི་དྲན་རྫི་དང་བྲལ་ན་ཐ་མལ་དུ་འཁྲུལ་འགྲོ་བས་མ་ཡེངས་པའི་དྲན་རྫི་དང་མ་བྲལ་བ་ཙམ་བྱ། ཏཻ་ལོ་པའི་ཞལ་ནས། སེམས་ལ་གཏད་སོ་མེད་ན་ཕྱག་རྒྱ་ཆེན་པོ་ཡིན། །དེ་ལ་གོམས་ཤིང་འདྲིས་ན་བླ་མེད་བྱང་ཆུབ་ཐོབ། ཅེས་གསུངས་པ་ད་ཡིན་ནོ། །དེའི་གགས་དང་གོལ་ས་གཅོད་པ་དང་བོགས་འདོན་པའི་མཆོག་བླ་མའི་རྣལ་འབྱོར་ཡིན་པས། རང་ཐུགས་རྗེ་ཆེན་པོའི་སྤྱི་གཙུག་གི་རིགས་བདག་འོད་དཔག་མེད་དེ། དྲན་རྫོགས་སུ་གསལ་གདབ་སྟེ། རྩ་བརྒྱུད་ཀྱི་བླ་མ་ཐམས་ཅད་སྤྱན་དྲངས་དེ་ལ་བསྟིམ། རང་གིས་གསོལ་འདེབས་གང་ཤེས་སམ། ཡིག་དྲུག་གསོལ་འདེབས་ཀྱི་ཚུལ་དུ་བཟླས་པའམ། མོས་གུས་ཀྱི་གདུང་ཤུགས་དྲག་པོས་བ་སྤུ་ལྡང་ཞིང་མཆི་མ་འཁྲུགས་པར་བྱའོ། །གསོལ་འདེབས་ཀྱང་ལན་ཁ་ཡར་རྒྱང་འབོད་ཀྱི་ཚུལ་དུ་བྱ། དེ་ལྟར་གསོལ་བ་བཏབ་པས་བྱིན་རླབས་ཀྱི་སྟོབས་ལས་ཉམས་གང་ཤར་དེ་བསྐྱངས་པས། གེགས་དང་གོལ་ས་གཅིག་ཀྱང་མེད་གསུངས། དེ་ནས་སེམས་བསྐྱེད་བྱམས་སྙིང་རྗེ་ལ་བརྟེན་ནས་བོགས་འདོན་པ་ནི། འགྲོ་བ་རིགས་དྲུག་
གི་སེམས་ཅན་ཐམས་ཅད་ལན་དུ་མར་ཕ་མ་བྱས་པའི་མ་དྲིན་ཆེན་ཡིན་ན་རིགས་དྲུག་གི་སྡུག་བསྔལ་འདི་ལས་ཐར་དུས་མེད་པ་ལ་སྙིང་རྗེ་དྲག་པོ་བསྐྱེད་ནས། སྣ་བུག་ནས་རླུང་ཞིག་ཕར་བུས་པ་དང་མཉམ་དུ། རང་གི་བསོད་ནམས་དང་དགེ་རྩ་ཅི་ཡོད་པ། སེམས་ཅན་ཐམས་ཅད་ལ་སིབས་སེ་ཐིམ་པས། སེམས་ཅན་ཐམས་ཅད་བདེ་སྐྱིད་ཚད་མེད་པ་ཐོབ། བདེ་བའི་རྒྱུ་བསོད་ནམས་དཔག་ཏུ་མེད་པ་དང་ལྡན་པར་བསྒོམས་ལ། ངག་གམ་ཡིད་ཀྱིས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་བརྗོད། རླུང་ཚུར་རྔུབ་པ་དང་མཉམ་དུ། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་ཅི་ཡོད་པ་ཐམས་ཅད་སིབས་སེ་བསྡུས་ནས་རང་ལ་བསྟིམས་པས། རང་ཉིད་སྤྱན་རས་གཟིགས་ཀྱི་སྐུ་དེ་མེ་ལ་ཤིང་བསྣན་པ་ལྟར་གཟི་བརྗིད་ཆེར་འབར། སེམས་ཅན་ཐམས་ཅད་རིགས་དྲུག་སོ་སོའི་སྡུག་བསྔལ་དང་བྲལ། སྡུག་བསྔལ་གྱི་རྒྱུ་སྡིག་སྒྲིབ་ཐམས་ཅད་དང་བྲལ་བར་བསྒོམས་ལ། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །ཅེས་ངག་གམ་ཡིད་ཀྱིས་བརྗོད། དེ་ཡང་སེམས་
ངོའི་ཉམས་ལེན་མ་ཡེངས་པའི་ངང་ནས་བསྒོམ་ཐུབ་ན། བྱམས་ཆེན་གཉུག་མའི་ཏིང་ངེ་འཛིན་དང་། སྟོང་ཉིད་སྙིང་རྗེའི་སྙིང་པོ་ཅན་ཡིན་པས། རང་གི་ཚོགས་རྫོགས་པ་དང་། སྒྲིབ་པ་སྦྱང་བ་དང་། སྲུང་འཁོར་ལ་ཡང་འདི་ལས་ཟབ་པ་མེད་གསུངས། འོད་གསལ་ཐོད་རྒལ་འདི་ནི་མ་བསྒོམས་པར་སངས་རྒྱས་པའི་གདམ་ངག །བལྟས་པས་གྲོལ་བའི་གདམ་ངག་ཟབ་མོ་ཡིན། འོད་ཁ་དོག་ལྔ་མཐོང་བ་འདི་ཡང་འཇའ་མཐོང་བ་དང་མི་འདྲ། ཡེ་ཤེས་ལྔ་མངོན་སུམ་དུ་མཐོང་བ་ཡིན། རྒྱལ་བ་རིགས་ལྔ་དངོས་སུ་མཇལ་བ་དང་ཁྱད་མེད་གསུངས། དང་པོ་ལྟ་དུས་དང་མི་འདྲ་བར་བཀྲག་མདངས་ངོ་མཚར་ཅན་གཅིག་མཐོང་རྒྱུ་ཡོད། དེ་མཐོང་ན་རབ་བར་དོར་ཞི་ཁྲོའི་ལྷ་ཚོགས་འཆར་བའི་ཚེ་བར་དོར་ངེས་པར་གྲོལ་བར་གསུངས་པས། འདི་ལས་ལམ་ཐག་ཉེ་བ་མེད། རྒྱུན་དུ་བལྟས་ན་རྒྱལ་བ་རིགས་ལྔ་སོགས་ཞི་ཁྲོའི་ལྷ་མང་པོ་མཐོང་འོང་། དེ་མཐོང་ན་བར་དོ་བསྒྲོད་མི་དགོས་པར་གསུངས་པས། ཁྱེད་རྣམས་ཀྱིས་རྒྱུན་དུ་ལྟ་བ་གལ་ཆེའོ། །དེ་དགོང་ཉལ་ཁ་དེ་རིང་བྱས་པའི་དགེ་སྦྱོར་གང་འགྲུབ་བསྔོ་བ་སྨོན་ལམ་རྒྱས་འདེབས་དགོས་
ཏེ། བསྔོ་མི་དང་བསྔོ་རྒྱུ་དང་བསྔོ་ས་གསུམ་པོ་དངོས་པོར་འཛིན་པས་བསྔོས་ན་བསྔོ་བ་དུག་ཅན་ཡིན་པས་བྱང་ཆུབ་ཀྱི་ལམ་དུ་མི་འགྲོ། སེམས་ངོ་མ་ཡེངས་པའི་ངང་ནས་བསྔོ་བ་བྱེད་པ་ནི་འཁོར་གསུམ་ཡོངས་དག་གི་བསྔོ་བ་ཡིན་པས་བྱང་ཆུབ་ལམ་དུ་འགྲོ། དེ་ལ་ཆོས་དང་དགེ་སྦྱོར་གང་བྱེད་ཀྱང་མཇུག་ཏུ་སེམས་མ་ཡེངས་པར་བསྔོ་བ་སྨོན་ལམ་གང་བྱས་པ་དེ་ཕྱི་མ་འགྲུབ་ངེས་པ་ཡིན་པས། བསྔོ་བ་སྨོན་ལམ་ཡང་གོ་མ་ལོག་པ་གལ་ཆེ་ཆེ། བདེ་བ་ཅན་དུ་སྐྱེ་བར་ཤོག་ཟེར་བ་དེས་འཐུས། ཤི་ནས་ཞག་བདུན་གཉིས་ཡོལ་ཙམ་ནས་རང་ཤི་བ་ཡང་ཐག་ཆོད། གར་འགྲོ་རང་དབང་ཆེ་བའི་དུས་ཤིག་འོང་། དེ་དུས་སངས་རྒྱས་འོད་དཔག་མེད་ཡིད་ལ་མ་བརྗེད་པར་གྱིས་ལ་བདེ་བ་ཅན་དུ་སོང་ཞིག །བསམ་པ་ཙམ་གྱིས་ཕྱིན་པར་ཐེ་ཚོམ་མེད་དོ། །ད་རེས་ཆོས་ཞུས་པའི་དོན་དེ་མ་བརྗེད་རེམ་རེམ། དེ་སུས་ཀྱང་ཉམས་སུ་ལོན་ངེས་པའི་ཆོས་གཏམ་དམའུ་ཡིན། །བཀའ་མདོ་རྒྱུད་གསར་རྙིང་གཏེར་གསུམ་གྱི་ཆོས་ཀྱི་སྙིང་པོ་ཡིན། སློབ་དཔོན་པདྨའི་བཀྲ་ཤིས་ཤོག །ཐུགས་རྗེ་ཆེན་པོའི་བཀྲ་ཤིས་ཤོག །དཔའ་བོ་རྒྱ་མཚོའི་བཀྲ་ཤིས་
ཤོག །དཔའ་མོ་རྒྱ་མཚོའི་བཀྲ་ཤིས་ཤོག །དམ་ཅན་རྒྱ་མཚོའི་བཀྲ་ཤིས་ཤོག་།ཆོས་ཐུན་སུམ་ཅུ་པ་འགྲུབ་བོ། །འདི་ནི་སྤྱན་རས་གཟིགས་ཀྱི་ཐུགས་རྗེས་མཐུས། སྙིགས་མའི་དུས་ཐུགས་རྗེ་ཆེན་པོའི་རྣལ་འབྱོར་པ། ༧ རཱ་ག་ཨ་སྱས་ལེགས་པར་བསྒྲིགས་པ་ལ། དགེ་སློང་བརྩོན་འགྲུས་ཞེས་བྱས་ཡི་གེར་བཀོད།། ༼༣༠༽ ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆེན་པོའི་མན་ངག་ཟབ་མོའི་རྒྱབ་ཆོས། བདེ་བ་ལ་བརྟེན་ནས་བོགས་འདོན་པ་ནི། རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱི་དར་དཀར་གྱི་གུར་ཕུབ་པ་ལྟ་བུ། །ནང་སྟོང་པ་ཕྲུ་མ་ཕུས་བཏབ་པ་ལྟ་བུ། དེའི་དབུས་སུ་རྩ་དབུ་མ་མཐིང་ཁ་མདའ་སྨྱུག་འབྲིང་པོ་ཙམ་པ། ཡར་སྣེ་སྤྱི་གཙུག་དང་མར་སྣེ་གསང་གནས་སུ་ཟུག་པ། གསང་བའི་སྦུབས་དང་ཅུང་ཟད་མ་འབྲེལ་བར། གཡས་སུ་རོ་མ་དམར་པོ་གཡོན་དུ་རྐྱང་མ་དཀར་པོ་གཉིས་མདའ་སྨྱུག་ཕྲ་ཤོས་ཙམ། ཡར་སྣེ་ཀླད་རྒྱའི་སྟེང་ནས་ཐུར་དུ་སྣ་བུག་གཉིས་སུ་ཟུག་པ། མར་སྣེ་ལྟེ་འོག་སོར་བཞི་ནས་ཡི་གེ་ཆའི་འཕོང་ལྟར་དབུ་མ་དང་གཅིག་ཏུ་གྱུར་པ། སྤྱི་བོ་བདེ་ཆེན་གྱི་འཁོར་ལོའི་རྩ་འདབ་སུམ་ཅུ་སོ་གཉིས། ཁ་དོག་དཀར་པོ་གྲོ་
སོག་འབྲིང་པོ་ཙམ་གདུགས་ཕུབ་པ་ལྟ་བུ། དབུས་སུ་ཧཱུྃ་ཡིག་དཀར་པོ་མགོ་ཐུར་བསྟན་ཡིག་དྲུག་དཀར་པོས་བསྐོར་བ། མགྲིན་པའི་རྩ་འདབ་དྲུག་ཅུ་དམར་པོ་རྩ་སྣེ་ཅུང་ཟད་གྱེན་དུ་ཕྱོགས་པའི་དབུས་སུ། ཨཱཿདམར་པོ་ལ་ཡིག་དྲུག་དམར་པོས་བསྐོར་བ། སྙིང་ཁ་ཆོས་ཀྱི་འཁོར་ལོའི་རྩ་འདབ་བརྒྱད་ཀ་ཁ་དོག་སྔོན་པོ་གུར་ཕུབ་པ་ལྟ་བུའི་དབུས་སུ་ཧཱུྃ་མཐིང་ནག་ལ་ཡིག་དྲུག་མཐིང་གས་བསྐོར་བ། ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི་ཁ་དོག་སྣ་ཚོགས་རྩ་སྣེ་ཅུང་ཟད་གྱེན་དུ་ཕྱོགས་པ། ལྟེ་བར་ཨོཾ་སྣ་ཚོགས་མདོག་ཅན་ལ་ཡིག་འབྲུ་ཁ་དོག་སྣ་ཚོགས་པས་བསྐོར་བ། རྩ་གསུམ་འདུས་མདོར་ཡི་གེ་ཨཱཡིག་དམར་པོ་ལྕགས་སྲེག་མདོག་ལྟར་རེག་བྱ་ཤིན་ཏུ་ཚ་བ་གཅིག་བསྒོམ། རླུང་སྣ་བུག་གཡས་ནས་རྒྱུ་དུས་ཕོ་རླུང་ཉོན་མོངས་པ་ཡིན་པས་མི་བཟུང་། བཟུང་ན་རླུང་སྐྱོན་འོངས། གཡོན་ནས་རྒྱུ་དུས་མོ་རླུང་ཡེ་ཤེས་ཀྱི་རླུང་ཡིན་པས་བཟུང་། སྣ་བུག་གཉིས་ཀ་ནས་རྒྱུ་དུས་ཆོས་སྐུའི་རླུང་ཡིན་པས་ངོ་བོ་སྐྱོང་། རླུང་རོ་ཞི་དྲག་སྙོམས་གསུམ་དུ་གཡས་གཡོན་དུ་མཉམ་དུ་ལན་དགུ་བུས། དེ་ནས་དལ་བུས་རྡུབས་ཏེ། ལྟོ་བ་བཀང་བས་རོ་
རྐྱང་གཉིས་ནས་ལྟེ་འོག་གི་ཡིག་ལ་ཕོག་པས། མེ་ལ་སྦྱད་པ་བརྒྱབ་པ་ལྟར་མེ་འབར་ཏེ། རྩ་གནས་ཐམས་ཅད་རིམ་གྱིས་གང་། མཐར་ལུས་ཐམས་ཅད་གང་ཞིང་བ་སྤུའི་བུ་ཟུག་ནས་མེ་ལྕེ་ཕྱིར་འཕྲོས། ལུས་ཀྱི་ཕྱིར་མེ་དཔུང་ཆེན་པོ་འབར། སྡིག་སྒྲིབ་མ་དག་པའི་ཕུང་ཁམས་སྐྱེ་མཆེད་ཐམས་ཅད་ཡེ་ཤེས་ཀྱི་མེས་བསྲེགས། དག་པ་ཡེ་ཤེས་ཀྱི་ལུས་སུ་གྱུར། སྤྱི་བོར་ཧཾ་ཡིག་ལས་བྱང་སེམས་དཀར་པོའི་རྒྱུན་བབས། སྤྱི་བོ་མགྲིན་པའི་རྩ་གནས་གང་། དགའ་བའི་ཡེ་ཤེས་སྐྱེས། སྙིང་གའི་རྩ་གནས་གང་བས་མཆོག་དགའི་ཡེ་ཤེས་སྐྱེས། ལྟེ་བའི་རྩ་གནས་གང་བས་དགའ་བྲལ་གྱི་ཡེ་ཤེས་སྐྱེས། དགའ་བ་ཞེས་པ་ནི་ལུས་ལ་བདེ་བ་སྐྱེས་པ་དེ་ཡིན། ཡེ་ཤེས་ཞེས་པ་ནི་བདེ་བའི་ངོ་བོ་ལ་བལྟས་པས་སྟོང་པར་མཐོང་བ་དེ་ཡིན། དེ་ནས་བྱང་སེམས་གསང་བའི་རྩར་བར་བབས་པས། དེའི་ངོ་བོ་ལ་མ་བལྟས་ན་ཉོན་མོངས་པ་ཆགས་པ་རང་ཁ་མ་ཡིན། ངོ་བོ་ལ་བལྟས་པས་བདེ་བ་དང་སྟོང་པ་དབྱེར་མེད་དུ་འདྲེས་པ་དེ། ལྷན་ཅིག་སྐྱེས་པའི་ཡེ་ཤེས་ཡིན། དེ་ནས་གསང་བའི་བུ་ག་ཧཱུྃ་གཅིག་གིས་བགགས་པས་ཐིག་ལེ་བཟུང་། ལྕེ་ཡ་རྐན་ལ་སྦྱར། མིག་
གྱེན་ལ་ལྡོག །རིག་པ་སྤྱི་བོའི་ཧཾ་ཡིག་ལ་གཏད། ཧྲིང་ཧྲིང་དྲག་ཏུ་བརྗོད། ཐིག་ལེ་ཆུའི་རླབས་ལོག་པ་ལྟར་སྐྱ་ཆི་ལི་ལི་གསང་གནས་ནས་ལྟེ་བར་ཡར་ལོག་མས་བསྟན་གྱི་དགའ་བ་དང་པོ་དང་། སྙིང་གར་ལོག་པས་གཉིས་པ། མགྲིན་པར་ལོག་པས་གསུམ་པ། སྤྱི་བོར་ལོག་པས་བཞི་པ། དེ་ནས་ཐིག་ལེ་ཐམས་ཅད་སྤྱི་བོའི་ཧཾ་ཡིག་ལ་ཐིམ་པར་བསྒོམས་ལ། སེམས་ཀ་དག་གི་ངང་ལ་དལ་གཅིག་བཞག །དེ་ནས་སྤྱི་བོའི་ཧཾ་ལ་རིག་པ་གཏད་ནས་ལུས་རྟའི་སྤྲུགས་སིལ་འདྲ་བ་ཞིག་བྱས་པས། སྤྱི་བོའི་ཧཾ་ལས་བདུད་རྩི་བྱང་སེམས་དཀར་ལ་དམར་བའི་མདངས་ཆགས་པ་ལྟར་བབ་པས། ལུས་ལྡེམས་སེ་གང་བར་བསྒོམས་ལ། ཉམས་ལེན་སེམས་ངོ་སྐྱོང་བས་བདེ་སྟོང་འདྲེས་པའི་ཉམས་བཟང་པོ་འཆར་ཏེ། ཐུགས་རྗེ་ཆེན་པོ་ངན་སོང་རང་གྲོལ་ལས། དམ་ཆོས་གཞན་ལས་ཁྱད་པར་འཕགས། ཡང་རླུང་བཟུང་བའི་སྐབས་སུ་རྣམ་སྣང་ཆོས་བདུན་མེ་དང་ཐིག་ལེ་བསྒོམ་ལ་མེ་ཐབས་དྲུག་ཆིང་བྱ། གཞན་འཁྲུལ་འཁོར་ཤེས་ཀྱང་ལེགས་ལ་མ་ཤེས་ཀྱང་མི་དགོས་ཏེ། སྲོང་བཙན་སྒམ་པོས་ཀྱང་མ་གསུངས་སོ། །ཐུན་དངོས་གཞི་
ལ་དག་པའི་སྒྱུ་ལུས་སྦྱང་བ་ནི། སྣང་བ་ཐམས་ཅད་ཐུགས་རྗེ་ཆེན་པོར་བསྒོམ། སྒྲ་གྲག་ཐམས་ཅད་ཡི་གེ་དྲུག་པའི་སྒྲ་དི་རི་རི་གྲག་པར་བསྒོམ། ལྷ་འདི་དག་ནི་གང་ནས་མ་བྱུང་གར་ཡང་མི་འགྲོ། གང་དུ་ཡང་མི་གནས་རང་གི་སེམས་སྣང་ཙམ་དུ་རྨི་ལམ་སྒྱུ་མ་ཡིན་ནོ་སྙམ་དུ་བསྒོམས་ལ་སྤྲོས་བྲལ་དུ་བཞག་གོ །གོམས་ནས་འགྱུ་བས་བསྒོམས་ལ་མི་གནོད་པའི་དུས་ན། ཉམས་ལེན་སེམས་ངོ་སྐྱོང་བའི་གཤིས་མ་ཤོར་བའི་ངང་ནས། རང་ལུས་ལྷའི་སྐུ་གསལ་སྟོང་འཇའ་ཚོན་ལྟ་བུར་བསྒོམ་སྟེ། དེའི་བསྐྱེད་རྫོགས་ཟུང་འཇུག་ཉམས་ལེན་གྱི་གཙོ་བོ་ཡིན་ཏེ། སྒྱུ་ལུས་ལམ་གྱི་གཞུང་ཤིང་ཞེས་གྲགས། དེ་ལྟར་བསྐྱེད་རྫོགས་ཟུང་འཇུག་འདི། གསང་སྔགས་རྡོ་རྗེ་ཐེག་པའི་བསྟན་པ་དངོས་ཡིན་ཏེ། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པ་གཉིས། །རིམ་གཉིས་མཉམ་པར་གང་བཞག་པ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་སོ། །མི་རྟོག་པ་ལ་བརྟེན་ནས་བོགས་འདོན་པ་ནི། ཉལ་དུས་སེང་གེ་ཉལ་སྟབས་བྱས་ལ། བླ་མ་སྤྱི་བོར་བསྒོམས་ལ། ཏིང་ངེ་འཛིན་གྱི་དབང་བསྐུར་ཞུ། རྨི་ལམ་ཟིན་པར་གསོལ་བ་
བཏབ། དེ་ནས་རང་གི་མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཐིག་ལེ་དམར་པོ་འོད་ཟེར་དང་བཅས་པ་ལ། སེམས་བཟུང་ནས་གཉིད་ལོག་པས་ཟིན་ནོ། །རྨི་ལམ་རྨི་ལམ་དུ་ངོ་ཤེས་པ་ནི་ཟིན་པ་ཡིན་ཏེ། ཉིན་པར་གྱི་ཉམས་ལེན་སྐྱོངས། རང་ཐུགས་རྗེ་ཆེན་པོ་ཕྱི་གསལ་ནང་གསལ་དུ་བསྒོམ་པའི་ཐུགས་ཀར་ཟླ་བའི་སྟེང་ཀར་པོ་ཚེག་དྲག་དང་བཅས་པ་ལས། འོད་ཟེར་ཉི་མ་འབུམ་ལས་ལྷག་པར་འཕྲོས་པས། ལུས་ཀྱི་ཕྱི་ནང་དང་གླིང་བཞི་སྟོང་གསུམ་ཐམས་ཅད་ཕྱི་གསལ་ནང་གསལ་དུ་གྱུར་པ་ལ་དམིགས་པ་བཟུང་ནས་གཉིད་ལོག་པས་འོད་གསལ་ཟིན་པར་འགྱུར་རོ། །དོན་ལ་གཉིད་ལ་སོང་རྨི་ལམ་མ་རྨིས་པའི་བར་དེར་ཉམས་ལེན་སེམས་ངོ་ཟིན་པ་ནི་གཉིད་ཀྱི་འོད་གསལ་ཡིན། རྨི་ལམ་རྨི་ལམ་དུ་ངོ་ཤེས་པས་ཉམས་ལེན་སེམས་ངོ་ཟིན་པ་རྨི་ལམ་གྱི་འོད་གསལ་ཡིན། ཐུགས་རྗེ་ཆེན་པོ་མི་ཏྲའི་དམར་ཁྲིད་ཀྱི་སྒྱུ་ལུས་དང་རྨི་ལམ་འོད་གསལ་སོགས་ཀྱི་སྔོན་འགྲོ་ཡང་ཡིན་ལ། ཚོགས་བསགས་པ་དང་ཉམས་ཆག་བསྐང་བ་དང་། ནད་དང་གདོན་གྱི་གེགས་སེལ། བདག་འཛིན་རྩ་བ་གཅོད་པའི་ཐབས། ཀུ་སཱ་
ལུའི་ཚོགས་གསོག་ཡིན་ཏེ་རང་གི་སྤྱི་གཙུག་ནམ་མཁར་ཡེ་ཤེས་ཀྱི་མཁའ་འགྲོ་མ་དཀར་མོ་གཡས་གྲི་གུག །གཡོན་ཐོད་ཁྲག་འཛིན་པ་གར་སྟབས་ཀྱིས་བཞུགས་པ་རིན་པོ་ཆེ་དང་རུས་པའི་རྒྱན་གྱིས་བརྒྱན་པ་ཞིག་སྒོམས་ལ། རང་གི་རྣམ་པར་ཤེས་པའི་ངོ་བོ་ཨ་དཀར་པོ་ཞིག་ཏུ་གྱུར་ནས་གསང་གནས་སུ་གནས་པ་དེ་སྤྱི་བོ་ཚངས་བུག་ནས་སྐར་མདའ་འཕང་བ་ལྟར་ཐོན་ནས་ལྷ་མོའི་ཐུགས་ཀར་ཐིམ་པར་བསྒོམ། དེ་ནས་རང་ཉིད་ཡེ་ཤེས་ཀྱི་མཁའ་འགྲོ་མར་གྱུར་པ་དེས་མདུན་དུ་ཐོད་པའི་སྒྱེད་པུ་གསུམ་སྤྲུལ་པའི་སྟེང་དུ། རང་གི་མགོ་བོ་སྨིན་མཚམས་ནས་བཅད་པའི་ཀ་པཱ་ལ་ཕྱི་དཀར་ལ་ནང་དམར་བ་སྟོང་གསུམ་གྱི་ཚད་ཙམ་དུ་གསལ་བའི་ནང་དུ་རང་གི་ཤ་ཁྲག །དུམ་བུར་གཏུབས་ནས་བླུགས་པའི་འོག་ནས་མེ་སྦར་ཨོཾ་ཨཱཿཧཱུྃ་ཞེས་བརྗོད་པས་ཤ་ཁྲག་ཐམས་ཅད་བདུད་རྩིར་མེར་གྱིས་ཞུ་ནས་ཡང་། ཨོཾ་ཨཱཿཧཱུྃ་ཞེས་བརྗོད་པས་ཡེ་ཤེས་ཀྱི་བདུད་རྩིར་བྱིན་གྱིས་བརླབས། རང་གི་ཐུགས་ཀར་བསམ་དེ་ལས་འོད་ཟེར་ཞགས་པ་དང་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས། ཕྱོགས་བཅུའི་རྩ་བརྒྱུད་ཀྱི་བླ་མ། རྒྱུད་སྡེ་བཞིའི་ལྷ་ཚོགས་སངས་རྒྱས་ཆོས་དགེ་འདུན་མཁའ་
འགྲོ་ཆོས་སྐྱོང་སྲུང་མ་ཐམས་ཅད་དང་། འགྲོ་བ་རིགས་དྲུག་གི་གནས་ཐམས་ཅད་ལ་ཕོག་པས་ཐུགས་རྗེ་ཆེན་པོར་གྱུར་པའི་ཐུགས་ཀ་ནས་འོད་ཟེར་གྱིས་བཀུག་སྟེ། རང་གི་མདུན་དུ་བཞུགས་པའི་ཞལ་དུ་བདུད་རྩི་དཀར་སིབ་སིབ་དྲངས་བས་སྐུ་ལུས་ཐམས་ཅད་ཟག་མེད་ཀྱི་བདེ་བས་གང་བར་བསམས་ནས། རྩ་བརྒྱུད་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཡི་དམ་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ། སངས་རྒྱས་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཆོས་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། དགེ་འདུན་དཀོན་མཆོག་རྣམས་ཀྱི་ཞལ་དུ་ཨོཾ་ཨཱཿཧཱུྃ། བྱང་སེམས་རྣམས་ཀྱི་ཞལ་དུ་ཨོཾ་ཨཱཿཧཱུྃ། དཔའ་བོ་མཁའ་འགྲོ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཆོས་སྐྱོང་སྲུང་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞི་བདག་རྣམས་ཀྱི་ཞལ་དུ་ཨོཾ་ཨཱཿཧཱུྃ། འགྲོ་བ་རིགས་དྲུག་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞེས་བརྗོད་པས་ཐམས་ཅད་ཚིམས་པར་བསམ་ཞིང་དེ་དག་ཐམས་ཅད་སྤྱན་རས་གཟིགས་ཀྱི་སྐུ་དང་སྒྲོལ་མར་གྱུར་ནས་ཡི་གེ་དྲུག་པའི་སྒྲ་དི་རི་རི་འདོན་པར་བསྒོམ་པ་འདི་དག་ཐམས་ཅད་ཀྱང་སྒྱུ་མ་ཡིན། རྨི་ལམ་ཡིན་སྙམ་དུ་བསྒོམ་ཞིང་དེ་ཉིད་རང་གི་བློས་
བཀོད་པ་མ་གཏོགས་པ་ལོགས་སུ་གྲུབ་པ་མེད། བདེན་མེད་ཀྱི་ངང་ལ་ཉམས་སུ་བླང་བར་བྱའོ། །ཡང་གོང་ལྟར་བེམ་རིག་ཕྲལ་ཏེ་རང་མཁའ་འགྲོ་མར་གསལ་བས། ཕྱག་གཡས་གྲི་གུག་ཚད་ཙམ་བྱས་པས། པགས་པ་དབང་ཆེན་གསེར་གྱི་ས་གཞི། བེམ་པོ་གླིང་བཞི་རི་རབ་བྱེ་བ་ཕྲག་བརྒྱ། ཤ་ཁྲག་དོན་སྙིང་ནང་རོལ་ཐམས་ཅད། ཚེའི་བུམ་པ་འཆི་མེད་བདུད་རྩིའི་བཀང་བ་དང་། དངུལ་ཆུ་གྲུབ་པའི་རྫས་དང་། འཆི་མེད་གྲུབ་པའི་ཚེ་རིལ་དང་ཚེ་ཆུ། ཚེའི་རིགས་ལ་གྲུབ་པའི་ཚེ་ཟས་གསེར་ལྷད་མེད། སྒྲ་མི་སྙན་གྱི་ཚེ་ཆུ། ཚེའི་རིག་འཛིན་དྲང་སྲོང་ལྷ་མོ་དཔག་ཏུ་མེད་པ། བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཚེ་དཔག་མེད་ཀྱི་སྐུར་གྱུར་པ་སྤྱན་དྲངས་ནམ་མཁའ་གང་བར་བཞུགས་པ་ལ་འབུལ། བདུད་རྩི་རྣམས་ཀྱང་གསོལ་བར་བསྒོམས་པས། ཚེའི་བར་ཆད་བཟློག་པར་རང་གི་ཕུང་པོ་དེ་རྒྱལ་སྲིད་སྣ་བདུན། བཀྲ་ཤིས་པའི་རྟགས་བརྒྱད། ནོར་བུ་ཆ་བདུན། རིན་པོ་ཆེ་སྣ་ཚོགས། འབྲུ་སྣ་ཚོགས། ཟས་སྣ་ཚོགས། གོས་སྣ་ཚོགས། རྟ་དྲེལ་ནོར་ཕྱུགས་སོགས། ལྷ་མིའི་ལོངས་སྤྱོད་དཔག་ཏུ་མེད་པར་སྤྲུལ་ནས་རང་གི་
ཐུགས་ཀའི་འོད་ཟེར་གྱིས་རྩ་བརྒྱུད་བླ་མ་ཡི་དམ་སངས་རྒྱས་བྱང་སེམས། ཛམ་བྷ་ལ་རིགས་ལྔ། རྣམ་སྲས་སེར་ལྗང་དམར་གསུམ། ནོར་རྒྱུན་མ་མཆེད་ལྔའི་སྐུར་གྱུར་པ་སྤྱན་དྲངས་ཏེ་ནམ་མཁའ་གང་བར་བཞུགས་པ་ལ་ཕུལ་བས། ལོངས་སྤྱོད་ཐམས་ཅད་བཞེས་པར་བསྒོམས་ལ། ཆོས་བསྒྲུབ་པའི་མཐུན་རྐྱེན་དཀོན་པའི་གེགས་སེལ། ནོར་སྒྲུབ་ཀྱི་མཆོག་ཏུ་འགྱུར་ཏེ། ཡང་གོང་ལྟར་བེམ་རིག་ཕྲལ་ལ། རང་གི་ཕུང་པོ་དེ་མཁས་པ་པཎྜི་ཏའི་ཚོགས་དང་། མཆོད་པའི་ལྷ་མོ་དབྱངས་ཅན་མ་དཀར་སེར་དམར་ལྗང་བྱེ་བ་དུང་ཕྱུར་དཔག་ཏུ་མེད་པས་ལག་ན་མཆོད་རྫས་ཐོགས་པ་དང་། སྡེ་སྣོད་གསུམ་རྒྱུད་སྡེ་བཞི་བཀའ་བསྟན་བཅོས་ཀྱི་གླེགས་བམ་དཔག་ཏུ་མེད་པ་མཛེས་ཤིང་ཡིད་དུ་འོང་བ་སྤྱིར་སྙུག་མཚལ་སྣག །ཤོག་བུ་ཤེས་རབ་ཀྱི་རལ་གྲི་མེ་འབར་བ། ཤེས་རབ་གྲུབ་པའི་རྫས་ཀྱི་རིགས་དཀར་གསུམ་མངར་གསུམ་དཔག་ཏུ་མེད་པར་དམིགས་ལ། །རང་གི་ཐུགས་ཀའི་འོད་ཟེར་གྱིས་བླ་མ་སངས་རྒྱས་བྱང་སེམས་ཐམས་ཅད་འཇམ་དབྱངས་རིགས་ལྔའི་སྐུར་གྱུར་པ་སྤྱན་དྲངས་ནམ་མཁའ་གང་བར་བཞུགས་པ་ལ་དེ་དག་ཕུལ་བས་མཉེས་
ཤིང་མཆོད་པའི་ལྷ་མོ་རྣམས་ཀྱིས་ཚངས་པའི་དབྱངས་ཀྱི། སྙན་ངག་གིས་བསྟོད་པ་དཔག་ཏུ་མེད་པས་བསྟོད་པར་བསྒོམས་པས། ཤེས་རབ་དང་གོ་བ་ཆུང་བའི་གེགས་སེལ་ཏེ། སྐྱེ་བ་འདི་དང་ཚེ་རབས་ཀུན་ཏུ་འཆད་རྩོད་རྩོམ་གསུམ་ལ་མཁས་པར་འགྱུར། དེ་བཞིན་དུ་རང་ལུས་ཨ་རུ་ར་རྣམ་པར་རྒྱལ་བ་དང་། ནད་སེལ་སྨན་གྱི་བདུད་རྩིའི་བཀང་བའི་ལྷུང་བཟེད་དང་། སྨན་གྱི་ཚོགས་དཔག་ཏུ་མེད་པར་སྤྲུལ་ཏེ། དཀོན་མཆོག་རྣམས་སངས་རྒྱས་སྨན་བླའི་སྐུར་གྱུར་པ་ནམ་མཁར་སྤྱན་དྲངས་ལ་ཕུལ་བས། ནད་མང་བའི་གེགས་སེལ་བ་སོགས་གོང་གི་རིགས་འགྲེས་སོ། །གོང་ལྟར་བེམ་རིག་ཕྲལ་བའི་བེམ་པོ་ལ། རང་ལ་གནོད་པའི་གདོན་བགེགས་ཐམས་ཅད་བསྟིམས། དེ་གོང་ལྟར་བྷནྡྷའི་ནང་དུ་བདུད་རྩིར་བསྒྱུར་བ། མགྲོན་རྣམས་ཡི་དམ་ཁྲོ་བོ་དང་ཁྲོས་མ་ནག་མོ་སོགས་ཁྲོ་མོའི་ཚོགས་ཀྱི་ཞལ་དུ་ཕུལ་ནས་ལྷག་མ་མ་ལུས་པར་བསྒོམས་པས། །གདོན་གྱིས་གནོད་པའི་བགེགས་ཐམས་ཅད་སེལ་བའི་མཆོག་སྟེ། གཅོད་ལུགས་བསྟབ་པ་ཀུན་གྱི་དོན་འདུས་སོ། །དེ་ཐམས་ཅད་ལ་མགྲོན་གཤེགས་པ་སོགས་མི་དགོས། དམིགས་མེད་ཉམས་ལེན་
གྱི་ངང་དུ་བཞག་གོ །བོགས་འདོན་གྱི་གཙོ་བོ་གསུམ་དང་། གེགས་སེལ་ཕྲན་བུ་ཚར་རོ། །འདི་ཁྲོམ་ལ་བཤད་མི་རུང་སློབ་མ་ཁྲིད་འཛུགས་རེ་ཡོད་པ་རྣམས་ལ་ཉུང་ཆོས་སུ་བཤད་པར་བྱའོ།། ཐུགས་རྗེ་ཆེན་པོ་ལ་ཕྱག་འཚལ་ལོ། ཐུགས་རྗེ་ཆེན་པོའི་མན་ངག་ཟབ་མོ། འདི་གཞན་ལ་འཆད་རུང་ངམ་མི་རུང་ནི། །རྩ་བའི་སྡོམ་པ་དམ་ཚིག་ལ་སྐྱོན་མེད་ཅིང་། ཐུགས་རྗེ་ཆེན་པོ་ཡི་དམ་དུ་བཟུང་ནས་བསྙེན་སྒྲུབ་ཐེམ་པ། རྟོགས་པ་རབ་རོ་གཅིག །འབྲིང་སྤྲོས་བྲལ། ཐ་མ་རྩེ་གཅིག་ཆེན་པོ་རྟོགས་ནས། སེམས་ཅན་ལ་ཕན་འདོད་ཀྱི་སྙིང་རྗེ་ཆེ་བ། དེ་ལྟ་བུ་ཞིག་དགོས་ཏེ། རྒྱན་སྟུག་པོ་བཀོད་པ་ལས། ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །རྣལ་འབྱོར་རྟོགས་པའི་བདག་ཉིད་དེ། །རང་ཉིད་ཆུད་ཟོས་གཞན་ཆུད་གསན། །ཞེས་གསུངས། སངས་རྒྱས་མཛོད་ཀྱི་མདོ་ལས། འཇིག་རྟེན་གྱི་དགྲས་ནི་སྲོག་ཙམ་འཕྲོག་གིས་ལུས་གཅིག་སྟོང་དུ་ཟད་དེ། མི་གཏི་མུག་ཅན་གྱིས་ཆོས་བཤད་ན། བསྐལ་པ་བརྒྱད་ཁྲི་བཞི་སྟོང་གི་བར་དུ་དམྱལ་བར་སྐྱེའོ། །ཞེས་གསུངས་སོ། །
འཇམ་དཔལ་རྣམ་པར་འཕྲུལ་པའི་མདོ་ལས། ཆོས་སྟོན་ཀྱང་ཆོས་ཉན་པ་རྣམས་ལ་སྙིང་རྗེ་ཆེན་པོ་མི་བསྐྱེད་པ་ནི་བདུད་ཀྱི་ལས་སོ། །ཞེས་དང་། མང་དུ་ཐོས་ཀྱང་གཞན་གྱིས་ཤེས་ཀྱི་དོགས་ནས་ཆོས་ལ་སློབ་དཔོན་གྱི་དཔེ་འཁྱུད་བྱེད་པ་ཡང་བདུད་ཀྱི་ལས་སོ། །ཞེས་དང་། དགོངས་འགྲེལ་ལས། བླ་མ་བཟང་པོའི་མཚན་ཉིད་དུས་ཀྱི་དབང་གིས་ཚང་བར་དཀའ་ཡང་། རང་རྒྱུད་ལ་ལེགས་པར་བརྟགས་ནས། ངན་པའི་མཚན་ཉིད་རྣམས་ཤས་ཆེ་བ་མ་ཚང་བ་གལ་ཆེ། འགའ་ཞིག་ཚང་བར་འདུག་ན། རང་གི་རྒྱུད་རང་གིས་ལེགས་པར་བཅོས་ཏེ་མེད་པར་བྱས། སྐྱོན་དེ་དག་གི་རྩ་བ་ཡང་། འཇིག་རྟེན་ཆོས་བརྒྱད་ཀྱི་རྟོགས་པ་དང་། སྙན་གྲགས་དང་བཀུར་སྟི་འདོད་པ་ཁོ་ནའི་སྐྱོན་ཡིན་ཞིང་། དེ་དག་བསམ་བསྒྱུར་ཤེས་ན་བཅོས་སླ་བ་ཡིན་ཏེ། འཇིག་རྟེན་ཆོས་བརྒྱུད་བཀུར་སྟི་དང་གྲགས་པ་འདོད་ཕྱིར་ཆོས་བཤད་ན་ངན་སོང་གི་རྒྱུ། བྱམས་སྙིང་རྗེས་ཀུན་ནས་བསླང་ནས་གཞན་ཕན་ཆོས་བཤད་ན་ཕན་ཡོན་ཆེ། དེ་ལྟར་ཕན་ཡོན་ཉེས་དམིགས་ཀྱང་བྱེད་ལུགས་འདྲ་སྟེ་བསམ་པའི་ཁྱད་པར་རོ། དེ་ཡང་མི་ལ་བཤད་པའི་ཆོས་དེ་རང་གིས་ཉམས་སུ་ལེན་
དགོས་ཏེ། མྱ་ངན་འདས་མདོ་ལས། ཀོ་ཀ་ལི་ཀ་དང་། ལེགས་པའི་ཀརྨས། མདོ་སྡེ་བཅུ་གཉིས་བཤད་ཤེས་ཀྱང་དོན་མ་གོ་བས། གསོན་པོར་དམྱལ་བར་ས་ཡི་བར་མཐོང་བྱེ་ནས་སོང་བར་བཤད་དོ། །རང་གིས་བཀུར་སྟི་ལ་ཞེ་འདོད་གཏིང་ནས་མེད་པར་བྱས་ལ། དབང་ཆོས་ཁྲིད་སོགས་ཀྱི་ཡོན་དུ་འབུལ་བ་ཆེ་ཕྲ་ཅི་བྱུང་ཡང་། ཆོས་ཀྱི་ཆེ་བ་ཡིན་པས་རང་ལ་དཀོར་སྒྲིབ་མི་འབྱུང་ཞིང་། ཁོང་རང་རྣམས་ཀྱི་ཚོགས་རྫོགས་བསོད་ནམས་དཔག་ཏུ་མེད་པ་ཐོབ། རིག་སྔགས་བསྒྲུབ་པ་ལ་བར་ཆད་བྱེད་པའི་བགེགས་འདི་དག་གི་གཙོར་བྱས་བགེགས་རིགས་སྟོང་ཕྲག་བརྒྱད་ཅུ་སོགས། བྱང་ཆུབ་བསྒྲུབ་པ་ལ་བར་ཆད་བྱེད་པ་ཐམས་ཅད་ཡིན་ནོ། །དེ་རྣམས་ལ་དམིགས་ལ་བགེགས་གཏོར་བསྔོས། རྒྱལ་མགྱོགས་བསྡུས་པ་གྲུབ་ན་ཡང་ལེགས། རང་ཉིད་རྟ་མགྲིན་བསྒོམས་ལ། བཀའ་བསྒོས་མཚམས་གཅོད་བྱས། སྤྲུལ་པའི་ཁྲོ་ཆུང་གིས་བགེགས་རྣམས་རྒྱ་མཚོའི་ཕར་འགྲམ་དུ་བསྐད་ནས། སྲུང་འཁོར་བསྒོམ་པ་ནི། རྡོ་རྗེའི་ས་གཞི་བརྟན་པ་མནར་མེད་པ་ཁྱབ་པ་ལ། སྟེང་དང་འོག་རྣམས་སུ་རྡོ་རྗེའི་ར་གུར། །
དེ་རྒྱབ་མེ་རི་ཁ་དོག་ལྔ་ལྡན་གྱི་གུར་དང་། སྟེང་འོག་རྡོ་རྗེའི་ས་གཞི་ར་གུར་གྱི་རྒྱབ་ཏུ་གསེར་གྱི་འཁོར་ལོ་ཞྭ་ཐེབ་ཁ་སྦྱོར་བ་ལྟ་བུ་རྩིབས་བྱེ་བ་གྲངས་མེད་སྤུ་གྲི་ལྟར་རྣོ་བ་གཡས་སུ་འཁོར་བའམ། འཁོར་ལོ་གཉིས་ཁ་སྦྱོར་རྩིབས་སོ་འཐབ་གཡས་གཡོན་དུ་འཁོར་བའི་བར་མཚམས་སུ་གནོད་བྱེད་གཏུབས་པའམ། འཁོར་ལོ་རྩིབས་བརྒྱད་པ་ཆུང་ངུ་གྲངས་མེད་པའི་ས་གཞི་དྲྭ་བ་རྭ་བ་གུར་དུ་གྱུར་པ་ཐམས་ཅད་སོ་སོར་གསོལ་ལོ་ལྟར་འཁོར་བའི་བར་མཚམས་སུ་གནོད་བྱེད་གཏུབ་པ་སྟེ། གསུམ་པོ་གང་འདོད་ཡིན་ལ། དེ་རྒྱབ་རལ་གྲིའི་ཡུ་བ་ཅན་གྱི་ས་གཞི་དྲྭ་བ་ར་བ་སྟེ། འདི་དག་རལ་གྲི་རྣམས་རྒྱ་གྲམ་འཁོར་བ་འདྲ་བའི་བར་རྣམས་སུ་དེ་བས་ཆུང་བ་གཏམས་པའོ། །དེ་རྒྱབ་པདྨས་མཚན་པའི་དབྱུག་ཏོའི་ར་གུར་རོ། །དེ་རྒྱབ་སྣ་ཚོགས་རྡོ་རྗེ་རྣོ་དབལ་ཅན་ཁ་གདངས་ཤིང་དྲག་ཏུ་འཁོར་བའི་ས་གཞི་ར་གུར་རོ། །དེ་སྒྲུབ་ཕུར་པའི་ས་གཞི་ར་གུར་དྲྭ་བ་ར་བ། དེ་རྒྱབ་མཚོན་ཆ་སྣ་ཚོགས་རྩེ་ཕྱིར་བསྟན་པ་སྟེ། དགྲ་སྟ་སྤུ་གྲི་ཆུ་གྲི་མདའ་མདུང་སྟ་རེ་ཐོ་བ་ཞགས་པ་ལ་སོགས་པ་བར་མཚམས་མེད་ཅིང་རྩ་བ་གཅིག་ཏུ་གྱུར་པ་དྲག་ཏུ་འཁོར་བའོ། །དེ་རྒྱབ་མེ་ཁ་དོག་ལྔ་
ལྡན་འུར་རྒྱང་དུས་མཐའི་མེ་ལྟར་འབར་ནས་སྒོ་ང་ལྟར་སྲུབ་མེད་ཅིང་ལྟ་བར་མི་བཟོད་པ་དུམ་བུ་གཅིག་ཏུ་གྱུར་པའོ། །དེ་ནས་རྟ་མགྲིན་གྱི་ཚོགས་སྔར་སྤྲོས་པའི་ཁྲོ་བོ་དེ་དག་ཚུར་འདུས་པས་སྲུང་འཁོར་གྱི་བར་མཚམས་རྣམས་སུ་ཞལ་ཕྱིར་གྲུ་བའི་ཁྲོ་ཆུང་དཔག་མེད་ཧཱུྃ་ཕཊ་ཀྱི་སྒྲས་ཟློག་པའི་ལས་མཛད་པ། འཁོར་ལོའི་རྩིབས་ནང་དུ་གཟིགས་པ་རྣམས་རཀྟ་ཞེས་སྲུང་སྔགས་དང་བསྲུང་བའི་ལས་མཛད་པར་བསྒོམ་པ་སྟེ་ཁྲོ་བོ་གཉིས་གཅིག་ཏུ་བརྩིས་པ་སྲུང་འཁོར་དགུ་རིམ། སྲུང་འཁོར་གྱི་ནང་དུ་ཆོས་ར་དེར་བྱས་ཚར་བ་དང་འདུ་རྒྱུ་ཐམས་ཅད་ཚུད་པར་བསྒོམ། ཁྲོམ་ལ་རིམས་ནད་མི་འབྱུང་བའི་རྟེན་འབྲེལ་དུ་ལོ་མ་གྱོན་མའི་རྗེས་གནང་བྱས་ལ། ཨོཾ་པི་ཤ་ཙི་སྭཱ་ཧཱ། ཞེས་པ་ཉིན་གཅིག་བཞིན་ཁྲོམ་ལ་ཕྲེང་སྐོར་ཡ་ཟུང་འུར་འདོན་བཅུག །དེ་ནས་ཁྲོམ་ནང་ལ་སྡིག་ཅན་གྲིབ་ཅན་དམ་ཚིག་ཉམས་པ་ཡང་འགའ་རེ་ཡོད་པས། དེའི་གྲིབ་ཀྱིས་གཞན་ལ་མི་གནོད་པའི་ཕྱིར། །ཁྲོ་བོ་རྨེ་བརྩེགས་ཀྱི་རྗེས་གནང་བྱེད། རང་ཉིད་ལའང་ཁྲོམ་གྲིབ་མི་འོང་ཕྱིར། ནངས་སྔ་ལོ་མ་གྱོན་མ་དང་། སྨེ་བརྩེགས་རྒྱུན་བསྙེན་རེ་བྱ། རང་རྟོག་པ་མཐོ་བར་ཡོད་ན་
སངས་རྒྱས་ཐམས་ཅད་ཀྱི་ཐུགས་དང་སེམས་ཅན་ཐམས་ཅད་ཀྱི་སེམས་རྒྱུད་དང་རང་གི་སེམས་ཉིད་དང་། དེ་གསུམ་ངོ་བོ་དབྱེར་མེད་རྟོག་ན་ཁྲོམ་མང་ལ་གསང་སྔགས་ཟབ་མོ་བཤད་ཀྱང་རང་ལ་གསང་སྒྲོག་མི་འབྱུང་། ཁྲོམ་ཕན་ཚུན་རྣམས་དབང་ཆོས་མཉམ་པར་ཐོབ་ནས་མཆེད་གྲོགས་ཡིན་ཀྱང་དམ་ཚིག་བསྲུང་དཀའ་བས་ཁྲོམ་རེ་རེ་བཞིན་དུ་སོ་སོར་རྡོ་རྗེའི་གུར་ཁང་རེ་རེའི་ནང་དུ་ཚུད་པར་བསྒོམ། དེ་ནི་འདུལ་བ་ནས་ཐག་གྲ་བཤད་པ་དང་མཚུངས། དེ་ཉིད་བྱུང་ཚད་དོ་ནུབ་བསྡུས་ལ་ཚོགས་འཁོར་རྒྱུན་དུ་བྱ། དེས་ཚོགས་རྫོགས་པ་དང་སྐུ་རིམ་ཉམས་རྟོགས་སྐྱེ་བའི་གནད་ཆེ་འབུལ་བ་སོགས་གང་བྱུང་ཉམས་ལེན་མ་ཡེངས་པར་བསྔོ་བས་རྒྱས་བཏབ། འབྲུ་དང་རིན་པོ་ཆེ་སོགས་སྐམ་དཔྱད་གང་བྱུང་རྣམས་མཎྜལ་དུ་དམིགས་ལ་མཎྜལ་ཤོ་ལོ་ཀ་རེས་ཕུལ། གོ་མཚོན་དང་རྐང་བཞི་བྱུང་ཚད་བསྐང་རྫས་དམིགས་ལ་གཏོར་བསྔོས་ཞོར་ལ་བསྐང་ཐུང་འདོན། འོ་ཞོ་སོགས་འཕྲལ་དུ་ལོངས་སྤྱོད་དགོས་པའི་ཟས་བྱུང་ཚད་བྲན་ལ། ཐུགས་རྗེ་ཆེན་པོ་དང་ལོ་མ་ཅན་དང་ཛཾ་བྷ་ལའི་སྔགས་ལ་ཁཱ་ཧི་བཏགས་ནས་ཕུལ་བས་དཀོར་སྒྲིབ་ཆུང་། བར་ཆད་ཞི་ཚོགས་
རྫོགས་དངོས་གྲུབ་འབྱུང་། བཟའ་བཏུང་གང་བྱུང་ཚད་ནང་གི་ཚོགས་འཁོར་ལྟར་ལོངས་སྤྱོད་གཞན་ཟང་ཟིང་ཆོས་ཕྱོགས་ལ་ཅི་ཐེང་བྱ། འབྲེལ་པ་ཐོགས་ཚད་ལ་བསྔོ་བ་རྒྱས་པ། བཀྲ་ཤིས་བར་བརྗོད་ལ་མེ་ཏོག་འཐོར། དེ་ནས་ཁྲོམ་གྲོལ་ནས་གཞི་བདག་རྣམས་ལ་གཏང་རག་གིས་དཀར་གཏོར་ཞིག་འབུལ། གཟུགས་མེད་པའི་ཆོས་ཉན་པ་རྣམས་གྲོལ་བར་བསྒོམ། གནས་བདག་ལ་ཡང་བསྔོ་བ་སྨོན་ལམ་བྱ། སྲུང་འཁོར་གྱི་དམིགས་པ་ཡང་བསྡུས་ཏེ། ཉམས་ལེན་སྟོང་ཉིད་ངང་ལ་ཡུན་རིང་བཞག །འགྲོ་དོན་བྱུང་ན་ཐུགས་དམ་ཆག་བསམ་པར་མི་བྱ། ཐུགས་དམ་ནི་བྱང་ཆུབ་བསྒྲུབ་པ་ལས་ལྷག་པའི་ཐུགས་དམ་བྱ་རྒྱུ་མེད་ཅིང་སེམས་ཅན་ལ་ཕན་ཐོགས་ནུས་ན་བྱང་ཆུབ་ཀྱི་རྩ་བ་དེ་ཡིན། སངས་རྒྱས་ནས་འགྲོ་དོན་མ་གཏོགས་བྱ་རྒྱུ་གཞན་མེད་པའི་ཕྱིར་སངས་རྒྱས་རྣམས་ཀྱང་དེ་ལ་མཉེས་སོ། །བཀུར་སྟི་དང་དད་གུས་ཀྱིས་མི་ཆེན་དང་བླ་ཆེན་རྣམས་དབུ་རྒུ་བའི་ཚེ། རང་ཉིད་རང་མཐོ་ང་རྒྱལ་སྐྱེ་ཞིང་རྒྱུ་རྩིས་དང་ཆགས་འཛིན་ཕྲག་དོག་དང་འགྲན་སེམས་སྐྱེས་ན་ལྷའི་བདུད་ཞུགས་པ་ཡིན། གདུལ་བྱ་འགྲོ་དོན་ཆེ་ཚུལ་ངན། རང་
དམན་ས་འཛིན་ཅིང་ང་རྒྱལ་མེད་པ་ཉམས་རྟོགས་ཇེ་འཕེལ་དུ་སོང་ན་དངོས་གྲུབ་ཡིན། འོན་ཀྱང་ཟང་ཟིང་མི་འོང་བསམ་པའི་འདོད་པ་གཏན་ནས་སྤངས་ཏེ། སེར་མོ་ཤེས་རབ་ཅན་རྣམས་ལ་དབང་རྒྱུན་དང་ལུང་རྒྱུན་མང་དུ་འཕེལ་ན། སངས་རྒྱས་བསྟན་པ་ཇི་སྲིད་གནས་ཀྱི་བར་གནས་པར་འགྱུར་བས་ལུང་གི་བསྟན་པ་ཡིན་ལ། སེར་མོ་བ་རྣམས་ལ་ཉམས་དང་རྟོགས་པ་སྐྱེས་ནས་ཁྲིད་འཛུགས་ཐུབ་པ་བྱུང་ན། དེའི་རྒྱུན་འཕེལ་ཐུབ་ན་རྟོགས་པ་དོན་བརྒྱུད་དུ་འགྱུར་ལ། ཁྲིད་གཞན་ལ་འཕེལ་མ་ཐུབ་ཀྱང་རང་ཉམས་ལེན་བསྒྲུབ་པར་བྱེད་པ་བྱུང་ན་ཉམས་སུ་ལེན་པ་སྒྲུབ་པའི་བསྟན་པ་ཡིན་ཏེ། ཐུབ་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་ཡིན། །དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ནའོ། །ཞེས་གསུངས། ཐ་མལ་བ་རྣམས་ལ་ཡང་དགེ་སྒྲུབ་སྡིག་སྤང་བྱེད་པ་དང་། བསྙེན་གནས་ངག་བཅད་ཡིག་དྲུག་འདོན་པ་སོགས་དགེ་བ་ལ་བློ་ཁ་འགྱུར་བ་དང་། ཞི་ལྷག་གི་ཏིང་ངེ་འཛིན་སྐྱོང་ཤེས་པ་མང་དུ་འོང་བས། དེའི་ཕན་ཡོན་ཁོ་ན་ལ་བསམ་པར་བྱའོ། །དེ་དག་ལ་ཚོགས་བཤད་ཀྱི་སྡེ་སྣོད་ཅེས་བྱ་སྟེ། ཁྲོམ་ཆོས་
སུ་རུང་བ་ཡིན། གནད་ཀྱི་ངོ་སྤྲོད་ཟབ་མོ་དང་། གེགས་སེལ་བོགས་འདོན་ཁྱད་པར་ཅན་ནི་རྟོག་འབུལ་གཅིག་ཞུས་པའི་སྐབས་སུ་གང་ལ་གང་ཕན་ཚིག་རེ་རེ་བཤད་པར་བྱའོ། །ཁྲོམ་ཆོས་དང་འབྱམས་བཤད་མི་རུང་ངོ་། །དེས་ཀྱང་མི་ཕན་གནོད་ཆེ་བའི་ཕྱིར་རོ། །དེ་ལྟར་སེམས་བསྐྱེད་དང་ལྡན་པས་སྤེལ་མཁས་པར་བྱས་ན་རང་ཉིད་ཀྱང་བསྟན་འཛིན་གྱི་གྲལ་ཚུད་ཅིང་། ལུང་དང་རྟོགས་པའི་བསྟན་པ་ཡུན་རིང་དུ་གནས་པར་འགྱུར་རོ། །ཁྲིད་ཀྱི་རྒྱབ་ཆོས་གྱི་ལེའུ་ཐ་མ་རྫོགས་སོ། །འདི་བྲིས་ཉེས་པའི་ཆ་རྣམས་གང་མཆིས་པ། །རྩ་གསུམ་ཆོས་བདག་སྲུང་མའི་ཚོགས་ལ་བཤགས། །འདི་བྲིས་དགེ་བའི་རྩ་བ་གང་མཆིས་དེས། །ཐུགས་རྗེ་ཆེན་པོའི་བསྟན་པ་མཐའ་རྒྱས་ནས། །འདི་ལ་འབྲེལ་བ་ཐོགས་ཚད་འགྲོ་བ་ཀུན། །བདེ་ཆེན་དག་པའི་ཞིང་དུ་སྐྱེ་གྱུར་ཅིག །སརྦ་མངྒ་ལཾ། ཞལ་དྲོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།