རོ་ཟ་སྒྲུབ་པའི་སྟ་གོན་རྒྱས་བསྡུས།
ན་མོ་ལོ་ཀི་ཤྭ་ར་ཀྲོ་དྷ་ཡེ། ཐུགས་རྗེ་ཆེན་པོ་ཁྲོ་བོའི་སྐུ། །རོ་ཟ་བསྒྲུབ་པའི་སྟ་གོན་ནི། །རྒྱས་པ་དང་ནི་བསྡུས་པ་གཉིས། །རྒྱས་པ་དཀྱིལ་འཁོར་བཤམས་པའི་སྟེང་། །དབང་ཆོག་ནང་ནས་འབྱུང་བ་ལྟར། །བུམ་པ་གཉིས་དང་གཏོར་མ་གསུམ། །གསོལ་ཀའི་གཏོར་མ་དང་བཅས་བཤམས། །སྨན་རཀ་མཆོད་པ་བསྐོར་བཤམས་དང་། །ཐིག་རྩ་ཚང་བའི་སྐུ་ཡང་བཤམས། ༈ །བསྡུས་པ་དཀྱིལ་འཁོར་སྟེང་ཉིད་དུ། །གསོལ་ཀའི་གཏོར་མ་ཁོ་ན་དང་། །དེ་མདུན་མཆོད་པ་རྣམ་ལྔ་བཤམས། །ཙག་ལི་འམ་སྐུ་གཟུགས་གཏོར་མར་གཟུགས། ༈ །ཆོ་ག་ལ་ཡང་རྒྱས་བསྡུས་གསུམ། །རྒྱས་པ་གནམ་ཆོས་གཞུང་ལྟར་དུ། །གནམ་ཆོས་སྔོན་འགྲོ་འདོན་པའི་རྗེས། །རྩ་གསུམ་སྤྱི་ཡི་ལས་བྱང་གི །ལྷ་བསྐྱེད་སྐབས་སུ་རོ་ཟ་ཡི། །གཏེར་གཞུང་མངོན་རྟོགས་གཙོ་རྐྱང་བཙུད། །སྤྱན་འདྲེན་མཆོད་པ་ཚར་བའི་རྗེས། །གནམ་ཆོས་སྤྱི་ཡི་མཆོད་བསྟོད་སྦྱར། །སླར་ཡང་རོ་ཟའི་བསྐང་གསོལ་དེ། །མདུན་བསྐྱེད་བྱས་ནས་འདོན་པ་མིན། །དེ་ནས་བསྙེན་པ་ཅི་འགྲུབ་བྱ། །དགོང་ཐུན་ཚོགས་དང་ཆད་མདོ་སོགས། །གནམ་ཆོས་གཞུང་ལྟར་བྱ་བ་ཡིན། །གྲོལ་ཁ་རྗེས་ཆོག་བཀྲ་ཤིས་སོགས། །གནམ་ཆོས་གཞུང་གི་བསྒྲིགས་ཆོག་སྦྱར། ༈ །དེ་ནས་འདོན་ལུགས་འབྲིང་པོ་ནི། །བསྐང་གསོལ་སྦྲགས་མ་དེ་ཉིད་ཀྱིས། །བདག་མདུན་དུས་གཅིག་བསྐྱེད་ལ་འདོན། །དེ་ཉིད་ཁོ་ན་ཐུན་བཞི་ཡིས་ཆོག །ཚོགས་དང་གཏོར་འབུལ་མི་དགོས་སོ། །གྲོལ་ཁ་དེ་
ཉིད་དབུལ་དུས་ཀྱིསང་། །གཏོར་མ་གཙང་སར་དབུལ་བའི་ཚེ། །སྡེ་བརྒྱད་རིང་གནས་གཤེགས་པར་བསྒོམ་ལ། ཨཿཡཿམཿདུཿཋཿརུཿཙཿཤཿནཿབཛྲ་མུཿ ཐང་ཀ་སོགས་ལ་རྒྱལ་ཆེན་བཞིའི། །སྐུ་གཟུགས་ཡོད་ལྟན་རྒྱལ་ཆེན་བསྟིམ། །མེད་ན་སྐུ་འདྲ་ལ་སོགས་ཀྱི། །པད་གདན་དེ་ལ་ཐིམ་པར་བསེམ། །རྒྱལ་ཆེན་སྤྱན་དྲངས་ཡིན་གཤེགས་མི་རུང་། །མདུན་བསྐྱེད་གཙོ་བོ་བདག་ལ་ཐིམ། །བདག་ཀྱང་ཐུགས་ཀའི་ཧཱུྃ་ལ་ཐིམ། །ཧཱུྃ་ཡང་གྱེན་རྫོགས་སྟོང་པར་ཡལ། །ངོ་བོ་རྗེན་པའི་སྟེང་དུ་བཞག ༈ །ཤིན་ཏུ་བསྡུས་པ་སྤྲོས་མེད་ནི། །དཀྱིལ་འཁོར་དབུས་སུ་གཏོར་མ་གཅིག །རྩེ་ལ་སྐུ་གཟུགས་ཙཀ་ལི་གཟུགས། །དེ་ཉིད་དམིགས་པའི་རྟེན་ཙམ་སྟེ། །བདག་མདུན་གཉིས་ཀ་གཙོ་རྐྱང་བྷོ། །རོ་ཟའི་མངོན་རྟོགས་ཉུང་ངུ་དེ། །དྲན་རྫོགས་དམ་དབྱེར་མེད་བྷོ། །སྤྱན་འདྲེན་མཆོད་བསྟོད་མི་དགོས་སོ། །རྗེས་ཆོག་སེམས་ངོ་སྐྱོང་བས་འཐུས། །སྒྲུབ་པ་རྒྱུས་འབྲིང་དམིགས་པ་འདྲ། །བདག་མདུན་གཙོ་བོའི་ཐུགས་ཀ་རུ། །ཉི་སྟེང་ཧཱུྃ་ཡིག་ནག་པོའི་མཐར། །སྔགས་ཕྲེང་མཐིང་ནག་གཡས་སུ་འཁོར། །དེ་ལས་འོད་ཟེར་འཕྲོས་པ་ཡིས། །འཛམ་གླིང་ཉི་མ་ལྷོ་ཡི་ཕྱོགས། །པོ་ཊ་ལ་ཡི་རྩེ་མོ་ན། །ཐུགས་རྗེ་ཆེན་པོའི་ཐུགས་ཀར་ཕོག །དེ་ཡི་སྐུ་ལས་སྤྲུལ་པ་ཡི། །ཁྲོ་བོ་རོ་ཟ་དཔག་མེད་པ། །སྐུ་ལས་མེ་ཕུང་རབ་
འབར་ཞིང་། །སྔགས་སྒྲ་འབྲུག་ལྟར་སྒྲོག་ཅིང་བྱོན། །མཚོ་ལ་ཆར་པ་འབབ་པ་བཞིན། །བདག་མདུན་རྣམས་ལ་སིབ་སིབ་ཐིམ། །བདེ་དྲོད་མེ་ལྟར་འབར་བ་དང་། །མཆོག་གི་དངོས་གྲུབ་ཐོབ་པར་བྷེཾ། །སླར་ཡང་ཐུགས་ཀའི་སྔགས་ཕྲེང་ལས། །འོད་ཟེར་སྣ་ཚོགས་ཕྱོགས་བཅུར་འཕྲོས། །ཕྱོགས་བཅུའི་ཞིང་ཀུན་བཞུགས་པ་ཡི། རྒྱུསངས་རྒྱས་བྱང་སེམས་ཡི་དམ་ལྷ། །ཁྲོ་བོ་ཁྲོ་མོ་ཐམས་ཅད་ལ། །འོད་དེས་མཆོད་པར་གྱུར་པས་མཉེས། །དེ་དག་ཀུན་གྱི་བྱིན་རླབས་དང་། །མཐུ་སྟོབས་འོད་དེས་ཚུར་བསྡུས་ནས། །རང་ལ་ཐིམ་པས་དངོས་གྲུབ་ཐོབ། །སླར་ཡང་འོད་ཟེར་འཕྲོས་པ་ཡིས། །སེམས་ཅན་ཀུན་གྱི་སྡིག་སྒྲིབ་རྣམས། །བ་མོར་ཉི་ཟེར་ཕོག་ལྟར་དག །འགྲོ་བ་ཀུན་གྱི་ཚེ་བསོད་བཅུད། །འོད་དེས་ཚུར་བསྡུས་རང་ལ་ཐིམ། །བཀྲག་དང་གཟི་མདངས་ཇེ་ཆེར་འབར། །དེ་ནི་བསྙེན་པའི་དམིགས་པའོ། །རང་གི་ཐུགས་ཀའི་སྔགས་ཕྲེང་ལས། །འོད་ཟེར་ཁ་དོག་ལྔ་ལྡན་པ། །སྟོང་སྐུད་གཤིབ་པ་བཞིན་དུ་འཕྲོས། །བདག་གི་ཞལ་ནས་མདུན་བསྐྱེད་ཀྱི། །ཞལ་ཞུགས་ཐུགས་ཀའི་སྔགས་ཕྲེང་ལ། །ཕོག་པས་ཐུགས་རྗེ་ཐུགས་དམ་
བསྐུལ། །འོད་དེ་མདུན་བསྐྱེད་ལྟེ་བ་ནས། །ཚུར་བྱུང་རང་གི་ལྟེ་བར་ཞུགས། །ཐུགས་ཀར་ཐིམ་པས་དངོས་གྲུབ་ཐོབ། །དེ་ལྟར་རྒྱུན་དུ་འཁོར་བར་དམིགས། །ཕར་ལ་འཕྲོས་པ་མཆོད་པ་དང་། །ཚུར་ཐིམ་དངོས་གྲུབ་གནང་ཚུལ་ཏེ། །དེ་ནས་འོད་ཟེར་སྔགས་ཕྲེང་འགྱུར། །སྔགས་ཕྲེང་ཁ་དོག་མཐིང་ནག་སྟེ། །འོད་ལྔའི་ཟེར་དང་ལྡན་པར་འཁོར། །བདག་མདུན་བར་གྱི་སྔགས་ཕྲེང་ལས། །འོད་ཟེར་སྣ་ཚོགས་ཕྱོགས་བཅུར་འཕྲོས། །བླ་མ་ཡི་དམ་མཁའ་འགྲོ་དང་། །སངས་རྒྱས་བྱང་སེམས་ཐམས་ཅད་མཆོད། །དེ་དག་ཀུན་གྱི་སྐུ་གསུང་ཐུགས། །ཁྲོ་བོའི་སྐུ་དང་སྔགས་ཕྲེང་དང་། །ཧཱུྃ་ཡིག་མཐིང་ནག་དཔག་མེད་པ། །དཔེར་ན་ཆར་དྲག་བབས་པ་བཞིན། །རྒྱུན་ཆད་མེད་པར་བྱོན་པ་དེ། །བདག་མདུན་རྣམས་ལ་སིབ་སིབ་ཐིམ། །དེ་ནི་བསྒྲུབ་པའི་དམིགས་པ་ཡིན། །བདག་ཉིད་ཐུགས་ཀའི་སྔགས་འཁོར་ལས། །མེ་འབར་ལུས་ཀྱི་ནང་ཀུན་གང་། །ནད་གདོན་སྡིག་སྒྲིབ་ཐམས་ཅད་བསྲེག །བདག་མདུན་སྐུ་ལས་ཡེ་ཤེས་མེ། །ཇེ་ཆེ་ཇེ་ཆེར་མཆེད་ཅིང་འབར། །གནོད་ཅིང་འཚེ་བའི་བདུད་དང་བགེགས། །ཐམས་ཅད་ནམ་མཁའི་ཕར་མཐའ་བྲོས། །གང་དག་མི་འགྲོ་གདུག་པ་ཅན། །ལུས་ངག་
སྟོབས་ནུས་གཞོབ་ཏུ་བསྲེགས། །མེ་དཔུང་འཇིག་རྟེན་ཁྱབ་པར་འབར། །སེམས་ཅན་ཀུན་གྱི་སྡིག་སྒྲིབ་བསྲེགས། །དཀར་ཕྱོགས་རྣམས་ནི་གཟི་བརྗིད་བསྐྱེད། །ནག་ཕྱོགས་བདུད་བགེགས་སྟོབས་ནུས་བསྲེགས། །མེ་དཔུང་ཚུར་འདུས་བདག་མདུན་ཐིམ། །དེ་ནི་ལས་སྦྱོར་དམིགས་པའོ། །བཅའ་ཚོགས་རྒྱས་བསྡུས་གསུམ་ཀ་ལ། །དམིགས་པ་དེ་རྣམས་ཐུན་རེ་རེ། །ཡང་ན་ཞག་རེར་རྫོགས་པར་བྱ། །བཅའ་ཚོགས་རྒྱས་འབྲིང་གཉིས་ལ་ནི། །མདུན་བསྐྱེད་འཁོར་མང་བསྒོམ་ཡོད་པས། །བདག་གི་ཐུགས་ཀའི་འོད་ཟེར་ནི། །མདུན་བསྐྱེད་གཙོ་འཁོར་ཀུན་ལ་ཕོག །སྔོན་གྱི་དམ་ཚིག་དྲན་ནས་ཀྱང་། །བོདག་ལ་གུས་འདུད་དང་བཅས་ནས། །རྣལ་འབྱོར་ཁྱོད་ཀྱིས་གང་བཅོལ་བའི། །ཕྲིན་ལས་ངེད་ཅག་རྣམས་ཀྱིས་སྒྲུབས། །ཟེར་ནས་ཁས་བླངས་དམ་བཅས་བྷེ། །དེ་ལྟར་ཞོགས་པ་སྔ་དྲོ་དང་། །ཉིང་དགུང་དགོང་ཁ་ཐུན་བཞིར་བྱ། །མུན་རུབ་ཐུགས་དམ་དགེ་སྦྱོར་རིགས། །ཆག་མེད་གང་དགོས་བྱས་པའི་རྗེས། །རླུང་ཁྲིད་བཞིན་དུ་གཏུམ་མོ་ཡི། །དམིགས་པ་བྷེ་ཞིང་སྔགས་བཟླའོ། །བསྙེན་ཚད་ཞག་པོ་བདུན་ཡིན་ཏེ། །དེ་ཡན་རང་གི་འདོད་དང་བསྟུན། །འདི་ཡི་བསྙེན་པ་མང་སོང་ནས། །གཞུང་གི་ལས་ཚོགས་དེ་ཀུན་འགྲུབ། །སྔོན་གྱི་ལས་ངན་མ་ཡིན་པའི། །ནད་རིགས་གདོན་རིགས་
ཐམས་ཅད་ཕན། །ལུས་ལ་བདེ་དྲོད་མེ་ལྟར་འབར། །ངག་ལ་ནུས་པ་ཐོགས་མེད་འབྱུང་། །སེམས་ལ་བདེ་སྟོང་ཏིང་འཛིན་སྐྱེ། །རྨི་ལམ་དག་སྣང་དཔག་མེད་དང་། །གདོན་བགེགས་ཐུལ་རྟགས་ལ་སོགས་འབྱུང་། །མདོར་ན་ཁྲོ་བོ་འདི་ཉིད་ལ། །བསྙེན་སྒྲུབ་ལེགས་པར་ཐེམས་བྱས་ན། །འདི་ཕྱིའི་དོན་ཆེན་འགྲུབ་པར་ངེས། །དགེ་སློང་ཨོ་རྒྱན་རིག་འཛིན་གྱིས། །བསྐུལ་ཕྱིར་རཱ་ག་ཨ་སྱ་ཡིས། །འཕྲལ་དུ་ངག་ནས་སྨྲས་པ་ལྟར། །དགེ་སློང་སྦྱིན་པས་ཡི་གེར་བཀོད། །འགལ་མཆིས་བཀའ་སྲུང་རྣམས་ལ་བཤགས། །དགེ་བས་འདི་ཉིད་ཆེར་འཕེལ་ནས། །འབྲེལ་ཚད་བདེ་སྟོང་ཟུང་འཇུག་པ། །རྡོ་རྗེ་འཆང་གི་སྐུ་འགྲུབ་ཤོག །མངྒ་ལཾ།། །།