ཁྲོ་བོ་རོ་ཟ་སྒྲུབ་པའི་རྒྱུན་ཁྱེར།
ཤམ༔ གུ་རུ་རིན་པོ་ཆེ་ལ་ཕྱག་འཚལ་ལོ༔ ཁྲོ་བོ་རོ་ཟ་བསྒྲུབ་པ་ནི༔ རྒྱུན་ཁྱེར་སྒྲུབ་རྫས་མི་དགོས་ཏེ༔ དམིགས་པ་འདི་ཉིད་འདོན་བསྒོམ་བྱ༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ རང་ཉིད་སྐད་ཅིག་དྲན་རྫོགས་སུ༔ དམ་ཚིག་ཡེ་ཤེས་དབྱེར་མེད་པ༔ ཁྲོ་བོ་རོ་ཟ་སྐུ་མདོག་མཐིང་༔ ཞལ་གཅིག་དང་ནི་ཕྱག་བཞི་པ༔ དང་པོ་གཉིས་ཀྱིས་ཐལ་མོ་སྦྱར༔ སྤྱན་རས་གཟིགས་ཀྱི་པའི་རྟགས་སུ་ཤེས༔ དེ་འོག་གཉིས་ཀྱིས་ཐལ་མོ་རྡེབ༔ བྱད་ལ་སོགས་པ་ཟློག་པའི་ཚུལ༔ ཁྲོ་བོའི་ཆས་རྣམས་ཡོངས་སུ་རྫོགས༔ པད་ཉིར་བྱད་སྟེང་ཞབས་བསྒྲད་དོ༔ བསྐལ་པའི་མེ་དཔུང་ཀློང་ན་བཞུགས༔ ཐུགས་ཀར་ཉི་སྟེང་ཧཱུྃ་གི་མཐར༔ སྔགས་ཕྲེང་གཡས་སུ་འཁོར་བ་ལས༔ འོད་ཟེར་ཕྱོགས་བཅུར་འཕྲོས་པ་ཡིས༔ རྩ་གསུམ་ལྷ་ཚོགས་ཐམས་ཅད་མཆོད༔ ཀུན་ཀྱང་ཁྲོ་བོ་རོ་ཟའི་སྐུ༔ གྱུར་ནས་ཆར་བཞིན་བདག་ལ་ཐིམ༔ དབང་དང་བྱིན་རླབས་དངོས་གྲུབ་ཐོབ༔ བདེ་དྲོད་མེ་ལྟར་འབར་བ་དང་༔ སེམས་ཉིད་
ཆོས་སྐུར་རྗེན་པར་རྟོགས༔ དེ་ལྟར་བསྒོམ་ཞིང་སྔགས་འདི་བཟླས༔ ཨོཾ་ཨཱཿཧཱུྃ་ལོ་ཀ་ཤྭ་ར་ཀྲོ་དྷ་ཧཱུྃ་ཕཊ༔ ཐེ་ཚོམ་མེད་པར་ཉམས་བླངས་ནས༔ སྲུང་དང་ཟློག་པའི་མཆོག་ཡིན་ཅིང་༔ བཀྲ་ཤིས་བདེ་སྐྱིད་ཚེ་རིང་ངོ་༔ ངན་སོང་གསུམ་དུ་འགྲོ་མི་སྲིད༔ འདི་ཕྱིའི་དོན་ཀུན་འགྲུབ་པའོ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཤུ་ཐཾ༔ ཤན༔ ཅེས་གཞུང་སྒྲུབ་ཞལ་གདམས་ཀྱིས་བརྒྱན་ཏེ༔ གཏེར་བློན་རཱ་ག་ཨ་སྱས་མཛད་པའོ༔ མངྒ་ལཾ༔