གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ ཐུགས་རྗེ་ཆེན་པོའི་དམར་ཁྲིད་ཆོས་འབྲུ་བདུན་པའི་ཁྲིད་རྒྱས་པ།
ཤོག་ལྷེབ་ ༢༤༩ ནས་་ ༣༠༠ བར།
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ ཐུགས་རྗེ་ཆེན་པོའི་དམར་ཁྲིད་ཆོས་འབྲུ་བདུན་པའི་ཁྲིད་རྒྱས་པ་བཞུགས་སོ༔
ན་མོ་གུ་རུ་དྷེ་ཝ་ལོ་ཀི་ཤྭ་ར་ཛྙཱ་ན་ཌཱ་ཀི་སརྦ་སིདྡྷི་ཧཱུྃ༔ རིའོ་ན་ད་ལམ་ཁྱེད་རྣམས་ལ་ཐུགས་རྗེ་ཆེན་པོའི་དམར་ཁྲིད་འཆད་པ་ལ༔ ཐོག་མར་བླ་མ་བརྒྱུད་པའི་ལོ་རྒྱུས་ནི་རྒྱས་པར་རྣམ་ཐར་མགུར་འབུམ་དབང་བཤད་སོགས་ནས་གསལ་ལྟར་ཡིན་ལ༔ ཁྲིད་འདི་ཡི་རྩ་ཚིག་ལས༔ ཧེ་ཧེ་ཞེས་པའི་དོན་ནི༔ བདེ་མཆོག་གི་རྩ་བ་དང་བཤད་པའི་རྒྱུད་རྣམས་ནས༔ ཧེ་ནི་རྒྱུ་སོགས་སྟོང་པ་ཉིད༔ ཅེས་གསུངས་པ་ལྟར༔ གང་ཟག་དང་ཆོས་ཀྱི་བདག་མེད་གཉིས་མཚོན་པ་ཡིན་ནོ༔ རྗེ་བླ་མ་རྣམས་ལ་ཞེས་པའི་དོན་ནི༔ ཆོས་ཁུངས་བཙུན་པར་སྟོན་ཏེ
དམ་ཆོས་བརྒྱུད་པར་འབྲེལ་པ་ཉིད་ཟབ༔ ཅེས་གསུངས་པ་ལྟར༔ ཆོས་འདི་དྲུག་པ་རྡོ་རྗེ་འཆང་ཆེན་པོ་ནས༔ ས་བཅུའི་སེམས་དཔའི་བུདྡྷ་པ་བྱ་བ་ལ་གསུངས༔ དེས་མཆོག་གི་གྲུབ་ཆེན་རྫ་དྲ་པ་ལ་གནང་༔ དེས་གྲུབ་ཆེན་སྐྱེའུ་པ་ལ་གནང་༔ དེས་ཨོ་རྒྱན་པདྨ་འབྱུང་གནས་ལ་གནང་༔ དེས་སྤྲུལ་སྐུ་མི་འགྱུར་རྡོ་རྗེ་ལ་དངོས་སུ་གནང་བའོ༔ དེ་ལྟར་བརྒྱུད་པ་ཉེ་ཞིང་མཁའ་འགྲོའི་ཁ་རླངས་མ་ཡལ་བས་བྱིན་རླབས་ཀྱི་བཀའ་བབ་ཆེན་པོ་ཡིན་ནོ༔ གསོལ་བ་འདེབས་པ་ཞེས་པའི་དོན་ནི་དེ་ལྟ་བུའི་བརྒྱུད་པ་དང་བླ་མ་དང་ཆོས་ལ་དད་པ་དགོས་པར་
བསྟན་ཏོ༔ ཆོས་བཅུ་པའི་མདོ་ལས༔ དད་པ་མེད་པའི་མི་རྣམས་ལ༔ དཀར་པོའི་ཆོས་རྣམས་མི་འབྱུང་སྟེ༔ ས་བོན་མེ་ཡིས་ཚིག་པ་ལ༔ མྱུ་གུ་སྔོན་པོ་ཇི་བཞིན་ནོ༔ ཞེས་གསུངས་སོ༔ དེ་བཞིན་དུ་སངས་རྒྱས་ཕལ་པོ་ཆེ་ལས༔ སྲིད་པའི་གནས་ཆེན་དད་པ་ཆུང་བ་ཡིས༔ སངས་རྒྱས་བྱང་ཆུབ་འཐོབ་པར་མི་ནུས་སོ༔ ཞེས་གསུངས་པས༔ དད་པ་མེད་ན་ཆོས་ཟབ་ཀྱང་ཉམས་རྟོགས་མི་སྐྱེའོ༔ དེས་ན་དད་པ་གལ་ཆེ་སྟེ༔ མདོ་རྒྱ་ཆེ་རོལ་པ་ལས༔ ཀུན་དགའ་བོ་དད་པ་ལ་སྦྱོར་བར་གྱིས་ཤིག༔ འདི་ནི་དེ་བཞིན་གཤེགས་པས་གསོལ་བ་འདེབས་པའོ༔ ཞེས་གསུངས་སོ༔ དད་པ་ཡོད་ན་ཉམས་རྟོགས་སྐྱེ་སྟེ༔ དཀོན་མཆོག་ཏ་ལ་ལའི་གཟུངས་ལས༔ རྒྱལ་དང་རྒྱལ་བའི་ཆོས་ལ་དད་གྱུར་ཅིང་༔ སངས་རྒྱས་སྲས་ཀྱི་སྤྱོད་ལ་དད་བྱེད་ནས༔ བྱང་ཆུབ་བླ་ན་མེད་ལ་དད་གྱུར་ན༔ སྐྱེས་བུ་ཆེན་པོ་རྣམས་ཀྱི་སེམས་སྐྱེའོ༔ ཞེས་གསུངས་སོ༔ དེས་བླ་མ་བརྒྱུད་པ་ལ་ཡིད་དྭངས་བའི་དད་པ་སངས་རྒྱས་ཀྱི་བྱང་ཆུབ་དེ་འཐོབ་པར་འདོད་པའི་དད་པ༔ ཆོས་ལ་ཡིད་ཆེས་པའི་དད་པ༔ ཆོས་སྒྲུབ་པ་ལ་རྐྱེན་བར་ཆད་ཅི་བྱུང་ཡང་ཆོས་ལ་
ཕྱིར་མི་ལྡོག་པའི་དད་པ་བྱའོ༔ དེ་ལ་ཆོས་ཉན་པ་ཁོ་ན་ལ་ཡང་ཕན་ཡོན་རྒྱ་ཆེ་སྟེ༔ སྔོན་དགེ་སློང་ཨུ་པ་གུཔས་ཆོས་འཆད་པའི་སྒྲ་ཁྱི་ཞིག་གིས་ཐོས་པས་སྒྲིབ་པ་བསྲབས་ནས་ཚེ་འཕོས་མ་ཐག༔ གཞན་འཕྲུལ་དབང་བྱེད་ཀྱི་ལྷར་སྐྱེས་པ་དང་༔ རྒྱ་གར་ན་དགེ་སློང་ཞིག་གིས་མདོ་སྡུད་པ་ཞལ་ཐོན་མཛད་པའི་སྒྲ་བྱ་ཐེ་བ་ཞིག་གིས་ཐོས་པས༔ སྒྲིབ་པ་བསྲབས་ནས་ཚེ་འཕོས་མ་ཐག་མི་ལུས་ཐོབ༔ རབ་ཏུ་བྱུང་བས་སྡུད་པ་བཟུང་མ་དགོས་པར་བློ་ལ་ཡོད་པར་བྱུང་བ་དང་༔ དགེ་སློང་གཅིག་གིས་ནམ་མཁའ་ནས་ཆོས་བཤད་པའི་སྒྲ་སྦལ་པ་ཞིག་གིས་ཐོས་པས་སྒྲིབ་པ་བསྲབས་ནས༔ ཚེ་འཕོས་མ་ཐག་སུམ་ཅུ་རྩ་གསུམ་གྱི་ལྷར་སྐྱེས་པའི་ལོ་རྒྱུས་ཀྱང་ཡོད་དོ༔ བཅོམ་ལྡན་འདས་ཀྱི་ཞལ་ནས། ཐོས་པས་ཆོས་རྣམས་ཤེས་པར་བྱ༔ ཐོས་པས་སྡིག་ལས་ལྡོག་པར་བྱེད༔ ཐོས་པས་དོན་མ་ཡིན་པ་སྤང་༔ ཐོས་པས་མྱ་ངན་འདས་པ་ཐོབ༔ ཅེས་གསུངས་པས་ཆོས་ལ་དད་གུས་རྩེ་གཅིག་པས་ཉོན་ཅིག༔ དེ་ཡང་འདིའི་གཞུང་ལས༔ སྤྲང་པོས་ཆོས་བཤད་མ་འོས་ཀྱང་༔ བདག་གིས་ཆོས་ཤིག་བཤད་པ་ན༔ ཞེས་པས་བླ་མའི་མཚན་ཉིད་སྟོན་
ཏེ༔ རྡོ་རྗེ་མཁའ་འགྲོའི་རྒྱུད་ལས༔ གང་ཡང་ཁྲོ་དང་སྤུ་ཅན་དང་༔ ངག་ནི་ཤིན་ཏུ་རྩུབ་པ་དང་༔ ཡོན་ཏན་དག་གི་ཆོག་ཤེས་པ༔ དེ་ནི་བླ་མར་བསྟེན་མི་བྱ༔ ཞེས་གསུངས་པས་བླ་མ་བརྟག་དགོས་ཏེ༔ བླ་མ་ལྔ་བཅུ་པ་ལས༔ བླ་མ་དང་ནི་སློབ་མ་དག༔ མཚུངས་པར་དམ་ཚིག་ཉམས་གྱུར་ན༔ དཔའ་བོས་དང་པོ་སློབ་དཔོན་དང་༔ སློབ་མའི་འབྲེལ་པ་བརྟག་པར་བྱ༔ ཞེས་གསུངས་སོ༔ འོ་ན་སློབ་དཔོན་གྱི་མཚན་ཉིད་ཇི་ལྟ་བུ་ཞེ་ན༔ རྡོ་རྗེ་གུར་ལས༔ རྡོ་རྗེ་སློབ་དཔོན་མཚན་ཉིད་ལྔ་ལྡན་ཉིད༔ དེ་ཡིས་ཉེ་བར་བསྟན་པ་བསྔགས༔ སྒྲུབ་པ་པོ་ལ་དངོས་གྲུབ་སྐྱེ༔ བསྟན་ཞིང་ཟབ་མོའི་ཆོས་ལྡན་དང་རིག་པའི་གནས་རྣམས་ཀུན་ལ་མཁས༔ སྦྱིན་སྲེག་དཀྱིལ་འཁོར་སྔགས་ཤེས་ཤིང་༔ རབ་གནས་གཏོར་མའི་ཕ་རོལ་སོན༔ དེ་ཉིད་བཅུ་པོ་རྣམ་པར་རིག༔ ཉན་ཐོས་སྤྱོད་པ་སྐྱོང་བྱེད་ཅིང་༔ སྔགས་ཀྱི་ཐེག་པ་རིམ་པར་གུས༔ གཟུགས་ལྡན་མཐོང་ན་དགའ་བ་དང་༔ དཀྱིལ་འཁོར་འབྲི་མཁས་བཟླས་པར་ལྡན༔ རྩ་བའི་ལྟུང་བ་རབ་འཇོམས་ཤིང་༔ སྔགས་དང་རྒྱུད་ཀྱི་རབ་སྦྱོར་གྱིས༔ སེམས་ཅན་རྣམས་ལ་
བདེ་སྟེར་བ༔ དེ་འདྲ་བླ་མ་དངོས་བྱས་ན༔ བདག་གིས་ཀྱང་ནི་སྨད་མི་བྱ༔ ཞེས་དང་༔ གདན་བཞི་ལས༔ དུལ་ཞིང་ཞི་བའི་ཆ་བྱད་ཅན༔ སེམས་ཅན་རྣམས་ལ་མི་འཇིག་སྦྱིན༔ སྔགས་དང་རྒྱུད་ཀྱི་སྦྱོར་ཤེས་ཤིང་༔ སྦྱོར་དང་བཟོད་དང་ཐབས་དག་དང་༔ ཐམས་ཅད་དུ་ནི་ངག་འཇམ་ཞིང་༔ སེམས་ཅན་རྣམས་ལ་བུ་གཅིག་བཞིན༔ རྣལ་འབྱོར་བསམ་གཏན་ཆོག་སྦྱོར་ན༔ སྙིང་རྗེ་ཕན་པའི་སེམས་ཀྱིས་ནི༔ བདེན་པར་སྨྲ་ཞིང་གསོད་མི་བྱ༔ དེ་ཉིད་བཅུ་པོ་ཡོངས་ཤེས་ན༔ དེ་ཉིད་སློབ་དཔོན་དུ་བསྟེན་ནོ༔ ཞེས་གསུངས་སོ༔ གལ་ཏེ་དེ་ལྟར་མཚན་ཉིད་ལྡན་པ་མ་རྙེད་ན་སྐྱོན་དང་ཡོན་ཏན་གཉིས་ཡོན་ཏན་ཆ་ཆེ་བར་འདུག་ན་རུང་སྟེ༔ དོན་དམ་བསྙེན་པ་ལས། སྙིགས་དུས་དབང་གིས་བླ་མའི་སྐྱོན་དང་ཡོན་ཏན་འདྲེས༔ རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན༔ གང་གི་ཡོན་ཏན་ལྷག་པ་ཡོངས་ནི་ལེགས་སྤྱད་ནས༔ བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ༔ ཞེས་གསུངས་ཤིང་༔ ཁྱད་པར་དུ་ཨོ་རྒྱན་རིན་པོ་ཆེའི་ལུང་གིས་ཟིན་པ་ནི་མཆོག་ཡིན་ཏེ༔ ནང་གི་སྐྱོན་དང་ཡོན་ཏན་མངོན་ཤེས་མེད་པས་མི་
ཤེས་པའི་ཕྱིར་རོ༔ དེ་ལྟར་ཐ་ནའང་ཡོན་ཏན་གྱི་ཆ་ཆེ་ཙམ་ནི་དགོས་ཀྱི༔ ལོག་པའི་བཤེས་གཉེན་ལ་ནི་འཛེམ་པར་བྱ་སྟེ༔ སངས་རྒྱས་མཛོད་ཀྱི་མདོ་ལས༔ འཇིག་རྟེན་གྱི་དགྲས་ནི་ལུས་སྲོག་ཙམ་འཕྲོག་གི༔ ལུས་ཤིག་གཏོང་དུ་ཟད་དོ༔ མི་གཏི་མུག་ཅན་གྱིས་ཆོས་བཤད་ན༔ བསྐལ་པ་བརྒྱད་ཁྲི་བཞི་སྟོང་གི་བར་དུ་དམྱལ་བར་སྐྱེའོ༔ ཞེས་གསུངས་སོ༔ དེ་ཡང་གཞུང་ལས༔ རྒྱལ་བུ་ཡོད་ཀྱང་ཆོས་འདི་ཉོན༔ ཞེས་པས་སློབ་མའི་མཚན་ཉིད་དང་༔ བླ་མ་བསྟེན་ལུགས་ཆོས་ཉན་པའི་ཀུན་སྤྱོད་རྣམས་བསྟན་ཏེ༔ སྒྱུ་འཕྲུལ་དྲྭ་བ་ལས༔ དགེ་དང་སྒོམ་ལ་དགའ་བ་དང་༔ རྟག་ཏུ་བླ་མ་ལ་གུས་དང་༔ རྒྱུན་དུ་ལྷ་རྣམས་མཆོད་བྱེད་པའི༔ ཡོན་ཏན་ལྡན་ན་སློབ་མ་ཡིན༔ ཞེས་དང་༔ དུར་ཁྲོད་རྒྱན་གྱི་རྒྱུད་ལས༔ དཔའ་ཞིང་དུལ་ལ་བློ་གྲོས་ལྡན་བཟོད་ལྡན་དྲང་ལ་གཡོ་སྒྱུ་མེད༔ དད་ལྡན་རིགས་ལྡན་གཏོང་ཕོད་ཆེ༔ ཐོས་མང་དམ་ཚིག་ལྡན་ལ་སྦྱིན༔ ཞེས་དང་༔ བཤད་རྒྱུད་རྡོ་རྗེ་ཕྲེང་བ་ལས༔ ཇི་ལྟར་སེང་གེའི་འོ་མ་ནི༔ ས་ཡི་སྣོད་དུ་བཞག་མི་བྱ༔ དེ་བཞིན་རྣལ་འབྱོར་ཆེན་པོའི་རྒྱུད༔ སྣོད་མིན་རྣམས་ལ་སྦྱིན་མི་བྱ
ཞེས་གསུངས་སོ༔ དེ་ལྟ་བུའི་སློབ་མ་ལ་གསང་སྔགས་བླ་ན་མེད་པའི་གདམས་པ་ཐམས་ཅད་སྦྱིན་པར་བྱ་ཞིང་༔ ཨོ་རྒྱན་རིན་པོ་ཆེས༔ མདོར་ན་གསང་སྔགས་རྡོ་རྗེ་ཐེག་པ་ལ༔ གང་འབྲེལ་ཐམས་ཅད་བྱང་ཆུབ་ཐོབ་པའི་ཕྱིར༔ འདི་གྲོལ་འདི་མ་གྲོལ་ཞེས་རྣམ་དབྱེ་བྲལ༔ འབྲེལ་ཚད་དོན་དང་ལྡན་ཞེས་དེ་ལ་བྱ༔ ཞེས་གསུངས་པའི་ཕན་ཡོན་ལ་བསམ་ཞིང་༔ སྣོད་མིན་ལ་ཡང་འབྲེལ་པ་ཐོབ་ཙམ་བྱ་སྟེ༔ ཨོ་རྒྱན་ཆེན་པོས༔ འབྲེལ་ཡོད་ཙམ་རེ་བློས་མི་སྤང་༔ ཞེས་གསུངས་སོ༔ བླ་མ་བསྟེན་ཚུལ་ནི༔ སྒྱུ་འཕྲུལ་དྲྭ་བའི་རྒྱུད་ལས༔ སློབ་དཔོན་ཇི་ལྟར་བལྟ་ཞེ་ན༔ བླ་མ་སངས་རྒྱས་ཀུན་དང་མཉམ༔ དེ་ཉིད་རྟག་ཏུ་རྡོ་རྗེ་འཆང་༔ དེ་བཞིན་གཤེགས་པ་རིན་ཆེན་ཏོག༔ དེ་ནི་ཡེ་ཤེས་རྒྱ་མཚོ་སྟེ༔ ཡིད་བཞིན་ནོར་བུ་རིན་ཆེན་བཞིན༔ སློབ་དཔོན་གྱིས་ནི་ཡོན་ཏན་བཟུང་སྐྱོན་རྣམས་ནམ་ཡང་མ་ཡིན་ནོ༔ ཡོན་ཏན་བཟུང་བས་དངོས་གྲུབ་ཐོབ༔ སྐྱོན་རྣམས་ཀྱིས་ནི་དངོས་གྲུབ་ཉམས༔ དེ་ཡི་གྲིབ་མའང་མི་འགོང་སྟེ༔ མཆོད་རྟེན་བཤིག་དང་འདྲ་བར་གསུངས་ཞེས་དང་༔ སྡོམ་འབྱུང་ལས༔ གལ་
ཏེ་ལྷ་ནི་མཉེས་འདོད་ན༔ འབད་པས་བླ་མ་མཉེས་པར་བྱ༔ བླ་མ་མཉེས་པར་མ་བྱས་པའི༔ དངོས་གྲུབ་སྨིག་རྒྱུའི་ཆུ་དང་མཚུངས༔ ཞེས་དང་༔ དོན་དམ་བསྙེན་པ་ལས༔ ཐུན་མཚམས་གསུམ་དུ་ཤིན་ཏུ་རྣམ་པར་དག་པ་ཡི༔ ཁ་དང་ལག་པ་རྐང་པ་དག་ནི་ཁྲུས་བྱ་སྟེ༔ མེ་ཏོག་ཡང་དག་བླང་ནས་བླ་མའི་སྤྱན་སྔར་ནི༔ རྒྱལ་བ་རྣམས་ཀྱི་དཀྱིལ་འཁོར་ཤིན་ཏུ་ཟླུམ་པོར་བྱ༔ བླ་མའི་ཞབས་ཀྱི་ཆུ་སྐྱེས་མེ་ཏོག་གིས་མཆོད་ཅིང་༔ ཤིན་ཏུ་གུས་པས་སྤྱི་བོར་ལག་པས་ཕྱག་བྱའོ༔ ཞེས་གསུངས་པས་རྒྱལ་བུ་ལ་སོགས་པ་རིགས་མཐོ་བ་དང་༔ རིག་གནས་ལ་མཁས་པ་སོ་སོའི་ང་རྒྱལ་བཅགས་ནས་གུས་པས་བླ་མ་བསྟེན་དགོས་སོ༔ དེ་ཡང་སྣོད་ཁ་སྦུབ་ལྟ་བུ་དོན་ཡེ་མི་གོ་བ་དང་༔ ཞབས་རྡོལ་ལྟ་བུ་གོ་ཡང་ཡིད་ལ་མི་བཟུང་བ་དང་༔ དུག་ཅན་ལྟ་བུ་འགྲན་སེམས་དང་ཚོད་ལྟ་སོགས་མ་ཡིན་པར༔ བླ་མ་ལ་སྨན་པ་ལྟ་བུ༔ ཆོས་ལ་སྨན་ལྟ་བུ༔ ཆོས་ཉན་ཅིང་ཉམས་སུ་བླངས་པས་སྨན་གྱིས་ནད་སེལ་བ་ལྟར༔ འཁོར་བའི་སྡུག་བསྔལ་མཐའ་དག་སེལ་བའི་འདུ་ཤེས་ཀྱིས་ཉན་འཚལ༔ དེ་ལ་ཁྲིད་ཀྱི་གོ་རིམ་གཞུང་ལས་བསྐྱེད་རིམ་དང་༔ སྒྲིབ་
སྦྱོང་༔ ཞི་གནས་དང་ལྷག་མཐོང་༔ བྱམས་པ་དང་སྙིང་རྗེ༔ དལ་འབྱོར་རྙེད་དཀའ་དང་མི་རྟག་པ་སྟེ༔ གོ་རིམ་འཆོལ་བ་ལྟར་གསུངས་པའི་དོན་ཡང་གཉིས་ཏེ༔ དང་པོ་བཞི་རྩ་བ་ཡིན་ལ༔ ཕྱི་མ་གསུམ་ནི༔ གེགས་སེལ་དང་བོགས་འདོན་དུ་འགྱུར་བ་ཡིན་ལ༔ དེ་ནི་སྔོན་དུ་ཆོས་སྒོར་ཞུགས་ཤིང་ཁྲིད་ཀྱང་ཐོབ་བ་ཞིག་ལ་བོགས་འདོན་དུ་དེ་ལྟར་ཟབ་པར་དགོངས་ལ༔ ལས་དང་པོ་པ་ལ་གོ་རིམ་བསྒྲིགས་དགོས་ཏེ༔ གཞུང་ཉིད་དུ་མ་བསྒྲིགས་པ་ནི་སྙིགས་དུས་སྐྱེ་བོ་སྤྱི་བརྟོལ་བ་སློབ་དཔོན་མི་བསྟེན་པ་འབྱུང་བ་རྣམས་དགག་པའི་དོན་ནོ༔ དེ་ལ་འདིར་གོ་རིམ་བསྒྲིགས་ཏེ་འཆད་པ་ལ༔ གཞུང་ལས༔ ད་རེས་མི་ལུས་ཐོབ་པ་ན༔ དེ་ལྟར་ཆོས་ལ་བརྩོན་འགྲུས་དགོས་ཞེས་གསུངས་པའི་དོན་བཤད་ན༔ ཐོག་མར་འཆི་བ་མི་རྟག་པ་བསྒོམ་དགོས་ཏེ༔ རྒྱ་ཆེ་རོལ་པ་ལས༔ སྲིད་གསུམ་མི་རྟག་སྟོན་ཀའི་སྤྲིན་དང་འདྲ༔ འགྲོ་བའི་སྐྱེ་འཆི་གར་ལ་བལྟ་དང་མཚུངས༔ སྐྱེས་བུའི་ཚེ་སྲོག་ནམ་མཁའི་གློག་འདྲ་སྟེ༔ རི་གཟར་འབབས་ཆུ་བཞིན་དུ་མྱུར་མགྱོགས་འགྲོ༔ ཞེས་དང་༔ མྱ་ངན་འདས་མདོར༔ འདུས་བྱས་རྟག་
པར་གྱུར་པ་ཡི༔ གནས་འདི་རྙེད་པར་མི་འགྱུར་བས༔ འདུས་བྱས་ཐམས་ཅད་མི་རྟག་གིས༔ མྱ་ངན་མ་བྱེད་ཀུན་དགའ་བོ༔ ཞེས་དང་༔ འདུལ་བ་ལུང་ལས་བསགས་པ་ཀུན་གྱི་མཐའ་འཛད་ཅིང་༔ མཐོན་པོ་རྣམས་ནི་མཐར་ལྟུང་ལགས༔ འཕྲད་པའི་མཐའ་ནི་བྲལ་བ་སྟེ༔ གསོན་པའི་མཐའ་ནི་འཆི་བ་ཡིན༔ ཞེས་དང་༔ འདི་ན་མཐུ་ཆེན་གནས་མཐོ་བར༔ གནས་པའི་ལྷ་ཚེ་རིང་པོ་ཡང་དེ་ལས་ཚེ་ཚད་ཉམས་གྱུར་ན༔ འཆི་བ་འདི་ལ་སུ་ཞིག་ཐར༔ ཞེས་དང་༔ མྱ་ངན་འདས་མདོར༔ སྐྱེ་བ་ཡོད་ན་འཆི་བ་ཡོད༔ དར་བ་ཡོད་ན་རྒུད་པ་ཡོད༔ ལང་ཚོ་དེ་ཡང་མི་རྟག་སྟེ༔ དར་བའི་མདོག་ཀྱང་ནད་ཀྱིས་འཕྲོག༔ འཚོ་བའི་ཚེ་ཡང་འཆི་བས་འཕྲོག༔ རྟག་པའི་ཆོས་ནི་གང་ཡང་མེད༔ ཅེས་དང་༔ རྒྱ་ཆེ་རོལ་པ་ལས༔ གང་དུ་གནས་ཀྱང་འཆི་བས་མི་ཚུགས་པའི༔ ས་ཕྱོགས་དེ་ནི་གང་དུའང་ཡོད་མིན་ཏེ༔ བར་སྣང་ན་མེད་རྒྱ་མཚོའི་སྟེང་ནའང་མེད༔ རི་བོ་རྣམས་ཀྱི་ཕུགས་ནའང་ཡོད་མ་ཡིན༔ ཞེས་དང་༔ མི་རྟག་པའི་ཚོམ་ལས༔ གང་ཡང་སངས་རྒྱས་རང་སངས་རྒྱས༔ སངས་རྒྱས་རྣམས་ཀྱིས་ཉན་ཐོས་
ཀྱང་༔ སྐུ་ལུས་འདི་ནི་སྤང་མཛད་ན༔ སྐྱེ་བོ་ཕལ་པ་སྨོས་ཅི་དགོས༔ ཞེས་དང་༔ སྐྱེས་པ་བུད་མེད་མང་པོ་ཡང་དར་ལ་བབ་པའང་འཆི་གྱུར་ན། དེ་ལ་མི་འདི་གཞོན་ཞེས་ཏེ༔ གསོན་པའི་གདེང་གྲོགས་ཅི་ཞིག་ཡོད༔ ཁ་ཅིག་མངལ་དུ་འཆི་བར་འགྱུར༔ དེ་བཞིན་ཁ་ཅིག་བཙས་པའི་སར༔ དེ་བཞིན་ཁ་ཅིག་གོག་ཙམ་ལ་ལ་རྒས་དང་ལ་ལ་གཞོན༔ ལ་ལ་དར་ལ་བབ་པའི་མི༔ རིམ་གྱིས་རབ་ཏུ་འགྲོ་འགྱུར་ཏེ༔ འབྲས་བུ་སྨིན་པ་ལྟུང་བ་བཞིན༔ ཞེས་དང་༔ སྔ་དྲོ་སྐྱེ་བོ་མང་མཐོང་༔ ཕྱི་དྲོ་ཁ་ཅིག་མཐོང་མི་འགྱུར༔ ཕྱི་དྲོ་སྐྱེ་བོ་མང་མཐོང་བ༔ སྔ་དྲོ་ཁ་ཅིག་མཐོང་མི་འགྱུར༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ སྐྱེས་ཕན་ཆད་འཆི་ངེས་པར་འདུག༔ དེ་མི་རྟག་པའི་ངོ་བོ་ཡིན་ཏེ༔ དོན་སྙིང་ལ་མཚོན་ཕོག་པའི་སྐྱེས་བུ་དང་འདྲ༔ དེ་ཡང་ནམ་འཆི་ངེས་པ་མི་འདུག༔ དེ་ཀ་མི་རྟག་པའི་མཚན་ཉིད་ཡིན་ཏེ༔ རྩྭ་ཁའི་ཟིལ་པ་དང་འདྲ༔ འཆི་བ་ལ་ཅེས་ཀྱང་མི་ཕན་པར་འདུག༔ དེ་ཀ་མི་རྟག་པའི་བྱེད་ཆོས་ཡིན་ཏེ། ཉི་མ་རྒས་པའི་གྲིབ་སོ་དང་འདྲའོ༔ དང་པོ་འཆི་ངེས་པའི་རྒྱུ་མཚན་ལ་
གསུམ་སྟེ༔ སྔར་སྐྱེས་པ་ལ་ལུས་པ་མེད་པ་དང་༔ ཚེ་སྣོན་པ་མེད་ཅིང་འཕྲི་བ་ཡོད་པ་དང་༔ ལུས་སེམས་འདུས་བྱས་ཡིན་པས་འཆི་ངེས་སོ༔ གཉིས་པ་ནམ་འཆི་ངེས་པ་མེད་པ་ལ་རྒྱུ་མཚན་གསུམ་སྟེ༔ ཚེ་ལ་དུས་བཏབ་མེད་པ་དང་༔ འཆི་རྐྱེན་མང་བ་དང་༔ འདུས་བྱས་འཇིག་པའི་རང་བཞིན་ཅན་ཡིན་པས་ནམ་འཆི་ངེས་པ་མེད་པའོ༔ གསུམ་པ་འཆི་བ་ལ་ཅིས་ཀྱང་མི་ཕན་པ་ལ་རྒྱུ་མཚན་གསུམ་སྟེ༔ བསགས་པའི་ནོར༔ འབྲེལ་བའི་གཉེན༔ བརྩིགས་པའི་མཁར་གྱིས་ཀྱང་མི་ཕན་པའོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ཆེམས་ལས༔ བོད་ཀྱི་བརྩོན་འགྲུས་ཚེ་འདིར་ཚེ༔ སང་བྱེད་གནང་བྱེད་མི་ཚེ་ཟད༔ ད་ལྟ་འཆི་ཡང་ཆོས་མི་དྲན༔ དགོས་ངོ་ཤེས་པ་དེ་ཡིན་ཏེ༔ ཁ་ཡེངས་མིག་ཡེངས་ངང་ལ་བརྗེད་བཞག་ནས་འགྲོ་ན་ང་ཕྱིར་ཤོག༔ སེར་སྣའི་གྲོལ་ཐབས་དེ་ལས་མེད༔ ཅེས་གསུངས་པ་ལྟར༔ དེ་སྔ་ཚེ་ཐར་དུ་ལུས་པ་གཅིག་ཀྱང་མི་གདའ༔ རང་ལ་མི་འཆི་བའི་གདེང་ཅི་ཡོད༔ རང་དང་ན་མཉམ་དང་དེ་ལས་གཞོན་པ་དུ་ཤི་ཡིད་ལ་རྩིས་བགྲང་མཛོད༔ ཤི་བས་མི་ཆོག་ཤི་ཐོན་ནས་བར་དོའི་འཇིགས་སྐྲག༔ བར་དོ་འཇིགས་པའི་
སྒྲ་བཞི༔ ཡ་ང་བའི་འཕྲང་བརྒྱད་འགྲིམས་དགོས༔ དེས་མི་ཆོག་ལས་ཀྱི་དབང་གིས་སྐྱེ་བ་ལེན་དགོས་ཏེ༔ སྡོམ་གསུམ་བསྟན་པའི་མདོ་ལས༔ ཅི་འདྲ་བ་ཡི་ལས་བྱས་པ༔ རྣམ་པར་སྨིན་པ་དེ་འདྲར་འགྱུར༔ བསྐལ་པ་བྱེ་བ་ཕྲག་བརྒྱར་ཡང་༔ དེ་ནི་ཆུད་ཟོར་འགྱུར་བ་མེད༔ ཅེས་དང་༔ དེས་པས་ཞུས་པའི་མདོ་ལས༔ ས་བོན་ཚ་བ་རྣམས་ལ་ནི༔ འབྲས་བུ་ཚ་བ་སྨིན་པར་འགྱུར༔ ས་བོན་མངར་བ་རྣམས་ལ་ནི༔ འབྲས་བུ་མངར་བ་སྐྱེ་བར་འགྱུར༔ དཔེ་ཟླར་བྱས་པ་འདི་ཡིས་ནི༔ སྡིག་པའི་ལས་ལ་སྡུག་བསྔལ་དང་༔ དགེ་བའི་ལས་ལ་བདེ་བ་སྟེ༔ ཁྱེད་ཀྱིས་དེ་ལྟར་ཤེས་པར་གྱིས༔ ཞེས་དང་༔ མདོ་སྡེ་ལས་བརྒྱ་པ་ལས༔ ལས་རྣམས་ཀྱང་ནི་སྣ་ཚོགས་ལས༔ དེ་ཡིས་འགྲོ་འདི་སྣ་ཚོགས་བྱས༔ ཞེས་དང་༔ སྙིང་རྗེ་པདྨ་དཀར་པོ་ལས་འཇིག་རྟེན་ནི་ལས་ཀྱིས་བྱས་པ་ལས་ཀྱི་སྤྲུལ་པའོ༔ སེམས་ཅན་རྣམས་ནི་ལས་ཀྱིས་བྱས་པ་ལས་ཀྱི་རྒྱུ་ལས་བྱུང་༔ ལས་ཀྱིས་རབ་ཏུ་ཕྱེ་བའོ༔ ཞེས་དང་༔ དྲན་པ་ཉེར་བཞག་ལས༔ མེ་ནི་གྲོང་བར་འགྱུར་ཡོང་སྲིད༔ རླུང་ནི་ཞགས་པས་འཆིང་ཡང་སྲིད༔
ཉི་ཟླ་ཐང་ལ་ལྷུང་ཡང་སྲིད༔ ལས་ཀྱི་རྣམ་སྨིན་བསླུ་མི་སྲིད༔ ཅེས་དང་༔ དཀོན་མཆོག་བརྩེགས་པ་ལས༔ ཅི་འདྲ་བ་ཡི་ལས་བྱས་པ༔ རྣམ་པར་སྨིན་པའང་དེ་འདྲར་འགྱུར༔ བསྐལ་པ་བྱེ་བ་བརྒྱར་ཡང་ནི༔ དེ་ནི་ཅུང་ཟད་འགྱུར་བ་མེད༔ ཅེས་དང་༔ རྡོ་རྗེ་ཕྲེང་བ་ལས༔ བཅོམ་ལྡན་འདས་ཀྱིས་བཀའ་སྩལ་པ༔ གསང་བའི་བདག་པོ་ཉོན་ཅིག༔ ལུས་ཀྱིས་ཉེས་པར་སྤྱོད་པ་ནི་རྣམ་པ་གསུམ་མོ༔ ངག་གིས་ཉེས་པར་སྤྱོད་པ་ནི་རྣམ་པ་བཞིའོ༔ ཡིད་ཀྱི་ལས་ནི་རྣམ་པ་གསུམ་སྟེ༔ དེ་དག་ཉོན་མོངས་པ་གསུམ་གྱིས་སེམས་ཅན་དམྱལ་བ་དང་༔ ཡི་དྭགས་དང་དུད་འགྲོའི་སྐྱེ་གནས་སུ་ལྟུང་བར་འགྱུར་རོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ལས་རྒྱུ་འབྲས་ལ་གསུམ་སྟེ༔ ལས་ཀྱི་ངོ་བོ་ངོས་བཟུང་བ་དང་༔ ས་མཚམས་དབྱེ་བ་རྣམ་གྲངས་སོ༔ དང་པོ་ནི་གང་ཉེས་པ་དངོས་སམ་བརྒྱུད་ནས་སྡུག་བསྔལ་བསྐྱེད་པ་ནི༔ སྡིག་ཏོ་མི་དགེ་བའི་ལས་སོ༔ དེ་ལ་རང་བཞིན་གྱི་ཁ་ན་མ་ཐོ་བ་ཉིད་སྡིག་ཏུ་གྱུར་པ༔ མཚམས་མེད་པ་ལྔ་དེ་དང་ཉེ་བ་ལྔ་མི་དགེ་བ་བཅུའོ༔ བཅས་པའི་ཁ་ན་མ་ཐོ་བ་བཅས་པ་ཉིད་ལས་ལྟུང་བར་འགྱུར་
སྡོམ་པ་གསུམ་གྱི་ཉེས་པ༔ འཇིག་རྟེན་གྱི་ཁ་ན་མ་ཐོ་བ་གཞན་གྱི་སྡིག་ཆེན་བྱེད་པ༔ མི་ཤེས་པ་བག་མེད་པ་མ་གུས་པ་ཉོན་མོངས་པ་མང་བའོ། གང་ལེགས་པར་སྤྱོད་པ་དང་དངོས་སམ་བརྒྱུད་ནས་བདེ་བ་བསྐྱེད་པ་ནི་དགེ་བའོ༔ དེ་ལ་གསུམ་སྟེ་འཁོར་གསུམ་དམིགས་པ་དང་བཅས་ནས་གཏོང་བ་བསོད་ནམས་ཆ་མཐུན་གྱི་དགེ་བའོ༔ ངེས་འབྱུང་གིས་ཀུན་ནས་བསླངས་ཏེ་གཏོང་བ་ཐར་པ་ཆ་མཐུན་གྱི་དགེ་བ༔ འཁོར་གསུམ་ཡང་དག་མི་དམིགས་པར་ཤེས་པ་ཐར་པ་བླ་ན་མེད་པའི་དགེ་བའོ༔ དགེ་སྡིག་གཉིས་ཀ་མ་ཡིན་པས་གཉིས་ཀ་མི་བསྐྱེད་པ་ནི་ལུང་མ་བསྟན་གྱི་ལས་སོ༔ གཉིས་པ་ལས་ཀྱི་ས་མཚམས་དབྱེ་བ་ལ་བརྒྱད་ལས༔ དང་པོ་དོན་གྱི་གནས་ལུགས་དགེ་བ་འདུས་མ་བྱས༔ དོན་གྱི་དགེ་བ་འདུས་བྱས་འཁོར་བའི་ཆོས༔ རང་བཞིན་གྱི་དགེ་བ་ཡེ་ཤེས༔ རང་བཞིན་གྱི་མི་དགེ་བ་ཉོན་མོངས་པ་དུག་ལྔའོ༔ གཤིས་དགེ་བ་ཆོས་ཉིད་སྟོང་པ༔ གཤིས་མི་དགེ་བ་མ་རིག་པ༔ ཡང་དག་པའི་དགེ་བ་བློ་ལས་འདས་པ༔ ཡང་དག་པའི་མི་དགེ་བ་ཡིད་ཀྱིས་བསླད་པའོ༔ ཡིད་ལ་མི་བྱེད་ན་མྱང་འདས་ཏེ་དགེ་བ༔
ཡིད་ལ་བྱེད་པ་ནི་འཁོར་བ་སྟེ་མི་དགེ་བའོ༔ དུག་གསུམ་ཆ་ཕྲ་མོས་སྦགས་པའི་དགེ་བས་མཐོ་རིས་གསུམ༔ དུག་གསུམ་གྱིས་ཀུན་ནས་བསླངས་བའི་མི་དགེ་བས་ངན་སོང་གསུམ་དུ་སྐྱེའོ༔ ཐབས་ཤེས་གཉིས་མེད་ཀྱི་དགེ་བས་མི་གནས་པའི་མྱ་ངན་ལས་འདའ༔ ཐབས་ཅི་རིགས་པའི་དགེ་བས་ཕྱོགས་གཅིག་པའི་མྱ་ངན་ལས་འདས་སོ། གསུམ་པ་ལས་ཀྱི་རྣམ་གྲངས་ལ༔ གཅིག་ཏུ་དཀར་བའི་ལས༔ ནག་པའི་ལས༔ འདྲེས་མའི་ལས༔ བསམ་པ་དཀར་ལ་སྦྱོར་བ་ནག་པ༔ བསམ་པ་ནག་ལ་སྦྱོར་བ་དཀར་བ༔ བསམ་སྦྱོར་གཉིས་ཀ་དཀར་བ༔ བསམ་སྦྱོར་གཉིས་ཀ་ནག་པ༔ མཐོང་ཆོས་འབྲས་བུ་ཅན༔ སྐྱེས་ནས་མྱོང་འགྱུར༔ ལན་གྲངས་གཞན་ལ་མྱོང་བ༔ ལས་དཀར་རྣམ་སྨིན་དཀར་བ༔ ལས་ནག་རྣམ་སྨིན་ནག་པ༔ འཕེན་བྱེད་དགེ་བ་རྫོགས་བྱེད་དགེ་བ༔ འཕེན་བྱེད་མི་དགེ་བ་རྫོགས་བྱེད་མི་དགེ་བ༔ འཕེན་བྱེད་དགེ་བ་རྫོགས་བྱེད་མི་དགེ་བ་སོགས༔ རྒྱས་པར་གཞན་དུ་བལྟའོ༔ བདག་གིས་བྱས་པའི་ལས་གཞན་ལ་མི་སྨིན༔ གཞན་གྱིས་བྱས་པ་བདག་ལ་མི་སྨིན༔ ལས་མ་བྱས་པ་དང་མི་འཕྲད༔ བྱས་པ་ཆུད་
མི་ཟ༔ དཀར་ནག་མི་འཆོལ་བས༔ ཤིན་ཏུ་ཆ་ཕྲ་མོ་ནས་འདོར་ལེན་བྱའོ༔ ཞེས་གསུངས་སོ༔ དེས་ན་མི་དགེ་བའི་ལས་ཀྱིས་ངན་སོང་དུ་སྐྱེས་ན་སྡུག་བསྔལ་དཔག་ཏུ་མེད༔ དེར་མི་སྐྱེ་བའི་ལས་དགེ་བ་ཁོ་ན་བྱས་པ་ཡང་དཀོན་པས་ཡ་ང་སྟེ༔ མངོན་པ་མཛོད་ལས༔ འདི་འོག་སྟོང་ཕྲག་ཉི་ཤུ་ན༔ མནར་མེད་པའོ་དེ་ཙམ་མོ༔ དེ་ཡི་སྟེང་ན་དམྱལ་བ་བདུན༔ ཞེས་གསུངས་ཏེ༔ ཚ་བའི་དམྱལ་བ་བརྒྱད་དེ༔ ཡང་སོས་དང་༔ ཐིག་ནག་དང་༔ བསྡུས་འཇོམས་དང་༔ ངུ་འབོད་དང་༔ དུ་འབོད་ཆེན་པོ་དང་༔ ཚ་བ་དང་༔ རབ་ཏུ་ཚ་བ་དང་༔ མནར་མེད་པ་སྟེ༔ རིག་འཛིན་ནཱ་གརྫུ་ནས༔ སེམས་ཅན་ཉེས་པའི་ལས་ལ་སྤྱོད་རྣམས་ནི༔ ཡང་སོས་ཐིག་ནག་ཚ་དང་རབ་ཏུ་ཚ༔ ངུ་འབོད་བསྡུས་འཇོམས་མནར་མེད་ལ་སོགས་པའི༔ དམྱལ་བ་རྣམས་སུ་རྟག་ཏུ་འཁོར་བར་འགྱུར༔ ཞེས་དང་༔ འཇིག་རྟེན་བཞག་པ་ལས༔ གང་ཕྱིར་ལོ་ནི་སྟོང་ཕྲག་དག༔ མང་པོར་ཡང་ནི་དེ་དག་ཏུ༔ བྲེག་ཅིང་གཤགས་ནས་ཡང་འཚོ་བས༔ དེ་ཕྱིར་ཡང་སོས་ཡིན་པར་བཤད༔ གང་ཕྱིར་དེ་ནི་ཤིང་བཞིན་དུ༔ ཐིག་
ནག་བཏབ་ནས་སོག་ལེ་དག༔ འབར་བ་ཡིས་ནི་གཤག་པར་བྱེད༔ དེ་ཕྱིར་ཐིག་ནག་ཡིན་པར་བཤད༔ གང་ཕྱིར་བསྡུས་ནས་དེར་འདོར་དང་༔ བརྡུངས་དང་སྲེག་པར་བྱེད་པ་ནི༔ དེ་ཡི་ཕྱིར་ན་བསྡུས་འཇོམས་ཏེ༔ དེ་ལྟར་མིང་ནི་དོན་མཐུན་གྲགས༔ གང་དག་གཞན་གྱི་ནོར་ཕྲོགས་པས༔ དེ་དག་ལྕགས་ཀྱི་ཐོ་ལུམ་ནི༔ ཚ་བ་དག་ཀྱང་ཟ་བ་དང་༔ ཡང་དང་ཡང་དུ་ཟས་སྐོམ་འབྱུང་༔ དེར་ནི་དྲེགས་པའི་མི་དག་གིས༔ རྒྱུན་མི་ཆད་པར་བསྲེག་པ་ནི༔ གང་ཕྱིར་སྐད་ནི་རབ་ཏུ་འབྱིན༔ དེ་ཕྱིར་དེ་ནི་ངུ་འབོད་ཡིན༔ མེས་བསྲེགས་པས་ནི་དྲག་ཕྱིར་དང་༔ ངུ་འབོད་པ་ཡང་ཆེ་ཕྱིར་དང་༔ ལྗི་ཞིང་ཆེ་བ་ཉིད་ཀྱི་ཕྱིར༔ དེ་ནི་ངུ་འབོད་ཆེན་པོ་ཡིན༔ གང་ཕྱིར་རྟག་ཏུ་ཚ་བའི་མེ༔ གདུང་བ་དྲག་པོ་སྐྱེས་པའི་ཕྱིར༔ འཇིག་རྟེན་དུ་ནི་ཚ་བའི་མིང་༔ དོན་དང་མཐུན་པར་གྲགས་པ་ཡིན༔ མེ་ནི་རབ་ཏུ་དྲག་པ་ཡིས༔ དེར་འཁོར་སེམས་ཅན་སྲེག་པར་བྱེད༔ ཚ་བ་ཕུལ་དུ་བྱུང་བ་སྟེ༔ དེ་ཕྱིར་རབ་ཏུ་ཚ་བར་གསུངས༔ གསལ་ཞིང་རྣོ་དང་སླ་ང་དང་༔ རྫ་བུམ་འབར་བར་སྲེག་བྱེད་པས༔ ཚ་བ་ཕུལ་དུ་བྱུང་བ་སྟེ༔ དེ་ཕྱིར་རབ་ཏུ་ཚ་
བར་བཤད༔ མེ་དྲག་དེ་ཡིས་ལུས་ཅན་གྱི༔ རུས་པ་རྣམས་ཀྱང་བརླག་པར་འགྱུར༔ གང་ཕྱིར་བདེ་བའི་སྐབས་མེད་པའི༔ དེ་ཕྱིར་མནར་མེད་ཡིན་པར་བཤད་ཅེས་ཚ་དམྱལ་བརྒྱད་དང་༔ ཉེ་འཁོར་བའི་དམྱལ་བ་ནི་མདོ་དེ་ཉིད་ལས༔ གང་ཞིག་བརྟུལ་ཞུགས་བཟང་མནོས་ནས༔ ལེགས་པར་བསྲུང་བར་མི་བྱེད་པ༔ དེ་ནི་ངེས་པར་ཤ་དང་རུས༔ འཇིགས་པའི་མེ་མ་མུར་དུ་བསྲེགས༔ གང་དུ་འཚོ་བ་ལ་སོགས་པའི༔ ཅུང་ཟད་ཙམ་གྱིས་འཚོ་བྱེད་པ༔ དེ་ནི་རོ་མྱག་འདམ་རྫབས་སུ༔ ནུབ་ཡི་འགྱུར་སྲིན་བུ་རྣམས་ཀྱིས་ཟ༔ གང་ཞིག་ཆོས་ཀྱི་སྡིག་འཛིན་ཅིང་༔ ཡང་དག་མ་ཡིན་ལམ་སྨྲ་བའི༔ མི་དེ་དག་ནི་སྤུ་གྲིའི་སོས༔ གཏུམ་པའི་ལམ་དུ་འགྲོ་བར་འགྱུར༔ བག་ཕབ་པ་ལ་གནོད་བྱེད་པ༔ ནགས་ཚལ་རལ་གྲིའི་འདབ་ཅན་དུ༔ གཏུབ་ཅིང་བྱ་རྒོད་འུག་པ་དང་༔ བྱ་རོག་དག་གིས་ཟ་བར་འགྱུར༔ འདོད་ལོག་སྤྱོད་པ་ཤལ་མ་རི༔ ལྕགས་ཀྱི་ཚེར་མ་རྩེ་མོ་འབར༔ སོར་ནི་བཅུ་དྲུག་ཡོད་པ་ལ༔ ཡར་ལ་འཛེག་ཅིང་མར་ལ་དྲུད༔ ཆུ་སྐྱེས་ཉ་སོགས་བསད་པ་ནི༔ ཆུ་བོ་རབ་མེད་འབར་བ་ཡི༔ འཇིགས་སུ་
རུང་བའི་གནས་སུ་འགྲོ༔ མི་དེ་དེར་ནི་མནར་བར་འགྱུར༔ ཞེས་གསུངས་ཤིང་༔ ལས་ངན་མ་ཟད་ཀྱི་བར་དུ་ཚེ་ཚད་རྫོགས་ཀྱང་དེར་སྐྱེས་ཏེ༔ གསུང་གི་རིག་འཛིན་ནཱ་གརྫུ་ནའི་གསུངས་ལས༔ དེ་ལྟར་སྡུག་བསྔལ་ཤིན་ཏུ་མི་བཟད་པས༔ བྱེ་བ་ཕྲག་བརྒྱར་ཉམས་སུ་མྱོང་ཡང་ནི༔ ཇི་སྲིད་ལས་དེ་ཟད་པར་མ་གྱུར་བར༔ དེ་སྲིད་སྲོག་དང་བྲལ་བར་མི་འགྱུར་རོ༔ ཞེས་གསུངས་སོ༔ གྲང་དམྱལ་བརྒྱད་དང་གཞན་ཁ་འཐོར་བའི་ཉེ་ཚེའི་དམྱལ་བ་སོགས་དཔག་ཏུ་མེད་དོ༔ དྲན་པ་ཉེར་བཞག་ལས༔ བླ་མ་དགེ་འདུན་སྐུ་གསུང་ཐུགས་རྟེན་གྱི་ན་བཟའ་བཤུས་དང་ཤིག་ནི་ལྷག་པོར་སོགས༔ སེམས་ཅན་གྲང་བས་ཉན་ནས་གང་བསད་པའི་མི་དེ་ངེས་པར་གྲང་དམྱལ་བརྒྱད་དུ་སྐྱེ༔ ཞེས་གསུངས་པས་ཆུ་བུར་ཅན་དང་༔ ཆུ་བུར་རྡོལ་བ་དང་༔ ཨ་ཆུ་ཟེར་བ་དང་༔ ཀྱི་ཧུད་ཟེར་བ་དང་༔ སོ་འཐམ་པ་དང་༔ པདྨ་ལྟར་གས་པ་དང་༔ ཨུཏྤལ་ལྟར་གས་པ་དང་༔ པདྨ་ལྟར་ཆེར་གས་པ་སྟེ༔ མངོན་པ་མཛོད་ལས༔ ཏིལ་སྦྱང་ནང་ནས་ལོ་བརྒྱར་ནི༔ ཏིལ་གཅིག་ཕྱུང་བས་ཟད་གྱུར་པ༔ ཆུ་བུར་ཅན་གྱི་ཚེ་ཡིན་ཏེ༔ གཞན་གྱི་
ཚེ་ནི་ཉི་ཤུས་འགྱུར༔ ཞེས་གསུངས་པས༔ ཚེ་ཚད་ཀྱང་ཤིན་ཏུ་རིང་ངོ་༔ ཁྱད་པར་སྐུར་པ་འདེབས་པ་ནི་སྡིག་ཆེ་སྟེ༔ རྣམ་པར་ངེས་པ་ཆོ་འཕྲུལ་གྱི་མདོ་བསྐལ་པ་དག་ནི་དུ་མར་ཡང་༔ ལུས་ནི་དཔག་ཚད་ལྔ་བརྒྱར་འགྱུར༔ དེ་ལ་མགོ་ཡང་ལྔ་བརྒྱ་སྟེ༔ མགོ་རྣམས་རེ་རེ་དག་ལ་ཡང་༔ ལྔ་བརྒྱའི་ལྕེ་ལས་མི་ཉུང་འགྱུར༔ ལྕེ་གཅིག་ཉིད་ལ་ཐོང་གཤོལ་ནི༔ ལྔ་བརྒྱ་ཚང་སྟེ་མི་ཉུང་བ༔ རབ་ཏུ་འབར་བས་རྨོ་བར་བྱེད༔ སྐུར་འདེབས་སྡིག་པའི་ལས་ཀྱིས་སོ༔ ཞེས་གསུངས་པ་དང་༔ ཁྱད་པར་གསང་སྔགས་ཀྱི་དམ་ཚིག་ཉམས་པ་ནི༔ དམྱལ་བ་དེ་ཐམས་ཅད་ལས་བདུན་འགྱུར་གྱི་སྡུག་བསྔལ་ཆེ་བ་རྡོ་རྗེ་དམྱལ་བ་ཞེས་བྱ་བར་སྐྱེ་སྟེ༔ འཇམ་དཔལ་སྒྱུ་འཕྲུལ་དྲྭ་བའི་རྒྱུད་ལས༔ ཕྱི་ཡི་རྒྱ་མཚོ་ཆེན་པོ་ཡི༔ ཆུ་དེ་ས་ཡིས་གཏོར་ནུས་པ༔ དེ་ཡི་ཚད་དུ་སྡུག་བསྔལ་མྱོང་༔ རྡོ་རྗེ་དམྱལ་བར་གྲགས་པ་ཡིན༔ ཞེས་གསུངས་ཤིང་༔ དམྱལ་བའི་སྡུག་བསྔལ་ཆུང་ངུ་ཡང་མིའི་སྡུག་བསྔལ་གང་ལས་ཀྱང་ཆེ་སྟེ༔ འཕགས་པ་ཀླུ་སྒྲུབ་ཀྱིས༔ འདི་ན་མི་གཅིག་མདུང་ཐུང་སུམ་བརྒྱ་ཡིས༔ རབ་ཏུ་དྲག་བཏབ་སྡུག་བསྔལ་མི་
བཟད་པ༔ དེ་ནི་དམྱལ་བའི་སྡུག་བསྔལ་ཆུང་ངུ་ཡང་༔ འོལ་ཀྱང་མི་འགྲོ་ཆར་ཡང་མི་ཕོད་དོ༔ ཞེས་གསུངས་སོ༔ ཡི་དྭགས་ཀྱི་སྡུག་བསྔལ་ཡང་༔ འཕགས་པ་ཀླུ་སྒྲུབ་ཀྱི་གསུངས་ལས༔ ཡི་དྭགས་རྣམས་ནི་འདོད་པས་ཕོངས་པ་སྟེ༔ བསྐྱེད་པའི་སྡུག་བསྔལ་རྒྱུན་ཆད་མི་བཟོད་པ༔ བཀྲེས་སྐོམ་གྲང་ལ་ངལ་དང་འཇིགས་པ་ཡིས༔ བསྐྱེད་པ་ཤིན་ཏུ་མི་བཟད་བསྟེན་འཚལ་ལོ༔ ཞེས་དང་༔ ཡི་དྭགས་རྣམས་ནི་སོས་ཀའི་དུས་སུ་ནི༔ ཟླ་བའང་ཚ་ལ་དགུན་ནི་ཉི་མའང་གྲང་༔ ལྗོན་ཤིང་ལོ་འབྲས་མེད་གྱུར་དེ་དག་གིས༔ བལྟས་པ་ཙམ་གྱིས་ཆུ་ཀླུང་འང་སྐམ་པར་འགྱུར༔ ཁ་ཅིག་ཁ་ནི་ཁབ་ཀྱི་མིག་ཙམ་ལ༔ ལྟོ་བ་རི་ཡི་ལྗོང་ཙམ་བཀྲེས་པས་ཉེན༔ མི་གཙང་གྱི་ནར་བོར་བ་ཆུང་ངུ་ཡང་༔ འཚལ་བའི་མཐུ་དང་ལྡན་པ་མ་མཆིས་སོ༔ ཞེས་ཕྱི་དང་ནང་གི་སྒྲིབ་པ་ཅན་དང་༔ ཁ་ཅིག་མཚོན་བཞིན་ཁ་ནས་མེ་འབར་ཏེ༔ ཟས་སུ་འབར་བའི་ཁར་བཅས་བྱེ་མ་འཚལ༔ རྨེན་རིགས་འགས་ནི་རྣག་དང་ཕྱི་ས་དང་༔ ཁྲག་སོགས་མི་གཙང་བ་ཡང་མི་རྙེད་པ༔ ཕན་ཚུན་སྡོང་དུམ་ཚིག་འདྲ་མགྲིན་པ་ནས༔ ཝ་བ་འབྱུང་བ་སྨིན་པའི་རྣག་འཚལ་ལོ༔ ཞེས་
གསུངས་པ་ལྟར་ཡིན་ལ༔ ཚེ་ཚད་ཀྱང་མི་ཡི་ཟླ་བ་རེ་ཞག་རེར་བརྩི་བའི་རང་ལོ་ལྔ་བརྒྱ་ཐུབ་པར་གསུངས་སོ༔ དུད་འགྲོ་ལ་རིགས་མི་འདྲ་བ་བྱེ་བ་སུམ་ཅུ་རྩ་བཞིར་གསུངས་ཏེ༔ དབང་མེད་གཞན་དག་རྡོག་པས་བརྡེག་པ་དང༔ ལྕགས་དང་ལྕགས་ཀྱུས་གདག་པས་བཏབ་སྟེ་བསྐོལ༔ ཁ་ཅིག་མུ་ཏིག་བལ་དང་རུས་པ་ཁྲག༔ ཤ་དང་པགས་པའི་ཕྱིར་དུ་འཆི་བར་འགྱུར༔ ཞེས་ཁ་འཐོར་བའི་སྡུག་བསྔལ་དང་༔ ཁ་ཅིག་ཟས་སུ་གདོང་དུ་གང་བབ་བྲ༔ ཞེས་གནས་ཀྱི་སྡུག་བསྔལ་དང་༔ ཚེ་ནི་མ་ངེས་ཏེ་རིང་བས་བསྐལ་པར་ཡང་ཐུབ་བོ༔ དེ་ལྟར་ངན་སོང་གསུམ་ལ་སྡུག་བསྔལ་མངོན་དུ་གྱུར་པ་དང་༔ ལྷ་དང་མི་དང་ལྷ་མ་ཡིན་གསུམ་ལ་ཡང་གནས་སྐབས་བདེ་བ་བག་ཙམ་ཡོད་དེ༔ མི་རྟག་འགྱུར་བའི་སྡུག་བསྔལ་དཔག་ཏུ་མེད་དོ༔ མདོར་ན་རིགས་དྲུག་གར་སྐྱེས་ཀྱང་སྡུག་བསྔལ་ཁོ་ན་ཏེ༔ རིག་འཛིན་ནཱ་གརྫུ་ནས༔ འཁོར་བ་ཁབ་ཀྱི་རྩེ་ཙམ་ནའང་༔ བདེ་བ་ནམ་ཡང་ཡོད་མ་ཡིན༔ མི་གཙང་བ་ལ་དྲི་ཞིམ་མེད༔ འཁོར་བའི་གནས་ན་བདེ་བ་མེད༔ མེ་ཡི་རང་བཞིན་ཚ་བ་ཡིན་པ་ལྟར༔ འཁོར་བའི་རང་བཞིན་སྡུག་བསྔལ་ཡིན་
པར་མཚོན༔ ཞེས་གསུངས་སོ༔ དེ་ལྟར་སྡུག་བསྔལ་དེ་ལས་སྐྱོབ་པའི་སྐྱབས་གནས་ཞིག་ཚོལ་དགོས་པ་ལས༔ ལྷ་གཞན་གྱིས་འཁོར་བའི་སྡུག་བསྔལ་ལས་སྐྱོབ་མི་ནུས་ཏེ། རྒྱལ་མཚན་དམ་པའི་མདོ་ལས༔ འཇིགས་པས་སྐག་པའི་མི་རྣམས་ནི༔ ཕལ་ཆེར་རི་དང་ནགས་ཚལ་དང་༔ ཀུན་དགའ་དང་ནི་མཆོད་གནས་ཀྱིས༔ ལྗོན་ཤིང་དག་ལ་སྐྱབས་འགྲོ་བ༔ སྐྱབས་དེ་གཙོ་བོ་མ་ཡིན་ཞིང་༔ སྐྱབས་དེ་མཆོག་གྱུར་མ་ཡིན་པས༔ སྐྱབས་དེ་ལ་ནི་བསྟེན་ནས་ནི༔ འཇིགས་པ་ཀུན་ལས་མི་གྲོལ་ལོ༔ ཞེས་གསུངས༔ འོ་ན་སུས་སྐྱོབས་ན༔ འཇམ་དཔལ་རྣམ་པར་རོལ་པའི་མདོ་ལས༔ འཇིགས་གྱུར་འཇིགས་པ་སེལ་མཛད་ཕྱིར༔ སྐྱབས་མེད་སྐྱོབ་པའི་སངས་རྒྱས་དང་༔ ཆོས་དང་ཚོགས་མཆོག་དགེ་འདུན་ལ༔ རྟག་པར་སྐྱབས་སུ་འགྲོ་བར་གྱིས༔ གང་དག་དེ་ལ་སྐྱབས་སོང་བ༔ འཇིགས་པ་ཀུན་ལས་ཐར་བར་འགྱུར༔ ཞེས་དང་༔ ཡོན་ཏན་བཀོད་པའི་མདོ་ལས༔ གང་ཞིག་སངས་རྒྱས་དག་ལ་སྐྱབས་སོང་ན༔ ལྷ་དང་དྲི་ཟ་ལྷ་མ་ཡིན༔ ཀླུ་དང་གནོད་སྦྱིན་ལ་སོགས་པ༔ འཇིགས་པ་ཀུན་ལས་ཐར་བར་འགྱུར༔ ཞེས་
ལྕགསུངས་པའི་དོན༔ ཕྱིའི་དཀོན་མཆོག་གསུམ་ནི་སངས་རྒྱས་ཆོས་དང་དགེ་འདུན་གསུམ༔ ནང་གི་དཀོན་མཆོག་གསུམ་ནི་བླ་མ་ཡི་དམ་མཁའ་འགྲོ་གསུམ༔ གསང་བ་རྩ་རླུང་ཐིག་ལེ་གསུམ༔ དེ་ཁོ་ན་ཉིད་ཀྱི་ངོ་བོ་རང་བཞིན་ཐུགས་རྗེ་གསུམ་ཡིན་ཏེ༔ དེ་ཐམས་ཅད་ངོ་བོ་ནི་བླ་མ་ཨོ་རྒྱན་རིན་པོ་ཆེ་ལ་འདུས་པ་ཡིན་ཏེ༔ ཐུགས་སངས་རྒྱས་གསུང་དམ་ཆོས་སྐུ་དགེ་འདུན་ནོ༔ ཡོན་ཏན་ཡི་དམ་ཕྲིན་ལས་མཁའ་འགྲོ་ཆོས་སྐྱོང་སྟེ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་རྒྱན་གྱི་འཁོར་ལོའི་རང་བཞིན་ཡིན་ནོ༔ དེས་ན་མདུན་གྱི་ནམ་མཁར་པདྨའི་སྡོང་པོ་འདབ་མ་ལྔར་གྱེས་པ་རྒྱ་ཁྱོན་བསམ་ལས་འདས་པའི་ལྟེ་བའི་ཟེའུ་འབྲུར༔ རྩ་བའི་བླ་མ་དང་དབྱེར་མེད་པའི་ཨོ་རྒྱན་ཆེན་པོ་པདྨ་འབྱུང་གནས་སྐུ་མདོག་དཀར་ལ་དམར་བའི་མདངས་ཆགས་པ༔ ཞལ་གཅིག་ཁྲོ་འཛུམ་གྱི་སྤྱན་རང་ལ་གཟིགས་པ༔ དབུ་ལ་པད་ཞུ་པདྨ་མཐོང་གྲོལ་གསོལ་བ༔ ཕྱག་གཡས་པས་གསེར་གྱི་རྡོ་རྗེ་ཐུགས་ཀར་འཛིན་ཅིང་གཡོན་བྷན་དང་ཚེ་བུམ་ལྟེ་བར་འཛིན་པ༔ སྐུ་ལ་ཟ་འོག་གི་བེར་དང་ཆོས་གོས་གསེར་གྱི་ཧ་རིས་ཅན་གསོལ་བ༔ གྲུ་མོ་ན་ཁ་ཊཾ་རྩེ་གསུམ་པ་བརྟེན་
ཞིང་རྡོ་རྗེའི་སྐྱིལ་ཀྲུང་གིས་བཞུགས་པ༔ སྐུ་གཟི་བརྗིད་འོད་དུ་འབར་བའི་སྤྱི་གཙུག་ནས་ཡར་ལ༔ གྲུབ་ཆེན་སྐྱེའུ་པ༔ རྫ་དྲ་པ༔ སངས་རྒྱས་པ༔ རྡོ་རྗེ་འཆང་ཆེན་པོ་ཀུན་ཏུ་བཟང་པོ་རྣམས་ཐོ་བརྩེགས་ལ༔ རྒྱ་གར་གྱི་རིག་འཛིན་བརྒྱད་དང་༔ དགའ་རབ་ཤྲཱི་སེང་རྗེ་འབངས་ཉི་ཤུ་རྩ་ལ༔ གཏེར་སྟོན་བརྒྱ་རྩ་བརྒྱད་ལ་སོགས་པ་སྤྲིན་ལྟར་གཏིབས་པར་བསྒོམ༔ གཡས་ཀྱི་འདབ་མ་ལ་ཨོ་རྒྱན་རིན་པོ་ཆེ་བླ་མ་དམ་པ་དེའི་ཐུགས་མི་ཟད་རྒྱན་གྱི་འཁོར་ལོའི་ངོ་བོ་བཅོམ་ལྡན་འདས་ཤཱཀྱ་ཐུབ་པ་རྒྱལ་བ་རིགས་ལྔ་སངས་རྒྱས་སྟོང་ལ་སོགས་པས་བསྐོར་བ་ཐམས་ཅད་སྤྲུལ་སྐུའི་ཆ་ལུགས་མཚན་དང་དཔེ་བྱད་ཀྱིས་སྤྲས་པ༔ རྒྱབ་ཏུ་བླ་མའི་གསུང་མི་ཟད་རྒྱན་གྱི་འཁོར་ལོའི་ངོ་བོ་ཐེག་པ་ཆེན་པོའི་མདོ་རྒྱུད་ཐམས་ཅད་གླེགས་བམ་གསེར་གདོང་ཁྲ་ཆེམ་མེར་བཞུགས་པ༔ གཡོན་དུ་བླ་མའི་སྐུ་མི་ཟད་རྒྱན་གྱི་འཁོར་ལོའི་ངོ་བོ་འཕགས་པ་བྱམས་པ་ལ་དགེ་སློང་གི་དགེ་འདུན་དང་ས་ལ་གནས་པའི་བྱང་ཆུབ་སེམས་དཔའ་ཐམས་ཅད་ཆ་ལུགས་དབུ་རེག་ཞབས་རྗེན་ཆོས་གོས་གསུམ་དང་ལྡན་པ༔ མདུན་གྱི་འདབ་མ་ལ་བླ་མའི་ཡོན་ཏན་གྱི་ངོ་བོ་ཡི་དམ་ཐུགས་རྗེ་ཆེན་
པོ་ལ་རྒྱུད་སྡེ་དྲུག་གི་ལྷ་ཚོགས་ཐམས་ཅད་ལོངས་སྤྱོད་རྫོགས་སྐུའི་རྣམ་པར་བཞུགས་པ༔ མེ་ཏོག་པདྨའི་འོག་པད་སྡོང་གི་ཕྱོགས་མཚམས་ཐམས་ཅད་དུ་དཔལ་མགོན་མ་ནིང་ནག་པོ་དང་༔ ལྷ་མོ་རེ་མ་ཏི་ལ་ཡེ་ཤེས་ཀྱི་ཆོས་སྐྱོང་༔ གནས་དང་ཡུལ་གྱི་དཔའ་བོ་ཌཱཀི་ཐམས་ཅད་ན་བུན་འཐིབས་པ་ལྟར་བཞུགས་པར་སྒོམས༔ གང་ཞིག་སངས་རྒྱས་ཡིད་བྱེད་པ༔ དེ་ཡི་མདུན་ན་ཐུབ་པ་བཞུགས༔ ཞེས་གསུངས་པས༔ སྤྱན་འདྲེན་མི་དགོས་དམ་ཡེ་དབྱེར་མེད་དུ་སྒོམས༔ དེ་ཡི་མདུན་དུ་རང་གི་གཙོས་བྱས་སེམས་ཅན་ཐམས་ཅད་སྐྱབས་ཞུ་བའི་མོས་པས༔ རང་གི་རམ་བུ་སེམས་ཅན་ཐམས་ཅད་ཀྱིས་དི་རི་རི་བཀྱག་པར་བསྒོམས་ནས༔ བཀའ་གཏེར་སྤྱིའི་སྐྱབས་འགྲོ༔ མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ཀུན་ཁྱབ་ཆོས་ཀྱི་སྐུ་ལ་སྐྱབས་སུ་མཆིའོ༔ མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་བདེ་ཆེན་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ༔ མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ༔ མ་ནམ་མཁའ་དང་མཉམ་པའི་
སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ༔ ཞེས་དད་གུས་ཚད་མེད་ཅིང་ཅི་མཛད་ཁྱེད་ཤེས་ཀྱི་བློས་སྐྱབས་འགྲོ་ཅི་མང་བྱའོ༔ འདི་སྐབས་དམིགས་པ་དང་བཅས་ཚར་གསུམ་མམ་རྗེས་ཟློས་བཅོལ་ལ༔ དེ་ནས་སྐྱབས་ཡུལ་གཞན་ཐམས་ཅད་འོད་དུ་ཞུ་ནས་བླ་མ་ཨོ་རྒྱན་རིན་པོ་ཆེ་ལ་ཐིམ༔ དེ་འོད་དུ་ཞུ་ནས་རང་ལ་ཐིམ་པས༔ སྐྱབས་གནས་བླ་མ་དཀོན་མཆོག་དང་རང་གི་ལུས་ངག་ཡིད་གསུམ་དབྱེར་མེད་ཁྲུག་གིས་འདྲེས་པར་བསྒོམས་ལ༔ སེམས་རང་ལུགས་སུ་ཡིད་ལ་ཅི་ཡང་མི་བསམ་པར་ཀློད་དེ་ལྷོད་ལ་ཞོག་ཅིག༔ དེའི་དོན་མ་དྲོས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་བདག་མེད་པ༔ སེམས་ཅན་མེད་པ་སྲོག་མེད་པ་གང་ཟག་མེད་པར་ཤེས༔ གཟུགས་སུ་མ་ཡིན་པ༔ མཚན་མ་ཡང་མ་ཡིན༔ ཆོས་སུ་མ་ཡིན་པར་དེ་བཞིན་དུ་ཡང་དག་པར་རྗེས་སུ་མཐོང་བ་དེ་ལྟ་བུ་ནི༔ ཟང་ཟིང་མེད་པའི་སེམས་ཀྱིས་སངས་རྒྱས་ལ་སྐྱབས་སུ་སོང་བ་ཡིན་ནོ༔ དེ་བཞིན་གཤེགས་པའི་ཆོས་ཉིད་གང་ཡིན་པ་དེ་ནི༔ ཆོས་ཀྱི་དབྱིངས་སོ༔ ཆོས་ཀྱི་དབྱིངས་གང་ཡིན་པ་དེ་ནི་ཆོས་ཐམས་ཅད་ཀྱི་རྗེས་སུ་སོང་བ་ཞེས་བྱ་སྟེ༔ དེ་ལྟར་ཆོས་ཐམས་
ཅད་ཀྱི་དབྱིངས་སུ་སོང་བ་མཐོང་སྟེ༔ དེ་ལྟར་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱིས་ཆོས་ལ་སྐྱབས་སུ་སོང་བ་ཡིན༔ གང་ཆོས་ཀྱི་དབྱིངས་འདུས་མ་བྱས་པར་སྒོམ་པ་དང་༔ ཉན་ཐོས་ཀྱི་ཐེག་པ་ལྟར་འདུས་མ་བྱས་པར་བསྟན་པ་དང་༔ ་འདུས་བྱས་དང་འདུས་མ་བྱས་པ་གཉིས་སུ་མེད་པ་འདི་ལྟ་བུ་ནི༔ ཟང་ཟིང་མེད་པའི་སེམས་ཀྱིས་དགེ་འདུན་ལ་སྐྱབས་སུ་སོང་བ་ཡིན་ནོ༔ ཞེས་གསུངས་པ་དང་༔ ཨོ་རྒྱན་རིན་པོ་ཆེའི་ཞལ་ནས༔ དཀོན་མཆོག་གསུམ་རང་གི་སེམས་སུ་གྲུབ་པར་ཤེས་པ་ནི་དོན་དུ་གཉེར་བའི་སྐྱབས་འགྲོའོ༔ ཞེས་དང་༔ སེམས་དེ་དཀོན་མཆོག་གསུམ་གྱི་རང་བཞིན་དེ་དང་༔ གཅིག་དང་དུ་མ་དང་བྲལ་ཞིང་མཐའ་གང་ལ་ཡང་མི་གནས་པས༔ གཉིས་མེད་རང་གྲོལ་དུ་རྟོགས་པ་ནི་ཡང་དག་བླ་ན་མེད་པའི་སྐྱབས་འགྲོའོ༔ ཞེས་གསུངས་པས་སོ༔ དེ་ལྟར་ངེད་རང་རྣམས་ནམ་འཆི་ཆ་མེད༔ ཤི་ནས་གར་འགྲོ་ལས་དབང་ཆེ་བས༔ བར་དོ་དང་ངན་སོང་གི་འཇིགས་སྐྲག་དེས་ན་སྡིག་པ་ལ་དུག་ལྟར་འཛེམ་དགོས༔ རིགས་དྲུག་གར་སྐྱེས་ཀྱང་སྡུག་བསྔལ་གྱི་རང་བཞིན་ཡིན༔ དེ་ལས་སྐྱོབ་པ་ནི་
བླ་མ་དཀོན་མཆོག་གསུམ་ཡིན་པས་དེ་ལ་སྐྱབས་ཞུ་བའི་དམིགས་ཐུན་དང་བཅས་པ་དེས་ཆོས་འབྲུ་དང་པོ་སོང་བ་ཡིན་པས༔ དམིགས་ཐུན་དེ་རྩེ་གཅིག་ཏུ་སྒོམས་ཤིག༔ ཅེས་མ་གསལ་ན་ཝིག་ནས་ཉི་མ་གསུམ་ཙམ་ལ་དལ་ཁོམ་དང་བསྟུན་ནོ༔ ཆོས་ཐུན་དང་པོའོ༔ རྡ་ཡིག་ཡོད། དེ་ནས་ཆོས་ཐུན་གཉིས་པ་ནི༔ གཞུང་ལས༔ མི་ལུས་རིན་ཆེན་གཙང་མ་འདི་ད་རེས་མིན་པ་ཐོབ་དུས་མེད༔ ཅེས་གསུངས་པའི་དོན་བཤད་ན༔ སྙིང་རྗེ་པདྨ་དཀར་པོའི་མདོ་ལས༔ མིར་སྐྱེས་པའང་རྙེད་པར་དཀའ༔ དལ་བ་ཕུན་སུམ་ཚོགས་པའང་རྙེད་པར་དཀའ༔ སངས་རྒྱས་འཇིག་རྟེན་དུ་འབྱོན་པའང་རྙེད་པར་དཀའ༔ དགེ་བའི་ཆོས་ལ་འདུན་པའང་རྙེད་པར་དཀའ༔ ཡང་དག་པའི་སྨོན་ལམ་ཡང་རྙེད་པར་དཀའ༔ ཞེས་དང་༔ འཕགས་པ་སྡོང་པོ་བཀོད་པའི་མདོ་ལས༔ མི་ཁོམ་བརྒྱད་ལས་ལྡོག་པའང་རྙེད་པར་དཀའ༔ མིར་གྱུར་པ་ཡང་རྙེད་པར་དཀའ༔ དལ་བ་ཕུན་སུམ་ཚོགས་པའང་རྙེད་པར་དཀའ༔ སངས་རྒྱས་འབྱུང་བའང་རྙེད་པར་དཀའ༔ དབང་པོ་མ་ཚང་བ་མེད་པའང་རྙེད་པར་དཀའ༔ སངས་རྒྱས་
ཀྱི་ཆོས་ཉན་པའང་རྙེད་པར་དཀའ༔ སྐྱེས་བུ་དམ་པ་དང་འགྲོགས་པའང་རྙེད་པར་དཀའ༔ ཡང་དག་པའི་དགེ་བའི་བཤེས་གཉེན་རྣམས་ཀྱང་རྙེད་པར་དཀའ༔ ཡང་དག་པའི་རྗེས་སུ་བསྟན་པ་ཉེ་བར་བསྒྲུབ་པའང་རྙེད་པར་དཀའ༔ ཡང་དག་པར་འཚོ་བའང་རྙེད་པར་དཀའ༔ མིའི་འཇིག་རྟེན་ན་ཆོས་དང་མཐུན་པའི་ས་ལ་ནན་ཏན་བྱེད་པའང་རྙེད་པར་དཀའ༔ ཞེས་དང་༔ ཉི་མའི་སྙིང་པོའི་མདོ་ལས༔ སྟོན་པའི་བསྟན་པའང་རྙེད་པར་དཀའ༔ དལ་བ་འདི་འདྲ་རྙེད་པར་དཀའ༔ དགེ་བྱེད་རབ་ཏུ་རྙེད་པར་དཀའ༔ དེ་ལྟར་ཁྱོད་ཀྱིས་གུས་བྱས་ཏེ༔ བྱང་ཆུབ་ཏུ་ནི་འདུན་པ་བསྐྱེད༔ ཅེས་དང་༔ གསང་བ་བསམ་གྱིས་མི་ཁྱབ་པའི་མདོ་ལས༔ སངས་རྒྱས་འབྱུང་བ་བརྒྱ་ལམ་རྙེད་པར་དཀའ༔ མིར་སྐྱེ་བ་ཡང་ཤིན་ཏུ་རྙེད་དཀའ་སྟེ༔ གྲོགས་པོ་གང་དག་དད་དང་ཆོས་ཉན་པ༔ འདི་འདྲ་བསྐལ་པ་བརྒྱར་ཡང་རྙེད་མི་འགྱུར༔ ཞེས་དང་༔ དཀོན་བརྩེགས་གསང་བ་བསམ་གྱིས་མི་ཁྱབ་པའི་མདོ་ལས༔ སངས་རྒྱས་འབྱུང་བ་རབ་ཏུ་རྙེད་པར་དཀའ༔ ཕ་དང་མ་དག་ཆོས་ལ་གནས་པ་དང་༔ དལ་དང་འབྱོར་དང་ཆོས་
མཐུན་གྲོགས་པོ་དང་༔ མཐུན་པར་གནས་པ་བསྟན་ལ་རབ་དད་དཀོན༔ དེ་རྙེད་ནས་ནི་བྱང་ཆུབ་མ་ཐོབ་བར༔ མཁས་པས་ཆོས་ནི་ནམ་ཡང་མི་གཏོང་ངོ་༔ ཞེས་གསུངས་ཏེ༔ མདོ་ལས༔ དམྱལ་བ་ཡི་དྭགས་དུད་འགྲོ་དང་༔ ཀླ་ཀློ་ཚེ་རིང་ལྷ་དང་ནི༔ ལོག་ལྟ་སངས་རྒྱས་ཀྱིས་སྟོང་པ༔ ལྐུགས་པ་འདི་དག་མི་ཁོམས་བརྒྱད༔ ཅེས་པ་དེ་རྣམས་སྤངས་པ་དལ་བ་བརྒྱད་དང་༔ མི་ཉིད་དབུས་སྐྱེས་དབང་པོ་ཚང་༔ ལས་མཐའ་མ་ལོག་གནས་ལ་དད༔ སངས་རྒྱས་བྱོན་དང་དེས་ཆོས་གསུངས༔ བསྟན་པ་གནས་དང་དེ་རྗེས་འཇུག༔ གཞན་ཕྱིར་སྙིང་ནི་བརྩེ་བའོ༔ ཞེས་རང་གཞན་གྱི་འབྱོར་པ་ལྔ་ལྔ་སྟེ་བཅོ་བརྒྱད་ཚང་བའི་མི་ལུས་རིན་པོ་ཆེ་གཙང་མ་འདི་ཐོབ་དཀའོ༔ འདི་ལྟ་བུ་ཐོབ་པའི་དུས་འདིར་སྐྱེ་བ་གཏན་གྱི་སོ་ནམ་ཚོགས་བསགས་པ་ལ་འབད་དགོས་ཏེ༔ དེ་ཡང་ལུས་ལ་སྙིང་པོ་ལེན་པའི་ཐབས༔ རབ་ཏུ་བྱུང་བ་ཡིན་ན་རང་གི་གང་ཞུས་པའི་སྡོམ་པ་དང་དམ་ཚིག་བསྲུང་བ་གལ་ཆེ་སྟེ༔ པདྨ་གསུང་གི་རིག་འཛིན་ནཱ་གརྫུ་ནས༔ ཁྲིམས་ནི་རྒྱུ་དང་མི་རྒྱུའི་ས་བཞིན་དུ༔ ཡོན་ཏན་ཀུན་གྱི་གཞི་རྟེན་ལེགས་པར་ཐུབ་པས་གསུངས༔ ཞེས་
པས་ཆོས་ཀྱི་གཞི་ཡིན༔ དེ་ལ་སྐྱབས་གསུམ་འཛིན་པའི་སྡོམ་པ་ནི་ཁྱིམ་པ་དང་རབ་བྱུང་གཉིས་ཀའི་ཐུན་མོང་ཡིན་པས༔ ཐོག་མར་སྐྱབས་སྡོམ་གྱི་བསླབ་པ་བསྲུང་བ་གལ་ཆེ་སྟེ༔ སངས་རྒྱས་ལ་སྐྱབས་སུ་སོང་ནས་ཕྱི་རོལ་མུ་སྟེགས་པའི་ལྷ་ལ་ཕྱག་མི་འཚལ༔ ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེའི་བསམ་སྦྱོར་དྲག་པོ་མི་བྱ༔ དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་མི་བསྟེན༔ དེ་གསུམ་ནི་ཁྱད་པར་གྱི་བསླབ་བྱ་གསུམ་ཡིན་ལ༔ སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་སཱཙྪདུམ་བུ་ལ་ཡང་གུས་པ༔ ཆོས་ལ་སྐྱབས་སུ་སོང་ནས་ཡི་གེ་འབྲུ་རེ་རེ་ལ་ཡང་གུས་པ༔ དགེ་འདུན་ལ་སྐྱབས་སུ་སོང་ནས་ལྷན་པ་སེར་པོ་བཏབ་པ་ཡན་ལ་གུས་པ༔ དེ་གསུམ་ནི་ཆ་མཐུན་གྱི་བསླབ་བྱ་གསུམ་ཡིན་ཞིང་༔ ནང་ནུབ་སྐྱབས་འགྲོ་ལ་བརྩོན་པ་བཟའ་གཏུང་ཕུད་ཀྱིས་དཀོན་མཆོག་གསུམ་མཆོད་པ༔ ནད་དང་སྡུག་བསྔལ་ཅི་བྱུང་ཡང་དཀོན་མཆོག་གསུམ་ལས་གཞན་པའི་སྐྱབས་མི་ཚོལ་བ་དང་གསུམ་ནི་ཐུན་མོང་གི་བསླབ་བྱ་གསུམ་སྟེ༔ འདི་དགུ་མ་བསྲུངས་ན་ནང་པ་སངས་རྒྱས་པའི་གྲར་མི་ཚུད༔ དཀོན་
མཆོག་གི་བྱིན་རླབས་ཀྱང་མི་འཇུག་པས་བསྲུང་བ་གལ་ཆེ༔ འདི་ལ་སེམས་ཅན་ལ་དོན་མེད་པའི་གནོད་འཚེ་ནི་དུག་ལྟར་སྤུངས་དགྲ་ལྟ་བུ་མ་རུངས་པ་ལའང་༔ ནམ་ཞིག་སྐྱེ་བ་ཕྱི་མ་ཚུན་ཆོད་ལ་བདག་གི་ཕན་འདོགས་སྙམ་པའི་གཏིང་ནས་བསམ་པ་མ་ངན་པར་བྱ༔ སེར་མོ་བ་ཤིན་ཏུ་མ་རུངས་ཞིག་ལའང་༔ འདིའི་གོས་འདི་དགེ་འདུན་གྱི་ན་བཟའ་ཡིན༔ བསྟན་པ་ནུབ་པའི་ཚེ་སེར་གོས་ཐམས་ཅད་བསྡུས་ནས་ལྷ་རྣམས་ཀྱིས་མཆོད་པ་བྱེད་པར་བཤད་ན༔ འདི་གྱོན་པ་ལ་ཡོན་ཏན་སྣ་གཅིག་མེད་པ་མི་སྲིད༔ རང་སྣང་བ་མ་ལོག་ན་བསོད་ནམས་འཕེལ་ཏེ༔ བཅོམ་ལྡན་འདས་སེང་གེ་ཡི་དམ་བརྟན་དུ་སྐྱེས་པ་ན་རྔོན་པས་ཆོས་གོས་གྱོན་ཏེ༔ དུག་མདའ་རྒྱབ་པ་ལ་སེམས་དད་ནས་ལེན་མ་བྱས་པས་བསོད་ནམས་རྒྱ་ཆེན་པོ་ཐོབ་པ་དང་འདྲ༔ ཁོ་རང་ཡང་རེ་ཞིག་ངན་སོང་དུ་ལྟུང་ཡང་༔ སངས་རྒྱས་མོས་པའི་བསྟན་ཞུགས་སུ་གྲོལ་བ་ཐུབ་པའི་སྨོན་ལམ་ཡིན་པས་མཐའ་ཡོད༔ དེས་ན་སྐྱེ་བོ་ཕལ་པའི་དོ་ཟླ་མིན་སྙམ་པ་གལ་ཆེ༔ བསླབ་བྱ་གཞན་བདུན་པོ་བསྲུང་སླའོ༔ ཁྱིམ་པ་རྣམས་ནི་བསྙེན་གནས་ཡན་ལག་བརྒྱད་པ་འདི་བསྲུང་བ་གལ་ཆེ་སྟེ༔ མདོ་
སྡེ་འཇིག་རྟེན་བཞག་པ་ལས༔ བརྒྱ་བྱིན་གྱིས་སྨྲས་པ༔ ཟླ་བ་ཡར་གྱི་ཚེས་བརྒྱད་དང་༔ ཆོ་འཕྲུལ་གྱི་ནི་ཟླ་བ་ལ༔ བསྙེན་གནས་ཡན་ལག་བརྒྱད་བསྲུངས་ན༔ དེ་ནི་ང་དང་འདྲ་བར་འགྱུར༔ ཞེས་སྨྲས་པ་ལ༔ བཅོམ་ལྡན་འདས་ཀྱིས་བཀའ་སྩལ་པ༔ ཀོའུ་ཤི་ཀ་དེ་སྐད་མ་ཟེར་ཅིག༔ ཟླ་བ་ཡར་གྱི་ཚེས་བརྒྱད་དང་༔ ཆོ་འཕྲུལ་གྱི་ནི་ཟླ་བ་ལ༔ བསྙེན་གནས་ཡན་ལག་བརྒྱད་བསྲུངས་ན༔ དེ་ནི་ང་དང་འདྲ་བར་འགྱུར༔ ཞེས་དང་༔ བྱམས་པས་ལུང་བསྟན་པའི་མདོ་ལས༔ བྱམས་པ་ཉིད་ཀྱིས་གསུངས་པ༔ ཤཱཀྱ་ཐུབ་པའི་བསྟན་པ་ལ༔ གང་ལ་གང་གིས་ཆོས་ཉན་ཅིང་༔ བསྙེན་གནས་ཡན་ལག་བརྒྱད་བསྲུང་ན༔ ང་ཡི་འཁོར་དུ་སྐྱེ་བར་འགྱུར༔ ཞེས་གསུངས་པ་དང་༔ མདོ་ཏིང་འཛིན་རྒྱལ་པོའི་ལེའུ་སོ་དྲུག་པ་ལས༔ བསྐལ་པ་བྱེ་བ་གངྒའི་བྱེ་སྙེད་དུ༔ དངས་པའི་སེམས་ཀྱིས་ཟས་དང་སྐོམ་རྣམས་དང་༔ གདུགས་དང་བ་དན་མར་མེའི་ཕྲེང་བ་ཡིས༔ སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས༔ གང་གིས་དམ་ཆོས་རབ་ཏུ་འཇིག་པ་དང་༔ བདེ་གཤེགས་བསྟན་པ་འགགས་པར་གྱུར་པའི་ཚེ༔ ཉིན་
མཚན་དུ་ནི་བསླབ་པ་གཅིག་སྤྱོད་པ༔ བསོད་ནམས་འདི་ནི་དེ་ལས་ཁྱད་པར་འཕགས༔ ཞེས་དང་༔ ཟླ་བ་སྒྲོན་མའི་མདོ་ལས་དེང་སང་ཡན་ལག་བརྒྱད་པའི་ཚུལ་ཁྲིམས་ཉིན་ཞག་གཅིག་བསྲུང་ན༔ མཚོན་གྱི་བསྐལ་པའི་ནང་དུ་སྐྱེ་བར་མི་འགྱུར༔ གང་གིས་བསྐལ་པ་གངྒའི་བྱེ་སྙེད་དུ༔ དང་པའི་སེམས་ཀྱིས་ཟས་དང་སྐོམ་རྣམས་དང་༔ གདུགས་དང་རྒྱལ་མཚན་མར་མེའི་ཕྲེང་བ་ཡི༔ སངས་རྒྱས་བྱེ་བ་ཁྲག་ཁྲག་བསྙེན་བཀུར་བས༔ གང་གིས་དམ་ཆོས་རབ་ཏུ་འཇིག་པ་དང་༔ སངས་རྒྱས་བསྟན་པ་འགགས་པར་གྱུར་པའི་ཚེ༔ ཉིན་མཚན་དུ་ནི་བསླབ་པ་གཅིག་སྤྱོད་པ༔ བསོད་ནམས་དེ་ནི་དེ་ལས་ཁྱད་པར་འཕགས༔ ཞེས་དང་༔ ཁང་བུ་བརྩེགས་པའི་མདོ་ལས༔ དེང་སང་ཡན་ལག་བརྒྱད་པའི་ཚུལ་ཁྲིམས་ཉིན་ཞག་གཅིག་བསྲུང་ན༔ མཚོན་གྱི་བསྐལ་པའི་ནང་དུ་སྐྱེ་བར་མི་འགྱུར༔ གོང་གི་ཕྱི་དྲོའི་ཁ་ཟས་ཉི་མ་གཅིག་བསྲུངས་ན༔ མུ་གེའི་བསྐལ་པ་ལས་ཐར་བར་འགྱུར་རོ༔ ཞེས་གསུངས་པས་བསྙེན་གནས་བསྲུང་བར་བྱ་ཞིང་༔ གལ་ཏེ་དགེ་བསྙེན་དང་༔ དགེ་བསྙེན་མ་ཞུས་པས་བསྙེན་གནས་དུས་བཟང་དུས་བསྲུང་ན༔
གསོ་སྦྱོང་དུ་འགྱུར་བས་ཉེས་བྱས་ཕྲ་མོ་ཉམས་པ་དག་པ་ཡིན་ལ༔ དགེ་ཚུལ་སློང་བར་མ་རབ་བྱུང་སོགས་ཀྱིས་ནི་བསྲུང་བར་མ་བཤད་དེ༔ གདནོ་གཅིག་པར་བཞེས་པ་དང་དེ་གཉིས་དོན་མི་གཅིག་གོ༔ དེ་ལ་རབ་ཏུ་བྱུང་ནས་སྡོམ་པ་གང་ཞུས་བསྲུང་བ་དང་བྱང་སྡོམ་ཞུས་ནས་དེའི་བསླབ་བྱ་བསྲུང་བ་དང་༔ སྔགས་སྡོམ་ཞུས་ནས་དེའི་དམ་ཚིག་བསྲུང་བ་རྣམས་ནི་ཚུལ་ཁྲིམས་ཡིན་ལ༔ སྔགས་སྡོམ་ནང་ན་འོག་མ་གཉིས་ཀྱང་དོན་གྱིས་ཚང་བར་ཡོད་དེ༔ གཞན་གནོད་གཞི་དང་བཅས་པ་སྤངས་པས་སོ་ཐར་ཚང་༔ གཞན་ཕན་གཞི་དང་བཅས་པ་བསྒྲུབས་པས་བྱང་སྡོམ་ཚང་༔ རྩ་བ་སྐུ་གསུང་ཐུགས་ཀྱི་དམ་ཚིག་ནི་སྔགས་སྡོམ་སྟེ༔ དེ་རྣམས་མ་བསྲུངས་ན་མི་ལུས་ཐོབ་པ་ཆུད་ཟོས་ཡིན༔ བསྲུངས་ན་མི་ལུས་ལ་སྙིང་པོ་ལོན་པ་ཡིན༔ རང་གསང་སྔགས་པ་ཡིན་ནོ་སྙམ་དུ་སྤྱོད་པ་རྩིང་མི་རུང་སྡོམ་པ་དང་དམ་ཚིག་བསྲུང་བ་གལ་ཆེ་སྟེ༔ འཇམ་དཔལ་རྩ་རྒྱུད་ལས༔ ཟློས་པ་འདི་ལ་ཚུལ་ཁྲིམས་ཉམས༔ དེ་ལ་གྲུབ་པ་མཆོག་མེད་ཅིང་༔ གྲུབ་པ་འབྲིང་ཡང་ཡང་མེད་དེ༔ གྲུབ་པ་ཐ་མའང་ཡོད་མ་ཡིན༔ ཚུལ་ཁྲིམས་འཆལ་ལ་ཐུབ་
དབང་གིས༔ གསང་སྔགས་འགྲུབ་པར་མ་གསུངས་ཏེ༔ མྱ་ངན་འདས་གྲོང་འགྲོ་བ་ཡི༔ ཡུལ་དང་ཕྱོགས་ཀྱང་མ་ཡིན་ནོ༔ བྱིས་པ་ངན་པ་འདི་ལ་ནི༔ སྔགས་འགྲུབ་པ་ནི་སོད༔ སྐྱེ་བོ་ཚུལ་ཁྲིམས་འཆལ་འདི་ལ༔ དེ་ལ་བདེ་འགྲོ་ག་ལ་ཡོད༔ མཐོ་རིས་སུ་ཡང་མི་འགྱུར་ཞིང་༔ བདེ་བ་མཆོག་ཏུ་མི་འགྱུར་ན༔ རྒྱལ་བས་གསུངས་པའི་སྔགས་རྣམས་ནི༔ འགྲུབ་པར་འགྱུར་བ་སྨོས་ཅི་དགོས༔ ཞེས་གསུངས་སོ༔ དེ་ཡང་ཐོབ་དཀའི་མི་ལུས་ཐོབ་པ་དོན་དང་ལྡན་པའི་ཐབས་བྱང་ཆུབ་སེམས་བསྐྱེད་གལ་ཆེ་སྟེ༔ གསང་བ་བསམ་གྱིས་མི་ཁྱབ་པའི་མདོ་ལས༔ བྱང་ཆུབ་སེམས་ལས་མ་གཏོགས་པ༔ སངས་རྒྱས་ཀྱིས་སྔགས་ཐབས་མ་གཟིགས༔ བྱང་ཆུབ་སེམས་བསྐྱེད་ཙམ་གྱིས་ནི༔ བསོད་ནམས་ཕུང་པོ་གང་ཐོབ་པ༔ གལ་ཏེ་དེ་ནི་གཟུགས་མཆིས་ན༔ ནམ་མཁའི་ཁམས་ནི་ཀུན་བཀང་སྟེ༔ དེ་ནི་དེ་བས་ལྷག་པར་འགྱུར༔ ཞེས་པ་དང་༔ དཔལ་སྦྱིན་གྱིས་ཞུས་པའི་མདོ་ལས༔ བྱང་ཆུབ་སེམས་ཀྱི་བསོད་ནམས་གང་༔ གལ་ཏེ་དེ་ལ་གཟུགས་མཆིས་ན་ནམ་མཁའི་ཁམས་ནི་ཀུན་བཀང་སྟེ༔ དེ་ནི་དེ་བས་ལྷག་པར་
འགྱུར༔ ཞེས་དང་༔ གང་གཱའི་བྱེ་མའི་གྲངས་སྙེད་ཀྱི༔ སངས་རྒྱས་ཞིང་རྣམས་མི་གང་གིས༔ རིན་ཆེན་དག་གིས་ཡོངས་བཀང་སྟེ༔ བདེ་བར་གཤེགས་ལ་ཕུལ་བ་བས༔ གང་གིས་ཐལ་མོ་སྦྱར་བགྱིས་ཏེ༔ བྱང་ཆུབ་ཏུ་ནི་སེམས་བཏུད་ན༔ མཆོད་པ་འདི་ནི་ཁྱད་པར་འཕགས༔ དེ་ལ་མཐའ་ནི་མ་མཆིས་སོ༔ ཞེས་གསུངས་པ་དང་༔ ངེས་པ་དང་མ་ངེས་པ་ལ་འཇུག་པ་ཕྱག་རྒྱ་ཆེན་པོའི་མདོ་ལས། འཇམ་དཔལ་གང་དང་གང་གིས་བྱང་ཆུབ་ཏུ་སེམས་བསྐྱེད་པའི་ཚེ༔ སེམས་དེ་ལས་མི་དགེ་བའི་ལས་རྣམ་པར་མ་སྤངས་བ་ཞིག་མེད་ལ༔ དེས་སངས་རྒྱས་ཀྱི་ཆོས་རྣམས་མ་བཟུང་བ་གང་ཡང་མེད་པའི་ཕྱིར༔ འཇམ་དཔལ་བྱང་ཆུབ་སེམས་དཔའ་རྣམས་ནི་རྒྱུ་དང་འབྲས་བུའི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ༔ ཞེས་དང་། སྡོང་པོ་རྒྱན་པའི་མདོ་ལས༔ བྱང་ཆུབ་ཀྱི་སེམས་ནི་ཉོན་མོངས་པ་ཐམས་ཅད་མེད་པར་བྱེད་པ་ལ་གསེར་འགྱུར་གྱི་རྩི་ལྟ་བུའོ༔ སྒྲིབ་པའི་བུད་ཤིང་ཐམས་ཅད་སྲེག་པར་བྱེད་པས་མེ་ལྟ་བུའོ༔ ཞེས་དང་༔ གཞན་ཡང་བླ་མེད་རྒྱུད་སྡེ་དུ་མ་ནས་ཀྱང་གསང་སྔགས་ཀྱི་རྩ་བ་སེམས་བསྐྱེད་ཡིན་ཞིང་
དེ་མེད་ན་དབང་གི་སྣོད་དུ་ཡང་མི་རུང་ན་ཉམས་ལེན་ལྟ་ཅི་སྨོས༔ དེས་ན་བྱང་ཆུབ་སེམས་བསྐྱེད་དགོས༔ སེམས་བསྐྱེད་པའི་རྟེན་ལ་བསོད་ནམས་དགེ་བའི་རྩ་བ་ཅུང་ཟད་ཅིག་དགོས་ཏེ༔ དེ་ལ་སླ་ཞིང་ཕན་ཡོན་ཆེ་བ་མཎྜལ་ཡིན་ཏེ༔ གསང་སྔགས་སྔ་འགྱུར་གྱི་རྒྱུད་ལུང་ལས༔ ཕན་ཡོན་རྒྱ་ཆེར་བསྐྱེད་པ་ཡི༔ མཎྜལ་ཕུལ་བའི་དགེ་བ་གང་འཕགས་པས་ཀྱང་ནི་བརྗོད་མི་ལོང་༔ ཞེས་དང་༔ ཨོ་རྒྱན་རིན་པོ་ཆེས༔ དུས་ཁྱད་པར་ཅན་ནམ༔ བླ་མ་དཀོན་མཆོག་སོགས་རྟེན་ཁྱད་པར་ཅན་གྱི་དྲུང་དུ༔ གུས་པ་དང་ལྡན་པས་མཎྜལ་ཚར་གཅིག་ཕུལ་བའི་བསོད་ནམས་ཀྱི་ཕུང་པོ་ནི་བསྐལ་པ་དཔག་ཏུ་མེད་པའི་བདེ་བར་གཤེགས་པའི་ཚོགས་དང་བཅས་པ་ལ་ཕྱི་ནང་གི་མཆོད་གསོལ་རྒྱ་ཆེན་པོ་བྱས་པ་བས་ལྷག་པའི་བསོད་ནམས་ཀྱི་དཔལ་འབྱོར་ཐོབ་པར་འགྱུར་རོ༔ ཅི་བསམ་པའི་དོན་ཐམས་ཅད་འགྲུབ་བོ༔ བསྐལ་པ་ནས་བསྐལ་པར་བསགས་པའི་སྡིག་སྒྲིབ་ཉེས་ལྟུང་གི་ཚོགས་ཐམས་ཅད་བྱང་ཞིང་དག་པར་འགྱུར༔ མཎྜལ་ཚར་གཅིག་ཕུལ་ནས་ཡིད་དད་པས་སྨོན་ལམ་ཇི་ལྟར་བཏབ་པ་ཐམས་ཅད་འབད་མེད་དུ་འགྲུབ༔ ཆོས་སྤྱོད་གཞན་ཐམས་
ཅད་གཅིག་ཏུ་དྲིལ་བའི་བསོད་ནམས་ལས༔ མཎྜལ་ཕུལ་བའི་བསོད་ནམས་ཁྱད་པར་ཆེ་ཞིང་༔ ཏིང་ངེ་འཛིན་དང་རྟོགས་པ་ཁྱད་པར་ཅན་རྒྱུད་ལ་སྐྱེ༔ ཚེ་ཕྱི་མ་ལ་སོགས་པའི་མཐར་ཐུག་རང་ཉིད་ཇི་ལྟར་འདོད་པའི་ལོངས་སྤྱོད་དང་༔ དཔལ་འབྱོར་ཐོབ་ཅིང་ཞིང་ཁམས་བགྲོད་པར་འགྱུར༔ བདེ་བར་གཤེགས་པ་ཐམས་ཅད་ཀྱི་དགོངས་པར་འགྱུར་བ་ལ་སོགས་པའི༔ བསོད་ནམས་ཀྱི་ཕུང་པོ་གང་གིས་ཀྱང་དཔག་པར་མི་ནུས་སོ༔ ཞེས་གསུངས་སོ༔ དེ་ལྟར་མཎྜལ་འབུལ་བའི་དུས་ལ་ངེས་པ་མེད་དེ༔ སྔ་འགྱུར་རྒྱུད་ལུང་ལས༔ ལྷ་དང་བླ་མ་ནམ་དྲན་དུས་ཉིད་དམ༔ ཚོགས་པ་རྒྱ་མཚོའི་དབུས་དང་ཆོས་འཕེལ་ཚེ༔ ཆོས་སྤྱོད་ཀུན་རྫོགས་གཙོ་བོར་མཎྜལ་འབུལ༔ ཞེས་གསུངས་པ་ལྟར་རོ༔ མཎྜལ་དངོས་སུ་མ་འབྱོར་ན་ཡིད་ཀྱིས་འབུལ་བར་བྱ་སྟེ༔ ཨོ་རྒྱན་རིན་པོ་ཆེའི་ཞལ་ནས༔ གདུང་ཤུགས་མོས་གུས་ཕུ་དུད་ལྡན་པས་མཎྜལ་དངོས་སུ་འབྱོར་བའམ༔ མ་འབྱོར་ཡང་ཡིད་ཀྱིས་སྤྲུལ་པར་དམིགས་ཤིང་འབུལ་བར་བྱ༔ ཞེས་གསུངས་ཏེ༔ དངོས་སུ་མཆོད་པ་དང་ཡིད་ཀྱིས་སྤྲུལ་ནས་མཆོད་པ་གཉིས་ཀྱང་བསོད་ནམས་
མཉམ་སྟེ༔ རྒྱལ་བ་བྱམས་པས༔ རབ་དྭངས་སེམས་དང་ལྡན་པ་ཡིས༔ ཚོགས་གཉིས་རྫོགས་པར་བྱ་བའི་ཕྱིར༔ སངས་རྒྱས་རྣམས་ལ་གོས་ལ་སོགས༔ མངོན་སུམ་མངོན་སུམ་མིན་པར་མཆོད༔ ཅེས་གསུངས་སོ༔ དེས་ན་མདུན་དུ་སྒྲུབ་པའི་མཎྜལ་ཡོད་ན་བཟང་ཞིང་ལེགས་པ་ཞིག་ལ་ཚོམ་བུ་ལྔ་བཀོད་དེ་སྟེགས་མཐོ་བ་ལ་བཞག༔ མེད་ན་མདུན་གྱི་ནམ་མཁར་དམིགས་པས་ཆོག་ལ་མཆོད་པའི་མཎྜལ་ཡང་ཡོད་ན་དངོས་སུ་འབུལ༔ མེད་ན་ལག་པའི་ཕྱག་རྒྱུ་ཙམ་ལ་བརྟེན་ནས་ཡིད་ཀྱིས་དམིགས་ཏེ་འབུལ་བས་ཆོག་མཎྜལ་འབུལ་བ་དང་སེམས་བསྐྱེད་ལེན་པ་ཡོད་ན་བླ་མ་དང་རྟེན་ཁྱད་པར་ཅན་གྱི་དྲུང་དུ་བྱ༔ མ་འཛོམས་ན་ཡིད་ཀྱིས་དམིགས་པས་ཆོག་སྟེ༔ སངས་རྒྱས་ཐམས་ཅད་ལ་རྡོ་རྗེའི་སྤྱན་དང་སྙན་མངའ་བས་དང་༔ འཇིག་རྟེན་ཐམས་ཅད་ལ༔ སེམས་ཅན་སོ་སོ་ནས་སངས་རྒྱས་ཀྱི་སྤྱན་གྱིས་ཉིན་མཚན་དུས་དྲུག་ཏུ་གཟིག་གས་པ་དང་༔ ཐུགས་ཀྱིས་འཁོར་འདས་ཐམས་ཅད་ཁྱབ་པར་བཞུགས་པས༔ ཡིད་ཀྱིས་གང་དུ་དམིགས་པ་དེར་སངས་རྒྱས་དངོས་སུ་བཞུགས་པ་ཡིན་ནོ༔ དེས་ན་སེམས་བསྐྱེད་ཞུ་ཡུལ་དང་དེའི་རྟེན་མཎྜལ་
གྱི་ཚོགས་བསགས་པའི་རྟེན་མདུན་གྱི་ནམ་མཁར་རིན་པོ་ཆེ་དང་པདྨ་དང་ཟླ་བའི་གདན་ལྔ་ཚོམ་གྱི་དབུས་མར་ཨོ་རྒྱན་ཆེན་པོ་དང་བླ་མ་དང་ཐ་དད་མེད་པ་ལ་རིག་འཛིན་གྲུབ་ཐོབ་ཐམས་ཅད་ཀྱིས་བསྐོར་བ༔ གཡས་སུ་ཤཱཀྱ་ཐུབ་པ་ལ་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱིས་བསྐོར་བ༔ རྒྱབ་ཏུ་མདོ་རྒྱུད་ཀྱི་ཆོས་ཐམས་ཅད་གླེགས་བམ་གྱི་ཚུལ་དུ་རི་རབ་ཙམ་པ༔ གཡོན་དུ་བྱང་ཆུབ་སེམས་དཔའ་བྱམས་པ་ལ་ས་དང་ལམ་ལ་གནས་ཤིང་ཕྱིར་མི་ལྡོག་པའི་སེམས་དཔའ་དང་༔ གསང་སྔགས་རིག་འཛིན་རྒྱ་མཚོས་བསྐོར་བ༔ མདུན་དུ་ཐུགས་རྗེ་ཆེན་པོ་ལ་རྒྱུད་སྡེ་དྲུག་གི་ལྷ་ཚོགས་ཀྱིས་བསྐོར་བ༔ གདན་གྱི་བར་མཚམས་སུ་དཔའ་བོ་མཁའ་འགྲོ་ཆོས་སྐྱོང་གི་ཚོགས་ཐམས་ཅད་སྤྲིན་འཁྲིགས་པ་ལྟ་བཞིནབསྒོམས༔ ད་དུང་དངོས་སུ་མི་བཞུགས་སྙམ་པའི་རྣམ་པར་རྟོག་པ་དག་པའི་ཕྱིར༔ ཕྱོགས་བཅུའི་ཞིང་ཐམས་ཅད་ནས་ཀྱང་ཁ་བ་བུ་ཡུག་ལྟར་བྱོན་ནས་དབྱེར་མེད་དུ་ཐིམ་པར་དམིགས༔ དེའི་དྲུང་དུ་ཕྱི་གླིང་བཞི་རི་རབ་བྱེ་བ་ཕྲག་བརྒྱ་ལྷ་མིའི་ལོངས་སྤྱོད་དང་བཅས་པ༔ ནང་རང་གི་ལུས་རྩ་རླུང་གི་ཁམས་དག་པའི་ཞིང་ཁམས་མཆོད་པའི་
ལྷ་མོ་དང་བཅས་པ༔ གཞན་ཡང་ལོངས་སྤྱོད་དགེ་རྩ་ཅི་ཡོད་པ་ཐམས་ཅད་བླ་མ་དཀོན་མཆོག་གི་དྲུང་དུ༔ མཎྜལ་གཅིག་ཏུ་བསྡུས་ཏེ་འབུལ་ཞིང་བྱང་ཆུབ་མཆོག་ཏུ་སེམས་བསྐྱེད་སྙམ་པ་གྱིས་ལ་འདི་ཡི་རྗེས་ཟློས་མཛོད༔ ལི་ཡི་མཎྜལ་རིན་ཆེན་བསྒྱུར་བྱས་ནས༔ ནས་རྣམས་ཀུན་ཀྱང་གསེར་གཡུར་བསྒྱུར་ནས་ཀྱང་༔ བླ་མ་ཐུགས་རྗེ་སྤྲུལ་པའི་སྐུ་གཅིག་ལ༔ དད་པས་འབུལ་ལོ་ཐུགས་རྗེས་བདག་གཞན་གཟིགས༔ ས་གཞི་སྤོས་སོགས་བྱ༔ ད་སྐྱབས་ཡུལ་ཕྱི་ནང་གསང་བའི་བླ་མ་དཀོན་མཆོག་གི་དྲུང་དུ༔ དུས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་༔ ཕ་མ་སེམས་ཅན་ཐམས་ཅད་བདག་ཁོ་ནས་བླ་ན་མེད་པའི་སངས་རྒྱས་ཀྱི་ས་ལ་བཀོད་པར་བྱའོ༔ སྙམ་པའི་བསམ་པ་རྣམ་པར་དག་པས་འདིའི་རྗེས་ཟློས་ལན་གསུམ་མཛོད༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ཐོབ་བྱའི་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ དེས་བྱང་ཆུབ་སེམས་བསྐྱེད་ཀྱང་ཐོབ་པ་ཡིན༔ དེ་ནས་མདུན་དུ་བསྐྱེད་པའི་ལྷ་ཚོགས་ཐམས་ཅད་རང་ལ་ཐིམ་པར་བསྒོམས་ལ༔
སེམས་མ་བཅོས་པར་ཀློད་ལ་ཞོག་ཅིག༔ སེམས་བསྐྱེད་ཆེན་པོའི་མདོ་ལས༔ འོད་སྲུང་ཆོས་ཐམས་ཅད་ནམ་མཁའ་ལྟར་མཚན་ཉིད་མེད་ཅིང་ཡེ་ནས་འོད་གསལ་བ་རྣམ་པར་དག་པ་དེ་ལ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ༔ ཞེས་དང་༔ ཡབ་སྲས་མཇལ་བའི་མདོ་ལས༔ སྟོང་ཉིད་ཆོས་ལ་བསྟེན་བགྱིད་ཅིང་༔ སངས་རྒྱས་སྤྱོད་ཡུལ་གང་མོས་པ༔ དེ་དག་སྟོན་པ་མཆོད་པ་སྟེ༔ མཆོད་པ་འདི་ནི་བླ་ན་མེད༔ ཅེས་དང་༔ བདུད་རྩི་གསང་བའི་རྒྱུད་ལས༔ མཉེས་པའི་དོན་གྱི་མཆོད་པ་སྟེ༔ སྤོས་སོགས་ཕུལ་བས་མཉེས་པ་མེད༔ རང་སེམས་ལས་སུ་རུང་བ་དག༔ མཉེས་པའི་མཆོད་པ་ཆེན་པོའོ་ཞེས་གསུངས་པས༔ སེམས་མ་བཅོས་པར་བཞག་པ་དེ་མཎྜལ་དང་མཆོད་པའི་རྒྱལ་པོ༔ དོན་དམ་བྱང་ཆུབ་ཏུ་སེམས་བསྐྱེད་པ་ཡང་ཡིན་པས༔ དེ་ལྟར་མཎྜལ་དང་སེམས་བསྐྱེད་ཀྱི་དམིགས་རིམ་དེ་ཐུན་དུ་ཆོད་ལ་ཅི་མང་དུ་སྒོམས་ཤིག༔ དེ་ལྟར་བྱང་ཆུབ་ཏུ་སེམས་བསྐྱེད་ནས་དེའི་བསླབ་པ་བསྲུང་དགོས་ཏེ༔ འདི་སྨོན་འཇུག་གཉིས་ཀ་སྟབས་གཅིག་ཏུ༔ བླངས་པ་ཡིན་པས་གཉིས་ཀའི་བསླབ་པ་བསྲུང་དགོས་དེ་
ཡང་ཉམས་སུ་ལེན་བདེ་ཕྱིར་བསྡུས་ཏེ་བཤད་ན༔ མ་དྲོས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་གཅིག་དང་ལྡན་ན༔ རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏོ༔ ཆོས་གཅིག་པོ་དེ་གང་ཞེ་ན༔ སེམས་ཅན་བློས་ཡོངས་སུ་མི་གཏོང་བའི་སེམས་སོ༔ ཞེས་གསུངས་པས་སེམས་ཅན་ཐམས་ཅད་བློས་གཏོང་བ་ནི་ཁྲ་དང་སྤྱང་ཀི་ལ་ཡང་མེད་དེ༔ རང་ལ་གནོད་པ་ཚན་ཆེན་བྱེད་པའི་སེམས་ཅན་ཡང་བློས་མི་གཏོང་བར༔ ནམ་ཞིག་འདི་བདག་གིས་སངས་རྒྱས་ཀྱི་ས་ལ་དགོད་པར་བྱ་སྙམ་དུ་བྱ་བ་གལ་ཆེའོ། སེམས་བསྐྱེད་པའི་བྱང་ཆུབ་སེམས་དཔའ་ལ་ཞེ་སྡང་གིས་སྐུར་པ་མི་གདབ༔ གཞན་གྱི་ཆོས་དང་བསོད་ནམས་བྱས་པ་ལ་འགྱོད་པ་མི་བསྐྱེད༔ བླ་མ་དང་སྐྱེས་བུ་དམ་པ་ལ་བསླུ་བའི་བསམ་སྦྱོར་སྤང་༔ སེམས་ཅན་ལ་གཡོ་སྒྱུའི་མགོ་མི་བསྐོར་བ་ནི་ནག་པོའི་ཆོས་བཞི་སྤངས་བ་ཡིན་ལ༔ དཀར་པོའི་ཆོས་བཞི་སོགས་རྣམ་གྲངས་མང་དུ་ཡོད་ཀྱང་༔ མདོར་བསྡུས་ན་དགེ་བའི་བྱ་བ་ཅི་བྱེད་ཀྱང་༔ ཐོག་མར་སེམས་ཅན་ཐམས་ཅད་སངས་རྒྱས་ཐོབ་པའི་ཕྱིར་དུ་བྱའོ་སྙམ་པའི་སེམས་
བསྐྱེད༔ མཇུག་ཏུ་དགེ་བའི་རྩ་བ་འདིས་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་རིན་པོ་ཆེ་མྱུར་དུ་ཐོབ་ནས༔ སེམས་ཅན་གྱི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག་སྙམ་པ་འདི་ལ་འདུས་པ་ཡིན་ནོ༔ སྐབས་སུ་སེམས་བསྐྱེད་ཀྱི་ཕན་ཡོན་དྲན་པར་བྱ་ཞིང་ཡང་ཡང་བསྒོམ་དགོས་པས༔ རྒྱལ་བ་བྱམས་པའི་ཞལ་ནས༔ རིགས་ཀྱི་བུ་བྱང་ཆུབ་ཀྱི་སེམས་ནི༔ སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ༔ དཀར་པོའི་ཆོས་ཐམས་ཅད་འཕེལ་བར་བྱེད་པ་ཞིང་ས་ལྟ་བུའོ༔ འཇིག་རྟེན་ཐམས་ཅད་བརྟེན་པ་ས་ལྟ་བུའོ༔ དབུལ་བ་ཐམས་ཅད་ཡང་དག་པར་གཅོད་པས་རྣམ་ཐོས་ཀྱི་བུ་ལྟ་བུའོ༔ རེ་བ་ཐམས་ཅད་སྐོང་བས་དཔག་བསམ་གྱི་ཤིང་ལྟ་བུའོ༔ དོན་ཐམས་ཅད་འགྲུབ་པས་ཡིད་བཞིན་ནོར་བུ་ལྟ་བུའོ༔ ཞེས་སོགས་དང་༔ བྱམས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་གཅིག་དང་ལྡན་ན༔ ངན་སོང་ཐམས་ཅད་སྤངས་ཤིང་༔ སྡིག་པའི་གྲོགས་པོའི་ལག་ཏུ་མི་འགྲོ་ལ༔ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ༔ ཆོས་གཅིག་པོ་དེ་གང་
ཞེ་ན་འདི་ལྟ་སྟེ༔ ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ ཞེས་དང་༔ བསོད་ནམས་ཐམས་ཅད་བསྡུས་པའི་མདོ་ལས༔ སྲེད་མེད་ཀྱི་བུ་དཔེར་ན་ཆུ་ཀླུང་དང་ཆུ་མིག་དང་ཆུ་བྲན་དང་འབབས་ཆུ་ཐམས་ཅད་ནི་རྒྱ་མཚོ་ཆེན་པོའི་ཁོང་དུ་འདུ་ཞིང་རྗེས་སུ་ཞུགས་པར་རིགས་པར་བྱའོ༔ དེ་བཞིན་དུ་བསོད་ནམས་བྱ་བའི་དངོས་པོ་གང་ཅི་ཡང་རུང་བ༔ སྦྱིན་པ་ལས་བྱུང་བ་དང་ཚུལ་ཁྲིམས་དང་བསྒོམ་པ་ལས་བྱུང་བ་དང་༔ ཟག་པ་དང་བཅས་པ་དང་༔ ཟག་པ་མེད་པ་དང་༔ འཇིག་རྟེན་དང་འཇིག་རྟེ་ལས་འདས་པའི་བསོད་ནམས་ཇི་སྙེད་དེ་དག་ཐམཾས་ཅད་བྱང་ཆུབ་ཀྱི་སེམས་ཀྱི་ཁོངས་སུ་འདུ་ཞིང་རྗེས་སུ་ཞུགས་པ་དག་གོ༔ སྲེད་མེད་ཀྱི་བུ་དེའི་ཕྱིར་བསོད་ནམས་ཐམས་ཅད་ཡོངས་སུ་བཟུང་བར་འདོད་པའི་རིགས་ཀྱི་བུའམ་རིགས་ཀྱི་བུ་མོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ༔ ཞེས་དང་༔ ཕལ་པོ་ཆེ་ལས༔ སེམས་དེ་ནི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་ཤོག་ཅིག༔ ཅེས་བྱ་བར་བསྐྱེད་པ་དེ༔ དེ་ནི་འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་
བཅོམ་ལྡན་འདས་རྣམས་དང་ཉེ་བ་ཡིན༔ དུས་གསུམ་གྱི་སངས་རྒྱས་རྣམས་ཀྱི་དེ་བཞིན་ཉིད་མཉམ་པ་ཡིན༔ དུས་གསུམ་གྱི་སངས་རྒྱས་ཐམས་ཅད་ཀྱི་ཡེ་ཤེས་དང་འགྲོགས་པ་ཡིན་ནོ༔ ཞེས་དང་༔ སངས་རྒྱས་ཕལ་པོ་ཆེ་ལས༔ གང་ཞིག་ཕྱོགས་བཅུའི་རྒྱལ་བ་བལྟ་བར་འདོད་པ་དང་༔ གང་ཞིག་སྦྱིན་གཏོང་བསོད་ནམས་མི་ཟད་མཛོད་འདོད་དང་༔ འགྲོ་བ་ཀུན་གྱི་སྡུག་བསྔལ་མི་ཟད་གྲོལ་འདོད་ན༔ དེས་ནི་ཡོན་ཏན་མི་ཟད་བྱང་ཆུབ་སེམས་བསྐྱེད་བྱ༔ ཞེས་དང་༔ ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས༔ འོད་སྲུང་ལྷག་པའི་བསམ་པ་ལ་ཞུགས་པ་ལས༔ བྱང་ཆུབ་འགྲུབ་པར་དཀའ་བ་མ་མཆིས་སོ༔ དེ་ཅིའི་ཕྱིར་ཞེ་ན༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་སེམས་བསྐྱེད་པ་ལ་རགས་ལས་ཏེ༔ བྱང་ཆུབ་ཏུ་སེམས་བསྐྱེད་མ་ཐག་ཏུ༔ སངས་རྒྱས་དང་སངས་རྒྱས་ཀྱི་ཆོས་རྣམས་བཟུང་བར་འགྱུར་རོ༔ ཞེས་དང་༔ དགེ་བའི་རྩ་བ་ཡོངས་སུ་འཛིན་པའི་མདོ་ལས༔ འོད་སྲུང་དཔེར་ན་འཛམ་བུ་གླིང་དང་གླིང་བཞི་པ་དང་༔ སྟོང་དང་པོ་དང་༔ སྟོང་གཉིས་པ་དང་༔ སྟོང་གསུམ་གྱི་སྟོང་ཆེན་པོ་
འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་འཕགས་པ་དགྲ་བཅོམ་པ་ཤ་སྟག་ཏུ་གྱུར་ཏེ༔ དགྲ་བཅོམ་པ་དེ་དག་ཐམས་ཅད་ལ་ཉི་མ་རེ་རེ་བཞིན་ལྷའི་ཞལ་ཟས་དང་༔ ཆོས་གོས་དང་མལ་ཆ་དང་ན་བའི་གསོས་སྨན་ལ་སོགས་པ་རྣམས་ཀྱིས་བསྙེན་བཀུར་ན་བསོད་ནམས་ཆེའམ༔ བཅོམ་ལྡན་འདས་དེ་ནི་བསོད་ནམས་རིམ་པ་བཞིན་དུ་ཆེ་ཞིང་བསམ་གྱིས་མི་ཁྱབ་བོ༔ འོད་སྲུང་དེ་བས་ཀྱང་གང་ཟག་གཅིག་བྱང་ཆུབ་ཏུ་སེམས་བསྐྱེད་པ་ལ་བཀོད་ན་བསོད་ནམས་ཁྱད་པར་ཅན་དུ་ཆེ་ཞིང་དཔག་ཏུ་མེད་དོ༔ དེ་ཅིའི་ཕྱིར་ཞེ་ན༔ དཀོན་མཆོག་གསུམ་གྱི་གདུང་རྒྱུད་མི་འཆད་པའི་ཕྱིར་རོ༔ ཞེས་དང་༔ སངས་རྒྱས་ཕལ་པོ་ཆེ་ལས༔ དཔེར་ན་དངུལ་ཆུའི་རང་བཞིན་གསེར་དུ་སྣང་བ་ཞེས་བྱ་བ་ཡོད་དེ༔ དེ་སྲང་གཅིག་གིས་ཀྱང་ལྕགས་སྲང་སྟོང་གསེར་དུ་འགྱུར་རོ༔ དངུལ་ཆུ་དེ་ལྕགས་སྲང་སྟོང་པོ་དེས་ཟད་པར་བྱ་བའམ༔ ལྕགས་སུ་བསྒྱུར་བར་མི་ནུས་སོ༔ དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཡེ་ཤེས་ཀྱིས་ལས་དང་ཉོན་མོངས་པའི་སྒྲིབ་པའི་ལྕགས་ཐམས་ཅད་ཟད་པར་བྱས་ཏེ་ཐམས་ཅད་མཁྱེན་པ་ཉིད་ཀྱི་ཁ་དོག་ཏུ་བྱེད་དོ༔ བྱང་
ཤོག་ལྷེབ་ ༣༠༡ ནས་་ ༤༠༠ བར།
ཆུབ་ཀྱི་སེམས་དེ་ནི་ལས་དང་ཉོན་མོངས་པས་ཟད་པར་བྱ་བའམ་ཉོན་མོངས་པར་མི་ནུས་སོ༔ ཞེས་གསུངས་པས༔ དེ་ལྟར་བྱང་ཆུབ་ཀྱི་སེམས་ཀྱིས་ཀུན་སློང་བཟང་པོ་དང་མ་བྲལ་ན་དགེ་བའི་བྱ་བ་ཅི་བྱས་ཚད་བྱང་ཆུབ་ཀྱི་ལམ་དུ་འགྲོ་བས་ཆོས་ལམ་དུ་སོང་བ་ཡིན༔ དེ་མེད་ན་སྟོང་ཉིད་ཀྱི་ལྟ་བ་བཟང་ཡང་ཐེག་དམན་དུ་གོལ༔ བསྐྱེད་རིམ་གསལ་ཞིང་སྔགས་ཀྱི་ནུས་པ་ཐོན་ཡང་སྲིན་པོ་དང་རཱུ་ཏྲར་གོལ༔ འདི་ཐེག་ཆེན་གྱི་རྩ་བ་དང་ཆོས་ཀྱི་གེགས་སེལ་ཡང་ཡིན༔ རྩ་བ་དེ་མ་འཕྱུགས་ན་དྲག་སྔགས་ལ་སོགས་པ་ཕྲིན་ལས་གང་སྒྲུབ་ཀྱང་སངས་རྒྱས་ཐོབ་པའི་ལམ་དུ་འགྲོ་བ་ཡིན༔ དེ་ལྟ་བུའི་སེམས་བསྐྱེད་དང་ལྡན་པར་ཕ་རོལ་ཏུ་ཕྱིན་པ་དྲུག་ལ་ཅི་ནུས་སུ་འབྲེལ་པ་འཇོག་པར་བྱ་སྟེ༔ དྲི་མ་མེད་པར་གྲགས་པ་བསྟན་པའི་མདོ་ལས༔ དབུལ་པོ་རྣམས་ནི་སྦྱིན་པས་སྡུད་དོ༔ འཆལ་བ་རྣམས་ནི་ཚུལ་ཁྲིམས་ཀྱིས་སྡུད་དོ༔ ཁོང་ཁྲོ་བ་ཅན་རྣམས་ནི་བཟོད་པས་སྡུད་དོ༔ ལེ་ལོ་ཅན་རྣམས་ནི་བརྩོན་འགྲུས་ཀྱིས་སྡུད་དོ༔ སེམས་རྣམ་པར་གཡེང་བ་རྣམས་ནི་བསམ་གཏན་གྱིས་སྡུད་དོ༔ ཤེས་རབ་འཆལ་བ་རྣམས་ནི་ཤེས་རབ་ཀྱིས་སྡུད་དོ༔ ཞེས་
གསུངས་སོ༔ དེས་ན་ཆོས་ཀྱི་སྦྱིན་པ་ནི་སྦྱིན་པའི་མཆོག་དང་༔ ཡི་དྭགས་ལ་ཆུ་གཏོར་དང་༔ དབུལ་ཕོངས་ལ་ཟས་སྦྱིན་པ་སོགས་དང་༔ ཁྱིམ་པ་ཡིན་ན་བསྙེན་གནས་རབ་བྱུང་ལ་སྡོམ་པ༔ སྔགས་པ་ལ་དམ་ཚིག་སོགས་ཚུལ་ཁྲིམས་དང་༔ ཆོས་བྱེད་པ་ལ་དཀའ་ཚེགས་བཟོད་པ་དང་༔ གནོད་པ་ལ་བསྲན་པའི་བཟོད་པ་དང་༔ ལུས་ངག་ཡིད་གསུམ་ཐོས་བསམ་སྒོམ་གསུམ་ལ་བརྩོན་པ་དང་༔ བསྐྱེད་རིམ་སོགས་བསྒོམ་བྱ་གང་ཡིན་རྩེ་གཅིག་ཏུ་ནན་ཏན་བྱ་བ་དང་༔ ཐུན་མོང་གི་ཤེས་རབ་སློབ་གཉེར་དང་མདོ་རྒྱུད་ལྟ་བ་དང་༔ དོན་དམ་པའི་ཤེས་རབ་བཀའ་རྫོགས་པ་ཆེན་པོ་བསྒོམ་པ་ལ་སོགས་ལ་བརྩོན་པར་བྱེད་དགོས་སོ༔ དེ་ལྟར་བསམ་པ་རྣམ་པར་དག་པས་དགེ་བ་ཅུང་ཟད་བྱས་ཤིང་སྨོན་ལམ་བཏབ་ན་ཡང་ཕན་ཡོན་རྒྱ་ཆེན་པོ་འབྱུང་སྟེ༔ མདོ་སྡེ་མཛངས་བླུན་ནས་རྒྱ་ཆེར་གསུངས་པའི་དོན་བསྡུས་ཏེ་བཤད་ན༔ སྔོན་སངས་རྒྱས་འོད་སྲུང་གི་བསྟན་མཇུག་ཏུ་བྲམ་ཟེ་གཉིས་ཀྱིས་བསྙེན་གནས་གཅིག་བསྲུང་བའི་འབྲས་བུས་གཅིག་མིའི་རྒྱལ་པོར་སྨོན་ལམ་བཏབ་བཞིན་སྐྱེས༔ གཅིག་དེས་ལྷར་སྐྱེ་བར་སྨོན་ལམ་བཏབ་ཀྱང་༔ དེ་ནུབ་དགོང་ཟོས་
པས་ཀླུའི་རྒྱལ་པོ་ཞིག་ཏུ་སྐྱེས་ནས་ཐུབ་པ་མཇལ་ཏེ་རྒྱུན་ཞུགས་ཀྱི་འབྲས་བུ་ཐོབ་པ་དང་༔ སྔོན་རྒྱལ་པོ་ཚངས་སྦྱིན་གྱིས་མི་གཅིག་བཟུང་ནས་གསོད་པར་ཤོམ་པ་བློན་པོས་སྲོག་སྐྱབས་བྱས་ཏེ་རབ་ཏུ་བྱུང་བཅུག་པས༔ བློན་པོ་དེ་སྐྱེ་བ་ཐམས་ཅད་དུ་ལྷ་དང་མིའི་ལུས་ཕུན་སུམ་ཚོགས་པ་ཐོབ་པ་ཕྱིས་བློན་པོའི་བུར་སྐྱེས་པ་ན་གཡང་ས་དང་ཆུ་དང་དུག་དང་མདའ་ལ་སོགས་པ་གང་གིས་ཀྱང་མ་ཚུགས་ཏེ༔ ཐུབ་པ་མཇལ་ནས་དགྲ་བཅོམ་ཐོབ་བོ༔ སྔོན་མི་དབུལ་པོ་ཞིག་གིས་ཤིང་བཙོངས་པས་གསེར་གྱི་དོང་ཙེ་གཉིས་ཁུག་པ༔ སངས་རྒྱས་གསེར་ཐུབ་དགེ་འདུན་དང་བཅས་པ་ལ་ཕུལ་བས༔ བསྐལ་པ་དགུ་བཅུ་རྩ་གཅིག་ཏུ་མིར་སྐྱེས་ཤིང་༔ གར་སྐྱེས་ཀྱང་གསེར་གྱི་དོང་ཙེ་ཡོད་པར་འགྱུར། ཕྱུག་ཅིང་ལོངས་སྤྱོད་ཆེན་པོ་དང་ལྡན་ཏེ༔ ཕྱིས་རྒྱལ་པོའི་ཁབ་ཏུ་སྐྱེས་མ་ཐག་ལག་ཏུ་གསེར་གྱི་དོང་ཙེ་ཡོད་པ་དེ་བླང་ཙམ་ནས་གསེར་གྱིས་མཛོད་གང་ཡང་ལག་གི་དོང་ཙེ་མ་ཟད༔ ཐུབ་པའི་དྲུང་དུ་རབ་ཏུ་བྱུང་བས་དགྲ་བཅོམ་པ་ཐོབ་པས་དགེ་སློང་གསེར་གྱི་དབྱིག་ཅེས་བྱའོ༔ སངས་རྒྱས་གསེར་ཐུབ་ཀྱི་བསྟན་པ་ལ༔ མི་དབུལ་པོ་ཞིག་གིས་དགེ་
འདུན་བཞུགས་སར་ཕྱུགས་མ་བརྒྱབ་མེ་ཏོག་བཏུས་ནས་གཏོར་བས༔ བསྐལ་པ་དགུ་བཅུ་རྩ་གཅིག་ཏུ་གར་སྐྱེས་ཀྱང་གཟུགས་མཛེས་པ་དང་བཟའ་བཏུང་དང་ཁྲི་གདན་ཕུན་སུམ་ཚོགས་པར་གྱུར༔ ཕྱིས་མཉན་ཡོད་ན་ཁྱིམ་བདག་ཆེ་ཞིང་མཐོ་བའི་བུར་སྐྱེས་མ་ཐག་མེ་ཏོག་གི་ཆར་བབ༔ ཐུབ་པ་སྤྱན་དྲངས་ནས་རིན་པོ་ཆེའི་ཁྲི་གདན་དང་ཞལ་ཟས་ཐམས་ཅད་བསམ་པ་ཙམ་ནས་བྱུང་༔ རབ་ཏུ་བྱུང་བས་དགྲ་བཅོམ་པ་ཐོབ་བོ༔ བསམ་པ་དག་ན་དགེ་བ་ཆུང་ངུ་རེ་ལའང་དེ་ལྟར་འབྱུང་བ་ཡིན༔ ཡང་སྔོན་སངས་རྒྱས་གསེར་ཐུབ་ཀྱི་བསྟན་པ་ལ༔ མི་དབུལ་པོ་ཞིག་གིས་རྡེའུ་དཀར་རྒྱུ་ལས་བྱས་པའི་ནོར་བུ་སྤར་གང་དགེ་འདུན་ལ་གཏོར་ནས་སྨོན་ལམ་བཏབ་པས༔ བསྐལ་པ་དགུ་བཅུ་རྩ་གཅིག་ཏུ་ནོར་བུ་དང་ཟས་གོས་ལོངས་སྤྱོད་ལྷུན་གྱིས་གྲུབ་པར་གྱུར་ཏེ༔ མཉན་ཡོད་དུ་ཁྱིམ་བདག་གི་བུར་སྐྱེས་མ་ཐག༔ ནམ་མཁའ་ནས་རིན་པོ་ཆེ་སྣ་བདུན་ཆར་བཞིན་བབས་ནས་ཁྱིམ་གང་༔ རབ་ཏུ་བྱུང་བས་དགྲ་བཅོམ་པ་ཐོབ་བོ༔་ཡང་སངས་རྒྱས་བསོད་སྐྱབས་བཞུགས་པའི་ཚེ༔ དགེ་སློང་གཅིག་དགེ་བསྐུལ་བྱོན་པ་ན༔ བུད་མེད་ཁྱོ་ཤུགས་གཉིས་ལ་རས་ཡུག་གཅིག་
ལས་གོས་སོགས་ཅི་ཡང་མེད་པ་དེ་ཕུལ་བས༔ རྒྱལ་པོ་དང་བཙུན་མོས་ཁོང་གཉིས་ལ་གོས་རྒྱན་ཕུད་དེ་གནང་ངོ་༔ བསྐལ་པ་དགུ་བཅུ་རྩ་གཅིར་ཀྱང་རས་གོས་དང་བཅས་ཏེ་སྐྱེས་ཤིང་ལོངས་སྤྱོད་དང་ལྡན་ནོ༔ མཉན་ཡོད་དུ་ཁྱིམ་བདག་གི་བུ་མོ་ལྟ་བས་ཆོག་མི་ཤེས་པ་སོགས་དང་བཅས་པར་སྐྱེས་ཏེ༔ སྟོན་པ་ལ་དགེ་སློང་མར་ཞུས་ནས་དགྲ་བཅོམ་པ་ཐོབ་བོ༔ ཡང་རྒན་མོ་དབུལ་ཕོངས་འཆི་མ་ནུས་ཤིང་ངུ་བ་ཞིག་གིས༔ འཕགས་པ་ཀ་ཏ་ཡ་ན་ལ་ཆུ་ལྟུང་བཟེད་གང་ཕུལ་ནས༔ ཆོས་དང་བསྔོ་བ་ཤོ་ལོ་ཀ་རེ་གནང་བས༔ དེ་སུམ་ཅུ་རྩ་གསུམ་པའི་ལྷར་སྐྱེས་ནས་འཁོར་ལྔ་བརྒྱ་དང་བཅས་ཀ་ཏ་ཡ་ན་ལས་ཆོས་ཞུས་པས་འབྲས་བུ་ཐོབ་བོ༔ དེས་ན་བསམ་པ་རྣམ་པར་དག་པ༔ བསོད་ནམས་བསགས་པ་ལ་འབད་ཅིང་ཁྱད་པར་དུ༔ མཎྜལ་དང་བྱང་ཆུབ་སེམས་བསྐྱེད་ལ་འབུངས་མཛོད༔ དེས་ཆོས་འབྲུ་གཉིས་པའོ༔ ལས་ནས་ཆོས་འབྲུ་གསུམ་པ་ནི༔ གཞུང་ལས༔ ཁྱོད་ཀྱི་བདེ་སྐྱིད་དགེ་བ་རྣམས༔ སེམས་ཅན་རྣམས་ལ་ཐིམ་པར་བསྒོམས་སེམས་ཅན་སྡུག་བསྔལ་སྡིག་སྒྲིབ་རྣམས༔ ཁྱེད་
ཀྱི་ལུས་ལ་སིབ་སིབ་ཐིམ༔ བསམ་ཞིང་ཡིག་བཅུ་བརྗོད་པར་བྱའོ་ཞེས་གསུངས་པའི་དོན་ཚིག་དང་པོ་གཉིས་ཀྱིས་བྱམས་པ༔ ཕྱི་མ་གཉིས་ཀྱིས་སྙིང་རྗེ༔ རྗེས་མས་བྱམས་སྙིང་རྗེའི་སྙིང་པོ་བསྟན་པ་སྟེ༔ དེ་དག་གི་དོན་རྒྱས་པར་བཤད་པ་ནི༔ དཀོན་མཆོག་བརྩེགས་པའི་མདོ་ལས་མཆོད་པ་ཇི་སྙེད་ཚད་མེད་པ༔ ཞིང་གི་བྱེ་བ་ཁྲག་ཁྲིག་ཏུ་སྐྱེས་བུ་མཆོག་ལ་མཆོད་པས་ཀྱང་༔ བྱམས་པའི་སེམས་ལ་ཆར་མི་ཕོད༔ ཅེས་དང་༔ ལྷ་མི་བྱམས་པར་འགྱུར་བ་དང་༔ དེ་རྣམས་ཀུན་གྱིས་སྲུང་བ་དང་༔ ཡིད་བདེ་བ་དང་བདེ་མང་དང་༔ དུག་དང་མཚོན་གྱི་གནོད་པ་མེད༔ འབད་པ་མེད་པར་ཐོབ་པ་དང་༔ ཚངས་པའི་འཇིག་རྟེན་སྐྱེ་གྱུར་ཏེ༔ གལ་ཏེ་གྲོལ་བར་མ་གྱུར་ཀྱང་༔ བྱམས་ཆོས་ཡོན་ཏན་བརྒྱད་ཐོབ་བོ༔ ཞེས་དང་༔ ཐར་པ་ཆེན་པོའི་མདོ་ལས༔ གང་ཞིག་འཇིག་རྟེན་རྣམ་དག་ཏུ༔ བསྐལ་པ་གཅིག་གི་བར་དག་ཏུ༔ ཚུལ་ཁྲིམས་རྣམ་དག་བསྲུང་བ་བས༔ སྐྱེས་བུ་གཅིག་གིས་སྐད་ཅིག་ཏུ༔ བྱམས་པའི་སྤྱད་པ་སྤྱོད་པའི་མཆོག༔ གང་ཞིག་འཇིག་རྟེན་ཁམས་འདི་རུ༔ ལུས་ངག་ཡིད་ཀྱི་སྡིག་སྤྱོད་པ༔ ངན་སོང་གསུམ་
དུ་ལྟུང་ངེས་ཀྱང་༔ བྱམས་པའི་སེམས་དེས་འཕྲལ་དུ་འབྱོངས༔ ཞེས་དང་༔ མདོ་རྒྱ་ཆེར་རོལ་པ་ལས༔ བྱང་སེམས་ལྡན་ལ་དུག་དང་མཚོན་མི་ཚུགས། རོ་ལངས་དང་ནི་འཇིགས་པ་གཞན་མི་འབྱུང་༔ བྱང་སེམས་ལྡན་ལ་གཞན་གྱིས་གནོད་མི་འགྱུར༔ དཔུང་བཅས་བདུད་རྣམས་རྒྱལ་མཚན་སྡེར་བཅས་པ༔ ནག་པོའི་རྩ་ལག་བྱམས་པའི་སྟོབས་ཀྱིས་འཇོམས༔ བླ་མེད་བྱང་ཆུབ་ཞི་བར་འཚང་ཡང་རྒྱ༔ ཞེས་དང་༔ རིན་ཆེན་ཕྲེང་བར༔ རྗེའུ་ཚོད་སུམ་བརྒྱའི་ཁ་ཟས་དག༔ ཉིན་རེ་དུས་གསུམ་བྱིན་པས་ཀྱང་༔ བྱམས་པ་ཡུད་ཙམ་ཐང་གཅིག་གིས༔ བསོད་ནམས་དག་ལ་ཆར་མི་ཕོད༔ ཅེས་དང་༔ འཇམ་དཔལ་ཞིང་གི་བཀོད་པ་ལས༔ བྱང་ཤར་གྱིས་མཚམས་ན་སངས་རྒྱས་དབང་ཕྱུག་ཆེན་པོའི་རྒྱལ་པོའི་འཇིག་རྟེན་གྱི་ཁམས་སྟོང་གིས་བརྒྱན་པ་ཞེས་བྱ་བ་དེ་ན༔ དགེ་སློང་འགོག་པ་ལ་ཞུགས་པའི་བདེ་བ་བཞིན་དུ་སེམས་ཅན་ཐམས་ཅད་ཀྱང་བདེ་བ་དང་ལྡན་ནོ༔ དེར་ལོ་བྱེ་བ་བརྒྱ་སྟོང་དུ་ཚངས་པར་སྤྱད་པ་སྤྱོད་པ་བས་ནི༔ ཞིང་འདིར་ཐ་ན་སེ་གོལ་ཏོག་པའི་ཡུན་ཙམ་དུ་སེམས་ཅན་ཐམས་ཅད་ལ་བྱམས་པའི་སེམས་
བསྐྱེད་ན༔ སྔ་མ་ལས་བསོད་ནམས་ཆེས་མང་དུ་བསྐྱེད་ན༔ ཉིན་མཚན་དུ་གནས་པ་ལྟ་ཅི་སྨོས༔ ཞེས་གསུངས་པས༔ བྱམས་པ་བསྒོམ་པའི་ཕན་ཡོན་མཐའ་ཡས་ཤིང་བྱམས་པ་ལ་བརྟེན་ནས་སྙིང་རྗེ་སྐྱེ༔ སྙིང་རྗེ་ལ་བརྟེན་ནས་བྱང་ཆུབ་ཀྱི་སེམས་སྐྱེ༔ བྱང་ཆུབ་ཀྱི་སེམས་ལ་བརྟེན་ནས་འཚང་རྒྱ་བ་ཡིན་ནོ༔ གཉིས་པ་སྙིང་རྗེའི་ཕན་ཡོན་ནི༔ རྣམ་སྣང་མངོན་པར་བྱང་ཆུབ་པའི་རྒྱུད་ལས༔ གསང་བའི་བདག་པོ་རྣམ་པ་ཐམས་ཅད་མཁྱེན་པ་ཉིད་ཐོབ་པའི་རྩ་བ་ནི་སྙིང་རྗེ་ཆེན་པོའོ༔ རྒྱུ་ནི་བྱང་ཆུབ་ཀྱི་སེམས་སོ༔ ཞེས་དང་༔ སྡུད་པ་ལས༔ མི་ཡི་འཇིག་རྟེན་འབྱུང་པོའི་གདོན་དང་ནད་མང་བ༔ ཕན་དང་སྙིང་བརྩེར་ལྡན་པའི་བྱིན་གྱིས་མེ་ཡི་ཕུང་པོ་ནི༔ ཞེས་དང་༔ སྙིང་རྗེ་པད་དཀར་ལས༔ བྱང་ཆུབ་སེམས་དཔའ་ཆོས་གཅིག་དང་ལྡན་ན༔ དེའི་ལག་ཏུ་སངས་རྒྱས་ཀྱི་ཆོས་ཐམས་ཅད་མཆིས་པར་འགྱུར་ཏེ༔ ཆོས་གཅིག་པོ་དེ་གང་ཞེ་ན༔ འདི་ལྟ་སྟེ་སྙིང་རྗེ་ཆེན་པོའོ༔ དེ་ལྟ་བུ་ཐེག་ཆེན་གྱི་རྩ་བ་གསང་སྔགས་ཀྱི་གཞི་བྱམས་སྙིང་རྗེ་བསྒོམ་པའི་ཚུལ་ནི༔ ཨོ་རྒྱན་རིན་པོ་ཆེའི་ཞལ་ནས༔ སྙིང་རྗེ་བྱམས་པའི་གཙོ་བོ་ནི་ལུས་བསྐྱེད་པའི་
མ་ཡིན་ལ༔ དེའི་དྲིན་ནི་འཁོར་བའི་ཚད་མེད་མུ་མེད་པས་འདི་ལ་བྱམས་སྙིང་རྗེ་ཚད་མེད་པ་བསྒོམ་སྟེ༔ ཐོག་མར་ང་ཡི་མ་སྡུག་མ་འདི༔ བདག་ལུས་ལ་ས་ལྟོ་ཟོས་ཀྱང་ཁོག་པར་མི་ཤོང་༔ མ་ཟོས་ཀྱང་སྦོས་ནས་རྒྱང་ངེ་བྱས༔ ཁས་ཧུས་འདེབས་མཆུ་སྐམ་སྲིད༔ སྣ་དྲག་ཆོམ་མེ་བྱས་གདོང་པ་བཀྲག་མེད་སྐྱ་ཧད་དི༔ ལུས་དང་རིག་པ་གཉིས་ཀ་ཤེད་ཆགས༔ རྐང་ལག་ཕྲ་ཉད་ཉད་བྱས་པས་འོ་རེ་བརྒྱལ༔ ངའི་མ་འདི་སྙིང་རེ་རྗེ་བསམ་པ་སྙིང་ནས་བསྒོམ༔ དེ་ནས་ཡང་ཆེར་རེད་པ་དང་༔ ལས་བྱས་དུས་ངལ་དུབ༔ སྐོམ་རྐན་ཅུང་ཟད་རེ་བྱུང་དུས་ཀྱང་དབུགས་བརྣངས་པ་ཙམ་འོང་༔ རྐང་ལག་རུས་ཚིགས་ན༔ ཡར་མི་འོང་མར་སྐྱུགས་ཐབས་སུ་སྡོད༔ དགྱེ་དགུ་མི་ཤེས་ད་རུང་ལུས་ཀྱི་སྤྱོད་ལམ་དྲག་ལས་ཐམས་ཅད་ང་ལ་གནོད་ཀྱིས་དོགས་ནས་ཟོན་ཆེན་པོ་བྱེད༔ འགུལ་བ་མ་ཚོར་ན་ངའི་དེ་ཅི་ཉེས་ཤིའམ་སྙམ་སྡུག་བསྔལ་བྱེད་པ་སྙིང་རེ་རང་རྗེ་དྲིན་རེ་རང་ཆེ་ན་བསམ༔ དེ་ནས་སྐྱེ་ནད་ཀྱིས་ཟིན་རྐང་ལག་རུས་ཚིགས་ཐམས་ཅད་བྲལ་ནས་ཞིག༔ རོ་སྨད་ཆད་འགྲོ་བ་ཙམ་བྱས་ཁོ་ཏང་ཏང་༔ སྐ་རེའི་རྩེ་ནས་རྡུལ་རེ་
ཐིགས༔ མི་ཚུག་པར་འགྲེ་ལོག་ལོག༔ ཨ་ཚ་ཨ་ནའི་སྐད་ཙིར་ཙིར་སྔས་ལ་སེན་མོ་ཐམ་ཐམ་རུས་པ་ཚིག་མིག་ཐམས་ཅད་ཞིག་པའི་ངང་ལ་སྐྱེ་བ་སྙིང་རེ་རྗེ་ན༔ དེ་ནས་ཉལ་སྟན་ཁར་བྲུལ་དུས་རང་ནད་ཟུག་དེ་འདྲ་བའི་ཁུད་ནས་ཀྱང་སྙིང་གིས་མ་ཚུགས་པར༔ ཙན་གྱིས་བླང་ནས་བྲང་ལ་གཅར༔ ད་རུང་གཉིད་བདེ་མོར་ཉལ་མི་ནུས་ངའི་དེ་སུབ་བམ་ཅི་ཉེས་སམ་སྙམ༔ ཙིར་བ་རེ་ངུས་ན་ཡང་ནའམ་ཚའམ་འདྲེ་བྱུང་ངམ་ཅི་ཉེས་སམ་འཆིའམ་སྙམ༔ སྙིང་ལ་ལྷང་ལྷང་གཅིན་རྟག་ཚོ་ལག་གིས་ཕྱགས༔ སྣབ་ཁས་འཇིབས༔ ཁ་ལ་གླན་བྲང་ལ་གཅར་ནས་བརྩེ་བ་དེ་ཙམ་གྱི་སྐྱོང་བའི་མ་སྡུག་མ་འདི་སྙིང་རེ་རང་རྗེ་ན༔ དྲིན་རེ་ཆེ་ན་བསམ་དུ་བསྒོམ༔ ད་དུང་དུ་ལྟོ་ཁས་སྙོད་ཞིམ་དགུ་ང་ལ་བྱིན་ནས་མ་སྡུག་སྲན་ཚད་སྲན༔ འཇམ་དགུ་ང་ལ་བསྐོན་ལས་བྱེད་འཕྲོ་ལའང་ང་ཡི་དེ་ལྟོགས་སམ་སྐོམ་མམ་འཁྱགས་སམ་ལྷུང་ངམ་ཆུར་ཚུད་དམ་ཅི་ཉེས་སྙམ་ནས་ལུས་ངལ་དུབ་རུང་རྒྱུག་ནས་ཁ་ལ་ཁ་སྤུན༔ ལྟོ་སྐོམ་བྱིན་ལབ་དང་གོ་རྒྱུ་མེད་ཀྱང་གཏམ་མང་པོ་ལབ་བརྩེ་བ་དེ་ལྟ་བུས་བསྐྱངས་པ་སྙིང་རེ་རྗེ་བསྒོམ༔ ད་དུང་དུ་ཅུང་ཟད་མ་བདེ་ན༔ སྙིང་འདར་ཐུག་གེ་ཁ་
ནག་ཀད་དེ༔ རིམ་གྲོ་སྨན་བཅོས་བྱེད༔ ན་སོགས་བྱུང་ན་ཅི་དྲག་ལ་ཐུག༔ འདི་སོས་ན་ཅི་སྟེར་ཅི་བྱེད་སྤྲང་དགོས་བྱུང་ན་བྱུང་སྙམ༔ པྲད་ཕྲད་ཅི་ཕན་ཅི་དྲག་དེ་ལྟ་བུས་བསྐྱངས་པ་སྙིང་རེ་རྗེ་ན༔ བདག་གི་དྲིན་གྱིས་གཞལ་ཐབས་གང་གི་བདེ་བ་ལ་སྐྱར་སྙམ་དུ་སྙིང་ནས་བསྒོམ༔ ཡང་བདག་གི་ཕ་མ་དྲིན་ཅན་འདིས་བདག་གི་དོན་དུ་ངའི་བུ་བུ་མོ་འདི་ཀུན་ནོར་གོས་གཞིས་གྲགས་པ་གཅིག་མ་བྱུང་དོགས༔ ལྟོགས་འཁྱག་ལ་མ་བརྩིས༔ ངལ་དུབ་ལ་མ་བརྩིས༔ གཏམ་དང་ངོ་ཚ་ལ་མ་བརྩིས༔ དོན་ལ་སྲོག་ལ་མ་བརྩིས་པར་ངའི་དོན་གཅིག་པུར་འབུངས་བ་སྙིང་རེ་རྗེ་དྲིན་རེ་ཆེ༔ དེར་མ་ཟད་བདག་གི་ཕྱིར་སྐྱིད་སྡུག་དཀའ་སྤྱད་ཅི་ཙམ་བྱས༔ ཁྱད་པར་དུ་ངའི་ལུས་ལ་འབུ་ལུག་འདྲ་བ་དེ་ད་དྲན་ཤེས་སྟོབས་དང་ལྡན་པར་གསོས་པས༔ ཡུལ་ཆོས་ལྡན་དུ་སྐྱེས་ད་ལྟ་རྒྱུ་འབྲས་ངོ་ཤེས་བླ་མ་སངས་རྒྱས་དང་འཕྲད༔ ད་ཆོས་བྱར་ཡོད་པ་འདི་ལྟ་བུའི་དྲིན་གྱིས་བསྐྱངས་པའི་ཕ་མ་དྲིན་རེ་ཆེ༔ སྙིང་རེ་རྗེ་སྙམ་དུ་ཡང་ཡང་བསྒོམ༔ ཞེས་གསུངས་པ་ལྟར་བསྒོམ་མོ༔ དེ་ཡང་སེམས་ཅན་ཐམས་ཅད་མ་མ་བྱས་པ་གཅིག་ཀྱང་མེད༔ དེ་ཡང་ལན་
གཅིག་མ་ཡིན་ཏེ་གྲངས་མེད༔ མ་བྱས་རིང་གི་ད་ལྟའི་མ་དང་འདྲ་བར་དྲིན་ཆེ་སྟེ༔ འཁོར་བ་ཐོག་མ་མེད་པའི་མདོ་ལས༔ རེ་རེའི་བདག་ཉིད་རུས་པའི་ཕུང་པོ་ནི༔ ལྷུན་པོ་མཉམ་པ་རྙེད་ཅིག་འདས་གྱུར་ཀྱང་༔ མ་ཡི་ཐོག་མཐའ་རྒྱ་ཤུག་ཚི་གུ་ཙམ༔ རིལ་བུ་བྱས་ཀྱང་ས་ཡིས་ལོང་མི་འགྱུར༔ ཞེས་དང་༔ གང་གིས་བདག་གི་མ་བྱས་ཤིང་༔ མ་ཡི་ནུ་ཞོ་འཐུང་བ་ཙམ༔ རྒྱ་མཚོ་བཞི་ཡི་ཆུ་ལའང་མེད༔ གང་གིས་བདག་གི་ཕ་བྱས་ཤིང་༔ རྟ་དང་གླང་པོ་བྱིན་པ་ཡང་༔ ཚངས་པའི་འཇིག་རྟེན་ལས་ཀྱང་ཐལ༔ ཞེས་དང་༔ སྤྱོད་འཇུག་ལས༔ གང་གིས་ལྟོར་མ་ཉལ་བའི་སེམས་ཅན་གཅིག་མེད་ཅིང་༔ གང་གི་ནོར་རྫས་བྱིན་དང་བསྲུང་ལ་སོགས༔ བདག་གི་དོན་དུ་དཀའ་བ་མ་སྤྱད་སེམས་ཅན་ནི༔ གཅིག་ཀྱང་མེད་ཕྱིར་ཀུན་ལ་སྙམ་པར་བྱ༔ ཞེས་གསུངས་པའི་ཕྱིར་སེམས་ཅན་ཐམས་ཅད་ཕ་མ་ཤ་སྟག་ཡིན་པས་དེ་ཐམས་ཅད་ལ་བྱམས་སྙིང་རྗེ་བསྒོམ་དགོས་ཏེ༔ བསྒོམ་ལུགས་ནི་ཨོ་རྒྱན་རིན་པོ་ཆེས་གསུངས་པ༔ དབེན་པར་མཉམ་བཞག་ཐལ་འགེལ་ཕྱག་རྒྱ་་་མྱ་ངན་ཕྱག་རྒྱ་ཡིན་ནོ༔ རྐང་གཡས་བསླང་བའི་སྟེང་གྲུ་མོ་བཙུགས་པས་འདན་པ་སྐྱོར།
རྐང་གཡོན་བསྙལ༔ བྱས་ལ༔ ངན་སོང་གསུམ་གྱི་སྡུག་བསྔལ་ལ་བྱམས་དང་སྙིང་རྗེ་བསྒོམས་ཏེ༔ ཀྱེ་མ་ཚ་བའི་དམྱལ་བ་ལ༔ ལྕགས་ཁང་སུམ་རིམ་གྱི་ནང་དུ་ཕྱོགས་བཞི་ནས་མེ་ཆེན་པོ་འབུད་ཅིང་ལོ་གྲངས་མེད་པར་བསྲེགས་ཤིང་ལུས་ནག་རུལ་རུལ་དམར་ཁོག་ཁོག་སོང་རུང་ལས་ཀྱིས་འཆི་རྒྱུ་མེད་པར༔ ཕ་འབོད་མ་འབོད་བཟའ་རོགས་བུ་ཚ་ཉེ་རིང་ལ་འབོད༔ ཨ་ཙ་མ་རིང་རིང་བྱེད་ཀྱང་ཕན་པ་མེད༔ བྱ་ཐབས་མེད་པར་སྙིང་རེ་རང་རྗེ་ན༔ ངས་ཐབས་གང་གིས་ཕན་ན་སྙིང་རེ་རང་རྗེ་ན༔ ཡེང་གྲང་བའི་དམྱལ་བ་ནི་གངས་སྟོང་རི་བྲག་འཁྱག་ཁྲོད་ཆུ་གླིང་རྣམས་ན་ལུས་འཁྱགས་ཚལ་པར་གས༔ ནང་ཁྲོལ་ཕྱིར་ཐོན་འཁྱགས་རུམ་རུམ་ཚེར་ཚེར༔ དོན་སྙིང་རྣམས་ཚལ་པར་ཤིག་ཤིག༔ ཁ་འཐམ་སོ་འགྲིགས་ཁྲུ་རེ་ཙམ་འཕར་ཞིང་འདར༔ མིག་སྐྱ་ལོག་ལོག་པ་ལ་སྐབས་སུ་ཨ་ཤུ་ཨ་ཙ་མ་ཙིར་ཙིར་ལ༔ ལོ་དང་ཁུང་མེད་བསྐལ་བར་སྡོད་དགོས་པ་སྙིང་རེ་རང་རྗེ་ན༔ ཐབས་གང་གིས་ཕན་པར་ནུས་ན་བསམ་བདག་གི་ཤུལ་ཞིག་ཞུགས་ནུས་པའི་སྙིང་རྗེ་དྲག་པོ་ཁ་ཙམ་མིན་པར་བསྒོམ་མོ༔ དེ་ལ་སོགས་པ་ཤལ་མ་རིའི་སྡོང་པོ་དང་
ཐལ་ཚན་རབ་མེད་རལ་གྲིའི་ནགས་ཚལ༔ ཡང་ཤི་ཡང་སོས་ལ་སོགས་ཆོས་སྤྱི་ལྟར་སྤོས་ཏེ་བྱེད་ན་བླ་མས་ཤེས་པར་བྱའོ༔ དེ་ནས་ཡང་ནི་ཡི་དྭགས་ཀྱི་སྡུག་བསྔལ་ལ་སྙིང་རྗེ་བསྒོམས་ཏེ༔ ཡི་དྭགས་ནི་ལུས་ཀྱི་བབ་ཁང་པ་ཆེན་པོ་ཙམ་མགོ་རྫ་ཟོམ་ཙམ༔ གྲེ་བ་ཁབ་ཙམ་ཟས་བསྐལ་པར་མི་རྙེད་ཅིང་སྡུག་བསྔལ༔ བཀྲེས་སྐོམ་པས་ཕྱོགས་ཀུན་ཏུ་རྒྱུག༔ བརྒྱ་ལམ་རྙེད་ཀྱང་རྐེ་ལ་མི་འགྲོ༔ ཅུང་ཟད་ཙམ་སོང་ཡང་ཁོག་པ་ནས་ཁྲོ་ཆུར་སོང་བས་མེ་འབར་ནས་དེ་བས་ཀྱང་སྡུག་བསྔལ་ཆེ་བ་སྙིང་རེ་རང་རྗེ་བསམ་དུ་མ་ཡེངས་པར་བསྒོམས༔ ཡང་ཟས་དང་ཆུའི་དྲི་དང་སྐད་ཚོར་ནས་ལུང་པ་མང་པོར་ཉིན་མཚན་ལོ་ཟླར་བཙལ་ཡང་མི་རྙེད་པར་ཤིན་ཏུ་ཡང་ལུས་དུབ་སྡུག་བསྔལ་ཆོ་ངེས་འདེབས་ཤིང་ཤར་འཆིར་མི་བཏུབ་པ་སྙིང་རེ་རང་རྗེ་ན་ཅི་རང་ཕན་ན་བསམ་མི་ཚུགས་པ་བསྒོམ་སྟེ༔ ཡང་རིགས་གཅིག་ནི་བསྒྲེས་སྐོམ་ཉམ་ཐག་ཕྱོགས་མཐའ་དག་ཏུ་སོང་བས་རྒྱང་རིང་པོ་ནས་ཟས་མཐོང་བས༔ ལྟོགས་སྐོམ་ངལ་དུབ་དུབ་རྩར་ཕྱིན་པ་དང་མེ་དཔུང་དང་མཚོན་ཆ་ཐོགས་པས་བསྲུངས་ནས་མི་ཐོབ་དེ་ཡི་མུག་ཟུང་དང་བྲལ་བརྒྱལ་ནས་འགྲོ༔ ཡང་ཆུ་མཐོང་
ནས་འགྲོ་རྒྱུ་མེད་བཞིན་བསྙགས་བསྙགས་པས་སླེབས་པ་དང་རྣག་ཁྲག་རེད་པ་དང་༔ ཡང་ས་འོག་ཏུ་ཐིམ་སྐད་ཐོས་པ་ཉན་ཞིང་ལག་པས་བྲེད་པས་མཇུག་མགོ་རུས་པ་ལ་ཐུག་པར་བྲད་ཀྱང་ཇེ་དམར་སོང་ཁོག་པ་ནི་སྐོམ་ཁ་ནས་ནི་མེ་འབར་ཤིན་ཏུ་སྡུག་བསྔལ་བ་ལ་འཆིར་མི་བཏུབ་པ་ལོ་དང་བསྐལ་པར་སྡོད་པ་སྙིང་རེ་རང་རྗེ་ན་བསམ་དུ་སྙིང་ནས་བསྒོམ༔ དེ་ནས་ཡང་དུད་འགྲོ་ལ་སྙིང་རྗེ་བསྒོམ་པ་ནི༔ ཡང་དུད་འགྲོའི་རིགས་འདི་དག་མ་རིག་པ་གཏི་མུག་གིས་སྨྲས་པའི་གཏམ་མི་གོ༔ དཀོན་མཆོག་གསུམ་གྱི་སྒྲ་མི་གྲགས༔ རྨོས་རྨོ་སྤུ་བྲེག་རྒས་འཁོག་ཀྱང་མི་ཐེག་པའི་ཁལ་འགེལ༔ འཕོངས་ཤ་བརྩོགས་རུས་པ་བརྩོགས་སུ་བརྡུང་༔ རྐེད་པ་ཉག་ཉག་འཕང་ཅོག་ཅོག་འུ་ཐུག་ནས་འགྱེལ༔ ཉལ་རུང་རང་དབང་མེད་པར་བརྡུང་བ་སྙིང་རེ་རང་རྗེ་ན་སྙམ་དུ་སྙིང་ནས་བསྒོམ༔ ཡང་རིགས་གཅིག་ནི་ནད་ཅུང་ཟད་དེ་ཙམ་མེད་པར་ཧྲིལ་གྱིས་བསྒྲིལ༔ སྟེང་དུ་ཞོན་སྙིང་ལ་གྲི་རྒྱག་སུག་བཞི་ཡོབ་ཡོབ༔ ཁ་ཏང་ཏང་མིག་སྐྱ་ལོག་ལོག་བྱེད་སྔངས་ན་ཚ་ནི་ཆེ་བྱ་ཐབས་ནི་མེད༔ སྒེ་ཁུག་ཁུག་འཆི་དགོས་པ་ཨ་ཙ་མ་ན་སྙིང་རེ་རང་རྗེ་ན་སྙམ་དུ་མི་བཟོད་པ་
བསྒོམ༔ ཡང་རི་དྭགས་རྣམས་ནི་མི་ཁྱི་མང་པོས་རི་མེད་ཀླུང་མེད་དུ་དེད་ཤ་ཆད་སྤུ་ཆད་བྲེད་སྔངས༔ སྙིང་གས་པར་བྲོས་ཀྱང་གསོད༔ ཡང་འགའ་ཞིག་ནི་གཞོན་ནས་མ་རྒས་བར་དུ་རྨོས་རྨོ༔ སྤུ་དང་ཞོ་བྱིན་བཟའ་ཁྱིམ་གང་དཀར་མེ་རེ་སྣུམ་ཧྲུག་གེ་བསྐྱངས་བའི་ལན་ཏུ་རྒས་པ་དང་བཙོང་༔ རང་ཡུལ་གྱི་འདུ་ཤེས་སྐྱེས་ནས་བྲོས་འོང་ཡང་བརླག་གོ༔ ཡང་རྒས་ནས་ཁ་བྲ་བེད་མེད་ཟེར་ནས་དྲིན་མ་དང་མཉམ་ཡང་གསོད༔ ལར་སྡུག་བསྔལ་རྣམས་སྣ་རེ་ནས་བསམ་ཡང་སྙིང་རེ་རང་རྗེ་ན་བསམ་དུ་བསྒོམ༔ དེ་ནས་བྱིངས་ལ་གནས་པ་དུད་འགྲོ་ལ༔ རི་རབ་ཀྱི་ཟོམ་དང་ཕྱིའི་རྒྱ་མཚོ་རྣམས་ན་ཆེ་བས་ཆུང་བ་ཐམས་ཅད་ཧབ་རེ་ལ་ཟ༔ ཆུང་བ་ཐམས་ཅད་ཀྱིས་ཆེ་བ་ལ་རུབ་ནས་ཟ༔ གཏི་མུག་ཉིན་མཚན་ངོ་མི་ཤིས་སྨྲ་མི་ཤེས་དོན་མི་གོ༔ སླར་ཡང་སྡུག་བསྔལ་མཐའ་མེད་དུ་འཁྱམས་པ་སྙིང་རེ་རང་རྗེ་ན་སྙམ་པ་བསྒོམ༔ དེ་ལྟར་རིགས་དྲུག་གི་སྡུག་བསྔལ་རྣམས་ལ་རང་གི་ཕ་དང་མར་མ་གྱུར་པ་མི་གཅིག་ཀྱང་མེད་ན༔ མ་རིག་པ་འདི་རྣམས་སྙིང་རེ་རང་རྗེ་ན༔ ཚེ་སྟོད་ཀྱི་བུ་ཚེ་སྨད་ཀྱི་དགྲ་ཚེ་སྟོད་དགྲ་ཚེ་སྨད་ཀྱི་བུ་ཚ༔ དེ་བཞིན་དུ་ཚེ་སྟོད་ཀྱི་ཕ་མ་ཚེ་སྨད་ཀྱི་
དགྲ༔ གནས་སྐབས་ཀྱི་དགྲ་གཉེན་ཅི་ལྟར་བཟུང་རུང་ཐམས་ཅད་བདག་གི་ཕ་མར་མ་གྱུར་པ་ནི་མེད༔ དེ་བས་སེམས་ཅན་རེ་རེས་ཕ་མ་བྱས་པ་ཡང་གྲངས་མེད་ན༔ བདག་གི་ཕ་མ་དྲིན་ཆེན་འདི་རྣམས་ཐབས་གང་གིས་བདེ་བ་ལ་སྦྱར༔ ངན་སོང་གི་སྡུག་བསྔལ་ལ་རྟག་ཏུ་སྤྱོད་པའི་ཕ་མ་དྲིན་ཆེན་རྣམས་སྙིང་རེ་རྗེ༔ སྙིང་རེ་རང་རྗེ་སྙམ་དུ་ཡང་ཡང་བསྒོམ་མོ༔ དེའི་ཚེ་སྙིང་རྗེ་དང་བྱང་སེམས་མ་སྐྱེས་ན༔ རང་ལ་ཞེ་ཁྲེལ་བདའ་སྟེ༔ ཁྱོད་ཀྱིས་སྤྱིར་ཕ་མ་རིགས་དྲུག༔ སྒོས་སུ་ད་ལྟའི་ཕ་མ་དྲིན་ཆེན་འདི་ཀུན་གྱིས་དཀའ་བ་དང་དྲིན་དེ་ཙམ་གྱིས་བསྐྱངས་རུང་ཁྱོད་ཞེ་ཐག་པའི་བྱམས་པ་དང་སྙིང་རྗེ་མི་སྐྱེ་བ༔ ཁྱོད་འདྲ་བ་གདིང་མེད་པོ་ཁྲེལ་མེད་པོ་ངོ་ཚ་མེད༔ ཕྱི་ཐག་མེད༔ དྲན་དུ་མི་བཟོ་ཁ་ཆོས་ཞེ་ངན་པོ༔ ཁྱོད་རེ་སྡུག་ཞེ་རེ་ཁྲེལ་ལས་རེ་ངན་དཀོན་མཆོག་གིས་རེ་ཁྲེལ་བྱས་ལ༔ སྙིང་ནས་བྱམས་སྙིང་རྗེ་བསྒོམ༔ ཞེས་གསུངས་པ་ལྟར་དུ་བསྒོམ་སྟེ༔ དེ་ཡང་མན་ངག་གི་བསྒོམ་ལུགས་ནི་སེམས་ཅན་ཚོགས་མ་བསགས་པ་ལ་ལ་དག༔ ད་ལྟ་རྩ་བའི་ཕ་མ་ལ་སྙིང་རྗེ་མི་སྐྱེ་བས༔ རང་ལ་ཡིད་མཐུན་པའི་མི་ཞིག་ལ་དམིགས་
ནས་བྱམས་སྙིང་རྗེ་བསྒོམས་པས་སྐྱེ་སླ༔ དེ་ནས་རྩ་བའི་མ་ལ་བསྒོམ༔ དེ་ནས་ཕ་ལ་བསྒོམ༔ དེ་ནས་ཉེ་དུ་ཤ་བརྩེ་བ་རྣམས་ལ༔ དེ་ནས་མཐུན་ཕྱོགས་ཐམས་ཅད་ལ༔ དེ་ནས་ས་ཕྱོགས་གཅིག་པ་ལ༔ དེ་ནས་བོད་ཁམས་ཐམས་ཅད་ལ༔ དེ་ནས་འཛམ་གླིང་སྤྱི་ལ༔ དེ་ལ་བྱམས་སྙིང་རྗེ་སྐྱེ་ན༔ བྱེ་བྲག་རང་དང་མི་མཐུན་པ་རྣམས་ལ༔ དེ་ནས་དགྲ་ལ་བྱམས་སྙིང་རྗེ་བསྒོམ༔ དེ་འབྱོངས་ནས་གླིང་བཞི་དང་སྟོང་གསུམ་དང་༔ འགྲོ་བ་རིགས་དྲུག་དང་༔ དེ་ནས་ནམ་མཁས་ཁྱབ་པའི་སེམས་ཅན་ཐམས་ཅད་ལ་བསྒོམ༔ དེ་ལ་ཕྱོགས་རིས་མེད་པར་སེམས་མཉམ་པར་གྱུར་ན་བྱམས་པ་ཆེན་པོ་དང་སྙིང་རྗེ་ཆེན་པོ་བསྒོམ༔ བྱམས་པ་དང་སྙིང་རྗེའི་དབང་གིས་རང་དབང་མེད་པར་འཆི་མ་འཁྲུགས་པ་དང་༔ བ་སྤུ་གཡོ་ནུས་ན་བྱམས་པ་དང་སྙིང་རྗེ་ཆེན་པོ་ཡིན་པར་བཤད༔ འདི་ནི་ལས་དང་པོ་པའི་བསྒོམ་བྱ་སེམས་ཅན་ལ་དམིགས་པའི་བྱམས་སྙིང་རྗེ་ཡིན་ཏེ༔ སངས་རྒྱས་ཐོབ་པ་ལ་དང་པོ་ས་བོན་ལྟར་མེད་ཐབས་མེད༔ བར་དུ་ཆུ་ལུད་ལྟར་གལ་ཆེ༔ ཐ་མར་སྟོན་ཐོག་ཕུན་སུམ་ཚོགས་པ་ལྟར་སངས་རྒྱས་ནས་སེམས་ཅན་ལ་ཕན་པ་རྒྱ་ཆེན་
པོ་འབྱུང་བ་ཡིན་ཏེ༔ འཇུག་པ་ལས༔ གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདི༔ ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ༔ ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ༔ དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི༔ ཞེས་དང་༔ བསླབ་བཏུས་ལས༔ འདི་ཉིད་དེ་བཞིན་གཤེགས་པ་མཉེས་བྱེད་ཡིན༔ སེམས་ཅན་མགུ་བར་བྱེད་པའང་འདི་ཉིད་དེ༔ རང་དོན་ཡང་དག་བསྒྲུབ་པའང་འདི་ཉིད་དོ༔ ཞེས་དང་༔ བློ་གྲོས་རྒྱ་མཚོས་ཞུས་པའི་མདོར༔ གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་བླ་ན་མེད་པ་སྟེ༔ བྱང་ཆུབ་ཏུ་སེམས་བསྐྱེད་པ་དང་༔ དམ་པའི་ཆོས་འཛིན་པ་དང་༔ སྲོག་ཆགས་རྣམས་ལ་སྙིང་བརྩེ་བའོ༔ ཞེས་གསུངས༔ དེ་ལྟར་བྱང་ཆུབ་ཏུ་སེམས་བསྐྱེད་བྱམས་སྙིང་རྗེ་བསྒོམ་པས་རང་གཞན་གྱི་དོན་ཐམས་ཅད་འགྲུབ་སྟེ༔ སྤྱོད་འཇུག་ལས༔ དེང་ནས་བཟུང་སྟེ་གཉིད་ལོག་གམ༔ བག་མེད་གྱུར་ཀྱང་བསོད་ནམས་ཤུགས༔ རྒྱུན་མི་ཆད་པ་དུ་མ་ཞིག༔ ནམ་མཁར་མཉམ་པ་རབ་ཏུ་འབྱུང་༔ རྒྱལ་སྲས་རྣམས་ལ་དོ་གལ་ཆེན་པོས་ཀྱང་༔ སྡིག་པ་མི་འབྱུང་
དགེ་བ་ངང་གིས་འཕེལ༔ དེ་ཚེ་བདག་གི་འབྲས་བུ་ཡོད༔ མི་ཡི་སྲིད་པ་ལེགས་པར་ཐོབ། དེ་རིང་སངས་རྒྱས་རིགས་སུ་སྐྱེ༔ སངས་རྒྱས་སྲས་སུ་ད་གྱུར་ཏོ༔ འདི་ནི་བྱང་ཆུབ་སེམས་སྟོབས་ཀྱི༔ སྔོན་གྱི་བསོད་ནམས་ཀུན་གྱི་གཏེར༔ དེ་ནི་རྒྱལ་སྲས་ཆགས་མེད་རབ་ཏུ་ཐོབ༔ ཅེས་དང་༔ བྱང་ཆུབ་སེམས་བསྐྱེད་གྱུར་པའི་སྐད་ཅིག་ལ༔ འཁོར་བའི་བཙོན་རར་བསྡོམ་པའི་ཉམ་ཐག་རྣམས༔ རྒྱལ་བ་རྣམས་ཀྱི་སྲས་ཞེས་རབ་བརྗོད་དེ༔ འཇིག་རྟེན་ལྷ་མིར་བཅས་པས་ཕྱག་བྱར་འགྱུར༔ གསེར་འགྱུར་རྩི་ཡི་རྣམ་པ་མཆོག་ལྟ་བུ༔ མི་གཙང་ལུས་འདི་བོར་ནས་རྒྱལ་བའི་སྐུ༔ རིན་ཆེན་རིན་ཐང་མེད་པར་བསྒྱུར་བས་ན༔ བྱང་ཆུབ་སེམས་ཞེས་བྱ་བ་རབ་བརྟན་བཟུང་༔ དགེ་བ་གཞན་ཀུན་ཆུ་ཤིང་བཞིན་དུ་ནི༔ འབྲས་བུ་བསྐྱེད་ནས་ཟད་པར་འགྱུར་བ་ཉིད༔ བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་༔ འབྲས་བུ་སྦྱིན་ཅིང་མི་ཟད་འཕེལ་བར་འགྱུར༔ སྡིག་པ་ཤིན་ཏུ་མི་བཟད་བྱས་ན་ཡང་༔ དཔའ་ལ་བརྟེན་ནས་འཇིགས་པ་ཆེན་པོ་ལྟར༔ གང་ལ་བསྟེན་ན་ཡུད་ཀྱིས་སྒྲོལ་གྱུར་པ༔ དེ་ལ་བག་ཅན་རྣམས་ཀྱིས་ཅིས་མི་བསྟེན༔ དེས་
ནི་དུས་མཐའི་མེ་བཞིན་སྡིག་ཅན་རྣམས༔ སྐད་ཅིག་གཅིག་གིས་ངེས་པར་སྲེག་པར་བྱེད༔ འགྲོ་བའི་འཆི་བདག་འཇོམས་བྱེད་པའི༔ བདུད་རྩིའི་མཆོག་ཀྱང་འདི་ཉིད་ཡིན༔ འགྲོ་བའི་དབུལ་བ་སེལ་བྱེད་པའི༔ མི་ཟད་གཏེར་ཡང་འདི་ཉིད་ཡིན༔ འགྲོ་བའི་ཉོན་མོངས་གདུང་སེལ་བའི༔ སེམས་ཀྱི་ཟླ་བ་ཤར་བ་ཡིན༔ འགྲོ་བའི་ཤེས་རབ་རིབ་དག༔ དཔྱིས་འབྱིན་ཉི་མ་ཆེན་པོ་ཡིན༔ ཞེས་གསུངས་སོ༔ འདི་ལྟར་བྱམས་སྙིང་རྗེ་མེད་ན་སྟོང་ཉིད་ཁོ་ན་བསྒོམས་ཀྱང་རྫོགས་པའི་སངས་རྒྱས་མི་ཐོབ་སྟེ༔ ཐེག་དམན་ཉན་རང་གི་ལམ་དུ་ལྟུང་བས་གེགས་སེལ་གྱི་གཙོ་བོ་ཡང་ཡིན་ཏེ༔ དཀོན་མཆོག་བརྩེགས་པ་ལས༔ དཔེར་ན་ནམ་མཁའ་ལ་ནི་ས་བོན་སྐྱེ་བ་ནི༔ འདས་དང་མ་འོངས་ད་ལྟ་བྱུང་བ་མེད༔ དེ་བཞིན་འདུས་མ་བྱས་ལ་སངས་རྒྱས་ཆོས༔ སྐྱེ་བ་གོང་དུའང་མ་བྱུང་འབྱུང་མི་འགྱུར༔ ཞེས་གསུངས༔ དེ་བཞིན་དུ་དྲི་མ་མེད་པར་གྲགས་པའི་མདོ་ལས༔ རིགས་ཀྱི་བུ་འདི་ལྟ་སྟེ་དཔེར་ན༔ དགོན་པ་དུངས་པའི་ས་ཕྱོགས་སུ་མེ་ཏོག་ཨུཏྤལ་དང་པདྨ་དང་ཀུ་མུ་ཏ་ལ་སོགས་པ་མི་སྐྱེ་སྟེ༔ འདམ་རྫབ་དང་ཆུ་གླིང་དུ་བསྐྱེད་།
པ་ན་དེ་རྣམས་སྐྱེའོ༔ རིགས་ཀྱི་བུ་དེ་བཞིན་དུ་འདུས་མ་བྱས་ངེས་པར་ཐོབ་པའི་སེམས་ལ་སངས་རྒྱས་ཀྱི་ཆོས་རྣམས་མི་སྐྱེ༔ ཞེས་གསུངས༔ དེ་ལྟར་རིགས་དྲུག་གི་སེམས་ཅན་སྡུག་བསྔལ་བ་ལ་ཤ་ཚ་ཞིང་མི་བཟོད་པས་ཐབས་ཡོད་ན་རང་དེའི་མལ་དུ་ཞུགས་ནས་གཞན་ཐར་བར་བྱེད་ནུས་པ་ཙམ་དུ་བསྒོམ་པ་སེམས་ཅན་ལ་དམིགས་པའི་བྱམས་སྙིང་རྗེ་ལས་དང་པོ་པའི་བསྒོམ་བྱ་ཡིན་ལ༔ སྣང་སྲིད་ཀྱི་ཆོས་ཐམས་ཅད་སྒྱུ་མ་རྨི་ལམ་ཆུ་ཟླ་ལྟར་རྟོགས་པ་ན༔ དེ་ལྟར་མ་རྟོགས་ནས་འཁྲུལ་པས་སྡུག་བསྔལ་བ་ལ་སྙིང་རྗེ་བསྒོམ་པ་ནི་ཆོས་ལ་དམིགས་པའི་བྱམས་སྙིང་རྗེ༔ སེམས་ཅན་ཐམས་ཅད་ངོ་བོ་མ་གྲུབ་པ་བདག་གཞན་དབྱེར་མེད་པའི་ལྟ་བ་རྟོགས་པའི་ངང་ནས་མ་རྟོགས་འཁྲུལ་པའི་འགྲོ་བ་ལ་སྙིང་རྗེ་ངང་གིས་འཆར་བ་དམིགས་པ་མེད་པའི་སྙིང་རྗེ་དང་༔ བྱམས་ཆེན་གཉུག་མའི་ཏིང་ངེ་འཛིན་ཞེས་བྱ་བ་ཡིན་པར་གསུངས་ན་ཡང་༔ རེ་ཞིག་དང་པོ་བསྒོམ་བྱ་ཡིན་པས༔ ཨོ་རྒྱན་རིན་པོ་ཆེས༔ བདག་གི་ལུས་ལོངས་སྤྱོད་བསགས་པའི་དགེ་བ་བདེ་སྟོང་གི་ཉམས་ལུས་ངག་ཡིད་ཀྱི་བདེ་བ་ཐམས་ཅད༔ བདག་གི་ཕ་མ་དྲིན་ཆེན་རྣམས་ཀྱིས་ཐོབ་པར་གྱུར་ཅིག༔ ཕ་
མ་དྲིན་ཆེན་གྱི་ལུས་ངག་ཡིད་གསུམ་གྱི་མི་དགེ་བ་ན་ཚ་སྡུག་བསྔལ༔ ལས་ངན་ཐམས་ཅད་བདག་ལ་སྨིན་པར་གྱུར་ཅིག༔ ཅེས་ཡིད་ཀྱིས་བསྔོ་ངག་ཏུ་ཡང་མདོར་ན་མི་བཟོད་པའི་སྙིང་རྗེ་བྱམས་པས་བདག་གཞན་ངེས་པར་བརྗེ་ཕོད་པར་བསྒོམ་མོ༔ ཞེས་གསུངས་པ་དང་༔ སྤྱོད་འཇུག་ལས༔ བདག་བདེ་གཞན་གྱི་སྡུག་བསྔལ་དག༔ ཡང་དག་བརྗེ་བར་མ་བྱས་ན༔ སངས་རྒྱས་ཉིད་དུ་མི་འགྲུབ་པས༔ འཁོར་བ་ན་ཡང་བདེ་བ་མེད༔ ཅེས་གསུངས་ཤིང་འདིའི་ལུགས་བྱམས་སྙིང་རྗེ་དུས་གཅིག་ཏུ་བསྒོམ་པ་རླུང་དང་བསྲེ་བ་གཏོང་ལེན་གྱི་དམིགས་པ་ཡིན་ཏེ༔ ལུས་བསྲང་ལ་རླུང་རོ་ཞིག་བུས་ཏེ༔ སྣ་བུག་ནས་རླུང་ཕར་འགྲོ་བའི་ཚེ༔ རང་གི་བདེ་སྐྱིད་དང་དགེ་བའི་རྩ་བ་ཅི་ཡོད་པ་ཐམས་ཅད༔ ཕ་མ་སེམས་ཅན་ཐམས་ཅད་ལ་སིབ་ཀྱིས་ཐིམ་པས༔ ཁོང་རྣམས་བདེ་བ་ཚད་མེད་པ་དང་ལྡན་ཞིང་བདེ་བའི་རྒྱུ་ལུས་ངག་ཡིད་གསུམ་ཟག་མེད་ཀྱི་དགེ་བ་ལ་སྤྱོད་པར་བསྒོམས་པ་ནི་བྱམས་པའོ༔ རླུང་ཚུར་རྔུབ་པའི་ཚེ་ན་ཕ་མ་སེམས་ཅན་ཐམས་ཅད་ཀྱི༔ ་སྡུག་བསྔལ་སྡིག་སྒྲིབ་ཅི་ཡོད་པ་ཐམས་ཅད་ཚུར་རང་ལ་སིབ་སིབ་ཐིམ་པས༔
ཁོང་རྣམས་ཀྱི་སྡུག་བསྔལ་ཅི་ཡོད་པ་ཐམས་ཅད་དང་བྲལ༔ སྡུག་བསྔལ་གྱི་རྒྱུ་སྡིག་སྒྲིབ་ཐམས་ཅད་དང་བྲལ་བར་བསྒོམ་པ་ནི་སྙིང་རྗེའོ༔ དེ་ངག་ཏུ་བརྗོད་ན༔ སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག༔ སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག༔ ཅེས་བརྗོད་དེ༔ དེ་ལྟ་བུ་ཐུན་རེ་ལ་དེ་དམིགས་པ་རླུང་དང་སྦྲགས་པ་བརྒྱའམ་ཉེར་གཅིག་ཙམ་རེ་བྱ༔ ཁྲིད་ཀྱི་ཚེ་ཐུན་བཞིའམ་དྲུག་ཏུ་བསྒོམ༔ དེ་ལྟར་བསྒོམས་པས་རང་ལ་མི་རུང་བའི་སྡུག་བསྔལ་འབྱུང་དོགས་ན་མི་སྲིད་དེ༔ སྡུག་བསྔལ་ནི་སྡིག་སྒྲིབ་ལས་འབྱུང་བ་ཡིན༔ བདེ་སྐྱིད་ནི་དགེ་བས་འབྱུང་ན༔ དེ་ནི་དགེ་བའི་མཆོག་ཡིན་པས་སྡུག་བསྔལ་བསྐྱེད་པ་མི་སྲིད༔ དེར་མ་ཟད་དགྲ་དང་གདོན་དང་ལྷ་འདྲེ་གདུག་པ་ཅན་ལ་ཡང་བྱེ་བྲག་དེ་ལ་དམིགས་ནས་བསྒོམས་པས་གནོད་པ་ཞི༔ གདོན་ཡིན་ཀྱང་དམ་ལ་ཐོག་ནས་སྲུང་མར་འོང་བ་ཡིན་ཏེ༔ བཅོམ་ལྡན་འདས་ཀྱིས་ཀྱང་བྱམས་པའི་ཏིང་ངེ་འཛིན་གྱིས་བདུད་བཏུལ་བ་ཡིན་ལ༔ སངས་རྒྱས་རྣམས་ལ་དད་གུས་ཅན་རྗེས་སུ་འཛིན་སྙམ་པའི་རྣམ་པར་རྟོག་པ་མི་མངའ་ཡང་༔ སྔོན་བྱང་ཆུབ་སེམས་
དཔའི་ཚེ་བྱམས་སྙིང་རྗེ་ལ་གོམས་ཤིང་སྨོན་ལམ་བཏབ་པས་དེང་སང་སངས་རྒྱས་དྲན་པ་ལ་ཡང་ཐུགས་རྗེ་དང་བྱིན་རླབས་འཇུག་པ་སྟེ༔ སྔོན་རྒྱལ་པོ་གསོལ་རྒྱལ་གྱི་བུ་མོ་རྡོ་རྗེ་བྱ་བ་གཟུགས་ངན་པས་རྒྱལ་པོའི་མཚང་དུ་གྱུར་ནས་མཛོད་དགུ་རིམ་གྱི་མུན་ཁང་དུ་སྦས་པས༔ སངས་རྒྱས་ལ་དད་པ་སྐྱེས་ཏེ་ཡིད་ལ་བྱས་པས་བཅོམ་ལྡན་འདས་དེར་བྱོན་ནས་འོད་ཟེར་ཕོག་པས༔ མོ་གཟུགས་ལྟ་ན་སྡུག་པར་གྱུར་པ་ཡང་སངས་རྒྱས་དེར་བྱོན་པ་མེད་ཀྱང་བྱམས་སྙིང་རྗེ་ལ་གོམས་པའི་མཐུ་ཡིན་པར་གསུངས་པ་དང་༔ མཐའ་འཁོབ་ཀྱི་རྒྱལ་པོ་འཕགས་སྐྱེས་པོས་ཤཱཀྱའི་བུ་མོ་མང་པོ་སྐྱིད་པ་བྲེག་ནས་གྲོགས་རོངས་སུ་བསྒྱུར་བ་ན༔ སངས་རྒྱས་ལ་གསོལ་བ་བཏབ་པས་ཐུབ་པ་དེར་བྱོན་ཏེ་རྨ་རྣམས་བཀྲུས་ནས་སྨན་བྱུག་སྟེ་ཕན་པར་མཛད་པ་ཡང་བྱམས་པ་དང་སྙིང་རྗེའི་མཐུ་ཡིན་གྱི་སངས་རྒྱས་དེར་བྱོན་པ་ཡང་མེད་གསུངས༔ དེ་ལྟ་བུ་བྱམས་སྙིང་རྗེ་གཏོང་ལེན་གྱི་དམིགས་པ་བསྒོམས་པས་མཛེ་དང་རིམས་ལ་སོགས་པ་འགོ་བའི་ནད་དང་༔ བྱད་ཁ་རྦོད་གཏོང་ཀག་དང་སྲི་ལ་སོགས་པས་ཀྱང་མི་ཚུགས་པར་བསྲུང་བའི་མཆོག་དམ་པ་ཡིན་ཏེ༔ སྒྱུ་འཕྲུལ་དྲྭ་བ་
ལས་བྱམས་པའི་གོ་ཆ་ཆས་པ་སྟེ༔ སྙིང་རྗེ་ཡི་ནི་ཡ་ལད་བགོས༔ ཞེས་དང་༔ ཨོ་རྒྱན་རིན་པོ་ཆེས༔ བྱང་ཆུབ་མཆོག་ཏུ་སེམས་བསྐྱེད་པའི་སྲུང་བ་ནི༔ ལུས་ཅན་རྣམས་ཀྱི་བྱང་ཆུབ་མཆོག་ཐོབ་བསྒོམ་ཞེས་པ་ནི༔ སྐྱེ་འགྲོ་དབུགས་ཀྱིས་བསྡུས་ཤིང་ཤེས་པས་ཟིན་པས་ཁྱད་པར་གནོད་བྱེད་ཀྱིས་གཙོ་བྱས་ཐམས་ཅད༔ བདེ་བ་དང་ལྡན་སྡུག་བསྔལ་དང་བྲལ་ནས་སངས་རྒྱས་སྐུ་གསུམ་གྱི་གོ་འཕང་ཐོབ་པར་བྱེད་པ་དེའི་ཆེད་དུ་ལྷ་སྒོམ་སྔགས་བཟླས་ལུས་ངག་ཡིད་གསུམ་དགེ་བ་ལ་བཀོད་སྙམ་དུ་བསམ་མོ༔ དེས་ནི་བསྲུང་བ་ཀུན་གྱི་མཆོག་ཡིན་ནོ༔ གནོད་བྱེད་ཁོ་རང་གི་དོན་དུ་སྒྲུབ་པ་བྱེད་པ་ལ་ཁོ་རང་གི་བར་དུ་མི་གཅོད་པའོ་ཞེས་གསུངས་སོ༔ དེ་ལྟར་བསྒོམ་པ་དེ་ནི་ཕྱི་མདོ་ལུགས་དང་ཐུན་མོང་གི་བྱམས་སྙིང་རྗེ་བསྒོམ་པ་ཡིན་ལ༔ ནང་སྔགས་ཀྱི་ལུགས་སུ་བྱམས་སྙིང་རྗེ་བསྒོམ་པ་ནི༔ བདག་ལུས་བྱམས་སྙིང་རྗེའི་ལྷ་ཐུགས་རྗེ་ཆེན་པོ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་བཞི་པར་བསྒོམ་པའི་སྐུ་ལས་འོད་ཟེར་དཀར་པོ་འཕྲོས་པས་སེམས་ཅན་ཐམས་ཅད་ལ་ཕོག་ནས་བདེ་བ་ཚད་མེད་པ་དང་ལྡན་པར་བྱས༔ སྐུ་ལས་འོད་ཟེར་
སེར་པོ་འཕྲོས་ནས་ཕོག་པས་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་བ་མོ་ལ་ཉི་ཟེར་ཕོག་པ་ལྟར་བསྒོམས་ལ་ཡི་གེ་དྲུག་པ་བཟླས་སོ༔ ཡང་སྔགས་བླ་མེད་ལྟར་ན་རང་ཉིད་ཐུགས་རྗེ་ཆེན་པོ་སྐུ་མདོག་དམར་པོར་བསྒོམས་ལ༔ སེམས་ཅན་ལ་བྱམས་སྙིང་རྗེ་བསྒོམས་པས༔ རང་གི་ཐུགས་ཀ་ནས་སངས་རྒྱས་ཐམས་ཅད་ཀྱི་སྙིང་རྗེ་ཆེན་པོའི་རང་གཟུགས་ལྷ་མོ་དཀར་མོ་ལྕགས་ཀྱུ་ཐོགས་པ་གྲངས་མེད་པ་སྤྲོས་ནས༔ ཐུགས་རྗེའི་ལྕགས་ཀྱུས་སྙིང་ཁ་ནས་བཟུང་སྟེ་འཁོར་བ་སྡུག་བསྔལ་གྱི་གནས་ནས་དྲངས་ཏེ་སྡུག་བསྔལ་དང་བྲལ་བ་བདེ་བ་དམ་པའི་ས་ལ་བཞག་པར་བསམས་ལ་རླུང་ཚུར་རྔུབ་པ་དང་སྤྲུལ་པ་རང་ལ་བསྡུ༔ རླུང་ཕར་བཏང་བ་དང་རང་རང་གི་ཐུགས་ཀ་ནས་སངས་རྒྱས་ཐམས་ཅད་ཀྱི་བྱམས་པ་ཚད་མེད་པའི་རང་གཟུགས༔ ལྷ་མོ་སེར་མོ་ཞགས་པ་ཐོགས་པ་གྲངས་མེད་པ་སྤྲོས་ཏེ༔ སེམས་ཅན་ཐམས་ཅད་ཀྱི་ལུས་ངག་ཡིད་གསུམ་བྱམས་པའི་ཞགས་པས་བཅིངས་བས་བདེ་བ་ཚད་མེད་པ་དང་ལྡན་པར་བསྒོམ༔ རླུང་ཚུར་རྔུབ་པ་དང་ལྷ་མོ་རྣམས་རང་ལ་བསྡུའོ༔ ཡང་རང་ཉིད་ཐུགས་རྗེ་ཆེན་པོ་དཀར་དམར་གང་བདེ་
བསྒོམས་ལ་འགྲོ་དྲུག་གི་སེམས་ཅན་ཐམས་ཅད་ལ་སྙིང་རྗེ་ཚད་མེད་པར་བསྒོམས་པས༔ རླུང་ཕྱིར་རྒྱུ་བ་དང་བསྟུན་རང་གི་ཐུགས་ཀ་ནས་འོད་ཟེར་དཀར་པོ་དཔག་ཏུ་མེད་པ་འཕྲོས་པས༔ སེམས་ཅན་ཐམས་ཅད་ལ་ཕོག་པས་སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་ཐམས་ཅད་སིབས་སེ་བསྡུས་ནས་རང་ལ་བསྟིམས་པས༔ མེ་ལ་ཤིང་བསྣན་པ་ལྟར་རང་ཉིད་སྐུ་གཟི་མདངས་འོད་དུ་འབར་བར་བསྒོམས་ལ་མི་དམིགས་པར་བཞག༔ རླུང་ཕྱིར་རྒྱུ་བ་དང་བསྟུན་སྐུ་ལས་འོད་ཟེར་སེར་པོ་འཕྲོས་ནས་སེམས་ཅན་ཐམས་ཅད་ལ་ཕོག་པས་བསོད་ནམས་དང་ཡེ་ཤེས་རྒྱས་ཏེ་བདེ་སྐྱིད་ཚད་མེད་པ་དང་ལྡན་ཏེ་མངོན་པར་སངས་རྒྱས་པ་ལ་ཚེགས་མེད་པར་ས་བཅུའི་སེམས་དཔའི་གོ་འཕང་ཐོབ་པར་བསྒོམས་ལ་མི་དམིགས་པར་བཞག༔ དམིགས་པ་དེ་རྣམས་གང་བསྒོམས་ཀྱང་མཐར་སེམས་མ་བཅོས་པར་ཀློད་ལ་ཡིད་ལ་ཅི་ཡང་མི་བསམ་པར་དམིགས་མེད་དུ་བཞག་སྟེ༔ མདོ་ལས༔ བཅོམ་ལྡན་འདས་སྙིང་རྗེ་ཆེན་པོ་ཞེས་བགྱི་བ་ཇི་ལྟར་ལགས༔ བཀའ་སྩལ་པ་བདག་དང་སེམས་ཅན་དང་སྙིང་རྗེ་གསུམ་དུ་དམིགས་པ་ནི་སྙིང་རྗེ་ཆུང་ངུ་ཡིན་ནོ༔ བདག་དང་
སེམས་ཅན་སྙིང་རྗེ་རྣམས་མ་མཐོང་བར་ཐམས་ཅད་མཉམ་པ་ཉིད་དུ་ཤེས་པ་ནི་སྙིང་རྗེ་ཆེན་པོའོ༔ ཞེས་གསུངས་པའོ༔ དེ་ལྟར་དམིགས་པ་གང་བྱེད་ཀྱང་བྱམས་སྙིང་རྗེའི་སྙིང་པོ་ཡི་གེ་བཅུ་པའོ༔ དྲུག་པ་འདི་བཟླ་བར་བྱ་སྟེ༔ ཟ་མ་ཏོག་བཀོད་པའི་མདོ་ལས༔ སངས་རྒྱས་དམར་པོ་མཆོག་གིས་བཀའ་སྩལ་པ༔ རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་གིས་ཡི་གེ་དྲུག་པའི་རིག་སྔགས་འདི་བཟླ་བར་བྱེད་ན༔ སྤོབས་པ་མི་ཟད་པར་འགྱུར་རོ༔ ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ༔ བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་འགྱུར་རོ༔ ཉི་མ་རེ་རེ་ཞིང་ཡང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ༔ བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ༔ ཡི་གེ་དྲུག་པའི་རིག་སྔགས་འདི་བརྗོད་ཅིང་རྟག་ཏུ་བཟླས་བརྗོད་ལ་བརྩོན་པ་དེ་དག་ནི་བསོད་ནམས་དང་ལྡན་པ་ཡིན་ནོ༔ དེ་དག་བཟླས་པ་བྱེད་པའི་ཚེ༔ སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དགུ་འདུ་བར་འགྱུར་རོ༔ རིགས་
ཀྱི་བུ་དེའི་བ་སྤུའི་ཁུང་བུ་རེ་རེ་ལ་ཡང་དེ་བཞིན་གཤེགས་པ་དག་བཞུགས་སོ༔ བཞུགས་ནས་ཀྱང་རིགས་ཀྱི་བུ་ཁྱོད་ལ་འདི་འདྲ་བའི་ཡིད་བཞིན་གྱི་ནོར་བུ་རྙེད་པ་ཐོབ་པར་འགྱུར་རོ༔ རིགས་ཀྱི་བུ་ཁྱོད་ཀྱིས་རིགས་བདུན་ཐར་བར་བྱས་པ་ཡིན་ནོ༔ ལེགས་སོ༔ རིགས་ཀྱི་བུ་ཁྱོད་ཀྱི་ལྟོ་བ་ན་སྲོག་ཆགས་གནས་པ་དེ་དག་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ༔ ལེགས་སོ་ཞེས་བྱ་བ་བྱིན་པར་འགྱུར་རོ༔ ཞེས་དང་༔ ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས༔ ཡང་སྙིང་ཡིད་ལ་སུས་བྱེད་ཚད༔ ཐུགས་རྗེ་ཆེན་པོ་དེ་ཡིན་ཕྱིར༔ བར་ཆད་སེལ་ཞིང་འགྲོ་བ་འདུལ༔ ཞེས་དང་༔ སྤྲུལ་པའི་རྒྱལ་པོས་ཀྱང་ཨོ་བྱམས་པ་ཚད་མེད༔ མ་སྙིང་རྗེ་ཚད་མེད་སོགས་ཚད་མེད་བཞི་དང་༔ ཨོཾ་སྨོན་པ་སེམས་བསྐྱེད་མ་འཇུག་པ་སེམས་བསྐྱེད་སོགས༔ བྱམས་སྙིང་རྗེ་བྱང་ཆུབ་ཀྱི་སེམས་ཐམས་ཅད་ཀྱང་ཡི་གེ་དྲུག་པ་འདི་ལ་ཚང་བར་གསུངས་ཤིང་༔ དེའི་གནད་ཀྱིས་འདིའི་གཞུང་ཉིད་ནས་ཀྱང་བྱམས་སྙིང་རྗེ་གཉིས་གཏོང་ལེན་གྱི་དམིགས་པ་དང་སྦྲགས་ནས་ཡི་གེ་དྲུག་གམ་བཅུ་པ་འདོན་པར་གསུངས་པའོ༔ དེས་ན་བྱམས་སྙིང་རྗེ་དེ་ད་ལམ་ཁྲིད་
སྐབས་འདིར་རྩེ་གཅིག་ཏུ་བསྒོམས་ལ་རྒྱུན་དུ་ཡང་ཐུན་རེ་མ་ཆག་པ་གལ་ཆེ༔ བསྒོམ་ལུགས་མདོ་སྔགས་ཐུན་མོང་བ་དང་སྔགས་ལུགས་དང་རྗེས་སུ་ཟུང་འཇུག་དང་དེ་རྣམས་གང་རུང་བསྒོམས་པས་འཐུས་ལ༔ ད་རུང་བྱམས་སྙིང་རྗེ་མ་འབྱོངས་བས་གདོན་དེ་དག་སོགས་ཀྱི་རྣམ་རྟོག་མ་ཆོད་ན༔ དམིགས་པ་རྗེས་མ་དེ་ལེགས་ཤིང་ཟབ་པ་ཡིན་པས་དེ་ལྟར་བསྒོམ་ཞིང་སྙིང་པོ་སྒྲོངས་མཛོད༔ རྣ་བའི་ཡུལ་དུ་གོ་ཙམ་དང་ཡིད་ཀྱི་གོ་ཡུལ་ཙམ་དུ་མ་སོང་བར་སེམས་ལ་བྱམས་སྙིང་རྗེའི་བརླན་གཅིག་འབབས་དགོས་པས་རྩེ་གཅིག་ཏུ་བསྒོམ༔ ངན་སོང་གི་སྡུག་བསྔལ་དང་སེམས་ཅན་སྡུག་བསྔལ་ཅན་མཐོང་བ་ཚོ་ཡིད་ལ་ཁོད་ལ་སྙིང་རྗེ་ཨེ་སྐྱེ་གྱིས༔ སྡུག་བསྔལ་དེ་འདྲ་རང་ལ་བྱུང་ན་ཇི་ལྟར་མཆིས་སྙམ་དུ་དཔེ་རང་ལུས་ཁོབ་ལ་སྙིང་རྗེ་བསྒོམ༔ བྱམས་སྙིང་རྗེ་ཨན་ཙམ་སྐྱེ་མ་འདོད་ན་ཐེག་པ་ཆེན་པོའི་ཆོས་ཀྱི་སྐལ་བ་མེད་པས་ཤིན་ཏུ་གལ་ཆེ་བས་ཞེ་ཐག་པ་ནས་སྒོམས་ཤིག༔ ཆོས་འབྲུ་གསུམ་པའོ༔ ༒ དེ་ནས་ཆོས་འབྲུ་བཞི་པ་ནི༔ གཞུང་ལས༔ ཡང་ནི་ཁྱེད་རང་སྤྱན་རས་གཟིགས༔ རྒྱལ་བ་རྒྱ་མཚོ་གོང་བཞིན་བསྒོམ༔
ཐུགས་ཀར་ཧྲཱིཿདམར་ཚེག་དྲག་བཅས༔ བདུད་རྩིའི་རྒྱུན་བབས་སྡིག་སྒྲིབ་ཀུན༔ མ་ལུས་དག་ནས་དུང་ཕྱིས་ལྟ་བུར་གྱུར༔ ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ༔ ཞེས་གསུངས་པའི་དོན་བཤད་ན་སྡིག་པ་བཤགས་དགོས་ཏེ༔ ཚེ་འདིར་ཡང་ཉོན་མོངས་པ་དུག་ལྔའི་སྒོ་ནས་ལུས་དང་ངག་དང་ཡིད་ཀྱི་མི་དགེ་བ་དུ་མ་ཞིག་ཞོར་ལ་སོགས༔ ཚེ་འདི་ལ་སྡིག་པ་ཆེ་བར་མ་བྱས་བསམ་ན་ཡང་༔ དེང་སང་རབ་ཏུ་བྱུང་བ་དང་བླ་མ་ཐམས་ཅད་བྱང་ཆུབ་སེམས་བསྐྱེད་མ་ཞུས་པ་ནི་མེད་ལ༔ སར་གནས་ཀྱི་སེམས་དཔའ་ཡང་གང་དུ་བཞུགས་མི་ཤེས༔ དེ་དག་སྤྱོད་པ་བཙུན་པ་ངེས་པ་ཡང་མེད་སྦས་ཚུལ་དུ་བཞུགས་པ་མང་བས༔ ངག་འཁྱལ་དང་སྐུར་འདེབས་འདི་ཞོར་ལ་འགྲོ་དོ་བ་ཁོ་ནས་སྡིག་སྒྲིབ་ལ་ཆོག་པར་ཡོད་དོ༔ དད་པའི་སྟོབས་བསྐྱེད་པའི་མདོ་ལས༔ འཇམ་དཔལ་གང་ཟག་གང་ལ་ལ་ཞིག་གིས་སེམས་བསྐྱེད་པའི་བྱང་ཆུབ་སེམས་དཔའ་ལ་སྐྱོན་གང་ཡང་རུང་བས་ཁྱད་དུ་བསད་དེ༔ སྤྲོ་བར་བྱེད་པ་དེ་དག་གིས་ནི་སེམས་ཅན་དམྱལ་བ་ཆེན་པོ་ངུ་འབོད་དུ་སྐྱེས་ཏེ༔ ལུས་དཔག་ཚད་ལྔ་བརྒྱ་ལ་མགོ་ལྔ་བརྒྱ་ཡོད་པ༔ མགོ་རེ་རེ་ལ་ཁ་ལྔ་བརྒྱ་ཡོད་པ༔ ཁ་རེ་རེ་ལ་
ལྕེ་ལྔ་བརྒྱ་ཡོད་པ༔ ལྕེ་རེ་རེ་ལའང་ལྕགས་ཀྱི་ཐོང་གཤོལ་འབར་བ་ལྔ་བརྒྱས་རྨོ་བར་འགྱུར་རོ༔ འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སེམས་ཅན་ཐམས་ཅད་ལ་དབྱུག་པ་དང་མཚོན་ཆས་བསྣུན་ཏེ་བསད་པ་དང་༔ དེ་དག་ཐམས་ཅད་དགྲ་བཅོམ་པ་ཤ་སྟག་ཏུ་གྱུར་པ་དེ་རྣམས་ཐམས་ཅད་ཀྱི་སྲོག་བཅད་པ་དང་༔ འཇིག་རྟེན་གྱི་ཁམས་ཐམས་ཅད་རིན་པོ་ཆེའི་སྟེགས་བུས་བསྐོར་ཏེ༔ གདུགས་དང་རྒྱལ་མཚན་དང་བ་དན་བསྒྲེང་བ་བཤིགས་བ་བས༔ གང་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་ཐེག་པ་ཆེན་པོ་ཉིད་ལ་སྒྲོ་བཏགས་ཏེ༔ རྐྱེན་གང་ཡང་རུང་བས་ཁྲོས་ཤིང་གཤེ་བ་དང་༔ མི་སྙན་པ་ཟེར་བ་དང་༔ ཁྱད་དུ་གསོད་པར་བྱེད་པ་འདི་ནི་སྔ་མ་བས་སྡིག་པ་ཆེས་གྲངས་མེད་པ་བསྐྱེད་དོ༔ ཞེས་དང་༔ སེམས་བསྐྱེད་པའི་བྱང་ཆུབ་སེམས་དཔའ་ལ་བརྙས་ན་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་བསད་པ་དང་༔ སེམས་ཅན་དེ་དག་ཐམས་ཅད་དགྲ་བཅོམ་པར་གྱུར་པའི་སྲོག་བཅད་པ་དང་༔ འཇིག་རྟེན་གྱི་ཁམས་དེ་ཐམས་ཅད་མཆོད་རྟེན་གྱིས་གང་བ་
བཤིགས་པ་བས་སྡིག་ཆེའོ༔ ཞེས་དང་༔ རབ་ཏུ་ཞི་བ་རྣམ་པར་ངེས་པ་ཆོ་འཕྲུལ་གྱི་མདོ་ལས༔ འཛམ་བུའི་གླིང་གི་སེམས་ཅན་ཐམས་ཅད་ཀྱི་སྲོག་བཅད་དམ༔ བདོག་པ་ཐམས་ཅད་ཕྲོག་པ་བས༔ བྱང་སེམས་ཀྱིས་ཐ་ན་དུད་འགྲོ་ལ་ཟན་ཆང་ཞིག་བྱིན་པའི་དགེ་བ་ལ་བར་ཆད་བྱས་ན་སྡིག་ཆེས་གྲངས་མེད་དེ༔ ཞེས་གསུངས་པས་དགེ་བའི་ཁ་བཀག་པ་དང་ཆོས་ཤུལ་ཅུང་ཟད་རེ་ལའང་དེ་ལྟར་དང་༔ དེང་སང་རང་རེ་ཡོན་ཏན་ཤེས་པར་རློམ་པ་ཀུན་ཡང་ཆོས་ལ་ཕྱོགས་རིས་བྱེད་པ་དང་༔ རང་མཁས་པའི་ང་རྒྱལ་གྱིས་རྒྱལ་བའི་གསུང་ལ་ཡང་དག་མ་དག་ཤན་འབྱེད་པ་སྐད་བྱེད་པ་འདི་ཡང་རང་རེ་ཆོས་ཀྱི་སྤྱན་དང་མངོན་ཤེས་རྒྱ་ཆེན་པོ་མ་ཐོབ་པས་ཡག་ཉེས་ཆེན་པོ་ཞིག་གདའ་སྟེ༔ རྣམ་པར་འཐག་པ་བསྡུད་པའི་མདོ་ལས༔ སྐྱེས་བུ་གླེན་པ་ལ་ལ་དག་དེ་བཞིན་གཤེགས་པའི་ཐབས་ལ་མཁས་པ་མི་ཤེས༔ ཁོང་དུ་མ་ཆུད་པར་ངའི་ལྡེམ་པོའི་ངག་ལ་འདི་སྐད་དུ༔ འདི་ནི་རུང་ངོ༔ འདི་ནི་མི་རུང་ངོ་ཞེས་ཟེར་ཏེ༔ དེ་དག་ནི་ཆོས་སྤངས་པ་ཡིན༔ དེ་བཞིན་གཤེགས་པ་ལ་སྐུར་པ་འདེབས་པ་ཡིན་ནོ༔ རྣམ་གྲངས་འདི་དག་ནི་ངེས་པར་སེམས་ཅན་དམྱལ་བར་
འགྲོའོ༔ ཞེས་གསུངས་སོ༔ དེ་བཞིན་དུ་ཐ་སྙད་ལ་ཅུང་ཟད་སྦྱངས་བདག་གིས་བཀའ་རྫོགས་པ་ཆེན་པོ་ལ་སོགས་པའི་རྒྱུད་སྡེ་ཆེན་པོ་རྣམས་བཀའ་མིན་རྒྱུད་མིན་དུ་བསྒྲུབ་པ་དང་༔ བཀའ་རྫོགས་པ་ཆེན་པོ་ལ་སོགས་པའི་ཟབ་ཁྲིད་སྟོན་པ་ལ་འཕྱ་བ་དང་སྨོད་པར་བྱེད་པ་ཡང་རང་རང་ངན་སོང་དུ་འཕེན་པ་ལ་དེ་ཁོ་ནས་ཆོག་སྟེ༔ རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས༔ གསང་བའི་བདག་པོ་ངས་ཁྱོད་ལ་བསྒོ་བར་བྱའོ༔ ཤེས་པར་བྱའོ༔ མ་འོངས་པའི་དུས་ན་མི་བླུན་པོ་དམིགས་པ་ཅན་ལ་ལྟ་བ༔ འཇིགས་ཚོགས་ལ་ལྟ་བ་མངོན་པར་ཞེན་པ༔ བློ་ཕྱིན་ཅི་ལོག་ཏུ་གྱུར་པ༔ བདག་གི་སེམས་ཀྱིས་གནས་གཏན་ལ་མ་ཕེབས་པ་རྣམས་འཁྲུལ་ནས༔ འདི་སྐད་དུ་ནི་སངས་རྒྱས་ཀྱི་གསུང་མ་ཡིན་གྱིས༔ འདི་དག་ནི་རང་བཟོ་ཅན་གྱིས་རང་བཟོ་བྱས་པ་ཡིན་ནོ༔ ཞེས་ཟེར་བ་དག་འབྱུང་བར་འགྱུར་རོ༔ གསང་བའི་བདག་པོ་མི་བླུན་པོ་དེ་དག་ནི་འགྲོ་བ་གཉིས་སུ་འགྲོ་བར་རིག་པར་བྱ་སྟེ༔ གཉིས་གང་ཞེ་ན༔ འདི་ལྟ་སྟེ་སེམས་ཅན་དམྱལ་བ་དང་༔ དུད་འགྲོའོ༔ གསང་བའི་བདག་པོ་དེ་དག་ལ་ནི་དགེ་བའི་རྩ་བ་རྒྱུ་ཅུང་
ཟད་ཀྱང་ཡོད་པར་མི་སྨྲའོ༔ དེ་ཅིའི་ཕྱིར་ཞེ་ན༔ དགེ་བའི་རྩ་བ་ཆད་པར་བྱེད་པ་ལ་ཞུགས་པ་སྟེ༔ སངས་རྒྱས་ཀྱི་བྱང་ཆུབ་ལ་བར་དུ་གཅོད་པར་བྱེད་པ་བདུད་ཀྱི་ཟིལ་གྱིས་གནོན་པ༔ ཤེས་རབ་འཆལ་པའི་རང་བཞིན་ཅན༔ ཐེག་པ་ཆེན་པོ་ལ་གོམས་པར་མ་བྱས་པ༔ ཉན་ཐོས་ཀྱི་ཐེག་པ་ལ་སྙིང་པོར་འདུ་ཤེས་པ་རྣམས་འབྱུང་བར་འགྱུར་རོ༔ རིགས་ཀྱི་བུའམ་རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་ལ་མངོན་པར་བརྩོན་པར་འགྱུར་བ་དེ་དག་ཚུལ་ཁྲིམས་འཆལ་བ་སྡིག་པའི་ཆོས་སྤྱོད་པ་དེ་དག་ལ་སངས་རྒྱས་ཀྱི་བྱང་ཆུབ་ག་ལ་ཡོད༔ ཅེས་མི་སྙན་པ་སྨྲ་བར་འགྱུར་ཏེ༔ མི་བླུན་པོ་དེ་དག་འདི་ལྟར་བཅོམ་ལྡན་འདས་ཐམས་ཅད་མཁྱེན་པ་དེས༔ སེམས་ཅན་རྣམས་ལ་ཕན་གདགས་པའི་ཕྱིར་འདི་དག་ཐམས་ཅད་གསུངས་སོ༔ དེ་དག་ལ་སྡང་བའི་སེམས་བསྐྱེད་པས་སྡུག་བསྔལ་སྔོན་གྱི་སྐལ་པ་ཅན་དུ་འགྱུར་རོ༔ ཞེས་དང་༔ འདུལ་བ་ལུང་ལས༔ གང་ཞིག་ཆོས་ནི་དྲི་མེད་ལ༔ ཆོས་མ་ཡིན་པར་སྟོན་པ་སྟེ༔ ཆུ་ལ་གནས་པའི་ཉ་བཞིན་དུ༔ དེ་ལ་ལྕེ་ནི་མ་མཆིས་འགྱུར༔ ཞེས་དང་༔ རྣམ་པར་འཐག་པ་ཐམས་ཅད་བསྡུས་པའི་མདོ་
ལས༔ འཇམ་དཔལ་དམ་པའི་ཆོས་སྤངས་པའི་སྒྲིབ་པ་ཤིན་ཏུ་ཕྲ་སྟེ༔ དེ་བཞིན་གཤེགས་པས་གསུངས་པའི་ཆོས་ལ་ལ་ནི་བཟང་བར་འདུ་ཤེས༔ ལ་ལ་ནི་ངན་པར་འདུ་ཤེས་ན་དམ་པའི་ཆོས་སྤངས་པའོ༔ དེ་བཞིན་དུ་འདི་ནི་རིགས་སོ་འདི་ནི་མི་རིགས་སོ་ཞེས་སྨྲ་བ་དང་༔ འདི་ནི་བྱང་ཆུབ་སེམས་དཔའི་བསླབ་པའོ༔ འདི་ནི་བྱང་ཆུབ་སེམས་དཔའི་བསླབ་པ་མ་ཡིན་པའོ༔ ཞེས་སྨྲ་བ་དང་༔ གང་ཟག་འདི་ནི་ཆོས་སྨྲ་བ་ལ་སྤོབས་པ་ཡོད་དོ༔ འདི་ནི་སྤོབས་པ་མེད་དོ་ཟེར་ན་ཆོས་སྤངས་པའོ༔ དེ་བཞིན་དུ་ཆོས་སྨྲ་བའི་སྤྱོད་པ་སུན་འབྱིན་པ་དང་༔ ཆོས་སྨྲ་བ་ནི་སྒྲུབ་པ་ཕུན་སུམ་ཚོགས་པ་མ་ཡིན་ཟེར་བ་དང་༔ ཆོས་སྨྲ་བ་ལ་སྤྱོད་པ་ཉམས་པ་དང་༔ ཚུལ་ཁྲིམས་ཉམས་པ་གླེང་བ་དང་༔ ཚིག་དང་ཚིག་ལ་འགལ་བར་བྱས་སོ་ཟེར་བ་དང་༔ ཆོས་ཀྱི་དོན་ལ་ལ་ནི་བདག་ཉིད་མོས་སོ༔ ལ་ལ་ནི་བདག་མི་མོས་ཟེར་བ་དང་༔ གཞན་ཆོས་སྨྲ་བའི་ཚེ་གཏམ་གཞན་དུ་བསྒྱུར་བ་དང་༔ དེའི་དཀྲུགས་མ་བྱེད་ན་ཆོས་སྤངས་པ་ཡིན་ནོ༔ འཇམ་དཔལ་གང་ལ་ལ་ཞིག་གི་དམ་པའི་ཆོས་སྤངས་པ་དེ་ནི༔ དེ་བཞིན་གཤེགས་པ་རྣམས་ལ་སྐུར་
པ་བཏབ་པ་ཡིན་ནོ༔ དགེ་འདུན་ལ་ངན་དུ་བརྗོད་པ་ཡིན་ནོ༔ དེ་ནི་སངས་རྒྱས་མཐོང་བ་མི་འདོད་པ་ཡིན་ནོ༔ དེ་ནི་སེམས་ཅན་དམྱལ་བ་ན་གནས་པ་དེ་མཐར་ཕྱིན་པར་ངས་མི་སྨྲའོ༔ ཞེས་གསུངས་ཏེ༔ བཀའ་གཏེར་གྱི་ཆོས་ཐམས་ཅད་སེམས་ཅན་གང་ལ་གང་འདུལ་དུ་གསུངས་པ་ཡིན་ཀྱང་རང་རེའི་ཡིད་དང་མ་མཐུན་ཙམ་ན་བཟང་ངན་དུ་འཛིན་པ་འདི་ཡང་སྐྱོན་ཆེན་པོ་ཞིག་གདའ༔ ཆོས་སྨྲ་བ་ལ་འཕྱ་བ་ཡང་སྐྱོན་ཆེའོ༔ དམ་པའི་ཆོས་སྤང་ཟེར་བའི་མནའ་འདི་ཡང་ཁ་ལ་བཏགས་པ་འདྲ་ཞིག་གདའ་བས༔ བཤགས་པ་མ་ཐེངས་ན་འདིས་ཀྱང་ཆོག་གདའ༔ ཁྱད་པར་རང་རེ་རྣམས་ཆོས་སྒོར་ཞུགས་དབང་ཁྲིད་ཞུ་བླ་མ་བསྟེན་པ་འདི་ཆོས་ཀྱི་རྩ་བ་ཡིན་ཏེ༔ འདི་ལ་ཡང་བླ་མའི་ཡོན་ཏན་རྒྱ་མཚོ་ལྟ་བུ་ཡོད་ཀྱང་མི་མཐོང་༔ སྐྱོན་ཅུང་ཟད་རེ་གདའ་ན་དེའི་སོ་པ་ལ་བཞག་པ་འདྲ་ཞིག་བྱེད༔ དད་གུས་ཡོད་ཀྱང་བགས་ཀྱིས་ཚོད་ཡོད་དང་བརྙས་བཅོས་ཀྱི་མཉམ་གྲོགས་སུ་སོང་ན་ཡང་ཉེས་པ་ཞིག་ཞོར་ལ་སོགས་ཉན་ཆེ་སྟེ༔ རྡོ་རྗེ་རྩེ་མོའི་རྒྱུད་ལས༔ བྱང་ཆུབ་སེམས་ནི་མ་བསྐྱེད་དང་༔ ཐེ་ཚོམ་ཡོད་དང་བཀའ་སྩལ་སྤང་༔ མ་དད་པས་ནི་མི་འགྲུབ་བོ༔
འཇིག་རྟེན་ན་ནི་གང་ཟག་བཞི༔ བསྐལ་པ་བརྒྱར་ནི་བརྩོན་བྱས་ཀྱང་༔ དེ་དག་འགྲུབ་པར་ཡང་མི་འགྱུར༔ ཞེས་དང་༔ རྩེ་མོ་ལས༔ འདི་ལྟ་སྟེ་དཔེར་ན་འདོད་ཁམས་དང་གཟུགས་ཁམས་དང་གཟུགས་མེད་པའི་ཁམས་ཀྱི་སེམས་ཅན་ཐམས་ཅད་དུས་གཅིག་ལ་བསད་པ་བས་ནི༔ རྡོ་རྗེ་སློབ་དཔོན་གྱི་བ་སྤུའི་ཁུང་གཅིག་ལ་སྨོད་པའི་བརྒྱ་སྟོང་གི་གྲངས་སུ་མི་འགྲོའོ༔ ཞེས་དང་༔ སྤྱན་རས་གཟིགས་བསྙེན་བཀུར་གཅིག་པའི་རྒྱུད་ལས༔ སློབ་དཔོན་ལ་ནི་དངོས་གྲུབ་ཐོབ༔ གལ་ཏེ་དེ་ལ་བརྙས་བྱེད་ན། བསྐལ་པ་བྱེ་བ་བརྒྱ་དག་ཏུ༔ དམ་ཆོས་མིང་ཡང་མི་ཐོས་ན༔ གསང་སྔགས་བྱང་ཆུབ་སྨོས་ཅི་དགོས༔ ཞེས་དང་༔ དཔལ་མཆོག་དང་པོ་ལས༔ སློབ་དཔོན་ལ་ནི་གང་སྨོད་པ༔ དེས་ནི་སངས་རྒྱས་ཀུན་སྨོད་པས༔ རྟག་ཏུ་སྡུག་བསྔལ་ཐོབ་པར་འགྱུར༔ ཞེས་གསུངས་པ་དང་༔ ཚེ་འདི་ལ་སྡིག་ལྟུང་མེད་དམ་སྙམ་ཡང་ཚེ་རབས་དཔག་ཏུ་མེད་པ་ནས༔ ལུས་དཔག་ཏུ་མེད་པ་བླང་བའི་ཚེ་སྡིག་པ་བྱས་པ་ནི་མང་༔ དགེ་བ་ནི་ལྟུང་སྡིག་པ་དེ་དག་བཤགས་པས་མ་ཐེངས་ན་ནམ་ཡང་ཆུད་མི་ཟ་བར་རང་ལ་སྨིན་དགོས་ཏེ༔ དྲི་
མེད་རྒྱལ་པོ་བཤགས་པའི་རྒྱུད་ལས༔ བསྐལ་པ་དཔག་མེད་སྐྱེ་བ་ཇི་སྙེད་དུ༔ རྡོས་བཅས་ལུས་བླངས་གྲངས་མེད་ཞིག་གྱུར་ཏེ༔ ཤ་རུས་བསགས་ན་འཇིག་རྟེན་ལྟོས་དང་མཉམ༔ རྣག་ཁྲག་བསགས་ན་རྒྱ་མཚོ་ཆེན་པོ་ཙམ༔ ལས་འཕྲོ་བསགས་ན་བསམ་འདས་བརྗོད་མི་ལངས༔ ཞེས་གསུངས་སོ༔ དེ་ལྟ་བུའི་སྡིག་པའི་ལས་དེ་དག་མ་བཤགས་ན་ཆུད་མི་ཟ་དུས་ནམ་ཞིག་རང་ལ་སྨིན་ངེས་ཏེ༔ བཅོམ་ལྡན་འདས་ཀྱི་ཞལ་ནས༔ ལུས་ཅན་རྣམས་ཀྱི་ལས་དག་ནི༔ བསྐལ་པ་བརྒྱར་ཡང་ཆུད་མི་ཟྭ༔ ཚོགས་ཤིང་དུས་ལ་བབ་པ་ན༔ འབྲས་བུ་ཉིད་དུ་སྨིན་པར་འགྱུར༔ ཞེས་གསུངས་སོ༔ སྡིག་པ་བཤགས་པའི་ཐབས་ཤེས་ནས་བཤགས་ན་འདག་སྟེ༔ གསང་ཆེན་ཐབས་ལ་མཁས་པའི་མདོ་ལས༔ རིགས་ཀྱི་བུ་ཡོངས་སུ་བརྟག་པ་བཟུང་ནི༔ གལ་ཏེ་རབ་ཏུ་བྱུང་བའི་བྱང་ཆུབ་སེམས་དཔའ་དེ༔ རྩ་བའི་ལྟུང་བ་བཞི་པོ་ཐམས་ཅད་ལས་འདས་པར་གྱུར་ཀྱང་༔ ཐབས་མཁས་པ་འདིས་སྦྱོང་བར་བྱེད་ན་བྱང་ཆུབ་སེམས་དཔའི་ལྟུང་བར་མི་འགྱུར་བར་ངས་བཤད་དོ༔ ཞེས་གསུངས་སོ༔ དེ་ལྟར་བཤགས་པའི་གདམས་པ་ཤེས་ན༔ བཤགས་པ་རེ་
རེས་ཀྱང་སྡིག་པ་མང་པོ་འཛོམས་ཏེ༔ མྱ་ངན་འདས་ཆེན་ལས༔ དགེ་བ་གཅིག་བྱས་ཀྱང་སྡིག་པ་མང་པོ་འཇོམས་ཏེ༔ ཞེས་དང་༔ རྡོ་རྗེ་ཆུང་ངུས་རི་རབ་བམ༔ མེ་ཆུང་ངུས་རྩི་ཤིང་ངམ༔ དུག་ཆུང་ངུས་སེམས་ཅན་འཇོམས་པ་ལྟར༔ དགེ་བ་ཆུང་ངུས་ཀྱང་སྡིག་པ་ཆེན་པོ་འཇོམས་པ་ནི་དོན་དུ་གཉེར་བ་ཆེན་པོ་ཉིད་དོ༔ ཞེས་དང་༔ གསེར་འོད་དམ་པའི་མདོ་ལས༔ གང་གི་བསྐལ་པ་སྟོང་རྣམས་སུ༔ སྡིག་པ་ཤིན་ཏུ་མི་བཟད་བགྱིད༔ ལན་གཅིག་རབ་ཏུ་བཤགས་པ་ཡིས༔ དེ་དག་ཐམས་ཅད་བྱང་བར་འགྱུར༔ ཞེས་གསུངས་སོ༔ བཤགས་པའི་ཐབས་ནི་སྟོབས་བཞི་སྟེ༔ ཆོས་བཞི་བསྟན་པ་སྙིང་པོའི་མདོ་ལས༔ བྱམས་པ་བྱང་ཆུབ་སེམས་དཔའི་ཆོས་བཞི་དང་ལྡན་ན༔ སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ༔ བཞི་གང་ཞེ་ན་འདི་ལྟ་སྟེ་རྣམ་པར་སུན་འབྱིན་པའི་སྟོབས་དང་༔ གཉེན་པོ་ཀུན་ཏུ་སྤྱོད་པའི་སྟོབས་དང་༔ ཉེས་པ་ལས་ངེས་པར་ལྡོག་པའི་སྟོབས་དང་༔ རྟེན་གྱི་སྟོབས་སོ༔ དེ་ལ་རྣམ་པར་སུན་འབྱིན་པ་ནི་སྡིག་པ་མི་དགེ་བའི་ལས་ལ་འགྱོད་པ་དང་ལྡན་པ།
གཉེན་པོ་ཀུན་ཏུ་སྤྱོད་པའི་སྟོབས་ནི་བཤགས་པ་ལ་བརྩོན་པ༔ ཉེས་པ་ལས་ལྡོག་པ་ནི་སྡིག་པ་ཕྱིན་ཆད་མི་བྱེད་པའི་སྡོམ་པ་ཡང་དག་པར་བསྲུངས་བ༔ རྟེན་ནི་སངས་རྒྱས་དང་ཆོས་དང་དགེ་འདུན་དང་རྟག་ཏུ་མི་འབྲལ་བའོ༔ བྱམས་པ་བྱང་ཆུབ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན༔ སྡིག་པ་ཐམས་ཅད་ཟིལ་གྱིས་གནོན་ཅིང་སྤང་བར་འགྱུར་རོ༔ ཞེས་གསུངས་སོ༔ དེ་ནས་སྟོབས་བཞི་གཅིག་ཏུ་བསྡུས་ནས་ཉམས་སུ་ལེན་ཏེ༔ ཚེ་རབས་ཐོག་མེད་ནས་བསགས་པའི་སྡིག་ལྟུང་ཐམས་ཅད་བཙན་དུག་ཁོག་ཏུ་ཤོར་བ་ལྟར་འགྱོད་པ་དྲག་པོ་དང་༔ ཕྱིན་ཆད་དེ་ལྟར་མི་བྱ་བར་སེམས་ཡི་དམ་དུ་བྱས་ལ༔ རྟེན་གྱི་སྟོབས་ནི་དཀོན་མཆོག་ཀུན་འདུས་ཐུགས་རྗེ་ཆེན་པོ་བསྒོམ༔ གཉེན་པོའི་སྟོབས་ནི་ཡི་གེ་བཅུ་པའམ་དྲུག་པ་བཟླས་པ་ཡིན་ཏེ༔ ཐུགས་རྗེ་ཆེན་པོ་བསྒོམས་པས་སྡིག་པ་འདག་པ་ནི༔ ཕྱག་སྟོང་སྤྱན་སྟོང་གི་གཟུངས་ལས༔ སྤྱན་རས་གཟིགས་ཀྱི་མཚན་ནས་བརྗོད་ན་ཡང་སྡིག་སྒྲིབ་གྲངས་མེད་པ་འབྱོང་ཞིང་༔ བསོད་ནམས་དཔག་ཏུ་མེད་པ་ཐོབ་སྟེ་འདི་ནས་འཆི་འཕོས་ནས་ཀྱང་བདེ་བ་ཅན་དུ་སྐྱེ་བར་འགྱུར་རོ༔ ཞེས་དང་༔ གདོང་
བཅུ་གཅིག་པའི་མདོ་ལས༔ ང་ཡི་མིང་ནས་བརྗོད་ཅིང་དྲན་པར་གྱུར་ན༔ གནོད་པ་ཐམས་ཅད་དང་བྲལ་བར་འགྱུར༔ སྡིག་སྒྲིབ་ཐམས་ཅད་བྱང་བར་འགྱུར་རོ༔ འཇིགས་པ་ཐམས་ཅད་ལས་ཐར་བར་འགྱུར་རོ༔ གདོན་བགེགས་ཐམས་ཅད་ལས་ཐར་ཞིང་སྐྱོབ་པར་འགྱུར་རོ༔ ལེགས་པའི་ཡོན་ཏན་ཐམས་ཅད་འཕེལ་བར་འགྱུར༔ བཀྲ་མི་ཤིས་པ་ཐམས་ཅད་ནུབ་པར་འགྱུར༔ ཞེས་དང་༔ པདྨ་རྒྱལ་པོའི་རྒྱུད་ལས༔ ཐུགས་རྗེ་ཆེན་པོའི་སྐུ་བསྒོམ་ཚུལ་གསུངས་ནས༔ བསྒོམ་དང་ཡིད་ལ་དྲན་པས་ཀྱང་༔ མཚམས་མེད་སྒྲིབ་པ་དག་པར་བྱེད༔ ཅེས་དང་༔ འཕགས་པ་སྤྱན་རས་གཟིགས་ཞལ་བཅུ་གཅིག་པའི་གཟུངས་ལས༔ བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་གསོལ་པ༔ བཅོམ་ལྡན་འདས་བདག་གི་མིང་འཛིན་པ་དེ་ནི་དོན་མཆིས་ཏེ༔ སངས་རྒྱས་བྱེ་བ་ཕྲག་འབུམ་གྱི་མིང་འཛིན་པ་བས་ལྷག་གོ༔ བདག་གི་མིང་འཛིན་པའི་སེམས་ཅན་ཐམས་ཅད་ནི་ཕྱིར་མི་ལྡོག་པ་ཉིད་ལ་གནས་པར་འགྱུར་རོ༔ བྲོ་ནད་ཐམས་ཅད་ལས་ཡོངས་སུ་ཐར་བར་འགྱུར་རོ༔ སྒྲིབ་པ་ཐམས་ཅད་དང་ལུས་ངག་
ཡིད་གསུམ་གྱི་ཉེས་པར་སྤྱོད་པ་ཐམས་ཅད་ལས་ཡོངས་སུ་ཐར་བར་འགྱུར་བ་ལགས་སོ༔ ཞེས་གསུངས་ཤིང་༔ ་སྔགས་རྣམས་གང་ཡིན་མིང་དེ་ཉིད༔ ཅེས་པས་ཡི་གེ་དྲུག་པ་སྒྲ་འགྱུར་ལྟར་བྱས་ན་ནོར་བུ་པདྨ་འཛིན་པ་སྟེ་ཐུགས་རྗེ་ཆེན་པོའི་མཚན་ཡིན་ལ༔ དེ་ལྟར་ཐུགས་རྗེ་ཆེན་པོ་ཡིད་ལ་དྲན་ཞིང་བསྒོམ་པ་ནི་སྡིག་པ་བཤགས་པའི་རྟེན་གྱི་སྟོབས་མཆོག་ཡིན་ལ༔ སྤྱིར་དགེ་བ་གང་བྱས་ཀྱང་སྡིག་པའི་གཉེན་པོ་ཡིན་མོད་ཀྱི༔ ཁྱད་པར་ཡི་གེ་བཅུ་པའམ་དྲུག་པའི་རིག་སྔགས་ཆེན་པོ་འདི་ནི༔ སྡིག་པ་བཤགས་པའི་གཉེན་པོ་ཀུན་ནས་སྤྱོད་པའི་སྟོབས་ཀྱི་མཆོག་དམ་པ་ཡིན་ཏེ༔ ཐུགས་རྗེ་ཆེན་པོ་པདྨ་རྒྱལ་པོའི་རྒྱུད་ལས༔ ཨོཾ་མ་ཎི་པདྨེ་ཧཱུྃ༔ ཐེབ་གཅིག་མོས་པས་བརྗོད་པ་ན༔ སེམས་ཅན་དམྱལ་བའི་ནད་ལས་ཐར༔ ཐེབ་གཉིས་བརྗོད་པས་ཡི་དྭགས་ཀྱི༔ འགྲོ་བའི་སྒོ་ཡང་འགགས་པར་འགྱུར༔ གསུམ་བརྗོད་དུད་འགྲོའི་འགྲོ་བ་འགགས༔ འདོད་པའི་ཡོན་ཏན་ལྔ་སྐྱེད་ཀྱང་༔ འདི་དང་མ་བྲལ་གཙང་མར་གནས༔ ཞེས་དང་༔ མཚན་བརྒྱ་རྩ་བརྒྱད་པའི་མདོ་ལས༔ བཅོམ་ལྡན་འདས་ཀྱིས་བཀའ་སྩལ་པ་རིགས་ཀྱི་བུའམ་རིགས་ཀྱི་བུ་མོ་གང་
ལ་ལ་ཞིག་གིས་འཕགས་པ་སྤྱན་རས་གཟིགས་ཡིད་ལ་བྱས་ནས༔ ཨོཾ་མ་ཎི་པདྨེ་ཧཱུྃ༔ ཞེས་བཟླས་བརྗོད་བྱས་ན་ངན་སོང་གསུམ་དུ་མི་སྐྱེ༔ མནར་མེད་པར་མི་འགྲོའོ༔ དེའི་ལུས་ལ་མཛེ་དང་ཤུ་བ་དང་གཡེམ་པ་དང་འབྲོས་དང་བས་ལྡག་དང་གློ་བ་ན་བ་དང་དབུགས་མི་བདེ་བ་དང་ནད་ཐམས་ཅད་ལས་ཐར་བར་འགྱུར་རོ་སྐྱེས་སོ་ཅོག་ཏུ་སྐྱེ་བ་དྲན་པར་འགྱུར་རོ༔ འཆི་བའི་ཚེ་བདེ་བ་ཅན་དུ་སྐྱེ་བར་འགྱུར་རོ༔ ཞེས་དང་༔ མདོ་སྡེ་ཟ་མ་ཏོག་བཀོད་པ་ཆེན་པོ་ལས༔ བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ༔ གང་དག་ཕ་རོལ་གྱི་བུད་མེད་ལ་ཆགས་ནས་འདོད་ལོག་སྤྱོད་པ་དང་༔ སྲོག་གཅོད་པའི་ལས་དང་༔ ཕ་མ་གསོད་པ་དང་༔ དགྲ་བཅོམ་པ་གསོད་པ་དང་༔ དགེ་སློང་མ་སུན་ཕྱུང་བ་དང་༔ མཆོད་རྟེན་བཤིག་པ་དང་༔ གཙུག་ལག་ཁང་བཤིག་པ་དང་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་༔ མཚམས་མེད་པའི་པ་ཐམས་ཅད་ཀྱང་༔ ཟ་མ་ཏོག་བཀོད་པའི་ཡི་གེ་དྲུག་པ་འདིས་རྩ་བ་ནས་དག་པར་བྱེད་དོ༔ ཞེས་དང་༔ ཟ་མ་ཏོག་གི་སྒྲུབ་ཐབས་རྒྱ་གཞུང་ལས༔ ཨོཾ་མ་ཎི་
པདྨེ་ཧཱུྃ༔ ཡི་གེ་འབུམ་དུ་བཟླས་སོ༔ གཉིས་པ་དང་གསུམ་པས་སྡིག་པ་དག་པར་འགྱུར་རོ༔ མཚམས་མེད་པ་ལྔ་བྱས་པས་ཀྱང་བྱེ་བ་བཟླས་པས་དངོས་གྲུབ་ཏུ་འགྱུར་རོ༔ ཞེས་དང་༔ འཇིག་རྟེན་འདི་སྒྲུབ་ཐབས་རྒྱ་གཞུང་ལས༔ ཨོཾ་མ་ཎི་པདྨེ་ཧཱུྃ༔ ཡི་གེ་འབུམ་བཟླས་པས་སྡིག་པ་དག་པར་འགྱུར་རོ༔ གཉིས་པ་དང་གསུམ་གྱིས་རྨི་ལམ་དུ་མཐོང་བར་འགྱུར་རོ༔ བྱེ་བ་བཟླས་ནས་མཚམས་མེད་པ་ལྔ་བྱས་པས་ཀྱང་འགྲུབ་པར་འགྱུར་རོ༔ ཞེས་དང་༔ པདྨ་ཟབ་པའི་རྒྱུད་དང་གྲུབ་ཆེན་ཛ་ལེནྡྷ་རའི་རྒྱ་གཞུང་གཉིས་ཀ་ལས༔ ལྷ་ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་༔ སྔགས་ཡི་གེ་དྲུག་པའམ་བཅུ་པ་གསུངས་ནས༔ དེ་ལྟར་བསྒོམ་པའི་བྱིན་རླབས་ནི༔ བདེ་བར་གཤེགས་པ་ཐམས་ཅད་ཀྱིས༔ བྱིན་གྱིས་བརླབ་པ་རྒྱུན་མི་འཆད༔ ལུས་ངག་ཡིད་གསུམ་བདེ་བ་དང་༔ ནམ་ཡང་འབྲལ་བར་མི་འགྱུར་རོ༔ ལྟུང་བ་རྣམས་ཀྱིས་མི་གོས་སོ༔ ཆོས་ཀྱི་རྩ་བ་འདི་ཟིན་ནས༔ ཡན་ལག་ཐམས་ཅད་འདུས་པ་ཡིན༔ ཞེས་གསུངས་པའི་ཕྱིར་རོ༔ དེ་ལ་འདི་ཁྲོམ་ཆོས་སུ་བྱེད་ན་ཐུགས་རྗེ་ཆེན་པོ་འབུ་སུ་ཀུའི་ཏིང་ངེ་འཛིན་གྱི་དབང་བསྐུར་ཏེ༔ འགྲོ་འདུལ་
དཀར་པོ་ཕྱག་བཞི་པར་བསྒོམས་པས་འཕྲུག་ཡངས་ཏེ་ཟ་མ་ཏོག་ལ་སོགས་པ་ཕྱི་མདོ་ལུགས་དང་མཐུན་པས་སྔགས་ཀྱང་ཡི་གེ་དྲུག་པར་བཟླས་ཏེ༔ ཐུགས་རྗེ་ཆེན་པོ་གསང་འདུས་རྒྱུད་ལས༔ ཕྱི་ལྟར་བཟླས་པས་ཡི་གེ་དྲུག༔ སྙན་འཇམ་རྨ་བྱའི་མགྲིན་ལྟར་བཟླས༔ ཨོཾ་མ་ཎི་པདྨེ་ཧཱུྃ༔ མདོ་ཡི་ལུགས་སུ་ཤེས་པར་བྱ༔ ཞེས་གསུངས་སོ༔ འདི་ཉུང་ཁྲིད་དུ་བྱེད་ན་ཐུགས་རྗེ་ཆེན་པོ་སྐྱེའུ་པའི་ལུགས་ཀྱི་དབང་རྒྱས་པར་བསྐུར་ནས༔ ལྷ་རྒྱལ་བ་རྒྱ་མཚོ་བཞེངས་ཐབས་རང་གཞུང་ལྟར་དུ་བསྒོམ་པར་བྱའོ༔ རྒྱལ་བ་རྒྱ་མཚོ་ལྷ་ལྔའི་དབང་ཙམ་བསྐུར་ནས་རྒྱལ་བ་རྒྱ་མཚོ་སྐྱིལ་ཀྲུང་ཅན་བསྒོམས་ལ༔ དེ་གཉིས་གང་བྱེད་ཀྱང་སྔགས་ཡི་གེ་བཅུ་པ་བཟླས་ཏེ༔ འདི་ཅུང་ཞིག་གཉན་པའང་ཡིན་ཏེ༔ ནང་ལྟར་ཟབ་མོ་ཡི་གེ་བཅུ༔ འབྲུག་སྟོང་ལྡིར་བ་ལྟ་བུར་བཟླས༔ ༀ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ༔ གསང་སྔགས་ནང་ལྟར་ཤེས་པར་བྱ༔ ཞེས་གསུངས་སོ༔ དེ་ལ་དམིགས་པ་རྒྱས་བསྡུས་གཉིས་ཏེ༔ དབང་པོ་རྣོན་པོས་རྒྱས་པར་བསྒོམ་པ་ནི༔ རང་གིས་ཐུགས་རྗེ་ཆེན་པོ་ལ་དད་གུས་རྩེ་གཅིག་པས༔ མ་ལུས་སེམས་ཅན་སོགས་སྤྱན་
འདྲེན་ཤོ་ལོ་ཀའམ་མེད་ཀྱང་རུང་༔ ཨོཾ་མ་ཎི་པདྨེ་ཧཱུྃ་བཛྲ་ས་མཱ་ཛ༔ ཞེས་ལག་པ་བསྣོལ་ཏེ་སེ་གོལ་བརྡབས་ནས་མཛུབ་མོ་ལྕགས་ཀྱུ་ལྟར་དཔུང་པར་གདེང་བ་རྡོ་རྗེ་བསྡུ་བའི་སྔགས་རྒྱ་བྱས་པས༔ བདེ་བ་ཅན་དང་པོ་ཏ་ལ་སོགས་པ་སངས་རྒྱས་ཀྱི་ཞིང་ཁམས་ཐམས་ཅད་ནས༔ འཕགས་པ་སྤྱན་རས་གཟིགས་དཔག་ཏུ་མེད་པ་བྱོན་ནས༔ སྐུ་གཅིག་ཏུ་གི་སྤྱི་བོར་བཞེངས་ཐབས་སུ་བཞུགས་པར་གྱུར་པ་ནི༔ སྐུ་མདོག་དཀར་པོའམ༔ དམར་པོ་ཞལ་གཅིག་ཞི་ཞིང་འཛུམ་པ་རལ་པའི་ཐོར་ཚུགས་ཀྱི་རྩེར་སྣང་བ་མཐའ་ཡས་བཞུགས་པ༔ ཕྱག་བཞི་དང་པོ་གཉིས་ཐལ་མོ་སྦྱར་བ༔ འོག་མ་གཉིས་ཕྲེང་བ་དང་པདྨ་འཛིན་པ༔ དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་འོད་ཟེར་འབར་བའི་ཐུགས་ཀར་ཟླ་བ་ལ་ཧྲི༔ཡིག་སྔགས་ཀྱིས་བསྐོར་བར་བསྒོམས་ལ༔ དེའི་དྲུང་དུ་སྡིག་ལྟུང་ཐམས་ཅད་བཤགས་པའི་བསམས་པས༔ བཅོམ་ལྡན་རྩ་བ་གསུམ་པོ་ལ༔ འཁོར་བའི་ཉོན་མོངས་དབང་གྱུར་པས༔ མི་ཤེས་ཐུགས་དང་འགལ་གྱུར་ཏེ༔ མཐོལ་ལོ་བཤགས་སོ་ས་མ་ཡ༔ ཞེས་ལུས་ཀྱི་ལས་ནི་རྣམ་པ་གསུམ༔ ཞེས་སོགས་བཤགས་ཚིག་
གང་ཤེས་བརྗོད༔ ཁྲོམ་ལ་རྗེས་ཟློས་ཡང་ལན་གསུམ་བཅུག༔ དེ་ལྟར་གསོལ་བ་བཏབ་པས་ཧྲཱིཿཡིག་སྔགས་ཕྲེང་དང་བཅས་པ་ལས་བདུད་རྩིའི་རྒྱུན་ངང་ཁྲ་ལ་ལ་བབ༔ སྐུ་ལུས་ལྟེམ་གྱིས་གང་ཞབས་ཀྱི་མཐེ་བོང་ནས་ཆང་རྫ་འི་ཐེམ་བུ་རྡོལ་བ་ལྟར་ངང་རྒྱང་རྒྱང་བབས་པས༔ རང་གི་སྤྱི་བོ་ཚངས་བུག་ནས་ཞུགས་པས་ལུས་ཐམས་ཅད་གང་༔ ཕྱི་ནས་ཀྱང་མར་ཞམ་པས་ཕྱི་ནང་གཉིས་ཀ་ནས་བཀྲུས་པས༔ སྡིག་སྒྲིབ་ནད་གདོན་ཉམས་ཆག་ཅི་ཡོད་པ་ཐམས་ཅད་དུད་ཁུའམ་སོལ་ཁུ་ལྟར་འོག་གི་སྒོ་གཉིས་དང་བ་སྤུའི་བུ་ག༔ རྐང་པའི་སེན་ཕྲག་ནས་ནག་ནུ་རུ་རུ་ཐོན༔ ས་རིམ་པ་དགུའི་འོག་ཏུ་མར་སོང་ནས༔ ལས་ཀྱི་གཤིན་རྗེ་ཁ་གདངས་པའི་ནང་དུ་སོང་བས་ངོམས་ཤིང་ཚིམ་སྟེ་ཚེ་སྐྱིན་སྲོག་གླུད་དུ་གྱུར༔ ལུས་བདུད་རྩིས་གང་བས་ལུས་ཤེལ་སྒོང་གཡའ་དག་པ་ལྟར་གྱུར་ནས༔ ཐ་མལ་པའི་ལུས་མ་ཡིན་ཐུགས་རྗེ་ཆེན་པོ་སྐུའི་རྣམ་པར་གྱུར༔ བདུད་རྩི་ཡར་འཁྱིལ་པས་ཐུགས་རྗེ་ཆེན་པོའི་ཞབས་ལ་རེག་པ་དང་༔ ཐུགས་རྗེ་ཆེན་པོས་རིགས་ཀྱི་བུ་ཁྱོད་ཀྱི་སྡིག་ལྟུང་ཐམས་ཅད་དག་གོ་ཞེས་དབུགས་དབྱུང་བའི་གསུང་བྱོན་པ་དང་ལྷན་ཅིག་
ཚངས་བུག་ནས་ཞུགས་ཏེ༔ སྙིང་གར་ཞུགས་པ་ལས༔ སྐུའི་རྣམ་པ་འོད་དུ་ཞུ་ནས༔ ཟླ་བའི་དཀྱིལ་འཁོར་ཉ་རྒྱས་པའི་ལྟེ་བར་ཧཱུྃཡིག་དམར་པོའམ་དཀར་པོ་ལ༔ ཡི་གེ་བཅུ་པའམ་དྲུག་གིས་རམ་མེར་བསྐོར་བར་གྱུར་ཏེ༔ དེ་ཡང་ཧྲཱིཿཡིག་གི་སྟོད་སྨད་བར་གསུམ་དུ་སྔགས་ཕྲེང་དཀར་དམར་མཐིང་ག་གསུམ་གྱིས་བསྐོར་བར་བསྒོམས༔ དང་པོ་སྔགས་ཕྲེང་དཀར་པོ་ལས་འོད་ཟེར་དཀར་པོ་འཕྲོས༔ ལུས་གང་བས་ལུས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་མུན་པ་ལ་ཟླ་བ་ཤར་བ་ལྟར་དག༔ འོད་ཟེར་དཀར་པོ་ཕྱོགས་བཅུར་འཕྲོས་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ལ་ཕོག༔ སྐུའི་དམ་ཚིག་ཉམས་ཆག་ཐམས་ཅད་བསྐང་༔ སྐུའི་བྱིན་རླབས་དངོས་གྲུབ་བསྡུས་ནས་རང་གི་ལུས་ལ་ཐིམ་པས་ལུས་འཆི་བ་མེད་པའི་དངོས་གྲུབ་ཐོབ༔ ཡང་འོད་ཟེར་དཀར་པོ་འཕྲོས་སེམས་ཅན་ཐམས་ཅད་ལ་ཕོག་པས་ལུས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་སངས་སེ་དག༔ ཐམས་ཅད་ལུས་བདེ་བ་དང་ལྡན་པར་གྱུར༔ སྔགས་ཕྲེང་དམར་པོ་ལས་འོད་ཟེར་དམར་པོ་འཕྲོས་ལུས་གང་བས་ངག་གི་སྒོ་ནས་བསགས་པའི་སྡིག་
སྒྲིབ་མུན་པ་ལ་ཉི་མ་ཤར་བ་ལྟར་དག༔ འོད་ཟེར་ཕྱིར་འཕྲོས་པས་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ལ་ཕོག་པས་གསུང་གི་ཉམས་ཆག་ཐམས་ཅད་བསྐང་༔ གསུང་གི་བྱིན་རླབས་དངོས་གྲུབ་བསྡུས་ནས་རང་གི་ངག་ལ་ཐིམ་པས༔ འགགས་མེད་གསུང་གི་དངོས་གྲུབ་ཐོབ༔ ཡང་འོད་ཟེར་དམར་པོ་འཕྲོས་ནས་སེམས་ཅན་ཐམས་ཅད་ལ་ཕོག་པས༔ ངག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་དག༔ ངག་ཆོས་སྨྲ་བར་གྱུར༔ ཡང་སྔགས་ཕྲེང་མཐིང་ག་ལས་འོད་ཟེར་མཐིང་ག་འཕྲོས༔ ལུས་གང་བས་སེམས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་ནམ་མཁའ་སྤྲིན་དང་བྲལ་བ་ལྟར་དག༔ འོད་ཟེར་ཕྱིར་འཕྲོས་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ལ་ཕོག་པས་ཐུགས་ཀྱི་དམ་ཚིག་ཉམས་ཆག་བསྐང་༔ ཐུགས་ཀྱི་བྱིན་རླབས་དངོས་གྲུབ་ཐམས་ཅད་བསྡུས་ནས་རང་གི་སེམས་ལ་ཐིམ་པས་འཁྲུལ་མེད་ཐུགས་ཀྱི་དངོས་གྲུབ་ཐོབ༔ ཡང་འོད་ཟེར་སྔོན་པོ་འཕྲོས་པས་སེམས་ཅན་ཐམས་ཅད་ལ་ཕོག་པས་སེམས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་དག༔ སེམས་
བདེ་སྟོང་གི་ཏིང་ངེ་འཛིན་སྐྱེས༔ འོད་ཟེར་དཀར་དམར་མཐིང་གསུམ་པོ་ཚུར་འདུས་སྔགས་ཕྲེང་གསུམ་ལ་ཐིམ་པས༔ སྔགས་ཕྲེང་གསུམ་གཅིག་ཏུ་འདྲེས་ཏེ་དཀར་དམར་སྔོ་བའི་མདངས་ཅན་དུ་གྱུར༔ དེ་ལས་བདུད་རྩིའི་རྒྱུན་ངང་ཁྲ་ལ་ལ་བབས་པས་ལུས་གང་༔ སྡིག་སྒྲིབ་ཉམས་ཆག་ཐམས་ཅད་འོག་སྒོ་གཉིས་དང་བ་སྤུའི་བུ་ག་ནས་ནག་ཉིལ་ཉིལ་ཕྱིར་ཐོན༔ ལུས་ཤེལ་སྒོང་ལྟར་ཕྱི་གསལ་ནང་གསལ་གཟི་བརྗིད་འོད་དུ་འབར་བར་བསྒོམ་པ་ནི་རྒྱས་པའོ༔ ཡང་བློ་རྨོངས་པ་དག་གི་དམིགས་པ་མང་ན་ཟིན་དཀའ་ཞིང་གང་ཞིག་སངས་རྒྱས་ཡིད་བྱེད་པ་ཞེས་སྤྱན་འདྲེན་ཡང་མི་དགོས་པས༔ རང་ལུས་ཐུགས་རྗེ་ཆེན་པོའི་སྐུ་ཡིན་སྙམ་པའི་མོས་པ་ཙམ་བྱས་ལ་རང་གི་སྙིང་གར་ཟླ་བའི་སྟེང་དུ་ཧྲཱི༔ཡིག་དཀར་ལ་དམར་བའི་མདངས་ཅན་གྱི་མཐར་སྔགས་ཡི་གེ་དྲུག་པས་བྲམ་མེར་བསྐོར་བ་དེ་ཉིད་ཐུགས་རྗེ་ཆེན་པོ་དངོས་ཡིན་པའི་ངེས་ཤེས་བྱས་ལ༔ དེའི་དྲུང་དུ་སྡིག་ལྟུང་ཐམས་ཅད་བཤགས་བསམ་པ་བྱས་པས་ཧྲཱི༔ཡིག་སྔགས་ཕྲེང་དང་བཅས་པ་ལས་བདུད་རྩིའི་རྒྱུན་འོ་མ་ལྟ་བུ་བབ༔ རང་ལུས་ཐམས་ཅད་ངང་ལྡེམས་སེ་གང་བས་སྡིག་སྒྲིབ་ནད་གདོན་ཐམས་ཅད་ནག་ནུ་རུ་
རུ་འོག་སྒོ་དང་རྐང་ཞབས་ནས་ཐོན་ཏེ་ས་འོག་ཏུ་སོང་བས༔ རང་ལུས་དྲི་མ་མེད་པ་ཤེལ་སྒོང་ལྟར་གྱུར་པར་བསྒོམ་མོ༔ དེ་དག་གི་ཚེ་ཡིག་བཅུའམ་ཡིག་དྲུག་སྐབས་སུ་གང་བབ་བརྒྱ་སྟོང་ལ་སོགས་པ་ཐུན་རེ་ལ་བཟླས་ནས༔ ཐུན་མཚམས་སུ་རང་ལུས་ཐུགས་རྗེ་ཆེན་པོ་འོད་དུ་ཞུ་ནས་སྔགས་ཕྲེང་ལ་ཐིམ༔ སྔགས་ཕྲེང་ཧྲཱིཿལ་ཐིམ༔ ཧྲ྄ཱིཿཡིག་ཚེག་དྲག་ར་བཏགས་ལ༔ ར་བཏགས་ཧ་ཁོག་ལ༔ ཧ་ཁོག་གི་གུ་ལ༔ གི་གུ་ཡང་ཞུ་ནས་ཐིག་ལེ་དཀར་དམར་ཡུངས་ཀར་ཙམ་ལ་སེམས་ཡུན་རིང་བཟུང་༔ དེའང་ཇེ་ཆུང་དུ་ཡལ་ནས་སྟོང་པ་ཉིད་དུ་གྱུར་པའི་ངང་ལ་སེམས་མ་བཅོས་པར་རང་ལུགས་སུ་བཞག་སྟེ༔ ལས་རྣམ་པར་དག་པའི་མདོ་ལས༔ གང་ཞིག་བཤགས་པ་བྱེད་འདོད་ན༔ དྲང་པོར་འདུག་ལ་ཡང་དག་ལྟོས༔ ཡང་དག་ཉིད་ལ་ཡང་དག་བལྟ༔ འདི་ནི་འགྱོད་ཚང་མཆོག་ཡིན་ནོ༔ ཞེས་དང་༔ ཐར་པ་ཆེན་པོའི་མདོ་ལས༔ བཅོམ་ལྡན་འདས་ཀྱིས་བཀའ་སྩལ་པ༔ སྡིག་པའི་རང་བཞིན་ནང་ན་ཡང་མི་གནས༔ ཕྱི་རོལ་ན་ཡང་མི་གནས༔ བར་ན་ཡང་མི་གནས་ཏ༔ སེམས་རྣམ་པར་གྲོལ་བའི་ཕྱིར༔ སྡིག་པའི་རང་
བཞིན་རྣམ་པར་གྲོལ་ལོ༔ སེམས་སྟོང་པ་ཉིད་ཀྱི་ཕྱིར་སྡིག་པའི་རང་བཞིན་ནི་སྟོང་པ་ཉིད་དོ༔ དད་པའི་མཐུ་ཆེ་བའི་ཕྱིར་བསོད་ནམས་ཀྱི་མཐུ་ཡང་ཆེའོ༔ ཞེས་གསུངས་སོ། དེ་ལྟར་ཐུན་བཞིའམ་དྲུག་ཏུ་སྒོམས་ལ་ཡི་གེ་དྲུག་པའམ་བཅུ་པ་ཟློས་ཤིག༔ དམིགས་པ་མ་ཡེངས་པར་འབུམ་ཕྲག་གཅིག་གམ་གཉིས་སམ་དྲུག་གམ་བྱེ་བ་བཟླས་ན་སྡིག་པ་མཚམས་མེད་ཀྱང་དག་པར་བཤད་དེ༔ འདིའི་བྱེ་བ་ནི་མངོན་པ་ནས་གསུངས་པའི་བྱེ་ཆེན་ཡིན་ཏེ༔ བརྒྱ་ཚོ་བཅུ་ནི་སྟོང་ཚོ༔ སྟོང་ཚོ་བཅུ་ནི་ཁྲི་ཚོ༔ ཁྲི་ཚོ་བཅུ་ནི་འབུམ་ཚོ༔ འབུམ་ཚོ་བཅུ་ནི་ས་ཡ༔ ས་ཡ་བཅུ་ནི་བྱེ་ཆེན༔ དེ་ཙམ་བཟླས་ན་སྡིག་པ་དག་པའི་རྟགས་འབྱུང་སྟེ༔ བསྐུལ་བྱེད་ཀྱི་གཟུངས་ལས༔ རྨི་ལམ་ན་ཡང་ཟས་ངན་སྐྱུགས་པ་དང་༔ ཞོ་དང་འོ་མ་འཐུང་བ་དང་༔ སྐྱགས་པ་དང་༔ ཉི་མ་དང་ཟླ་བ་མཐོང་བ་དང་༔ ནམ་མཁའ་ལ་འགྲོ་བ༔ མེ་འབར་བ༔ མ་ཧེ་དང་མི་ནག་ཐུབ་པ༔ དགེ་སློང་དང་དགེ་སློང་མའི་དགེ་འདུན་མཐོང་བ་དང་༔ འོ་མ་འབྱུང་བའི་ཤིང་དང་༔ གླང་པོ་ཆེ་དང་ཁྱུ་མཆོག་དང་༔ རི་དང་སེང་གེའི་ཁྲི་དང་ཁང་བཟང་དག་གི་སྟེང་དུ་འཛེགས་པ་དང་༔ ཆོས་ཉན་
པ་རྨིས་ན་སྡིག་པ་དང་བྲལ་བར་འགྱུར་རོ༔ ཞེས་གསུངས་སོ༔ དེ་ཡང་སྡིག་པ་བཤགས་ན་དག་པའི་ལོ་རྒྱུས་ནི༔ རྒྱལ་བུ་དགེ་མཐོང་གིས་མི་སུམ་སྟོང་ཀླུ་བསད་པ་དང་༔ ཁྱེའུ་བདེ་བྱེད་ཀྱིས་མ་བསད་པ་དང་༔ ཅུང་དགའ་བོ་བུད་མེད་ལ་ལྷག་པར་ཆགས་པ་དང་༔ རྒྱལ་བུ་མཐོང་ལྡན་གྱིས་ཕ་བསད་པ་དང་༔ སོར་ཕྲེང་ཅན་གྱིས་མི་དགུ་བརྒྱ་དང་གོ་དགུ་བསད་པ་རྣམས་ཀྱང་༔ སྟོབས་བཞི་པོ་རེ་རེས་དག་ནས་ཡོན་ཏན་ཐོབ་པར་བཤད་ན༔ སྟོབས་བཞི་གཅིག་ཏུ་དྲིལ་བ་འདི་ལྟར་ཉམས་སུ་བླངས་ན་སྨོས་ཅི་དགོས་ཏེ༔ བཤེས་སྤྲིང་ལས༔ གང་ཞིག་སྔོན་ཆད་བག་མེད་གྱུར་པ་ལ༔ ཕྱི་ནས་བག་དང་ལྡན་པར་གྱུར་དེ་ཡང་༔ ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ༔ དགའ་བོ་སོར་ཕྲེང་མཐོང་ལྡན་བདེ་བྱེད་བཞིན༔ ཞེས་གསུངས་སོ༔ དཔུང་བཟང་གིས་ཞུས་པ་ལས༔ སོས་ཀ་ནགས་མེ་མཆེད་པའི་མེ་ལྕེ་ཡིས༔ མ་བསྒྲིབས་བཞིན་དུ་ཚང་ཚིང་ཀུན་སྲེག་ལྟར༔ བཟླས་བརྗོད་མེ་ལ་ཚུལ་ཁྲིམས་རླུང་གིས་སྦྱར༔ བརྩོན་འགྲུས་ཆེན་པོའི་མེ་ཡིས་སྡིག་པ་བསྲེག༔ ཇི་ལྟར་གངས་ལ་ཉི་མའི་འོད་ཟེར་གྱིས༔ གདུང་ན་གཟི་བརྗིད་མི་
བཟོད་འགྱུ་བ་བཞིན༔ ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས༔ གདུང་ན་སྡིག་པའི་གངས་ཀྱང་ཟད་པར་འགྱུར༔ མུན་ནག་སྨག་ལ་མར་མེ་ཕྱུང་བ་ཡིས༔ མུན་ནག་མ་ལུས་སེལ་བར་བྱེད་པ་བཞིན༔ ཚེ་རབས་སྟོང་ནས་བསགས་པའི་སྡིག་པའི་མུན༔ བཟླས་བརྗོད་མར་མེས་མྱུར་དུ་སེལ་བར་བྱེད༔ ཅེས་གསུངས༔ དེ་ལྟར་བཤགས་པའི་ཐབས་མཁས་ན་སྡིག་པ་ཆེ་ཡང་བྱང་སླ་སྟེ༔ དཔེར་ན་ལྕགས་ཆེན་པོ་ལེབ་མོ་སླ་ང་ལྟ་བུར་བརྡུང་ན་ཆུའི་ཁ་ན་ལྡིང་བ་དང་འདྲ་ལ༔ བཤགས་མ་ཤེས་ན་སྡིག་པ་ཆུང་ཡང་ངན་སོང་དུ་ལྟུང་བ་སྟེ༔ ལྕགས་ཀྱི་རིལ་བུ་སྲན་མ་ཙམ་ཡང་ཆུའི་ཞབས་སུ་འགྲོ་བ་ལྟ་བུ་སྟེ༔ བཅོམ་ལྡན་འདས་ཀྱི་ཞལ་ནས༔ མཁས་ལ་སྡིག་པ་བྱས་པའི་རྣམ་སྨིན་འཕྲལ་ལ་འཛོམས༔ མི་མཁས་སྡིག་པ་བྱས་པ་དེ་ཉིད་ཐུར་དུ་འགྲོ༔ ལྕགས་ཀྱི་གོང་བུ་ཆུང་ཡང་ཆུ་ཡི་གཏིང་དུ་འགྲོ༔ དེ་ཉིད་སྣོད་དུ་བྱས་ན་ཆེ་ཡང་ཁ་ན་འཕྱོ༔ ཞེས་གསུངས་སོ༔ མཁས་པས་ཀྱང་སྡིག་ལྟུང་བྱས་ཀྱང་ཨའུ་ཙི་བཤགས་ཆོག་སྙམ་ཞིང་བྱས་ན་ནི་མ་ཤེས་པས་བྱས་པ་ལས་ཀྱང་ལྕི་བས་དག་དཀའ་སྟེ༔ ལུང་ལས༔ མཁས་པས་སྡིག་པ་བྱས་པ་རྣམས་
བཀའ་སོགས་བསླུས་པས་ཤིན་ཏུ་ལྗི༔ བླུན་པོས་སྡིག་བྱས་ལྕི་བ་ཡོད༔ རང་བཞིན་བླུན་པ་ཉིད་ཀྱིས་སོ༔ ཞེས་དང་༔ དེ་གཉིས་ཀྱི་དོན་རྒྱ་གར་གྱི་པཎྜི་ཏ་མཚོ་སྐྱེས་ཀྱི་གསུངས་ལས༔ ཕྱིར་ཞིང་སྡོམ་ལ་དགའ་བ་ནི༔ ཉེས་པ་ཆེ་ཡང་ཡང་བར་བཤད༔ བཤགས་ཀྱང་འདོད་པར་འཛིན་བྱེད་ན༔ ཉེས་པ་ཆུང་ཡང་ལྡི་བར་བཤད། ཁྱད་དུ་བསད་ནས་མ་བཤགས་ན༔ ཉེས་པ་ཆུང་ཡང་ལྗི་བར་བཤད༔ རྟག་ཏུ་འཛེམ་ཞིང་འཇིགས་གྱུར་ན༔ ཉོན་མོངས་ཟིལ་གནོན་ཉེས་བྱུང་ཡང་༔ ཉེས་པ་ཆེ་བར་མི་འགྱུར་རོ༔ ཞེས་གསུངས་སོ༔ དེ་ཡང་ཆོས་སྒོར་ཞུགས་ནས་ཉེས་ལྟུང་གིས་མ་གོས་ན་མཆོག་ཡིན་གྱི༔ གལ་ཏེ་ཉེས་ལྟུང་ཕྲ་ཞིབ་བྱུང་ན་བཤགས་པར་བྱ་བ་གལ་ཆེ་སྟེ༔ ས་ཡི་སྙིང་པོ་འཁོར་ལོ་བཅུ་པའི་མདོ་ལས༔ ང་ཡི་བསྟན་པ་ལ་སྐྱེས་བུ་དམ་པ་གཉིས་ཡོད་དེ༔ གཅིག་ནི་རང་བཞིན་གྱིས་དག་པས་དང་པོ་ནས་མི་དགེ་བ་མི་བྱེད་པའོ༔ གཅིག་ནི་བྱས་སུ་ཟིན་ཡང་འཛེམ་པ་དང་ངོ་ཚ་བས་སོ་སོར་འཆགས་པའོ༔ ཞེས་གསུངས་སོ༔ དེ་ཡང་ཉེས་ལྟུང་ཕྲ་ཞིབ་བྱུང་བ་ཡང་འདི་ཙམ་མི་ཏོ་སྙམ་དུ་མི་བཞག་འཕྲལ་དུ་སྦྱང་དགོས་ཏེ༔ ལྟ་
བ་རྣམ་པར་དག་ཀྱང་སྤྱོད་པ་ཕྲ་ཞིབ་ཉམས་པས་ཀླུར་སྐྱེ་བ་རྒྱ་མཚོས་ཞུས་པའི་མདོ་ལས་གསུངས་པ་དང་༔ བཤགས་པ་མ་ཐེངས་ན་སྡིག་ལྟུང་གང་ཡིན་དེ་ཞག་རེ་ལ་སྐྱེད་རེ་འགྲོ་བས་ཆུང་ངུ་ཡང་ཆེན་པོར་འགྲོ་བའོ༔ ནམ་འཆི་ཆ་མེད་པས་ཀྱང་མྱུར་དུ་བཤགས་དགོས་ཏེ་སྤྱོད་འཇུག་ལས་བདག་ནི་སྡིག་པ་མ་བྱང་བར༔ སྔོན་དུ་གུམ་པར་འགྱུར་དུ་མཆི༔ ཞེས་གསུངས་སོ༔ དེ་ལྟར་སྡིག་པ་བཤགས་པའི་ཐབས་ཟབ་མོ་འདི་གེགས་སེལ་ཀྱི་མཆོག་ཀྱང་ཡིན་ཏེ༔ ཆོས་ཉམས་སུ་ལེན་པ་ན་ནད་གདོན་གེགས་གོལ་ས་ཐམས་ཅད་སྡིག་སྒྲིབ་ལས་འབྱུང་བ་ཡིན་པས༔ སྒྲིབ་པ་ལེགས་པར་བྱང་ན་བར་ཆད་ཅི་ཡང་མེད་པས་སྡིག་བྱང་སྔགས་དང་དམིགས་པ་ནི༔ ད་ལམ་ཞག་རྩེ་གཅིག་དང་༔ རྗེས་ནས་ཀྱང་རྒྱུན་དུ་མ་ཆག་པ་དང་༔་ཁྲིད་ཡུན་རིང་བྱེད་ན་འདི་རང་ལ་རྟགས་ཐོན་པ་དགོས་རྒྱུ་ཡིན་ནོ༔ དཔེར་ན་ཚོས་བྱེད་ན་ཡང་ལྭ་བ་མ་བཀྲུས་པར་ཚོས་མི་ཟ་བ་བཞིན་དུ༔ སྡིག་སྒྲིབ་གཅིག་ཨན་ཙམ་མ་བྱང་ན༔ རྟོགས་པ་མི་སྐྱེ་ངོ་སྤྱད་ཀྱང་མི་འཕྲོད༔ ཉམས་ཅུང་ཟད་སྐྱེས་པ་ཡང་གེགས་དང་གོལ་སར་འཆོར་བས་རེ་ཞིག་འདི་རང་སྒོམ་བཟླས་མཛོད༔ དེས་
ཆོས་འབྲུ་བཞི་པ་སོང་ངོ་༔ ༒ དེ་ནས་ཆོས་འབྲུ་ལྔ་པ་ནི༔ གཞུང་ལས༔ ཁྱེད་རང་རྒྱལ་བ་རྒྱ་མཚོ་ནི༔ དམར་པོ་ཞལ་གཅིག་ཕྱག་བཞི་པ༔ གཡས་གཡོན་ཕྲེང་པ་པདྨ་དང་༔ འོག་གཉིས་ཐལ་མོ་སྦྱར་བ་ནི༔ བཞེངས་པའི་སྟབས་བསྒོམ་ཡིག་དྲུག་བརྗོད༔ ཅེས་གསུངས་པའི་དོན་བཤད་ན༔ སེམས་སྟོང་ཉིད་བསྒོམ་པ་དང་༔ ལམ་ཕར་ཕྱིན་དྲུག་ལ་སྤྱོད་ཀྱང་༔ རྒྱུའི་ཐེག་པས་བསྐལ་པ་གྲངས་མེད་གསུམ་དུ་བླ་མེད་བྱང་ཆུབ་མི་ཐོབ་པ་ནི༔ ཡི་དམ་ལྷའི་བསྐྱེད་རིམ་མེད་པས་ལམ་ཐག་རིང་བ་ཡིན༔ དེས་ན་ཐབས་མང་བ་དང་དཀའ་ཚེགས་མེད་པ་དང་དབང་པོ་རྣོ་བ་སོགས་ཁྱད་པར་གསུམ་གྱི་མདོ་ལས་སྔགས་ཁྱད་པར་དུ་འཕགས་ཏེ༔ ཚུལ་གསུམ་སྒྲོན་མ་ལས༔ དོན་གཅིག་ནའང་མ་རྨོངས་དང་༔ ཐབས་མང་དཀའ་བ་མེད་པ་དང་༔ དབང་པོ་རྣོན་པོའི་དབང་བྱས་ན༔ སྔགས་ཀྱི་ཐེག་པ་ཁྱད་པར་འཕགས༔ ཞེས་གསུངས༔ དེ་ཡང་སྔགས་ཕྱི་པ་བྱ་སྤྱོད་རྣལ་འབྱོར་རྒྱུད་གསུམ་ནའང་ལྷའི་རྣམ་པ་བསྒོམ་ཙམ་ཡོད་ཀྱང་༔ ཕུང་ཁམས་སྐྱེ་མཆེད་གདོད་ནས་ལྷའི་རང་བཞིན་དུ་
མ་རྟོགས་ནས་སྐྱེ་བ་དྲུག་ཅུ་དང་བཅུ་དྲུག་དང་བདུན་སོགས་འགོར་ལ༔ གསང་སྔགས་བླ་མེད་འདི་ལ་ནི་ལམ་ཤིན་ཏུ་ཉེ་བ་སྟེ༔ སངས་རྒྱས་མཉམ་སྦྱོར་གྱི་རྒྱུད་ལས༔ བསྐལ་པ་བྱེ་བར་རྙེད་དཀའ་བའི༔ སངས་རྒྱས་ཉིད་ཀྱང་བརྩོན་ལྡན་ལཚེ་འདི་ཉིད་ལ་སྟེར་བས་ན༔ འབྲས་བུ་ཅན་གྱི་མིང་ནས་འབོད༔ ཅེས་དང་༔ སཾ་བྷུ་ཊི་ལས༔ མདོར་བསྡུས་ནས་ནི་སངས་རྒྱས་ཉིད༔ བསྐལ་པ་བྱེ་བ་གྲངས་མེད་པས༔ ཇི་སྲིད་སངས་རྒྱས་གང་ཐོབ་པ༔ གང་གི་དམ་པའི་བདེ་བ་ཁྱོད༔ སྐྱེ་བ་འདིས་ནི་ཐོབ་པར་འགྱུར༔ ཡང་ན་རྡོ་རྗེ་འཛིན་པ་ཉིད༔ ཡང་ན་འཁོར་ལོས་སྒྱུར་བའོ༔ འདིས་ནི་དངོས་གྲུབ་ཆེན་པོ་བརྒྱད༔ གཞན་ཡང་ཡིད་ལ་འདོད་པ་ཐོབ༔ ཅེས་གསུངས་སོ༔ གལ་ཏེ་བརྩོན་འགྲུས་ཆུང་བས་ཚེ་འདིར་མཆོག་གི་དངོས་གྲུབ་མ་ཐོབ་ནའང་༔ བར་དོ་ན་ངེས་པར་ལྷ་སྐུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ༔ ཡེ་ཤེས་ཐིག་ལེ་ལས༔ ཡང་ན་ལུས་འདི་སྤང་མ་ཐག༔ བརྩོན་པ་མི་ལྡན་པས་ཀྱང་འགྲུབ༔ ཅེས་གསུངས་སོ༔ ཚེ་སྟོད་སྡིག་པ་ཆེན་པོ་བྱས་ཀྱང་འདི་ལྟ་བུའི་ཆོས་སྒོར་ཞུགས་ནས་རྩེ་གཅིག་ཏུ་ཉམས་སུ་བླངས་ན་ཚེ་
འདི་ལའང་སངས་རྒྱས་ཐོབ་ནུས་ཏེ༔ དུས་འཁོར་རྩ་རྒྱུད་ལས༔ གདོལ་པ་སྨིག་མ་མཁན་ལ་སོགས༔ མཚམས་མེད་ལྔ་ནི་བྱེད་པ་རྣམས༔ སྔགས་ཀྱི་སྤྱོད་པ་རྗེས་སྤྱོད་ན༔ སྐྱེ་བ་འདི་ལ་སངས་རྒྱས་འགྱུར༔ ཞེས་དང་གསང་བ་འདུས་པར༔ སེམས་ཅན་མཚམས་མེད་ལྔ་ལ་སོགས༔ སྡིག་པ་ཆེན་པོ་བྱས་པས་ཀྱང་༔ རྡོ་རྗེ་ཐེག་པ་རྒྱ་མཚོ་སྟེ༔ ཐེག་མཆོག་འདི་ལ་འགྲུབ་པར་འགྱུར༔ ཞེས་གསུངས་སོ༔ འདི་བླ་མེད་རྡོ་རྗེ་ཐེག་པའི་ལུགས་རང་ལུས་ཕུང་ཁམས་སྐྱེ་མཆེད་ཐམས་ཅད་ཡི་དམ་གྱི་ལྷར་ངོ་སྤྱོད་པ་སྟེ༔ ཡེ་ཤེས་རྔམ་གློག་གི་རྒྱུད་ལས༔ ཕུང་པོ་ལྔ་དོན་སངས་རྒྱས་ལྔ༔ འབྱུང་བ་ལྔ་དོན་དབྱིངས་ཕྱུག་ཡུམ༔ ཁམས་དང་སྐྱེ་མཆེད་མང་པོ་ཀུན༔ སེམས་དཔའ་སེམས་མའི་དཀྱིལ་འཁོར་ཡིན༔ དེས་ན་སྲིད་གསུམ་དཀྱིལ་འཁོར་ཆེ༔ ཞེས་དང་གསང་བ་འདུས་པ་ལས༔ མདོར་ན་ཕུང་པོ་ལྔ་རྣམས་ནི་སངས་རྒྱས་ལྔར་ནི་རབ་ཏུ་གྲགས༔ རྡོ་རྗེ་སྐྱེ་མཆེད་ཉིད་དག་ཀྱང་༔ བྱང་ཆུབ་སེམས་ཀྱི་དཀྱིལ་འཁོར་མཆོག༔ ས་ནི་སངས་རྒྱས་སྤྱན་མ་ཡིན༔ ཆུ་ཡི་ཁམས་ནི་མ་མཱ་ཀི༔ དཀར་དང་སྒྲོན་མ་ཞེས་བྱ་
བར༔ མེ་དང་རླུང་དུ་རབ་ཏུ་གྲགས༔ མཁའ་དབྱིངས་རྡོ་རྗེའི་དམ་ཚིག་ནི༔ རྡོ་རྗེ་འཛིན་པ་དེ་ཉིད་ཡིན༔ ཞེས་དང་༔ རྡོ་རྗེ་མཁའ་འགྲོའི་རྒྱུད་ལས༔ ལུས་ནི་སངས་རྒྱུས་རང་བཞིན་སྐུ༔ ཆ་ཤས་བྱང་ཆུབ་ཡན་ལག་ནས༔ དེ་ཡི་བ་སྤུ་དགྲ་བཅོམ་པ༔ ཅོད་པན་རིགས་བདག་ལ་སོགས་པའོ༔ ཞེས་དང་༔ བདེ་བ་དམ་པ་རྟོགས་པར་བྱེད་པའི་རྒྱུད་ལས༔ སངས་རྒྱས་ཐམས་ཅད་ལུས་ལ་གནས༔ ལུས་ལས་གཞན་དུ་ཡོད་མ་ཡིན༔ ཞེས་དང་༔ སཾ་བྷུ་ཊི་ལས༔ རང་གི་ལུས་ལ་སངས་རྒྱས་བཞུགས༔ གཞན་དུ་གང་དུའང་སངས་རྒྱས་མེད༔ ལུས་ལས་གཞན་དུ་སངས་རྒྱས་ཉིད༔ མི་ཤེས་པ་ཡི་སྒྲིབ་པར་འདོད༔ ཅེས་གསུངས་སོ༔ དེ་ལྟར་ཡིན་པ་ལ་ཡིན་པར་ཤེས་པས༔ བསྒོམ་པ་ན་དེ་དངོས་སུ་འགྲུབ་པ་ཡིན་ཏེ༔ ལྷ་མོ་བཞིས་ཞུས་པའི་རྒྱུད་ལས༔ ཕུང་པོ་ལ་སོགས་སངས་རྒྱས་ལྔའི༔ རང་བཞིན་དངོས་ཞེས་བཤད་པ་ཡིན༔ དངོས་དེ་ངེས་པར་བསྒོམས་པ་ཡིས༔ རང་སེམས་མཐུ་ཡི་སངས་རྒྱས་འགྱུར༔ ཞེས་དང་༔ རྡོ་རྗེ་གུར་ལས༔ སངས་རྒྱས་ང་རྒྱལ་རྣལ་འབྱོར་གྱི༔ སངས་རྒྱས་ཉིད་ཡུན་རིང་མི་འགྱུར
སྟོན་པ་སུམ་ཅུ་རྩ་གཉིས་མཚན༔ མངའ་བདག་དཔེ་བྱད་བརྒྱད་ཅུར་ལྡན༔ དེ་ཕྱིར་ཐབས་དེས་བསྒྲུབ་བྱ་སྟེ༔ ཐབས་ནི་སྟོན་པའི་གཟུགས་ཅན་ནོ༔ ཞེས་དང་༔ ངེས་བརྗོད་བླ་མར༔ ལྷ་ཡི་རྣལ་འབྱོར་མངོན་སྦྱོར་བས༔ གཉིས་སུ་མེད་པའི་ཡེ་ཤེས་འགྱུར༔ དེ་མ་ཐག་ཏུ་བྱང་ཆུབ་སྟེ༔ མཆོག་གི་ངེས་པ་རྙེད་པར་འགྱུར་ཞེས་གསུངས་སོ༔ ལྷ་མདུན་བསྐྱེད་སོགས་ལས་ཀྱང་བདག་བསྐྱེད་ཟབ་པ་སྟེ༔ རྡོ་རྗེ་མཁའ་འགྲོའི་རྒྱུད་ལས༔ འདི་ནི་རང་བྱུང་བཅོམ་ལྡན་འདས༔ གཅིག་པུ་བདག་ཉིད་ཆེ་བའི་ལྷ༔ རྟག་ཏུ་ཕྱག་དང་མཆོད་སོགས་བྱ༔ རྡོ་ཤིང་འདག་པ་ལ་སོགས་དང་༔ རས་དང་ཚོན་གྱི་གཟུགས་བརྙན་ལ༔ བྱིན་རླབས་ཡེ་ཤེས་དབབ་བྱས་ནས༔ ལྷ་ཡིན་ཟེར་ནས་མཆོད་སོགས་བྱེད༔ བཅོས་མ་ལ་ཡང་དེ་ལྟར་ན༔ བདག་ཉིད་ཡེ་ནས་སངས་རྒྱས་ལ༔ ཅི་ཕྱིར་ཞེ་ན་མཆོད་མི་བྱེད༔ ཅེས་གསུངས་པས་རང་གི་ཕུང་པོ་ལྔ་རིགས་ལྔའི་སྤྱན་རས་གཟིགས༔ ཁམས་ལྔ་ཡུམ་ལྔ་ཚོགས་བརྒྱད་སེམས་དཔའ་ཡུལ་བརྒྱད་སེམས་མ༔ སོགས་སུ་ཤེས་པར་གྱིས་ལ་ཐ་མལ་དུ་འཛིན་པ་སྤང་ཅི་ཐུབགལ་ཆེའོ༔ དེ་ལྟར་ལུས་
ཀྱི་གནས་ལུགས་ཧང་ཙམ་མ་གོ་ན་ལྷའི་གཟུགས་ཙམ་བསྒོམས་ཤེས་ཀྱང་བླ་མེད་ཀྱི་བསྐྱེད་རིམ་གོ་མི་ཆོད་པ་ཡིན་ནོ༔ དེས་ན་བསྐྱེད་རིམ་རྒྱས་པ་ཡན་ལག་དྲུག་གི་སྒོ་ནས་བསྐྱེད་པ་དང་༔ མངོན་བྱང་ལྔས་བསྐྱེད་པ་དང་༔ ཆོ་ག་ཡན་ལག་བཞིས་བསྐྱེད་པ་སོགས་མང་དུ་ཡོད་ནའང་༔ སྡོམ་པའི་རྒྱུད་ལས༔ སྐད་ཅིག་རྣམ་པས་ལྷར་བསྒོམ་བྱ༔ ཞེས་སོགས་དང་༔ རྒྱལ་བ་རྒྱ་མཚོའི་ཡང་སྙིང་ལས༔ སྐྱེ་བོ་ཕོ་མོ་ཡི་གེ་མི་ཤེས་པ་རྣམས་ལ་སྐད་ཅིག་དྲན་རྫོགས་སུ་བསྒོམ་ན་ཟིན་སླ་བར་གསུངས་པ་ལྟར་འདིར་སྐད་ཅིག་ལ་ལྷར་བསྐྱེད་པ་ཡིན་ཏེ་སུ་བྷ་ཝ་སོགས་མི་དགོས་རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོའམ༔ དམར་པོ་ཞལ་གཅིག་ཞི་ཞིང་འཛུམ་པ༔ ཕྱག་བཞིའི་དང་པོ་གཉིས་ཐུགས་ཀར་ཐལ་མོ་སྦྱར་བ༔ གཡས་འོག་མས་མུ་ཏིག་གི་ཕྲེང་བ་དང་གཡོན་མེ་ཏོག་པདྨ་རང་གི་སྐུ་མདོག་དང་མཚུངས་པ་འཛིན་པ༔ ཞབས་གཉིས་རྡོ་རྗེའི་སྐྱིལ་ཀྲུང་ངམ༔ དྲང་པོར་བཞེངས་པ༔ རིན་པོ་ཆེའི་དབུ་རྒྱན་སྙན་ཆ་མགུལ་རྒྱན་དོ་ཤལ་ཕྱག་གདུབ་ཞབས་གདུབ་སྐེ་རགས་སེ་མོ་དོ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ༔ དར་སྣ་ཚོགས་ཀྱིས་སྟོད་གཡོགས་
དང་སྨད་དཀྲིས་ཅན༔ སྣ་ཚོགས་པདྨ་དང་ཟླ་བའི་གདན་ལ་བཞུགས་པ༔ དེ་རང་གི་ལུས་དང་དབྱེར་མེད་དུ་བསྒོམ་པ་ནི་དམ་ཚིག་སེམས་དཔའོ༔ དེའི་ཐུགས་ཀར་ཟླ་བའི་གདན་ལ་ཧྲི༔ཡིག་ལ་བཟླ་བྱའི་སྔགས་ཀྱི་ཡི་གེའི་ངོ་ཕྱིར་བསྟན་ནས་གཡོན་དུ་བཀོད་པ་ལས༔ ཧྲི༔ཡིག་མི་འགུལ་བར་སྔགས་ཕྲེང་གཡས་སུ་ཀྱི་ལི་ལི་འཁོར་བར་བསྒོམ་པ་ཡེ་ཤེས་སེམས་དཔའ་སྟེ༔ རང་གི་སེམས་དང་དབྱེར་མེད་པར་བསྒོམས༔ དེ་ནས་སྔགས་ཕྲེང་ལས་འོད་ཟེར་སྣ་ཚོགས་ཕྱོགས་བཅུར་འཕྲོས་པས༔ སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད༔ དེ་ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས་ཁ་བ་བུ་ཡུག་ལྟར་བྱོན་ཏེ་མཚོ་ལ་ཆར་ཆེན་པོ་བབ་པ་ལྟར་རང་ལ་སིབ་སིབ་ཐིམ་པར་བསྒོམས་པ་ནི༔ ཡེ་ཤེས་པ་སྤྱན་འདྲེན་པ་དང་དབང་བསྐུར་བ་ཡང་ཡིན༔ བྱིན་རླབས་སྡུད་པའི་དམིགས་པ་ཤིན་ཏུ་ཟབ་མོ་ཡིན་ནོ༔ དེ་ཡང་འོད་ཟེར་དེས་གྲུབ་ཆེན་བརྒྱད་ཅུ་རིག་འཛིན་བརྒྱད་ལ་སོགས་པ་དང་༔ རྗེ་འབངས་ཉེར་ལྔ་ལ་སོགས་མཆོད་ནས༔ དེ་ཐམས་ཅད་ཐུགས་རྗེ་ཆེན་པོའི་སྐུར་གྱུར་པ་ཆར་ལྟར་བབས་ནས་རང་ལ་ཐིམ་པ་དང་༔ ཡི་
དམ་རྒྱུད་སྡེ་དྲུག་དང་བཀའ་དགོངས་ཕུར་གསུམ༔ སངས་རྒྱས་བྱང་སེམས་གང་དང་གང་ལ་མོས་པ་ཐམས་ཅད་ལ་མཆོད་པས༔ དེ་ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས་རང་ལ་ཐིམ་པར་བསྒོམ་པ་དང་༔ དེ་བཞིན་དུ་དཔའ་བོ་རྟ་མགྲིན་གིང་སྡེ་བཞི་མཁའ་འགྲོ་ལྔ་སོགས་དང་༔ ཡེ་ཤེས་ཀྱི་ཆོས་སྐྱོང་ཐམས་ཅད་ལའང་དེ་ལྟར་བྱས་ཏེ༔ པདྨ་རྒྱལ་པོའི་རྒྱུད་ལས༔ སངས་རྒྱས་ཐམས་ཅད་འདུས་པ་ནི༔ མགོན་པོ་སྤྱན་རས་གཟིགས་སྐུ་ཡིན༔ དྲན་པ་ཙམ་གྱིས་འཁོར་བ་ཡི༔ རྟོག་པ་ཐམས་ཅད་འགགས་པར་འགྱུར༔ མྱ་ངན་འདས་པ་ཐམས་ཅད་ཀྱི༔ སྙིང་པོ་མ་ལུས་ལེགས་པར་འགྱུར༔ ཞེས་དང་༔ ལྷ་ལྕམ་མན་དཱ་ར་བ་གྲུབ་པའི་རྒྱལ་མོ་ཞེས་གསུངས༔ བྷཾ་ག་ལའི་ཕག་མོའི་གསུངས་ལས་འདི་རྒྱུད་སྡེ་བཞིའི་ཕྱི་སྒྲུབ་ཡིན་གསུངས་པའི་དོན་ཏེ༔ ལྷ་གཅིག་དང་སྔགས་གཅིག་གིས་རྒྱུད་སྡེའི་ལྷ་ཚོགས་ཐམས་ཅད་དུས་གཅིག་ལ་གྲུབ་པའི་གདམས་ངག་ཟབ་མོ་ངོ་མཚར་ཅན་ཡིན་ཏེ༔ དེ་ཡང་ན་སོ་གཞོན་པ་རླུང་ཆུན་པས་ནི་རླུང་དང་བསྲེ༔ ཕར་བཏང་དུས་འོད་ཟེར་སྤྲོ༔ ཚུར་རྔུབ་དུས་བྱིན་རླབས་བསྡུ༔ ཁོག་པར་བསྐྱིལ་ཚེ་སྔགས་འཁོར་ལ་
དམིགས་པ་གཏད་པའམ༔ དམིགས་མེད་དུ་བཞག་ལ་སྔགས་ཡིད་བཟླས་བྱའོ༔ བསྐྱེད་རིམ་དང་སྔགས་བཟླས་པ་ཁོ་ན་ལ་མོས་ན་སྔགས་སིལ་བུར་བུང་བའི་སྐད་ཙམ་དག་པར་བཟླ་ཞིང་དམིགས་པ་སྤྲོ་བསྡུ་ཁོ་ན་བྱའོ༔ དེ་ནི་བླ་མ་ཡི་དམ་དང་བསྲེ་བ༔ མཁའ་འགྲོ་ཆོས་སྐྱོང་དང་བསྲེ་བ་ཞེས་ཟབ་ཆོས་བླ་ན་མེད་པའོ༔ དེ་ནས་རང་གི་ཐུགས་ཀའི་སྔགས་ཕྲེང་ལས་འོད་ཟེར་མཐིང་ག་འཕྲོས༔ ཞེ་སྡང་གི་སྒྲིབ་པ་དག་ནས་ཕྱིར་འཕྲོས་ནས་དམྱལ་བའི་ཡུལ་དུ་སོང་བས་ཚ་གྲང་གི་སྡུག་བསྔལ་ཐམས་ཅད་ཞི༔ དམྱལ་བའི་འཇིག་རྟེན་མངོན་པར་དགའ་བའི་ཞིང་དང་དམྱལ་བའི་སེམས་ཅན་ཐམས་ཅད་རྡོ་རྗེ་སྤྱན་རིས་གཟིགས་སྐུ་མདོག་སྔོན་པོ་ཞལ་གཅིག་ཕྱག་བཞི་པར་གྱུར་ནས་ཐམས་ཅད་ཡིག་དྲུག་དི་རི་རི་བཟླ་བར་བསྒོམ༔ དེ་བཞིན་དུ་ཐུགས་ཀའི་སྔགས་ཕྲེང་ལས་འོད་ཟེར་དམར་པོ་འཕྲོས་འདོད་ཆགས་ཀྱི་སྒྲིབ་པ་སྦྱངས་ཡི་དྭགས་ཀྱི་འཇིག་རྟེན་བདེ་བ་ཅན་དང་སེམས་ཅན་ཐམས་ཅད་པདྨ་སྤྱན་རས་གཟིགས་དམར་པོར་བསྒྱུར་བ་དང་༔ འོད་ཟེར་དཀར་པོས་གཏི་མུག་གི་སྒྲིབ་པ་སྦྱངས་ནས་དུད་འགྲོའི་འཇིག་རྟེན་སྟུག་པོ་བཀོད་དང་སེམས་ཅན་ཐམས་
ཅད་རྣམ་སྣང་སྤྱན་རས་གཟིགས་དཀར་པོར་བསྒྱུར་བ་དང་༔ འོད་ཟེར་སེར་པོས་ང་རྒྱལ་སྦྱངས་ནས་ལྷ་དང་མིའི་འཇིག་རྟེན་དཔལ་དང་ལྡན་པ་དང་སེམས་ཅན་ཐམས་ཅད་རིན་ཆེན་སྤྱན་རས་གཟིགས་སེར་པོར་བསྒྱུར་བ་དང་༔ འོད་ཟེར་ལྗང་གུས་ཕྲག་དོག་སྦྱངས་ནས་ལྷ་མ་ཡིན་གྱི་འཇིག་རྟེན་ལས་རབ་རྫོགས་དང་སེམས་ཅན་ཐམས་ཅད་ཀརྨ་སྤྱན་རས་གཟིགས་ལྗང་གུར་བསྒྱུར༔ དེ་ལྟར་སྣོད་ཀྱི་འཇིག་རྟེན་དག་པའི་ཞིང་ཁམས༔ སེམས་ཅན་ཐམས་ཅད་ཐུགས་རྗེ་ཆེན་པོར་གྱུར་པས་ཡི་གེ་དྲུག་པ་བཟླ་རོགས་འུ་རུ་རུ་བསྒོམས་ལ་དམིགས་པ་གསལ་ན་སྐད་ཅིག་རེར་ཡང་དུང་ཕྱུར་མང་པོརའགྲོ་བར་དམར་ཁྲིད་ཚེམ་བུ་ལུགས་སོགས་ནས་བཤད་དོ༔ དེ་ནི་སྣང་བ་སྐུའི་ཁྱེར་སོ་ཡིན་ལ༔ མེ་ཆུ་རླུང་སོགས་འབྱུང་བའི་སྒྲ་དང་༔ སྲོག་ཆགས་ཀྱི་སྐད་གང་ཐོས་ཐམས་ཅད་ཡི་གེ་དྲུག་གམ་བཅུར་བསྒོམ་པ་ནི་གྲག་པ་གསུང་གི་ཁྱེར་སོ་ཞེས་བྱའོ༔ དེ་ལྟ་བུའི་ངང་ནས་བཟླས་པའི་ཕན་ཡོན་ནི༔ མདོ་སྡེ་ཟ་མ་ཏོག་བཀོད་པ་ལས༔ བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ༔ རྣལ་འབྱོར་པ་གཞན་རྣམས་ནི་འབྲས་ཀྱི་ཕུབ་མ་དང་འདྲའོ༔ རྣལ་འབྱོར་པ་ཐམས་ཅད་ཀྱི་ནང་
ནས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་འདི་ནི་འབྲས་ཀྱི་སྙིང་པོར་གྱུར་པའོ༔ རིགས་ཀྱི་བུ་སྦྱིན་པའི་ཕ་རོལ་ཏུ་ཕྱིན་པ་དང་༔ ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་༔ བཟོད་པའི་ཕ་རོལ་ཏུ་ཕྱིན་པ་དང་༔ བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་༔ བསམ་གཏན་གྱི་ཕ་རོལ་ཏུ་ཕྱིན་པ་དང་༔ ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་རོ༔ ཨོཾ་མ་ཎི་པདྨེ་ཧཱུྃ༔ ཞེས་ལན་གསུམ་བརྗོད་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ༔ ཞེས་གསུངས་པས་བྱང་ཆུབ་སྨོན་པ་སེམས་བསྐྱེད་ཀྱི་ཉམས་ལེན་ཕར་ཕྱིན་དྲུག་ཀྱང་འདི་ལ་འཐུས་ལ༔ མཆོད་པ་ཐམས་ཅད་ཀྱང་དེ་ལ་ཚང་སྟེ༔ མདོ་དེ་ཉིད་ལས༔ ཡི་གེ་དྲུག་པ་ལན་གཅིག་བཟུང་ནས༔ དེ་བཞིན་གཤེགས་པ་ཐམས་ཅད་ལ་ན་བཟའ་དང་བཤོས་དང་མལ་སྟན་དང་ན་བའི་རྐྱེན་སྨན་དང་ཡོ་བྱད་ཐམས་ཅད་ཀྱིས་བཀུར་སྟི་བྱས་པར་འགྱུར་རོ༔ ཞེས་དང་༔ ཐུགས་རྗེ་ཆེན་པོ་གསང་འདུས་རྒྱུད་ལས༔ འཇིག་རྟེན་སེམས་ཅན་སྲོག་བཏོན་པའི༔ བསོད་ནམས་འཕགས་པས་བགྲང་བར་ནུས༔ ཡིག་བདུན་ལན་བདུན་བཟླས་པ་ཡི༔ ཡོན་ཏན་བརྗོད་པར་ག་ལ་
ནུས༔ ཁམས་གསུམ་སེམས་ཅན་མ་ལུས་པ༔ སངས་རྒྱས་སར་བཀོད་བསོད་ནམས་ནི༔ བགྲང་བར་ནུས་ཀྱི་ཡི་གེ་བདུན༔ གཅིག་བརྗོད་ཡོན་ཏན་བགྲང་མི་ནུས༔ རྒྱལ་བ་ནམ་མཁའ་གང་བ་ལ༔ མཆོད་པ་ཕུལ་བའི་བསོད་ནམས་ཚོགས༔ བགྲང་བར་ནུས་ཀྱི་ཡིག་བདུན་པ༔ གཅིག་བརྗོད་ཡོན་ཏན་བགྲང་མི་ནུས༔ ཡིག་བདུན་ཡིད་ལ་སུས་བྱེད་ཚད༔ ཐུགས་རྗེ་ཆེན་པོ་དེ་ཡིན་ཕྱིར༔ བར་ཆད་སེལ་ཞིང་འགྲོ་བ་འདུལ༔ ཞེས་དང་༔ སྤྲུལ་པའི་རྒྱལ་པོ་སྲོང་བཙན་སྒམ་པོའི་ཞལ་ནས༔ ཨོཾཿཐུགས་རྗེ་ཆེན་པོ་སྐུའི་སྙིང་པོ༔ ཨཱཿགསུང་གི་སྙིང་པོ༔ ཧཱུྃཿཐུགས་ཀྱི་སྙིང་པོ༔ ཧྲཱིཿཡང་སྙིང་་ཡི་གེ་དྲུག་པ་ཉེ་བའི་སྙིང་པོའོ༔ ཞེས་གསུངས་སོ༔ དོན་ཏིག་འགྲོ་བ་ཀུན་གྲོལ་རྒྱུད་ལས༔ རྡོ་རྗེ་གངས་ཆེན་མཚོས་བཀའ་སྩལ་པ༔ མཆོག་དང་ཐུན་མོང་གྲུབ་ཆེན་བརྒྱད༔ འབྱུང་བ་བཞི་ཡི་ཕྲིན་ལས་བཞི༔ ཡི་གེ་བཅུ་པ་བཟུང་བས་འགྲུབ༔ ཅེས་དང་༔ མདོ་སྡེ་ཟ་མ་ཏོག་ལས༔ སྔོན་སངས་རྒྱས་གཙུག་ལྡན་ལས་ཐུབ་པས་གསན་པ༔ གང་འཇིག་རྟེན་གྱི་ཁམས་ན་སྤྱན་རས་གཟིགས་དབང་པོའི་མིང་དྲན་པ་དེའི་བསོད་ནམས་དེ་དག་ནི་བདེ་བ་
དང་ལྡན་པ་ཡིན་ནོ༔ དེ་དག་ནི་རྒས་པ་དང་ན་བ་དང་འཆི་བའི་སྡུག་བསྔལ་ལས་ཡོངས་སུ་ཐར་བ་ཡིན་ནོ༔ དེ་དག་འཁོར་བའི་ཐ་མ་གཞན་མེད་པའི་སྡུག་བསྔལ་བར་མི་འགྱུར་རོ༔ དེ་དག་ནི་གོས་དཀར་པོ་སྐྱ་བོ་བཞིན་དུ༔ བྱ་ངང་པའི་རྒྱལ་པོ་མགྱོགས་པ་དང་༔ རླུང་གི་ཤུགས་འོང་བ་བཞིན་དུ་བདེ་བ་ཅན་གྱི་ཞིང་ཁམས་སུ་དེ་བཞིན་གཤེགས་པ་སྣང་བ་མཐའ་ཡས་ལ་ཆོས་མངོན་སུམ་དུ་ཉན་པའི་ཕྱིར་འགྲོའོ༔ ཐོས་ནས་ཀྱང་དེ་དག་གིས་ལུས་ལ་འཁོར་བའི་སྡུག་བསྔལ་མི་འབྱུང་༔ འདོད་ཆགས་དང་ཞེ་སྡང་དང་གཏི་མུག་མི་འབྱུང་༔ རྒས་པ་དང་ཤི་བར་མི་འགྱུར༔ དེ་དག་གི་ལུས་ལ་བཀྲེས་པར་མི་འགྱུར༔ མངལ་ན་གནས་པའི་སྡུག་བསྔལ་བ་ཤེས་པར་མི་འགྱུར་ཏེ༔ ཆོས་ཀྱི་རོས་བསྐྱེད་ནས་དེ་ཉིད་དུ་པདྨོའི་ནང་དུ་སྐྱེ་བར་འགྱུར་ཏེ༔ བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡི་དམ་བརྟན་པོ་རྫོགས་པ་དང་༔ སེམས་ཅན་ཐམས་ཅད་ཐར་པ་ལ་གཞོག་གི་བར་དུ་འཇིག་རྟེན་གྱི་ཁམས་དེ་ན་རྟག་ཏུ་འཛིན་ཅིང་གནས་སོ༔ གསུངས་སོ༔ སྤྱིར་ཐུགས་རྗེ་ཆེན་པོ་བོད་ཁ་བ་ཅན་གྱི་ལྷ་སྐལ་ཡིན་
ཞིང་སྙིང་པོ་ཡི་གེ་དྲུག་པ་ལྷག་པར་ངེད་རང་ཁམས་ཕྱོགས་སུ་བཀའ་བབས་པས་འགྲུབ་སླ་སྟེ༔ ཨོ་རྒྱན་རིན་པོ་ཆེའི་ཞལ་ནས༔ ཐུགས་རྗེ་ཆེན་པོ་འཕགས་པ་སྤྱན་རས་གཟིགས༔ བོད་ཡུལ་ཁ་བ་ཅན་གྱི་ལྷ་ཡིན་ཞིང་༔ ཁྱད་པར་ཆོས་འདི་ཁམས་ཀོང་ཕྱོགས་སུ་དར༔ ཡིག་དྲུག་བསྟན་པ་མདོ་ཁམས་ཕོ་མོས་འཛིན༔ ཞེས་གསུངས་པ་དང་༔ དུས་ཤིན་ཏུ་སྙིགས་མ་འབྱུང་ཚུལ་ལུང་བསྟན་སྐབས༔ རྒྱལ་པོ་ཁྲི་སྲོང་ལྡེའུ་བཙན་གྱིས༔ དེ་དུས་ཆོས་བྱས་ན་འབྲས་བུ་ཨེ་ཡོད་ལྷ་གང་ཐུགས་རྗེ་ཆེ་ཞུས་པས༔ དམ་ཆོས་བྱས་ན་འབྲས་བུ་དེ་དུས་ཆེ༔ ལྷ་ཚོགས་ཐུགས་རྗེ་སྤྱན་རས་གཟིགས་ཀྱི་ཆེ༔ ཆོས་ཀྱི་མཇུག་མ་ཡི་གེ་དྲུག་པས་སྡུད༔ ཅེས་གསུངས་པས་དུས་ལ་བབས་པའི་ཆོས་ཡིན་པས་བྱིན་རླབས་མྱུར་ཞིང་༔ ཨོ་རྒྱན་རིན་པོ་ཆེའི་ཞལ་ཆེམས་ལས༔ ལྷ་ཐུགས་རྗེ་ཆེན་པོ་སྒོམས་ཤིག༔ ཆོས་ཡི་གེ་དྲུག་པ་ཟློས་ཤིག༔ ཆོས་དེ་ལས་ཟབ་པ་ནི་པདྨ་འབྱུང་གནས་བདག་གིས་ཀྱང་གསུངས་མི་ཤེས་སོ༔ ཞེས་གསུངས་པས༔ འདིའི་བསྐྱེད་རྫོགས་ཇི་ལྟ་བ་ཞིག་ཤེས་ན་དེ་ལས་ཟབ་པ་ནི་གཅིག་ཀྱང་མེད་དོ༔ དེས་དམིགས་པ་བསྐྱེད་རིམ་སྐོར་དངོས་གཞི་སོང་བ་ཡིན་
བསྐྱེད་རིམ་འདིའི་ཆ་ལག་རིགས་བདག་བསྒོམ་པ་དང་བླ་མའི་རྣལ་འབྱོར་བསྒོམ་པ་གཅིག་ཏུ་བསྡུས་ཏེ་སྟོན་པ་ནི་གཞུང་ལས༔ རྗེ་བླ་མ་རྣམས་ལ་གསོལ་བ་འདེབས༔ ཞེས་གསུངས་པའི་དོན་བཤད་ན་འདི་ལྟ་སྟེ༔ རྟོགས་པ་མ་སྐྱེས་པ་སྐྱེ་བའི་ཐབས་སྐྱེས་པ་བོགས་འདོན་པའི་ཐབས༔ ས་ལམ་གྱི་བར་ཆད་ཞི་བ་ཐམས་ཅད་ལ་བླ་མའི་རྣལ་འབྱོར་བསྒོམ་པ་གལ་ཆེ༔ དེ་ལས་སོ་སོ་སྐྱེ་བོའི་དགེ་བའི་བཤེས་གཉེན་ཐ་མལ་པ་ཡིན་ཀྱང་དེ་སངས་རྒྱས་ཐམས་ཅད་ལས་བཀའ་དྲིན་ཆེ་སྟེ༔ སངས་རྒྱས་ཡེ་ཤེས་ཀྱི་སྐུ་ཅན་རང་རེ་ཐ་མལ་པས་མཇལ་བའི་སྐལ་བ་ཙམ་ཡང་མེད་ན༔ ཆོས་ཐོས་པ་ལྟ་ཅི་སྨོས༔ རྡོ་རྗེ་སློབ་དཔོན་སོ་སོ་སྐྱེ་བོ་ཡིན་ཀྱང་དབང་བསྐུར་ཆོས་བཤད་པའི་ཚེ་སེམས་ཅན་དེ་རྣམས་རྗེས་སུ་འཛིན་པའི་ཕྱིར་དུ་སངས་རྒྱས་བྱང་སེམས་རྣམས་དེའི་རྒྱུད་ལ་ཞུགས་ནས་དད་པ་ཅན་རྣམས་རྗེས་སུ་འཛིན་པར་ཡང་བཤད་དེ༔ དབང་ལུང་གི་རྒྱུན་ཙམ་ལའང་ཉམས་སུ་བླངས་ན་བྱིན་རླབས་འབྱུང་བའང་དེའི་གནད་ཡིན་ལ༔ ཁྱད་པར་རྡོ་རྗེ་སློབ་དཔོན་མཚན་ཉིད་དང་ལྡན་པ་ནི་སངས་རྒྱས་ཐམས་ཅད་དང་དབྱེར་མེད་ཅིང་༔ སངས་རྒྱས་ཐམས་
ཅད་ལས་ཀྱང་གཉེན་པ་ཡིན་ཏེ༔ མཁའ་འགྲོ་རྡོ་རྗེ་གུར་གྱི་རྒྱུད་ལས༔ གང་ཕྱིར་རྡོ་རྗེ་འཛིན་པ་ཞེས༔ དེ་ཉིད་སློབ་དཔོན་གཟུགས་སུ་འཛིན༔ སེམས་ཅན་ཕན་གདགས་དམིགས་ནས་ནི༔ ཐ་མལ་པ་ཡི་གཟུགས་སུ་གནས༔ ཞེས་དང་༔ འཇམ་དཔལ་རྩ་རྒྱུད་ལས༔ འདས་དང་མ་བྱོན་ད་ལྟར་གྱི༔ སངས་རྒྱས་རྣམས་ནི་འཇིག་རྟེན་དུ༔ མི་ཡི་གཟུགས་སུ་ཡང་དག་འབྱུང་༔ ཞེས་དང་༔ གཉིས་མེད་རྣམ་རྒྱལ་རྒྱུད་ལས༔ ལྷ་དང་མི་ཡི་སྟོན་པ་གང་༔ རྐང་གཉིས་ཐམས་ཅད་མཁྱེན་པ་སྟེ༔ མ་འོངས་བླ་མའི་གཟུགས་སུ་གནས༔ དེ་ཉིད་ཚུལ་འདི་བསྟན་པའོ༔ ཞེས་དང་༔ དགོངས་འདུས་ལས༔ བླ་མ་མེད་པའི་གོང་རོལ་ནས༔ སངས་རྒྱས་བྱ་བའི་མིང་ཡང་མེད༔ བསྐལ་པ་འབུམ་གྱི་སངས་རྒྱས་ཀྱང་༔ བླ་མ་དག་ལ་བརྟེན་ནས་འབྱུང་༔ ཞེས་གསུངས་སོ༔ དེ་ལྟ་བུའི་བླ་མའི་རྣལ་འབྱོར་བསྒོམ་དགོས་པ་ཡང་༔ ཨ་ཏི་བཀོད་པའི་རྒྱུད་ལས༔ དྲིན་དང་ལྡན་པའི་བླ་མ་དེ༔ སྤྱི་བོའི་གཙུག་གམ་སྙིང་གི་དབུས༔ ཡན་ལག་མཐིལ་དུ་གང་བསྒོམ་པོ་སངས་རྒྱས་སྟོང་གི་ཡོན་ཏན་ཀྱང་༔ གང་ཟག་དེ་ཡིས་འཛིན་པར་འགྱུར
ཞེས་དང་༔ དེ་བསྒོམས་ན་ཉམས་རྟོགས་སྐྱེ་བ་སྟེ༔ མཁའ་འགྲོ་མ་ཀུན་ཏུ་སྤྱོད་པའི་རྒྱུད་ལས༔ གང་གི་དྲིན་གྱིས་བདེ་ཆེན་ཉིད༔ སྐད་ཅིག་ཉིད་ལ་འཆར་བ་གང་༔ བླ་མ་རིན་ཆེན་ལྟ་བུའི་སྐུ༔ རྡོ་རྗེ་ཅན་ཞབས་པད་ལ་འདུད༔ ཅེས་གསུངས་སོ༔ བླ་མའི་རྣལ་འབྱོར་མ་བསྒོམས་པར་ཉམས་རྟོགས་མི་སྐྱེ་སྟེ༔ བརྟག་གཉིས་ལས༔ སྐྱ་བ་འཛིན་པ་མེད་པར་ནི༔ གྲུ་ཡིས་ཕ་རོལ་སྒྲོལ་མི་ནུས༔ ཡོན་ཏན་ཐམས་ཅད་རབ་རྫོགས་ཀྱང་༔ བླ་མ་མེད་པར་སྲིད་ཐར་མིན་ཞེས་གསུངས་སོ༔ ལྷ་གཞན་སྒོམ་པ་དང་རྩ་རླུང་བསྒོམ་པ་ལས་ཀྱང་བླ་མ་བསྒོམ་པ་ལྷག་སྟེ༔ ཡེ་ཤེས་གསང་བ་སྒྲོན་མའི་རྒྱུད་ལས༔ མཚན་དང་དཔེ་བྱད་ལྡན་པའི་ལྷ༔ བསྐལ་པའི་བར་དུ་བསྒོམ་པ་བས༔ བླ་མ་དྲན་པ་བསོད་ནམས་ཆེ༔ ཞེས་དང་༔ དམ་ཚིག་བཀོད་པ་རྒྱ་མཚོའི་རྒྱུད་ལས༔ རྫོགས་པའི་རིམ་པ་བསྐལ་པའི་བར་དུ་ནི༔ འདུ་འཛི་རྣམ་གཡེང་སྤངས་ནས་བསྒོམས་པ་བས༔ བླ་མ་རང་སེམས་དཀྱིལ་དུ་དལ་ཅིག་ཤར་བ་ཙམ༔ འབུམ་ཕྲག་ཉི་ཤུའི་ཆར་ཡང་མི་ཕོད་དོ༔ ཞེས་གསུངས་སོ༔ ཉམས་དང་རྟོགས་པ་སྐྱེ་བ་དང་ས་ལམ་
གྱི་ཡོན་ཏན་གོང་འཕེལ་དུ་འགྲོ་བ་ལ་ཡང་བླ་མའི་རྣལ་འབྱོར་འདི་གལ་ཆེ་བ་སྟེ༔ ཀྱེའི་རྡོ་རྗེའི་རྒྱུད་ལས༔ གཞན་གྱིས་བརྗོད་མིན་ལྷན་ཅིག་སྐྱེས༔ གང་དུ་ཡང་ནི་མི་རྙེད་དེ༔ བླ་མའི་དུས་ཐབས་བསྟན་པ་དང་༔ བདག་གི་བསོད་ནམས་ལས་ཤེས་བྱ༔ ཞེས་དང་༔ ཡེ་ཤེས་མངོན་འབྱུང་གི་རྒྱུད་ལས༔ ས་དང་ལམ་གྱི་རིམ་པ་རྣམས༔ བླ་མའི་མོས་གུས་ལ་ཟླས་བགྲོད༔ བླ་མའི་སྣང་བ་མ་བྲལ་ན༔ སངས་རྒྱས་རྣམས་དང་འབྲལ་མེད་གནས༔ ཞེས་གསུངས་སོ༔ དེ་ལྟ་བུའི་བླ་མ་ལ་རབ་བསྒྲུབ་པའི་མཆོད་པ་སྟེ་བླ་མས་གང་གནང་བའི་ཆོས་དེ་རྟགས་ཐོན་པར་ཉམས་སུ་ལེན་པ་དང་༔ གཞན་ལ་ཡང་སྤེལ་ཞིང་བསྟན་པ་འཛིན་པ་དང་༔ འབྲིང་ལུས་ངག་གི་མཆོད་པ་སྟེ་ལུས་ཀྱིས་བླ་མའི་བྱ་བ་ལས་ཀ་གང་དགོས་སྐྱོ་ངལ་མེད་པར་བསྒྲུབ་ཅིང་དེས་རང་གི་སྒྲིབ་པ་དག་པ་དང་ཚོགས་རྫོགས་པའི་དགའ་བ་བསྒོམ་པ་ལ༔ ཡུས་དང་དྲིན་མི་རྩི༔ རང་གི་བླ་མའི་ཡོན་ཏན་དང་བསྔགས་པ་ཕྱོགས་ཀུན་ཏུ་སྒྲོགས་པའོ༔ ཐ་མ་ཟང་ཟིང་གི་མཆོད་པ་རང་གིས་ཅི་འབྱོར་པ་སེར་སྣ་མེད་པར་ཕུལ་བས༔ ཚོགས་རྫོགས་པའི་དགའ་བ་ལས་དེའི་ཡུས་མི་བསྒོམ༔ དངོས་སུ་མ་
འབྱོར་ནའང་ཡིད་ཀྱིས་རང་གི་ལུས་ལོངས་སྤྱོད་དགེ་བའི་རྩ་བ་དང་བཅས་པ་འབུལ་ཏེ་མཎྜལ་གྱི་ཚིག་བརྗོད༔ རང་གི་སྲུང་ཟློག་གི་བྱ་བ་གང་བྱེད་ཐམས་ཅད་ཀྱང་གཙོ་བོར་བླ་མའི་སྐུ་རིམ་དུ་དམིགས༔ དེ་ལྟར་བྱས་ན་བསོད་ནམས་དཔག་ཏུ་མེད་པ་ཐོབ་ཅིང་བྱིན་རླབས་ཤུགས་ལས་འབྱུང་བ་རྟེན་འབྲེལ་གྱི་གནད་ཡིན་ཏེ༔ སྡོམ་འབྱུང་ལས༔ མཆོད་པ་ཐམས་ཅད་ཡོངས་སྤངས་ལ༔ བླ་མ་མཆོད་པ་བརྩམ་པར་བྱ༔ དེ་མཉེས་པས་ནི་ཀུན་མཁྱེན་དག༔ གོ་འཕང་དམ་པ་ཐོབ་པར་འགྱུར༔ ཞེས་དང་༔ མཁའ་འགྲོ་མ་ཟིལ་གནོན་གྱི་རྒྱུད་ལས༔ སངས་རྒྱས་བྱང་ཆུབ་སེམས་དཔའ་གངྒའི་བྱེ་མ་སྙེད་པ༔ བསྐལ་པ་གངྒའི་བྱེ་མ་སྙེད་དུ་བསྐུར་བ་ལས༔ རྡོ་རྗེ་སློབ་དཔོན་གྱི་བ་སྤུའི་བུ་ག་གཅིག་གེ༔ ལ་ཏིལ་མར་གྱིས་བྱུག་པ་བསོད་ནམས་ཆེས་ཁྱད་པར་དུ་འཕགས་སོ༔ ཞེས་དང་༔ དཔལ་སཾ་བྷུ་ཊི་ལས༔ གང་ཕྱིར་ཕྱོགས་བཅུའི་སངས་རྒྱས་དང་༔ བྱང་ཆུབ་སེམས་དཔའི་བསོད་ནམས་ལས༔ སློབ་དཔོན་བ་སྤུའི་ཁུང་བུ་མཆོག༔ དེ་བྱིན་བསོད་ནམས་ཁྱད་པར་འཕགས༔ ཞེས་དང་༔ འཁོར་ལོ་བཀོད་པའི་རྒྱུད་ལས༔ རིག་པ་ཆེན་པོ་སངས་
རྒྱས་ཐམས་ཅད་ཉོན་ཅིག༔ གང་ཟག་ལ་ལས༔ རྡོ་རྗེ་སློབ་དཔོན་གྱི་བྱ་བ་བྱེད་ཅིང་༔ སློབ་དཔོན་ལ་ཕྱག་དང་བསྐོར་བ་བྱེད་པ་དང་༔ མེ་ཏོག་འཐོར༔ རང་གི་དབང་བའི་ཡུལ་མཁར་སྤྱོད་ཡུལ་དུ་འོང་བ་དག་ཕུལ་ཞིང་༔ མ་གུས་པ་དག་སྤང་པ་དེ་ནི་དམ་ཚིག་ཅན་རྣམས་ཀྱིས་བསྲུང་བ་དང་༔ སྐྱོབ་པར་བྱེད་ཅིང་དངོས་གྲུབ་སྟེར་བ་དང་༔ དེ་བཞིན་གཤེགས་པ་ཐམས་ཅད་ཀྱིས་ལུང་སྟོན་པ་དང་༔ བདུད་ཐམས་ཅད་ཀྱིས་མི་ཚུགས་པ་དང་༔ སངས་རྒྱས་ཀྱི་ཡོན་ཏན་ཐམས་ཅད་མྱུར་དུ་འབྱུང་བར་འགྱུར་རོ༔ ཞེས་དང་༔ གསང་བ་འདུས་པའི་རྒྱུད་ལས༔ རིགས་ཀྱི་བུ་སངས་རྒྱས་བཅོམ་ལྡན་འདས་ཕྱོགས་བཅུ་ན་ཇི་སྙེད་བཞུགས་པ་དང་༔ སངས་རྒྱས་བཅོམ་ལྡན་འདས་དེ་རྣམས་ཀྱི་སྐུ་རྡོ་རྗེ་གསུང་རྡོ་རྗེ་ཐུགས་རྡོ་རྗེ་ལས་བྱུང་བའི་བསོད་ནམས་ཀྱི་ཕུང་པོ་ཇི་སྙེད་པ་དེ་བས་ཀྱང་སློབ་དཔོན་གྱི་བ་སྤུའི་བུ་ག་གཅིག་གིས་བསོད་ནམས་ཁྱད་པར་དུ་འཕགས༔ ཞེས་གསུངས་སོ༔ ཡོན་ཏན་དང་ཡེ་ཤེས་བསམ་གྱིས་མི་ཁྱབ་པ་བསྟན་པའི་མདོ་ལས༔ འཇམ་དཔལ་དགེ་བའི་བཤེས་གཉེན་ལ་བསྙེན་བཀུར་བྱེད་པའི་བྱང་ཆུབ་སེམས་དཔའ་དེ་ནི༔ སྔོན་གྱི་སངས་རྒྱས་
བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་དང་༔ སྦྱིན་པ་ལས་བྱུང་བ་དང་༔ མཆོད་པ་ལས་བྱུང་བ་དང་༔ དེ་དག་གི་ཐད་ནས་བསླབ་པ་བཟུང་བ་ལས་བྱུང་བ་རྣམས༔ སྔོན་འགྲོ་གཅིག་གི་ཟིལ་གྱིས་གནོན་ཏེ༔ དེ་ལས་དགེ་བའི་བཤེས་གཉེན་ལ་བསྙེན་བཀུར་བྱས་པ་ནི་ཡོན་ཏན་བསམ་གྱིས་མི་ཁྱབ་པའོ༔ ཞེས་གསུངས་སོ༔ བླ་མ་ལ་གསོལ་བ་བཏབ་ན་བྱིན་རླབས་དང་དངོས་གྲུབ་གང་འདོད་པ་འབྱུང་བ་དང་༔ དེ་བསྙེན་སྒྲུབ་བཟླས་བརྗོད་གཞན་ལས་ལྷག་སྟེ༔ གསང་འདུས་འབུམ་པ་ལས༔ བླ་མ་ལ་གུས་སློབ་མ་ཡིས༔ སྒྲ་རིང་གསལ་བའི་སྐད་གསང་གིས༔ ཐོན་པས་གསོལ་བ་འདེབས་པ་ན༔ དེ་ལ་ང་ཡིས་དངོས་གྲུབ་སྟེར༔ ཞེས་དང་༔ དེ་ཡང་རྒྱང་འབོད་དབྱངས་སོགས་བྱ་བ་ཡང་སྤྱོད་འཇུག་ལས༔ སྤྱན་རིས་གཟིགས་མགོན་དེ་ལ་ཡང་༔ ཉམ་ཐག་ང་རོས་འོ་དོད་འབོད༔ ཅེས་དང་༔ སྐྱབས་ཚོལ་སྙིང་ནས་འོ་དོད་འབོད༔ ཅེས་གསུངས༔ བཀོད་པ་ཆེན་པོའི་རྒྱུད་ལས༔ བསྙེན་སྒྲུབ་བཟླས་པ་ས་ཡ་བས༔ བླ་མའི་གསོལ་འདེབས་གཅིག་བརྗོད་ན༔ ནུས་པ་འབུམ་ཕྲག་ཆར་མི་
ཕོད༔ ཅེས་དང་། ཨོ་རྒྱན་རིན་པོ་ཆེའི་ཞལ་ནས༔ མཚན་ཉིད་དང་ལྡན་པའི་བླ་མ་དེ་རྡོ་རྗེ་སེམས་དཔའ་དངོས་ཡིན་ཏེ༔ དེ་ལ་སངས་རྒྱས་དངོས་ཀྱི་མོས་གུས་དང་འབྲལ་མི་རུང་ཞིང་༔ ལུས་ངག་ཡིད་གསུམ་གྱི་སྒོ་ནས་ཅི་མཉེས་ཀྱི་ཞབས་ཏོག་བྱ་ཞིང་༔ རབ་སྒྲུབ་པའི་ཞབས་ཏོག༔ འབྲིང་ལུས་ངག་ཡིད་གསུམ༔ ཐ་མ་དངོས་པོ་དང་ལོངས་སྤྱོད་ལ་སོགས་པ་ཞེ་ཐག་པ་ནས་ཞབས་ཏོག་ཅི་མཉེས་བྱ་ཞིང་༔ ཅི་གསུང་གི་བཀའ་ཉན་པ་ཨ་ཅང་ཆེ་སྟེ༔ སེམས་ཅན་བརྒྱའི་སྲོག་གཅོད་གསུངས་ཀྱང་སྤྲོ་བཞིན་དུ་བྱེད་པ་གཅིག་དགོས༔ རང་གི་རྩ་བའི་བླ་མ་ནི་སངས་རྒྱས་ལས་ཀྱང་ལྷག་པར་མཆོད་པ་རྒྱུད་བཀའ་ལུང་མཐའ་དག་ནས་གསུངས་ཤིང་༔ ཐེག་པ་ཆེན་པོ་ཚེ་གཅིག་གིས་སངས་རྒྱས་ཐོབ་པར་བྱེད་པ་ཡང་༔ བླ་མའི་བྱིན་རླབས་ཐུགས་ཆུད་ཀྱི་བཀའ་བབས་ལ་བརྟེན་ནས་ཐོབ་པ་ཡིན་པས༔ འདི་ཁོ་ནས་མཉེས་པར་བྱེད་པ་གལ་ཆེ་སྟེ༔ འདི་ཉིད་མཆོད་པའི་བསོད་ནམས་ཀྱི་ཚད་ནི༔ སངས་རྒྱས་མཉམ་སྦྱོར་རྒྱུད་ལས༔ སྟོང་གསུམ་གང་བའི་བྱེ་སྙེད་ཀྱི༔ རྒྱལ་བ་མཆོད་པའི་བསོད་ནམས་ཀྱིས༔ བླ་མའི་བ་སྤུ་གཅིག་མཆོད་པའི༔ བསོད་
ནམས་དེ་ནི་ཆར་མི་ཉེ༔ ཞེས་པས་དེ་ལྟར་བླ་མ་མཆོད་ཅིང་༔ མཚན་ཉིད་དང་ལྡན་པའི་བླ་མ་དེ་ཡི་ཕྱི་རོལ་གྱི་སྤྱོད་ལམ་ཐུགས་རྒྱུད་དམ༔ བཀའ་བཀྱོན་དང་མཛད་སྤྱོད་ཅི་ལྟར་མཛད་ཀྱང་༔ ནང་གི་ཐུགས་དགོངས་མི་རྟོགས་པས་དེ་ལ་མ་དད་པའམ༔ ལོག་ལྟ་སྐྱེར་མི་རུང་ཞིང་༔ ཅི་མཛད་བརྡའ་དང་ཆོས་སུ་གོ་བར་བྱ་ཞིང་༔ སྤྱིར་ཡང་གང་ཟག་གི་ཚོད་བཟུང་བར་དཀའ་ཞིང་༔ ཁྱད་པར་སྦས་པའི་རྣལ་འབྱོར་པ་ནང་གི་དགོངས་པ་མི་རྟོག་ཅིང་ཕྱིའི་མཛད་སྤྱོད་མི་ངེས་ལ༔ རང་ཐ་མལ་པའི་ཤེས་རྒྱུད་མ་དག་པའི་སྣང་བ་ཡིན་པས༔ དཔེར་ན་མིག་སྐྱོན་ཅན་གྱིས་གངས་དང་དུང་ལ་སེར་པོར་མཐོང་བ་དང་མཚུངས་སོ༔ གལ་ཏེ་རྩ་བའི་བླ་མ་ལ་མ་དད་ན༔ དངོས་གྲུབ་ཀྱི་སྒོ་འགགས་ཏེ༔ ལས་ཀྱིས་དམྱལ་བར་ལྟུང་ཞིང་ཤེས་བྱ་ཀུན་ལ་མ་རྨོངས་ཀྱང་ཕན་པར་མི་འགྱུར་ཏེ༔ གསང་འདུས་ལས༔ རྩ་བའི་བླ་མ་འདྲེན་པའི་གཙོ༔ འདི་ལ་མ་དད་ལོག་ལྟ་བ༔ ཤེས་བྱ་ཀུན་ལ་མ་རྨོངས་ཀྱང་༔ ཐར་པའི་ལམ་འགགས་དོན་དང་འགལ༔ ཞེས་པས་བླ་མ་བསྟེན་ཚུལ་དེ་ལྟར་བྱའོ་གསུངས་སོ༔ དེ་ལ་བླ་མ་ཐོ་བརྩེགས་སུ་བསྒོམ་པ་དང་ཁྲོམ་
ཚོགས་སུ་བསྒོམ་པ་དང་༔ ཀུན་འདུས་སུ་བསྒོམ་པ་གསུམ་ལས་འདི་ཀུན་འདུས་སུ་བསྒོམས་པས་ཟིན་སླ༔ དེ་ལ་བླ་མ་སྐུ་དངོས་སུ་བསྒོམ་པ་དང་ལྷའི་སྐུ་བསྒོམ་པ་གཉིས་ལས༔ འདིར་ལྷའི་སྐུར་བསྒོམ་པ་གལ་ཆེ་སྟེ་བླ་མ་ལ་སྐྱོན་གྱི་རྣམ་གྲངས་བག་ཙམ་ཡོད་ཀྱང་བླ་མའི་སྐྱོན་མི་འཇུག་བྱིན་རླབས་འཇུག་པའི་གནད་ཡོད་པ་དང་༔ ལྷ་ཡང་འདི་སྣང་བ་མཐའ་ཡས་བསྒོམས་པས་ཐུགས་རྗེ་ཆེན་པོའི་རིགས་བདག་ཡིན་པས་འབྲེལ་ཆེ་བས༔ ཚེ་རིང་བ་དང་ཕྱི་མ་བདེ་བ་ཅན་དུ་སྐྱེ་བ་སོགས་གནད་མང་དུ་ཡོད་པ་ཡིན་ནོ༔ དེ་ནས་དམིགས་པ་དངོས་ནི་རང་ཉིད་ཐུགས་རྗེ་ཆེན་པོ་རྒྱལ་བ་རྒྱ་མཚོའམ་འགྲོ་འདུལ་དུ་བསྒོམ་པའི་སྤྱི་བོར་པདྨ་འདབ་མ་སྟོང་ལྡན་གྱི་ཟེའུ་འབྲུར་ཟླ་བའི་དཀྱིལ་འཁོར་གྱི་དབུས་སུ༔ ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་སངས་རྒྱས་སྣང་བ་མཐའ་ཡས་སྐུ་མདོག་བྱི་རུ་ལྟར་དམར་ཞིང་ཉི་མའི་དཀྱིལ་འཁོར་ལྟར་འོད་འབར་བ༔ ཞལ་གཅིག་ཞི་ཞིང་འཛུམ་པ་ལ་མཛོད་སྤུ་དཀར་པོས་བརྒྱན་པ༔ ཕྱག་གཉིས་མཉམ་གཞག་གི་སྟེང་དུ་འཆི་མེད་ཚེའི་བདུད་རྩིས་བཀང་བའི་ལྷུང་བཟེད་བསྣམས་པ༔ སྐུ་ལ་མཚན་བཟང་པོ་སུམ་ཅུ་རྩ་གཉིས་དཔེ་བྱད་བཟང་
པོ་བརྒྱད་ཅུས་སྤྲས་ཤིང་ཆོས་གོས་རྣམ་པ་གསུམ་གསོལ་ནས་རྡོ་རྗེའི་སྐྱིལ་ཀྲུང་གིས་བཞུགས་པར་བསྒོམས༔ དེའི་དཔྲལ་བར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་མཐིང་ག༔ ཐུགས་ཀའི་དབུས་སུ་ཟླ་བ་ལ་ཧྲཱིཿཡིག་དམར་པོས་མཚན་པ་ལས་འོད་དམར་ཕྱོགས་བཅུར་འཕྲོས་པས༔ རྒྱ་གར་གྱི་རིག་འཛིན་བརྒྱད་གྲུབ་ཆེན་བརྒྱད་ཅུ་རྩ་ལྔ༔ ཨོ་རྒྱན་རིན་པོ་ཆེ་རྗེ་འབངས་ཉི་ཤུ་རྩ་ལྔ་གཏེར་སྟོན་བརྒྱ་དང་རྩ་བརྒྱད༔ ཁྱད་པར་རང་གི་དད་པ་གང་ལ་ཡོད་པ་དང་དབང་ལུང་གི་འབྲེལ་བ་ཐོབ་པའི་རྩ་བ་དང་བརྒྱུད་པའི་བླ་མ་ཐམས་ཅད་ཁ་བ་བུ་ཡུག་ལྟར་སྤྱན་དྲངས་ནས་སྣང་བ་མཐའ་ཡས་ལ་ཐིམ་པས་བླ་མ་ཀུན་འདུས་སུ་བསྒོམ༔ མཎྜལ་རྒྱས་པར་འབུལ་བའམ༔ ལུས་དང་ལོངས་སྤྱོད་དགེ་བའི་རྩ་བ་བཅས༔ རང་གཞན་རྒྱུད་ཀྱིས་བསྡུས་པའི་གོ་ས་ནས༔ ཀུན་བཟང་མཆོད་པའི་སྤྲིན་དང་བདེ་ཆེན་རོས༔ ཟག་མེད་བླ་མའི་དགོངས་པ་རྫོགས་ཕྱིར་མཆོད༔ ཅེས་གསུངས་ས་གཞི་སྤོས་བྱུག་མ་བྱ༔ སྐུ་གསུམ་གསོལ་འདེབས་ལེའུ་བདུན་མ་ལྟར་རམ༔ མ་ནམ་མཁའ་མི་གསོལ་བ་འདེབས་སོ་ལ་བསྒྱུར༔ ཡི་གེ་དྲུག་པ་ལ་
གསོལ་འདེབས་ཐམས་ཅད་ཚང་བར་སྤྲུལ་པའི་རྒྱལ་པོས་གསུངས་པ་དང་༔ བཛྲ་གུ་རུ་ཡང་ཕྱི་ལྟར་གསོལ་འདེབས་ཀྱི་སྙིང་པོ་ཡིན་པར་གསུངས་པས༔ དེ་གཉིས་གང་རུང་ཕྲེང་སྐོར་རེ་ཙམ་བཟླའོ༔ དེ་ནས་དབང་བླང་བ་ནི༔ ཡེ་ཤེས་རྒྱ་མཚོའི་རྒྱུད་ལས༔ བླ་མའི་སྐུ་ཡི་དཀྱིལ་འཁོར་ལས༔ དབང་བཞི་ཡོངས་རྫོགས་བླང་གྱུར་ན༔ ས་ལམ་མ་ལུས་ཚེ་འདིར་བགྲོད༔ ཅེས་གསུངས་པས༔ བླ་མ་སངས་རྒྱས་སྣང་བ་མཐའ་ཡས་ཀྱི་དཔྲལ་བ་ནས་འོད་ཟེར་དཀར་པོ་བྱུང་༔ རང་གི་དཔྲལ་བར་ཐིམ༔ སྐུའི་བྱིན་རླབས་ཞུགས༔ མགྲིན་པ་ནས་འོད་ཟེར་དམར་པོ་བྱུང་རང་གི་མགྲིན་པར་ཐིམ་པས་གསུང་གི་བྱིན་རླབས་ཞུགས༔ བླ་མའི་ཐུགས་ཀ་ནས་འོད་ཟེར་སྔོན་པོ་བྱུང་རང་གི་སྙིང་གར་ཐིམ་པས་ཐུགས་ཀྱི་བྱིན་རླབས་ཞུགས༔ བླ་མའི་སྐུའི་ཆ་ཐམས་ཅད་ནས་འོད་ཟེར་སྣ་ཚོགས་བྱུང་ནས་རང་གི་ལུས་ཐམས་ཅད་ལ་ཐིམ་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་བྱིན་རླབས་ཐོབ༔ སྡིག་སྒྲིབ་ཐམས་ཅད་དག་པར་བསྒོམ་པ་དང་༔ བླ་མའི་དཔྲལ་བའི་ཨོ་ལས་ཨོཾ་ཡིག་དཀར་པོ་འཕྲོས་རང་གི་སྤྱི་བོར་ཐིམ་པ་དང་དེ་བཞིན་དུ་མགྲིན་པ་ནས་
ཨཱཿཡིག་དམར་པོ་དང་༔ ཐུགས་ཀ་ནས་ཧཱུྃ་ཡིག་སྔོན་པོ་དང་༔ ལྟེ་བ་ནས་ཧྲཱིཿཡིག་ལྗང་གུ་རྣམས་འཕྲོས་ནས་རང་གི་སྤྱི་མགྲིན་སྙིང་ག་ལྟེ་བ་རྣམས་སུ་ཐིམ་པས་སྒྲིབ་པ་བཞི་དག་དབང་བཞི་ཐོབ་པར་བསྒོམ་པ་དང་༔ བླ་མའི་སྐུ་ལས་བདུད་རྩིའི་རྒྱུན་བབས་པས་རང་གི་ཚངས་བུག་ནས་ཞུགས་ཏེ༔ དཔྲལ་བ་གང་བས་ལུས་སྒྲིབ་དག་བུམ་དབང་ཐོབ༔ མགྲིན་པ་གང་བས་ངག་སྒྲིབ་དག་གསང་དབང་ཐོབ༔ སྙིང་ག་གང་བས་ཡིད་སྒྲིབ་དག་ཤེས་རབ་ཡེ་ཤེས་ཀྱི་དབང་ཐོབ༔ ལུས་ཐམས་ཅད་ལྟེམ་གྱིས་གང་བས་སྒོ་གསུམ་ཆ་སྙོམས་ཀྱི་སྒྲིབ་པ་དག༔ ཚིག་དབང་རིན་པོ་ཆེ་ཐོབ་པར་བསྒོམ༔ དམིགས་པ་ཟིན་དཀའ་ན་རྗེས་མ་འདི་ཡིས་ཆོག༔ དེ་ཡང་བདུད་རྩི་དེ་ག་པུར་གྱི་ཆུའི་རང་བཞིན་བསིལ་ངད་ཅན་བསྒོམས་པས་ཚད་པའི་ནད་སེལ༔ བདུད་རྩི་དམར་པོ་ཁྲོ་ཆུ་ལྟར་བསྒོམས་པས་གྲང་བ་སེལ༔ སེར་པོ་འབྲི་མར་ཁུ་བ་ལྟར་སྣུམ་བཅུད་ལྡན་པར་བསྒོམས་པས་རླུང་ནད་སེལ༔ ཕྱག་གི་ལྷུང་བཟེད་ནས་ཚེའི་བདུད་རྩི་ལུད་པ་དང་སྦྲགས་པས་ཚེའི་བར་ཆད་སེལ་ལོ༔ དེ་ནས་ཐུན་མཚམས་སུ་བླ་མ་འོད་དུ་ཞུ་ནས་རང་ལ་ཐིམ་པས༔ རྩ་བ་དང་
བརྒྱུད་པའི་བླ་མ་རྣམས་ཀྱི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་ཆུ་དང་འོ་མ་འདྲེས་པ་ལྟར་གྱུར༔ ཕྱི་སྣོད་འཇིག་རྟེན་སངས་རྒྱས་ཀྱི་ཞིང་ཁམས་སུ་བསྒོམ་པ་ནང་བཅུད་སེམས་ཅན་ལ་ཐིམ༔ སེམས་ཅན་ཐམས་ཅད་ཐུགས་རྗེ་ཆེན་པོ་རིགས་ལྔར་གསལ་བ་རང་ལ་ཐིམ༔ རང་ཐུགས་ཀའི་སྔགས་ཕྲེང་ལ་ཐིམ༔ སྔགས་ཕྲེང་ཧྲཱིཿལ་ཐིམ༔ ཧྲཱིཿཡང་ཇེ་ཕྲ་ནམ་མཁའ་ལ་འཇལ་ཡལ་བ་ལྟར་ཅི་ཡང་མི་བསྒོམ་པར་སེམས་རང་ལུགས་སུ་ཀློད་ལ་བཞག༔ གཉིད་ཁ་དེ་ལྟར་བསྒོམས་པས་གཉིད་འོད་གསལ་དུ་འགྲོ་བ་དང་འཆི་ཁ་ཡང་དེ་ལྟར་བསྒོམས་པས་འཆི་དུས་ཐུགས་དམ་འོད་གསལ་འཛིན་ལུགས་ཀྱང་དེ་ལྟར་ཡིན་ལ༔ དེ་ལྟར་གནས་ན་ལྷ་བསྒོམ་པ་དང་ཕྱག་བསྐོར་བ་སོགས་བླ་མ་མཆོད་པ་ཡང་དེ་ཡིན་ཏེ༔ བླ་མ་ཆོས་སྐུའི་རྣལ་འབྱོར་ཞེས་བྱའོ༔ ཀྱེའི་རྡོ་རྗེའི་རྒྱུད་ལས༔ བསྒོམ་མེད་སྒོམ་པ་པོ་ཡང་མེད༔ ལྷ་མེད་སྔགས་ཀྱང་ཡོད་མ་ཡིན༔ སྤྲོས་པ་མེད་པའི་རང་བཞིན་ལ༔ ལྷ་དང་སྔགས་རྣམས་ཡང་དག་གནས༔ རྣམ་སྣང་མི་བསྐྱོད་དོན་གྲུབ་དང་༔ རིན་ཆེན་དཔག་མེད་སེམས་དཔའོ༔ ཞེས་དང་༔ རྡོ་རྗེ་རྩེ་མོ་ལས༔ སྔགས་རྣམས་ཀྱི་
ནི་མཚན་ཉིད་ནི༔ སངས་རྒྱས་ཀུན་གྱི་ཐུགས་ཡིན་ཏེ༔ ཆོས་ཀྱི་སྙིང་པོ་སྒྲུབ་བྱེད་ཡིན༔ ཆོས་ཀྱི་དབྱིངས་དང་ཡང་དག་ལྡན༔ སྔགས་ཀྱི་མཚན་ཉིད་ཡིན་པར་བརྗོད༔ ཅེས་དང་༔ ནམ་མཁའ་རིན་པོ་ཆེའི་མདོ་ལས༔ ཇི་ལྟར་ཆུ་ལ་ཆུ་བཞག་དང་༔ ཇི་ལྟར་མར་ལ་མར་བཞག་ལྟར༔ རང་གིས་རང་གི་ཡེ་ཤེས་འདི༔ ལེགས་མཐོང་གང་ཡིན་འདིར་ཕྱག་ཡིན༔ ཞེས་གསུངས་པས་སེམས་མ་བཅོས་པར་ཞོག་ཅིག༔ དེས་ཆོས་འབྲུ་ལྔ་པ་སོང་༔ ༒ དེ་ནས་ཆོས་འབྲུ་དྲུག་པ་ནི་གཞུང་ལས༔ དེ་ནས་སེམས་ལ་ཕར་ལྟོས་དང་༔ ཅི་ཡང་མི་དྲན་གཏི་མུག་འདྲ༔ དེ་ལ་གནས་པ་ངོས་བཟུང་ངོ་༔ ཞེས་གསུངས་པའི་དོན་བཤད་ན༔ དང་པོ་མ་བསྒོམ་པའི་ཉེས་དམིགས་བསྒོམ་པའི་ཕན་ཡོན་བསྒོམ་རྒྱུ་གང་ཡིན་ངོས་བཟུང་༔ དམིགས་ཐུན་དངོས་དང་བཞི་ལས༔ དང་པོ་ནི་ཆོས་ཤེས་ནས་མ་བསྒོམས་ན་རྒྱ་མཚོའི་འགྲམ་དུ་སྐོམ་ནས་ཤི་བ་དང་འདྲ་སྟེ༔ འཕགས་པ་སྡོང་པོ་བཀོད་པའི་མདོ་ལས༔ ཡང་དག་སངས་རྒྱས་བསྟན་པ་འདི༔ ཐོས་པ་ཙམ་གྱིས་མི་འགྲུབ་བོ༔ དཔེར་ན་ལ་ལ་ཆུ་
ཀླུང་གིས༔ སྟོབས་མེད་ནན་གྱིས་ཁྱེར་བ་དག༔ སྐོམ་པས་ཤི་བར་གྱུར་པ་བཞིན༔ མ་བསྒོམས་ཆོས་ཀྱང་དེ་བཞིན་ནོ༔ ཞེས་དང་༔ དཀོན་མཆོག་བརྩེགས་པ་ལས༔ འོད་སྲུང་འདི་ལྟ་སྟེ་དཔེར་ན་མི་ལ་ལ་ཞིག་རྒྱ་མཚོའམ་ཆུ་བོ་ཆེན་པོས་ཁྱེར་ལ་ཆུས་སྐོམ་བཞིན་དུ་འཆི་བའི་དུས་བྱེད་པ་བཞིན་དུ༔ འོད་སྲུང་འདི་ལ་དགེ་སྦྱོང་དང་བྲམ་ཟེ་མང་པོ་ཁ་ཅིག་ཆོས་མང་པོ་བསླབས་ནས་ཀུན་ཆུབ་པར་བྱས་ཀྱང་༔ འདོད་ཆགས་ལ་སྲེད་པ་མི་སེལ༔ ཞེ་སྡང་ལ་སྲེད་པ་མི་སེལ༔ གཏི་མུག་ལ་སྲེད་པ་མི་སེལ་བ་དེ་དག༔ ཆོས་ཀྱི་རྒྱ་མཚོས་ཁྱེར་ལ་ཉོན་མོངས་པའི་སྐོམ་པས་འཆི་བའི་དུས་བྱེད་པར་འགྱུར་ཏེ༔ ངན་འགྲོར་འགྲོ་བར་འགྱུར་རོ༔ ཞེས་དང་༔ འོད་སྲུང་གིས་ཞུས་པའི་མདོ་ལས༔ མི་གཅིག་རྒྱ་མཚོའི་ནང་དུ་སྐོམ་ནས་འཆི་བ་བཞིན་དུ༔ དགེ་སློང་མང་དུ་ཐོས་པ་ཡང་ཐོས་པས་བརྒྱགས་ནས༔ ཉོན་མོངས་པ་མི་སྤང་ན་ངན་སོང་དུ་སྐྱེའོ༔ ཞེས་དང་༔ འཕགས་པ་སྡོང་རྒྱན་ལས༔ ཆོས་མང་དུ་ཐོས་ནས་ཉམས་སུ་མི་ལེན་པ་ནི་དཔེར་ན་མི་དབུལ་པོས་ལས་སུ་མིའི་ནོར་བགྲང་ཡང་བདག་ལ་གཅིག་ཀྱང་བྱར་མེད་པ་དང་འདྲའོ༔ ཞེས་དང་༔ མདོ་
ཐལས༔ ཆོས་རྣམས་ཡོངས་སུ་མ་བསྒོམས་པར༔ ཆོས་ཉིད་མཐོང་བར་མི་འགྱུར་ཏེ༔ ཆུ་ནི་མཐོང་དང་ཐོས་པ་ཡི༔ མ་འཐུང་སྐོམ་པ་སེལ་མི་འགྱུར༔ ཞེས་དང་༔ སྡོང་པོ་བཀོད་པ་ལས༔ ཇི་ལྟར་འགྲོ་བ་མང་པོ་ལ༔ ཟས་དང་སྐོམ་དག་སྦྱིན་བྱས་ཀྱང་༔ བདག་ཉིད་བཀྲེས་ནས་ཤི་བ་ལྟར༔ མ་བསྒོམས་ཆོས་ཀྱང་དེ་དང་འདྲ༔ ཇི་ལྟར་དབྱིག་གི་བང་མཛོད་དུ༔ རིན་ཆེན་མང་པོ་བགྲང་བྱེད་ཀྱང་༔ བག་ཞད་ཙམ་ཡང་མི་འཐོབ་བཞིན༔ ཆོས་ལ་མ་བསྒོམས་དེ་དང་འདྲ༔ ཞེས་དང་༔ ཐལ་ཆེན་ལས༔ དཔེར་ན་འོན་པ་རོལ་མོ་མཁན༔ གཞན་དག་དེ་ཡིས་དགའ་བྱེད་ཀྱང་༔ བདག་ཉིད་ཀྱིས་ནི་མི་ཐོས་ན༔ མ་བསྒོམས་ཆོས་ཀྱང་དེ་བཞིན་ནོ༔ ཆུ་བོ་དག་གང་རྒྱ་མཚོ་ལས༔ གྲུ་དང་གཟིང་བཅས་མཉན་པ་ཡི༔ གཞན་དག་དེ་ཡིས་སྒྲོལ་བྱེད་ཀྱང་༔ བདག་ཉིད་ཆུ་ལ་ཤི་བ་ལྟར༔ མ་བསྒོམས་ཆོས་ཀྱང་དེ་བཞིན་ནོ༔ ཞེས་གསུངས་པས༔ ཆོས་ལ་མཁས་ཀྱང་རང་གིས་མ་བསྒོམས་ན་མི་ཕན་ལ༔ ཐ་མལ་པ་རྣམས་ཀྱང་ཁྲིད་ཐོབ་བཞིན་མ་འཁྲེབ་པར་ཉམས་སུ་ལེན་པ་གལ་ཆེའོ༔ གཉིས་པ་བསྒོམས་པའི་ཕན་
ཡོན་ནི༔ ཏིང་འཛིན་རྒྱལ་པོ་ལས༔ ཁམས་གསུམ་གྱི་སེམས་ཅན་ཐམས་ཅད་དགེ་བ་བཅུའི་ལམ་ལ་བཙུད་པ་བས༔ ཆོས་བདག་མེད་པ་ལ་མོས་ནས་དགོན་པའི་ཕྱོགས་སུ་གོམ་པ་བདུན་བོར་བ་བསོད་ནམས་ཆེའོ༔ ཞེས་དང་༔ དེ་ཁོ་ན་ཉིད་ངེས་པར་བསྟན་པའི་མདོ་ལས༔ ཤཱ་རིའི་བུ་གང་གིས་བསྐལ་པ་བཅུའི་བར་དུ་མཉན་པ་བས༔ གང་གིས་སེ་གོལ་ཏོག་པའི་ཡུད་ཙམ་དུ་དེ་ཁོ་ན་ཉིད་ཀྱི་དོན་བསྒོམས་ན་དེས་བསོད་ནམས་མང་དུ་འཕེལ་ལོ༔ ཤཱ་རིའི་བུ་དེ་ལྟ་བས་ན་དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་དག་ལ་ནན་ཏན་གྱིས་གདམས་པར་བྱའོ༔ ཤཱ་རིའི་བུ་གང་སངས་རྒྱས་ཀྱི་བསྟན་པའི་བྱང་ཆུབ་སེམས་དཔའ་ཐམས་ཅད་ཀྱང་ཏིང་ངེ་འཛིན་འདི་ལ་གནས་པ་ཤ་སྟག་གོ༔ གསུངས་སོ༔ རྟོག་པ་ཆེན་པོའི་མདོ་ལས༔ ཐང་གཅིག་བསམ་གཏན་ཐུན་ཞུགས་ན༔ ཁམས་གསུམ་གང་བའི་མི་རྣམས་ལ༔ སྲོག་བྱིན་པས་ནི་འདི་དོན་མ༔ ཞེས་དང་༔ དམ་པ་འཇུག་པའི་མདོ་ལས༔ སེམས་ཅན་ཐམས་ཅད་ལ་ཇི་སྲིད་འཚོའི་བར་དུ༔ འཚོ་བའི་ཡོ་བྱད་ཀྱི་ཚོགས་བསགས་པ་བས༔ སྟོང་པ་ཉིད་ཐུན་གཅིག་བསྒོམ་པ་བསོད་ནམས་ཆེའོ༔ ཞེས་དང་༔
ཉི་ཁྲི་ལས༔ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཅིག་འཁོད་པ་དེ་དག་སྦྱིན་པས་ཡོངས་སུ་ཚིམས་པར་བྱས༔ ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བ་དང་༔ རྒྱུན་དུ་ཞུགས་པ་དང་རང་བྱང་ཆུབ་ལ་བཀོད་པ་བས༔ གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སེ་གོལ་གཏོགས་པ་ཙམ་ཞིག་བསྒོམ་པ་བསོད་ནམས་ཆེས་མང་དུ་འཕེལ་ལོ༔ ཞེས་དང་༔ གཙུག་ཏོར་ཆེན་པོའི་མདོ་ལས༔ བསྐལ་པ་མང་པོའི་བར་དུ་ཐོས་པ་བསགས་པ་བས༔ ཉིན་གཅིག་ཆོས་ཉིད་ཀྱི་དོན་བསྒོམ་པ་བསོད་ནམས་ཆེའོ༔ དེ་ཅིའི་ཕྱིར་ཞེ་ན༔ སྐྱེ་ཤིའི་ལམ་དང་རིང་དུ་བྱེད་པའི་ཕྱིར་རོ༔ ཞེས་དང་༔ ས་ཆེན་གྱི་མདོ་ལས༔ རྣལ་འབྱོར་སློབ་པར་འདོད་པས་དོན་ཉམས་སུ་བླང་བ་ལ་བསླབ་པར་བྱའོ༔ བརྟགས་པའི་ཐ་སྙད་ཇི་ཙམ་སྙེད་ཅིག་ཤེས་ཀྱང་ཚིག་གི་དོན་རྟོགས་པོ་དང་མི་འདྲའོ༔ ཞེས་དང་༔ ཏིང་ངེ་འཛིན་མཆོག་དམ་པའི་མདོ་ལས་བཅོམ་ལྡན་འདས་ཀྱིས་བཀའ་སྩལ་པ༔ གཞན་ཡང་མི་གཅིག་གིས་གོང་དུ་སྨོས་པའི་བསོད་ནམས་ཐམས་ཅད་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བར་བྱེད་ནུས་ལ༔ མདོ་སྡེ་བཅུ་གཉིས་དང་བསྟན་བཅོས་པོ་ཏི་བཅོ་ལྔ་རྙེད་ཀྱང་ཁ་ཐོན་དུ་འདོན་ཅིང་འཆད་ནུས་ཏེ༔ ཚུལ་ཁྲིམས་དང་བཟོད་པ་དང་བྱམས་པ་ལ་སོགས་པ་ཡང་སྤྱོད༔ སྦྱིན་པར་བྱེད༔ མང་དུ་ཐོས་པའི་མཆོག་ཏུ་གྱུར་ལ་ཆོས་སྟོང་ཞིང་ཞི་བའི་དོན་ཡང་སྟོན་ཏེ༔ ཉན་པའི་མངོན་པར་ཤེས་པ་ལྔ་ཐོབ་པར་བྱེད༔ དེ་ལྟར་ཕན་པ་དང་བདེ་བའི་དོན་བྱས་ཀྱང་༔ དེ་བས་མི་ཞིག་ཉིན་གཅིག་གམ་མཚན་གཅིག་ཏིང་ངེ་འཛིན་ལ་ཞུགས་པ་ཙམ་མི་ཕོད་དོ༔ དེ་ཅིའི་ཕྱིར་ཞེ་ན༔ མང་དུ་ཐོས་པའི་གང་ཟག་ནི༔ རིའམ་རྒྱ་མཚོ་ལྟར་ང་རྒྱལ་གྱི་སེམས་ཆེའོ༔ དེ་ལྟར་ང་རྒྱལ་གྱི་སེམས་ཆེ་བ་ནི༔ ངན་སོང་དུ་བསྐལ་པ་དཔག་མེད་ཀྱི་བར་དུ་སྡུག་བསྔལ་མྱོང་བར་འགྱུར་རོ༔ ཞེས་དང་༔ ཏིང་ངེ་འཛིན་མཆོག་དམ་པའི་མདོ་ལས༔ གང་ལ་བསམ་གཏན་ཏིང་ངེ་འཛིན་ཡོད་པ་ནི༔ སྐྱེ་ཤི་འཁོར་བའི་སྡིག་ཁ་ན་མ་ཐོ་བའི་ལྕི་བ་ཡང་འབྱོང་བར་འགྱུར་རོ༔ བསམ་གཏན་གྱི་ཏིང་ངེ་འཛིན་ནི་རྒྱ་མཚོ་དང་འདྲ་སྟེ༔ ངས་བསམ་གཏན་དང་ཏིང་ངེ་འཛིན་གྱི་བསོད་ནམས་དང་ཕན་ཡོན་བཤད་ན་ཟད་པའི་མཐའ་
མེད་དེ༔ བསྐལ་པར་ཡང་མི་རྫོགས་སོ༔ ཞེས་སོགས་རྒྱ་ཆེར་གསུངས་སོ༔ འོ་ན་དེ་ལྟར་ཕན་ཡོན་ཆེན་པོ་དང་ལྡན་པའི་ཏིང་ངེ་འཛིན་དེ་གང་ཡིན་ཞེ་ན༔ ང་འཇུག་ཡིན་ནོ༔ དེ་ལ་པཎྜི་ཏའི་དཔྱད་སྒོམ་ཞེས་པ་སྒྲོ་འདོགས་ཕྱི་ནས་བཅད༔ རྒྱལ་བའི་བཀའ་མདོ་རྒྱུད་ལ་ཐོས་བསམ་རྒྱ་ཆེན་པོ་བྱས་ཏེ༔ ལུང་དང་རིགས་པའི་སྒོ་ནས་ལྟ་བའི་གནས་ལུགས་གཏན་ལ་ཕབ་ནས༔ ད་གཟོད་བསྒོམ་དགོས་ཏེ་དམིགས་པ་དེ་མིན་ཡང་གོལ་ས་སོགས་སུ་འཆོར་བའི་ཉན་ཡོད་ཅེས་བཤད་ཀྱང་༔ ཀུ་སཱ་ལའི་འཇོག་སྒོམ་ནི་སྤྲོས་པ་ནང་ནས་གཅོད་པ་སྟེ༔ དེ་ལྟར་ཐོས་བསམ་བྱས་ཀྱང་ནམ་མཁའ་ལ་འདོམ་འཇལ་བྱས་པ་དང་འདྲ་བས་མཐའ་ཆོད་པ་མི་སྲིད༔ ཚེ་ལ་ལོང་མེད་པས་བླ་མའི་གསུངས་བཞིན་ཉམས་སུ་བླངས་པས༔ ཞི་གནས་དང་ལྷག་མཐོང་དང་ཟུང་འཇུག་རྣམས་རིམ་གྱིས་འཆར་བས་ཐབ་ཀྱི་མེ་བསད་ན་སྐར་ཁུང་གི་དུ་བ་རང་འགགས་སུ་འགྲོ་བ་དང་འདྲ་གསུངས་ཏེ༔ ཨོ་རྒྱན་རིན་པོ་ཆེས༔ འདི་ཉིད་མ་རྟོགས་པཎྜི་ཏ་ཡང་འཁྲུལ༔ འདི་ཉིད་རྟོགས་ན་བ་ལང་རྫི་ཡང་གྲོལ༔ རང་གི་ཁ་རུ་མྱོང་བའི་བུ་རམ་ལ༔ དེ་ལ་གཞན་
གྱིས་རོ་བཤད་མི་དགོས་ལྟར༔ བཤད་མི་ཤེས་ཀྱང་མངོན་སུམ་གཏན་ལ་ཕེབ༔ ཅེས་གསུངས་པས་འདིར་ཀུ་སཱ་ལའི་འཇོག་སྒོམ་དུ་བྱ་བ་ཡིན༔ འདིར་དང་པོ་ཞི་གནས་ཀྱི་ཁྲིད་བཏབ་པས་རིམ་གྱིས་ལྷག་མཐོང་ངོ་འཕྲོད་དེ༔ སྒོམ་ཐོག་ནས་ལྟ་བ་བཙལ་བས་རྟོགས་པ་བསྟན་པ་ཡིན༔ འགའ་ཞིག་སྔོན་དུ་ཁྲིད་ཐོབ་པས་ལྷག་མཐོང་ཅུང་ཟད་ངོ་འཕྲོད་ཀྱང་ཞི་གནས་ཀྱི་ཉམས་མ་སྐྱེས་ན་རྩལ་དང་ཡོན་ཏན་མི་རྫོགས་པས་འདིར་བོགས་འདོན་དུ་ཡང་འགྱུར་བ་སྟེ༔ མྱ་ངན་འདས་ཆེན་ལས༔ ཞི་གནས་དང་ལྡན་པ་ལྷག་མཐོང་གིས་གྲོལ་བ་དང་༔ ལྷག་མཐོང་དང་ལྡན་པ་ཞི་གནས་ཀྱིས་གྲོལ་བར་གསུངས་སོ༔ དེ་ལ་ཞི་གནས་སྐྱེ་བའི་རྒྱུ་ལུས་ངག་ཡིད་གསུམ་དབེན་པ་ལས་འབྱུང་བ་སྟེ༔ སྤྱོད་འཇུག་ལས༔ ལུས་དང་སེམས་ནི་དབེན་པ་ལས༔ རྣམ་པར་རྟོག་པ་མི་འབྱུང་ངོ་༔ ཞེས་གསུངས་སོ༔ དེ་ནས་དབེན་པར་སྟན་བདེ་བ་ལ་ལུས་གནད་བཅའ་དགོས་ཏེ༔ རྒྱུད་ཀྱི་རྒྱལ་པོ་རྙོགས་པ་མེད་པ་ལས༔ དེ་ནས་སྐྱིལ་ཀྲུང་བཅས་ནས་ནི༔ སྣ་ཡི་རྩེ་མོར་བལྟས་ནས་ཀྱང་༔ རང་གི་རང་བཞིན་རྣལ་འབྱོར་གྱིས༔ དེ་ཉིད་མཐོང་བས་བཞག་པར་བྱ༔ སྙིང་གའི་
གནད་དུ་ལག་པ་གཉིས་དཔུང་པ་ཤད་ཤད་ལ་ཟེར། འབད་པས་མཉམ་པར་བཞག་བྱས་ནས༔ མི་རྟོག་པ་ཡི་རང་བཞིན་དུ༔ གང་ཚེ་སེམས་ནི་རབ་རྒྱུ་བ༔ སངས་རྒྱས་ཐམས་ཅད་འདུས་པའི་བདག༔ དེ་ཚེ་དེ་ལ་སྐྱེ་བར་འགྱུར༔ ཞེས་དང་༔ གདན་བཞི་ལས༔ ཡིད་དུ་འོང་བའི་ས་ཕྱོགས་སུ༔ དབེན་པའི་སྟན་ལ་གནས་ནས་སེམས་དཔའི་སྐྱིལ་ཀྲུང་བཅས་ནས་ནི༔ ལག་གཉིས་གསང་བའི་གནས་སུ་བཞག༔ མིག་ནི་སྣ་རྩེར་བལྟས་ནས་སུ༔ དབུགས་ནི་ལྟེ་བའི་རྩ་བར་བཟུང་༔ ཐད་ཀ་ཀུན་ཡངས་པ་ནི༔ ཞེས་དང་༔ རྒྱན་སྟུག་པོ་བཀོད་པ་ལས༔ པདྨོའི་གནས་སུ་སྟན་བཅས་ཏེ༔ སྐྱིལ་མོ་ཀྲུང་དང་མཉམ་བཞག་ཅིང་༔ རྟག་ཏུ་རྣལ་འབྱོར་སྦྱོང་བར་གྱིས༔ འདོད་ཆགས་བདེ་ལས་རྣམ་པར་དབེན༔ དབང་པོ་དབང་པོའི་དོན་རྣམས་ཀྱིཿ་་་ཆགས་པ་ལ་ཟེར། ཐམས་ཅད་ལས་ཀྱང་ཕྱིར་བཟློག་ཅིང་༔ ལྕགས་ཀྱུས་གླང་པོ་ཇི་བཞིན་དུ༔ སེམས་ནི་མཉམ་པར་གཞག་པར་གྱིས༔ ཞེས་དང་༔ པདྨ་གསུང་གི་རིག་འཛིན་ཆེན་པོ་ནཱ་གརྫུ་ནའི་ཞལ་ནས༔ སྐུ་ནི་དགྱེ་བ་མ་ཡིན་ནོ༔ རྒུ་བ་ཡང་ནི་མ་ཡིན་ནོ།
དབུགས་བཏང་པ་དང་རྔུབ་པ་མིན༔ གསུང་པ་མ་ཡིན་མི་གསུང་མིན༔ སྤྱན་བཟང་བཙུམ་པ་མ་ཡིན་ལ༔ ཕྱེ་བ་ཡང་ནི་མ་ཡིན་ནོ༔ ཞེས་གསུངས་པ་ལྟར་རྣམ་སྣང་གི་ཆོས་བདུན་བྱ་སྟེ༔ རྐང་པ་རྡོ་རྗེའི་སྐྱིལ་ཀྲུང་ངམ་སེམས་སྐྱིལ་གང་རུང་ལ་རྐང་པ་གཡས་སྟེང་དུ་བྱས་འོག་རླུང་ཅུང་ཟད་སྡོམ་པའི་གནད་ཀྱིས་ཐུར་སེལ་གྱི་རླུང་ཟིར༔ ཐིག་ལེ་བརྟན་ཞིང་ཟོ་མདོག་བདེ༔ སྒལ་པ་གསེར་གྱི་ཏོང་ཙེ་ལྟར་བསྲང་རྐེད་པ་ཅུང་ཟད་འཐེན་གསུས་པ་ཨིན་ཙམ་ལྡིར༔ སྐེད་པ་ཉག་བྱས་རོ་སྟོད་ཅུང་ཞིག་དགྱེ་བས་སྲོག་འཛིན་གྱི་རླུང་དང་མེ་མཉམ་གྱི་རླུང་ཟིན༔ དྲོད་སྐྱེ་རིག་པ་དང་འབྱུང་བ་སྙོམས་པའི་གནད་ཡོད༔ ལག་པ་མཉམ་བཞག་གཡོན་པའི་སྟེང་དུ་གཡས་བཞག་ལ་སུས་པ་ཅུང་ཟད་བཅར༔ མཐེ་བོང་ལྟོ་གི༔ སྦྱར་བའམ་མཐེ་བོང་གཉིས་ཀྱིས་སྲིན་ལག་གི་འཕར་རྩ་མནན༔ དཔུང་པ་རྒོད་གཤོག་ལྟར་བརྐྱང་ཞྭ་བཞི་ཁྲིམས་བྱ་རྐང་སོར་བསྐུམ༔ དེ་རྣམས་ཀྱི་ཁྱབ་བྱེད་ཀྱི་རླུང་ཟིན་དབུ་མའི་ཁ་འབྱེད་ཐིག་ལེ་ཁྲེམ་ལུས་བདེ་བས་ཁྱབ་བོ༔ མགྲིན་པོ་ཨེན་ཙམ་འགུགས་མཆུ་མི་བསུམ་སོ་བར་ཅུང་ཟད་ཡོད་པར་བྱ༔ མིག་སྣ་རྩེའི་ཐད་ཀྱི་ནམ་མཁའ་ལ་བལྟ་དེ་རྣམས་ཀྱིས་
གྱེན་རྒྱུའི་རླུང་ཟིན་ཏེ་རླུང་རང་གནས་སུ་འགྲོ༔ ཡོན་ཏན་ཐམས་ཅད་རང་བབས་ལ་སྐྱེ་བ་ཡིན་པས་རྒས་པ་དང་ན་བ་སོགས་ལུས་ཀྱི་མི་ནུས་པ་མེད་པ་རྣམས་ལུས་གནད་འདི་ཤིན་ཏུ་གལ་ཆེའོ༔ དེ་ལ་ཞི་གནས་དེ་ལ་མཚན་བཅས་དང་མཚན་མེད་གཉིས་ཡོད་པ་ལས༔ མཚན་བཅས་མ་དག་པ་ཤིང་བུ་དང་རྡེའུ་ལ་སེམས་འཛིན་པ་བས་དག་པ་ལྷ་སྐུ་ལ་སེམས་འཛིན་པ་ལྷག་ལ༔ དེ་ནི་གོང་དུ་བསྐྱེད་རིམ་བསྒོམ་པ་ལ་འཐུས་པས་འདིར་གུད་དུ་སྟོན་མི་དགོས་ཤིང་༔ འདིར་མཚན་མེད་ཞི་གནས་བསྒོམ་པ་ཡིན་ཏེ༔ རྒྱལ་བའི་ཡུམ་ལས༔ བྱང་ཆུབ་སེམས་དཔའ་ཆེན་པོ་དེ་ནི༔ བསམ་གཏན་ཡིད་ལ་མི་བྱ་བ་ལ་མཁས་པར་རིག་པར་བྱའོ༔ ཞེས་དང་༔ རྡོ་རྗེ་གཙུག་ཏོར་གྱི་རྒྱུད་ལས༔ གསང་བའི་བདག་པོ་དོན་དམ་པའི་བདེན་པ་ནི༔ བདག་མེད་པའི་དངོས་པོ་ཟིལ་གྱིས་མ་གནོན་པ་ཆོས་ཐམས་ཅད་སྟོང་པ་སྟེ༔ འཕེལ་བ་མེད་པ་འགྲིབ་པ་མེད་པ་རྣམ་པར་དག་པ་དེས་ནི་ནམ་མཁའ་དང་མཉམ་པ༔ རང་བཞིན་གྱིས་དག་ཅིང་དྲི་མ་མེད་པའི་ངོ་བོ་ཉིད༔ ཡི་གེ་མེད་པ་ཚིག་མེད་པ་ལུས་དང་ངག་དང་ཡིད་བྲལ་བ༔ ཡོད་པའང་མ་ཡིན་མེད་པའང་མ་
ཡིན༔ སྤྱོད་པ་ཡང་མ་ཡིན་མི་སྤྱོད་པ་ཡང་མ་ཡིན༔ ཐག་རིང་བ་ཡང་མ་ཡིན་ཉེ་བ་ཡང་མ་ཡིན༔ སྟོང་པ་ཡང་མ་ཡིན་མི་སྟོང་པ་ཡང་མ་ཡིན༔ དབུ་མའང་མ་ཡིན་པ་བློའི་སྤྱོད་ཡུལ་ལས་འདས་པ་འདི་ནི་དོན་དམ་པའི་བདེན་པའོ༔ ཞེས་དང་༔ དགོངས་པ་ལུང་སྟོན་གྱི་རྒྱུད་ལས༔ རང་རིག་ཙམ་གྱི་ཡེ་ཤེས་ནི༔ ནམ་མཁའ་ལྟ་བུར་མཚན་ཉིད་མེད༔ གསུམ་པོ་དེ་ཉིད་གཅིག་གྱུར་བ༔ འགྲོ་བ་མེད་ཅིང་འོང་བ་མེད༔ འགགས་མེད་རབ་ཏུ་ཞི་བ་ཉིད༔ རྟག་དང་ཆད་པ་རྣམ་པར་སྤངས༔ དུས་གསུམ་མཁྱེན་པས་མ་བྱས་པ༔ རྟོགས་པ་ནམ་མཁའ་དབྱེར་མེད་མཚན༔ འདི་ཉིད་ཁོ་ན་དོན་དམ་སྟེ༔ སོ་སོར་རང་རིག་མཚན་ཉིད་དོ༔ ཞེས་དང་༔ ཨོ་རྒྱན་རིན་པོ་ཆེའི་ཞོལ་ནས༔ བཞག་ཐབས་སེམས་ཀྱི་གནད་གསུམ་ནི༔ ཐ་མལ་དུ་མ་ཡེངས་རྟོག་པ་མ་འགྱུས༔ ཡིད་བཟོ་མ་བྱས་པར་ཤེས་པ་རང་ལུགས་སུ་ཕྱ་ལེ་བཞག་གོ༔ དེས་སྒོམ་རང་བབས་སུ་འོང་ལ་ཡེངས་བ་དང་འགྱུས་ན་བསྒོམ་མི་སྐྱེའོ༔ དེ་ལྟར་རང་ལུགས་སུ་བཞག་པས་རྣམ་རྟོག་ཕྲ་རགས་ཐམས་ཅད་རང་སར་ཉལ་ཞིང་ཞི་ནས་སེམས་རང་སར་ལྷན་ནེར་གནས་པ་འོང་བ་དེ་ལ་ཞི་གནས་
ཟེར༔ ཞེས་གསུངས་པས༔ ཁྱེད་རང་རྣམས་དབེན་པར་སོང་ལ་ལུས་རྣམ་སྣང་གི་ཆོས་བདུན་མཛོད་ལ༔ དང་པོ་རང་ཉིད་ཐུགས་རྗེ་ཆེན་པོ་བསྒོམ་པ་དང་བླ་མའི་རྣལ་འབྱོར་དང་བཅས་པ་ཐུན་ཆུང་ཞིག་བསྒོམ༔ དེ་ནས་བླ་མ་རང་ལ་བསྟིམ་ཐུགས་རྗེ་ཆེན་པོ་འོད་དུ་ཞུ་ནས་ཧྲིཡིག་དང་དེ་ཡང་སྟོང་པར་འཇའ་ཡལ་བ་ལྟར་བསྒོམ༔ དེ་ནས་དམིགས་པ་ཅི་ཡང་མི་བསྒོམ་པ་ནི་མི་དམིགས་པ་ཡིན་ཏེ༔ འདས་པའི་རྗེས་མི་གཅོད་དེ་དེ་རིང་ཕན་ཆད་ཀྱི་སྔར་འདས་པའི་བྱ་བ་གང་ཡང་མི་བསམ༔ མ་འོངས་པའི་མདུན་མི་བསུ་སྟེ༔ ད་ལྟ་ཚུན་ཆད་ཕྱིན་ཆད་ཀྱི་བྱ་བ་ཅི་ཡང་ཡིད་ལ་མི་བསམ༔ ད་ལྟའི་ཤེས་པ་ལ་དགག་སྒྲུབ་མི་བྱ་སྟེ༔ འདི་འདྲ་ཞིག་བསྒོམ་སྙམ་པ་དང་འདི་འདྲ་བ་དྲན་པ་དང་བསྒོམ་པ་མི་རུང་སྙམ་པའི་དགག་སྒྲུབ་མི་བྱེད༔ སེམས་རང་བབས་སུ་ཀློད་ལ་མ་ཡེངས་ཙམ་དུ་བཞག་གོ༔ དེ་ཡང་ལུས་རང་བབས་སུ་ལུས་གནད་ཀྱི་ངང་ནས་ཀློད་དེ་ཤིག་གེ་སོག་ཕོན་ཐག་པ་ཆད་པ་ལྟར་བཞག༔ ངག་རང་བབ་ནི་སྐུ་འདྲའི་ཞལ་ལྟར་ཅི་ཡང་མི་སྨྲ་བར་བཞག༔ ཡིད་རང་བབ་ནི་ཆུ་ཆད་པའི་རང་ཐག་ལྟ་བུ་སྟེ༔ འདི་བྱའི་འདུན་པ་འདུ་
ཤེས་མེད་པར་ཅམ་མེ་བཞག་གོ༔ དེ་ཡང་ཞི་ཞེས་པ་ནི་རྣམ་རྟོག་སྣ་ཚོགས་འཕྲོ་བ་དེ་ཞི༔ གནས་ཞེས་པ་སེམས་ལྷན་ནེ་གནས་པ་ཞིག་འོང་བས་སེམས་གནས་ཨེ་ཐུབ་ལྟོས། འདི་ལ་ཡང་ཁམས་ཀྱི་རིགས་ལ་སྣ་ཚོགས་འཆར་བར་འདུག་པས༔ ལ་ལ་སེམས་ཁྲིག་གེ་གནས་པ་དེ་སྐྱེ་སླ་བ་ཞིག་འོང་༔ དེ་ལ་སྐྱོན་ཅན་དང་སྐྱོན་མེད་གཉིས་ཡོད་དེ༔ སེམས་གནས་པས་རྣམ་པར་ཤེས་པ་ཚོགས་བརྒྱུད་འགགས་པ་འདྲ་བ་དྲན་པ་གཏོར་ནས་ཅི་ཡང་མི་དྲན༔ མིག་གི་ཡང་གཟུགས་སུ་འཛིན་པའི་ཤེས་པ་མི་གསལ༔ བོས་ཀྱང་མི་ཚོར་ལངས་མི་ཤེས་པར་ཐོམ་མེར་ལུས་པ་ཞིག་འབྱུང་༔ དེ་བསྒོམ་སྐྱེ་བའི་སྔ་ལྟས་ནི་ཡིན་ཀྱང་བསྒོམ་གྱི་གོ་མི་ཆོད་དེ༔ དེ་བསྒོམ་ཡིན་སྙམ་ནས་བསྒོམས་ན་དུད་འགྲོར་སྐྱེ་བའི་རྒྱུ་ཡིན་ཏེ༔ དེ་ལྟ་བུ་ནི་ཕྱི་བ་དྲེད་མོང་ལ་ཡང་ཡོད་པས་དགུན་ཟླ་གསུམ་ལུས་མི་རུལ་མི་འཁྱགས་མི་ལྟོགས་པ་དེའི་ནུས་པ་ཡིན༔ དེ་ལ་འགོག་པ་ཆ་མཐུན་ཟེར༔ ཉན་ཐོས་འགོག་པ་དངོས་ནི་སོ་སོ་སྐྱེ་བོ་ལ་སྐྱེ་དོགས་མེད་ཀྱང་༔ རྣམ་རྟོག་གང་ཡང་ཡིད་ལ་མི་འཕྲོ་བར་སེམས་གར་གཏད་དུ་ལྷན་ནེ་སྡོད་པ་བོས་ན་ཐོས་པས་མིག་སོགས་ཀྱང་གསལ་ཆ་མ་འགག་
ཤོག་ལྷེབ་ ༤༠༡ ནས་་ ༤༤༤ བར།
དེ་བསྒོམ་པའི་ཚེ་ཉོན་མོངས་པ་དུག་ལྔ་འགགས་པ༔ དེ་ལ་ནམ་འདོད་བར་དུ་གནས་པ་ཞིག་བྱུང་ན་ཉན་ཐོས་དང་ཐུན་མོང་གི་ལམ་འཇིག་རྟེན་པའི་ཞི་གནས་ཡིན༔ འདི་ཇི་ལྟར་ཆགས་ཆེ་བ་བཞིན་རྩལ་དང་ཡོན་ཏན་ཆེ༔ ལ་ལ་དག་ལུས་སེམས་ཐམས་ཅད་དགའ་བ་དང་བདེ་བ་ཆེན་པོས་ཁྱབ༔ སེམས་རང་བཞིན་གྱི་གནས་པ་མཚོ་ཆེན་རླུང་གིས་མི་བསྐྱོད་པ་ལྟ་བུ་མེ་རེ༔ ཀྱི་ལེ་གནས་པ་འོང་༔ བདེ་ཉམས་ཀྱི་ཞི་གནས་ཡིན་པས་དེ་ལའང་ཆགས་ཞེན་མེད་པར་སྐྱོང་ན་ཡོན་ཏན་སྐྱེ༔ དེ་ལ་ཆགས་ཞེན་ཆེན་པོས་བསྒོམས་ན་འདོད་ཁམས་ཀྱི་ལྷར་གོལ་བ་ཡིན༔ ལ་ལ་གསལ་སིང་ངེ་མར་མེ་རླུང་གིས་མ་བསྐྱོད་པ་ལྟ་བུ་སེམས་རྩེ་གཅིག་ཏུ་གནས་པ་ཞིག་འབྱུང་༔ དེ་ཞི་གནས་སྐྱོན་མེད་ཡིན་ཡང་ཆགས་ཞེན་ཆེན་པོས་དེ་བསྒོམ་དུ་འཛིན་ན་གཟུགས་ཁམས་ཀྱི་ལྷར་སྐྱེ་བའི་རྒྱུ་ཡིན༔ ལ་ལས་སེམས་ཅི་ཡང་མེད་པ་འཕྲོ་རྒྱུ་ཡང་མེད་གནས་རྒྱུ་ཡང་མེད་ཅི་ཡང་མི་འདུག་སྟོང་པ་རེད་སྙམ་པའི་དྲན་པ་གཅིག་པུ་དེ་ལ་གནས་ནས་ཅི་ཡང་མི་འཕྲོ་བ་ཞིག་འབྱུང་༔ དེ་ནི་ཅི་ཡང་མེད་པའི་སྐྱེ་མཆེད་སོགས་གཟུགས་མེད་དུ་སྐྱེ་བའི་རྒྱུ་ཡིན༔ དེ་སྒོམ་དུ་
འཛིན་མི་རུང་༔ འོན་ཀྱང་དེ་རྣམས་སྐྱེ་དགོས་རྒྱུ་ཞིག་ཡིན༔ སྐས་ཐེམ་འོག་མ་ལ་མ་བརྫིས་པར་གོང་མར་མི་སླེབ༔ དེ་ཚོ་ཐམས་ཅད་རིམ་པར་སྐྱེས་ནས་བསྒོམ་པའི་ཡོན་ཏན་དང་སྟོབས་ཆེ་བ་ཡིན༔ ལ་ལ་གནས་ཉམས་ཆུང་འཕྲོ་རྒོད་ཤས་ཆེ༔ སེམས་སྐད་ཅིག་ཀྱང་མི་སྡོད་པར་ཕྱོགས་ཐམས་ཅད་དུ་རླུང་འཚུབ་པ་ལྟར་རྒྱུག༔ ང་ལ་སྒོམ་མི་འོང་བར་གདའ་བསམ་པ་ཞིག་འོང་སྟེ༔ དེ་ཡང་གནས་པ་ཡིན་རྩུབ་ཉམས་ཟེར༔ སེམས་མི་སྡོད་པར་རིག་པ་དེ་རང་གནས་པ་ཡིན༔ སྔོན་བསྐལ་པ་དུ་མ་ནས་སེམས་དེ་ལྟར་ཡོད་དེ་ད་བར་མ་མཐོང་༔ ད་རྐུ་མ་ངོས་ཟིན་པ་དང་འདྲ་བས༔ སེམས་འཕྲོ་དུས་འཕྲོ་མཁན་དང་རྒྱུག་མཁན་དེ་ལ་གཟུགས་དང་ཁ་དོག་དང་དངོས་པོ་ཅི་འདྲ་ཞིག་གདའ་ཧྲིག་གེ་ལྟོས་དང་༔ འདི་མཐོང་མེད་པར་རང་མལ་དུ་འཁོར་འོང་༔ ལར་བསྒྲིམ་དྲགས་ན་མི་སྡོད་པས་ལུས་སེམས་བག་ཀློད་ལ་མ་ཡེངས་ཙམ་དུ་ཞོག་དང་བབས་ཀྱིས་གནས་ནི་འོང་བ་ཡིན༔ ལ་ལ་དག་ལ་སེམས་ཨན་ཙམ་ཀྱི་ལེ་གནས་ད་ལམ་ལེགས་སྙམ་ཛ༔ ག་ཤེད་ཐག་རིང་ཞིག་ཏུ་རྒྱངས་ཀྱིས་འཕྲོ་ནས་འགྲོ༔ དེ་མི་ལེགས་སྙམ་ནས་ཚུར་བཀུག་ནས་བཞག་པས་ཅུང་
ཟད་གནས༔ དེ་འདྲ་བ་ཡང་ཡང་བྱེད་པ་ཞིག་འོང་༔ དེ་ལ་འཕྲོས་ནི་ཐལ་དུས་ཞིག་ལ་འཕྲོ་བའི་རྣམ་རྟོག་དེ་དང་པོ་གང་ནས་བྱུང་ལྟོས༔ ད་ལྟ་ཅི་འདྲའི་ངོ་བོ་ཞིག་འདུག་ལྟོས༔ ད་ནས་འཕྲོས་པ་དེ་མཐར་གང་དུ་འགྲོ་ལྟོས་དང་དེ་གསུམ་ཁ་རང་བཞིན་མེད་པར་མཐོང་འོང་༔ དཔེར་ན་སྨྱུག་མའི་ནགས་འདབ་ནས་སྨྱུག་གཅིག་བཅད་ནས་བལྟས་པས་ནང་སྟོང་པར་འདུག་པ་མཐོང་ཛ་སྨྱུག་ཐམས་ཅད་དེ་དང་འདྲ་བ་ཤེས་པ་ལྟར༔ རྣམ་རྟོག་ཅིག་རང་བཞིན་མེད་ཅིང་སྐྱེ་འགགས་གནས་གསུམ་དང་བྲལ་བར་རྟོགས་པ་ན༔ རྣམ་རྟོག་ཐམས་ཅད་དེ་དང་འདྲ་བ་ཤེས་པར་བྱའོ༔ ལར་ད་རེས་ཞི་གནས་ཀྱི་སྐབས་ཡིན་པས་རེ་ཞིག་སེམས་མི་འཕྲོ་བར་གནས་ཅི་ཐུབ་གྱིས་ལ༔ གལ་ཏེ་འཕྲོས་ན་ཡང་ཚུར་བཀུག་ལ་གནས་ཅི་ཐུབ་བྱ༔ སེམས་མི་འཕྲོ་བ་ཅི་ཙམ་འདུག་ཐུབ་ལྟོས༔ དེ་ཡང་མི་གསལ་བའི་གཉིད་དང་བྱིང་འཐིབ་མ་ཡིན་པར་སེམས་རྩེ་གཅིག་ཏུ་ས་ལེ་ཡེ་རེ་ཧྲིག་གེ་རྗེན་ནེ་གནས་པ༔ ལུས་སེམས་བགས་ཀྱིས་བདེ་བ་དང་ལྡན་པ་བྱུང་ན་ཐུན་མོང་ཞི་གནས་ཆགས་པ་ཟེར༔ གནས་པ་ཆགས་པ་ཟེར༔ གནས་ཉམས་སྐྱེས་པ་ཟེར༔ ཕ་རོལ་ཏུ་
ཕྱིན་པ་དྲུག་ལས་བསམ་གཏན་གྱི་ཕ་རོལ་ཏུ་ཕྱིན་པའི་གྲངས་སུ་འགྲོ༔ ལ་ལ་དག་གིས་ཞི་གནས་ལ་འགྲོ་དོགས་ཡོད་ཟེར་ནས་ངན་པ་སྐད་བྱེད་དེ༔ ཞི་གནས་ཅི་ལྟ་བ་བཞིན་སྐྱེས་ན་ཉོན་མོངས་པའི་མགོ་ཡང་དེས་ནོན༔ ཐུན་མོང་གི་མངོན་ཤེས་གྲུབ་པའི་རྟགས་ཐམས་ཅད་དེ་ལས་འབྱུང་བ་སྟེ༔ ཕྱི་རོལ་པའི་དྲང་སྲོང་རྣམས་དཔག་ཚད་ལྔ་བརྒྱར་འཕུར་བ་སོགས་ཟག་བཅས་ཀྱི་མངོན་ཤེས་གྲུབ་རྟགས་མཐའ་ཡས་པ་ཡོད་པར་འདུག་པར་ཡང་ཞི་གནས་ཁོ་ནའི་ནུས་པ་ཡིན༔ སྤྲིན་ཆེན་ཚར་ཆེ་བ་ལྟར༔ ཞི་གནས་ཇི་ལྟར་ཆགས་ཆེ་བ་ལྟར་ལྷག་མཐོང་གི་ཡོན་ཏན་རྩལ་ཆེ་བ་ཡིན༔ སྤྲིན་དུམ་བུ་ཞིག་ལ་ཆར་འབྲུ་འགའ་ཙམ་ལས་མེད་པ་ལྟར༔ ཞི་གནས་མ་ཆགས་ན་ལྷག་མཐོང་ངོ་སྤྲད་ཀྱང་གོ་ཡུལ་སྐམ་པོ་འདྲ་བ་ཞིག་ལས་ཕོ་མི་བྱེད་པ་ཡིན༔ ལར་མཚན་མེད་ཞི་གནས་སེམས་མ་བཅོས་པར་ཞོག་ཟེར་བ་དང་༔ མི་དམིགས་པར་བཞག་ཟེར་བ་འདི་སྔོན་འགྲོ་ལའང་ཡོད༔ ཞི་གནས་ལྷག་མཐོང་གཉིས་ཀའི་དངོས་གཞི་ཡང་ཡིན༔ དེ་སོ་སོ་ལ་སྐབས་དོན་གྱི་གོ་ཚུལ་རེ་ཡང་ཡོད༔ ཚིག་བསྡོམ་ཆེ་བས་ཚིག་དེ་བྱིས་པས་ཀྱང་ཤེས་ཏེ༔ ཉམས་ལེན་དེ་བསྒོམ་ཆེན་རྒས་
པོས་ཀྱང་དཀའ་བ་ཞིག་ཏུ་ཡོད༔ དེས་ན་སེམས་ལ་ཅི་ཡང་མ་བསམ༔ བཟོ་བཅོས་གང་ཡང་མ་བྱེད་པར་རང་སར་ཞོག་དང་༔ ཅི་ཡང་མི་དྲན་པར་ཐོམ་མེ་ལུས་པ་འདྲ་བ་ལ༔ མི་འཕྲོ་བ་སྡོད་པ་དེ་ཡང་མཐོང་བ༔ དེ་ལ་ཡུན་རིང་དུ་བཞག་ཀྱང་སྡོད་པ༔ དྲན་མེད་པ་རྒྱལ་བ་དང་གཉིད་པ་ལྟ་བུ་ནི་མ་ཡིན་པ་དེ་འདྲ་ཞིག་ཅི་ཙམ་འོང་ཞིང་གནས་ཐུབ་པར་འདུག་ལྟོས༔ གལ་ཏེ་གནས་ཡེ་མ་ཐུབ་ཀྱང་འཆར་ལུགས་ཡིན་པས་དེ་ལ་འགྱོད་པ་དང་སྡུག་བསྔལ་ནི་མི་དགོས༔ ལར་ཞི་གནས་བསྒོམ་པ་འདི་ཕར་ཕྱིན་དྲུག་གི་ནང་ནས་བསམ་གཏན་གྱི་ཕར་ཕྱིན་དེ་ཡིན་ཏེ༔ བྱང་ཆུབ་སེམས་དཔའི་ས་ལས༔ དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་ནི༔ རྣམ་པར་རྟོག་པ་ཐམས་ཅད་དང་བྲལ་བ་ལུས་སེམས་ཤིན་ཏུ་སྦྱངས་པ་བསྐྱེད་པ༔ མཆོག་ཏུ་རབ་ཏུ་ཞི་བ༔ རློམས་སེམས་དང་བྲལ་བ་རོ་མྱང་བ་མེད་པ༔ མཚན་མ་ཐམས་ཅད་དང་བྲལ་བ་གང་ཡིན་པ་དེ་ནི༔ དེ་དག་གི་ཚེ་འདི་ལ་བདེ་བར་གནས་པ་ཡིན་པར་རིག་པར་བྱའོ༔ ཞེས་གསུངས་པས་སེམས་ཡོད་མེད་གནས་མི་གནས་སོགས་རྣམ་རྟོག་མི་འགྱུ་བར་གནས་པ༔ ལུས་ངག་
གསུམ་ལ་མི་དགེ་བའི་རྟོག་པ་མེད་པ༔ འདི་བསྒོམ་ཡིན་སྙམ་པའི་ང་རྒྱལ་མེད་པ༔ ཞི་གནས་ཀྱིས་ལུས་སེམས་བདེ་བས་ཁྱབ་པ་དེ་ལ་ཆགས་ཞེན་སྲེད་པ་ཡང་མེད་པ༔ དམིགས་པ་གང་ལ་བཟུང་བའི་གཏད་སོ་མེད་པར་སེམས་རང་བཞིན་གྱིས་གནས་ན་ཞི་གནས་ལེགས་པོ་ཡིན་ཏེ༔ པདྨ་ས་རའི་ཞལ་ནས༔ བསྒོམ་རྒྱུ་རྡུལ་ཙམ་མེད་པ་ལ༔ ཡེངས་སུ་སྐད་ཅིག་མི་འདོད་པ༔ ཕྱག་རྒྱ་ཆེན་པོ་བསྒོམ་པ་ཡིན༔ ཞེས་གསུངས་པ་ལྟར༔ ཅི་ཡང་མི་བསམ་པར་མ་ཡེངས་པར་བཞག༔ དེ་ཡང་བསྒྲིམ་དྲག་ན་གནས་མི་འདོད་པས་ལུས་ངག་ཡིད་གསུམ་བག་ཀློད་ལ་བཞག་སྟེ༔ གྲུབ་ཆེན་པདྨ་ས་ར་ཧས༔ འགྱུར་བུས་བཅིངས་པའི་སེམས་ཉིད་འདི༔ ཀློད་ན་གྲོལ་བར་ཐེ་ཚོམ་མེད༔ བྲམ་ཟེས་སྐུད་པ་འཁེལ་བ་བཞིན༔ རྣལ་འབྱོར་ཤེས་པ་ཀློད་ན་བདེ༔ ཞེས་དང་༔ བཅིངས་པ་དག་ན་ཕྱོགས་བཅུར་འཐེན་པ་བརྩོམ༔ ཀློད་པར་གྱུར་ན་མི་གཡོ་བརྟན་པར་གནས་རྔ་མོང་ཐག་པས་གྲོལ་བའི་དཔེ་ཇི་བཞིན༔ ཞེས་གསུངས༔ དེ་ཡང་རྗེ་འབངས་གཉག་ཆེན་ཛཱ་ནའི་སྤྲུལ་སྐུ་གྲུབ་ཆེན་པྲཛྷ་བྷ་དྲའི་གསུངས་ལས༔ འདས་པ་ལ་མི་མནོ༔ མ་
ཐའོངས་པ་ལ་མི་བསམ༔ ད་ལྟ་བ་ལ་མི་སེམས༔ བློས་མི་སྒོམ༔ རྟོག་པས་མི་དཔྱད༔ སེམས་ནི་ཡང་དག་པར་གྲོལ༔ ཞེས་དང་༔ གྲུབ་ཆེན་ཤ་བ་རིས༔ བསྒོམ་དུ་མེད་པ་ཡིད་ལ་མི་བྱ་སྟེ༔ ཐ་མལ་ཤེས་པ་རང་ལུགས་གཉུག་མ་ལ༔ བཅོས་མའི་དམིགས་པ་དག་གིས་མི་བསླད་དེ༔ རང་བཞིན་དག་པའི་སེམས་ལ་བཅོས་མི་དགོས༔ མ་བཟུང་མ་བཏང་རང་ག་ཉིད་དུ་ཞོག༔ ཅེས་གསུངས་པ་ལྟར་སེམས་མ་བཅོས་པར་རང་ལུགས་སུ་བཞག༔ དེ་ལ་སྐྱོན་མེད་དང་སྐྱོན་ཅན་གཉིས་འོང་སྟེ༔ སྐྱོན་ཅན་ནི༔ མུན་ནེ་བ་ལྷང་ངེ་བ་ལྷོབ་བེ་བ་བྱིངས་རྨུག་གི་རྣམ་པ་གསལ་ཆ་མེད་པར་མི་འཕྲོ་བར་གནས་པ་ཡིན༔ རྒྱུན་དུ་དེ་ལ་མ་ལུས་ན་རེས་འགའ་དེ་ལྟར་བྱུང་བ་ཡང་མི་སྐྱོན་ཁམས་ཀྱི་དགྱེ་རྒུ་ཡིན༔ སེམས་མི་འཕྲོ་བར་གསལ་སེང་ངེ་ཤེལ་སྒོང་ལྟ་བུའམ་མར་མེ་རླུང་གིས་མ་བསྐྱོད་པ་ལྟ་བུ་རྩེ་གཅིག་ཏུ་གནས་པ་དེ་ཞི་གནས་ཡིན༔ དེ་ལ་རྣམ་རྟོག་ཕྱིར་འཕྲོ་བ་ནི་མེད་ཀྱང་༔ དེ་རང་ལ་སྤུ་རིས་འབྱེད་པའི་རྣམ་རྟོག་ཕྲ་བ་འགའ་རེ་ཡོད་པ་དེ༔ གསལ་སེང་ངེ་གནས་སོ་མི་འཕྲོའོ་ཞི་གནས་ཡིན་ནོ་བསམ་པའང་དེ་ལ་རྟོག་དཔྱོད་ཞད་
ཙམ་རེ་ཡོད་པ་དེ་ནི་བསམ་གཏན་དང་པོ་ཞེས་བྱའོ༔ རྟོག་དཔྱོད་ཕྲ་ཞིབ་ཡང་འགའ་མི་རྒྱུ་ལ༔ གནས་པ་དེས་སེམས་རྩ་དང་ཡིད་དགའ་བའི་འཛིན་པ་ཞིག་ཡོད་པ་ནི་བསམ་གཏན་གཉིས་པའོ༔ སེམས་གནས་པ་དེས་དགའ་བའི་འཛིན་པ་ནི་མེད་ཀྱང་༔ ལུས་བདེ་བ་ཡང་བ་འདུག་འདོད་པ་སེམས་བདེ་བ་ཚད་མེད་པས་ཕྱིའི་འདོད་ཡོན་གང་ལ་ཡང་བློ་མི་འཇུག་པ་བདེ་མེ་རེ་གནས་པ་ནི་བསམ་གཏན་གསུམ་པའོ༔ སེམས་གནས་པ་དེ་ལ་དགའ་བ་དང་བདེ་བའི་ཚོར་བ་ཡང་མེད༔ མི་དགའ་བ་དང་མི་བདེ་བ་ཡང་མེད་སེམས་ཁྲིག་གེ་གནས་པ་ནི་བསམ་གཏན་བཞི་པའོ༔ བསམ་གཏན་བཞི་པོ་དེ་ནི་རྣམ་གཡེང་སྤང་ཞིང་ཚུལ་ཁྲིམས་གཙང་ལ་རྩེ་གཅིག་ཏུ་བསྒོམ་པ་ལ་སྐྱེ་ལ་གང་ཡིན་ལ་སྐྱེ་བ་ནི་མ་ཡིན་ཏེ༔ འཇིག་རྟེན་པའི་ལམ་གཟུགས་ཁམས་ཀྱི་ལྷར་སྐྱེ་བའི་རྒྱུ་ཡིན་ཏེ༔ ཕྱི་རོལ་པ་དང་ཐུན་མོང་གི་ལམ་ས༔ ཕྱི་པའི་དྲང་སྲོང་རྣམས་ཀྱི་ཉམས་ལེན་གཙོ་བོ་ཡིན༔ དེ་རང་ནང་པའི་ནི་བསྒོམ་གྱི་གཞི་ཙམ་ཡིན་གྱི་ཉམས་ལེན་དངོས་དེ་མ་ཡིན་ཏེ༔ རིག་འཛིན་ནཱ་གརྫུ་ནས༔ འདོད་སྤྱོད་བདེ་དང་དགའ་དང་སྡུག་བསྔལ་དག༔ རྣམ་པར་སྤང་བའི་བསམ་གཏན་བཞི་པོ་ཡིས༔
ཚངས་དང་འོད་གསལ་དག་དང་དགེ་རྒྱས་དང་༔ འབྲས་བུ་ཆེ་བ་རྣམས་དང་སྐལ་མཉམ་འཐོབ༔ ཅེས་གསུངས་སོ༔ དེ་ཡང་སེམས་གནས་པ་དེ་ལུས་ཀྱི་ནང་དུ་སེམས་གནས་པས་ཕྱི་རོལ་དུ་འཕྲོ་ན་དེ་བཀག་དགོས་པས༔ འཕྲོ་དོག་གི་འཛིན་པ་ཅུང་ཟད་ཞིག་ཡོད་པ་ནི༔ ཉན་ཐོས་ལུགས་ཀྱི་འགོགས་པ་ཆ་མཐུན་གྱི་ཞི་གནས་ཏེ་འདི་བརྟན་པོ་སྐྱེས་ན་ལོ་ཟླ་ཡང་ཡུད་ཙམ་ལས་མ་སོང་སྙམ་པ༔ དེ་ཚོ་ཆགས་པ་དང་སྡང་བ་ལ་སོགས་པའི་ཉོན་མོངས་དང་སྲེད་པ་མི་སྐྱེ་བ་སྟེ༔ སྔོན་ས་ར་ཧས་བྲམ་ཟེའི་བུ་མོ་ཞིག་ཁྲིད་ནས་དབེན་པ་ལ་བསྒོམས་པས༔ དེས་སྔོ་ཚོད་གཅིག་འདྲེན་བདོ་ས་ར་ཧ་འགོག་པའི་ཞི་གནས་ལ་སོང་སྟེ༔ ལོ་བཅུ་གཉིས་བར་མ་ས༔ ལོ་བཅུ་གཉིས་སོང་བ་དང་སད་ནས་སྔོ་ཚོད་ག་རེ་གསུངས་པས༔ ཁྱེད་ཏིང་ངེ་འཛིན་ལོ་བཅུ་གཉིས་སོང་དེང་སང་དཔྱིད་དུ་སོང་བས་ཚོད་མ་མེད་ལོ་བཅུ་གཉིས་བསྒོམས་པས་ཚོད་མའི་རྣམ་རྟོག་གཅིག་ཙམ་མ་ཆོད་ན་དགོས་པ་ཅི་ཡོད་ཟེར་བས་བདེན་སྙམ་ནས་མ་ཞུགས་པར་སྤྱོད་པ་མཛད་ཟེར་བའི་གཏམ་རྒྱུད་ལྟ་བུ་ཡིན་ཏེ༔ དྲང་སྲོང་ཉན་ཐོས་འགོག་པ་ལ་ཞུགས་པ་ནས་ལུས་སྐམ་ཡང་འཆི་
བ་མེད་པར་བྱམས་པའི་བསྟན་པ་ལ་ལངས་ནས་ཆོས་ཉན་པ་དག་མང་དུ་ཡོད་པར་བཤད་པ་རྣམས་ཀྱང་༔ སེམས་ནང་དུ་བསྡུས་ནས་ཕྱིར་མི་འཕྲོ་བ་ལ་ནང་དུ་ཡང་རྣམ་རྟོག་ཅི་ཡང་མི་འགྱུ་བར་གནས་པ་དེ་ལྟ་བུ་ལ་བརྟན་པ་ཐོབ་པ་ཡིན་པར་སྣང་༔ དེ་ལ་ཡང་ལུས་མ་སྐམ་བར་དུ་རྣམ་པར་ཤེས་པ་ཚོགས་བརྒྱད་འགགས་པ་ནི་མིན་ཞིང་དབུགས་རྒྱུ་བ་ཡང་ཡོད་ལ༔ ལུས་སྐམ་ནས་དབུགས་མི་རྒྱུ་ཡང་རྣམ་ཤེས་སྙིང་གི་དཀྱིལ་དུ་ཏིང་ངེ་འཛིན་དེའི་ནུས་པས་རླན་ཅུང་ཟད་ཡོད་པ་ལ་གནས་པ་ཡིན་ཟེར་རོ༔ དེ་ལྟ་བུ་རྒྱ་ནག་གླང་ཆེན་འགྱིང་རིའི་ལྷ་ཁང་ནང་དུ་མཇལ་རྒྱུ་ཡང་ཡོད་སྐད༔ ཞི་གནས་དེ་ལྟར་སྐྱེས་པ་ནི་ཉན་ཐོས་འགོག་པ་ཡིན་ལ༔ དེ་ཙམ་སྐྱེ་དཀའ་ཡང་ཆ་འདྲ་ཅུང་ཟད་སྐྱེ་སྲིད་པ་ཡིན་ཏེ༔ ཉི་མ་གར་སོང་མི་ཚོར་བ་འདྲ་འོང་བ་ཡིན༔ དེ་འདྲ་བྱུང་ན་ཡང་ལྷག་མཐོང་ལ་ཕན་པ་ཆེ་བ་ཡིན༔ ཡང་ཁྲིད་ཞུས་པས་ལུས་བསྲང་ནས་མིག་བཙུམ་ནས་ཉན་པས་སེམས་དྲན་མེད་དུ་སོང་བ་རྣ་བས་བོས་ཀྱང་མ་ཐོས་པར་གཞན་རྣམས་བྱེར་ན་ཡང་ལང་རྒྱུ་མེད་པ་གཉིད་འཐུག་པོ་འདྲ་བ་ཞིག་འོང་བ་དེ་ཞི་གནས་འཐོམ་པོ་ཡིན༔ དེ་ལ་སྒོམ་སྐྱེ་བའི་བག་ཆགས་ཡོད་རྟགས་ཡིན་
ཀྱང་དེ་རྒྱུན་དུ་བསྒོམ་ན་དུད་འགྲོར་སྐྱེ་བའི་རྒྱུ་ཡིན་པས་ངོ་ལ་ཆུ་བཏབ་པས་སད་འོང་ངོ༔ ལ་ལ་ཁྲིད་ཞུས་པས་ངུ་བ་དང་དགོད་པ་དང་འཕར་བ་དང་འདར་བ་དང་རང་དབང་མེད་ཅིང་ཡིད་ལ་དྲན་པས་ཡེ་མི་ཟིན་པར་འབྱུང་བ་ནི༔ དབང་བསྐུར་བ་དང་སྔ་མའི་བྱིན་རླབས་ཀྱི་ཉམས་འཕར་བ་ཡིན་ན་སེམས་རྩ་དགའ་ཞིང་ལུས་བདེ་སྐྱོ་ཤས་དང་རྣལ་མ་ཞིག་འོང་བའི་རྟགས་ཡིན་ཏེ༔ དབུ་འཛུག་ལས༔ གང་ཞིག་གང་གི་སྟོང་པ་ཉིད་ཐོས་ནི༔ ནང་དུ་རབ་ཏུ་དགའ་བ་ཡང་ནས་ཡང་དུ་འབྱུང་༔ རབ་ཏུ་དགའ་བ་ལས་བྱུང་མཆི་མས་མིག་བརླན་ཅིང་༔ ལུས་ཀྱི་བ་སྤུ་ལྡང་བར་གྱུར་པ་གང་ཡིན་པ༔ དེ་ལ་རྫོགས་པའི་བྱང་ཆུབ་བློ་ཡི་ས་བོན་རྒྱུ༔ དེ་ཉིད་རབ་ཏུ་བརྟན་པའི་སྣོད་ནི་དེ་ཡིན་ནོ༔ དེ་ལ་དམ་པའི་དོན་གྱི་བདེན་པ་བསྟན་པར་བྱ༔ ཞེས་གསུངས་སོ༔ དེ་ལ་ཡང་ནོར་ས་ཡོད་དེ་འགའ་ཞིག་དེ་ལྟར་འཕར་འདར་ངུ་དགོད་བྱེད་ཅིང་བློ་མི་བདེ་བ༔ རྗེས་ནས་ཀྱང་ཆོས་ལ་བློ་འགྲོ་བ་མེད་ཅིང་སེམས་རྒྱུད་རྩུབ་པ༔ འདུ་ཚོགས་ནམ་ཆེ་དེ་ལྡང་བ་ནི་གདོན་ཞུགས་པ་ཡིན་ལ༔ དེ་འདྲ་བ་མང་པོ་དུས་རེ་ལའང་ནི་འཁྲབ་པ་ནི་གདོན་
བྱིན་ཆེན་ཞིག་གིས་རྗེས་སུ་འབྲངས་ནས་བྱིན་གྱིས་བརླབས་པ་སྟེ༔ བགེགས་བསྐྲད་ཀྱི་དམིགས་པ་དྲག་པོས་བསྐྲད་པར་བྱའོ༔ གལ་ཏེ་བཟང་ངན་མ་འབྱེད་ན་གུ་རུ་དྲག་པོའམ་རྡོ་རྗེ་གྲོ་ལོད་དཔག་མེད་སྤྱན་དྲངས་ལ་བསྟིམ་པའི་དམིགས་པ་བྱས་པས༔ ཞི་སོང་ན་གདོན་དང་མ་ཞི་ན་བྱིན་འབེབས་ཀྱི་ཉམས་འཕར་ཡིན་ནོ༔་ཞི་གནས་སྐྱོན་མེད་སེམས་རྩེ་གཅིག་ཏུ་གནས་པ་དེ་ལ་ཡང་༔ ནང་དུ་རྟོག་པ་ཕྲའུ་རེ་འབྱུང་བས༔ ནང་ན་ཡང་མི་གནས་ཏེ་ཁྱབ་པར་ནམ་མཁའ་ལྟར་གནས་སོ་སྙམ་པའི་འཛིན་པ་དེ་ལས་སེམས་གནས་པ་ནམ་མཁའ་མཐའ་ཡས་ཀྱི་སྐྱེ་མཆེད༔ སེམས་གནས་པ་དེ་ནི་སེམས་ཏེ་དེ་ལ་ཕྱི་ནང་དང་མཐའ་དབུས་མེད་དེ་མཐའ་ཡས་སོ་སྙམ་པའི་འཛིན་པ་གཅིག་པུ་ལ་སེམས་གནས་པ་རྣམ་ཤེས་མཐའ་ཡས་སྐྱེ་མཆེད༔ དེ་ལྟར་གནས་པའི་སེམས་དེ་ལ་ནི་གཟུགས་ཁ་དོག་དངོས་པོ་ཅི་ཡང་མེད་དོ་སྙམ་པའི་འཛིན་པ་གཅིག་པུ་ལ་སེམས་གནས་པ་ཅི་ཡང་མེད་པའི་སྐྱེ་མཆེད་སེམས་གནས་པ་དེ་ནི་སེམས་ཡིན་ལ་དེ་ནི་ཡོད་པ་ཡང་མ་ཡིན་མེད་པ་ཡང་མ་ཡིན་ནོ་སྙམ་པའི་འཛིན་པ་གཅིག་པུ་ལ་སེམས་གནས་པ་ནི་ཡོད་མིན་མེད་མིན་གྱི་སྐྱེ་མཆེད་དེ༔ དེ་དག་
ལ་ཡུད་རེ་ཙམ་སྐྱེ་བ་བྱུང་ན་ཡང་ལེགས༔ སྔོན་བྱང་ཆུབ་སེམས་དཔའ་རྒྱལ་བུ་དོན་འགྲུབ་ལོ་དྲུག་ཏུ་དཀའ་བ་སྤྱད་ཚེ་ཡང་དེ་རྣམས་བསྒོམ་པ་ཡིན་པར་འདུག༔ ནེ་རཉྫནའི་འགྲམ་དུ་ལོ་དྲུག་ཏུ༔ དཀའ་བ་སྤྱད་མཛད་བརྩོན་འགྲུས་མཐར་ཕྱིན་པ༔ བསམ་གཏན་མཆོག་བརྙེས་མཛད་ལ་ཕྱག་འཚལ་ལོ༔ ཞེས་གསུངས་སོ༔ དེ་རྣམས་འཇིག་རྟེན་པའི་བསམ་གཏན་གྱི་མཆོག་ཡིན་པས༔ དེ་ཁོ་ན་བསྒོམས་ན་སྲིད་པའི་རྩེ་མོ་གཟུགས་མེད་ཁམས་སུ་སྐྱེ་བའི་རྒྱུ་ཡིན་པར་གཟིགས་ནས༔ སྟོན་པས་དེ་བསྐྱུར་ཏེ་འོ་ཐུག་གསོལ་ནས་སླར་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས་སངས་རྒྱས་པ་ཡིན་ལ༔ དེ་དག་ཀྱང་བསོད་ནམས་བསགས་པ་དང་བརྩོན་འགྲུས་ཅན་གྱི་སྐྱེས་བུ་མིན་པ་ལ་མི་སྐྱེ་ནའང་ཕྱོགས་མཐུན་རེ་སྐྱེས་ནའང་ཉོན་མོངས་པའི་མགོ་ནོན་པ་དང་༔ དམིགས་པ་གར་གཏད་དུ་གནས་ནུས་པས་རྟགས་ཐོན་པ་དང་༔ འཇིག་རྟེན་ལས་འདས་པའི་ཡོན་ཏན་གྱི་རྟེན་བྱེད༔ ཤིན་ཏུ་རྒྱ་ཆེར་སྐྱེས་ནས་ཟག་བཅས་ཀྱི་མངོན་ཤེས་གྲུབ་པའི་རྟགས་ཀྱང་འབྱུང་སྟེ༔ འདི་དག་ལྷག་མཐོང་ངོ་འཕྲོད་སྟེང་རྩེ་གཅིག་གི་སྐབས་སུ་ཡང་སྐྱེ་བ་ཡོད་དོ༔ འདི་
རྣམས་དང་པོ་སྐྱེ་དགོས་པ་ཡིན༔ དེ་ལ་མ་ཆགས་མ་ཞེན་པར་རིམ་གྱིས་བགྲོད་པས་བྱང་ཆུབ་འཐོབ་སྟེ༔ བསམ་གཏན་གྱི་ཕ་རོལ་ཏུ་ཕྱིན་པ་མེད་པར་ཡང་སངས་རྒྱས་པའི་ཐབས་མེད་པ་ཡིན་པས༔ ཞི་གནས་དང་ཟེར་ནས་ནོར་མི་ཉན་སྙམ་དུ་གནད་ཆུང་མི་བྱ་བར་གནས་ཅི་ཐུབ་བྱ་བ་གལ་ཆེ་སྟེ༔ བྱང་ཆུབ་སེམས་དཔའི་ས་ལས༔ བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པ་སངས་རྒྱས་སོ༔ མངོན་པར་རྫོགས་པར་འཚང་རྒྱ་བར་འགྱུར་རོ༔ མངོན་པར་རྫོགས་པར་འཚང་རྒྱའོ་ཞེས་གསུངས་སོ༔ འོ་ན་ཞི་གནས་དེ་གང་ལྷག་མཐོང་དེ་གང་ཡིན་སྙམ་ན་རྒྱལ་བ་བྱམས་པས༔ ཡང་དག་གནས་པ་ལ་བརྟེན་ནས༔ སེམས་ལ་སེམས་ནི་འཇོག་ཕྱིར་དང་༔ ཆོས་རྣམས་རབ་ཏུ་འབྱེད་པའི་ཕྱིར༔ ཞི་གནས་དང་ནི་ལྷག་མཐོང་ཡིན༔ ཞེས་གསུངས་པས༔ སེམས་ལ་སེམས་མཉམ་པར་བཞག་པས་གང་དུ་ཡང་མི་འཕྲོ་བར་རང་སར་གནས་པ་ལྷན་ནེ་ཁྲིག་གེ་མེ་རེ་གནས་པ་དེ་ཡིན་ལ༔ སེམས་མི་འཕྲོ་བར་གནས་གང་ཐུབ་མཛད༔ དེས་ཆོས་འབྲུ་དྲུག་པ་
སོང་བ་ཡིན་ནོ༔ འདི་ལ་ཡུན་རིང་རབ་ཞིག་བསྒོམས་ན་ལེགས་པ་ཡིན་ནོ༔ ༒ དེ་ནས་ཆོས་འབྲུ་བདུན་པ་ནི༔ གཞུང་ལས༔ ཀུན་ལ་འཕྲོ་བ་ཐ་མལ་སེམས༔ གྲུ་བ་ཞེས་བྱར་ངོས་བཟུང་ངོ་༔ ཐ་མལ་སེམས་དང་མི་འདྲ་བའི༔ དེ་རྣམས་ཧྲིག་གེར་མཐོང་བ་དེ༔ རིག་པ་ཞེས་འབྱར་ངོས་བཟུང་ངོ་༔ ཞེས་གསུངས་པའི་དོན་བཤད་ན༔ འདིར་དང་པོ་ལྷག་མཐོང་དང་ཕྱིས་ནས་ཞི་ལྷག་ཟུང་འཇུག་ཏུ་ངོ་སྤྱོད་པ་ཡིན་ཏེ༔ གང་དུ་སེམས་མི་འཕྲོ་བར་ཀྱི་ལེ་གནས་པ་ཞི་ནས༔ གནས་པ་དེའི་ངོ་བོ་ལ་བལྟས་པས་གཟུགས་ཁ་དོག་དངོས་པོ་ཅིར་ཡང་མ་གྲུབ་པར་ལྷག་གིས་མཐོང་བ་ལྷག་མཐོང་༔ མ་གྲུབ་བཞིན་ས་ལེ་སིང་ངེ་གནས་གནས་ཀྱང་ངོ་བོ་མ་གྲུབ་པ་དེ་གཉིས་དབྱེར་མེད་པ་དེ་ཞི་ལྷག་ཟུང་འཇུག༔ སེམས་རང་སར་བཞག་པས་མི་སྡོད་པར་འཕྲོ་བ་དེ་འགྱུ་བ་སྟེ༔ དེ་མཐོང་བ་ཞི་གནས༔ འགྱུ་བའི་ངོ་བོ་ལ་བལྟས་པས་རང་བཞིན་མ་གྲུབ་པར་ཆུ་དང་རླབས་ལྟར་ཞི་བ་ལྷག་མཐོང་༔ འགྱུ་བ་དང་འགྱུ་བའི་ངོ་བོ་སྟོང་བ་གཉིས་དབྱེར་མེད་པ་ཞི་ལྷག་ཟུང་འཇུག་ཡིན་ཏེ༔ ཨོ་རྒྱན་ཆེན་
པོའི་ཞལ་ནས༔ དེའི་གདངས་མ་འགགས་པ་ཡུལ་མེད་རང་གསལ་དུ་རྗེན་ནེ་ལྷག་གེ་བ་ཞིག་འོང་༔ དེ་དག་ལ་ལྷག་མཐོང་ཟེར༔ དེ་གཉིས་ཤེས་པ་སྐད་ཅིག་དབྱེར་མེད་གཅིག༔ གི་ངོ་བོ་ཧྲིག་གེ་གནས་པ་ཞིག་འོང་༔ དེ་ལ་ཞི་གནས་ལྷག་མཐོང་ཟུང་འཇུག་ཟེར་བ་ཡིན་ནོ༔ ཞེས་གསུངས་སོ༔ གཞན་ཡང་དེ་སྟོན་པའི་ལུང་ནི༔ རྒྱུད་རྡོ་རྗེ་རྩེ་མོ་ལས་ཆོས་ཀུན་དངོས་པོ་མེད་པ་སྟེ༔ མཚན་ཉིད་མེད་ཅིང་སྐྱེ་བ་མེད༔ མཚན་ཉིད་མེད་ཅིང་ནམ་མཁའ་མཚུངས༔ དམིགས་པ་ཐམས་ཅད་རྣམ་པར་སྤང་༔ ཞེས་དང་༔ རྡོ་རྗེ་འཆང་གི་ཞལ་ནས༔ ངེས་པའི་འབྲས་བུའི་སངས་རྒྱས་ནི༔ རྣམ་དག་ཆོས་སྐུའི་རང་བཞིན་ཤེས༔ དེ་ཙམ་ཉིད་ན་སངས་རྒྱས་ཏེ༔ ཀུན་བཟང་ཉིད་ཀྱི་དགོངས་པ་ཡིན་ཞེས་དང་༔ གྲུབ་ཆེན་པདྨ་ས་ར་ཧས༔ གང་སྨྲས་རྫུན་པས་ལོག་པ་དེ་བོར་ལ༔ གང་ལ་ཞེན་པ་ཡོད་ན་དེ་ཡང་ཐོང་༔ རྟོག་པར་གྱུར་ན་ཐམས་ཅད་དེ་ཡིན་ཏེ༔ དེ་ལས་གཞན་ཞིག་སུས་ཀྱང་ཤེས་མི་འགྱུར༔ ཞེས་དང་༔ མ་བཅོས་བཞག་པའི་སེམས་ནི་སངས་རྒྱས་ཏེ༔ འགྲོ་འཆགས་ཉལ་འདུག་ཐམས་ཅད་ལྷུག་པར་ཞོག༔ རྣམ་རྟོག་ཀུན་གྱི་
རྩ་བ་སེམས་ཡིན་ཕྱིར༔ སེམས་མེད་ཕྱིར་ན་རྣམ་རྟོག་ཡོད་མ་ཡིན༔ ཞེས་དང་༔ ཆོས་རྣམས་ཐམས་ཅད་རང་གི་སེམས་ཡིན་ཏེ༔ སེམས་ལས་མ་གཏོགས་ཆོས་གཞན་རྡུལ་ཙམ་མེད༔ གང་གིས་གདོད་ནས་སེམས་མེད་རྟོགས་པ་ཡི༔ དུས་གསུམ་རྒྱལ་བའི་དགོངས་པ་དམ་པ་རྙེད༔ ཅེས་དང་༔ ཁ་ཅིག་བློ་ཡི་དབྱེ་བས་རྨོངས་རྣམས་བཅིངས༔ བདག་པོ་ཁྱིམ་དུ་བཞག་ནས་གཞན་དུ་ཚོལ༔ ཁ་ཅིག་གཟུགས་བརྙན་དག་ལ་དོན་དུ་འཛིན༔ ཁ་ཅིག་རྩ་བ་བོར་ནས་ལོ་འདབ་བྲེག་ཇི་ལྟར་བྱས་ཀྱང་བསླུས་པ་མ་ཚོར་རམ་ཀྱེ་ཧོ་བྱིས་པ་རྣམས་ཀྱི་དེ་ཉིད་མ་རིག་ཀྱང་༔ དེ་ཉིད་ངང་ལ་གཡོ་མེད་ང་ཡིས་རྟོགས༔ ང་ཡིས་ང་ཡི་ཐོག་མཐའ་ཤེས་གྱུར་པས༔ ང་ཡི་ང་མཐོང་རང་ཉིད་ཀླུ༔ གཅིག་པུའི་ལུས༔ ཞེས་དང་༔ པདྨ་བིརླ་པས༔ སེམས་ཉིད་མིང་སྟོང་སྤྲོས་བྲལ་ཕྱག་རྒྱ་ཆེན་པོ་སྟེ༔ ནམ་མཁའི་རང་བཞིན་གདོད་ནས་མིང་སྟོང་ཡིན་དང་མཚུངས༔ ངོ་བོ་ཉིད་ཀྱི་མ་སྐྱེས་མཚན་མའི་དངོས་དང་བྲལ༔ མཁའ་ལྟར་ཀུན་ལ་ཁྱབ་ཅིང་འཕོ་དང་འགྱུར་བ་མེད༔ ཅེས་དང་༔ སློབ་དཔོན་ཆེན་པོ་པདྨ་འབྱུང་གནས་ཀྱི་དངོས་སློབ་པཎྜི་ཏ་ཀ་
མ་ལ་ཤཱི་ལ་ཞེས་པ་ཕྱིས་དམ་པ་རྒྱ་གར་དུ་གྲགས་པའི་ཞལ་ནས༔ ཆོས་སྐུ་སྐྱེ་མེད་ཉི་མའི་སྙིང་པོ་འདྲ༔ འོད་གསལ་གསལ་འགྲིབ་མེད་དོ་དིང་རི་བ༔ རྣམ་རྟོག་རྒྱུན་ལམ་ཁོང་སྟོང་རྐུན་མ་འདྲ༔ དོན་ལ་ཐོབ་ཤོར་མེད་དོ་དིང་རི་བ༔ ཚོར་བ་རྗེས་མེད་ཆུ་ཡི་རི་མོ་འདྲ༔ འཁྲུལ་སྣང་རྗེས་འཛིན་མེད་དོ་དིང་རི་བ༔ བག་ཆགས་དྲན་པ་ནམ་མཁའི་འཇའ་ཚོན་འདྲ༔ ཞེན་ཚད་ངོས་བཟུང་མེད་དོ་དིང་རི་བ༔ འགྱུ་བ་དངོས་སོང་བར་སྣང་འཇའ་ཚོན་འདྲ༔ སེམས་ལ་གཟའ་གཏད་མེད་དོ་དིང་རི་བ༔ འཛིན་མེད་རང་གྲོལ་སྤྱི་སེར་ལྷག་པ་འདྲ༔ ཡུལ་གཞན་འཛིན་པ་མེད་དོ་དིང་རི་བ༔ རིག་པ་དངོས་མེད་ནམ་མཁའི་བྱ་ལམ་འདྲ༔ ཉམས་ལ་ཐོག་རྡུགས་མེད་དོ་དིང་རི་བ༔ སེམས་ཉིད་དོན་མཐོང་ལྷགས་པའི་རྨི་ལམ་འདྲ༔ ཚིག་དང་ཐ་སྙད་བྲལ་ལོ་དིང་རི་བ༔ ཞེས་དང་༔ བརྒྱད་སྟོང་པ་ལས༔ སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་འོད་གསལ་བ་ལགས་སོ༔ ཞེས་དང་༔ རྒྱན་སྟུག་པོ་བཀོད་པ་ལས༔ སེམས་ཉིད་བདེ་སྟོང་ལྷན་ཅིག་སྐྱེས༔ འོག་མིན་གཙང་མའི་གནས་མཆོག་གོ༔ ཞེས་དང་༔ མཁའ་འགྲོ་མ་རླུང་གཤོག་ཅན་
གྱིས༔ ཀྱེ་ཧོ་རང་རིག་རྒྱལ་པོ་འདི་མཐོང་ན༔ ཐམས་ཅད་ཐམས་ཅད་ཐར་པའི་ལམ༔ རང་རིག་འདི་ཉིད་མ་རྟོགས་ན༔ གྲོལ་བ་ནམ་ཡང་ཡོད་མ་ཡིན༔ ཞེས་དང་༔ གཤེད་དམར་རྒྱུད་དང་༔ ནམ་མཁའི་རང་བཞིན་གྱི་མདོ་དང་༔ མངོན་རྟོགས་རྒྱན་གསུམ་ཀ་ནས༔ འདི་ལ་བསལ་བྱ་ཅི་ཡང་མེད༔ བཞག་པར་བྱ་བ་ཅུང་ཟད་མེད༔ ཡང་དག་ཉིད་ལ་ཡང་དག་ལྟ༔ ཡང་དག་མཐོང་ན་རྣམ་པར་གྲོལ༔ ཞེས་དང་༔ གསང་བ་སྙིང་པོ་ལས༔ བཅིངས་མེད་རྣམ་པར་གྲོལ་མེད་པའི༔ ཡེ་ནས་ལྷུན་རྫོགས་སངས་རྒྱས་ཆོས༔ ཞེས་དང་༔ གྲུབ་ཆེན་པདྨ་ས་ར་ཧས༔ བུ་ལྟོས་ཤིག་རང་གི་སེམས་ལ་ལྟོས༔ བལྟས་པས་སེམས་ལ་གྲུབ་པ་མེད༔ གྲུབ་པ་མེད་པའི་སེམས་ཉིད་འདི༔ སྣ་ཚོགས་སྣང་བ་ངོ་མཚར་ཆེ༔ རང་སེམས་སྐྱེ་མེད་ཆོས་ཀྱི་སྐུ༔ ཆོས་ཀྱི་སྐུ་ལ་སྐྱེ་འཇིག་མེད༔ སྐྱེ་མེད་བདེ་བ་ཆེན་པོའི་སྐུ༔ རང་ལ་ཡོད་པ་ངོ་མཚར་ཆེ༔ རང་སེམས་ཆོས་སྐུའི་མེ་ལོང་ལ༔ གཉིས་མེད་ཡེ་ཤེས་འོད་དུ་ཤར༔ ཤར་ཙམ་ཉིད་ནས་གྲུབ་པ་མེད༔ བདེ་ཆེན་ལྷན་ཅིག་སྐྱེས་པ་ཡིན༔ གསུངས་སོ༔ སུམ་ཅུ་རྩ་གསུམ་པའི་
ལེའུ་ལས༔ སྲིད་གསུམ་ཐམས་ཅད་སེམས་ལས་བྱུང་བར་འགྱུར༔ སེམས་དེ་ཉིད་ཀྱང་འདི་ཞེས་བསྟན་དུ་མེད༔ གཟུགས་མེད་ལུང་དུ་མ་བསྟན་སྒྱུ་མ་འདྲ༔ མཁས་པ་དེས་ནི་སེམས་ཀྱི་ཆོས་ཉིད་ཚོལ༔ དེ་ནི་སེམས་ཀྱི་ཆོས་ཉིད་ཚོལ་བ་ན༔ སེམས་དང་སེམས་ཀྱི་ཆོས་ཉིད་མཐོང་བ་མེད༔ སེམས་དེ་སེམས་གང་གིས་ནི་ཚོལ་བྱེད་པའི༔ སེམས་དེ་ཡི་ནི་རང་བཞིན་མཐོང་བ་མེད༔ ཅེས་དང་༔ རྣམ་སྣང་མངོན་བྱང་ལས༔ སེམས་དེ་ནི་དེ་བཞིན་གཤེགས་པས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ༔ ཞེས་དང་༔ བྱང་ཆུབ་སེམས་འགྲེལ་ལས༔ ནོང་ངམ་དེ་བཞིན་ཕྱི་རོལ་ལམ༔ ཡང་ན་གཉིས་ཀའི་བར་དག་ཏུ༔ རྒྱལ་བ་རྣམས་ཀྱིས་སེམས་མ་རྙེད༔ ཅེས་དང་༔ འོད་སྲུང་གིས་ཞུས་པའི་མདོ་ལས༔ འོད་སྲུང་སེམས་ནི་ནང་ན་ཡང་མེད༔ ཕྱི་རོལ་ན་ཡང་མེད༔ གཉིས་ཀར་མེད་པ་ཡང་མི་དམིགས་སོ༔ འོད་སྲུང་སེམས་ནི་དཔྱད་དུ་མེད་པ༔ རྟེན་མ་ཡིན་པ་སྣང་བ་མེད་པ་རྣམ་པར་རིག་པ་མེད་པ་གནས་པ་མེད་པའོ༔ འོད་སྲུང་སེམས་ནི་སངས་རྒྱས་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ༔ འོད་
སྲུང་སེམས་ནི་ཀུན་ཏུ་བཙལ་ཡང་མི་རྙེད་དོ༔ གང་མ་རྙེད་པ་དེ་མི་དམིགས་སོ༔ གང་མི་དམིགས་པ་དེ་འདས་པ་ཡང་མ་ཡིན༔ མ་འོངས་པ་མ་ཡིན༔ ད་ལྟར་བྱུང་བ་ཡང་མ་ཡིན་ནོ༔ ཞེས་གསུངས་པས༔ སེམས་ཚོལ་བ་དང་སེམས་ཀྱི་གཟུགས་ཁ་དོག་བརྟགས་པ་སོགས་ཀྱང་ཀ་དཔེ་མ་བྱེད་མི་དགོས་བྱས་ཀྱང་མི་རྙེད༔ མ་རྙེད་པས་བློ་ཆུང་བ་འགའ་ཞིག་སྡུག་ཐག་ཆད་པར་སྣང་འོ་ན་སེམས་དེ་ལ་ཅི་འདྲ་ཞིག་ཡོད་སྙམ་ན༔ བྱམས་པས་ཞུས་པ་ལས༔ བྱམས་པས་གསོལ་བ༔ ནང་གི་སེམས་ཇི་ལྟར་ལྟ་བར་བགྱི༔ བཀའ་སྩལ་བ༔ སེམས་ནི་དབྱིབས་མེད་པ་ཁ་དོག་མེད་པ་གནས་མེད་པ་ནམ་མཁའ་ལྟ་བུའོ༔ ཞེས་དང་༔ སྡུད་པ་ལས༔ གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ལ༔ འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་༔ གང་ལ་རྣམ་པར་ཤེས་དང་སེམས་ཡིད་མཐོང་མེད་པ༔ དེ་ནི་ཆོས་མཐོང་ཡིན་ཞེས་དེ་བཞིན་གཤེགས་པས་བསྟན༔ ཞེས་དང་༔ ནམ་མཁའ་ལྟ་བུའི་ཏིང་ངེ་འཛིན་མདོ་ལས༔ བླ་མ་དམ་པའི་བདུད་རྩི་ཡིས༔ རང་སེམས་ནམ་མཁའ་ལྟ་བུར་ཤེས༔ དེ་ཡི་དོན་ལ་མ་
ཡེངས་པ༔ དེ་ནི་ཏིང་ངེ་འཛིན་ཞེས་བསྟན༔ ཞེས་དང་༔ ཡེ་ཤེས་རྒྱ་མཚོའི་ཏིང་ངེ་འཛིན་གྱི་མདོ་ལས༔ ཆོས་རྣམས་སེམས་ཀྱིས་རྒྱས་གདབ་ཅིང་༔ སེམས་ལ་དངོས་པོ་མེད་པས་བཏབ༔ སེམས་ངོ་ཤེས་པ་གང་ཡིན་པ༔ དེ་ནི་རྣལ་འབྱོར་སྤྱོད་པ་ཡིན༔ ཞེས་དང་༔ རྒྱལ་མཚན་དམ་པའི་མདོ་ལས༔ ཏིང་འཛིན་བསམ་གྱིས་མི་ཁྱབ་པ༔ རྣལ་འབྱོར་སྤྱོད་པ་རྣམས་ལ་བཤད༔ དེ་དག་ཐམས་ཅད་དོན་གཅིག་སྟེ༔ སེམས་ཉིད་སྟོང་པར་འདུག་པར་བཤད༔ ཅེས་དང་༔ གསང་བ་མཛོད་ཀྱི་མདོ་ལས༔ ཆུ་རྣམས་ཐམས་ཅད་རྒྱ་མཚོར་གཅིག༔ ཏིང་འཛིན་སྣ་ཚོགས་ཐ་དད་པ༔ ཆོས་ཀྱི་དབྱིངས་སུ་རོ་གཅིག་གོ༔ ཏིང་འཛིན་དེ་ལྟར་ཤེས་པར་གྱིས་ཞེས་དང་༔ དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས༔ སེམས་ཅན་ཐམས་ཅད་སེམས་གཅིག་སྟེ༔ འོད་གསལ་སྐྱེ་བ་མེད་པའི་དོན༔ ཉོན་མོངས་འཇོམས་པའི་དཔའ་བོ་སྟེ༔ དེ་ཕྱིར་ཏིང་ངེ་འཛིན་ཞེས་བྱ༔ སྤྱན་རས་གཟིགས་རྣམ་པར་རོལ་པའི་མདོ་ལས༔ བྱང་ཆུབ་སེམས་དཔའ་སྤྱན་རིས་གཟིགས་ཀྱིས་གསོལ་པ་དུས་ཀྱི་ཐ་མའི་ཚེ་ལམ་གྱི་མིང་བཏགས་ནས༔ ལོག་པའི་
ལམ་དུ་ཞུགས་པ་མང་དུ་མཆི་ལགས་ན༔ ཡང་དག་པའི་ལམ་ཞེས་བགྱི་བ་གང་ལགས༔ བཀའ་སྩལ་པ༔ ཡང་དག་པའི་ལམ་ཞེས་བྱ་བ་ནི༔ སེམས་རྣམ་པར་མི་རྟོག་པ་དབུ་མ་མ་ནོར་བ་དེ་ཡིན་ནོ༔ གསོལ་པ་འོ་ན་སངས་རྒྱས་དང་སེམས་ཅན་ཐམས་ཅད་སེམས་ཀྱི་ལམ་ནས་འགྲོ་བ་ལགས་སམ༔ བཀའ་སྩལ་པ༔ ལམ་སྲོལ་ཆེན་པོར་རྒྱལ་པོ་དང་༔ སྤང་པོ་ལ་སོགས་ཀུན་འགྲོ་ལྟར༔ སེམས་ཀྱི་རྒྱ་ལམ་ཆེན་པོ་ནས༔ སངས་རྒྱས་དང་ནི་སེམས་ཅན་ཀུན༔ རྒྱ་ལམ་དེ་ནས་འགྲོ་བ་ཡིན༔ དེས་ན་རྣལ་འབྱོར་སྤྱོད་པ་སྐྱེས༔ སེམས་ཀྱི་ལམ་ལ་ནན་ཏན་བྱ༔ ཞེས་དང་༔ ཀྱེའི་རྡོ་རྗེའི་རྒྱུད་ལས༔ རང་རིག་ཡེ་ཤེས་སྤྲོས་བྲལ་ལ༔ སྒྲ་དང་ཐ་སྙད་འཇུག་ན་འཁྲུལ༔ རང་བཞིན་རང་གི་འོད་གསལ་ལ༔ མ་རིག་མུན་པས་སྒྲིབ་ན་འཁྲུལ༔ དངོས་པོ་སྟོང་པ་རོ་མཉམ་ལ༔ བླང་དང་དོར་བར་བྱེད་ན་འཁྲུལ༔ འདོད་ཡོན་ངང་གིས་འགགས་ན་འཁྲུལ༔ དེ་དག་དཀའ་བས་འགེགས་ན་འཁྲུལ༔ རང་རིག་འདོད་པས་སྟོང་པ་ལ༔ འདོད་ཡོན་ལྔ་ལ་བསྟེན་ན་འཁྲུལ༔ ཆོས་ཉིད་དམན་དང་གྱ་ནོམ་སྤང་༔ སྒྲོ་འདོགས་
སྐུར་པ་འདེབས་ན་འཁྲུལ༔ བསྒོམ་པ་ཉིད་ཀྱང་རྟོགས་པ་ལ༔ མི་བསྒོམ་པ་ཡང་རྟོགས་པ་སྟེ༔ བསྒོམ་དང་མི་བསྒོམ་འཛིན་ན་འཁྲུལ༔ སངས་རྒྱས་སེམས་ཅན་གཉིས་མེད་ལ༔ དེ་དག་གཉིས་སུ་འཛིན་ན་འཁྲུལ༔ ཀུན་རྫོབ་དོན་དམ་གཉིས་མེད་ལ༔ བདེན་པ་གཉིས་སུ་འཛིན་ན་འཁྲུལ༔ ཞེས་དང་༔ སྒོམ་པ་པོ་མེད་བསྒོམ་བྱ་མེད༔ བསྒོམ་དུ་མེད་པའི་དོན་བསྒོམས་ན༔ མ་སྒོམ་པ་ཉིད་བསྒོམ་པའི་མཆོག༔ རང་སེམས་རང་གིས་མཐོང་གྱུར་ན༔ དངོས་དང་མཚན་མར་ག་ལ་མཐོང་༔ མ་མཐོང་བ་ཉིད་མཐོང་བའི་མཆོག༔ གོང་ལྟར་ལྟོ་ཡང་མི་རུང་བའི༔ བལྟ་རུ་མེད་པའི་དོན་ལ་བལྟ༔ མ་བལྟས་ན་ཡང་ལྟ་བའི་མཆོག༔ རྣམ་རྟོག་ཡེ་ནས་ངང་གིས་སྲེག༔ སྲེག་ཏུ་མེད་པའི་སྦྱིན་སྲེག་བྱ༔ མ་བསྲེགས་པ་ཉིད་སྲེག་པའི་མཆོག༔ མཆོད་པ་པོ་མེད་མཆོད་བྱ་མེད༔ མཆོད་དུ་མེད་པའི་མཆོད་པ་ནི༔ མ་མཆོད་ན་ཡང་མཆོད་པ་སྟེ༔ རང་རིག་མཆོད་པ་མཆོད་པའི་མཆོག༔ དཀའ་བ་མེད་པའི་དཀའ་ཐུབ་བྱས༔ སྟོང་པའི་དཀའ་ཐུབ་དཀའ་ཐུབ་མཆོག༔ སྲུང་དུ་མེད་པའི་དོན་སྲུང་སྟེ༔ རང་རིག་བརྟུལ་ཞུགས་བརྟུལ་ཞུགས་མཆོག་
སྦྱིན་དུ་མེད་པའི་སྦྱིན་པ་བཏང་༔ སེམས་ཀྱི་སྦྱིན་པ་སྦྱིན་པའི་མཆོག༔ ཚུལ་ཁྲིམས་ལ་སོགས་དེ་བཞིན་ནོ༔ དེ་ལྟར་གྱུར་པའི་མཁས་པ་ལ༔ སྟོང་པར་མི་འགྱུར་གང་ཡང་མེད༔ ཅེས་དང་༔ བརྟག་གཉིས་ལས༔ ལུས་ལ་ཡེ་ཤེས་ཆེན་པོ་གནས༔ རྟོག་པ་ཐམས་ཅད་ཡང་དག་སྤང་༔ དངོས་པོ་ཀུན་ལ་ཁྱབ་པ་པོ༔ ལུས་གནས་ལུས་ལས་མ་སྐྱེས་པའོ༔ ཞེས་དང་༔ གསང་བ་འདུས་པ་ལས༔ དངོས་པོ་ཐམས་ཅད་དང་བྲལ་བ༔ ཕུང་པོ་ཁམས་དང་སྐྱེ་མཆེད་དང་༔ གཟུང་དང་འཛིན་པ་རྣམ་པར་སྤང་༔ ཆོས་བདག་མེད་པ་མཉམ་པ་ཉིད༔ རང་སེམས་གདོད་ནས་མ་སྐྱེས་པ༔ སྟོང་པ་ཉིད་ཀྱི་རང་བཞིན་ནོ༔ ཞེས་དང་། དགོངས་འདུས་ལས༔ སེམས་ཅན་སངས་རྒྱས་ཡིན་པ་ལ༔ རྟོག་པས་སྒྲིབ་པ་དེ་མ་ཤེས༔ རྟོག་པ་ཉིད་ནི་རྟོགས་མེད་ཕྱིར༔ བདེ་གཤེགས་སྙིང་པོ་གཞན་ན་མེད༔ ཅེས་དང་༔ སྡོམ་འབྱུང་ལས༔ ཆོས་ཀུན་ཡོངས་སུ་ཤེས་པའི་དོན༔ བསྒོམ་པ་དེ་ཉིད་བསྒོམ་དུ་མེད༔ རྫོགས་པའི་བྱང་ཆུབ་བདེ་བ་ཆེ༔ ཕྱག་རྒྱ་ཆེན་པོའི་མཆོག་དེ་ཡིན༔ ཞེས་དང་༔ ངེས་བརྗོད་བླ་མར་
གཟུང་དང་འཛིན་པ་མི་དམིགས་པའི༔ དེ་བཞིན་ཉིད་ལ་སེམས་གནས་ན༔ བདེ་ལ་དགའ་བའི་དངོས་གྲུབ་འཆར༔ ཐབས་དང་ཤེས་རབ་གཉིས་མེད་པ༔ ཕྱག་རྒྱ་ཆེ་ལ་ངེས་པར་རོལ༔ ཞེས་དང་༔ འཀི་སེང་གདོང་མས༔ ཀྱེ་ཧོ་ཡོད་དོ་བྱས་ན་ངོས་གཟུང་མེད༔ མེད་དོ་བྱས་ན་སྣ་ཚོགས་འཆར༔ ཡོད་མེད་མཐའ་དང་བྲལ་བ་ལ༔ འདི་ཞེས་གང་གིས་མཚོན་མི་ནུས༔ ཞེས་དང་༔ སྟོབས་པོ་ཆེའི་རྒྱུད་ལས༔ ཇི་ལྟར་གླང་པོ་རྙེད་གྱུར་ནས༔ གླང་པོའི་རྗེས་ནི་མི་ཚོལ་ལྟར༔ སེམས་ཀྱི་དེ་ཉིད་རྙེད་གྱུར་ནས༔ རྣམ་རྟོག་གང་ཡང་མི་ཚོལ་ལོ༔ ཞེས་དང་༔ མཁའ་འགྲོ་མ་ཐུགས་ཀྱི་གསང་མཛོད་ལས༔ ཡིད་ཀྱི་བསམ་མནོ་བཀག་པ་ལ༔ ཡིད་ལ་མི་བྱེད་ཟེར་བ་ཡིན༔ གང་འདིར་ཡིད་ལ་བྱེད་པ་ཡི༔ གསལ་བ་བདག་མེད་རྟོག་པ་ལ༔ ཡིད་ལ་མི་བྱེད་ཅེས་བྱའོ༔ ཞེས་དང་༔ སྙན་བརྒྱུད་རྡོ་རྗེའི་ཚིག་རྐང་ལས༔ གཞི་ནས་མ་བཅོས་ཡེ་ནས་ལྷུན་གྲུབ་ལ༔ ཐ་མལ་རང་ལུགས་ཆེན་པོར་བཞག་པ་ན༔ འཕོ་འགྱུར་མེད་པ་ནམ་མཁའི་ཀློང་ཡངས་སུ༔ སྐྱེ་འཆི་མེད་པ་ཆོས་སྐུའི་ལུས་ཐོབ་འགྱུར༔ ཞེས་དང་༔ ནམ་མཁའ་དང་མཉམ་པའི་
རྒྱུད་ལས༔ འཁྲུལ་དང་མ་འཁྲུལ་ངོ་བོ་གཅིག་འགྲོ་ལ་སེམས་རྒྱུད་གཉིས་མི་འཆར༔ མ་བཅོས་རིག་པ་འདི་རང་ཡིན༔ འོད་གསལ་རིག་པ་ཅོག་གེ་ཞོག༔ ཅེས་དང་༔ རབ་ཏུ་མི་གནས་པའི་རྒྱུད་ལས༔ སེམས་ནི་སྐྱེ་མེད་ཤེས་ནས་ཀྱང་༔ བསྒོམ་པར་བྱ་བ་མ་ཡིན་ཏེ༔ རང་གར་བཞག་ན་བདེ་བ་ཆེ༔ གོམས་པའི་སྟོབས་ཀྱི་འབྲས་བུ་མཆོག༔ ཅེས་དང་༔ ནམ་མཁའ་རྣམ་པར་དག་པའི་རང་བཞིན་ལས༔ སྤྲིན་ཚོགས་གློ་བུར་ཉིད་དུ་བྱུང་གྱུར་ན༔ དེ་ཉིད་ཡིན་ཏེ་ནམ་མཁའ་ཉིད་ཀྱི་ངང་༔ སེམས་ཉིད་གནས་པ་རྡོ་རྗེ་ཡེ་ཤེས་ལ༔ བྱེད་སྒོ་ཐ་དད་རྟོག་པའི་ཚུལ་སྣང་ཡང་༔ དེ་ཉིད་དོན་ལས་གཞན་པ་ཡོད་མ་ཡིན༔ ཞེས་དང་༔ ཨོ་རྒྱན་རིན་པོ་ཆེས་ནམ་མཁའི་སྤྲིན་བཞིན་རང་བྱུང་རང་ཐིམ༔ བར་སྣང་རླུང་བཞིན་འགྱུ་བ་རྗེས་མེད༔ བྲམ་ཟེའི་སྐུད་པ་བཞིན་དུ་མི་བསྒྲིམས་མི་ཀློད་མེད་པར་ཆ་སྙོམ་དུ་བཞག༔ སེམས་གསལ་དུ་རེ་བའི་ཤེས་པས་མི་བཅོས༔ གསལ་པོའི་རྟོག་པ་མི་བཞུགས༔ ཞི་གནས་སྡོང་པོའི་རྟོག་པ་འོག་འགྱུས༔ བསྒོམ་བྱུང་དང་མ་བྱུང་གི་འཛིན་རྟོག་མ་ཞུགས་པར་བཞག༔
དོན་ལ་ངོ་བོ་རང་གི་རང་རིག་ཙམ་དུ་གནས་ལ་ཁད་ཀྱིས་བཞག་གོ༔ མི་གནས་ན་འགྲོ་སར་བཏང་བས་དཔེར་ན་སེང་གེ་ཡང་རྩལ་འཕྱོས་ཀྱང་གངས་ལས་མ་འདས༔ ཉི་མས་འཇིག་རྟེན་ཁྱབ་ཀྱང་རྒས་དུས་ཉི་མའི་དཀྱིལ་འཁོར་ལས་མ་འདས༔ ཉ་གར་འཕྱོས་ཀྱང་ཆུ་ལས་མ་འདས༔ རྒྱ་མཚོའི་བྱ་རོག་གར་འཕྱོས་ཀྱང་རྫོང་ལས་མ་འདས་པ་བཞིན་དུ༔ སེམས་འཕྲོ་རྟོག་ཅི་ལྟར་མང་ཡང་༔ དེ་སེམས་ཉིད་རང་ལས་མ་འདས་ཏེ༔ དེས་ན་མི་གནས་པའི་ངོ་བོ་ཁོ་རང་དྲན་པས་རྩིས་ཟིན་ཙམ༔ བཟང་ངན་གྱི་རྟོག་པས་མ་བཅིང་ཙམ་པ་དེ་ཀའི་སྟེང་དུ་ཀློད་ཤེས་ན༔ མི་གནས་པ་ཁོ་ན་གནས་པ་ཆེན་པོ་ཡིན༔ ཞེས་དང་༔ ཉན་ཐོས་པ་བཞིན་དུ་དགག་ཀྱང་མི་བགགས༔ སོ་སོ་སྐྱེ་བོ་བཞིན་དུ་མཚན་མའི་རྗེས་སུ་མི་འབྲང་༔ མུ་སྟེགས་རྟག་ལྟ་བཞིན་དུ་ཏིང་ངེ་འཛིན་གྱི་རོ་ལ་མི་ཆགས༔ དོན་ལ་མ་བཅོས་པ་ཁོ་རང་གི་ངོ་བོ་རང་བྱུང་དང་དངོས་སུ་བཞག༔ ཅེས་གསུངས་པ་དང་༔ ངོ་བོ་སྟོང་སེང་ངེ་བ༔ རང་བཞིན་གསལ་རྗེན་ནེ་བ༔ རྩལ་གཏད་མེད་དུ་ཐ་ལེ་བ༔ གསལ་རིག་སྟོང་གསུམ་ངང་གནས་པ་དེ་ལ་སྐྱོན་མེད་ཀྱི་ཕྱག་རྒྱ་ཆེན་པོ་ཡིན༔ ཞེས་
ཐགསུངས་པ་ལྟར་ཉམས་སུ་ལེན་ནོ༔ དེ་ལྟར་བརྩོན་འགྲུས་དང་ལྡན་པས་བསྒོམས་ན་རབ་གཅིག་ཆར་འབྲིང་ཐོད་རྒལ་ཐ་མ་རིམ་སྐྱེས་སུ་རྟོགས་པ་འཆར་ཏེ༔ བང་མཛོད་ལས༔ སེམས་ཀྱི་རང་བཞིན་གཅིག་མོད་ཀྱང་༔ སེམས་ཀྱི་མཚན་ཉིད་མི་འདྲ་སྟེ༔ དབང་པོ་རབ་འབྲིང་གསུམ་དུ་འབྱུང་༔ ཞེས་གསུངས་སོ༔ དེ་ལ་རབ་ལ་ཡང་རབ་དང་རབ་གཉིས༔ ཡང་རབ་ནི་ནམ་མཁའ་ཀློང་ཡངས་ལས༔ དབང་པོ་རབ་ཀྱི་དོན་དུ་ནི༔ བསྟན་པ་ཙམ་གྱི་རྟོགས་པའི་ཆོས༔ ཐིག་ལེ་ཉག་གཅིག་ཆོས་ཀྱི་སྐུ༔ ཤེས་པ་ཙམ་གྱིས་འཚང་རྒྱ་ངེས༔ ཞེས་གསུངས་སོ༔་རབ་ནི་རྟོགས་པའི་དོན་ལ་གནས་པ་ཙམ་གྱིས་གྲོལ་ཏེ༔ ཡེ་ཤེས་ཀློང་ཡངས་ལས༔ རང་སེམས་རྟོགས་པའི་སྐད་ཅིག་ལ༔ བཏུད་དེ་གཅིག་ཆར་འཇུག་ནུས་ན༔ བསྒོམ་པའི་ཡུན་ལ་རིང་ཐུང་མེད༔ ནམ་འགྲུབ་བསམ་པའི་ཁར་མ་ལུས༔ གསུངས་སོ༔ རླུང་སེམས་གཉིས་མེད་རྒྱ་གཞུང་ལས༔ རབ་གཅིག་ཆར་དུ་སྐྱེ་སྟེ་མཉམ་རྗེས་མེད་པར་ཐམས་ཅད་ཆོས་ཉིད་ཀྱི་ངང་༔ ཞེས་གསུངས་སོ༔ འབྲིང་ནི་ཉམས་སྒྲོན་ལས༔ ཐོད་རྒལ་སྒོམས་ལ་ངེས་མེད་དོ༔
འགའ་ཞིག་གནས་ནས་མཐར་ཕྱིན་ཡོང་༔ ལ་ལ་མི་གཡོ་མཉམ་ཉིད་གནས༔ མཐར་ཕྱིན་ཡོན་ཏན་རྫོགས་པ་ཡོད༔ ལ་ལ་དང་པོ་གནས་མ་ཐོབ༔ ཉམས་དང་དྲོད་རྟགས་མཐོ་དམན་ཚེ༔ གོ་རིམ་ངེས་མེད་མཐར་ཕྱིན་ཡོད༔ ལ་ལ་གོ་རིམ་ཅན་སྐྱེ་ལ༔ སྐབས་སུ་ཐོད་རྒལ་སྐྱེ་བ་ཡོད༔ ཅེས་གསུངས་ཏེ་ཐོད་རྒལ་བ་འདི་བརྩོན་འགྲུས་ཆེ་ན་བོགས་ཆེ་རྟོགས་པ་མཆོག་སྐྱེ༔ བརྩོན་འགྲུས་ཞན་ན་ཆོས་མགོ་ཡང་མི་ཐོན་ཐ་མལ་པར་གྱུར་པ་ཡིན་ནོ༔ ཐ་མ་རིམ་གྱིས་སྐྱེ་བ་ནི༔ དགའ་རབ་རྡོ་རྗེས༔ དང་པོར་གནས་པའི་ཏིང་ངེ་འཛིན༔ གཉིས་པ་ལ་ནི་མི་གཡོ་བ༔ གསུམ་པ་མཉམ་པ་ཉིད་དུ་གྱུར༔ བཞི་པོ་ཡེ་ཤེས་ལྷུན་གྱིས་གྲུབ༔ ཅེས་གསུངས༔ དེ་ལ་དང་པོ་འདི་ལ་ཕྱག་རྒྱ་ཆེན་པོ་རྩེ་གཅིག་ཟེར༔ རྫོགས་ཆེན་ཁྲེགས་ཆོད་པས་གནས་པའི་ཏིང་ངེ་འཛིན་ཟེར༔ གསུང་རབ་སྤྱི་ལས་སེང་གེ་རྣམ་རོལ་འགྱིང་བའི་ཏིང་ངེ་འཛིན་ཟེར༔ དཔེར་ན་སེང་གེ་འགྱིང་བའི་ཚེ་རང་གི་ལུས་ལ་ཚུར་བལྟ་བ་ལྟར༔ རང་གི་སེམས་ལ་རང་གིས་ཚུར་བལྟ་བ་ཡིན་ཏེ༔ གསང་བ་བསམ་གྱིས་མི་ཁྱབ་པ་དང་ཆུ་ཀླུང་ཆེན་པོའི་རྒྱུད་ལས༔ སེང་གེ་རྣམ་པར་འགྱིང་
བའི་ཏིང་ངེ་འཛིན་གྱིས༔ མི་གཡོ་རྩེ་གཅིག་དང་མའི་ཤེས་པ་གསལ༔ ཞེས་གསུངས་པས་སེམས་བདེ་གསལ་མི་རྟོག་པའི་ངོ་བོ་ལ་རྩེ་གཅིག་ཏུ་གནས་པས་རྩེ་གཅིག་ཟེར་རོ༔ འདི་ལ་ཡང་ཅུང་ཟད་བརྟན་པ་རབ་ཏུ་བརྟན་པ་རང་དབང་ཐོབ་པ་རྣམས་ལ་ཆེ་འབྲིང་ཆུང་གསུམ་དུ་འཇོག༔ འདི་སྐབས་ཁམས་གསུམ་གྱི་གོལ་ས་གཅོད་དགོས་ཏེ༔ ཞི་གནས་སྐབས་དང་འདིར་ལྷག་མཐོང་གཉིས་ཆ་འདྲ་ཡང་དོན་མི་འདྲ༔ ཞི་གནས་ཁ་རྐྱང་ལ་བདེ་གསལ་མི་རྟོག་པ་སྐྱེས་ཀྱང་ངོ་བོ་སྟོང་པར་མ་རྟོགས༔ འདིར་ངོ་བོ་སྟོང་པར་རྟོགས་པས་ཞི་ལྷག་ཟུང་འཇུག་ཡིན་ཡང་ད་དུང་བདེ་ཉམས་ལ་ཆགས་ཞེན་དང་གསལ་ཉམས་ལ་མཆོག་འཛིན་གྱིས་འཛིན་པའི་ངེས་ཤེས་དེ་ལ་ཞེན་ན་འདོད་ཁམས་དང་གཟུགས་ཁམས་སུ་གོལ་བ་ཡིན༔ སེམས་ཀྱི་ངོ་བོ་སྟོང་པ་གཟུགས་ཁ་དོག་དངོས་པོ་མེད་པ་ལ་མེད་བཞིན་དུ་མཐོང་མོད་ཀྱི༔ ནམ་མཁའ་ལྟ་བུ་ཡིན་ནོ་སྙམ་པ་དང་༔ སེམས་སམ་རྣམ་ཤེས་ནི་མཐའ་ཡས་ཏེ་དཔག་པར་དཀའོ་སྙམ་པ་དང་༔ སེམས་ནི་ཡོད་པ་མ་ཡིན་ཏེ་དངོས་པོ་མེད༔ མེད་པ་མ་ཡིན་ཅིར་ཡང་འཆར་བས་ཡོད་མེད་གཉིས་ཀ་མ་ཡིན་ནོ་
སྙམ་པ་དང་༔ སེམས་ནི་ཅིའི་ངོ་བོར་ཡང་མ་གྲུབ་པས་མེད་ཅིང་སྟོང་པ་ཡིན་ནོ་སྙམ་པའི་ངེས་ཤེས་ཀྱི་འཛིན་པ་དམ་པོ་ཡོད་ན་གཟུགས་མེད་ཁམས་བཞིར་གོལ་བ་ཡིན༔ འཛིན་པ་དེ་རྣམས་ཀྱང་ཉམས་ཡིན་ཏེ་དང་པོ་སྐྱེ་དགོས༔ དེ་ནས་དེ་ལ་མཆོག་ཏུ་མི་འཛིན་པར་ཞེན་མེད་དུ་སྐྱོང་དགོས་པ་ཡིན༔ ལམ་ཁ་བྲག་གི་མཚམས་སུ་ཕྱིན་དགོས༔ ཕྱིན་ནས་མ་ནོར་དགོས་པ་དང་འདྲ༔ ཤོར་ས་གསུམ་ཡང་འདི་སྐབས་སུ་འོང་སྟེ༔ གསུང་རབ་ཀྱི་དོན་ལ་ཐོས་བསམ་བྱས་པས་ཆོས་ཐམས་ཅད་སྟོང་ཞིང་བདག་མེད་པ་ཡིན་ནོ་སྙམ་པའི་གོ་བ་སྐམ་པོས་ནི་སྒོམ་གོ་མི་ཆོད་དེ་གཤིས་ལ་ཤོར་བ་ཡིན༔ དེ་ཡོན་ཏན་ཅན་ལ་འོང་གཞན་ལ་མི་འོང་༔ སྭ་བྷ་ཝ་དང་ཤུ་ནྱ་ཏའི་སྔགས་བརྗོད་པས་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུར་གྱུར་སོང་བར་བསྒོམ་པ་རྒྱས་འདེབས་སུ་ཤོར་བ་ཡིན་ཏེ་བསྒོམ་གོ་མི་ཆོད༔ དེ་སྔགས་པ་ཁྲིད་ཞུ་མ་མྱོང་བ་ལ་འོང་༔ ཉོན་མོངས་པ་དུག་ལྔ་ནི་འཁོར་བའི་བཙོན་རར་ཁྲིད་པའི་དགྲ་ཡིན་པས༔ དགྲ་དེ་འཇོམས་པའི་ཐབས་ནི་སྟོང་པ་ཉིད་ཡིན་སྙམ་ནས་བསྒོམ་པ་ནི་གཉེན་པོར་ཤོར་བ་ཡིན་ཏེ༔ འདི་ཉན་ཐོས་གཙོ་བོར་བྱེད་པའི་དགེ་བཤེས་ལ་
འོང་༔ འདིར་གསང་སྔགས་ལུགས་དུག་ལྔ་མི་སྤང་བ་དམ་ཚིག་ཏུ་གསུངས་པས༔ དུག་ལྔའི་རང་ངོ་བལྟས་པས་ཡེ་ཤེས་ལྔ་ཡིན་ངོ་ཤེས་མ་ཤེས་ལས་དོན་གཅིག་པས་དགྲར་མི་ལྟའོ༔ དེ་བཞིན་དུ་སེམས་སྟོང་པ་ཉིད་ལ་དགེ་སྡིག་གིས་མི་གོས་སྙམ་པའི་ལས་རྒྱུ་འབྲས་ལ་མི་འཛེམ་པ་ནག་པོ་ཁ་འབྱམས་བདུད་ཀྱི་ལྟ་བ་ཡིན་པས༔ རིག་འཛིན་ནཱ་གརྫུ་ནས༔ སྟོང་པ་ཉིད་ལ་བལྟ་ཉེས་ན༔ ཤེས་རབ་དམན་རྣམས་ཕུང་བར་འགྱུར༔ ཞེས་པ་དེ་ཡིན་པས་འདི་ཕྱག་རྫོགས་སུ་ཁས་ལེན་པ་རྣམས་ལ་འོང་ཉེན་ཆེ་བས་སྤྱོད་པ་ཞིབ་པ་གལ་ཆེ༔ རྣམ་རྟོག་མང་པོ་འཕྲོ་བ་ལ་མི་དགའ་བར་མི་བྱ་སྟེ༔ རྣམ་རྟོག་བཀག་ནས་ཅི་ཡང་མི་དྲན་པ་དེ་བསྒོམ་དུ་འཛིན་པ་ཧྭ་ཤང་ལྟ་བ་ཡིན༔ འདིར་རྣམ་རྟོག་པ་གང་ཤར་ངོ་བོ་ལ་བལྟ་བ་ཡིན་པས༔ གནས་འགྱུ་ལ་འདམ་ཀ་མི་བྱ༔ སྔོན་འགྲོ་ནས་བཟུང་སྟེ་ལན་དུ་མར་སེམས་མ་བཅོས་པར་ཞོག་སྨྲས་མོད༔ བསྡོམ་པོར་བྱས་ན་དེ་བས་བཅོས་ཆེ་ཅི་ཡོད༔ ཀློད་ལ་ཞོག་ཟེར་བ་སེམས་འཕྲོས་ཀྱང་མ་བཀག་ཟེར་བ་ཡིན༔ དེ་ལྟར་བདེ་གསལ་མི་རྟོག་པ་ལ་ཆགས་ཞེན་མེད་ཀྱང་བདེ་གསལ་མི་རྟོག་པ་གསུམ་ཀ་ཚང་
བ༔ སེང་ངེ་ཡེ་རེ་རྗེན་ནེ་གནས་པའི་ངོ་བོ་སྟོང་པར་རྟོགས་པ༔ འཕྲོ་ནའང་ཆུ་དང་རླབས་བཞིན་དུ་རང་སར་ཞི་བ་དེ་ལ་རྩེ་གཅིག་དང་གནས་པའི་ཏིང་ངེ་འཛིན་ཏེ༔ དེའི་རྟགས་དང་ཕན་ཡོན་དང་དེ་ལྟ་བུ་ཞིག་ཤི་ན་གར་སྐྱེ་བ་རྣམས་རིག་འཛིན་དགའ་རབ་རྡོ་རྗེས་གསུངས་པ་ནི༔ འཁོར་བའི་འདུ་འཛི་སྤངས་ནས་ནི༔ དགོན་པར་མཉམ་པར་བཞག་པའི་ཚེ༔ སྐྱོན་གྱི་ཚོགས་རྣམས་མ་བྱུང་བར༔ ཇི་སྲིད་གནས་ལ་གནས་ཞེས་བྱ༔ དཔེར་ན་སྐྱེས་བུ་འཇིགས་བཅས་ཞིག༔ ལམ་ལ་ཤིན་ཏུ་བསྒྲོད་པའི་ཚེ༔ རང་ཡུལ་སྣང་བ་མཐོང་སླེབས་ནས༔ འཇིགས་པའི་རྟོགས་པ་མེད་དང་འདྲ༔ འཁོར་བའི་ཆོས་ལ་སྐྱོ་བ་དང་༔ སེམས་ཅན་རྣམས་ལ་སྙིང་རྗེ་སྐྱེ༔ རང་གི་གནས་ལ་མི་ཆགས་ཤིང་༔ ཐག་རིང་གཞན་དུ་འགྲོ་བར་འདོད༔ རྣལ་འབྱོར་པ་དེ་འགོགས་པའི་ཚེ༔ ངེས་པར་མི་ལུས་ཐོབ་ནས་ནི༔ ཆོས་སྤྱོད་པ་དང་ལྡན་གྱུར་ནས༔ དེ་ཚེ་ཆོས་ཉིད་བདེན་པ་མཐོང་༔ ཞེས་གསུངས་སོ༔ དེའི་སྐབས་སུ་ཆོས་ཐམས་ཅད་སེམས་ཡིན་པའི་གོ་བ་ཙམ་སྐྱེ༔ སེམས་སྟོང་པ་ཡིན་པར་རྟོགས་ཀྱང་༔ བལྟ་བྱ་ལྟ་བྱེད་ཀྱི་འཛིན་པ་ཞིག་ཡོད༔ བྱ་བ་ཐེང་བ་
དང་ཉོན་མོངས་མགོ་ནོན་པ་དང་སྐྱོ་ཤས་ངེས་འབྱུང་དེ་དུས་ཆེ༔ བླ་མ་ལ་དད་པ་སྐྱེ་སེམས་ཅན་ལ་དམིགས་པའི་སྙིང་རྗེ་དང་བྱམས་པ་ཡང་འདི་སྐབས་སུ་བསྒོམ་དགོས་རྒྱུར་འདུག༔ དེ་ནས་རྫོགས་ཆེན་ལུགས་འདི་ལ་མི་གཡོ་བའི་ཏིང་ངེ་འཛིན་ཟེར༔ ཕྱག་ཆེན་པས་སྤྲོས་བྲལ༔ ཆོས་སྤྱི་ལས་དཔའ་བར་འགྲོ་བའི་ཏིང་ངེ་འཛིན་དུ་གསུངས་ཏེ༔ བདེ་གསལ་མི་རྟོག་པའི་ཉམས་ཐམས་ཅད་འཇའ་ཡལ་བ་བཞིན་སོང་༔ འདི་སྒོམ་གྱི་གཏད་སོ་དང་ངེས་ཤེས་ཀྱི་འཛིན་པ་དེ་ཞིག༔ བལྟ་བྱ་དང་ལྟ་བྱེད་གཅིག་ཏུ་འདྲེས༔ འདི་བསྒོམ་དེ་བསྒོམ་མེད༔ འདི་ལྟ་དེ་ལྟ་མེད་པར་སྔར་གྱི་བསྒོམ་དེ་བོར་ཤོར་བ་འདྲ་ཞིག་འོང་༔ འདི་སྐབས་ཐོས་པ་ཆུང་ན་བསྒོམ་བོར་ཤོར་བ་སྙམ་ནས་སྡུག་བསྔལ་བྱེད༔ སྔར་ལྟར་ཨེ་འོང་བརྩོན་འགྲུས་བྱས་ཀྱང་མི་འོང་༔ ཧམ་པ་ཆེ་ན་བསྒོམ་མེད་ཡིན་སྙམ་ནས་སྟོང་སྐད་མང་པོ་འདོན༔ བསྒོམ་རྒྱུ་མེད་རང་བཞིན་ཤེས་པས་ཆོག་ཟེར་ནས་གཞི་ཕྱག་རྒྱ་ཆེན་པོའི་གོ་བ་སྐམ་པོ་ཞིག་ལ་བློ་གཏད་ནས༔ སྤྱོད་པ་གང་མིན་བྱེད་ཅིང་སྡོད་ཉེན་ཡོད༔ ལ་ལས་འདི་ཡིན་མི་འདུག་མེད་སོང་སྙམ་ནས་སྐྱུར་ཉེན་ཆེ༔ བླ་མས་ངོ་སྤྲོད་གལ་
ཆེ་བླ་མ་མེད་ན་གྲུབ་ཆེན་རྣམས་ཀྱི་གསུངས་ལ་བལྟས་པས་ངོ་ཤེས་འཕྲད་པ་ལྟར་འོང་༔ འདི་ངོ་བོ་མཐོང་བ་དང་༔ ཐ་མལ་གྱི་ཤེས་པ་རྗེན་པར་རྟོགས་པ་དང་༔ སྤྲོས་བྲལ་ངོ་མཐོང་ཙམ་ཡིན༔ འདི་བསྒོམ་གཏད་སོ་མེད་ཀྱང་མ་ཡེངས་པའི་དྲན་རྗེས་ཡང་ཡང་གསལ་འདེབས་པ་གལ་ཆེ༔ སྟོང་ཉིད་ཀྱི་ངོ་སྤྲོད་ཐམས་ཅད་འདི་སྐབས་སུ་གོ་འོང་༔ སྨྲ་བསམ་བརྗོད་མེད་ཡང་འདི་ཡིན༔ གང་ཟག་གི་བདག་མེད་ཡང་འདི་ཡིན༔ འདི་སྐབས་མོས་གུས་དང་གསོལ་འདེབས་གལ་ཆེ་ཞིང་༔ རེས་འགའ་དབེན་པ་བསྟེན་ཏེ་རེས་འགའ་རྣམ་གཡེང་དང་བསྲེ་བས་བོགས་འབྱུང་༔ རྣམ་རྟོག་ཉུང་དུ་མ་སོང་ཡང་རྣམ་རྟོག་གིས་བསྒོམ་ལ་མི་གནོད་དེ་ཆུ་དང་ཆུ་རླབས་ལྟར་ཐིམ་པས་རྣམ་རྟོག་སོ་སོར་ངོ་བོ་ལྟ་མི་དགོས༔ འགྱུ་བ་དེ་ལྟར་མང་ཡང་མཚོ་ལ་ཁ་བ་བབས་པ་ལྟར་ཁོ་རང་གི་ངང་དུ་ཐིམ༔ རྣམ་རྟོག་བསྒོམ་དུ་ཤར་བས་བསྐྱེད་རྫོགས་ཟུང་དུ་འཇུག་པ་གོ་བ་སྐམ་པོ་གཅིག་མིན་པ་ཞིག་འཆར་ཏེ༔ ཉམས་ལེན་སྟོང་ཉིད་ཀྱི་རྩི་དང་མ་བྲལ་བར་ནམ་མཁའ་ལ་འཇའ་ཤར་བ་ལྟར་ཡི་དམ་གྱི་ལྷ་དང་བླ་མ་བསྒོམ་པ་ཐུབ་འོང་༔ ནང་འཛིན་པའི་སེམས་སྟོང་པར་རྟོགས་
པས་རྣམ་ཤེས་ཚོགས་བརྒྱད་དེ༔ གཟུགས་མཐོང་མཁན་སྒྲ་ཐོས་དྲི་ཚོར་མཁན་རོ་མྱོང་མཁན་ཐམས་ཅད་ཀྱི་འགྱུ་བ་མ་འགགས་པར་གསལ་ཡང་ངོ་བོ་སྟོང་པར་རྟོགས་དེར་འཛིན་གྱི་མཚན་མ་ཞིག༔ འདི་ལ་ཆུང་འབྲིང་ཆེ་གསུམ་དང་༔ བརྟན་པ་ཐོབ་མ་ཐོབ་རྩལ་རྫོགས་མ་རྫོགས་ཡོན་ཏན་སྐྱེས་མ་སྐྱེས་སོགས༔ དེ་ལ་ཡང་རྣམ་གྲངས་དཔག་ཏུ་མེད་པ་ཡོད་ལ༔ གཅིག་ལ་འཆར་ཀུན་ལ་མི་འཆར་ཞིང་༔ སེམས་ཀྱི་ཁམས་དང་དབང་པོའི་བྱེ་བྲག་མཐའ་ཡས་པས་འཆར་ཚུལ་ཡང་དེ་དང་མཚུངས་པ་ཡིན་པར་སྣང་ཡང་༔ ལ་ཆེན་གྱི་བབ་ནི་གཅིག་པས་ཤེས་པར་བྱའོ༔ དེའི་དོན་གསང་བ་བསམ་གྱིས་མི་ཁྱབ་དང་ཆུ་ཀླུང་ཆེན་པོའི་གསང་རྒྱུད་ལས༔ གཉིས་པ་དཔའ་བར་འགྲོ་བའི་ཏིང་ངེ་འཛིན་གྱིས༔ སྤྲོས་དང་བྲལ་བའི་མཉམ་བཞག་ཆེན་པོ་ལ༔ བསམ་གྱིས་མི་ཁྱབ་ཏིང་འཛིན་རྩལ་དུ་ཤར༔ རྟོགས་པ་ཐོབ་ནས་སྐྱེ་ལ་དབང་བ་ཡིན༔ ཞེས་གསུངས་ཏེ༔ རྒྱུད་ལ་ལ་ནས་འདི་ལ་སྒྱུ་མ་ལྟ་བུར་བཤད་པ་ཡང་སྣང་སྟེ་མིང་གང་བཏགས་ཀྱང་འདྲ༔ དེའི་རྟགས་དང་འབྲས་བུ་ཡང་སློབ་དཔོན་དགའ་རབ་རྡོ་རྗེས༔ རྫོགས་ཆེན་པྲ་ཁྲིད་ཀྱི་རྒྱ་གཞུང་
ཆེན་པོ་ལས༔ ཇི་སྲིད་མཉམ་པར་བཞག་པའི་ཚེ༔ སྐྱོན་གྱི་རྣམ་པ་གང་འགོགས་ནས༔ རང་བྱུང་ཡེ་ཤེས་དྲོད་དང་ལྡན༔ ཉིན་མཚན་འདས་ཀྱི་བར་དུ་གནས༔ མི་རྟོག་ཐིག་ལེའི་ངང་ལ་གནས་པ་ཡིན༔ མི་བསྐྱོད་དྭངས་པའི་རྒྱ་མཚོ་ཆེན་པོ་དང་༔ མི་གཡོ་གསལ་བ་ཏིལ་གྱི་མར་མེ་འདྲ༔ དེ་ནི་ཡེ་ཤེས་བདེ་བ་དྲོད་ཅེས་བྱ༔ དེ་ཚེ་ཟས་དང་གོས་ཀྱི་འདུ་ཤེས་ཆུང་༔ ཉོན་མོངས་ལ་སོགས་ཆགས་སྡང་ཆུང་༔ སྙིང་རྗེ་ཕན་སེམས་རབ་ཏུ་ཆེ༔ རྨི་ལམ་རྟགས་བཟང་རབ་ཏུ་འབྱུང་༔ དེ་ལྟ་བུ་ཡི་རྣལ་འབྱོར་པ༔ འབྱུང་བ་ལྔ་པོ་ཞིག་པའི་ཚེ༔ ལྷ་ཡི་རིག་འཛིན་ཆེན་པོ་ཐོབ༔ ཚེ་འདི་ཉིད་ལ་མངོན་སངས་རྒྱས༔ ཞེས་གསུངས་སོ༔ དེ་ནས་རྫོགས་ཆེན་ལུགས་ལ་མཉམ་པ་ཉིད་ཀྱི་ཏིང་ངེ་འཛིན༔ ཕྱག་ཆེན་པས་རོ་གཅིག༔ ཆོས་སྤྱི་ལ་སྒྱུ་མ་ལྟ་བུའི་ཏིང་ངེ་འཛིན་ཞེས་བྱ་བ་དེ་འཆར་ཏེ༔ ཕྱི་རོལ་གྱི་ས་རྡོ་རི་བྲག་སྐྱེ་འགྲོ་ཡུལ་དང་གྲོང་ཁྱེར་སོགས་གང་མཐོང་བ་ཐམས་ཅད་རྣམ་པ་སོ་སོར་གསལ་ཡང་ངོ་བོ་སྟོང་པར་རོ་གཅིག་ཏུ་འདྲེས༔ སངས་རྒྱས་ཐམས་ཅད་ཀྱི་ཐུགས་རྒྱུད་སེམས་ཅན་ཐམས་ཅད་ཀྱི་སེམས་རྒྱུད༔ རྣལ་འབྱོར་པ་རང་གི་སེམས་གསུམ་དབྱེར་
མེད་རོ་གཅིག་སྟོང་པ་ཉིད་དུ་འདྲེས་ཏེ༔ དེ་ཡང་རེས་འགའ་དེ་ལྟར་སྣང་ངོ་སྙམ་པ་ལ་རེས་མི་འཆར་ན་ཉམས་ཡིན་ལ༔ དྲན་པས་ནམ་ཟིན་ལ་དེ་ལྟར་སྣང་ན་རྟོགས་པ་ཡིན༔ ནམ་མཁས་ཁྱབ་ཚད་ཀྱི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ངོ་བོ་སྟོང་པ་ཉིད་དུ་རོ་གཅིག༔ རང་བཞིན་སོ་སོར་གསལ་སྣང་མ་འགགས་པར་རོ་གཅིག༔ རྩལ་རྟེན་འབྲེལ་གྱི་འཆར་སྒོ་སྣ་ཚོགས་སུ་འཆར་བར་རོ་གཅིག་པ་སྟེ༔ གོ་བ་ཙམ་དང་བློས་བཅོས་ཏེ་བཟོས་པ་མ་ཡིན་པར་ཤུགས་འབྱུང་དུ་རྟོགས་པ་གཅིག་ཡིན་ཏེ༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ གསུམ་པ་སྒྱུ་མ་ལྟ་བུའི་ཏིང་འཛིན་གྱིས༔ དུ་མ་རོ་གཅིག་ས་བཅུའི་རྟོགས་པ་འཆར༔ དུས་གསུམ་རྒྱལ་བའི་སྲས་པོས་གཞན་དོན་མཛད༔ རྩེ་མོར་ཕྱིན་ནས་འཕེལ་བ་རྒྱུན་མི་ཆད༔ ཅེས་དང་༔ དགའ་རབ་རྡོ་རྗེས༔ འཁོར་བ་མྱ་ངན་འདས་པའི་ཆོས༔ ཇི་ལྟ་བུར་ཡང་མི་གཟིགས་ཏེ༔ ཐམས་ཅད་མཉམ་པ་ཉིད་དུ་གསལ༔ ལོ་ཟླར་འདས་ཀྱང་དེ་བཞིན་གནས༔ མཉམ་ཉིད་མི་གཡོ་ཆོས་ཀྱི་སྐུ༔ བཟུང་བས་མི་ཟིན་ཆུ་ཟླ་འདྲ༔ རྟོག་མེད་མཉམ་པ་དེ་ཉིད་ནི༔ ཁྱུང་ཆེན་
ནམ་མཁར་ལྡིང་དང་མཚུངས༔ ཡོ་བྱད་འདུ་ཤེས་ཐམས་ཅད་འགོགས༔ དགེ་དང་མི་དགེའི་རྣམ་རྟོག་མེད༔ ཉོན་མོངས་སྒྲིབ་པ་རྣམ་པར་དག༔ ཉམས་ཀྱི་རྨི་ལྟས་སྣ་ཚོགས་འབྱུང་༔ མཉམ་པ་ཉིད་ཀྱི་ངོ་བོ་ལས༔ ལམ་དང་ས་ཡི་རིག་འཛིན་ཐོབ༔ དེ་ཡང་བགྲོད་དུ་མེད་པ་སྟེ༔ དེ་ཚེ་ཉིད་ལ་མངོན་སངས་རྒྱ༔ ཞེས་གསུངས་སོ༔ དེ་ལ་པཎྜི་ཏའི་དཔྱད་བསྒོམ་དང་ཁྲིད་ལ་ལ་ནས་གཞི་ལྟ་བའི་གནས་ལུགས་ངོ་སྤྲད་ནས་ལམ་བསྒོམ་པའི་རིམ་པ་ཉམས་སུ་ལེན་པ་ཡིན་ཡང་༔ བསྒོམས་པས་ཉམས་སུ་མ་བླངས་ན་ལྟ་བ་གོ་ཡུལ་ཙམ་དུ་ལུས༔ དང་པོ་ནས་བསྒོམས་པས་ལྟ་བ་དངོས་སུ་རྟོགས༔ གཞི་དངོས་པོའི་གནས་ལུགས་དང་ལྟ་བ་དོན་གཅིག༔ གཞིའི་གནས་ལུགས་དེ་མངོན་དུ་གྱུར་པ་འབྲས་བུ་ཡིན་པས༔ སཾ་བྷུ་ཊི་ལས༔ འཁོར་བ་དང་ནི་མྱ་ངན་འདས༔ ཐ་དད་ཡོད་པ་མ་ཡིན་ཏེ༔ འཁོར་བའི་རང་བཞིན་ཤེས་པ་ལ༔ མྱ་ངན་འདས་ཞེས་བརྗོད་པ་ཡིན༔ ཞེས་དང་༔ དུས་འཁོར་བསྡུས་རྒྱུད་ལས༔ སེམས་ཅན་རྣམས་ནི་སངས་རྒྱས་ཉིད་ཡིན་ཏེ༔ སངས་རྒྱས་ཆེན་པོ་གཞན་འདིར་འཇིག་རྟེན་ཁམས་ན་ཡོད་པ་མ་ཡིན༔ ཅེས་དང་
ཀྱེའི་རྡོ་རྗེ་ལས༔ འདི་ཉིད་འཁོར་བ་ཞེས་བྱ་སྟེ༔ འདི་ཉིད་མྱ་ངན་འདས་པ་ཉིད༔ རྨོངས་ཕྱིར་འཁོར་བའི་གཟུགས་ཅན་ཏེ༔ རྨོངས་མེད་འཁོར་བ་དག་པ་སྟེ༔ འཁོར་བ་མྱ་ངན་འདས་པར་འགྱུར༔ ཞེས་དང་༔ གསང་བ་མཛོད་ལས༔ སངས་རྒྱས་སེམས་ཅན་གཉིས་མེད་ལ༔ དེ་དག་གཉིས་སུ་འཛིན་ན་འཁྲུལ༔ ཞེས་དང་༔ རྡོ་རྗེ་འཆང་གི་ཞལ་ནས༔ ཐོག་མ་ཐ་མ་དང་བར་དུ༔ གཞི་ཉིད་ཤེས་པས་འབྲལ་མེད་ཕྱིར༔ ལམ་དང་འབྲས་བུ་ཤུགས་ལ་ཚང་༔ དེ་ཕྱིར་རྒྱུ་འབྲས་རོ་གཅིག་པ། ལམ་དང་གཉེན་པོ་བསྒྲུབ་རྒྱུ་མེད༔ དེ་ཕྱི་བྱ་བྲལ་འཛིན་མེད་ཀློང་༔ ཞེས་དང་༔ བྲམ་ཟེ་ཆེན་པོ་པདྨ་ས་ར་ཧས༔ ཆོས་རྣམས་ཐམས་ཅད་རང་གི་སེམས་ཡིན་ཏེ༔ སེམས་ལས་མ་གཏོགས་ཆོས་གཞན་རྡུལ་ཙམ་མེད༔ གང་གིས་གདོད་ནས་སྐྱེ་མེད་རྟོགས་གྱུར་ནས༔ དུས་གསུམ་རྒྱལ་བའི་དགོངས་པ་དམ་པ་རྙེད༔ ཅེས་སོགས་དང་༔ རྫོགས་པ་ཆེན་པོ་ཀློང་གསལ་ལས༔ མ་གྲུབ་ཐོག་མིན་གང་དག་ནས༔ དངོས་པོ་གཤིས་ཀྱི་འདུག་ཚུལ་ནི༔ ངོ་བོ་སྟོང་པར་རང་བཞིན་གསལ༔ ཐུགས་རྗེ་ཀུན་ལ་སྣང་ནུས་པ༔ བྱས་
པ་མེད་ཅིང་རང་གསལ་བར༔ ཡེ་ཉིད་ནས་ནི་རང་བཞིན་གནས༔ སྟོང་པའི་ངོས་ནས་རྟག་མཐའ་བྲལ༔ གསལ་བའི་ངང་ནས་ཆད་མཐའ་བྲལ༔ གསལ་སྟོང་ངོས་ནས་འཛིན་ཆ་བྲལ༔ ཐོག་མའི་ཀ་དག་གསལ་སྟོང་ཁྱབ༔ སུས་ཀྱང་བྱས་པ་མེད་པ་ཡིན༔ དེ་ནི་ཐོག་མའི་སྤྱི་གཞིའོ༔ ཞེས་དང་༔ རྒྱ་རུ་མེད་པའི་སངས་རྒྱས་དང་༔ འདའ་རུ་མེད་པའི་མྱང་འདས་གཉིས༔ ཡང་དག་སངས་རྒྱས་མངོན་སངས་རྒྱས༔ མངོན་སངས་རྒྱས་པ་དེར་སངས་རྒྱས༔ སྤྲུལ་པ་པོ་རྣམས་ཡང་སངས་རྒྱས༔ རིག་རྩལ་ཡེ་ཤེས་ངང་ལ་འོད་ལྔ་སྟོང་གསལ་ངང་ལ་ཐིམ༔ སྟོང་གསལ་མ་འགགས་རང་རྩལ་རྫོགས༔ ཡོན་ཏན་འབྲས་བུའི་ཐོབ་ཚུལ་ལོ༔ ཞེས་དང་༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ བཞི་པ་རྡོ་རྗེ་ལྟ་བུའི་ཏིང་འཛིན་གྱིས༔ བསྒོམ་དུ་མེད་པའི་མཉམ་བཞག་ཆེན་པོ་ལ༔ མཁྱེན་པའི་ཡེ་ཤེས་སངས་རྒྱས་ཞིང་ཁམས་མཐོང་༔ མ་བཅོས་ལྷུན་གྲུབ་ཆོས་མཆོག་ཆེན་པོའི་ངང་༔ ཞེས་དང་༔ དགའ་རབ་རྡོ་རྗེའི་པྲ་ཁྲིད་ལས༔ རང་གི་ངོ་བོ་ཆོས་ཀྱི་སྐུ༔ དཔེ་མེད་དཔེ་ནི་ནམ་མཁའ་འདྲ༔ རྟགས་ནི་སངས་རྒྱས་ཆོ་འཕྲུལ་
འབྱུང་༔ འབྲས་བུ་སངས་རྒྱས་དེ་ཉིད་དོ༔ ཞེས་གསུང་ཞིང་སྒོམ་མེད་ཅེས་པའི་དོན་དྲན་རྫི་བརྟེན་མི་དགོས་པ་ཡིན༔ རླུང་སེམས་གཉིས་མེད་ལས་གསུངས༔ དེ་ཡང་གཞིའི་གོ་བ་སྐམ་པོ་མ་ཡིན་པར་ཡེངས་མ་ཡེངས་དྲན་མ་དྲན་མེད་པར་ངོ་བོའི་ཀློང་དུ་ཕྲིལ་གྱིས་འགྲོ་བ་ཞིག་ཡོད་པར་གྲུབ་ཆེན་རྣམས་ཀྱིས་གསུངས་པར་གདའ༔ དེ་ཡང་རྟོགས་པ་ཙམ་དང་༔ རྩལ་རྫོགས་པ་ཙམ་དང་༔ མཐར་ཕྱིན་ཁོར་ཡུག་ཏུ་སོང་བ་གསུམ་ལ་ཆུང་འབྲིང་ཆེ་གསུམ་དུ་བཞེད་པར་སྣང་སྟེ༔ སྒོམ་མེད་ཆེན་པོ་དེ་རྟོགས་ན་གསང་སྔགས་ནས་ཚེ་གཅིག་ལ་སངས་རྒྱས་ཟེར་བ་དེ་ཡིན་པར་བཤད་དོ༔ དེ་ཡང་སེམས་ཆོས་སྐུར་སངས་རྒྱས་ནས་ལུས་མི་སྣང་ཡང་ལུས་བྲལ་ཙམ་ནས་ཐུགས་སངས་རྒྱས་ཐམས་ཅད་དང་དབྱེར་མེད་དུ་སངས་རྒྱས་ནས༔ གཟུགས་སྐུ་གང་འདུལ་དུ་སོ་སོར་སྣང་བས་ཕྲིན་ལས་འཁོར་བ་ཇི་སྲིད་དུ་འབད་མེད་ཀྱིས་འགྲོ་དོན་འབྱུང་བར་གསུངས་སོ༔ དེ་ཡང་གཞུང་ལས༔ སྔོན་སྐྱེའུ་པས་གསུངས་པའི་ཆོས་འབྲུ་བདུན་པ་མེ་སྤྲེལ་ས་གའི་ཚེས་ལྔའི་ཉིན་ཨོ་རྒྱན་རིན་པོ་ཆེས་སྤྲུལ་སྐུ་མི་འགྱུར་རྡོ་རྗེ་ལ་དངོས་སུ་གསུངས་པའོ༔ ཞེས་པའི་ཁྲིད་
དངོས་རྫོགས་པས༔ རྒྱུན་དུ་རང་ལུས་ཡི་དམ་ཀུན་འདུས་ཐུགས་རྗེ་ཆེན་པོ༔ སྤྱི་བོར་བླ་མ་ཀུན་འདུས་འོད་དཔག་མེད་བསྒོམ་པ༔ སྒྲིབ་སྦྱང་ཀུན་འདུས་ཡི་གེ་དྲུག་པ་བཟླ་བ་བཏང་ལེན་བྱམས་སྙིང་རྗེ༔ ཞི་ལྷག་ཟུང་འཇུག་གི་ཏིང་ངེ་འཛིན་བསྒོམ་ཞིང་༔ ལུས་འདི་ལྟར་ཐོབ་དཀའ་བ་དོན་ཡོད་པའི་ཕྱིར་དགེ་བ་བསྒྲུབ༔ ནམ་འཆི་ཆ་མེད་བསམས་ནས་སྡིག་པ་སྤྱང་བ་རྣམས་བསྡུས་དོན་ཡིན་པས་ཉམས་སུ་ལོངས་ཤིག༔ ཅེས་པ་ཆོས་བདག་ཏུ་གསུངས་ཕྱིར་རང་གཞན་ལ་ཕན་པའི་ཆེད་དུ་རཱ་ག་ཨ་སྱས་སྦྱར་བ་ལ༔ འགལ་འཁྲུལ་གང་མཆིས་རྩ་བ་གསུམ་ལ་བཤགས་ཤིང་༔ དགེ་བས་སེམས་ཅན་ཐམས་ཅད་ཐུགས་རྗེ་ཆེན་པོའི་གོ་འཕང་ཐོབ་པར་གྱུར་ཅིག༔ མངྒ་ལཾ༔ ཤུ་བྷཾ༔ ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།